Tibetan
འགྲོའི་སྙིང་ཐིག་གི་ཆོས་སྐོར། རྡོ་རྗེ་ཕུར་པའི་སྒོའི་ཐབས་མཆོག་རླུང་གི་རྫོགས་རིམ་གྱི་སྨིན་བྱེད་ཀྱི་དབང་། གྲོལ་བྱེད་ཀྱི་ཁྲིད། རྒྱབ་རྟེན་གྱི་ལུང་དང་བཅས་པ་ཞིབ་རྒྱས་སུ་མཛད་ཅིང་། ཁྱད་པར་གདུལ་བྱ་མཆོག་དམན་ ༈ ཀུན་ལ་རང་རང་དང་འཚམས་པའི་དབང་ཁྲིད་ལུང་དང་བཅས་པ་བསྩལ་ནས། མདོ་ཁམས་མུན་པའི་གླིང་དུ་འོད་གསལ་རྫོགས་པ་ཆེན་པོ་འབྲས་བུའི་ཆོས་མཆོག་བླ་ན་མེད་པའི་དབང་ཁྲིད་ལ་སོགས་པའི་ཆོས་ཀྱི་སྒྲོན་མེས་སྐལ་ལྡན་རྗེས་སུ་འཇུག་པ་ཐམས་ཅད་ལ་ཐར་པའི་གྲོལ་ལམ་ཆེན་པོ་གསལ་བར་བསྟན་ཏོ། །ད་ནི་འདུས་སྡེ་ཕྱོགས་ནས་འོང་བ་ཆ་ཤས་རེ་ལ་དབང་ཁྲིད་རེ་བཤདཔ་མ་གཏོགས་འདུས་སྡེ་མང་པོ་ལ་དབང་ཁྲིད་གསུང་རྒྱུ་འོ་བརྒྱལ་ལ་དགོངས་པ་ཡིན་གསུངས་ཏེ། ཐུགས་སྒྲུབ་ཡིད་བཞིན་ནོར་བུའི་མཇུག་རྫོགས་པར་ཞིབ་རྒྱས་སུ་ཕབ་སྟེ། དེའི་གཙོས་གདམས་པའི་བཀའ་སྲོལ་ཟབ་མོ་ཐམས་ཅད་བདེ་བའི་རྡོ་རྗེ་ལ་གནང་ནས་འཆད་སྤེལ་གསལ་ཁྱབ་ཏུ་དགོས་པའི་གཉེར་གཏད་མཛད། དེ་སྐབས་བདེ་བའི་རྡོ་རྗེ་ནས་སྔར་མོ་རང་ལ་ཨ་འཛོམ་རིན་པོ་ཆེས་གནང་བའི་ཐུབ་སྐུ་ལི་ལ་དང་། ཚེ་དཔག་མེད་ཡབ་ཡུམ་གཏེར་བྱོན་བྱིན་རླབས་ཅན་ཞིག་ཡོད་པ་དེ་དང་། ལྷ་རེག་ཀ་ཤིའི་མདངས་འཛིན་གྱི་སྐྱེས་བཅས། རྗེའི་ལུང་ཟིན་ཡི་གེའི་རིས་བྱེད་ཚུལ་ཁྲིམས་རྡོ་རྗེ་ལ། རྗེའི་སྐུ་མདུན་དུ་བསྐུར་ནས་སོར་བཅུའི་ཐལ་མོ་སྙིང་ལ་བཏུད་དེ་འདི་སྐད་གསོལ། ཨོཾ་སྭ་སྟི། དུས་གསུམ་སངས་རྒྱས་ཀུན་ལས་བཀའ་དྲིན་ལྷག འཁོར་ལོའི་མགོན་པོ་གཏེར་ཆེན་ཆོས་ཀྱི་རྗེ། །བདག་ཅག་རྗེས་འཇུག་སྐལ་ལྡན་སྐྱེས་བུ་ལ། །པདྨའི་ཟབ་ཏིག་མཁའ་འགྲོའི་སྙིང་གི་བཅུད། །ཟབ་ཆོས་གདམས་པའི་བདུད་རྩིའི་ཆོས་ཆར་འབེབ། །བཀའ་དྲིན་བརྗོད་ལས་འདས་སོ་འཁོར་ཐབས་བྲལ། །སངས་རྒྱས་བསྟན་པ་དར་ཞིང་རྒྱས་པ་དང་། །དམ་ཆོས་མི་ནུབ་རྟག་ཏུ་འཕེལ་བའི་ཕྱིར། །དུས་གསུམ་སངས་རྒྱས་ཡོངས་འདུས་ཤཱཀྱའི་ཏོག །སྐུ་ཚེ་མི་ནུབ་མཐའ་རུ་ཕྱིན་པ་དང་། །ཟུང་འཇུག་ཕྱག་རྒྱ་ཆེན་པོའི་མྱུར་ལམ་ལ། །ཐབས་ཤེས་དབྱེར་མེད་རྟེན་འབྲེལ་ཚེ་མཐའ་ཡས། །འགྲོ་དོན་ཕྲིན་ལས་དར་བའི་རྟེན་འབྲེལ་རྫས། །ཐུགས་རྗེས་དགྱེས་པར་དགོངས་ཏེ་བཞེས་སུ་གསོལ། །བདག་ཀྱང་ཚེ་རབས་ཚེ་བརྒྱུད་ཐམས་ཅད་དུ། །འབྲལ་མེད་རྗེས་བཟུང་ཟབ་ཆོས་དཔལ་སྤྱོད་ནས། ས་དང་ལམ་གྱི་ཡོན་ཏན་རབ་རྫོགས་ཤིང་། །སྟོན་འཁོར་དགོངས་པ་དབྱེར་མེད་བཀའ་དྲིན་ཞུ། །ཞེས་ཕུལ་བས། རྗེས་ཀྱང་ཐུགས་དགྱེས་པར་མཛད་ནས་ཐུགས་བསྐྱེད་ཀྱི་གསོས་སུ་སྨན། དེ་དག་རྣམས་ཀྱི་སྐབས་སུ་ཞལ་གཟིགས་ལུང་བསྟན་ཞིང་བཀོད་སོགས་དུ་མ་ཡོད་ཀྱང་གཏེར་གཞུང་དུ་གསལ་བས་འདིར་ཡི་གེ་མང་བར་དོགས་ནས་མ་བྲིས་སོ། །དེ་ནས་རྗེའི་ཐུགས་ལ་ད་ནི་ བཤད་སྒྲུབ་ཀྱི་བསྟན་གཞི་དར་རྒྱས་སུ་འདུག་པས། ཡབ་རྗེ་བླ་མའི་ཟབ་གཏེར་གྱི་ཆོས་སྐོར་རྣམས་སྤར་དུ་བརྐོ་དགོངས་ནས། རྗེའི་དངོས་སློབ་ཆོས་ཀྱི་བདག་པོ་བསོ་སྤྲུལ་རིན་པོ་ཆེ་དང་། བི་མའི་རྣམ་རོལ་བསྟན་འཛིན་དར་རྒྱས་དང་། བློ་བཟང་དར་རྒྱས་ལ་སོགས་པའི་ཐུགས་ཀྱི་བུ་ཆེན་རྣམས་ལ་སྤར་ཤིང་གི་ཆ་རྐྱེན་ལ་རྒྱུ་བཅའ་ལ་སོགས་པའི་མཐུན་རྐྱེན་དགོས་གསུངས་པས། དེ་རྣམས་ཀྱིས་དགའ་མགུ་ཡི་རང་བྱས་ནས་མཐུན་རྐྱེན་ཞབས་ཞུ་ཅི་འགྲུབ་བྱེད་པར་ཞལ་གྱིས་བཞེས་པས་རྗེའི་ཐུགས་དགྱེས་པར་མཛད། དེ་ནས་བླ་མ་གསུང་མཆོག་རྡོ་རྗེའི་གཉེར་བ་དགེ་བཙུན་པདྨ་བསམ་གཏན་ཞེས་པ་དེ་ལ་སྡེ་དགེའིཕྱོགས་སུ་ཁོང་གི་ཉེ་འབྲེལ་ཙམ་ཡོད་འདུག་པས། དེ་ལ་སྤར་རྟེན་གྱི་སྟབས་ལགས་མ་འཆུག་གསུངས། ཁོང་ན་རེ་ད་ལོ་སྟབས་མི་ལྡན་ཀྱང་སང་ཕོད་ཁྱེད་ཀྱིས་ཤིང་ལེབ་ལ་སོགས་པ་ཐམས་ཅད་སྟ་གོན་ལེགས་པར་བསྒྲིགས་དང་། སྤར་རྐོས་བཅུ་ཐམ་པ་ལོན་ངེས་བྱེད་ཟེར། རྗེས་ཀྱང་དེ་ལུགས་ཀྱི་བདེ་བའི་རྡོ་རྗེ་ལ་ཞལ་བཀོད་གནང་ནས་ཕྱག་རྫས་ཅི་ཡོད་སྤར་གྱི་མཐུན་རྐྱེན་དུ་བསྒྲིགས་པ་ལ་སོགས་པ་གཏེར་གཉིས་ཀྱི་བསྟན་པ་གཞི་ཚུགས་པའི་རྟེན་འབྲེལ་གྱི་འཆར་སྒོ་དུ་མ་འབྱུང་བའོ། །དེ་ནས་དགུང་3 གྲངས་ཞེ་བཞིའི་ལོར་སྒྲུབ་སྡེ་རྣམས་ལ་འོད་གསལ་ཐོད་རྒལ་གྱི་ཁྲིད་གསུངས་ནས་ལམ་འབྲས་མངོན་གྱུར་མཛད། དེ་སྐབས་བཞུགས་གནས་གཞན་ཞིག་ཏུ་སྤར་དགོས་དགོངས་ནས། སྐུ་མཆེད་ཆེ་བ་རྡོ་གྲུབ་རིན་པོ་ཆེའི་དྲུང་དུ་བྱོན་ནས་ཆོས་དང་གདམས་པ་མང་པོའི་བསྒྲོ་གླེང་མཛད་དོ། །ཁྱད་པར་སྐུ་གདུང་རིན་པོ་ཆེ་དང་། སྐུ་གསུང་ཐུགས་ཀྱི་རྟེན་རྣམས་ཀྱི་མདུན་དུ་ཚོགས་མཆོད