Tibetan
པར་སྔགས་ཀྱི་བདག་མོ་ཨེ་ཀ་ཛ། །དབང་ཕྱུག་རྣམ་གཉིས་མཆོད་གསོལ་རྒྱུན་དུ་བརྩོན། །རྟེན་འབྲེལ་སྙིང་པོ་འབུམ་ཕྲག་བཞི་བསྐྱངས་ཏེ། །ས་གནས་ཀུན་ལ་སྙིང་གཏེར་ཆེན་མོ་དང་། །ཛི་བྷ་ལྷ་དང་ནོར་རྒྱུན་རིག་བྱེད་མ། །གེ་སར་དགྲ་བླའི་རྒྱལ་པོའི་གཏེར་བུམ་བཞུགས། །གསར་མའི་དགེ་བཙུན་སྐྱེས་བུ་ཐམས་ཅད་ཀྱིས། །བདེ་མཆོག་དགྱེས་པ་རྡོ་རྗེ་ ༈ གཤིན་རྗེ་གཤེད། །དུས་ཀྱི་འཁོར་ལོའི་ལྷ་དགུའི་བསྙེན་ཚད་བསྐྱར། །གདུགས་དཀར་བསྒོམ་བཟླས་གནད་ཐོང་ལས་སྦྱོར་བྱ། །ས་མིག་ཀུན་ཏུ་བཅུད་ཀྱིས་གསོལ་བ་དང་། །རིགས་གསུམ་མགོན་པོའི་སྐུ་གྲངས་མང་དུ་གདབ། །ཡུལ་སྡེ་ཀུན་གྱིས་སིདྡྷི་སྒྲོལ་མ་དང་། །སྐྱབས་འགྲོ་ཚིགས་བདུན་གསོལ་འདེབས་དུང་ཕྱུར་གྲངས། །ཅི་མང་བསྐྱར་ཞིང་དམག་ཇག་ཁྲིམས་འཇུག་སྟེ། །དགེ་བཅུའི་ཆོས་ལ་འབད་ཅིང་སྡིག་ལས་དོར། །ས་གནད་རེ་ལ་རྣམ་པར་རྒྱལ་མ་དང་། །བདུད་འདུལ་མཆོད་རྟེན་ཚད་ལྡན་བཞེངས་གྲུབ་གནད། །དགོན་གནས་ཀུན་གྱི་འོག་དང་བྱང་དུ་བྱ། །ཁྱད་པར་ལྟོ་ཕུར་ནག་མོའི་སྲོག་འདྲེན་པའི། །མཆོད་རྟེན་ནག་པོ་བང་རིམ་སྟོང་རྩ་བཞེངས། །དུས་གཉན་ཀུན་ཏུ་བསྙེན་གནས་ཆོ་ག་འབུངས། །ལས་སྒྲིབ་སྦྱངས་ཕྱིར་སྦྱིན་སྲེག་འབུམ་ཐེར་དང་། །ཡིག་བརྒྱའི་དུང་འཁོར་གྲངས་མང་དར་དུ་འཕྱར། །བོད་ཀྱི་ལྷ་གཅིག་འཕགས་མཆོག་སྙིང་རྗེའི་ལྷ། །སྐུ་བཞེངས་གསུང་རྟེན་རྡོ་ལ་བརྐོ་བ་དང་། །དུང་ཕྱུར་བརྐྱང་ཞིང་རྒྱུན་དུ་ཡི་དམ་བརྟེན། །ཚོགས་ཀྱི་འཁོར་ལོ་བྱེ་བ་ཚད་ཏུ་ལོངས། །མ་ཧཱ་ཀ་ལའི་དམག་བཟློག་གྲུབགྱུར་ན། །བདེ་སྐྱིད་ཉི་མ་གསར་དུ་འཆར་ ཡང་སྲིད། །དེ་ལྟར་གནད་དང་ལྡན་པར་མགྱུར་ན། །ཤེལ་འཕྲུ་ཅན་གྱི་རྒྱ་ཡིས་སྣ་དྲངས་ཏེ། །ཆུ་མིགས་གནད་ཀླུ་ཡི་མིག་འཕྲུལ་ནས། །ཉུང་དཀར་བྲེགང་འབྱུང་པོའི་དམག་དཔུང་འགྱེད། །ཡུལ་སྡེ་ཀུན་ལ་མཚོན་གྱི་ཆར་པ་འབེབས། །ཁྲག་གི་མཚོ་འཁྱིལ་སྡིག་པའི་དུད་སྤྲིན་འཁྲིགས། །ཤི་ཚད་འདྲེར་སྡང་སྐྱེ་འགྲོའི་ཤེས་རྒྱུད་བརླབས། །མི་མིན་ཡུལ་ནས་སྟོན་པ་མ་ཤི་ཀ །འབྱུང་སྟེ་ལོག་པའི་བསྟན་བཅོས་སྣ་ཚོགས་སྟོན། །རང་གི་འཕྲུལ་བྱེད་གདོན་སྒོ་ནད་རིགས་ཚོགས། །བྱིན་རླབས་བྱས་ཙམ་བཅད་ཅིང་བདེ་བར་བྱེད། །མུ་གེས་མནར་བའི་སྐྱེ་འགྲོའི་ཚོགས་རྣམས་ལ། །ས་རྡོ་གསེར་དངུལ་ཟས་གོས་བསྒྱུར་བྱས་ཏེ། །སྦྱིན་པ་གཏོང་ཞིང་ཕན་པའི་ལས་ཀ་བྱེད། །དང་པོ་རྒྱུ་འབྲས་ལམ་སྟོན་ཀུན་ཡིད་ཆེས། །དེ་མཐར་ལོག་པའི་བསྟན་བཅོས་བམ་པོ་ལྔའི། །དོན་འགྲེལ་བརྒྱ་དང་དགུ་བཅུ་རྩ་ལྔ་ཡིས། །རྒྱུད་བསླུས་ཀུན་ཀྱང་ཆོས་ལམ་དེ་རུ་ཞུགས། །བསྟན་པ་མཐར་རྒྱས་ཤམ་བྷ་ལའི་གྲོང་ཁྱེར། །གངས་རི་དྲུག་ཅུ་ཚུན་ཆོད་དབང་དུ་བྱས། །དེ་དུས་ཀླུ་ཡི་སྤྲུལ་པ་ཀྱ་ཡིས་ཕུད། །ཀྱ་བསྟན་དར་ཞིང་སྔར་བཞིན་ཁྱབ་པའི་ཚེ། །ཀྱ་ཡུལ་སོག་པོ་གསེར་གྱི་སྣ་བ་ཅན། །ལྕགས་ཀྱི་འཁོར་ལོས་ཀྱ་བསྟན་ཧོར་ ༈ དུ་བྱེད། །ཀྱ་ལ་ཀླུ་སྐྱབས་ལོག་བསྟན་བཅོ་ལྔ་འབྱུང་། །ནམ་མཁའི་མདོག་ཀུན་ཁ་དོག་སྣ་ཚོགས་འབྱུང་། །རིགས་ལྡན་རྒྱལ་པོ་ཏིང་ངེ་འཛིན་ལས་བཞེངས། །མངོན་པར་ཤེས་པ་ལྔ་ཡིས་བལྟས་པ་ཡིས། །སངས་རྒྱས་བསྟན་པ་མཐའ་རུ་ཐུག་པ་མཐོང་། །གཙུག་ལག་ཁང་སྟེང་གསེར་གྱི་རྔ་བརྡུངས་ཏེ། །གཡུ་ཡི་ཁྲི་བཤམས་རིགས་ལྡན་དམག་བསྡུས་ན། །དུས་ཀྱི་འཁོར་ལོ་རྡོ་རྗེ་རྣོན་པོ་དང་། །རྡོ་རྗེ་གྲགས་པོ་ལ་སོགས་གྲུབ་ཆེན་བརྒྱ། །རིགས་ལྡན་འཁོར་ལོ་རེ་རེར་སྤྲུལ་པ་ལས། །ཤར་ལྷོ་ནུབ་བྱང་འདུས་པའི་གྲལ་བསྒྲིགས་ཤིང་། །ཀུན་ཀྱང་རྡོ་རྗེའི་ཏིང་ངེ་འཛིན་ལ་བཞུགས། །དམག་མི་རེ་ལ་རྡོ་རྗེའི་གོ་བསྐོན་ཅིང་། །ཐ་ཀར་×༡ཝཾཤམ་བྷ་ལའི་བསྐོར་རོ།། རྒྱ་མཚོའི་མཐར་ཁྱབ་ནམ་མཁའི་དབྱིངས་ཁྱབ་པའི། །སྤྲུལ་པ་རེ་རེས་འགྲོ་བའི་དོན་བྱེད་དོ། །སླར་ཡང་རྟགས་ཙམ་འཛིན་པ་ལྔ་བརྒྱ་འབྱུང་། །དེ་ནས་རིམ་བཞིན་ཚེ་ལོ་བཅུ་པའི་བར། །བསྟན་པ་མར་འགྲིབ་བྱམས་མགོན་བསྟན་པ་འབྱུང་། །བརྒྱད་ཁྲིའི་བར་དུ་གོང་དུ་འཕེལ་བར་འགྱུར། །ཁུག་པ་འདི་ནི་བསྐལ་པའི་ཁུག་པ་མིན། །བསྟན་པའི་ཁུག་པ་ཡིན་ཏེ་སྐྱོན་དེ་ཡང་། །དམ་ཚིག་སྡོམ་པ་མ་བསྲུང་ཆོས་འཁོར་ འགྱེད།༈ །དགེ་བའི་ལས་སྤང་སྡིག་པའི་ལས་བྱས་པའི། །འབྲས་བུ་ཆུད་མི་ཟ་བ་སྨིན་པ་ཡི། །དེ་དུས་མི་ནག་ཁ་ནས་ཆོས་བཤད་ཅིང་། །དགེ་བཙུན་བསྔགས་པའི་ཚོགས་རྣམས་དཀོར་ལ་འབྱམས། །ངན་དགུའི་ལས་བྲལ་ངག་ཏུ་རྒྱུག་ཅིང་འཚེར། །བསྟན་པའི་སྲུང་མ་བརྟན་མ་བཅུ་གཉིས་ཀྱི། །མིག་འབྲས་དམ་སྡོམ་ཉམས་པའི་