Tibetan
འཆུག་ཟེར། རྗེ་ཉིད་ཀྱིས་ཞལ་ནས་བདག་རང་ལ་རིན་པོ་ཆེས་བསྟན་པ་འཛིན་སྐྱོང་འོང་ན་ཁྱད་མེད་པ་སོགས་གསུངས་ནས་བཀའ་གནང་ཐོབ་པའི་ལོ་རྒྱུས་དང་། མཁའ་འགྲོས་ལུང་བསྟན་རེ་འབྱུང་འདུག་པས་བསྟན་ཞབས་འདིར་འོང་འདུན་ཡོད་ཀྱང་སྟབས་ཨེ་ལྡན་དཀའ་མོ་རེད། ཨ་ཁུ་ཁྱོད་ཀྱི་སེམས་རིང་མི་ཉན་སྨྲས། བློ་ལིས་ད་ཇི་ལྟར་བྱས་ཀྱང་ཁྱེད་ཀྱིས་བསྟན་པའི་བདག་པོ་རེ་འོང་ངེས་པ་རེད། རིན་པོ་ཆེའི་ཐུགས་རྩིས་ཤིན་ཏུ་ཆེ་འདུག་པས་དེ་ལུགས་ཀྱིས་ཁྱེད་མ་འཆུག་ཟེར་ནས་སྐྱེལ་མ་མཛད། དེ་ནས་ཡབ་ཀྱི་དྲུང་དུ་ཕྱག་ཕེབས་ནས་ལོ་རྒྱུས་རྣམས་ཞིབ་པར་བསྙད་པས། བླ་མའི་ཐུགས་ ལ་མཉེས་པ་སྒྲུབ་ན་ཚེ་འདི་ཕྱི་ཀུན་ཏུ་དོན་གྲུབ་ངེས་པ་ཡིན་གསུངས། དེ་ནས་ཡབ་རྗེ་བླ་མའི་མདུན་ནས་གཏེར་ཁ་སྔ་ཕྱི་ཀུན་གྱི་དབང་ཁྲིད་ཕྱག་བཞེས་རྣམས་ལེགས་པར་གསན། ཁྱད་པར་ཡབ་རྗེ་བླ་མའི་གསུང་ཆོས་ཀྱིས་དབང་ཁྲིད་ཕྱག་བཞེས་དབྱངས་འདོན་སོགས་ཐམས་ཅད་ཐུགས་སུ་ཞིབ་རྒྱས་སུ་ཆུད་པར་མཛད། དགུང་ལོ་བཅུ་གསུམ་ལོན་ཚེ་ཡབ་རྗེ་བླ་མའི་གཏེར་གསར་གྱི་རྩ་རླུང་། སྐུ་མཆེད་འབྲིང་བ་ལྷ་ཆེན་སྟོབས་རྒྱལ་དང་མཉམ་དུ་ཉིན་ཞག་བརྒྱད་ཅུར་ཁྲིད་སྦྱངས་མཛད་ཚེ། རླུང་ཁུག་རེ་ལ་འཁྲུལ་འཁོར་ཉི་ཤུ་རྩ་ལྔ་རེ་རྫོགས་པར་ནུས་པའི་རླུང་སྟོབས་ལ་མངའ་དབང་མཛད། དེ་སྐབས་མནལ་ལམ་ལ་རྔ་ཡབ་ཟངས་མདོག་དཔལ་རི་རེད་ཟེར་བ་ཡུལ་ཡངས་པ་ཅན་རྒྱ་ཆེ་ལ་ཁྱོན་ཡངས་པའི་དབུས་སུ་རིཙིཏྟའི་དབྱིབས་ལྟ་བུ་ལ། རྩ་བ་ཁྱོན་ཡངས་ཤིང་མཐའ་སྐོར་དུ་སྲིན་པོའི་ཡུལ་ཆེན་བཅོ་བརྒྱད་ཀྱིས་བསྐོར་བ། དེའི་ཕྱི་ལ་ཀེང་རུས་ཀྱི་ལྕགས་རི་གསུམ་རྩེགས་སུ་ཡོད་པ། དེའི་ཕྱི་རོལ་དུ་དུར་ཁྲོད་ཆེན་པོ་བརྒྱད་དང་། མཚོ་ཆེན་པོ་བདུན་གྱིས་བསྐོར་བ། ཡུལ་འཇིགས་སུ་རུང་བ་རི་བོ་ཐམས་ཅད་ཟངས་ལས་གྲུབ་པ། རྩི་ཤིང་དང་ནགས་ཚལ་ལྷུན་འཐུག་པར་གནས་སོ། །རྗེ་ཉིད་ཀྱི་ཐུགས་བསམ་ལ་ཡུལ་འདི་ཟངས་མདོག་དཔལ་རི་ ༈ མིན་པ་འདྲ། སྲིན་ཡུལ་ལང་ཀ་པུ་རི་ཡིན་འདུག་དགོངས། དེའི་སྐབས་མཁའ་འགྲོ་མ་རིག་པའི་དབང་ཕྱུག་བདེ་ཆེན་མོ་དང་། རལ་གྲི་འབར་བ་གཉིས་བྱོན་ནས་འདི་སྐད་གསུངས། ཡ་ཡ། བདེ་ཆེན་མཁའ་འགྲོའི་གྲོང་ཁྱེར། །གཞན་ན་ཡོད་པ་མ་ཡིན། །རང་བྱུང་རིག་པའི་ཀློང་དུ། །འཁོར་འདས་ཆོས་སྐུ་འུབ་ཆུབ། །རྔ་ཡབ་ཟངས་མདོག་དཔལ་རིར། །ངེད་ཅག་རྣམས་ཀྱི་གནས་ཡིན། །དཔའ་བོ་ཁྱོད་ཀྱང་བྱོན་བསམ། །ཟེར་ཚེ་བདག་གི་བླ་མ་རིན་པོ་ཆེ་དགུང་གྲངས་ལོན་པས་རེ་ཞིག་དཔལ་རི་ལ་འདུགསྟབས་མེད་ཀྱང་། གུ་རུ་པདྨའི་ཞལ་མཇལ་ཨེ་འོང་སྙམ་གྱིས་ཞུས་ཚེ། མཁའ་འགྲོ་གཉིས་ཀྱིས་དར་གྱི་འོད་ལི་ལ་བཏེག་ནས་ད་བཞུད་ཟེར། རྗེ་ཉིད་ཀྱང་མཁའ་འགྲོ་གཉིས་ཀྱི་ངག་ལམ་ལྟར་བྱོན་ཚེ། རྗེའི་ཞལ་ནས་ཡུལ་འཇིགས་སུ་རུང་བ་ཕ་གི་རྣམས་ཅི་རེད་གསུངས་ཚེ། མཁའ་འགྲོའི་ཞལ་ནས་ཡུལ་འདི་རྣམས་དཔལ་རིའི་མཐའ་འཁོར་སྲིན་ཡུལ་ལང་ཀ་པུ་རི་སྲིན་ཡུལ་ཏྲི་ཤ་ཀུ་ན་སུ་ཝརྞ་པུ་རི་ལ་སོགས་པའི་ཡུལ་ཆེན་བཅོ་བརྒྱད། ངོ་མཚར་བའི་གནས་བརྒྱད། རང་བྱུང་གི་མཚོ་ཆེན་བདུན། སྦས་ཡུལ་གྱི་ནགས་ཁྲོད། ལྕེ་སྤྱང་རོལ་བརྩེད་ཀྱི་ཤིང་སྣ་ཚོགས་ལ་སོགས་པ་རེད་ གསུངས། རིན་པོ་ཆེའི་རི་དེའི༽སྐེད་པར་ངོ་ཤེས་ཀྱི་གྲུབ་པའི་དབང་ཕྱུག་རྣམས་ཀྱིས་རང་རང་གི་འཁོར་དང་ཕོ་བྲང་སོགས་ཡིད་དུ་འོང་བ་མང་པོ་བང་རིམ་གྱི་ཕྱོགས་ཕྱོགས་སུ་བཞུགས་ཡོད་པ་ལ། རྗེའི་ཞལ་ནས་ཁོང་རྣམས་སུ་རེད་ཞུས་ཚེ། ཌཱཀྐིའི་ཞལ་ནས་ཕ་གི་རྣམས་གུ་རུ་པདྨའི་སྤྲུལ་པ་གཏེར་ཆེན་རྣམས་རེད་གསུངས། ཉིད་ཀྱིས་གྲུབ་པའི་དབང་ཕྱུག་འདི་རྣམས་ལ་མཇལ་འདོད་ཡོད་པས་ང་དེར་འགྲོ་དགོས་གསུངས། ཌཱཀྐིའི་འགྲོ་མི་དགོས་ད་ལྟ་དཔལ་རིའི་ཚོགས་གྲལ་ལ་བྱོན་འོང་ཟེར། དེ་ནས་རི་དེའི་རྩེ་མོ་རུ་ཕྱིན་ཚེ་ཕོ་བྲང་ཆེན་པོ་སུམ་ཐོག་ཏུ་ཡོད་པ། ཕྱོགས་བཞི་རིན་པོ་ཆེ་ཤེལ་མུ་ཏིག་བྱུ་རུ་མུ་མེན་ལས་གྲུབ་པའི་ལྕགས་རིས་བསྐོར་བའི་དབུས་སུ། གཞལ་ཡས་ཁང་ཡངས་ཤིང་རྒྱ་ཆེ་བ་རིན་པོ་ཆེ་སྣ་ཚོགས་ལས་གྲུབ་པ། ཕྱི་ནང་གསལ་སྒྲིབ་མེད་པ་ཟང་ཐལ་དུ་མཐོང་ཞིང་། པདྨ་རཱ་གའི་ས་གཞི་རྣམས་བརྡལ་ཞིང་ཁོད་སྙོམས་པ། རིན་པོ་ཆེ་སྣ་ཚོགས་བཅལ་དུ་བཀྲམ་པ། ཕྱི་རོལ་དུ་མེ་ཏོག་དང་ལྗོན་པ་ལོ་འདབ་འབྲས་བུ་སྣ་ཚོགས་སྨིན་པ། ཆུ་བོ་ཡན་ལག་བརྒྱད་ལྡན་གྱི་ཁྲུས་ཀྱི་རྫིང་བུ་དང་། དཔག་བསམ་ཤིང་གི་མེ་ཏོག་རབ་ཏུ་རྒྱས་པའི་སྟེང་ན་བྱ་རིགས་མི་འདྲ་བ་སྣ་ཚོགས་ཀྱིས་ཆོས་ཀྱི་སྒྲ་སྒྲོགས་པ། སྤོས་ ༈ དང་དྲི་བཟང་གི་ངད་པ་འཐུལ་ཞིང་འཇའ་འོད་ཀྱི་ན་བུན་རླངས་འཁྲིགས་པ། ཕྱོགས་མཚམས་རྣམས་སུ་འཇའ་ཡིས་སྤྲིན་དཔུང་འཁྱིལ་ཞིང་། གནས་དེར་མཐོང་བ་ཙམ་གྱིས་འོད་གསལ་ཆོས་སྐུའི་དགོངས་པའི་རྟོགས་པ་ཀློང་དུ་གྱུར་བར་བྱེད་དོ། །ཕོ་བྲང་གི་ཤར་སྒོ་རིན་པོ་ཆེ་རྡོ་རྗེཕ་ལམ་ལས་གྲུབ་པ། ལྷོ་སྒོ་གསེར་གཙོ་མའི་ཁ་བདབྱས་ཤིང་ཨིནྡྲ་ནི་ལ་ལས་བྱས་ཤིང་གྲུབ་པ། ནུབ་པདྨ་རཱ་ག་དང་། བྱང་མར་གད་ཀྱི་ཁ་བད་བེེཌཱུཪྻ་ལས་གྲུབ་པ། སྒོ་སྐྱོང་རྒྱལ་ཆེན་སྡེ་བཞིས་མཛད་ཡོད་པ་ལ། རྗེའི་ཞལ་ནས་ཡུལ་འདི་དང་ཕོ་བྲང་འདི་ཅི་ཞེས་བྱ་རེད་གསུངས་པས། ཌཱཀྐིས་ཡུལ་འདི་པདྨ་དྲྭ་བ་ཅན་རེད། ཕོ་བྲང་པདྨ་འོད་རང་བྱུང་ལྷུན་གྱིས་གྲུབ་པའི་གནས་རིག་འཛིན་དཔའ་བོ་མཁའ་འགྲོའི་འདུ་ར་རེད ད་ཁྱེད་ཕོ་བྲང་ནང་དུ་འདོང་ཟེར་ཏེ་ཕྱག་ཕེབས་པའི་གསེར་གྱི་ཐེམ་སྐས་ལ་གཡུ་ཡི་ཕྲ་ཚོམ་བྱས་པར་འདུག་པ་དེ་ལ་བརྟེན་ནས་འོག་ཁང་དུ་བྱོན་པས། གཏེར་སྟོན་སངས་རྒྱས་གླིང་པས་ཚོགས་དཔོན་མཛད་ནས་རྩ་གསུམ་དགོངས་པ་འདུས་པའི་བདུད་རྩི་བམ་སྒྲུབ་མཛད་ཀྱིན་འདུག་པ་ལ། རྗེ་ཉིད་ཀྱི་ཕྱག་དང་སྨོན་ལམ་མཛད། ཟབ་གཏེར་གྱི་བསྒྲོ་གླེང་མང་དུ་མཛད་ནས་སངས་རྒྱས་གླིང་པས་ཁྱོད་ལས་འཕྲོ་དག་ པའི་སྐྱེས་བུ་རིགས་ཅན་དུ་འདུག་པས། དགོངས་འདུས་འབྲིང་པོ་བདག་གི་ཟབ་ཆོས་ཀྱི་སྙིང་པོ་ཡིན་པས་གཅེས་ནོར་གྱི་ཚུལ་དུ་ཁྱེད་ལ་གདམས། གྲངས་བདུན་ཕྲག་སོང་ཚེ་ང་ཉིད་མཇལ་བའི་སྐལ་བ་ཡོད་གསུངས། གཏེར་གྱི་ལུང་བྱང་གི་བརྡ་དོན་རྣམས་གནང་། དེ་ནས་བར་ཁང་དུ་བྱོན་ཏེ་ཕར་གཟིགས་ཚུར་གཟིགས་མཛད་ཚེ། ཤཱཀྱ་དྷེ་ཝ་དང་། ཀ་ལ་སིདྡྷི། རྡོ་རྗེ་མཚོ། བདེ་བའི་གོ་ཆ་རྣམས་ཀྱིས་རྡོ་རྗེའི་གཟུངས་མ་མོ་མཛད་ནས་བཀའ་འདུས་ཆོས་ཀྱི་རྒྱ་མཚོའི་བདུད་རྩི་སྨན་སྒྲུབ་མཛད་ཀྱིན་འདུག །དེ་ཀར་མར་ཕྱག་ཕེབས་ཚེ་དབུས་སུ་ཟ་འོག་གི་བླ་བྲེ་དང་གདུགས་འཕེན་སྣ་ཚོགས་བཀྲ་བའི་ཀློང་དུ། རིན་པོ་ཆེའི་ཁྲི་སེངགེ་བརྒྱད་ཀྱིས་གཏེགས་པའི་སྟེང་དུ་གུ་རུ་རིན་པོ་ཆེ་ཨོ་རྒྱན་སྣང་སྲིད་ཟིལ་གནོན་གྱི་ཚུལ་དུ་བཞུགས། དེའི་གཡས་གྲལ་དང་གཡོན་གྲལ་རྣམས་སུ་གྲུབ་ཆེན་རྒྱལ་བ་མཆོག་དབྱངས། དགེ་སློང་ནམ་མཁའི་སྙིང་པོ། གཉགས་ཛྙཱ་ན་ཀུ་མཱ་ར། ཟུར་ཆུང་དཔལ་གྱི་ཡེ་ཤེས། ཟུར་ཆེན་དཔལ་གྱི་རྡོ་རྗེ་ཤེས། དཔལ་གྱི་སེང་གེ །སྣ་ནམ་རྡོ་རྗེ་བདུད་འཇོམས། ཆོས་རྒྱལ་ཁྲི་སྲོང་ལྡེའུ་བཙན། བ་གོར་བེེ་རོ་ཙཱ་ན། རྒྱལ་མོ་གཡུ་སྒྲ་སྙིང་པོ། སྣ་ནམ་ཡེ་ཤེས་དང་། ལྷ་ལུང་དཔལ་གྱི་རྡོ་རྗེ། ཤུད་བུ་ ༈ དཔལ་གྱི་སེང་གེ །ལང་གྲོ་དཀོན་མཆོག་འབྱུང་གནས། ཁྱེའུ་ཆུང་ལོ་ཙཱ། སངས་རྒྱས་ཡེ་ཤེས། སོག་པོ་ལྷ་དཔལ། དཔལ་གྱི་དབང་ཕྱུག །ལྡན་མ་རྩེ་མང་། རྒྱལ་བའི་བློ་གྲོས། སྐ་བ་དཔལ་བརྩེགས་འོ་བྲན་དབང་ཕྱུག །དྲནཔ་ནམ་མཁའ། རྨ་ཐོག་རིན་ཆེན། རྒྱལ་བ་བྱང་ཆུབ་ལ་སོགས་པ་རྗེ་འབངས་རིག་འཛིན་གྱི་ལྷ་ཚོགས་ཐམས་ཅད་སྔགས་བཙུན་གྲུབ་ཐོབ་ཀྱི་ཆས་རང་རང་བསྟུན་ནས་ལྷང་ངེར་ལྷམ་མེར་བཞུགས་ཡོད་པ་ལ་རྗེ་ཉིད་ཀྱི་ཕྱག་མཛད་ནས་གསོལ་བ་འདི་ལྟར་བཏབ། ཨེ་མ་ཧོཿ སྣང་བ་ཁྱབ་བརྡལ་ཡངས་པའི་ཞིང་ཁམས་ན། །གདོད་མའི་མགོན་པོ་ཀུན་བཟང་རྡོ་རྗེ་འཆང་། །པདྨ་ཐོདཕྲེང་རིགས་གསུམ་འགྲོ་བའི་མགོན། །མཚོ་སྐྱེས་རྡོ་རྗེ་འཆང་ལ་གསོལ་བ་འདེབས། །ཐུགས་རྗེ་ཞི་བའི་དབྱིངས་སུ་མི་གཟིམ་པར། །བརྩེ་བས་ཐུགས་རྗེས་བདག་རྒྱུད་སྨིན་གྲོལ་ནས། །ཚེ་རབས་ཀུན་ཏུ་འབྲལ་མེད་ཐུགས་རྗེས་ཟུངས། །རིགས་ཀུན་ཡོངས་འདུས་གུ་རུ་པད་འབྱུང་གི། ། སྨོན་ལམ་མཐུ་ལས་གྲུབ་པའི་རིག་པ་འཛིན། །མ་ངེས་གང་འདུལ་ཐབས་ཀྱིས་གར་བསྒྱུར་བ། །རྗེ་འབངས་རིག་འཛིན་དཔའ་བོ་དཔའ་མོའི་ཚོགས། །བདག་ནི་མི་ཕྱེད་དད་པས་གསོལ་བ་ འདེབས། །ཐུགས་བརྒྱུད་རྟོགས་པའི་བྱིན་རླབས་དངོས་གྲུབ་སྩོལ། །འདི་ནས་མི་གནས་མྱ་ངན་འདས་འོག་ཏུ། །བཟང་ངན་འབྲེལ་ཐོབ་མཐོང་ཐོས་དྲན་རེག་ཏུ། །འགྲོ་ཀུན་བདག་གིས་དབང་བསྡུས་ཆོས་ལ་བཙུད། །པད་རི་པདྨ་འོད་དུ་འདྲེན་པར་ཤོག །དེ་ཚེ་དཔའ་བོ་དཔའ་མོའི་ཚོགས་གྲལ་དུ། །རིགས་གཉིས་སྦྱངས་བསྒྲོད་ལམ་ལ་མི་ལྟོས་པར།སྨིན་གྲོལ་གདམས་པའི་ལམ་ལ་༼མི་དགོས་༽དཔལ་ཐོབ་ནས། སྟོན་འཁོར་དགོངས་པ་དབྱེར་མེད་སངས་རྒྱས་ཤོག །ཅེས་གསུངས་མ་ཐག་མཁའ་འགྲོ་རྣམས་ཀྱིས་དབྱངས་གཅིག་དང་མགྲིན་གཅིག་ཏུ་འདི་སྐད་གསུངས། དྲི་མས་མ་གོས་རྒྱལ་བ་རྣམས་དང་མཚུངས། །ཀུན་དང་མཐུན་པའི་ཡོན་ཏན་བསམ་མི་ཁྱབ། །སྐྱེས་མེད་མཁའ་འགྲོའི་ཉེ་བའི་སྲས་ཐུགས་ཀྱི་བུ་ཡིན། མཆན། གཅིག་པུ། །འོད་སྣང་མཐའ་ཡས་རྒྱལ་ཚབ་སྤྲུལ་པའི