Tibetan
གཅིག་ཉིནགསོ་སྤྲུལ་རིན་པོ་ཆེ་སང་མ་གཏོགས། ཀུན་གྱིས་ལོ་གསར་བྱེད་ཅིང་དགའ་སྤྲོ་བྱས་པ་མཐོང་བ་ལ་རྐྱེན་བྱས་ཏེ། ཡིད་ཤིན་ཏུ་སྐྱོ་བའི་རྗེ་ལ་གདུང་བའི་དབྱངས་ཀྱིས་སྨྲེ་སྔགས་འདི་ལྟར་གསོལ། ཀྱེེ་མ་ཀྱི་ཧུད་འདུས་བྱས་འཁོར་བའི་ཆོས། །གང་ལ་བསམ་ཀྱང་སྐྱོ་བ་འཕེལ་བའིགཞི། །ཅི་ལ་བསམ་ཀྱང་དགོས་མེད་ངལ་བའི་རྒྱུ། །སྙིང་བརྩེ་བའི་བུ་དེ་ཕྱི་མར་སོང་། །གྲོགས་ཡིད་བཞིན་ནོར་བུ་ཞིང་དུ་བྱོན། །ང་བདེ་སྐྱོང་དབང་མོ་ཤུལ་དུ་བོར། །སྐྱབས་གནས་མེད་གཅིག་པུར་ས་མཐར་སྤྱུགས། །སེར་དགོན་གངས་རི་འདྲ་བའི་གཡས་ཟུར་དུ། །སྡུག་མཐའ་དེ་སེམས་ལ་དེངས་དུས་མེད། །ཕ་དུས་གསུམ་སངས་རྒྱས་ལས་ལྷག་པས། །ཡིད་དུ་ངེ་བ་ལ་འབྲལ་མེད་མཛོད། །ཐུགས་ཞི་བའི་དབྱིངས་སུ་མི་གཟིམས་པར། །མགོན་མེད་པའི་བུ་མོ་བསྐྱབ་ཏུ་གསོལ། བྱམས་བརྩེ་བས་གཅེས་པར་མི་བསྐྱང་བར། །ཐུགས་ཞི་བར་གཤེགས་པ་ཅིའི་ཕྱིར་ལགས། །མགོན་ན་ནང་བཞུགས་ཀྱང་ད་ལོ་མེད། །གདམས་ངག་རྣམས་དཔེ་ལ་རེ་དགོས་བྱུང་། །སྙིང་བརྩེ་བའི་ཉམས་ལེན་ཞུ་ས་མེད། །འོ་དོད་ཀྱིས་གསོལ་འདེབས་བྱེད་དགོས་བྱུང་། །ཞལ་ཉི་མའི་དཀྱིལ་འཁོར་མི་མཐོང་བར། །སྐུ་གདུང་ལ་རེ་ལྟོས་བཅའ་དགོས་བྱུང་། །དཔལ་སྟོན་གྱི་བླ་མ་དབྱིངས་སུ་ཡིབ། །སྨིན་གྲོལ་གྱི་གདམས་པ་ཞུ་ས་མེད། །འཁོར་བུ་སློབ་རང་རང་ཡུལ་དུ་བྱོན། །ང་གྲོགས་མེད་གཅིག་པུར་ཡུལ་ཕུད་བྱས། སེམས་སྡུག་གིས་མནར་ཀྱང་བཤད་ས་མེད། །ཐབས་ཚོགས་ཆེན་མྱུར་དུ་རྫོགས་པའི་ཕྱིར། །རྒྱུ་ཇི་སྙེད་དངོས་སུ་ཕུལ་ས་མེད། །ཡིད་མོས་ཀྱིས་མཆོད་པ་བྱེད་དགོས་བྱུང་། །ཡུལ་མི་ཀུན་དགའ་སྤྲོས་ལོ་གསར་བྱེད། །ངའི་སེམས་གཏིང་སྡུག་གིས་མ་བཟོད་ནས། །ལྷ་བླ་མར་འོ་དོད་འབོད་དགོས་བྱུང་། །ཞལ་རྟ་བདུན་དཀྱིལ་འཁོར་དྲན་པའི་དུས། །གསལ་བྱེད་སྒོར་ཆུ་རྒྱུན་ཆད་ས་མེད། །གསུང་བྱམས་པས་གཅེས་པར་བསྐྱང་དྲན་དུས། །ལུས་སྲོག་ལ་མི་ལྟོས་ཅི་བྱེད་སྙམ། །ཐུགས་བརྩེ་བའི་གདམས་ཁྲིད་གནང་དྲན་དུས། །སྡུག་མཐའ་དང་སྲོག་ཀྱང་3 ཕང་བ་མེད། །ད་ཅི་ལ་བསམས་ཀྱང་བླ་མ་དྲན། །ཡུལ་གང་དུ་བསྡད་ཀྱང་བླ་མ་དྲན། །གྲོགས་སུ་དང་འགྲོགས་ཀྱང་བླ་མ་དྲན། །ཆོས་གདམས་ཁྲིད་བསམས་དུས་བླ་མ་དྲན། ། མགོན་ནམ་སྙིང་བཛྲ་སྨོན་ལམ་དང་། །ལྷ་པད་འབྱུང་ཡབ་ཡུམ་ཐུགས་རྗེ་ཡིས། །ངའི་ཚེ་རབས་གཏན་གྱི་གསང་བའིགྲོགས། །དུས་མི་འགྱང་དངོས་མཇལ་སྨོན་ལམ་མཛོད། །ཅེས་འོ་དོད་འབོད་པའི་ཚེ། སྤྲིན་གསེབ་ནས་མཁའ་འགྲོ་བདེ་བའི་གོ་ཆ་དང་། རིག་པའི་རལ་གྲི་ཡིན་སྐད་པ་གཉིས་ཀྱིས་འདི་སྐད་ཟེར། ཨེ་ཨེཿ གསོན་དང་རིགས་ལྡན་མཛའ་ན་མོ། །སྣང་བའི་ཆོས་ཀུན་སྒྱུ་མར་རྩལ་སྦྱོང་མཛོད། །རྟག་བརྟན་ཡོངས་གྲུབ་རིག་པའི་རྡོ་རྗེ་འདི། །པདྨ་ལས་འབྲེལ་ཐུགས་དང་གཉིས་སུ་མེད། །ད་ལྟ་ནང་གསལ་ཆོས་སྐུའི་ཞིང་དུ་བཞུགས། སྐུའི་བཀོད་པ་ཡེ་ཤེས་འཁོར་ལོར་རྫོགས། །འགགས་མེད་རང་གསལ་ཡེ་ཤེས་རོལ་པ་འདི། །པདྨ་ལས་འབྲེལ་རྩལ་དང་གཉིས་སུ་མེད། །ད་ལྟ་མི་གནས་འོག་མིན་གནས་སུ་བཞུགས། །སྐུ་ཡི་བཀོད་པ་ལོངས་སྐུའི་ཞིང་དུ་བཞུགས། །ཀུན་རིག་ཀུན་ཁྱབ་ཡེ་ཤེས་རོལ་རྩལ་དང་། །པདྨ་ལས་འབྲེལ་དབྱེར་མེད་ཐ་དད་བྲལ། །ད་ལྟ་གང་འདུལ་མོས་ངོར་ཕྱག་རྒྱའི་ གར། །ཆུ་ཟླ་ཇི་བཞིན་བསྟན་འགྲོའི་དཔལ་དུ་ཤར། །སྐུ་ཡི་བཀོད་པ་ཟུར་ཙམ་ཁྱོད་ལ་གདམས། །ཙིཏྟར་རྒྱས་ཐོབ་ལས་ཅན་དོན་དུ་སྤེལ། །འདི་ལ་གང་འབྲེལ་དཔལ་རིར་འཁོད་པར་ངེས། །ཞེས་ཟེར་ནས། རྗེ་དེ་ཉིད་སྐུ་ན་ཆུང་དུས་ཀྱི་སྐབས་སུ་ཚུན་ཆདགསལ་པོར་ཡོད་པ་ཞིག་བསྟན་ཏེ། འདི་གཏན་ལ་ཕོབ་དང་འགྲོ་དོན་ཆེན་པོ་འབྱུང་ངེས་ཟེར་བ་ལ་རྐྱེན་བྱས་ཏེ། སྔར་བས་ཀྱང་བརྡ་དོན་ཤིན་ཏུ་གསལ་པོ་རེ་ཡོད་སྐབས། རྡོ་རྗེའི་ལུང་གིས་བསྔགས་པ་ཆོས་ཀྱི་བདག་པོ་དྲག་སྔགས་མཐུ་སྟོབས་རྩལ་གྱིས་ཡར་ཚེས་དགེ་བར་བཀྲ་ཤིས་པའི་རྫས་དང་དྲི་བྲལ་ལྷ་རེག་སྐྱེས་བཅས། བྱེད་ཀྱི་ཟབ་ཆོས་ཀྱི་ནང་ནས་བྱིན་རླབས་དང་ངོ་མཚར་ཆེ་བའི་པུ་སྟ་ཀ་གཅིག་གི་བརྡ་དོན་གསལ་འདུག་པ་རྨིས་པས།དེ་བདག་གི་ཆོས་སྐལ་དུ་ལྷག་ལུས་མེད་པར་འབེབ་ཐུབ་བཀའ་དྲིན་མ་ཆུང་ཞེས་ཡང་ཡང་ངག་ཕྲིན་འབྱོར་བ་དང་། ཁྱད་པར་རྗེའི་ཟབ་གཏེར་ཡོངས་རྫོགས་ཀྱི་ཆོས་ཀྱི་བདག་པོར་རྡོ་རྗེའི་ལུང་གིས་ཟིན་པ་ཐུགས་ཀྱི་སྲས་གཅིག་པུ་མཚན་བརྗོད་པར་དཀའ་ནའང་དོན་གྱི་སླད་དུ་སྨྲོས་ན། རིག་འཛིན་པདྨ་སྣ་ཚོགས་རང་གྲོལ་འདུས་པ་རྩལ་གྱིས་རིན་ཆེན་གཉིས་པ་དང་པཉྩ་ཀ་ཤིའི་མདངས་འཛིན་གྱི་སྐྱེས་བཅས་བཀའ་༈ བསྐུལ་སྤྱི་བོར་ཕེབས་པ་དང་། ཉེ་ཆར་པདྨའི་ལུང་ཟིན་ཡི་གེའི་འདུ་བྱེད་བསླབ་གསུམ་ཚུལ་ཁྲིམས་ལྡན་པ་ཤཱི་ལ་བཛྲ། རྗེའི་དངོས་སློབ་རྟོག་བྲལ་ནམ་མཁའི་རྣལ་འབྱོར་ལ་ཤུལ་བླ་མ་གསང་སྔགས་རྡོ་རྗེ། ཉེ་ཆར་ཆོས་ཀྱི་བདག་པོ་དགེ་བཙུན་དཔལ་ལྡན་བློ་གྲོས་སོགས་རྡོ་རྗེའི་མཆེདགྲོགས་རྣམས་ཀྱིས་ལན་བརྒྱར་བསྐུལ་བ་ཟབ་ཕྱིར་བཟློག་ཏུ་མ་ནུས་པར། སྔོན་བྱོན་གྲུབ་པའི་དབང་ཕྱུག་དུ་མའི་རྡོ་རྗེའི་ལུང་གིས་གསལ་བ་དང་། རྗེ་དེ་ཉིད་ཀྱི་མཆོག་གི་རྡོ་རྗེའི་གཟུངས་མར་གུ་རུ་པདྨའི་ལུང་གིས་བསྔགས་པར་མཛད་པ་ཀུན་བཟང་བདེ་སྐྱོང་ཆོས