་འབུལ་བ་སོགས་ཞིབ་རྒྱས་སུ་མཛད། དེ་ནས་དེ་ཀའི་གཉེར་མ་དགེ་བཙུན་བསོ་སྨྱོན་ཞེས་པས་སྤར་ཤིང་སྟོང་ཚོད་ལྷག་ཙམ་སྟབས་ལྡན་བྱས་ཏེ། རྗེས་དེའི་རིན་གྱི་དངུལ་གནང་བ་སོགས་མཛད། དེ་སྐབས་གསང་ཐབས་སུ་བྱོན་པ་ཡིན་པས། ལས་ལྡན་འགའ་རེ་མ་གཏོགས་སུས་རྗེ་དེ་ཉིད་ཡིན་པར་མ་ཤེས། དེ་ནས་གདན་སར་ཕེབས་ནས་འདུས་སྡེ་རྣམས་ལ་རང་རང་དང་འཚམས་པའི་གདམས་ཁྲིད་མན་ངག་སོགས་གནང་། གཙུག་ལག་ཁང་གི་ཤིང་བཟོ་བ་སོགས་ཀྱི་ལས་མི་མངགས་ནས་ཞིབ་རྒྱས་སུ་མཛད། དེ་ནས་སྒྲུབ་སྡེ་བ་རྙིང་པ་རྣམས་མཐར་ཕྱིན་ནས་དབང་ཁྲིད་དང་དགའ་སྟོན་གྱི་ཚོགས་འཁོར་བཅས་ཡབ་ཡུམ་སྲས་དང་བཅས་པ་ཚོགས་ནས་མཐའ་རྒྱས་སུ་མཛད། དེ་ནས་སྒྲུབ་སྡེ་གསར་པ་རྗེའི་ཆོས་ཀྱི་བདག་པོ་ན་ཤུལ་བླ་མ་ཆོས་གྲགས། ༈ ལྷ་བཟོའི་འོན་པོ་ཚུལ་ཁྲིམས་འོད་གསལ་ལ་སོགས་པའི་འདུས་སྡེ་ཉེར་གཅིག་ལས་མི་མང་བར་མཛད་ནས། དེ་རྣམས་ལ་རྩ་གསུམ་གྱི་དབང་ལུང་དང་། སྔོན་འགྲོ་སེམས་སྦྱོང་བདུན་མའི་དོན་ཁྲིད་དང་། སྦྱིན་པ་རྣམ་བཞིའི་དམིགས་རིམ་ལ་སོགས་པ་གསུངས་ནས་སྔར་བཞག་ཞལ་བཀོད་རྣམས་རྒྱས་པར་གནང་། དེ་ནས་ཡབ་རྗེ་བླ་མའི་དངོས་སློབ་བླ་མ་ཆོས་རྒྱལ་དཔོན་གཡོག་སོགས་ཕྱོགས་ཀྱི་འདུས་སྡེ་རྣམས་ལ། ཡབ་རྗེ་བླ་མའི་ཟབ་གཏེར་འཇམ་དཔལ་གསང་འདུས་དང་། ཁྲོས་མ་ལ་སོགས་པའི་དབང་ལུང་། ཟབ་ཆོས་ཡོངས་རྫོགས་ཀྱི་བཀའ་གཏད་སོགས་ཀྱིས་ཀུན་ཡིད་ཚིམ་པར་མཛད་དོ། །དོན་བཞི་པ་རང་དོན་དུ་མངོན་པར་རྫོགས་པར་སངས་རྒྱས་ནས་སངས་རྒྱས་ཆོས་ཀྱི་སྐུའི་ངང་ལས་མ་གཡོས་བཞིན་དུ། གཞན་དོན་དུ་གཟུགས་ཀྱི་སྐུས་འགྲོ་བ་རྣམས་སྨིན་གྲོལ་གྱི་ལམ་ལ་བཀོད་ནས་མཁྱེན་བརྩེ་ནུས་པའི་དཔལ་ལ་མངའ་བརྙེས་ཤིང་དོན་གཉིས་མཐར་ཕྱིན་དུ་མཛད། མཐར་གདུལ་བྱ་རྟག་འཛིན་ཅན་རྣམས་ཁ་དྲང་བའི་ཕྱིར་དུ་ཡང་སངས་རྒྱས་པའི་ཚུལ་ནི། དགུང་གྲངས་ཞེ་བཞིའི་ལོར་བསྐལ་པ་ཤིང་ཕོ་བྱི་བའི་ལོའི་ཟླ་བ་གསུམ་པའི་ཚེས་བཅུ་བདུན་གྱི་ཉིན་སེམས་ཅན་བསོད་ནམས་དམན་པའི་གནས་ དུས་ཀྱི་དབང་གིས་གློ་བུར་དུ་གཞན་རྐྱེན་ཤུག་དྲག་པ་ཞིག་བྱུང་བས། རྗེ་དེ་ཉིད་ཀྱི་ཞལ་ནས། ད་ང་རང་ལ་བླ་མ་རིན་པོ་ཆེའི་ལུང་བསྟན་དུ། ལས་ཐ་མ་བདུད་ལ་མ་ཤོར་དགོས། གསུངས་པ་དེ་ད་ལན་ཡིན་པར་འདུག །ཆོས་ཐམས་ཅད་རྟེན་ཅིང་འབྲེལ་འབྱུང་ཡིན་པས། ད་འུ་ཅག་གཉིས་ཁ་བྲལ་དགོས་ཕྱིན་ཆད་ང་རང་གི་ཚེ་ལ་བར་ཆད་ཡོད་པ། ལུང་བསྟན་སྔ་ཕྱི་ཀུན་ལ་གསལ་པོར་ཡོད་པ་དེའི་སྐབས་སུ་བབ་པ་འདྲ་གསུངས། ཡང་བདེ་བའི་རྡོ་རྗེས་ཅི་ནས་ཀྱང་སྐུ་ཚེ་གཞན་རྐྱེན་གྱི་དབང་དུ་གཏོང་མི་ཉན་ཡང་ཡང་ཞུས་ཚེ་རྗེའི་ཞལ་ནས་ང་རང་གིས་ཐབས་གང་དྲག་ལོས་བྱེད་དང་། ད་བྱ་བ་གང་ཐད་ནས་དེ་ཙམ་རེད། འོན་ཀྱང་གུ་རུ་པདྨའི་སྨོན་ལམ་ལ་བསླུ་བ་མེད་པ་ཡིན་པས། ཁྱེད་རང་གི་ཚེ་སྲོག་ལ་བར་ཆད་རེ་མ་འབྱུང་ན་གཏེར་གཉིས་ཀྱི་ཞབས་ཞུ་རེ་འོང་ངེས་གསུངས། དེ་ནས་གང་ལྟར་བྱས་ཀྱང་རྟེན་འབྲེལ་བཏང་སྙོམས་ལ་སོང་བའི་སྐབས། འཁོར་སློབ་ཡུལ་མི་ཐམས་ཅད་ཀྱི་བློ་སེམས་མི་བདེ་བར་གྱུར་ཅིང་། ཡི་ཚོམ་ནས་ཅི་བྱ་གཏོལ་མེད་དུ་སོང་སྐབས། རྗེའི་ཞལ་ནས་སུ་ཁ་བཛྲ་འདི་ཚུལ་མཐུན་གྱི་མཁའ་འགྲོ་ཞིག་ཡིན་པས། སྤྲུལ་སྐུ་ཁྱེད་ཀྱིས་འདི་གཞན་དབང་དུ་མ་ཤོར་བ་དགོས་སོགས་ཀྱི་ཞལ་ཆེམས་ལྟ་བུའི་ ༈ གསུང་མཛད་སློབ་བུ་རྣམས་ལ་གསུང་བགྲོས་མང་དུ་མཛད། ཡང་དེའི་སྐབས་སུ་བདེ་བའི་རྡོ་རྗེས་ད་ཡུལ་གཞན་ཞིག་ཏུ་འབྱོན་ཐབས་ཨེ་ཡོད་ཞུས་པས་ཡོད་ཐང་གསུངས། དེ་སྐབས་སུ་བསོ་སྤྲུལ་རིན་པོ་ཆེའི་མདུན་གཡོག་ཀུན་བཟང་བསྟན་འཛིན་ཞེས་པ་དེ་ཉིད་རྗེའི་སྐུ་དོན་གལ་ཆེ་བ་གཅིག་གི་ཕྱིར་དུ་དེ་ཀར་འོང་ཡོད་པས། དེ་ལ་རྗེ་མཁའ་འགྲོ་དཔོན་གཡོག་སེར་དགོན་དུ་བསྐྱལ་མ་བྱེད་རྒྱུ་ཡིན་པས། བསོ་སྤྲུལ་ཁྱོད་གཉིས་ཀྱི་མགོ་འདྲེན་བརྩེ་སྐྱོང་ལ་མ་འཆུག་གསུངས། ཁོང་ན་རེ་ཁྱེད་ཡབ་ཡུམ་ལྷན་དུ་མི་འབྱོན་པ་ཅི་ལགས་ཞུས་པས། རྗེའི་ཞལ་ནས་ང་རང་སྟབས་བདེ་མོ་ཞིག་མ་འབྱུང་བར་དུ་འོང་བར་མི་ཐོན་པ་འདྲ་ན། ཐ་ནའང་ལོ་ཅིག་ལས་མི་འགྱང་བར་འབྱོན་འོང་གསུངས། དེ་སྐབས་བདེ་བའི་རྡོ་རྗེས་ང་རང་གཅིག་པུར་སེར་དགོན་ལ་འགྲོ་དགོས་པ་མི་འཐད་ཀྱང་ཁྱེད་ཀྱིས་ཅི་གསུངས་བྱེད། ཁྱེད་སྒྲུབ་གྲྭའི་ནང་དུ་ཕེབས་ཚེ་ང་རང་གཅིག་པུར་འདུག་ཚོད་མེད་པ་འདྲ་ན་ལོ་གཅིག་གི་བར་དུ་ཁྱེད་སྒུགས་དགོས་ཚེ་སྡུག་བསྔལ་ཆེ་ཞུས་ནས་སེམས་ཆུང་བར་བྱས། རྗེས་ཐུགས་བརྩེ་བརྩེ་མཛད་ནས་དེ་ལྟར་མི་དགོས་དང་། ང་ལོ་གཅིག་མི་འགོར་ཐང་། ཅི་མགྱོགས་བྱས་ནས་ཐོན་འོང་གསུངས། བདེ་བའི་རྡོ་ རྗེས་ཁྱོད་བྱོན་ན་ལམ་མཐོ་དམན་གང་ནས་བྱོན་ཞུས། རྗེས་ཞལ་ནས་གང་ནས་འོང་ན་འདྲ་སྟེ། སྙིའི་ན་བ་ནས་ཐོན་འོང་གསུངས་ཤིང་ཆོས་དང་འཇིག་རྟེན་གྱི་གསུང་བགྲོས་དང་བསླབ་བྱ་དུ་མ་མཛད་ནས། ཐུགས་བརྩེ་བ་ཆེན་པོས་སྐྱེ་བ་ནས་ཚེ་རབས་སུ་འབྲལ་བ་མེད་པའི་ཞལ་བཞེས་དང་སྨོན་ལམ་ཐུགས་བསྐྱེད་ལ་སོགས་པ་མཛད། དེ་ནས་རྗེ་དེ་ཉིད་ཀྱིས་སློབ་བུ་དྲི་མེད་རྣམ་དག་ལ་སོགས་པ་རྣམས་ལ་སྐུ་མི་བཞུགས་པའི་གསུང་མཛད་གསལ་པོར་གནང་ཡང་། བདེ་བའི་རྡོ་རྗེ་ལ་སྦ་གསང་མཛད་ཡོད་སྐབས་ཟླ་བ་གསུམ་པའི་ཉེར་གསུམ་ཉིན། རྗེའི་ཞལ་ནས་ང་རང་གི་སྣང་བ་ལ་ཐིག་ལེ་དཀར་དམར་སེར་ལྗང་མཐིང་ག་ལྔ་འབྱུང་ནས་རང་གི་གནས་ལྔའི་ཐིག་ལེ་དཀར་གསལ་དམར་ལྗང་མཐིང་ག་རྣམས་ལ་ཐིམ། དེ་དག་གཅིག་ཏུ་འདུས་ནས་བདག་གི་སྤྱི་བོ་ནས་སྙིང་གར་ཐིམ་སོང་བ་ལྟར་བྱས་ཚེ་དབུགས་ཐིམ་པ་ལྟ་བུར་བྱེད་འདུག་གསུངས། བདེ་བའི་རྡོ་རྗེ་དང་། ཚུལ་ཁྲིམས་རྡོ་རྗེ་གཉིས་ཀྱིས་ཁྱེད་ལ་འཁྲུག་པ་འདྲ་ན་སྐུ་རིམ་སོགས་ཞིབ་རྒྱས་དགོས་ཡང་ཡང་ཞུས་ཀྱང་། རྗེས་ང་རང་ལ་སྐྱོན་མེད་ངེས་པ་ཡིན་གསུངས། དེ་ནས་ཡུལ་རྐྱེན་གྱིས་ལྷ་འཁྲུག་པ་སོང་ནས་མ་མོའི་དལ་ཡམས་ལྟ་བུ་འབྱུང་ནས། དེར་འདུས་ཀྱི་བུ་སློབ་ཐམས་ཅད་ལ་ནད་ ༈ དྲག་པོ་བྱུང་ནས་ཐམས་ཅད་འཆི་གྲབ་བྱེད་པ་ལྟ་བུར་སོང་། དེའི་ཉེར་དྲུག་ནུབ་རྗེ་ལ་མཁའ་འགྲོའི་ལུང་བསྟན་འདི་ལྟར་འབྱུང་བས། མདངས་སུམ་གྱི་རྨི་ལམ་ན་བུ་མོ་སྔོ་སང་ཞིག་གིས་ལག་མཐིལ་དུ་བརྡ་ཡིག་འདི་ལྟར་བཀོད་ནས་བསྟན། ༄༄༅བོནརྦ་རྐཿ ཡ་ཡཿ མཁའ་འགྲོ་དང་མཁའ་འགྲོའི་གྲོང་ཁྱེར། །བདེ་བདེ་མཁའ་འགྲོའི་སྐྱོ་གྲོགས། །མི་རིང་མྱུར་དུ་འབྱོན་དང་། །ངེད་ཅག་བསུ་མར་ཕེབ་ཡོང་། །ཡབ་ཡུམ་འདུ་འབྲལ་མེད་དོ། །མཁའ་འགྲོའི་ཚོགས་དཔོན་བྱེད་ངེས། །བདུད་ཀྱིས་བསླུས་པའི་བུ་མོས། །བརྙས་དམོད་ངག་ཏུ་བསྐྱུར་རན། །དུས་འཁྲུགས་མཚོན་གྱི་ཡོ་ལང་། །མི་བདེའི་སྡུག་བསྔལ་གྱིས་མནར། །དེ་ཕྱིར་ཡེ་ཤེས་ལྔ་ཡི། །དར་ལམ་ལ་ཞོན་རིག་པའི། །འོད་གོང་སྡེ་ལྔས་བསུ་འགྲོ། །ཕྱོགས་མིན་ཕྱོགས་སུ་བགྲོད་ཀྱང་། །ངེད་ཅག་ཞབས་ཞུ་བྱེད་ཀྱང་། །བར་ཆད་བདུད་པོ་དབང་བཙན། །རྐྱེན་ཁ་དུ་མར་འཆོལ་སྲིད། །མཁའ་འགྲོའི་ཐ་ཚིག