Tibetan
མནལ་ལམ་ལ་མཁའ་འགྲོ་རལ་གྲིས་འབར་མ་ཡིན་སྐད་པས་འདི་སྐད་ཟེར། 3 ཧེ་ཧེཿ བྱང་མུན་པའི་གླིང་ན་ཉི་གཞོན་བཀྲ། །གནུབས་སངས་རྒྱས་ཡེ་ཤེས་སྒྱུ་མའི་གར། །དེའི་ཡན་ལག་ལས་སྐྱེས་ནི་གུ་མ། །དབྱིངས་ལྷན་སྐྱེས་ཡེ་ཤེས་ཌཱཀྐིའི་སྤྲུལ། །གཡང་དཀར་གྱི་ལོ་འཛིན་གཟུགས་བྱད་ལེགས། །གནས་གསུམ་ན་སྨེ་བའི་ཐིག་ལེ་ཡོད། །དེ་ཉེ་རྒྱུར་སྤྱོད་ལ་རང་སྐལ་གྱིས། །ཆོས་ཟབ་པའི་དོན་ལ་སྤྱོད་རེ་རན། །དེའི་གནས་དང་ལྡན་པར་མ་གྱུར་ན། །དབྱིངས་ཌཱཀྐིའི་བསུ་བ་ཁྱོད་ལ་ཡོད། །བརྡ་གོ་འམ་རྡོ་རྗེ་གཟི་བརྗིད་རྩལ། །ང་སྐྱེ་མེད་དབྱིངས་ཀྱི་མཁའ་འགྲོ་མ། །གདངས་ལྔ་ལྡན་ཡེ་ཤེས་ཀློང་ནས་ཤར། སྔོན་ཚེ་རབས་མང་པོ་མ་བཞིན་བརྩེ། །ཁྱོད་དགོངས་པ་ཟབ་ཀྱི་ན་སོ་གཞོན། །ཅོལ་ཆུང་གི་བདུད་དབང་མ་ཤོར་བར། །རང་སྐལ་གྱི་ཕ་ཕོག་ལོན་པར་བརྩོན། །ད་གསང་ཞིངགསང་བ་ཌཱཀྐིའི་ཚིག ཞེས་ཟེར་ཏེ་མནལ་ལས་སད་པ་དང་མཉམ་དུ་ནང་སྔ་མོ་སྐྱོ་ཚ་གསོལ་ཏེ། ཡབ་རྗེ་བླ་མའི་དྲུང་དུ་བྱོན་ནས་ཕྱག་ཕུལ་ཏེ་མདུན་དུ་བཞུགས། བླ་མས་ཁྱོད་ཀྱིས་མཚམས་ལེགས་པོ་ཨེ་འོང་སྒྲུབ་རྟགས་ཅི་ཡོད་གསུངས་པས། རྗེ་དེ་ཉིད་ཀྱིས་མཚམས་ཀྱི་ལོ་རྒྱུས་མ་གཏོགས་མཁའ་འགྲོའི་ལུང་བསྟན་འབྱུང་བའི་རྣམ་གྲངས་ཞུ་མ་སྤོབས། དེ་ནས་དགུང་ལོ་བཅུ་དྲུག་ལོ་ན་སྔ་མའི་རྟེན ༈ འབྲེལ་སྟབས་དབེན་ཀྱང་། ཟབ་གཏེར་གྱི་ཆོས་སྐོར་རྫོགས་ཆེན་གྱི་སྐོར་དང་སྒྲུབ་ཐབས་ཆ་ཤས་རེ་ཕྱག་བྲིས་མཛད་ནས། ཡབ་རྗེ་བླ་མའི་སྤྱན་ལམ་དུ་ཕུལ་ཚེ། དང་པོ་ཐུགས་མི་མཉེས་པའི་ཚུལ་མཛད་ནས་བཀའ་བཀྱོན་དང་ཕྱག་འབེབ་གནང་། དེ་ནས་རྗེ་ཉིད་ཀྱི་ཞལ་ནས་ང་རང་གིས་སློབ་མ་ལམ་གྱིས་རྩོམ་ཆོས་དང་གང་དྲན་ཡིག་བྲིས་སུ་བགྱིས་པའི་བློ་ངན་མེད་ངེས་པ་ཡིན་ཀྱང་། འགྲོ་བ་བསླུ་བྲིད་དང་རང་གི་དོན་ཤོར་གྱི་རྒྱུ་ཡིན་མིན་བླ་མ་རིན་པོ་ཆེ་ཁྱོད་ཀྱིས་གསུང་དུ་གསོལ། གསུངས་ནས་ཕྱག་ཕུལ་ཞིང་ཡང་ཡང་ཞུ་བ་ཕུལ་ཏེ། མཁའ་འགྲོའི་ཞལ་གཟིགས་ལུང་བསྟན་ཡོད་ཚུལ་རྣམས་ཞིབ་པར་ཞུས་ཚེ། བླ་མའི་ཞལ་ནས་ཁྱོད་ཀྱི་ཡི་གེ་རྩམ་ཆོས་དང་གང་དྲན་ཡིག་རིས་སུ་བྲིས་བྲིས་པ་རེད་བསམ་པ་མིན་ངེས་ཁྱོད་ཀྱི་རྒྱུད་བརྟག་པ་ཡིནཔས། འུ་ཅག་ཕ་བུ་ཡིན་ཀྱང་ཁྱོད་ང་ལ་སངས་རྒྱས་དངོས་ཀྱི་འདུ་ཤེས་ངེས་པར་འདུག་པས། ཟབ་གཏེར་གྱི་དངོས་གྲུབ་རེ་ཐོབ་འོང་། སྔ་མའི་རྟེན་འབྲེལ་འགྲིགས་ན་བཟང་གི་ཏ། ད་དུས་ལས་ཡོལ་འདུག །མིན་ཀྱང་སྤུན་ཟླ་དང་ཉེ་འཁོར་རྣམས་ཀྱིས་ཁྱོད་ད་དུང་བྱིས་པ་ཡིན་པས་ཅི་ཟེར་མི་ཤེས་གསུངས། རྗེའི་ཞལ་ནས་ཡི་གེ་འདི་རྣམས་ཅི་བྱེད་ཞུས་པས། བླ་མའི་ཞལ་ ནས་ཕྱི་ནང་ཀུན་ལགསང་རྒྱ་གྱིས་ལ་ཞོག་གསུངས། དེ་ནས་ལོ་ཁྱིམ་དེའི་ནང་དུ་རྡོ་ལུང་རི་ཟབ་ཟེར་བའི་ནང་དུ་ས་ཕུག་ཞིག་ཡོད་པ་དེ་ཀར་མྱུར་ལམ་ཐོད་རྒལ་གྱི་ཉམས་ལེན་ཟླ་བ་དྲུག་དང་ཞག་བཅུ་འགྲོ་སྐབས། རྡོ་རྗེ་གཡུ་སྒྲོན་མ་ཡིན་སྐད་པའི་མི་མོ་གཟུགས་མཛེས་ཤིང་ཡིད་དུ་འོང་བ་དར་དཀར་གྱིས་ལྭ་བ་མནབ་པ་རྨ་བྱའི་སྒྲོ་ཐུལ་གཡང་ལུགས་སུ་གསོལ་ཞིང་ཕྱག་ན་མེ་ལོང་དང་གཏེར་བུམ་འཛིན་པ་རིན་པོ་ཆེའི་རྒྱན་གྱིས་སྤྲས་པ་ཞིག་གིས་འདི་སྐད་གསུངས། ཨེ་ཨེཿ གསོན་དང་རིགས་ལྡན་དབང་མོ། །ཀུན་གསལ་རྟ་བདུན་ཁྱོན་ཡངས། །དབྱར་རྔའི་རང་སྒྲ་ཤུགས་ལྡན། །རུ་སྦལ་སྒྱུ་རྩལ་རྒོད་ཀྱང་། །ངང་པའི་ཆབ་སྲིད་གསལ་འོང་། །ལྷ་ལམ་ཡུལ་ནས་འོང་བའི། །བཞིན་མཛེས་ཌཱཀྐི་ང་རང་། །དགའ་བའི་འགྲོས་ལ་མཁས་པའི། །བདེ་ཆེན་བཅུད་ལ་དབང་འབྱོར། །མཁའ་དབྱིངས་རོལ་མོའི་སྒྱུ་རྩལ། །ཁྱོད་དང་འབྲེལ་ན་ལེགས་བསམ། །པདྨའི་ཕ་ཕོབ་ཐོབ་པ། །ཟབ་གཏེར་གྲོགས་མོ་ངས་བྱེད། །ཟེར་ནས་སྐུས་གར་བསྒྱུར་ཏེ། འཁྲིལ་སྦྱོར་གྱི་སྟ་གོན་བྱེད་ཚེ། རྗེ་དེ་ཉིད་ན་སོ་ཆུང་བའི་རྐྱེན་ལ་ལྟོས་ནས་མཁའ་འགྲོའི་གསུངས་ལྟར་མ་ནུས་ཤིང་བཞུགས་པས། ཡང་ཌཱཀྐིའི་ཞལ་ནས་ཁྱོད་ཀློང་ཆེན་རྡོ་རྗེ་གཟི་ ༈ བརྗིད་ཡིན་སྐབས་ང་རང་བདེ་བསྐྱེད་གསང་བའི་གྲོགས་ཡིན་ཀྱང་ད་ལན་ང་མ་ཤེས་པས་ལན། ད་ང་འགྲོ་བ་ཡིན་ཟེར་ཞིང་འགྲོ་གྲབ་བྱེད་འདུག །རྗེའི་ཞལ་ནས་ཀློང་ཆེན་པའི་སྐྱེ་སྲིད་ཡིན་ཚུལ་ཇི་ལྟར་རེད་སྨྲས་པའི་ཚེ། ཌཱཀྐིས་ན་རེ། ཁྱོད་ཀྱིས་ཕ་ཡབ་ལ་དྲིས་དང་གསལ་འོང་གི་དང་། དེ་རྟེན་འབྲེལ་གྱི་སྣ་ཁ་ལས་ཀྱིས་མ་བསྒྱུར་བ་ཞིག་དགོས་ཟེར་ཞིང་གཡུ་དྲུག་དཀར་ཞིག་རྗེ་ལ་ཕུལ་ཏེ། འུ་ཅག་དམ་ཚིག་གི་རྟེན་ཡིན་ཟེར་ནས་མི་སྣང་བར་གར་སོང་ཆ་མེད་དུ་གྱུར། དེ་ནས་ནང་སྔ་མོ་བླ་མའི་དྲུང་དུ་བྱོན་ནས་ཕྱག་