Tibetan
པའི་དབུས་སུ་གནམ་ལྕགས་ཀྱི་འཁོར་ལོ་དང་རྡོ་རྗེ་རྒྱ་གྲམ་ཉིས་བརྩེགས་ཀྱི་སྟེང་དུ་ཕོ་བྲང་ཆེན་པོ་དམར་པོ་ཟླགམ་བང་རིམ་གྱི་ཚུལ་དུ་ཡོད་པ། རྡོ་རྗེའི་ར་བའི་ནང་ཐམས་ཅད་རྡོ་རྗེའི་ས་གཞི་ལ་དུར་ཁྲོད་ཆེན་པོ་བརྒྱད་ཀྱི་བཀོད་པ་ཐམས་ཅད་རབ་ཏུ་རྫོགསཔ། ཐོད་པ་སྐམ་རློན་རྙིང་གསུམ་གྱིས་བརྩིགས་པ་བྱས་ཤིང་། ལྷ་ཆེན་པོ་བརྒྱད་དང་། ཀླུ་ཆེན་པོ་བརྒྱད། རྒྱུ་སྐར་ཉི་ཤུ་རྩ་བརྒྱད་ལ་སོགས་པས་ཀ་བ་དང་གདུང་མ་དྲལ་གཤམས་བྱས་ལ། གཟའ་བརྒྱད་དང་ཉི་ཟླའི་སྐར་ཁུང་། སྦྲུལ་རིགས་ཀྱི་ཐགས་པ་ལ་ཐོད་པའི་དྲྭ་མ་དང་དྲྭ་ཕྱེད། རྟ་བབས་རྣམས་ཀྱང་ཐོད་པ་དང་མི་རྟ་ལ་སོགས་པའི་དབང་པོ་ལྔ་དང་སྒལ་ཚིག་དང་། ལྷ་ཆེན་པོའི་ཐོད་པ་སྦུབས་པའི་མདའ་ཡབ་དང་རྒྱ་ཕུབ། དེའི་སྟེང་ཙིཏྟའི་ཏོག་དང་ཞིང་ལྤགས་ཀྱི་རྒྱལ་མཚན་དང་འཕེན་བླ་བྲེ་སོགས་བྱས་པ། ཕྱི་དང་བར་ཐམས་ཅད་མེ་དཔུང་འཁྲིགས་གེར་གནས་འདུག་པའི། རྗེའི་ཞལ་ནས་མཁའ་འགྲོ་མ་ ཞིག་ལ་འདིའི་ཞིང་ཁམས་འདི་འོག་མིན་ཆོས་དབྱིངས་མེ་རི་འབར་བའི་གནས་མིན་ནམ། ཡུལ་འཇིགས་སུ་རུང་བ་འདི་ཅི་རེད་གསུངས་པས། ཌཱཀྐིའི་ཞལ་ནས་འདི་གདུལ་བྱ་ཁ་དྲང་བའི་ཕྱིར་དུར་ཁྲོད་མེ་རི་འབར་བའི་གནས་རེད། འོག་མིན་ཆོས་དབྱིངས་མེ་རི་འབར་བའི་གནས་འདིའི་སྟེང་ན་ཡོད་ཟེར། རྗེའི་ཞལ་ནས་ང་རང་ཞིང་དེ་མཇལ་དུ་འགྲོ་དགོས་ཞུས་པས། ཌཱཀྐིའི་ཞལ་ནས་ཁྱོད་སྐྱེ་སྔོན་རིགས་ལྡན་དྲྭ་མ་ལྔའི་ནང་ནས་སྲིན་པོ་བློ་གྲོས་ཐབས་ལྡན་ཡིན་དུས་གསང་སྔགས་བླ་ན་མེད་པའི་ཆོས་ཀྱི་སྐལ་བ་ལྡན་པ་ཡིན་པས་ཞིང་ཁམས་མཇལ་དུ་འགྲོ་མི་དགོས། འདི་ནས་མི་གནས་འདས་འོག་ན། བཟང་ངན་འབྲེལ་ཚད་ཐམས་ཅད་ཞིང་འདིར་བསྒྲོད་པ་ལ་ཐེ་ཚོམ་དང་སོམ་ཉི་མ་བྱེད་ཅིག དེ་དུས་བདག་གིས་ཀྱང་ཁྱོད་བསུ་མར་འོང་ཟེར་ནས། ཌཱཀྐི་དེ་འོད་ཀྱི་རྣམ་པར་གྱུར་ནས་ཞིང་བཀོད་ལ་ཐིམ་སྣང་འཆར་ཚེ་མནལ་ལས་སད་དོ། །ཞུས་པས་བླ་མའི་ཞལ་ནས་རྗེ་ལ་ཁྱོད་གཞལ་ཡས་ཁང་གི་ནང་དུ་ཨེ་སོང་གསུངས་པས། རྗེའི་ཞལ་ནས་ནང་དུ་འགྲོ་སྙམ་ཚེ་ཐུན་གྲོལ་རན་པ་ལ་རྐྱེན་བྱས་ནས་གཉིད་སད་བྱུང་ཞུས་ཚེ། ཡབ་རྗེ་བླ་མའི་ཞལ་ནས་ཁྱོད་བློ་གྲོས་ཐབས་ལྡན་ཡིན་ན་ཤེས་རབ་ལ་དབང་ཐོབ་པ་ཡིན་པས། ཐོས་བསམ་གྱི་ལམ་ལ་འབད་རྩོལ་ ༈ མི་དགོས་པར་རང་བྱུང་དུ་ཤེས་འོང་གསུང་། ད་ཁྱོད་ཀྱི་མཚམ་སྐྲ་ཞོག་ལ་ང་ཡི་རྗེས་སུ་འཇུག་དང་། བསྟན་འགྲོའི་དོན་ཤུགས་ལ་འབྱུང་འོང་གི། ད་དུས་ངན་གྱི་མི་འདི་ཚོའི་བྱ་སྤྱོད་ལ་ལྟོས་དང་། ཁྱོད་ཀྱི་ཚེ་མཐའ་བདུད་དབང་དུ་མི་ཤོར་བ་གལ་ཆེ་གསུངས། ཡང་རྗེའི་ཞལ་ནས་བླ་མ་རིན་པོ་ཆེ་ལ། བདག་གི་ཚེ་མཐའ་བདུད་དབང་དུ་མི་འགྲོ་ཐབས་ཅི་དགོས། བླ་མ་རིན་པོ་ཆེ་ཁྱོད་ཀྱིས་བདག་ལ་ལུང་བསྟན་དུ་གསོལ་ཞུས་ཚེ།བླ་མའི་ཞལ་ནས་གནས་དུས་ཀྱི་འགྲོ་བ་རྣམས་ལོག་ལྟ་ཆེ་ཞིང་བསོད་ནམས་ཞན་པ་དང་། དུས་ཀྱི་དམག་འཁྲུག་ནད་ཡམས་མུ་གེ་སོགས་མང་བའི་རྐྱེན་དང་། ཁྱདཔར་རྒན་པོ་ང་རང་འཆི་ཚེ་མཐའ་མི་རྒྱ་ཧོར་གྱི་འཇིགས་པ་ཉེ་འོང་ངེས་པ་ཡིན་པས། དུས་ཀྱི་འཕོ་འགྱུར་སོགས་ཅི་འོང་ཅི་ཆ་ཅི་ལ་ཡོད། དེའི་སྐབས་སུ་འགྲོ་བ་རྣམས་ཀྱི་ཤེས་རྒྱུད་བདུད་ཀྱིས་བརླབས་ནས་རང་གཞན་ཕུང་ལ་སྦྱོར་བ་དང་། མཐའ་མི་ཀླ་ཀློའི་ཁ་དར་ནས་བསྟན་འཛིན་གྱི་སྐྱེས་བུ་རྣམས་ཀྱི་སྐུ་ཚེ་མཛད་ཕྲིན་ཐམས་ཅད་རྐྱེན་དབང་དུ་འགྲོ་བ་མང་བས་དེ་ལ་བྱ་ཐབས་དཀའ་མོ་རེད། དེའི་ཕྱིར་ན་ཁྱོད་ཀྱང་བསྟན་འགྲོའི་གསོས་སུ་སྨན་པའི་སྐྱེས་བུ་ཞིག་འདུག་པས་གནས་དུས་ཀྱིས་བསྒྱུར་བས་བདུད་དབང་ལ་གཟབ་ དགོས། ང་རང་ཡོད་ཚེ་ཁྱོད་རྐྱེན་དབང་ངན་པས་མི་ཚུགས། ཕྱིའི་ད་ཕན་ཁྱོད་ཀྱི་ལེགས་ཉེས་ཐམས་ཅད་མ་དང་མཁའ་འགྲོའི་ཞལ་ལུང་ལྟར་སྒྲུབས་དང་རང་གཞན་གྱི་དོན་ཆེན་འབྱུང་འོང་གསུངས། དེ་ནས་རྗེ་ཉིད་ཀྱིས་བླ་མའི་བཀའ་གནང་བཞིན་མཚམས་སྐྲ་འཇོག་པར་མཛད། བླ་མས་སྐྲ་དབང་གསུངས་སྐབས་བླ་མའི་ཞལ་ནས་ང་རྣལ་འབྱོར་བ་སྣང་བ་དབང་ཐོབ་ཀྱི་སྐྱེས་བུ་ཡིནཔས། ད་ལན་ཁྱོད་ལ་སྤྲོས་མེད་དོན་གྱི་གསང་དབང་བསྐུར་བ་ཡིན་གསུངས་ནས། གསང་ཆབ་བདུད་རྩིའི་ཆུ་རྒྱུན་གྱིས་སྐྲ་དབང་ཡོངས་རྫོགས་བསྐུར་ཏེ་དཔའ་བོ་ཡབ་ཡུམ་རྟེན་བཞུགས་སྐབས། རྗེའི་ཉིད་ཀྱི་སྐུ་ལུས་འཕར་བ་དང་གཡོ་བ་འཁྲབ་པ་སོགས་རང་དབང་མེད་པར་མཛད། གནས་ཁང་ཕྱི་ནང་ཀུན་དྲི་བཟང་གི་ངད་འཐུལ་བ་དང་། གླིང་བུ་དང་རོལ་མོ་སྣ་ཚོགས་ཀྱི་སྒྲ་སྒྲོགས་པ་སོགས་རྟགས་མཚན་ཅན་དུ་མ་འབྱུང་། དེའི་ནུབ་མནལ་ལམ་ལ་མཁའ་འགྲོའི་ཚོགས་དཔོན་དུ་བྱོན་ནས་དཔའ་བོ་མཁའ་འགྲོ་མང་པོ་དང་ཆབ་གཅིག་ཏུ་ཚོགས་ཀྱི་འཁོར་ལོ་རྒྱ་ཆེན་པོ་མཛད་ཚེ། ཀུན་གྱིས་ངེད་ཅག་རྣམས་ཀྱིས་དགའ་སྟོན་བྱེད་ཀྱིན་ཡོད་ཟེར་ནས། དཔའ་བོ་དང་དཔའ་མོ་ཐམས་ཅད་ཀྱིས་གླུ་བྲོ་གར་ལ་སོགས་པ་མཛད་ཚེ། རྗེའི་ཐུགས་དགོངས་ ༈ ལ་འདི་རྣམས་དགའ་སྤྲོ་དེ་ཙམ་བྱེད་པ་ཅི་ཡིན་དགོངས། མོ་ཞིག་གིས་ན་རེ་ངེད་དཔའ་བོ་མཁའ་འགྲོས་དགའ་སྤྲོ་གླུགར་ལོས་བྱེད། ཁྱོད་དཔའ་བོ་ཡོངས་འདུས་ཀྱི་ངོ་བོ་བདགཅག་ཌཱཀྐི་རྣམས་ཀྱི་ཚོགས་རྗེ་ཚོགས་དཔོན་མ་བཅོས་བཞི་ལྡན་གྱི་རྣལ་འབྱོར་དམ་པར་མངའ་གསོལ་བ་ཡིནཔས། དགའ་སྟོན་གླུ་གར་གྱི་མཆོད་པ་བྱེད་པ་དེས་ཡིན་ཟེར། ཡང་རྗེའི་ཞལ་ནས་མ་བཅོས་བཞི་ལྡན་གྱི་རྣལ་འབྱོར་ལྡན་ལུགས་ཇི་ལྟར་ཡིན་གསུངས་པས། ཡང་ཌཱཀྐིས་སྐུའི་གར་བསྒྱུར་ཏེ་གླིང་བུའི་སྒྲ་ལ་དྲངས་ནས་འདི་སྐད་ཟེར། ཧ་ཧེ་ཧཾ། མཚན་ཉིད་ལྡན་པའི་སློབ་དཔོན་གྱིས། །ལས་འཕྲོ་ལྡན་པའི་རྣལ་འབྱོར་ལ། །ཚིག་ལ་བརྟེན་ནས་དོན་དབང་བསྐུར། །རྩལ་དབང་ཡོངས་རྫོགས་ལྷུན་གྱིས་གྲུབ། །གསུམ་ལྡན་རྡོ་རྗེ་འཛིན་པ་ཆེ། །དུས་གསུམ་རྒྱལ་བའི་སྲས་སུ་བསྔགས། །མ་བཅོས་རང་བྱུང་ལྕང་ལོར་ལྡན། །མ་རྒྱུད་མཁའ་འགྲོའི་བརྩེ་བས་བསྐྱངས། །རྣམ་རྟོག་དྲི་བྲལ་གནག་སྣུམ་མཛེས། །རིགས་ཀུན་ཡོངས་འདུས་སྤྱི་བོར་བཅིངས། །བླ་མེད་དོན་གྱི་རྣལ་འབྱོར་པའི། །རལ་པ་མ་བཅོས་ལྕང་ལོར་ལྡན། །གང་སྣང་ཡེ་ཤེས་གྲོགས་སུ་ཤར། །མ་བཅོས་དགོས་དཀར་མཐིང་ཤམས་དཀྲིས། །ཉོན་ མོངས་སྐྱོན་གྱི་དྲི་མ་བྲལ། །སེམས་ཉིད་མ་བཅོས་གཉུག་མར་གནས། །སྐུ་གསུམ་མཉམ་ཉིད་དབྱིངས་སུ་ཆུབ། །རྒྱན་ཆ་མ་བཅོས་རུས་རྒྱན་གསོལ། །ཚོགས་དྲུག་མ་སྤངས་ལོངས་སུ་སྤྱོད། །མངའ་ལྡན་ཞིང་ལ་མངའ་དབང་བསྒྱུར། །མཁའ་འགྲོ་སེམས་ཀྱི་ཆོ་འཕྲུལ་ཏེ། །དཔའ་བོ་ཁྱོད་ཀྱི་གྲོགས་སུ་སྤྱོད། །ཅེས་ཟེར་ནས་ཚོགས་ཀྱི་མཆོད་པ་ཚིམ་པ་དྲུག་ལྡན་དུ་ལོངས་སྤྱོད་པའི་སྣང་བ་འཆར་ཚེ་མནལ་ལས་སད་དོ། །དེ་ནས་དགུང་ལོ་ཉེར་གཅིག་ལོར་རྡོ་ལུང་རི་ཟབ་ནང་དུ་སྒར་བཞུགས་ཚེ་མནལ་ལམ་ལ་མཁའ་འགྲོ་བདེ་བའི་གོ་ཆ་ཡིན་སྐད་པ་ཞིག་གིས་འདི་སྐད་ཟེར། ཨེ་ཨེཿ བསིལ་ལྡན་རི་བོང་འོད་ལྡན། །ཆུ་འཛིན་ནག་པོས་བསྒྲིབས་ནས། །མི་རིང་དཔྱིད་ཀྱི་རྒྱལ་མོ། །ལྷོ་ལ་ཆས་པ་ཨེ་ནམ། །ནམ་མཁའི་ནོར་བུའི་འོད་ཟེར། །ནུབ་ཀྱི་རྨ་བྱས་བསྐུལ་ནས། །དབྱར་རྔའི་གཙུག་ཏུ་ཨེ་ནམ། །སྐྱི་བསེར་དབང་ཞུ་འཕྲད་ཚེ། །ནུས་ལྡན་མེདགཤོག་བསྐུལ་ན། །སྐོམ་སེལ་སྨན་དུ་ཨེ་ནམ། །ཀཱི་ལ་ཡ་ཡི་དབལ་ཁ། འདྲེ་མོའི་སྙིང་ལ་ཕོག་ན། །རྒྱ་སྟག་འཛུམ་དྲུག་འོད་ལྡན། །ལྷོ་ནས་འོང་བ་ཨེ་ནམ། །ནམ་ཟླའི་རྒྱལ་མོའི་སྐད་སྙན། །ལྟོ་འགྲོའི་ལྟོ་བར་བགྲངས་ཚེ། །མ་ངེས་གནས་གསུམ་འགྲིམ་ན། ༈ ཉེས་སེལ་གེགས་ལས་གྲོལ་ངེས། །སབྟའི་དབང་དུ་སོང་ན། །མི་རིང་སྒྱུ་མའི་ལྟད་མོ། །དབང་པོའི་ཡུལ་དུ་ཤར་འོང་། །ས་ག་ཟླ་བའི་འཛུམ་མདངས། ངམ་ནག་སྤྲིན་གྱིས་བསུས་ནས། །མི་འདོད་སྣ་འགའ་འབྱུང་སྲིད། །བྱང་སྨད་བདུད་ཀྱི་བྱད་ཟོར། །བཟློག་ཐབས་གནད་ལ་རེམ་དགོས། །དེ་སོགས་རིག་པས་དཔྱོད་དང་།།ལེགས་ཉེས་སྣ་ཁ་གསལ་ངེས། །ཞེས་ཟེར་ཡལ། རྗེའི་ཐུགས་དགོངས་ལ་ཅི་ཡིན་སྒར་བ་ལ་མི་བདེ་བ་ཞིག་འོང་བར་འདུག་དགོངས་ནས། ཡབ་རྗེ་བླ་མའི་དྲུང་དུ་བྱོན་ཏེ་མཁའ་འགྲོའི་ལུང་བསྟན་གྱི་རིགས་རྣམས་ཞིབ་པར་ཞུས་ཚེ། བླ་མའི་ཞལ་ནས་ད་ལོ་རྐྱེན་ངན་འཚུབས་མ་རེ་འོང་ཐང་གི། ལུང་བསྟན་གང་ལ་བལྟས་ཀྱང་ལེགས་པོ་ཞིག་མི་འོང་བ་འདྲ་གསུངས། ཡང་རྗེས་ང་ཡི་ཡུམ་ནད་གཞི་ངན་པས་དེ་འཆི་འགྲོ་བ་ཨེ་ཡིན་སྙམ་ཞུས་པས། བླ་མས་སངས་མཚོ་ལོ་བར་ཆ་ཤས་ལ་མི་སྐྱོན་གྱི་ཏ། ཀ་སྒྲོན་འདི་ལ་འཁྲུག་ནི་རེད་གསུངས། དེ་ནས་ལོ་ཁྱིམ་དེ་ཀའི་ནང་དུ་མི་འདོད་པ་འགའ་རེ་འབྱུང་ཡང་ཡི་གེ་མང་བར་དོགས་ནས་མ་བྲིས་སོ། །དེ་ནས་དགུང་ལོ་ཉེར་གཉིས་ལོར་ཡབ་རྗེ་བླ་མའི་ཞལ་ནས་དཁྱོད་ཤར་ཕྱོགས་སྤྲེལ་རྫོང་བྲག་དཀར་གྱི་གཏེར་རྣམས་ལོན་ པའི་དུས་ལ་བབས་འདུག་པས་འགྲོ་གྲབ་གྱིས་ལ་སོང་གསུངས། དེ་ནས་རྗེའི་ཞལ་ནས་ང་ཇི་ལྟར་བྱས་ནས་འགྲོ་དགོས། བླ་མ་རིན་པོ་ཆེ་ཁྱོད་ཀྱིས་གསུང་དུ་གསོལ་ཞུས་ཚེ། ཡང་བླ་མའི་ཞལ་ནས་གྲྭ་འཁོར་མང་པོ་བྱས་ནས་སྒར་གཞི་ཡི་དགོས་མེད། བྱ་བྲལ་གྱི་ཚུལ་དུ་གཉན་ཁྲོད་འགྲིམ་ཞོར་ལ་སོགས་གསུངས། རྗེ་དེ་ཉིད་ཀྱིས་བླ་མའི་བཀའ་བཞིན་ཉེ་གནས་འོད་འབར་དང་། བླ་མའི་དངོས་སློབ་རྣལ་འབྱོར་དམ་པ་སྒོ་སྤའི་ཟབགསང་ཞེས་པ་དེ་གཉིས་ཕྱག་ཕྱིར་ཁྲིད་དེ་གྲོ་ཁལ་ཅི་