Tibetan
བདུད་རྩིའི་བཅུད་ཀྱིས་གཏམས་པ་ལྟེ་བར་འཛིན་ཅིང་། སྲིད་ཞི་གཉིས་མེད་ཞབས་རོལ་སྟབས་སུ་བཞུགས་པ། ཐེག་གསུམ་ཡོངས་སུ་རྫོགས་པའི་ན་བཟའ་གསོལ་ཞིང་། དབུ་ལ་པདྨ་མཐོང་གྲོལ་རྒོད་སྒྲོ་དར་སྣས་བརྒྱན་པ་གསོལ་ཞིང་། སྐུ་ལྟ་བས་ཆོག་མི་ཤེས་པ་འོད་དང་འོད་ཕུང་གི་རྣམ་པར་བཞུགས་པའི་གཡས་གཡོན་མདུན་ངོས་སུ། ལྷ་ལྕམ་དང་། མཚོ་རྒྱལ། ཀ་ལ་སིདྡྷི། བཀྲ་ཤིས་ཁྱེའུ་ ༈ འདྲེན། ཤཱཀྱ་དེ་ཝ་སོགས་གུ་རུའི་ཐུགས་སུ་བྱོན་པའི་མཁའ་འགྲོ་རྣམས་ཀྱིས་གུ་རུ་ལ་གུས་བཏུད་ཀྱི་ཚུལ་དུ་བཞེངས་སྟབས་སུ་བཞུགས་ནས་མཆོད་པ་བསམ་གྱིས་མི་ཁྱབ་པ་མང་པོ་འབུལ་འདུག་པ་དང་། དེའི་གཡས་གཡོན་གྱི་གྲལ་དུ་ཉིད་ལས་མི་གཞན་པའི་འཁོར་རིག་འཛིན་བརྒྱད་དང་མཚན་བརྒྱད་རྗེ་འབངས་གྲུབ་རིགས་མང་པོར་བཀྲ་ལམ་མེར་བཞུགས་ཡོད་པ་གཟིགས་པས། རྗེ་དེ་ཉིད་ཀྱིས་ཕྱག་ཕུལ་ནས་གསོལ་བ་འདི་ལྟར་བཏབ། ཨེ་མ་ཧོ། ལྷོ་ནུབ་རྔ་ཡབ་ཟངས་མདོག་དཔལ་གྱི་རི། །དཔའ་བོ་མཁའ་འགྲོ་འདུས་པའི་གླིང་མཆོག་ན། །ལྷུན་གྲུབ་བཀོད་པ་རབ་རྫོགས་ཕོ་བྲང་དབུས། །རྗེ་བཙུན་མཚོ་སྐྱེས་རྡོ་རྗེ་ཐོད་ཕྲེང་རྩལ། །སྐུ་ཡི་འོད་ཀྱིས་སངས་རྒྱས་ཞིང་ཀུན་ཁྱབ། །གསུང་གིས་གང་འདུལ་གསང་སྔགས་ཆོས་སྒྲ་སྒྲོགས། །ཐུགས་ཀྱི་དགོངས་པས་སྐལ་ལྡན་སྨིན་གྲོལ་མཛད། །མཐོང་བ་དོན་ལྡན་ཁྱོད་ལ་གུས་ཕྱག་འཚལ། །ཐུགས་སུ་བྱོན་པའི་ཡེ་ཤེས་ཌཱཀྐི་དང་། །རང་རྩལ་སྒྱུ་འཕྲུལ་དཔའ་བོ་མཁའ་འགྲོ་བཅས། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །བདག་རྒྱུད་སྨིན་ཅིང་གྲོལ་བར་མཛད་དུ་གསོལ། །ལྔ་བརྒྱའི་ཐ་མ་ལྔ་བདོའི་དུས་འདི་རུ། །པད་ འབྱུང་རིག་འཛིན་མཁའ་འགྲོའི་ཐུགས་རྗེ་ཡིས། །རྒྱལ་བསྟན་ཉམས་པ་གསོ་བའི་དཔལ་དུ་ཡང་། །བདག་གྱུར་འགྲོ་དོན་དཔག་མེད་འགྲུབ་པར་ཤོག །གསང་སྔགས་རྡོ་རྗེ་ཐེག་པའི་རིམ་གཉིས་ལམ། །གོང་འཕེལ་ཟབ་ལམ་སྙིང་པོ་མཐར་ཕྱིན་ནས། །བསྐྱེད་དང་བསྒོམ་པའི་ལམ་ལ་མི་ལྟོས་པར། །ཚེ་འདིར་འཇའ་ལུས་རྡོ་རྗེའི་སྐུ་ཐོབ་ཤོག །རིག་འཛིན་དཔའ་བོ་མཁའ་འགྲོའི་ཐུགས་རྗེ་དང་། །བདག་གི་ལྷག་བསམ་རྣམ་པར་དག་པའི་མཐུས། །བདག་དང་བཟང་ངན་འབྲེལ་ཐོག་སེམས་ཅན་ཀུན། །སྐྱེ་བ་གཞན་གྱིས་བར་མ་ཆོད་པ་རུ། །དག་པའི་ཞིང་མཆོག་འདི་རུ་སྐྱེ་བར་ཤོག །སྐྱེས་མ་ཐག་ཏུ་གུ་རུའི་ཞལ་མཐོང་ནས། །གསུང་ཐོས་དབུགས་དབྱུང་སྨིན་གྲོལ་ཆོས་ཐོབ་སྟེ། །སྟོན་འཁོར་དགོངས་པ་དབྱེར་མེད་རྫོགས་སངས་རྒྱས། ། དོན་གཉིས་ལྷུན་གྱིས་གྲུབ་པར་མཛད་དུ་གསོལ། །ཅེས་གསུངས་པས། གུ་རུ་ཐུགས་དགྱེས་པའི་ཚུལ་གྱིས་ལུང་བསྟན་དབུགས་དབྱུང་དབང་བསྐུར་སོགས་མཚོན་བྱེད་བརྡ་ཤོག་གི་གཏད་རྒྱ་སྨོན་ལམ་ལེགས་པར་མཛད་པས། ཐབས་མཆོག་ཏུ་མི་འགྱུར་བ་བདེ་བ་ཆེན་པོའི་ཡེ་ཤེས་དང་། ཤེས་རབ་རྣམ་ཀུན་མཆོག་ལྡན་གྱི་ངོ་བོ་སྟོང་པ་ཉིད་གཉིས་ཟུང་དུ་འཇུག་པའི་དོན་རྒྱུད་ལ་སྐྱེས་ ༈ སོ། །དེ་ནས་འཁོར་གྱི་དཔའ་བོ་དང་མཁའ་འགྲོ་རྣམས་ཀྱིས་ཚོགས་ཀྱི་མཆོད་པ་རྒྱ་ཆེན་བཤམས་ནས་ཐམས་ཅད་ཚོགས་ཀྱི་དགའ་སྟོན་ལ་རོལ་བས། དཀྱིལ་འཁོར་བ་ཐམས་ཅད་རིག་པ་རང་བྱུང་གི་ཡེ་ཤེས་དང་། སྟོང་པ་དེ་བཞིན་ཉིད་ཀྱི་དབྱིངས་སུ་རོ་གཅིག་པར་གྱུར། དེ་ནས་ཡེ་ཤེས་མཚོ་རྒྱལ་གྱི་ཞལ་ནས་རིགས་ཀྱི་བུ་ཁྱོད་ཀྱིས་ཞིང་འདི་མ་བརྗེད་པར་ཡིད་ལ་ཟུངས་ཤིག འདི་དཔའ་བོ་བདུད་འཇོམས་རྡོ་རྗེའི་བཞུགས་གནས་རེད་གསུངས། རྗེའི་ཞལ་ནས་བདག་གི་ཡབ་རྗེ་བླ་མ་རིན་པོ་ཆེ་དེ་ལ་སྐུ་གེགས་ཅི་ཡོད་ལགས། རིམ་གྲོ་ཅི་སྒྲུབ་དགོས་སོགས་ཁྱོད་ཀྱིས་ལུང་བསྟན་དུ་གསོལ། ཞེས་ཞུས་པས། ཌཱཀྐིའི་ཞལ་ནས་གཏེར་ཆེན་བདུད་འཇོམས་རྡོ་རྗེའི་སྐུ་ཚེ་བརྟན་ཐབས་ཁོང་གྲྭ་སློབ་ཆོས་བདག་རྣམས་དང་། ཁྱད་པར་གཟུངས་མ་འཁོར་འབངས་རྣམས་ལ་རག་ལས་ཡོད་པས། སྙིགས་དུས་ཀྱི་འགྲོ་བ་བསོད་ནམས་ཞན་པས་སྐུ་ཚེ་ཨེ་བརྟན་གཏེར་སྟོན་ཁོ་རང་ལ་ཐུག་འདུག །ད་ཁྱེད་ལོ་གསུམ་གྱི་གོང་ཐོག་ནས་ངེད་མཁའ་འགྲོ་རྣམས་ཀྱིས་བུ་སྡུག་བཞིན་དུ་གཅེས་སྤྲས་སུ་བསྐྱངས་ནས། ཌཱཀྐིའི་ཐུགས་བཅུད་ཡང་ཟབ་ཀྱི་ཆོས་སྐོར་ཐམས་ཅད་གཅེས་ནོར་དུ་སྤྲད་དེ་ཡུན་རིང་དུ་བསྐྱངས་པ་ཡིནཔས། ད་ ནི་ཕ་ཤུལ་བུས་བཟུང་སྟེ་གཏེར་གཉིས་ཀྱི་བསྟན་པ་འཛིན་སྐྱོང་སྤེལ་བ་ལ་བློ་རྒྱ་མི་ཆུང་བར་མཛོད་དང་། ཁྱོད་ཀྱི་རིགས་མ་མཆོག་དང་ཆོས་བདག་རྣམས་ཀྱི་མཐུན་རྐྱེན་དེ་མཁའ་འགྲོ་རྣམས་ཀྱིས་བྱེད་འོང་གསུངས། ཡང་རྗེའི་ཞལ་ནས་དམན་པ་བདག་ལྟ་བུས་གཏེར་གཉིས་ཀྱི་འཛིན་སྐྱོང་བྱེད་པ་ལྟ་ཞོག །ཡབ་རྗེ་བླ་མ་དང་ལས་ལྡན་གྱི་སྐྱེས་བུ་འགའ་མ་གཏོགས་ང་རང་བླ་མར་མཐོང་བར་དཀའ་འདུག །གླེང་མོ་དང་བརྙས་བཅོས་བྱེད་པ་ལ་སོགས་བྱ་བ་གང་ཐད་ནས་མི་བཟང་བར་འདུག་གསུངས་ནས་རྗེའི་ཐུགས་ཆུང་མཛད་པས། མཁའ་འགྲོ་རྣམས་ཐུགས་སུན་པའི་ཚུལ་དུ་གྱུར་ནས་ཡང་འདི་ལྟར་གསུངས། དཔའ་བོ་ཆེན་པོ་ཁྱོད་ལ་ཐུགས་ཁག་མེད། སྙིགས་དུས་ཀྱི་འགྲོ་བ་ཐམས་ཅད་ཀྱི་བློ་ཁ་བདུད་ཀྱིས་བསྒྱུར་བ་ཡིན་པས། ལས་ཅི་བྱས་ཐམས་ཅད་འཁོར་བ་ངན་སོང་གི་སྣོན་པ་བྱེད་པ་མ་གཏོགས། ཐར་པ་བྱང་ཆུབ་ཀྱི་དོན་གཉེར་བྱེད་མཁན་ཉིན་པར་གྱི་སྐར་མ་དང་འདྲ་མཚུངས་འདུག་ཀྱང་། ད་ཁྱོད་ཀྱིས་གདུལ་བྱའི་འགྲོ་བ་རྣམས་ཐབས་མཁས་ཐུགས་རྗེ་ཆེན་པོས་སྨིན་གྲོལ་གྱི་ལམ་ལ་བཀོད་ནས་གུ་རུ་པདྨའི་ཐུགས་བཞེད་བསྒྲུབ་པར་མཛོད་དང་། ཁྱོད་ཕལ་བའི་མི་དང་མི་འདྲ་བ་ཡིན་པས། འགྲོ་བའི་མིག་ལམ་ལ་གནོད་པར་སྣང་ཡང་། དོན་ ༈ ལ་དཔག་བསམ་ཤིང་དང་ཡིད་བཞིན་གྱི་ནོར་བུ་ཇི་བཞིན་དུ་གཟུགས་ཅན་གཟུགས་མེད་ཀྱི་འགྲོ་བ་རྣམས་ལ་གང་ལ་གང་འདུལ་གྱི་འགྲོ་དོན་རྒྱ་ཆེན་པོ་འབྱུང་བ་ལ་ཐེ་ཚོམ་མེད་དོ་གསུངས། ཡང་མཁའ་འགྲོ་མཚོ་རྒྱལ་མས་ཆང་ཀཱ་པཱ་ལ་གང་གནང་ནས་འདི་ཟག་མེད་ཀྱི་བདུད་རྩི་རེད་གསུངས་ནས། རྗེ་དེ་ཉིད་ཀྱིས་གསོལ་མ་ཐག་ཏུ་རྣམ་ཐར་གསུམ་ལྡན་གྱི་དགོངས་པ་མངོན་དུ་གྱུར་ནས་སྣང་བ་བཞིའི་རྟགས་ཚད་རྩོལ་མེད་དུ་རྫོགས་ཤིང་སྐྱོན་བྲལ་འཕོ་ཆེན་དྭངས་མའི་སྐུ་རུ་གྲོལ་བར་གྱུར་ཏོ། །ཡང་མཁའ་འགྲོ་ཀུན་གསལ་མ་དང་ཞི་བ་རྡོ་རྗེ་མཚོ་གཉིས་ཀྱིས་དབྱངས་གཅིག་དང་མགྲིན་གཅིག་ཏུ་འདི་སྐད་གསུངས། ཨེ་ཨེཿ དབྱིངས་མི་འགྱུར་ཆོས་སྐུའི་མཁའ་ཀློང་ནས། །གདངས་མ་ངེས་སྣ་ཚོགས་འཕྲུལ་དུ་ངོམ། །ལས་སྨོན་ལམ་དག་པའི་དཔལ་ཤར་བ། །དཔལ་ཧེ་རུ་ཀ་དཔལ་ཁྱོད་ཉིད་ནི། །གནས་ལྷ་ལྡན་ཡེར་བ་བསམ་ཡས་སུ། །ཟབ་གཏེར་གྱི་ཆོས་སྒོ་དུ་མ་ཡོད། །ལོ་གཅིག་གི་གཉིས་ལས་མ་འགྱངས་བར། །མིག་འཕྲུལ་བཞིན་འབྱིན་པའི་དུས་ལ་བབ། །བདུད་སབྟའི་ལོག་ལམ་མ་བསྒྱུར་ན། །མགོན་པད་འབྱུང་གི་ཕྲིན་ལས་ཟབ་གཏེར་རྣམས། །རྟེན་འབྲེལ་གྱི་མཐུན་རྐྱེན་ངེད་ཚོས་བྱེད། །ལྷ་རིག་ བྱེད་དམར་མོས་སྡེ་ཁ་བསྒྱུར། །གཏེར་གསུམ་གྱི་རང་ནོར་ལག་ཏུ་རྙེད། །སྐུ་ཚེ་དང་མཛད་ཕྲིན་ནམ་མཁའ་མཉམ། །བརྡ་གོ་འམ་པདྨ་ལས་འབྲེལ་རྩལ། །ང་མ་འགྱང་མྱུར་བར་ཡུལ་དུ་བྱོན། །ཕས་བུ་ལ་བཞག་པའི་ཟབ་ཆོས་རྣམས། །དག་ཐེར་དང་གབ་འཁྲུལ་གསལ་མི་དགོས། །བྲིས་སྤེལ་གྱི་བགོ་སྐལ་ཁྱོད་ལ་དབང་། །ལས་མ་འགྱངས་རང་ནོར་ཚགས་སུ་མཛོད། །ཁོང་ནུས་ལྡན་འོད་ཟེར་རྟ་བདུན་འདི། །དབྱིངས་ཡེ་ཤེས་སྒྱུ་འཕྲུལ་བཀོད་པ་ལས། །སྐལ་ལྡན་རྣམས་ཡང་དག་ལམ་ལ་བཀོད། །ཚོམ་བུ་ནི་འབུམ་བཅས་གནས་འདི་རུ། མ་མཁའ་འགྲོའི་ཚོགས་ཀྱི་རྗེ་བོར་འགོད། །ཡུན་རིང་པོར་འགྲོ་བའི་དོན་མཛད་ཀྱང་། །དུས་ངན་པའི་མི་ཡིས་གོ་བར་དཀའ། །དེ་ཕྱིར་དང་འགྲོ་དོན་ཞིང་དུ་ལྷགས། །བརྡ་གོ་འམ་པདྨ་ལས་འབྲེལ་རྩལ། །སྔོན་བསམ་ཡས་སུ་གུ་པདྨའི་དྲུང་། །འུ་ཅག་རྣམས་རྟེན་འབྲེལ་ལྷན་དུ་འཛོམས། །ངས་ཐུགས་བསྐྱེད་དང་སྨོན་ལམ་རྒྱ་ཆེ་བའི། །དུས་ད་བར་ཁྱོད་ཀྱི་གྲོགས་སུ་ཤར། །ཡུལ་རྒྱ་བོད་ཀྱི་རྒུད་པ་མཐའ་དག་སེལ། །པད་འབྱུང་དང་མཚོ་རྒྱལ་ཐུགས་བཞེད་འགྲུབ། །མ་དབྱིངས་ཡུམ་མཚོ་རྒྱལ་སྒྱུར་འཕྲུལ་གར། །ངས་ཐུགས་ཀྱི་འོད་ཟེར་མི་མོ་ནི། ༈ གཏེར་གསུམ་གྱི་སྒོ་འཕར་གྲོགས་སུ་ཤར། །མ་མཁའ་འགྲོའི་ཕྲིན་ལས་ཟབ་མོའི་མཐུས། །ཁྱེད་ཐབས་ཤེས་འབྲལ་མེད་འཛོམས་པ་ན། །བདུདཀླ་ཀློང་འཕེལ་ཁ་ལོ་བརྒྱར་བཟློག །གནས་ངེས་མེད་འགྲིམས་པའི་དོན་ལྡན་ན། །བསྟན་འགྲོ་བའི་དོན་ཆེན་རིམ་གྱིས་འབྱུང་། གནས་གཅིག་ཏུ་བསྡད་ནས་ས་བཟུང་ན། །བློ་རིག་པའི་ཐབས་ལ་མ་རྨོངས་པ། །ཕྱི་ནང་གི་འབྲེལ་བ་སྤངས་ན་དགེ །ནོར་བུ་དང་ཆངས་བུའི་ཚུལ་ནོར་ནས། །དམ་གྲིབ་ཀྱི་སྨག་དང་འཕྲད་ཉིན་མོ། །མ་ཌཱཀྐིའི་བརྡབྱང་ཇི་བཞིན་དུ། །ལས་གང་བྱེད་འགྲོ་བའི་དོན་ལ་དགོངས། །བརྡ་གོ་འམ་པདྨ་ལས་འབྲེལ་རྩལ། །ངས་ཚིག་འདི་མ་བརྗེདཙིཏྟར་འཆོང་། །ལེགས་ཉེས་ཀྱི་འབྱུང་འགྱུར་དུས་སུ་སྨྲ། །ཞེས་གསུངས་མ་ཐག་ཏུ་ཐིག་ལེ་དེ་ཉིད་ཐུགས་ཀར་ཐིམ་སྣང་ཤར་ཚེ་ཉམས་ལས་སད་དོ། །དེ་ནས་རྗེ་དེ་ཉིད་སྒྲུབ་ཁང་དུ་བྱོན་ནས་ཞག་ཆ་ཤས་ལ་ཟབ་གཏེར་གྱི་གཏེར་སྒྲུབ་མཛད་ཅིང་། ཁྱད་པར་རྨ་རྒྱལ་ནས་གདན་དྲངས་པའི་ཟབ་ཤོག་རྣམས་གཏན་ཕབ་མཛད་དེ་གསལ་ཁྱབ་ཏུ་སྤེལ་ནས་སྐལ་ལྡན་རྣམས་སྨིན་གྲོལ་གྱི་ལམ་ལ་འགོད་པར་མཛད། དེ་ནས་ཡུལ་དེ་ཕྱོགས་ཀྱི་གནས་ཆེན་གནས་ཕྲན་རྣམས་ལ། ལས་ལྡན་ རྣམས་ཀྱིས་བསོད་ནམས་བསགས་པ་དང་དྭངས་བ་འདྲེན་ཕྱིར་གནས་ཡིག་ཕབ་པ་དང་། རྗེ་དེ་ཉིད་ཀྱིས་ཀྱང་ཕྱག་ཞབས་ཀྱི་རྗེས་འབུར་དུ་ཡོད་པ་རིས་སུ་གསལ་བ་སོགས་གྲུབ་རྟགས་ངོ་མཚར་ཅན་དུ་མས་འགྲོ་བློ་ཆོས་ལ་བཀོད་པར་མཛད་དོ། །དེ་ནས་མཁའ་འགྲོའི་ཞལ་ལུང་བཞིན་དགུང་ལོ་ཉི་ཤུ་རྩ་གསུམ་ལོར་རང་ཡུལ་ལ་ཕེབས་པའི་སྟ་གོན་མཛད་ཚེ། དེར་ཕྱོགས་ཀྱི་བུ་སློབ་ཡོན་བདག་རྣམས་ཀྱིས་བླ་མ་ལ་མཉེས་པ་གསུམ་གྱིས་ཞབས་ཏོག་བསྒྲུབ་ཅིང་རང་རང་དང་མཛེས་པའི་གདམས་པ་དང་ལུང་བསྟན་སོགས་གང་འདོད་ཀྱི་དངོས་གྲུབ་ཐམས་ཅད་ཡིད་ཚིམ་པར་ཞུས། རྗེ་ཉིད་ཀྱིས་ཀྱང་ཁོང་རྣམས་ཀྱི་མོས་པ་དང་མཐུན་པའི་མན་ངག་གི་གདམས་ཁྲིད་དང་། ལུགས་གཉིས་ཀྱི་ཞལ་ཏ་མཛད་ནས་རིམ་གྱིས་རང་ཡུལ་ལ་ཕེབས་སྐབས་ལམ་གྱི་ཡོན་བདག་རྣམས་ཀྱིས་རྗེ་དེ་ཉིད་ཡིན་པར་ཤེས་ནས། རྒྱུ་ཅི་འབྱོར་གྱི་དངོས་པོ་མང་དུ་ཕུལ་བས། དེ་དག་ཡབ་རྗེ་བླ་མའི་མཇལ་རྟེན་དུ་བཟུང་ནས་ཡབ་ཡུལ་དུ་ཕེབས་པས། བུ་སློབ་འཁོར་འབངས་ཐམས་ཅད་ཀྱིས་དགའ་བ་བསྒོམ། དེ་ནས་རིམ་གྱིས་བླ་མའི་དྲུང་དུ་བྱོན་ནས་ཕྱག་ཕུལ། རྒྱུ་ནོར་དངོས་པོ་ཐམས་ཅད་མཇལ་དར་གྱི་རྟེན་དུ་ཕུལ་ཏེ། བླ་མ་རིནཔོ་ཆེ་སྐུ་ཁམས་བཟང་ཞུས་པས། བླ་མས་ ༈ ཐུགས་ཤིན་ཏུ་དགྱེས་པར་མཛད་ནས་དེ་ཕྱོགས་ཀྱི་གནས་ཀྱི་ལོ་རྒྱུས་རྣམས་ཞིབ་པར་དྲི་བ་མཛད་པས། རྗེ་དེ་ཉིད་ཀྱིས་ཀྱང་ཡུལ་གྱི་ལོ་རྒྱུས་གནས་ཀྱི་ཡོན་ཏན་ཟབ་གཏེར་བཞེས་ཚུལ་རྣམས་ལེགས་པར་ཞུས་ཚེ། བླ་མའི་ཞལ་ནས་དེ་མིན་ཁྱོད་ལ་ཞལ་གཟིགས་ལུང་བསྟན་ཅི་འདྲ་འབྱུང་གསུངས་པས། རྗེའི་ཞལ་ནས་བདག་ལ་འཁྲུལ་སྣང་རེ་འདུག་ཀྱང་ཡིད་ཚོམ་པ་ཞིག་འདྲ་ཞུས་ཚེ། བླ་མའི་ཞལ་ནས་དེའི་ལོ་རྒྱས་ད་ལྟ་ཞིབ་རྒྱས་སུ་བཤད་པ་ཆོག་གི། །ད་རེས་ཁྱོད་ཐོན་ཚོད་བཟང་གསུངས་ཏེ་ཆོས་དང་གདམས་པའི་བགྲོ་གླེང་མང་པོ་མཛད་ནས་འབུལ་བ་སོགས་ཀྱིས་བླ་མ་ཅི་མཉེས་སུ་བསྒྲུབ་པར་མཛད་པས་སྲས་རྣམས་ཀྱི་དམ་པར་གྱུར་ཏོ། །དེ་ནས་རྗེ་དེ་ཉིད་ཀྱིས་བླ་མའི་མདུན་གཡོག་མཛད་ཅིང་བཞུགས་པས། ཉིན་གཅིག་བླ་མའི་ཞལ་ནས་ཁྱོདཔོ་ཊ་ལའི་རི་ངོགས་ཕ་གི་ན་ལྷ་གཟའ་ཤན་གསུམ་གྱི་མཚམས་དམ་པོ་ཞིག་ཏུ་སྡོད་གསུངས། རྗེའི་ཞལ་ནས་ང་རང་གི་ཉམས་དང་རྨི་ལམ་གང་ལ་བརྟག་ཀྱང་། ཁྱོད་ཀྱི་སྐུ་ཚེ་དེ་ཅིའགྱུར་མི་ཤེས་པ་འདྲ་ན། ཉིད་ཀྱི་གཏེར་གསར་དབང་ལུང་གི་ཁྲིད་ཁ་མ་ཐོབ་པ་རྣམས་བདག་ལ་གསུངས་དགོས་ཞུས་ཚེ། བླ་མའི་ཞལ་ནས་ངས་གདམས་ཁྲིད་མན་ངག་ཐམས་ཅད་དཔེ་དང་ཚིག་ལ་མ་ ལྟོས་པར་ཚྭ་ཚྭ་བརྐོས་ཕོར་བཞིན་དུ་དགོངས་བརྒྱུད་ཀྱི་ཕ་ཕོག་ཁྱོད་ལ་གཏད་ཡོད་པས། དེ་ལས་ལྷག་པའི་གདམས་ཁྲིད་ང་ལ་སྦྱིན་རྒྱུ་མེད། ངའི་དཀའ་བསྒྲུབ་ན་ཁྱོད་མཚམས་ལ་སྡོད་གསུངས། རྗེའི་ཞལ་ནས་བདག་བླ་མའི་བཀའ་བཞིན་མཚམས་ལ་ལོས་འདུག་ཀྱང་། ངཉིན་བཞིན་བླ་མ་རིན་པོ་ཆེ་ཁྱོད་ཀྱི་སྐུ་མདུན་དུ་ཡོང་ཆོག་པའི་བཀའ་གནང་སྩལ་དུ་གསོལ་ཞུས་ཚེ། བླ་མའི་ཞལ་ནས་བརྒྱ་ཞག་གཅིག་ལ་ཡོང་མི་ཉན། དེ་ཕན་ཆད་འོང་ན་ཆོག་གསུངས་པས། རྗེ་དེ་ཉིད་བླ་མ་དང་འབྲལ་འདོད་གཏན་ནས་མེད་ཀྱང་བཀའ་བཅག་མཕོད་ནས་མཚམས་དམ་རྒྱལ་བཞུགས། ཟླ་བ་གཉིས་ཙམ་སོང་རྗེས་མཁའ་འགྲོ་རལ་གྲི་འབར་མ་ཡིན་སྐད་པས་འདི་སྐད་ཟེར། ཨེ་ཨེཿ སྤྲིན་བྲལ་ནམ་མཁའ་ཡངས་པ་དེ། །སྣོད་བཅུད་ཀུན་གྱི་གཞི་རུ་སྣང་། །རྒྱ་མཚོ་ཐ་གྲུ་ཡངས་པ་དེ། །ནོར་བུ་ཀུན་གྱི་གནས་སུ་སྣང། །ཤེས་རབ་གསུམ་ལྡན་མངའ་མཛད་དེ། །བློ་ལྡན་ཀུན་གྱི་གྲོགས་སུ་མཆི། །ནུས་ལྡན་སྤྲུལ་པའི་དཔའ་བོ་འདི། །མ་དང་མཁའ་འགྲོའི་དབུས་ན་འཛའ། །འགྲོ་བའི་མུན་སེལ་རྟ་བདུན་དེ། །སྤྲིན་བྲལ་ནམ་མཁའི་དབྱིངས་ལ་མཛེས། །དེ་སོགས་བརྡ་ཙམ་བརྗོད་པ་ལ། །ཁྱོད་ཤེས་རབ་ལྡན་པས་ལེགས་པར་ ༈ དཔྱོད། །ཅེས་སྨྲས་པས། རྗེ་དེ་ཉིད་ཐུགས་མ་བདེ་བ་བྱུང་ཡང་མཚམས་ནས་བཞེངས་མ་ཕོད། དེ་ནས་རིམ་བཞིན་མཚམས་ཁ་གང་ནས་བླ་མའི་སྐུ་མདུན་ལ། ཕེབས་ནས་བཀའ་སྲུང་བྲན་དུ་ཁོལ་བའི་རྟགས་མཚན་ལེགས་པར་ཞུས་ཚེ་བླ་མས་ཐུགས་དགྱེས་པར་མཛད། དེའི་སྐབས་ཆར་བབ་རྒྱུ་བྱས་ཏེ་བླ་མའི་གཟིམ་ཁང་གི་ཐོག་ཐད་ཀྱི་སྟེང་གི་ནམ་མཁའ་ནས་འབྲུག་སྒྲ་ཞིག་སྒྲོགས་པས། བླ་མའི་ཞལ་ནས་ང་ལོ་དྲུག་ཅུ་རེ་དགུ་མ་ཐོན་བར་དུ་ངའི་མགོ་ཐོག་ནས་འབྲུག་གྲགས་མ་མྱོང་ནས། ད་ལན་འབྲུག་གྲགས་པ་འདིང་རང་འགྲོ་རན་ཟེར་བ་ཡིན་པའི་རྟགས་རེད་གསུངས། རྗེའི་ཐུགས་