Tibetan
གྱིས་ད་དུང་མ་མངོན་པ་རེད་ལགས་ཟེར། རྗེས་ཆུ་ཆེན་པོ་འདི་ལས་བསྒྲོད་ཐབས་ཅི་དགོས་གསུངས། བདེ་བའི་རྡོ་རྗེས་འུ་ཅག་ཡབ་ཡུམ་གྱི་སྐུ་འཆིང་མཐུད་ན་བསྒྲོད་ཐབས་ཡོད་ཟེར་ནས་དེ་ལྟར་བྱས་ཏེ་ཆུའི་ཕ་རི་ལ་བྱོན་ཞིང་ཕྱིར་གཟིགས་པས། པཱ་ཤཾ་ཏ་རེ་དང་གཉིས་ལུང་ཐུར་དུ་འགྲོ་བ་གཟིགས། ནས། རྗེས་ཆུ་འདིས་ཁྱེར་འགྲོ་གི་དགོངས་ནས་པཱ་ཤཾ་ཏ་རེ་ལ་འབོད་པར་མཛད་ཀྱང་མི་ཉན་པར་བུད་སོང་བས། རྗེས་བདེ་བའི་རྡོ་རྗེ་ཡོད་པ་འདིའི་ལན་མི་བྱེད་པ་འདྲ་དགོངས་པས། བདེ་བའི་རྡོ་རྗེས་བདག་གིས་ཨེ་ཡིན་སང་ཕོད་ཁོ་རང་ལ་ཚེ་གེགས་འདུག་པ་དེའི་ལན་ཟེར།རྗེས་རིམ་གྲོ་ཅི་དགོས་གསུངས། བདེ་བའི་རྡོ་རྗེས་ཚོགས་མཆོད་གྲངས་ལྡན་རེ་འཁྱོལ་ན་སྐྱོན་མེད་ཟེར། དེ་ནས་མཆོད་རྟེན་གྱི་རྩར་ཐོན་སོང་བས་ནང་ཐམས་ཅདགཞལ་ཡས་ཁང་གི་བཀོད་པ་ཕུན་སུམ་ཚོགས་པར་གནས་ཤིང་ཡིད་དུ་འོང་བ་ས་གཞི་ཐམས་ཅད་རིན་པོ་ཆེ་སྣ་ཚོགས་ལས་གྲུབ་པའི། སྟེང་ཁང་དུ་བདེ་མཆོག་གི་དཀྱིལ་འཁོར་ཡོངས་སུ་རྫོགས་པ་བློས་བསླང་གི་ཚུལ་དུ་ཡོད་པས། བར་ཁང་དུ་དཔལ་དུས་ཀྱི་འཁོར་ལོའི་དཀྱིལ་འཁོར་རིན་པོ་ཆེ་སྣ་ལྔ་ལས་གྲུབ་པ། གཙོ་འཁོར་རྣམས་ཀྱིས་སྟག་ཤཾ་རུས་རྒྱན་གསོལ་ཞིང་དབུ་སྐྲ་ཐོར་ཅོག་ཏུ་བཅིང་བ། ཌཱཀྐི་མ་མང་པོས་མཆོད་གཉེར་གྱི་ཚུལ་མཛད་འདུག་པས། དེ་རྣམས་ཀྱི་མགྲིན་གཅིག་ཏུ་འདི་སྐད་ཟེར།གྷ༔ཀྵ༔སྨ ཤུལ༔ཝ༔ཝ༔ཧཱུཾ་བ་སྥོ་ཿཞེས་ཟེར། སྔགས་དེ་དག་ཐམས་ཅད་གསེར་གྱི་ཡི་གེར་གྱུར་ནས། རྗེ་ཡབ་ཡུམ་གྱི་ལྟེ་བའི་གནས་སུ་ཐིམ་སྟེ། མཁའ་འགྲོ་མ་རྣམས་ཀྱིས་ཀྱང་སྐུས་གར་བསྒྱུར་ནས་ ༈ འཇའ་ཡལ་བ་བཞིན་དཀྱིལ་འཁོར་གྱི་གཙོ་བོ་ལ་ཐིམ་མོ། །དེ་ནས་འོག་ཁང་ལ་བྱོན་ནས་གཟིགས་པས་གྲུབ་ཆེན་ས་ར་ཧ་པ་དེ་ཉིད་གྲུབ་ཐོབ་བརྒྱད་ཅུ་རྩ་དགུའི་དབུས་ན་སྐུ་གཟི་བརྗིད་དང་ལྡན་ཞིང་། གསུང་ཚངས་པའི་དབྱངས་ཀྱིས་བདེ་མཆོག་དྲིལ་བུ་པའི་དཀྱིལ་འཁོར་ཞལ་ཕྱེས་ནས་ཡོད་པ་ལ། བདེ་བའི་རྡོ་རྗེས་ཁྱོད་ཀྱིས་ད་དབང་རྟེན་བླ་མ་ལ་ཕུལ་ཟེར་མ་ཐག ཁོ་རང་གྲུབ་ཆེན་མི་ཏྲི་པའིགཡས་ཕྱོགས་སུ་གྲུབ་ཆེན་རོ་ལང་དམར་མོ་ཞེས་པ་བཞུགས་འདུག་པས་དེའི་ཐུགས་ཀར་ཐིམ་སོང་། རྗེས་བླ་མ་ལ་དབང་རྟེན་ཕུལ་ནས་གདམས་པ་ཞུས་པས་ས་ར་ཧ་པའི་ཞལ་ནས་ཁྱོད་ང་དང་གཉིས་སུ་མེད་པ་ཡིན་པས། ངའི་དགོངས་བརྒྱུད་ཀྱི་བྱིན་རླབས་ཁྱོད་ལ་ཐོབ་པ་ཡིན་ཏེ། ཆོས་བཅུད་ཀུན་གྱི་སྙིང་པོ་ཡོ་ག་གསུམ་དྲིལ་གྱི་མན་ངག་མཐར་ཐུག་པ་ཟབ་དོན་རྡོ་རྗེ་ཕག་མོའི་ཆོས་སྐོར་གྱི་པྲ་ཁྲིད་ཐུགས་ཀྱི་རྒྱ་ཅན་འདི་ཁྱོད་ལ་གཏད་པ་ཡིན་པས། འདི་གཏན་ལ་ཕབ་ནས་འགྲོ་བའི་དོན་མཛོད་དང་། ཆོས་འདིའི་འབྲེལ་བ་ཐོབ་ཚད་སྐྱེ་བ་གཞན་གྱིས་བར་མི་ཆོད་པར་ཞིང་འདིའི་འཁོར་གྱི་ཐོག་མར་སྐྱེ་བར་ཐེ་ཚོམ་མེད་དོ་གསུངས་ནས། མཐིང་ཤོག་ཆེ་བ་ཅིག་གི་ངོས་ལ་གསེར་གྱིས་བྲིས་པའི་བརྡ་ཡིག་ཉི་ཤུ་རྩ་ལྔ་ཡོད་པ། མཐའ་སྐོར་ ཐམས་ཅད་རྟགས་བརྒྱད་སྣ་བདུན་རྫས་བརྒྱད་ལ་སོགས་པའི་བཀྲ་ཤིས་པའི་རི་མོ་ཐམས་ཅད་འཕྲུལ་གྱི་ཚུལ་དུ་ཡོད་པ་ཞིག་གནང་བ་དང་། གཞན་ཡང་བྱུང་དང་འབྱུང་འགྱུར་གྱི་ལུང་བསྟན་དུ་མ་གསུངས། རྗེས་ད་དུང་གྲུབ་ཆེན་རྣམས་ལ་གདམས་ཁྲིད་ཞུས་དགོས་དགོངས་ནས། གྲུབ་ཆེན་མོ་རོལང་དམར་མོའི་མདུན་དུ་བྱོན་པས། རྡོ་རྗེ་ཕག་མོ་དམར་མོ་ཞིག་ཏུ་གྱུར་ནས་བྷ་ག་བདེ་བ་ཆེན་པོའི་དཀྱིལ་འཁོར་ལ་བརྟེན་ནས་གསང་དབང་ཡོངས་སུ་རྫོགས་པ་བསྐུར་ཏེ། ཐབས་གྲོལ་གྱི་མན་ངག་ཤོག་དྲིལ་གཉིས་གནང་ནས་ཁྱེད་ཀྱིས་འགྲོ་བའི་དོན་མཛོད་གསུངས་མ་ཐག་གཞན་རྐྱེན་གྱིས་མནལ་ལས་སད་དོ། །དེ་ནས་རིམ་བཞིན་སྒྲུབ་པ་མཐར་ཕྱིན་ནས་དོན་གཉིས་ཀྱི་མཛད་པ་མཐའ་ཡས་པ་འབྱུང་ངོ་། །དེའི་སྐབས་སུ་སྨོན་ལོག་ཉམས་པ་ཞིག་གི་རྐྱེན་གྱིས་རྗེའི་ཟབ་གཏེར་གྱི་ཤོག་སེར་དང་གཏེར་སྒྲོམ་མང་པོ་སབྟས་བསྒྲིབས་ནས་རྐྱེན་དབང་དུ་སོང་བས་ཕབ་རྒྱུ་མ་རྙེད་དེ། རྗེའི་ཐུགས་སུན་ནས་བླ་མ་ལྷ་ལ་གསོལ་བ་བཏབ་པས། དེའི་ནུབ་ཨོ་ཌི་ཡ་ནའི་ཞིང་དུ་ཕེབས་པ་དང་། གཞན་ཡང་དག་པའི་གཟིགས་སྣང་དུ་མ་འབྱུང་ཡང་གཏེར་གཞུང་དུ་གསལ་བའོ། །དེ་ནས་དགུང་ལོ་ཞེ་གཅིག་ལོར་དབང་གི་ལྷ་མོའི་སྒོ་ནས་སྐུ་མཚམས་ལ་བཞུགས་ཡོད་ ༈ སྐབས། མནལ་ལམ་ལ་བན་ཆུང་སྤྲེལ་མགོ་ཅན་ཞིག་འབྱུང་ནས་ཁྱེད་ཀྱིས་ང་ཤེས་སམ་ཟེར། རྗེའི་ཞལ་ནས་མི་ཤེས་པ་འདྲ་གསུངས། ཁོ་ན་རེ་ང་ཡར་ལྷ་ཤམ་པོ་ནས་ཡིན་ཟེར། རྗེའི་ཞལ་ནས་ཁྱེད་འདིར་ཅིའི་ཕྱིར་འོང་བ་ཡིན་གསུངས། ཁོ་ན་རེ་ང་ཁྱོད་བསུ་བ་ལ་འོང་བ་ཡིན་ཟེར། རྗེའི་ཞལ་ནས་ང་ཅིའི་ཕྱིར་འོངས། སྔར་བདེ་བའི་རྡོ་རྗེའི་བཀའ་བཙན་བཟློག་ཏུ་མ་ནུས་པར་ངེས་མེད་ལ་འགྲོ་ཐབས་མབྱུང་བ་ཡིན་པས་མི་འགྲོ་གསུངས། ཁོ་ན་རེ་བདེ་བའི་རྡོ་རྗེ་ཁོ་རང་ཟླ་བ་དྲུག་པའི་ཉེར་ལྔའི་ཉིན་ཞིང་ཁམས་སུ་འགྲོ་རབ་ཡོད་པས་ཁྱོད་བྱོན་པ་ལ་བཤོལ་ཐབས་མི་འོང་ཟེར། རྗེའི་ཐུགས་ལ་འདི་ལྷ་འདྲེའི་ཆོ་འཕྲུལ་ཡིན་ནམ་ཅི་ཡིན་གྱི་ཆ་མི་ཆོད་པ་འདྲ་ན། ཁོ་རང་གི་རྒྱུད་ཚོད་ལ་བརྟགས་དགོས་དགོངས་ནས་ཡི་དམ་ལྷའི་ཏིང་ངེ་འཛིན་གྱི་ག་འུར་བཅིངས་པས། ཁོ་ན་རེང་ལ་འདི་འདྲ་མི་དགོས་དང་། བདག་གིས་ཁྱེད་མི་བསླུ། ཁྱེད་བྱོན་ན་བྱ་རྒྱལ་ལོར་ང་བསུ་བ་འོང་། མི་བྱོན་དགོངས་ན་བདེ་བའི་རྡོ་རྗེ་ལ་རིམ་གྲོ་གལ་ཆེ་བར་འདུག་ཟེར་ཞིང་རལ་གྲི་ཧྲཱིཿཡིག་གི་རྒྱ་ཅན་ཞིག་སྤྲད་ནས། འདི་ལས་འབྲེལ་བའི་མནོག་ཆོས་རེད་ཟེར་ནས་འོད་དམར་ཞིག་ཏུ་གྱུར་ཏེ་མི་སྣང་བར་སོང་། རྗེས་རལ་གྲི་ཕྱག་གི་བཟུང་ནས་ལན་ གསུམ་འཕྱར་བ་དང་མཉམ་དུ་དེས་བུམ་ཆེ་བ་ཞིག་ཏུ་གྱུར། རྗེས་ངོ་མཚར་བར་དགོངས་ནས་གཟིགས་པས་སྔར་དག་སྣང་ལ་ཨོ་རྒྱན་གཏེར་བདག་གླིང་པ་དངོས་སུ་མཇལ་ནས་ལྷ་ཆེན་གྱི་ཆོས་སྐོར་གྱི་བཀའ་དབང་ལུང་དང་བཅས་པ་གནང་བ་དེར་དགོངས་ཚེ། གསེར་གྱི་བརྡ་ཡིག་འབྲུ་བདུན་དུ་གྱུར་ནས་རྗེའི་ཐུགས་ཀར་ཐིམ་སྣང་འཆར།དེ་ནས་རང་གཏེར་གྱི་ཟབ་ཆོས་དུ་མ་གསར་ཕབ་མཛད་ནས་སྐལ་ལྡན་ཆོས་ཀྱི་བདག་པོ་རྣམས་ལ་རིམ་གྱིས་སྤེལ་སྐབས་ས་གཡོས་པ་དང་སྒྲ་གྲགས་པ་དང་། ཡེ་ཤེས་མཁའ་འགྲོས་དངོས་གྲུབ་ཀྱི་རྫས་དངོས་སུ་ཕུལ་བ་སོགས་རྟེན་འབྲེལ་ཕུན་སུམ་ཚོགས་པ་འབྱུང་བ་དང་། དེའི་སྐབས་སུ་བསོ་སྤྲུལ་རིན་པོ་ཆེའི་ཆིབས་བསུ་ལ་སྤྲུལ་སྐུ་འཇིགས་དགའི་ཡང་སྤྲུལ་རིག་འཛིན་ཆོས་ཉིད་དོན་རྟོགས་དཔོན་གཡོག་རྣམས་བྱོན་ཏེ། དེ་རྣམས་ལ་ཟབ་ལམ་གསང་བ་སྙིང་ཁྲག་གི་ཆོས་སྐོར་གུ་རུའི་སྒྲུབ་ཐབས་ཀྱི་ཚེ་དབང་སོགས་ཞིབ་རྒྱས་སུ་མཛད། ཁྱད་པར་ཆོས་ཉིད་དོན་རྟོགས་ལ་ལུགས་གཉིས་ཀྱི་ཞལ་ཏ་དང་གསུང་བགྲོས་མཛད་ནས་ཐུགས་བརྩེ་བས་རྗེས་སུ་བཟུང་སྟེ་བསོ་སྤྲུལ་དཔོན་གཡོག་ཐམས་ཅད་ཕར་བྱོན། དེ་སྐབས་རྗེ་ལ་འོག་མིན་གསང་ཆེན་རོལ་པའི་དུར་ཁྲོད་ནས་རྡོ་རྗེ་ཕག་མོའི་ཞལ་དངོས་སུ་མཇལ་ནས་ ཨ་ནུ་ཡོ་གའི་ཟབ་ཁྲིད་ཀྱི་མན་ངག་དུ་མ་གསུངས་པ་དང་། གཞན་ཡང་བྱུང་དང་འབྱུང་འགྱུར་སོགས་ལུང་དུ་བསྟན་པ་གཏེར་གཞུང་དུ་གསལ། དེ་ནས་རྗེའི་ཉེ་གནས་འོད་འབར་ཞེས་པས་རྗེ་ལ་གསོལ་ཇ་བསྐོལ་བ་སོགས་ཀྱི་ཞབས་ཞུ་བྱེད་ཀྱིན་ཡོད་སྐབས་རྐྱེན་ཞིག་ལ་བརྟེན་ནས་བར་སྐབས་སུ་མདུན་གཡོག་ཏུ་འདུག་མི་ཉན་ཟེར་བས། རྗེའི་ཐུགས་ལ་འོད་འབར་འདི་ཆུང་ནས་ད་ལ་ཐུག་གི་བར་དུ་གཏེར་སྟོན་བླ་བྲང་གི་མི་ཉན་གྱི་མི་དང་ཁྱི་ཉན་གྱི་ཁྱི་བྱས་ཏེ་ཞབས་ཞུས་མང་དུ་བྱས། ད་ང་རང་སར་ཁ་དལ་སོས་དལ་རེའོང་བ་འདི་ལ་མི་དགའ་བ་བྱེད་དོན་མེད་ཀྱང་། ད་རང་རེ་རྣམས་ནོག་འཁོན་བྱེད་ན་ཐབས་སྡུག་འདྲ་བས་དགོས་མེད་དགོངས་ནས།ད་ཁོ་རང་ཚོའི་བསམ་པ་རྫོགས་བྱེད་བྱས་ནས་ཕན་ཚུན་འཐབ་འཁོན་བྱེད་དགོས་མེད་དགོངས་ཏེ། རྗེ་ལ་དངོས་རྫས་ཅི་ཡོད་ཐམས་ཅད་ཕྲན་བུ་ཐབས་ཆགས་རེ་མིན་པ་ཁ་ཚང་འོད་འབར་ལ་གནང་ནས་ལོགས་སུ་བཞག །ཡི་གེའི་འདུ་བྱེད་ཤཱི་ལ་བཛྲ་ཞེས་པ་དེ་ཁོ་རང་གི་མ་ཡོད་སར་མངག་ནས་རྗེ་དེ་ཉིད་གཅིག་པུར་བཞུགས་སྐབས། སྔགས་སྲུང་མས་ལུང་བསྟན་དུ་མ་གསུངས་ཀྱང་། རྗེས་གཏན་ཕབ་མེད་ཅིང་གོས་དཀར་ཀློང་དུ་བསྟབས་ནས་ཐུགས་ཁྲོས་ཏེ། ཁྱོད་ལྷ་མི་ཀུན་གྱིས་ང་3 ལོན་ཟེར་ཡང་ཨེ་ལན་མི་ལན་མངོན་སུམ་མིག་གིས་མཐོང་རྒྱུ་འདི་རེད་གསུངས། ཐུགས་དགོངས་ལ་ཤཱི་ལ་བཛྲ་མ་ཡོད་སར་འགྲོ་མ་ཉན་པ་འདྲ་དགོངས། དེ་སྐབས་སུ་རྗེའི་དངོས་སློབ་ཆོས་ཀྱི་བདག་པོ་བླ་མ་ཚུལ་ཁྲིམས་བཟང་པོ་ཞེས་པ་དབེན་རི་ལ་སྒྲུབ་ཚུགས་ཐུབ་པ་ཞིག་ཡོདཔ་དེའི་རྨི་ལམ་ལོག་ནས་རྟགས་མཚན་མ་ངེས་པ་འབྱུང་བ་དང་། ཁྱད་པར་བདེ་བའི་རྡོ་རྗེ་ལ་ཤིན་ཏུ་འཁྲུག་པར་འདུག་པས། ནངས་པར་རྗེའི་དྲུང་དུ་འོང་ནས་ང་རང་གི་རྨི་ལམ་དང་འདྲ་ན་མཁའ་འགྲོ་བདེ་བའི་རྡོ་རྗེ་ལ་ཤིན་ཏུ་འཁྲུག་འདུག་པས། འུ་ཅག་གིས་རིམ་གྲོ་རེ་ལ་བསྒྲུབ་རྒྱུ་དང་། ཁྱདཔར་9 ཁྱེད་ཀྱི་ཐུགས་གཏད་གཟབ་གཟབ་རེ་མ་མཛད་ན། ཁྱེད་ཀྱི་སྐུ་ཚེ་བརྟན་ཐབས་ལ་སྔ་ཕྱི་ཀུན་གྱི་ལུང་བསྟན་ལ་དེའི་གྲགས་མེད་པར་གསལ་བས་དེ་ལུགས་དགོས་ཞུས། རྗེས་ཀྱང་ན་ནང་བླ་མའི་ཞལ་གཟིགས་ལུང་བསྟན་ནང་ན་བདེ་བའི་རྡོ་རྗེ་དང་རྟེན་འབྲེལ་མ་ལྡན་ན་ཞེ་གཉིས་ལོ་ཕན་མི་འདུག་པའི་ལུང་བསྟན་གསལ་པོར་འདུག་པས། ད་དུང་ཡབ་རྗེ་བླ་མའི་བསྟན་པ་འདི་མཐའ་རྒྱས་སུ་འོངས་ཐབས་རེ་འབྱུང་ན་དོན་ལྡན་རེད་དགོངས་པ་དང་། ཁྱད་པར་སྔར་གྱི་ལྷ་ཆེན་གྱི་ལུང་བསྟན་དང་། ཚུལ་བཟང་རྨི་ལམ་གཉིས་འདྲ་མཚུངས་ཀྱི་དགོངས་ནས། མཁའ་འགྲོ་ལ་སྐུ་རིམ་ ༈ སོགས་ལེགས་པར་བསྒྲུབ་པ་དང་། ཁྱད་པར་བརྟགས་འགུགས་ཀྱི་མན་ངག་ཕྲིན་རྒྱས་སུ་མཛད་ནས་བུ་སློབ་ཀུན་གྱིས་འབད་རྩོལ་ཆེན་པོ་བྱས། དེ་སྐབས་ཨ་སྐྱོང་ལ་རྒྱ་ཡི་འཇིགས་པ་འོང་ནས་འུར་འུར་ཟང་ཟིང་བྱེད་ཅིང་སྒར་གཞི་ཡུལ་གཞན་ཞིག་ཏུ་འགྲོ་དགོས་ཞེས་ཡུལ་མི་ཉེ་འཁོར་བླ་བྲང་ལ་སོགས་པས་ཡང་ཡང་ཟེར་ཡང་། རྗེ་དེ་ཉིད་བཏང་སྙོམས་སུ་བཞུགས། དེའི་ཉེར་ལྔའི་ཉིན་ནམ་མཁའ་འཇའགུར་གྱིས་གང་བ་སོགས་རྟགས་མཚན་དུ་མ་ཡོད་པས། རྗེས་ཀྱང་ཐུགས་མ་བདེ་ནས་ཅི་ཡིན་དགོངས། ཚུལ་བཟང་གིས་མཁའ་འགྲོ་ཞིང་དུ་ཕེབས་སོང་བ་འདྲ་ཟེར་ནས་ཚབ་འཚུབ་ཀྱིགཏམ་སྨྲས་ནས་ཕར་འགྲོ་ཚུར་འགྲོ་བྱེད་འདུག །བུ་སློབ་གཞན་རྣམས་ཀྱི་ཡིད་མ་བདེ་བ་ལྟ་བུར་བྱུང་བས། རྗེས་གནོད་སྦྱིན་ཆེན་པོའི་གསོལ་ཁ་གསུངས་ནས་ཕྲིན་ལས་སུ་མངག་པས། དེ་ནུབ་མནལ་ལམ་ལ་གནོད་སྦྱིན་ཆེན་པོ་དགེ་བཙུན་ཞིག་ཏུ་སྤྲུལ་ནས་འོང་སྟེ་འདི་སྐད་ཟེར། ཀཱཿ དབྱིངས་ཡེ་གཉིས་མེད་ཆོས་སྐུའི་མཁའ་ཀློང་ནས། །གདངས་སྣང་མ་འགགས་བརྡ་ཡི་རོལ་མོ་ངོམ། །ཤར་གྱི་ཙན་དན་དམར་པོའི་རལ་གྲི་འདི། །ལྷོ་ཡི་ཆོས་བཅུད་འཛིན་པའི་དཔལ་དུ་ངེས། །བྱང་གི་ཕག་ནག་འཚེ་བ་ནུབ་ཏུ་ གཡོ། །སྲིན་བྱ་མ་བཟོད་སྟོང་གསུམ་འཆོམ་པར་བྱེད། །ནུས་ལྡན་ཐུགས་ཁྲོས་ཟ་བྱེད་ལས་ལ་བསྐུལ། །མི་རིང་སྒྱུ་མའི་ལྟད་མོ་ཡུལ་ལ་ཤར། །སྣང་བ་བདེ་ཆེན་པདྨ་ལས་འབྲེལ་དང་། །སྟོང་དབྱིངས་མི་འགྱུར་སུ་ཁ་བཛྲ་རྩལ། །བདེ་ཆེན་དབྱིངས་སུ་འདུ་འབྲལ་མེད་མོད་ཀྱང་། །གཏེར་གཉིས་བསྟན་པའི་སྲོག་གི་ཀ་བ་རུ། །མི་འགྱང་དབང་སྒོར་གསལ་ལ་ཅི་ཆ་ཡོད། །ཅེས་ཟེར་ནས་མི་སྣང་བར་ཡལ། རྗེ་མནལ་སད་པ་དང་ཐུགས་བདེ་མོར་སོང་ནས་ནང་སྔ་སློབ་བུ་ཚུལ་བཟང་ལ་མཁའ་འགྲོ་ལ་སྐྱོན་མེད་པ་འདྲ། ཞག་ཆ་ཤས་ནས་འདི་གར་བྱོན་པར་ལ་ཐང་མེད་གསུངས་ནས་ཐམས་ཅད་ཀྱི་ཡིད་བདེ་མོར་བྱས། དེ་ནས་རྗེས་གཡང་གཏེར་གྱི་བུམ་པ་མང་པོ་བསྒྲུབས་ནས་ཕྱོགས་ཀུན་ཏུ་ས་དཔལ་གང་བཟང་ལ་བཞག་རྒྱུ་བཅུག