གྲིབ་ཀྱིས་བསྒྲིབས། །དཀར་ཕྱོགས་ཁས་ཞན་ནག་ཕྱོགས་ཁ་དར་ནས། །ཆོས་ལ་བར་གཅོད་དམ་ཚིག་ནང་འགྲེས་བྱེད། །སྡིག་པའི་ལས་ཀྱིས་སོ་ནམ་དཔལ་ཁ་བསྐྱོད། །རང་གིས་ལས་བསགས་འབྲས་བུ་བྱུང་བ་ལ། །ཡུལ་རྐྱེན་གཞན་གྱི་དབང་དུ་མ་གྱེར་བར། །རང་སྐྱོན་ཉོན་མོངས་ལས་ངན་ཚོགས་སྡོམ་ཏེ། །རྟག་ཏུ་དཀོན་མཆོག་གསུམ་ལ་བློ་ཕུག་གཏོད། །བྱང་ཆུབ་སེམས་ཀྱི་ཀུན་ནས་བསླང་བ་ཡི། །སྡོམ་པ་གསུམ་གྱིས་རང་རྒྱུད་མཛེས་པར་གྱིས། །རིམ་གཉིས་ལམ་བསྒོམ་ཚེ་སྒྲུབ་མཉམ་པ་དང་། །དམ་ཚིག་ངོ་ལྐོག་མེད་པར་རྟག་ཏུ་བསྲུང་། །སྡིག་པ་ཕྲ་མོའི་ཚོགས་ལའང་འཛེམ་པར་གྱིས། ། དཔེར་ན་མེ་སྟག་ཕྲ་མོ་ཙམ་གྱིས་ཀྱང་། །རྩ་ཕུང་རི་རབ་ཆེན་པོ་བསྲེགས་ལ་ལྟོས། །དགེ་བ་ཆུང་ངུས་མི་ཕན་བརྙས་མི་བྱ། །ཆུ་ཡིས་ཐིགས་པས་བགྲང་གསོག་རྒྱ་མཚོར་འགྱུར། །ཐོས་ ༈ བསམ་སྒོམ་གསུམ་ཚུལ་བཞིན་བསླབ་པར་གྱིས། །ཐོས་པས་རང་རྒྱུད་མ་ཐུལ་ཅི་ལ་ཕན། །སྒོམ་པ་གནད་དུ་མ་སོང་འཆིང་བའི་རྒྱུ། །དེ་ཕྱིར་རྒྱལ་བ་གོང་མའི་རྣམ་ཐར་བཞིན། །ཡོན་མཆོད་སྡེ་གཉིས་ཀུན་གྱིས་དེ་བཞིན་མཛོད། །སྐྱིད་ཚེ་དཀོན་མཆོག་གསུམ་པོ་རྒྱབ་ཏུ་དོར། །སྡུག་ཚེ་འོ་དོད་ར་མདའ་སྦྲན་གྱུར་ཀྱང་། །རི་གཟར་རྦབ་བཞིན་ལས་འབྲས་བཟློག་ཏུ་མེད། །དེ་ཕྱིར་སྐྱིད་སྡུག་ལེགས་ཉེས་གང་བྱུང་ཡང་། །དཀོན་མཆོག་གསུམ་ལ་བློ་ཕུག་རྟག་ཏུ་གཏོད། །སྙིགས་མའི་དུས་འདིར་ཐུགས་བསྐྱེད་རྨདབྱུང་ཞིང་། །རྒྱལ་ཀུན་ཕྲིན་ལས་གཅིག་བསྡུས་ཐོད་ཕྲེང་རྩལ། །ཡེངས་མེད་དད་པས་བསྐུལ་ཞིང་གསོལ་འདེབས་འབུངས། །དེ་ནི་ནམ་ཡང་བསླུ་བ་ཡོད་མ་ཡིན། །ཅེས་པ་སོགས་དང་དེའི་འཇུག་ཏུ། བོད་འབངས་ལས་ལྡན་སྐྱེས་བུ་ཐམས་ཅད་ཀྱིས། །པདྨ་འབྱུང་གནས་ཞལ་ལུང་མ་སྒྲུབ་ན། །མཐའ་མིའི་དམག་དཔུང་བོད་པ་རང་གིས་བྱེད། །དེ་ཕྱིར་པད་འབྱུང་མཚོ་རྒྱལ་བཀའ་བཞིན་དུ། རང་བྱས་བདུད་ཀྱི་དབང་དུ་མི་གཏོང་བར། །དུས་རྣམས་ཀུན་ཏུ་གུ་རུ་སིདྡྷི་དང་། །འཇིགས་སྒྲོལ་འཕགས་པའི་གསོལ་འདེབས་སྙིང་པོར་བརྩོན། །མི་དགེའི་སེམས་བོར་དཀར་པོའི་ལས་ལ་ འབུངས། །པད་འབྱུང་བྱིན་རླབས་ནམ་ཡང་རྒྱུན་ཆད་མེད། །བསླུ་མེད་རྡོ་རྗེའི་ཚིག་གིས་ཨ་ཐཾ་རྒྱ། །ཞེས་གསུངས་ནས་ཕྱག་གཡས་རྗེ་ཉིད་ཀྱི་དབུ་ལ་བཞག་ནས་ཕ་དམ་པའི་སྨོན་ལམ་སུམ་བཅུ་པ་གསུངས་ནས། ཁྱོད་ཀྱི་དེ་དེ་བཞིན་དུ་འགྲུབ་པར་ཤོག་ཅིག་གསུངས་ནས་མི་སྣང་བར་གྱུར་ཏོ། །དེ་ནས་རིམ་བཞིན་རང་ཡུལ་ཕྱོགས་ལ་ཕེབས་ནས་ཡབ་རྗེ་བླ་མ་དང་མཇལ་འཕྲད་མཛད་ནས་རྗེ་ཉིད་ཀྱི་ཕྱག་ཏུ་འབྱོར་བའི་རྒྱུ་རྫས་དངོས་པོ་ཐམས་ཅད་ཡབ་རྗེ་བླ་མར་མཇལ་རྟེན་དུ་ཕུལ། བླ་མ་རིན་པོ་ཆེས་ཀྱང་ཐུགས་མཉེས་པར་མཛད། དེ་ནས་དགུང་ལོ་བཅུ་དགུའི་ལོར་ཟུར་བབ་བརྡ་བྱང་མཁའ་འགྲོ་ཀུན་གསལ་མས་གདམས་པ། ཡེ་ཡེཿ ནུབ་དབུ་བདུད་རྩེ་དགུའི་ཉེ་ཆ་ན། །མི་བསོད་ནམས་ལྡན་པ་རཏྣའི་མིང་། །དེའི་ཡན་ལག་བྲག་གི་སྤྲེའུ་རྩེ། །མ་དབྱིངས་ཀྱི་སྤྲུལ་པ་ཏཱ་རེའི་མིང་། །རིགས་དབང་པོར་ལྡན་ཞིང་གསལ་བྱེད་ལེགས། །ལྷ་དམར་པོའི་ལས་ཀྱི་མཐུས་བསྐུལ་ནས། །དུས་རེ་ཞིག་ཉེ་རྒྱུས་དཔལ་ལ་སྤྱོད། །གནས་མ་ངེས་ནས་འོང་བ་ཨ་ཏིའི་མིང་། །གདོང་སྨེ་བ་རྡོ་རྗེའི་རི་མོ་ཡོད། །དཔལ་དེ་ལ་བླ་མའི་མཆན དཀོན་མཆོག་སྤྱི་འདུས་སྒྲུབགཏེར་གཏོད། །དཔལ་ཡེ་ཤེས་སྤྲུལ་པ་གྲོལ་གྱི་མིང་། །ཁྱོའི་ཟབ་ ༈ པའི་ཆོས་དང་འཕྲད་པའི་ཚེ། །བློ་གཉིས་འཛིན་གྱིལས་ལ་མ་ཞེན་ན། །སྒོམ་བྱུང་གི་ཤེས་རབ་ནང་ནས་རྙེད། །རྟེན་ཕྱི་མ་ཁྱོད་ཀྱི་སྲས་སུ་སྐྱེས། །ཟབ་གཏེར་ལ་སྤྱོད་པའི་སྐལ་དང་ལྡན། །རྒྱ་ཆེན་པོ་ས་ཡི་གཏེར་ལ་དབང་། །ཆོས་གདུལ་བྱ་བསྟན་པ་དབུས་ནས་དར། །ཀུན་གསལ་གྱི་རྟ་བདུན་དབང་པོ་ཁོང་། །ཤེས་རབ་ཀྱི་རྩལ་ཤུགས་སྟོབས་ལྡན་ཀྱང་། །ལྷ་དམའ་རུ་རྩེ་ཡི་འཕྲུལ་མེད་ན། །ཁྱོད་ངམ་ནག་བྲག་གི་སྤྲེའུས་འཇོམས། །ཆབ་སྲིད་དང་བསྟན་པ་ཉམས་ཡང་སྲིད། །མིའི་ལུས་ལ་བདུད་ཀྱི་བློ་སེམས་ཅན། །ལས་གང་བྱས་བསྟན་པའི་བདུད་དུ་བབ། །བློ་རིག་པའི་ཐབས་ཀྱིས་མ་སྤངས་ན། །ལས་བྱ་བ་ནག་པོ་བདུད་དབང་ཤོར། །ནུབ་སྤྲེལ་རྫོང་མཁའ་འགྲོའི་གསང་ཕུག་ཏུ། །རི་གླང་ཆེན་འགྱིང་འདྲའི་གཡས་ཟུར་ན། །བྲག་སྲིན་མོ་གནམ་དུ་འཕྱོང་འདྲ་ཡོད། །གནས་དེ་རུ་མཁའ་འགྲོ་གསང་བའི་ཆོས། །རིགས་མི་འདྲའི་སྒྲོམ་བུ་ལ་ཡང་ཡོད། །དུས་རྟེན་འབྲེལ་གསང་ཐབས་ཚུལ་དུ་ལོངས། །གནས་ཆུ་གསུམ་འདུས་པའི་ཉེ་ལོགས་ན། །རི་བུམ་པ་འདྲ་བའི་ལྟེ་བ་རུ། །ཕ་མཚོ་སྐྱེས་རྡོ་རྗེའི་སྐུ་དང་ནི། །གནམ་ལྕགས་ཀྱི་སྡིག་པ་ར་དགུ་ཡོད། །དེ་ཐབས་དང་རིག་པའི་ གནད་ལྡན་ཚེ། །དུས་མི་རིང་རང་གཏེར་ལག་ཏུ་ལོན། །མ་འོངས་གི་འབྱུང་འགྱུར་དུས་སུ་སྨྲ། །བརྡ་གོ་འམ་པདྨ་ལས་འབྲེལ་རྩལ། །ཞེས་ཟེར་ནས་ཡལ། དེ་ནས་རྗེའི་ཐུགས་དགོངས་ལ་ལན་གྲངས་མང་པོར་མཁའ་འགྲོའི་ལུང་བསྟན་ཡོད་ཀྱང་ཆ་མི་ཆོད་པས། ཡབ་རྗེ་བླ་མའི་དྲུང་དུ་བྱོན་དགོས་སྙམ་ནས་ས་གཏེར་གྱི་ཁ་བྱང་དང་གཏེར་རྫས་རྣམས་ཕྱག་བསྣམས་མཛད་ནས་བླ་མའི་སྐུ་མདུན་དུ་ཕེབས། ཕྱག་ཕུལ་ནས་བླ་མའི་ཞབས་སྤྱི་བོར་བླངས་ནས་སྐུ་མདུན་དུ་བཞུགས་ཏེ་གཏེར་རྫས་དང་ཁ་བྱང་རྣམས་ཕྱག་ཏུ་ཕུལ། ཟུར་བབ་ལུང་བསྟན་གྱི་ལོ་རྒྱུས་དང་། མཁའ་འགྲོས་ཞལ་གཟིགས་ཚུལ་གྱི་རྣམ་གྲངས་ཐམས་ཅད་སྦ་གསང་མེད་པར་ཞུས་ཚེ། བླ་མའི་ཞལ་ནས་ཁྱོད་ཀྱི་ཚེ་རབས་ཀྱི་གཟུངས་མ་དང་། ས་གཏེར་གྱི་གནས་དང་། གདུལ་བྱའི་ཞིང་ས་རྣམས་རྟེན་འབྲེལ་རབ་དང་ལྡན་ན་སྟོད་དབུས་གཙང་ཕྱོགས་ལ་ཡོད་ཀྱང་། སྔོན་གྱི་ལས་དབང་གིས་ངས་བསྟན་པ་ལ་ཕན་ཐོགས་ཡོད་པར་འདུག་པས། བདུད་དབང་དུ་མ་ཤོར་ན་རྟེན་འབྲེལ་འབྲིང་ཙམ་འོང་ཐང་གསུངས། རྗེའི་ཞལ་ནས་ད་ལན་གྱི་ལུང་ཟིན་མ་འདི་བདག་གི་ཚེ་རབས་ཀྱི་གཟུངས་མ་ཡིན་ནམ་ཞུས་པས། ཁྱོད་གནས་སྐབས་རེ་དབང་བ་མ་གཏོགས་ཚེ་རབས་ཀྱི་ལས་ ༈ ལྡན་པ་དཀའ་ལེ་རེད་གསུངས། རྗེའི་ཐུགས་དགོངས་ལ་གཟུངས་མ་དང་རྟེན་འབྲེལ་མི་ལྡན་པ་ཨེ་ཡིན། རྟེན་འབྲེལ་ལྡན་ན་ང་མི་དབང་ཅི་ལ་སྲིད་དགོངས་པས། ཡབ་རྗེ་བླ་མའི་ཞལ་ནས་ཁྱོད་བསམ་མནོ་མི་དགོས་དང་ད་ལན་གྱི་རྟེན་འབྲེལ་ང་རང་གིས་ཆོས་སྐྱོང་ལ་འཕྲིན་བཅོལ་ན་ལྡན་གྱི་ཏ། ལྷ་ཟབ་སར་བདུད་ཟབ་ཟེར་བའི་དཔེ་བཞིན་དཀའ་མོ་རེད་གསུངས། ཡང་རྗེའི་ཞལ་ནས་བདག་གི་ཚེ་རབས་ཀྱི་གྲོགས་དང་། ས་གཏེར་གྱི་ཟབ་ཆོས་རྣམས་ལོན་ཐབས་ལ་ཅི་དགོས་བླ་མ་རིན་པོ་ཆེས་གསུང་དུ་གསོལ་ཞུས་ཚེ།ཡང་བླ་མའི་ཞལ་ནས་ཁྱོད་ལྷ་ས་ལ་འགྲོ་ཐུབ་ན་དེ་ཐམས་ཅད་ཀྱི་སྟབས་འགྲིགས་ཐང་གསུངས་ནས་རྗེ་དེ་ཉིད་དབུས་ལ་བྱོན་པར་ཞལ་གྱིས་བཞེས། དེ་ནས་བླ་མའི་གསུངས་ལྟར་མི་དབང་གི་སྲས་མོ་པཱ་ཤཾ་ཏཱ་རེ་ཞེས་པ་མཁའ་འགྲོའི་རིགས་ཅན་ཞིག་ཡོད་པ་དེ་རྒྱུར་བཞེས། དགུང་ལོ་ཉི་ཤུའི་ལོར་ཡབ་རྗེ་བླ་མའི་བཀའ་བཞིན་ལུགས་གཉིས་ཀྱི་བྱ་བས་བླ་མའི་བསྟན་ཞབས་ཅི་འགྲུབ་མཛད། ཁྱད་པར་ཡབ་རྗེའི་གསུངས་ཆོས་རྣམས་ཀྱི་འཆད་སྤེལ་མཐའ་ཡས་སུ་མཛད། པདྨ་ལུང་རྟོགས་རྒྱ་མཚོ་རྗེ་དེ་ཉིད་ཀྱིས་ཆོས་ཀྱི་བདག་པོ་ཡིན་པས་ཟབ་ཆོས་སྣ་འགའ་རེ་གཏད། དེ་ནས་ཡབ་རྗེ་གཏེར་གསར་གྱི་རྩ་ གསུམ་ཆོས་སྐྱོང་དང་བཅས་པས་མཚམས་དམ་རྒྱར་བཞུགས་སྐབས་མནལ་ལམ་ལ། ཡུལ་སྐྱིད་མོའི་ཚལ་ཡིད་དུ་འོང་བ་མེ་ཏོག་སྣ་ཚོགས་རྒྱས་ཤིང་། བྱ་རིགས་མི་འདྲ་བ་མང་པོས་གུ་རུ་ཧ་རི་ནི་ས་དབྱངས་སུ་གྱེར་ཞིང་ཡོད་པ། དེའི་དབུས་ན་འཇའ་འོད་སྣ་ལྔ་ལས་གྲུབ་པའི་གུར་ཁང་ཡངས་ཤིང་རྒྱ་ཆེ་བའི་ནང་དུ་རིན་པོ་ཆེ་སྣ་ཚོགས་ཀྱིས་སྤྲས་པའི་ཁྲི་སྟེང་ན། དཔའ་བོ་དཀར་ལ་དམར་མདངས་ཆགས་པ་ཞི་ཞིང་འཛུམ་པ། རུས་པའི་རྒྱན་དྲུག་གིས་སྤྲས་ཤིང་སྟག་ལྤགས་ཀྱི་སྨད་ཤམ་དང་དར་སྣ་ལྔས་བརྒྱན་པ། དབུ་སྐྲ་ཐོར་ཅོག་ཏུ་བཅིངས་ཞིང་ལྷག་མ་སྐུ་རྒྱབ་ཁྲོལ་བ། ཕྱག་ན་ཀཱ་པ་ལ་བདུད་རྩིས་བཀང་བ་བསྣམས་པ་ཞིག་དཔའ་བོ་དང་མཁའ་འགྲོའི་དབུས་ན་ལྷམ་མེར་བཞུགས་འདུག་པས། རྗེའི་ཐུགས་དགོངས་ལ་འདི་རྣམས་སུ་ཡིན་མཇལ་དུ་འགྲོ་དགོས་དགོངས་ནས་འབྱོན་པའི་ཚེ་ན། མཁའ་འགྲོ་མ་ཞིག་གིས་གཟིགས་པའི་ཚུལ་མཛད་ནས་རྗེ་དེ་ཉིད་བསུ་བ་ལ་མ་བྱོན་ནས་འདི་སྐད་ཟེར། དཔའ་བོ་ཆེན་པོ་དྲི་མ་མེད། །ལས་སྐལ་ལྡན་པ་རིགས་ཀྱི་བུ། །དཔ་བོ་དཔའ་མོའི་ཚོགས་གྲལ་དུ། །རྗེ་ཁྱོད་བྱོན་པ་ངོ་མཚར་ཆེ། །ཞེས་ཟེར་ནས་རྗེའི་ཕྱག་ལ་འཇུས་ནས་གདན་འདྲེན་མཛད་དེ། གུར་ཁང་གི་ནང་ན་ཟ་བེར་ཉིས་བརྩེགས་ ཀྱི་ཁྲི་ཞིག་ཡོད་པ་དེའི་སྟེང་ན་རྗེ་དེ་ཉིད་བཞུགས་གསོལ་ཞུས། དེ་ནས་རྗེའི་ཞལ་ནས་ཡུལ་འདི་གང་ལགས། འདི་ན་བཞུགས་པའི་དཔའ་བོ་འདི་སུ་རེད་གསུངས་པས། ཌཱཀྐིའི་ཞལ་ནས་ཡུལ་འདི་ཀཉྩི་ཀ་ཡི་གནས་རེད། དཔའ་བོ་འདི་རིག་འཛིན་བི་མ་མི་ཏྲ་རེད་ཟེར། ཡང་རྗེའི་ཞལ་ནས་ད་ལན་གྱི་དཀྱིལ་འཁོར་འདི་ཅི་ཡིན། བདུད་རྩི་སྨན་གྱི་སྒྲུབ་པ་ཨེ་རེད་གསུངས། ཌཱཀྐིའི་ཞལ་ནས་བི་མའི་བདུད་རྩི་སྨན་སྒྲུབ་ད་དུང་དུས་ལ་མ་བབ། ནམ་ཞིག་ན་ནེ་གྲོ་རྡོ་རྗེ་གསང་རྫོང་དུ་བསྒྲུབ་དགོས་པ་ཡིན། ད་ལན་དཀྱིལ་འཁོར་རྣམས་ཀྱིས་ཐུགས་སྒྲུབ་སྐོར་གསུམ་གྱི་ནང་ནས་བྱིན་རླབས་ཆེ་བ་གདམས་ངག་མི་འཆུག་པ་བརྒྱུད་པའི་བབས་ཉེ་བ་ཀུན་འདུས་རིན་ཆེན་སྙིང་པོ་གུ་རུའི་ཕྱི་ནང་གསང་གསུམ་གྱི་སྒྲུབ་པའི་དཀྱིལ་འཁོར་ཞལ་ཕྱེས་ནས་བཀའ་བབས་ཀྱི་ལས་ལྡན་པ་གཏད་རྒྱ་སྨོན་ལམ་མཛད་ནས་རྒྱལ་ཚབ་ཏུ་མངའ་དབང་གསོལ་དགོས་ཟེར། དེ་ནས་ཚོགས་གྲལ་ནས་མཁའ་འགྲོ་གཉིས་བྱོན་ཏེ་རྗེ་ལ་ཁྲུས་གསོལ་མཛད་ཅིང་ལོངས་སྤྱོད་རྫོགས་པའི་རྒྱན་ཆས་གསོལ་ནས་འདི་སྐད་དོ། །ཡེ་ཤེས་སྒྱུ་མའི་སྐུ་མཆོག་ལ། །རང་བྱུང་ལྷུན་གྲུབ་རྒྱན་ཆས་གསོལ། །ཐུགས་རྗེས་འགྲོ་བའི་དོན་ཀུན་འགྲུབ། །ཐབས་ཤེས་3 གཉིས་མེད་སངས་རྒྱས་ཤོག །ཅེས་གསུངས་ནས་རྗེ་དེ་ཉིད་བི་མ་མི་ཏྲའི་མདུན་དུ་བྱོན་ནས་ཕྱག་ཕུལ་ཏེ་འདི་སྐད་གསོལ། སྐྱེ་བ་འདི་ནས་ཚེ་རབས་ཐམས་ཅད་དུ། །བདག་ནི་མཚན་དཔེ་ལྡན་པའི་ལུས་ཐོབ་སྟེ། །རྡོ་རྗེ་ཐེག་པའི་ཡང་ཟབ་ཆོས་འཕྲད་ནས། །གཏད་རྒྱ་སྨོན་ལམ་བཟང་པོ་དུས་སུ་སྨིན། །གུ་རུ་ཡབ་ཡུམ་ཐུགས་བཞེད་སྒྲུབ་ནུས་ཤོག །འདི་ནས་ཚེ་འཕོས་ལུས་རྗེས་གྱུར་མ་ཐག །པད་རི་པད་མ་འོད་ཀྱི་ཕོ་བྲང་དུ། །རིག་འཛིན་དཔའ་བོ་མཁའ་འགྲོས་མདུན་བསུས་ནས། །བདག་དང་འབྲེལ་ཐོགས་ཞིང་འདིར་སྐྱེ་བར་ཤོག །སླར་ཡང་གདུལ་བྱའི་མོས་ངོར་ཆུ་ཟླ་བཞིན། །གང་འདུལ་སྤྲུལ་པས་འགྲོ་ཁམས་བདེ་ལ་བཀོད། །ཁམས་གསུམ་འཁོར་བ་དོང་ནས་སྤྲུགས་ནུས་པའི། །ཕྲིན་ལས་དམ་པའི་དཔལ་དུ་བདག་འགྱུར་ཤོག ཅེས་གསོལ་བས། བི་མ་མི་ཏྲའི་ཞལ་འཛུམ་པར་མཛད་ནས་འདི་སྐད་གསུངས། རྒྱལ་ཀུན་དགོངས་པ་གཅིག་བསྡུས་པད་འབྱུང་གིས། །སྨོན་ལམ་ལས་འཁྲུངས་རིགས་ཀྱི་བུ་མཆོག་ཁྱོད། །སེམས་དཔའ་བདག་གི་ཐུགས་དང་གཉིས་སུ་མེད། །རིན་ཆེན་གཏེར་གྱི་ལས་དང་སྐལ་བ་ལྡན། །བརྩེ་ཆེན་དབང་ཕྱུག་འགྲོ་མགོན་ཁྱོད་མིན་ནམ། །ཞིང་འདིར་བྱོན་པ་ངོ་མཚར་ ༈ རྨད་པོ་ཆེ། །ཅེས་གསུངས་ནས། གུ་རུ་བདེ་བ་ཆེན་པོའི་དཀྱིལ་འཁོར་གྱི་ཞལ་ཕྱེས་ཏེ་དབང་དང་གདམས་པ་ཐམས་ཅད་ཕ་ཕོག་ཏུ་གནས་ཚེ། རྗེ་དེ་ཉིད་ཀྱི་མེ་ཏོག་ནུབ་ཏུ་བབ་པས་པདྨ་གསུང་གི་བཀའ་བབས་སུ་མངའ་གསོལ་ཞིང་དེ་ཀར་ཉིན་ཞག་བདུན་ཕྲག་གཅིག་ལ་བཞུགས། དེ་ནས་དབང་དང་གདམས་པ་རྣམས་འཛིན་སྐབས་བི་མ་ལ་མི་ཏྲའི་ཞལ་ནས་འདི་སྐད་གསུངས། ངེས་རྒྱ་ཆོས་བོད་དུ་མ་འགྱུར་བ་ཐམས་ཅད་ཀྱི་སྙིང་པོ་བཅུད་དུ་དྲིལ་བ། ཐུགས་སྒྲུབ་ཆེ་བ་སྙིངཐིག་ཡ་བཞི། འབྲིང་པོ་ཀུན་བཟང་དགོངས་པ་ཟང་ཐལ། ཆུང་ངུ་གུ་རུའི་ཐུགས་ཀྱི་སྒྲུབ་པ་རྣམས་ཡིན་པས། ད་ལན་ཁྱོད་ལ་གུ་རུའི་ཐུགས་སྒྲུབ་ཀྱི་གཏེར་ཁ་དབང་བ་ཡིན་པས། དེ་ལ་བླ་སྒྲུབ་གུ་རུ་སྤྱི་འདུས་སྒྲུབ་པ། རྫོགས་ཆེན་དྲི་མེད་ཟང་ཐལ། ཐུགས་སྒྲུབ་བྱིན་རླབས་གཏེར་མཛོད། བཀའ་དགོངས་ཕུར་གསུམ་ལ་སོགས་པ་དྲག་སྔགས་ཕྲིན་ལས་དང་བཅས་པ་ཆུ་བོ་བཞི་ལྡན་གྱི་ཚུལ་དུ་འཆུག་མེད་དུ་ཐོབ་ནས་བསྟན་དང་འགྲོ་བའི་དོན་རླབས་པོ་ཆེ་འབྱུང་བར་གདོན་མི་ཟའོ་གསུངས་ནས། གཏེར་གནས་རིག་མ་ཆོས་བདག་དང་བཅས་པའི་ལུང་བྱང་གནང་ནས་ཐམས་ཅད་ཀྱིས་ཚོགས་ཀྱི་དགའ་སྟོན་ལ་རོལ། དེ་ནས་གྲོགས་ མཁའ་འགྲོ་ཞིག་གིས་འདི་སྐད་ཟེར། ད་དཔའ་བོ་ཆེན་པོ་ཁྱོད་སྦས་གནས་རྣམས་ལ་ལྟད་མོ་ལ་ཨེ་འགྲོ་ཟེར། རྗེའི་ཞལ་ནས་དཔའ་བོ་ཆེན་པོ་ལ་ཞུ་དང་། ང་རང་གིས་འགྲོ་དགོས་མི་དགོས་ཆ་མི་ཆོད་གསུངས་པས། བི་མ་མི་ཏྲའི་ཞལ་ནས་བྱོན་ན་ཆོག་གི་ལྟད་མོ་ལེགས་པོ་ཡོད། གནས་སྐབས་དང་མཐར་ཐུག་གི་དུས་ཀྱི་འཕོ་འགྱུར་རྣམས་གསལ་འོང་གསུངས། དེ་ནས་རྗེ་དེ་ཉིད་གྲོགས་མཁའ་འགྲོ་རྣམས་དང་བཅས་སྦས་གནས་ཆགས་ཚུལ་དང་དུས་ཀྱི་མཐའ་མི་འབྱུང་ཚུལ་རྣམས་ལེགས་པར་གཟིགས་མཐར་མནལ་ལས་སད་དོ། །དེ་ནས་མཚམས་ཁང་གང་ཉིན་དངོས་གྲུབ་ལེན་སྐབས་དཀྱིལ་འཁོར་ནང་དུ་གཏོར་མ་བདུད་རྩིས་ཞུ་བ་དང་། དྲི་བཟང་འཐུལ་བ་སོགས་རྟགས་མཚན་ཁྱད་པར་ཅན་འབྱུང་བ་དང་། ཁྱད་པར་ཡི་དམ་ལྷའི་ཞལ་མངོན་སུམ་དུ་གཟིགས་ཤིང་ལུང་བསྟན་དབུགས་དབྱུང་མཛད་པ་དུ་མར་སྣང་། དེ་ནས་མཚམས་གྲོལ་ཉིན་རྗེ་དེ་ཉིད་ཡབ་རྗེ་བླ་མའི་དྲུང་དུ་བྱོན་ནས་ཕྱག་ཕུལ་ཏེ་མདུན་དུ་བཞུགས་ཚེ། བླ་མའི་ཞལ་ནས་ཁྱོད་ཀྱིས་མཚམས་མཐར་ཕྱིན་པ་བཟང་། ཡི་དམ་ལྷས་དངོས་གྲུབ་ཅི་སྟེར་གསུངས་པས། རྗེའི་ཞལ་ནས་ཡི་དམ་གྱི་ཞལ་གཟིགས་ནས་འོག་མིན་ཆོས་དབྱིངས་མེ་རི་འབར་བའི་ཞིང་ཁམས་རེད་ཟེར་བ་ ༈ གཅིག་ལ་ཐོན་སྣང་འཆར་ལགས་ཞུས་པས། བླ་མའི་ཞལ་ནས་ཞིང་གི་བཀོད་པ་ཇི་ལྟར་སྣང་སྨྲོས་ཤིག་གསུངས་ཚེ། རྗེ་དེ་ཉིད་ཀྱི་ཞལ་ནས་ཞིང་བཀོད་ནི་ཡུལ འཇིགས་སུ་རུང་བ་མི་རོ་རྟ་རོ་གཅལ་དུ་བཀྲམ་པ་ཀེང་རུས་ཀྱི་ལྕགས་རི་སུམ་རིམ་དུ་ཡོད་