ཕུལ་ཏེ་མདུན་དུ་བཞུགས་ཚེ། བླ་མའི་ཞལ་ནས་ཁྱོད་ལ་ཅི་དགོས་གསུངས་པས། རྗེའི་ཞལ་ནས་བླ་མ་རིན་པོ་ཆེ་ཁྱོད་ཀྱིས་བདག་ལ་སྐྱེ་ཕྲེང་ལུང་བསྟན་ཞིག་གསུང་དུ་གསོལ་ཞུས་ནས་ཕྱག་ཕུལ་བས། བླ་མའི་ཞལ་ནས་ཕས་བུ་ལ་ལུང་བསྟན་པ་འདི་མི་མཛའ་ཨ་གསུངས། རྗེའི་ཞལ་ནས་བདག་གི་འདི་ཕྱི་བར་གསུམ་དུ་སྐྱབས་མགོན་བླ་མ་ཁྱེད་ལས་མེད་པས། བདག་གི་ལས་ཇི་ལྟར་འགྱུར་གྱི་ལུང་བསྟན་ཞིག་ཅི་ནས་ཀྱང་གསུང་དུ་གསོལ། ཞེས་ཡང་ཡང་ཞུ་བ་ཕུལ་བའི་ཚེ། བླ་མས་ད་ཆོག་གི་གསུངས་ཏེ་འདི་སྐད་གསུངས། གཉིད་འོད་གསལ་འདྲེས་པའི་དགསྣང་ངོར། །མ་མཁའ་འགྲོའི་བདེ་ བའི་དབང་ཕྱུག་མ། །ཡིན་སྐད་པའི་བུད་མེད་ཞིག་ན་རེ། །ང་འོང་བ་ཆོས་ཀྱི་དབྱིངས་ནས་འོང་། །དབྱིངས་ཟག་མེད་ནམ་མཁའི་ཁོར་ཡུག་ནས། །གདངས་ལྷུན་གྲུབ་རོལ་པ་འཕྲུལ་མོ་ཆེ། །ཚུལ་མ་ངེས་སྣ་ཚོགས་སྣང་བ་ཤར། །འདི་ཡོད་ལ་ཀུན་ལ་ཡོད་ན་ཡང་། །དེ་མངོན་དུ་གྱུར་པ་ཉིན་སྐར་ཙམ། །འདིར་སྣ་ཚོགས་སྣང་བའི་རྫུན་རིས་ཀུན། །མེད་བཞིན་ཏུ་འཁྲུལ་སྣང་ཀུན་ལ་ཡོད། །ཚུལ་སྟོང་ཉིད་ཡིན་པར་སུས་མ་མཐོང་། །ང་རིག་རྩལ་རོལ་པའི་མཛའ་ན་མོས། །མ་ཁྱོད་ལ་ལུང་བསྟན་ཚིགས་སུ་བཅད། །གཞི་འཁོར་འདས་རོལ་པའི་མ་ཆེན་མོས། །བུའི་གྲངས་ལ་བརྗོད་དུ་མ་མཆིས་ཀྱང་། །བུ་ཡིད་ལ་བཅག་པ་སྒྱུ་མའི་བུ། སྔོན་སྒྱུ་མའི་རྣལ་འབྱོར་ཀློང་ཆེན་མ། །མ་འགྲོ་ལ་རྗེས་ཆགས་གར་གྱི་དབང་། །དོན་རྣམ་འཕྲུལ་མཉྫུ་ཤྲཱི་པས། །ཡང་སྨོན་ལམ་རྣམ་དག་སྒྱུ་མའི་འཕྲུལ། །དུས་དེང་སང་མི་ཡི་རྫུ་ལ་ཞུགས། །ད་ཡི་དམ་ལྷ་ཚོགས་གང་ལགས་ཀྱང་། །ལྷ་རྡོ་རྗེ་ཁྲོ་ལོད་ཕུར་པ་ལེགས། །བཀའི་སྲུང་མ་གང་ལགས་ཅི་ཡིན་ན། །བཀའི་སྲུང་མ་གནོད་སྦྱིན་ཤན་པ་དང་། །གཟའ་ཁྱབ་འཇུག་སྔོན་ལས་འབྲེལ་བའི་ལྷ། །གནས་གང་བདེ་དབེན་པའི་རི་ངོགས་བདེ། །ལས་ཅི་བྱེད་ཕྱོགས་མེད་ འགྲོ་བ་སྐྱོངས། །ཕུགས་གར་གཏོད་གཞི་ཡི་རེག་པ་ཡིས། །མཐར་གར་བསྡུ་སྣང་བཞི་མཐའ་རུ་བསྡུ། །ཟས་ཅི་ཟ་སློང་མོའི་ཁ་ཟས་བཟང་། །རྐྱེན་བར་ཆད་གང་གིས་སེལ་སྲིད་ན། །ཆོས་བདུད་གཅོད་ཟབ་མོས་སེལ་ཡང་སྲིད། །དུས་ལྔ་བརྒྱ་སྙིགས་མའི་དལ་ཡམས་ལ། །སྔགས་རྡོ་རྗེའི་གོ་ཁྲབ་བགོ་བ་གལ། །ལས་མཐའ་མ་བདུད་ལ་མ་ཤོར་དགོས། །ཚེ་ཚད་ནི་ཅི་ཡིན་བྱ་བ་ན། །ལོ་བདུན་ཅུ་རྩ་གཉིས་གྲངས་ཙམ་མམ། །རྐྱེན་བར་ཆད་ཕོ་ཉས་གཡུལ་བཟློག་ཕྱིར། །མ་མཁའ་འགྲོའི་ཞལ་ལ་ཚོགས་མཆོད་བཏང་། གནད་ཚུལ་བཞིན་སྤྱོད་པའི་སྐལ་ལྡན་ན། །ཚེ་འདི་ཕྱི་གཉིས་ལ་ལེགས་ཡོན་འཐོབ།། ཨེཿ ང་དབུས་ནས་ལྷགས་པའི་མཛའ་ན་མོ། །བར་མངོན་དགའི་ཞིང་ནས་སྟོང་གཟུགས་སྟོན། ཡུལ་སྒྱུ་མའི་ལྟད་མོ་སྟོན་དུ་འོང་། །ལྷོ་གསང་ཆེན་རོལ་པའི་དུར་ཁྲོད་ནས། །ངེས་བདེ་སྡུག་གར་གྱིས་རྣམ་རོལ་ངོམས། །གནས་དེ་རུ་ཐོགས་པར་མ་གྱུར་ན། །ནུབ་པདྨ་བརྩེགས་པའི་དུརཁྲོད་ནས། །ངས་ཉོན་མོངས་རོ་རྙིལ་ཆོ་འཕྲུལ་གྱིས། །གདངས་འཇིགས་མེད་ཟང་ཐལ་ནོར་དུ་སྟེར། །གནས་དེ་རུ་ཡུན་གཅིག་ངལ་གསོའི་མཐར། །རྒྱང་བདེ་སྡུག་མེད་པའི་ཨ་ཐང་3 ནས། །ང་དབྱིངས་ནས་མི་རིང་བསུ་མར་འོང་། །གནས་རང་སྣང་དོན་གྱི་འོག་མིན་ནས། །ང་ལམ་འདྲེན་མ་མོ་སྡེ་བཞི་འཁོར། །འོད་དབང་པོ་གཞུ་ཡིས་ལམ་བྱས་ཏེ། །བདག་མ་བུ་ཀུན་བཟང་རྒྱལ་སར་འགྲོ། །ད་ང་འགྲོ་ཆོས་ཀྱི་དབྱིངས་སུ་འགྲོ། །ང་ལུས་མེད་མཁའ་འགྲོའི་གྲོང་ཁྱེར་དུ། །བདེ་སྡུག་མེད་པའི་དབྱིངས་སུ་འགྲོ། །ཞེས་ཟེར་ཞིང་འཇའ་ཚོན་ཡལ་བ་བཞིན་ཐལ། གསུངས་ནས་དེ་ལྟར་གྱིས་དང་རང་གཞན་གྱིས་དོན་འབྱུང་འོང་གསུངས། དེ་ནས་དགུང་ལོ་བཅུ་བདུན་ལོར་སྐུ་བགེགས་ཤིན་ཏུ་ཆེ་བས། ཡབ་རྗེ་བླ་མས་གེགས་སེལ་གྱི་ཕྱིར་དུ་རྗེ་དེ་ཉིད་ལ་བཀའ་བཀྱོན་དང་ཕྱག་འབེབས་སོགས་གནང་ནས་དུས་རྒྱུན་དུ་ཐུགས་དྲག་པོ་བྱས་ཏེ་སྤྱན་གྱིས་གཟིགས་པ་མེད་པ་ཙམ་མཛད་ཚེ། བླ་མ་རིན་པོ་ཆེའི་དངོས་སློབ་ལུང་ཟིན་རྣམས་ཀྱི་ནང་ནས་བསོ་སྤྲུལ་ཚེ་དབང་རིག་འཛིན་ནམ་སྣ་ཚོགས་རངགྲོལ་དང་། གླིང་སྤྲུལ་པདྨ་ལུང་རྟོགས་རྒྱ་མཚོ། བླ་མ་དགེ་ལེགས་དཔལ་བཟང་ལ་སོགས་པའི་སྐྱེས་ཆེན་རྣམས་དང་། ལས་ལྡན་གྱི་སློབ་བུ་འགས་གཙུག་གི་རྒྱན་དུ་འཆང་ནས་བླ་མར་མཐོང་། གཞན་བུ་སློབ་རྣམས་ཀྱིས་བླ་མའི་མཛད་སྤྱོད་ལ་ལྟོས་ཏེ་བརྙས་དམོད་དང་ལོག་པར་བལྟ་ཞིང་། རྗེ་དེ་ཉིད་ལ་ཁྱོད་བླ་མ་ ༈ གཏེར་སྟོན་གྱི་བླ་བཙོང་རེད་ཟེར་ཞིང་མིག་གི་ལིང་ཏོག་དང་འདྲ་བ་བྱུང་། བླ་མས་ཀྱང་ཆོས་གྲལ་དབང་གྲལ་ཙམ་ལའང་རྗེ་དེ་ཉིད་བཞུགས་སུ་མི་བཅུག་པར་མཛད། དེའི་སྐབས་རྗེ་དེ་ཉིད་ཐུགས་ཤིན་ཏུ་སྐྱོ་དྲག་ནས་རང་གནས་ཀྱི་ལུང་པ་འདམ་ལུང་ཞེས་པའི་སྒང་ཁ་རུ་བྱོན་ནས་ཐུགས་སྐྱོ་བའི་གླུ་འདི་གསུངས་སོ། །ཕ་ཀུན་མཁྱེན་པད་འབྱུང་ཆོས་ཀྱི་རྗེ། །དོན་དབྱེར་མེད་བདུད་འཇོམས་ཧེ་རུ་ཀ །བདག་གསོལ་བ་འདེབས་སོ་བྱིན་གྱིས་རློབས། །སྤྲང་རི་ཁྲོད་ཟིན་པར་མཛད་དུ་གསོལ། །སྔོན་སྨོན་ལམ་བཟང་པོའི་ལས་འཕྲོ་ལྡན། །ཕ་མཚན་ལྡན་བླ་མས་རྗེས་སུ་བཟུང་། །ཆོས་ཟབ་པའི་གདམས་ངག་སྣ་ཚོགས་ཐོབ། །རང་གཞན་གྱི་དོན་གཉིས་ངང་གིས་འབྱུང་། །མ་མཁའ་འགྲོའི་གྲལ་ཕྲལ་ལུང་བསྟན་བཞིན། །ཆོས་ཟབ་པའི་གཏེར་ལ་དབང་བའི་དུས། །སབྟ་ཡི་སྨོན་ལམ་ལས་ཀྱིས་བསྒྱུར། །དེ་ཇི་བཞིན་མ་ནོར་གནད་ལ་འབད། །དོན་མ་ནོར་རང་བྱུང་འགྲུབ་པར་འགྱུར། །དེ་བསམ་ཤིང་བསམ་ན་སྐྱོ་བ་སྐྱེས། །གནས་གང་དུ་བསྡད་ཀྱང་དབེན་རི་དྲན། །རང་གཅིག་པུར་སྒྲུབ་ཚུགས་ཟིན་པ་ཞིག །མགོན་པད་འབྱུང་གིས་བྱིན་རློབས་ལམ་སྣ་དྲོངས། །སྤྲང་རི་ཁྲོད་ཟིན་པར་བྱིན་གྱིས་ རློབས། །བློ་ཆོས་ལ་འགྱུར་བར་བྱིན་གྱིས་རློབས། །ཕ་བཀའ་དྲིན་ཅན་གྱི་མཛད་སྤྱོད་ལ། །ཡིད་ཐེ་ཚོམ་མེད་པར་བྱིན་གྱིས་རློབས། །ལས་བྱ་བ་དམ་པའི་ཆོས་དང་བསྟུན། །གཉིས་འཛིན་གྱི་མདུད་རྒྱ་དབྱིངས་སུ་ཞིག །རང་བྱུང་གི་ཡེ་ཤེས་མངོན་གྱུར་ཤོག །གསུངས་ནས་ད་བླ་མའི་བཀའ་གནང་ཞིག་ཐོབ་ན་ངེས་མེད་ཀྱི་རི་ཁྲོད་ཞིག་ཏུ་འགྲོ་དགོས་དགོངས་ནས། དེ་ནས་མ་ཡུམ་ཡོད་སར་ཕེབས་ཏེ། རྗེའི་ཞལ་ནས་ཨ་མ་ང་སྔར་བླ་མའི་ཐུགས་ཀྱིས་ཤིན་ཏུ་གཅེས་པར་བསྐྱངས་ནས་སྤུན་ཟླ་རྣམས་དང་ཁྱད་མེད་པར་མཛད། ཁྱད་པར་ཟབ་ཆོས་ཀྱི་ཁྲོལ་དོན་དམར་ཁྲིད་དུ་གསུངས་པ་སོགས་ཡིན་ཀྱང་། ད་རེས་ཀྱི་དུས་རྣམས་སུ་ཆོས་གྲལ་ཙམ་ལ་འང་འདུག་མི་ཆོག་གསུངས་ནས། ནུབ་མོ་གཟིམ་གཡོག་སོགས་ཞབས་ཞུ་བྱེད་སྐབས་རྣམས་སུ་གསུང་མཛད་མི་གནང་བར་འདུག་པས། དཅི་ནས་ཀྱང་བླ་མའི་ཐུགས་ཟིན་གྱི་སློབ་བུ་ཞིག་མི་འོང་ངེས་པ་རེད། ད་ནི་བླ་མའི་སྲས་སུ་གྱུར་པ་བཀའ་ཡང་ཐུགས་མཉེས་པར་གྱུར་པའི་ལུས་ལྡན་ཞིག་ལོན་པ་ལ་སྨོན་ལམ་བཏབ་ནས་ལུས་ངན་འདི་བོར་སོང་ན་ཅི་མ་རུང་གསུངས་ཏེ་བཤུམ་པར་མཛད་ཚེ། མའི་སེམས་ཀྱིས་མ་བཟོདཀྱང་ཡབ་ལ་ནི་ཞུ་མ་ཕོད་པར་རྗེ་དེ་ཉིད་ཀྱི་ཐུགས་གསོས་ནས། ད་ ཁྱོད་ཀྱི་ལུས་བཟང་པོ་ད་ཕན་ལོན་ཐབས་དཀའ་མོ་རེད། ཁྱེད་སྐྱེ་ངན་ཞིག་མིན་པ་འདྲ། སྔར་ང་རང་ལ་མཁྱེན་སྤྲུལ་དང་མི་ཕམ་གཉིས་ཡོད་སྐབས་ལུས་ནད་སྡུག་བསྔལ་ཆེན་པོ་འབྱུང་། ཁྱོད་ཡོད་དུས་མཁའ་འགྲོའི་ཚོགས་གྲལ་དུ་སླེབ་སྣང་འཆར་བ་དང་། ལུས་ལ་ན་ཚ་མེད་ཅིང་ཤེས་པ་དྭངས་ཤིང་དགེ་སྦྱོར་འཕེལ་བ་དང་། བཙས་དུས་གནས་ཁང་ཕྱི་ནང་ཐམས་ཅད་འོད་ཀྱིས་ཁྱབ་ཅིང་། ཁང་སྟེང་དུ་རྒོད་བབས་ནས་གར་བྱེད་པའི་ཚུལ་གྱིས་ཕར་འགྲོ་ཚུར་འགྲོ་བྱེད་འདུག་པ་གཞན་གྱིས་རིག་ཟེར། མོའི་སྣང་བ་ལའང་ཁྱོད་མངལ་སྐྱོན་གྱིས་མ་གོས་པར་འོད་ཀྱི་རྣམ་པར་གནས་པ་སོགས་རྟགས་མཚན་ཁྱད་པར་བ་ཡོད་པས། བླ་མས་ཀྱང་ཁོང་གི་བསྟན་པ་འཛིན་པའི་བུ་ཞིག་འོང་གསུངས་པ་སོགས་སྨྲས་ནས། ད་ཁྱོད་ཀྱིས་བླ་མས་ཅི་གསུངས་བསྒྲུབས་ལ་བཀའ་བཀྱོན་ཕྱག་འབེབས་གནང་རུང་དགོས་པ་ཆེན་པོ་ཡོད་ཐང་ལོག་ལྟ་མ་བྱེད་ཟེར། ཡང་རྗེའི་ཞལ་ནས་བླ་མ་ལ་ལོག་ལྟ་ཅིལ་སྐྱེ། བཀའ་དྲིན་འཁོར་ཐབས་དང་བྲལ་བ་ཡིན་པས་སྲོག་ལ་བབ་དགོས་པ་བཀའ་གནང་ཕེབས་ཀྱང་བསྒྲུབས་ངེས་པ་ཡིན། བླ་མས་ལུང་ཟིན་གྱི་བུ་སློབ་ཆེ་བ་རྣམས་ཀྱི་ནང་ནས་ང་རང་གིས་དབང་འབྲེལ་ཡོད་པ་གླིང་སྤྲུལ་དང་བསམ་སྤྲུལ་3 བླ་མ་དགེ་དཔལ་ཆོས་བསྟན་ལ་སོགས་པའི་བུ་སློབ་འགའ་རེ་མ་གཏོགས། ཐམས་ཅད་ཀྱི་བརྙས་དམོད་བྱེད་འདུག་པས་ང་རང་བླ་མའི་སྲས་མིན་པར་འདྲ་སྙམ་གྱིས་གསུངས། མ་ཡུམ་གྱིས་ན་རེ་ཁྱོད་ལ་ཚེ་གེགས་ཆེ་བས་ལན་པ་རེད། ཀུན་གྱིས་དམན་སྡང་ཅི་ལ་ཡིན་ཟེར་ནས། ད་བཞུགས་གནས་སྤོར་དགོས་པས་དེ་ལུགས་ཀྱི་བླ་མའི་ཞལ་ཞུ་གྱིས་ཟེར། དེ་ནས་ལོ་ཁྱིམ་དེར་སྟོན་ཟླ། ཐ་ཆུང་གི་ནང་དུ་བ་ར་ཚངས་ཀྱི་སྟོད་དུ་ལུང་ཁ་མ་ཟེར་བ་དེ་ལ་སྒར་གཞི་གུན་སར་ཕེབས་ཚེ། རྗེ་དེ་ཉིད་ཀྱིས་སྔར་ལྟར་བླ་མའི་གཟིམ་སྦྲའི་ནང་དུ་ར་བ་དང་། ཕྱིའི་སྤྱོད་ལམ་གྱི་ས་བརྐོས་པ་སོགས་མཛད་ནས་གཟིམ་སྦྲ་ཕུག །དེ་ནས་བླ་མའི་གཟིམ་མལ་བཅའསྐབས། རྗེ་དེ་ཉིད་ཀྱི་ཐུགས་བསམ་ལ་བདག་སྐྱེ་བ་ནས་ཚེ་རབས་གར་སྐྱེས་ཀྱང་བླ་མ་རིན་པོ་ཆེ་འདི་དང་། མི་འབྲལ་བ་ཐུགས་མཉེས་པའི་ཞབས་ཞུ་ལེགས་པོ་རེ་བསྒྲུབ་ན། དབེན་རི་བརྒྱ་ཡི་དོ་ཟླ་མེད་པ་འདྲ་དགོངས་ནས་སྨོན་ལམ་རྣམ་དག་རེ་མཛད། དེ་ནས་བླ་མའི་གཞུགས་གནས་ཀྱི་སྟ་གོན་རྣམས་ལེགས་པར་གྲུབ་སྟེ། རྗེ་དེ་ཉིད་བླ་མའི་དྲུང་དུ་བྱོན་ནས་བཀའ་བཀྱོན་ཕྱག་འབེབས་གནང་ནས་བླ་མ་གཟིམས་སྦྲའི་ནང་དུ་བྱོན་སོང་རྗེས། རྗེ་དེ་ཉིད་ཐུགས་སྐྱོ་བས་བཤུམ་པར་མཛད་ནས་བཞུགས་ཡོད་ ༈ སྐབས། ཧོར་འོད་ཆུང་དང་། བླ་མ་ཤེར་གསང་། མཁྱེན་རབ་རྒྱ་མཚོ་སོགས་མཆེད་གྲོགས་འགའ་བྱོན་ནས་ཁྱེད་ཀྱི་ཐུགས་ཆུང་མ་མཛད་དང་། བླ་མ་རིན་པོ་ཆེས་ཁྱེད་ལ་སྐུ་གེགས་ཡོད་པའི་ལོ་རྒྱུས་གསུངས་འདུག་པས་བཀའ་བཀྱོན་ཕྱག་འབེབས་ཇི་ལྟར་གནང་ཡང་ལོག་རྟོག་མི་ཉན་གསུངས། རྗེའི་ཞལ་ནས་བཀའ་བཀྱོན་ཕྱག་འབེབས་ཇི་ལྟར་གནང་ཡང་ལོག་ལྟ་སྐྱེ་བ་མི་དགོས། ང་རང་གི་བླ་མའི་ཐུགས་ཟིན་པ་ཞིག་མི་འོང་གི་སྙམ་ནས་སྡུག་པ་ཡིན་གསུངས། ཡང་མཆེད་གྲོགས་རྣམས་ཀྱིས་བླ་མའི་ཐུགས་ལ་ཟིན་ངེས་པ་རེད། བླ་མའི་ཞལ་ནས་ཁོང་མཆེད་གྲོགས་བུ་སློབ་རྣམས་ལ་བར་སྐབས་ཆང་གསོལ་ཞོར་ལ་འདི་ལྟར་གསུངས། ང་རང་གི་བུ་དྲི་མེད་འདི་གཞི་བཟང་བས་དམན་སྡང་བྱས་ནས་བརྡུང་བཙོག་བྱེད་པ་ཡིན། བུ་དེ་ལ་ཚེ་འཕྲེང་ཆེ་བ་ཡིན་པས་དེ་སེལ་ཐབས་བྱེད་པ་ཡིན་མ་གཏོགས་སྡང་བ་མིན། ངས་བསྟན་པ་འདི་ཁོ་རང་ལ་རག་ལས་ཡོད་གསུངས་པ་ཡིན་པས། ཁྱེད་ཀྱིས་དེ་ལུགས་ཀྱི་ཐུགས་ཟབ་མཛད་ལ་སྐུ་ཚེ་མཐར་ཕྱིན་ཐབས་རེ་མ་འཆུག་ཟེར། དེ་སྐབས་གཞི་ཆེན་བླ་སྤྲུལ་འགའ་དང་། ཕྱོགས་གཞན་ནས་བྱོན་པའི་བླ་སྤྲུལ་མང་པོ་ལ་གཏེར་གསར་གྱི་ཕུརཔ་ཁྲོས་མ་སེང་གདོང་སོགས་ཀྱི་ དབང་ལུང་འབུལ་དགོས་པས། བླ་མས་རྗེ་དེ་ཉིད་ལ་གསུངས་མཛད་མི་གནང་། གཞན་བུ་སློབ་ཞིག་ལ་གསུང་ཆའི་ཚུལ་དུ། རྗེ་དེ་ཉིད་ལ་ཁྱོད་ཀྱིས་ཕྱོགས་ཀྱི་སྒར་བ་འདི་རྣམས་ལ་དབང་ལུང་སོགས་གང་དགོས་ཀྱི་བྱ་བ་གྱིས་ཤིག་གསུངས། དེ་ནས་བླ་མའི་བཀའ་བཞིན་རྗེ་ཉིད་ཀྱིས་བླ་སྒར་རྣམས་ལ་དབང་ལུང་འབུལ་སྐབས། དབང་གི་མགོར་ཐོན་ཚེ་བླ་མ་བསྐྱེད་ལམ་ལ་བྱོན་ཏེ་གཟིགས་ཚེ། ཐུགས་སྣང་ལ། རྗེ་དེ་ཉིད་ཀྱི་མདུན་ཐད་དུ་འཇའ་ཡི་གུར་ཁང་འཁྱིལ་བའི་ཀློང་དུ་མཁའ་འགྲོ་མ་རུས་པའི་རྒྱན་དྲུག་གིས་སྤྲས་པ་ཞིག་གིས་ཌཱ་དྲིལ་དཀྲོལ་བཞིན་སྙན་པའི་བྱངས་ཀྱིས་ཚིགས་བདུན་གསུངས་པ་གཟིགས་ཚེ། བླ་མའི་དགོངས་པ་ལ་བུ་ཆུང་དྲི་མེད་