Tibetan
བཞུགས། དེའི་ནུབ་གཟིམ་ལམ་ལ་བུད་མེད་ཡིད་དུ་འོང་བ་དར་དཀར་ཀྱི་ལྭ་བ་གྱོན་པ་རིན་པོ་ཆེའི་རྒྱན་སྣ་ཚོགས་ཀྱིས་སྤྲས་པ་གཉིས་ཡུ་མོ་དང་རྨ་བྱར་བཅིབས་ནས་རྗེའི་དྲུང་དུ་འོང་སྟེ་སྐུ་ཁམས་བདེ་ལགས་སམ་ཞུས་པས། རྗེའི་ཞལ་ནས་ང་བདེ་མོར་གནས། ཁྱེད་གཉིས་སུ་ཡིན་གསུངས་པས། ཁོང་གཉིས་ན་རེ་ངེད་གཉིས་འབྲོང་རིའི་ལྕམ་གཉིས་ཡིན་པས་ཁྱེད་གནས་ནང་ལ་ཨེ་བྱོན་ཟེར། རྗེའི་ཞལ་ནས་ཁྱེད་གཉིས་ཀྱིས་འགྲོ་རོགས་བྱས་ན་འགྲོ་གསུངས། དེ་ནས་རྗེ་དེ་ཉིད་མཁའ་འགྲོ་གཉིས་དང་བཅས་ཏེ་བྱོན་པས་མདུན་ལུང་བར་མ་རེད་ཟེར་ནས་དུང་གི་སྒོ་དང་ཐེམ་སྐས་ཡོད་པ་ཞིག་ཏུ་ཐོན་སོང་བས། གྲོགས་གཉིས་ལ་རྗེའི་ཞལ་ནས་གནས་འདི་གང་རེད་གསུངས། མཁའ་འགྲོས་ན་རེ་གནས་འདི་དགེ་བསྙེན་འབྲོང་རི་སྨུག་པོ་ཡིན་ཟེར། དེ་ནས་ནང་དུ་ ༈ བྱོན་པའི་གཞལ་ཡས་ཁང་སུམ་ཐོག་ཏུ་ཡོད་པས། འོག་ཁྱམས་སུ་སྲས་མཆོག་ནོར་བུ་འོད་འབར་རེད་ཟེར་བའི་གསེར་རྒོག་དང་གསེར་ཁྲབ་གསོལ་ཕྱག་ན་སྦ་ལྕག་དང་ནོར་བུ་འཛིན་པ། འཁོར་དུ་དཔལ་ཐུལ་ལྔ་བཅུ་རྩ་བརྒྱད་ཀྱིས་བསྐོར་བ། འདོད་ཡོན་གྱི་ལྷ་མོ་མང་པོས་རང་རང་གི་ཡིད་དང་མཐུན་པའི་ཟས་སྣ་ཚོགས་ཐོགས་ནས་མགྲོན་ཐབས་ཀྱི་ཚུལ་དུ་ཡོད་པ། དེའི་བར་ཁང་ལ་འབྲོང་རི་སྨུག་པོ་ཡིན་ཟེར་བའི་མི་དམར་སྨུག་ཁྲོ་ཉམས་ལྡན་པ། དར་མཐིང་གི་བེར་གཡང་ལུགས་སུ་གསོལ་ནས་རིན་པོ་ཆེའི་ཁྲིའི་སྟེང་དུ་རོལ་སྟབས་ཀྱིས་ཚུལ་དུ་བཞུགས་པས། འཁོར་དུ་མགོན་པོའི་ལྷ་དམག་རེད་ཟེར་བ་མང་པོས་བསྐོར་ནས་ཡོད་པ་ལ། རྗེའི་ཞལ་ནས་གྲོགས་གཉིས་ལ་ད་སྟེང་ཁང་དུ་འགྲོ་གསུངས་པས། མཁའ་འགྲོས་ན་རེ་སྟེང་ཁང་དུ་མཇལ་རྒྱུ་དུ་མ་ཡོད་པས་ཁྱོད་ཡར་ཕེབས་ཁར་འགྲོ་དང་ཆོག་ཟེར། རྗེ་ན་རེ་མཇལ་བ་ཅི་ཡོད་གསུངས། མཁའ་འགྲོའི་ཞལ་ནས་ཕོ་བྲང་རི་བོ་གྲུ་འཛིན་ཟེར་བ་ཐུགས་རྗེ་ཆེན་པོའི་གནས་རེད། ཕ་གི་མི་སྨུག་གེ་ཞིག་ཡོད་པ་འདི་སྤྱན་གཟིགས་ཀྱི་སྤྲུལ་པ་མགོན་པོ་ཚོགས་བདག་ཟེར་བ། ཕྱི་ལྟར་ན་དགེ་བསྙེན་འབྲོང་རི་བླ་དཔོན་སོགས་བསོད་ནམས་ཅན་གྱི་དགྲ་ལྷ་གཞི་བདག་མཐུ་ བོ་ཅན་དང་། ནང་ལྟར་ན་དཔལ་མགོན་ཚོགས་ཀྱི་བདག་པོ་སངས་རྒྱས་བསྟན་པའི་སྤྱི་བསྲུང་མཐའ་མི་ཧ་རི་ནག་པོ་ལ་སོགས་དམ་ཉམས་བསྟན་དགྲ་རྣམས་ཀྱི་སྲོག་གི་གཤེད་པོ་ཆེ་དམ་ལྡན་གྱི་མི་རྣམས་ཀྱི་སྐྱབས་ན་ལྷ་དང་། གསོལ་ན་སྡོང་གྲོགས་བྱེད་པ་དང་། རྦད་ན་སྟོང་གསུམ་གཡོ་ནུས་པའི་སྟོབས་ཤུགས་ལྡན་ཞིང་མཐུ་རྩལ་ཆེ་ཟེར། རྗེའི་ཞལ་ནས་སྒོ་ཁང་གི་བདག་པོ་སྲས་མཆོག ནོར་བུ་འོད་འབར་ཟེར་བ་དེ་ཅི་རེདགསུངས་པས། མཁའ་འགྲོས་ན་རེ་དེ་ཐུགས་ཆེན་གྱི་སྲས་ནོར་བུ་འཛིནགྱི་སྤྲུལ་པ་ནོར་བུ་འོད་འབར་རྩལ་རེད་ཟེར། ཡང་མཁའ་འགྲོ་གཅིག་གིས་ན་རེ་ཝ་ཤུ་དཔོན་གྱི་ཕ་རེད་ཟེར། གཅིག་ན་རེ་ནུ་བོ་རེད་ཟེར་ནས་ཁ་མ་འཆམས་པའི་ཚུལ་བྱེད། རྗེའི་ཞལ་ནས་འབྲོང་རི་སྤྱན་རས་གཟིགས་ཀྱི་སྤྲུལ་པ་ཡིན་ན། ཁྱེད་གཉིས་དེའི་ལྕམ་ཡིན་ཟེར་བ་ཁྱོད་གཉིས་ཀྱི་སྤྲུལ་པ་དང་སྤྲུལ་གཞི་ཅི་རེད་གསུངས། མཁའ་འགྲོས་ན་རེ་ཁྱོད་ཀྱིས་ངེདགཉིས་ཀྱི་སྤྲུལ་གཞི་ལ་གཟིགས་བསམས་ན་འདི་ལྟར་རེད་ཟེར་ཞིང་། ཏཱཾཿཡིག་དཀར་ལྗང་དུ་གྱུར་ནས་རྗེ་དེ་ཉིད་ཀྱི་ཐུགས་ཁར་ཐིམ་སོང་སྣང་ཤར་བ་དང་མཉམ་དུ་མནལ་ལས་སད་དོ། །དེ་ནས་ནང་སྔ་མོ་སྐྱོ་ཚ་གསོལ་ནས་ལམ་ལ་བཞུད་སྐབས་ནམ་མཁའི་མཐོངས་ན་སྤྲིན་གྱི་གསེབ་ནས་ལྷའི་བུ་མོ་འདྲ་བ་ ༈ ཞིག་གིས་སྐད་སྙན་པའི་ངག་གིས་འདི་སྐད་སྨྲས། ཧེ་ཧེཿ སྔོན་ནམ་སྙིང་དང་བི་མའི་སྨོན་ལམ་མཐུས། །དུས་ད་རེས་ཟབ་མོ་གཏེར་ལ་དབང་། །རང་སྐལ་གྱི་ནོར་བུ་འོད་འབར་དེ། །སྟོད་གཡུ་འབྲུག་རྒྱལ་པོའི་ནོར་བུ་རྙེད། །ལས་འབད་རྩོལ་མི་དགོས་སྨོན་ལམ་མཐུས། །ནོར་བུ་དེ་རྒྱ་མཚོའི་དཔལ་དུ་ཤར། །གནས་མི་རིང་རང་གནས་ཉེ་བའི་སར། །མཚོ་རྒྱལ་གྱི་གར་བསྒྱུར་པཱ་ཤཾ་མིང་། །བཞིན་མཛེས་ལྡན་སྣ་སྨེ་གཡོན་ན་ཡོད། །དེ་ཉེ་རྒྱུའི་གྲོགས་ཀྱི་དཔལ་ལྡན་ན། །གཏེར་གཉིས་ཀྱི་སྒོ་འཕར་ལོངས་སྤྱོད་ལྡན། །རེ་ཞིག་གི་ཚེ་འཕྲེང་སེལ་བར་ངེས། །དུས་རིང་མོ་འགྲོགས་པའི་སྟབས་ལེགས་ན། །སྔོན་རྟེན་འབྲེལ་སྐྱོ།ཚ། །གནད་དེ་ལ་སྟབས་ཀགཟབ་གལ་ཆེ། །དེ་དེ་དང་དེ་སོགས་རིག་པས་དཔྱོད། དུས་དུས་སུ་ང་ཡིས་ལེགས་ཉེས་སྨྲ། །ཅེས་ཟེར་མི་སྣང་བར་སྤྲིན་གྱི་རྣམ་པར་ཡལ། དེ་ནས་དམ་ཅན་གྱི་གནས་ཡོད་སར་ཕེབས་ནས་སྐོར་བ་ཞིག་མཛད་ཚེ། ལམ་ཁ་ནས་བན་རྒན་སྨ་ར་ཐམས་ཅད་དཀར་པོ་སོང་བ་ཞིག་འདུག་ཡོད་པས། རྗེའི་ཞལ་ནས་ཁྱོད་ཀྱིས་སྐོར་བ་བྱེད་པ་ཨེ་ཡིན་གསུངས་པས། ཁོ་ན་རེ་ང་གྲངས་བདུན་བརྒྱ་དང་ཉི་ཤུ་ཐམ་པར་རང་སེམས་ལ་སྐོར་བར་བྱེད་ པ་ཡིན། ད་རི་སྒོག་སྐམ་པོ་ལ་སྐོར་བ་བྱེད་པས་ཅི་ཕན་ཟེར། ཡང་རྗེའི་ཞལ་ནས་ན་རེ་འདི་དམ་ཅན་གྱི་གནས་ཁྱད་པར་ཅན་ཞིག་ཡིན་པ་ཀུན་གྱིས་ཟེར་བས། ཁྱོད་ཀྱང་རང་སེམས་སྟོང་པ་ལ་སྐོར་ཚོད་མེད་པས་གནས་འདི་ལ་སྐོར་བཟང་གསུངས། ཁོ་ན་རེ་ཁྱོད་ཅོལ་ཆུང་གི་བྱིས་པ་རེད། རི་འབར་འབུར་དང་ས་རྩི་ཤིང་ཅན་གྱི་འབྲས་བུ་ཐོབ་པ་ག་ལ་ཡོད། དེའི་འབྲས་བུ་ཐོབ་ན་སྲིད་པའི་མི་རྒན་མགོ་འཁོར་དེ་ཀ་མཐའ་མེད་འཁོར་བར་ཅི་ཕྱིར་འཁྱམས་ཟེར། ཡང་རྗེའི་ཞལ་ནས་སྲིད་པའི་མི་རྒན་མགོ་འཁོར་རེད་ཟེར་བ་དེ་སུ་རེད་གསུངས་ཚེ། ཁོ་ན་རེ་སྲིད་པའི་མི་རྒན་ཟེར་བ་ཡར་སངས་རྒྱས་ཀྱི་ས་མ་མཐོང་ཞིང་། མར་ངན་སོང་འཁོར་བའི་གནས་སུ་གཞི་བཟུང་གི་ཆུང་མ་ལྟ་བུ་ཡུལ་དྲུག་གི་གྲོང་ཁྱེར་དུ་ཉིན་མཚན་བར་མེད་འཁྱམས་མཁན་དེ་ལ་ཟེར། ཁྱོད་ཀྱང་རི་འབུར་ས་འབུར་ལ་བསྐོར་བ་བྱེད་པས་ཅི་ཕན། རྐང་པ་ལ་སྡུག་གཏད་པ་རེད། དེ་བས་སེམས་ཉིད་སྟོང་པའི་གསལ་ཆ་ལ་འགགས་པ་མེད་པའི་རྩ་ཁམས་ཡི་གེའི་འཁོར་ལོ་འདི་ལ་བསྐོར་བ་བྱེད་ནས་ཆོས་མཛད་ཀྱི་འགྲོ་དོན་རེ་བསྒྲུབ་ན་བཟང་གི་ཟེར་ནས་མི་སྣང་བར་གྱུར། དེ་ནས་རྗེ་དེ་ཉིད་བླ་མ་རོང་དུ་བྱོན་ཚེ་ཞག་ཆ་ཤས་བཞུགས་སྐབས། ཡང་སྔར་འབྲོང་མདུན་ནས་འོང་བའི་མི་རྟ་ ༈ དམར་པོ་དེ་འོང་ནས་ཁྱེད་མ་འགོར་བར་མྱུར་དུ་སེ་རའི་རི་ཁྲོད་དུ་བྱོན་དགོས། སྔར་བླ་མ་འཇམ་དབྱངས་ཀྱིས་ང་ལ་ཤོག་དྲིལ་ཞིག་གཏད་ཡོད་པས། དེ་དུས་ལ་བབ་པ་ཡིན་པས་ཁྱོད་བྱོན་ན་ངས་ཁྱོད་ལ་འབུལ་དགོས་ཟེར་ནས་ཐལ། དེ་ནས་མི་འདི་ཅི་ཡིན་རྗེའི་དགོངས་ནས་ཡོད་པ་ལ། ཡང་བུད་མེད་ཞིག་ཐོན་བྱུང་བས་དེ་ལ་རྗེའི་ཞལ་ནས་ཐམ་མི་དམར་རྟ་དམར་ཞིག་འོང་བ་དེ་སུ་རེད་གསུངས་ཚེ། མོ་ན་རེ་ཁྱོད་ཀྱིས་ངོ་མ་ཤེས་སམ། རྗེས་འབྲོང་མདུན་ནས་ལན་མ་གཉིས་རིག་དེ་མིན་ཆ་རྒྱུས་མེད་གསུངས། མོ་ན་རེ་ཁྱོད་རི་ཁྲོད་བླ་མ་ཡིན་སྐབས་ཁོ་བཀའ་སྲུང་གི་གཙོ་བོ་ཡིན་རབས་ཡོད། དམ་ཅན་སྐྱེས་བུ་སྲིད་པ་གསལ་བྱེད་རེད་ཟེར། ཡང་རྗེའི་ཞལ་ནས་ཁྱོད་སུ་ཡིན་གསུངས་པས། མོ་ན་རེ་གནས་འདིའི་སྲུང་མ་