Tibetan
བཅས་བཅོས་མེད་པར་རིག་པ་ཟང་ཐལ་རྒྱ་ཡན་དུ་ལམ་དུ་ཁྱེར་བ་ཁོ་ན་གལ་ཆེ་བ་ཡིན་ནོ། །ཐུན་མཚམས་རྣམས་སུ་རང་གི་སྒོ་གསུམ་བླ་མའི་སྐུ་གསུང་ཐུགས་དང་གཉིས་སུ་མེད་པར་བསམ་ཞིང་། ཟ་ཉལ་འགྲོ་འདུག་ལ་སོགས་སྤྱོད་ལམ་ཐམས་ཅད་དུ་ད་ལྟའི་རང་གི་ཤེས་པ་ ༄༅། གྲ་མ་ཉམས་ཤིང་རང་རིག་རང་གསལ་འདི་ཀ་ལ་བསྒོམ་མཁན་གྱི་གཉེན་པོ་དང་ལྟ་བའི་ཞེན་པས་མ་བཅིངས་པར་རང་བབས་སུ་མངོན་གྱུར་དུ་འཇོག་པ་ནི་ངོ་བོ་སྟོང་པའི་ཡེ་ཤེས་དང་། རང་བཞིན་གསལ་བའི་ཡེ་ཤེས་དང་། ཐུགས་རྗེ་ཀུན་ཁྱབ་ཀྱི་ཡེ་ཤེས་རྣམས་ཐ་མི་དད་པ་རངབྱུང་རིག་པའི་ཡེ་ཤེས་ཚད་ལ་ཕེབས་ནས་ཚེ་འདིར་གདོད་མའི་ཆོས་སྐུའི་རྒྱལ་ས་ཟིན་པར་ངེས་སོ། །དེ་ལྟར་བརྒྱུད་ལྡན་བླ་མའི་བྱིན་རླབས་ལ། །བརྟེན་ནས་རང་བྱུང་ཡེ་ཤེས་མངོན་གྱུར་ཐབས །དད་ལྡན་སྐྱེས་བུ་འཇིགས་ཆོས་མཚན་འཆང་བས། །ནན་ཆེར་ཡང་ཡང་བསྐུལ་བ་མི་ལྡོག་ཙམ། །ཆོས་མེད་སྨྱོན་མ་དུས་ཀུན་ཞལ་རྫུན་མཁན །སུ་ཁ་བཛྲ་མིང་གིས་བྲིས་པའོ།། དགེའོ།། །། ༈ བླ་མ་ལ་ཕྱག་འཚལ་ལོ། །འོད་གསལ་རྡོ་རྗེ་ཐེག་པའི་མྱུར་ལམ་ལ་བརྟེན་ནས་ཚེ་ལུས་གཅིག་གི་རྣམ་མཁྱེན་གྱི་ལམ་ལ་བགྲོད་པར་འདོད་པ་དག་གིས། བརྒྱུད་ལྡན་བླ་མ་དམ་པའི་ཞལ་སྔ་ནས་ཐུན་མོང་དང་ཐུན་མིན་གྱི་ཆོས་ཐམས་ཅད་ཚུལ་བཞིན་ཉམས་འོག་ཏུ་ཆུད་པར་བྱས་ཏེ། རང་གི་སྒོ་གསུམ་གྱི་བྱ་བ་དྲན་བསམ་སྤྱོད་ལམ་ཐམས་ཅད་ཞི་དུལ་བག་ཡོད་ཀྱི་སྒོ་ནས་བླ་མའི་བཀའ་བཞིན་ཆོས་དང་མཐུན་པར་བསྒྲུབ་ཅིང་དམ་ཚིག་སྡོམ་པ་ལ་ སོགས་པར་མངོན་ལྐོག་དངགཡོ་སྒྱུ་མི་བྱེད་པར་ཚུལ་མཐུན་དུ་བསྒྲུབ་ཅིང་། ཁྱད་པར་དུ་མན་ངག་གི་དོན་རྣམས་གོ་ཡུལ་འུད་གོག་སྟོང་ལྟ་རུ་མ་གོལ་བར་གནས་ལུགས་རྫོགས་པ་ཆེན་པོའི་གཞིའི་བཞུགས་ཚུལ། ལམ་གྱི་གནས་ཚུལ་ལ་སོགས་པ་ཐམས་ཅད་དོན་ཕྱིན་ཅི་མ་ལོག་པར་རང་གིས་ཐོས་པ་དེ་ལ་གོ་བ་ཟེར། གོ་བ་དེ་དོན་དང་ཡ་བྲལ་དུ་མ་སོང་བར་རང་གི་རྒྱུད་ལ་འདྲེས་ངེས་པར་བྱས་ཏེ་ཉམས་སུ་ལེན་པ་དེ་ལ་མྱོང་བ་ཟེར། མྱོང་བ་དེ་དག་བླ་མའི་མན་ངག་དང་མཐུན་པར། ཡོད་པར་བློས་མི་བཅོས། མེདཔར་སེམས་ཀྱིས་མ་བསྒྱུར། སྟོང་ཉམས་ལུང་མ་བསྟན་དུ་མ་སོང་བར་རིག་སྟོང་བསམ་བརྗོད་དང་བྲལ་བའི་འོད་གསལ་སྐུ་གསུམ་མཉམ་ཉིད་ཀྱི་དབྱིངས་ཆེན་པོ་ཡེ་གྲོལ་འདུས་མ་བྱས་པའི་དབྱིངས་སུ་ལ་བཟླ་ཞིང་གསལ་སྟོང་མྱོང་ཞེན་མེད་པར་མཐོང་བ་དེ་ལ་རྟོགས་པ་ཟེར། རྟོགས་པ་དེའི་ངང་བརྟན་ཅིང་འགྱུར་བ་མེད་པའི་དོན་གཤིས་ཐོག་ལ་ཕེབས་ནས་གང་ཤར་གང་སྣང་ཐམས་ཅད་རིག་པ་ཡེ་ཤེས་ཆེན་པོའི་རོལ་རྩལ་ལས་མ་འདས་པའི་གདིང་རྙེད་ནས། རིག་པ་ཐད་ཀར་ཡན་པའི་ངང་དུ་རྟོག་ཚོགས་བཟང་ངན་བར་གསུམ་ཅི་ཤར་ཅི་སྣང་ཐམས་ཅད་དཔེར་ན་ཆུ་ལ་ཆུ་ཐིམ་པ་ལྟ་བུར་རང་གྲོལ་དུ་སོང་བ་ནི་མངོན་གྱུར་ངང་གནས་ཀྱི་རིག་པ་ ༄༅། །ཞེས་བློ་འདས་ཡེ་གྲོལ་ཟབ་མོའི་དགོངས་པའི་གནད་རྟོགས་པ་ཡིན་ནོ། །དེ་ལྟར་གོ་མྱོང་རྟོགས་གསུམ་གྱི་གནད་དང་ལྡན་པའི་ངང་ནས་ལྟ་བས་ཐག་བཅད། སྒོམ་པའི་ངང་བསྐྱངས། སྤྱོད་པ་ལ་དོར་ནས་འོད་གསལ་ཉིན་མཚན་བར་མེད་དུ་བསྐྱངས་པས་ན་ཀུན་བཟང་གདོད་མ་གཞིའི་རང་ཞལ་མངོན་དུ་གྱུར་ཅིང་སྒྲོལ་བའི་ས་ལ་ཕེབས་པ་ཡིན་ནོ། །དེ་ལྟར་མ་རྟོགས་ཤིང་གོ་བ་ཙམ་ལ་གདིང་བཅས་ནས་སེམས་སྟོང་ཉམས་སུ་གོལ སྣང་བ་ཡུལ་གྱི་རྗེས་སུ་འབྲངས་ཏེ་གནས་ལུགས་རྫོགས་པ་ཆེན་པོའི་དགོངས་དོན་ལ་བློ་ཡིད་དཔྱོད་ཀྱིས་བཅོས་ཤིང་དྲན་འཛིན་གྱིས་ཟིན་པའི་རྟོག་པ་ཐམས་ཅད་ཡེ་ཤེས་ཡིན་པར་འདོད དྲན་འཛིན་དང་བྲལ་བར་སྣང་ཚེ་རྣམ་པར་རྟོག་པ་ལུང་མ་བསྟན་དུ་འདོད་པ་སོགས་ནི་རིག་པ་ངོ་འཕྲོད་པ་ལྟ་ཞོབ །འགྱུ་བ་རང་གྲོལ་གྱི་གནད་ཙམ་ཡང་གོ་བ་མ་སོང་བས་ན ད་དུང་སྣང་སེམས་གཉིས་པོའི་ལ་ཤན་གྱི་མཚམས་སུ་ལུས་པས། དཔེར་ན་ཆུ་རང་གྲོལ་དུ་ཡོད་པ་འཁྱག་པའི་སྦུབས་སུ་ཆུད་པ་དང་འདྲ་མཚུངས་པ་ཡིན་པས། དེས་ན་རང་གི་ཉམས་ལེན་ལ་སྒྲོ་འདོགས་ཆོད་པ་གལ་ཆེའོ། །རྫོགས་ཆེན་རང་ལམ་གྱི་བཞེད་ཚུལ་ལ་གོལ་ཤོར་ནོར་གསུམ་སོགས་ཀྱི་ལམ་སྐྱོན་དབེན་ཀྱང་། གང་ ཟག་གི་བློའི་རིམ་པའི་དབང་གིས་ལམ་ཐ་དད་དུ་མར་སྣང་ཡང་། དོན་ལ་རང་གི་རིག་པའི་གནས་ལུགས་ཇི་བཞིན་པར་མཐོང་བའི་ཚེ་ན། བསྒོམ་ཞེས་ཆེད་དུ་ཚོལ་བའང་མ་ཡིན མ་བསྒོམ་ལུང་མ་བསྟན་དུ་སོང་བ་ཡང་མ་ཡིན་པར་བྱ་རྩོལ་གཉིས་མེད་ཀྱི་ཡེ་ཤེས་ཆེན་པོ་ཁྱབ་བརྡལ་སྤྲོས་པ་དང་བྲལ་བའི་ངང་དུ་འབྱམས་ཀླས་པ་ནི་མཉམ་བཞག་དང་། རྗེས་ཐོབ་ཙམ་དུ་ལྟ་བའི་སྟངས་མ་ཤོར་བ་ནམ་མཁའ་མཐའ་དབུས་བྲལ་བ་ལྟ་བུ་དང་། བསྒོམ་པའི་ངང་མ་བོར་བ་རྒྱ་མཚོ་དྭངས་གསལ་གྱི་ཆ་དང་འགྲོགས་པ་ལྟ་བུ་དང་། སྤྱོད་པ་བག་མེད་དུ་མ་ཤོར་བར་འོད་གསལ་ཉིན་མཚན་འཁོར་ཡུག་ཏུ་འདྲེས་པར་བྱ་ཞིང་རིག་པ་ཁྱབ་བརྡལ་དུ་འཇོག །ཤེས་པ་བཟོ་མེད་དུ་སྐྱོངས། དྲན་རྟོག་ཆུ་ལ་རི་མོ་བྲིས་པ་བཞིན་དུ་རང་གྲོལ་དུ་བཞག་པས། སྐྱེ་མེད་ཀྱི་ཉམས་ཆུ་བོ་ཆེན་པོའི་རྒྱུན་ལྟར་ཆད་མེད་དུ་ངང་གིས་འབྱུང་བ་ཡིན་ནོ །དེ་ལྟར་ཚུལ་བཞིན་ཉམས་སུ་བླངས་པའི་མཐར་གཞི་འབྲས་གཉིས་མེད་ཀྱི་རིག་པར་བརྟན་པ་ཐོབ་ནས་ཀུན་བཟང་ཆོས་ཀྱི་སྐུའི་རང་ཞལ་མངོན་དུ་གྱུར་ཅིང་ནང་གསལ་གཞོན་ནུ་བུམ་སྐུར་གྲོལ་བར་ངེས་སོ། །ཅེས་པ་འདི་ཡང་རང་སློབ་དད་དམ་འཆང་བ་ཤཱཀྱའི་དགེ་བཙུན་དམ་པ་སེམས་དཔའ་ནས་འདི་ལྟར་དགོས་ཞེས་ནན་ཆེར་ ༄༅། །བསྐུལ་ངོ་མི་ལྡོག་ཙམ་དུ་བདེ་བའི་མིང་གིས་བྲིས་པའོ།། དགེའོ།། །། སེམས་མེད་རྒན་མོའི་བསམ་ཚོད་ལ་སྦྱར་ན། གཉུག་མའི་ཡེ་ཤེས་འཁྲུལ་མེད་ཞིག མངོན་དུ་གྱུར་ན་དེའི་ངང་ལ་ཤེས་པ་བཟོ་བཅོས་མེད་པར་ལྷན་ནེར་བཞག་ཚེ། གནས་པ་དེ་ལས་ཅུང་ཟད་འཕྲོ་བའི་རྣམ་པ་ཤར་ཡང་རང་སར་དྭངས་པ་རྒྱ་མཚོར་རླབས་ཐིམ་པ་ལྟ་བུ་དང་། སྣང་བ་སྣ་ཚོགས་སྣང་ཡང་ཞེན་མེད་དུ་རང་གྲོལ་ཤེས་པ་དུམ་བུར་འཕྲོ་བ་ལྟར་སྣང་ཡང་ཆུ་ལ་རལ་གྲིས་བཏབ་པ་ལྟར་ཕན་གནོད་ཀྱི་ཡུལ་བྲལ། སྣང་ཙམ་ཉིད་ནས་ཆོས་ཉིད་སྟོང་པའི་དབྱིངས་ལས་མ འདས་པ་ཆར་ཆུ་དང་འདྲེས་པ་ལྟ་བུ་དབྱེ་བསལ་མེད་ཅིང་། མདོར་ན་གང་སྣང་གང་ཤར་ཐམས་ཅད་ག་པུར་ལ་རླུང་གིས་རྒྱས་ཐེབས་པ་ལྟ་བུར་རིག་པ་ཆོས་ཉིད་ཀྱི་ངང་ལས་འགྱུར་བ་མེད་པ་ཁྱབ་བརྡལ་ནམ་མཁའི་ཁོར་ཡུག་བློས་བྱ་རྩོལ་ལས་བྲལ་བ་ལྟར་སྣང་བ་ལས། མཉམ་བཞག་ཅེས་པ་གདན་བཏིང་བ་ལྟ་བུའི་ཐོག་ལ རིག་ཐོག་ཅེས་མགྲོན་པོ་ཞིག་ཐོན་པ་ལྟ་བུ་གཟུགས་ཅན་དང་། ཡང་རྗེས་ཐོབ་རྐུན་པོ་ལྟར་གར་སོང་རྗེས་གཅོད་བྱེད་དགོས་པའི་གཉུག་སེམས་ཞིག་ནི་བདག་གིས་ཞག་གྲངས་དུ་མར་བཙལ་ཡང་མ་རྙེད་པས། ད་ནི་རིག་པ་ཡིད་ཀྱིས་མཐོང་བ་ཕར་ཞོག །སྣང་ ཡུལ་ཐམས་ཅད་ཀྱང་མེ་ལོང་ནང་གི་གཟུགས་བརྙན་དང་རི་མོའི་མར་མེ་ལྟ་བུར་སོང་འདུག །ཧ་ཧ་ཧ། ཞེས་པའང་ཉམས་ལེན་པ་འགའ་རེས་བགྲོ་གླེང་བྱེད་པ་ཐོས་ཚེ། རང་གི་སེམས་ལ ཡིད་དཔྱོད་ཀྱི་བྱ་ར་བྱས་ཀྱང་ཟིན་མེད་ཀྱི་རྟོག་པ་མ་ཆོད་ནས་ཡིག་རིས་སུ་བདེ་བའི་རྡོ་རྗེས་རྫུན་ཚིག་བྲིས་པའོ།། དགེའོ།། །། ༈ ཡང་རྩོལ་བྲལ་གྱི་རིག་པ་ངོ་འཕྲོད་ཕན་ཆད་མ་བཅོས་ངང་བཞག་ཆེན་པོར་ངོ་བོས་ལམ་བྱེད་པ་ཙམ་ལས་རེས་འཇོག་གི་ལམ་ཚོལ་ཨེ་དགོས། གལ་ཏེ་མཉམ་རྗེས་ཀྱི་མིང་འདོགས་དགོས་ན། མཉམ་བཞག་ནམ་མཁའ་ལྟ་བུ་ཕྱོགས་ལྷུང་དང་བྲལ་བ་སྐྱེ་འགགས་བཅིངས་གྲོལ་ཡོད་མེད་འགྲོ་འོང་འཁོར་འདས་སོགས་སེམས་ཀྱི་སྤུན་པ་ཙམ་ཡང་མེད་ཅིང་། ཁྱབ་བརྡལ་སྤྲོས་པ་དང་བྲལ་བ་དག་མཉམ་ཆོས་སྐུ་ཆེན་པོར་འབྱམས་ཀླས་ཤིང་། རྗེས་ཐོབ་ཏུ་ལྕགས་ཁམས་གསེར་འགྱུར་གྱི་རྩིས་ཐེབས་པ་ལྟར ཚོགས་དྲུག་རང་གྲོལ་གྱི་མན་ངག་རིག་པ་ཐུག་ཕྲད་ཀྱི་གདམས་པའི་གནད་ལ་བརྟེན་ནས། ཤར་ཆ་ཐམས་ཅད་རིག་པ་རང་གི ཆོས་ཉིད་དུ་རང་ཤར་རང་གྲོལ་བ་མ་གཏོགས། རིག་པ་ངོ་འཕྲོད་ཡོད་ཟེར་ཡང་ད་དུང་མཉམ་རྗེས་བློ་ཡིས་འཇོག་དགོས་པ་ནི། དཔེར་ན་མཉམ་བཞག་གི་རྟོག་པ་སངས་རྒྱས་དང་རྗེས་ ༄༅། །ཐོབ་ཀྱི་རྟོག་པ་འཁྲུལ་པར་མཐོང་ཞིང་གཉེན་པོར་ཞེན་ནས་རེ་དོགས་ཀྱི་སྒྲོག་ཏུ་བཅིང་བ་ནི། དཔེར་ན་མིག་ཡོད་ཀྱང་གཟུགས་སྣང་མ་མཐོང་ཟེར་བའི་ཕྱོགས་སུ་ངེས པས། དེས་ན་མིག་སྐྱོན་སེལ་བ་ལ་སྨན་དཔྱད་དགོས་པ་ལྟར་གནས་ལུགས་རྫོགས་པ་ཆེན་པོའི་དགོངས་པ་ཇི་བཞིན་པ་མངོན་དུ་གྱུར་པའི་ཐབས་སེམས་དང་རིག་པའི་ཤན་འབྱེད་ཀྱི་མན་ངག་ཐུགས་སུ་ཆུད་པར་བྱས་ནས། བསྒོམ་འཛིན་གྱི་བློ་ཡི་ལྕགས་སྒྲོག་དེ་བཀྲོལ་ནས་བསྒོམ་མེད་བློ་འདས་ཡེ་གྲོལ་ཆེན་པོར་ལ་བཟླ་བ་ནི། སྐྱབས་རྗེ་གཏེར་ཆེན་ཡབ་སྲས་ཀྱི་དགོངས་པའི་ཕྱོགས་ཙམ་ཨེ་ཡིན་སྙམ དེ་མིན་རང་རེ་རྣམས་ཀྱི་ཉམས་ལེན་ལ་དཔྱད་ན།ཀུན་གཞི་དང་ཡིད་དྭངས་གསལ་གྱི་ཆ་ལ་ངོ་བོར་འདོད་ཅིང་། ཡིད་ཤེས་ཀྱིས་སེམས་ཀྱི་དྭངས་ཚོལ་བ་ལ་མཉམ་བཞག་གི་རིག་པ་དང་། ཡིད་ཤེས་ཕྲ་བས་རྟོག་པ་བཟང་ངན་ཉེ་བར་ལེན་པ་ལ་རྗེས་ཐོབ་ཀྱི་རིག་པར་རློམས་པ་ནི་ནོར་བུ་དང་མཆིང་བུ་ནོར་བའི་དཔེ་བཞིན་རང་གིས་རང་བསླུས་ནས། བདུད་མོ་སྙེམས་བྱེད་མ་དང་། བདུད་པོ་ལག་རིང་གཉིས་ཀྱི་དབང་དུ་སོང་ནས་གོལ་ཤོར་གྱི་འཕྲང་ལ་ཐུག་ངེས་ཡིན་པས་ན་གཉིས་འཛིན་འཁྲུལ་པའི་བློ་ལ་མ་ཞེན་པར་བླ་མའི་མན་ངག་ཐུགས་སུ་ཆུད་པར་ བྱས་ནས་ཐག་གཅིག་ཐོག་ཏུ་བཅད། ས་རང་ས་ནས་བཟུང་། གདངས་རང་གྲོལ་དུ་སྐྱོང་། ངང་མངོན་གྱུར་དུ་འཇོག་པ་ལས། འཕྲལ་དང་སླད་ཀྱིས་བསྒོམ་བྱ་སྒོམ་བྱེད་མི་དགོས་པ མཁྱེན་བཞིན་དེ་གར་བློ་ཐག་ངེས་པར་ཆོད་ན་ཁྲེགས་ཆོད་ཅེས་པའི་དོན་དེ་ཡིན་པར་སྣང་བློ་ཚབ་ཚུབ་བཅོས་མ་བྱས་པ་ལ་ཟེར་ནི་ཨེ་ཡིན་མི་ཤེས ཧ་ཧ་ཧ། ཞེས་བདེ་བའི་རྡོ་རྗེས་འཁྲུལ འབྱམས་མཉམ་བཞག་ལས་རྗེས་ཐོབ་རྫུན་རིས་སུ་བྲིས་པའོ།། །། ༈ དེ་ལ་འདིར་སྔོན་གྱི་སྨོན་ལམ་དག་པས་མཚམས་སྦྱར་ནས་བླ་མ་དམ་པ་མཚན་ཉིད་དང་ལྡན་པར་མཇལ་བའི་སྐབས། བློ་རྩེ་གཅིགགིས་དད་གུས་མོས་པ་དྲག་པོས་ཡིད་ཁྱོད་ཤེས་ཀྱི་བློ་ཁེལ་བས་གསོལ་བ་བཏབ་པ་དང་། ཁྱད་པར་ཐུན་བཞིར་བླ་མའི་རྣལ་འབྱོར་བསྒོམས་ནས། དབང་བཞི་བླང་བའི་དམིགས པས་རང་རྒྱུད་ལེགས་པར་སྦྱངས་ནས་རྗེས་སུ་ཐུགས་ཡིད་བསྲེ་ཞིང་རང་སེམས་དེ་ཀ་མ་བཅོས་མ་བསྒྱུར་བར་བློ་འདས་འོད་གསལ་གྱི་ངང་དེཀ་བསྐྱངས་པས་ན་གོལ་ཤོར་ནོར་གསུམ་གྱི་འཕྲང་ཐམས་ཅད་ངང་གིས་གྲོལ་བ་ཡིན་ནོ །ཇི་ལྟར་གྲོལ་བ་ཡིན་སྙམ་ན། སེམས་ཡེ་ནས་གཞི་མེད་རྩ་བྲལ་མཐའ་བརྒྱད་སྤྲོས་བྲལ་བློ་འདས་ཡེ་སྟོང་ཆེན་པོར་ཤེས་ནས་ཐེག་པ་འོག་མ་ལྟར་ཡོད་མེད་ ༄༅། །དགག་སྒྲུབ་ཀྱི་བློ་དང་མ་བྲལ་བ་ལྟ་བུ་མ་ཡིན་པས་ནོར་ས་མེད་དོ། །དོན་དམ་སྟོང་ཉིད་ཀྱི་ངོ་བོ་ཇི་བཞིན་པར་མཐོང་ནས་རིག་པ་གདོད་ནས་རྣམ་པར་དག་པ་ཀ་དག་ཕྱོགས་ཡན་ཆེན་པོའི་གནད་གོ་བས་སྟོང་པས་རྒྱས་འདེབས་ཀྱི་ལྷན་པོ་མ་དགོས་པས་ཤོར་ས་མེད་དོ། །གནས་ལུགས་རང་ངོ་མཐོང་ནས་རིག་པའི་འཆར་སྒོ་འགགས་མེད་དུ་གསལ་ཞིང་འཁྲུལ་པ་དང་བྲལ་བ་རྟོག་མེད་ནམ་མཁའ་ལྟ་བུར་ཤེས་པས་ན་གོལ་ས་མེད་དོ། །དེའི་ཕྱིར་ན་རང་གི་ངོ་བོ་ཇི་བཞིན་པར་ངོ་འཕྲོད་རྗེས བཟང་ངན་གང་གིས་ཀྱང་བཅོས་བསླད་མི་བྱེད་པར་རང་བབས་སུ་བཞག་ན་གཉིས་མེད་ཡེ་ཤེས་ཆེན་པོའི་དོན་རང་ཐོག་ཏུ་མྱུར་དུ་ཕེབས་པ་ཡིན་ནོ། །ཞེས་པ་འདིའང་དགེ་བཙུན་དམ་པ་བྷ་དྲའི་མིང་གིས་བསྐུལ་ངོ་མི་ལྡོག་ཙམ་དུ་འདུ་ཤེས་གསུམ་པ་སུ་ཁ་བཛྲ་གྱིས་རྫུན་རིས་སུ་བྲིས་པའོ།། །། ༈ དུས་གསུམ་སངས་རྒྱས་སྐུ་དངོས་འཆང་། །ཆོས་རྗེ་པདྨ་ལས་འབྲེལ་ལ། །གསོལ་བ་འདེབས་སོ་ཐུགས་རྗེས་ཟུངས། །བདེ་ཆེན་འཁོར་ལོའི་རྒྱན་དུ་བཞུགས། །ཨེ་མ་གསོན་དང་སྐལ་ལྡན་བུ །ཚེ་སྔོན་ལས་འཕྲོ་བཟང་པོའི་མཐུས། །ད་རེས་དལ་རྟེན་མི་ལུས་ཐོབ། །སྙིང་པོ་ལྷ་ཆོས་བསྒྲུབ་ལ་རེམ །ཚེ་འདི་རྨི་ལམ་གནས་ སྐབས་ཙམ། །ཡུན་རིང་འདུག་པའི་ལོང་མེད་པས །བློ་སྣ་མང་པོས་དོན་ཀུན་འཆོར། །ཆགས་ཞེན་འཁྲི་བ་ཆོད་ཐབས་རེམ །འདུ་ལོང་མང་པོའི་ཁ་འཛིན་འདི། །རང་གཞན་དུག་ལྔ་འཕེལ་བའི་རྒྱུ། །མི་ངོ་ལོན་པའི་དུས་མེད་པས། །རང་དོན་ནང་ནས་མ་འཆོར་རེམ །དག་སྣང་མེད་པའི་གནས་བསྐོར་དང་། །ཉོན་མོངས་དབང་སོང་བྱ་བྲལ་བ། །ཀུན་གྱིས་གླེང་བརྗོད་གནས་ཡིན་པས །ཆགས་སྡང་ཉོན་མོངས་འདུལ་ཐབས་རེམ །སྙིགས་དུས་མི་ཡི་བསམ་སྤྱོད་ནི། །ཕར་ལ་བྱམས་ཀྱང་ཚུར་གཤེ་བས། །ཆོས་བརྒྱད་འདུན་མ་འགྲུབ་དཀའ་བས། །ལྷ་ཆོས་རྣམ་དག་བསྒྲུབ་ཐབས་རེམ །འཁོར་བའི་ཆོས་ལ་བློ་གཏོད་ཀྱང་། །སྙིང་པོ་མེད་པ་ཆུ་ཤིང་འདྲ། །སྙོམས་ལས་ངང་དུ་མི་ཚེ་ཟད། །ད་ནི་བློ་སྣ་མི་རིང་བར། །དབེན་རིར་སྒྲུབ་ཚུགས་ཟིན་ཐབས་རེམ། །ངར་འཛིན་ཞེན་པ་མ་ཆོད་བར། །གཏན་བདེའི་འབྲས་བུ་ཐོབ་མི་སྲིད། །དེ་ཕྱིར་རང་བྱུང་རིག་པའི་བབས། །གནས་ལུགས་ཚུལ་བཞིན་ཉམས་སུ་ལོངས། །ཡེ་གཞི་གདོད་ནས་རྣམ་པར་དག །སྤྲོས་བྲལ་རྣམ་ཐར་གསུམ་དང་ལྡན། །སྐུ་གསུམ་མཉམ་ཉིད་རྫོགས་པའི་དབྱིངས །རང་བྱུང་རིག་པ་དེ་གའོ། །མངོན་གྱུར་ངང་དུ་རང་ ༄༅། །བབས་ཞོག །དེ་ནི་ལྟ་བའི་གནད་གཅིག་ཡིན །སྟོང་གསལ་འགགས་མེད་རྗེན་པའི་གཤིས །འཛིན་མེད་རང་གྲོལ་ཆེན་པོའི་ཀློང་། །རང་སྣང་འོད་གསལ་ཕྱོགས་ལྷུང་བྲལ། སྤང་བླང་བྱ་རྩོལ་མེད་པ་ཡི །རང་ཤར་རང་གྲོལ་གནད་རྟོགས་པ །འདི་ནི་སྒོམ་པའི་གནད་གཅིག་ཡིན །རང་རིག་ཆོས་སྐུ་དྲི་མེད་ལ། །བླང་དོར་དགགས་སྒྲུབ ཡུལ་ལས་འདས། །ཡིད་དཔྱོད་བློ་ཡིས་བཅོས་མ་གཞུག །མཉམ་རྗེས་དབྱེར་མེད་འོད་གསལ་ངང་། །རོ་གཅིག་ཆོས་དབྱིངས་བརྡལ་ཁྱབ་མཁར། །ཡེངས་འཁྲུལ་མེད་པར་ལ་བཟླའོ། །དེ་ལ་སྤྱོད་པའི་གནད་གཅིག་ཡོད། །དེ་ལྟར་གནད་གསུམ་ལྡན་པ་ཡིས །གསང་སྔགས་ལས་ཀྱང་ཆེས་གསང་བ། །མྱུར་ལམ་འཕོ་ཆེན་དྭངས་མའི་དབྱིངས། །ཚེ་འདིར་མངོན་གྱུར་བསྒྲུབ་པའི་ཐབས། །སྒོ་ཡུལ་རླུང་རིག་ལ་བརྟེན་ནས །མི་འགུལ་གསུམ་ལ་གཞི་བཅས་ཏེ། །ཉམས་ལེན་རྩེ་གཅིག་གནད་དྲིལ་ན །སྒྲོན་མ་བཞི་ཡི་གསང་ལམ་ནས། ཡིད་དཔྱོད་བྲལ་བའི་ཆོས་ཉིད་ཀྱི། །འོད་གསལ་སྣང་བ་མངོན་སུམ་དུ། །ཤེས་རབ་ཡེ་ཤེས་མིག་གིས་མཐོང་། །ཕྱི་ནང་སྣོད་བཅུད་འོད་གསལ་གྱི །སྣང་ཤེས་ཉམས་རྟོགས་གོང་འཕེལ་ ཏེ། །དོན་གྱི་ཞི་གནས་བརྟན་ཐོབ་འགྱུར། །སྣོད་བཅུད་དབྱིངས་ཐིག་འོད་ལྔར་འཕོས། །གཟུང་འཛིན་བག་ཆགས་དབྱིངས་སུ་དག །རིག་པ་སྐུ་གསུམ་དབྱིངས་སུ་བརྡལ། །སྒོ་གསུམ རྟོགས་པ་ཚད་ལ་ཕེབས། །ཕྱི་ནང་འོད་གསལ་ཆེན་པོར་སྨིན། །སྣང་སྲིད་ཞིང་དང་སྐུ་རུ་རྫོགས། །མངོན་ཤེས་ལྔ་སོགས་རྫུ་འཕྲུལ་ལྡན །སྐྱེ་འཇུག་གཉིས་ལ་དབང་འབྱོར་ནས། །དོན་གྱི་འབྲས་བུའི་སངས་རྒྱས་ཤོག །དེའི་མཐར་ཆོས་ཉིད་འཕེལ་རྫོགས་ནས། །ཟད་པའི་ས་ལ་རབ་བརྒལ་ཏེ །མི་འཇིགས་གདིང་བཞིའི་དོན་མངོན་བརྙེས །རང་སྣང་ཡེ་ཤེས་རང་དབང་ཐོབ། །བློ་འདས་ཆོས་སྐུའི་གཏན་སྲིད་ཟིན། །ཤེས་སྒྲིབ་བག་ཆགས་དབྱིངས་སུ་སངས །འཕོ་ཆེན་དྭངས་མའི་སྐུ་རུ་སྨིན། །མ་དག་འཁྲུལ་པའི་ཆོས་རྣམས་ཀུན །རྨི་ལམ་དབྱིངས་སུ་སད་པ་བཞིན། །ནང་དབྱིངས་གདོད་མའི་ས་རུ་གྲོལ །ཡང་དག་རྫོགས་པའི་སངས་རྒྱས་ཐོབ །དེ་ལྟར་ཚུལ་བཞིན་གནད་ལྡན་ན། །དོན་གཉིས་འབྲས་བུ་ཚེ་འདིར་ཐོབ །གོ་དོན ཚིག་གི་སྙིང་པོ་འདི། །དཔེ་རུལ་ཉར་ཚག་མི་བྱེད་པར། །ཁ་མཁས་བརྗོད་ཚིག་མི་བདེ་ཡང་། །རང་གི་རྒྱུད་ལ་འབྱོར་ཐབས་རེམ །སྙན་སྙན་སྡེབས་སྦྱོར་ངས་མི་ཤེས །ཆོས་དང་ 八༄༅། །མཐུན་པའི་བསླབ་བྱ་ཡིན །བརྒྱུད་ལྡན་བླ་མའི་མན་ངག་གོ། །དོན་གