Tibetan
པར་སྒར་ཐོག་འདིཀར་ལོ་བར་ཆ་ཤས་ཙམ་ལ་བཞུགས་ཐབས་རེ་མ་འཆུག །ངའི་ས་ནས་བླ་བྲང་གིས་འགལ་ཟླ་ མེད་ངེས་པ་ཡིན་སོགས་གསུངས་ནས། བདེ་བའི་རྡོ་རྗེས་སྐྱེ་བ་ནས་ཚེ་རབས་ཀུན་ཏུ་ཁྱེད་དང་འབྲལ་བ་མེད་པའི་སྨོན་ལམ་དཀར་ནག་འཁྱུད་འཁོར་བར་དུ་བཏབ་ནས་ཡོད་ཀྱང་། ཁྱེད་ཀྱི་སྐུ་མདུན་ལ་བཅར་ཐབས་དཀའ་མོ་རེད། གཅིག་ཐད་ནས་མགར་སྤྲུལ་དང་། གཉིས་ཐད་ནས་ཉིད་ཀྱི་ཉེ་འཁོར་རྣམས་ཚིག་ཐོག་ཏུ་ཨེ་འདུག་མི་ཤེས་པ་འདྲ་ན་དེ་ལྟར་གྱི་དགོས་མེད། འུ་ཅག་ཡབ་ཡུམ་ཐུགས་ནང་མཐུན་ཐོག་ཡིན་པ་དང་། བདག་རང་གིས་ཀྱང་ལོ་ངོ་བཅོ་ལྔའི་དུས་ནས་ཁྱོད་ལ་གསོལ་བ་བཏབ་ནས་གཙུག་གི་ནོར་དུ་འཆང་བ་ཡིན། ད་དུང་ཡང་འདི་ཕྱི་བར་གསུམ་ལ་རེས་སྐྱབས་གནས་ཁྱེད་ལས་མེད་པས་ཐུགས་ཞབས་ནས་མི་འདོར་བ་བཀའ་དྲིན་མ་ཆུང་ཟེར་ནས། རྗེའི་སྐུ་ལ་བསྟོད་པ་བྱས་པ་དང་། སྨོན་ལམ་སོགས་གཏེར་གཞུང་དུ་གསལ་ལོ། །དེ་ནས་བདེ་བའི་རྡོ་རྗེས་རྗེ་ལ་ཟབ་གཏེར་འབེབས་རྒྱུ་བཀའ་དྲིན་མ་ཆུང་ཞུས་ནས་རང་གནས་ལ་ཕེབས་སོང་། དེ་ནུབ་མནལ་ལམ་ལ་མཁའ་འགྲོ་ཀུན་ཁྱབ་དབང་མོ་ཡིན་སྐད་པས་བརྡ་བྱང་དང་ལུང་བསྟན་བྱུང་བ་ལ་བརྟེན་ནས་ཁམས་སེང་གེ་གནམ་འཕྱོང་གི་ཟབ་གཏེར་གུ་རུ་རྟ་ཕག་གི་ཆོས་སྐོར་གཏན་ཕབ་མཛད་སྐབས། སྔར་འབྲོང་རིའི་ལུང་བསྟན་བྱུང་བ་ལ་གཞི་བྱས་ནས་ཝ་ཤུལ་དཔོན་གྱི་ ༈ འདོད་དོན་དུ་འབྲོང་རི་ལ་གཏེར་བུམ་བཞག་པ་དང་། ལྷ་ཆེན་གྱི་སྒྲུབ་པ་གསུངས་ནས་མཐའ་རྒྱས་སུ་མཛད་ཅིང་གཏེར་ཁ་ཆ་ཤས་ཀྱང་སྤྱན་དྲངས། དེ་སྐབས འབྲོང་མདུན་ནགནས་འགོའི་དབོན་པོ་ཞེས་པའི་བླ་མ་མཚམས་པ་ཞིག་ཡོད་པ་དེས་རྗེ་ལ་ཁྱེད་ཀུན་མཁྱེན་གྱི་སྤྲུལ་པ་ངེས་པ་ཡིན་འདུག་པས། ང་རང་གི་རྨི་ལམ་བཟང་པོ་རྨིས་པ་སོགས་གསུངས། རྗེ་ལ་ཆོས་འབྲེལ་སྨོན་ལམ་སོགས་ཞུས་ནས་རྟེན་འབྲེལ་གྱི་དངོས་རྫས་ཕུལ། དེ་ནས་རིམ་གྱིས་བྱོན་ནས་གདན་སར་ཕེབས། བསོ་སྤྲུལ་རིན་པོ་ཆེ་རྗེའི་སྐུ་ཚབ་ལ་གདུལ་བྱར་བྱོན་ཡོད་པ་དེ་ཚུར་ཕེབས་ནས་འབུལ་སྡུད་ཐམས་ཅད་བླ་བྲང་ལ་གནང་བ་ལ་སོགས་པ་མཛད། དེའི་སྐབས་ས་གྱོད་ཝ་ཤུལ་དཔོན་གྱིས་འགྲིགས་ཐབས་བྱས་ཏེ་ལེགས་པར་ཕན་ཚུན་མཐུན་པར་གྱུར་ནས་འཁོན་པ་ཞི་བརབྱུང་། དེའི་སྐབས་སུ་བླ་མ་རིན་པོ་ཆེའི་ཞལ་གཟིགས་ནས་ལུང་བསྟན་སྐོར་དུ་མ་ཡོད་ཀྱང་གཏེར་གཞུང་དུ་གསལ། དེ་ནས་རྗེ་དེ་ཉིད་ཀྱི་གྲྭ་ཚང་དུ་གཏོགས་པ་མཁར་ནང་འགབ་མའི་དཔོན་སྡེ་སྐྱ་སེར་ཀུན་གྱིས་ཕུན་སུམ་ཚོགས་པའི་ཆིབས་སུ་ཞུས་ནས་སུརྻའི་མིང་འཛིན་གྱི་གནས་དེ་ཀར་ཕེབས་ནས་བཞུགས། དེ་སྐབས་རྗེའི་ཉེ་གནས་འོད་འབར་དང་། འཇིགས་མེད་བཟང་པོ་ གཉིས་རོང་ཕྱོགས་ལ་འགྲོ་དགོས་པས། རྗེས་ལུང་བསྟན་དང་རྨི་ལམ་འཁྲུག་ཚུལ་སོགས་བདེ་བའི་རྡོ་རྗེ་ལ་མ་བཤད་ན་ཁོ་རང་གིས་ཡང་ཅི་བསམ་མི་ཤེས་དགོངས་ནས་འདི་བཞིན་གསུངས། ད་ལོ་ང་རང་གི་རྨི་ལམ་དུ་སེམས་དོགས་ཟོན་ཤོར་བས་འཆི་ལྟས་འགའ་རེ་རྨིས་བྱུང་བ་དང་། ཁྱད་པར་སེམས་ཁམས་ཀྱང་ཞན་དུ་འགྲོ་མ་རག་པ་ལྟ་བུའི་འདུ་ཤེས་དྲུག་པོ་སྡུག་མོ་མ་གཅིག་ཏུ་འདུག་པ་དང་། དེ་རྗེས་ཚོགས་བསྐང་ཚད་ལྡན་བྱས་ཏེ་བླ་མ་ལྷ་ལ་གསོལ་བ་བཏབ་པའི་རྨི་ལམ་དུ་བསྐལ་བ་ཆུ་ཁྱིའི་ལོའི་ཟླ་བ་གཉིས་པའི་ཚེས་བཅུ་ལ་ཚོགས་འཁོར་བཤམས་པ་དང་། གསོལ་འདེབས་རྒྱུད་བསྐུལ་མཛད་པ་དང་། འུ་ཅག་ཕ་བུ་ཟངས་མདོག་དཔལ་རིའི་ཚོགས་གྲལ་དུ་སོང་ནས་ལོ་འགར་སྡོད། དེ་ནས་ཤཾཤ་བྷ་ལར་ཡབ་རྗེ་བླ་མ་རིགས་ལྡན་བློན་ཆེན་པདྨ་བདེ་ལྡན་དང་། ང་རང་བློན་པོ་དྷརྨཱ་ཨཀྵ་བྲི་ཞེས་པའི་སྐྱེ་སྲིད་ལེན་དགོས། དེ་དུས་འགྲོ་དོན་ཆེན་པོ་འོང་གི་གསུངས་པ་རྨིས་ནས་སད་བྱུང་བ་དང་། ང་རང་ཁྱེད་ཀྱི་བཀའ་དང་འགལ་འགྲོ་བས་ཅི་དགོས་སྙམ་ཞིང་སེམས་ཁམས་མི་བདེ་བའི་ངང་ནས་གཉིད་ལོག་སྐབས། མཁའ་འགྲོ་དམར་མོ་སྒྲ་སྒྲོགས་ཡིན་སྐད་པའི་བུད་མེད་མི་མོའི་ཆ་ལུགས་ཅན་ཞིག་གིས། ཁྱོད་ཀྱི་ཚེ་རབས་ཀྱི་རིག་མ་རྡོ་རྗེ་ ༈ ཕག་མོའི་རྣམ་འཕྲུལ་སྐལ་བཟང་སྒྲོན་མ་ཡིན་པས། དེ་དང་རྟེན་འབྲེལ་མ་འཛོལ་ན་ཁྱེད་ལོ་དྲུག་ཅུའི་བར་དུ་བར་ཆད་བཟློག་གི་དང་། རྐྱེན་སྣང་གི་འཚུབ་མ་ཆེ་བས་ཁྱེད་ཡབ་ཡུམ་ལྷན་དུ་འཚོགས་ཨེ་ཐུབ་མི་ཤེས་ཟེར་སྣང་ཤར་བ་དང་། གཞན་ཡང་དེའི་རིགས་ཀྱི་རྨི་ལམ་ལུང་བསྟན་མང་པོ་ཆལ་ཆོལ་དུ་འདུག་པས། ང་རང་གི་ཚེ་ཕུགས་བརྟན་མི་བརྟན་ནི་ཉིད་ལ་ཐུག་ཡོད་པས། ཅི་དགོས་ཉིད་ཀྱིས་ཤེས་སོགས་གསུངས་ནས་མཇུག་ཏུ། ཀྱེེ་མཿ གུ་རུ་པད་འབྱུང་རྗེ་འབངས་ཉེར་ལྔ་དང་། །གཏེར་ཆེན་བརྒྱ་རྩ་བླ་མ་རྩ་གསུམ་ལྷ། །ཡིད་བཞིན་འཁོར་ལོ་འཕགས་མ་རིག་བྱེད་མ། །ཡེ་ཤེས་མཚོ་རྒྱལ་ལ་སོགས་གནས་གསུམ་གྱི། །མཁའ་འགྲོ་དམ་ཅན་རྒྱ་མཚོའི་བདེན་སྟོབས་ཀྱིས། །བདག་གི་ཚེ་རབས་དུ་མའི་བདེ་བསྐྱེད་གྲོགས། །དགའ་ཆེན་བདེ་བའི་རྡོ་རྗེ་སྙིང་གི་ནོར། །སྐད་ཅིག་མི་འབྲལ་དབྱེར་མེད་ལྷན་འཛོམས་པའི། །རྟེན་འབྲེལ་ལེགས་ཚོགས་མྱུར་དུ་བསྒྲིགས་པར་མཛོད། །ཟབ་གཏེར་སྒོ་འཕར་འབྱེད་པའི་ལྡེ་མིག་མཆོག །གཏེར་སྟོན་ཉིད་དང་ཐབས་ཤེས་མ་འཛོམས་ན། །ཚེ་ཡི་མཐར་བྱས་ཟངས་མདོག་དཔལ་གྱི་རིར། །ཟླ་བ་དྲུག་དང་ཞག་བཅུའི་དུས་མཚམས་སུ། །འགྲོ་ངེས་ བསླུ་མེད་བླ་མའི་ལུང་གིས་གསལ། །འོན་ཀྱང་སྙིང་གྲོགས་དམ་པའི་གཡར་དམ་དེ། །ཅིས་ཀྱང་བཟློག་མ་སྤོབས་པར་རང་དབང་ཞིག །མཆིས་ན་དྲུག་ཅུའི་བར་དུ་འདུག་སྙམ་ཡང་། བདུད་དབང་སྟོབས་བཙན་ཅི་འགྱུར་ཆ་མ་མཆིས། །གལ་ཏེ་གཞན་དབང་དྲག་པོས་ཐབས་ཤེས་འཛོལ། །ཚེ་ཡི་འཚོ་བ་ཉམས་པའི་གྲིབ་ཀྱིས་བསྣུབ། །ཞེ་གཉིས་དཔལ་རིའི་འགྲོ་དགོས་བྱུང་བ་ན། །མཁའ་འགྲོ་ཡིད་བཞིན་ནོར་བུའི་ཐུགས་མཎྜལ། །ད་དུང་ཕན་ཚུན་རྟེན་འབྲེལ་སྨོན་ལམ་དང་། །ལྷག་པའི་ལྷ་དང་མཁའ་འགྲོ་ཆོས་སྐྱོང་གི། །བདེན་པའི་མཐུ་ཡིས་ཐབས་ཤེས་ལྷན་དུ་འཛོམས། །ཟབ་གཏེར་གསུམ་གྱི་སྒོ་འཕར་བགྲང་ཡས་འབྱེད། །གསང་ཆེན་མྱུར་ལམ་ཤིང་རྟ་ལ་ཞོན་ནས། །བཅུ་གསུམ་རྡོ་རྗེ་འཛིན་པར་སངས་རྒྱས་ཐོབ། །བསྐལ་པ་རྒྱ་མཚོར་འགྲོ་དོན་རྟག་བསྒྲུབ་ཅིང་། །འཁོར་བ་ཕྱིར་བསྒྲལ་འགྲོ་ཁམས་ཡོངས་སྟོང་ནས། །ཀུན་ཀྱང་གཞོན་ནུ་བུམ་སྐུའི་རྒྱལ་ཁབ་ཆེར། །གདོད་མའི་མགོན་པོ་ཀུན་ཏུ་བཟང་པོར་ཤོག །ཅེས་པའི་བཀའ་གླེང་བསྐུར་བར་མཛད། དེ་ནས་དེར་འདུས་ཀྱི་བུ་སློབ་རྣམས་ལ་ཟབ་གཏེར་གཉིས་ཀྱི་བྲི་སྤེལ་ཡང་དུ་མ་མཛད་ཅིང་བཞུགས་པའི་སྐབས་སྐབས་སུ་བསྙུན་ཁམས་ཀྱང་མ་ངེས་པ་རེ་བྱུང་ནས། བསོ་སྤྲུལ་རིན་པོ་ཆེ་དང་། བུ་སློབ་རྣམས་ཀྱིས་སྐུ་རིམ་རྒྱུན་འདོན་སོགས་མཛད། དེ་སྐབས་བདེ་བའི་རྡོ་རྗེ་ལ་གསུང་ཤོག་འཕྲོད་པས། ཁོ་རང་དམ་སེལ་གྱི་རྐྱེན་གྱིས་འབམ་གཞི་ལྟ་བུའི་ནད་དྲག་པོ་སོང་བས། རྗེའི་མདུན་ལ་མྱུར་དུ་བྱ་བ་གང་ཐད་ནས་འོང་ཐབས་མ་ལྡན་ཏེ། ཕྱི་ནད་ཀྱིས་མནར། ནང་བཟའསྡུག་གིས་མནར་བར་རྗེ་དེ་ཉིད་ཞིང་དུ་བྱོན་འགྲོ་སྙམ་ནས་སྡུག་བསྔལ་ཆེན་པོ་ཉིན་མཚན་མེད་པར་བྱས་ཏེ། རྗེ་དེ་ཉིད་ལ་ཞུ་ཡིག་ཕུལ་བ། ད་དུང་བསྟན་པ་དང་སེམས་ཅན་གྱི་དོན་ལ་སྐུ་མྱ་ངན་ལས་མི་འདའ་བར་བཞུགས་པར་གསོལ་བ་བཏབ་པ་དང་། ཟླ་བ་དང་པོའི་ནང་དུ་སྐུ་བགེགས་སེལ་ཐབས་ལ་ང་རང་འཆི་མ་སོང་ན་འོང་ངེས་པ་སོགས་ཀྱི་ཡར་ཞུ་དང་། ཁྱད་པར་གདུང་ཤུགས་ཀྱིས་གསོལ་བ་འདི་ལྟར་བཏབ། རྒྱལ་ཀུན་འདུས་པ་པདྨ་ཐོད་ཕྲེང་རྩལ། །དབྱིངས་ཡུམ་མཁའ་འགྲོ་ཡེ་ཤེས་མཚོ་རྒྱལ་མར། །གསོལ་བ་འདེབས་སོ་བདག་གི་མགོན་མཛོད་ཅིག །སྐྱེ་སྔོན་སྨོན་ལམ་དག་པའི་ལས་འཕྲོ་ཡིས། །ཚེ་རབས་མང་པོར་མཚན་ལྡན་གྲོགས་དང་འགྲོགས། །ད་རིས་རྐྱེན་དབང་དྲག་པོའི་སྟོབས་ཤུགས་ཀྱིས། །སྙིང་དང་འདྲ་བའི་གྲོགས་སུ་བྲལ་བའི་ཚེ། །དྲན་ཁམས་སྡུག་གིས་3 ཟིན་ནས་འཆི་མ་འཁྲུག །དགྱེས་པའི་ཞལ་བསྟན་གསུང་གི་དབུགས་དབྱུང་ཚེ། །ལྷ་ཡི་ཡུལ་བསྒྲོད་བདེ་སྐྱིད་སྣང་བ་འཆར། །སྙིང་གྲོགས་ཁྱེད་དང་འབྲལ་སྙམ་མེད་ན་ཡང་། །ལས་ངན་བདག་ནི་ལུས་ངན་དམན་པར་སྐྱེ། །གཞན་གྱི་དབང་སོང་རང་དབང་རང་ལ་མེད། །འཆི་བདག་ཡུལ་བཞིན་དོན་སྙིང་མེད་དང་མཚུངས། །འདི་ཕྱིའི་རེ་ལྟོས་འཆའ་བ་གཅིག་པུ་ཉིད། །སྐད་ཅིག་མི་འབྲལ་ཡང་ཡང་ཡིད་ལ་དྲན། །དཀར་ནག་འཁྱུད་འཁོར་བར་དུ་གསོལ་བ་བཏབ། །དཔའ་བོ་ཁྱོད་ཉིད་འབྲལ་མེད་གཙུག་ཏུ་ཁུར། །རྐྱེན་དབང་ངན་པའི་གཡུལ་ལས་རྒྱལ་བར་མཛོད། །སྔ་སོར་ཞུ་ཚིག་ཡང་ཡང་ཐུགས་ལ་ཟུངས། །ཡལ་བར་མ་དོར་ཐུགས་བཞེས་བཀའ་དྲིན་ཞུ། །ཉེ་འབྲེལ་ལ་སོགས་འགྲོ་བའི་ལོག་སྒྲིབ་ཀྱིས། །དགོངས་པ་གཞན་དུ་ཕྱོགས་ཚེ་ཇི་ལྟར་བྱེད། །ཉིད་ཀྱི་བཀའ་གླེང་སྤྱི་བོར་ཕེབས་པའི་ངོར། །མི་མངོན་ཟངས་མདོག་དཔལ་རིར་ཡིབ་འགྲོ་གསུངས། །ཐོས་ཚེ་སྙིང་གྲོགས་དྲན་ཁམས་སྡུག་གིས་ཟིན། །འདི་ཕྱིའི་རེ་ལྟོས་སྐྱབས་མགོན་སུ་ཡིས་བྱེད། །ཁོ་མོའི་སྙིང་གཏམ་ཉམས་ལེན་སུ་ལ་ཞུ། །འགྲོ་བའི་མ་རིག་མུན་པ་སུ་ཡིས་སེལ། །བསྟན་པའི་སྒྲོན་མེ་སྲོག་ཤིང་སུ་ཡིས་འཛིན། །ཐུགས་སུན་མ་མཛད་ ༈ ཐུགས་རྒྱ་ཆེར་བསྐྱེད་ནས། །སྐུ་ཚེ་ཞབས་པད་རྡོ་རྗེར་བརྟན་བཞུགས་ནས། །བདེ་བའི་རྡོ་རྗེ་ཐུགས་ནས་མི་འདོར་བར། །ཐབས་ལམ་ཁ་སྦྱོར་བདེ་སྟོང་དགའ་བཞི་ཡི། །འོད་གསལ་མངོན་དུ་འགྱུར་བར་མཛད་དུ་གསོལ། །མི་འགྱང་མྱུར་དུ་དངོས་མཇལ་སྨོན་ལམ་ཞུ། །གལ་ཏེ་ཞུ་ཚིག་ཡལ་བར་སྲིད་གྱུར་ན། །དཔའ་བོ་ཁྱོད་ཀྱི་སྔོན་དུ་མཁའ་སྤྱོད་དུ། །བདག་གིས་འདུན་པ་དྲག་པོ་ཡང་ཡང་གཏད། །གནས་གསུམ་མཁའ་འགྲོའི་ཚོགས་ཀྱིས་འགྲུབ་པར་མཛོད། །དུས་འདི་ནས་བཟུང་བྱང་ཆུབ་སྙིང་པོའི་བར། །དཔའ་བོ་ཁྱེད་དང་སྐད་ཅིག་མི་འབྲལ་ཞིང་། །གསང་སྤྱོད་ལམ་ལ་ཐེ་ཚོམ་མེད་པ་དང་། །མཛད་སྤྱོད་ཐམས་ཅད་ཡང་དག་ལམ་མཆོག་མཐོང་། །གསུང་གི་བདུད་རྩི་ཟབ་མོ་རབ་ཐོབ་ནས། །ཐུགས་ཀྱི་དགོངས་པ་དབྱེར་མེད་འགྲུབ་པར་ཤོག །ཅེས་དང་། གཞན་ཡང་མཁའ་འགྲོའི་ལུང་བསྟན་བཞིན་དེ་བར་གྱི་རིམ་གྲོ་སོགས་གང་དགོས་ཀྱི་ཞུ་ཡིག་ཕུལ་བས། རྗེས་ཀྱང་བདེ་བའི་རྡོ་རྗེས་ཞུ་བྱ་ལྟར་དེར་འདུས་ཀྱི་བུ་སློབ་རྣམས་ལ་ཚོགས་མཆོད་འབུམ་ཐེར་ལ་སོགས་པའི་སྐུ་རིམ་རྣམས་བསྒྲུབ་དགོས་གསུངས་ནས། བུ་སློབ་རྣམས་ཀྱིས་ཀྱང་དེ་ལྟར་ཞིབ་རྒྱས་སུ་མཛད། དེ་ནས་ཞག་ ཆ་ཤས་སོང་སྐབས་བདེ་བའི་རྡོ་རྗེའི་རྐང་པ་གཉིས་ཀ་ཞ་སོང་བས། མགར་ར་སང་གིས་མི་རོ་བསྐྱལ་ས་དུར་ཁྲོད་ལྟ་བུར་བྱས་ནས། རྒྱལ་སྲས་ཀྱི་སྐུ་ནུས་འཇིགས་མེད་དཀོན་མཆོག་སོགས་ཀྱིས་བསྐྱལ་བྱུང་བས། དེའི་སྐབས་སུ་འཇིགས་མེད་དཀོན་མཆོག་རྗེའི་སྐུ་མདུན་ལ་འོང་ནས་ལགས་ངེད་ཀྱི་མཁའ་འགྲོ་འདི་ས་མཐའ་ཞིག་ཏུ་མི་མངགས་པ་ཞིག་ལ་ཁྱེད་མ་འཆུག ཁོ་རང་གི་ཁྱེད་ཀྱི་བཀའ་ཙམ་ངེས་པ་ཡིན། དེ་མིན་ངེད་ཅག་སུས་བཤོལ་མ་བྱས་ཀྱང་ཁོ་རང་ཁག་མེད་ཡིན་པས། ཡར་དོངས་ནས་ས་མཐར་འགྲོ་ངེས་པ་ཡིན་ཟེར་བ་སོགས་ཀྱི་དགའ་སྡུག་གི་གཏམ་ཐམས་ཅད་རྗེ་ལ་ཞིབ་རྒྱས་སུ་ཞུས། རྗེའི་ཞལ་ནས་ཁྱེད་ཀྱི་ཁོ་རང་ལ་སྡུག་འདི་འདྲ་གཏད་མ་འབབ། ང་རང་གི་ཁ་ཨེ་ཉན་མི་ཤེས་ཀྱང་། ཐབས་གང་དྲག་གིས་ས་མཐར་མི་གཏོང་སོགས་གསུངས། དེ་ནས་རྗེས་བདེ་བའི་རྡོ་རྗེ་ལ་སྨན་དང་རིམ་གྲོ་སོགས་ཐབས་གང་དྲག་མཛད་ནས། རྐང་པ་གཅིག་ནད་ལས་གྲོལ། གཅིག་ནད་ལས་མ་གྲོལ་ཀྱང་ཟུག་རྔུ་མེད་པ་ལྟ་བུར་བྱུང་། དེ་ནས་ཡབ་ཡུམ་གདན་ཐོག་གཅིག་ལ་འཚོགས་ཤིང་ཕྱི་ཟབ་གཏེར་གསུམ་གྱི་སྒོ་འཕར་འབྱེད་ནས་གསལ་ཁྱབ་ཏུ་སྤེལ་ཞིང་དར་བ་དང་། ནང་ཐབས་ཤེས་མྱུར་ལམ་ལ་བརྟེན་ནས་བོགས་འབྱིན་ ༈ བརྟན་པར་བཅང་བས་གནས་ལྔའི་རྩ་མདུདགྲོལ་བ་དང་། གསང་བ་ཟུང་འཇུག་གི་རིག་སྐུ་མངོན་དུ་གྱུར་ནས་དག་རྫོགས་སྨིན་གསུམ་མཐར་ཕྱིན་པའི་ལམ་གྱི་ཡོན་ཏན་འབྱུང་ཚུལ་རྣམས་ནི་གཏེར་གཞུང་གཉིས་ལ་གསལ་བས་འདིར་ཡི་གེ་མང་བར་དོགས་ནས་མ་བྲིས་སོ། །དེའི་དུས་སུ་ཉིན་མོ་མེ་ཏོག་གི་ཆར་བབ་པ་སྒྲ་སྒྲོགས་པ་དང་། ནུབ་མོ་ས་གཡོ་བ་དང་རིངུར་བ་རྔ་དང་རོལ་མོ་རྣམས་འབུད་དཀྲོལ་བྱེད་པ་སོགས་ནི་དེར་འདུས་ཀྱི་སྐལ་ལྡན་ལས་ཅན་རྣམས་ཀྱིས་མཐོང་ཆོས་སུ་འབྱུང་ངོ་། །དེ་ནས་དགུང་ལོ་ཞེགཉིས་ལོར་ཡབ་ཡུམ་ཚེ་སྒྲུབ་ལ་བཞུད་ནས་སྐུ་གེགས་ལས་གྲོལ། དེའི་སྐབས་སུ་རེབ་གོང་བ་ལེགས་པ་ཕྱོགས་ནས་སློབ་མ་མང་པོ་འདུས་བྱུང་བས། དེ་དག་ལ་རང་རང་དང་འཚམས་པའི་ཁྲིད་ལུང་སོགས་མཛད། ཁྱད་པར་ཟབ་གཏེར་ཡོངས་རྫོགས་ཀྱི་བདག་པོ་བསོ་སྤྲུལ་རིན་པོ་ཆེ་དང་། ཡུལ་དེའི་དཔོན་བླ་རྗེའི་དངོས་སློབ་བདེ་ཆེན་བཟང་པོ་དང་། པདྨ་བདེ་གསལ་ལ་སོགས་པའི་ཉེ་འཁོར་རྣམས་ཀྱིས་རྗེའི ཟབ་གཏེར་ཡོངས་རྫོགས་ཀྱི་དབང་ལུང་གསུངས་དགོས་ཡང་ཡང་ཞུས་ཀྱང་། རྗེའི་ཐུགས་ལ་ཡབ་རྗེ་བླ་མའི་བསྟན་པ་མི་དར་བར་བྱེད་འགྲོ་དགོངས་ནས་བཏང་སྙོམས་ལ་བཞུགས་སྐབས། བདེ་བའི་རྡོ་རྗེས་ཡབ་ཡུམ་རྟེན་འབྲེལ་གྱི་ཐོག་མ་ཡིན་པས། ཟབ་ཆོས་ཡོངས་རྫོགས་གསུང་དགོས་ཞེས་ཡང་ཡང་ནན་ཆེར་ཞུས་ཚེ། རྗེ་དེ་ཉིད་ཀྱིས་ཀྱང་ད་ལན་ཆོས་བདག་རྣམས་དང་རྩ་བའི་ཐབས་གྲོགས་བཅས་ཕུན་སུམ་ཚོགས་པར་འདུས་ཡོད་པས། རྟེན་འབྲེལ་མ་བསྒྲིགས་རང་བྱུང་དུ་འབྱུང་འདུག་དགོངས་ཏེ། ཟབ་གཏེར་གྱི་དབང་ཁྲིད་གསུངས་པར་ཞལ་གྱིས་གནང་། དེ་ནས་བསྐལ་པ་ཆུ་ཁྱིའི་ཟླ་བ་བཞི་པའི་ཡར་ཚེས་གསུམ་ལ། ཟབ་ཆོས་ཡོངས་རྫོགས་ཀྱི་བདག་པོ་འབྲོག་མིའི་རྣམ་རོལ་བསོ་སྤྲུལ་སྣ་ཚོགས་རང་གྲོལ། རྗེའི་ཕུ་བོ་མཁྱེན་སྤྲུལ་རིན་པོ་ཆེའི་སྐུ་སྲས་ཡབ་རྗེ་བླ་མའི་གསུང་གི་ཟླ་གཞོན་སྤྲུལ་པའི་སྐུ་རིག་འཛིན་ཀུན་བཟང་ཉི་མ། ཆོས་བདག་ཀ་བཞིའི་ནང་ནས་ཤར་གྱི་ཀ་ཆེན་ཝ་ཤུལ་རོག་ཟའི་དབོན་པོ་དྲི་མེད་འོད་གསལ་ལ་སོགས་པའི་ཆོས་བདག་གཙོ་བོ་བརྒྱ་དང་། བུ་ཆེན་ཉེར་ལྔ། ཕྲན་བརྒྱད་ཅུ་ལ་སོགས་པ་ཐམས་ཅད་སྨོན་ལམ་གྱི་དབང་གིས་རང་རང་གི་ཕྱོགས་ནས་འདུས་པ་དང་། རེབ་གོང་སྔགས་མང་ནས་བྱ་བྲལ་བ་ལྷུན་གྲུབ་རིག་འཛིན་དང་། དྲག་སྔགས་བདག་པོ་བསོད་ནམས་འབུམ་ལ་སོགས་པའི་རེབགོང་སྔགས་སྡེས་གཙོས་འདུས་སྡེ་སྐར་ཚོགས་ལྟ་བུར་འཚོགས་པ་རྣམས་ལ། ཟབ་གཏེར་སྨིན་པ་འབྲས་ ༈ བུ་ལྟ་བུའི་ཆོས་སྐོར་སྐུ་བསོ་ཐོག་རྒྱལ་བའི་དབེན་གནས་ཀྱི་ཟབ་ཆོས་སྐོར་དང་། གསལ་བ་མེ་ཏོག་ལྟ་བུའི་སྐོར་སྤྲེལ་རྫོང་རྡོ་རྗེ་ཕག་མོའི་ཆོས་སྐོར། རྒྱས་པ་ཡལ་ག་ལྟ་བུའི་ཆོས་སྐོར་ཤིང་ལོ་བྲག་དཀར་གྱི་ཟབ་ཤོག་ལུས་མེད་མཁའ་འགྲོས་དངོས་སུ་ཕུལ་བའི་ཆོས་སྐོར། ཞག་པ་རྩ་བ་ལྟ་བུའི་ཆོས་སྐོར་བསམ་ཡས་མཆིམས་ཕུ་རི་མོ་ཅན་གྱི་ཆོས་སྐོར་དང་། གཏེར་ལ་ཕན་པའི་གྲོགས་ས་གཞི་ལྟ་བུའི་སྐོར་དག་སྣང་སྐོར་གསུམ་དང་། དགོངས་གཏེར་རྣམ་གཉིས་ཀྱི་ཆོས་སྐོར་དང་། གཞན་ཡང་གནས་ཆེན་བརྒྱ་དང་། གནས་ཕྲན་ལྔ་ལ་སོགས་པ་ནས་སྤྱན་དྲངས་པའི་ཟབ་གཏེར་པུསྟི་ཀ་བཅུ་དྲུག་གི་དབང་ལུང་ཡོངས་སུ་རྫོགས་པར་བསྩལ་ནས། དེར་འདུས་ཀྱི་སྐལ་ལྡན་གདུལ་བྱ་ཐམས་ཅད་སྨིན་གྲོལ་དུ་བཀོད་པར་མཛད་ཅིང་ཕྲིན་ལས་བཟང་པོ་འགྲན་ཟླ་དང་བྲལ་བར་འབྱུང་བ་དང་། ཡུལ་ཕྱོགས་དེ་ཀར་བདེ་སྐྱིད་ཕུན་སུམ་ཚོགས་པ་གོང་འཕེལ་དུ་རྒྱས་ཤིག་ཆོས་ཀྱི་སྒྲོན་མེ་གསལ་ཁྱབ་ཏུ་དར་བར་མཛད་དོ། །འདྲིལ་བ་སྡོང་པོ་ལྟ་བུའི་སྐོར་ཐུགས་སྒྲུབ་ཡིད་བཞིན་ནོར་བུའི་ཆོས་སྐོར་རྣམས་རྟེན་འབྲེལ་རྗེས་མཐུད་དུ་བཞག་པའོ། །དེ་ནས་ཡབ་རྗེ་བླ་མའི་ལུང་བསྟན་བཞིན་གདན་ས་ནེེ་གྲོ་རྡོ་རྗེ་རྫོང་དུ་ཕེབས་པའི་དུས་ལ་ དགོངས་ནས། འཁོར་འབངས་བུ་སློབ་རྣམས་ལ་དེ་ལུགས་ཀྱི་ཞལ་བཀོད་སྟ་གོན་སོགས་མཛད་ཚེ། ཟླ་བ་ལྔ་པའི་ཡར་ཚེས་ལ་ཡབ་ཡུམ་གཉིས་དང་། བསོ་སྤྲུལ་རིན་པོ་ཆེའི་གཙོས་བུ་སློབ་ཆེ་བ་རྣམས་བྱོན། དེ་སྐབས་རྗེའི་སྐུ་ནུས་མཁྱེན་སྤྲུལ་རིན་པོ་ཆེའི་སྐུ་སྲས་ཀུན་བཟང་ཉི་མ་སྔོན་ལ་བྱོན་ནས། རྗེས་དཔོན་གཡོག་ལ་བཞུགས་གནས་ཀྱི་སྟ་གོན་མཛད་ཡོད་པ་ལ། རྗེས་རྟེན་འབྲེལ་བརྟགས་པས་ཆ་ཆོད་པ་ཞིག་མ་འབྱུང་ནས། བདེ་བའི་རྡོ་རྗེ་ལ་ལོ་རྒྱུས་གསུངས་པས། མོ་ན་རེ་རྟེན་འབྲེལ་འབྲིང་ལ་བབ་པ་རེད་ཟེར། དེ་ནས་བཞུགས་གནས་སོགས་ཀྱི་མཐུན་རྐྱེན་བུ་སློབ་རྣམས་ཀྱིས་ལེགས་པར་བསྒྲུབ་གནས་ཕུན་སུམ་ཚོགས་པར་བྱས། དེ་སྐབས་བདེ་བའི་རྡོ་རྗེས་གནས་དེ་ནས་སྒྲོལ་དཀར་ཡིད་བཞིན་འཁོར་ལོའི་ཟབ་གཏེར་ཞིག་སྤྱན་དྲངས་ནས་རྗེའི་སྐུ་ཚེ་བརྟན་ཕྱིར་དུ་ཕུལ་བས། རྗེའི་ཞལ་ནས་རྟེན་འབྲེལ་བཟང་གསུངས་ནས་ཡབ་ཡུམ་གཉིས་ཀས་གཏེར་འབྱུང་གི་ལོ་རྒྱུས་དང་། གཏེར་སྟོན་གྱི་ཆེ་བ། ཆོས་བདག་གི་དགོས་ཆེད་རྣམས་ཀྱི་གསུང་མཛད་སོགས་དུ་མ་མཛད་དོ། །ཁྱད་པར་རྗེའི་ཞལ་ནས་དའུ་ཅག་གཉིས་ཀྱིས་བདུད་རྩི་སྨན་སྒྲུབ་ཞིག་བསྒྲུབ་དགོས་པའི་ལུང་བསྟན་ཡོདཔས་དེ་ལུགས་དགོས་གསུངས། བདེ་བའི་རྡོ་ རྗེས་ཀྱང་རྗེའི་བཀའ་བཞིན་སྨན་སྒྲུབ་ཀྱི་སྟགོན་བྱས། བུ་སློབ་རྣམས་ཀྱིས་ཞག་བཅུ་གསུམ་གྱི་བར་དུ་སྨན་རྣམས་བརྡུང་བཙག་བྱས་ཏེ། དེ་ནས་རྗེ་དེ་ཉིད་དང་། བསོ་སྤྲུལ་རིན་པོ་ཆེ་དང་། རྗེའི་དངོས་སློབ་ཡི་གེའི་རིས་བྱེད་སྟོང་ཉིད་རྡོ་རྗེ། ཉེ་གནས་དཔལ་ལྡན་བློ་གྲོས། བདེ་བའི་རྡོ་རྗེ་བཅས་པས་ཞག་བདུན་གྱི་བར་གུ་རུ་རྟཕག་ཡབ་ཡུམ་གྱི་དཀྱིལ་འཁོར་ལ་བརྟེན་ནས་བདུད་རྩི་སྨན་སྒྲུབ་མཛད་ཚེ། ཞག་གསུམ་ནས་ངོ་མཚར་བའི་འགྲུབ་རྟགས་སྣ་ཚོགས་མཐོང་ཆོས་སུ་འབྱུང་། ཉིན་བདུན་འགྲོ་སྐབས་ཐོ་རངས་དུས་རྗེའི་མནལ་ལམ་ལ་བུད་མེད་རུས་པའི་རྒྱན་དྲུག་གསོལ་བ་དར་དཀར་གྱི་ལྭ་བ་མནབ་པ་རིན་པོ་ཆེའི་རྒྱན་སྣ་ཚོགས་ཀྱིས་སྤྲས་ཤིང་ཕྱག་ན་སྒྲ་སྙན་འཛིན་པ་ཞིག་མདུན་ཐད་དེ་ཀར་འོང་ཞིང་སྒྲ་སྙན་གྱི་སྒྲ་ལ་དྲངས་ནས་འདི་སྐད་ཟེར། ཧེ་ཧེཿ རྨད་བྱུང་དམ་རྫས་ཨམྲྀ་ཏ། །རང་ལ་རྫོགས་པའི་གསང་བའི་རྫས། །རྒྱུ་རྐྱེན་འདུས་པའི་ར་ས་ཡ། །རིགས་ལྔ་མཉམ་སྦྱོར་རྨད་པོ་ཆེ། །ཟག་མེད་བདེ་ཆེན་བསྐྱེདཔའི་རྫས། །བདག་ཅག་རྣམས་ཀྱི་དཔལ་དུ་རོལ། །ཨ་ཧཾ་སིདྡྷི་ཡ་མི་ཧོ། ཞེས་ཟེར་བས། རྗེའི་ཐུགས་ལ་ཅི་ཡིན་དགོངས་པ་དང་མཉམ་དུ་ཡུལ་ཡིད་དུ་འོང་བ་སྤང་ལྗོངས་མེ་ཏོག་3 གི་ཚལ་རྒྱས་པ། ཆུ་མིག་དང་ཤིང་སྣ་ལ་སོགས་པས་སྣང་བའི་ཁྱོན་ལྟར་ཁྱབ་པ། དེའི་དབུས་སུ་འཇའ་ཡི་གུར་ཁང་ཉིས་རིམ་དུ་ཡོད་པའི་ནང་ན་ཟ་འོག་གི་གདན་གསུམ་བརྩེགས་ཀྱི་སྟེང་དུ། དཔའ་བོ་དཀར་ལ་དམར་མདངས་ཆགས་པ་ཧེ་རུ་ཀའི་ཆ་བྱད་ཅན་ཞི་མ་ཁྲོ་འཛུམ་གྱི་ཉམས་དང་ལྡན་པ་ཞིག་བཞུགས་ཡོད་པ། དེའི་མཐའ་བསྐོར་དུ་དཔའ་བོ་དང་དཔའ་མོ་མང་