་སྐུ། །ནུས་ལྡན་ཐུགས་ཀྱི་འོད་ཟེར་རིག་པ་འཛིན། །གནས་འདིར་ཕེབས་པ་སྐལ་བཟང་ལས་འཕྲོ་ལྡན། །གཟུངས་མ་རྡོ་རྗེ་སྤུན་གྲོགས་མི་ཤེས་སམ། །གུ་རུ་པདྨའི་དྲུང་དུ་བྱོན་ལགས་སམ། །ཞེས་ཟེར་ནས་རྗེ་ཉིད་ཀྱི་ཕྱག་གཡས་གཡོན་ལ་འཇུས་ནས་ཞབས་ཞུ་བྱེད་ཚུལ་མཛད་ནས་ཡར་ཕོ་བྲང་དུ་བྱོན་པས། རྗེ་འབངས་སྟོན་ ༈ འཁོར་གྱི་ཚོགས་རྣམས་ཀྱིས་དབྱངས་གཅིག་དང་མགྲིན་གཅིག་ཏུ་འདི་སྐད་གསུངས། ཨེ་མ་ངོ་མཚར་རྨད་པོ་ཆེ། །རྡོ་རྗེའི་རིག་པ་འཛིན་པ་ཁྱེད། །པདྨའི་སྨོན་ལམ་ཐུགས་བསྐྱེད་ཀྱིས། །ལས་སྐལ་ལྡན་པའི་དཔལ་དུ་ཤར། །གང་འབྲེལ་ཞིང་འདི་འདྲེན་སྟོན་མཛད། །ཤེས་རབ་གསུམ་གྱི་རྩལ་དང་ལྡན། །བརྩེ་ཆེན་དབང་ཕྱུག་ཁྱོད་མིན་ནམ། ལས་དང་སྨོན་ལམ་དུས་འཛོམས་པས། །ཞིང་འདིར་བྱོན་པ་ངོ་མཚར་ཆེ། །གསུངས་ནས་ཐམས་ཅད་ཐུགས་དགྱེས་ཚུལ་མཛད། དེ་ནས་རྗེ་ཉིད་གུ་རུ་རིན་པོ་ཆེའི་དྲུང་དུ་བྱོན་ནས་ཕྱག་ཕུལ་ཏེ་གསོལ་བ་བཏབ་པ་ནི། རྗེ་བཙུན་གུ་རུ་རིན་པོ་ཆེ། །ཁྱེད་ནི་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཡོན་ཕྲིན་ལས་བདག །འགྲོ་བ་ཀུན་དང་ཁྱད་པར་དུ། །བདག་ཅག་བོད་འབངས་དད་ཅན་ལ། །ཐུགས་རྗེས་ལྷག་པར་གཟིགས་པ་ཡི། །བཀའ་དྲིན་དྲན་ནོ་འཁོར་ཐབས་བྲལ། །རྒྱལ་ཀུན་སྤྱི་གཟུགས་རྡོ་རྗེ་འཆང་། །བདག་ནི་ཁྱེད་ལས་རེ་ས་མེད། །དུས་ཀུན་འབྲལ་མེད་རྗེས་བཟུང་ནས། །རྡོ་རྗེ་ཐེག་པའི་མྱུར་ལམ་མཆོག །མ་ནོར་ཚུལ་བཞིན་བརྟན་ཐོབ་སྟེ། གཞོན་ནུ་བུམ་སྐུའི་འོད་ཀློང་དུ། །པད་འབྱུང་རྗེ་དང་དབྱེར་མེད་ཤོག །ཅེས་གསོལ་ བ་བཏབ་མཐར། གུ་རུ་རིན་པོ་ཆེའི་ཞལ་འཛུམ་པའི་ངང་ནས་རྡོ་རྗེ་དྲིལ་བུ་ཞིག་གནང་བས་རྗེ་དེ་ཉིད་ཀྱིས་ཅི་ཡིན་དགོངས་ཚེ། ཌཱཀྐི་ན་རེ་ཁྱེད་ཀྱི་དྲིལ་བུ་དཀྲོལ་གསུངས་ནས་དཀྲོལ་ཚེ། སྐད་སྙན་ལ་རིང་བ་སྐྱོན་ཐམས་ཅད་བྲལ་བ་གཅིག་འདུག་པས། རྗེའི་ཞལ་ནས་ཌཱཀྐི་འདིའི་དོན་ཅི་རེད་གསུངས་པས། ན་རེ་རྡོ་རྗེ་དྲིལ་བུ་གསང་སྔགས་གསང་བའི་རྫས་ཡིན་པས། ཁྱོད་ལ་མཁའ་འགྲོའི་ཡང་ཏིག་གི་ཆོས་ལ་དབང་བ་ཡིན་གསུངས་ནས། གསང་སྤྱོད་མྱུར་ལམ་གྱི་སྒྲུབ་སྡེ་མོ་རྡོ་རྗེ་མཚོས་མཛད་ནས་མཚན་གྱི་ཅོད་པན་པད་མ་འགྲོ་འདུལ་གསང་སྔགས་གླིང་པ་རུ་གསོལ། གུ་རུ་རིན་པོ་ཆེས་དེར་འདུས་ཀྱི་རིག་འཛིན་མཆེད་ལྕམ་རྣམས་ལ་རིག་པ་དོན་གྱིས་དབང་གསུང་སྐབས། རྗེ་དེ་ཉིད་ཀྱིས་མེ་ཏོག་ནུབ་ཏུ་བབ་པའི་རིག་འཛིན་པདྨ་དགྱེས་པའི་རྡོ་རྗེ་རུ་ཅོད་པན་དུ་གནང་ནས་པུ་སྟཀ་སུམ་ཅུའི་བཀའ་དབང་དང་གཏེར་འདོན་པའི་དུས་ཚིག་གཏེར་གནས་ཐབས་གྲོགས་ཆོས་བདག་ལུང་བྱང་དང་བཅས་པ་ལེགས་པར་བསྩལ། རྗེ་འབངས་རིག་འཛིན་རྣམས་ཀྱིས་ཐུགས་དགོངས་དབྱེར་མེད་ཀྱི་ངང་ནས་འདི་ལྟར་གསུངས། ཡེ་གདོད་ནས་དག་པ་ཀ་དག་གི་གནས་ལུགས། །གནས་འགྱུ་བ་རང་རིག་འོད་གསལ་དང་དབྱེར་མེད། །དབྱིངས་ཁྱབ་བརྡལ་ ༈ ཡེ་ཤེས་རང་བབས་ལ་སྐྱོངས་དང་། །དུས་ད་ལྟའི་ཐད་ཀའི་ཤེས་པ་ཉིད་རིག་པ། །བློས་བསྒོམ་པའི་དྲན་འཛིན་རང་གྲོལ་ལ་ཐོངས་དང་། །ངེད་རིག་འཛིན་རྣམས་ཀྱི་དགོངས་པ་དང་དབྱེར་མེད། །ཐུགས་རྒྱུད་ཀྱི་ཡོན་ཏན་ཕ་ཕོག་ཏུ་ཐོབ་ནས། །བསྟན་འགྲོ་བའི་དོན་ཆེན་འབད་མེད་དུ་འབྱུང་ངོ་། །ཞེས་གསུངས། དེ་ནས་ནམ་སྙིང་དང་གཡུ་སྒྲ་བེེ་རོ་རྣམས་ཀྱིས་གསང་གཏམ་གྱི་ཚུལ་དུ་ཞལ་ཏ་མང་དུ་མཛད། ཁྱད་པར་དགོངས་ཟབ་ཀྱི་གནད་འདི་ལྟར་གསུངས། གདོད་མའི་རིག་པ་རང་བཞིན་སྤོས་དང་བྲལ། །རྟག་བརྟན་ཡོངས་གྲུབ་བདེ་ཆེན་འདུས་མ་བྱས། །ནམ་མཁའི་མཚན་ཉིད་རྣམ་ཐར་གསུམ་དང་ལྡན། །ཕྱོགས་དང་རིས་མེད་མཉམ་ཉིད་ལྟ་བའི་ངང་། །གཉུག་མའི་ཡེ་ཤེས་འགགས་མེད་སྒོམ་པའི་ཀློང་། །ཐ་དད་གཟུང་བའི་ཡུལ་དང་ཡུལ་ཅན་ཀུན། །རེ་དོགས་བཟོ་བཅོས་མ་བསླད་སྤྱོད་པ་ཡི། །ཏིང་འཛིན་རིག་པའི་ངང་བཞག་གནད་ལ་སྐྱོངས། །གཞི་འབྲས་དབྱེར་མེད་འོད་གསལ་ཆོས་ཀྱི་སྐུ། །རང་རིག་མངོན་གྱུར་གདོད་མའི་སངས་རྒྱས་འགྲུབ། །ལྷུན་གྲུབ་བདེ་བ་ཆེན་པོ་ཨེ་མ་ཧོ། །དེ་སྐད་རྡོ་རྗེའི་ཚིག་འདི་ཙིཏྟར་སྦོས། །ཞེས་གསུངས་ཏེ། ཤོག་སེར་ལྔ་གནང་ནས། འདི་ཆོས་བོད་དུ་མ་བསྒྱུར་བ་མཁའ་འགྲོའི་སྙིང་ཁྲག་ལྟ་བུ་ཡིན་པས་གཅེས་ནོར་དུ་ཁྱོད་ལ་སྤྲད། ལྔ་ཚན་བཅུའི་དུས་སུ་གསལ་འོང་གསུངས། དེ་ནས་ཡེ་ཤེས་མཚོ་རྒྱལ་གྱིས་དབུ་མཛད་ནས་མཁའ་འགྲོ་རྣམས་ཀྱིས་ཕོ་བྲང་གི་སྒོ་ཁྱམས་སུ་སྐྱེལ་མ་མཛད་དོ། །རྗེ་ཉིད་ཀྱིས་ཐུགས་ཆུང་གི་ཚུལ་མཛད་ནས་ཡེ་ཤེས་མཚོ་རྒྱལ་གྱི་ཞབས་སྤྱི་བོར་བླངས་ནས། བདག་སྐྱེ་བ་ནས་ཚེ་རབས་ཀུན་ཏུ་རྒྱལ་ཡུམ་རྡོ་རྗེ་ཕག་