Tibetan
འདི་ལ་འདུག་ནས་རིམ་གཉིས་ཀྱི་ལམ་བསྒོམ་ན་ཉམས་རྟོགས་ཀྱི་ཡོན་ཏན་རྒྱས་ནས་དོན་གཉིས་ལྷུན་གྱིས་གྲུབ་པ་དང་། འབྲེལ་འཇོག་ཙམ་བྱས་ན་གནས་སྐབས་དང་མཐར་ཐུག་གི་བར་ཆད་ཞི་ནས་བསམ་པ་ཐམས་ཅད་འགྲུབ་པར་འགྱུར་བ་དང་། ཕྱག་དང་བསྐོར་བབྱས་པ་ཙམ་གྱིས་ལུས་ངག་གི་སྡིག་པ་དག་ནས་འཁོར་བ་མཐའ་ཅན་དུ་འགྱུར་བ་སོགས་ཡོན་ཏན་བསམ་གྱིས་མི་ཁྱབ་པ་ཡོད་པས་འདི་རྣམས་མ་བརྗེད་པར་ཡིད་ལ་འཆོངས་ཤིག་ཟེར་ཏེ། གསེར་གྱིས་བྲིས་པའི་བརྡ་བཅུ་བསྟན་ནས་འདི་གནས་ཀྱི་ཡོན་ཏན་རྒྱས་པ་རེད་ཟེར། རྗེའི་ཞལ་ནས་འདི་རྣམས་ཀྱི་མིང་ལ་ཅི་ཟེར་གསུངས། ཌཱཀྐིས་ན་རེ་གནས་འདི་ནི་ནེེ་གྲོ་རྡོ་རྗེ་ཕུག་པ་ཟེར། རྡོ་རྗེ་མཁའ་འགྲོ་བྱེ་བ་འབུམ་གྱི་བཞུགས་གནས་དང་བྱིན་གྱིས་བརླབས་པ་ཡིན་པས་མཁའ་འགྲོའི་འདུ་ར་ཁྱད་པར་ཅན་ཡིན། གཡས་ཀྱི་སྦས་གནས་འདི་པདྨ་རྫོང་ཟེར་བ་ནཻ་གྲོ་གཏེར་གྱི་ཕུག་པ་རེད་ཟེར། གཡོན་གྱི་སྦས་རྫོང་འདི་རྣམས་མཁའ་འགྲོའི་བྲོ་ར་དང་། རོའི་སྒྲུབ་ཕུག་གཡུ་སྒྲ་འོད་སྐུར་གྲོལ་ས་རེད་ཟེར། ཕོ་བྲང་ཆེན་པོ་གྲོང་ཁྱེར་བརྒྱད་ཀྱིས་བསྐོར་བ་ནི་ནེེ་གྲོ་བྲག་མོ་ཆེའི་སྦས་ཡུལ་ཡིན། ད་དུང་བསྒྲོད་པའི་དུས་མིན་པས་ཕྱི་ནང་གི་བཀོད་པ་མ་ མངོན་ཟེར། ཡང་རྗེའི་ཞལ་ནས་ཡུལ་འདིའི་ཕྱི་རིམ་གྱི་ཕྱོགས་བཞིའི་ཞིང་སྣང་འདི་རྣམས་ཅི་རེད་གསུངས། ཁོང་རྣམས་ན་རེ་སྒོ་སྲུང་རྣམས་ལ་དྲི་དང་ཟེར། རྗེས་སྒོ་སྲུང་གང་དུ་ཡོད་གསུངས་པས། ཌཱཀྐིས་ན་རེ་ཕོ་བྲང་འདིའི་ཕྱི་རོལ་ན་ཤར་དུ་དཀར་མོ་སྟག་གདོང་མ་ལ་སྨན་མོ་འབུམ་གྱི་ཚོགས་དང་བཅས་པ་ཡོད། ལྷོ་རུ་གཟིག་གདོང་མ་ལ་བཙན་དང་ཐེའུ་རང་མང་པོའི་ཚོགས་དང་བཅས་པ་ཡོད། ནུབ་ཏུ་དོམ་མགོ་མ་ལ་ཀླུ་གཉན་ས་བདག་གི་ཚོགས་དང་བཅས་པ་ཡོད། བྱང་དུ་སེང་གདོང་དམར་མོ་ཅེ་སྤྱང་སྟག་གཟིག་ལ་སོགས་པའི་ཚོགས་ཡོད་ཟེར། རྗེའི་ཞལ་ནས་དེ་དག་རྣམས་ཅིའི་ཕྱིར་ཡིན་གསུངས། ཌཱཀྐི་ན་རེ་དེ་དག་ནི་ལེགས་ཉེས་ཀྱི་སྟངས་འཛིན་ཅིང་དམ་ཚིག་གི་རྗེས་གཅོད་བྱེད་མཁན་ཡིན་པས། གནས་འདིར་འདུག་ནས་རིམ་གཉིས་ཀྱི་ལམ་བསྒོམ་པ་དང་། དཀར་པོ་དགེ་བའི་ལས་ཅི་བསགས་ན་ངེད་རྣམས་ཀྱིས་བྱིན་གྱིས་བརླབས་ནས་དངོས་གྲུབ་སྟེར་བ་དང་། མི་དགེ་བའི་ལས་དམ་པའི་ཆོས་དང་འགལ་བ་བྱེད་ཚེ། ཁོང་རྣམས་ཀྱིས་མི་འདོད་པའི་རྐྱེན་སྣ་ཚོགས་སྟོན་པ་ཡིན་ཟེར་ནས། ད་ཁྱོད་ངེད་ཅག་གི་ཕོ་བྲང་ནང་དུ་བྱོན་ཟེར་ཞིང་། རྗེ་དེ་ཉིད་མཁའ་འགྲོ་གཉིས་དང་བཅས་བྱོན་པར་བྱེད་ཚེ་ཐུན་རྔ་བརྡུང་བ་ལ་རྐྱེན་ ༈ ནས་ཉམས་ལས་སད་དོ། །དེ་ནས་རྗེ་དེ་ཉིད་ཀྱི་ཐུགས་ལ་འདི་ཅི་ཡིན། གནས་འདི་ག་ཨེ་ཡིན། ཡུལ་གཞན་ཞིག་ཡིན་ནམ་དགོངས་ཚེ། མཁའ་འགྲོ་རྡོ་རྗེ་ཕྲེང་བ་མ་ཡིན་སྐད་པས་འདི་སྐད་ཟེར། ཧེཿ ཡཿ ཀ་དག་སྟོང་ཆེན་ནམ་མཁའི་ཀློང་མཛོད་ངང་། །སྣང་སྲིད་སྣོད་བཅུད་ལོངས་སྤྱོད་རྒྱན་དུ་ཆེ། །སེམས་ཉིད་མི་གྱུར་བདེ་བ་ཆེན་པོའི་ཀློང་། །སེམས་བྱུང་ཆོས་ཁམས་སྤྲིན་ཚོགས་རྒྱན་དུ་ཤར། །འོད་གསལ་རིག་པ་སྟོང་ཉིད་གསུམ་དང་ལྡན། །སྐུ་དང་ཡེ་ཤེས་ཡོན་ཏན་རྒྱན་དུ་ཤར། །ཐམས་ཅད་དག་མཉམ་རོལ་པའི་དཀྱིལ་འཁོར་ལ། །འཁོར་འདས་ཆོས་ཀུན་རྟེན་འབྲེལ་ཚུལ་ཤེས་མཛོད། །ཡུལ་སྣང་རང་རྒྱུད་འཛིན་ན་སྲིད་པའི་རྒྱུ། །གཉིས་མེད་ཆོས་སྐུ་ཆེན་པོར་རྒྱས་ཐོབ་ལ། །གནས་འདིའི་ཡོན་ཏན་སྐལ་ལྡན་རྣམས་ལ་སྨྲོས། །ཡང་ཅིག་གསོན་དང་པདྨ་ལས་འབྲེལ་རྩལ། །བཻ་རོ་གཡུ་སྒྲགཉིས་ཀྱི་སྨོན་ལམ་མཐུ། །དུས་འདིར་སད་པ་སྐལ་བཟང་ལས་འཕྲོ་ལྡན། །འོན་ཀྱང་དམར་པོ་ལྷ་ལ་ལས་བཅོལ་ནས། །ཤེས་རབ་ཕོ་ཉ་དབང་གི་ལྕགས་ཀྱུས་དྲོངས། །རྒྱ་མཚོའི་དཔལ་དུ་ནོར་བུའི་འོད་ཟེར་གཡོ། །ལྕགས་སྦྲུལ་ནག་པོ་འབྲུག་གི་ལྟོ་རུ་སྙན། །དེའི་མཐུས་གཏེར་གཉིས་ བསྟན་པ་ཉི་བཞིན་གསལ། །ཅེས་ཟེར་ནས་མི་སྣང་བར་གྱུར། དེ་ནས་རྗེ་དེ་ཉིད་སྐུ་མཚམས་གྲོལ་ནས་རིམ་བཞིན་བུ་སློབ་རྣམས་ལ་ཟབ་གཏེར་གཉིས་ཀྱི་ཆོས་སྒོ་གསར་ཕབ་མཛད་པ་དང་། ། དབང་ཁྲིད་སོགས་ཅི་དགོས་ཀྱི་གདམས་པ་རྣམས་གནང་། །ཁྱད་པར་ཀུན་མཁྱེན་གཉིས་པའི་གསུང་འོག་མིན་བགྲོད་པའི་ཐེམ་སྐས་གསུངས་སྐབས་གློང་བུར་དུ་ཐུགས་སྣང་འགྱུར་ནས་འབྱུང་བཞི་རིམ་བཞིན་ཐིམ་ནས་མཆེད་པ་ཉེར་ཐོབ་ལ་ཐིམ་འགྲོ་བར་བྱེད་སྐབས་ནམ་མཁའ་ནས་ཚིག་གི་དོན་མི་གོ་ཞིང་སྒྲ་ཞིག་གསན་པས། །དེ་མ་ཐག་ཏུ་རྗེའི་ཐུགས་ལ་སྔ་སོར་བདེ་བའི་རྡོ་རྗེས་ཞུས་པ་རྣམས་དགོངས་ནས་རིམ་བཞིན་འདི་སྣང་ལ་ཐུགས་གཏད་ནས་དེངས་བ་ལྟ་བུར་བྱུང་ཡང་བསྙུན་གཞི་མ་ངེས་པ་ཞིག་འདུག