Tibetan
དང་ཀུན་གྱིས་ཁྱེད་ཀྱི་རྗེས་སུ་ཞིང་དུ་ཕེབ་འགྲོ་ངེས་པ་ཡིན་པས། ང་རང་གི་སྡུག་བསྔལ་སྟེང་ན་མི་འདུག་ཞུས། ཡང་རྗེའི་ཞལ་ནས་ང་རང་གནས་དུས་ཀྱི་དབང་གིས་ཉམས་གྲིབ་ཀྱི་རྐྱེན་གྱིས་མི་འཆི་ཐབས་མེད་བྱུང་བ་ཡིན་པས་ཅི་བྱེད། བསོ་སྤྲུལ་གྱིས་ང་འཆི་བའི་སྡུག་གིས་བསྲེ་འཕོ་བྱེད་པ་ཡིན་པས་དེ་མི་ཉན་སྨྲོས། ཁྱད་པར་ཁྱེད་དང་ངགཉིས་ཅི་ཁྱད། ཡབ་ཡུམ་ཆོས་དམ་ཁྲིམས་གཙང་ཡིན་པ་ཁོ་རང་གིས་ཤེས། མིན་ཀྱང་བླ་མའི་དམ་ཚིག་གི་དོན་ཤེས་པ་ཞིག་ཡིན་པས། ཁྱེད་ཀྱིས་ཆོས་དམ་གཉན་པོས་བཤོལ་མ་བྱས་ན་ཚིག་འགྲོ་ངེས་པ་ཡིན་ལ་སོགས་པའི་བྱུང་དང་འབྱུང་འགྱུར་གྱི་གསུང་མཛད་གལ་ཆེན་སོགས་གནང་། བདེ་བའི་རྡོ་རྗེས་རྗེའི་ཞབས་སྤྱི་བོར་བླང་ནས་སྨོན་ལམ་བཏབ་པ་སོགས་བྱས། ཚེས་བདུན་གྱི་ཉིན་བདེ་བའི་རྡོ་རྗེའི་སྲས་གློ་བུར་གྱི་ནད་ཞིག་གིས་ཚེ་དུས་ལས་ཡོལ་སོང་བས། དེ་སྐབས་བུ་སློབ་ནད་ལས་གྲོལ་བ་རྣམས་གཅིག་འོང་གཉིས་འོང་བྱས་ནས་3 རིམ་གྱིས་འདུས་སྐབས། རྗེས་ཉེ་གནས་འོད་འབར་སྒྲུབ་གྲལ་འདུག་ཡོད་པ་དེ་གློ་བུར་དུ་བུད་ནས་འོང་བས་བསྙུན་དྲིས་ཚེ། རྗེའི་ཞལ་ནས་ངེད་ཅག་གི་བུ་གཅིག་པུ་འདི་ལག་ནས་ཤོར་སོང་། ད་ང་རང་ཡང་རབ་ཞིག་ལ་ཐུག་ཡོད་པ་སོགས་གསུངས་ནས་ལེགས་ཉེས་ཀྱི་གསུང་བགྲོས་མཛད། དེ་སྐབས་སྔར་རཏྣ་གླིང་པ་དང་། བདུད་འདུལ་རྡོ་རྗེ་རྣམས་ཀྱིས་ཟབ་ཆོས་དབང་ལུང་གསུང་དགོས་ཞུས་ནས། ཕྱོགས་ཀྱི་བུ་སློབ་མང་པོ་འདུས་ཡོད་དགོས་པས། དེ་རྣམས་ཀྱིས་རྗེ་སྐུ་ཁམས་བསྙུང་བ་མ་གོ་ནས་ཐམས་ཅད་འདུས་བྱུང་བས། དེ་དག་ནང་ནས་རྗེའི་དངོས་སློབ་མ་བླ་མ་པད་གསལ་ཞེས་པ་ཞིག་ཡོད་པ་དེ་ཀས་ངག་ཞུ་བསྐུར་ནས་རྗེའི་ཞབས་བརྟན་དུ་ཚེ་ཐར་བྱེད་པ། ཚོགས་མཆོད་འབུམ་ཐེར། ས་ཏྭ་དང་ཡིག་བརྒྱ་དུང་ཡོན་ལ་སོགས་པ་འགྲུབ་ངེས་པ་ཡིན་པས། སྐུ་ཚེ་ཞབས་པད་བརྟན་དགོས་ཞུས་ཚེ་ཅི་ཡང་མི་གསུངས། ཚེས་བརྒྱད་ཉིན་རྗེའི་ཞལ་ནས་འུ་ཅག་ཡབ་ཡུམ་གཉིས་དྭངས་སང་ལ་འགྲོ་གསུངས་ནས་སྒོའི་ཕྱི་རོལ་ལ་བཞུགས། དེ་སྐབས་བདེ་བའི་རྡོ་རྗེས་བླ་མ་པད་གསལ་གྱིས་ཁྱེད་ལ་ཡར་ཞུ་གསོལ་བ་དེ་ཐུགས་ཀྱིས་མ་དོར་ཞུས་ཚེ། རྗེའི་ཞལ་ནས་རིམ་གྲོ་བྱས་པས་ང་རང་གི་ཚེ་བསླུ་ཐབས་ཡོད་ན། སྔར་བླ་མ་མཁའ་འགྲོ་ཐམས་ཅད་ ༈ ཀྱིས་ཁྱེད་ལུང་དུ་ཅིའི་ཕྱིར་བསྟན། མཐར་འུ་ཅག་ལྷན་དུ་བསྡད་མ་ཆོག་ཟེར་བའི་རྐྱེན་གྱིས་འདི་ལྟར་ཅི་ལ་བྱུང་གསུངས་ཏེ། སྤྱན་བར་སྣང་ལ་གཟིགས་ནས་འདི་སྐད་གསུངས། འོད་གསལ་ཉི་མའི་དཀྱིལ་འཁོར་འདི། །ཤར་ནས་འབྱུང་ཡང་ནུབ་རིར་ཕྱོགས། །དེ་ཡང་མི་རྟག་སྟོན་པ་འདྲ། །དབྱར་གསུམ་སྤང་ལ་རྩི་ཐོག་རྒྱས། །སྟོན་གསུམ་སད་སེར་བ་མོས་འཇོམས། །དེ་ཡང་མི་རྟག་སྟོན་པ་འདྲ། །འཁོར་སློབ་ཚོང་དུས་མགྲོན་པོ་འདྲ། །སྔ་སོར་འདུས་ཀྱང་ཕྱི་ནས་མེད། །དེ་ཡང་མི་རྟག་སྟོན་པ་འདྲ། །སྒྱུ་ལུས་ནམ་མཁའི་འཇའ་ཚོན་འདྲ། །སྣང་མུན་བྲལ་ཚེ་མཁའ་ལ་ཡལ། །དེ་ཡང་མི་རྟག་སྟོན་པ་འདྲ། །པདྨ་ལས་འབྲེལ་ཆོས་ཀྱི་སྐུ། །དཔལ་རིའི་ཞིང་ལ་མངོན་སངས་རྒྱས། །དེ་ཡང་མི་རྟག་སྟོན་པ་འདྲ། །ཀུན་བཟང་ཆོས་ཉིད་དབང་མོ་ཁྱེད། །བདག་གི་ལུས་ལ་སེམས་མ་འཕྲང་། །སྣང་རྟོག་བླ་མའི་སྐུ་རུ་བསྒོམ། །སྒྲ་གྲགས་བདེ་ཆེན་སྔགས་སུ་བཟློས། །དྲན་རྟོག་ཆོས་ཉིད་གཅིག་གི་ངང་། །བདག་གི་ཐུགས་དང་གཉིས་མེད་མཛོད། །དུས་རྣམ་འབྲལ་མེད་བྱིན་གྱིས་རློབས། །ཕྱི་མ་དཔལ་རིའི་ཕོ་བྲང་དུ། །འདྲེན་སྟོན་བསུ་བང་ཡིས་བྱེད། །དེ་བར་ཐུགས་ བསྐྱེད་དམ་བཅའ་བཞིན། །བསྟན་འགྲོའི་དོན་རྣམས་མཐའ་རྒྱས་མཛད། །གསུངས་ནས་ཕྱག་གཉིས་བདེ་བའི་རྡོ་རྗེའི་མགོ་ལ་བཞག་ནས་སྨོན་ལམ་མཛད་ཀྱང་། བདེ་བའི་རྡོ་རྗེ་ནི་སྡུག་བསྔལ་ཤིན་ཏུ་ཆེ་ཡང་སྡུག་སྲན་བྱས་ནས་རྗེའི་ཕྱག་ལ་འཇུས་ཤིང་འདི་སྐད་ཞུས། ཕ་ཀུན་མཁྱེན་པདྨ་ལས་འབྲེལ་རྩལ། །ཐུགས་བརྩེ་བ་ཆེན་པོས་བདག་ལ་དགོངས། །སྔོན་མཚོ་རྒྱལ་དང་ཤེལ་དཀར་སྨོན་ལམ་མཐུས། །དུས་ད་རེས་ལས་འཕྲོ་དག་པ་ཡིས། །མགོན་ཁྱེད་ཀྱི་ཉེ་རྒྱུའི་སྐལ་ལྡན་ནས། །རྩ་བདུན་ནས་ཐུགས་ཀྱི་གཟུངས་མར་བཟུངས། །སུམ་ཅུ་ནས་ཟུང་འཇུག་བསྟན་འགྲོར་སྨན། །མཛད་པ་དངཕྲིན་ལས་མཐའ་རྒྱས་འབྱུང་། །དུས་ད་རིའི་སྨོན་ལོག་བདུད་དབང་གིས། །སྐུ་ཉི་མའི་དཀྱིལ་འཁོར་དབྱིངས་ལ་ནུབ། །མིག་ལོང་གི་བདག་ཅག་ཇི་ལྟར་བྱེད། །ཕ་ཡིད་བཞིན་ནོར་བུ་མཁའ་འགྲོས་འདྲེན། །མ་འགྲོ་བའི་བདེ་སྐྱིད་སུ་ཡིས་སྤེལ། །མགོན་དུས་གསུམ་སངས་རྒྱས་ཞིང་དུ་བྱོན། །གཉིས་འཛིན་གྱི་སེམས་ཅན་སུ་ཡིས་འདྲེན། །ཕ་པདྨ་ལས་འབྲེལ་དཔལ་རིར་གཤེགས། །ལས་ལྡན་གྱི་བུ་སློབ་སུ་ཡིས་སྐྱོབ། །གྲོགས་ཡིད་བཞིན་ནོར་བུ་མི་བཞུགས་པར། །ལུས་དམན་གྱི་བདེ་སྐྱོང་དབང་མོ་ང་། སྐྱབས་གནས་དང་རེ་ལྟོས་བསུ་ལ་བཅའ། །མགོན་པད་འབྱུང་དངོས་སྣང་དབྱིངས་ལ་གཤེགས། །གཏེར་གཉིས་ཀྱི་འཛིན་སྐྱོང་སུ་ཡིས་བྱེད། །རྗེ་ཁྱེད་ཉིད་དངོས་སུ་མི་བཞུགས་པར། །ད་འདྲ་སྐུར་གསོལ་བ་བཏབ་དགོས་འབྱུང་། །གསུང་ཟབ་མོའི་གདམས་ངག་མི་གསུངས་པ། །མན་ངག་རྣམས་དཔེ་རུ་བྲི་དགོས་བྱུང་། །ཐུགས་བརྩེ་བས་གཅེས་པར་མ་བསྐྱང་ནས། །མུན་སྒོམ་གྱི་ཐུགས་ཡིད་བསྲེ་དགོས་བྱུང་། །འཁོར་སློབ་ཀྱི་སྐལ་ལྡན་མི་སྐྱོང་བར། །ཡུལ་བདེ་བཞིན་རང་སར་འགྲོ་དགོས་བྱུང་། །ད་ཅི་ལ་བསམ་ཀྱང་མགོན་ཁྱེད་དང་། །འབྲལ་མེད་ཀྱི་བཀའ་དྲིན་མི་ཆུང་ཞུ། །ཞེས་ཞུས་ནས་གསོལ་བ་ཡང་ཡང་བཏབ། རྗེས་ཀྱང་ཞལ་ཏ་མང་དུ་མཛད་ནས། ཡབ་ཡུམ་གཉིས་ཀའི་ཀ་དག་དང་ལྷུན་གྲུབ་ཀྱི་ཉམས་ལེན་རྣམས་ཞུ་དག་བྱས་པའི་ཚུལ་གྱིས་གསུང་བགྲོས་མང་དུ་གནང་། སྨན་དཔྱད་རིམ་གྲོ་གཏར་དཔྱད་ལ་སོགས་པས་བུ་སློབ་ཐམས་ཅད་ཡིད་ལྷག་མེད་པར་མཛད། དེ་ནས་རྗེའི་ཞལ་ནས་སང་ཉིན་ཚེས་བཅུ་ཡིན་ཨ་གསུངས། བདེ་བའི་རྡོ་རྗེས་ཅི་ཡང་ཞུ་མ་ཕོད། ཉེ་གནས་འཇིགས་མེད་བཟང་པོ་ཞེས་པས་རེད་ལགས་ཟེར། དེའི་ཐོ་རངས་ཀར་རྗེའི་ཞལ་ནས། བདེ་བའི་རྡོ་རྗེ་ལ་བོ་། ཁྱོད་ཉིན་ཞག་མང་པོར་གཉིད་ཆག་སོང་བས། ཁྱེད་ཅུང་ཟད་གཉིད་གསུངས། བདེ་བའི་རྡོ་རྗེས་ང་རང་ལ་གཉིད་མི་འོང་གི་ལགས་ཞུས་ཚེ། རྗེའི་ཞལ་ནས་དེ་ན་གཏུམ་མོའི་འོད་གསལ་ལ་ཅུང་ཟད་སྡོད་གསུངས། དེ་བཞིན་དུ་བསྡད་པས་རྗེ་ལ་མཁའ་འགྲོས་བསུ་མ་འབྱོན་པ་མཐོང་བ་ལ་རྐྱེན་ནས་ཧར་གྱིས་ཉམས་སད་པས། རྗེས་ཁྱོད་ཀྱི་ཉམས་ཅི་འདྲ་འབྱུང་གསུངས་ཀྱང་། བདེ་བའི་རྡོ་རྗེ་སེམས་སྡུག་བསྔལ་གྱིས་ནོན་ནས་མཆི་མས་བརྣང་སྟེ་ཅི་ཡང་ཞུ་མ་ཐུབ་ནས་རྗེའི་ཕྱག་ལ་འཇུས་ཤིང་བསྡད། རྗེའི་ཞལ་ནས་ད་ཁྱེད་ཀྱི་ངའི་རྩ་འཁོར་རྣམས་ལ་རེག་དང་གསུངས། བདེ་བའི་རྡོ་རྗེས་ད་ནི་རིག་པའི་རྩ་འཁོར་ཐམས་ཅད་འགྲེང་ངེར་སོང་ནས་སྐུ་ལུས་ནང་དུ་ཀ་བ་ལྟར་གནས་འདུག་པས། བདེ་བའི་རྡོ་རྗེས་རྩ་འཁོར་ཐམས་ཅད་ཞིག་འགྲོ་བ་ཅིའི་ཕྱིར་ལགས་ཞུས། རྗེའི་ཞལ་ནས་རླུང་སེམས་ནམ་མཁར་ཐིམ་པའི་རྟགས་རེད་གསུངས། དེ་ནས་ནམ་གསལ་འོང་བ་དང་། རྗེའི་ཞལ་དང་སྐུ་ལུས་ལ་མཇལ་དུས་མདོག་འགྱུར་ནས་དཀར་སང་སང་བྱེད་འདུག་པས། རྗེའི་ཞལ་ནས་མཚར་རོ་སྒོ་ལྔའི་རླུང་ཐམས་ཅད་དྲན་འདུས་ཀྱི་འཁོར་ལོར་ཐིམ་འདུག་གསུངས། བདེ་བའི་རྡོ་རྗེས་ཉམས་གོང་འཕེལ་གྱི་སྐབས་སྐུ་ལུས་རྟགས་ཡོད་ཟེར་བ་ལྟར་ཡོད་འདུག །དེ་ ༈ ནས་ཟླ་བ་བཞི་པའི་ཚེས་བཅུའི་ཉིན་ཉི་མ་རྩེ་ཤར་འོང་སྐབས་སྒོ་བཞེངས་མཛད་དེ། ཤར་ཕྱོགས་སུ་ཞལ་དཀྱུས་ནས་དེ་ཀར་ཐུགས་དམ་ལ་ཡུན་གཅིག་བཞུགས་ནས་ཡར་གཟིམས་མལ་དུ་ཕེབ་སྟེ། བདེ་བའི་རྡོ་རྗེ་ལ་ཁོང་གི་སྐུ་ཆིངས་ཁྲོལ་གསུངས། བདེ་བའི་རྡོ་རྗེས་དེ་ལྟར་བྱས་ཚེ་ཞལ་བྱང་ཕྱོགས་ལ་དཀྱུས་ནས་བཞུགས་འདུག བདེ་བའི་རྡོ་རྗེས་རྗེས་མི་གཟིགས་པར་བྱས་ནས་ངུ་ཞིང་བསྡད། ཡང་བདེ་བའི་རྡོ་རྗེས་ད་རྗེའི་ཞལ་མཇལ་ཐབས་མི་ཐོན་པ་འདྲ་སྙམ་ནས། རྗེའི་གཡས་ཕྱོགས་དེར་སོང་ནས་བསྡད་ཚེ།ཉེ་གནས་འོད་འབར་གྱིས་ཁྱེདས་རྗེན་ལ་མ་འདུག་རྐང་པ་ན་འོང་ཟེར་བ་ལ། བདེ་བའི་རྡོ་རྗེས་ང་རང་ལ་མི་སྐྱོན་སྨྲས་ཚེ། དེའི་སྒྲ་ཡིས་བསྐུལ་བ་ལྟ་བུར་བྱས་ནས། རྗེའི་ཞལ་བདེ་བའི་རྡོ་རྗེའི་སར་དཀྱུས་ནས། ༥་གཅེས་ཕྲུག་ཁྱེད་འདི་ན་བྱོན་ཨེ་ཡོད་གསུངས། བདེ་བའི་རྡོ་རྗེས་ཡོད་ལགས་ཞུས་ནས་གསོལ་ཇ་ཨེ་བཞེས་ཞུས་ནས། རྗེའི་ཞལ་ནས་རེད་རེད་རེད་གསུངས། ཉེ་གནས་འོད་འབར་གྱིས་གསོལ་ཇ་དྲང་རྒྱུ་བྱས་ཚེ། དེ་མ་ཐག་ཏུ་རྗེའི་ཕྱག་གཉིས་བདེ་བའི་རྡོ་རྗེའི་མགོ་ལ་བཞག་ནས། ཨ་ཧཾཿ བདག་ནི་ཐབས་མཆོག་བདེ་ཆེན་ཧེ་རུ་ཀ །ཁྱོད་ཀྱི་སྟོང་དབྱིངས་ཤེས་རབ་ཡུམ་ ཆེན་མོ། །ཟུང་འཇུག་གཉིས་མེད་སྤྱོད་པའི་ཏིང་འཛིན་གྱིས། །སྣང་གྲགས་རིག་གསུམ་དག་པ་རབ་འབྱམས་ཞིང་། །སྐུ་དང་ཡེ་ཤེས་འདུ་འབྲལ་མེད་པའི་ཀློང་། །ཟུང་འཇུག་མི་ཤིག་རྟ་ཕག་ཡབ་ཡུམ་སྐུར། །རབ་སད་གཞོན་ནུ་བུམ་སྐུར་སངས་རྒྱས་ཤོག །ཅེས་གསུངས་མ་ཐག་ཏུ་གཟུགས་སྐུ་མཚན་དཔེའི་དཀྱིལ་འཁོར་ཆོས་སྐུའི་དབྱིངས་སུ་བསྡུས་ནས། ནང་གསལ་གཞོན་ནུ་བུམ་སྐུར་གདོད་མའི་ནང་དབྱིངས་ཆེན་པོར་མངོན་པར་རྫོགས་སངས་རྒྱས་སར་གཤེགས་པའོ། །དེ་ནས་བདེ་བའི་རྡོ་རྗེ་ལ་སྔར་ཡབ་ཡུམ་གསུང་བགྲོས་ཞིབ་མོར་ཡོད་པའི་དུས་ལ་བབ་ནས། ནང་དབྱིངས་ལྷུན་གྲུབ་སྒོ་བརྒྱད་ཀྱི་ཐུགས་དམ་གསལ་འདེབས་ཞུས་པས། དེ་མ་ཐག་ཏུ་སྒྲ་ཐག་ཆེམ་དང་། འུར་བ་ལ་སོགས་པ་ཉིན་ཞག་གསུམ་ཚུན་ཆད་ཀྱི་ས་ལ་ཚོར་བ་དང་། གཞན་ཡང་ས་གཡོ་བ་དང་། དྲི་བཟང་འཐུལ་བ། ནམ་མཁའ་བར་སྣང་ཐམས་ཅད་འཇའ་ཚོན་གྱིས་སྦུར་རླངས་འཁྲིགས་ཤིང་། རྔ་དུང་རོལ་མོ་ལ་སོགས་པའི་སྒྲ་ཀུན་གྱིས་མཐོང་ཆོས་སུ་གྱུར་ནས་ངོ་མཚར་བའི་ཆོ་འཕྲུལ་མཐའ་ཡས་པ་འབྱུང་སྟེ། མཐོང་ཐོས་དྲན་བསམ་གྱི་འགྲོ་བ་ཚུན་ཆད་ཐར་པའི་གྲོལ་ལམ་ལ་འགོད་པར་མཛད་དོ། །དེ་ནས་རྗེས་འཇུག་གདུལ་བྱར་གྱུར་པའི་ སྐྱེས་བུ་རྣམས་ཀྱི་དྭངས་བ་འདྲེན་པ་དང་། དད་མོས་ཀྱི་རྟེན། ཚོགས་བསགས་པའི་ཡུལ། གསོལ་བ་འདེབས་པའི་གནས་སུ་སྐུ་གདུང་རིན་པོ་ཆེས་ཕྲིན་ལས་མཛད་ཚུལ་ནི། སྐུ་གདུང་རིན་པོ་ཆེ་སྤྲུལ་སྐུའི་བཞུགས་སྟངས་ལས་མ་གཡོས་བཞིན་དུ་ཕྱག་གཉིས་བསྣོལ་ཐབས་མཛད་ཅིང་སྐུ་ཟིལ་པ་ཕྲོམ་མེར་དྲི་བཟང་གི་ངད་འཐུལ་ཞིང་བལྟ་བས་ཆོག་མི་ཤེས་པ་ལྟ་བུར་བཞུགས་ཡོད་པ་ལ། དེར་དུས་ཀྱི་བུ་སློབ་ཐམས་ཅད་མྱ་ངན་གྱིས་ཤིན་ཏུ་གདུངས་ནས་དབུགས་ཁར་མི་ཆུད་འགྲོ་བའི་ས་མི་ནོན་པར་ཁོང་སྙིང་མེད་པ་ལྟ་བུར་སོང་བས། བུ་སློབ་ཆེ་བ་རྣམས་ཀྱི་ནང་ནས་རྟ་ཤུལ་བླ་མ་བྱ་བྲལ་བ་ནམ་མཁའ་རྡོ་རྗེ་ཞེས་པས།ད་འུ་ཅག་རྣམས་ཀྱིས་དེ་ལྟར་མ་བྱེད་ཟེར་ནས་ཁ་ཏ་བྱས། བདེ་བའི་རྡོ་རྗེས་ཀྱང་བུ་སློབ་རྣམས་ལ་མགོ་འདྲེན་བྱས་ནས་མཆོད་འབུལ་སོགས་ཀྱི་སྟ་གོན་བྱས་ཏེ། དེ་ཚེ་རྗེའི་ཀློག་སློབ་པའི་སློབ་དཔོན་ལུགས་གཉིས་གང་ཐད་ནས་དམ་སེལ་སྤུ་རྩེ་ཙམ་ཡང་མེད་ཅིང་ཆོས་ཀྱི་བདག་པོར་མངའགསོལ་མཛདཔ། བླ་མ་མཁས་བཙུན་བཟང་གསུམ་དང་ལྡན་པ་ཚེ་མཆོག་ཅེས་པས་ཐུགས་དམ་གྱི་གསལ་འདེབས་མཛད་པ་དང་། གཞན་བུ་སློབ་དམ་ལྡན་འགས་སྐུ་གདུང་རིན་པོ་ཆེ་ཞབས་ཞུ་བྱས་ནས་གདན་སར་ད། སྤྱན་དྲངས། དེ་ནས་གཞན་བུ་སློབ་རྣམས་དང་། ཉེ་གནས་འོད་འབར་ལ་ཁུར་ཐང་གཏད་ནས་ཕྱག་རྫས་ཅི་ཡོད་ཐམས་ཅད་མཆོད་པར་འགྲོ་ངེས་བྱས། ཁྱད་པར་དེར་འདུས་ཀྱི་བུ་སློབ་རྣམས་དང་། རྟ་ཤུལ། མཁར་ནང་གོང་འགབ། སྟག་ཐོག །སེར་དགོན་ལ་སོགས་པ་ནས་མཆོད་འབུལ་བསམ་གྱིས་མི་ཁྱབ་པ་འོང་ནས། ལྷ་རྣམས་མཉེས་པ་དང་། མི་རྣམས་དགྱེས་པ་དང་། སྦྱིན་ཡུལ་དུ་གྱུར་པ་རྣམས་ཚིམ་པར་བྱས་ནས་མཆོད་པ་རྒྱ་ཆེན་པོ་མཆོད། དེ་ནས་སྐུ་གདུང་རྡོ་རྗེའི་སྐྱིལ་ཀྲུང་དུ་དར་གྱི་སྒྲོམ་དུ་བཞུགས་པ་ལ་ཞག་བདུན་ཕྲག་བར་ལ་ཉིན་རེ་བཞིན་དུ་ཇེ་ཆུང་དུ་སོང་། དེར་འདུས་ཐམས་ཅད་ཀྱིས་སྐུ་ལུས་མི་བཞུགས་པ་འདྲ་སྨྲས། དེ་ནས་བསོ་སྤྲུལ་རིན་པོ་ཆེ་དང་། རྗེའི་སྐུ་མཆེད་པདྨ་རྡོ་རྗེ་རྣམས་བྱོན་ནས་ཞལ་བགྲོས་གནང་། བདེ་བའི་རྡོ་རྗེས་བུ་སློབ་རྣམས་ལ་བདག་གིས་བླ་མའི་སྐུ་འཚམས་མི་ཕེར་ཀྱང་། ཐུགས་དགོངས་རྫོགས་ཕྱིར་གཙུག་ལག་ཁང་འགྲུབ་དགོས་པས། ཁྱེད་རྣམས་ཀྱིས་ཀྱང་རང་ཡུལ་ལ་མི་བྱོན་པར་དེ་ལྟར་གྱི་བྱ་བ་བསྐྱང་རོག་དགོས་ཞུས་ཚེ། བསོ་སྤྲུལ་རིན་པོ་ཆེའི་དབུས་ཐམས་ཅད་ཀྱིས་རྗེས་སུ་ཡི་རང་བྱས་ཡོད་སྐབས། བདེ་བའི་རྡོ་རྗེ་ཡུལ་ཕུད་བྱེད་དགོས་ཟེར་བ་འབྱུང་བས། ཐམས་ཅད་ ༈ ཀྱིས་བྱཐབས་མ་རྙེད་ནས། བདེ་བའི་རྡོ་རྗེ་བསོ་སྤྲུལ་གྱི་གདནས་སེར་དགོན་དུ་འབུད་ཐག་བཅད་དེ། མཁར་ནང་དཔོན་པོ་འགྲོ་མགོན་སོགས་ཀྱིས་མཐུན་རྐྱེན་བྱས་ནས་སྐྱེལ་མ་བསྒྲིགས། དེ་སྐབས་བདེ་བའི་རྡོ་རྗེ་སྔར་རྗེས་གསུངས་པ་འདི་ངེས་པ་རེད། ང་རང་གཅིག་པུར་ཡིན་ཀྱང་འདུག་ཏུ་མ་སྟེར་བས། ད་ཅི་ནས་ཀྱང་བདག་ལྟ་བུའི་ལས་ངན་མེད་འདུག་སྙམ་ནས་རྒྱབ་རིའི་ལབ་རྩེའི་ཟུར་ལ་སོང་སྟེ། ལུས་སར་བརྡབ་ནས་སྐད་ཆེན་པོས་ངུས་ཤིང་། རྗེ་ལ་འོ་དོད་འབོད་ནས་ཤིན་ཏུ་དྲག་པོའི་རླུང་གི་སྟོབས་ཀྱིས་བརྒྱལ་སོང་བ་ལྟ་བུར་འགྲོ་སྐབས་བཞིན་ལ་རླུང་ཕོག་པ་དང་། མིག་ཕར་ཅུང་ཟད་ཕྱེས་པ་གཉིས་དུས་འཛོམས་ཚེ། མིག་ལམ་ལ་ནག་ཡོ་རེ་བ་ཞིག་འབྱུང་བས། མིག་ཅུང་ཟད་ཕྱིས་ནས་བལྟས་པས། རྗེ་དེ་ཉིད་དངོས་སུ་བྱོན་ནས་བདེ་བའི་རྡོ་རྗེའི་བཞིན་ལ་ཕུ་མཛད་ཀྱིན་འདུག་པས། བདེ་བའི་རྡོ་རྗེ་ཤིན་ཏུ་དགའ་དྲག་ནས་རྗེའི་མགུལ་ལ་འཐམ་སྟེ། ང་རང་ཁྱེད་ཀྱི་སྐྱར་བཞག་པའི་རྐྱེན་གྱིས་སྡུག་བསྔལ་ཆེན་པོ་བྱུང་ཞུས་ནས། སྐྱིད་སྡུག་ཐམས་ཅད་གསལ་པོར་ཞུས་ཏེ། ད་ནིང་ཁྱོད་དང་དབྱེར་མི་ཕྱེད་ཞུས་པས། རྗེའི་ཞལ་ནས་ང་ཡུལ་ནས་ཡུལ་དུ་སྒྲོ་དེད་ཅུང་ཟད་ཙམ་ཡང་འགྲོ་བར་བྱེད་མ་ མྱོང་བས། ཁྱེད་འདི་སྣང་སྒྱུ་མ་རྨི་ལམ་ལྟ་བུ་འདི་ལ་དེ་ཙམ་སྡུག་བསྔལ་ཅིའི་ཕྱིར་བྱེད། ཁྱེད་རང་གིས་འུ་ཅག་ཡབ་ཡུམ་འབྲལ་སྣང་ཤར་བ་རེད་མ་གཏོགས། འུ་ཅག་འབྲལ་བ་སྤུ་རྩེ་ཙམ་ཡང་ཅིའི་ཕྱིར་དུ་བྱེད། ད་ཆོས་ཐམས་ཅད་སྒྱུ་མ་རྨི་ལམ་ཉིད་དུ་ཐག་བཅད་ནས། གཉིས་མེད་ཡེ་ཤེས་ཆེན་པོར་འགགས་སྡོམ་པར་མཛོད་ཅིག་དང་། སྐུ་གསུམ་མཉམ་པ་ཉིད་ཀྱི་དབྱིངས་ཇི་ལྟ་བ་བཞིན་དུ་མངོན་དུ་གྱུར་པ་ལ་དཀའ་ཚེགས་མེད་དོ་གསུངས་ནས། ད་ཁྱེད་རྗེས་ནས་ཤོག་དང་། ང་སྔོན་ལ་འགྲོ་དགོས་གསུངས་ཏེ། ཐུགས་བརྩེ་བརྩེ་བྱས་ནས་བྱོན་སོང་། བདེ་བའི་རྡོ་རྗེའི་བསམ་པ་ལང་རང་གིས་རྗེ་ཞིང་དུ་ཕེབ་སོང་སྙམ་པ་འདི་རྨི་ལམ་འདྲ། རྗེ་དངོས་སུ་བཞུགས་འདུགསྙམ་ནས་སེམས་དགའ་བ་དང་བཅས་རྗེས་ནས་འོང་སྟེ། གཟིམ་སྦྲའི་ནང་དུ་སོང་ནས། སློབ་བུ་དཔལ་ལྡན་བློ་གྲོས་དང་། དྲི་མེད་རྣམ་དག །བཙུན་མ་ཡེ་ཤེས་སྒྲོན། བསམ་བདེ་ལ་སོགས་པས་མར་མེ་བཤམས་པ་དང་། ཕྱག་འཚལ་མཆོད་པ་ཕུལ་ནས་འདུག་པས། ཡང་བདེ་བའི་རྡོ་རྗེས་ཡིད་མ་ཆེས་ནས་ཡར་སོང་བས། རྗེའི་སྐུ་གདུང་ལོངས་སྤྱོད་རྫོགས་པའི་ཆས་གསོལ་ནས་དཀྱིལ་འཁོར་གྱི་དབུས་སུ་བཞུགས་པ་དངོས་སུ་ཡོད་པ་མཐོང་ནས། སྔོན་གྱིས་ ༈ དགའ་སེམས་དེ་ཀ་སྡུག་བསྔལ་ལ་འགྱུར་ནས་རང་གནས་ཀྱི་ཕུག་དེ་ཀར་བསྡད་དེ། སྡུག་བསྔལ་སྒྱུ་མར་སྦྱངས་ནས་རྟ་རྒོད་ལ་སྲབ་འཇོག་པ་བཞིན། ལན་རེ་སྡུག་བསྔལ་གྱིས་རྒོད། ལན་རེ་གཉེན་པོས་རྒོད་པ་ལྟ་བུར་བྱས་ནས་རོ་སྙོམས་ཆེན་པོའི་འདུན་པ་ལ་བློ་རྩེ་གཏད་དེ། རྗེ་ལ་གསོལ་བ་བཏབ་ཡོད་སྐབས་རླུང་སྟོབས་ཀྱིས་དྲན་པ་ཉམས་འགྲོ་བར་བྱས་ཚེ། མདུན་ཐད་དེ་ཀར་འོད་ལྔའི་ཁ་དོག་ལྡན་པའི་ཐིག་ལེའི་ནང་དུ་མཁའ་འགྲོ་བདེ་བའི་གོ་ཆ་དང་། རིག་པའི་རལ་གྲི་ཡིན་སྐད་པའི་མཁའ་འགྲོ་གཉིས་དང་། ཡིད་བཞིན་ནོར་བུ་བཅས་བཞུགས་པར་སྣང་བས། དེ་མ་ཐག་ང་རང་ཤིན་ཏུ་ཡིད་སྐྱོ་བའི་སྟོབས་ཀྱིས་དབང་པོ་ནག་ཐོམ་མེ་བར་སོང་འདུག །དེ་སྐབས་མཁའ་འགྲོ་ཀུན་གསལ་མ་ཡིན་སྐད་པས་ལན་གསུམ་བོས་ནས། ཀྱེ་མ་རིགས་ལྡན་ཌཱཀྐི་མ། །སྒྲ་འཛིན་དབང་པོ་མ་ཡེངས་གསོན། །འཁོར་འདས་ཆོས་ཀུན་སྒྱུ་མའི་འཕྲུལ། །སྣང་བའི་ཡུལ་ལ་ཞེན་པ་སྤོངས། །རིག་པ་མི་འགྱུར་བཙན་ས་ཟུངས། གང་སྣང་སྤང་བླང་དགག་སྒྲུབ་བྲལ། །ཆོས་ཀུན་ཆོས་ཉིད་གཅིག་གི་ངང་། །གང་ཤར་གང་སྣང་རིག་པའི་རྒྱན། །སྣང་བ་མ་འགགས་དཔེ་ཡི་གར། །སྟོང་ཉིད་བརྗོད་བྲལ་ཤེས་རབ་ ཡུམ་།ཟུང་འཇུག་ཕྱག་རྒྱར་འདུ་འབྲལ་མེད། །ཀུན་རྫོབ་སྒྱུ་མའི་རྟེན་འབྲེལ་དུ། །ཡུད་ཙམ་འབྲལ་བར་རང་གི་ཆོས། །བདེ་ཆེན་དབྱིངས་སུ་ཐབས་ཤེས་འདུ་འབྲལ་མེད། །དོངས་དང་འུ་ཅག་པདྨའི་དྲུང་དུ་འགྲོ། །ཞེས་ཟེར་ནས་བདག་གི་དྲན་འདུས་འཁོར་ལོ་མཐེལ་ཆོག་ཞིག་བྱས་པ་ལ་རྐྱེན་བྱས་ནས། རང་ཡང་གནས་སྐབས་དེར་ཞིང་དུ་ལྷགས་སྣང་འཆར་བའི་བལྟས་པ་དང་མཉམ་དུ། ཡིད་བཞིན་ནོར་བུ་ང་རང་གི་རྩར་བྱོན་ནས། འོ་བརྒྱལ་ལམ། ཐུགས་ངལ་མ་མཛད་དམ། སྤྱིར་འཁོར་འདས་ཀྱི་ཆོས་འདི་མཚར་རེ་ཆེ། སྒོས་འུ་ཅག་རྣམས་སྒྱུ་མའི་འཕྲུལ་སྣང་དབྱིངས་སུ་ཞིག་པ་ལྟར་འབྱུང་བ་དེ་ལྟར་མཚར་རམ། མི་རྟག་པའི་གཏམ་རྒྱུན་དུ་མ་གསུངས་ཀྱང་། ང་རང་ཡིད་ཆེས་བྱས་ནས་ཤིན་ཏུ་དྲག་ཏུ་ངུས་ཏེ། ཁྱེད་ཀྱིས་ངེད་རྣམས་ཤུལ་དུ་བོར་ནས་ཞིང་དུ་བྱོན་པ་ཅི་ལགས། ཡང་སྒོས་ང་རང་ནི་ཉིད་ཀྱིས་མཁྱེན་བཞིན་ཕྱི་ནང་ཀུན་གྱིས་བརྙས་དམོད་བྱས་ཤིང་གང་གནོད་བྱེད་པ་ཉིད་ཀྱིས་མཁྱེན། ད་མགོན་སྐྱབས་མེད་པ་བདག་གིས་ཇི་ལྟར་བྱེད་སོགས་སྐྱོ་གཏམ་མང་དུ་ཞུས་པས། གསུངས་པ་ཁྱེད་ཀྱིས་འདི་ལྟར་མ་མཛད་དང་། འུ་ཅག་གཉིས་སྐད་ཅིག་ཀྱང་འབྲལ་བ་མེད། སྤྱིར་འདུས་བྱས་ཀྱི་མཚན་ཉིད་དང་། ༈ སྒོས་འུ་ཅག་གཉིས་བསྟན་པའི་གསོས་སུ་སྨན་པས། ཕྱི་ནང་གི་རྐྱེན་དབང་ངན་པ་དང་། དུས་ཀྱིས་འགྱུར་བ་ཆེར་བཙན་པའི་འགྲོ་བ་རྣམས་བསོད་ནམས་དམན་པའི་དབང་གིས་སོང་ནས། ཀུན་རྫོབ་སྒྱུ་མ་ཙམ་དུ་འབྲལ་སྣང་འཆར་ཡང་། དོན་ལ་ནི་འུ་ཅག་གཉིས་སྔོན་སྨོན་འབྲེལ་ཟབ་ཆེ་བ་དང་། ད་རེས་ཕན་ཚུན་ཁྲིམས་གཙང་ཞིང་འབྲེལ་བ་ཆེ་བའི་སྟོབས་ཀྱིས་སྐད་ཅིག་ཀྱང་འབྲལ་ས་མེད། འོད་གསལ་གྱི་ཀློང་དུ་ང་ཉིད་དུས་ཀུན་མཇལ་འོང་གསུངས་ནས། ཆོས་དང་འཇིག་རྟེན་གྱི་བསྒོ་གླེང་མང་པོ་མཛད་དེ། བྱུང་དང་འབྱུང་འགྱུར་གྱི་ལུང་བསྟན་དུས་སུ་ཁྲོལ་འོང་གསུངས་ཤིང་། ཡང་སྟེང་གི་ནམ་མཁར་དཔག་ནས་སྤྱན་གཉིས་ཧྲིག་གེར་བར་སྣང་ལ་གཟིགས་འདུག །ང་རང་གིས་ཉིད་ཀྱི་ཕྱག་ལ་བཟུང་སྟེ་གདུང་བའི་ཤུགས་ཀྱིས་འདི་སྐད་གསོལ། རང་སྣང་སྟོན་པ་གཟུགས་ཀྱི་སྐུར་