Tibetan
སངས་རྒྱས་གླིང་པའི་ཡང་སྤྲུལ་དམ་གྲིབ་ཀྱི་དབང་དུ་སོང་བ་ཡིན་པས་ད་རེས་སྐུ་རིམ་ཞིག་བསྒྲུབ་དགོས་འདུག་དགོངས་ཏེ་ཕུར་པའི་སྐུ་མཚམས་ལ་བཞུགས། གཞན་ཡང་རིམ་གྲོ་སོགས་ལེགས་པར་བསྒྲུབ་རྗེས་ཡར་ཚེས་ལ་ཡུམ་ལ་གནོད་པ་མེད་པར་ངོ་མཚར་བའི་ལྟས་བཅས་སྐུ་འཁྲུངས་པ་སོགས་ཕུན་སུམ་ཚོགས་པ་འབྱུང་བ་ཡིན་ནོ། །དེ་ནས་དགུང་ལོ་སུམ་ཅུ་སོ་གཅིག་ལོར་བསོ་སྤྲུལ་རིན་པོ་ཆེ་ནས་གདན་འདྲེན་མཛད་ནས་གསེར་སྐུ་མཆོད་སྡོང་སོགས་རབ་གནས་མཛད་ཅིང་། ཁྱད་པར་དེ་སྐབས་མཁྱེན་སྤྲུལ་རིན་པོ་ཆེའི་ཡང་སྤྲུལ་ངོས་འཛིན་མཛད་ནས་མངའགསོལ། དེ་ནས་བསོ་སྤྲུལ་རིན་པོ་ཆེ་ནས་བླ་མཆན་མཛད་ནས་ལྷ་སྡེ་ཕན་ཚུན་ཐམས་ཅད་ཀྱི་ནང་དུ་གདན་འདྲེན་བྱས་ནས་འབུལ་སྡུད་སོགས་ཀྱི་ཞབས་ཏོག་རྒྱ་ཆེན་པོ་བསྒྲུབས། དེ་སྐབས་སུ་མཁའ་འགྲོ་རལ་གྲི་འབར་མ་ཡིན་སྐད་པས་འདི་སྐད་ཟེར། ཧེ་ཧེཿ ཤར་འོད་ལན་མི་བདུན་ནུབ་ཏུ་ཆས། །ཁོང་དཔྱིད་ཀྱི་རྒྱལ་མོས་དབྱངས་སྙན་སྒྲོགས། །རི་ཕག་སྣ་འདྲ་བའི་གཡས་ཟུར་ན། །བྲག་ཧོམ་ཁུང་ལྟོ་བར་ཟབ་པའི་གཏེར། །གནམ་ལྕགས་ཀྱི་སྦལ་སྒྲོམ་ནག་པོའི་3 ནང་། །གསོད་བྱེད་ཀྱི་འཆར་ཀའི་ལས་ཚོགས་ཡོད། །བྱ་རྒོད་པོས་ནམ་འཕང་གཅོད་པའི་དུས། །དངོས་གྲུབ་ཀྱི་ཕ་ཕོག་དེ་དུས་ལོངས། །དེས་ཀླ་ཀློའི་བསྟན་པ་ལོ་བརྒྱ་བཟློག །བརྡ་གོ་འམ་པདྨ་ལས་འབྲེལ་རྩལ། །ཞེས་ཟེར་བའི་བརྡ་བྱངབྱུང་བས། ཟབ་གཏེར་གསང་ཐབས་སུ་བཞེས་ནས་གཏེར་སྒྲུབ་མཛད་ཚེ། ཤོག་སེར་བདུན་འདུག་ཀྱང་རྩ་སྒྲུབ་ཙམ་ཞིག་ཕབ། གཞན་བཀའ་གཉན་པས་ཕབ་མ་ཐུབ་པར་ཤོག་སེར་དུ་བཞུགས། དེ་ནས་དགུང་ལོ་སོ་གཉིས་ལོར་གསེར་སྨད་ཕྱོགས་སུ་བྱོན་སྐབས། རྗེ་དེ་ཉིད་ཀྱི་དངོས་སློབ་བསོ་སྤྲུལ་རིན་པོ་ཆེ་ཡང་གཉན་སར་བྱོན་ཞོར་ལ་ལྷན་དུ་ཕེབས་ནས་དོན་གཉིས་ཀྱི་མཛད་པས་གཟུགས་ཅན་གཟུགས་མེད་ཀྱི་འགྲོ་བ་རྣམས་ཆོས་ལམ་ལ་བློ་བཀོད། དེ་སྐབས་སུ་རྗེ་དེ་ཉིད་ལ་དད་འདུན་ཆེ་བའི་ཡོན་བདག་རྣམས་ཀྱིས་གསོལ་ཆང་མང་པོ་དྲངས་ནས་བཟི་བའི་ཚུལ་མཛད་ཚེ། ཡུལ་དེའི་རྒྱལ་པོ་གདུག་པ་ཅན་ཞིག་ཡོད་པ་དེ་མི་སྤྲེའུའི་མགོ་ཅན་ཞིག་ཏུ་སྤྲུལ་ནས་རྗེའི་མདུན་སར་ཉེ་འོང་བས། རྗེ་ཡིས་མཁྱེན་བཞིན་མ་གཟིགས་པའི་ཚུལ་མཛད་ནས་བཞུགས་ཚེ། ཁོས་ལྕགས་ཀྱི་སྡེར་མོ་རྣོ་བ་ཞིག་ཕུད་ནས་རྗེའི་ཐུགས་ཀར་ཚད་ཙམ་བྱེད་དུས། རྗེ་དེ་ཉིད་ཀྱི་ཏིང་ངེ་འཛིན་གྱིས་ཟིལ་གྱིས་མནན་ནས་སྐུ་དྲུང་ ༈ ཕུར་བུ་ཞིག་ཡོད་པ་དེ་ཁོ་རང་ལ་གདེངས་པའི་ཚེ། ཁོ་ཡང་ཇེ་ཆུང་ཇེ་ཆུང་དུ་སོང་ནས་བན་སྤྲང་ལྟ་བུའི་གཟུགས་བསྟན་ཏེ་སྨྲེ་སྔགས་ཀྱི་ཚིག་འདི་སྐད་ཟེར། ཙི་ཙི་ར་མ་མཐོ་རྩལ་ཆེ། །ཁྱོད་བན་བོན་སྔགས་པ་རྒྱུག་གྲངས་མང་། །ང་ཡུལ་མེད་འཁྱམས་པའི་འདྲེ་གདོན་ལ། །སྔགས་པས་ཕུར་བུ་ཅི་ཕྱིར་གདེངས། །ད་ང་འགྲོ་རང་ཡུལ་ཕྱོགས་སུ་འགྲོ། །ཁྱེད་དང་ངགཉིས་གྱེད་འགྲིགས་སྙམ། །ངེད་ཅག་ཁྱོད་ལ་གནོད་མི་བྱ། །ཅེས་ཟེར་ནས་འགྲོ་གྲབ་བྱེད་ཀྱང་ཏིང་ངེ་འཛིན་གྱིས་བཅིང་བས་འགྲོ་མ་ནུས། རྗེའི་ཞལ་ནས། ཁྱོད་ཡུལ་ཀུན་ཉུལ་བའི་སྟོབས་པོ་ཆེ། །སྐྱེ་འགྲོ་ཡོངས་ཀྱི་སྲོག་ལ་གནོད། །མ་རུངས་ཆོ་འཕྲུལ་སྟོན་ལ་མཁས། །དགོན་སྡེ་བླ་མ་ཡོངས་ལ་འཚེ། །ལས་ངན་སྣ་ཚོགས་རང་གིས་བསགས། །ཕྱི་མ་མནར་མེད་གནས་སུ་ལྟུང་། །དེ་འདྲའི་ལས་ངན་ཁྱོད་རེ་སྡུག །ང་གུ་རུ་པདྨའི་བུ་གཅིག་ཡིན། །ཆོས་བདུད་གཅོད་ཟབ་མོའི་གདམས་པ་ཡོད། །ཡུལ་གཉིས་འཛིན་གཅོད་པའི་ཕུར་བུ་འདི། །ཁྱོད་འཁྲུལ་སྣང་དངོས་པོར་འཐས་པའི་ལུས། །མ་ལུས་ཐལ་བའི་རྡུལ་བཞིན་བརླག །འཁྲུལ་མེད་ཡེ་ཤེས་ཆེན་པོར་ཨཱ། །གསུངས་པས་ཁོ་ན་རེ་ད་དུང་ང་ འཇིག་རྟེན་འདིར་འདུག་པར་སྤྲོ་བས་ད་རེས་ཁྱོད་ཀྱིས་ཐུགས་དམ་གློད་པར་མཛོད་དང་། ངས་ཁྱོད་ཀྱི་དབང་ལུང་ཁྲིདགསུམ་ཐོབ་ཚད་དང་། ཐ་ན་ཆོས་ཀྱི་འབྲེལ་བ་དང་། དད་པ་ཡོད་ཚད་ཀུན་ལ་གནོད་མི་བྱེད་ཟེར་ནས་ཁས་བླངས་དམ་བཅས་སོགས་བྱས། རྗེས་ཀྱང་ཐབས་གང་དྲག་གིས་སེམས་ཅན་གཞན་ལ་ཡང་གནོད་པ་མི་ཉན་གསུངས་པས།དེ་ལྟར་ཅི་ལྕོགས་བྱེད་ཟེར་ནས་རླུང་འཚུབས་ཞིག་ཏུ་གྱུར་ནས་སོང་། ཡུལ་དེར་ལོ་འགར་མི་ཕྱུགས་ཀུན་ལ་རྒྱལ་གདོན་གྱི་གནོད་པ་ཞི་བར་བྱེད་པ་བྱུང་། དེ་ནས་དགུང་ལོ་སོ་གསུམ་ལོར་སྟག་ཐོག་གོང་མའི་ནང་དུ་བྱོན་སྐབས། ཉག་གཏེར་རིན་པོ་ཆེ་གདུལ་བྱར་བྱོན་པ་དང་མཇལ་འཕྲད་མཛད་ཚེ། ཡབ་རྗེ་བླ་མའི་གསུང་ཆོས་འོད་གསལ་མ་བསྒོམས་སངས་རྒྱས་ཀྱི་ཁྲིད་གཞུང་རྩོད་གཞི་མཛད་ནས་ཉིན་ཞག་འགར་རྩོད་པས། ལས་གླིང་གི་ཞལ་ནས་ཁྱེད་ཀྱི་སློབ་མ་འགས་བླ་མའི་སྐུ་བླ་བཙོང་ནས་ལྟ་བ་མིན་པ་མང་པོ་བཤད་འདུག་པས། ད་ལན་ཁྱོད་བླ་མའི་སྲས་ཡིན་ཡང་དགོངས་པ་ལོན་ཨེ་ཡོད་མི་ཤེས་བསམ་ནས་དྲི་རྩོད་བྱས་པ་ཡིན་པས། ད་ལྟ་སྒོམ་སྤྱོད་འབྲས་ཀྱི་འཇོག་མཚམས་གནད་འགགས་ཅི་འདྲ་ཡིན་གསུངས་པས། རྗེའི་ཞལ་ནས་བདག་གིས་ཡབ་རྗེ་བླ་མའི་དགོངས་ཟུར་ཙམ་ཞིག་ལས་ལོན་པར་ ༈ བཀའ་ན་ཡང་ལྟ་སྒོམ་སྤྱོད་འབྲས་གནད་བསྡུས་ཀྱི་འཇོག་མཚམས་སྐྱེ་མེད་དུ་ཐག་ཆོད། ཡེངས་མེད་དུ་རྒྱུན་སྐྱོངས། འགགས་མེད་དུ་རྩལ་སྦྱོང་། བློ་འདས་སུ་ལ་ཟླ་བ་ནི་དཀའ་གནད་ཀྱི་ཆིངས་སུ་བསྟན་པ་ཡིན་གསུངས་པས། གཏེར་ཆེན་ཉིད་ཐུགས་ཤིན་ཏུ་དགྱེས་ཤིང་ཕ་རྗེས་བུས་ནོན་ཟེར་བ་འདི་ལྟར་དགོས། ད་ཁྱོད་ཀྱིས་བླ་མའི་ལྟ་བ་འདི་རེད་ཟེར་ནས་ཀུན་མཁྱེན་ཡབ་སྲས་ཀྱི་གསུང་དང་བཅས་པ་མིན་པར་ངེས་སོ་གསུངས་ནས་གཞན་ཡང་ཆོས་ཀྱི་བསྒྲོ་གླེང་མང་དུ་མཛད། དེར་འདུས་ཀྱི་སློབ་འབངས་གྲྭ་ཚང་ཀུན་གྱི་གཅིག་གིས་གཅིག་ལ་བླ་མ་ཉག་གཏེར་ནི་མཁས་གྲུབ་གཉིས་ལྡན་དུ་ཡིན་འདུག །འུ་ཅག་གི་སྤྲུལ་སྐུ་སང་ནི་བསླབ་སྦྱོང་གང་ཡང་མ་བརྩོན་ཀྱང་ད་ལན་ཆོས་རྩོད་ལས་རྒྱལ་ཁ་ཐོབ་པ་འདི་ངོ་མཚར་ཆེ་ཟེར་ནས་ནང་གྲྭ་ཐམས་ཅད་ཀྱིས་དགའ་དགའ་བྱས། དེའི་བར་སྐབས་བསོ་སྤྲུལ་རིན་པོ་ཆེ་བདེ་གནས་བྲག་དཀར་ལབྱོན་སོང་བ་སྙན་ཚེ་ཐུགས་ཆུང་མཛད་ནས་ངནི་བསུ་བ་ལ་བྱོན་དགོས་དགོངས་ཏེ་བཞུགས་ཡོད་སྐབས་དུབ་ཡོལ་ཞིག་མཛད་ཚེ། གཡུ་སྒྲོན་མ་ཡིན་སྐད་པའི་བུད་མེད་དར་མཐིང་གི་ལྭ་བ་མནབ་པ་ཕྱག་ན་མེ་ལོང་དང་མདའ་དར་འཛིན་པ་ཞིག་གིས་འདི་སྐད་ཟེར། ཨེ་ཨེཿ ལྷོའི་ གསེར་གྱི་བ་དན་འོད་པོ་ཆེ། །བྱང་འབྲོང་གི་ཁུ་རུ་ངོམས་པའི་ཚེ། །ནུབ་རུས་སྦལ་ནག་པོའི་མཁུན་པ་འདེབས། །མི་ཤེས་ལྡན་བློ་ཡིས་མ་གོ་ན། །ཐང་དཀར་པོས་ས་ལམ་གཅོད་ལ་ལྟོས། །དབྱར་སྐྱེས་ཀྱི་འཛུམ་མདངས་ཤར་བའི་དུས། །གྲོགས་ཐོག་མའི་མིང་གིས་ཚེ་འཕྲང་སེལ། །ཁོང་མི་མོའི་གཡོ་འཕྲུལ་རང་ལ་སྟོན། །ཐབས་ཤེས་རབ་ཅན་གྱི་མ་དཔྱོད་ན། དོན་གཉིས་ཀྱི་ནོར་བུ་གཞན་དབང་སྲིད། །སྟོད་སྲིན་བྱའི་ངར་སྐད་འབྲུག་ལ་འགྲན། །རྒྱ་སྟག་གི་རི་མོ་མདངས་ལྡན་ཀྱང་། །ཀུ་ཀུ་ཡི་མཇུག་མས་འགྲན་ཉེན་ཡོད། །ལྷ་གནོད་སྦྱིན་ཆེན་པོར་ལས་བཅོལ་ན། །རྐྱེན་ཆོ་འཕྲུལ་ངན་པ་དེ་ཡིས་སེལ། །ཞེས་ཟེར་ཞིང་མདུན་ཐད་དེཀར་མར་བབ་ནས་མེ་ལོང་གསལ་བ་འདི་ལ་ལྟོས་དང་གསུངས་པས་བྱུང་དང་འབྱུང་འགྱུར་གྱི་ལུང་བསྟན་སྣ་ཚོགས་ཀྱི་བརྡ་དོན་རྣམས་གསལ་བས། རྗེའི་ཞལ་ནས་མི་མིན་ལྷ་ཡི་གྲོགས་ལྔ་དང་། མཆོག་གི་གཟུངས་མ་གཉིས་ལ་དབང་བའི་དགོས་པ་ཇི་ལྟར་ཡིན་གསུངས་པས། མཁའ་འགྲོའི་ཞལ་ནས་ཁྱོད་གྲུབ་ཆེན་ཀུ་ཀུ་རས་པའི་དུས་ལུས་མེད་མཁའ་འགྲོའི་ཚོགས་དཔོན་མཛད་ནས་ལྷ་དང་གནོད་སྦྱིན་ལ་སོགས་པའི་དངོས་མེད་རྣམས་ལ་ཆོས་ཀྱི་འཁོར་ལོ་བསྐོར་ནས་འགྲོ་བའི་ ༈ དོན་རྒྱ་ཆེན་པོ་མཛད། དེ་སྐབས་ལྷ་ཡི་སྲས་མོ་འོད་ལྡན་མ་དང་། ཀླུའི་བུ་མོ་ཟླ་བ། གྲུལ་བུམ་གྱི་བུ་མོ་གན་ཛར། གནོད་སྦྱིན་གྱི་བུ་མོ་གཟུགས་ལེགས། སྐྱེ་དགུའི་བདག་མོ་རེ་མ་ཛ་རྣམས་ཀྱིས་སྨོན་ལམ་གྱི་མཐུ་ལ་བརྟེན་ནས་དུས་ད་བར་ལ་གང་འདོད་ཀྱི་དངོས་གྲུབ་སྟེར་ཞིང་ལས་བསྒྲུབ། ཁྱད་པར་ཁྱོད་ཀྱིས་དངོས་སུ་གཟུགས་མེད་རྣམས་ཆོས་ལ་བཙུད་ཅིང་ཐར་པ་བྱང་ཆུབ་ཀྱི་ལམ་སྟོན་མཛད་ཚེ་ཁོང་རྣམས་གྲོགས་སུ་འགྱུར་བ་ཡིན་ནོ།དེ་དག་ཀྱང་སྔོན་གྱི་སྨོན་ལམ་གྱི་ལས་འཕྲོ་སད་པས་དཔའ་བོ་ཁྱོད་ཀྱི་གདུལ་བྱར་གྱུར་བ་ཡིན། མཆོག་གི་གཟུངས་མ་ནི་སྐྱེ་བ་སྨོན་ལམ་དགོས་པ་ཡོན་ཏན་ཐམས་ཅད་ཁ་བྱང་སྒོ་བརྒྱ་བྱེད་པའི་ལྡེ་མིག་ནང་དུ་གསལ་ལ། དོན་ལ་དཔའ་བོའི་སྟོང་དབྱིངས་བཙུན་མོར་ཤར་བ་ཡིན་པས་ཐ་དད་ཡོད་པ་མ་ཡིན་ནོ། །གསུངས་མ་ཐག་གཏམ་གྱི་མཇུག་མ་རྫོགས་ཀྱང་གཞན་རྐྱེན་གྱིས་གློ་བུར་དུ་མནལ་སད་དོ། །དེ་ནས་དགུང་ལོ་སོ་བཞིའི་ལོར་མཁར་ནང་གོང་མའི་ནང་དུ་བྱོན་ཡོད་སྐབས་མཁའ་འགྲོའི་ལུང་བསྟན་བྱུང་ནས་གོ་མཆོག་རང་བྱུང་གི་གནས་དང་། སྦས་གནས་གསང་ཕུག་རྣམས་སུ་ཟབ་གཏེར་འབྱིན་པའི་དུས་ཚིག་ཡོད་པས་དེ་ཀར་བྱོན་དགོས་དགོངས་ནས་ཡོད་ཚེ། ཡང་ བདུད་འཇོམས་པའི་ཞལ་མཇལ་ནས་འདི་སྐད་གསུངས། ཧེ་ཧེཿ བུ་ཆུང་དྲི་མ་མེད་པ། །ཡིད་ཀྱི་དྭངས་མཚོའི་མོས་པ། །ཐོས་བྱེད་སྣོད་ལ་བཏང་ནས། །དོན་འདི་ཡིད་ལ་ཟུངས་དང་། །ནོར་བུ་འོད་མདངས་གསལ་འོང་། །ཤེལ་བུམ་དྲི་མ་མེད་པ། །ཁྱོད་ཀྱི་ལག་ཏུ་སོན་ཚེ། །གཏེར་གཉིས་བསྟན་པའི་པད་ཚལ། །ཤར་དང་ལྷོ་ནས་དར་བའི། །ཐབས་མཁས་དབང་གི་ལྕགས་ཀྱུས། །འདྲེན་བྱེད་ནུས་པ་མ་ཞན། །ཅང་ཤེས་རྩལ་ལྡན་ངང་པས། །རང་སྐལ་ཆུ་ལ་འཐུང་ཚེ། །ཁྭ་ཏ་རོག་པོའི་བསམ་ངན། །ཧ་ལོའི་མེ་ཏོག་མདངས་རྒྱས། །ཚུལ་ཁྲིམས་ལྷ་ཡི་ལྗོན་ཤིང་། །དཔྱིད་ཀྱི་རྒྱལ་མོས་བསུས་འགྲོ། །གཏེར་སྲུང་ལས་ལ་བསྐུལ་ན། །ཕ་རོལ་ནུས་པ་བཅོམ་ངེས། །ཡར་མར་ཚེས་བཅུ་གཉིས་ལ། །ག་ཎའི་འཁོར་ལོ་མ་ཆག །མ་དང་མཁའ་འགྲོའི་གྲོགས་ལྡན། །དུས་དང་དུས་སུ་བྱེད་འོང་། །སྲིད་པའི་འཁྱུད་འཁོར་གཅིག་གི །ཆོས་བརྒྱད་ཐབས་ཀྱིས་སྤོངས་ལ། །སྦས་གནས་རྡོ་རྗེ་ཡང་རྫོང་། ཟབ་གཏེར་དུ་མའི་གནས་ཡིན། །དེ་ལ་རང་ཚུགས་བཟུང་ན། །དོན་གཉིས་ནོར་བུའི་འོད་བརྒྱ། །མཐའ་དབུས་ཀུན་ནས་དར་ངེས། །གྲོགས་ཀྱི་འགྱུར་ལྡོག་སྣ་ཚོགས། །ཅེར་གྲོལ་རྒྱ་ ༈ ཡིས་བཏབ་ན། །རྐྱེན་ངན་གྲོགས་སུ་འཆར་ནས། །བདེན་མེད་སྒྱུ་མར་མཐོང་སྟེ། །དབེན་སར་སྒྲུབ་མཐའ་ཕྱིན་ངེས། །དེ་དང་དེ་སོགས་ཅི་འགྱུར། །དུས་སུ་གསལ་བ་ཨེ་ནམ། །ཞེས་དང་། གཞན་ཡང་སྒྲུབ་ཐབས་འགའ་ཡི་ཤོག་དྲིལ་དང་ཞལ་ཏ་མང་དུ་གནང་ནས་མི་སྣང་བར་ཡལ། དེ་ནས་ཡབ་རྗེ་བླ་མའི་ལུང་བསྟན་བཞིན་དབང་གི་ལྷ་མོའི་སྒོ་ནས་སྐུ་མཚམས་ལ་བཞུགས་ནས་ཁ་བསྐང་མེ་མཆོད་སོགས་ལེགས་པར་གྲུབ་རྗེས། མཆིམས་ཕུའི་ཟབགཏེར་མཚོ་རྒྱལ་སྒྲུབ་ཐབས་དཔལ་རི་མངོན་བྱེད་ཀྱི་ཆོས་སྡེ་གཏན་ལ་ཕབ་ནས། ཆོས་ཀྱི་བདག་པོ་བི་མའི་རྣམ་རོལ་བསྟན་འཛིན་དར་རྒྱས་ལ་གསལ་ཁྱབ་ཏུ་སྤེལ་བ་སོགས་མཛད། དེ་ནས་དགུང་ལོ་སོ་ལྔའི་ལོར་བསོ་སྤྲུལ་རིན་པོ་ཆེ་རྨ་ཉིན་ཕྱོགས་སུ་བཞུགས་ཡོད་པས་དེ་ཀར་རྗེ་དེ་ཉིད་བྱོན་ཞོར་དང་། སྔར་གྱི་མཁའ་འགྲོའི་ལུང་བསྟན་བཞིན་བྲག་དཀར་གསུམ་གྱི་གསང་གཏེར་རྣམས་འདོན་པའི་དུས་ལ་བབས་པས། དེ་ཀར་བྱོན་ནས་ཚེ་རིང་མས་དངོས་སུ་གྲོགས་བྱས་ཏེ། ཆོས་ཀྱི་བདག་པོ་བསོ་སྤྲུལ་སྣ་ཚོགས་རང་གྲོལ་བཅས་གཏེར་གནས་རྣམས་སུ་བྱོན་ཏེ། བདེ་མཆོག་ཐུགས་ཀྱི་གནས་ནས་ཡང་ཟབ་གསང་བ་སྙིང་ཁྲག་གི་ཆོས་སྐོར་གུ་རུ་རྡོ་རྗེ་གྲོ་ལོད་ ཀྱི་སྒྲུབ་སྐོར་རིན་པོ་ཆེ་སྣ་གསུམ་ལས་གྲུབ་པའི་རྡོ་རྗེ་བརྩེ་དགུ་པ་དང་། གཡུ་སྒྲོམ་ཆོས་སྨན་བཅས་སྤྱན་དྲངས། སྐུའི་གནས་དང་གསུང་གནས་རྣམས་ནས་གཏེར་སྲུང་རྣམས་ཀྱིས་གཏེར་རྫས་དངོས་སུ་འོང་ནས་ཕུལ་བ་སོགས་རྟེན་འབྲེལ་གྱི་སྣ་ཁ་ཕུན་སུམ་ཚོགས་པ་བྱུང་ནས་ཚུར་ཕེབས། དེ་ནས་མཁར་འགས་སང་གིས་གདན་འདྲེན་བྱས་ཏེ། དེ་ཀར་བྱོན་ནས་བསྲུང་སྐྱོབས་རིམ་གྲོ་མཛད་པ་དང་། ཁྱད་པར་དགོན་པར། བདེ་གཤེགས་མཆོད་སྡོང་བཞེངས་པར་ས་འདུལ་མཛད་སྐབས་གང་ནས་ཡོང་ཆ་མེད་པའི་དགེ་བཙུན་ཞིག་ཐོན་བྱུང་ནས་རྗེ་ལ་ཕྱག་གསུམ་ཕུལ་ཏེ་ཤོག་དྲིལ་ཆེ་བ་གཅིག་སྤྲད་ནས། འདི་རང་བྱུང་མཆོད་རྟེན་བྱ་རུང་ཁ་ཤོར་ནས་མཁའ་འགྲོ་ལས་ཀྱི་དབང་མོ་ཆེས་ཁྱོད་ལ་སྤྲོད་ཟེར་འདུག་པས། མཁའ་འགྲོའི་སྙིང་ཁྲག་གི་ཆོས་སྐོར་གྱི་ཁ་བྱང་ཡིན་ཟེར་ནས་མི་སྣང་བར་གྱུར། རྗེས་ཤོག་དྲིལ་དེ་ཁ་ཕྱེས་ནས་གཟིགས་ཚེ་མཐིང་ཤོག་ངོས་ལ་གསེར་བྲིས་ཀྱི་ཨོ་རྒྱན་བརྡ་དང་། ཟངས་གླིང་གི་བརྡ་གཉིས་སུ་སྣང་བ་ལ། རྗེས་ཨོ་རྒྱན་གྱི་བརྡ་ཡིག་གཏན་ལ་ཕབ་པར་མཛད། ཟངས་གླིང་གི་བརྡ་ཡང་གཏེར་དུ་སྦས། དེ་ནུབ་གཟིམས་ལམ་ལ་མཁའ་འགྲོ་བདེ་བའི་གོ་ཆ་ཡིན་སྐད་པས་འདི་སྐད་ཟེར། ཧྃ་ཧེཿ གཞི་དབྱིངས་སྐྱེ་མེད་ ནམ་མཁའི་རང་བཞིན། །གཞི་སྣང་འགགས་མེད་ཡེ་ཤེས་རོལ་པ། །གཞི་རྩལ་རིག་པ་དོན་གྱི་ཌཱཀྐིས། །གཞིར་བཞེངས་ལྷུན་གྲུབ་ལོངས་སྐུའི་བརྡ་སྟོན། མ་འགགས་བརྡ་གསང་སྒྱུ་མར་ངོམས་ན། །ཨེ་ཨེཿ སྦས་པའི་རྣལ་འབྱོར་ཆེན་པོ། །རིག་འཛིན་བི་མ་རསྨི། །དབང་ཆེན་གསུང་གི་ད་ལར། །རང་བཞིན་གསུམ་དུ་བཞུགས་ན། དམ་སྲིའི་འཚེ་བ་སེལ་འགྲོ། །རྒྱ་འདྲེ་གདུག་པའི་སྟོབས་ཀྱིས། །མི་རུངས་ཡོ་ལངས་འཕྲུལ་འགྱེད། །བཟློག་བྱེད་འཆར་ཀ་ནག་པོའི། །ཆེ་དབལ་རྣོ་ལ་བསྒྱུར་མཛོད། །དབང་གི་ལྷ་མོའི་ཕྲིན་ལས། །འཆི་མེད་ཚེ་ཡི་རིག་འཛིན། །བདུན་ཕྲག་གསུམ་དུ་བསྒྲུབ་ན། །འཆི་བཟློག་གནད་ཟབ་ལེགས་གོ། །དབྱིངས་ཡུམ་བདེ་ཆེན་རྒྱལ་མོ། །ལྷན་རྐྱེན་རྣལ་འབྱོར་སུ་ཁ། །གནས་གསུམ་མཁའ་འགྲོས་གྲོགས་བྱེད། །དུས་ཚིག་རྟེན་འབྲེལ་བརྡ་རྟགས། །འབྱུང་བ་གཤེད་ལ་ངོམས་ཚེ། །སྔོན་གྱི་སྨོན་ལམ་མཐུ་བཙན། །སྐྱེ་འཕྲེང་དུ་མར་ཐབས་ཤེས །ཟུང་འཇུག་བདེ་ཆེན་ཕོ་ཉར། །འབྲལ་མེད་གྲོགས་སུ་བཅིང་བའི། །དོན་གཉིས་ནོར་བུ་རྙེད་ངེས། །གཞན་རྐྱེན་སབྟས་བསྒྲིབ་ན། །ཤེལ་དཀར་རྡོ་རྗེ་ཏཱ་རེ། །དགོངས་པ་3 དབྱིངས་ལ་གཏད་ཚེ། །མཁའ་སྤྱོད་ཞིང་ཁམས་རང་སྣང་། །སྐད་ཅིག་མངོན་དུ་འགྱུར་འོང་། །པདྨ་ལས་འབྲེལ་ཁྱོད་ཀྱིས། །མ་དང་མཁའ་འགྲོའི་ད་ལར། །ག་ཎའི་འཁོར་ལོ་བསྐོར་ཡོད། །མེ་མཆོད་ལས་ཀྱི་ཁ་བསྒྱུར། །འབུམ་ཕྲག་གནད་དུ་བསྣུན་ན། །གློ་བུར་རྐྱེན་སྣང་བྱང་འགྲོ། །ཐབས་མཆོག་ཕོ་ཉའི་དབང་ཕྱུག །ཤེས་རབ་མི་འགྱུར་ཨེ་ཝཾ། །ཟུང་འཇུག་སྦྱོར་སྒྲོལ་མཐར་ཕྱིན། །གཉིས་སྣང་རུ་ཏྲ་བཅོམ་ནས། །མི་འཇིགས་ནོར་བུ་མཆོག་རྙེད། །བྱང་ཕྱོགས་བདུད་ཀྱི་བསླུ་བ། །ལྷོ་ཕྱོགས་སྲིན་མོའི་ཆོ་འཕྲུལ། །རེ་ཟུང་རྣམ་འགྱུར་ངོམ་ན། །དམིགས་མེད་ཡེ་ཤེས་ཆེན་པོས། །འཛིན་མེད་ངང་དུ་བསྒྲལ་ཚེ། །ཡུལ་མེད་ཟང་ཐལ་རྗེན་པར། །རང་ཤར་རང་ཀློང་གཞིར་ཐིམ། །དོན་མེད་གནས་ཡུལ་ཉུལ་ནས། །དགོས་མེད་གཟིམ་ལ་ཆགས་ན། །བུང་བ་རོ་ཡིས་བསླུ་བཞིན། །འབྱུང་ཚེ་དབྱིངས་ཀྱི་སྤྲུལ་པ། །ཡིད་བཞིན་ནོར་བུ་བསམ་འཕེལ། །མི་མངོན་དབྱིངས་ལ་ཡིབ་ན། །བསྟན་འགྲོའི་དོན་ཆེན་དེ་ཙམ། །ཅི་དང་ཅི་འགྱུར་ཅི་ཆ། །དུས་སུ་བརྡ་དོན་གསལ་ངེས། །ཞེས་ཟེར་ནས་ཐལ་ལྕག་ཞིག་བྱས་ཚེ་གཉིད་ལས་སད་དོ། །དེ་ནས་ནོར་བླ་མ་འོད་ཆུང་གི་ཆོས་སྒར་སྟེང་དུ་གདན་འདྲེན་ ༈ བྱས་ནས་འབོར་ས་གོང་འགབ་བར་གསུམ་ཧོར་སྐོར་དང་། ཡང་དང་། ཁང་རྒན་ལ་སོགས་པའི་བླ་སེར་ཐམས་ཅད་འདུས་པ་ལ། ཡབ་རྗེ་བླ་མའི་གཏེར་གསར་གྱི་དབང་ལུང་ཁྲིད་གསུམ་ཁ་ཚང་གསུངས། གཞན་ཡང་རྗེའི་གསུང་ཆོས་གསར་ཕབ་སྤེལ་བ་སོགས་གསལ་ཁྱབ་མཛད་སྐབས། མར་གྱི་གཡུང་དྲུང་ལྕགས་རྩེ་དང་། གཉེན་པོ་གཡུ་རྩེ། རྫ་གཡུ་གསེར་ཁྲབ་རྣམས་རང་རང་གི་འཁོར་དང་བཅས་པ་རྗེའི་མདུན་སར་འོང་ནས་ཕྱག་ཕུལ་ཏེ། རང་རང་གི་བློ་དང་མཐུན་པའི་ཆོས་འབྲེལ་མང་པོ་ཞུས། དེ་སྐབས་གཡུ་དྲུང་ལྕགས་རྩེས་རྗེ་ལ་འདས་མ་འོངས་ད་ལྟ་རྣམས་ཀྱི་ལུང་བསྟན་མང་དུ་ཞུས་ཚེ། རྗེའི་ཞལ་ནས་ཁྱོད་མི་མ་ཡིན་རྣམས་ལ་སྣང་སྲིད་གསལ་བའི་མེ་ལོང་དུས་གསུམ་མཁྱེན་པའི་ལུང་བསྟན་མེད་ཨ་གསུངས་པས། ཁོ་ན་རེ་ངེད་རྣམས་ཕྱི་ལྟར་ན་སྡེ་བརྒྱད་ཀྱི་གཙོ་བོ་དམར་ལ་དགྱེས་ཤིང་དགྲ་བོའི་སྲོག་རྩ་གཅོདཔ། ནང་ལྟར་ན་སློབ་དཔོན་པདྨའི་བཀའ་ཉན། མགོ་ནག་མིའི་དགྲ་ལྷ། འཛམ་གླིང་ཡོངས་ཀྱི་མངའ་བདག །གསང་བ་ལྟར་ན་དཀར་ཕྱོགས་ཀྱི་ཁ་འཛིན་བྱེད་ཅིང་། སངས་རྒྱས་ཀྱི་བསྟན་པ་བསྲུང་། དཀོན་མཆོག་གི་དབུ་འཕང་བསྟོད། དགེ་འདུན་གྱི་སྐུ་ཚེ་བསྲིང་། སེམས་ཅན་ གྱི་བདེ་སྐྱིད་སྤེལ། མཐའ་མི་དབུས་སུ་མི་གཏོང་བ་སོགས་རྒྱལ་དབངཔདྨ་དང་རྒྱལ་ཚབ་རྣམས་ཀྱི་བཀའ་བཞིན་བསྒྲུབས་ནས་ས་འཛིན་གྱི་སེམས་དཔའ་ཡིན་པས། ལེགས་ཉེས་ཅི་འོང་གསལ་བའི་མེ་ལོང་ཡོད་ཟེར་ནས། བསྟན་པ་སྤྱི་ལ་ཕན་པའི་ལུང་བསྟན་མང་པོ་སྨྲས། ཁྱད་པར་ད་རེས་ཀྱི་སྐབས་ཁྱོད་ཀྱིས་དོན་ཟབ་མོ་འདི་ལ་མི་མིན་མི་རུ་བརྫུས་ནས་བར་ཆད་ཅུང་ཞིག་འདུག་པས། དེ་ལ་དམ་གདོགས་བཀའ་ཡི་ཕྱག་བྱ་གལ་ཆེ་ཟེར་ནས་ཐམས་ཅད་མི་སྣང་བར་གྱུར། དེ་ནས་ཞག་འགའ་སོང་ཚེ་མི་སྙིང་རླུང་གིས་བསྒུལ་ནས་འདུས་སྡེ་རྣམས་ལ། གློ་བུར་གྱི་རྐྱེན་སྣང་ཅུང་ཟད་ལ་བརྟེན་ནས་མཁོན་འཐབ་ཅིག་བྱུང་སྐབས། ཡབ་རྗེ་བླ་མས་ཞལ་གཟིགས་ནས་ལུང་བསྟན་བསླབ་བྱ་དུ་མ་གནང་། ཁྱད་པར་ད་ལན་གྱི་འཐབ་མཁོན་འདིའི་རྐྱེན་མི་མ་ཡིན་རྒྱལ་གཤེད་ཅིག་གིས་གནོད་པ་ཡིན་པས། ཐབས་ནི་ཞི་བ་ཆེན་པོས་དམ་ལ་བཞག་ན་ཡུལ་སྡེ་ཕྱི་ནང་ཀུན་དང་། དགོན་སྡེའི་བླ་སྤྲུལ་རྣམས་ལ་གནོད་མི་ཚུགས་པའི་དོན་ཡོདགསུངས། དེ་ནས་རྗེས་ཀྱང་བླ་མའི་ལུང་བསྟན་བཞིན་ཡུལ་དེ་ཀར་དབང་བའི་གདོན་ཞིག་ཡོད་པ་དེ་ཐབས་ཞི་བའི་སྒོ་ནས་དམ་ལ་བཏགས་པ་སོགས་མཛད་ཅིང་ཡུལ་དེ་བདེ་ལ་བཀོད། དེ་སྐབས་གཡས་རུའི་ ༈ ཆོས་སྒར་ནས་སྒོ་སྤྲུལ་འཇིགས་བྲལ་ཆོས་ཀྱི་བློ་གྲོས་ཀྱིས་རྗེ་དེ་ཉིད་ཀུན་མཁྱེན་ཆེན་པོ་དངོས་ཡིན་གསུངས་ནས་དཔོན་གཡོག་འགའ་བྱོན་ཏེ་དབང་ཁྲིད་མང་པོ་གསན། ང་ཁྱེད་ཀྱི་ཆོས་ཀྱི་བདག་པོ་ཡིན་ཀྱང་ཚེ་ཅི་འདྲ་ཡོད་མི་གོ་ཡང་། སྐྱེ་བ་ཕྱི་རིས་ཁྱོད་ཀྱི་བསྟན་པ་ལ་ཞབས་ཞུ་རེ་འོང་བར་ལ་ཐང་ཅི་ཡོད་གསུངས་ཚེ།རྗེའི་ཞལ་ནས་ཁྱོད་བདག་གི་ཆོས་བདག་ཡིན་ན་ང་རང་གིས་ཁྱོད་ཀྱི་སྐུ་བགེགས་སེལ་ཐབས་ལོས་འོང་གསུངས་པས། ཡང་སྒོ་སྤྲུལ་ཞལ་ནས་རྟེན་འབྲེལ་བཟང་། ད་ལན་ང་རང་ལ་ཚེ་གེགས་ཡོད་ཀྱང་སེལ་ཐབས་ཞིག་ལྡན་འོང་གི་ཏ། ནམ་ཞིག་ན་ངས་ཁྱོད་ལ་རེ་ལྟོས་ཞིག་བཅའ་དགོས་ཐང་། དེ་དུས་ལུགས་གཉིས་གང་ཐད་ནས་མ་འཆུག་གསུངས། རྗེའི་ཐུགས་དགོངས་སུ་གསུངས་མཛད་འདིར་བལྟས་ན་སྐུ་ཡེ་མི་