Tibetan
དེ་དང་ཁྱེད་རྣམ་པ་གཉིས་འཛོམས་ན་ཁྱེད་བླ་མ་ཡབ་སྲས་ཀྱི་བསྟན་པ་འདི་ད་དུང་དར་རྒྱས་ཞིག་འོང་ངེས་པ་རེད་ཟེར། རྗེའི་ཞལ་ནས་དུས་ཚོད་ནམ་འོང་གི་གསུངས། ཁོང་ན་རེ་སྟོན་སྨད་འདི་ཀར་འོང་ངེས་པ་རེད་ཟེར། རྗེའི་ཐུགས་ལ་སྔར་མཁའ་འགྲོའི་ལུང་བསྟན་དང་འདྲ་མཚུངས་གི་ཏ། དུས་དབང་ངན་པའི་རྐྱེན་དེས་ཅི་འགྱུར་ཆ་མི་ཆོད་ ༈ དགོངས། དེ་ནས་ཟླ་ཞག་འགའ་སོང་ཚེ་རྗེས་ཀློང་ཆེན་ལ་ཁྱོད་ཀྱིས་རྨི་ལམ་གྱིས་རིག་ངོ་མ་རེད། ད་སྟོན་གྱི་མི་ཚད་མདུན་ཐོན་རན་འབྱུང་བས། ཁྱོད་ཀྱིས་མཚོ་རྒྱལ་སྤྲུལ་པ་བྱོན་འོང་གི་ཟེར་བ་དེ་ཙམ་རེད་གསུངས་ནས་རྩེ་མཚར་མོར་གསུངས། ཁོང་ན་རེ་སྔ་ཕྱི་རེ་ཡོདཐང་མ་གཏོགས་བྱོན་ངེས་པ་ལྷ་དཔང་ཡིན་ན་ཟེར། དེ་ནས་ཉིན་གཅིག་རྗེ་བསྐྱོད་ལམ་ལ་བྱོན་ནས་གཟིགས་ཚེ་རྗེའི་བཞུགས་གནས་ཀྱི་མདུན་ངོས་སུ་གུར་ཞིག་གི་ནང་ན་རིག་མ་མྱོང་བའི་སྔགས་པ་ཞྭ་ནག་གོས་བེར་གྱོན་པ་ཞིག་གིས་གྱིང་སྟབས་ཀྱི་ལག་གཉིས་མེ་ལོང་དང་མདའ་དར་འཛིན་པ་ཞིག་འདུག་པས། རྗེའི་ཐུགས་ལ་ཚེ་རིང་མའི་ཆོ་འཕྲུལ་འདྲ། མཁའ་འགྲོ་སྔགས་པའི་ཆ་བྱད་ཅན་ཞིག་གི་ཅི་ལ་ཡོད་དགོངས། ད་ལྟ་ཐུན་གྲོལ་རྗེས་བདེ་བའི་རྡོ་རྗེ་ཡིན་འདུག་པས་ངོ་མཚར་ཆེ་འདུག་དགོངས། དེ་ནས་དབུས་མོ་བདེ་བའི་རྡོ་རྗེའི་དྲུང་དུ་འོང་ནས་ང་རང་ལ་མཁའ་འགྲོའི་ལུང་བསྟན་བྱུང་ནས་ཁྱོད་ཀྱི་སྐུ་མདུན་དུ་འོང་བ་ཡིན་པས། ད་དུང་བསྟན་པ་དང་སེམས་ཅན་གྱི་དོན་དུ་སྐུ་ཚེ་ཞབས་པད་བརྟན་དགོས་པའི་གསོལ་བ་ཡང་ཡང་བཏབ་པས། རྗེའི་ཞལ་ནས་ང་རང་འཆི་བ་ལ་རང་དབང་ཐོབ་པའི་གང་ཟག་མིན་པས་ནམ་འཆི་ངེས་པ་མེད་གསུངས། ཡང་ བདེ་བའི་རྡོ་རྗེས་མཁའ་འགྲོའི་ལུང་བསྟན་རྗེའི་ཕྱག་ཏུ་ཕུལ་ནས་ལགས་ང་རང་གི་རྫུན་དང་གཡོ་གཏམ་མིན་པའི་བདེན་རྟགས་འདི་རེད་ཞུས་པས། རྗེས་གཟིགས་ནས་དགེ་སློང་འདུལ་བ་འཛིན་པའི་ཆས་སུ་བཞུགས་མ་ཉན་པ་འདྲ་དགོངས་ནས་ཞལ་ཅུང་འཛུམ་ཞིག་མཛད། དེ་མིན་ཅི་ཡང་མ་གསུངས། ཡང་བདེ་བའི་རྡོ་རྗེས་མཁའ་འགྲོ་ལུང་བསྟན་གྱི་དོན་ཁྱོད་ཀྱི་ཐུགས་སུ་མཁྱེན་བཞིན་རང་གིས་ཞུ་མི་དགོས་ཀྱང་། བདག་རང་ནི་གཞན་དབང་དུ་སོང་བ་དང་གཅིག །རྗེའི་གཟུངས་མ་སོགས་ཀྱི་ཐུགས་བབ་ཡོད་མེད་དང་། ང་རང་ཁ་ཉམས་ཞན་པ་ས་མཐའི་མི་ཡིན་པ་སོགས་ལ་ལུང་བཏགས་ནས་ཁྱོད་ཀྱི་སྐ་རྩར་བཅར་ཐབས་མ་ལྡན་པ་ཡིན་མ་གཏོགས། མོ་ལོ་བཅོ་ལྔའི་དུས་ནས་ཡུལ་ཁྱིམ་ཉེ་འབྲེལ་ཐམས་ཅད་བཙན་ཐབས་སུ་སྤངས་ནས་ཁྱེད་གཅིག་པུར་གསོལ་བ་བཏབ་སྟེ་དམ་པའི་ལྷ་ཆོས་ཞིག་ཨེ་འགྲུབ་སྙམ་ཡང་། ལུས་ངན་བདག་ལས་ངན་པའི་དབང་གིས་འཁོར་ཆེན་སྤངས་ནས་འཁོར་ཆུང་ལ་ཉིན་མཚན་མེད་དུ་གཡེང་འདུག་པས། ད་ནི་འདི་ཕྱི་བར་དོ་གསུམ་ལ་འབྲལ་བ་མེད་པའི་ཐུགས་གཏད་སྐྱབས་འཇུག་དང་། གདམས་ཁྲིད་རེ་གནང་བའི་བཀའ་དྲིན་མ་ཆུང་ཞུ་ཟེར་བ་དང་། གཞན་ཡང་ཆོས་དང་སེམས་ཅན་གྱི་བགྲོས་གླེང་ ༈ མང་པོ་བྱས། ཡང་རྗེའི་ཞལ་ནས་ཁྱེད་ཟབ་གཏེར་ལ་དབང་བ་ཞིག་ཡིན་པས། ངས་གདམས་ཁྲིད་བསྟན་སླ་གི། ཁྱོད་ཀྱིས་ཐོག་མར་གྱི་བླ་མ་སུ་བསྟེན། གདམས་ངག་ཅི་བསླབ། ཀློག་སློབ་པའི་སློབ་དཔོན་ཅི་འདྲ་ཡོད། གཏེར་གྱི་ཁ་བྱང་ཕྱག་ཏུ་ནམ་ལོན། གཏེར་གྲོགས་དང་ཆོས་བདག་གང་ལྟར་ཡོད་ལེགས་པར་སྦ་གསང་མེད་པར་སྨྲོས་གསུངས། བདེ་བའི་རྡོ་རྗེས་ང་རང་ཆུང་ནས་ཆོས་ལ་མོས་ཀྱང་ཕ་མའི་བཀས་མ་གནང་ནས་གནས་ལམ་བསྟན། དེ་ནས་ལོ་ངོ་བཅུ་གཉིས་ལོན་དུས་རྨི་ལམ་ལ་གྲུབ་ཆེན་ས་ར་ཧ་པ་ཡིན་སྐད་པའི་རྣལ་འབྱོར་པ་ཞིག་གིས་ལུས་མེད་མཁའ་འགྲོའི་ཆོས་སྐོར་རེད་ཟེར་ནས་རྩ་རླུང་གི་འཕྲུལ་འཁོར་ལ་བསླབ་པ་དང་། གཞན་ཡང་འོག་སྒོ་བདེ་བ་ཆེན་པོའི་མན་ངག་ཐམས་ཅད་དེ་ལས་བརྒྱུད། ལོ་བཅུ་གསུམ་དུས་མཁའ་འགྲོས་ལུང་བྱང་འོང་ནས་གྲོགས་གཏེར་གནས་ཆོས་བདག་ཐམས་ཅད་འདི་ཕྱོགས་སུ་ཡོད་པར་ལུང་དུ་བསྟན་ཀྱང་ཡི་གེ་མ་ཤེས་པའི་རྐྱེན་གྱིས་རེ་ཞིག་བཏང་སྙོམས་ལ་ལུས་སྐབས་ཚེ་རིང་མས་གྲོགས་བྱས་ཏེ་བརྗེད་ཐོ་ཙམ་བྲིས། བཅུ་དྲུག་ལོན་དུས་གནས་ལ་འགྲོ་དགོས་ཀྱང་། བཅོ་ལྔའི་ལོར་ཁྱོད་ལ་གསོལ་བ་བཏབ་ནས་སྨད་ཕྱོགས་སུ་འོང་། བཅུ་བདུན་ ལོར་མགར་ར་གཏེར་ཆེན་གྱི་ལུང་གིས་ཟིན་ཀྱང་རྟེན་འབྲེལ་གཞན་དབང་ལ་སོང་། དེ་ནས་ལོ་ངོ་བཅོ་བརྒྱད་དུས་ཁྱོད་མཁར་འགབ་ནང་དུ་དཔོན་པོ་ཤི་སར་བྱོན་སྐབས། སྟོང་དཔོན་བཟང་མོ་དང་། ངེད་གཉིས་ཀྱིས་རྡོ་ཆུའི་རབ་ཁ་ནས་གསོལ་ཇ་དྲངས་ཤིང་དེ་ཀར་བཞུགས་པར་གསོལ་བ་བཏབ་ཀྱང་། གྲྭ་པ་དབང་བཙན་པས་བཞུགས་སུ་མ་སྟེར། དེའི་སྐབས་ཁྱོད་ཀྱིས་དངོས་རྫས་གནང་བ་དང་། ཞལ་གདམས་གསོལ་འདེབས་སོགས་མཛད་པའི་རྐྱེན་གྱིས། རྨ་རྒྱལ་ནས་ཟབ་གཏེར་སྐོར་གསུམ་གྱི་བརྡ་བྱང་དང་། མཚོ་རྒྱལ་སྒྲུབ་པའི་ཆོས་སྐོར་བཅས་རྙེད། ལོ་བཅུ་དགུའི་དུས་རྨི་ལམ་འཁྲུལ་སྣང་ཞིག་ལ་རྐྱེན་ནས་གཉིད་ལས་སད་ཚེ། ཡི་གེ་བྲི་འདོན་ལ་འབད་རྩོལ་མ་དགོས་པར་ཤེས་པ་སོགས་བྱུང་། དེ་མིན་འོད་གསལ་རྫོགས་པ་ཆེན་པོ་འབྲས་བུའི་ཆོས་མཆོག་ཕུལ་དུ་ཕྱིན་པ་ནི་གཅིག་གི་ཟུར་ནས་ཞུས་མ་ལོན་ཡང་། རྣམ་པའི་རྣམ་པ་ལམ་བྱེད་ཙམ་བསྟན་པ་མཐོང་ཡང་། ང་རང་བློ་དམན་པའི་དབང་གིས་ངལ་བ་ལ་བསམས་ནས་ཞུ་མ་ཐུབ་ཞུས་ཚེ། ཡང་རྗེའི་ཞལ་ནས་དེ་ན་ཁྱོད་ཀྱི་སྣང་བ་ལམ་བྱེད་བློར་མ་ཆུད་ན་རང་ལུགས་ཀྱི་དགོངས་ཉམས་ཅི་འདྲ་ཡིན་གསུངས། བདེ་བའི་རྡོ་རྗེས་ལགས་ང་རང་མོ་ལོ་བཅུ་དྲུག་ནས་བཟུང་ད་བར་ ༈ ལ་ཉམས་ལེན་འདི་རེད་ཟེར་རྒྱུ་ཅུང་ཟད་ཙམ་ཡང་མ་རྙེད། ཕྱིའི་ཡུལ་ལ་སྣང་བས་ཕར་མ་བཅད་གསལ་ལྷང་ངེ། ནང་བློ་ཡིས་བཅོས་སུ་མ་ཞུགས་པའི་སྟོང་སང་ངེ། བར་རྟོག་ཚོགས་ཀྱི་རྐྱེན་དབང་གིས་བསྒྱུར་དུ་མི་བཏུབ་པའི་ཟང་ཐལ་ལེ་བའི་ཤེས་པ་འདི་ལ་སེམས་ཟེར་བ་ཨེ་ཡིན། འདི་འཁོར་འདས་གཉིས་ཀྱི་གྲུབ་གཞིར་སོང་བས་མེད་པ་ཡང་མ་ཡིན་སྨྲ་བསམ་བརྗོད་པ་དང་བྲལ་ཞིང་ཁྱབ་བརྡལ་ནམ་མཁའ་ལྟ་བུར་གནས་པས། ཡོད་པ་ཡང་མ་ཡིན་ཡོད་མེད་གང་གི་ཕྱོགས་སུ་མ་ལྷུང་བའི་ཡེ་གྲོལ་བློ་འདས་ཆེན་པོ་འདི་ཀ་རིག་པའི་ངོ་བོ་རེད་སྙམ་གྱི་ཞུས། རྗེའི་ཞལ་ནས་གསལ་སྟོང་གཉིས་སུ་མེད་པའི་ཡེ་ཤེས་དེ་ལ་རིག་པ་ཟེར་བ་ཡིན་ཡང་ངོ་བོ་དེཀའི་ངང་གདངས་དང་མ་བྲལ་བར་ཉམས་སུ་བླངས་ན་ཆོག་གསུངས་ནས་ཕན་ཚུན་གཉིས་ཀྱིས་རྫོགས་པ་ཆེན་པོའི་ཆོས་ཀྱི་བགྲོས་གླེང་མང་དུ་མཛད། ཁྱད་པར་བདེ་བའི་རྡོ་རྗེས་སྙན་རྒྱུད་ཀྱི་ཆོས་སྐོར་རྡོ་རྗེ་ཆུ་འཐུང་གི་མན་ངག་དང་། གཏེར་གྱི་ཁ་བྱང་གཏེར་སྟོན་གྱི་འབྱུང་ཁུངས་ལ་སོགས་པ་ཐམས་ཅད་རྗེ་ལ་སྦས་གསང་མེད་པར་ཞུས་པས། རྗེའི་ཞལ་ནས་ཁྱེད་ང་རང་གི་ཁབྱང་ཡང་བྱང་ཐམས་ཅད་དུ་སྔར་ནས་ཡོད་པར་སྣང་ནའང་། རྟེན་འབྲེལ་གྱི་སྟབས་བདེ་མོ་མ་བྱུང་ཡང་། མགར་ར་སྤྲུལ་སྐུའི་ཞལ་གསུང་ལེགས་པོ་གནང་ཡོད་པས་དེ་ལུགས་ཀྱི་རྟེན་འབྲེལ་འཕྲོ་ཅན་དགོས། ཁྱོད་ཀྱི་ཁ་བྱང་ནང་ན་ང་རང་ཨེ་ཡོད་གསུངས། བདེ་བའི་རྡོ་རྗེས་ཧ་མ་གོ་ལགས་ཞུས་ནས་རྗེ་དེ་ཉིད་ཐབས་གྲོགས་ཀྱི་གཙོ་བོར་བསྟནཀྱང་། གཞན་གཟུངས་མ་སོགས་ཀྱི་ཐུགས་བབ་མེད་བསམས་ནས་བཏང་སྙོམས་སུ་བཞག། དེ་ནས་རྗེའི་ཞལ་ནས་སང་ཕོད་ང་རང་གི་ཕུ་བོ་མཁྱེན་སྤྲུལ་རིན་པོ་ཆེའི་སྐུ་གེགས་ཀྱི་ཐོག་ཡིན་པས་ཁྱེད་ཀྱི་ཐུགས་གཏད་རེ་དགོས། ང་རང་འཆི་བ་ལ་ཡ་ང་ཡོད་པ་མིན་ཏེ། ཁྱེད་དང་ང་གཉིས་བླ་སློབ་ཏུ་སོང་བས་ཐབས་ཅི་ཡོད་ཀྱིས་ཁྱེད་ཀྱི་བཀའ་ཅི་བཅག ང་རང་གི་འདི་སྣང་ལ་སེམས་ལོས་གཏད་དང་། བླ་བྲང་ནས་གདུལ་བྱར་འགྲོ་དགོས་སོགས་ཟེར་འདུག་པས། དེ་ལྟར་བྱེད་དགོས་ཚེ་འདི་སྣང་ལ་འདུག་ཟེར་རྒྱུ་མེད་གསུངས། ཡང་བདེ་བའི་རྡོ་རྗེ་ཁྱོད་ཀྱིས་འདི་ལྟར་གསུངས་མི་ཉན། བླ་བྲང་དང་གྲོས་འོང་ལོས་འགྲོ། ད་དུང་བསྟན་པ་དང་སེམས་ཅན་གྱི་དོན་ལ་བཞུགས་པར་གསོལ་བ་བཏབ། རྗེས་ཀྱང་དེ་བཞིན་བཞུགས་པར་ཞལ་གྱིས་བཞེས་ནས། སང་ཕོད་སོགས་སྟབས་ནམ་ལྡན་དུས་ཞིག་ལ་ཁྱེད་ཀྱི་གསུང་ཆོས་ཐམས་ཅད་ངའི་སར་ཁྱེར་ཤོག་གསུངས་ཏེ། ཕན་ཚུན་གཉིས་ཀ་ནས་གཅིག་གྲོགས་ ༈ གཅིག་གིས་བྱས་ཤིང་ཐབས་ཤེས་འདུ་འབྲལ་མེད་པའི་སྨོན་ལམ་མཛད་ནས་ཐུགས་ཡིདགཅིག་དྲིལ་ལྟ་བུའི་དད་འདུན་གྱི་གསོས་སུ་གྱུར་ཏོ། །དེ་ནས་ཟླ་ཞག་འགའ་སོང་རྗེས་མཁའ་འགྲོ་རིག་པའི་གོ་ཆ་ཡིན་སྐད་པའི་བུ་མེད་འཇིགས་སུ་རུང་བ་ཞིག་བྱུང་ནས་རྗེ་ལ་འདི་སྐད་གསོལ། ཁྱོད་སྔར་འཕྲང་མགོའི་གཏེར་ཆེན་ཤེས་རབ་འོད་ཟེར་ཡིན་དུས་ནས་ད་ལ་ཐུག་གི་བར་དུ་ངས་བརྩེ་བའི་བུ་གཅིག་ལྟ་བུར་བསྐྱངས་ནས་ཟབ་གཏེར་དུ་མའི་གྲོགས་ལྡན་བྱས་ཏེ། གུ་རུའི་ཐུགས་བཞེད་མ་ལུས་པ་བསྒྲུབས། ད་རེས་ཀྱི་སྐབས་སུ་ཁྱོད་ཀྱིས་སྔགས་ལོག་བྱས་ནས་ཐེག་པ་འོག་མར་འཇུག་འདུན་ཡོད་པ་དེས་ལེན། སྲོག་ལ་བབ་ན་བདེ་བའི་རྡོ་རྗེ་དང་ངེད་ཅག་དམ་ཚིག་གཅིག་པ་ཡིན་པས་འགལ་བ་ཡོང་། འདི་ཙམ་རེད་ཟེར་ནས་མོ་ཡིས་གྲི་གུག་རྗེའི་སྐུ་ལ་ཚད་ཙམ་བྱས་ཚེ། རྗེའི་ཐུགས་ལ་མཁའ་འགྲོས་བཀའ་ཆད་འབེབས་པ་འདྲ་དགོངས་ཚེ། གློ་བུར་དུ་འབམ་གཞི་ལྟ་བུའི་མ་ངེས་པའི་བསྙུང་གཞི་ཞིག་གིས་ཐེབས་བྱུང་བས། བསོ་སྤྲུལ་རིན་པོ་ཆེ་དང་། སློབ་འབངས་ཀུན་གྱིས་སྐུ་རིམ་ཞབས་བརྟན་སོགས་ཅི་དགོས་ལེགས་པར་བསྒྲུབས་ནས་བསྙུན་ལས་གྲོལ་ཏེ། ཟབ་གཏེར་སྔ་ཕྱི་གཉིས་ཀྱི་དབང་ལུང་ཁྲིད་སོགས་འདུས་སྡེ་ རྣམས་ལ་དར་རྒྱས་སུ་སྤེལ་བར་མཛད་ཚེ་སྔར་བས་ཤེས་རབ་རྒྱས་ཤིང་། དེ་སྐབས་སུ་ཟབ་གཏེར་གསར་ཕབ་སོགས་ལ་བརྡ་ཁྲོལ་ཤིན་ཏུ་མྱུར་བར་སོང་འདུག་པས། རྗེའི་ཐུགས་ལ་བདེ་ཆེན་བདེ་བའི་རྡོ་རྗེར་འཕྲད་པས་ཡིན་པར་འདུག་དགོངས་ནས། ནུབ་ཐུན་སྐབས་མཁའ་འགྲོའི་ཚོགས་མཆོད་གསུང་དུས་བདེ་བའི་རྡོ་རྗེའི་ཡིག་བརྒྱ་མཛད་ནས། བདག་སྐྱེ་བ་འདི་ནས་ཚེ་རབས་ཀུན་ཏུ་བདེ་བའི་རྡོ་རྗེ་ཉེ་རྒྱུའི་གྲོགས་སུ་འཕྲད་པར་སྨོན་པས། འོད་ཐིག་གི་ཀློང་ནས་བདེ་བའི་རྡོ་རྗེ་དངོས་སུ་འོང་ནས་ལུང་བསྟན་བསླབ་བྱ་མང་པོ་མཛད་པ་གཏེར་གཞུང་དུ་གསལ། དེ་ནུབ་མནལ་ལམ་ལ་ཡབ་རྗེ་བླ་མ་རིན་པོ་ཆེ་དང་ཞལ་མཇལ་ནས་བསྟན་པ་སྤྱིའི་བྱུང་དང་འབྱུང་འགྱུར་གྱི་ལུང་བསྟན་དུ་མ་གསུངས། ཁྱད་པར་རང་གཏེར་བཀའ་བརྒྱད་ཀྱི་གཏེར་ཤོག་རྣམས་གནང་ནས་འདི་ཁྱོད་ཀྱིས་གཏན་ལ་ཕོབ་དང་། ངའི་དགོངས་བརྒྱུད་ཀྱི་བྱིན་རླབས་ཚྭ་ཚྭ་བརྐོས་ཕོར་བཞིན་དུ་ཐོབ་ནས་གཏེར་གཉིས་ཀྱི་བསྟན་པས་ས་སྟེང་ཁྱབ་པར་ངེས་སོ་གསུངས། རྗེའི་ཞལ་ནས་བླ་མ་རིན་པོ་ཆེ་ལགས་བདག་གིས་གཏེར་གཉིས་ཀྱི་བསྟན་པ་རྒྱས་ཕྱིར་དང་། ཚེ་སྲོག་བརྟན་ཐབས་སོགས་ལ་ཅི་དགོས་ཞུས་ཚེ། བླ་མ་རིན་པོ་ཆེའི་ཞལ་ནས་ཁྱོད་ཀྱི་ལས་དང་བྱ་བ་ཐམས་ཅད་ལམ་དུ་ ༈ འགྲོ་ཐབས་ལ་ངའི་འདྲ་སྐུ་བརྒྱ་རྩ་བཞེངས་པ་དང་། ཡང་གཏེར་རྣམས་གསར་ཕབ་བྱེད་པ་ལ་གཡེང་བ་མེད་པར་བརྩོན་པ་དང་། བློ་ཕུག་ང་ལ་བཅོལ་ནས་གསོལ་བ་ཐོབ་དང་། གང་བརྩམ་ཚད་ཐམས་ཅད་དཀར་པོ་དགེ་བའི་ལམ་ལ་འགྲོ་ངེས་པ་ཡིན། ཁྱད་པར་ཁྱོད་སང་ཕོད་མཁྱེན་སྤྲུལ་གྱིགེགས་ཐོག་ཡིན་པ་དང་། དམ་སྲི་མི་རུ་བརྫུས་ནས་བར་ཆད་འོང་ཉེན་ཡོད་པས། དེ་ལ་སྟབས་གཟབ་དགོས་གསུངས། རྗེའི་ཞལ་ནས་དེ་སྐབས་ཀྱི་རིམ་གྲོ་ཅི་དགོས་ཞུས་ཚེ། སློབ་དཔོན་སྐུ་བརྙན་ཁྱོད་རང་གིས་ལག་འདེབས་འབུམ་ཐེར། མཁའ་འགྲོའི་མེ་མཆོད་དང་ཚོགས་མཆོད་ལ་སོགས་གྲངས་ལྡན་དང་། ཁྱདཔར་ཕག་མོའི་སྒྱུ་འཕྲུལ་མཁའ་འགྲོ་སུ་ཁ་བཛྲ་དང་སྐལ་བ་ལྡན་ཐབས་འོང་ན་རྐྱེན་ལས་ཐར་འགྲོ་གསུངས་ནས་སྤྱན་ཧྲིག་གེར་བར་སྣང་ལ་གཟིགས་ནས་གསུང་གི་གདངས་ལས། ཧེ་ཧེཿ ཤར་ནམ་མཁའི་སྙིང་པོ་འོད་པོ་ཆེ། །ལྷོ་གཡུ་འབྲུག་གི་སྒྲ་ཡིས་བསུ་བའི་དུས། །རྩལ་གསུམ་ལྡན་ཐང་དཀར་མཁའ་ལ་ལྡིང་། །ཟིལ་གནོན་དང་སྒྲ་བརྒྱ་ལྷན་འཛོམས་ན། །མདངས་གཅིག་གྲོགས་གཅིག་གིས་བྱེད་པར་ངེས། །ནུབ་སྲིན་བྱ་ཁྭ་ཏ་རོག་པོ་འདིའི། །བཞད་པ་ཡི་སྒྲ་ལ་མ་ཞེན་དགོས། །རྨ་བྱ་ཡི་ འཛུམ་མདངས་གཡོ་བ་ལ། །དྲན་བྱེད་ཀྱི་ལྕགས་ཀྱུ་མ་འཆིང་གལ། །དེ་འཆིང་ན་རླུང་དང་མར་མེའི་དཔེ། །ཁྱེད་སྐུ་ཚེའི་འཕེལ་ཁ་རྐྱེན་གྱིས་བསྒྱུར། །དབྱིངས་མི་མིན་ཡུལ་གྱི་ནོར་བུ་འདི། །ཐབས་མཁས་པས་བརྟག་འགུགས་ལས་བརྩམས་ནས། །རྒྱ་མོ་ཡི་དཔལ་དུ་སྤྱོད་ཤེས་ན། །གཏེར་གཉིས་ཀྱི་བསྟན་པ་མཐའ་ནས་རྒྱས། །གནས་ལྔ་ཡི་མདུད་པ་རིམ་གྲོལ་ནས། །ཁྱོད་ཀློང་ཆེན་ཀློང་གི་སྒོ་བརྒྱ་འབྱེད། །ཚུར་གོ་བར་མཛོད་ཅིག་སྙིང་གི་བུ། །ཞེས་གསུངས་མཐག་མནལ་ལས་སད་ཚེ། བཀའ་བརྒྱད་ཀྱི་གཏེར་ཤོག་ཐམས་ཅད་མངོན་སུམ་དུ་ཕྱག་ལ་འབྱོར་ཡོད་པ་ཕྱི་ནས་སྐལ་ལྡན་བུ་སློབ་རྣམས་ཀྱིས་ཀྱང་མཐོང་ཆོས་སུ་གྱུར། དེ་ནས་གཏེར་སྒྲུབ་མཛད་ཅིང་རིམ་གྱིས་གཏན་ལ་ཕབ་ནས། ཟབ་གཏེར་ཡོངས་རྫོགས་ཀྱི་ཆོས་ཀྱི་བདག་པོ་བསོ་སྤྲུལ་རིན་པོ་ཆེ་སྣ་ཚོགས་རང་གྲོལ་གྱིས་དབུས་བུ་སློབ་སྐལ་ལྡན་རྣམས་ལ་གསལ་ཁྱབ་ཏུ་སྤེལ་བར་མཛད་དོ། །དེ་ནས་དགུང་གྲངས་སོ་དགུའི་ལོར་རིག་འཛིན་ཞི་དྲག་གི་སྒོ་ནས་སྐུ་མཚམས་ལ་བཞུགས་ནས་བདུན་ཕྲག་གསུམ་ཙམ་འགྲོ་སྐབས། སྔར་ཨ་སང་གཏེར་སྟོན་རྣམ་སྲས་ལ་ཡབ་རྗེ་བླ་མའི་ཟབ་གཏེར་མ་བསྒོམ་སངས་རྒྱས་ཀྱི་ཁྲིད་དང་། གཞན་ཡང་བར་དོའི་དྲུག་ཁྲིད་ལོག་ ༈ པ་ཟླ་དྲུག་ཙམ་དུ་ཞིབ་རྒྱས་སུ་གསུངས་སྐབས། གནས་དེ་ལ་དོགས་གཟོན་ཅུང་ཟད་ཞིག་མཛད་པའི་རྐྱེན་གྱིས་མཁའ་འགྲོའི་ལུང་བསྟན་འབྱུང་ཡང་བཏང་སྙོམས་སུ་ཡོད་དུས། གནས་བདག་ཡིན་ཟེར་བའི་མི་མོ་གཉིས་ཀྱིས་ཁྱེད་ངེད་ཅག་གི་གནས་ལ་ལྟད་མོར་འགྲོ་ཟེར་ནས་ཡང་ཡང་འོངས་ཀྱང་མ་བྱོན་པར་ཁྱོད་གཉིས་སོང། ང་དུས་ལ་བབ་དུས་ཐོན་འོང་གསུངས་པ་དེ་དུས་ལ་བབ་ནས་སྟག་གཟིག་དོམ་སེང་མང་པོ་འོང་སྟེ། ཁྱེད་ངེད་ཅག་གི་གནས་སུ་ཕེབས་ལགས་ཞུས་པས། རྗེའི་ཞལ་ནས་ཁྱེད་གཅན་གཟན་ཤ་སྟག་ཡིན་པར་འདུག་ན་དེའི་ཡུལ་དུ་ང་མི་འགྲོ་གསུངས། སྟག་མགོ་ཅན་ན་རེ། ཛཿ ཤར་ཕྱོགས་མེ་ལོང་ཡེ་ཤེས་གདངས། །རང་བཞིན་ཡེ་ཤེས་སྤྱོད་པའི་མ། །རྡོ་རྗེ་མཁའ་འགྲོ་རྒྱལ་བའི་ཡུམ། །ཞི་བའི་ཕྲིན་ལས་ང་ཡི་དབང་། །ཟེར་ནས་རྒོད་ཐང་དཀར་ཞིག་ཏུ་གྱུར་ནས་རྗེའི་མདུན་ཕྱོགས་དེ་ཀར་འདུག གཟིག་གི་མགོ་ཅན་ན་རེ། ཧཱུྃཿ ལྷོ་ཕྱོགས་མཉམ་ཉིད་ཡེ་ཤེས་དབྱིངས། །རང་བཞིན་ཡེ ཤེས་སྤྱོད་པའི་མ། །རིན་ཆེན་མཁའ་འགྲོ་སེར་གསལ་མཛེས། །རྒྱས་པའི་ལས་ཀུན་བདག་ལ་དབང་། །ཟེར་ནས་རྒོད་ཐང་དཀར་དུ་སྤྲུལ་ནས་རྗེའི་གཡས་ཕྱོགས་སུ་ཁ་བསྟན་ནས་ འདུག །ཡང་དོམ་གྱི་མགོ་ཅན་ན་རེ། བཾཿ ནུབ་ཕྱོགས་སོར་རྟོག་ཡེ་ཤེས་དབྱིངས། །རང་བཞིན་ངང་གིས་སྤྱོད་པའི་མ། །པདྨ་ཌཱཀྐི་སྒྲ་སྒྲོགས་དང་། །དབང་གི་ཕྲིན་ལས་ཐོགས་མེད་སྒྲུབ། །ཟེར་ནས་རྗེའི་སྐུ་རྒྱབ་ཏུ་འདུག་གོ །ཡང་སེང་གེའི་མགོ་ཅན་ན་རེ། ཧོཿ བྱང་ཕྱོགས་བྱ་གྲུབ་ཡེ་ཤེས་དབྱིངས། །རང་བཞིན་ངང་གིས་སྤྱོད་པའི་མ། །ཀརྨ་ཌཱཀྐི་སྣ་ཚོགས་ཕྱིན། །དྲག་པོའི་ཕྲིན་ལས་ཐོགས་མེད་སྒྲུབ། །ཟེར་ནས་རྗེའི་བྱང་ཕྱོགས་སུ་གནས། དེ་ནས་ཐམས་ཅད་ཀྱིས་དབྱངས་གཅིག་དང་མགྲིན་གཅིག་ཏུ་འདི་སྐད་ཟེར། ཨེ་ཨ་ར་ལི་ཕེ་ཛ་བྷྲུྃཿཟེར་བ་དང་མཉམ་དུ་ཡུལ་སྣང་ཐམས་ཅད་འཇའ་འོད་ལམ་མེར་སོང་བའི་ཐིག་ལེ་དཀར་ལ་འཚེར་བ་ཞིག་གི་དབུས་སུ་ཡུལ་སྣང་ཡིད་དུ་འོང་བ་ནེའུ་གསེང་དང་ལྗོན་པ་ལོ་འབྲས་ལྡན་པའི་མཐའ་སྐོར་ལྕགས་རི་ལྟར་ཡོད་པ། དེའི་དཀྱིལ་དུ་ཕོ་བྲང་ཆེན་པོ་གྲོང་ཁྱེར་བརྒྱད་ཀྱིས་བསྐོར་བ། བྲག་རི་དང་རྩི་ཤིང་ཐམས་ཅད་ལ་བཾ་ཧ་རི་ནི་ས་འབུར་དུ་དོད་པ་དང་རང་སྒྲ་སྒྲོགས་པ། དེའི་གཡས་སུ་བྲག་རི་རྩེ་མོ་ཙིཏྟའི་དབྱིབས་ཅན་དབུ་རྩེ་དམར་བ་ཟངས་ལས་གྲུབ་པ། སྐེད་པ་དཀར་པོ་དུང་མདོག་ཏུ་ཡོད་པའི་བྲག་ངོས་ན་རང་བྱོན་གྱི་གུ་རུ་མཚན་བརྒྱད་འབུར་དུ་ཡོད་པ་དང་། གུ་ ༈ རུའི་ཕྱག་རྗེས་དང་ཞབས་རྗེས། གཞན་ཡང་འདོན་དུ་རུང་བའི་ཟབ་གཏེར་སྣ་ཚོགས་དང་། འདོན་དུ་མི་ཉན་པའི་རྒྱལ་པོའི་བླ་གཏེར། གྲུབ་ཆེ་ས་ར་ཧ་པའི་ཕྱག མདའ། ནོར་བུ་དགྲ་འདུལ་གྱི་ཤེལ་གྱི་གྲི་ཆུང་ཡུ་དཀར་དང་། སྔོན་ཨོ་རྒྱན་ཆེན་པོས་གནས་འདི་ཕྱོགས་ཀྱི་ལྷ་འདྲེ་རྣམས་དམ་ལ་བཏགས་ཤིང་བྲན་དུ་བཀོལ་བའི་དམ་རྟགས་ཀྱི་ཕུར་བུ་གྱད་ཀྱི་མིས་བཏེག་མི་ནུས་པ་ལྟ་བུ་གནམ་ལྕགས་ལས་གྲུབ་པ་དུས་རྒྱུན་དུ་ཀཱི་ལ་ཡ་འབྲུ་དགུ་རང་གྲགས་སུ་ཡོད་པ་སོགས་དང་། འབབ་ཆུའི་སྒྲ་ཡང་གུ་རུ་སིདྡྷིའི་སྔགས་སྒྲའི་རྒྱུན་ལྟ་བུར་གནས་སོ། །དེའི་གཡོན་ཕྱོགས་ན་ནེའུ་གསེང་ལྗོན་པའི་ཚལ་རྒྱས་པ། བྱ་དང་རི་དྭགས་གཅན་གཟན་ལ་སོགས་སྤུ་སྡུག་མཛེས་ཤིང་ཡིད་དུ་འོང་བ་མང་པོས་སེམས་དགའ་བའི་རྩེད་འཇོ་བྱེད་ཅིང་། ངག་ནས་བཾ་ཧ་རི་ནི་ས་དབྱངས་སུ་གྱེར་བ། དེའི་དབུས་སུ་ཡེ་ཤེས་མཚོ་རྒྱལ་གྱི་དབུ་ལྗོན་བདུན་ཕྲག་དང་། བེེ་རོཙཱ་ནས་ཆོས་བོད་ལ་བསྒྱུར་དུས་བོད་ཀྱི་བདུད་བློན་རྣམས་ཀྱིས་བར་ཆད་བརྩམས་ནས་རྒྱལ་མོ་ཚ་བ་རོང་ལ་ཕེབས་དུས་གནས་འདིར་ཞག་བདུན་ཕྲག་གཅིག་བཞུགས་སྐབས། ས་ཡི་ལྷ་མོས་འཇིག་རྟེན་ཁམས་ཀྱི་སྨན་བཅུད་རྣམས་བསྡུས་ནས་ཕུལ་བ། བེེ་རོས་རྫུ་ དེཔོ འཕྲུལ་གྱིས་རྡོ་ཡིས་མཆོད་རྟེན་བརྒྱ་རྩ་བཞེངས་པ་དང་། འབབ་ཆུ་ཐམས་ཅད་འདུ་བ་བཞིའི་ནད་སེལ་བའི་ནུས་ལྡན་དུ་བྱིན་གྱིས་བརླབས་པ་སོགས་ཡོད། དེའི་མདུན་ངོས་ན་རྡོ་རྗེ་ཕག་མོའི་སྒྲུབ་ཕུག་ཏུ་ཕག་མགོ་རང་བྱོན་དང་། མཚོ་རྒྱལ་ཕྱག་ཞབས་རྗེས་དང་། གཞན་ཡང་ངོ་ཤེས་མི་ཤེས་ཀྱི་ལྷ་སྐུ་ཡིག་སྣ་ལ་སོགས་པའི་རང་བྱོན་དུ་མ་བཞུགས། དེའི་ཤར་དུ་སྐྱེད་མོའི་ཚལ་གྱི་ས་གཞི་ཐམས་ཅད་ཤེལ་ལས་གྲུབ་པ་རྒྱ་ཆེ་ལ་ཁྱོན་ཡངས་པ་ཞིང་གི་བཀོད་པ་ཕུན་སུམ་ཚོགས་པའི་དབུས་རྡོ་རྗེ་རིགས་ཀྱི་དཔའ་བོ་དང་དཔའ་མོ་མང་པོས་ཚོགས་ཀྱི་འཁོར་ལོ་རྒྱ་ཆེན་པོ་བསྐོར་ནས་བཞུགས་པ་དང་། དེ་བཞིན་དུ་ལྷོ་ཕྱོགས་དང་ནུབ་ཕྱོགས་བྱང་ཕྱོགས་རྣམས་སུ་ཕྱོགས་མདོག་དང་མཐུན་པའི་ཞིང་ཁམས་གཞལ་ཡས་ཀྱི་བཀོད་པ་ཐམས་ཅད་ཕུན་སུམ་ཚོགས་པར་གནས་པའི་དབུས་སུ་རིན་ཆེན་པདྨ་ལས་ཀྱི་དཔའ་བོ་དང་དཔའ་མོ་མངཔོས་ཚོགས་ཀྱི་མཆོད་པ་རྒྱ་ཆེན་པོ་བཤམས་ཤིང་རང་རང་གི་རིགས་ཀྱི་འཁོར་གྱིས་བསྐོར་ནས་ཡོད་པའི་ནང་ནས་པདྨ་མཁའ་འགྲོ་ཞིག་དང་རྡོ་རྗེ་མཁའ་འགྲོ་གཉིས་ཐོན་བྱུང་ནས་འདི་སྐད་ཟེར། རིགས་ཀྱི་བུ་གནས་འདི་ནི་ནེེ་གྲོ་རྡོ་རྗེ་ཡང་རྫོང་རེད། ཁྱོད་ཀྱིས་མ་བརྗེད་པར་རྗེས་སུ་འཇུག་པའི་གང་ཟག་ལ་གནས་འདིའི་ཡོན་ཏན་རྣམས་ ༈ སྨྲོས་ཤིག །གནས་