Tibetan
པོ་ཚོགས་ནས་གླུ་གར་རོལ་མོའི་སྒྲ་རྒྱུན་མི་ཆད་པར་སྒྲོགས་པ་ཞིག་གཟིགས་པས། རྗེའི་ཞལ་ནས་ཁྱོད་སུ་ཡིན། ད་ལན་འདིར་ཅི་བྱེད་དུ་འོང་། ཡུལ་ཕ་གི་ཅི་རེད་གསུངས་ཚེ། ཌཱཀྐིས་ན་རེ་ང་ཁྱེད་ཀྱིས་མི་ཤེས་སམ་ཟེར། རྗེའི་ཞལ་ནས་རྒྱན་ཆས་ཀྱི་ཁྱད་པར་མ་གཏོགས། ང་རང་གི་གྲོགས་བདེ་བའི་རྡོ་རྗེ་འདྲ་སྙམ་གྱི་གསུངས། ཌཱཀྐིས་ན་རེ། ཧེ་ཧེཿ ང་བདེ་བདེ་མཁའ་འགྲོའི་གྲོང་ཁྱེར་ནས། །བདེ་བསྐྱེད་གསང་བའི་གར་མཁན་མ། །བདེ་ཆེན་འབྱུང་གནས་དཔའ་བོ་ལ། །བདེ་སྟོང་ཡེ་ཤེས་སྤེལ་བར་བྱས། །ང་བདེ་ཆེན་བདེ་བའི་རྡོ་རྗེ་ཡིན། །ཡུལ་ཕ་གི་མཁའ་འགྲོའི་ཚོགས་གྲལ་རེད། །དེའི་ཚོགས་དཔོན་བི་མ་མི་ཏྲ་ཡོད། །ཁྱོད་འདོང་དང་འུ་ཅག་ལྟད་མོར་འགྲོ། །ཞེས་ཟེར་ནས། རྗེས་ཀྱང་ཌཱཀྐི་དང་བཅས་ཚོགས་གྲལ་དུ་བྱོན་ནས་གཟིགས་པས། ༈ ཐམས་ཅད་ཀྱིས་བི་མ་ལའི་བདུད་རྩི་སྨན་སྒྲུབ་རེད་ཟེར་ནས་ཚོགས་འདུག་པས། རྗེས་ཕྱག་ཕུལ་ནས་དངོས་གྲུབ་ཞུ་ཞུས་ཚེ། ཚོགས་དཔོན་གྱི་དཔའ་བོའི་ཞལ་ནས་དངོས་གྲུབ་དལྟ་བསྩལ་འོང་གི །ད་ཁྱོད་ལ་ངས་རྒྱ་ཆོས་བོད་དུ་མ་བསྒྱུར་བ་སྙིང་ཐིག་མ་བུ་ཁ་སྤྲོད་དང་། ཐུགས་སྒྲུབ་ཡིད་བཞིན་ནོར་བུ་རྣམས་གཅེས་ནོར་དུ་སྤྲད་ཡོད་པ་དེ་གཏན་ལ་ཕབ་ནས་གསལ་ཁྱབ་ཏུ་སྤེལ་དང་། འགྲོ་དོན་རྒྱ་ཆེན་པོ་འབྱུང་བ་དང་། ཁྱད་པར་ཁྱེད་ཀྱི་རིགས་སུ་ང་མི་འགྱང་བར་འོང་བས། དེའི་སྐབས་གཏེར་གཉིས་ཀྱི་བསྟན་པ་བདག་ལ་ཕབ་པ་ཡིན་པས། དེའི་བར་ལ་བདུད་དབང་དུ་མ་གཏོང་གསུངས་ནས། རིན་པོ་ཆེ་སྣ་ཚོགས་ལས་གྲུབ་པའི་རྡོ་རྗེ་དྲིལ་བུ་ཞིག་གནང་བས། རྗེའི་ཐུགས་ལ་སྔར་མཁའ་འགྲོའི་ལུང་བསྟན་དུ་བི་མས་བདུད་རྩི་སྨན་སྒྲུབ་ནེེ་གྲོ་རྡོ་རྗེ་རྫོང་དུ་བསྒྲུབ་དགོས་གསུང་པ་དེ་འདི་ཡིན་པར་འདུག །ད་དུང་ལོ་རྒྱུས་རྣམས་གསལ་པོ་ཞིག་འདྲི་དགོས་དགོངས་ཚེ། སྔར་གྱི་ཌཱཀྐིས་ན་རེ་སྔར་མཁའ་འགྲོའི་ལུང་བསྟན་བཞིན་ཁྱེད་ལ་མཆེད་ལྕམ་རྣམས་ཀྱིས་བདུད་རྩི་བམ་སྒྲུབ་མཛད་པ་དེ་རེད། བི་མ་ལ་ཁྱོད་རང་ཡིན་པས། ད་ལན་གྱི་ཡུལ་སྣང་དཀྱིལ་འཁོར་འདི་རྣམས་ཁྱོད་ཀྱི་བདུད་རྩི་སྨན་སྒྲུབ་ཀྱི་སྒྲུབ་གྲལ་རེད། ཟེར་མ་ཐག་ཏུ་གློ་བུར་དུ་གཞན་རྐྱེན་གྱིས་མནལ་ལས་སད་དོ། །ནང་པར་བདེ་བའི་རྡོ་རྗེ་ལ་རྗེའི་ཞལ་ནས་ང་རང་གི་ཟབ་གཏེར་སྙིང་ཐིག་མ་བུ་ཁ་སྤྲོད་ཞེས་པ་མན་ངག་སྐོར་གསུམ་གྱི་དགོངས་བཅུད་ཟབ་མོ་ཞིག་གཏེར་དུ་ཡོད་པ་འདོན་དུ་འགྲོ་དགོས་གསུངས། བདེ་བའི་རྡོ་རྗེས་གཏེར་གནས་གང་ལགས་མྱུར་པོར་བྱོན་དགོས་ཞུས་ཚེ། རྗེའི་ཞལ་ནས་རྨ་སྤོམ་རའི་གཡས་ཕྱོགས་བསེ་མཁར་ནོར་བུ་ཁྲབ་རྫོང་ཞེས་པ་རི་ཙིཏྟའི་དབྱིབས་འདྲ་བ་ཞིག་ཡོད། དེའི་གཡོན་ངོས་ན་ན་བ་ཆེན་པོ་ཞིག་ཡོད། དེ་ན་སྦས་པའི་མཚོ་ཆེན་འབྲུག་མོའི་བླ་མཚོ་ཞེས་པ་དེ་གཏེར་གནས་རེད། སྔར་ང་རང་དམར་ཆེན་ལ་འགྲོ་དུས་རྡེའུ་བྱ་ལམ་ཟེར་བ་དེ་ལ་ཐོན་དུས་རྨ་སྤོམ་ར་བསུ་བ་ལ་འོང་སྐབས། མེ་ཏོག་གི་ཆར་བབས། ནམ་མཁའ་ལ་འཇའ་རིས་སྣ་ཚོགས་ཤར།ལུང་པར་དྲི་བཟང་གི་ངད་ཐུལ། བཀྲ་ཤིས་ལྷ་རེག་དངོས་སུ་ཕུལ་བ། གྲྭ་པ་ལ་སོགས་པས་མཐོང་ཆོས་སུ་གྱུར། དེ་སྐབས་གཏེར་ཁ་ཆ་ཤས་རེ་སྤྱན་དྲངས་ཀྱང་། སྙིང་ཐིག་གི་ཆོས་སྐོར་ཁྱེད་རང་ལ་རག་ལས་ཡོད་པས་བཏང་སྙོམས་སུ་བཞག་པ་ཡིན། ད་ནི་བསྐལ་བ་གླང་ལོར་ལེན་དུ་འགྲོ་དགོས་གསུངས་ནས་རྟེན་འབྲེལ་རྗེས་མཐུད་དུ་བཞག །དེ་ནས་རྡོ་རྗེ་སློབ་དཔོན་དང་མཆེད་ལྕམ་ཀུན་གྱིས་ ༈ བདུད་རྩི་སྨན་སྒྲུབ་ཀྱི་དངོས་གྲུབ་རོལ་བས། ཐམས་ཅད་ལ་ཉམས་རྟོགས་ཁྱད་པར་ཅན་གྱི་བལྟས་སྣ་ཚོགས་འཁྲུགས་པ་སོགས་འབྱུང་ནས། གཏང་རག་ཚོགས་འཁོར་ལ་སོགས་པ་ཞིབ་རྒྱས་སུ་མཛད། དེ་ནས་མཚམས་གྲོལ་རྗེས་སུ་སྨན་གྱི་རྗེས་རིམ་གྱི་བྱ་བ་ཐམས་ཅད་མཐར་ཕྱིན་པར་མཛད་དེ། བུ་སློབ་རྣམས་ལ་སྨན་གྱི་དངོས་གྲུབ་རང་རང་གི་གདུལ་བྱ་དང་འཚམས་པར་གནང་ནས། ཆོས་ཁྲིད་སོགས་ཀྱང་གང་འདོད་དུ་བསྩལ་བའོ། །དེ་ནས་ཡབ་རྗེ་བླ་མའི་འདས་མཆོད་ཚོགས་ཡོད་སྐབས། བསོ་སྤྲུལ་རིན་པོ་ཆེ་ལ་དགོན་པས་ཆིབས་བསུ་འོང་འདུག་པས། རྗེའི་ཐུགས་ལ་དེངས་བར་སོངཔས། བདེ་བའི་རྡོ་རྗེས་ཁྱེད་ཁམས་བསྙུང་བ་ཨེ་རེད་ལགས་ཞུས་ཚེ། རྗེའི་ཞལ་ནས་ང་རང་ཁྱེད་འོང་ཕྱིན་ཆད་ནད་ཐམས་ཅད་ལས་གྲོལ་སོང་བས་ནད་མེད། བསོ་སྤྲུལ་བྱོན་གྲབ་དགོས་ཚེ་སེམས་གཅོང་མོ་རེད་གསུངས། དེ་ནས་བསོ་སྤྲུལ་རིན་པོ་ཆེ་ཕར་བྱོན་ཁར་རྗེའི་དྲུང་ནས་བྱོན་མི་ཐུབ་པ་ལྟ་བུར་མཛད་ཚེ། རྗེས་ཀྱང་རང་ཁར་གྱི་གསུང་མཛད་རེ་མ་གཏོགས་ཐུགས་བརྩེ་བརྩེ་ཆེན་པོ་མི་མཛད་ཅིང་བཞུགས་འདུག །དེ་ནས་བུ་སློབ་རྣམས་ཀྱིས་བསོ་སྤྲུལ་རིན་པོ་ཆེ་གནས་ཕན་ཆོད་དུ་ཆིབས་སྐྱེལ་བྱས། བདེ་བའི་ རྡོ་རྗེའི་རྐང་པ་ངན་པས་རྗེས་གཟིམ་སྦྲའི་ནང་བར་དུ་ཆིབས་སྐྱེལ་གྱི་ཚུལ་བྱས་ནས་དེ་ཀར་ལྷག་སོང་བས། རྗེའི་ཞལ་ནས་བསོ་སྤྲུལ་བྱོན་སོང་བ་འདི་ང་རང་གིས་སེམས་ཤིན་ཏུ་གཅོང་འདུག་གསུངས། བདེ་བའི་རྡོ་རྗེས་ཁྱེད་ཀྱིས་བསོ་སྤྲུལ་བྱོན་ཁར་ཐུགས་བརྩེ་བརྩེ་དང་གཅེས་གཅེས་ཨེ་མི་མཛད་སྙམ་སེམས། དེ་ལྟ་མི་མཛད་པ་ཅི་ལགས་ཞུས། རྗེའི་ཞལ་ནས་ངས་གཅེས་གཅེས་བྱས་ན་ཁོ་རང་དེ་བས་ཀྱང་འགྲོ་མི་ཐུབ་པར་འདུག་པའི་དཔེ་ཡིན་མ་གཏོགས། ང་རང་གི་བརྩེ་བའི་བུ་གཅིག་པུ་དང་ཁྱད་མེད། ལུགས་གཉིས་གང་ཐད་ནས་སྡུག་མཉམ་ཁུར་བྱས་ཏེ། ད་བར་དུ་ངའི་བཀའ་ཚིག་གཅིག་དང་འགལ་བ་འགྲོ་མ་མྱོང་བའི་སློབ་མ་དམ་ལྡན་ཡིན་གསུངས་ནས་དེ་ཐད་ཀྱི་ནང་གསུངས་མང་པོ་མཛད། དེ་ནས་དེར་འདུས་ཀྱི་བུ་སློབ་རྣམས་ལ་ཟབ་གཏེར་གཉིས་ཀྱི་ཆོས་སྐོར་གསར་ཕབ་དང་། དེའི་དབང་ཁྲིད་ལུང་དང་བཅས་པ་གནང་བ་དང་། ཁྱད་པར་ཕྱོགས་འདུས་ཀྱི་གཙོ་བོ་རྗེའི་ལུང་ཟིན་སྤྲུལ་པའི་སྐུ་འཇིགས་མེད་མཚན་ཅན་དང་། སྐུ་ནུ་སྤྲུལ་སྐུ་རྡོ་རྗེས་དགྲ་འདུལ་ལ་སོགས་པའི་འཁོར་འདུས་སྡེ་རྣམས་ལ། ཀུན་མཁྱེན་ཡབ་སྲས་ཀྱི་ཆོས་གཏེར་རྣམས་ཀྱི་དབང་ཁྲིད་ལུང་དང་བཅས་པ་དར་རྒྱས་སུ་མཛད་ནས་ཕྱོགས་དུས་ཀྱི་སློབ་ ༈ མའི་འདུ་བ་མང་བའི། རྗེ་དེ་ཉིད་མཚམས་སྒོ་རྡོ་བརྩེགས་བྱས་ཏེ་དམ་རྒྱར་བཞུགས་སྐབས། མཁའ་འགྲོ་ཡེ་ཤེས་མཚོ་རྒྱལ་མ་ཡིན་སྐད་པས་འདི་སྐད་གསུངས། ཧེ་ཡཿ དབྱིངས་དམ་པ་རབ་འབྱམས་ཆོས་ཀྱི་ཀློང་། །རྩ་ལ་ཡེ་ཤེས་མཁའ་འགྲོའི་རྣམ་པར་ཤར། །དོན་སྒྲིབ་མེད་གསལ་བའི་མེ་ལོང་འདི། །ཐུགས་བརྡལ་ཁྱབ་ཆོས་ཉིད་རོལ་མོར་ངོམས། །ཐབས་བདེ་ཆེན་པདྨ་ལས་འབྲེལ་པས། །སྔོན་སྨོན་ལམ་དག་པའི་མཐུ་སད་ནས། །གཏེར་གཉིས་ཀྱི་སྲོག་ཤིང་འཛིན་པ་ལ། །འཁྲུལ་ཞིག་གི་རྣལ་འབྱོར་ཝཱ་ར་ཧི། །ཕྱི་ཆ་ལུགས་མི་མོའི་གཟུགས་སུ་བཞེངས། །གཏེར་རྣམ་གཉིས་སྤེལ་བའི་གྲོགས་ལྡན་ཕྱིར། །ཐབས་ཤེས་ཀྱི་རྟེན་འབྲེལ་མཁའ་འགྲོས་བྱས། །མདངས་གཅིག་གྲོགས་གཅིག་གིས་བྱེད་པའི་དུས། །གྲོགས་ངན་པའི་ངག་གིས་བསླུ་བ་སྤོངས། །ལས་བྱ་བ་ཅི་བྱེད་རང་ཐག་ཆོད། །བློ་ཕལ་པའི་མི་ལ་མ་དྲི་བར། །ཕ་བླ་མའི་ཞལ་ལུང་བཞིན་དུ་སྒྲུབས། །ཁྱེད་ཐབས་ཤེས་འཛོམས་པའི་རྟེན་འབྲེལ་གྱིས། །སྐལ་ལྡན་གྱི་བུ་སློབ་འདུ་སྒོ་རྒྱས། །ཐབས་མཁས་པས་སྙིང་པོའི་སྒྲུབ་པ་ཚུགས། །དེའི་རྐྱེན་གྱིས་ཡུལ་ཀུན་བདེ་ལེགས་པའི། །དོན་གཉིས་ཀྱི་མཛད་ ཕྲིན་ནམ་མཁར་མཉམ། །བརྡ་གོ་འམ་རྡོ་རྗེ་གཟི་བརྗིད་རྩལ། །ཞེས་ཟེར་ནས་མི་སྣང་བར་གྱུར་ཏོ། །དེ་ནས་དགུང་ལོ་ཞེ་གསུམ་ལོར་བླ་བྲང་ལ་མི་འདོད་པ་ཞིག་འབྱུང་བས། གློ་བུར་དུ་རྗེ་དེ་ཉིད་སྐུ་མཚམས་ནས་གྲོལ་དགོས་བྱུང་བ་སོགས་འབྱུང་། དེའི་སྐབས་སུ་བདེ་བའི་རྡོ་རྗེ་ལ་མཁའ་འགྲོའི་བརྡ་བྱང་འོང་ནས།མཁའ་འགྲོའི་ཚོགས་ཁང་གོང་མ་ན་མཁའ་འགྲོ་དགོངས་འདུས་ཀྱི་ཆོས་སྐོར་ཞིག་གཏེར་དུ་ཡོད་པ་དེ་འདོན་པའི་དུས་ལ་བབ་ནས། བརྡ་བྱང་རྗེའི་ཕྱག་ཏུ་ཕུལ་ཚེ། རྗེའི་ཐུགས་ཤིན་ཏུ་དགྱེས་ཏེ་རྟེན་འབྲེལ་དུས་དང་ལྡན་དགོས། འུ་ཅག་གཉིས་ལེན་དུ་འགྲོ་གསུངས། མཁའ་འགྲོས་ཀྱང་ལགས་སོ་ཞུས་ནས་ཞག་ཆ་ཤས་ཀྱི་གཏེར་འདོན་པའི་དུས་ལ་བབ་སྟེ། ཡབ་ཡུམ་གཉིས་ཀ་གསང་ཐབས་ཀྱིས་བྱོན། མཁའ་འགྲོའི་རྐང་པ་ངན་པས་ག་ལེར་སོང་། རྗེས་ཁོང་གི་གཏེར་སྒོ་གར་ཡོད་གཟིགས་གསུངས་ནས་སྔོན་དུ་བྱོན་སོང་བས། དེའི་ཅུང་ཞིག་གི་རྗེ་ཕྱིར་ཕེབས་བྱུང་བས། མཁའ་འགྲོས་ཁྱེད་ཅིའི་ཕྱིར་བྱོན་པ་ཡིན་ཞུས་ཚེ། རྗེའི་ཐུགས་ལ་རྟེན་འབྲེལ་བསྣོག་མི་ཉན་དགོངས་ཤིང་། ང་རང་གིས་གཏེར་ལོན་ནས་ཁྱེད་བསུ་བར་འོང་བ་ཡིན་གསུངས་ཏེ་ས་ཕུག་གཅིག་ལ་ལྷན་དུ་བྱོན། དེ་ནས་རྗེའི་ཞལ་ནས་གཏེར་གནས་ལ་ཉ་ ༈ སྦལ་མང་པོ་ཚོགས་འདུག་པས་དེ་ཅི་རེད་གསུངས། བདེ་བའི་རྡོ་རྗེས་འདི་ཕྱིའི་གཏེར་སྲུང་ཀླུ་བཙན་ཞིག་ཡིན་འདུག་པས་དེའི་ཆོ་འཕྲུལ་ཨེ་རེད་ལགས་ཞུས། དེ་ནས་ཡར་གཏེར་སྒོར་ཉེ་འགྲོ་ཁར་དྲི་བཟང་འཐུལ་བ་དང་། ནམ་མཁའ་ནས་རྒོད་ཀྱི་འཚུབ་འཚུབ་བྱེད་ཅིང་སྐད་སྙན་སྒྲོགས་པ་སོགས་བྱེད། དེ་ནས་ཡབ་ཡུམ་གཉིས་ཀ་གཏེར་སྒོར་ཕེབས་ནས། རྗེས་ཚིག་བདུན་གསུངས་བཞིན་བཞུགས་ཏེ། བདེ་བའི་རྡོ་རྗེས་གཏེར་སྒོ་ཕྱེས་ཏེ་གཏེར་སྒྲོམ་གསུམ་འདོན་ནས། རྗེའི་ཕྱག་ཏུཕུལ་བས་ངོ་མཚར་ཆེ་གསུངས་ཏེ། དབང་ལེན་མཛད་ཅིང་ཐུགས་དགྱེས་དགྱེས་མཛད་ནས་གཏེར་ཚབ་བཞག་སྟེ་གཏེར་སྒོ་བསྡམས། དེ་ནས་བདེ་བའི་རྡོ་རྗེས་རྗེ་ལ་གསོལ་བ། ང་རང་གཏེར་གསང་གཏེར་ཡིན་པས་གཞན་ལ་ལོན་རབ་གསུང་མི་ཉན་ཞུས་ཚེ། རྗེའི་ཞལ་ནས་ཁྱེད་གཏེར་སྟོན་ཡིན་པ་ཀུན་གྱིས་ཐོས་ཡོད་པས། ང་རང་གིས་མ་བཤད་ནའང་གོ་འགྲོ་ངེས་པ་ཡིན་གསུངས། དེ་ནས་བདེ་བའི་རྡོ་རྗེས་ད་ནི་ཁྱེད་ཀྱིས་ཟབ་གཏེར་ཞིག་བཞེས་དགོས་ཡང་ཡང་ཞུས་པས། ཉིན་གཅིག་དྭངས་ཡན་ལ་ཡབ་ཡུམ་གཉིས་ཀ་བྱོན་པས། རྗེས་ད་རེས་ང་རང་གི་གཏེར་ལོན་དགོས་པས་ཨ་མཚར་དུ་རྟེན་འབྲེལ་ཞིག་བརྟགས་དགོས་ གསུངས་ནས། བདེ་བའི་རྡོ་རྗེའི་སྲས་ལོ་ངོ་ལྔ་ལོན་པ་ཞིག་ཡོད་པ་དེ་ལ། རྗེའི་ཞལ་ནས་ཁྱེད་གཏེར་སྟོན་ཨེ་བྱེད་གསུངས། སྲས་ཀྱིས་ང་གཏེར་སྟོན་ཁྱེད་འདྲ་འདྲ་བྱེད་ཟེར། རྗེས་རིགས་ཀྱི་བུ་འདི་ལྟར་ལོས་ཡིན་གསུངས། དེ་ནས་གནས་དེའི་ངོས་ནས་བྱེ་མ་ཨ་ཀྲོང་ལས་གྲུབ་པའི་དབྱངས་ཅན་རིགས་ལྔའི་གཏེར་སྒྲོམ་ཆེ་བ་གཅིག་བཞེས་ནས་ངོ་མཚར་བའི་རྟེན་འབྲེལ་དུ་མ་རང་བྱུང་དུ་འབྱུང་། དེའི་སྐབས་སུ་ཨ་འཛོམ་རིན་པོ་ཆེས་བང་མི་བཏང་ནས་བདེ་བའི་རྡོ་རྗེ་བྱོན་དགོས་པའི་གསུངས་ཤོག་གནད་མོ་ཞིག་ཐོན་བྱུང་བས། བདེ་བའི་རྡོ་རྗེས་མི་འགྲོ་དགོས་མེད་ཟེར་ཞིང་ཡིག་ལན་ཙམ་ཡང་མི་བསྐུར། དེ་དུས་རྗེའི་ཐུགས་ལ་བླ་མ་ཨ་འཛོམ་གྱི་གསུངས་ཤོག་འདི་ལ། རང་གཞན་ཀུན་ལ་དགོས་པ་ཆེན་པོ་ཡོད་པར་འདྲ། མིན་ཀྱང་བླ་མའི་སྐུ་ཚེ་ལ་ཕན་ཐོག་ཡོད་ཚེ། སྤྱིར་སེམས་ཅན་གྱི་བདེ་སྐྱིད་སྒོས་གུ་རུ་པདྨའི་བསྟན་པ་འདི་ལ་ཕན་ཐོགས་རྒྱ་ཆེན་པོ་འབྱུང་ངེས་དགོངས་པ་དང་། ཡང་སྒོས་བདེ་བའི་རྡོ་རྗེའི་ཁ་བྱང་ལྟར་ན་དགོས་པ་ཆེན་པོ་འདུག་དགོངས་ཏེ། བདེ་བའི་རྡོ་རྗེ་ལ་ཡང་ཡང་སོང་གསུངས་ནས་གྲྭ་པ་ཁལ་རྟ་སོགས་ཀྱི་སྟ་གོན་མཛད་དེ། ཟླ་བགཉིས་ནས་འདི་ཀར་ཐོན་ཐབས་དགོས་སོགས་གསུངས་ནས་ལམ་སྐྱེལ་མཛད། དེའི་ཉིན་པར་ནས་༼རྗེའི༽རྡོ་རྗེའི་སྐུ་ལུས་ཐམས་ཅད་མི་བདེ་བ་ལྟ་བུར་སོང་འདུག་ཀྱང་། རྗེའི་དངོས་སློབ་བླ་མ་ཚུལ་བཟང་ཞེས་པས་གསོལ་ཇ་དྲང་ནས་དེ་ཀར་བྱོན་ཏེ་ལུགས་གཉིས་ཀྱི་གསུང་བསྒྲོས་མང་དུ་མཛད། དེ་ནས་ཚུར་གཟིམ་སྦྲའི་ནང་དུ་བྱོན་ནས་བཞུགས་པས། ནང་སྔ་མོ་བསྙུན་གཞི་ཇེ་འཁྲུག་ཏུ་སོང་། དེར་འདུས་ཀྱི་བུ་སློབ་རྣམས་ཀྱིས་སྐུ་རིམ་སྒྲུབ་པ་དང་། ཁྱད་པར་བླ་བྲང་ནས་རྗེའི་སྐུ་ནུས་སྤྲུལ་སྐུ་རྡོ་རྗེ་དགྲ་འདུལ་བྱོན་ནས་བྱབ་ཁྲུས་མནོལ་བསང་ལ་སོགས་པའི་ཅི་དགོས་ཀྱི་སྐུ་རིམ་ཐམས་ཅད་ཉིན་ཞག་ཁ་སྦྱར་ནས་གསུངས་པ་དང་། མཁྱེན་སྤྲུལ་རིན་པོ་ཆེའི་སྐུ་སྲས་ཉག་བླ་ཐུགས་ཀྱི་ཡང་སྤྲུལ་རིག་འཛིན་ཀུན་བཟང་ཉི་མས་ཀྱང་ཚེ་སྒྲུབ་སོགས་མཛད་ནས་རིམ་གྱིས་བསྙུན་ལསགྲོལ་ཏེ། བླ་མ་ལྷ་དང་མཁའ་འགྲོའི་ལུང་བསྟན་བཞིན་ཡབ་རྗེ་བླ་མའི་ཟབ་གཏེར་མ་བསྒོམས་སངས་རྒྱས་ཀྱི་སྒྲུབ་སྡེ་བཙུགས་ནས། རྗེའི་དངོས་སློབ་དམ་པ་སྟག་ཐོག་བླ་མ་བརྩོན་འགྲུས་རྒྱ་མཚོ་དང་། ཕྱུག་ཤུལ་ཀརྨ་དོན་གྲུབ་སོགས་སྐལ་ལྡན་བཅུ་བདུན་ལས་མི་མང་བར་མཛད་ནས་སྙིང་པོ་སྒྲུབ་པའི་བསྟན་པའི་དབུ་བཙུགས་པར་མཛད། དེ་ནས་གཞན་དེར་འདུས་ཀྱི་བུ་སློབ་རྣམས་ལ་ཀུན་མཁྱེན་ཡ་བཞིའི་དབང་ལུང་གསུངས་3 རུ2 སྐབས། དམ་ཉམས་ཞིག་གི་རྐྱེན་གྱིས་རྗེའི་སྤྱན་སྒྲིབ་འགྲོ་བ་ཙམ་བྱས་སྐབས། བདེ་བའི་རྡོ་རྗེ་ཡིན་སྐད་པས་ལུང་བསྟན་བརྡ་རུ་ངོམས་པ་གཏེར་གཞུང་དུ་གསལ། དེ་ནས་རྗེ་དེ་ཉིད་ཀྱིས་སྒྲུབ་སྡེ་བ་རྣམས་ལ་དུས་དུས་སུ་ཁྲིད་གསུངས་པ་ལ་བྱོན་སྐབས། མཁའ་འགྲོ་བདེ་སྐྱོང་དབང་མོ་མཚམས་སེར་ཨེ་ཡིན་དགོངས་ནས་ཅུང་བཞུགས་ཞིག་མཛད་ཚེ། ནམ་མཁའི་ཐོངས་ནས་ཌཱཀྐི་ཞིག་གིས་འདི་སྐད་ཟེར། ཡེ་ཡེཿ སྤྲིན་བྲལ་ནམ་མཁའ་ཡངས་པ། །སྣོད་བཅུད་གཞི་རུ་ཨེ་ནམ། །རྒྱ་ཆེའི་རྒྱ་མཚོ་ཡངས་པ། །ནོར་བུའི་གནས་སུ་ཨེ་ནམ། །ཤེས་རབ་ཕོ་ཉའི་སྦྱོར་བ། །བདེ་སྟོང་ལམ་མཆོག་ཨེ་ནམ། །ཐབས་དང་ཤེས་རབ་དབྱེར་མེད། །ལྷན་དུ་འཚོགས་འོང་ཨེ་ནམ། །རྣམ་རྟོག་འཕྲུལ་གྱི་བརྫུ་བག །རེ་དོགས་རྩ་བར་ཨེ་ནམ། གཏད་མེད་བྱུང་རྒྱལ་སྤྱོད་དང་། །མི་རིང་བདེ་སྐྱོང་དབང་མོ། །ལྷོ་ནས་ཆས་འོང་ཨེ་ནམ། །གཞན་གྱིས་བསླུ་བསྒྱུར་མི་བཏུབ། །རྣོ་བྱེད་ལྕགས་སུ་ཨེ་ནམ། །བར་ཆད་གང་གིས་མི་ཚུགས། །ཀུན་ལས་རྒྱལ་འོང་ཨེ་ནམ། །འབྲུག་གི་སྐད་ཆེན་བསྒྲགས་ཀྱང་། པདྨའི་སྨོན་ལམ་མཐུ་བཙན། །བཟློག་ཏུ་མི་ནུས་ཨེ་ནམ། །ཕང་ལ་འོ་དོད་མི་དགོས། །འབྲལ་མེད་ ༈ རྗེས་སུ་བཟུང་ཡོད། །དབང་དྲག་བསྐུལ་ལུ་མི་དགོས། །སྡོང་གྲོགས་དབྱེར་མེད་བྱེད་འདུག །ཆུ་དགྲགང་ལ་མི་སྐྱོན། །པད་འབྱུང་མཚོ་རྒྱལ་ཐུགས་རྗེས། །འཇིགས་པ་ཀུན་ལས་བསྐྱབ་འོང་། །རིགས་བྱེད་ཕྲིན་ལས་སྦྲན་ན། །མྱུར་དུ་འབྱོན་འོང་ཨེ་ནམ། །ཅེས་ཟེར་ཡལ། རྗེའི་ཐུགས་ལ་བདེ་མོ་རེད་དགོངས་ནས་བུ་སློབ་རྣམས་ལ་ལམ་ལྷ་རིམ་གྲོ་དགོས་གསུངས། དེ་ལྟར་བྱེད་སྐབས་གློ་བུར་དུ་བདེ་བའི་རྡོ་རྗེ་ཐོན་བྱུང་བས་ཐམས་ཅད་ཀྱིས་དགའ་སྤྲོ་ཆེན་པོ་བྱས། བདེ་བའི་རྡོ་རྗེ་རྐང་པ་ཉམས་གྲིབ་ཡིན་པས་ཡར་དེངས་ལ་སོང་ནས་ལག་རྟེན་འཛིན་མི་དགོས་པ་ལྟ་བུར་སོང་འདུག་པས། བུ་སློབ་དེར་འདུས་ཀུན་གྱིས་ངོ་མཚར་དུ་སྨྲས་ནས་དགའ་སྤྲོ་ཆེན་པོ་བྱས་སོ། །དེ་ནས་རྗེའི་ཐུགས་ལ་དནི་བཤད་སྒྲུབ་ཀྱི་བསྟན པ་ནི་དར་རྒྱས་སུ་འབྱུང་འདུག་པས། ཡབ་རྗེ་བླ་མའི་ཐུགས་བཞེད་རྫོགས་ཕྱིར་དང་། ཁྱད་པར་ཡོན་བདག་དང་བུ་སློབ་ཀུན་གྱིས་གསོལ་ཞབས་ཀྱི་རྟེན་དུ་ཕུལ་བའི་ཕྱག་རྫས་རྣམས་ཀྱིས། ཡབ་རྗེ་བླ་མའི་ཟབ་ཆོས་ཀྱི་ནང་ནས་གནས་ལུགས་རྒྱུད་སྤར་དུ་བཞེངས་པ་དང་། ཟབ་ཆོས་ཡོངས་རྫོགས་ཀྱི་ཡི་གེ་སྤུས་ལྡན་རིན་ཐང་ཆེ་བས་བརྒྱན་པ་པུསྟ་ཀ་ཉི་ཤུ་ལྷག་ཙམ་དང་། རྒྱལ་བའི་ བཀའ་འགྱུར་ཆེན་མོའི་དབུས་རྗེ་ཡབ་སྲས་ལ་སོགས་པའི་གསུང་འབུམ་སྐོར་དང་། ཀུན་མཁྱེན་ཡབ་སྲས་ཀྱི་གསུང་གི་གཙོས། དཔལ་སྤྲུལ་རིན་པོ་ཆེ་དང་། མི་ཕམ་འཇམ་དཔལ་དབྱངས་དང་། སྐུ་མཆེད་རྡོ་གྲུབ་རིན་པོ་ཆེ་ལ་སོགས་པའི་མཁས་གྲུབ་གཉིས་ལྡན་གྱི་གསུང་འབུམ་སྐོར་དང་། རིན་ཆེན་གཏེར་མཛོད་དབུས། རཏྣ་གླིང་པ། དགོངས་འདུས། བདུད་འདུལ་རྡོ་རྗེ་ལ་སོགས་པའི་སྔ་འགྱུར་དང་། ཉག་བླ་པདྨ་བདུད་འདུལ། མགར་ར་གཏེར་ཆེན་བདུད་འདུལ་དབང་ཕྱུག་གླིང་པ། ལས་རབ་གླིང་པ། རིག་འཛིན་ནོར་བུ། སྐུ་ནུས་སྤྲུལ་སྐུ་རྡོ་རྗེ་དགྲ་འདུལ་ལ་སོགས་པའི་ཟབ་མོ་གཏེར་ཆོས་ཀྱི་སྐོར་དང་། ཐང་སྟོང་། མར་པ། མི་ལ། ཞབས་དཀར་ལ་སོགས་པའི་གྲུབ་པའི་དབང་ཕྱུག་རྣམས་ཀྱི་ཞལ་གདམས་གསུང་ཆོས་ཀྱི་སྐོར་ལ་སོགས་པ། མདོར་ན་གསར་དགེ་རྙིང་གསུམ། བཀའ་འབྲུག་ཇོ་ནང་ལ་སོགས་པའི་རིས་མེད་ཀྱི་དཔེ་ཆ་པུསྟ་ཀ་སྟོང་ཟིན་ཙམ་དང་། ཡབ་རྗེ་བླ་མའི་སྐུ་གསུང་ཐུགས་ཀྱི་རྟེན་རྣམས་ལ། ཀུན་གྱིས་ཕྱག་དང་སྐོར་བ་བྱེད་པ་ལ་སྟབས་བདེ་བར་གཙུག་ལག་ཁང་ཞིག་བཞེངས་དགོས་དགོངས་ནས། བདེ་བའི་རྡོ་རྗེ་ལ་དེ་ལྟར་དགོས་གསུངས་ཚེ། མོ་ན་རེ་ཁྱེད་ཀྱིས་ཅི་གསུངས་ལོས་ ༈ བསྒྲུབ་ཞུས་ནས་དེ་ལྟར་གྱི་སྟ་གོན་བྱས། དེ་ནས་སྟག་ཐོག་སང་དང་། མཁར་ནང་གོང་འགབ་ལ་སོགས་པའི་ཡུལ་སྡེ་དཔོན་ཁག་ཐམས་ཅད་ཀྱིས་ཁང་པའི་རྩིག་རྡོ་ཅི་དགོས་ཀྱི་མཐུན་རྐྱེན་བྱས། རྟ་ཤུལ་གོང་འགབ་བར་གསུམ་གྱིས་ས་བརྐོ་དང་ས་བཙག་ཐུ་བ་སོགས་བྱས། སྒང་རི་ལྷ་སྡེ་རྣམས་ཀྱིས་འོ་ཞོ་འབུད་ཤིང་སོགས་ཀྱི་མཐུན་རྐྱེན་དང་། ཝ་ཤུལ་དཔོན་ཁག་གཉིས་ནས་འགེབ་ཤིང་ཅི་དགོས་ཐམས་ཅད་སྡེ་འབངས་ཀུན་གྱིས་མཐུན་རྐྱེན་གྱི་སྟབས་ལེགས་བསྒྲིགས་པ་སོགས་བྱས་ཏེ། གཙུག་ལག་ཁང་གི་རྨང་བཏིང་ནས་ཕྱིར་ཁྱོན་འཛོམ་པར་བྱས། དེ་སྐབས་སུ་བསོ་སྤྲུལ་རིན་པོ་ཆེ་འབྲོང་སྐོར་དུ་བྱོན་ཞོར་ལ་དེ་ཀར་ཕེབ་ཅིང་ཞག་ཆ་ཤས་སུ་བཞུགས་ནས་ཐུགས་མཐུན་གྱི་གསུངས་མཛད་མང་དུ་གནང་། རྗེས་ཐུགས་བརྩེ་བརྩེ་མཛད་ནས་དབུ་དཀྲིས་དང་སྐུ་ཆིངས་ལ་སོགས་པ་གནང་ནས་བསོ་སྤྲུལ་འབྲོང་སྐོར་ལ་བྱོན། དེ་ནས་རྗེའི་ཞལ་ནས་བདེ་བའི་རྡོ་རྗེ་ལ་ད་ལན་ང་རང་གིས་བསོ་སྤྲུལ་ལ་གཅེས་གཅེས་བྱས་ནས་མགོ་དཀྲིས་དང་སྐེ་རགས་ལ་སོགས་པ་སྦྱིན་པས་ཁྱེད་ཨེ་དགའ་གསུངས། བདེ་བའི་རྡོ་རྗེས་ལོས་དགའ། ད་སྤྲུལ་སྐུ་འདི་མྱུར་དུ་འདི་ཀར་འབྱོན་རྒྱུ་འོང་ན་བཟང་ངོ་ཞུས། རྗེའི་ཞལ་ནས་ཅིའི་ཕྱིར་ཡིན་ གསུངས། བདེ་བའི་རྡོ་རྗེས་ང་རང་ལ་ལུང་བསྟན་འདྲ་འདྲ་ཞིག་འདུག་པས། དེའི་ནང་ན་ཡིད་ཚོམ་པ་རེ་ཡོད་པར་འདྲ་ཞུས་ནས་ལུང་བསྟན་རྗེ་ལ་ཕུལ། དེའི་བར་སྐབས་སུ་གཞན་རྐྱེན་ཚིག་ངན་སྣ་རེ་ཐོས་བྱུང་བས། བླ་སློབ་ཡབ་ཡུམ་ཐམས་ཅད་ཡིད་མ་དགའ་ནས་ཅི་འགྱུར་སྲིད་སྙམ་ཡོད་སྐབས། བླ་མ་རིན་པོ་ཆེས་ལུང་བསྟན་འོང་ནས་གནས་ངེས་མེད་ལ་མྱུར་དུ་བྱོན་གར་ལྡན་ན་བར་ཆད་ཀྱི་གཡུལ་ལས་རྒྱལ་འདུག་གསུངས་པས། བདེ་བའི་རྡོ་རྗེ་དང་། ཤཱི་ལ་བཛྲ་ལ་སོགས་པའི་བུ་སློབ་ནང་གྲྭ་ཀུན་གྱིས་ཕྱོགས་གཞན་ཞིག་ཏུ་བྱོན་དགོས་ཡང་ཡང་ཞུས་ཀྱང་། རྗེས་སྤྲུལ་སྐུ་རྡོར་ལོ་སྐུ་མཚམས་ཡིན་པས། གཞན་རྣམས་ཀྱིས་དེ་ལྟར་བྱེད་པ་གོ་མེད་ངེས་པ་ཡིན་པས། ཁོ་རང་ལངས་འཕྲིན་ཡིག་ཞིག་བསྐུར་ན་གོ་འོང་གསུངས་ནས། དེ་ལྟར་འཕྲིན་བསྐུར་ཚེ་སྐུ་མཆེད་ཐུགས་ནང་མཐུན་པའི་གྲོས་མདུད་སྔར་ཚིག་ལྟར་ཡོད་པའི་གསུང་མཛད་བྱུང་ནས་འབྱོན་སྟབས་མ་ལྡན་ནས། ཡབ་རྗེ་བླ་མའི་ཟབ་གཏེར་ཟབ་གསང་མཁའ་