Tibetan
ཐུགས་ལ་ད་རེས་ཉེར་ལྔའི་མཁའ་འགྲོའི་དུས་ཆེན་ཡིན་པས། གཏེར་འཛིན་པའི་དུས་ཚོད་བཟང་དགོངས་ནས་དུས་མཆོད་སོགས་ལེགས་པར་གྲུབ་རྗེས། ཉེ་གནས་དཔལ་ལྡན་བློ་གྲོས་དང་། སློབ་བུ་ཐོས་དགའ་སོགས་ལས་ལྡན་རྣམས་ལ་གཏེར་སྒོ་དགོས་གསུང་ནས་བསྐོས། དེ་ནས་རྗེ་དེ་ཉིད་དང་། དངོས་སློབ་ཆོས་ཀྱི་བདག་པོ་བསྟན་འཛིན་དར་རྒྱས་དང་། ཚུལ་ཁྲིམས་བཟང་པོ་བཅས་ནེེ་གྲོ་སྟག་ཚང་ཕུག་ཏུབྱོན་ནས། ངོ་མཚར་བའི་ཟབ་གཏེར་སྤྱན་དྲངས་པ་ནི། སྐུ་ཚབས་སུ་གུ་རུའི་སྐུ་རིན་པོ་ཆེ་ལྗོན་དམར་ལས་གྲུབ་པ་དང་། གསུང་རྟེན་དུ་བྱེ་མ་ཨ་ཀྲོང་ལས་གྲུབ་པའི་སྒྲོམ་བུ་ཤོག་སེར་རིགས་ལྔ་བཞུགས་པ་དང་། ཐུགས་རྟེན་དུ་གནམ་ལྕགས་ཨུ་མ་ལས་གྲུབ་པའི་ཕུར་བུ་དང་། ཡོན་ཏན་རྒྱས་བྱེད་ཀྱི་ཆོས་སྐོར་རྡོ་སྒྲོམ་གུ་རུའི་ཕྱག་རྟགས་ཅན་དང་། ཕྲིན་ལས་ཀྱི་ཆོས་སྐོར་སྡིག་སྒྲོམ་ཧཱུྃཿཡིག་གིས་མཚན་པ། ཁྱད་པར་ཟབ་གཏེར་དྲིལ་བ་སྡོང་པོ་ལྟ་བུའི་ཆོས་སྐོར་བསེ་སྒྲོམ་རྡོ་རྗེའི་རྒྱ་ཅན་དང་། གཞན་ ཡང་བདུད་རྩི་ཆོས་སྨན་ལ་སོགས་པ་མྱོང་གྲོལ་གྱི་དམ་རྫས་དུ་མ་གཏེར་ནས་བཏོན་ཏེ་དེར་འདུས་ཀྱི་བུ་སློབ་ཐམས་ཅད་ངོ་མཚར་སྐྱེས་ཏེ་དད་མོས་ཀྱི་གསོས་སུ་གྱུར། གསེར་གྱི་རྡོ་རྗེ་རྩེ་ལྔ་པ་དང་། གཡུ་སྒྲོམ་རྣམས་ནི་རྟེན་འབྲེལ་རྗེས་མཐུད་དུ་བཞག དེ་སྐབས་སུ་མཁའ་འགྲོ་རལ་གྲི་འབར་མས་བྱུང་དང་འབྱུང་འགྱུར་གྱི་ལུང་བསྟན་མང་དུ་གསུངས་པ་གཏེར་གཞུང་དུ་གསལ། དེ་ནས་ཟབ་གཏེར་གཉིས་ལ་མངའ་དབང་འབྱོར་ཞིང་འཛིན་སྐྱོང་བྲིས་སྤེལ་གྱིས་བསྟན་པ་མཐའ་རྒྱས་མཛད་པའོ། །དེ་ནས་དགུང་གྲངས་སོ་བརྒྱད་ལོར་ཡབ་རྗེ་བླ་མའི་ཟབ་གཏེར་གྱི་གཏེར་སྒྲུབ་མཛད་ནས་སྐུ་མཚམས་ལ་བཞུགས་ཡོད་སྐབས་འོད་གསལ་གྱི་གཟིགས་སྣང་དུ་ཐིག་ལེ་སྔོན་པོ་གསལ་ལ་འོད་ཟེར་འབར་བའི་ཀློང་དུ། ཀུན་མཁྱེན་ཆེན་པོ་པཎྜི་ཏའི་ཆ་བྱད་ཅན་ཕྱག་གཡས་ཆོས་འཆད་དང་གཡོན་ས་གནོན་མཛད་ཅིང་ཞབས་གཉིས་རྡོ་རྗེ་སྐྱིལ་ཀྲུང་དུ་བཞུགས་ནས་ཞལ་འཛུམ་བརྩེ་བའི་ཚུལ་གྱིས་འདི་སྐད་གསུངས། ཀྱེེ་རིགས་ཀྱི་བུ་གཞི་ལ་ལྟོས་དང་། སངས་རྒྱས་ནི་འཁྲུལ་བ་ལ་མི་གནས། སྐྱེ་བ་མེད་དོ། །འགགས་པ་མེད་དོ། །རྟག་ཆད་ཀྱི་མཐའ་ལས་འདས་སོ། །སྤྲོས་པའི་ཆོས་ཀུན་ཡེ་ནས་གཞི་ལ་རྣམ་པར་དག་གོ །ལྷུན་གྲུབ་3 རིན་པོ་ཆེ་སྐུ་དང་ཡེ་ཤེས་ཡོན་ཏན་ཐམས་ཅད་ཡེ་རྫོགས་ཆོས་ཉིད་ཀྱི་ཀློང་དུ་འདའ་བ་ནམ་ཡང་མེད་དོ། །ཀྱེེ་རིགས་ཀྱི་བུ་སངས་རྒྱས་དང་སེམས་ཅན་གཉིས་ཀྱི་གཞི་རང་བྱུང་དུ་གང་གིས་མ་བྱས། རྐྱེན་སུས་ཀྱང་མ་བསྒྲུབ། རང་བཞིན་གཉུག་མའི་ཡེ་ཤེས་ཀྱི་རོལ་པ་ཆེན་པོ་འདི་ནི་ཕུང་པོ་ཞལ་ཕྱག་ལས་འདས་པ། མཚན་མ་ཀུན་དང་བྲལ་ཞིང་བརྗོད་དུ་མེད་པ་ཕྱམ་བརྡལ་ཡེ་ཤེས་ཀྱི་ཀློང་དུ་ཐམས་ཅད་རྫོགས་པའོ། །ཀྱེ་རིགས་ཀྱི་བུ་གཞི་དབྱིངས་སྟོང་པ་འདི་ལ་རྒྱས་འདེབས་མ་བྱེད། ཆད་ལྟ་ལ་གོལ་ལོ། །རང་གསལ་སྣང་ལ་འགགས་མེད་ཧྲིག་ཧྲིག་འདི་ལ་ལྷན་འདེབས་མ་བྱེད། རྟག་ལྟ་ལ་གོལ་ལོ། །འབོལ་ལོ་ཝལ་ལེ་འདི་ལ་མ་ཞེན་ཅིག །འདོད་ཁམས་ཀྱི་གནས་ལ་གོལ་ལོ། །མེད་པ་ཡང་མ་ཡིན་ནོ། །རང་རྩལ་འགགས་མེད།ཡོད་པ་ཡང་མ་ཡིན་ནོ། ། ཆོས་ཀུན་རང་བཞིན་སྟོང་པ། ཡོད་མེད་གང་ཡང་མ་བྱེད་ཅིག །ཡོད་མིན་མེད་མིན་གྱི་གནས་སུ་གོལ་ལོ། །ཀྱེེ་རིགས་ཀྱི་བུ་སེམས་རང་བྱུང་གི་ཡེ་ཤེས་དེ་ཀ་ཐ་དད་མ་ཡིན་རོ་གཅིག །དུ་མ་མ་ཡིན་ཉག་གཅིག །མ་བཅོས་མ་བསླད་ཅིག །བཅོས་ན་བསླད་དོ། །དཔྱད་པ་མ་བྱེདཅིག །བློ་ལས་འདས་པའོ། །བྱར་མེད་དུ་ཐོངས་ཤིག །རང་བབ་ཡིན་པས་གཤིས་སུ་ལྷོད་ ༈ ཅིག །དྲན་པ་ཕྱོགས་ཡན་ཆེན་པོ་འཇུར་བུས་མ་བཅིངས་ངང་དུ་སྐྱོངས་ཤིག །རང་ཤར་ཡིན་ནོ་བསྒོམ་བློ་ལས་འདས་སོ། །ཡེངས་སུ་མེད་པས་འཁྲུལ་དུ་མི་སྲིད་དོ། །གཞི་རྩ་དང་བྲལ་བས་སྤང་བླང་གི་ཆོས་ཀྱིས་མ་བཅོས་མ་བསྒྱུར་མ་ལེན་པར་རང་བྱུང་གི་ཡེ་ཤེས་རང་ཐོག་ཏུ་བཙན་ས་ཟིན་པར་གྱིས་ཤིག །གདོད་མའི་རང་བྱུང་གི་གཞི་ལ་འཕོ་འགྱུར་བསྒྲེས་རྒུད་དང་བྲལ་བ། འཆར་ནུབ་གཡོ་བ་མེད་པ། སྤྲོས་པའི་མཐའ་བརྒྱད་དང་བྲལ་ཞིང་རྣམ་པར་ཐར་པའི་སྒོ་གསུམ་དང་ལྡན་པ། ནམ་མཁའ་ལྟ་བུ་མི་ཆོད་པ། མི་ཤིགས་པ། བདེན་པ། སྲ་བ། བརྟན་པ། ཐོགས་པ་མེད་པ། མ་ཕམ་པ་སྟེ་རྡོ་རྗེའི་ཆོས་བདུན་དང་དམ་བཅའ་བཞི་དང་ལྡན་པའི་རང་རིག་སེམས་ཀྱི་རྡོ་རྗེ་འདི་ནི་འཁྲུལ་བ་དང་བྲལ་བ། འཁྲུལ་དུ་མི་སྲིད་པ། འཁྲུལ་བར་མི་གནས་ཤིང་འཁོར་འདས་རྒྱན་དུ་རྫོགས་པ་སྐུ་གསུམ་མཉམ་པ་ཉིད་ཀྱི་ངང་རྟོགས་པར་གྱིས་ཤིག །ཀྱེེ་རིགས་ཀྱི་བུ་དེ་ལྟར་གཉིས་མེད་ཀྱི་ཡེ་ཤེས་ལ་གདེང་བཞིའི་དྲོད་ཚད་ཀྱི་གཟེར་ཆེན་གདབས་པས་མི་གནས་གཞོན་ནུ་བུམ་པའི་སྐུར་སངས་རྒྱས་པ་ལ་སྐད་ཅིགགཅིག་གིས་བྱེད་ཐོག་དེ་ཀར་གྲོལ་བར་གདོན་མི་ཟའོ། །ཞེས་གསུངས་ནས་མཇུག་མ་རྫོགས་ཀྱང་ གཞན་རྐྱེན་ཤུགས་དྲག་པོ་ཞིག་གིས་ཉམས་སྣང་ལས་སད་དོ། །དེ་ནས་རྗེའི་ཐུགས་དགོངས་ལ་ད་ནི་ཀུན་མཁྱེན་ཡབ་སྲས་ཀྱི་ཆོས་ཀྱི་བསྟན་པའི་བཀའ་བབ་པ་འདྲ་དགོངས་ནས། དེར་འདུས་ཀྱི་སྐལ་ལྡན་ཆོས་ཀྱི་བདག་པོ་ཀརྨ་དོན་གྲུབ། པདྨ་བདེ་གསལ། ཚུལ་ཁྲིམས་བཟང་པོ། ཡི་གེའི་འདུ་བྱེད་དུ་ལུང་གིས་བསྔགས་པ་ཚུལ་ཁྲིམས་རྡོ་རྗེ་ལ་སོགས་པའི་བུ་སློབ་རྣམས་ལ་ཀློང་ཆེན་ཡབ་སྲས་ཀྱི་གསུང་ཆོས་ཀྱི་དབང་ལུང་ཁྲིད་སོགས་ཞིབ་རྒྱས་སུ་གནང་བར་མཛད། དེ་སྐབས་མཁའ་འགྲོ་རལ་གྲི་འབར་མ་ཡིན་སྐད་པའི་དར་དང་རུས་པའི་རྒྱན་དྲུག་གསོལ་བ། ཕྱག་ན་ཀཱ་པ་ལ་བདུད་རྩིས་བཀང་བ་འཛིན་པ་ཞིག་འོང་ནས་འདི་སྐད་ཟེར། ཁྱེད་ཀྱི་བདུད་རྩི་འདི་གསོལ་དང་། སྔོན་གྱི་གཏད་རྒྱ་སད་འོང་ཟེར། རྗེའི་ཐུགས་ལ་སྔོན་གྱི་གཏད་རྒྱ་སད་ནས་ཟབ་གཏེར་བྲི་སྤེལ་བྱེད་ཀྱིན་ཡོད་པས། དགཏད་རྒྱ་སད་དགོས་པ་ཅི་ཡིན་དགོངས་ཚེ། ཌཱཀྐིའི་ཞལ་ནས་སྔོན་གྱི་གཏད་རྒྱ་ཟེར་བ་ཁྱེད་འཕྲང་འགོའི་གཏེར་ཆེན་ཤེས་རབ་འོད་ཟེར་ཡིན་སྐབས་གཞན་རྐྱེན་གྱིས་གཟུགས་སྐུ་ཆོས་དབྱིངས་སུ་བསྡུས་ནས། ཟབ་ཆོས་གུ་རུའི་ཐུགས་སྒྲུབ་མཐོང་བ་དོན་ལྡན་གྱི་ཆོས་སྐོར་སྐྱ་མོ་བྲག་ལ་སྦས་པ་དེའི་གཏད་རྒྱ་དུས་ལ་སད་འོང་ཟེར་ནས་བརྡ་ཞིག་བསྟན་པ་ལ། ཧེ་ ༈ ཧེཿ བྱང་གི་གཞོན་ནུ་སྟོབས་ཆེན། །དཔའ་སྙིང་རལ་པ་སྤྲུགས་པས། །དེའི་འབངས་བྱིའུ་ཆུང་ཕྲ་མོ། །རྒྱ་སྟག་གམ་དུ་འཕྱོ་ཡང་། །བར་ཆད་རྐྱེན་གྱིས་མི་ཚུག །གཤིན་རྗེ་གདེང་བའི་ཁ་རུ། །འཛུམ་དྲུག་སྟག་གི་ཐིག་ལེ། །རྒྱུ་སྐར་བཞིན་དུ་བསྒྲོད་ན། །འཇིགས་པའི་ཧ་ཧ་གོད་བྱུང་། །དེ་བཟློག་རྡོ་རྗེ་ཕྲ་མོ། །སྟོང་རྩ་ངག་འདོན་གལ་ཆེ། །དེས་ནི་མི་ཤིགས་རྫོང་ཚུ།། ཡ་ཡཿ གསེར་ལ་སྦྲང་རྩིའི་ངར་ཆགས། །ངར་ལ་རལ་གྲིའི་སོས་འགྲན། །རལ་གྲི་གསེར་དུ་གྱུར་ཚེ། །གསེར་དང་རལ་གྲི་མ་དབྱེ། །ཨུ་ལ་མཁུན་པའི་སྒྲ་ལ། །དེ་ཕོས་ཆགས་པ་བྱེད་ཚེ། །འགྱུར་ལྡོག་མང་པོ་འབྱུང་གི དེ་ལ་སྲིན་བུ་མ་འགྲོ། །ངུར་ཕག་སྦྲུལ་ལ་བརྩེ་ཚེ། །སྦྲུལ་གྱི་རྨུགས་འཛིན་ཁུར་ནས། །རྨུགས་འཛིན་གཡང་དཀར་སྟེང་དུ། །རྒྱུག་གྲབ་མཁས་པའི་སྟེང་གི །མ་འཕྲད་བར་དུ་བར་ཆད། །རྐྱེན་དབང་མི་འབྱུང་ངེས་པ། །ཆུ་ལ་རལ་གྲིས་དཔེ་བཞིན།། ཡེ་ཡེཿ ནམ་མཁའ་ཁམས་ཀྱི་བུ་མོ། །ལྕགས་ཀྱུའི་མདངས་ལ་ཞོན་ནས། །ཁ་དོག་སྣ་ལྔའི་སྒྱུ་རྩལ། །སྲོག་གི་ཐིག་ལེ་ངོམ་ཚེ། །འགྱུ་བྱེད་རྒྱལ་བའི་ཐུགས་དབྱིངས། །རང་ལ་ལྟད་མོ་ངོམ་ཚེ། །ཆགས་མེད་ཞེན་ མེད་སྐྱོངས་དང་། །རྣལ་འབྱོར་རྡོ་རྗེའི་གྲོང་འཇུག །རྒྱལ་བའི་མཚན་བཟང་གྲངས་ཀྱི། །འཁྱུད་འཁོར་རྐང་གྲངས་རྫོགས་ཚེ། །དབེན་རིར་ས་འཛིན་ཚད་ཡིན། །སེང་གེ་གང་རྩེར་འགྱིང་ན། །གཡུ་རལ་རྒྱས་པ་ཆོས་ཉིད། །མ་མཁས་གྲོང་ཡུལ་ཉུལ་ན། །ཁྱི་དང་བྱི་ལས་བརྙས་འོང་། །སྒྱུ་མའི་རྫས་ལ་ཆགས་ན། །རིན་ཆེན་དང་པོ་བཞིན་ཡང་། །བསླུ་བར་འགྱུར་བ་ཆོས་ཉིད། །དཔེ་དེ་གཟུགས་ལ་གོང་མའི། །རྗེས་སུ་སྙེགས་མེད་སྐལ་ལྡན། །ཞེས་ཟེར་བཞིན་གར་གསུམ་སྒྱུ་མའི་གར། བདེ་བའི་གར། དབྱིངས་ཀྱི་གར། བསྒྱུར། བརྡ་གསུམ་བསྟན་ནས་དབྱིངས་སུ་ཐིམ་སོང་། རྗེའི་ཐུགས་ལ་སྔར་མེ་སྦྲུལ་ལོར་དབྱིངས་སྣང་མཁའ་འགྲོའི་ཤོག་སེར་ཞིག་གཏད་བྱུང་བས་དེའི་བརྡ་བྱང་རེད་དགོངས་ནས་རྟེན་འབྲེལ་ཙམ་དུ།ཨབབྷཻཿ ཆོས་ཀྱི་བདག་པོ་ཤཱི་ལ་བཛྲ་ལ་ཕྲིན་ལས་ཕྲན་བུ་རེ་བྲི་སྤེལ་མཛད། དེ་ནས་ཉིན་གཅིག་རྗེ་དེ་ཉིད་དང་སློབ་བུ་ཚུལ་བཟང་ལ་སོགས་པའི་བུ་སློབ་འགའ་དང་བཅས་པས་བྲ་ཐོ་འཇོག་པ་སོགས་མཛད་སྐབས། བྲ་བ་ཞིག་གིས་ཁུང་སྒོ་ནས་འདི་སྐད་ཟེར། ཙིག་ཙིག་འཁོར་བའི་ཆོས་ལ། །ཙིག་ཙིགསྙིང་པོ་མི་འདུག །སྔོན་གྱི་ལས་ཀྱིས་བསླུས་པའི། །ཨ་བྲ་རྫ་བྲ་ངེད་ཚོ། །འདུས་པ་ ༈ སྤང་རི་ཁོདསྙོམས། །བཟའ་བཅའ་རྩྭ་རྩེ་རྩྭ་འབྲས། །བཏུང་བ་བདུད་རྩིའི་ཆུ་བཟང་། །ལོངས་སྤྱོད་འབྱོར་བ་ཕུན་ཚོགས། །སྨོན་ལམ་རང་དབང་འཛོམས་ཡང་། །ད་རེས་འདུས་བྱས་ཆོས་ཉིད། །འདུག་པ་ཨབ་ཁུང་འདྲེན་སོ། །སྐྱིད་སེར་རླུང་གིས་གང་འདུག །འདི་ཡང་མི་རྟག་མཚན་ཉིད། །རྩྭ་རྩེ་རྩྭ་འབྲས་ལོ་མ། །ད་རེས་སྲོག་གཅོད་གཤེད་རེད། །འདི་ཡང་མི་རྟག་མཚན་ཉིད། །རྣལ་འབྱོར་ཚོགས་དྲུག་རྒྱན་ཤར། །བྲ་ཙིག་གནོད་པར་མཐོང་འདུག །འདི་ཡང་མི་རྟག་མཚན་ཉིད། །སྒོམ་ཆེན་རི་ལ་འདུག་ཀྱང་། །སྐྱབས་མེད་ཨ་བྲའི་གཤེད་མ། །འདི་ཡང་མི་རྟག་མཚན་ཉིད། །རང་སེམས་ཆོས་སྐུར་མཐོང་ཟེར། །ཡུལ་སྣང་ཞེན་པ་མཆོད། །འདི་ཡང་མི་རྟག་མཚན་ཉིད། །ན་ནང་ཚོགས་པའི་ཨབ་རོག །ད་ལོ་ང་བས་མ་ལུས། །འདི་ཡང་མི་རྟག་མཚན་ཉིད། །ཙིག་ཙིག་ཨ་བྲའི་སྡུག་བསྔལ། །ཙིག་ཙིག་སུས་ཀྱང་མི་བཟོད། །ཙིག་ཙིག་ཟེར་ནས་དབུགས་དང་བྲལ་སོང་བས། རྗེའི་ཐུགས་ལ་ཨ་ཁ་ཁ་ཁོང་རྣམས་ལ་འདི་ཙམ་གྱི་སྡུག་བསྔལ་ཡོད་པ་འདི་ཅི་ལན་དགོངས་ཚེ། གནས་བདག་ཡིན་སྐད་པའི་བུད་མེད་ཞིག་འོང་ནས་ཁྱོད་མཚམས་ཁང་ནང་དུ་ མི་བཞུགས་པར་ཨབ་ཁུང་སྒོ་ལ་ཅི་མཛད་ཀྱིན་ཡོད་ཟེར། རྗེའི་ཞལ་ནས་ཨ་བྲའི་ལོ་རྒྱུས་ཞིབ་པར་གསུངས། ཁྱད་པར་ན་ནང་ང་རང་གིས་ཨ་བྲ་རྣམས་ཀྱིས་ས་ཕུད་ཐབས་བྱས་པ་ཡིན་པས་འདིས་ལན་པ་ཨེ་ཡིན་སྙམ་གྱི་གསུངས། མོ་ན་རེ་ཨ་བྲའི་སྐད་ཤེས་མི་སྲིད་པས་འདི་ཁྱོད་ལ་བརྡ་དོན་དཔེ་རུ་བསྟན་པ་འདྲ་ཟེར། ཡང་རྗེའི་ཞལ་ནས་བརྡ་དོན་ཨ་བྲས་མི་ཤེས། ང་རང་གིས་ཁོང་རྣམས་ས་ཕུད་པ་དེ་ལན་གསུངས། མོ་ན་རེ་ཁྱོད་རྣལ་འབྱོར་པ་ལ་མ་གྲོལ་བའི་སེམས་ཅན་དང་། གྲོལ་བ་ཐོབ་པའི་སངས་རྒྱས་གཉིས་མེད་པ་ཡིན་པས།ཨ་བྲའི་ས་ཕུད་བྱས་ཀྱང་རྣམ་སྨིན་སོགས་པ་གང་ཡང་མེད། གལ་ཏེ་ཡོད་པར་བྱས་ཀྱང་ཁྱོད་ཀྱི་སྤྱན་ལམ་ལ་བརྒྱུད་པའི་ཆེ་བ་མི་དང་། ཆུང་བ་སྲོག་ཆགས་ཀྱི་རིགས་སུ་གཏོགས་པ་ཐམས་ཅད་འཁོར་བ་མཐའ་ཅན་དུ་འགྱུར་བ་ཡིནཔས། ཨ་བྲ་རྣམས་ལས་དག་པ་རེད་ཟེར་རྗེའི་ཐུགས་ལོག་མཛད་ནས་ཁྱོད་ཀྱིས་རྒྱུ་འབྲས་ཁྱད་བསད་ཀྱི་གཏམ་མ་བཤད། ང་བསད་བསད་འདྲེན་པའི་སངས་རྒྱས་ཡིན་ན་མི་གཅིག་གིས་རིག་པ་མེད་པ་འུག་པ་ལྟ་བུ་ཅི་ལ་ཡིན་གསུངས་ནས་ཐུགས་ལོག་མང་དུ་མཛད་ཚེ། མོ་ན་རེ་དེང་སང་གི་སེམས་ཅན་བསོད་ནམས་དམན་པའི་དུས་དབང་གིས་སངས་རྒྱས་མི་གཟུགས་སུ་གྲུབ་པའི་ ༈ ཡོན་ཏན་མ་མཐོང་ནས་ལོག་པར་ལྟ་བ་སོགས་བྱེད། བདུད་མིའི་ཁོག་ཏུ་ཞུགས་པ་མ་ཤེས་ནས་རང་གཞན་ལོག་ལམ་ལ་ཞུགས་པ་ནི་སྙིགས་དུས་ཀྱི་རང་མཚང་རེད། དུས་ངན་གྱི་རང་རྟགས་དང་གཏེར་སྟོན་གྱི་ཡོན་ཏན་རྣམས་འདི་ལྟར་རེད་ཟེར་ནས་འབྱུང་འགྱུར་གྱི་ལུང་བསྟན་བརྡ་རུ་བསྟན་ཚེ། རྗེའི་ཐུགས་ལ་གནས་བདག་ངོ་མ་ཡིན་པར་འདྲ་དགོངས་ནས། ཡ་དེ་ན་ཨ་བྲའི་བརྡ་དོན་ཅི་ཡིན་ཁྱོད་ཀྱིས་སྨྲོས་དང་གསུངས་ཚེ། མོ་ན་རེ་བླ་བྲང་དང་ཁྱེད་གཉིས་ལ་དཔེ་བཞག་བྱེད་ལ་རེད་ཟེར་ནས་མི་སྣང་བར་གྱུར། རྗེའི་ཐུགས་ལ་བླ་བྲང་ནས་དེ་སྐབས་རྣམས་སུ་གསོལ་བཅའ་ཅུང་ཟད་སྤྲད་པ་འདི་རེད་དགོངས། དེ་ནས་དཔོན་གཡོག་ཐམས་ཅད་ཚུར་བྱོན་ནས་རང་རང་གི་ཐུན་བཅད་ནས་བཞུགས་ཡོད་སྐབས། རྗེའི་ཧ་བ་ཀུན་ལོ་དེ་ལ་བློ་བུར་དུ་ནད་ཞིག་བྱུང་འདུག་པས། དེ་ལ་རིམ་གྲོ་སོགས་ཅི་དགོས་ཐམས་ཅད་རྗེ་རང་གི་དབུས་དེར་འདུས་ཀྱི་བུ་སློབ་རྣམས་ཀྱིས་བསྒྲུབ་སྐབས། ནང་བར་སྔ་མོ་བླ་མ་དམ་པ་གསུང་མཆོག་རྡོ་རྗེ་བྱོན་འོང་བས། རྗེའི་ཞལ་ནས་ཁོང་གི་ཧ་ལི་འདི་ལ་ཐུགས་གཏད་དང་རིམ་གྲོ་ཅི་དགོས་གསུང་དུ་གསོལ་ཞུས་ཚེ། བླ་མའི་ཞལ་ནས་ང་རང་ད་ནང་འོང་དོན་འདི་ལ་དགོས་པ་ཡོད་པས། ད་ལྟ་ཆོས་ འབྲེལ་བྱེད་གསུངས། དེའི་ཐབས་ཙམ་གྱི་ཧ་བས་རྗེའི་ཞལ་ལ་བལྟ་ཞིང་ལག་གཉིས་ཐལ་མོ་སྦྱར་བའི་ཚུལ་བྱས་ནས་ཁ་ནུབ་ཕྱོགས་སུ་བསྟན་ནས་ཚེའི་དུས་ལས་ཡོལ་སོང་བས། བླ་མ་གསུང་མཆོག་རྡོ་རྗེས་ཆོས་ལུང་སོགས་ཞིབ་རྒྱས་སུ་གསུངས། རྗེའི་ཐུགས་ལ་བླ་མས་ཧ་ལི་འཆི་འགྲོ་བ་མཁྱེན་པ་འདྲ་དགོངས་ནས་ཕྱག་རྫས་ཅི་ཡོད་ནང་ནས་འབུལ་བ་སོགས་ཕུལ་བར་མཛད། དེ་ནས་གཏེར་ཆེན་ལས་རབ་གླིང་པ་དང་། རྡོ་གྲུབ་རིན་པོ་ཆེ་རྣམས་ཀྱི་མདུན་དུ་ཕྱག་རྫས་ཅི་ཡོད་སོགས་ཕུལ་ཞིང་། རྗེས་ཀྱི་རིམ་པའི་དགོངས་ཞག་ལ་སོགས་པ་ཐམས་ཅད་མཐའ་རྒྱས་སུ་མཛད། དེ་ནས་རྗེ་དེ་ཉིད་ཧ་བའི་དོན་དུ་སྐུ་མཚམས་ལ་བཞུགས་ཡོད་སྐབས། མཁའ་འགྲོ་བདེ་བའི་གོ་ཆ་ཡིན་སྐད་པའི་དར་མཐིང་གི་ལྭ་བ་གསོལ་བ་རུས་རྒྱན་དང་རིན་པོ་ཆེ་དུ་མའི་རྒྱན་གྱིས་སྤྲས་ཤིང་གཞོན་ཚུལ་ལང་ཚོ་དང་ལྡན་པ་ཞིག་གིས་འདི་སྐད་ཟེར། ཡེ་ཡེཿ དབྱིངས་མི་འགྱུར་ཆོས་སྐུའི་མཁའ་ཀློང་ནས། །གདངས་མ་འགགས་སྣ་ཚོགས་སྒྱུ་འཕྲུལ་ངོམ། །རྩལ་བདེ་སྡུག་རི་མོ་ཅིར་ཡང་འཆར། །ཁྱོད་ཀློང་ཆེན་སྒྱུ་མའི་རྣལ་འབྱོར་པ། །ཡུལ་སྣང་བ་འཕྲད་པའི་ཆོ་འཕྲུལ་ལ། །རྩིས་གདབ་ཀྱི་དགོངས་པ་ཨ་རེ་ཆུང་། །ཀུ་ཀུ་ནི་ལས་དང་སྐལ་བར་ལྡན། །སྔོན་ ༈ འདོང་ཆུར་ཁྱོད་ནི་པད་གླིང་དུས། །མོས་བསོད་ནམས་བསགས་པའི་ལས་འཕྲོ་ཡིས། །དཔའ་བོ་ཁྱོད་ཀྱི་སྐུ་ཡི་གཟུངས་མར་འབྲེལ། །སྨོན་ལོག་གི་བར་ཆད་སྟོབས་དབང་གིས། །ལས་མཐའ་མ་ནག་ཕྱོགས་གྲོགས་ཀྱིས་བསླུས། །དེའི་རྐྱེན་གྱིས་ད་རེས་ཀུ་ཀུར་སྐྱེས། །ང་ཁྱོད་ཀྱི་ཡིད་ལ་བཅག་པ་ཡི། །མོས་དགེ་རྩ་དེ་བཞིན་འགྲུབ་འགྱུར་ན། །གནས་ཟངས་མདོག་དཔལ་རིར་ཚོགས་གྲལ་འགྲོ། །སླར་གདུལ་བྱའི་ཡུལ་ལ་ལོ་གསུམ་ནས། །དཔའ་བོ་ཁྱོད་ཀྱི་འཁོར་དུ་སྐྱེས་ནས་ཀྱང་། །དོན་གཉིས་ཀྱི་དཔལ་ལ་སྤྱོད་པར་ངེས། །ཞེས་ཟེར་ནས་མི་སྣང་བར་གྱུར། རྗེའི་ཐུགས་ལ་ངའི་ཡིད་ལ་བཅག་པ་ཞེས་པ་ནི་མོ་རང་གིས་དགེ་རྩ་ལ་ཆོས་དབྱིངས་རིན་པོ་ཆེའི་རྩ་བ་རབ་ན་བརྒྱ། མིན་ཀྱང་ལྔ་བཅུ་འམ། ཐན་རྩ་ལྔ་ལས་མི་ཉུང་བ་ཞིག་བསྡུས་ནས་བུ་སློབ་རྣམས་ལ་ཁ་འདོན་བྱེད་དུ་བཅུག་པ་དང་། ཁྱད་པར་དེའི་ཁྲིད་ཀྱང་བཤད་ནས་བསྒོམ་བསྒྲུབ་བྱེད་དུ་བཅུག་དགོས་དགོངས་པ་དེ་ཀ་ཡིན་པ་འདྲ་དགོངས་ཏེ། རྗེ་ལ་སྔར་དངོས་སློབ་དམ་པ་ཐུགས་ཀྱི་བུ་ཆེན་ལ་ཤུལ་བླ་མ་གསང་སྔགས་ཞེས་པས་གསོལ་བཅའི་རྟེན་དུ་དངུལ་ཞིག་ཕུལ་ཡོད་པ་དེ་ཀ་ཡི་གེ་བླུ་ཡོན་ལ་བཞག་ཡོད་པས། དེའི་ རྩ་བ་བྱས་ནས་ཕྱག་རྫས་ཀྱི་ལྷག་མ་རྣམས་ཡི་གེའི་མཐུན་རྐྱེན་མཛད་དེ། རྗེ་དངོས་སློབ་བླ་མ་དཀར་དོན་དང་། ཉེ་གནས་བསོད་ནམས་དབང་ཕྱུག་གཉིས་ལ་ཀུན་མཁྱེན་ཡབ་སྲས་ཀྱི་གསུང་དང་། གཞན་ཡང་གསར་རྙིང་རིས་མེད་ཀྱི་དཔེ་ཆ་རྣམས་བླུ་དགོས་གསུངས་ནས་མངགས་པ་སོགས་མཛད་ཚེ། དེ་སྐབས་རྫུན་དབྱེན་ཞིག་གིས་རྗེ་ལ་ཐུགས་སུན་གྱི་གཏམ་མང་པོ་ཞུས་པ་ལ་རྐྱེན་བྱས་ནས་ཐུགས་འདུན་ཞིག་དུ་གཏད་པ་དང་། སྐུ་ཕྲེང་ཕྱི་མ་འདུལ་བ་འཛིན་པའི་སྐྱེས་བུར་དགོངས་ནས་དགེ་སློང་བསྒྲུབ་དགོས་དགོངས་ཡོད་ཚེ། ཉིན་གཅིག་མནལ་ལམ་ལ་བུད་མེད་མང་པོ་འཚོགས་ཡོད་པར་གཟིགས་ནས་འདི་རྣམས་ཅི་ཡིན་དགོངས་ཚེ། ཁོང་རྣམས་ན་རེ་ངེད་ཚོ་ཁྱོད་ཀྱིས་མི་ཤེས་སམ་ཟེར། རྗེའི་ཞལ་ནས་མི་ཤེས་གསུངས། ཡང་མོ་ན་རེ་ངེད་ཚོ་སྔགས་སྲུང་མའི་ཕོ་ཉ་ཡིན། ཁྱོད་ཀྱིས་འདུལ་བ་འཛིན་པ་བྱེད་ཀྱིན་ཡོད་པས་མགོ་དང་ཡན་ལག་རྣམས་ངེ་ཚོའི་ཡིན་པས་བཅད་ན་ཆོག་ཟེར་ནས། རྗེའི་དབུ་ལ་སྤུ་གྲིས་ཚད་ནས་གཅོད་གྲབ་བྱེད་པ་དང་། གཞན་ཡང་གདུག་རྩུབ་དུ་མ་བསྟན་ཅིང་རྩ་ཁམས་འཁྲུག་སྟེ་བདེ་བའི་སྐབས་མ་སྟེར་ནས་མནལ་ལས་སད་དོ། །ཡང་ཐོ་རང་ཁར་མཁའ་འགྲོ་ཡེ་ཤེས་མཚོ་རྒྱལ་མས་ལོངས་སྤྱོད་རྫོགས་པའི་ཆས་ དང་། དཔའ་བོ་བརྟུལ་ཞུགས་འཛིན་པའི་ཆས་གོས་ཀྱི་དཔེ་བསྟན་ནས། ཁྱོད་ཀྱིས་རྣལ་འབྱོར་ཧེ་རུ་ཀ་པའི་ཆས་འདི་བཞིན་མཛོད། ཞག་ཆ་ཤས་ནས་ང་ཉིད་དངོས་སུ་ཐོན་འོང་གསུངས་ནས་སྐུའི་གར་བསྒྱུར་ཏེ་འདི་སྐད་གསུངས། མ་དག་སྣང་བ་དབྱིངས་སུ་དག་པའི་ལྟས། །ལུས་སེམས་མི་བདེའི་ཟུག་རྔུ་ཅིར་ཡང་སྡང་། །རེ་དོགས་འཁུ་འཕྲིག་ངང་ལས་མི་བསྐྱིལ་བར། །འཛིན་མེད་ལམ་གྱི་རིག་པའི་གཤིས་སུ་ཀློད། །རྒྱ་ཡན་མཐའ་བྲལ་རིག་སྟོང་འབྲས་བུར་སྐྱོལ། །ལམ་གྱི་འབོགས་འདོན་ཉེ་རྒྱུའི་ཕོ་ཉ་བརྟེན། །ཚོགས་བསགས་སྒྲིབ་སྦྱོང་ལམ་ཆོད་གྲངས་མང་ཐོང་། །སུ་ཡི་ཁ་ལ་མི་ཉན་རང་ཚུགས་ཟུངས། །རུས་རྒྱན་མེ་ལོང་བརྟུལ་ཞུགས་རྒྱན་ཆས་འཆོང་། །སྣང་བ་གཏད་མེད་གཟུང་འཛིན་ཕཊཿཀྱིས་གཏོར། །བགེགས་ཞེས་མི་དམིགས་སེམས་ཀྱི་ཆོ་འཕྲུལ་ཏེ། །ཤར་དང་གྲོལ་བ་དུས་མཉམ་རིག་ངོར་གདངས། །ལྷུན་གྲུབ་ལམ་བྱེད་ངོ་བོ་ཟད་པར་ཞོག །གནད་ལྡན་མི་མོའི་ངག་གིས་མི་བསླུ་བར། །སྨྱོན་པ་དྲང་སྲོང་བྲམ་ཟེའི་བརྟུལ་ཞུགས་སློབས། །དུས་གསུམ་རྒྱལ་བའི་གདུང་འཚོབ་ཁྱོད་བསྔགས་པས། །བདུན་ཅུའི་གར་བྱེད་དཔའ་བོ་མཁའ་འགྲོའི་གྲོང་། །ངོ་༈ མཚར་ལྟས་བཅས་གདུལ་བྱ་དང་བཅས་འདྲེན། །ཤེས་པར་གྱིས་ཤིག་པད་འབྱུང་ཐུགས་ཀྱི་སྲས། །ཀློང་ཆེན་ལས་འབྲེལ་རྩལ་ལ་སྙིང་གཏམ་གདམས། །ཞེས་ཟེར་ནས་མིང་སྣང་བར་ཡལ་མ་ཐག་མནལ་ལས་སད་དོ། །རྗེས་ཀྱང་མཁའ་འགྲོའི་ལུང་བསྟན་བཞིན་དཔའ་བོ་བརྟུལ་ཞུགས་ཀྱི་ཆས་དང་། ཧེ་རུ་ཀ་པའི་ཆས་བརྒྱད་ལ་སོགས་པ་ཐམས་ཅད་བསྒྲུབ་པར་མཛད། དེའི་སྐབས་སུ་མཁའ་འགྲོའི་རིགས་ཅན་གྱི་མཐུ་ལ་བརྟེན་ནས་ཡང་དག་ཐུགས་ཀྱི་ཆོས་སྐོར་གྱི་གཏད་རྒྱ་གློ་བུར་དུ་སད་ནས་ཆོས་ཀྱི་བདག་པོ་ཤཱི་ལ་བཛྲ་ལ་སོགས་པར་གསལ་ཁྱབ་ཏུ་སྤེལ་བར་མཛད། རྗེའི་ཐུགས་ལ་མཚོ་རྒྱལ་དངོས་བྱོན་གསུངས་པ་དེ་ཨེ་ཡིན་དགོངས་ཚེ་མཚོ་རྒྱལ་མིན་པར་མཁྱེན། རྗེའི་དངོས་སློབ་མགོན་བླ་ཀློང་ཆེན་ཞེས་པས་མདང་སུམ་ང་རང་གི་རྨི་ལམ་ལ་མཁའ་འགྲོ་ཡེ་ཤེས་མཚོ་རྒྱལ་བྱོན་པར་རྨིས་པས།