འཛི་ཆེན་ནོར་སྐྱོང་མ་ཡིན་ཟེར་ནས་བཤུད་པ་གཅིག་བྱས་ནས་མི་སྣང་བར་གྱུར། དེ་ནས་རྗེ་དེ་ཉིད་ཡར་སེར་དགོན་དུ་བྱོན་ནས་རི་ཁྲོད་བླ་མའི་སྒྲུབ་ཁང་དུ་བྱོན་ཏེ་མཚམས་བཅད་རྒྱ་མཛད་ཅིང་བདུན་ཕྲག་གསུམ་ཙམ་དུ་བཞུགས་ཚེ། ཉིན་གཅིག་མནལ་ལམ་ལ་མཁའ་འགྲོ་རྡོ་རྗེ་གཡུ་སྒྲོན་མ་ཡིན་སྐད་པའི་གཡས་དར་སྣས་བརྒྱན་པའི་མདའ་དང་གཡོན་ན་རིན་ཆེན་གྱིས་བཀང་བའི་གསེར་གྱི་གཞོང་པ་འཛིན་ པ་དར་དཀར་གྱི་ལྭ་བ་མནབ་ཅིང་རིན་པོ་ཆེའི་རྒྱན་དུ་མས་སྤྲས་པ་ཞིག་གིས་འདི་སྐད་ཟེར། ཡེ་ཡེཿ གངས་ཅན་ཤོལ་གྱི་ཕོ་བྲང་ནས། །འོང་བའི་ཚེ་སྔོན་ཁྱོད་ཀྱི་གྲོགས། །སྐྱེ་བ་མེད་ལས་རང་བྱུང་ནང་། །འགགས་མེད་རང་གསལ་བརྡ་ངོ་སྤྲོད། །ཁྱོད་མ་ཡེངས་སྒྲ་འཛིན་དབང་པོ་གསོན། །རང་གནས་ཀྱི་རང་བྱུང་གནས་ཁང་དུ། །ཐབས་རྟེན་འབྲེལ་འཛོམས་པའི་རི་མོ་བཀྲ། །དུས་གཡུ་འབྲུག་མཇུག་མ་ངོམ་པའི་ཚེ། །བློ་རིག་པས་སྨོན་ལམ་སྟབས་ལྡན་ན། །དབྱིངས་མཁའ་འགྲོའི་འཕྲུལ་གྱི་ཡི་གེ་འདི། །ཁྱོད་ལས་འཕྲོ་སྨོན་ལམ་དུས་ལ་བབས། ཁོ་རྡོ་རྗེ་ལེགས་པར་ཕྲིན་བཅོལ་ན། །ལས་མི་འགྱངས་མྱུར་དུ་གསལ་བར་ངེས། །ཞེས་ཟེར་ནས་མདའ་མོ་སྒྲོ་ལྡན་འདི་ཁྱོད་ལ་གཏད་ཟེར་ནས་མི་སྣང་བར་ཡལ། ནང་སྔ་མོ་སྐྱོ་ཚ་གསོལ་སྐབས་རྗེའི་ཐུགས་དགོངས་ལ་མདང་གི་རྨི་ལམ་དེ་ལུང་བསྟན་ཞིག་ཡིན་པར་འདུག་ཀྱང་དོན་གོ་དཀའ་མོ་རེད་དགོངས། དེ་ནས་ཉེར་ལྔ་མཁའ་འགྲོའི་དུས་ཆེན་གྱི་ཉིན་རྗེའི་ཐུགས་རྒྱ་གློ་བུར་དུ་སད་ནས་གནས་ཁང་གི་གྱང་ངོ་ལ་གནམ་ཆོས་དབང་ལྡན་ཞིག་ལྡན་ཡོད་པ་དེ་གཟིགས་ནས་ཉི་ཤར་འབྲུག་ཡོལ་འགྲོ་སྐབས་རྡོ་མདུང་ཞིག་གིས་གྱང་ལོགས་བརྐོས་པའི་ནང་ན་བུམ་གཏེར་ཞིག་བཞག་ ༈ ཡོད་པ་དེའི་ཁ་ཁེབས་བླངས་ནས་གཟིགས་ཚེ། མཐིང་ཤོག་གི་ངོས་ལ་གསེར་གྱིས་བྲིས་པའི་ཤོག་དྲིལ་གཅིག་འདུག་པ་དེ་གཏན་ལ་བབ་ཚེ། ཁ་བྱང་དང་བསྟན་པ་སྤྱིའི་ལུང་བསྟན་དུ་མ་ཡོད་ཀྱང་ཕྱི་ནང་ཀུན་ལ་གསང་རྒྱ་དམ་པོ་མཛད། དེ་ནས་ཉིན་གཅིག་སྐྱོ་སངས་ལ་བྱོན་སྐབས་ཐུགས་དགོངས་ལ་འདུལ་བ་འཛིན་པའི་སྐྱེས་བུ་ཞིག་ཡིན་ན་དགའ་དགོངས་ནས་ཞག་ཆ་ཤས་ཙམ་སོང་ཚེ། དེ་ཚའི་རི་ཁྲོད་དུ་བླ་མ་རིན་པོ་ཆེ་ལུང་ཟིན་གྱི་བུ་སློབ་དམ་པ་རྗེ་ཉིད་ཀྱི་དངོས་སློབ་བསོ་སྤྲུལ་རིན་པོ་ཆེའི་རབ་བྱུང་གི་མཁན་པོ་འདུལ་བ་འཛིན་པ་ཆེན་པོ་དེ་ཚེ་བླ་མ་ཆོས་རྒྱལ་ཞེས་པའི་དྲུང་དུ་བྱོན་ནས་དགེ་ཚུལ་བསྒྲུབ་དགོས་དགོངས་ཚེ། དེ་ནུབ་གཟིམ་ལམ་ལ་བུད་མེད་གཟུགས་མི་སྡུག་པ་ཞིག་གིས་དུས་ཀྱི་ཁུག་པོའི་སྤྱོད་པ་འདི་ཐབས་སྡུག་ཟེར་ཞིང་བྲང་བརྡུང་སྟེ་དྲག་ཏུ་ངུས་ཀྱིན་འདུག་པས། རྗེའི་ཞལ་ནས་ཁྱོད་འདི་ཙམ་གྱིས་སྡུག་བསྔལ་ཅི་ལ་བྱེད་གསུངས་པས། མོ་ན་རེ་ང་ངུ་བ་ལ་ཁག་ཅིག་ཡོད་དེང་སང་གི་མིའི་སྤྱོད་པ་འདི་ལ་ལྟོས་དང་། རྒན་མོ་ང་ཡིས་མི་ཚད་གནས་དང་ཡུལ་གྱི་མཁའ་འགྲོ་རྣམས་ཀྱང་ཐུགས་ཁྲེལ་བར་འདུག་ཟེར། ཡང་རྗེའི་ཞལ་ནས་གནས་ཡུལ་གྱི་མཁའ་འགྲོ་མ་རྣམས་འཁྲུག་དོན་ཅི་རེད་གསུངས། མོ་ན་རེ་ བཤད་ན་བཤད་ཚོད་མེད་པ་འདྲ་ཡང་། ད་ཁྱོད་ལ་ཟུར་ཙམ་སྨྲས་ན་རང་མཚངས་ལ་གོ་འགྲོ་ཟེར། རྗེའི་ཞལ་ནས་སྨྲོས་དང་རང་མཚངས་ལ་ཅི་ལ་ཕོག་གསུངས། མོ་ན་རེ་མཚང་ལ་མ་ཕོག་ན་བཟང་གི་ཏ། དུས་ངན་སྙིགས་མའི་རང་རྟགས་ལ་ལྟོས་དང་། སྔགས་པས་དམ་ཚིག་མི་བསྲུང་བར་མགོ་རག་བྱེད། དགེ་སློང་གིས་གསུམ་ལྡན་ཡིན་ཟེར་ཞིང་སྔགས་སུ་ཞུགས། ཟབ་མོ་གཏེར་ལ་དབང་ཡང་མི་ངན་པའི་རྐྱེན་གྱིས་ངོ་ཕོ་ཆུང་བས་བཏང་སྙོམས་སུ་ཤོར་བ་དེ་སོ་ཁྱོད་གཏེར་སྟོན་ཚོའི་མཚངས་རེད་ཟེར་ཞིང་། རྗེའི་ཞལ་ནས་གཏེར་སྟོན་རྣམས་འདུལ་བའི་བསླབ་པ་ལ་ཞུགས་ཀྱང་གཏེར་ལ་ཅི་གནོད། སྔོན་གུ་རུ་པདྨས་ཀྱང་ཀུན་དགའ་བོའི་མདུན་ནས་རབ་ཏུ་བྱུང་སྟེ། ཤཱཀྱ་སེང་གེའི་མཚན་གསོལ་ནས་དབུ་རག་ཞབས་རྗེན་མཛད་པ་ཡིན་ཀྱང་། མཐར་བོད་ཁམས་ཐམས་ཅད་གཏེར་གྱིས་འདྲེན་པ་ཡིན་གསུངས། མོ་ན་རེ་ངས་གུ་རུ་པདྨའི་ཆ་རྒྱུས་ངེས་ཤེས། ཁྱོད་ཀྱིས་མི་ཤེས། གུ་རུ་སྔར་འོག་མིན་ན་བཞུགས་དུས་ང་ལས་བྱེད་ཡིན། ལྷོ་ནུབ་འོ་མ་ཅན་ལ་རྒྱལ་བ་རྣམས་ཀྱི་དགོངས་པ་གཅིག་ཏུ་དྲིལ་ནས་རང་བྱུང་སྤྲུལ་པའི་སྐུ་རུ་བྱོན། སྤང་ཐོབ་ཀྱི་ཡོན་ཏན་ཐམས་ཅད་ས་ལམ་གྱི་རིམ་པར་མི་ལྟོས་པར་མཁྱེན་གཟིགས་ཡེ་ཤེས་ཡོན་ཏན་ ༈ ཐམས་ཅད་ལ་མངའ་བརྙེས་པའི་རྟགས་སུ། ཨོ་རྒྱན་རྒྱལ་བའི་རྒྱལ་སྲིད་གཟུང་ནས་རིགས་ལྡན་འོད་འཆང་ལྷ་མོ་ཁབ་ཏུ་བཞེས་ནས། གནས་དང་ཡུལ་གྱི་དཔའ་བོ་དང་དཔའ་མོ་ཐམས་ཅད་དབང་དུ་བསྡུས་ནས་སྲིད་གསུམ་ཟིལ་གྱིས་གནོན་པར་མཛད། དེ་ནས་བརྟུལ་ཞུགས་ཀྱི་སྤྱོད་པའི་རྣལ་འབྱོར་ལ་ཞུགས་ནས་དུར་ཁྲོད་བསིལ་བའི་ཚལ་ལ་སོགས་པ་དུར་ཁྲོད་བརྒྱད་དུ་བརྟུལ་ཞུགས་ཀྱི་སྤྱོད་པས་ལྷ་འདྲེ་མི་གསུམ་ཀླུ་གཉནས་བདག་སྡེ་བརྒྱད་འབྱུང་པོ་ལ་སོགས་པ་གཟུགས་མེད་ཐམས་ཅད་དབང་དུ་བསྡུས་ནས་མངའ་འོག་ཏུ་ཆོས་ལ་བཀོད་པ་བདེན། དགེ་སྦྱོང་མགོ་རག་བྱས་ནས་བརྟུལ་ཞུགས་འོང་བངས་མི་ཤེས་ཟེར་ནས་མི་སྣང་བ་སོང་ངོ་། །དེ་ནས་ནང་སྔ་མོ་སྐྱོ་ཚ་གསོལ་ཚེ་རྗེ་དེ་ཉིད་ཀྱི་སྐུ་ཁམས་མི་བདེ་བར་ཟུག་རྔུ་ཆེན་པོ་ཞིག་བྱུང་འདུག་པས། རྗེའི་ཐུགས་ལ་ཆམ་པ་ཞིག་བཞེས་འདུག་དགོངས་ཀྱང་། གསང་རྒྱ་མཛད་ནས་ཞག་ཆ་ཤས་ཙམ་སོང་རྗེས། རྗེ་དེ་ཉིད་བསྙུངས་ལས་གྲོལ་སྐབས་ཡུལ་ཕྱོགས་དེའི་ཉེ་ཆར་དུ་སྐེ་ཡམས་ཀྱི་ནད་བྱུང་ནས་འགྲོ་བ་མང་པོ་ན་བ་དང་། ཁྱད་པར་རྗེ་ཉིད་ཀྱི་ལྕམ་སྲིང་མ་འབྲིང་པོ་དཔལ་མཚོ་ཞེས་པའི་བཟའ་མི་གཉིས་ཡོད་པ་དེ་ནད་ཀྱིས་མནར་ནས་འཆི་ལ་ཐུག་པར་ཡོད་པས། དེའི་ཡུལ་མི་གཉིས་བྱུང་ནས་རྗེ་དེ་ཉིད་འབོད་པ་ལ་འོང་སྟེ་དཔོན་གཡོག་བཅས་དེ་ཀར་ཕེབས་ཚེ། ལྕམ་སྲིང་མོ་དང་ཁྱོ་ཕོ་གཉིས་ཀ་འཆི་ཁ་ལ་ཐུག་ཡོད་པས། རྗེས་དམ་རྫས་དང་བླ་མ་རིན་པོ་ཆེའི་ཚག་སྦྱར་སྦྱིན་ནས་ལུས་སྦྱིན་དང་བཀའ་བསྒོ་མཛད་པས། ཁྱོ་ཕོ་འཆི་བ་ལས་མགྲོལ་ཏེ་ཤི་སོང་། ལྕམ་སྲིང་མ་ནད་ལས་གྲོལ་ཏེ།འཇིག་རྟེན་གྱི་ཞལ་ཏ་མཛད་ནས། རྗེ་དེ་ཉིད་ཕྱིར་བྱོན་ནས་མཁའ་འགྲོ་འཁྲུག་བསྐང་དང་གསོལ་ཁ་སོགས་མཛད་ནས། ཡུལ་དེའི་ནད་ཐམས་ཅད་ཞི་ལ་སོང་ངོ་། །དེ་ནས་རྗེ་དེ་ཉིད་ཀྱིས་ཁ་བྱང་ལྟར་དགུང་ལོ་བཅོ་བརྒྱད་ལོར་གསེར་སྨད་རྔ་མ་སྟག་རྩེ་ནས་གསང་གཏེར་སྐོར་གསུམ་གྱི་གཏེར་སྒྲོམ་རིན་པོ་ཆེ་སྨུག་པོ་ལས་བྱས་པ་དབྱིབས་གླང་ཆེན་ལྟ་བུར་ཡོད་པ་དང་། གནམ་ལྕགས་ཀྱི་ཕུར་བུ་དང་། ཐུགས་རྟགས་རྡོ་རྗེ་རྩེ་ལྔ་བཅས་གསང་གཏེར་དུ་བཞེས། དེ་ནས་རྗེ་དེ་ཉིད་གྲོགས་གཅིག་དང་བཅས་དབུས་ཕྱོགས་ལ་བྱོན་པར་དགོངས་ཚེ། ཡབ་རྗེ་བླ་མས་མཁྱེན་ཏེ་རོང་ཚོགས་པ་ལ་གསུངས་ཤོག་གནད་མོ་ཞིག་བསྐུར་འདུག་པས། རྗེ་དེ་ཉིད་ཡབ་ཡུལ་ལ་བྱོན་གྲབ་བྱས། དེ་ནས་ཡོན་བདག་འགའ་ལ་བསྲུང་སྐྱོབ་མཛད་ཚེ། འབུལ་སྡུད་རིན་ཐང་ཆེ་བ་སྣ་ཚོགས་ཕུལ། དེ་ནས་ཡབ་ཡུལ་ལ་བྱོན་པའི་ལམ་ ཁར་རྣལ་འབྱོར་པ་དམར་སྨུག་སྐྲ་དང་སྨ་ར་ཐམས་ཅད་དཀར་སང་དུ་ཡོད་པ། ཕྱག་གཡས་པ་ས་གནོན་དང་ཨོ་རྒྱན་བྷན་ཐོད་བདུད་རྩིས་བཀང་བ་བསྣམས་པ། སྐུ་སྨད་ལ་སྟག་ལྤགས་ཀྱི་ཤམ་ཐབས་དཀྲིས་པ། རི་དྭགས་ཨེ་ན་ཡའི་གདན་ལ་བཞུགས་པ་ཞིག་འདུག་པས། རྗེའི་ཐུགས་དགོངས་ལ་ཡབ་རྗེ་བླ་མ་རིན་པོ་ཆེའི་སྤྲུལ་པ་ཨེ་ཡིན་དགོངས་ནས་མྱུར་བར་མདུན་སར་ཕེབས་ནས་གཟིགས་ཚེ་བླ་མ་རིན་པོ་ཆེ་མིན་པར་དགོངས། དེ་ནས་རྗེས་ཕྱག་ཕུལ་ནས་གསོལ་བ། རྣལ་འབྱོར་པ་ཁྱོད་སུ་ཡིན་གང་དུ་བྱོན་གསུངས་པས། རྣལ་འབྱོར་པའི་ཞལ་ནས་ང་འགྲོ་བའི་དོན་དུ་འོང་བ་ཡིན། ཁྱེད་སར་ཁྱོད་ལ་ངེས་གདམས་པའི་མན་ངག་རེ་བསྟན་དུ་འོང་བ་ཡིན་པ་སྟེ། ཐང་སྟོང་སྒྲུབ་ཐབས་དང་ཞལ་ལུང་ལེའུ་ལྔ་བཅུ་པ་བཅས་གཅེས་ནོར་དུ་གནང་ནས་གནས་སྐབས་དུས་ཀྱི་འཕོ་འགྱུར་དང་རྟེན་འབྲེལ་སེལ་ཐབས་ལ་འདི་ལྟར་གསུངས། ངང་གནས་མངོན་གྱུར་ཆོས་ཀུན་དེ་བཞིན་ཉིད། །རིག་དབྱིངས་ཟུང་འཇུག་འོད་གསལ་ཆེན་པོའི་ཁམས། །ཡེ་ཤེས་རླུང་ལྔའི་ལྷུན་གྲུབ་འཕྲུལ་དུ་ཤར། །ཀུན་འབྱུང་འཁོར་ལོ་མ་རིག་གློ་བུར་གྱིས། །ཉེར་བཏབ་སྲིད་པའི་ཁམས་གསུམ་རོལ་པར་ཤར། ཕྱི་ནང་གཟུང་འཛིན་3 ཡུལ་དང་ཡུལ་ཅན་གྱི། །སྣང་སེམས་ཐ་དད་སོ་སོར་འཛིན་ཤུགས་རླབས། །བདེ་སྡུག་བར་མ་གསུམ་གྱི་འོབས་སུ་ཚུད། །རྟེན་འབྲེལ་བཅུ་གཉིས་ཤིང་རྟའི་འཁོར་ལོ་འཁོར། །དུག་གསུམ་དབལ་གྱིས་ངན་སོང་རྨི་ལམ་བཞིན། །མེད་བཞིན་སྣང་བའི་ཤུགས་ཀྱི་ལས་སྣ་ཚོགས། །མ་ངེས་སྣ་ཚོགས་འབྱུང་བ་ཆོས་ཀུན་མཚན། །བསྐལ་པ་རྫོགས་ལྡན་སུམ་ལྡན་རྩོད་ལྡན་ནས། །བལྟས་བགད་འོ་འཁྱུད་ཆགས་པས་ཚིམས་པ་སོགས། །ཉོན་མོངས་ཆེ་ཕྲ་རགས་སྤྱོད་ཤིན་དུ་རགས། །དེར་འབྱུང་ལས་ཀྱི་འབྲས་བུ་ཆུད་མི་གསན། །སྙིགས་མ་ལྔ་འབྱུང་མི་ཐུབ་ལྔ་ཡི་དུས། །སྐྱེ་འགྲོའི་བདེ་ཉམས་ས་བཅུད་ཡུལ་ལྷ་ཉམས། །ནད་རིམས་མུ་གེའི་བསྐལ་པ་མཐའ་ནས་དར། །གཉན་དང་ས་བདག་ཀོ་ལོང་གདུག་རྩུབ་འགྱེད། །ཐེག་གསུམ་ལམ་ཞུགས་དགེ་འདུན་གང་དག་གིས། །སོ་ཐར་སྡོམ་པ་གཞན་བསླུས་ཆས་སུ་འཛིན། །བྱང་ཆུབ་སེམས་ཉམས་རྒྱུད་ཀུན་ལོག་ལྟས་བསླད། །བསྐྱེད་རིམ་དམིགས་གཏད་རང་རྒྱུད་པ་རུ་འཛིན། །བདེ་སྟོང་གནད་དོར་ནག་ཆང་རྟག་ཏུ་སྤྱོད། །སྔགས་པར་ཁས་འཆའ་རྩ་རླུངས་དབྱིངས་སུ་བསྐྱིལ། །མདོ་སྔགས་བསྟན་པ་མི་ནག་ཚོགས་གྲལ་གླེང་། །སྡེ་གསུམ་ཐ་དད་པར་ ༈ བཟུང་འདོད་གཟུགས་བསླབ། །ཡང་ན་གཟུགས་མེད་ཁམས་ཀྱི་ལས་བྱེད་དོ། །ཁ་ཅིག་བླ་མའི་དྲིན་གྱི་ཐེག་རྩེའི་ཆོས། །ཅི་བཞིན་མཐོང་བའི་བློ་མིག་ལྡན་ན་ཡང་། །མི་ཚེ་རྙེད་འཚོལ་འདུ་འཛིའི་གནས་སུ་ཟད། །རང་ལ་ཡོན་ཏན་མེད་བཞིན་སྙན་གྲགས་ཕྱིར། །ཆོས་འཆད་སྐྱེ་བོའི་དབུས་སུ་བསྟོད་པ་སོགས། །ཅི་སྲིད་ལས་དག་འདྲེས་དམར་སྤྱོད་པའི་སྟོབས། །གཟུང་འཛིན་གདོན་གྱིས་བསླང་བའི་མཐའ་དམག་སྡེའི། །འཕེལ་ཁ་ཆུ་སྟག་ལོ་ནས་རིམ་པར་རྒྱས། །གཞན་དོན་ལྷུར་བླང་པད་འབྱུང་སྤྲུལ་པ་རེས། །སྨོན་ལམ་རང་རིག་ནུས་མཐུ་གྱད་ཀྱི་སྟོབས། །ལོ་གྲངས་དྲུག་ཅུར་ཀླ་ཀློའི་འཕེལ་ཁ་བཟློག །དེ་ལྟར་དྲུག་ཅུ་དྲུག་ཅུ་བཅུ་པའི་རྗེས། །རབ་བྱུང་བཅོ་ལྔའི་ནང་ཚན་ལྕགས་ཁྱིའི་སྡེའི། །འཕེལ་ཁ་ཤིང་ཡོས་ལོ་ནས་རྒྱས་པ་དེ། །གཉན་པོ་བརྒྱད་དེ་ཆབ་མདོར་བློ་བཟང་མཚན། །སྨར་ཡུལ་ནུས་ལྡན་མཁའ་སྤྱོད་གླིང་པ་དང་། །རེ་སྐོང་ཀ་གསལ་པྲ་ཛྙཱ་རས་མི་རྩལ། །ཟླ་རྒྱུད་མི་ཕམ་འཇམ་དཔལ་རྡོ་རྗེ་དང་། །ཡང་གཅིག་ཀུན་བཟང་བདེ་ཆེན་རྡོ་རྗེ་དང་། །འཇིགས་མེད་མཚན་དང་ཆོས་ཉིད་རྒྱལ་མཚན་སྡེ། །ཀཿཐོག་བདེ་བའི་མིང་དུ་ཐུབ་བསྟན་མཛད། །རྡོ་ཡི་རྒྱུད་གཞོལ་གྲུབ་རི་ འཛིན་པའི་སྡེ། །བསྟན་པའི་ཉི་མ་བཟང་པོའི་མཚན་འཆང་བས། །ལོག་སྨོན་ནུས་མཐུ་གཞོམ་པའི་རྟེན་འབྲེལ་ཡོད། །ཉག་ཏུ་རང་གྲོལ་མཚན་དང་བསོད་ནམས་མཚན། །ཡང་གཅིག་ཉེར་བཞད་སྙིང་པོའི་སྤྲུལ་པ་དང་། །ཁྱད་པར་བདུད་འདུལ་སྤྲུལ་པས་ཆུ་ཀླུང་བསྒྱུར། །ཁྱོད་ནི་པདྨ་ལས་འབྲེལ་རྩལ་ལ་སོགས། །གཏེར་སྟོན་བརྒྱད་ཀྱི་སྨོན་ལམ་མཐུ་ཡོད་པས། །འཆར་ཀ་རྣམས་གཉིས་ཀླ་ཀློའི་གཤེད་དུ་འབེབས། །དགོན་སྡེ་གཅིག་མིན་ཀུན་ལ་དར་རྒྱས་ན། །ལོ་གྲངས་དྲུག་ཅུར་ཇང་འདུལ་དམག་དཔུང་བཟློག །སྔ་འགྱུར་ཆོས་བརྒྱུད་འཛིན་པ་ཐམས་ཅད་ཀྱིས། །རྡོ་རྗེ་ཕུར་པའི་བསྙེན་ལ་ཚད་དུ་བསྐྱར། །འགོང་ནག་ཨར་གཏད་ལོ་ཡི་སྤར་ཁ་བསྒྱུར། །ཟླ་བའི་ཟད་མཚམས་གཏེར་མའི་ལས་སྦྱོར་བྱ། །བཀའ་སྲུང་ཆོས་སྐྱོང་ཡུལ་ལྷ་ཟོ་དོར་བརྔན། །ཁྱད་