བསོ་སྤྲུལ་རིན་པོ་ཆེའི་དབུས་བུ་སློབ་ཐམས་ཅད་ཀྱིས་སྐུ་རིམ་བསྒྲུབ། ཁྱད་པར་བླ་བྲང་བཅས་པས་ཁ་འཆམ་ནས་བདེ་བའི་རྡོ་རྗེ་ལ་ཕྲིན་ཡིག་བསྐུར་ན་ཁྱེད་ལསྔར་བཞིན་ཡོད་པ་མིན་པས་དལན་རྟེན་འབྲེལ་ཙམ་དུ་ལོས་མ་དགའ་ཟེར། རྗེས་ད་དགོས་མེད་བློ་སྣ་མང་བ་ལ་དོན་མེད་གསུངས་ཀྱང་། ཐམས་ཅད་ཀྱི་རྟེན་འབྲེལ་གཞན་དབང་ལ་གཏོང་མི་ཉན་ཡང་ཡང་ཞུས་ཚེ། རྗེས་ཀྱང་མགར་ར་རྒྱལ་སྲས་ལ་རྟེན་འབྲེལ་གྱི་དགོས་ཆེད་ཙམ་དུ་ཁྱེད་ཀྱི་ཐུགས་བབ་ ༈ ཡོད་ན་དེ་ལུགས་དང་། མེད་ཚེ་སྔར་ཉིད་ནས་བདག་ལ་གནང་བ་ཡིན་ཀྱང་། འུ་ཅག་རྣམས་མི་བདེ་བའི་གཞིར་འགྲོ་བས། མཁའ་འགྲོ་བྱོན་མི་དགོས་སོགས་ཀྱི་བཀའ་གླེང་གནང་ཚེ། མགར་སྤྲུལ་ནས་སྔར་གྱི་ཚིག་ཐོག་ལོས་ཡིན་ཟེར་ནས། དགེ་བཙུན་དཔལ་ལྡན་རྒྱ་མཚོ་ཞེས་པ་ཕར་འཛོམ་སྒར་དུ་འགྲོ་གྱིན་འདུག་པས། དེ་ལ་མགར་སྤྲུལ་ནས་རྗེ་ལ་མདུན་ཡིག་ཕུལ་བས་རྟེན་འབྲེལ་གྱི་གསོས་སུ་གྱུར་ནས་རྗེའི་སྐུ་ཁམས་ཀྱང་ཡར་བདེར་སོང་བ་དང་། དེ་ནས་ཞག་ཆ་ཤས་ནས། རྒྱལ་སྲས་དཔོན་གཡོག་ཐམས་ཅད་བྱོན། རྗེས་ཀྱང་ལྷ་དང་བླམའི་ལུང་བསྟན་འབྱུང་ཚུལ་དེ་ལྟར་ཡིན་ཀྱང་། ཁྱོད་ཀྱི་ཐུགས་བབ་མེད་ཚེ་སྔར་ཞུས་པ་ལྟར་ཡིན་གསུངས། རྒྱལ་སྲས་ཀྱི་ཞལ་ནས་མོ་རང་ལ་ད་ལོ་མོ་རྩིས་ཤིན་ཏུ་འཁྲུག་འདུག་པས། ཁྱེད་གཉིས་གཅིག་གྲོགས་གཅིག་གིས་བྱས་ནས་ཕན་ཐོགས་འབྱུང་ན་བཟང་གི། ང་རང་སྔར་བཤད་ཀྱི་ཚིག་ཐོག་ཡིན་པས། མོ་རང་གི་བདག་པོ་ཁྱེད་ཡིན་འདུག་ཀྱང་། བླ་བྲང་རྣམས་ཀྱི་ཐུགས་བབ་ཡོད་པ་གལ་ཆེ་གསུངས། རྗེའི་ཞལ་ནས་ཁོང་རྣམས་ཐུགས་འདུན་བཞིན་ཡབ་ཡུམ་ཐམས་ཅད་ལྷན་དུ་བཞུགས་པ་ལ། རང་ནས་ཀྱང་ཕན་ཚུན་ཀུན་ལ་ལུགས་གཉིས་གང་ཐད་ནས་ ཚུལ་མཐུན་གཞུང་བཟང་གི་བྱ་བས་བསྐྱང་ཞིང་། ཁྱད་པར་རིག་མའི་དམ་ཚིག་ལ་བསམས་ནས་ངེད་ཅག་རྣམས་ནང་མཐུན་ཡིན་མ་གཏོགས། མཁའ་འགྲོ་ངའི་རྩར་བཞུགས་བཞག་རུང་ཚིག ངན་མེད་ངེས་ཀྱང་། ད་ང་རང་ཁ་ལོ་ནམ་ཚ་མཐོ་འགྲོ་བ་ཡིན་པས། ཐབས་ཅི་ཡོད་ཀྱི་བྱ་བ་མི་མང་སྙམ་གྱི་གསུངས། དེ་ནས་རྗེའི་ཞལ་ནས་མཁའ་འགྲོ་བདེ་ཆེན་བདེ་བའི་རྡོ་རྗེ་ལ་ཁྱོད་ཀྱི་གསུང་ཆོས་རྣམས་ངའི་སར་ཁྱེར་ཤོག་གསུངས། བདེ་བའི་རྡོ་རྗེས་བཀའ་བཞིན་དཔེ་ཆ་རྣམས་ཁྱེར་ནས། ཁ་བྱང་སྐོར་གསང་རྒྱ་བྱས་ནས་མ་ཁྱེར་བས། རྗེའི་ཞལ་ནས་ཁྱེད་ལོ་བཅུ་གསུམ་ཡིན་དུས་ཀྱི་ཁ་བྱང་ཐོག་མ་དེ་གར་ཡོད་ན་སྦས་གསང་མེད་པར་འདིར་ཁྱེར་ཤོག་གསུངས། བདེ་བའི་རྡོ་རྗེས་ཁ་བྱང་མེད་ཞུས་ན་རྫུན་དུ་འགྲོ། སྤྱན་ལམ་ལ་ཕུལ་ན་རྗེ་དེ་ཉིད་ཁ་བྱང་དུ་གསལ་པོར་ཟིན་འདུག་པས། དམན་པ་བདག་ལྟ་བུའི་ཐབས་གྲོགས་རེད་ཞུས་ན་ཅི་དགོངས་སྙམ་པ་དང་། ཁྱད་པར་མགར་ར་སྤྲུལ་སྐུའི་ནི་ང་རང་གི་གཏེར་ཆོས་འབྲི་ཕབ་བྱེད་པར་བཀའགནང་མ་ཐོབ་པས། ད་ལྟ་གཟིགས་སོང་ན་བཀའ་བཀྱོན་ཕྱག་འབེབས་ཨེ་གནང་སྙམ་ནས་ཅི་ཡང་མ་ཞུས་པར་འདུག་ཀྱང་། རྗེས་ཡང་བཀའ་གསུངས་ཕེབས་པས་མོ་རང་གི་ཁ་བྱང་ཐམས་ཅད་རྗེའི་ཕྱག་ཏུ་ ༈ ཕུལ་བས། གཏེར་སྟོན་ངེས་པ་རེད་ཁ་བྱང་ངོ་མཚར་ཅན་གསུངས། མགར་སྤྲུལ་གྱི་ཞལ་ནས་འུ་ཅག་རྣམས་ལའང་ང་རང་དང་འཚམས་པའི་ཁ་བྱང་དང་ཡང་བྱང་སོགས་ཡོད་འདུག་པས་ངོ་མཚར་རྒྱ་ཅང་ཨེ་ཡོད་གསུངས། རྗེའི་ཞལ་ནས་འུ་ཅག་དང་པོ་རང་ཡུལ་ལ་བསྡད་ནས་ཐབས་གྲོགས་ཆོས་བདག་ཐམས་ཅད་རག་རི་རེམ་མ་གཏོགས་རང་ས་ནས་རྙེད། མཁའ་འགྲོའི་ཕ་ཡུལ་དབུས་ཕྱོགས་ས་ཐག་རིང་བ་དང་། ཆོས་བདག་དང་ཐབས་གྲོགས་ཐམས་ཅད་འུ་ཅག་གི་ཡུལ་ལ་འདི་ལྟར་གསལ་པོར་ཡོད་པ་ངོ་མཚར་གྱི་གསུངས། དེ་སྐབས་སུ་ལུང་བསྟན་ནང་དུ་བྱ་ཆོས་བྱིའུ་ཆོས་ཟེར་བ་མཁའ་འགྲོའི་བརྡ་བྱང་ཞིག་འདུག་པ་རྗེའི་གཟིགས་ནས་འདི་ལ་བྱ་ཆོས་ཅིའི་ཕྱིར་བཏགས་པ་ཡིན་གསུངས་པས། བདེ་བའི་རྡོ་རྗེས་ལགས་བྱ་ཆོས་ཟེར་བ་དཔེ་ལ་བརྟེན་ནས་གཞན་གྱིས་བཏགས་པ་ཡིན་པས། ང་རང་གིས་ཀྱང་དེའི་རྗེས་མཐུན་དུ་རྒྱབ་ཡིག་ལ་དེ་བཞིན་བྲིས་པ་ཡིན་ཞུས་པས། རྗེས་ཁྱེད་ཞིང་དུ་ཡིབ་འགྲོ་བའི་བརྡ་བསྒྱུར་རེད་གསུངས། ཡབ་ཡུམ་གཉིས་ཀས་གཅིག་གྲོགས་གཅིག་གིས་བྱས་ཏེ། སྐུ་ཚེ་བར་ཆད་སེལ་ཐས་ཀྱིས་ཞུས་ལན་མང་པོ་ཡོད་ཀྱང་གཏེར་གཞུང་དུ་གསལ་བས་ཡི་གེར་འཇིགས་ནས་མ་བྲིས། དེ་ནས་རྗེས་མཁའ་འགྲོའི་དཀྱིལ་འཁོར་ལ་བརྟེན་ནས་བདེ་བའི་རྡོ་རྗེ་ལ་སྨིན་གྲོལ་ཞིབ་རྒྱས་སུ་གསུངས་ནས། མེ་ཏོག་དབུས་སུ་བབས་པས་མིང་ཀུན་བཟང་བདེ་སྐྱོང་ཆོས་ཉིད་དབང་མོའི་ཅོད་པན་གནང་། དེ་ནས་བདེ་བའི་རྡོ་རྗེས་རྗེ་ལ་རངགཏེར་གྱི་མཚོ་རྒྱལ་གྱི་ཆོས་སྐོར་རྣམས་ཀྱི་ལུང་ཕུལ། རྗེས་དབང་བསྐུར་དགོས་གསུངས་ཀྱང་། བདེ་བའི་རྡོ་རྗེས་ས་གཏེར་ཕག་མོའི་ཆོས་སྐོར་ཕབ་ནས། རྗེ་ལ་ཐོག་མར་དབང་ལུང་འབུལ་དགོས་པ་འདྲ་ན་དེ་ཆོག་གི་སྙམ་ནས། འདིའི་དབང་གཅིག་བརྒྱུད་ཡིན་པས་རྗེས་སོར་དུ་འབུལ་འོང་ཞུས། དེ་ནས་བདེ་བའི་རྡོ་རྗེས་གཏེར་ཆོས་རྣམས་ཀྱི་བརྡ་དང་གཏེར་ཚག་ཐམས་ཅད་མེད་པར་བརྩམས་ཆོས་ལྟ་བུར་བྱས་ཡོདཔས། རྗེས་འདི་ལྟར་མཛད་པར་བརྡ་ཡིག་སོགས་ཐམས་ཅད་གཏེར་གཞུང་དུ་ཇི་ལྟར་ཡོད་པ་བཞིན་མ་གཏོག་བཅས་བཅོས་མ་མཛད། ཁྱད་པར་ས་གཏེར་གྱི་ཆོས་སྐོར་འབེབས་ཐབས་མ་འཆུགས་གསུངས་པས། དེ་བའི་རྡོ་རྗེས་ང་རང་སྤྲང་མོ་ཡིན་པས། རྗེ་མི་ལ་རས་པའི་གསུངས་བཞིན་འོང་བར་མ་གཏོགས། ས་གཏེར་དུ་མར་དབང་ཡང་གྲོགས་མ་ལྡན་ནས་ས་གཏེར་གསུམ་ཙམ་ལས་མ་ལོན། དེ་ཕབ་རྒྱུ་འགྲིགས་འོང་གི། དེ་འུ་ཅག་ཡབ་ཡུམ་གུ་རུའི་སྨོན་ལམ་གྱི་སྟོབས་སད་ནས་ ༈ འཕྲད་པ་ཡིན་ཀྱང་། ང་རང་གཞན་དབང་ལ་ཤོར་བས་ཁྱོད་ཀྱི་སྐུ་མདུན་ལ་འོངསྟབས་མི་ལྡན་ཡང་སྔར་ཞུས་པ་ལྟར། སྤྱིར་སངས་རྒྱས་ཀྱི་བསྟན་པ་དང་། སྒོས་བླ་མ་གཏེར་སྟོན་གྱི་ཐུགས་དགོངས་རྫོགས་ཐབས་ཟབ་གཏེར་བྲི་སྤེལ་ལ་སོགས་པ་དང་། ཡང་སྒོས་ང་རང་ཐུགས་ནས་མི་འདོར་བར་སྐུ་ཚེ་ཞབས་པད་བརྟན་ཐབས་མ་འཆུག་སྐུ་མཁྱེན་ཞུས་ནས་ཞབས་སྤྱི་བོར་བླང་སྟེ་གསོལ་འདེབས་སྨོན་ལམ་བཏབ་ཅིང་རྒྱལ་སྲས་དཔོན་གཡོག་མཁའ་འགྲོ་བཅས་ཕར་བྱོན་གྲབ་བྱས། རྗེ་དེ་ཉིད་ཀྱིས་ཀྱང་རྩ་བའི་རིག་མ་ལྟ་བུར་ཐུགས་བརྩེ་བརྩེ་མཛད་དེ། མཁའ་འགྲོ་ལ་སྲས་ཞིག་ཡོད་པས་དེ་ལ་སྲུང་སྐྱོབ་ཀྱི་འཁོར་ལོ་སོགས་གནང་ཞིང་ལུང་གཉིས་ཀྱི་བྱ་བས་དེར་འདུས་བུ་སློབ་ཀུན་གྱི་ཡིད་སྤྲོ་བར་བྱས་ནས་རྒྱལ་སྲས་དཔོན་གཡོག་ཐམས་ཅད་ཕར་ཕེབས་སོ། །དེ་ནས་རྗེ་དེ་ཉིད་ཀྱིས་གུ་རུའི་སྐུ་འདྲ་འབུམ་ཐེར་ཕྱག་བཏབ་མཛད་པ་སོགས་རིམ་གྲོ་ཐམས་ཅད་བསྒྲུབས་ནས་སྐུ་གེགས་ལས་གྲོལ་ཏེ། བུ་སློབ་ཆོས་བདག་རྣམས་ལ་ཡབ་རྗེ་བླ་མའི་ཟབ་གཏེར་གྱི་དབང་ཁྲིད་གསུངས་པ་དང་། ཁྱདཔར་རང་གཏེར་གྱི་ཆོས་སྐོར་ཁམས་ཀྱི་སེང་གེ་གནམ་འཕྱོང་ནས་སྤྱན་དྲངས་བའི་ཟབ་ཆོས་གསང་བ་སྙིང་ཁྲག་གི་ཆོས་སྐོར་གུ་རུའི་སྒྲུབ་ ཐབས། ཡབ་རྗེ་བླ་མའི་ཟབ་གཏེར་ཡང་གཏེར་གྱི་ཚུལ་དུ་ཤོག་སེར་ངོས་སུ་གནང་བ་ལས་ཞལ་བཤུས་པ་ཟབ་གསང་མཁའ་འགྲོའི་སྙིང་ཐིག་གི་ཆོས་སྐོར་བཀའ་བརྒྱད་གསང་བ་འདུས་པ་དང་། རྣམ་འཇོམས་ཀྱི་སྒྲུབ་སྐོར། རྔ་ལ་སྟག་རྩེ་ནས་སྤྱན་དྲངས་པའི་ཟབ་ཆོས་གསང་བ་སྙིང་པོའི་ཆོས་སྐོར་ཕུར་པ་ཀུན་བཟང་འཇའ་ཐིག མཆིམས་ཕུ་རི་མོ་ཅན་ནས་སྤྱན་དྲངས་པའི་ཆོས་སྐོར་ལས་ཟབ་ཆོས་པདྨའི་ཐུགས་ཐིག་གི་དབང་གི་རྡོ་རྗེའི་སྒྲུབ་ཐབས་ལ་སོགས་པ་གསར་ཕབ་མཛད་ནས་ཆོས་ཀྱི་བདག་པོ་རྣམས་ལ་གཏད། དེ་སྐབས་རྗེའི་དངོས་སློབ་ཐུགས་ཀྱི་བུ་ཆེན་བསོ་སྤྲུལ་སྣ་ཚོགས་རང་གྲོལ་དང་། པདྨ་བདེ་གསལ། གསང་སྔགས་རྡོ་རྗེ། ཚུལ་ཁྲིམས་བཟང་པོ། ཡབ་རྗེ་བླ་མའི་དངོས་སློབས་སེམས་ཉིད་རྡོ་རྗེ། ཨ་སྐྱབས་བླ་མ་ཀརྨ་དོན་གྲུབ། རྗེའི་ཉེ་གནས་བསོད་ནམས་དབང་ཕྱུག ཡི་གེའི་རིས་བྱེད་ཚུལ་ཁྲིམས་རྡོ་རྗེ། དཔལ་ལྡན་བློ་གྲོས། ཤེས་རབ་རྒྱ་མཚོ་ལ་སོགས་པའི་བུ་སློབ་འདུས་སྡེ་རྣམས་ལ། ཀུན་མཁྱེན་གཉིས་པའི་གསུང་དང་། རང་གཏེར་ཟབ་ཆོས་གསར་བབ་རྣམས་ཀྱི་དབང་ལུང་ཁྲིད་སོགས་གསུངས་སྐབས་དབྱིངས་ཀྱི་མཁའ་འགྲོ་འཁྲུག་ནས་རྗེ་ལ་གློ་བུར་དུ་བསྙུན་གཞི་ཞིག་བྱུང་བས། རྗེས་ཅི་ཡིན་ ༈ དགོངས་ཚེ་རྡོ་རྗེའི་མཆེད་གྲོགས་གཉིས་སེམས་འཁོན་བྱས་འདུག་པས་ལེན་པར་མཁྱེན་ཀྱང་། མ་མཁྱེན་པའི་ཚུལ་གྱིས་ཅི་ཡང་མ་གསུངས་ནས་དབང་ཁྲིད་རྣམས་ཞིབ་རྒྱས་སུ་གསུངས་པས། རྗེའི་སྐུ་ཁམས་ཇེ་འཁྲུགས་དང་། གཞན་ཡང་མི་འདོད་པ་སྣ་ཚོགས་འབྱུང་ཉེ་བར་མཁྱེན་ནས་དབང་གྲལ་གྱི་བུ་སློབ་རྣམས་ལ་བཀའ་བཀྱོན་ཕྱག་བསྡིགས་སོགས་ཐུགས་དྲག་པོའི་སྤྱོད་པ་དུ་མ་མཛད་མཐར། མཁའ་འགྲོའི་འཁྲུགས་པ་རང་ཞི་བ་དང་། རྡོ་རྗེའི་མཆེད་པོ་གཉིས་ཀྱི་སེམས་འཁོན་རང་འགྲིགས་ལ་སོང་ནས།རྗེས་རིམ་ཚོགས་མཆོད་གཏང་རག་སོགས་མཐའ་རྒྱས་སུ་བྱས། དེ་ནས་ཡང་བར་སྐབས་ཞིག་ལ་རྐྱེན་ཅུང་ཟད་ཞིག་གིས་བསྐུལ་ནས་ལྷ་སྡེ་རྣམས་དང་། བླ་བྲང་གཞུང་གཉིས་ནོག་འཁོན་ཅུང་ཟད་འོང་ནས། སྔར་གྱི་ས་མཚམས་ཡོད་པ་རྣམས་གྲོས་མ་འཆམ་ཞིང་། བླ་བྲང་སྒར་གཞི་གནས་སྐབས་ཡུལ་གཞན་ཞིག་ཏུ་བྱོན་སྙམ་ཡོད་ཚེ། རྗེའི་ཐུགས་དགོངས་ལ་ད་སྐབས་སྐུ་མཆེད་གཉིས་ལུགས་གཉིས་གང་འཐད་ནས་ཐུགས་ནང་མཐུན་པས་གནས་སྐབས་སུ་ཅི་བདེར་བྱེད། དེ་མི་ནང་རང་གིས་ཕོ་ལོ་བཅོ་ལྔ་ནས་སོ་ལྔའི་བར་དུ་གཏེར་སྟོན་བླ་བྲང་གི་ཞབས་ཞུ་ལུགས་གཉིས་གང་ཐད་ནས་ཡབ་རྗེ་བླ་མའི་ སྐུ་ཚབ་འོང་ངེས་པ་བྱས། ད་ནི་འཇིག་རྟེན་ཆོས་བརྒྱད་ཀྱིས་དགོས་མེད་སྙམ་ནས་གཅིག་པུར་དབེན་རིར་བསྡད་ཡོད་ཀྱང་། མ་བྱོན་ན་སྤྲུལ་སྐུའི་ཐུགས་ལ་གནོད་འགྲོ་དགོངས་ནས་བྱོན་གསུངས་ཏེ། དེ་ནས་རྗེ་དེ་ཉིད་དང་། སྤྲུལ་སྐུ་རྡོ་དགྲ། བླ་མ་ཚེ་བསོད། ཉེ་གནས་བསོད་ནམས་དབང་ཕྱུག་སོགས་དཔོན་གཡོག་ཐམས་ཅད་གློ་བུར་དུ་བྱོན། སྒོ་པའི་ཆོས་རྒྱལ། ཤཱི་ལ་བཛྲ། འོད་འབར་སོགས་རི་ཁྲོད་པ་རྣམས་ཀྱི་རྗེས་ནས་གཟིམ་གི་སྦྲ་དང་། ལྷ་གུར་སྐུ་གསུང་ཐུགས་རྟེན། རྣམ་ཐར་གྱི་སྤར་ཤིང་སོགས་དང་། བཅའ་ཀ་ཡོ་བྱད་ཐམས་ཅད་ཚགས་སུ་བཙུད་ནས་རིམ་བཞིན་དུ་སྒར་བཀྱག་སྟེ། བྱ་སྟོད་ཀྱི་སྣ་རིང་མ་ཞེས་པའི་གནས་སུ་བྱོན་ཞིང་དེ་ཀར་ཆོས་སྒར་བཏབ་ནས་བཞུགས། དེ་སྐབས་རྗེའི་དངོས་སློབ་ཆོས་ཀྱི་བདག་པོ་བསྟན་འཛིན་དར་རྒྱས་དང་། བློ་བཟང་དར་རྒྱས་དཔོན་གཡོག་བྱོན་ནས། རྗེའི་བཞུགས་གནས་སོག་གུར་རྡོ་ཚད་གསུམ་དང་། གཞན་ཡང་རྒྱུ་རྫས་རིན་ཐང་ཆེ་བའི་དངོས་པོ་དུ་མ་ཕུལ་ནས་མཉེས་པ་གསུམ་གྱི་ཞབས་ཏོག་བསྒྲུབས། རྗེས་ཀྱང་དམ་ལྡན་གྱི་སློབ་མར་དགོངས་ནས་ཐུགས་ཀྱི་སྲས་སུ་བཟུང་ཞིང་གདམས་ཁྲིད་གང་དགོས་གནང་བ་སོགས་མཛད་དོ། །བླ་མ་རིན་པོ་ཆེའི་ལུང་བསྟན་བཞིན་མགོན་ཁང་ ༈ སྤར་བ་དང་། བཀའ་སྲུང་རྣམས་ཀྱི་རྟེན་མཁར་འཛུགས་པ་སོགས་ཀྱི་བྱ་བ་ཐམས་ཅད་ཞིབ་རྒྱས་སུ་མཛད། དེ་ནས་རྗེ་དེ་ཉིད་ཀྱི་གྲྭ་ཚང་དུ་གཏོགས་པ་སྟག་ཐོག་སང་གི་བླ་སེར་ཐམས་ཅད་དང་། གཞན་ཡང་དགེ་རྩེ་སོགས་ཀྱི་བླ་སེར་འདུས་ནས། ཡབ་རྗེ་བླ་མའི་ཟབ་གཏེར་ཕུར་པ་བདེ་གཤེགས་སྙིང་པོའི་ཟླ་སྒྲུབ་ལ་རྗེ་དེ་ཉིད་བཞུགས་སྐབས་དག་པའི་གཟིགས་སྣང་དུ་མ་འབྱུང་བ་གཏེར་གཞུང་དུ་གསལ། སྒྲུབ་པ་ཆེན་པོར་ཐོན་སྐབས་མཁའ་འགྲོ་བདེ་བའི་གོ་ཆ་ཡིན་སྐད་པས་འདི་སྐད་ཟེར། ཨེ་ཨཿ དབྱིངས་མི་འགྱུར་ཆོས་སྐུའི་མཁའ་ཀློང་ནས། །མདངས་མ་འགགས་བརྡ་ཡི་རིས་མོ་ངོམས། །རང་སྐལ་གྱི་འབྲུག་གི་གཙུག་ནོར་འདི། །ངམ་ནག་གི་ཞགས་པའི་འཕྲུལ་ལ་འཛེམ། །དོམ་ནག་ལ་ཞོན་པའི་སྐྱེས་བུ་འདི། སྒྲ་བརྒྱ་ཡི་གཟོན་ལ་མ་འཆོར་དགོས། །གནག་སྣུམ་གྱིས་བརྒྱན་པའི་རྨ་བྱ་ཡིས། །དུག་འཇོམས་ཀྱི་ནུས་པ་མ་ཞན་ན། །དོན་གཉིས་ཀྱི་ནོར་བུ་རིམ་གྱིས་ལོན། །ཕ་བླ་མས་བཞག་པའི་ནོར་གྱི་སྐལ། །འཛིན་སྐྱོང་དང་སྤེལ་སྡོམ་ཁྱོད་ལ་རག །དུས་འཁྱུད་འཁོར་གཅིག་ལས་མ་འགྱང་བར། །ཟབ་ཆོས་རྣམས་གཏེར་ཞབས་སྡོམ་པར་གཅེས། །གནས་བདེ་བདེ་མཁའ་འགྲོའི་ གྲོང་ཁྱེར་ན། །ཞིང་ཡོན་ཏན་བཀོད་པ་ཕུན་སུམ་ཚོགས། །གྲོགས་དཔའ་བོ་མཁའ་འགྲོ་དམ་ཚིག་ལྡན། །ཆོས་ཟབ་པའི་འགྲོ་དོན་ཞིང་དུ་ལྷགས། །ཁྱོད་དེ་རུ་ངེད་ཅག་བསུ་བར་འོང་། ། འཇིག་རྟེན་གྱི་མི་རྣམས་བདུད་ཀྱིས་བསླུས། །མི་དགེ་ཡི་ཆོས་ལ་ཅི་བཞིན་མཐོང་། །མཚན་ལྡན་གྱི་ཆོས་དང་བླ་མ་ལ། །ལོག་ལྟ་དང་འབྲས་བུ་གཞན་ཚོལ་བྱེད། །དམ་ཚིག་དང་སྡོམ་པ་སྣ་གཅིག་མེད། །སྤྱོད་པ་ནི་ཁྱི་ཕག་ལྟ་བུ་བྱེད། །ལར་དེ་སོགས་སྙིགས་མའི་རང་མཚང་ལ། །ངོ་དམ་ཚིག་ཌཱཀྐི་སུན་མ་འབྱུང་། །དེ་ཕྱིར་ན་འགྲོ་དོན་ཞིང་དུ་ཡོད། །ཤར་རྟ་བདུན་གྱི་ངག་ལ་མ་ཉན་པར། །ལྷོ་ཆོས་བཅུད་ཀྱི་སྲོག་ཤིང་གཟབ་གལ་ཆེ། །གནས་མི་རིང་རང་གནས་ཉེ་ཆ་ནས། ཁོང་ཁྭ་ཏ་རོག་པོས་གཏམ་ངན་སྨྲ། །ཁུ་བྱུག་གི་སྒྱུ་རྩལ་ངོམ་པའི་དུས། །ནུབ་སྲིན་བྱའི་བརྫུ་བག་སྟག་གིས་བསུས། །བྲག་སྤྲེའུའི་ཆོ་འཕྲུལ་ཡོ་ལང་གིས། །ནམ་མཁའ་ཡི་ནོར་བུ་འོད་ཆེན་འདི། །གནས་དཔལ་རིར་བཞུད་ལ་ཅི་ཆ་ཡོད། །ཅེས་ཟེར་ནས་མི་སྣང་བར་གྱུར། གཞན་ཡང་དེའི་རིགས་ཀྱི་བླ་མ་རིན་པོ་ཆེའི་ཞལ་གཟིགས་ལུང་བསྟན་དུ་མ་ཡང་འབྱུང་བས། རྗེའི་ཐུགས་ལ་ཇི་ལྟར་བྱས་ཀྱང་གནས་དུས་ཀྱི་དབང་གིས་ང་རང་ཞེ་གཅིག་ཕན་ལ་མི་ ༈ འདུག་ངེས་པ་རེད་དགོངས་ནས། དེ་ལྟར་གྱི་བྱ་བ་རྣམས་ཐུགས་ལ་བཞེས་ཤིང་ཡབ་རྗེ་བླ་མའི་ཟབ་གཏེར་གྱི་མཇུག་རྣམས་རྫོགས་དགོས་དགོངས་པས། དེ་ནུབ་མནལ་ལམ་ལ་དགའ་རབ་རྡོ་རྗེ་པཎྜི་ཏའི་ཆ་བྱད་ཅན་ཞིག་དང་མཇལ་བས། རྗེས་དངོས་བྱོར་ཡིད་སྤྲུལ་གྱི་མཎྜལ་དུ་ཕུལ་ནས་ཕྱག་འཚལ་བཅས་སྨོན་ལམ་གསུངས་པས། དགའ་རབ་རྡོ་རྗེའི་ཞལ་ནས་རིགས་ཀྱི་བུ་ཁྱེད་ང་ཡི་སྤྲུལ་པ་ཡིན་པས། ངས་ཁྱོད་ལ་རྒྱ་ཆོས་བོད་དུ་མ་གྲགས་པའི་མན་ངག་ཁྱད་པར་ཅན་རྣམས་ཀྱི་བརྡ་དབང་