Tibetan
བར་ཡལ། ཡང་མི་ནག་རྟ་ནག་ཅན་ཞིག་འོང་ནས་ཨ་བུ་ལགས་སྐུ་ཁམས་བཟང་འོ་མ་བརྒྱལ་ལམ་ཟེར། རྗེའི་ཞལ་ནས་དཀའ་མ་ཐ་ཁྱོད་སུ་ཡིན་གསུངས་པས། ཁོ་ན་རེ་ཡུལ་འདིའི་སྲུང་མ་མཐུ་རྩལ་ཅན་ཡིན་པས་འོན་ཀྱང་ང་གུ་རུ་པདྨའི་བཀའ་དམ་ལ་གནས་ཡོད་པ་ཞིག་ཡིན་ཏེ། ཁྱེད་གཏེར་སྟོན་ངེས་པ་པདྨའི་རྒྱལ་ཚབས་སུ་འདུག་པས་མཇལ་དུ་འོང་བ་ཡིན་ཟེར་ནས་ཕྱག་ཕུལ་ཏེ་མདུན་དུ་འཁོད་པས། ཡང་རྗེ་དེ་ཉིད་ཀྱི་ཞལ་ནས་ཁྱོདགཟུགས་མེད་ཡིད་ལུས་ཙམ་གྱིས་དང་གཏེར་སྟོན་ཨེ་ཡིན་ཅི་ཕྱིར་ཤེས། ་སྤྲང་པོ་འཁྱར་པོ་ཞིག་ཡིན་མ་གཏོགས་གཏེར་སྟོན་པདྨའི་རྒྱལ་ཚབས་མིན་གསུངས་ནས།ཁོ་ན་རེ་ང་ཡིད་ལུས་ཡང་མངོན་ཤེས་ཕྲ་མོ་ཡོད་པས་ན་ནང་ནས་རྗེ་ཁྱོད་བྱོན་པར་འདུག་སྙམ་ནས་སྟ་གོན་བྱས་པ་ཡིན། ང་ལ་ཁྱེད་གཏེར་སྟོན་ཡིན་མིན་གསུང་མི་དགོས། སྔར་ཁྱོད་པདྨ་གླིང་པའི་དུས་ཀུན་བཟང་དགོངས་པ་ཟང་ཐལ་མཁའ་ཁྱབ་རང་གྲོལ་གྱི་ཆོས་སྐོར་ཕྲན་རེའི་གཏེར་སྲུང་ང་རང་ཡིན་པས། དེ་དུས་ཀྱི་སྨོན་ལམ་ལས་འཕྲོ་ད་ལྟའི་བར་དུ་ལྡན་པས། ཁྱོད་ཀྱིས་ང་ལ་གསོལ་མཆོད་རེ་མཛད་དང་དངོས་གྲུབ་རེ་སྟེར་འོང་ཟེར་བ་དང་མནལ་སད་དོ། །དེ་ནས་ནང་སྔ་མོ་སྐྱོ་ཚ་གསོལ་སྐབས་རྗེའི་ཐུགས་དགོངས་ལ། ད་བསོ་ ༈ སྤྲུལ་འདིའི་ཐུགས་ཆུང་ཤིན་ཏུ་མཛད་འདུག་པས་ལྷན་དུ་དབུས་ཕྱོགས་ལ་བྱོན་ན་ཅི་ཡིན་དགོངས་པས། དེ་མ་ཐག་པར་གཟིམ་གུར་གྱི་སྟེང་ན་བྱིའུ་ཡིད་དུ་འོང་བ་ལྔའི་མདངས་དང་ལྡན་པ་ཞིག་བྱུང་ནས་འདི་སྐད་ཟེར། ཏིང་ཏིང་རྣལ་འབྱོར་དྲི་མེད་འོད་ཟེར། །སྦས་གནས་པདྨ་བཀོད་ནས་འོང་བའི། །འཕྲུལ་བྱ་འོད་མདངས་མཛེས་པ་ང་རང་། །ཌཱཀྐི་རྒྱ་མཚོའི་ཕོ་ཉ་ཡིན་པས། །ཁྱོད་ལ་དུས་ཚིག་བརྡ་རུ་བསྟན་འོང་། །མ་གཅིག་ཀུན་བཟང་རྡོ་རྗེ་གླིང་པའི། །གསང་གཏམ་ཤོག་དྲིལ་སྙིང་ལ་བབ་བཞིན། །ད་ལ་འུར་ལ་འུར་རིག་པས་དཔྱོད་ལ། །དབུས་རི་ལྷ་ལྡན་དུས་སུ་མ་བབ། །སྦས་ཡུལ་ཕྱོགས་སུ་བྱོན་ན་ལེགས་བསམ། །མཐོ་མཐོ་རྒྱལ་པོས་ངག་ལ་མ་གཞོལ། །སེང་དཀར་རང་ས་ཟིན་པ་གལ་ཆེ། །རྟ་ཡི་བརྫུ་བག་འབྲུག་ལ་ངོམས་དུས། །དྲག་རྩལ་ཆོས་སྐྱོང་ལས་ལ་བསྐུལ་མཛད། །སྡེ་བརྒྱད་གདུག་པའི་ཆོ་འཕྲུལ་འགྱེད་ནས། །ཁ་ཆར་བུ་ཡུག་མི་འདོད་སྟོན་ཚེ། །རླུང་ལྷའི་རྒྱལ་པོ་ཕྱོགས་ནས་གཡོ་བའི། །མི་འགྱང་ལ་ཡོག་ལྟད་མོ་མངོན་ངེས། །ཆོས་ཀྱི་བདག་པོ་ཀརྨའི་མིང་འཛིན། །སྨོན་ལམ་དབང་གིས་རྟེན་འབྲེལ་འཛོམ་ན། །ཤེས་རབ་མིག་གིས་རང་སྐལ་ནོར་རྙེད། བདེསྡུག་སྣ་ཚོགས་རི་མོ་ཤར་ཡང་། །ཐམས་ཅད་རོ་སྙོམས་བརྟུལ་ཞུགས་སྐྱོང་མཛོད། །གང་བདེར་མ་དང་མཁའ་འགྲོས་གྲོགས་བྱེད། །འདི་སྣང་སྒྱུ་མའི་ཡུལ་ལ་མ་ཆགས། །དུས་གསུམ་ལམ་དུ་ཞུགས་ན་ལེགས་པའི། །བརྡ་དོན་ཁྱོད་ཀྱིས་གོའམ་དཔའ་བོ། །བདེ་བདེ་སྐྱིད་སྐྱིད་མཁའ་འགྲོའི་གླིང་ན། །ཏིང་ཏིང་བྱིའུ་འཕུར་ལྡིང་གཡོ་ཞིང་། །ངེས་ངེས་མཁའ་འགྲོའི་ཞིང་དུ་ང་འགྲོ། །ཟེར་ནས་གར་སོང་ཆ་མེད་དུ་འཕུར་སོང་། དེ་ནས་རྗེ་དེ་ཉིད་མཁའ་འགྲོའི་ལུང་བསྟན་བཞིན་སྦས་གནས་སུ་བྱོན་པར་དགོངས་ནས་དབུས་ཕྱོགས་ལ་བྱོན་པའི་བུ་སློབ་རྣམས་ལ་གང་མཁོའི་གསུང་ཆོས་བྲི་སྤེལ་དང་། ཉམས་ལེན་གྱི་ཞལ་ཏ་རང་རང་འཚམས་པའི་ཅི་དགོས་ཐམས་ཅད་ཀྱིས་བློ་ཡིད་ཚིམ་པར་མཛད། ཁྱད་པར་བསོ་སྤྲུལ་རིན་པོ་ཆེ་ལ་ལུགས་གཉིས་ཀྱི་ཞལ་ཏ་སོགས་གནང་ནས་ཐུགས་ཡིད་དྲིལ་གྱི་ཐུགས་བརྩེ་མཛད་ནས། རྗེ་དེ་ཉིད་མི་འགྱང་བར་རང་ཡུལ་ལ་ཕེབས་པར་ཞལ་གྱིས་བཞེས་ནས་བསོ་སྤྲུལ་དཔོན་གཡོག་དབུས་ལ་བྱོན། རྗེ་འཁོར་བཅས་སྦས་གནས་ཕྱོགས་སུ་བྱོན་པས། དེའི་དགུང་མོ་སྒར་པའི་མི་ཐམས་ཅད་ཀྱིས་སེམས་སྐྱིད་པའི་རྩེ་དགའ་བྱེད་ཅིང་བཞད་གད་གླུ་ལེན་སོགས་བྱེད་འདུག །རྗེ་དེ་ཉིད་ནི་བསོ་སྤྲུལ་བྱོན་སོང་ ༈ བ་ལ་ཐུགས་ཆུང་མཛད་ནས་ཅོག་པོའི་ནང་དུ་ཐུགས་དམ་ལ་བཞུགས་གནས་མཛད་ཚེ། བསོ་སྤྲུལ་རིན་པོ་ཆེ་དང་དེའི་ཉེ་གནས་མདུན་གཡོག་ཀུན་བཟང་བསྟན་འཛིན་ཞེས་པ་དཔོན་གཡོག་གཉིས་པོ་སྒར་གཞིའི་རྗེས་ནས་བྱོན་ཚེ། བསོ་སྤྲུལ་གྱིས་རྗེ་དེ་ཉིད་དྲན་ཞིང་བཤུམ་པར་མཛད་དེ་བྱོན་འགྲོ་བ་དགོངས་པས། རྗེས་ཀྱང་སློབ་མ་དམ་ལྡན་དུ་དགོངས་ནས་བླ་མ་ལྷ་ལ་གསོལ་བ་འདི་ལྟར་བཏབ། དུས་གསུམ་རྒྱལ་བའི་སྤྱི་གཟུགས་པདྨ་འབྱུང་། །རིགས་བརྒྱའི་སྤྱི་དཔལ་བདུད་འཇོམས་ཧེ་རུ་ཀ །ཡེ་ཤེས་མཚོ་རྒྱལ་གནས་གསུམ་མཁའ་འགྲོ་དང་། །འཇིག་འདས་དམ་ཅན་གཏེར་སྲུང་རྒྱ་མཚོའི་ཚོགས། །གསོལ་བ་འདེབས་སོ་བྱིན་བརླབས་བར་ཆད་གསོལ། །སྔོན་སྨོན་གཏད་རྒྱ་བཟང་པོ་མཐུ་བཙན་པས། །སྐྱེ་ཕྲེང་དུ་མ་དབྱེར་མེད་ལྷན་དུ་ཚོགས། །ཟབ་གཏེར་ཆོས་ཀྱི་བདག་པོ་རིག་པ་འཛིན། །དམ་ལྡན་སློབ་བུ་སྙིང་གི་བུ་གཅིག་པུ། །ལྷག་བསམ་དག་པའི་དོན་གཉིས་བསྒྲུབ་པ་ལ། །ལམ་འཕྲང་ཆོམ་རྐུན་གཅན་གཟན་འཇིགས་པ་པོ། །ཚེ་ཆོས་བསོད་ནམས་ནོར་ལ་བར་གཅོད་པའི། །འགབ་འདྲེའི་རིགས་གྱུར་གཟུགས་ཅན་གཟུགས་མེད་ཀྱིས། །བསམ་ངན་གདུག་རྩུབ་གནོད་འཚེ་མ་ལུས་པ། ། མཐུ་སྟོབས་ནུས་པས་ཞི་བཟློག་གཞོམ་པ་དང་། །ཁ་འཛིན་སྡོང་གྲོགས་ལམ་བསྟོན་སྲུང་སྐྱོབས་མཛད། །བསམ་དོན་རེ་བ་མ་ལུས་ཀུན་འགྲུབ་ནས། །ཕྱོགས་དུས་གནས་སྐབས་མཐར་ཐུག བདེ་ལེགས་ཤོག །ཅེས་གསུངས་ཏེ་ལམ་ལྷར་གསོལ་ཁ་ཕྲིན་བཅོལ་ཐུགས་གཏད་སོགས་རྒྱུན་གྱིས་མཛད། དེ་ནས་རིམ་བཞིན་བྱོན་པའི་ཞག་འགའ་འགྲོ་སྐབས་སུ། རྗེ་ལ་མཁའ་འགྲོའི་གསུང་གཏེར་གྱི་བརྡ་སྤྲད་ཀྱང་གཞན་རྐྱེན་ལ་བརྟེན་ནས་བཏང་སྙོམས་སུ་སོང་བས་གཏེར་སྲུང་གིས་འཁུ་ལྡོག་བྱས་ནས་གཏེར་སྟོན་ཆོས་བདག་གཉིས་ཀྱི་སྒར་གཞི་ལ་ཆོམ་རྐུན་སོགས་མི་འདོད་པ་རེ་བྱུང་ཚེ། རྗེ་དེ་ཉིད་ཀྱིས་སྔར་མཁའ་འགྲོའི་ཞལ་ལུང་བཞིན་ཟབ་གཏེར་གྱི་སྲུང་མ་ལས་ལ་བསྐུལ་བའི་རྟགས་མཚན་མངོན་གསུམ་དུ་འབྱུང་བས་ཉེར་འཚེ་ཐམས་ཅད་ཞི་བར་བྱེད་དོ། །དེ་ནས་ལུགས་གཉིས་ཀྱི་མཛད་པས་མཐོང་ཐོས་ཀྱི་འགྲོ་བློ་ཆོས་ལ་བསྒྱུར་ནས་རིམ་གྱིས་ཆབ་མདོར་ཕེབས། དེ་ཀའི་སྡེ་དཔོན་ཀུན་གྱིས་ཞབས་ཏོག་བསྒྲུབ་ནས་སྐབས་རེར་བཞུགས་དགོས་པའི་གསོལ་བཏབ་ཀྱང་། རྗེ་དེ་ཉིད་ཀྱིས་མཁའ་འགྲོའི་ལུང་བསྟན་བཞིན་དུ་འདུག་པར་དགོངས་ནས་བཞུགས་པར་ཞལ་གྱིས་མ་བཞེས་ཏེ། རིམ་བཞིན་ཁམས་རི་བོ་ཆེར་ཕེབས་ཏེ་གནས་སྐབས་དེ་ཀར་ སྒར་བཏབ་ནས་བཞུགས། ཟླ་བ་བཅུ་གཅིག་པའི་ཚེས་བརྒྱད་ལ་ཡབ་རྗེ་བླ་མའི་འདས་མཆོད་འཚོགས་མཛད་སྐབས་སྤྱན་འདྲེན་དུས་འཇའ་འོད་ཀྱི་ཀློང་ནས་ཡབ་རྗེ་བླ་མ་མངོན་སུམ་དུ་མཇལ་ཏེ་བྱུང་དང་འབྱུང་འགྱུར་གྱི་ལུང་བསྟན་དང་། རང་གཏེར་གྱི་ཆོས་བཀའ་འདས་རྗེས་སྐོར་གསུམ་གྱི་བརྡའ་ཤོག་དང་། དགོངས་རྒྱུད་རྟོགས་པའི་བྱིན་རླབས་ཐམས་ཅད་གཅེས་ནོར་དགོངས་གཏེར་མཆན་དུ་གནང་ནས་མི་སྣང་བར་གྱུར་ཏོ།།དེ་ནས་རྗེ་དེ་ཉིད་དགུང་ལོ་ཉེར