་ཉིད་དབང་མོའམ། དོན་ལ་མདོ་མེད་ཆོལ་པོ་སྙོམས་ལས་པ་དུས་མཐའི་གཏེར་མིང་འཛིན་པ་སློབ་འབངས་ཡོངས་ཀྱི་ཐ་ཤལ་བ་བདེ་ཆེན་བདེ་བའི་རྡོ་རྗེས་རང་ལོ་སོ་བཞིའི་ལོར་ཤིང་གླང་ཟླ་བ་བརྒྱད་པའི་ཡར་ཚེས་ལྔའི་ཉིན། བསོ་སྤྲུལ་རིན་པོ་ཆེའི་གདན་ས་ཀུན་བཟང་ཐེག་མཆོག་གླིང་གི་དབེན་ཁྲོད། ལྷ་ལུང་ནོར་བུ་གཡུ་རྩེའི་མདུན་ངོས། ས་འཛིན་དགེ་གཉེན་ཤེས་རབ་འོད་འབར་གྱི་ཉེ་འཆར། རང་བཞིན་མཁའ་འགྲོ་འདུ་བའི་གནས་མཆོག་ནས་མཁའ་འགྲོའི་ཞལ་ལུང་ལྷག་ཆད་མེདཔར་བཀོད་པ་ཡི་གེའི་རིས་བྱེད་སྙིང་གི་བུ་མཆོག་ཚུལ་ཁྲིམས་རྡོ་རྗེས་ལེགས་པར་བགྱིས་པའོ།། དགེའོ།། དགེའོ།། ༈ དགེའོ།། ལེགས་སོ།། སརྦ་མངྒ་ལཾ།། འདིའི་མཐུས་ཟབ་གཏེར་བསྟན་པ་མཐར་རྒྱས་ནས། །དཔལ་མགོན་བླ་མ་མཆོག་དང་མི་འབྲལ་ཞིང་། རང་གཞན་དོན་གཉིས་རྫོགས་པ་མཐར་ཕྱིན་ནས། །ཐབས་ཤེས་དབྱེར་མེད་རིག་སྐུ་མངོན་གྱུར་ཤོག །བདེ་བའི་རྡོ་རྗེས་སོ།། རྣམ་ཐར་འདི་ནི་རྗེ་དེ་ཉིད་ཀྱིས་དངོས་དང་དངོས་མེད་ཀྱི་གདུལ་བྱ་བསྐྱང་བའི་ཚུལ་དུ་མ་ཡོད་པ་ལས། རང་ཅག་རྣམས་ཀྱི་མོས་གུས་ཀྱི་རྟེན་དུ་ཅུང་ཟད་བསྡུས་ནས་བྲིས་ཏེ། དགུང་གྲངས་ལ་གཞི་བྱས་པ་ཡིན་པས་སྐབས་ཀྱིས་མཛད་ཕྲིན་ལ་ལར་དོན་གཅིག་མ། དུས་ཚོད་ནམ་ཟླའི་སྟོད་སྨད་སོགས་ལ་ཅུང་ཟད་མི་འདྲ་བ་ཡོད་ཀྱང་། དེ་ལ་ཐེ་ཚོམ་མི་མཛད་པ་དང་། ད་དུང་རྡོ་རྗེའི་མཆེད་པོ་མཁྱེན་ཡངས་བློ་གྲོས་ལྡན་པ་རྣམས་ཀྱིས་རྣམ་ཐར་ཆེན་མོ་འབེབས་ཐུབ་རེ་བཀའ་དྲིན་མི་ཆུང་ཞུ། བོ་མོ་བདག་ནི་བློ་རྨོངས་ཤེས་རབ་ཆུང་ཞིང་བརྩོན་འགྲུས་ཞན་པས་ཉུང་བསྡུས་ཙམ་ལས་ཡིག་རིས་སུ་མ་བགྱིས་པས་མཁྱེན་འཚལ། བདེ་བའི་རྡོ་རྗེའི་ཞལ་འཚབ་དགེའོ།། །།