Tibetan
བཞུགས་པ་འདྲ་དགོངས་ཏེ། ད་དུང་ཁྱོད་བསྟན་པ་དང་སེམས་ཅན་གྱི་དོན་ལ་བཞུགས་དགོས། ནམ་ཞིག་ངའི་སར་བྱོན་དུས་ཞབས་ཞུ་གང་ལྡན་ཞུ་གསུངས། ཡང་སྒོ་སྤྲུལ་གྱི་ཞལ་ནས་ཁྱེད་ཀྱིས་མགར་ར་སང་གི་དབུས་ཀྱི་མཁའ་འགྲོ་མ་དེ་ལོས་ཤེས་ཨེ་རེད་གསུངས། རྗེའི་ཞལ་ནས་ཤེས་དང་ཆ་རྒྱུས་ཡེ་མེད། སྔར་ཡབ་རྗེ་བླ་མའི་ལུང་བསྟན་དང་། རང་གཏེར་གྱི་བརྡ་བྱང་རྣམས་ལ་ དེ་དང་འདྲ་མཚུངས་པའི་མཚོ་རྒྱལ་གསུང་སྤྲུལ་གཏེར་ལ་དབང་བ་ཞིག་ཡོད་འདུག་པས། དེ་ཨེ་ཡིན་སྙམ་ཡང་། ང་རང་གི་གཟུངས་མ་ལེགས་པའི་སེམས་བབ་ཡོད་མེད་ཆ་མི་ཆོད་པ་དང་། ཁྱད་པར་མགར་ར་སྤྲུལ་སྐུའི་སྐུ་ཙར་ཡོད་པས་སྟབས་ལེགས་དེ་ཙམ་རེ་གསུངས། སྒོ་སྤྲུལ་གྱི་ཞལ་ནས་ཁོ་རང་གཏེར་ཆོས་ཡོད་ངེས་པ་ཡིན་འདུག་ཀྱང་། གཏེར་གྲོགས་དང་མ་འཕྲད་ནས་གསང་རྒྱ་དམ་པོ་བྱས་ཏེ་ཐ་མལ་ལྟ་བུའི་སྤྱོད་པ་བསྐྱང་འདུག །དེ་དང་ཁྱོད་གཉིས་འཕྲད་ན་མ་འཛོལ་བ་འདྲ་གསུངས། རྗེའི་ཞལ་ནས་ཁྱེད་དང་མཁའ་འགྲོ་གཉིས་ཀ་ཆ་རྒྱུས་ཞིབ་མོ་ཡོད་པ་འདྲ་ན། ཁོང་ལ་གཏེར་རིགས་ཅི་འདྲ་འདུག་གསུངས་པས། སྒོ་སྤྲུལ་གྱི་ཞལ་ནས་ང་རང་གི་མཁའ་འགྲོ་མིགགིས་རིག་མ་མྱོང་དང་། ངའི་སློབ་མ་ཆོས་སྐོར་འཇིགས་ཆོས་ཞེས་པ་དེས་མགར་སྤྲུལ་ཡོད་སར་གཏེར་ཆེན་རིན་པོ་ཆེའི་གསུང་ཆོས་ཉམས་ལེན་བྱས་ཏེ། དེ་ཀར་ཟླ་ཤས་རེ་འདུག་མྱོང་བས། དེ་ལ་ཆ་ཞིབ་ཡོད་པས་ལོ་རྒྱུས་རྣམས་དེས་ང་ལ་སྨྲས་པ་ཡིན། མིན་ཀྱང་ངོར་བླ་མ་འོད་ཆུང་ལའང་ཆ་ཞིབ་འདུག་པས། ཉིན་ཆ་ཤས་ནས་འདི་ཀར་འཁོར་ལོ་རབ་གནས་བྱེད་དགོས་པས། དཔོན་གཡོག་ཐམས་ཅད་བྱོན་རྒྱུ་རེད་ཟེར་འདུག །ཁྱེད་ཅག་ཕན་ཚུན་ཀུན་ལ་རྟེན་ འབྲེལ་རེ་ཡོད་ན་གཞན་དབང་མ་གཏོང་གསུངས། ཡང་རྗེའི་ཞལ་ནས་ང་ནི་ང་རང་གིས་ཡབ་རྗེ་བླ་མ་རིན་པོ་ཆེའི་བསྟན་པ་མ་ཟིན་ཀྱང་། གཅིག་པུར་དབེན་རི་ཞིག་ལ་འདུག་སྙམ་ནས་ཉིན་མཚན་མེད་པར་བླ་མ་ལྷ་ལ་གསོལ་བ་འདེབས་ཀྱིན་ཡོད་མ་གཏོགས་གཏེར་སྟོན་བྱས་ནས་རིག་མ་སོགས་རྟེན་འབྲེལ་ལ་ཨེ་ལྡན་མི་བསམ་ངེས་པ་ཡིན་གསུངས། སྒོ་སྤྲུལ་གྱི་ཞལ་ནས་ཁྱེད་པདྨའི་རྒྱལ་ཚབ་འཁྲུལ་མེད་ཡིན་པས། ད་དུང་རྟེན་འབྲེལ་ལ་རག་ལས་ཡོད་པས་ཐུགས་སུན་མ་མཛད་པར་བསྟན་པ་དང་སེམས་ཅན་གྱི་