་དྲུག་ལོར་མ་ཡུམ་ཞི་བར་གཤེགས་པ་དང་། སྐུ་བྱུས་མཁྱེན་སྤྲུལ་རིན་པོ་ཆེ་དབུས་ཕྱོགས་ལ་བྱོན་དགོས་པ་སོགས་ལེགས་ཉེས་ཀྱི་བྱ་བ་མང་དུ་གསན་ནས་སྦས་གནས་ལ་བྱོན་སྟབས་མེད་པའི་མཐོང་ཐག་ཆོད་དེ། ཕར་ཚུར་ལ་བང་མི་བཀའ་ཤོག་བརྒྱུད་ཅིང་གང་དགོས་ཀྱི་བྱ་བ་ཐམས་ཅད་བསྒྲུབས་པར་མཛད། དེ་སྐབས་ཆབ་མདོའི་དཔོན་ནས་སྡེ་སྲུང་གི་སྐུ་རིམ་གྱི་ཡོ་བྱད་འབུལ་བ་སོགས་བསྐུར་ནས་བང་མི་དཀའ་ཤོག་ཐོན་བྱུང་བས། ཁོང་རྣམས་ཀྱི་འདོད་དོན་བསྒྲུབ་ནས་བློ་ཡིད་ཚིམ་པར་མཛད། དེ་སྐབས་ཡུལ་དེ་ཀར་ལུགས་གཉིས་ཀྱི་དཔོན་དུ་གཏོགས་པའི་དགེ་བཙུན་ཀརྨ་བསམ་འཕེལ་ཞེས་པ་ཞིག་བྱུང་ནས་རྗེ་ལ་མཐུན་རྐྱེན་ཞབས་ཏོག་ལེགས་པར་3 བསྒྲུབས་ནས་གཏེར་ཆོས་ཀྱི་ཡི་གེ་པ་བྱས། རྗེས་ཀྱང་མཁའ་འགྲོའི་ལུང་དུ་གསལ་བའི་སྐྱེས་བུར་དགོངས་ནས་བླ་རྫོགས་ཐུགས་གསུམ་གྱི་ནང་ནས་བླ་སྒྲུབ་གུ་རུ་སྤྱི་འདུས་ཀྱི་ཆོས་སྐོར་དབང་དང་བསྐྱེད་རྫོགས་རྒྱབ་ཆོས་དང་བཅས་པ་ཤོག་སེར་ལས་ཞལ་བསྒྱུར་ཏེ་བྲིས་སྤེལ་མཛད་ནས་ཆོས་བདག་སྐྱེས་བུ་རྣམས་ལ་གཏད། ཁྱད་པར་ཡབ་རྗེ་བླ་མའི་ཟབ་གཏེར་རྣམས་ཡང་གཏེར་དུ་གཏེར་ནས་དྲངས་ཏེ་གསལ་ཁྱབ་ཏུ་སྤེལ་བ་དང་། རང་གཏེར་གྱི་བཀའ་བརྒྱད་དང་། ཡབ་རྗེས་ཟབ་གཏེར་གྱི་བཀའ་བརྒྱད་རྣམས་ཀྱི་ཁ་བྱང་ལུང་བྱང་ཐམས་ཅད་གསར་ཕབ་མཛད་པ་སོགས་ཟབ་གཏེར་གྱི་སྒོ་འཕར་མཐའ་ཡས་པ་གསར་དུ་ཕྱེས་ཏེ་འགྲོ་དོན་རྒྱ་ཆེན་པོ་འདུས་སྡེ་སྐལ་ལྡན་རྣམས་ཀྱི་མཐོང་ཆོས་སུ་མཛད། བན་གྱི་སྡེ་རྣམས་ལ་རང་ལུགས་དང་མཐུན་པའི་ཆོས་ཀྱི་དབང་ལུང་སོགས་གནང་། བོན་རྣམས་ལ་ཨ་ཁྲི་ཐིག་ལེའི་ཆོས་སྐོར་གྱི་ཁྲིད་ལུང་མཛད་ནས་ཁོང་རྣམས་ཡིད་ཀྱི་རེ་བ་མ་ལུས་པ་བསྐང་སྟེ། བན་བོན་ཐམས་ཅད་ཀྱིས་གཙུག་གི་ནོར་བུར་འཆང་ནས་ཞབས་ཏོག་དུ་མས་ཅི་མཉེས་སུ་བསྒྲུབ་པར་བྱས་ཏེ། སྐྱེལ་མ་སོགས་ལ་ཞབས་ཞུ་ཅི་འགྲུབ་བྱེད་པར་ཁས་བླངས་ནས་རང་རང་གི་ལམ་སྐྱེལ་གྱི་སྟ་གོན་བྱས། དེ་ནས་རིམ་གྱིས་རྗེ་དེ་ཉིད་དགུང་ལོ་ཉེར་ ༈ བདུན་ལོར་དབུས་ཕྱོགས་ལ་ཕེབས་སྟེ། བྱོན་ལམ་གྱི་གནས་རྣམས་ལ་འབྲེལ་འཇོག་དང་། ངོ་མཚར་བའི་གཏེར་ཁ་དུ་མ་བཞེས་པ་སོགས་དོན་གཉིས་ཀྱི་མཛད་པ་འགྲན་བྲལ་དུ་མཛད་ཅིང་རིམ་གྱིས་ལྷ་སར་ཕེབས། སེར་དགེ་འབྲས་གསུམ་ལ་ལྷ་མཇལ་དང་། ཇོ་ཤཱཀ་རྣམ་གསུམ་ལ་གསེར་ཆབ་གསོལ་བ་སོགས་མཛད། ཁྱད་པར་ཇོ་བོའི་མདུན་དུ་མར་མེ་མཆོད་པ་སོགས་ཅི་འབྱོར་བསགས། རྗེ་དེ་ཉིད་དང་དགེ་སློང་བཞི་སྡེ་རེས་ཉིན་ཞག་འགར་མཆོད་པ་འབུལ་བ་མཛད་སྐབས། རྗེའི་ཐུགས་སྣང་ལ་ཇོ་བོའི་མཛོད་སྤུ་ལས་འོད་ཟེར་དཀར་པོ་ཞིག་བྱུང་ནས་རྗེའི་ཐུགས་ཀར་ཐིམ་པར་སྣང་བས། དེ་མཐག་ཏུ་ཐུགས་སྣང་འགྱུར་ནས་རྫུ་འཕྲུལ་ལ་དབང་ཐོབ་སྟེ། དག་པའི་ཞིང་ལྔར་བྱོན་ནས་རིགས་ལྔའི་སངས་རྒྱས་རྣམས་ཀྱིས་དབང་བསྐུར་ལུང་བསྟན་དབུགས་དབྱུང་བ་ལ་སོགས་པ་མཛད་ཅིང་སངས་རྒྱས་ཀྱི་ཡོན་ཏན་ཉེར་ལྔའི་དབང་ཕྱུག་དམ་པརགྱུར་ནས། མར་གནས་དྲུག་གི་འགྲོ་བ་རྣམས་ལ་མཛད་པ་གང་འདུལ་གྱི་སྒོ་ནས་ངན་སོང་གི་རྒྱུ་བག་ཆགས་དང་བཅས་པ་ལྷག་མེད་དུ་བཅོམ་སྟེ། ཐམས་ཅད་བདེ་འགྲོ་མཐོ་རིས་ཀྱི་གནས་སུ་འདྲེན་སྟོན་མཛད་ནས་འགྲོ་བའི་དོན་རྒྱ་ཆེན་པོ་མཛད་པ་སོགས་འབྱུང་བའི། ཞིང་ལྔའི་ བཀོད་པ་ཐམས་ཅད་རྗེས་འཇུག་གི་དོན་དུ་ཡི་གེར་ཕབ་ནས་ཉུང་བསྡུས་སྨོན་ལམ་གསུངས་ཚེ། ཉོན་མོངས་བདུད་ཀྱི་སྡེ་ཚོགས་བཅོམ། །བསོད་ནམས་ཡེ་ཤེས་ཕུང་པོར་ལྡན། །སྲིད་དང་ཞི་བའི་མཐའ་ལས་འདས། །ཤཱཀྱའི་ཏོག་ལ་གསོལ་བ་འདེབས། །འཇིག་བརྒྱད་ཞི་བར་བྱིན་གྱི་རློབས། །སྐྱེ་དང་ཚེ་རབས་ཐམས་ཅད་དུ། །སླར་ཡང་ལྷག་པའི་ལུས་ཐོབ་ནས། །འགྲོ་རྣམས་སྡུག་བསྔལ་ལས་གྲོལ་བའི། །དེད་དཔོན་མཆོག་ཏུ་བདག་འགྱུར་ཤོག །གསུངས་མ་ཐག་ཏུ་ཞིང་སྣང་ཐམས་ཅད་འོད་དཀར་ལ་ཐིམ། འོད་ཟེར་ཇོ་བོའི་སྨིན་མཚམས་ལ་ཐིམ་མོ། དེ་ནས་ཉིན་གཅིག་ཡང་ཇོ་མཇལ་ལ་བྱོན་སྐབས་བླ་བྲང་གསེར་ཁང་སྟེང་ན་སྟག་ལུང་མ་ཧཱ་རིན་པོ་ཆེས་ཞི་ཁྲོ་ཁྲོམ་དཀྲུགས་ཀྱི་དབང་མོ་ཆེ་གསུངས་ནས་འདུས་པ་སྟོང་སྡེ་ཙམ་འཚོགས་པའི་མདུན་སར་རྗེ་དེ་ཉིད་མཇལ་དུ་བྱོན་པས། མ་ཧཱ་རིན་པོ་ཆེའི་ཐུགས་དགྱེས་ཞུས་པར་མཛད་ནས་མདོ་སྔགས་ཆོས་ཀྱི་བསྒྲོ་གླེང་མང་པོ་ཡར་ཞུ་ཕྱིར་གསུངས་མཛད་པས། སྟག་ལུང་རིན་པོ་ཆེའི་ཞལ་ནས་ཁྱོད་དོན་དང་ལྡན་པའི་རྣལ་འབྱོར་རལ་པ་ཅན་ཞིག་ཡིན་པར་འདུག་གསུངས་ནས་ཐུགས་བརྩེ་བརྩེ་མཛད་ཅིང་དངུལ་དང་དངོས་རྫས་མང་པོ་གནང་ནས་ཐུགས་བསྐྱེད་སྨོན་ལམ་མཛད། གཞན་འདུས་པ་ ༈ འཁོར་དུ་གཏོགས་པ་འགས་སྔགས་པ་རལ་ནག་ཅན་ནམ་ས་ཆེན་པོ་ཁྱོད་མར་སོང་། རིན་པོ་ཆེ་ལ་ཆོས་ཅི་བྱེད་འདུག་ཟེར་ནས་དེར་འདུས་ཐམས་ཅད་ཧ་ལས་པར་བྱེད་དོ། །དེ་ནས་བཀའ་བློན་ལྷ་ཀླུ་སང་གིས་ཞབས་ཏོག་བསྒྲུབ་ནས་ཕོ་བྲང་དུ་གདན་དྲངས་ཞུས་ནས། སྙིང་ཐིག་གི་དབང་ལུང་དང་སྐུ་རིམ་སོགས་མཛད་ནས་སྦྱིན་བདག་གི་གཙོ་བོར་གྱུར་ནས་མཐུན་རྐྱེན་ཕུན་སུམ་ཚོགས་པར་མཛད། དེ་ནས་སྔར་མཁའ་འགྲོའི་ལུང་བསྟན་དང་། བླ་མའི་ཞལ་གསུང་དང་མཐུན་པའི་ཟབ་གཏེར་གྱི་གྲོགས་སུ་མངགས་པའི་མི་རེད་སྙམ་པའི་འབྲུག་ལོ་པ་ཞིག་རིགས་རུས་མཐོ་བ་སོག་པོའི་དབང་དུ་གཏོགས་པའི་དཔོན་ཚང་ཞིག་ཏུ་འདུག་པས། རྗེ་དེ་ཉིད་ཀྱི་དངོས་སློབ་དམ་པ་མགོན་བླ་ཤེས་རབ་ཞེས་པ་ལུགས་གཉིས་གང་ཐད་ནས་བློ་རྣོ་བ་ཞིག་ཡོད་པ་དེ་ལ། རྗེས་ཟབ་གཏེར་གྱི་གྲོགས་སུ་འདུག་པས་ལོན་ཐབས་ཅི་དགོས་གསུངས་པས། ཤེས་རབ་ཀྱིས་འུ་ཅག་ཡུལ་ནག་ཕྱོགས་པ་དམའ་བ་བསོད་ནམས་དབུལ་བ་ཡིན་པས་སྐབས་ཀྱི་རྟེན་འབྲེལ་གྱི་མཚོན་ཙམ་མ་གཏོགས་ཡུན་རིང་པོར་གཟུངས་མར་མི་སྦྱིན་ངེས་པ་འདྲ་ན། ཉིད་ཀྱི་ཆོས་སྐྱོང་ལ་འཕྲིན་བཅོལ་མཛད་ན་རྒྱལ་དབང་པདྨའི་སྨོན་ལམ་ལ་བསླུ་བ་མེད་པ་ཡིན་པས་རིམ་གྱིས་ སྟབས་ལེགས་ལོས་འོང་ཞུས་པས། རྗེས་ཀྱང་དེ་ལྟར་མཛད། དེ་ནས་བོད་སྡེ་པ་གཞུང་ནས་གཏེར་སྟོན་ཚད་ལྡན་དུ་འདུག་པས་བོད་སྤྱིའི་དབུ་བླར་བཀོད་དགོས་ཟེར་ནས་ཐམས་ཅད་ཀྱིས་གྲོས་འཆམས་ཀྱང་གསང་ཐབས་སུ་བྱས། རྗེ་དེ་ཉིད་ཀྱིས་བླ་མའི་ལུང་བསྟན་དུ་གསུངས་པ་ལྟར། ལྷོ་གནས་རྣམས་སུ་བྱོན་པའི་ལམ་ཁར་སྐུ་མཆེད་མཁྱེན་སྤྲུལ་རིན་པོ་ཆེ་ཚེ་རིང་ལྗོངས་ནས་ཞི་བར་གཤེགས་པ་སྔར་ནས་གསན་ཀྱང་ཡུལ་དེ་ཀ་སྤྱན་ལམ་ལ་མངོན་ཚེ་ཐུགས་ཤིན་ཏུ་སྐྱོ་བའི་འོ་དོད་འབོད་ནས་མང་དུ་བཤུམ་པར་མཛད་ཚེ། ནམ་མཁའ་ནས་སྤྲིན་འཇའ་རིས་ཀྱི་རྣམ་པར་ཤར་བྱུང་བ་དེ་ལ་གཟིགས་པའི་ནང་ན་འོད་འཁྱིལ་གྱི་ཀློང་དུ་མཁྱེན་སྤྲུལ་རིན་པོ་ཆེ་སྐུ་དངོས་སུ་བཞུགས་པ་དང་མཇལ་བས། རྗེའི་ཞལ་ནས་ཡབ་རྗེ་གཏེར་ཆེན་རིན་པོ་ཆེ་སྙིགས་དུས་ཀྱི་བསོད་ནམས་དམན་པའི་དབང་གིས་ཞིང་དུ་བྱོན། ཁྱོད་ཀྱིས་ངེད་རྣམས་ཐུགས་ཀྱིས་བོར་ནས་ཞིང་དུ་བྱོན་པའི་དགོས་པ་དང་ཅི་ལགས། ཁྱད་པར་བདག་ཕ་མ་མེད་པའི་དྭ་ཕྲུག་ཁ་ཉམས་ཞན་པའི་ཁྱོད་ལས་རེ་ས་མེད་པ་དགོངས་བཞིན་ང་རང་ཐུགས་ནས་དོར་བ་ཅི་ཕྱིར་ཡིན་གསུངས་ཏེ་བཤུམ་པར་མཛད་ཚེ། མཁྱེན་སྤྲུལ་རིན་པོ་ཆེས་ཀྱང་ཐུགས་བརྩེ་བརྩེ་མཛད་ནས་ལུགས་གཉིས་ཀྱི་གསུངས་མཛད་མང་པོ་ ༈ གནང་བ་དང་། ཁྱད་པར་མི་འགྱང་བར་མྱུར་དུ་མཇལ་འོང་གསུངས་པས། རྗེ་དེ་ཉིད་ཀྱི་ཞལ་ནས་འུ་ཅག་མི་འགྱང་བར་མཇལ་ཐབས་ཅི་འདྲ་ལགས་གསུངས་ཚེ། མཁྱེན་སྤྲུལ་རིན་པོ་ཆེའི་ཞལ་ནས་བསོད་སྤྲུལ་གྱིས་ང་ལ་ཆོས་དམ་གྱིས་བཅིངས་ནས་ཁྱོད་རང་ཡུལ་ཕྱོགས་ལ་འོང་དགོས་གསུངས་ནས་སྐད་དང་ཡི་གེ་མང་པོ་བཞག་འདུག་པས། བསྐལ་པ་ལྕགས་ཁྱིའི་ལོར་སེར་དགོན་དུ་བྱོན་དགོས། དེ་དུས་འུ་ཅག་གཉིས་མཇལ་འོང་གམ་གསུངས། ཡང་རྗེའི་ཞལ་ནས་བདག་རང་ཡུལ་ལ་འགྲོ་སྙམ་མེད་པས་ཇི་ལྟར་དགོས་ཞུས་པས། མཁྱེན་སྤྲུལ་གྱི་ཞལ་ནས་ད་ཅི་དགོས་ཁྱོད་ལ་མཁའ་འགྲོའི་ཞལ་གཟིགས་ལུང་བསྟན་རེ་ལོས་འོང་གསུངས་ནས་མི་སྣང་བར་ཡལ། དེ་ནས་རིམ་གྱིས་བྱོན་ནས་སྔར་ཀློང་ཆེན་པའི་གནས་ཡུལ་གྲོགས་མོ་ཆེར་ཕེབས་པས། རྗེ་དེ་ཉིད་སྔར་ཀློང་ཆེན་པ་ཡིན་དུས་ཀྱི་གནས་ཚུལ་ཐུགས་ལ་གསལ་བས་མཚར་རེ་ཆེ་གསུངས་ཚེ། གནས་ཚང་གི་རྒན་བུ་ན་རེ་རིན་པོ་ཆེ་ལགས་ཁྱོད་ཅི་ལ་མཚར་བ་ཡིན་ཞུས་པས། རྗེའི་ཞལ་ནས་སྔར་ཀློང་ཆེན་པ་ཡིན་དུས་གནས་ཁང་འདིའི་བཀོད་པ་དང་། བྱ་བ་རྣམས་གསལ་པོར་དྲན་པར་འདུག་པས་དེ་ལ་མཚར་བ་ཡིན་གསུངས་ནས་སྔོན་གྱི་ལོ་རྒྱུས་ཐམས་ ཅད་ཞིབ་པར་གསུངས་ཚེ། ཁོང་རྣམས་ཡིད་ཆེས་ཤིང་ཞབས་ཏོག་ཀྱང་འགྲན་བྲལ་ཞུ་བར་བྱས། དེ་ནས་རིམ་གྱིས་ལྷོ་གནས་རྣམས་སུ་བྱོན་ནས་ཁྱད་པར་གངས་རི་ཐོད་དཀར་དུ་ཕེབས་ནས་བླ་སྒྲུབ་ཐིག་ལེའི་རྒྱ་ཅན་གྱི་སྐུ་མཚམས་ལ་བཞུགས་སྐབས་ཐོག་མར་གནས་སྲུང་རྣམས་ཀྱིས་གཟུགས་བསྟན་ནས་ཕྲིན་ལས་གང་འདོད་དུ་བསྒྲུབ་པ་དང་། གནས་ཆེན་རྣམས་ཀྱི་གཏེར་ཐམས་ཅད་གཏེར་སྲུང་དངོས་སུ་འོང་ནས་གཏེར་རྫས་རྣམས་ལྷག་ལུས་མེད་པར་ཕུལ་བ་སོགས་རྟགས་མཚན་དུ་མ་འབྱུང་བ་དང་། ཁྱད་པར་ཀུན་མཁྱེན་ཆེན་པོས་ཞལ་དངོས་སུ་གཟིགས་པས་དབུ་མགྲིན་གྱི་རྩ་མདུད་ཐམས་ཅད་གྲོལ་ནས་ཤེས་བྱ་ཐམས་ཅད་ལ་ཐོགས་པ་མེད་ཅིང་མདོ་སྔགས་རྒྱུད་སྡེ་རྒྱ་མཚོའི་གཞུང་ལུགས་གྲུབ་མཐའ་ཐམས་ཅད་ཐུགས་སུ་ཆུད་པར་བྱུང་ངོ་། །དེའི་སྐབས་སུ་གནས་སྲུང་རྣམས་ཀྱིས་ཡོན་ཏན་ཐམས་ཅད་རྗེས་འཇུག་གི་དོན་དུ་གཏན་ཕབས་ཀྱི་བརྡས་བསྐུལ་ནས་གནས་ཀྱི་ཡོན་ཏན་ཕྱི་ནང་གསང་གསུམ་གྱི་ཚུལ་དུ་བྲི་སྤེལ་མཛད། ཚེ་རིང་མ་བྱོན་ནས་རྗེ་དེ་ཉིད་ཕྱག་མཐིལ་དུ་བཞག་ནས་ཡུལ་ཉེར་བཞི་གནས་སོ་གཉིས་ཧེ་རུ་ཀའི་གནས་བཅུ་ལ་སོགས་ཐམས་ཅད་དུ་བྱོན་པས། རྗེའི་ཞལ་ནས་ཡུལ་དེ་དག་ཅི་ལས་བྱུང་། གནས་འདི་དག་གང་ལས་གྲུབ་ ༈ གསུངས་པས། མཁའ་འགྲོའི་ཞལ་ནས་གནས་ཡུལ་འདི་རྣམས་གདུལ་བྱ་རྟག་འཛིན་ཅན་རྣམས་ཁ་དྲང་བའི་ཕྱིར་དུ་གསུངས་པས་དོན་དུ་འདི་ལྟར་རེད་ལྟོས་ཤིག་གསུངས་ཏེ། ཐུགས་ཀར་སྡིགས་མཛུབ་གཏད་ནས་རང་སྣང་ཡེ་ཤེས་ཀྱི་ཞིང་ཁམས་སྤྲུལ་པ་གཞན་ན་མེད་དོ་གསུངས་ནས་ལྟོ་བ་ཧར་གྱིས་ཕྱེས་ཏེ། གནས་ཡུལ་དུར་ཁྲོད་ཀྱི་ཞིང་གི་བཀོད་པ་ཐམས་ཅད་རྡོ་རྗེའི་ཕུང་པོའི་གྲོང་དུ་ངོ་བསྟན་ཏེ། འདི་ཁྱོད་ཀྱི་མགྲིན་པའི་རྩ་མདུད་དགྲོལ་བའི་རྟགས་སུ་ཤར་བ་ཡིན་གསུངས་ནས་མི་སྣང་བར་ཡལ། འདི་སྐབས་སུ་མཐོང་སྣང་གི་བཀོད་པ་དང་། ལུང་བསྟན་བསྐོར་དུ་མ་ཡོད་ཀྱང་གཏེར་གཞུང་དུ་གསལ་བས་འདིར་མ་བྲིས་སོ། །སྐུ་མཚམས་གྲོལ་ནས་གཏེར་ཁ་ཆ་ཤས་རེ་བཞེས། དེ་སྐབས་སུ་དབུས་རོགས་དང་སློབ་མ་རྣམས་ཀྱིས་རང་ཅག་ད་ནི་ཕ་ཡུལ་དུ་བྱོན་དགོས་ཟེར་བ་ལ། རྗེས་ད་དུང་ལོ་ཤེས་རེ་ཁོང་མི་བྱོན་གསུངས་ཀྱང་དབུས་རོགས་རྣམས་ཀྱིས་བཞུགས་སུ་མ་སྟེར། དེ་དུས་ཡབ་རྗེ་བླ་མས་ཞལ་གཟིགས་ནས་འདི་སྐད་གསུངས། བུ་ཉོན་དང་དྲི་མ་མེད་པའི་དཔལ། །བྱང་སྤྲིན་དཀར་གསེབ་ཀྱི་གཡུ་འབྲུག་གི །གཙུག་ནོར་བུ་འོད་ལྡན་སྙིང་པོ་འདི། །ལྷ་གནོད་སྦྱིན་ཆེན་པོ་ལས་བཅོལ་ན། ། སྔོན་སྨོན་ལམ་ལས་འཕྲོ་དུས་འཛོམས་ན། །ལྕགས་ཆུ་གཉིས་འགྲོ་བའི་གསོས་སུ་སྨན། །གནས་འདི་རུ་ཉམས་ལེན་གནད་རེམ་ན། །མ་འགྲོ་བའི་དོན་ཆེན་ངེས་པར་འགྲུབ། །ཆོས་ཟབ་པ་གཏེར་གཉིས་སྒོ་འཕར་ནས། །ཡུལ་རྒྱ་བོད་ཀུན་བདེ་སྐྱིད་ཉི་མ་འཆར། །བཤད་སྒྲུབ་ཀྱི་བསྟན་གཞི་བྱང་ནས་དར། །ལས་ཤུགས་ཀྱིས་དྲངས་ནས་ཡུལ་ཕྱོགས་སུ། །མི་ལྕེ་གཉིས་ལྡན་པའི་བློ་སྟོབས་ཀྱིས། །ཁྱོད་སྒྱུ་མའི་ཡུལ་ལ་ལྟད་