མོ་ཁྱེད་ཀྱིས་མངོན་སུམ་དུ་རྗེས་སུ་བཟུང་ནས་མཆོག་དང་ཐུན་མོང་གི་དངོས་གྲུབ་དམ་པ་སྩལ་དུ་གསོལ། ཞེས་གསུངས་པས། རྗེ་མོའི་ཞལ་ནས། ཨེཿསྟོང་པ་ཤེས་རབ་ཆེན་པོའི་མཁའ། །ཝ་མི་འགྱུར་རྡོ་རྗེ་བདེ་བ་ཆེ། །ཟུང་འཇུག་ཐབས་ཤེས་གཉིས་སུ་མེད། །ཁ་སྦྱོར་དགའ་བཞི་སྟོང་པའི་དབྱིངས། །འོད་གསལ་སྣང་བའི་ལམ་དུ་མཇལ། །ཞེས་གསུངས་ཏེ་དགའ་འཁྱིལ་གྱི་དབུས་སུ་ཨ་ལི་དང་ཀ་ལི་གཡས་གཡོན་དུ་འཁོར་བའི་ཙཀ་ལིའི་དབྱིབས་ལྟ་བུ་ཞིག་གནང་ནས་འདི་ང་མི་བརྗེད་པའི་རྟེན་ཡིན་གསུངས། གཏེར་གྱི་སློང་ཚད་དང་གཏེར་འདོན་པའི་ཚུལ་གྱི་ཞལ་ཏ་མཛད། དེ་ནས་རྗེ་ཉིད་ཀྱིས་སྟེང་ཁང་ལ་བྱོན་དགོས་གསུངས་ཀྱང་། ཌཱཀྐི་རྣམས་ཀྱིས་ད་ལན་མིན་རྗེས་ནས་སྟེང་ཁང་དུ་ཕྱག་ཕེབས་ན་ཆོག་གསུངས་ནས། ༈ སྔར་གྱི་མཁའ་འགྲོ་གཉིས་པོས་དར་གྱི་འོད་ལི་ལ་འཇུས་ནས་རྗེ་ཉིད་ཀྱི་ཞབས་ཞུས་ཚུལ་མཛད་ནས་ཕོ་བྲང་གི་ཕྱི་རོལ་དུ་ཕེབས། དེའི་ཤར་ཕྱོགས་སུ་ས་གཞི་ཐམས་ཅད་ཤེལ་ལས་གྲུབ་པ་ལྗོན་ཤིང་རྣམས་དཀར་ལ་དྲི་བསུང་འཐུལ་བ་མེ་ཏོག་སྣ་ཚོགས་བཀྲ་བའི་སྟེང་ན་བྱ་བྱིའུ་ཐམས་ཅད་དཀརགསལ་སྣུམ་ལ་འདྲིལ་བ་སྐད་སྙན་པས་ཆོས་ཀྱི་སྒྲ་སྒྲོགས་པ། ཆུ་མཚོ་ཐམས་ཅད་ཟླུམ་ལ་འཁྱིལ་ཞིང་ཡན་ལག་བརྒྱད་དང་ལྡན་པའི་དབུས་སུ་རིན་པོ་ཆེ་མན་ཤེལ་ལས་གྲུབ་པའི་ཕོ་བྲང་ཚད་དང་མཚན་ཉིད་མ་ལུས་རྫོགས་པར་འདུག་པས། རྗེ་དེ་ཉིད་ཀྱི་ཞལ་ནས་ཡུལ་ཞིང་ཁམས་ཕ་གི་ཅི་རེད་གསུངས་པས། ཌཱཀྐིས་ན་རེ་ཕགི་རྡོ་རྗེའི་རིགས་ཀྱི་ཞིང་ཁམས་རྣམ་པར་གསལ་བའི་ཞིང་དེ་རེད་ཟེར། དེར་ལྷགས་དགོས་གསུངས་ཀྱང་ད་དུང་མིན། འཇིག་རྟེན་དུ་གངས་རི་ཐོད་དཀར་བྱ་བ་འདི་དང་ཁྱད་མེད། ཁྱོད་དེར་སོང་དང་གནས་འདི་དང་ཉེ་འོང་ཟེར། ཡང་ནུབ་ཕྱོགས་ན་བྱོན་ཚེ་ས་གཞི་ཐམས་ཅད་པདྨ་རཱ་ག་ལས་གྲུབ་པ་ལྗོན་ཤིང་དང་མེ་ཏོག་དང་ཆུ་མཚོ་ལ་སོགས་དམར་གསལ་དྲི་བཟང་འཐུལ་བཀ་ལ་པིང་ཀ་ལ་སོགས་བྱང་ཆུབ་སེམས་དཔའི་སྤྲུལ་པའི་བྱ་རིགས་རྣམས་ཀྱིས་ཆོས་ཀྱི་སྒྲ་འུར་དིར་སྒྲོགས་པའི་དབུས་སུ་རིན་པོ་ཆེ་ལས་གྲུབ་པའི་ཕོ་ བྲང་སུམ་བརྩེགས་ཡོད་པས་ཡུལ་ཕ་གི་ཅི་རེད་གསུངས། ཌཱཀྐི་ན་རེ་ཞིང་ཁམས་ཕ་གི་འོད་ཟེར་མཐའ་ཡས་པདྨ་རིགས་ཀྱི་ཞིང་ཁམས་རེད་ཟེར། དེར་ལྷགས་དགོས་གསུངས་ཀྱང་ད་དུང་མིན། འཇིག་རྟེན་དུ་གུ་རུའི་སྐུ་གསུང་ཐུགས་ཀྱི་གནས་གསུམ་ཡོད་པས་དེ་གར་ཁྱོད་སོང་དང་གནས་འདི་དང་ཉེ་འོང་གསུངས། ཡང་རྗེའི་ཞལ་ནས་ཞིང་འདིའི་ལྷོ་བྱང་གཉིས་ལ་ཞིང་མེད་དམ། ཡོད་ན་མི་མངོན་ནམ་གསུངས་པས། ཌཱཀྐིས་ན་རེ་ཤར་ནུབ་ཀྱི་ཞིང་འདི་དཔལ་རིའི་བར་ཁང་སྟེང་གི་འོད་ཟེར་རེད། ད་དུང་བསྒྲོད་པའི་དུས་མིན་པས་ཁྱོད་ཀྱིས་མ་བརྗེད་པར་ཞིང་འདིའི་བཀོད་པ་རྣམས་རྗེས་འཇུག་གི་ལས་ལྡན་རྣམས་ལ་སྨྲོས་ཤིག་དང་། ནམ་ཞིག་ན་ཞིང་འདིར་སྐྱེ་བར་ཐེ་ཚོམ་མེད་དོ་ཟེར་བ་དང་མཉམ་དུ་མནལ་ལས་སད་དོ། །ནངས་སྔ་མོ་ཡང་བླ་མའི་དངོས་སློབ་བླ་མ་དགེ་བའི་བཤེས་གཉེན་དགེ་ལེགས་དཔལ་བཟང་ཞེས་པས་རྩ་རླུང་གི་ཁྲིད་དཔོན་ཡིན་པས་ཁོང་ལ་མནལ་ལམ་གྱི་ལོ་རྒྱུས་རྣམས་གསུངས་ཚེ། དེ་ཉིད་ཀྱི་ཞལ་ནས་ཁྱོད་ཀློང་ཆེན་པའི་སྤྲུལ་པ་ཡིནཔར་བླ་མ་རིན་པོ་ཆེའི་གསུངས་བཞིན་དང་མནལ་ལམ་ལྟར་ན། བོད་ཡུལ་གྱི་གནས་ཆེན་དང་ཁྱད་པར་གངས་རི་ཐོད་དཀར་དུ་བྱོན་དགོས་པ་ཨེ་ཡིན་སྙམ། ད་རྟེན་འབྲེལ་གྱི་ཐོག་མ་ཡིན་པས་ཞིང་ ཁམས་ཀྱི་སྨོན་ལམ་དང་། གུ་རུ་ཡབ་ཡུམ་གྱི་སྒྲུབ་ཐབས་བྱིན་རླབས་ཆེ་བ་ཞིག་གནང་དུ་གསོལ་གསུངས་པས། རྗེ་དེ་ཉིད་ཀྱིས་ཀྱང་ཆོས་ཀྱི་བདག་པོར་དགོངས་ནས་དག་སྣང་སྐོར་གསུམ་གྱི་ཆོས་གཏེར་འགའ་རེ་གསུངས། དེ་ནས་དགུང་ལོ་བཅུ་བཞི་བཅོ་ལྔའི་སྐབས་འབུལ་སྡུད་ལ་བྱོན་སྐབས། དགེ་རྩེ་གོ་འཕན་ཟེར་བའི་མཐའ་བ་རྒན་མོ་མ་བུ་གཉིས་ཡོད་པ་དེ་འཁོན་འཐབ་ཞིག་ལ་རྐྱེན་བྱས་ཏེ་བུ་མོ་གྲི་རུ་ཤི་བས། དེ་ཀར་པོ་ཉིད་འབོད་པ་ཐོན་པས་ཁོང་མི་བྱོན་གསུངས་ཀྱང་། བླ་མཆན་སྒོ་སྤའི་ཟབ་གསང་ཞེས་པས་བྱོན་དགོས་ཟེར་ནས། བྱོན་ཚེ་སྤུར་རོ་ལང་བྱེད་བྱུང་བས། རྗེ་དེ་ཉིད་དགོངས་པ་ལ་ཅུང་ཟད་བཞུགས་ནས་སྤུར་གྱི་སྟེང་དུ་ཤམ་འདུག་མཛད་དེ་བགེགས་བསྐྲད་ལུས་བྱིན་སོགས་གསུངས་ཚེ། རོ་ལང་ཞི་ནས་དེར་འདུས་ཀྱི་མི་རྣམས་ངོ་མཚར་དུ་གྱུར་ཏོ། །དེ་ནས་ཡབ་རྗེ་གཏེར་ཆེན་རིན་པོ་ཆེ་ལ་མཁའ་འགྲོའི་ལུང་བསྟན་བྱུང་ནས། རྗེ་དེ་ཉིད་ལ་སྐུ་གེགས་ཤིན་ཏུ་ཆེ་བར་འདུག་པས་རང་གཏེར་གྱི་ཁྲོས་མའི་མཚམས་དམ་རྒྱར་བཞུགས་དགོས་བླ་མའི་བཀའ་གནང་ཕེབས་ཚེ། དེ་ལྟར་དུ་ཟླ་ཞག་བརྒྱ་བཞུགས། དེའི་ཚེ་