དོན་དང་། ཁྱད་པར་ཁྱེད་རང་གི་ཡབ་རྗེ་བླ་མའི་གཏེར་མཇུག་ཁྱོད་ལ་ཐུག་ཡོད་པས་ཐུགས་གཟབ་ལེགས་པར་དགོས། ཁྱེད་ཀྱི་རིག་མ་དེ་ཀ་ནོར་སོང་ནི་ཨེ་རེདགསུངས། ཡང་རྗེས་ཞལ་ནས་ནོར་བ་མ་སོང་ངེས་པ་ཡིན། བླ་མ་རིན་པོ་ཆེའི་སྐུ་བཞུགས་ཡོད་སྐབས་ཁ་བྱང་བླ་མའི་སྤྱན་ལམ་ལ་བརྒྱུད་ནས་ངེས་བཟུང་བ་ཡིན་ཀྱང་། དེ་སྐབས་གསུང་མཛད་རེ་ཡོད་པས་དེའི་ཐོག་ཏུ་སོང་བ་འདྲ་གསུངས། སྒོ་སྤྲུལ་གྱི་ཞལ་ནས་ད་དེ་ལྟར་ཡིན་ཀྱང་ཐུགས་གཟབ་དགོས་གསུངས་ནས་ཕན་ཚུན་ཐུགས་ནང་མཐུན་པའི་གསུང་མཛད་དང་། ཉམས་ལེན་གནད་གསང་གི་བསྒྲོ་གླེང་མང་དུ་གསུངས་ནས་སྒོ་སྤྲུལ་གདན་སར་3 བྱོན། རྗེ་དེ་ཉིད་དེ་ཀར་བཞུགས་ནས་སྙེ་སང་གི་ཟུར་ལ་མཁྱེན་སྤྲུལ་རིན་པོ་ཆེའི་སྐུ་སྲས་ཞིག་ཡོདཔ་དེ་དང་། སྔར་ཡབ་རྗེ་བླ་མའི་གཏེར་རྫས་རྣམས་མཁྱེན་སྤྲུལ་གྱི་ཕྱག་བསྣམས་མཛད་པའི་ནང་ནས་ཕྲན་བུ་རེ་ཡོད་པ་ཐམས་ཅད་ལ་བདག་པོ་མཛད། དེ་སྐབས་གནོད་སྦྱིན་ཆེན་པོ་ཡིན་སྐད་པའི་བནྡེ་ཞིག་འོང་ནས་འདི་སྐད་ཟེར། ཀྵཿ རང་བྱུང་ཆོས་སྐུའི་ཀློང་ཡངས་ནས། འགགས་མེད་བརྡ་ཡི་རོལ་མོ་ངོམས། །ཤེས་རབ་ལྡན་པས་གོ་བར་མཛད། །སྔོན་སྨོན་འབྲེལ་ཟབ་ཆེ་བ་ཡིས། །གཏད་རྒྱ་དུས་འདིར་སད་པ་ནི། །ང་ཡིས་ཁྱོད་ལ་གྲོགས་ལྡན་བྱས། སྤྲིན་དཀར་སྟོད་ཀྱི་གཡུ་འབྲུག་གི །གཙུག་ནོར་རང་བཞིན་ཤུགས་ཀྱིས་ལོན། །དངོས་གྲུབ་སྐྱོན་དུ་མ་འཛིན་ན། །ཐབས་ཤེས་རྟེན་འབྲེལ་རབ་ལ་དབང་། །དུས་ཀྱི་འཕོ་འགྱུར་རྒུད་པ་སེལ །དམག་འཁྲུགས་ནད་ཡམས་མུ་གེ་ཞི། །གཏེར་གཉིས་བསྟན་པ་ཕྱོགས་ཀུན་ཁྱབ། །སྙན་གྲགས་དབྱར་རྔའི་སྒྲ་དང་མཉམ། །ཕྲིན་ལས་བཞི་ཡིས་འགྲོ་དབང་བསྡུས། །དོན་གཉིས་དགོས་འདོད་ནོར་བུ་རྙེད། །དེ་དོན་མ་ནོར་གསལ་བར་ངེས། །ཟེར་ཞིང་མི་སྣང་བར་གྱུར། དེ་ནས་ཞག་ཆ་ཤས་ནས་མགར་ར་གཏེར་ཆེན་གྱི་རྒྱལ་སྲས་དང་། མཁའ་འགྲོ་དཔོན་ གཡོག་བཅས་འཁོར་ལོ་རབ་གནས་བྱེད་པ་ལ་བྱོན་འོང་སྐབས། རྗེའི་ཐུགས་དགོངས་ལ་སྒོ་སྤྲུལ་གྱིས་གསུངས་པ་ལྟར་རྟེན་འབྲེལ་གྱི་བརྡ་དོན་རྣམས་བསྒྲོ་གླེང་དེར་མཛད་དགོས་དགོངས་ནས། ཐོག་མར་རྒྱལ་སྲས་དང་མཇལ་འཕྲད་མཛདཔའི་ཚེ། མཁའ་འགྲོས་ཕྱག་གསུམ་ཕུལ་ནས་རྗེ་ལ་སྐུ་ཁམས་བཟང་ཞུས་ཏེ། རིན་ཆེན་གཉིས་པ་དང་དར་བཅས་མཇལ་དར་དུ་ཕུལ་ནས་ཕྱག་དབང་བླང་། རྗེས་ཀྱང་རྟེན་འབྲེལ་གྱི་ཐོག་མར་དགོངས་ནས་དབང་མདོག་འཛིན་པའི་རིན་པོ་ཆེ་དང་དར་བཅས་གནང་། ཡང་མཁའ་འགྲོས་སྤྲུལ་སྐུ་རིན་པོ་ཆེ་ཁྱེད་ཀྱི་སྒྲུབ་ཐབས་ཚིག་ཉུང་ལ་དོན་བསྡུས་པ་བྱིན་རླབས་ཆེ་བ་ཞིག་བཀའ་དྲིན་མ་ཆུང་ཞུས་ནས་རང་གནས་ཀྱི་གུར་ནང་ལ་སོང་། རྒྱལ་སྲས་དང་རྗེ་དེ་ཉིད་འཁོར་ལོའི་ཁང་པའི་ནང་དུ་བཞུགས་ནས་གསུང་མཛད་ཞིབ་རྒྱས་སུ་མཛད། དེ་ནས་ནང་སྔ་མོ་རྗེ་དཔོན་གཡོག་དང་། རྒྱལ་སྲས་མཁའ་འགྲོ་དཔོན་གཡོག་ཐམས་ཅད་ལྷན་དུ་ཚོགས་ནས་འཁོར་ལོ་རབ་གནས་མཛད་ཚེ། མཁའ་འགྲོ་ཀུན་གསལ་མ་ཡིན་སྐད་པས་ཤེལ་གྱི་སྒྲོམ་བུ་ཞིག་འོང་ནས་མཁའ་འགྲོ་བདེ་བའི་རྡོ་རྗེ་ལ་སྦྱིན་པ་རྗེས་གཟིགས་ཚེ། བདེ་བའི་རྡོ་རྗེས་ཤེལ་སྒྲོམ་སྦས་པའི་ཚུལ་གྱིས་མདུན་སྒམ་གྱི་འོག་ཏུ་༈ བཞག །རྗེའི་ཞལ་ནས་གཏེར་སྒྲོམ་དེ་ཁྱེད་ལ་མ་མཁོ་ན་ང་རང་ལ་དགོས་གསུངས། མོ་ན་རེ་གཏེར་མ་རེད་ང་རང་གི་བུ་མོའི་རྩེ་རྡོ་རེད་ཟེར། རྗེའི་ཞལ་ནས་ཅི་ཡིན་ངས་མཐོང་བ་ཡིན་པས་ཁྱེར་ཤོག་གསུངས། བདེ་བའི་རྡོ་རྗེས་ཀྱང་རྗེའི་བཀའ་མ་གཅོག་པར་གཏེར་སྒྲོམ་ཕྱག་ཏུ་ཕུལ་བས་རྗེའི་ཐུགས་ཤིན་ཏུ་དགྱེས་པར་མཛད། དེ་སྐབས་བདེ་བའི་རྡོ་རྗེས་རྗེ་ལ་གསོལ་བ། ང་རང་ལས་ངན་པ་དང་ལུས་དམན་པའི་དབང་གིས་གཞན་དོན་ཕར་ཞོག །རང་དོན་ཀྱང་ཕྲན་བུ་ཙམ་ཡང་འོང་བ་དཀའ་འདུག་པས། སྤྲུལ་སྐུ་ཡིད་བཞིན་ནོར་བུ་ཁྱེད་ཀྱིས་ཐུགས་གཏད་རེ་མ་འཆུག་དང་། ང་རང་ས་མཐའ་ངེས་མེད་ཞིག་ཏུ་འགྲོ་སྙམ་ཡོད་ཞུས་ཚེ། རྗེའི་ཞལ་ནས་ཐུགས་སུན་མ་བྱེད་དང་བསྟན་འགྲོའི་དོན་རིམ་བཞིན་ལོས་འོང་གསུངས་ནས་ཞལ་ཏ་མང་དུ་མཛད། དེ་ནས་ཡང་ཉིནགཅིག་མགར་སྤྲུལ་གྱི་ཞལ་ནས་ང་རང་གི་མཁའ་འགྲོ་འདི་ཁྱད་པར་བ་ཞིག་ཡིནཀྱང་། ང་དང་ནི་ཕ་ཡབ་བླ་མའི་སྨོན་ལམ་གྱིས་འཕྲད་པ་མ་གཏོགས་ང་རང་གི་ལུང་ཟིན་ནི་མིན་པས། ཁྱེད་ཀྱིས་བདག་བྱས་ན་སྐུ་ཚེ་ལ་ཕན་ཐོགས་ཡོད་ཐང་། མོ་རང་གིས་དད་པ་དང་མོས་གུས་ཚད་མེད་པ་ཞིག་འདུག །ནམ་དང་དུས་ཀུན་ཁྱེད་ཡབ་སྲས་ལ་གསོལ་བ་འདེབས་པ་དང་། བསྟན་ ཞབས་ལ་སྐྱེ་བའི་སྨོན་ལམ་བཏབ་ཀྱིན་འདུག་པས་ལས་འཕྲོ་རེ་ཡོད་ངེས་རེད་གསུངས། ཡང་རྗེས་བཏང་སྙོམས་ལ་བཞུགས་ནས་ཅི་ཡང་མ་གསུངས་པས། མགར་སྤྲུལ་གྱིས་ལན་གྲངས་མང་པོའི་བར་དུ་ཡང་ཡང་ཞུས་ཚེ། རྗེ་དེ་ཉིད་ཀྱིས་ཀྱང་མགར་ར་རྒྱལ་སྲས་ཀྱིས་གསུང་ལྟར་ལེགས་སོ། །ད་ཕན་ང་རང་གི་གཟུངས་མ་དང་སྤུན་ཟླ་རྣམས་ཀྱི་སེམས་ལ་བབ་ཚེ་མཁའ་འགྲོའི་བདག་པོ་ང་རང་ལས་མེད། ཁྱེད་ཀྱིས་གཞན་ལ་གནང་མི་ཆོག །ང་རང་གི་སྔ་ཕྱི་ཀུན་ཏུ་ལུང་བསྟན་ཁ་བྱང་རྣམས་སུ་ཟིན་ཡོད་ཀྱང་། གཅིག་ཐད་ནས་ཁྱེད་ཀྱི་སྐུ་མདུན་དུ་ཡོད་པ་དང་། གཉིས་ཐད་ནས་ང་རང་གིས་དབེན་རིར་སྒྲུབ་ཚུལ་རེ་ཨེ་ཟིན་སྙམ་པ་ཡིན་པས་བྱ་བ་མང་པོ་དྲན་དགོས་མེད་བསམ། ད་ཇི་ལྟར་ཡིན་ཀྱང་གུ་རུ་པདྨའི་སྨོན་ལམ་ལ་བསླུ་བ་མེད་པ་ཡིན་པས་རྟེན་འབྲེལ་ལེགས་པའི་དགོས་ཆེད་དང་འབྲེལ་བ་རེ་འབྱུང་ན་ཁྱེད་ཀྱིས་དེ་ལུགས་དགོས་གསུངས། མགར་ར་རྒྱལ་སྲས་ཀྱི་ཞལ་ནས་མཁའ་འགྲོ་ང་རང་གི་ཡུམ་སྐལ་མ་རེད། ཁྱེད་ལ་སྦྱིན་པའི་ཚིག་ཐོག་ལ་ང་ཡོད་གསུངས་ནས་ཚིགས་ཆེན་མོར་བཤད། དེ་ནས་རྗེའི་ཐུགས་དགོངས་ལ་གནོད་སྦྱིན་གྱི་ལུང་བསྟན་དང་། སྒོ་སྤྲུལ་གྱི་གསུང་མཛདགཉིས་འདྲ་མཚུངས་༈ འདུག་དགོངས་ནས་ཕན་ཚུན་གཉིས་ན་རྟེན་འབྲེལ་ཙམ་དུ་ཟབ་གཏེར་གསར་ཕབ་ཀྱིས་བསྐུལ་བ་མཛད་ནས། མཁའ་འགྲོས་ཀྱང་རྗེའི་བཀའ་བཞིན་སྣང་སྲིད་དབང་མཛད་ཀྱི་སྒྲུབ་ཐབས་ཞིག་བྲིས་ནས་རྗེ་ལ་ཕུལ་བས་རྟེན་འབྲེལ་འཕྲོ་ཅན་དུ་འབྱུང་། དེ་ནས་རིམ་བཞིན་སྨར་གྱི་ལྕགས་རི་འོད་འབར། བཀྲིས་སྒོ་མང་། ཁྲོས་མའི་གནས་སོགས་ནས་ཟབ་གཏེར་དུ་མ་བཞེས། དེ་སྐབས་ཡོན་བདག་དད་ལྡན་རྣམས་ཀྱིས་གསོལ་ཆང་དྲངས་ནས། རྗེ་ཆང་གིས་བརྫི་བའི་ཚུལ་མཛད་ཅིང་ཆུ་ལ་ཉ་ལྟར་བསྒྲོད། རི་བྲག་ཟང་ཐལ་དུ་ཕུད་པ་སོགས་རྫུ་འཕྲུལ་ཡ་མ་ཟུང་བསྟན་ནས་དེ་ཕྱོགས་ཀྱི་འགྲོ་བློ་ཆོས་ལ་བསྒྱུར་བ་སོགས་མཛད་ནས་གདན་སར་ཕེབས། དེ་ནས་རྗེ་དེ་ཉིད་གཡུང་ཤེས་བླ་མ་དགེ་བའི་བཤེས་གཉེན་དམ་པ་གསུང་མཆོག་གི་དྲུང་དུ་བྱོན་པས། བླ་མའི་ཞལ ནས་ཁྱེད་ཀྱིས་ཡབ་རྗེ་བླ་མའི་གསུང་ཆོས་འཛིན་སྐྱོང་སྤེལ་གསུམ་དར་རྒྱས་སུ་མཛད་པ་ངོ་མཚར་ཆེ་གསུངས། དེ་སྐབས་ལེགས་ཉེས་ཀྱི་གཏམ་མང་པོ་ཡོད་ཀྱང་ཡི་གེར་འཇིགས་ནས་མབྲིས་སོ། །དེ་ནས་དོན་གསུམ་པ་རྒྱུད་ཀྱི་ཚུལ་ནི། རྗེ་དེ་ཉིད་ཡབ་རྗེ་བླ་མའི་ཟབ་གཏེར་གྱི་ཕུར་པའི་ཟླ་དྲུག་ལ་བཞུགས་སྐབས། བླ་མས་ལུང་བསྟན་ནས་མངའ་ཐང་ལོངས་སྤྱོད་ཐམས་ཅད་ཐབས་ ཀྱིས་སྤང་དགོས་གསུངས་པ་དང་། ཁྱད་པར་དུ་གདུལ་བྱ་སྐལ་ལྡན་རྣམས་རིམ་གཉིས་ཀྱི་ལམ་ལ་འཇུག་ནས་གསང་སྔགས་རྡོ་རྗེ་ཐེག་པའི་གནད་ཇི་བཞིན་པར་རྟོགས་པའི་ཕྱིར་དུ། རྗེ་དེ་ཉིད་དགུང་གྲངས་སོ་དྲུག་ལ་ཕེབ་ཚེ་འཁོར་འབངས་མངའ་ཐང་ལོངས་སྤྱོད་ཐམས་ཅད་ཐབས་ཀྱིས་སྤངས་ནས། ཡབ་རྗེ་བླ་མའི་གདན་སའི་ཉེ་ལོགས་ན་ནེེ་གྲོ་རྡོ་རྗེ་རྫོང་ཞེས་པའི་དབེན་གནས་སུ། སྐལ་ལྡན་གྱི་སློབ་མ་འགས་བཞུགས་གནས་ཀྱི་གཟིམ་སྦྲ་སོགས་ཅུང་ཟད་རེའི་མཐུན་རྐྱེན་བྱས་ནས། ཉེ་གནས་འོད་འབར་གྱིས་ཞབས་ཞུ་བྱས་ཏེ། རྗེ་དེ་ཉིད་དབེན་རི་ལ་བྱོན་ནས་བཅད་རྒྱ་དམ་པོར་བཞུགས་ཡོད་སྐབས། གསོལ་བཅའ་དང་ན་བཟའ་མེད་པ་ལ་རྐྱེན་ནས་ཁམས་ཅུང་ཟད་མི་བདེ་བ་ལྟ་བུ་བྱུང་བས། རྗེའི་ཐུགས་ལ་ཟས་དགོས་མེད་པ་སྤྲང་པོ་རྣམས་ལའང་འཁྱག་ལྟོག་གི་ནད་དྲག་པོ་འདི་ཙམ་འབྱུང་མི་སྲིད་ན། ང་རང་འདི་ཙམ་ཅིའི་ཕྱིར་ན་དགོངས་ཏེ་ནད་ཐོག་བརྫིས་མཛད་ཅིང་གང་སྣང་ལམ་འཁྱེར་གྱི་དམིགས་གནད་མཛད་ཚེ། ལྷ་འདྲེའི་ཆོ་འཕྲུལ་ཡིན་པས་གློ་བུར་དུ་བསྙུང་ལས་གྲོལ། དེ་སྐབས་ཡང་བསོ་སྤྲུལ་རིན་པོ་ཆེས་རྗེ་དེ་ཉིད་གཅིག་པུར་དབེན་རི་ལ་བཞུགས་པར་གསན་ནས་གསོལ་བཅའ་སོགས་མཐུན་རྐྱེན་ཨ། བསྒྲིགས་ཤིང་རྗེའི་མདུན་ལ་བྱོན་ཏེ། ཕན་ཚུན་ཐུགས་ནང་མཐུན་པའི་གསུང་མཛད་མང་པོ་གནང་། དེ་ནས་བསོ་སྤྲུལ་ཕར་བྱོན་སོང་བ་ལ་རྐྱེན་ནས་རྗེའི་ཐུགས་སྐྱོ་བའི་ཚུལ་གྱིས་མདུན་སྒམ་གྱི་སྟེང་ན་འགུགས་ཞིག་ཕྱག་བྲིས་མཛད་ནས་བཞུགས་ཡོད་སྐབས། གནས་བདག་རྡོ་རྗེ་ཀུན་གྲགས་མ་ཡིན་སྐད་པས་བུད་མེད་མཛེས་མ་རིན་པོ་ཆེའི་རྒྱན་དུ་མས་བརྒྱན་པ་ཞིག་འོང་ནས་འདི་སྐད་ཟེར། ཡ་ཡཿ གནས་མཆོག་རྡོ་རྗེའི་གསང་ཞུག །མ་དང་མཁའ་འགྲོའི་འདུ་ར། །ངོ་མཚར་དུ་མ་ཡོད་པས། །གནས་འདིར་ཕེབས་པ་ལེགས་སམ། །ཧེ་རུ་ཀ་དཔལ་ཁྱོད་ནི། ངེད་ཅག་རྣམས་ཀྱི་ཚོགས་དཔོན། །སྔོན་སྨོན་འཕྲོ་ཡིས་འཛོམས་པས། །ཤེས་རབ་གསུམ་གྱི་ཕོ་ཉ། །ཟླ་བའི་བཅུད་ཀྱིས་བསྐྱངས་ན། །རང་སྐལ་ཆོས་ཀྱི་ཕ་ཕོག །དུས་སུ་ལོན་པ་ཨེ་ནམ། །ཤར་གྱི་པདྨའི་དཀྱིལ་འཁོར། །ནུབ་ནས་བསུ་བ་ཨེ་ནམ། །ཆོས་འཛིན་གསལ་གྱི་མིང་ལ། །རང་སྐལ་མཁའ་འགྲོའི་གསང་སྒྲུབ། །དུས་སུ་བརྡ་དོན་ཁྲོལ་ལ། །རིམ་གྱིས་གཏད་པ་ཨེ་ནམ། །ལྷོ་ཡི་ཙན་དན་སྨུག་པོ། །ཅང་ཤེས་ཡུལ་དུ་ངོམ་ན། །དབྱིངས་ཀྱི་ཌཱཀྐིས་བསུ་བ། །མི་རིང་འོང་བ་ཨེ་ནམ། །ཤེས་རབ་མདའ་མོའི་སྒྱུ་རྩལ། །དུས་སུ་སད་པ་ ༈ ཨེ་ནམ། །ལྷ་ཡི་ཚུལ་ཁྲིམས་མེ་ཏོག །ཁྱེད་ཅག་དཔལ་དུ་ཤར་ཡང་། །སྨོན་ངན་ཁྭ་ཏ་རོག་པོས། །ཆོ་འཕྲུལ་སྟོན་པ་ཨེ་ནམ། །གསལ་གསལ་མཁའ་འགྲོའི་བརྡ་ཚིག །ཙིཏྟའི་ག་འུར་ཨ་ཐམ། །འཁོར་འདས་ཆོས་ཀུན་རོ་གཅིག །ཐ་དད་བྲལ་བ་ཨེ་ནམ། །རོ་རྩལ་འགགས་མེད་རང་གསལ། །བདེན་འཛིན་མེད་པ་ཨེ་ནམ། །ཀུན་རྫོབ་སྒྱུ་མའི་ཡུལ་ལ། །མངོན་ཞེན་བྲལ་བ་ཨེ་ནམ། །གང་ཤར་གང་སྣང་ཆོས་ཉིད། །རྩིས་གདབ་མེད་པར་མཛོད་ཅིག །ཅེས་ཟེར་ནས་མི་སྣང་བར་གྱུར། དེའི་སྐབས་སུ་རྗེའི་དངོས་སློབ་མང་པོ་ཕྱོགས་ཉེ་རིང་ཐམས་ཅད་ནས་བྱོན་ཏེ། རང་སྐལ་གྱི་ཟབ་ཆོས་སྣ་ཚོགས་ཀྱིས་བསྐུལ་བ་པོ་བྱས་ནས་མཉེས་པ་གསུམ་གྱི་ཞབས་ཏོག་བསྒྲུབ། རྗེས་ཀྱང་མཁའ་འགྲོས་ལུང་བསྟན་བཞིན་ཆོས་ཀྱི་བདག་པོ་རྣམས་ལ་རང་སྐལ་གྱི་གདམས་པ་ཐམས་ཅད་ཤོག་སེར་ལས་ཞལ་བཤུས་ཏེ་གསལ་ཁྱབ་ཏུ་སྤེལ་བར་མཛད། དེ་སྐབས་སུ་ངོ་མཚར་བའི་རྟེན་འབྲེལ་བདུན་ལ་སོགས་པ་མ་བསྒྲིགས་ཤུགས་ལ་འབྱུང་བ་དེར་འདུས་ཀྱི་བུ་སློབ་ཐམས་ཅད་ཀྱིས་མཐོང་ཆོས་སུ་བྱུང་ནས་མཛད་ཕྲིན་མཐའ་རྒྱས་སུ་ཁྱབ་པར་མཛད་པའོ། །དེ་ནས་དགུང་གྲངས་སོ་བདུན་ལོར་གངས་རི་ཐོད་ དཀར་ལ་བྱོན་དགོངས་ནས་ཉེ་གནས་དཔལ་ལྡན་བློ་གྲོས་ལ་རྗེས་ང་རང་དབུས་ཕྱོགས་སར་འགྲོ་སྙམ་གྱི་གསུངས་ཚེ་དཔལ་ལྡན་བློ་གྲོས་ཀྱིས་བདག་ནི་མ་རྒན་དང་སྲིང་མོ་གཉིས་ལ་ཆགས་ཞེན་སྤུ་རྩེ་ཙམ་ཡང་མེད་ངེས་པ་ཡིན་པས། རྗེ་ཁྱོད་གང་དུ་བྱོན་ཀྱང་ང་རང་འགྲོ་ངེས་པ་ཡིན་པས་དེ་ལུགས་ཐུགས་ལ་འདོགས་པར་བཀའ་དྲིན་མི་ཆུང་བར་ཞུ་ཞེས་ཡང་ཡང་ཞུས་ཚེ། རྗེའི་ཞལ་ནས་ང་རང་འགྲོ་སྟབས་ལྡན་ན་གཅིག་པུར་འགྲོ་སྙམ་པས། ཁྱེད་ཅི་བྱས་ན་ཆོག་གི་གསུང་། ཡང་ཁོ་ན་རེ་སུ་གཅིག་ཀྱང་མ་ཁྲིད་རུང་ང་རང་ནི་ཕྱག་ཕྱིར་ཁྲིད་རོགས་ཞུ་ཟེར་ནས་ཞུ་བ་མང་དུ་ཕུལ་བས། རྗེའི་ཞལ་ནས་དེ་ལྟར་བྱས་ན་ཆོག་གསུང་། དེ་ནས་འཁོར་སློབ་གཞན་གྱི་མི་གོ་བར་བྱས་ནས་བྱོན་གྲུབ་ཀྱི་སྟགོན་ལ་ཐུགས་དགོངས་མངགས་ཡོད་སྐབས། ཡབ་རྗེ་བླ་མའི་ཞལ་མཇལ་ནས་འདི་སྐད་གསུངས། ཡ་ཡཿ དབྱིངས་མི་འགྱུར་ཆོས་སྐུའི་མཁའ་ཀློང་ནས། །གདངས་མ་འགགས་བརྡ་ཡི་རིས་མོ་ངོམས། །སྟོད་སྤྲིན་དཀར་གསེབ་ཀྱི་གཡུ་འབྲུག་དང་། །སྨད་ལྕགས་སྦྲུལ་ལྟོ་བའི་ནོར་བུ་གཉིས། །ནམ་སྙིང་དང་བཛྲ་སྨོན་ལམ་མཐུས། །བསྟན་འགྲོ་བའི་དཔལ་དུ་དུས་འཛོམས་ན། །གནས་ནི་གྲོ་བདེ་ཆེན་གསང་ཕུག་ཏུ། །མ་མཁའ་འགྲོ་ཐུགས་བཅུད་ ༈ སྙིང་པོའི་ཆོས། །བུའི་རང་སྐལ་ཟབ་གཏེར་དུ་མ་ཡོད། །ལས་རྟེན་འབྲེལ་སྣ་ཁ་མ་ལོག་ན། །གཏེར་གཉིས་ཀྱི་བསྟན་པས་ས་སྟེང་ཁྱབ། །གནས་མི་རིང་རང་གནས་ཉེ་བའི་སར། །མགོན་པདྨའི་སྤྲུལ་པ་བཛྲ་མིང་། །ཆོས་ཟབ་པའི་གཏེར་ལ་དབང་བའི་དུས། །སྔོན་བདུད་སྤྲུལ་སྨོན་ལོག་རྐྱེན་སདནས། །ལྷོའི་བ་དན་མུན་པའི་དམག་ལ་བཞུགས། །བསྟན་པ་ནི་ལྷོ་ནས་ལྷོ་རུ་དར། །བྲག་སྤྲེའུའི་རིག་པས་མ་དཔྱད་ན། །མི་གཙང་གི་འདམ་དུ་བྱིང་ཉེན་ཡོད། །མཁའ་འགྲོའི་ཡན་ལག་ལས་སྐྱེས་ནི་གུ་ནི། །དུག་ཧ་ལོའི་མདངས་ཀྱིས་མ་བསྒྱུར་ན། །བསྟན་འགྲོ་བའི་གསོས་སུ་རིམ་གྱིས་སྨན། །ལས་མི་འདོད་བྱ་བ་སྣ་ཚོགས་ནི། །དུས་གཡང་དཀར་མཇུག་མས་བསྲུ་བ་ལ། །གྲོགས་ངན་པའི་ངག་ལ་མ་ཞེན་པར། །བློ་བརྟན་པོས་དབེན་རིར་སྒྲུབ་ཚུགས་ཟུངས། །ངའི་བསྟན་པ་འཛིན་སྐྱོང་ཁྱོད་ལ་རག །མ་ཌཱཀྐིའི་ལུང་བྱང་ཇི་བཞིན་དུ། །གཏེར་གཉིས་ཀྱི་དུས་ཚིག་རིག་པས་དཔྱོད། གཏེར་བཅུད་ཀྱི་སྙིང་པོའི་གདམས་སྐོར་རྣམས། །ལས་སྨོན་ལམ་ལྡན་པ་མ་གཏོགས་པར། །གང་རུང་གི་མི་ལ་གསང་རྒྱ་མཛོད། །སྤེལ་སྡོམ་གྱི་གནད་ལ་མ་མཁས་ན། །མ་མཁའ་འགྲོའི་ བཀའ་ཆད་ཁྱོད་ལ་འོང་། །ད་ཅི་དང་ཅི་འགྱུར་རིག་པས་དཔྱོད། །དུས་དུས་སུ་འབྱུང་འགྱུར་བརྡ་དོན་གསལ། །ཞེས་གསུངས་ནས་མི་སྣང་བར་ཡལ། དེ་ནས་རྗེའི་ཐུགས་དགོངས་ལ་རང་གཅིག་པུར་ངེས་མེད་ཀྱི་གནས་སུ་འགྲོ་སྙམ་ཡོད་ཀྱང་། ཌཱཀྐིའི་ལུང་བསྟན་དང་། བླ་མའི་ཞལ་ལུང་གཉིས་གང་ལ་བལྟས་ཀྱང་འཁོར་སློབ་བསྐྱང་ནས་སྡོད་དགོས་པ་འདྲ་དགོངས་ཏེ། ཡབ་རྗེ་བླ་མའི་ཟབ་གཏེར་གྱི་དབང་ཁྲིད་རྣམས་སྐལ་ལྡན་གྱི་བུ་སློབ་རྣམས་ལ་ཡོངས་ཁྱབ་ཏུ་སྤེལ་བར་མཛད་ནས། བུ་སློབ་ཐམས་ཅད་ཀྱིས་ཀྱང་བླ་མ་རིན་པོ་ཆེ་དང་ཁྱད་མེད་ཀྱི་དད་མོས་ཐོབ་པ་སོགས་འབྱུང་། དེའི་སྐབས་སུ་མཁའ་འགྲོ་ཡེ་ཤེས་མཚོ་རྒྱལ་མས་དངོས་སུ་ཞལ་གཟིགས་ནས་འདི་སྐད་གསུངས། ཨེ་ཨེཿ མི་འགྱུར་རྡོ་རྗེ་བཙུན་མོའི་མཁར། །འཁོར་འདས་ཆོས་ཀུན་སྒྲིབ་མེད་གསལ། །བྱུང་དང་འབྱུང་འགྱུར་དུས་ཚིག་རྣམས། །བརྡ་དང་བརྡ་ཡིག་སོ་སོར་འཁྲོལ། །གསོར་གདུབ་འཁྲོལ་བའི་ཁུ་མཚུར་ནས། །ཕག་གདོང་ནག་མོ་ཧྲཱིཿཡིག་མཚན། །ཕོ་རོག་དང་བ་ཁྲི་ཐུབ་དཀྱིལ། །གནམ་ལྕགས་ངར་མའི་ཟུར་གསུམ་དང་། །བསེ་ཡི་སྒྲོམ་དང་རྡོ་ཡི་སྒྲོམ། །ཀླུ་བདུད་ཁྲོས་པའི་ཁ་རླངས་ཡོད། །རིག་འཛིན་འདུས་པའི་སྣང་བརྙན་ དང་། །གསེར་གྱི་པུསྟི་མཛེས་པ་ཡོད། །ངར་གཅོད་ཆུ་སྲིན་གཟུགས་དང་ནི། །འབྱུང་པོ་འདུལ་བའི་ཐོ་ལུམ་ཡོད། །པད་འབྱུང་ཟ་བེར་མཚོ་རྒྱལ་གྱི། །དབུ་སྐྲའི་ཉག་མ་བདུན་ཀྱང་ཡོད། །ཆོས་བདག་ཌཱཀྐིའི་ཕྲིན་ལས་དང་། །ག་ཎའི་འཁོར་ལོ་བརྒྱ་གྲུབ་ན། །ལྟོ་འགྲོས་ལྟོ་འགྲོས་ལྔ་དྲུག་ཉིན། །དབང་གི་དུས་སུ་དུས་ཚིག་ཡིན། ། ༈ ཀེཤྭག྅ཏོཌམརྨ་སྐོཊཨོ་གྱུགི་ཇ་ཿ ཅེས་ཟེར་ནས་མི་སྣང་བར་གྱུར། དེ་ནས་ལོ་ཁྱིམ་དེའི་ཟླ་བ་དགུ་པའི་ཉེར་བཞིའི་ཐོ་རང་ཁར་སྒྲ་ཆེན་པོ་ཞིག་ལྡིར་བྱུང་བས། རྗེའི་ཐུགས་ལ་སྒྲ་འདི་ཅི་ཡིན་དགོངས་ཚེ། ཡང་བཀྲ་ཤིས་ཚེ་རིང་མ་ཡིན་སྐད་པའི་བུད་མེད་ཞིག་ཐོན་བྱུང་བས། རྗེའི་ཞལ་ནས་ཁྱོད་སུ་ཡིན་གསུང་། ཌཱཀྐི་ན་རེ་ང་རྡོ་རྗེ་གཡུ་སྒྲོན་མ་ཡིན་པས། ད་ལྟ་དགུང་མོ་དབང་གི་དུས་སུ་འུ་ཅག་རྣམ་གཉིས་གཏེར་ལེན་པའི་དུས་ལ་བབ་པ་ཡིན་ཟེར། རྗེའི་ཐུགས་ལ་གཡུ་སྒྲོན་མ་མིན་པ་འདྲ། བདེ་བའི་རྡོ་རྗེ་ཡིན་པར་འདུག །ཁོ་ཚེ་འཕོས་པ་ཨེ་ཡིན་དགོངས་ནས་ཐུགས་མ་བདེ་བར་སོང་བས། ཌཱཀྐིས་མཁྱེན་བཞིན་བདེ་ཆེན་བདེ་བའི་རྡོ་རྗེ་དངགཉིས་སུ་མེད་པ་ཡིན། ཁོ་རང་ཞིང་དུ་ཡིབ་པ་མིན། ད་ལན་ཁྱོད་ཀྱི་གཏེར་8༦3 གྲོགས་ཡིན་ཀྱང་ས་ཐག་རིང་བ་དང་། གཞན་དབང་ལ་སོང་བས་འདིར་འོང་སྟབས་དེ་ཙམ་ཡིན་པས་ན། ང་རང་གིས་ཁྱེད་ཀྱི་གཏེར་གྲོགས་བྱེད་གསུངས་འོད་དམར་གྱི་རྣམ་པར་གྱུར་ནས་རྗེའི་གསང་བར་ཐིམ་སོང་། ནང་སྔ་མོ་རྗེའི་