ཁྱད་པར་རྗེ་རང་ཉིད་བཞུགས་གནས་ཀྱི་རྒྱབ་རིའི་བྲག་ལ་གཏེར་བུམ་ཆ་ཤས་དང་། པད་རྒྱུའི་ཐུགས་སྒྲུབ་ཀྱི་གཏེར་སྒྲོམ། མཁའ་འགྲོ་དགོངས་འདུས་དང་། ཡི་དམ་དགོངས་འདུས་ཀྱི་ཤོག་སེར། གཞན་ནོར་སྒྲུབ་ཚེ་སྒྲུབ་ལ་སོགས་པའི་གཏེར་སྒྲོམ་ཤོག་སེར་ཐམས་ཅད་ཡང་གཏེར་དུ་སྦས་ནས། མ་འོངས་པ་ན་ངའི་གཏེར་འདི་འདོན་དུས་གསང་གཏེར་གྱི་ལྡེ་མིག་ཉེ་རྒྱུའི་ཕོ་ཉ་མོ་དང་རྩ་བ་དང་ ཡན་ལག་གི་བུ་ཆེན་དང་ཆོས་ཀྱི་བདག་པོ་ལ་སོགས་པ་ཐམས་ཅད་གུ་རུ་པདྨའི་སྨོན་ལམ་ལས་ཀྱིས་འབྲེལ་བ་རྣམས་ལྷན་དུ་འཛོམས་ནས་གུ་རུ་ཡབ་ཡུམ་གྱི་ཐུགས་བཞེད་འགྲུབ་པ་དང་། དོན་གཉིས་ཀྱི་མཛད་པ་མཐར་ཕྱིན་པར་ཤོག་ཅིག་གསུངས་ནས། བདེ་བའི་རྡོ་རྗེ་ཡིད་རྒྱ་མཛད་དེ་གཏེར་སྒོ་རྣམས་བསྡམས་པས་གཏེར་སྲུང་རྣམས་ཀྱིས་ཀྱང་རང་རང་གི་གཏེར་ལ་བདག་པོ་བྱེད་པའི་ཚུལ་གྱིས་གཏེར་གནས་སོ་སོ་ལ་ཐིམ་མོ། །དེ་ནས་ཞག་འགའ་ནས་བདེ་བའི་རྡོ་རྗེ་ལ་ནད་དྲག་པོ་ཞིག་གློ་བུར་དུ་བྱུང་ནས་འབྲོང་སྐོར་ལ་བྱོན་ཞོར་དུ་རྗེའི་དྲུང་དུ་འོང་ནས་ཡབ་ཡུམ་གཉིས་ཀ་ཤི་གསོན་མཇལ་བ་ལྟ་བུའི་དགའ་སྤྲོ་མཛད། དེ་ནས་རྗེས་བདེ་བའི་རྡོ་རྗེ་ལ་ཁྱོད་བསྙུན་གཞིཅི་རེད་གསུངས། མོ་ན་རེ་ང་རང་ནད་གཞི་དམ་སེལ་ཞིག་ལ་རྐྱེན་བྱས་པ་ཡིན་པས་གློ་བུར་དུ་ལུང་བསྟན་འདྲ་འདྲ་ཞིག་འོང་ནས། སྟག་ཟླའི་ཉེར་ལྔ་ཚུན་ཆད་དུ་རབ་ན་ཁྱོད་ཀྱི་སྐུ་མདུན། མིན་ཀྱང་འབྲོང་མདུན་མཐོན་དགོས་ཟེར་བ་འོང་ཡང་། རྒྱལ་སྲས་སོགས་ཀྱི་ཐུགས་བབ་མེད་སྙམ་ནས་བཏང་སྙོམས་སུ་བསྡད་སྐབས། ཚེས་བཅོ་བརྒྱད་ཉིན་ནད་དྲག་པོ་ཐེབས་པ་ཡིན། ང་རང་གི་གྲྭ་བ་ཐུབ་བཟང་དང་། རྒྱལ་སྲས་ཀྱི་སྐུ་ནུ་འཇིགས་མེད་དཀོན་མཆོག་དང་། ཁྲ་3 བླ་སྙན་གྲགས་ཞེས་པ་ང་རང་གི་ཆོས་བདག་ཏུ་འགྱུར་བ་ཞིག་ཡོད་པ། དེ་དག་གིས་འདུག་ཏུ་མ་སྟེར་བར་གྲོ་ཁ་ཁལ་རྟ་སོགས་ཀྱི་མཐུན་རྐྱེན་བྱས་ཏེ། ཚེས་བཅུ་དགུའི་ཉིན་སྙན་གྲགས་ཀྱིས། བསྐྱལ་ནས། སོག་གི་དཀོན་མཆོག་ཚེ་རིང་གི་རི་ཐོག་ལ་བསྐྱལ་མ་བྱས། དེ་ང་རང་ལ་རྟ་ཕོ་བཟང་པོ་ཞིག་གཡར་ནས་ཉེར་ལྔའི་ཉིན་འབྲོང་མདུན་ལ་ཐོན། དེའི་ཉིན་འཆི་འགྲོ་ཚད་བྱས་ནས་སྡུག་བསྔལ་ཆེན་པོ་འབྱུང་འདུག་ཀྱང་། བནྡེ་ཞིག་འོང་ནས་སྤྲུལ་སྐུ་ལས་འབྲེལ་པས་མངག་པ་ཡིན་པས། ཁྱོད་ཡབ་ཡུམ་དམ་ཚིག་ལ་གནས་དགོས་ཟེར་བ་དང་མཉམ་དུ་འོད་དམར་ཞིག་གིས་བདག་གི་སྣང་བ་ཁྱབ་སོང་བར་བྱས་པ་ལ་རྐྱེན་བྱས་ཏེ་ང་རང་རོ་ལང་རྒྱབ་བྱུང་ཞུས། རྗེའི་ཞལ་ནས་ཁྱོད་ཀྱིས་དེ་ལྟར་ཅི་ལ་བྱེད། སྔར་སྣ་རང་མའི་ཐོག་ནས་འུ་ཅག་ཡབ་ཡུམ་གྱི་སྐུ་ཚེ་རྐྱེན་དབང་དུ་མི་གཏོང་ཆད་ཨེ་ཡིན་གསུངས། བདེ་བའི་རྡོ་རྗེས་རེད་ད་སྔར་ཚིག་གི་སྟེང་ན་ཕན་ཚུན་གཉིས་ཀ་མེད་པ་འདྲ་ཟེར་ནས་ངུ་ཀྱིན་འདུག་པས། རྗེའི་ཐུགས་ལ་ངས་འདུན་པ་ཞིང་དུ་གཏད་པ་འདི་གོ་བར་འདྲ་དགོངས་ཀྱང་མིན་མདོག་མཛད་ནས། ཁྱེད་ཀྱི་ཐུགས་ཆུང་ཅིའི་ཕྱིར་ཡིན། འུ་ཅག་ཐག་རིང་གི་སྙམ་ན་ནི་རྒྱལ་སྲས་ཐུགས་ལ་བབ་ན་ང་རང་གི་ས་ནས་བླ་བྲང་གིས་ཁྱེད་ལོ་གཅིག་གཉིས་ ༈ རེ་བཞུགས་ན་འདྲ། མིན་ཀྱང་གཏན་བཞུགས་བྱེད་རྒྱུ་ལྡན་ན་དགའ་མགུ་ཡི་རང་བྱེད་པ་མ་གཏོགས། འགལ་ཟླ་སྤུ་རྩེ་ཙམ་ཡང་མི་བྱེད་ཟེར་ནས་ཁ་ཆེན་ཚིག་ཆེན་བཤད་འདུག་པས། དེའི་ཐད་ནས་ཐུགས་ཆུང་འདི་མི་དགོས་གསུངས། བདེ་བའི་རྡོ་རྗེས་ངའི་དེ་ལྟར་བསམ་པ་མིན། ཁྱེད་ཀྱིས་དུས་དང་རྣམ་པ་ཀུན་ཏུ་ཐུགས་འདུན་ཞིང་ལ་གཏད་ནས། བདག་ཅག་རྗེས་འཇུག་ཐམས་ཅད་ལ་ཐུགས་འདོགས་མ་བཏང་ནས་རྐྱེན་དབང་དུ་གཏོང་བ་འདྲ་སྙམ་ནས་སེམས་ལ་སྡུག་བསྔལ་ཆེན་པོ་འབྱུང་བ་དང་། ཁྱད་པར་ང་རང་གི་ཐད་ནས་བླ་བྲང་གིས་ཅི་ཟེར་གྱི་ལགས་ཞུས་ནས་སྔར་གྱི་རྒྱུ་རྐྱེན་ཐམས་ཅད་གསལ་པོར་སྨྲས་འདུག་པས། རྗེས་ཁྱེད་ལ་དེ་ལྟར་རེད་སུས་ཟེར་གསུངས། བདེ་བའི་རྡོ་རྗེས་འཇིག་རྟེན་གྱི་མི་ཞིག་ནི་མིན་ངེས་པ་མེན་མིན་ན་ཞུས། དེ་ནས་ཡབ་ཡུམ་གཉིས་ཀ་ལུགས་གཉིས་ཀྱི་གསུང་མཛད་མང་དུ་གནང་། རྗེས་ཀྱང་སྔར་གྱི་དམ་བཅའ་བཞིན་ཐུགས་འདུན་ཞིང་ལ་མི་གཏད་གསུངས། དེ་སྐབས་བདེ་བའི་རྡོ་རྗེ་ལ་འབྲོང་མདུན་ནས་ལོན་པའི་གཏེར་སྒྲོམ་བྱེ་མ་ཨ་ཀྲོང་ལས་གྲུབ་པ་ཞིག་ཡོད་པ་དེ། རྗེ་ལ་ཕུལ་ནས་རྟེན་འབྲེལ་འཕྲོ་ཅན་དུ་མཛད་ཅིང་དེ་ཀར་ཞག་འགར་བཞུགས། དེ་ནས་ཀུན་གྱིས་འུར་ཟིང་བྱེད་ ཅིང་སྒར་གཞི་སྤར་དགོས་ཞུས་ཚེ། རྗེས་སྐྱོན་མེད་པ་འདྲ་ཡང་ཁོ་རང་ཚོའི་བསམ་པ་ལྟར་སྒར་སྤར་ན་ཆོག་གསུངས་ཏེ། ཌཱཀྐིའི་ལུང་བསྟན་གྱི་གནས་གསེར་འབྲོང་རིའི་ནུབ་ཀྱི་སྒོ་སྲུང་གཉན་ཆེན་གཡུ་བསེ་ཟེར་བའི་དབང་གི་སྦས་གནས་ཞིག་ཡོད་པ་དེ་ཀར་སྒར་གཞི་ལྷན་དུ་བྱོན་ནས། ཡབ་ཡུམ་གཉིས་ཀས་ཟབ་གཏེར་གསར་ཕབ་དང་དབང་ལུང་སོགས་མཛད། ཁྱད་པར་བདེ་བའི་རྡོ་རྗེས་རྗེ་ལ་ཁྱེད་ཀྱི་གཏེར་སྒོའི་གུ་རུ་རྟཕག་གི་ཆོས་སྐོར་ཟབ་མོ་ཞིག་ཡོད་པ་དེ་གཏན་ལ་ཕེབས་ཐབས་བཀའ་དྲིན་མི་ཆུང་བར་ཞུ་ཞེས་ཡང་ཡང་དུ་གསོལ་བ་བཏབ་པས། རྗེས་ཀྱང་ཕབ་པར་ཞལ་གྱིས་བཞེས་ནས་ཕན་ཚུན་ཞིབ་རྒྱས་ཀྱི་གསུང་མཛད་དང་། ཁྱད་པར་བདེ་བའི་རྡོ་རྗེས་རྗེ་ལ་གསོལ་བ་བདག་ནི་ལས་ངན་པ་འདི་སྟོབས་ཆེ་བས་བྱ་བ་ཅི་འགྱུར་ཆ་མི་ཆོད་པ་འདྲ་ན། ཡིད་བཞིན་ནོར་བུ་ཁྱོད་ནི་སྐུ་ཚེ་བརྟན་ཐབས་ལ་མ་འཆུག ཁྱོད་ནི་བསོ་སྤྲུལ་སྣ་ཚོགས་རང་གྲོལ་གྱི་དབུས་བུ་སློབ་རྣམས་ཀྱིས་མཉེས་པ་གསུམ་གྱི་ཞབས་ཏོག་སྒྲུབ་ནས་ཆོས་དམ་ཚིགགོ་ཡོད་པ་ཤ་སྟག་ཡིན་པ་ལྟ་བུར་འདུག་པས་ངོ་མཚར་ཆེ་གི་མ་གཏོགས། སྙིགས་དུས་འདིར་འགྲོ་བ་རྣམས་ཀྱིས་ཆོས་ཀྱི་ཡོན་ཏན་བླ་མའི་བཀའ་དྲིན་གོ་བ་ཤིན་ཏུ་དཀའ་མོ་རེད་ཟེར་ནས། བྱུང་དང་འབྱུང་འགྱུར་གྱི་ ༈ གཏམ་སྣ་ཚོགས་བསླབ་བྱའི་ཚུལ་དུ་ཞུས་ཏེ། སྐྱེ་བ་འདི་ནས་ཚེ་རབས་ཐམས་ཅད་དུ། །ཡིད་བཞིན་ནོར་བུ་ཁྱོད་དང་མི་འབྲལ་ཞིང་། །ཟབ་གཏེར་ཆོས་ཀྱི་དཔལ་ལ་ལོངས་སྤྱོད་ནས། །ཐབས་ཤེས་ཟུང་འཇུག་རིག་སྐུ་མངོན་འགྱུར་ཤོག །ཅེས་ཟེར་ནས་བདེ་བའི་རྡོ་རྗེས་ཞབས་སྤྱི་བོར་བླང་ཞིང་སེམས་ཆུང་བའི་ཚུལ་བྱེད་ཚེ། རྗེའི་ཐུགས་ལ་ཁོ་རང་ལ་མགར་སྤྲུལ་གྱིས་ཤ་མི་ཚ་གི་ཟེར་བ་འདི་བདེན་འདུག་དགོངས་ནས། བདེ་བའི་རྡོ་རྗེ་ལ་དེ་ལྟར་ཡིན་འདུག་ཟེར་བ་དང་རང་གིས་ཐོས་བྱུང་བས་བདེན་ནམ་གསུངས། བདེ་བའི་རྡོ་རྗེས། ཕན་ཚུན་འཐབ་འཁོན་དུ་འགྲོ་སྙམ་ནས། མགར་སྤྲུལ་གྱིས་མགོ་ལོག་བཟའགསལ་སྒྲོན་ཞེས་པ་ལུང་གིས་ཟིན་ནས་སྐུ་རྩར་བཞེས་རྒྱུ་བྱས་ཏེ། བདེ་བའི་རྡོ་རྗེ་ཕུད་གྲབ་བྱེད་ཀྱིན་ཡོད་ཀྱང་། དེ་ལྟར་མིན་ཟེར་ནས་སྦས་གསང་བྱས་ཤིང་བདག་ངེས་མེད་ཞིག་ཏུ་འགྲོ་འདུན་ཡོད་པས་ཁྱོད་ཀྱི་ཐུགས་གཏད་རེམ་ཞུས་ཚེ། རྗེའི་ཞལ་ནས་བདག་ལ་མཁའ་འགྲོའི་ལུང་བསྟན་སོགས་ལ་ཚེ་ཆོས་བར་ཆད་སེལ་ཐབས་ཁྱེད་རང་ཡིན་པ་ལྟར་ས་ཐག་རིང་པོ་རེ་མི་བྱོན་པ་དང་། ཁྱད་