ལ་ང་རང་གི་ལུང་བསྟན་བཙུབ་ལུགས་དང། བླ་མས་གསུངས་ཚུལ་གང་ལ་བལྟས་ཀྱང་མི་བཞུགས་པ་འདྲ་དགོངས་ནས། ཕྱག་ཕུལ་ཏེ་བཤུམས་པར་མཛད་ནས་བླ་མ་རིན་པོ་ཆེ་ཁྱེད་ད་དུང་བསྟན་པ་དང་སེམས་ཅན་གྱི་དོན་ལ་སྐུ་ཚེ་བསྐལ་བརྒྱའི་བར་དུ་མྱ་ངན་ལས་མི་མདའ་བར་བཞུགས་པར་གསོལ་བ་འདེབས། ཁྱད་པར་ང་རང་གི་སྐྱབས་དང་མགོན་སོགས་འདི་དང་ཕྱི་མའི་རེ་ལྟོས་བཅའ་བ་བླ་མ་ཁྱོད་ལས་མེད་པས། ད་དུང་མྱ་ངན་ལས་མི་འདའ་བར་གསོལ་བ་ཡང་ཡང་བཏབ། དེ་སྐབས་བླ་མས་ང་རང་འཆི་བ་རེད་མི་བསམ། པདྨ་བཀོད་དུ་འགྲོ་དགོས་པའི་དུས་ལ་བབ་འདུག་པར་འདྲ་གསུངས་ནས། འཁོར་བུ་སློབ་རྣམས་ལའང་དེ་ཀའི་སྟ་གོན་བསྒྲིགས་དགོས་གསུངས་ཏེ། ཐམས་ཅད་ཀྱིས་བླ་མའི་བཀའ་བཞིན་དུ་ནོར་དངོས་རྫས་ཐམས་ཅད་ཅི་མཁོ་རྣམས་ཚགས་སུ་བྱས། གཞན་དངོས་པོ་ཐམས་ཅད་བཙོང་བ་དང་ཐེབས་བཞག་བྱས་པ་སོགས་བསྒྲུབ། དེ་ནས་རྗེ་དེ་ཉིད་བླ་མའི་བཀའ་བཞིན་དུ་མཚམས་ལ་བཞུགས་ཏེ། དགུང་མོའི་དུས་སུ་བླ་མའི་སྐུ་མདུན་ལ་ཕེབ་ཆོག་པའི་བཀའ་གནང་ཐོབ་པས་ཉིན་རེ་བཞིན་དུ་དེ་ཀར་ཕེབས་ཏེ། རྗེས་ཕྱག་ཕུལ་ནས་བླ་མ་རིན་པོ་ཆེ་ཁྱེད་ཀྱི་མཛད་སྤྱོད་གང་ལ་བརྟགས་ཀྱང་ཡིད་མི་ཆེས་ཞིག་འདུག་པས། བདག་གི་བྱ་བ་ལས་མཐའ་ཐམས་ཅད་ཅི་འགྱུར་གྱི་ལུང་བསྟན་གསལ་པོ་ཞིག་གནང་དུ་གསོལ་ཞེས་ཡང་ཡང་ཞུས་ཚེ། བླ་མའི་ཞལ་ནས་ངས་ཁྱོད་ལ་ད་སྔ་ཡན་བཤད་པ་ཐམས་ཅད་ལུང་བསྟན་ཡིན་པས་དེས་མི་ཆོག་པ་མེད་གསུངས། རྗེས་ཡང་ཡང་ཞུས་པས་འདི་སྐད་གསུངས། མཁའ་འགྲོ་བདེ་ཆེན་ཡེ་ཤེས་མས། །ཟླ་བ་ལྟ་བུའི་ཞལ་ངོམས་ཤིང་། །འཇའ་ཚོན་ལྟ་བུའི་སྐུར་བཞེངས་ནས། །རྒྱུད་མངས་ལྟ་བུའི་དབྱངས་སྙན་གྱིས།། ཀྱེེཿ སྐལ་ལྡན་རིགས་ཀྱི་བུ་ཁྱོད་ཀྱིས། །ང་ཡིད་ལ་བྱ་བ་ཅིའི་ཕྱིར་མིན། །དབྱིངས ༈ ནམ་མཁའ་མཛོད་ཀྱི་ཀློང་ཡངས་ནས། །ང་སྒྱུ་མ་ལྟ་བུའི་འཕྲུལ་འགྱེད་མཁན། །དེ་རིག་དང་མ་རིག་ཆོ་འཕྲུལ་གྱིས། །སངས་རྒྱས་དང་སེམས་ཅན་གཉིས་ཀ འཁྲུལ། །ཡོད་པ་དང་མེད་པ་ཀུན་གྱི་གཞི། །བརྡ་གོ་འམ་ཟེར་བའི་དྲིས་ལན་དུ། །ངས་འདི་སྐད་དབྱངས་ཀྱིས་ཚིག་འདི་བརྗོད།། ཀྱེེཿ ཨ་ལྕམ་རྒྱལ་མོ་བཞིན་ལེགས་མ། །ཁྱོད་སྐྱེ་བ་མེད་ལ་སྐྱེ་བར་སྟོན། །བྱུང་ས་མེད་པའི་དབྱིངས་རུམ་ནས། །གནས་མེད་ནམ་མཁའི་ཁོར་ཡུག་དེ། །འགྲོ་མེད་ཆུ་ཡི་ཟླ་གཟུགས་ལྟར། །ཡིད་ལ་བྱས་པའི་སྣང་ངོར་འཁོར། །ང་སྒྱུ་མའི་བུ་ཆུང་དྲི་མ་མེད། །དུས་གསུམ་གྱི་འབྱུང་འགྱུར་ལྡོག་པའི་ཚུལ། །དོན་མ་འཁྲུལ་ཚུལ་བཞིན་བསྟན་དུ་གསོལ། །ཅེས་ཞུས་པའི་ལན་དུ་འདི་སྐད་ཟེར།། ཀྱེེཿ སྒྱུ་མའི་རྣལ་འབྱོར་ཆེན་པོ་ཉོན། །ཀློང་ཆེན་ལྷ་ལམ་ཡངས་པ་ནས། །མདངས་གསལ་བའི་འོད་བརྒྱ་ཟེར་མདངས་ཅན། །ཤར་རྡོ་རྗེ་ཅན་གྱི་ཡུལ་ནས་ཆས། །ལས་ཉོན་མོངས་རྩུབ་རགས་དང་བྲལ་ཞིང་། ། དབྱིངས་མི་འགྱུར་ལྷུམས་སུ་ཁྱབ་ཅིང་བརྡལ། །རབ་མཐོ་བགངས་དཀར་ལྷུན་པོའི་རྩེ། །ཟིལ་གནོན་གྱི་རྒྱལ་པོ་གདོང་ལྔ་པ། །སྟེང་དབྱར་རྔའི་དཔའ་རྩལ་བཀོང་ནུས་ན། །སྟོབས་ འཇིགས་པའི་ང་རོ་སུ་ཡིས་འགོག །བརྡ་གོ་འམ་སྒྱུ་མའི་རྣལ་འབྱོར་ལགས། །ཐབས་བདེ་ཆེན་རིག་པའི་གཞོན་ནུ་དེའི། །ཡུལ་སྟོང་ཉིད་ཤེས་རབ་དཔལ་འབར་མཁར། །ཚུལ་གཉིས་མེད་རོལ་པའི་གདེངས་ལྡན་ན། །དོན་དགའ་བཞིའི་ཡེ་ཤེས་ཉམས་སུ་མྱོང་། །མདངས་ལྔ་ལྡན་གཉིས་སྐྱེས་བཞིན་བཟང་གིས། །མྱོས་བྱེད་ཀྱི་ཧ་ལ་ཟས་བྱེད་བཞིན། །ལས་ཇི་ལྟར་བྱས་ཀྱང་དེ་ལྟར་རོ། །རྐྱེན་བར་ཆད་སེལ་ཕྱིར་ཀུ་མ་ར། །གཞན་རྒོལ་བ་འཇོམས་པའི་དྲང་སྲོང་ཆེ། །རྒྱ་ཚོགས་གཉིས་རྫོགས་ཕྱིར་ལུས་སྦྱིན་དང་། །དམ་ཉམས་ལ་དགོས་པའི་ཚོགས་བསྐང་དང་། །བདུད་ཕ་རོལ་བཟློག་པའི་ཐབས་ལ་འབད། །བསྟན་འགྲོ་བའི་དཔལ་མགོན་དུ་སྨོན་ཐོབ། །གྲོགས་མཆོག་གྱུར་གནོད་སྦྱིན་དམར་ནག་དང་། །གཟའ་ཁྱབ་འཇུག་ཆེན་པོ་བྲན་ཏུ་ཁོལ། །ལྷ་དབང་ཕྱུག་ཆེན་པོས་གཞན་སྣང་བསྒྱུར། །ཆོས་སྲིད་ཀྱི་མངའ་ཐང་རྒྱས་པའི་ཕྱིར། །ནོར་ལོངས་སྤྱོད་བསྒྲུབ་པའི་ཐབས་ལ་འབད། །ཚེ་འཕེལ་རྒྱས་ཕྱིར་ན་ཚེ་ཡི་གཟུངས། ལྷ་ཡིད་ལ་བྱས་ན་ཉེར་གཅིག་རེ། །དུས་རྟག་པར་རྒྱུན་དུ་བསྒོམ་བཟླས་བྱ། །གཞི་ཁྲེགས་ཆོད་ལྟ་བ་གཏན་དབབ་སྟེ། །དབྱིངས་ལྷུན་གྲུབ་རོལ་པའི་མྱུར་ལམ་དུ། །ཚུལ་འཕྱུག་མེད་ བསྒོམ་པའི་རྣལ་འབྱོར་ན། །ཚེ་འདི་རུ་མི་འཇིགས་གདེང་ཐོབ་སྲིད། །ཡུལ་འབྲེལ་ཚད་ཐར་པའི་ས་བོན་ཐོབ། །ཚེ་འདི་ཕྱི་གཉིས་ལ་རང་དབང་བསྒྱུར། །དགྲ་འདུ་བ་རྣམ་བཞིའི་ནད་བྱུང་ཚེ། །རྐྱེན་ངན་པ་གྲོགས་སུ་ཁྱེར་བ་