ཡང་མེད་པར་ཞབས་ཐང་ལ་གཉན་ཁྲོད་བརྒྱ་རྩར་བྱོན་གྲུབ་བྱས་ཏེ། བླ་མའི་མདུན་དུ་སྐུ་ཁམས་བདེ་མོར་བཞུགས། ཞེས་ཞུས་པས། བླ་མའི་ཞལ་ནས་རང་གི་སྤྱོད་ལམ་པ་བྱེད་གསུངས་ཏེ། གཟིམས་ཁང་གི་ར་བའི་ནང་དུ་བླ་མ་བྱོན་ནས་འདི་སྐད་གསུངས། ད་ཆོས་ཐམས་ཅད་རྟེན་ཅིང་འབྲེལ་བར་འབྱུང་བ་ཡིན་པས། ཕ་རྗེས་བུ་ཡིས་ཟིན་པའི་ཕྱིར་དུ་ང་རང་གི་གཟན་དཀར་དུང་རྣ་མཐིང་ཤམ་ལ་སོགས་པ་ཐམས་ཅད་བུ་ཁྱོད་ལ་གཏད་པ་ཡིན་པས། ངའི་དགོངས་རྒྱུད་ཀྱི་བྱིན་རླབས་དང་ཚེ་བསོད་དཔལ་འབྱོར་མངའ་ཐང་གཟི་བརྗིད་ཐམས་ཅད་ཁྱོད་ལ་ཐོབ་པར་ཤོགཅིག ཟབ་གཏེར་གྱིཕཕོབ་ཐོབ་ནས་གུ་རུ་པདྨའི་ཐུགས་བཞེད་མ་ལུས་པ་རྫོགས་ཤིང་གསང་ ༈ སྔགས་ཀྱི་བསྟན་པའི་གསོས་སུ་སྨན་པར་ཤོག་ཅིག །རྗེ་བཙུན་མི་ལ་ལྟ་བུ་མཐོང་ཐོས་ཀྱི་འགྲོ་བ་རྣམས་ཐར་པ་བྱང་ཆུབ་ཀྱི་ལམ་ལ་འགོད་ནུས་པར་ཤོག་ཅིག །ཚེ་དང་ཆོས་ལ་བར་ཆད་མི་འབྱུང་ཞིང་རང་གཞན་གྱི་དོན་རྒྱ་ཆེན་པོ་གདན་ཐོག་གཅིག་ཏུ་འགྲུབ་པར་ཤོག་ཅིག །གཏེར་སྲུང་དམ་ཅན་རྒྱ་མཚོ་རྣམས་ཀྱིས་བདག་གི་བུ་འདི་ལ་ཁ་འཛིན་དང་སྡོང་གྲོགས་མཛོད་ཅིག །དགྲ་འདྲེ་གདོན་གསུམ་གྱི་སྙིང་སྲོག་ཆོད་ལ་རྗེས་མེད་དུ་ཐོངས་ཤིག།ཕྱི་ནང་གི་བར་ཐམས་ཅད་སེལ་ཞིང་མགོན་སྐྱབས་གྲོགས་ལྡན་གྱི་ཕྲིན་ལས་མཛོད་ཅིག་གསུངས་ཏེ། ཕྱག་གཡས་རྗེའི་དབུ་ལ་བཞག་ནས་ཅུང་ཟད་དགོངས་པ་མཛད། དེ་ནས་ཆང་ཀཱ་པ་ལ་གང་རྗེ་ལ་གནང་ནས་འདི་གནའ་མིའི་སྲོལ་རེད། མར་པ་ལོ་ཙཱས་མི་ལ་རས་པ་བྲག་དཀར་རྟ་སོ་ལ་ཕེབས་དུས་སྐྱེལ་ཆང་གནང་བ་བཞིན། ངས་ཀྱང་ཁྱོད་སྤྲེལ་རྫོང་བྲག་དཀར་ལ་བྱོན་སྐྱེམ་དུ་བླུད་པ་ཡིན་པས་ལྷག་མེད་དུ་འཐུང་དང་བྱིན་རླབས་ཀྱི་སྣ་ཁ་རེ་ཐོབ་འོང་གསུངས་ནས་ཆང་དེ་རྗེ་ལ་གནང་བས་ལྷག་མེད་དུ་གསོལ། དེ་ནས་རྗེ་དེ་ཉིད་བླ་མ་དང་འབྲལ་མ་ཐུབ་པར་བླ་མའི་ཞབས་སྤྱི་བོར་བླངས་ནས་སྨོན་ལམ་མཛད་དེ་ཡུན་རིང་ལ་བཞུགས་པས། བླ་མའི་ཞལ་ནས་ད་ཁྱོད་གྲོགས་པོ་རྣམས་དང་ བཅས་ཏེ་སོང་། ང་རང་ན་སོ་ལོན་པས་དེ་ཕན་ཐག་རིང་པོར་སྐྱེལ་མི་ཐུབ་གསུངས། རྗེའི་ཞལ་ནས་བླ་མ་རིན་པོ་ཆེ་ཁྱོད་ཀྱིས་བདག་སྐྱེ་བ་འདི་ནས་ཚེ་རབས་ཐམས་ཅད་དུ་བླ་མ་ཁྱེད་དང་འདུ་འབྲལ་མེད་པའི་ཐུགས་བསྐྱེད་སྨོན་ལམ་མཛད་པ་བཀའ་དྲིན་མི་ཆུང་བ་ཁྱོད་མཁྱེན་གསུངས། བླ་མའི་ཕྱག་ལ་འཇུས་ནས་ཡབ་སྲས་བྲལ་མ་སྤོབས་པར་བཤུམ་པར་མཛད་པས། བླ་མས་ཀྱང་རྗེ་དེ་ཉིད་ཐུགས་ལ་ཤིན་ཏུ་བརྩེ་བས་ཐུགས་ཆུང་བར་མཛད་ཚེ། དེར་འདུས་ཀྱི་བུ་སློབ་ཐམས་ཅད་ཀྱང་བླ་མ་ཡབ་སྲས་གཉིས་ཀ་ཐུགས་འདུན་ཆེ་བ་ལ་སྨོན་ནས་ཐམས་ཅད་ཀྱི་སེམས་དགའ་སྐྱོ་འདྲེས་པར་སོང་ནས་གཏད་མེད་དུ་འདུག །དེ་ནས་བླ་མས་ཀྱང་གཟིམ་ཁང་གི་ཕྱི་རོལ་དུ་སྐྱེལ་ཐུང་མཛད། གཞན་བུ་སློབ་ཆོས་བདག་རྣམས་ཀྱིས་རྒྱང་རིང་པོ་རུ་སྐྱེལ་མ་མཛད། དེ་ནས་རྗེས་བུ་སློབ་རྣམས་ལ་ཆོས་དང་གདམས་པའི་ཞལ་ཏ་མཛད་ནས་བུ་སློབ་ཐམས་ཅད་ཀྱི་ཐུགས་སྐྱོ་སྐྱོ་མཛད་ངང་རང་ཡུལ་ལ་ལོག །རྗེ་དཔོན་གཡོག་གསུམ་པོ་དབེན་ཁྲོད་ལ་རིམ་བཞིན་བྱོན་པས་སྨར་གྱི་ལོགས་ན་ལུང་ཞེས་པའི་མདར་ཕེབས་ཚེ། བླ་མ་དཔོན་གཡོག་གཉིས་དང་མཇལ་བས། རྗེའི་ཐུགས་དགོངས་ལ་ཨ་ཅེ་འདི་གཉིས་ངོ་ཤེས་ཞིག་ཡིན་པར་འདུག་དགོངས་ནས་ཡར་ཡར་ཕེབས་ ༈ ཚེ་ངོ་མི་ཤེས་པ་ཞིག་སྣང་བས། རྗེས་ཅི་ཡང་མ་གསུངས་པར་བྱོན་པས། ཨ་ལྕེས་ན་རེ་འདི་སྐད་ཟེར། ཨ་ལགས་སང་སྐུ་ཁམས་བཟང་ལགས་གང་ནས་ཡིན། ད་ལན་གང་དུ་ཕེབས་ཟེར་བས། རྗེའི་ཞལ་ནས་ང་སྤྲང་པོ་ཞིག་ཡིན། གནས་སྐོར་ལ་འགྲོ་བ་ཡིན་གསུངས། ཁོ་ན་རེ་ཁྱོད་ཀྱིས་ང་མ་དགོངས་སམ་ཟེར། རྗེས་ཀྱང་ཁྱོད་མི་ཤེས་པ་འདྲ་གསུངས། ཡང་ཁོ་ན་རེ། ངས་སྔར་ཁྱོད་ཀུ་ཀུ་རས་པ་ཡིན་སྐབས། མི་ཏྲི་པའི་སློབ་མ་ཀོ་འུ་མི་ཏྲི་ཡིན། འུ་ཅག་གཉིས་སྨོན་ལམ་ལས་འཕྲོ་ལྡན་པས་སྐྱེ་ཕྲེང་དུ་མར་ལྷན་དུ་འབྲེལ་ཡོད་ཀྱང་ཁྱོད་ཀྱིས་མི་དགོངས་སམ་ཟེར། ཡང་རྗེའི་ཞལ་ནས་སྔར་གྱི་ཀུ་ཀུ་མི་ཏྲི་དང་ཀོ་འུ་རྣམས་ཀྱིས་ལོ་རྒྱུས་ང་རང་གིས་ཤེས་ཀྱང་། ད་རེས་སྐྱེ་བ་འདིའི་ཀོ་འུ་མི་ཏྲིའི་སྤྲུལ་པ་སུ་རེད་གསུངས་པས། ཡང་ཁོ་ན་རེ་ལག་རྟེན་ལ་འཇུས་ནས་འདི་སྐད་ཟེར། རྣལ་འབྱོར་ཀོ་འུ་མི་ཏྲི་དང་། །སྐྱེ་བ་མེད་པ་འོད་གསལ་སྐུ། །འགགས་པ་མེད་པ་འཁོར་འདས་གསལ། །སྣང་སྲིད་གསལ་བའི་མེ་ལོང་ཡོད། །ཁྱོད་ཀུ་ཀུ་ནས་བཟུང་ད་བར་དུ། །བསྟན་འགྲོ་བའི་དཔལ་དུ་ཤར་བ་རྣམས། །ངས་འཆུག་མེད་བརྡ་ཡི་རིས་སུ་བཏབ། །དུས་སྨོན་ལམ་འཛོམས་ན་གཏད་རྒྱ་ཁྲོལ། །ང་རྒྱལ་ ཁམས་འགྲིམ་པའི་རྣལ་འབྱོར་ངས། །ཀུ་ཀུ་དང་ཀོ་འུའི་ལོ་རྒྱུས་དང་། །འབྱུང་འགྱུར་གྱི་གཏམ་རྣམས་ཟུར་ཙམ་བཤད། །ཁྱོད་གཡོ་སྒྱུ་རྡོ་རྗེ་གཟི་བརྗིད་རྩལ། །རྟོགས་པ་ཕུལ་ཕྱིན་མཁས་ཤིང་གྲུབ་པ་བརྙེས། །ཟབ་ཆོས་གསང་བ་མན་ངག་སྡེ་གསུམ་གྱིས། །ཆོས་མཛོད་གདམས་པའི་གཏེར་སྒོ་དུ་མ་ཕྱེས། །དེ་དུས་ཀོ་འུ་མི་ཏྲིའི་སྤྲུལ་པ་ནི། །ཆོས་ཀྱི་བདག་པོ་འོད་ཟེར་གོ་ཆ་ཡིན། །ཟབ་ཆོས་བསྟན་པའི་གསོས་སུ་སྨན་པར་འགྱུར། །རྣོལ་མོ་སྒང་དུ་པདྨ་གླིང་པར་བཞེངས། །ཀུན་བཟང་དགོངས་པའི་ཆོས་མཛོད་དུ་མ་དང་། །ཟབ་གཏེར་བདུན་ལ་དབང་ཞིང་འགྲོ་བ་འདྲེན། །དེ་དུས་ཀོའུ་མི་ཏྲིའི་སྤྲུལ་པ་ནི། །ཆོས་ཀྱི་བདག་པོ་སྐྱེས་བུ་པདྨ་རྩལ། །ཡི་གེའི་འདུ་བྱེད་ཟབ་གཏེར་ཕྲིན་ལས་རྒྱས། །ཡོལ་མོ་གཞུང་དུ་ཁྱོད་ནི་བསམ་གཏན་གླིང་། མཁའ་འགྲོ་གསང་བའི་སྙིང་ཐིག་ཆོས་ལ་དབང་། །དེ་དུས་ཀོ་འུ་མི་ཏྲིའི་སྤྲུལ་པ་ནི། །ཆོས་བདག་སྐྱེས་བུ་བསོད་ནམས་བསྟན་འཛིན་འབྱུང་། །ཟབ་གཏེར་གཉིས་ཀྱིས་འཛིན་སྐྱོང་མཐའ་རྒྱས་མཛད། །དེ་དག་ཆེ་ལོང་ཙམ་ཞིག་བརྗོད་པ་ཡིན། །སླར་ཡང་ཁྱོད་ནི་བེེ་རོ་ནམ་སྙིང་དང་། །ཀུན་བཟང་མཚོ་སྐྱེས་རྡོ་རྗེ་གཡུ་སྒྲ་ཡི། སྤྲུལ་པ་གཏེར་སྟོན་གསང་སྔགས་གླིང་པ་ཞེས། །སྤྲོ་ ༈ ཐུང་རིག་པ་ཧུར་ཞིང་ཆོས་ཉིད་མཐོང་། །ཟབ་གཏེར་གསུམ་འདོམས་གདུལ་བྱ་ཐབས་ཀྱིས་འདྲེན། །དེ་དུས་ཀོ་འུ་མི་ཏྲིའི་སྤྲུལ་པ་ནི། །ཆོས་བདག་སྐྱེས་བུ་སྣ་ཚོགས་རང་གྲོལ་འབྱུང་། །དེ་ནས་མི་གནས་མྱ་ངན་འདས་འོག་ན། །ཁྱོད་ནི་གཏེར་སྟོན་པདྨ་ཀློང་ཡངས་དང་། །ཨོ་རྒྱན་བཞད་དཔའ་རྩལ་ཞེས་གྲུབ་བརྙེས་པ། །མཁའ་འགྲོ་གསང་བའི་སྙིང་ཐིག་ཆོས་ལ་དབང་། །ཁྱད་པར་ས་གཏེར་བདུན་གྱིས་བསྟན་འགྲོར་སྨན། །དེ་དུས་ཀོ་འུ་མི་ཏྲའི་སྤྲུལ་པ་ནི། །རིགས་ཀྱི་མྱུ་གུ་འམ་ནི་ཆོས་ཀྱི་བདག །གཏེར་སྟོན་ཁྲག་འཐུང་གར་གྱི་དབང་ཕྱུག་འབྱུང་། །ཁྱོད་ཀྱི་གཏེར་གནས་གང་ཡིན་ཞེས་པ་ན། །རྨ་ཆེན་སྤོམ་ར་པདྨ་རི་མཐོ་དང་། །སྤྲེལ་རྫོང་བྲག་དཀར་གཡུ་མཚོ་བྲག་དཀར་དང་། །སེང་གེ་རྫོང་གསུམ་སྒྲགས་མདའ་རི་བོ་ཆེ། །ངང་པ་ལྷ་རི་སྡོང་ར་བྲག་གར་ནང་། །དྲིལ་ཞོན་ལྷ་རྩེ་ཤིང་ལོ་ཡིག་དྲུག་མ། །སེངྒེ་སྒོང་མཆོང་ནམ་གྲོ་ལ་སོགས་ནས། །གནས་ཆེན་གཏེར་ཆེན་གནས་ཕྲན་གཏེར་ཕྲན་འདོན།༈ །ཟབ་གཏེར་དུ་མས་ཆོས་སྒོ་གསར་དུ་འབྱེད། །རྫས་གཏེར་སྐུ་ཚབ་རིན་ཆེན་གཟི་སྒྲོམ་དང་། །མཆོང་སྒྲོམ་ཤེལ་སྒྲོམ་གཡུ་སྒྲོམ་བསྭེ་ཡི་སྒྲོམ། །གནམ་ལྕགས་ཕུར་པ་ཐུགས་རྟེན་ རྡོ་རྗེ་དང་། །གཏེར་རིགས་མི་འདྲ་བརྒྱ་དང་རྩ་བརྒྱད་ཡོད། །རེ་འགའ་ཆོས་གཏེར་ཕལ་ཆེར་རྫས་གཏེར་འདོན། །དེ་དག་ལོག་ལམ་སབྟས་མ་བསྒྱུར་ཞིང་། །ཚུལ་བཞིན་ལེན་པའི་རྟེན་འབྲེལ་དུས་འཛོམས་ན། །མཐའ་དམག་ཀླ་ཀློའི་འཕེལ་ཁ་ལོ་བརྒྱར་བཟློག །གཏེར་གྱི་གྲོགས་དང་ཆོས་བདག་གང་ཞེས་ན། །མི་མིན་ལྷ་ཡི་རིགས་ཅན་ཨུ་ཏྲ་ལྔ། །རིགས་དང་ཉེ་གནས་སྨོན་ལམ་དབང་གིས་འཛོམ། །དེ་རྣམས་ཁྱོད་སྔོན་གཏེར་རིགས་འཛིན་པའི་དུས། །གཟུགས་མེད་ལྷ་འདྲེ་གདུལ་བྱར་གཟིགས་ནས་ནི། །གང་འདུལ་སྤྲུལ་པས་འགྲོ་ཁམས་བདེ་ལ་བཀོད། །དེ་དུས་དེ་རྣམས་སྨོན་ལམ་རྣམ་དག་པའི། །ཟུང་འཇུག་རྟེན་འབྲེལ་འབྱུང་བ་དེ་ལྟར་ལགས། །དབྱིངས་ཀྱི་སྤྲུལ་པ་དབྱིངས་སྣང་མཁའ་འགྲོ་ལྔ། །སྟག་ཡོས་འབྲུག་སྦྲུལ་གླང་ངམ་ཁྱི་ལོ་པ། །དེ་དག་རྩ་བའི་གཟུངས་མ་ཌཱཀྐི་ལྔ། འཕྲལ་འཕྲལ་དངོས་གྲུབ་གཏེར་དང་གདུལ་བྱ་རྒྱས། །དབང་ཐང་སྤེལ་དང་རིགས་བརྒྱུད་འཛིན་པ་ཡི། །ཆ་གསུམ་ཡ་བཞི་གཏེར་གྱི་གྲོགས་སུ་མངགས། །དེ་དག་རྩ་བའི་གཟུངས་དང་གྲོགས་རྣམས་ནི། །རང་རང་བརྡ་བྱང་ཇི་བཞིན་མ་ནོར་བར། །སྐབས་རེར་གཏེར་ལ་ཕན་པའི་ཉེ་རྒྱུད་དང་། །རྫས་སོགས་རྟེན་འབྲེལ་ ༈ དུས་ལས་མི་ཡོལ་བའི། །ཐབས་མཁས་ཤེས་རབ་མིག་གིས་འབྱེད་པར་མཛོད། །ཚེ་རབས་མང་འབྲེལ་མཆོག་གི་གཟུངས་མ་ནི། །ནུབ་ཕྱོགས་སྤྲིན་དཀར་ཁུར་བའི་སྒྲ་བརྒྱར་འཛིན། །གནས་ཞིང་སྐྱེས་ཟབ་མོ་གཏེར་ལ་དབང་། །པདྨའི་རིགས་ཅན་སྤྱི་མགྲིན་སྙིང་ག་རུ། །བཾ་དང་ཧ་རི་ནི་སའི་རི་མོ་ཡོད། །སྤྲོ་ཐུང་རིག་པ་ཧུར་ཞིང་སྤྱོད་ལམ་མཛེས། །དཀར་དམར་སྨེ་བའི་ལུས་ཀུན་རྒྱན་རིས་བཀྲ། །མཆན་དང་མཁལ་ཁུང་དགའ་འཁྱིལ་གཡུང་དྲུང་མཛེས། །གནོན་སྦྱིན་ཆེན་པོར་ཕྲིན་ལས་བཅོལ་བ་དང་། །འགུགས་བྱེད་ལྕགས་ཀྱུའི་སྦྱོར་བས་ལས་བརྩམས་ན། །སྔོན་སྨོན་རྟེན་འབྲེལ་དུས་སུ་སད་པར་ངེས། །དེ་དུས་ནག་པོ་བདུད་དབང་མ་ཤོར་ན། །སྐུ་ཚེའི་འཕེལ་ཁ་བདུན་ཅུར་འཚོ་བར་འགྱུར། །ཆོས་ཀྱི་