Tibetan
བཞེངས་པ། །ཨོ་རྒྱན་དངོས་སྤྲུལ་པདྨ་ལས་འབྲེལ་རྩལ། །དགོངས་པ་ཆོས་ཀྱི་དབྱིངས་ལས་མ་གཡོས་ཀྱང་། །ཐུགས་རྗེ་ཐབས་མཁས་མཛད་པ་མངའ་བརྙེས་པའི། །བདག་ཅག་རྗེས་འཇུག་བསྟན་འགྲོའི་དོན་ཆེད་དུ། །སླར་ཡང་ཐུགས་རྗེའི་ཟློས་གར་སྒྱུ་མའི་སྐུ། །མ་འགྱང་མྱུར་དུ་འབྱོན་པར་མཛད་ནས་ཀྱང་། རབ་དངོས་འབྲིང་ཉམས་ཐ་ན་རྨི་ལམ་དུ། །ཞལ་མཇལ་གསུང་ཐོས་རྗེས་སུ་བཟུང་དུ་གསོལ། །བདག་ཅག་རྗེས་འཇུག་བརྒྱུད་འཛིན་བུ་སློབ་རྣམས། །ཚེ་ལུས་འདི་རུ་རྗེས་སུ་མ་བཟུང་ན། །སྐྱེ་གནས་གཞན་དུ་འཕོས་ཚེ་ཅི་ཞིག་བྱེད། །ད་རེས་འབྲེལ་ཟབ་ཆེ་ཡང་དགོས་པ་ཆུང་། །ཐུགས་རྒྱུད་དགོངས་པའི་ཕ་ཕོགས་མ་སྩལ་ན། །རྫོགས་སངས་རྒྱས་པའི་དགོངས་པ་ཅི་ཞིག་བྱེད། །གསོལ་བ་འདེབས་སོ་སྐྱབས་མགོན་ཆོས་ཀྱི་རྗེ། །ཁྱེད་ཀྱི་ཐུགས་རྗེའི་ལྕགས་ཀྱུས་མ་བཟུང་ན། །འདི་ཕྱི་རེ་ལྟོས་སྐྱབས་གནས་སུ་ལ་ཞུ། །ཉམས་ལེན་རྟོགས་པའི་དྲོད་ཚད་སུ་ཡིས་འཛིན། །གཏེར་གཉིས་བསྟན་པ་འཛིན་སྐྱོང་སུ་ཡིས་བྱེད། །གྲྭ་འཁོར་སློབ་མའི་ཡོན་ཏན་སུ་ཡིས་སྤེལ། །ཁོ་མོའི་སྙིང་གཏམ་ཉམས་ལེན་སུ་ལ་ཞུ། །ཡིད་རྟེན་འཁྲི་ཤིང་དཔའ་བོ་སུ་ལ་བཅའ། །སྐྱིད་སྡུག་བྱུང་ཚེ་མགོ་འདྲེན་སུ་ཡིས་བྱེད། །བསྐྱེད་རྫོགས་གོལ་འཆུག་གནད་དོན་སུ་ལ་དྲི། །དེ་དོན་བསམ་ན་ཡང་ཡང་ཁྱེད་ཉིད་དྲན། །ཁྱེད་ཀྱི་ཡོན་ཏན་དྲན་ཞིང་མཆི་མ་འཁྲུགས། །གནས་ཡུལ་གང་དུ་བསྡད་ཀྱང་སྐྱོ་ངལ་ཆེ། །ཟས་སྐོམ་ཇི་ལྟར་བཟང་ཡང་སྙིང་རླུང་ལྡང་། །ཅི་དང་ཅི་ལ་བསམ་ཀྱང་རྗེ་ཁྱེད་དྲན། །ད་ནི་བདག་ཅག་མགོན་མེད་རྣམས་ཀྱི་ ༈ ཕྱིར། །མྱུར་དུ་མ་འགྱང་ཐུགས་རྗེ་སྒྱུ་མའི་སྐུར། །བཞེངས་ནས་བདག་ཅག་རྗེས་སུ་མ་བཟུང་ན། །གཅེས་པའི་སྲོག་ཀྱང་ཡལ་བར་དོར་ཀྱང་རུང་། །ཀྱེ་མ་ཀྱི་ཧུད་རྗེ་བཙུན་བཀའ་དྲིན་ཅན། །གནས་མལ་གང་དུ་བསྡད་ཀྱང་བླ་མ་དྲན། །མཆེད་གྲོགས་སུ་དང་འགྲོགས་ཀྱང་བླ་མ་དྲན། །མྱུར་ལམ་གདམས་པ་བསམ་ཚེ་བླ་མ་དྲན། །གཅེས་པའི་སྲོག་ལ་མི་ལྟོས་བླ་མ་དྲན། །མྱུར་དུ་འབྲལ་མེད་ཞལ་བཟང་མ་ངོམ་ན། །བདག་ཀྱང་མི་གནས་མྱ་ངན་འདས་སར་རྙེད། །དཔའ་བོ་ཁྱེད་དང་དབྱེར་མེད་ཐུགས་ཀློང་དུ། །ཤེས་རབ་སྲོག་འཛིན་ལམ་བཟང་ལ་བརྒྱུད་དེ། །རང་སྣང་དོན་གྱི་འོག་མིན་ཞིང་ཁམས་སུ། །ལྔ་ལྡན་རིག་པ་དེ་རུ་བགྲོད་པར་སྙམ། །དེ་བས་མ་འགྱང་རབ་དངོས་འབྲིང་ཉམས་དང་། །ཐ་ན་རྨི་ལམ་ཉིད་དུ་མཇལ་བར་ཤོག །དེའི་མཐུས་བདག་གི་སྔོན་གྱི་དམ་བཅའ་བཞིན། །ཟབ་གསང་བསྟན་པའི་གསོས་སུ་བདག་གྱུར་ཏེ། །འགྲོ་ཁམས་རྒྱ་མཚོ་ཆོས་ཀྱིས་འདུལ་བར་མཛོད། །ཅེས་སོགས་ཀྱི་ཞུ་བ་མང་དུ་ཕུལ་བས། སྐུ་མི་སྣང་བར་གསུང་གི་གདངས་ལས་འདི་སྐད་གསུངས། ཨེ་མ་གསོན་དང་རིགས་ལྡན་སྙིང་གི་གྲོགས། །བདག་ཉིད་ཆེན་པོ་པདྨ་ལས་འབྲེལ་ང་། ། གཤེགས་བྱོན་མེད་དེ་ནམ་མཁའ་ནམ་མཁར་ཐིམ། །རིག་སྐུ་མངོན་གྱུར་གདོད་མའི་ཟད་སར་ཕྱིན། །ཁྱེད་རྣམས་མྱ་ངན་མ་བྱེད་གསོལ་བ་ཐོབ། །འོད་གསལ་རིག་པའི་ངང་དུ་ང་དང་མཇལ། །ཕ་ཕོག་གདམས་པ་ཉམས་ལོངས་གནད་ལ་རེམ། །དོན་གཉིས་འབྲས་བུ་ཚེ་འདིར་འགྲུབ་པར་མཛོད། །པདྨ་ལས་འབྲེལ་གདོད་མའི་སར་ཕྱིན་ཀྱང་། །སྙིང་མིག་སྲོག་དང་མཚུངས་པ་ཡང་ཟབ་བཅུད། །མ་དང་མཁའ་འགྲོའི་སྙིང་ཁྲག་དྭངས་མའི་ཆོས། །འགྲོ་བའི་ཁམས་དབང་མོས་པ་དང་བསྟུན་ནས། །སྦས་གསང་མེད་པར་ཡི་གེའི་རིས་སུ་བཀོད། །རང་སྐལ་གང་ལྡན་ཆོས་ལ་ལོངས་སྤྱོད་ན། །ང་དང་གཉིས་མེད་གདོད་མའི་ཟད་སར་འཁྱོལ། །ནམ་ཡང་འདུ་འབྲལ་མེད་དོ་རིགས་ལྡན་ཚོགས། །ཐུགས་ངལ་མ་མཛད་དད་ལྡན་བརྩེ་བའི་གྲོགས། །སྣང་བའི་ཆོས་ཀུན་བདེན་མེད་སྒྱུ་མའི་འཕྲུལ། །ཕྱི་ནང་སྣོད་བཅུད་བདག་ལུས་ཕུང་པོ་ཁམས། །སྐྱེ་མཆེད་ལ་སོགས་བདེན་གྲུབ་རྡུལ་ཙམ་མེད། །ཐམས་ཅད་གཞི་རྩ་བྲལ་བ་རང་གི་གཤིས། །སྣང་སྲིད་འཁོར་འདས་ཡེ་ནས་རིག་པའི་ངང་། །འབྲས་བུ་མངོན་བྱེད་ཚེ་གཅིག་སངས་རྒྱས་ལམ། །ཡེ་གྲོལ་བློ་བྲལ་ནམ་མཁའ་ལྟ་བུའི་དོན། །གནད་གསུམ་འདུས་པ་ ༈ བཞི་ཡི་ཆོས་ཉིད་ཡིན། །ཐེག་པ་ཐ་དད་ལམ་འཚོལ་མི་ལྟོས་པར། །གཞི་གནས་རིག་པ་སྐུ་དང་ཡེ་ཤེས་མཛོད། །གདོད་ནས་རྣམ་དག་འཁྲུལ་བྲལ་ཆོས་ཀྱི་སྐུ། །མངོན་གྱུར་རང་གནས་གཏན་སྲིད་ཟིན་པ་ནི། །རྒྱུ་ལ་མ་ལྟོས་འབྲས་བུ་ད་ལྟ་རྙེད། །རང་སྣང་སྟོན་པ་སངས་རྒྱས་མངོན་མཐོང་གི། །མོས་གུས་ཟབ་མོའི་བྱིན་མཐུ་ལ་བརྟེན་ནས། རང་བྱུང་ཡེ་ཤེས་ཆེན་པོའི་རང་ཞལ་མཐོང་། །ཚིག་དང་དཔེ་སོགས་ཐ་སྙད་ཀུན་དང་བྲལ། །རང་གསལ་སྒྲིབ་མེད་གདམས་པའི་གནས་རྣམས་མཐོང་། །སེམས་ཀྱི་སྐྱོན་བྲལ་རིག་པ་བྱང་ཆུབ་སེམས། །གཉིས་འཛིན་རྟོག་པའི་བློ་ལ་མ་ལྟོས་པར། །སེམས་དང་སེམས་འབྱུང་གཉིས་རྟོག་རབ་ཞི་ནས། །མཐའ་གྲོལ་ཀློང་ཡངས་ཉི་མའི་སྙིང་པོའི་ཀློང་། །མ་རིག་སྤྲིན་གྱི་སྒྲིབ་ཚོགས་དབྱིངས་སུ་སངས། །སྐུ་དང་ཡེ་ཤེས་ཡོན་ཏན་མ་ལུས་པ། །འུབ་ཆུབ་གཞོན་ནུ་བུམ་པའི་སྐུ་རུ་རྒྱ། །དོན་གཉིས་མཐར་ཕྱིན་ཆོས་སྐུ་འགྱུར་བ་མེད། འབྲས་བུ་རང་ཐོག་ཕེབ་པ་སངས་རྒྱས་གནད། །ཕུང་པོ་ཁམས་དང་སྐྱེ་མཆེད་ཉོན་མོངས་ལྔ། །ཡེ་ནས་རྣམ་དག་རིགས་ལྔ་ཡེ་ཤེས་ལྔ། །སྐུ་ལྔ་ཞིང་ལྔ་ལ་སོགས་འདུ་འབྲལ་མེད། །རང་བྱུང་མངོན་གྱུར་ལྷན་གཅིག་སྐྱེས་པའི་ །དུ་མ་རོ་གཅིག་ཐ་དད་དབྱེ་བསལ་མེད། །མངོན་གྱུར་ཡེ་སངས་རྒྱས་པ་ཉིད་དུ་ཤར། །རང་བྱུང་རིག་པ་སྐུ་དང་ཡེ་ཤེས་མཛོད། །ངོ་བོ་སྟོང་པ་བརྗོད་བྲལ་ཆོས་ཀྱི་སྐུ། །རང་བཞིན་རང་གསལ་འགགས་མེད་ལོངས་སྤྱོད་སྐུ། །ཐུགས་རྗེ་ཀུན་ཁྱབ་རང་བཞིན་སྤྲུལ་པའི་སྐུ། །ངོ་བོ་མི་ཤིགས་འགྱུར་མེད་རྡོ་རྗེའི་སྐུ། །འཁོར་འདས་ཡོངས་ལ་ཁྱབ་ཅིང་བརྡལ་བའོ། །སྟོང་པ་ཆོས་དབྱིངས་དྲི་བྲལ་མེ་ལོང་སྟེ། །འཁོར་འདས་དག་མཉམ་མཉམ་ཉིད་ཡེ་ཤེས་སོ། །མཁྱེན་གཟིགས་སོར་རྟོག་རྩོལ་བྲལ་བྱ་གྲུབ་སོགས། །དག་པ་རྒྱལ་བའི་སྐུ་དང་ཞིང་ཁམས་ཀུན། །རིག་པ་བདེ་གཤེགས་སྙིང་པོར་ལྷུན་གྱིས་གྲུབ། །མ་དག་ཁམས་གསུམ་འཁོར་བའི་འཁྲུལ་སྣང་དང་། །རྟོག་ཚོགས་བཟང་ངན་བར་གསུམ་ཕྲ་རགས་ཀུན། །རང་བཞིན་ཡེ་དག་ཆོས་དབྱིངས་ཆེན་པོའི་རྩལ། །དངོས་པོ་མཚན་འཛིན་སྒྲུབ་གཞི་ཀུན་དང་བྲལ། །འགྲོ་བ་རིགས་དྲུག་སྐྱེ་གནས་བཞི་པོ་ཡང་། །ཆོས་དབྱིངས་ངང་ལས་གཡོ་བ་རྡུལ་ཙམ་མེད། །གང་སྣང་གང་ཤར་ཆོས་ཉིད་འཁོར་ལོ་སྟེ། །བསལ་བཞག་མི་དགོས་གདོད་མའི་ཟད་སར་འཁྱོལ། །ཀུན་བཟང་པདྨ་ང་དང་དབྱེར་མེད་པར། །རིག་སྐུ་མངོན་གྱུར་ཆོས་སྐུའི་རྒྱལ་སར་སྙེགས། ༦ ༈ རིགས་ལྡན་སློབ་འབངས་ཀུན་གྱི་སྙིང་ལ་འཆོང་། །ཞེས་གསུངས་ཤིང་འཇའ་ཚོན་གྱི་རྣམ་པར་གྱུར། དེ་ནས་སྐུ་གདུང་རིན་པོ་ཆེ་ཞག་ཉི་ཤུ་རྩ་གཅིག་ཏུ་བཞག་ནས་མཆོད་འབུལ་སོགས་ཞིབ་རྒྱས་སུ་ཞུས། དེ་ནས་ཞུགས་འབུལ་རན་སྐབས། བདེ་བའི་རྡོ་རྗེས་གདུང་ལ་རེག་པ་ན་ཁྲུ་ཆུང་ཚད་ཙམ་ལས་སྐུ་གདུང་མ་བཞུགས། རྗེའི་དངོས་སློབ་ཡི་གེའི་འདུ་བྱེད་སྟོང་ཉིད་རྡོ་རྗེ་དང་། དབོན་ཡེ་ཤེས་ལ་སོགས་པས་ཞབས་ཞུ་བྱས་ནས་ཞུགས་མེ་འབུལ་སྐབས། བསོ་སྤྲུལ་རིན་པོ་ཆེའི་དབུས་བུ་སློབ་ཐམས་ཅད་མྱ་ངན་གྱིས་ཤིན་ཏུ་ནོན་ནས་ཐམས་ཅད་བེམ་རིག་བྲལ་བ་ལྟ་བུར་སོང་། ཁྱད་པར་བདེ་བའི་རྡོ་རྗེས་སྐྱབས་མགོན་རེ་ལྟོས་བཅའ་བའི་གནས་མེད་པས་ལུས་སྲོག་བྲལ་དགོས་པ་ལ་ཡ་ང་ཐེ་ཚོམ་མེད་པ་ལྟ་བུར་བྱུང་ཡང་། རྡོ་རྗེའི་སྤུན་གྲོགས་བསོ་སྤྲུལ་སང་དང་། བླ་མ་པད་གསལ། བླ་མ་ཆོས་གྲགས་ལ་སོགས་པས་རྡོ་རྗེའི་དམ་ཚིག་གི་བཀའ་ཡོད་པ་བཟློག་མ་ནུས་ནས། རྗེ་ལ་འོ་དོད་ཀྱིས་གསོལ་བ་བཏབ་ཅིང་ཡོད་པའི་སྐབས། གདུང་དུད་གཡས་སུ་འཁྱིལ་ཞིང་འོད་ལྔའི་ཁ་དོག་གསལ་པོ་ཞིག་ཡོད་པ་དེར་འདུས་ཀྱི་མཐོང་ཆོས་སུ་གྱུར་བ་དང་། དེའི་ནང་ནས་མཁའ་འགྲོ་རུས་པའི་རྒྱན་དྲུག་སྤྲས་པ་བཞིས་ཤེལ་ གྱི་མཆོད་རྟེན་འོད་ཟེར་སྣ་ལྔ་འཕྲོ་བ་ཞིག་དར་གྱི་འོད་ལིའི་སྟེང་ལ་བཞག་ནས་ལྷོ་ནུབ་ཀྱི་མཚམས་སུ་བཞུད་པ་སྐལ་ལྡན་འགའི་མངོན་སུམ་མཐོང་ཆོས་སུ་གྱུར། ཁྱད་པར་སྐུ་གདུང་རིན་པོ་ཆེའི་འོད་ཞུ་མ་ཚང་བར་དུ་འོད་ལྔའི་ཁ་དོག་གི་མེ་འབར་བ་དང་། དྲི་བཟང་འཐུལ་བ། སྦྲང་ཆར་གྱི་སིལ་མ་བབ་ཚད་རན་པ་ཙམ་འབབས་ཤིང་། ཡུལ་ཀུན་འཇའ་འོད་ཀྱིས་གང་བ་ལ་སོགས་པས་འགྲོ་བློ་དད་མོས་ཀྱི་སྣང་བ་གོང་འཕེལ་དུ་འགྱུར་བའི་ངོ་མཚར་གྱི་བཀོད་པ་དུ་མ་འབྱུང་བ་མཐོང་ཆོས་སུ་གྱུར་ཏོ། །དེ་ནས་རྗེའི་དངོས་སློབ་འདུལ་བ་འཛིན་པ་པདྨ་བདེ་གསལ་དང་། ཆོས་གསལ། རིག་ཆུང་ལ་སོགས་པའི་འདུས་སྡེ་རྣམས་ཀྱིས་སངས་རྒྱས་སྨན་བླའི་དཀྱིལ་འཁོར་གྱི་ཞལ་ཕྱེས་ནས་ཉིན་ཞག་བཅུ་བཞིའི་བར་དུ་ཁྲུས་གསོལ་མཆོད་འབུལ་བྱེད་པ་ཞིབ་རྒྱས་བྱས་མཐར། བསོ་སྤྲུལ་རིན་པོ་ཆེ་དང་། རྗེའི་དངོས་སློབ་བླ་མ་ཚུལ་ཁྲིམས་བཟང་པོ། དྲི་མེད་རྣམ་དག བདེ་བའི་རྡོ་རྗེ། སྒོ་སྤའི་ཆོས་གསལ། ཤཱི་ལ་བཛྲ་ལ་སོགས་པའི་བུ་སློབ་རྣམས་ཀྱིས་མཆོད་སྡོང་གི་བུམ་པ་ཞལ་ཕྱེས་ཏེ་གདུང་རུས། མཇལ་བའི་ཚེ། རང་རང་གི་ཁམས་དབང་དང་མཐུན་པའི་མཐོང་སྣང་དུ་མ་དང་། ཁྱད་པར་ཀུན་གྱིས་མཐོང་ཆོས་སུ་དཀྱིལ་འཁོར་སྒོ་རྫོགས་ཀྱི་རི་མོ་ ༈ གསལ་པོར་ཡོད་པ་དང་། གདུང་རུས་ལ་ཡིག་འབྲུ་དང་ཕྱག་མཚན་གྱི་རྣམ་པ་རིས་དང་འབུར་དུ་ཡོད་པ། གདུང་རིགས་ལྔ་དང་སྐུ་གདུང་རིང་བསྲེལ་ལ་སོགས་པ་འབྱུང་ནས། སྐལ་ལྡན་གདུལ་བྱར་གྱུར་པ་རྣམས་ཀྱིས་ཕྱག་འཚལ་བའི་གནས། གསོལ་བཏབ་པའི་ཡུལ་བསོད་ནམས་བསགས་པའི་ཞིང་སར་གྱུར་ཏེ། ཁམས་གསུམ་འཁོར་བ་དོང་ནས་སྤྲུགས་པར་བྱེད་པའི་མཛད་པ་ཕྲིན་ལས་བསམ་གྱིས་མི་ཁྱབ་པ་དུ་མ་མཐོང་ཆོས་སུ་འབྱུང་བ་དང་། ཆོས་ཀྱི་སྲས་ཀྱང་བཀའ་བབ་མཆོག་གི་བུ་བཞི། གཙོ་བོ་བརྒྱད། བུ་ཆེན་ཉེར་ལྔ། བརྟུལ་བཞུགས་འཛིན་པ་བཅུ་དྲུག དབེན་ཁྲོད་བྲག་སྐྱིབ་འཛིན་པ་ཉེར་ལྔ། འབྲེལ་ཚད་དོན་དང་ལྡན་པ་བཅུ་གསུམ། སེང་གེ་རྩལ་ཆེན་རྫོགས་འདྲ་བདུན། ངེས་མེད་དབེན་ཁྲོད་འཛིན་པ་བཞི། འདོད་དོན་ལམ་སློང་ནུས་པ་བཅུ། འཇའ་ལུས་འོད་སྐུར་གྲོལ་བ་ཟུང་གསུམ། མཛད་འཕྲིན་གདུལ་བྱ་རྒྱས་བྱེད་གཟུངས་མ་གཉིས། ཟབགཏེར་སྒོ་འཕར་འབྱེད་པའི་གཟུངས་མ་ལྔ། རང་ལས་མི་གཞན་པའི་སྟོང་དབྱིངས་མཆོག་གི་གཟུངས་མ་གཉིས། ཟབ་གཏེར་ཡིག་རིས་བཀོད་པའི་བུ་ཆེན་གཉིས་ལ་སོགས་པ་བསྟན་འགྲོའི་གསོས་སུ་སྨན་པ་གདུལ་བྱའི་རེ་བ་སྐོང་བ་མཐའ་ ཡས་པ་དུས་རིང་མོར་འབྱུང་བ་ཡིན་ནོ། །མཁའ་འགྲོ་བདེ་བའི་གོ་ཆས་གདམས་པ། གཏེར་ཆེན་འགྱུར་མེད་རྡོ་རྗེའི་ཞལ་ལུང་ལས། ང་ནི་མི་གནས་མྱ་ངན་འདས་འོག་ན། །པདྨ་ལས་འབྲེལ་ཀློང་ཆེན་རབ་འབྱམས་སྤྲུལ། །ཐུབ་པའི་བསྟན་ལ་ཐུབ་པའི་མཛད་པ་ཅན། །ཟལ་མོ་སྒང་དུ་སྦས་པའི་རྣལ་འབྱོར་པ། །པདྨ་འགྲོ་འདུལ་གསང་སྔགས་གླིང་པ་འབྱུང་། །མཛད་པ་བཞི་ཡིས་འགྲོ་ཁམས་བདེ་ལ་བསྒྱུར། །འབྲེལ་ཚད་དག་པ་མཁའ་སྤྱོད་དཔལ་རིར་འདྲེན། །ཞེས་གསུངས་པ་བཞིན། རང་དོན་དུ་སངས་རྒྱས་ཆོས་ཀྱི་སྐུ་ལས་མ་གཡོས་བཞིན་དུ་ནང་གསལ་གཞོན་ནུ་བུམ་སྐུར་མངོན་པར་རྫོགས་པར་སངས་རྒྱས། གཞན་དོན་དུ་ཕྲིན་ལས་བཟང་པོ་ལྷུན་གྱིས་གྲུབ་པས་ས་གསུམ་གྱི་འགྲོ་བ་རྣམས་ལ་གང་ལ་གང་འདུལ་དུ་སྟོན་ནས་ཁམས་གསུམ་འཁོར་བ་དོང་ནས་སྤྲུགས་པར་མཛདཔའོ། །ས་མ་ཡ། རྒྱ་རྒྱ་རྒྱ། སྨྲས་པ། གང་གི་རང་བཞིན་བདེ་ཆེན་འདུས་མ་བྱས་དབྱིངས་འོད་གསལ་ཆོས་ཀྱི་སྐུ། །ལྷུན་གྲུབ་སྐུ་དང་ཡེ་ཤེས་ཡོན་ཏན་མ་ལུས་ཇི་སྙེད་རབ་རྫོགས་པ། །ཨོ་རྒྱན་དངོས་སྣང་གཏེར་ཆེན་རྒྱལ་པོ་པདྨ་འགྲོ་འདུལ་གསང་སྔགས་གླིང་། །རིགས་ཀུན་ཡོངས་འདུས་དཀྱིལ་འཁོར་རྒྱ་མཚོའི་སྤྱི་དཔལ་ཆེན་པོ་ ཆོས་ཀྱི་རྗེའི། །ཐུགས་རྗེའི་མཛད་པ་ཕྲིན་ལས་བཟང་པོར་ཚད་བཟུང་བདག་བློས་དཔོག་དཀའ་ཡང་། །མགོན་དེའི་ཡེ་ཤེས་ཡོན་ཏན་དུས་གསུམ་སངས་རྒྱས་ཀུན་དང་མཚུངས་གྱུར་ཀྱང་། །ཐུགས་རྗེའི་བཀའ་དྲིན་འཁོར་ཐབས་བྲལ་བ་སངས་རྒྱས་ཀུན་ལས་ཆེར་ལྷག་པས། །དེའི་མཐུས་ཐུགས་རྒྱུད་དགོངས་པའི་བྱིན་རླབས་ཡེ་ཤེས་བདུད་རྩིའི་ཆུ་རྒྱུན་གྱིས། །བདག་རྒྱུད་མ་རིག་མུན་ཁམས་སྒྲིབ་གཉིས་མཐར་བྱས་ཡེ་ཤེས་གསལ་བ་ཡི། །རིག་སྟོང་གཉིས་མེད་ཡེ་ཤེས་ཅིར་ཡང་འཇུག་པའི་མེ་ལོང་དྭངས་བར་གསལ་བའི་ངོར། །མགོན་དེའི་རང་བཞིན་སྤྲུལ་པས་འགྲོ་འདུལ་གཟུགས་ཀྱི་སྐུར་བཞེངས་གར་མཛད་ཚུལ། །ལེགས་བཤད་རྣམ་པར་ཐར་པ་སྙིང་གི་མུན་སེལ་མཁའ་འགྲོའི་ཞལ་ལུང་འདི། །རྒྱས་པར་རྒྱལ་བའི་ལྗགས་ཀྱིས་བསྒྲགས་སུ་མི་ནུས་བདག་འདྲས་སྨོས་ཅི་དགོས། །ཟུར་ཙམ་གདུལ་བྱའི་དད་པའི་ཤིང་རྟ་འདྲེན་ཕྱིར་དགོངས་པའི་ཆོས་སྡོང་ལས། ཀུན་རྟོག་བློ་ཡིས་བཅའ་བཅོས་དྲི་མས་མ་སྦག་རང་བྱུང་བརྡ་ཡི་འཕྲུལ། །རིག་འཛིན་བླ་མའི་ཐུགས་རྗེའི་གདུགས་དཀར་བསིལ་གྲིབ་ལ་བརྟེན་བདག་གིས་ཁྲོལ། །རང་དོན་ཡིད་བྱེད་བློ་ཡི་དྲི་མ་ཀུན་དའི་འོད་བཞིན་རབ་སྤངས་ནས། །རྟ་3 བདུན་ཇི་བཞིན་འགྲོ་ཁམས་སྙིང་གི་མ་རིག་མུན་པ་སེལ་བྱེད་དུ། །གང་གི་རྣམ་ཐར་མཐའ་ཡི་རྒྱ་མཚོ་ཆེ་ལས་ཟབ་ཡང་དཔག་དཀའ་བས། །བདག་གི་དད་པའི་ཀུ་ཤའི་ཆུན་པོའི་རང་བློར་འཚམས་པའི་ཤེས་རབ་ཀྱིས། །ཅུང་ཞིག་བླང་ནས་བློ་གྲོས་གསར་པ་རབ་དཀར་འོད་ཀྱི་དྲི་བསུང་ལྡན། །བརྒྱུད་ལྡན་བླ་མའི་བྱིན་རླབས་མི་རིང་འདུན་པའི་རྩེ་ལ་རབ་གནས་པའི། །ཐུགས་རྗེའི་ཆུ་རྒྱུན་ཡེ་ཤེས་བདུད་རྩིས་མ་སྨིན་གེ་སར་འདབ་རྒྱས་ཀྱང་། །གཞན་ཕན་འབྱུང་བའི་ནུས་པ་མེད་ཅིང་སྐྱེ་དམན་བདག་གི་ཡིད་ཕམ་པས། །བདེན་གཉིས་བསླུ་མེད་ཟུང་འཇུག་མཐུ་ལ་ཡིད་གཉིས་མེད་པར་གདེངས་བཅས་ནས། །རྗེས་འཇུག་སྐལ་ལྡན་གདུལ་བྱའི་དོན་དུ་ལྷག་བསམ་དཀར་པོས་ཡི་གེར་བགྱིས། །ངལ་ཚེགས་མ་བྱེད་འདི་དོན་སོམས་ལ་བླ་མར་རྩེ་གཅིག་གསོལ་བ་ཐོབ། །ཐུགས་རྒྱུད་དགོངས་པའི་ཡེ་ཤེས་ཡོན་ཏན་བྱིན་རླབས་ལ་སོགས་རྒྱུད་ལ་འཇུག །སྐྱེ་དང་ཚེ་རབས་རྣམ་པ་ཀུན་ཏུ་ལས་སྨོན་དང་ལྡན་གདུལ་བྱར་འགྱུར། །ཟབ་གཏེར་རྒྱ་མཚོའི་ཆོས་ལ་ལོངས་སྤྱོད་ས་ལམ་རིམ་པར་མི་ལྟོས་པར། །རིག་པ་རང་གསལ་ཆེན་པོའི་གནད་མཐོང་འཁོར་འདས་གཉིས་མེད་འོད་སྐུར་གྲོལ། །སྤང་ཐོབ་བྲལ་བའི་རིག་པ་རང་བྱུང་ཡེ་ཤེས་ཆེན་པོའི་ ༈ དཀྱིལ་འཁོར་དུ། །ཀུན་བཟང་པདྨ་ལས་འབྲེལ་རྩལ་དང་དབྱེར་མེད་མངོན་པར་རྫོགས་སངས་རྒྱས། །དྲུག་ལྡན་གཞོན་ནུ་བུམ་སྐུར་ནང་གསལ་འོད་སྐུ་ཆེན་པོའི་ས་ཐོབ་བོ། །བདག་གིས་དེ་ལྟར་བགྱིས་པའི་རྣམ་དཀར་དགེ་བའི་འབྲས་བུ་འདི་ཡི་མཐུས། གཏེར་ཆེན་བླ་མ་ཉིད་དང་འབྲལ་མེད་ཚེ་རབས་ཀུན་ཏུ་རྗེས་བཟུང་ནས། །མི་མཐུན་འགལ་རྐྱེན་བདུད་དབང་བར་ཆད་བདེན་གཉིས་བསླུ་མེད་ནུས་པས་བཟློག །ཕྱི་ནང་རྟེན་འབྲེལ་ལེགས་འགྲིགས་ཟབ་གཏེར་རྒྱ་མཚོའི་སྒོ་འབྱེད་བསྟན་འགྲོར་སྨན། །སྣོད་དང་བཅུད་ཀྱི་རྒུད་པ་སེལ་ཞིང་བསྟན་གཡོའི་དགེ་མཚན་ཕུན་ཚོགས་ཤིང་། །རྒྱལ་བསྟན་དར་རྒྱས་དགེ་འདུན་གོང་འཕེལ་བསྟན་འཛིན་སྐྱེས་བུའི་ཞབས་པད་བརྟན། །སྦྱིན་བདག་མངའ་ཐང་ལོངས་སྤྱོད་རྒྱས་ཤིང་ཆོས་བཞིན་སྤྱོད་པའི་བསོད་ནམས་ལྡན། །སེམས་ཅན་རྣམས་ནི་བདེ་སྐྱིད་ཕུན་ཚོགས་དགེ་ལེགས་ཡོན་ཏན་གོང་འཕེལ་ནས། །ཀུན་ཀྱང་རྔ་ཡབ་ཟངས་མདོག་དཔལ་རི་པདྨ་འོད་གླིང་མཁའ་འགྲོའི་གྲོང་། །རིག་འཛིན་པདྨ་ལས་འབྲེལ་རྩལ་དང་ཐུགས་ཡིད་དབྱེར་མེད་རོ་གཅིག་གྱུར། །སླར་ཡང་གདུལ་བྱའི་ཆོས་ངོར་གང་ལ་གང་འདུལ་དེ་ལ་དེར་མཐུན་པའི། །སྣ་ཚོགས་ཐབས་ཀྱིས་ འགྲོ་ཀུན་རྗེས་བཟུང་བསྟན་དང་འགྲོ་བའི་དཔལ་འབར་ནས། །རང་གཞན་དོན་གཉིས་ལྷུན་གྱིས་འགྲུབ་ནས་འགྲོ་ཁམས་རྒྱ་མཚོ་ཡོངས་སྒྲོལ་ཤོག །བཀྲ་ཤིས་དཔལ་མངའ་དཀོན་མཆོག་རྣམ གསུམ་བྱིན་རླབས་རྟ་བདུན་འོད་ཟེར་གྱིས། །མ་རིག་འགྲོ་ཁམས་མུན་པ་རབ་སེལ་དགོས་འདོད་འབྱུང་བའི་བཀྲ་ཤིས་ཤོག །རྣམ་དཀར་ལེགས་བཤད་བསླབ་གསུམ་ལྡན་པའི་ཚུལ་ཁྲིམས་གཙང་མའི་ས་གཞི་ལ། །རྒྱལ་བའི་དགོངས་པ་ཟབ་ལམ་མཆོག་འདིའི་ས་ལམ་ཡོན་ཏན་འབྲས་བཟང་སྨིན། །བྱིན་རླབས་ཡེ་ཤེས་བདུད་རྩིའི་ཆར་ཆེན་སྐྱེ་དགུའི་ལོངས་སྤྱོད་སྐལ་ལྡན་ནས། །ལུང་དང་རྟོགས་པའི་རྒྱལ་བསྟན་མི་ནུབ་ཡུན་རིང་དར་རྒྱས་བཀྲིས་ཤོག