ཉམས་པས། །དུས་ཡོལ་བསུ་མ་འགྲིགས་དཀའ། །དེ་དག་གླང་གི་ལོ་ལ། །ཟླ་བ་གསུམ་པའི་བདུན་གསུམ། །ཞག་བཞིར་འགྲོ་ཚེ་འདྲན་འོང་། །བནྡྷའི་མདའ་མོ་ཤར་དུ་འཕེན། ། སྲིན་བྱའི་རྫུ་བག་གསོད་པར་ངེས། །ལ་འུར་རང་གི་བྱ་བར་བཞུགས། །དབྱིངས་ལ་དབྱིངས་ཐིམ་ཨེ་རེ་མཚར། ཅེས་ཟེར་བཞིན་སྙིང་གར་ཐིམ་པས། དབུགས་ཐིམ་ནས་རྟོག་པ་ཅུང་ཟད་འགག་གོ། །ཅེས་གསུངས་པས། ཡང་བདེ་བའི་རྡོ་རྗེ་དང་། ཚུལ་ཁྲིམས་རྡོ་རྗེ་གཉིས་ཀྱིས་ཡིད་མ་བདེ་བས་ཞུ་བ་མང་དུ་ཕུལ་ནས་ཞབས་བརྟན་སོགས་རེམ་དགོས་ཞུས་ཚེ།རྗེའི་ཞལ་ནས་བླ་མ་རིན་པོ་ཆེའི་ཞལ་ལུང་དང་། སྔར་གྱི་མཁའ་འགྲོའི་བརྡ་བྱང་གང་ལ་བལྟས་ན་རིམ་གྲོ་ཇི་ལྟར་བྱས་ཀྱང་ཕན་པར་དཀའ་བ་ཡིན་པས། འུ་ཅག་ཡབ་ཡུམ་ལྷན་དུ་ཚོགས་པའི་སྐལ་བ་ལྡན་ན་སྐྱོན་མེད་ངེས་པ་དང་། སྟབས་མ་ལྡན་ན་ཅི་འགྱུར་གསལ་འོང་ཀྱང་། ཡབ་ཡུམ་ལྷན་དུ་ཚོགས་ཐལ་སྤྲུལ་སྐུ་རྡོར་ལོ་དང་། བུ་སློབ་རྣམས་ཀྱིས་ལྡན་འོང་གསུངས་ཏེ། རྗེས་ཀྱང་ཐུགས་ཐག་དེ་ཀར་བཅད་ནས་བཞུགས་ཡོད་སྐབས་གཞན་རྐྱེན་སེལ་ཐབས་མ་བྱུང་ནས། རྗེ་དེ་ཉིད་སྐུ་ཁམས་བསྙུན་བྱུང་བས། བདེ་བའི་རྡོ་རྗེས་ད་ལུང་བསྟན་སོགས་གང་ལ་བལྟས་ཀྱང་མི་བཟང་བ་འདྲ་སྙམ་ནས། ཡང་ཡང་རྗེ་ལ་བཞུགས་པར་གསོལ་བ་བཏབ་ཀྱང་ཕན་པ་མ་འབྱུང་ནས། རྗེའི་ཞལ་ནས། དགྲ་དམ་གྲིབ་མིན་པས་གོས་མ་མྱོང་། །གྲོགས་བླ་མ་མིན་པས་སྐྱོབས་མ་ ༈ མྱོང་། །ཟེར་བ་ལྟར་ད་རེས་དེའི་ཐོག་ལ་ཐོན་པ་ཡིན་པས། སྐུ་རིམ་སོགས་ཅི་ཡང་བསྒྲུབ་མི་ཉན་གསུངས། དེ་ནས་ཟླ་བ་བཞི་པའི་ཚེས་ལྔའི་ཉིན་ཁམས་ཇེ་འཁྲུག་ཏུ་སོང་བས། སྒྲུབ་གྲྭ་བ་དང་། རི་ཁྲོད་གཉིས་ཀྱི་བླ་སེར་བུ་སློབ་ཀུན་གྱིས་སྐུ་རིམ་ཚོགས་པ་དང་། དགོན་པ་གཞན་ལའང་རྒྱབ་ཆོག་ཁྱེར་བ་སོགས་བྱས་ཀྱང་ཕན་པ་མ་བྱུང་ཞིང་། ཚེས་དྲུག་གི་ཉིན་གནས་ལུང་གི་གཡོན་ཕྱོགས་ན་ལུང་ཁ་མ་ཟེར་བ་ཞིག་ཡོད་པ་དེ་ཀར་བཞུགས་གནས་སྤར་ན་ཨེ་དགའ་གསུངས་ཏེ། གསང་ཐབས་ཀྱིས་བཞུགས་གནས་སྤར་བར་བྱས། དེ་སྐབས་ཤཱི་ལ་བཛྲ་ལ་སོགས་པའི་བུ་སློབ་རྣམས་ནི་ནད་ཀྱིས་མནར་ནས་གཅིག་ཀྱང་ཡོང་མ་ཐུབ་སྟེ། ཡབ་ཡུམ་གཉིས་དང་