Tibetan
དང་། །མ་མཁའ་འགྲོ་ལ་བརྟེན་མིང་གནད་ཟུངས། །སྔགས་གཞན་གྱིས་མི་ཐུབ་གོ་ཁྲབ་བསྒོ། །གནད་ཚུལ་བཞིན་བསྟན་པས་དོན་གཉིས་འགྲུབ། །ཡུལ་ངེས་མེད་འགྲིམས་པའི་སྟབས་ལྡན་ན། །མ་འགྲོ་བའི་དོན་ཆེན་ངེས་པ་འགྲུབ། །ས་གཅིག་ཏུ་བཟུང་ནས་བསྒོམ་བསྒྲུབ་ན། །ལྷ་དཔའ་བོ་མཁའ་འགྲོས་འཚོ་བ་སྦྱོར། །གྲོགས་ཆོས་སྐྱོང་སྲུང་མས་མཐུན་རྐྱེན་བསྒྲུབ། །སྔོན་སྦྱངས་པའི་ལས་འཕྲོ་དེང་འདིར་སད། །བརྡ་ཇི་ལྟར་ཤེས་བཞིན་ལག་ལེན་ཐོབ། །ཡུལ་ངན་པའི་གནས་སུ་མགོ་མ་འཁོར། །གྲོགས་ངན་པའི་ངག་གིས་བློ་མ་བསྒྱུར། །བློ་བརྟན་པོས་རང་ས་འཛིན་པ་གསལ། །ཅེས་ཟེར་ཞིང་སླར་སྨྲས་པ། ཨ་ཨཿ ང་མ་མོ་དབྱིངས་ཀྱི་ཡུམ་ཆེན། །ང་ཆོས་ཉིད་མཁའ་རུ་དེང་འགྲོ། །དོན་དབྱིངས་རིག་དབྱེར་མེད་ཆེན་པོས། །དོན་ངང་ཚུལ་མཐོང་བའི་དུས་སུ། །ངས་གླིང་བཞི་ཡུད་ཀྱིས་བསྐོར་ནས། །ཤར་གསལ་བྱེད་དང་འགྲོགས་སླེབ་3 ཡོང་།དབྱིངས་ལྷུན་གྲུབ་བདེ་བ་ཆེན་པོར། །ཡུལ་མ་དག་སྣང་བ་འཕོས་ནས། །མ་མཐོང་བས་མཐོང་ཆེན་ཕྱེས་ནས། །ཡུལ་གཉིས་འཛིན་དྭངས་མའི་དབྱིངས་སུ། །གོ་འཕོས་ནས་འཕེལ་ཚད་རྫོགས་ཚེ། །ང་དང་ལྡན་ཞིང་ནས་སླེབས་འོང་། །སེམས་མ་རིག་རིག་པར་འཕོས་ནས། །སྐུ་ཞིང་ཁམས་མངོན་དུ་གྱུར་ཏེ། །སྤྲུལ་བསྒྱུར་ལ་རང་དབང་ཐོབ་པའི། །མ་ཆེན་ང་ནུབ་ནས་ཆས་འོང་། །ཟག་མེད་པའི་བདེ་ཆེན་སྟེར་ནས། །དབྱིངས་དག་མཉམ་རོལ་པར་འདྲེན་འགྲོ། །ཚེ་འདིར་སྣང་གི་ཆོས་ཅན་སྣང་བ། །དབྱིངས་ཆོས་ཉིད་མཉམ་བརྡལ་གྱི་ཀློང་དུ། །མི་འཇིགས་པའི་གདེང་ཆེན་ཐོབ་ཚེ། །ང་ལས་རབ་ཞིང་ནས་སླེབ་འོང་། །སྒྲིབ་གཉིས་ཀྱི་ཤུན་པ་ཕྲལ་ནས། །གནས་རང་སྣང་དོན་གྱི་འོག་མིན། །མངོན་གྱུར་དུ་མ་ངེས་འགྲོགས་འགྲོ། །གནས་སྟུག་པོ་བཀོད་པ་དེ་ཀ །མ་མཁའ་འགྲོ་ང་ཡི་ཀློང་མཛོད། །དེ་མངོན་དུ་བསྒྱུརའོང་ཨེ་མ། །ཞེས་གླུ་རིང་དེ་ལྟར་བླངས་ནས་འཇའ་ཚོན་ནམ་མཁའ་ལ་ཡལ་བ་ལྟར་མི་སྣང་བརགྱུར་ཏོ། །ཞེས་གསུངས་ནས་དེ་ལྟར་གྱིས་དང་ད་དུང་ལུགས་གཉིས་ཀྱི་བསླབ་བྱ་ཐམས་ཅད་ངས་ཁྱོད་ལ་སྨྲས་དང་ཆོག་གི་གསུངས་ནས། རྗེ་དེ་ཉིད་སྒྲུབ་ཁང་དུ་བྱོན་ནས་བཞུགས་སྐབས་ ༈ བླ་མ་ཡབ་སྲས་ཀྱི་བར་ལ་རྫུན་དབྱེན་ཞིག་བྱུང་བས། རྗེ་དེ་བླ་མའི་དྲུང་དུ་བྱོན་པས། བླ་མའི་ཞལ་ནས་ཁྱོད་བཟའ་ཚང་རྣམས་ལ་ཆགས་ནས་ངའི་བཀའ་མི་བསྒྲུབ་པར་ཡིག་ཆ་དངོས་རྫས་གང་བཟང་ཚགས་སུ་བྱས་ནས་སྡོད་གྲབ་བྱས་ཅིང་ཡོད་པས། ང་རང་གིས་ཁྱོད་ལ་དགོས་མེད་པ་འདྲ་གསུངས་ནས་ཕྱག་འབེབས་གནང་བས། རྗེས་ཕྱག་ཕུལ་ནས་བླ་མ་རིན་པོ་ཆེ་ཁྱོད་ཀྱི་བཀའ་དང་འགལ་བ་མི་བསྒྲུབ་ངེས་པ་ཡིན་པས། ང་རང་གིས་མཛོད་བདུན་དང་ཡ་བཞིའི་དཔེ་ཆ་རེ་མ་གཏོགས་ངོས་རྫས་དུ་མ་དངུལ་སྲང་གང་གི་རྒྱུ་རྩ་བཟུང་མེད་ངེས་པ་འདི་ཕྱི་ཐུབ་པ་ཡིན་པས། འུ་ཅག་ཡབ་སྲས་ཀྱི་བར་ལ་རྫུན་དབྱེན་བྱེད་མཁན་དེ་གང་ཡིན་བདག་ལ་གསུང་དུ་གསོལ་ཞུས་པས། བླ་མའི་ཞལ་ནས་འོ་ཁྱོད་སྔར་ཚིག་ལྟར་དབུས་ལ་འགྲོ་གྲབ་བྱེད་པ བདེན་ན་ངའི་བཀའ་ལ་འགལ་བ་མིན། ཕ་བུའི་འདུན་པ་ཡོདགསུངས་ཏེ་རྫུན་དབྱེན་བྱེད་མཁན་གྱི་མིའི་མིང་གསུངས་ནས་ཁྱོད་ཀྱི་སེམས་ལ་བཟུང་མི་ཉན་གསུངས། ཡང་རྗེའི་ཞལ་ནས་ང་རང་གི་དཔེ་ཆ་ཐམས་ཅད་མེད་པར་བྱེད་ཨེ་རེད་ལགས་ཞུས་ཚེ། ཇི་ལྟར་བྱས་ཀྱང་ཆོག་གསུངས། གཞན་སྐུ་ནུས་ཆེ་བ་མཁྱེན་སྤྲུལ་འཛམ་གླིང་དབང་རྒྱལ་སོགས་བུ་སློབ་རྣམས་ཀྱིས་པདྨ་བཀོད་དུ་ བྱོན་པའི་ལམ་ལྷ་སྐུ་རིམ་དུ་འཚོགས་སྐབས། བླ་མའི་ཟབ་གཏེར་ཞིང་སྐྱོང་གི་སྒྲུབ་པ་གཏན་ཕབ་མཛད་ནས་ལམ་ལྷར་འདོན་དགོངས་གསུངས་བཞིན། བུ་སློབ་རྣམས་ཀྱིས་དེ་ལྟར་ལེགས་པར་སྟ་གོན་མཛད་ཚེ། གློ་བུར་བླ་མའི་སྐུ་ཁམས་མི་བདེ་བ་ལྟ་བུ་བྱུང་འདུག་པས། རྗེའི་ཞལ་ནས་ཇི་ལྟར་བྱས་ཀྱང་ཁྱོད་མི་བཞུགས་ངེས་པར་འདྲ་ན། བདག་ལ་ལུགས་གཉིས་ཀྱི་བྱ་བ་ཐམས་ཅད་ཀྱི་བསླབ་བྱ་གང་འདོད་དུ་སྩལ་གསུངས་པ་དེ་ལན་གནང་དུ་གསོལ་ཞུས་ནས་ཕྱགཕུལ་བས། བླ་མས་ཀྱང་གཏེར་གྱི་ཁྲོམ་སྡོམ། བུ་སློབ་སྐྱོང་ཚུལ། དབུས་ཕྱོགས་ལ་བྱོན་ན་ཟབ་གཏེར་གྱི་ཆོས་སྒོ་དབང་ཚུལ་སོགས་ཀྱི་ཞལ་ཏ་ཐམས་ཅད་ལྷག་ལུས་མེད་པར་གསུངས་ཚེ། རྗེ་དེ་ཉིད་ཐུགས་ཤིན་ཏུ་སྐྱོ་ནས་བཤུམ་པར་མཛད་པས། བླ་མའི་ཞལ་ནས་ངས་ཁྱོད་ལ་འཁོར་འདས་རང་སྣང་དུ་ཐག་བཅད་ནས་རང་རིག་བླ་མར་ངོ་སྤྲད་དེ་བདེ་སྡུག་ཐམས་ཅད་རོ་སྙོམས་སུ་རྟོགས་པའི་གདམས་པ་གཏད་པ་འདི་ལ་གདེངས་ཐོབ་པར་མཛོད་དང་། ང་དང་ནམ་ཡང་འདུ་འབྲལ་མེད་པར་རྗེས་སུ་བཟུང་འོང་གསུངས་པས། རྗེའི་ཞལ་ནས་ད་བླ་མ་ཁྱོད་དང་དངོས་སུ་མཇལ་བའི་སྐལ་བ་ནམ་ཡོད་ཞུས་པས། བླ་མའི་ཞལ་ནས་ད་སྐལ་བ་ཁྱིའི་ལོ་ལ་འཕྲད་འོང་གསུངས། ཡང་རྗེའི་ཞལ་ ༈ ནས་བླ་མ་རིན་པོ་ཆེ་ཁྱེད་པདྨ་བཀོད་དུ་བྱོན་དགོས་གསུངས་པ་དེ་ལ་དགོངས་པའི་གཞི་ཇི་ལྟར་ཡིན། ང་རང་ལ་སྦ་གསང་མེད་པར་གསུང་དུ་གསོལ་ཞུས་ཚེ། བླ་མའི་ཞལ་ནས་ང་རང་གི་མཐའ་མི་ཀླ་ཀློ་འདུལ་བའི་དུས་ལ་བབ་པ་ཡིན་པས་དེའི་དོན་གྱི་ཡིན། བསྐལ་པ་འབྲུག་གི་ལོར་གསལ་འོང་ཐང་། ད་མཁན་སྤྲུལ་ལ་སོགས་པའི་བཀོད་ཆེན་པ་རྣམས་དེའི་དུས་སུ་སྤྱན་འབྲུག་རྡོ་རྗེ་ཕག་མོའི་གནས་སུ་མ་འགོར་བར་བཀོད་ཆེན་ལ་མྱུར་དུ་ཐོན་ཐབས་ལྡན་རྟེན་འབྲེལ་ལོང་དང་། ལམ་འཕྲང་སོགས་བར་ཆད་ཀྱི་དབང་དུ་སོང་ན་བྱ་བ་ལམ་དུ་ཨེ་འགྲོ་མི་ཤེས། ཁྱོད་ལ་སྔར་སྨྲས་བཞིན་དབུས་ཕྱོགས་དང་གངས་རི་ཐོད་དཀར་རྣམས་སུ་མི་རིང་བར་སོང་དང་འཕྲད་འོང་། ང་དང་མ་འཕྲད་ཀྱི་བར་དུ་ཨོ་རྒྱན་ཟ་ཧོར་པདྨ་འདི་གཏེར་རྫས་ཀུན་གྱི་བཅུད་ལྟ་བུ་ཡིན་པས། ངའི་ཚབས་སུ་ཁྱོད་ལ་སྦྱིན་པ་ཡིན་པས་གཞན་གཅིག་ལ་འདི་མི་དབང་བས་སྦྱིན་མི་དགོས་གསུངས་ཏེ་ཐུགས་གཏད་སྨོན་ལམ་མཛད་ནས་གནང་། ཁྱད་པར་དུ་གཏེར་རྫས་རྣམས་དང་གཡང་ཐོད་སོགས་བླ་མ་ལ་སྐུ་ཆས་ཅི་ཡོད་ཐམས་ཅད་གཅེས་ནོར་དུ་རྗེ་ལ་གནང་ནས། ད་སྙིང་གཏམ་ཚིག་གཅིག་ཡོད་པས་སང་ཉིན་ཤོག་དང་བཤད་གསུངས། དེ་ནས་བླ་མའི་ སྐུ་ཁམས་རྗེ་འཁྲུགས་ཡིན་པས། རྗེ་དེ་ཉིད་བླ་མ་དང་བྲལ་མ་ཐུབ་པར་ལན་གྲངས་མང་པོར་ཕྱིར་བླ་མའི་མདུན་ལ་བྱོན་ཚེ། ང་རང་གིས་ལུགས་གཉིས་ཀྱི་བསླབ་བྱ་ཐམས་ཅད་ཁྱོད་ལ་སྨྲས་ཚར། ད་མཚན་མུན་ནག་འདིའི་ནང་དུ་ཡང་ཡང་ཁྱོད་ཕྱིར་ཅི་ལ་འོང་བ་ཡིན། ཕར་གནས་མལ་ལ་སོང་ནས་ཉོལ་སྡོད། ནང་སྔ་མོ་ཤོག་གསུངས་པས། རྗེའི་ཞལ་ནས་བདག་བླ་མ་ཁྱོད་དང་བྲལ་མི་ཐུབ་པས་སེམས་འདི་ལ་སྡུག་བསྔལ་ཆེན་པོ་ཞིག་འདུག་སྟེ། གནས་མལ་ལ་འགྲོ་སྙམ་མི་སྐྱེས་ལགས། ང་རང་ཉིད་ཀྱི་གཟིམ་རྟེན་དུ་ཉལ་ཨེ་ཆོག་ཞུས་པས།བླ་མས་ཆོག་གསུངས་ཚེ། ཡུམ་གྱིས་ཁྱོད་ཕ་བུ་གཉིས་ལ་ཉིན་མཚན་ཁ་སྦྱར་ནས་བཤདཀྱང་ཚིག་ལ་ཟད་མཐའ་མེད་ན། དོ་ནུབ་ཀྱི་གཏམ་གྱི་མཇུག་རྫོགས་མི་ཐུབ་པས་མོ་གཉིད་དུ་མི་འཇུག་གི་། །སང་ཉིན་བཤད་ན་ནམ་ལོས་ལངས་ཟེར་ནས། རྗེ་དེ་ཉིད་ལ་སེག་སྡང་བྱེད་འདུག་པས། ཡང་བླ་མས་ད་ནང་སྔ་ཤོག་གསུངས་ནས་རྗེའི་དབུ་ལ་ཕྱག་བྱིལ་དང་ཞལ་བཏུག་པ་སོགས་ཐུགས་བརྩེ་བརྩེ་མཛད་ནས། རྗེས་བླ་མ་ལ་ཕྱག་ཕུལ་ཏེ་གནས་མལ་དུ་བྱོན་ནོ། །ལོ་ངོག་དེའི་དུས་འཛིན་ཆུ་ཡོས་ལོའི་ཟླ་བ་བཅུ་གཅིག་པའི་ཚེས་བརྒྱད་ཀྱི་ནང་སྔ་མོ་བླ་མའི་བཀའ་བཞིན་རྗེ་དེ་ཉིད་མདུན་དུ་ཕེབས་གྲབ་བྱེད་ཀྱིན་ ཡོད་ཚེ། གྲྭ་པ་ཞིག་ཐོན་བྱུང་ནས་ཁྱེད་ལ་མཁྱེན་སྤྲུལ་སང་གི་མདུན་དུ་ད་ནས་བྱོན་ཤོག །ཞིང་སྐྱོང་གི་མཆོད་དཔོན་བྱེད་དགོས་གསུང་གི་ཟེར། རྗེའི་ཞལ་ནས་བླ་མ་རིན་པོ་ཆེའི་སྐུ་མདུན་དུ་ཅུང་འགྲོ་ཞིག་དགོས་དགོས་པས། དེ་རྗེས་འོང་ན་ཆོག་གམ་གསུངས་པས། ཁྱོད་ཀྱིས་མཆོད་དཔོན་མ་བྱས་ན་སྐུ་རིམ་འདོན་རྒྱུ་མི་འོང་བས་ད་ནས་ཤོག་གསུང་གི་ཟེར་བས། རྗེའི་ཐུགས་དགོངས་ལ་བླ་མའི་མདུན་དུ་འགྲོ་དགོས་ཀྱང་། མཁྱེན་སྤྲུལ་སྐུ་ནུས་ཆེ་བ་ཡིན་པས་ཐུགས་རྟགས་བཙན་པས་མ་ཞུས་ན་མི་སྙམ་དགོངས་ཏེ། མཁྱེན་སྤྲུལ་གྱི་སྐུ་མདུན་དུ་ཕེབས་ནས། རྗེ་ང་བླ་རིན་པོ་ཆེས་ཤོག་གསུངས་ཡོད་པའི་དེ་གར། ཅུང་འགྲོ་ཞིག་བྱས་ནས་འོང་ན་ཨེ་ཆོག་ཞུས་ཚེ། ད་མལ་འུ་ཅག་འགོར་སོང་བས་ཉི་མ་ཤར་འོང་གི །ད་ལྟ་ཇ་སྐབས་ལ་སོང་ན་ལོས་ཆོག་གསུངས་ནས་ནང་སྔ་བྱོན་རྒྱུ་བཀའི་མ་གནང་། རྗེ་དེ་ཉིད་ཐུགས་ཤིན་ཏུ་གཅོང་ཡང་མཆོད་དཔོན་མཛད་ནས་བཞུགས། དེའི་བར་སྐབས་མགོན་བླ་ཤེས་རབ་དང་གཅིག་གཉིས་ཞིག་འོང་བས་བླ་མའི་བསྙུན་ཅི་འདྲ་རེད་བྲིས་ཚེ། ཡར་དོངས་ནས་གསོལ་བ་རེད་མཛད་འདུག་ཟེར། དེར་འདུས་ཀྱི་བུ་སློབ་ཐམས་ཅད་ཀྱིས་དགའ་སྤྲོ་བྱེད་འདུག །མི་དེ་༈ རྣམས་ཕར་སོང་མ་ཐག་ཏུ་མདུན་གཡོག་པ་ཞིག་གིས་མཁྱེན་སྤྲུལ་གྱི་སྙན་དུ་ལྐོག་ཤུག་བྱས་ཏེའདུག་པས། མཁྱེན་སྤྲུལ་གྱི་གསུང་གྲོལ་ཏེ་འདོན་པའི་མཚམས་བསྐྱུར་ནས་ཧར་གྱིས་བཞེངས་ཏེ། དགོན་ནང་དུ་བླ་མའི་གཟིམ་ཁང་དུ་ཕེབས་སོང་། དེར་འདུས་ཀྱི་བུ་སློབ་གཞན་ཐམས་ཅད་ཀྱིས་ཆོ་ངེ་དིར་གྱིས་སོང་ནས་དྲན་པ་ཉམས་པ་བྱུང་། དེ་ནས་རྗེའི་ཐུགས་ལ་བླ་མ་ཞིང་དུ་བྱོན་སོང་ངེས་པ་རེད་དགོངས་ནས་བླ་མའི་གཟིམས་ཁང་དུ་བྱོན་གྲབ་བྱས་པས། བླ་སེར་ཐམས་ཅད་ཀྱིས་ཁྱོད