Tibetan
འབྱུང་འགྲོ་ལ་བྱང་སེམས་བསྒོམ། ། སྡོམ་དང་དམ་ཚིག་དཔྲལ་བའི་མིག་ལྟར་བསྲུང་། །ལུས་ངག་དལ་བར་མ་སྡོད་དགེ་ལ་འབུངས །སྟོང་ཉིད་ལྟ་བ་བླ་མའི་མན་ངག་བཞིན །འཁོར་འདས་སྟོང་ཉིད་ཆེན་པོའི་ངང་རྟོགས་ནས་།རང་རིག་འགྱུར་བ་མེད་པའི་གདིང་ཐོབ་ན། །དེ་ལ་འཁོར་འདས་རང་སྣང་ལྟ་བ་ཟེར། །ལྟ་བ་དེའི་ངང་རང་སེམས་མ་བཅོས་པར། ངང་བཞག་དྲན་པས་གསལ་མདངས་མ་བོར་ཙམ། །ཆེད་དུ་མ་བསྒོམས་གཡེང་དུ་མ་བསྐྱུར་བར། །ཡེངས་མེད་སྒོམ་མེད་བརྗོད་པ་བྲལ་བའི་ངང་།བྱིང་རྨུགས་འཐིབ་གསུམ་ཉམས་ཀྱི་སྐྱོན་སྤངས་ནས། །གང་ཤར་འཛིན་མེད་རིག པའི་ཀློང་དུ་ཞོག །དེ་ལ་སྒོམ་པ་རང་གསལ་འཛིན་མེད་བརྗོད། །དེ་ལྟར་སེམས་ཀྱི་གནས་ལུགས་ཡིན་ལུགས་རྣམས །མ་ནོར་ཚུལ་བཞིན་རྟོགས་ནས་དེའི་ངང་དུ། །གང་ཤར་གང་སྣང་# ༄༅། །ཐམས་ཅད་རིག་པའི་རྩལ། །དེ་ལས་སྤང་བླང་དགག་སྒྲུབ་མི་བྱེད་པར། །རང་ཤར་རང་སྣང་རང་གྲོལ་གནད་རྟོགས་ན། །དེ་ལ་མ་བཅོས་རང་བྱུང་སྤྱོད་པ་ཟེར། །རང་རིག་མངོན་གྱུར་གདོད་མ་གཞིའི་སངས་རྒྱས །སྐུ་གསུམ་མཉམ་པ་ཉིད་ཀྱི་དབྱིངས་དེ་ལས། །ཐོབ་བྱའི་འབྲས་བུ་ཡེ་ནས་གྲུབ་པ་མེད། །དེ་ལྟར་ལྟ་སྒོམ་སྤྱོད་འབྲས་མདོར་བསྡུས་འདི། །གོ་སླའི་ཕྱིར་དུ་ཅུང་ཞིག་སྤྲོས་པ་ལས །དོན་ལ་ལྟ་སྒོམ་སྤྱོད་འབྲས་ཐ་དད་མེད། །རང་རིག་མ་བཅོས་གཉུག་མའི་ཡེ་ཤེས་འདི། །མ་ཡེངས་འཛིན་མེད་བློ་འདས་ཆེན་པོར་སྐྱོངས། །དེ་ཡིས་ཚེ་འདིར་ཀུན་བཟང་རང་ཞལ་མཇལ། །དེ་སྐད་དད་ལྡན་སངས་རྒྱས་བཀྲ་ཤིས་ཀྱིས། །ཞལ་གདམས་དགོས་ཞེས་ནན་ཆེར་བསྐུལ་བའི་ངོར །ཆོས་མེད་ཟོབ་བརྫུན་ཀུན་བཟང་དབང་མོས་བྲིས། །དགེ་བས་འགྲོ་ཀུན་གདོད་མ་གཞིར་གྲོལ་ཤོག ༈ གདོད་ནས་རྣམ་དག་རིགཔ་བྱང་ཆུབ་སེམས །སྤྲོས་བྲལ་རྣམ་ཐར་གསུམ་ལྡན་སྟོང་པ་ཉིད། །ལྷུན་གྲུབ་སྐུ་དང་ཡེ་ཤེས་འདུ་འབྲལ་མེད། །ཀུན་བཟང་པདྨ་ལས་འབྲེལ་སྤྱི་བོར་རོལ །ཤིན་ཏུ་ཟབ་གསང་འོད་གསལ་རྫོགས་པ་ཆེ །མན་ངག་ཀུན་གྱི་མཐར་ཐུག་གསང་བའི་ལམ ། གནད་གསུམ་འདུས་པ་གཞི་ཡི་ཁྱད་ཆོས་ནི །སེམས་ལས་མ་བྱུང་རང་རིག་ཀ་ནས་དག །གཟུང་འཛིན་འཁྲུལ་པའི་བློ་ལ་མ་ལྟོས་པར། །སེམས་དང་སེམས་བྱུང་ཡེ་ནས་མཐའ་གྲོལ ཀློང་། །མ་རིག་སྒྲིབ་སངས་ཡེ་ཤེས་ངང་གིས་རྒྱས །ལུང་ལས་མ་བྱུང་གདམས་པའི་མན་ངག་ནི །བརྒྱུད་ལྡན་བླ་མ་སངས་རྒྱས་མངོན་མཐོང་གི །མོས་གུས་ཟབ་མོས་བྱིན་རླབས རྟོགས་པ་འཕོས །ཚིག་དང་དཔེ་ལ་མ་ལྟོས་གདམས་པའི་གནད། །འཛིན་མེད་རང་གྲོལ་རིག་པའི་རང་ཞལ་མཐོང་།རྒྱུ་ལས་མ་བྱུང་ཡེ་རྫོགས་འབྲས་བུ་ནི། །ཚོགས་གཉིས་འཇུག་པ་ཐ་དད་མ་བསྒྲུབ་པར། །ཡེ་གདངས་གཞིར་གནས་རིག་པ་ཆོས་སྐུའི་ཀློང་།སྐུ་དང་ཡེ་ཤེས་ཡོན་ཏན་རྒྱ་མཚོའི་མཛོད། །གདོད་ནས་འཁྲུལ་མེད་ངང་བཞག་ཆོས་ཀྱི་སྐུ །མངོན་གྱུར་ཆེན པོ་ཡེ་རྫོགས་འབྲས་བུ་ལགས། །དེ་ལྟར་ཀུན་བཟང་དགོངས་པའི་ཁྱད་ཆོས་འདི། །མཆོག་སྤྲུལ་དམ་པ་འཆི་མེད་རྣམ་རྒྱལ་དྲུང་། །འཁྲུལ་འབྱམས་བདེ་ཆེན་བདེ་བའི་རྡོ་རྗེ་ཡིས རྟོགས་པའི་འདྲ་འབགས་ཡི་གེའི་རིས་སུ་བྲིས །མཁའ་འགྲོ་ཡང་རྫོང་གསང་བའི་དབེན་གནས་ནས །ཀུན་བཟང་ཆོས་ཉིད་དབང་མོས་གུས་པས་ཕུལ །རང་ལུགས་གཡག་རྭ་འཕྲེད་ཆོད་ ༄༅། །འདི་ལྟར་ལགས། །ཡག་ཡག་སྙན་སྙན་ལྟ་བ་བདག་ལ་མེད། །གཅིག་ཆོད་རིག་པའི་གནས་ཚུལ་མདོ་ཙམ་ཡིན །ཡིན་མིན་ཡོད་ན་ཁྱེད་དྲུང་བཟོད་པར གསོལ། །བཅོས་མེད་གཏད་མེད་ངང་ནས་ཕུལ་བ་དགེ ༈ མཁན་པོ་ནོར་བུ་དབང་རྒྱལ་ལ་སྤྲིངས་ཡིག་ཏུ་གདམས་པ། བདག་གིས་ཕྱི་མཚམས་དམ་པོ་བྱས་ནས་མཚམས་ཐོ་བཞག ཀྱང་། ནང་མཚམས་ཉོན་མོངས་རང་ཁར་ཤོར་ནས་སྣང་བ་འཁྲུལ་མཁས། རིག་པ་ཅོལ་ཆུང་ནས་སྒོམ་ཞེས་པ་དེ་ནི་ལུང་མ་བསྟན་དུ་འབྱམས་སོང་བས་བྱ་ཐབས་མ་རྙེད་ནས་སྒྱིད་ལུག་པའི་ངང་དུ་ཉལ་བསྡད་ཡོད། ཕྱི་སྣང་བ་སྒྱུ་མ་རྨི་ལམ་ལྟར་སོང་བས་བསྒོམ་རྒྱུ་མ་རྙེད། ནང་སྲིད་པའི་ཆོས་ཁམས་རིག་པ་གཞིར་བཞེངས་ལས་མེད། གསང་བ་རིག་པ་ཞེས་པ་འཁོར་འདས་དག་མཉམ་དུ་རྫོགས། ད་ནི་བསྒོམ་དང་སྒོམ་བྱེད་དྲན་འཛིན་དེ་བོར་ནས། །ཆོས་དབྱིངས་ཀློང་དུ་བག་ཡངས་ལྟད་མོ་ཞིག་བྱས་ཚེ། །ཚོགས་དྲུག་ཡུལ་ནས་རིག་རྩལ་ཡེ་ཤེས་དང་འཕྲད་ནས། །གང་ཤར་རང་གྲོལ་ཤར་གྲོལ་མཐའ་གྲོལ་དང་ཡེ་གྲོལ། །ཡེ་ཡིན་རིག་པ་མ་བཅོས་ཀ་དག་གི་གནས་ལུགས། །འབད་རྩོལ་མེད་པར་མཐོང་ལ་ལ་ཐང་ནི་མི་འདུག །དེ་སྐད་ཆོས་ མེད་མདོ་མེད་ཁོ་མོ་ཡི་གནས་ཚུལ །དམ་ལྡན་སློབ་བུ་མཆོག་གི་སྐུ་དྲུང་དུ་ཕུལ་བས། །ཁྱོད་ཀྱང་མ་ཡི་རྗེས་སུ་སྐུ་གསུམ་གྱི་ཀློང་དུ། །རང་བྱུང་རིག་པའི་ཡེ་ཤེས་ངལ་གསོ་རང་མཛོད དང་། །སངས་རྒྱས་ཀུན་ཏུ་བཟང་པོ་ཐག་རིང་ལ་མི་བཞུགས གཉུག་སེམས་ཕྲ་བའི་ཡེ་ཤེས་ཀུན་བཟང་གི་དགོངས་པ། །ཤེས་བྱའི་ཆོས་ཀྱིས་སྒྲོ་བཏགས་སྐུར་འདེབས་དེ་མེད་ཚེ། ། ངང་གནས་སྐུ་གསུམ་ཡེ་ཤེས་མངོན་གྱུར་དུ་མཇལ་ནས །རང་རིག་པད་འབྱུང་རྗེ་དང་དབྱེར་མེད་དུ་གྲོལ་ནས །ཁམས་གསུམ་ཆོས་ཀྱི་རྒྱལ་པོར་དབུགས་དབྱུངས་དེ་ལོས་མཛད། །ཅེས་ཟླ་ཚེས་དགེ་བར་སེར་དགོན་དབེན་ཁྲོད་ནས་སུ་ཁ་བཛྲ་རྩལ་གྱིས་ཕུལ།། དགེའོ།། །། མི་དབང་ས་སྐྱོང་སྲས་མོ་བདེ་ཆེན་མཚོ་ལ་སྤྲིངས་ཡིག་ཏུ་གདམས་པ། འབྱོར་ལྡན་གྱི་ལུས་རྟེན ཐོབ་པའི་དོན་ལྷག་བསམ་རྣམ་པར་དག་པའི་སྒོ་ནས་ལུས་ངག་གི་དགེ་བ་ཅི་འགྲུབ་མཛད་པ་དང་། ཁྱད་པར་རང་གི་སེམས་ཀྱི་གནས་ཚུལ་སྟོང་པ་ཙམ་ལ་གཞི་མི་བཅའ་བར། ཕྱི་ནང་སྣོད་བཅུད བདག་ལུས་ཕུང་ཁམས་ལ་སོགས་སྣོད་བཅུད་ཐམས་ཅད་ཡེ་ནས་སྟོང་ཞིང་བདག་མེད་པའི་རང་བཞིན་དུ་གཏན་ལ་ཕབས་ནས་བདག་མེད་རྟོགས་པའི་ཤེས་རབ་ཆེན་པོས་འཁོར་འདས་ཐམས་ཅད་ ༄༅། །གཞི་དབྱིངས་གཅིག་གི་ཀློང་དུ་རོ་གཅིག་ཅིང་སྐུ་དང་ཡེ་ཤེས་ལ་སོགས་པའི་ཡོན་ཏན་ཐམས་ཅད་ཡེ་རྫོགས་ཆེན་པོར་ལྷུན་གྱིས་གྲུབ་པའི་གནས་ཚུལ་དང་ཡིན་ལུགས་ཐམས་ཅད་བླ་མའི་མན་ངག་ལ་བརྟེན་ནས་རང་གི་ལྟ་སྒོམ་གྱི་ཕུ་ཐག་ཆོད་པ་ཞིག་ཅི་ནས་ཀྱང་གལ་ཆེ། གདམས་པའི་གནད་གོ་བ་ཙམ་ལ་མ་བཞག་པར། རང་གི་གཞིའི་བཞུགས་ཚུལ། ལམ་གྱི་གནས་ཚུལ་རྣམས་ཉམས་འོག་ཏུ་ཆུད་པར་བྱས་ཏེ་ཉམས་ལེན་ལ་སྙིང་རུས་བྱེད་པ་གནད་ཡིན། དེས་ཇི་ཞིག་ནས་ཆོས་ཉིད་ཀྱི་དོན་གཤི་ཐོག་ལ་ཕེབས་ནས་དྲན་རྟོག་འགྱུ་བ་ཐམས་ཅད། དཔེར་ན་ཆུ་ལ་རི་མོ་བྲིས་པ་ལྟར་རང་གྲོལ་དུ་སོང་ནས་སྐྱེ་མེད་ཀྱི་ཉམས་ཆུ་བོ་ཆེན་པོའི་རྒྱུན་བཞིན་འབད་མེད་དུ་ངང་གིས་འབྱུང་བ་ཡིན་ནོ། །དེས་འཁོར་འདས་རང་སྣང་དུ་ཤེས་ནས་རིག་པ་སྐུ་གསུམ་མཉམ་ཉིད་ཀྱི་དབྱིངས་རྣམ་པར་མི་རྟོག་པའི་ཡེ་ཤེས་མངོན་དུ་གྱུར་པ་ནི་རྫོགས་ཆེན་མན་ངག་རང་ལུགས་ཀྱི་ལྟ་བའི་ཁྱད་ཆོས་བླ་ན་མེད་པ་ཡིན་ནོ། །དེ་ལྟར་གྱི་ཡིན་ལུགས་ཚུལ་བཞིན་དུ་ཐུགས་སུ་ཆུབ་པར་མཛོད་དང་རང་རེ་གཉིས་པོ་དངོས་མཇལ་འོང་ཡང་དེའི་ལྷག་གི་བསླབ་བྱ་བདག་ལ་བྱེད་རྒྱུ་མེད་པས། སྙིང་མིག་སྲོག་དང་མཚུངས་པའི་མན་ངག་འདིའི་ཡིན་ལུགས་ཤེས་པ་ ཙམ་གྱིས་ནང་བསྒོམ་ན་ནང་སངས་རྒྱས། ནུབ་སྒོམ་ན་ནུབ་སངས་རྒྱས་པའི་གདམས་པ སྲིད་གསུམ་ཀ་དག་གི་དགོངས་པའི་བབས་སོ་དེ་ག་ཡང་ཡིན་པས་ཐུགས་ཀློང་དུ་མངའ་བར་ཞུ། རང་རེ་རྣམས་ཆོས་བརྒྱུད་གཅིག་པ་ཡིན་པས། ལམ་འདིའི་ཁྲིད་མ་ཐོབ་པ་ལ་ཟུར་ཙམ་ཡང་བསྒྲགས་པར་མི་བྱ། བློ་ཡིད་དཔྱོད་ཀྱི་བསྒོམ་པས་འདིའི་དོན་རྟོགས་པར་དཀའ་བས་དེ་ལུགས་མཁྱེན་འཚལ ཅེས་པའང་བྱིན་རླབས་དབེན་ཁྲོད་གནས་ནས་ཀུན་བཟང་བདེ་སྐྱོང་དབང་མོས་གུས་ཕུལ། དགེའོ།། །། ཧ་ཧ་བསྒོམ་འཛིན་གྱིས་བཅིངས་པའི་སྒོམ་ཆེན་དུ་རློམས་པས། །བསྒོམ་རོ་དེ་ཆེ་བའི་སྒོམ་པ་དེ་མེདཀྱང་། །ཉམས་ཆུང་གི་རྒན་མོའི་བསམ་ཚོད་ལ་སྦྱར་ན །ཚབ་ཚུབ་ཀྱི་བློ་སྣ་རྣམ་རྟོག་གི་འབོད་པ །རང་ཁ་རུ་སྐྱུར་དང་རང་གཞི་ཡི་ཀློང་དུ། །རང་གྲོལ་དུ་འགྲོ་བ་རྟོགས་པ་ཡི་ཆོས་ཉིད། །གཞི་དབྱིངས་ཀྱི་མཁའ་ལ་རིག་རྩལ་གྱི་ཡེ་ཤེས། །འགྲོ་འོང་ལྟར་སྣང་ཡང་དག་མཉམ་གྱི་དབྱིངས་སུ། །དབྱེ་བསལ་ཀྱང་མི་དགོས་གང་ཤར་ནི་རང་གྲོལ །རང་རིག་འདི་ཀུན་བཟང་གཞན་ལས་ནི་མ་བྱུང་།ཡེ་བབས་ཀྱི་གནས་ལུགས་མ་བཅོས་པར་སྐྱོངས་དང་། །རང་བྱུང་གི་ཡེ་ཤེས་ཐག་རིང་ལ་མི་བཞུགས། །བློ་ ༄༅། །བྲལ་གྱི་ཆོས་སྐུ་དེ་ག་རང་ཡིན་འདུག །རྩོལ་བྲལ་གྱི་ཡེ་ཤེས་རང་ས་ནས་མཇལ་འོང་། །བཅོས་བསྒྱུར་གྱིས་བསྒོམ་ཀྱང་བརྗོད་བྲལ་གྱི་ཡེ་ཤེས། །ནམ་མཁའ་ཡི་འཇའ་བཞིན་ཟིན་ཐབས་ནི་འོ་བརྒྱལ། །རང་བབས་སུ་ཞོག་དང་རང་གྲོལ་གྱི་ཆོས་སྐུའི །རང་བཞིན་དེ་མཐོང་ནས་གདོད་མ་ཡི་དབྱིངས་སུ །མཉམ་གྲོལ་གྱི་གཏན་སྲིད་ཚེ་འདི་རུ་ཐོབ་ངེས། །བཅོས་མ་ཡི་བསྒོམ་དེ་རྒན་མོ་ངས་མི་ཤེས །དེ་ཙམ་རེ་མཛོད་དང་ཉེ་ལམ་རེ་ཡིན་ཐངས །དེ་སྐད་ནི་རང་སློབ་རིག་བཟང་གི་ཉམས་ལ །རང་གྲོལ་གྱི་མེ་བཙའ་དུག་མདའ་བས་ཚ་བ། །ཁ་ངན་གྱི་རྒན་མོ་ཀུན་བཟང་གི་མིང་གིས །གནས་ལུགས་ཀྱི་འདྲ་འབག་ཡིག་རིས་སུ་བྲིས་པ། །སློབ་བུ་ལ་ཕུལ་བ་ཉམས་ལེན་རེ་མཛོད་དང་། །གོ་རྒྱུ་རེ་ཡོད་ཐང་གསོལ འདེབས་ཀྱང་འདི་ཡིན །ཞལ་གདམས་དང་བསླབ་བྱ་འདིའི་ལྷག་ནི་མེད་དོ། །སུ་ཁ་བཛྲ་གྱིས་སོ།། ༈ ངོ་བོ་ཀ་དག་ཆོས་ཀྱི་དབྱིངས། །འགགས་མེད་རང་གསལ་ལོངས་སྤྱོད རྫོགས། །ཐུགས་རྗེ་ཀུན་ཁྱབ་སྤྲུལ་པའི་སྐུ །སྐུ་གསུམ་དབྱེར་མེད་བླ་མར་འདུད། །དེ་ལ་འདིར་ལྟ་སྒོམ་སྤྱོད་འབྲས་ཀྱི་གནད་བསྡུས་ཅུང་ཟདགསལ་འདེབས་ཀྱི་ཚུལ་དུ་བཤད་པ་ལ། གསང་སྔགས་འདི་ནི་ཐབས་ཆེ་བས་དད་པ་དང་མོས་གུས་ཁ་ཞེ་མེད་པ་ཞིག་ཡོད་ཕྱིན་ཆད་བླ་མ་ལ་ཐག་ཉེ་རིང་དང་སྐུ་བཞུགས་ཡོད་མེད་ལ་ཁྱད་པར་མེད་པ་ཡིན་པས་གསོལ་བ་རྩེ་གཅིག་ཏུ་བཏབ་ན་དགོངས་རྒྱུད་ཀྱི་བྱིན་རླབས་རང་རྒྱུད་ལ་འཕོ་ངེས་པ་དང་། ཁྱད་པར་ཆོས་ཐེག་པ་ཀུན་གྱི་མཆོག་གྱུར་འོད་གསལ་རྫོགས་པ་ཆེན་པོ་ཞེས་པ་རང་བྱུང་གི་ཡེ་ཤེས་རང་གི་རིག་པ་སྨྲ་བསམ་བརྗོད་པ་དང་བྲལ་བ་འདི་ཀ །ཡོད་པར་ཡང་མ་བསྒོམས་བློ་ཡིན། མེད་པར་ཡང་མ་བསྒོམས་བློ་ཡིན ཡོད་མེད་ཀྱི་དགག་སྒྲུབ་གང་ཡང་མི་བྱེད་པར། སེམས་རང་ལུགས་སུ་ཇི་ལྟར་དུ་གནས་པ་དེ་ལྟར་དུ་ཞོག་དང་། གཉིས་མེད་ཀྱི་ཡེ་ཤེས་ཞེས་གཞན་ནས་བསྒྲུབ་མི་དགོས་པར་ཤུགས་འབྱུང་དུ་གནས་པ་དེ་ཀ་ཡིན་ནོ། །ལྟ་བའི་རྣམ་གྲངས་མང་ཡང་རང་སེམས་གཞི་མེད་རྩ་བྲལ་དུ་མཐོང་བ་དེ་ཡིན། སྒོམ་པའི་འཇོག་ཚུལ་མང་ཡང་འཁོར་འདས་རང་སྣང་དུ་ངོ་ཤེས་ཤིང་དེའི་ངང་དུ་མེད་མཉམ་དག་མཉམ་ཆེན་པོར་ཤེས་པ་ལ་གདིང་ཐོབ་པ་དེ་ཀ་ཡིན་ནོ། །སྤྱོད་པ་ཇི་ལྟར་བཤད་ཀྱང་རང་རིག་ལས་གཞན་པའི་སངས་རྒྱས་མེད་པར་ཐག་ཆོད་པ་དང་། རྣམ་རྟོག་ལས་གཞན་པའི་འདྲེ་མེད་པར་ཐག་ཆོད་ནས་གང་ཤར་ཡེ་ཤེས་དང་། གང་སྣང་རིག་པར་རྟོགས་པའི་བླང་དོར་མེད ༄༅། །པ། དཔེར་ན་སེང་གེས་གངས་རི་ཟིན་པར་ལྟར་འཁོར་བ་རྒྱན་དུ་ཤར་བ་ཡིན་ནོ། །འབྲས་བུའི་ཐོབ་ཚུལ་མང་ཡང་བརྒྱུད་ལྡན་བླ་མ་དམ་པའི་ཐུགས་ཤེས་རབ ཆེན་པོའི་མཐུ་ལ་བརྟེན་ནས་རང་རིག་གཞི་མེད་རྩ་བྲལ་འཁོར་འདས་དག་མཉམ་གྱི་རོལ་པ། བློས་མ་བཅོས་པའི་བློ་འདས་ཆེན་པོ་དེ་ཀ་མངོན་དུ་གྱུར་པ་དེ་ཉིད་ཡིན་ནོ །དེ་ལས་གཞན་པའི་ཐོབ་བྱའི་འབྲས་བུ་མེད་པར་ཤེས་པར་གྱིས་ཤིག །མདོར་ན་དུས་དང་རྣམ་པ་ཀུན་ཏུ་རང་སེམས་བཟང་རྟོག་གིས་མ་བཅོས། ངན་རྟོག་གིས་མ་བསྒྱུར། རང་རིག་རང་གསལ་བློ་ལས་འདས་པའི་ངང་དེར་མ་ཡེངས་པར་བཞག་ན། སྣང་བ་སྤྲུལ་སྐུ། ཤར་བ་ལོངས་སྐུ གཞི་མེད་ཆོས་སྐུའི་དགོངས་པ་དང་ནམ་ཡང་འདུ་འབྲལ་མེད་པ་ཡིན་ནོ། །ཅེས་པ་འདི་ཡང་དད་ལྡན་མི དབང་གྲགས་རྒྱལ་གྱི་འདོད་དོན་གསལ་འདེབས་སུ་སྟག་སེང་ན་མདོ་ནས་སུ་ཁ་བཛྲ་གྱིས་སོ།། དགེའོ།། །། ༈ དཔལ་ཀུན་བཟང་ཀློང་ལ་ཕྱག་འཚལ་ལོ། །ངོ་བོ་གདོད་ནས་དག་པ་ཆོས་ཀྱི་སྐུ། །རང་བཞིན་སྐུ་དང་ཡེ་ཤེས་ལོངས་སྤྱོད་རྫོགས །ཐུགས་རྗེ་ཀུན་ཁྱབ་རང་གསལ་སྤྲུལ་པའི་སྐུ །སྐུ་གསུམ་མཉམ་ཉིད་ལས་འབྲེལ་རྩལ་ལ་འདུད། །བྱང་ཆུབ་བར་དུ་ རིགས་ཀྱི་བདག་པོར་བཞུགས །བདག་རྒྱུད་སྨིན་ཅིང་གྲོལ་བར་བྱིན་གྱིས་རློབས། །དེ་ལ་འདིར་ཞི་ལྷག་མཉམ་རྗེས་ཀྱི་དབྱེ་བས་གསལ་འདེབས་ཅུང་ཟད་བརྗོད་ན། ཐོག་མར་ལམ་གང་ཞིག་ཉམས་སུ་བླང་བར་བྱེད་ནའང་རང་གི་སྒོ་གསུམ་གྱི་བྱ་བ་བསྡམས་ནས་ཆོས་མ་ཡིན་པའི་ལོག་སྤྱོད་ཐམས་ཅད་རྒྱང་ནས་སྤངས་ཏེ། བྱམས་དང་སྙིང་རྗེ་བྱང་ཆུབ་ཀྱི་སེམས་ཀྱིས་རང་གི རྒྱུད་རྣམ་པར་དག་པར་སྦྱངས་ནས་འཁོར་བ་བློས་བཏང་སྟེ། བརྒྱུད་ལྡན་བླ་མ་དམ་པའི་བཀའ་བཞིན་བསྒྲུབ་ཅིང་། མི་མེད་དབེན་པའི་གནས་སུ་རང་གཅིག་པུར་སྟན་བདེ་བ་ལ་འདུག་ཅིང་ལུང་མ་བསྟན་གྱི་ལྟ་བ་ཐོམ་ཡོ་རེ་བ་དེ་ལ་བསྒོམ་དུ་མི་རེ་བར། ཐུན་བཞི་བླ་མའི་རྣལ་འབྱོར་བསྒོམ་ནས་དབང་བཞི་བླང་ཞིང་ཐུགས་ཡིད་བསྲེ། དེ་དུས་བླ་མ་ཡུལ་གཞན་དུ་མི་འཛིན་པར་རང་གི་ངོ་བོ་སྟོང་པ་དེ་ཀ་བླ་མའི་ཐུགས རང་བཞིན་གསལ་བའི་ཡེ་ཤེས་དེ་ཀ་བླ་མའི་ཡོན་ཏན རོལ་རྩལ་འགགས་མེད་ཀྱི་འཆར་སྒོ་དེ་ཀ་བླ་མའི་ཐུགས་རྗེར་ཤེས་པའི་ངང་ནས་སྒོ་གསུམ་བླ་མའི་སྐུ གསུང་ཐུགས་དང་དབྱེར་མེད་དུ་བསྲེས་ལ་རིག་པ་ཁ་ཡན་དུ་ཀློད་ལ་མཉམ་པར་བཞག་པའི་ཚེ་ན། ཡེ་གཞི་གདོད་མའི་གནས་ལུགས་སྤྲོས་པ་དང་བྲལ་བ་རྣམ་པར་ཐར་པའི་སྒོ་གསུམ་དང་ལྡན་པ ༄༅། །བློ་འདས་ཡེ་གྲོལ་གྱི་དགོངས་པ་མངོན་དུ་གྱུར་པ་དེ་ལ་རིག་པ་ཞེས་བརྗོད་པ་ཡིན་ནོ། །དེ་ལ་བློས་བཅས་བཅོས་དགག་སྒྲུབ་གང་ཡང་མི་བྱེད་པར་རང་བབས་སུ་བཞག་པའི་ཚེན་ཕྲ་རགས་ཀྱི་རྟོག་ཚོགས་ཐམས་ཅད་རང་སར་ཞི་ནས་འགྱུུ་དྲན་གྱི་རླབས་དང་བྲལ་ཞིང་སེམས་དྭངས་སང་ངེ་བར་གནས་པའི་ཆ་རང་རིག་རང་གསལ་དེ་ལ་ཞི་གནས་བརྗོད་པ་ཡིན། དེའི་གནས་ཆ་དེ་ཀ་རང་ངོ་ཤེས་པས་གསལ་རིག་འཛིན་པ་མེད་ཅིང་མངོན་དུ་གྱུར་པ་དེ་ལ་ལྷག་མཐོང་བརྗོད་པ་ཡིན་ནོ། །དེ་ཀ་མངོན་དུ་གྱུར་པའི་ངང་ལས་གང་ཤར་གང་སྣང་ཐམས་ཅད་ཤུགས་འབྱུང་གི་དྲན་པའི་རྩིས་ཟིན་བཞིན་ངང་ལས་མ་གཡོས་པར་གནས་པ་ལ་མཉམ་བཞག་བརྗོད་པ་ཡིན་ནོ། །དེའི་ངང་ལས་གང་ཤར་ལ་སྟོང་པས་རྒྱས་འདེབས་མ་ཡིན་པར་དེ་ཉིད་ངོ་ཤེས་བཞིན་པའི་ངང་དུ་གང་སྣང་ཐམས་ཅད་རང་གྲོལ་དུ་ཤེས་པ་ལ་རྗེས་ཐོབ་ཟེར་བ་ཡིན་ནོ། །མདོར་ན་གནས་ལུགས་ལྷུམས་ཞུགས་ཀྱི་དགོངས་པ་ཞེས་པ་རང་རིག་མངོན་དུ་གྱུར་པ་དེ་ལས་གཞན་ན་སངས་རྒྱས་ཀྱི་དགོངས་པ་ཞེས་བཟང་པོ་དང་དུ་བླང་རྒྱུ་མེད་པས། གཉིས་མེད་ཡེ་ཤེས་ཆེན་པོའི་དོན་རང་ངོ་སྤྲད་ཐོག་དེ་ཀར་བཅས་བཅོས་དགག་སྒྲུབ་མེད་པར་ཉམས་སུ་བླང་ན། ཞི་ལྷག་ཟུང་འབྲེལ་གྱི་ རྟོག་པ་ནང་ནས་འཆར་ཏེ། གང་ཤར་ལམ་ཁྱེར་གྱི་གནས་སུ་ཤེས། ལུས་ཀྱི་མཚམས་ཁང་ལ་སེམས་སྒྲུབ་པ་པོ་ཉོན་མོངས་གནས་སུ་དག་ནས་དབེན་པར་གནས། གནས་ལུགས་མ་བཅོས པའི་རྒྱུན་བསྐྱངས་པས་ཚེ་སྒྲུབ་མཐའ་རུ་ཕྱིན། བཟང་ངན་གྱི་རྣམ་རྟོག་གང་ཤར་ཡང་སྤང་བླང་དང་དགག་སྒྲུབ་མེད་པ དཔེར་ན་བྱིས་པས་ལྷ་ཁང་མཐོང་བའམ་ལྐུགས་པས་བུ་རམ་ཟོས་པ་ལྟར། གང་སྣང་ཡུལ་མེད་སྤྲོས་བྲལ་ཆེན་པོའི་ངང་ལས་མ་གཡོས་པར་ལ་བཟླ་ཞིང་། རིག་སྟོང་བློ་འདས་འོད་གསལ་ཆེན་པོའི་ཀློང་དུ་བཙན་ས་ཟིན་ཅིང་། དེས་སྣང་སྲིད་བླ་མའི་དཀྱིལ་འཁོར་དང་གང་སྣང་ཡེ་ཤེས་ཀྱི་རོལ་པར་ཤེས་ཤིང་བློ་འདས་ཡེ་གྲོལ་ཆེན་པོའི་ངང་དུ་སངས་རྒྱས་པར་འགྱུར་རོ། །ཅེས་པ་འདི་ཡང་དད་ལྡན་དགེ་བཙུན་དམ་པ་བོ་དྷིའི་མིང་གིས་དུས་རིང་མོ་ནས་ཡང་ཡང་བསྐུལ་ངོ་མི་ལྡོག་ཙམ་དུ་བདེ་བའི་རྡོ་རྗེས་གསང་དགོན་དབེན་ཁྲོད་ནས་བྲིས་པའོ།། དགེའོ།། །། ༈ མི་དབང་ས་སྐྱོང་སྲས་མོ་བདེ་ཆེན་མཚོ་ལ་སྤྲིང་ཡིག་ཏུ་གདམས་པ། སྔར་ཞུས་ལྟར་འཁོར་བའི་བྱ་བ་ལ་བདེ་སྡུག་ཅི་འགྱུར་ངེས་པ་མེད་པ་མཁྱེན་བཞིན་རྐྱེན་ངན་གྲོགས་འཆར་གྱི་ལམ་ཁྱེར་ལ་བློ་སྦྱོང་བ་གལ་ཆེ་བར་སྣང་ལགས། ཁྱད་པར་སེམས་ཀྱི་གསང་བའི་མྱུར་ ༄༅། །ལམ་དེ་བླ་མའི་མན་ངག་དང་རང་གི་བརྩོན་འགྲུས་ཀྱི་མཐུ་ལ་བརྟེན་ནས་གོ་མྱོང་རྟོགས་གསུམ་གྱི་སྒོ་ནས་ཆོས་ཉིད་ཀྱི་གནས་ལུགས་ཐུགས་སུ་ཆུབ་པར་མཛོད་དང་། ། ཅི་ཞིག་ནས་རིག་པ་རངབྱུང་གི་ཡེ་ཤེས་ཡིན་པས་གདིང་ཐོབ་ངེས་པ་ཡིན་མ་གཏོགས་གོ་ཙམ་གྱིས་རྟོགས་པར་མི་འགྱུར་བས། དེས་ན་རྒྱུན་དུ་རྐྱེན་བཟང་ངན་གང་བྱུང་ཡང་གནས་ལུགས་ཀྱི་དོན མ་བརྗེད་པ་ཙམ་བསྐྱང་ནུས་ན་རྟོགས་པ་ཁྱད་པར་ཅན་རྒྱུད་ལ་སྐྱེ་འོང་བ་ལམ་གྱི་ཁྱད་ཆོས་ཡིན་ནོ།།བླ་མའི་མནངག་གི་དོན་ཇི་བཞིན་པར་སེམས་ལ་གནས་པ་དེ་ལ་གོ་བ་ཟེར། གོ་བའི་དོན་དེ་རང་རྒྱུད་དང་འདྲེས་ངེས་བྱེད་པ་དེ་ལ་མྱོང་བ་ཟེར། མྱོང་བ་དེ་ཞེན་འཛིན་གཏད་སོ་དང་བྲལ་ཞིང་བློ་ཡིད་དཔྱོད་དང་མ་འདྲེས་པ་རིག་པ་སྨྲ་བསམ་བརྗོད་བྲལ་གྱི་ངང་མངོན་དུ་གྱུར་པ་ལ་རྟོགས་པ་ཟེར། རྟོགས་པ་དེ་རྩལ་རྫོགས་ནས་སྐུ་གསུམ་མཉམ་པ་ཉིད་ཀྱི་དབྱིངས་སུ་ལ་བཟླ་བ་ནི་གདིང་ཐོབ་པ་ཞེས་བསྒོམ་མེད་ཀྱི་གནས་ལུགས་ལ་རང་བྱན་ཆུད་པ་ཡིན་པས་ན། དེར་མ་ཐོན་བར་དུ་ཡུན་ཐུང་གྲངས་མང་གི་ཐབས་ལ་བརྟེན་ནས་ཉམས་ལེན་རེ་མ་འཆུག་དང་། འདི་ཉིད་ཕྲན་གྱི་སྙིང་གཏམ་སྙིང་གི་དྭངས་མ་ཡིན་པས་ཨ་ཐམ་རྒྱ༔ ཅེས་བདེ་བའི་རྡོ་རྗེས་ཕུལ།། བླ་མ་ལ་ཕྱག་ འཚལ་ལོ། །འདིར་སྐལ་བ་དང་ལྡན་པས་འོད་གསལ་རྫོགས་པ་ཆེན་པོའི་ལམ་ལ་མོས་པའི་གང་ཟག་རྣམས་ཀྱིས་ཐོག་མར་འཁོར་བ་ལ་བློ་ལྡོག་ནས་རང་རྒྱུད་ལེགས་པར་སྦྱངས ཁྱད་པར་བྱམས་སྙིང་རྗེ་བྱང་ཆུབ་སེམས་ཀྱིས་ཀུན་ནས་བསླངས་ཏེ་གནས་དབེན་པར་སྟན་བདེ་བ་ལ་འདུག་ཅིང་ཡིད་མོས་གུས་དྲག་པོའི་སྒོ་ནས་བླ་མ་རྡོ་རྗེ་འཛིན་པ་དང་། བརྒྱུད་པའི་བླ་མ་རྣམས་ལ་གསོལ་བ་བཏབ་ཅིང་བླ་མའི་རྣལ་འབྱོར་ཚིག་རྗེས་དོན་དྲན་དུ་བྱེད། དེ་ནས་དབང་བཞི་བླངས་ནས་བླ་མའི་ཐུགས་རྣམ་པར་མི་རྟོག་པའི་ཡེ་ཤེས་དང་རང་གི་སྒོ་གསུམ་ཐ་མི་དད་པའི་ངང་དུ་མཉམ་པར་བཞག་ནས། གཟུགས་སྣང་ཐམས་ཅད་བླ་མའི་སྐུའི་དཀྱིལ་འཁོར། སྒྲ་གྲགས་ཐམས་ཅད་བླ་མའི་གསུང་གི་དཀྱིལ་འཁོར། དྲན་རྟོག་ཐམས་ཅད་བླ་མའི་ཐུགས་ཀྱི་དཀྱིལ་འཁོར་དུ་ངོ་ཤེས་ངང་གནས་ཆེན་པོའི་དོན་རིག་ཅིང་། སོ་སོར་རྟོགས་པའི་ཤེས་རབ་ཀྱི་རྩལ་འབར་ནས་གང་ཤར་ལ་སྤང་བླང་