། སྲས་མིང་སྲིང་ཆུང་ངུ་གཉིས། ཉེ་གནས་ཐུབ་བསྟན་བཟང་པོ་བཅས་དེ་ཀར་བཞུགས། དེ་སྐབས་རྗེའི་ཞལ་ནས་ད་སྔ་ང་རང་ཕོ་ལོ་བཅུ་གཉིས་ནས་ཞེ་བཞིར་ཐུག་གི་བར་དུ། སྤྱིར་སངས་རྒྱས་བསྟན་པ་ལ་བསམ་ནས་གུ་རུ་རིན་པོ་ཆེའི་བཀའ་བཞིན་བསྒྲུབས། ཁྱད་པར་ཝ་ཤུལ་གསེལ་ཐལ་དང་། མགོ་ལོག་ཁག་གསུམ་ལ་སོགས་པའི་ཆོས་སྲིད་བདེ་སྐྱིད་ལ་གནོད་པའི་མཐའ་མི་ཀླ་ཀློའི་འཕེལ་ཁ་མནན་པ་དང་། ཡང་སྒོས་བླ་མ་གཏེར་ སྟོན་གྱི་བསྟན་པ་མུན་ཁང་ལ་སྒྲོན་མེ་བཏེགས་པ་བཞིན་གསལ་ཁྱབ་ཏུ་དར་བ་འདི་ལ་བར་ཆད་དང་དུས་དབང་བསོད་ནམས་ཞན་པ་སོགས་ཀྱིས་བྱ་ཐབས་བྲལ་འདུག་པས། ད་ཁོ་རང་རྣམས་ཀྱི་བསམ་པ་རྫོགས་པར་བྱེད་དགོས་པར་འདུག་ན། ཁྱེད་ཀྱི་ཐུགས་ངལ་མ་བྱེད་དང་། འུ་ཅག་གཉིས་འགལ་བ་སྤུ་རྩེ་ཙམ་ཡང་མ་སོང་བ་ཡིན་པས། སྐྱེ་བ་ནས་ཚེ་རབས་དང་འདི་ཕྱི་བར་དོ་ཐམས་ཅད་ལ་འབྲལ་བ་མེད་ངེས་པ་ཡིན་པས། ད་ནི་ང་རང་ན་ཚོད་ཀྱང་མི་འདུག་པས་ཟངས་མདོག་དཔལ་རི་ལ་འགྲོ་རན་གསུངས་ནས། སྤྱན་ཧྲིག་གེར་བར་སྣང་ལ་གཟིགས་འདུག །བདེ་བའི་རྡོ་རྗེ་ཡིས་མགུལ་ལ་འཁྱུད་ནས་འུ་ཅག་ཡབ་ཡུམ་སྔར་གྱི་དམ་ཚིག་ཇི་ལྟར་བཤད། ད་དུང་བསྟན་པ་དང་སེམས་ཅན་གྱི་དོན་ལ་བཞུགས་དགོས་པ་དང་། ཁྱད་པར་ང་རང་བསྐྱུར་ནས་ཅིའི་ཕྱིར་བྱོན་ཞུས་ཤིང་དྲག་ཏུ་ངུས་ནས་བརྒྱལ་འགྲོ་བར་ལྟ་བུར་བྱས་ཚེ། ཡང་རྗེའི་ཐུགས་ཀྱིས་མ་བཟོད་ནས་དགོངས་པ་ལྷོད་དེ། བདེ་བའི་རྡོ་རྗེ་ལ། ཡ་གཅེས་ཕྲུག་ཁྱེད་ཀྱིས་དེ་ལྟར་མ་བྱེད་དང་། ང་རང་སྔར་ལས་འབྲེལ་བའི་དུས་ནས་དམ་སེལ་གྱི་རྐྱེན་དབང་ལས་མ་ཐར་བ་ཡིན་པས་ད་ལན་ཀྱང་དེའི་ལན། ད་འུ་ཅག་རྟེན་འབྲེལ་གཞན་དབང་དུ་སོང་བ་ཡིན་པས། བྱ་ཐབས་ཅི་ ༈ ཡང་མེད་པས་འགྲོ་དགོས་ངེས་པ་ཡིན་ཀྱང་། བསོ་སྤྲུལ་དེ་ལ་འུ་ཅག་གིས་དྲིན་ལན་མ་སོད་ཨ་གསུངས། བདེ་བའི་རྡོ་རྗེས་བསོ་སྤྲུལ་ལ་སྐུ་དྲིན་གསོ་ཐབས་ལ། རབ་ན་ཁྱེད་སྐུ་བཞུགས་པ་དང་། མིན་ཀྱང་ཡང་སྤྲུལ་ཞིག་ཁོ་རང་གི་ཉམས་ལ་ཕན་པ་ཞིག་འབྱོན་ན་སྐུ་དྲིན་གསོ་ངེས་པ་འདྲ་མ་གཏོགས། ང་རང་གིས་བསོ་སྤྲུལ་ལ་སྐུ་དྲིན་གསོ་ཐབས་ལྟ་ཞོག །རང་ཡང་ཅི་འགྱུར་མི་ཤེས་ཞུས། ཡང་རྗེའི་ཞལ་ནས་བདུད་དབང་ཆེ་བ་དང་སེམས་ཅན་བསོད་ནམས་དམན་པའི་དབང་གིས་ཁྱེད་ཀྱི་ཚེ་ཆོས་ཅི་འགྱུར་མི་ཤེས་ཀྱང་། ད་ནི་ཁྱེད་རང་གི་མཁའ་འགྲོའི་ལུང་བྱང་དང་མཐུན་པའི་སྐུ་ཚེ་རེ་བརྟན་ཐབས་མཛོད་གསུངས། བདེ་བའི་རྡོ་རྗེས་ང་རང་གི་ཁ་བྱང་ལྟར་བྱ་བ་ཨེ་འགྲུབ་མི་བསམ་གི་ལགས། ད་ཁྱེད་ཀྱི་ཐུགས་འདུན་གྱི་བྱ་འཕྲོ་སྤར་ཤིང་མི་འཛོམས་ཀྱང་། གཙུག་ལག་ཁང་སོགས་འཕྲོ་མཐུད་པ་དང་། ཁྱད་པར་ཁྱོད་ཀྱི་ཟབ་གཏེར་འདིའི་འཛིན་སྐྱོང་རེ་བདག་གིས་འོང་ན་ལོ་བར་རེ་སྡོད་མི་ཐུབ་ཅི་ཐབས་སྙམ་པའི། དེ་མིན་ཁྱེད་མེད་ཕྱིན་ཆད་ང་རང་ཁ་ཉམ་ཆུང་བ་དང་། ཕ་ཡུལ་སོགས་ས་ཐག་རིང་བས། ཀུན་གྱིས་བརྙས་དམོད་བྱེད་པའི་ཡུལ་ཡིན་འདུག་ན། ཅིའི་ཕྱིར་འཇིག་རྟེན་དུ་གནས་ལགས་ཞུས། ཡང་རྗེའི་ཞལ་ནས་ཁྱེད་ཀྱིས་ཆུང་ནས་བཟུང་ད་བར་དུ་ཐུགས་བསྐྱེད་དམ་བཅའ་རྣམ་དག་ཡིན་ཀྱང་དུས་ངན་གྱི་མི་རྣམས་ཀྱིས་གོ་དཀའ་བས། ཁྱེད་གནས་འདིར་འདུག་ཐབས་མི་སྟེར་ཨ གསུངས། བདེ་བའི་རྡོ་རྗེའི་བསམ་པ་ལ། ད་ངེད་ཅག་རྣམས་ལ་ནོག་འཁོན་བྱེད་དོན་ཅི་ཡང་མེད། ཁོག་པའི་སྙིང་དང་། དཔྲལ་བའི་མིག་ལྟ་བུ་གཉིས་ཀ་ནི་ཞིང་དུ་བྱོན་འགྲོ་ངེས་རེད། དེ་རྗེས་རྒྱུ་རྫས་ནི་རྩོད་རྒྱུ་མེད་པ་ཡིན་པས། གནས་འདི་ཀར་འདུག་ཐབས་མེད་རྒྱུ་མེད་པ་འདྲ་སྙམ་ཀྱང་། ཅི་ཡང་མ་ཞུས་ནས་ངུ་གྱིན་བསྡད་ཚེ། རྗེའི་ཞལ་ནས་ད་ཁྱོད་ང་རང་གིས་མཐོང་སར་ཐུགས་ངལ་མ་བྱས་ན་དགའ། ང་འདུག་ཐག་ནི་མེད་ངེས་པ་འདྲ་ན། འུ་ཅག་གཉིས་དུས་དང་རྣམ་པ་ཀུན་ཏུ་འདུ་འབྲལ་ག་ལ་ཡོད། ཚེ་རབས་ཐམས་ཅད་དུ་མི་འབྲལ་བའི་སྨོན་ལམ་ཐོབ། ཁྱེད་ཀྱིས་དེ་ལྟར་ཚེ་བདག་གིས་ཀྱང་སེམས་ཁམས་མི་བདེ་བ་ལྟ་བུ་རེད་གསུངས། དེ་ནས་བདེ་བའི་རྡོ་རྗེས་ད་ཇི་ལྟར་བྱས་ཀྱང་རང་རེ་རྣམས་ཀྱི་ལུང་བསྟན་དང་། རྗེའི་བསྙུན་ཁམས་གང་ལ་དཔྱད་ཀྱང་མི་བཞུགས་ངེས་པ་ཡིན་འདུག་པས། རྗེས་གཟིགས་སར་ང་རང་གི་སྡུག་བསྔལ་མི་བསོགས་པར་བྱེད་དགོས་མ་གཏོགས། ས་ལམ་གྱི་རྐྱེན་དུ་འགྲོ་ཉམས་ནས་སྡུག་སྲན་ཅི་ཐུབ་བྱས། ཡང་བདེ་བའི་རྡོ་རྗེས་བསོ་སྤྲུལ་སང་གདན་འདྲེན་ལ་མི་ཞིག་མངགས་དགོས་ཞུས་ཚེ། རྗེའི་ཞལ་ནས་འབོད་མི་བཏང་མི་དགོས་ཐོན་ཐབས་འོང་གསུངས། བདེ་བའི་རྡོ་རྗེས་བསོ་སྤྲུལ་ཡང་སྐུགེགས་ཆེ་བ་དང་། ཁྱེད་མི་བཞུགས་པ་