སྟོན་མཆོག་དྲི་མ་མེད་པའི་དཔལ་མངའ་རྒྱལ་ཀུན་ཕྲིན་ལས་ཡོངས་འདུས་རྗེ། །སྐྱོན་བྲལ་ཀུནྡའི་འོད་ཟེར་རབ་འཕྲོས་ཟབ་གཏེར་རྒྱ་མཚོའི་བཅུད་མཆོག་འདིའི། །བསྟན་པ་མི་ནུབ་གངས་ཅན་ལྗོངས་འདིར་སྲིད་མཐའི་བར་དུ་དར་ཞིང་རྒྱས། །དེར་འཛིན་རྡོ་རྗེ་འཛིན་པ་མཆེད་ལྕམ་འདུས་པའི་སྡེ་ཚོགས་ལྷན་འཛོམས་ནས། །ཕུན་ཚོགས་ཕྱོགས་ལས་རྣམ་པར་རྒྱལ་བའི་བཀྲ་ཤིས་དམ་པ་དེང་འདིར་ཤོག །འདིའི་མཐུས་རྒྱལ་དབང་པདྨའི་རིང་ལུགས་སྔ་འགྱུར་རྙིང་མའི་གཞི་ཚུགས་ནས། ཕྱོགས་རིས་དྲི་མའི་སྐྱོན་བྲལ་ལུང་རྟོགས་བསྟན་པའི་འོད་བརྒྱ་ཕྱོགས་བཅུར་དར། །བཤད་སྒྲུབ་ཐོས་བསམ་སྒོམ་པའི་འཛིན་སྐྱོང་སྲིད་མཐར་དར་རྒྱས་བཀྲ་ཤིས་ཤོག །དགེ་འདིས་སྐྱེ་དགུ་སྲིད་གསུམ་ཀ་དག་ཆེན་པོར་ཡོངས་གྲོལ་དཔལ་ཐོབ་ནས། །རང་སྣང་དོན་གྱི་འོག་མིན་ཞིང་དུ་མངོན་པར་སངས་རྒྱས་བཀྲ་ཤིས་ཤོག །ཅེས་པ་སྐྱབས་རྗེ་ཐམས་ཅད་མཁྱེན་པ་གྲུབ་པའི་དབང་ཕྱུག་རིག་འཛིན་ཆེན་པོའི་རྣམ་པར་ཐར་པ་སྙིང་གི་མུན་སེལ་ཞེས་བྱ་བ་འདི་ཡང་ཤིང་བྱི་ལོའི་ཟླ་བ་བདུན་པའི་ཡར་ཚེས་བཅོ་བརྒྱད་ཉིན་དགུང་མོའི་མཁའ་འགྲོའི་ཚོགས་མཆོད་འདོན་སྐབས། གཏེར་ཆེན་བླ་མ་ཡིད་བཞིན་ནོར་བུས་ཞལ་དངོས་སུ་གཟིགས་ནས་བརྡ་དབང་བསྐུར་ཏེ་བྱིན་རླབས་གནང་བ་ལ་བརྟེན་ནས། མཚན་དོན་དང་མཆོད་པར་བརྗོད་པ་གཉིས་ཀྱི་དབུ་བརྩམས་ནས་ཡོད་སྐབས། གཞན་དུས་ཀྱི་རྐྱེན་ཞིག་ལ་བརྟེན་ནས་ང་རང་བླ་མའི་སྐུ་དྲུང་དུ་འདུག་ཡུན་ཐུང་བ་དང་། སྔོན་ཆད་ཡུལ་ཕྱོགས་ས་ཐག་རིང་བའི་དབང་གིས་རྗེའི་མཛད་སྤྱོད་སོགས་ཆ་ཞིབ་མེད་པ་དང་། མིན་ཀྱང་བདག་ལྟ་བུའི་དམན་པ་བློ་རྨོངས་པ་དུད་འགྲོ་ལྟ་བུའི་འདུ་ཤེས་གསུམ་པ་ཡིན་པས་ན། བླ་མའི་ཡོན་ཏན་མཛད་སྤྱོད་ཟུར་ཙམ་ཡང་བརྗོད་དོན་ཅིའི་ཕྱིར་དེ་། ཤེས་སྙམ་ནས་བཏང་སྙོམས་ལ་བཞག་པའི་ཚེ། ཡང་ཟླ་བ་བཅུ་གཉིས་པའི་ཚེས་བཅུའི་ཉིན་བསོ་སྤྲུལ་རིན་པོ་ཆེས་ཡིད་བཞིན་ནོར་བུ་བླ་མ་བཀའ་དྲིན་ཅན་གྱི་སྐུ་གདུང་སློབ་དཔོན་སྣང་སྲིད་ཟིལ་གནོན་དང་། རང་ནས་ཀྱང་ཐུགས་རྟེན་མཆོད་སྡོང་བཞེངས་པ་རྣམས་རབ་ཏུ་གནས་པའི་ཆོ་ག་ལ་བརྩོན་ནས་ཡོད་སྐབས། ཤིང་གླང་ཟླ་བ་དང་པོའི་ཚེས་