དེ་ཀློང་ཆེན་པའི་སྐྱེ་སྲིད་ཡིན་ངེས་པ་འདྲ། སྔོན་ལས་འབྲེལ་རྩལ་གཟུགས་སྐུ་དབྱིངས་སུ་བསྡུ་སྐབས་ལས་ལྡན་རྣམས་ཀྱི་མཐོང་སྣང་ལ་མཁའ་འགྲོ་རུས་པའི་རྒྱན་དྲུག་ཅན་ཞིག་དབུ་གཙུག་ནས་ཐོན་ཏེ། སྟེང་གི་ནམ་མཁར་ཐིམ་སོང་བ་མཐོང་ཆོས་སུ་ཡོད་པས་རྡོ་རྗེ་ཕག་མོས་རྗེས་སུ་བཟུང་བ་ཞིག་ཡིན་པར་དགོངས། གཞན་མཆེད་གྲོགས་རྣམས་ཀྱིས་འཇའ་དང་འོད་རེ་ཤར་བ་ཀུན་གྱིས་མཐོང་ནས་ངོ་མཚར་དུ་སྨྲས། དེ་ནས་དབང་ལུང་གི་མཇུག་ཏུ་རྗེ་དེ་ཉིད་ལ་མཎྜལ་གྱི་རྟེན་དུ་ཕུལ་བ་ཆོས་ ༈ དུང་གཡས་འཁྱིལ་སྤུས་ལྡན་ཞིག་དང་རིན་ཆེན་གཉིས་པ་དར་གོས་ཕྲུགས་ལ་སོགས་པ་ཕྱག་ཏུ་འབྱོར་བ་རྣམས་ཡབ་རྗེ་བླ་མའི་དྲུང་དུ་ཕྱག་བཅས་ཕུལ་བས། དེ་སྔོན་བླ་མའི་གསུངས་མཛད་མི་གནང་བའི་ཚུལ་བྱས་ཀྱང་། ད་རེས་ཀྱི་སྐབས་གསུངས་གནང་ནས་ཆོས་ཐམས་ཅད་རྟེན་ཅིང་འབྲེལ་བར་འབྱུང་བ་ཡིན་པས་ཆོས་དུང་སྤུས་ལྡན་འདི་ལེགས་སོ་གསུངས། རྗེ་དེ་ཉིད་བླ་མས་གསུང་གནང་བ་ལ་དགའ་དྲག་ནས་ཅི་ཡིན་འདི་ཡིན་མེད་པར་རབ་དགའི་ས་ཐོབ་པའི་སྐྱེས་བུ་ལྟ་བུར་གྱུར་པ་དང་། བླ་མའི་ཞལ་ནས་ད་ཁྱོད་ཀྱིས་ངའི་བཀའ་བསྒྲུབ་བསམ་ན་ངེས་མེད་དུ་སྤྲང་སྡོམ་གྱི་ཚུལ་དུ་གྲོགས་ཞིག་དང་བཅས་ཏེ་སོང་གསུངས། དེ་ནས་བླ་མའི་བཀའ་བཞིན་རྗེ་དེ་ཉིད་བྱ་བྲལ་གྱི་ཚུལ་དུ་བྱོན་ནས། ཐོག་མར་སེར་འབྲོང་རིར་གནས་བསྐོར་མཛད་ནས་བྱོན་པའི་ལམ་ཁར་མི་དམར་རྟ་དམར་ཅན་ཞིག་བྱུང་ནས་ཁྱེད་སུ་ཡིན། ད་ལྟ་གར་བྱོན་ཟེར་བ་ལ། རྗེ་ཉིད་ཀྱིས་ཅི་ཡང་མི་གསུངས་མར་བྱོན་པའི་མི་དེ་ཡང་གར་སོང་མེད་པར་ཡལ། དེ་ནས་གནས་ཀྱི་གཡོན་ལུང་མདོར་ཕེབས་ནས་མདུན་ལུང་གོང་མའི་ནང་དུ་གསོལ་ཕོག་མཛད་ཅིང་ཡོད་པ་ལ། ཡང་སྔར་གྱི་མི་དེ་འོང་ནས་ཁྱེད་སུ་ཡིན་གང་དུ་བྱོན་ཟེར་བ་ལ། ང་གིས་ལིས་གཏེར་ སྲས་ཡིན། ངེས་མེད་ཀྱི་གནས་སུ་འགྲོ། ཁྱོད་སུ་ཡིན་གསུངས་པས། ཁོ་ན་རེ་ང་སེ་ར་དགོན་ནས་འོང་བ་ཡིན། ལོ་ཆ་ཤས་ལ་འུ་ཅག་མཇལ་རྒྱུ་མ་བྱུང་བ། ད་ལན་ཁྱེད་བསུ་མར་འོང་བ་ཡིནཔས། ད་ང་སྔོན་དུ་འགྲོ། ཁྱེད་རྗེས་ནས་བྱོན་ཤོག་ཟེར་ནས་རྟ་ལ་ལྕག་ཀྱིས་བྲབ་པའི་ཚུལ་བྱས་ནས་མི་སྣང་བར་གྱུར། དེའི་ཉིན་རྗེ་དེ་ཉིད་སྟོང་ར་ཟེར་བའི་ལུང་མདའ་རུ་ཕེབས་ནས་དེ་གར་