་ཀྱིས་མཆོད་ཆ་ཡི་གེ་ལ་སོགས་པ་རྣམས་ཚགས་སུ་ཚུད་པར་གྱིས་ཟེར་ནས་ཐམས་ཅད་དགོན་ཐོག་ཏུ་སོང་། རྗེ་དེ་ཉིད་ཀྱིས་ཡོ་བྱད་ཐམས་ཅད་ཚགས་སུ་མཛད་ནས་རིམ་གྱིས་དགོན་ནང་ལ་ཕེབས་ཏེ། བླ་མའི་གཟིམས་ཁང་གི་སྒོ་བར་ནས་གཟིགས་པས་སུ་གཅིག་ཀྱང་མི་འདུག་པའི་གཟིམ་སྒོ་ག་ལེར་ཕྱེས་ནས་ནང་དུ་བྱོན་ཏེ། བླ་མའི་ཞབས་སྤྱི་བོར་བླངས་ཏེ་གསོལ་འདེབས་དང་སྨོན་ལམ་མཛད་ཚེ། ཐུགས་ཤིན་ཏུ་སྐྱོ་བས་དྲན་མེད་དུ་འགྲོ་ལ་ཁད་བྱུང་བས། དེའི་ཐད་དུ་བླ་མའི་ཐུགས་ཀ་ནས་འོད་དཀར་པོ་ཞིག་བྱུང་ནས་རྗེ་དེ་ཉིད་ཀྱི་ཐུགས་དཀར་ཐིམ་སོང་སྣང་འཆར་ཚེ། ཞག་གསུམ་གྱི་བར་དུ་བདེ་བ་ཆེན་པོའི་འོད་གསལ་དང་མ་བྲལ་བར་གནས་པས། འདས་རྗེས་ཀྱིས་ཆོས་ ༈ སྐོར་མཐའ་ཡས་པའི་དགོངས་བརྒྱུད་ཀྱི་བྱིན་རླབས་ཐོབ་པར་གྱུར་ཏོ། །དེ་ནས་ཐམས་ཅད་ཀྱིས་གདུང་ཆོས་བྱ་དགོས་པ་སོགས་ཀྱི་གྲོས་བྱས་ཚེ། མཁྱེན་སྤྲུལ་གྱི་དབུས་བུ་སློབ་འཁོར་འབངས་ཐམས་ཅད་ཀྱིས་རྗེ་དེ་ཉིད་བླ་མའི་ཐུགས་ཀྱིས་ཟིན་པ་དང་། འགལ་བ་སྤུ་ཙམ་མེད་པ་ངེས་པར་ཡིན་འདུག་པས། དེ་ཀས་གདུང་ཆོས་བྱེད་དགོས་ཟེར་བ་ཁ་འཆམས་ནས་རྗེ་ལ་དེ་བཞིན་དུ་ལོ་རྒྱུས་ཞུས་ཚེ། རྗེས་འཁོར་འབངས་ཐམས་ཅད་ཀྱི་ནང་ནས་ང་རང་གི་ངན་མེད་པའི་ཁྱེད་བུ་སློབ་ཆེ་བ་རྣམས་ཀྱིས་བླ་མའི་གདུང་གི་ཐུགས་ཁུར་བཞེས་པར་མཛོད་གསུངས་ནས་གྲོས་མ་འོང་བས། བུ་སློབ་རྣམས་ཀྱིས་མཁྱེན་སྤྲུལ་ལ་ཞུས་དང་དེའི་བཀའ་མི་བཅག་ཟེར་ནས་བཞུད། དེའི་ཐབས་ཅིག་གི་མཁྱེན་སྤྲུལ་རིནཔོ་ཆེས་རྗེ་ཉིད་མདུན་དུ་ཤོག་གསུངས་ཏེ། སྔར་བཞིན་དུ་བླ་མའི་གདུང་གི་ཐུགས་ཁུར་ཁྱོད་ཀྱིས་ལོང་གསུངས། བཀའ་མ་གཅོག་པར་གདུང་ཆོས་སོགས་ལེགས་པར་མཛད། དེ་ནས་ཐུགས་ཤིན་ཏུ་སྐྱོ་ནས་བླ་མ་ལ་འོ་དོད་འབོད་ནས་གསོལ་བ་འདི་ལྟར་བཏབ། ཀྱི་ཧུད་ཀྱི་ཧུད་ཀྱེ་མ་ཀྱི་ཧུད། །རྒྱལ་ཀུན་འདུས་ཞལ་བླ་མ་རྗེ། །མཚོ་སྐྱེས་རྗེ་དང་དབྱེར་མེད་པ། །བདག་ཅག་འགྲོ་བ་ཡོངས་ཀྱི་མགོན། བདུད་འཇོམས་རྡོ་རྗེར་གསོལ་བ་འདེབས། །བདག་རྒྱུད་བྱིན་གྱིས་བརླབ་ཏུ་གསོལ། །ཕྱོགས་གནས་གང་དུ་བསྡད་ཀྱང་རུང་། །དྲིན་ཅན་བླ་མ་ཡང་ཡང་དྲན། །ཉིན་མཚན་བར་མེད་འཁྱུད་འཁོར་དུ། །གསལ་བྱེད་ཆུ་རྒྱུན་རྒྱུན་ཆད་མེད། །ཤར་རི་མཐོའི་དཀྱིལ་ནས་ཉི་དཀྱིལ་ཤར། །ཕ་བླ་མའི་ཞལ་གྱི་དཀྱིལ་འཁོར་དྲན། །སེམས་གདུང་བས་སྐྱོ་ནས་མཆི་མ་ཤོར། བུས་གསོལ་བ་འདེབས་སོ་ཐུགས་རྗེས་ཟུངས། །ཉིན་གསལ་བའི་འོད་ཟེར་ཀུན་ལ་ཁྱབ། །ཕ་རྗེ་བཙུན་བླ་མ་ཁོ་རང་དྲན། །ཐུགས་རྗེ་ལ་ཕྱོགས་རིས་མེད་པ་ཡི། །སྐལ་ལྡན་རྣམས་སྨིན་གྲོལ་ལམ་ལ་བཀོད།།བུས་གསོལ་བ་འདེབས་སོ་ཐུགས་རྗེས་ཟུངས། །ལྷོ་སྤྲིན་དཀར་མཐོང་ནས་སླར་ཡང་ཡལ། །ཕ་བླ་མ་དུས་གསུམ་སངས་རྒྱས་དེ། །ངའི་མགོན་གཅིག་བྱོན་ཀྱང་མྱ་ངན་འདས། །བརྡ་ཇི་ལྟར་མཐོང་བའི་བླ་མ་དྲན། །བུས་གསོལ་བ་འདེབས་སོ་ཐུགས་རྗེས་ཟུངས། །དབྱིངས་ནམ་མཁའ་མཐོང་ཚེ་བླ་མ་དྲན། །ཕ་ཆོས་ཀྱི་སྐུ་ཡི་དགོངས་པ་ལ། ། དུས་འཕོ་འགྱུར་མེད་པའི་བྱིན་རླབས་ཞུས། །ཐུགས་རྒྱུད་ཀྱི་ཡེ་ཤེས་ཡོན་ཏན་རྣམས། །གཅེས་ནོར་དུ་ཕ་ཕོག་གཏད་རྒྱ་མཛད། །བུས་གསོལ་བ་འདེབས་སོ་ཐུགས་རྗེས་ཟུངས། །ལོ་བཅུ་ ༈ གཉིས་ནས་བཟུང་ད་བར་དུ། །ཕ་བླ་མར་མཇལ་ཀྱང་སྐད་ཅིག་འདྲ། །ཆོས་ཟབ་གནད་མི་འདྲ་མང་ཐོས་ཀྱང་། །ཕ་བཞུགས་ཡུན་ཐུང་བའི་ཕུད་ཙམ་འདྲ། ། བུས་གསོལ་བ་འདེབས་སོ་ཐུགས་རྗེས་ཟུངས། །མཚན་ཐོས་པས་དད་པའི་བ་སྤུགཡོ། །འཁོར་བ་ལ་ཞེན་པ་གཏིང་ནས་ཆོད། གསུང་ཐོས་པས་མ་རིག་གཉིད་ལས་སད། །ཤེས་རབ་དང་བློ་གྲོས་སྤོབས་པ་ཐོབ། ཞལ་མཐོང་བ་ཙམ་གྱིས་བག་ཆགས་དག །རྩོལ་མེད་ཀྱི་རྟོགས་པ་མངོན་དུ་གྱུར། །བུས་གསོལ་བ་འདེབས་སོ་ཐུགས་རྗེས་ཟུངས། །ད་འདི་ནས་ཚེ་རབས་ཐམས་ཅད་དུ། །ཕ་ཁྱོད་ཀྱི་དགོངས་སྤྱོད་ཅིའདྲ་ཡང་། །བུ་བདག་ཀྱང་དེ་ལྟར་གྱུར་ནས་ཀྱང་། །ཚེ་འདི་རུ་དོན་གཉིས་དཔལ་ཐོབ་ནས།།ཞིང་མི་འགྱུར་བདེ་ཆེན་ཕོ་བྲང་དུ། །ཕ་བླ་མ་ཁྱོད་ཀྱིས་འདྲེན་དུ་གསོལ། །གསུངས་ནས་ཕྱག་མང་དུ་ཕུལ་ཏེ་བཞུགས་ཡོད་པའི་སྐབས། རང་གནས་ཀྱི་ཁང་པའི་སྟེང་ན་འཇའ་འོད་ཀྱི་གུར་ཁང་འདྲ་བ་ཞིག་འདུག་པ་དེའི་ནང་ནས་མཁའ་འགྲོ་གཉིས་དང་བླ་མ་རིན་པོ་ཆེ་བཅས་བཞུགས་ཡོད་པས། རྗེའི་ཐུགས་ལ་ཅི་ཡིན་དགོངས་ཚེ་མཁའ་འགྲོ་གཉིས་ཀྱིས་འདི་སྐད་ཟེར། ཨེ་མ་གསོན་དང་སྐལ་ལྡན་རིགས་ཅན་ལགས། །ཕ་ གཅིག་མཚོ་སྐྱེས་རྡོ་རྗེ་བདུད་འཇོམས་པས། །ཇི་ལྟར་བསྟན་པའི་རང་རིག་ཆོས་སྐུ་འདི། །ཇི་བཞིན་ངང་དུ་མ་ནོར་ཉམས་སུ་ལོངས། །ཟབ་མོའི་གདམས་པ་ཐུགས་ཀྱི་ཆོས་མཛོད་རྣམས། གང་འདོད་ཁྱོད་ལ་ཕ་ཕོག་ཚུལ་དུ་འོང་། །བླ་མ་ཡུལ་དུ་འཛིན་ན་ངལ་བའི་རྒྱུ། །རང་རིག་ངོ་བོ་མི་འགྱུར་ཆོས་སྐུ་འདི། །དོན་གྱི་བླ་མ་ཡིན་ཕྱིར་མཆོག་ཏུ་ཟབ། །ཐུགས་ངལ་མ་མཛད་གནས་ལུགས་རང་ས་ཟུངས། །བློ་འདས་འོད་གསལ་ཀློང་དུ་འདུ་འབྲལ་མེད། །ཞེས་གསུངས་པས། ཡང་རྗེའི་ཞལ་ནས་བླ་མ་མཁའ་འགྲོ་རྣམས་ལ་གདུང་དབྱངས་ཀྱི་ཚིག་མང་དུ་གསུངས་མཐར་འཇའ་འོད་ཀྱི་གུར་ཁང་ཇེ་མཐོར་སོང་ནས་ལྷོ་ནུབ་ཀྱི་ཕྱོགས་སུ་མི་སྣང་བར་ཡལ། དེ་ནས་རྗེ་དེ་ཉིད་ཀྱིས་བླ་མའི་ཐུགས་དམ་རྣམས་གསུངས་ནས་གདུང་མདུན་ལ་བཞུགས་པས། ཞག་བདུན་ཙམ་འགྲོ་སྐབས་ཞལ་མངོན་སུམ་དུ་གཟིགས་ནས་འདི་སྐད་གསུངས། རིགས་ཀྱི་བུ་ཁྱོད་ལ་བདག་གིས་ཕྱི་ནང་གསང་གསུམ་གྱི་སྒྲུབ་པའི་བཀའ་དབང་རྣམས་བསྐུར་བའི་དུས་ལ་བབ་འདུག་པས། ཁྱོད་ཀྱི་ལུས་ལོངས་སྤྱོད་དང་བཅས་པ་ང་ཡི་ཕྱོགས་སུ་ཕུལ་ཞིག་གསུངས་པས། རྗེ་དེ་ཉིད་ཐུགས་དགའ་སྐྱོ་འདྲེས་མར་སོང་ནས་ཡུན་གཅིག་ལ་ཅི་ཡང་སྨྲ་མ་ནུས་པ་དྲན་མེད་དུ་ ༈ སོང་བས། བླ་མས་བྱིན་རླབས་མཛད་ཚེ་དྲན་པ་རྙེད་ནས་ཕྱག་ཕུལ་ཏེ་འདི་སྐད་གསུངས། །ལུས་དབང་རི་རབ་གླིང་བཞི་ཡན་ལག་ལྔ། །སེམས་ཉིད་བདེ་བ་ཆེན་པོ་འཁོར་འདས་གཞི། །དབྱིངས་སྣང་ལྷུན་གྲུབ་ཡོན་ཏན་བཀོད་པ་རྫོགས། །རང་བཞིན་རྣམ་དག་མཎྜལ་རྒྱ་མཚོ་འདི། །སྐུ་གསུམ་རིགས་འདུས་བླ་མ་ཁྱོད་ལ་འབུལ། །བདག་སོགས་འགྲོ་བའི་ཚོགས་གཉིས་རབ་རྫོགས་ཕྱིར། །ཐུགས་རྗེ་ཆེན་པོས་དགོངས་ཏེ་བཞེས་སུ་གསོལ། །ཞེས་གསུངས་ནས་ཕྱག་མང་དུ་ཕུལ་བས། བླ་མའི་སྐུའི་གར་བསྒྱུར་ཏེ་ཧེ་རུ་ཀ་པ་རྡོ་རྗེ་དང་ཕུར་པ་གདེངས་པ་ཞིག་ཏུ་གྱུར་ནས་ཁྲོ་བོའི་གད་རྒྱང་ཧཱུྃ་རིང་གི་དབྱངས་ཀྱི་སྒྲ་ལ་བསྐུལ་ནས་འདི་སྐད་གསུངས། ཨཱཿཨཱཿཨཱཿ ཨེ་མ་སྐལ་ལྡན་ལས་འཕྲོ་ཅན། །རིག་པའི་བུ་ཆུང་དྲི་མ་མེ༵ད། །མཁྱེན་གཉིས་འོ༷ད་ཟེར༷་དཔལ་དང་ལྡན། །མ་བཅོས་སྒོ་གསུམ་གཅིག་དྲིལ་དུ། །མོས་གུས་མཛོད་ལ་ཤེས་པ་གཏོད། །སྣང་སྲིད་ཐམས་ཅད་དག་པ་ཆེ། །ཕྱི་ནང་གཞན་གསུམ་ལྷའི་རྣམ་རོལ། །ཡོངས་གྲུབ་ཆེན་པོར་ལམ་ཁྱེར་བ། །བླ་མ་ཕྱི་ལྟར་གྲུབ་པ་ཡིན། །རང་ལུས་ལྷ་ཡི་ཕྱག་རྒྱར་རབ་གསལ་ནས། །སྤྱི་བོར་མགྲིན་པ་སྙིང་གར་བླ་མ་བསྒོམ། །དབང་ལེན་ ཐུགས་ཡིད་བསྲེ་ཞིང་ངལ་གསོ་བ། །བླ་མ་ནང་ལྟར་སྒྲུབ་པའི་ལག་ལེན་ཡིན། །རང་ཉིད་བླ་མའི་ཕྱག་རྒྱར་བསྒོམ་ནས་ཀྱང་། །རིག་པ་མི་འགྱུར་བདེ་ཆེན་འདུས་མ་བྱས། །བློ་འདས་གཉུག་མ་འོད་གསལ་ཆོས་ཀྱི་སྐུ། །ཡེ་ནས་རང་སེམས་བླ་མའི་ཐུགས་གཉིས་ཀ །དབྱེར་མེད་གཅིག་འདྲེས་མཉམ་ཉིད་ཆོས་སྐུའི་ཀློང་། །མ་བཅོས་མ་བསྒྱུར་རང་བབས་ངང་གནས་པ། བླ་མ་གསང་བ་ལྟར་དུ་བསྒྲུབ་ཐབས་ཡིན། །མདོར་ན་སྣང་སྲིད་བླ་མའི་དཀྱིལ་འཁོར་དུ། །བཞིར་བཞེངས་འོད་གསལ་ཕྱག་རྒྱར་མཉམ་སྦྱོར་བའི། །མ་དག་བསྐྱེད་རིམ་སྣོད་བཅུད་ལྷ་རུ་དག །རྫོགས་རིམ་རྩ་རླུང་ཐིག་ལེ་བཅུད་དུ་སྨིན། །རྫོགས་པ་ཆེན་པོ་སྲིད་ཞི་མཉམ་རྫོགས་ཀློང་། །བདུད་འཇོམས་རྡོ་རྗེ་སྐུ་གསུང་ཐུགས་ཡོན་ཏན། །ཕྲིན་ལས་ལ་སོགས་མཉམ་རྫོགས་རིག་པའི་དབྱིངས། །ཡོངས་གྲུབ་བླ་མའི་དཀྱིལ་འཁོར་རང་བྱུང་འགྲུབ། །འདི་དོན་མ་བརྗེད་སྙིང་གི་དཀྱིལ་དུ་ཟུངས། །དུས་རྣམ་ཀུན་ཏུ་ཉམས་ལེན་གནད་དེ་དང་། །མི་འབྲལ་བསྒྲུབ་པ་འདི་ལ་བརྩོན་ཞུས་ན། །ང་དང་ནམ་ཡང་འདུ་འབྲལ་ཡོད་མ་ཡིན། །ཐུགས་རྒྱུད་དགོངས་པའི་ཟབ་དོན་ཁྱོད་ལ་སྦྱིན། །གསུངས་ཏེ་སྐུའི་གར་བསྒྱུར་ཏེ་སྔར་གྱི་སྐུ་བཞུགས་པའི་སྐབས་ལྟར་ མཛད་ནས་ཤོག་དྲིལ་གསུམ་གནང་སྟེ། འདི་ང་རང་གི་སྐུ་རྒྱུད་ཉི་མའི་སྙིང་པོ། གསུང་རྒྱུད་མུན་སེལ་སྒྲོན་མེ། ཐུགས་རྒྱུད་བྱིན་རླབས་སྤྲིན་ཕུང་རྣམས་ཀྱི་བརྡ ཤོག་ཡིན་པས། ཁྱོད་ལ་ཀློང་བརྡ་ལེན་མེད་ཀྱི་དགོངས་རྒྱ་བཏབ་པ་ཡིན་པས། དུས་ལ་བབས་ཚེ་སྐལ་ལྡན་ལས་འཕྲོ་ཅན་རྣམས་ལ་རིམ་གྱིས་སྤེལ་ལ་སྤྲོད་ཅིག་གསུངས་ནས་ཐུགས་བརྩེ་བརྩེ་མཛད་པའི་ཚུལ་གྱིས་མི་སྣང་བར་གྱུར་པས། རྗེ་དེ་ཉིད་ཐུགས་སྐྱོ་བས་བཞུགས་མི་ཐུབ་པ་ལྟར་བྱུང་ཡང་བྱ་ཐབས་དང་བྲལ། འཁོར་བུ་སློབ་ནམ་མཁའི་སྐར་ཚོགས་ལྟར་མང་བས་གདུང་མཆོད་སོགས་མཆོད་པ་གྲངས་མེད་བསམ་གྱིས་མི་ཁྱབ་པ་རང་རང་གི་དངོས་པོ་ཅི་ཡོད་ཐམས་ཅད་བླ་མའི་ཕྱོགས་སུ་ཕུལ་ནས་ཞག་གྲངས་ཡུན་རིང་པོའི་བར་དུ་གདུང་མཆོད་འབུལ་བར་མཛད། དེ་ནས་བླ་མའི་སྐུ་གདུང་མཆོད་རན་སོང་བའི་སྐབས་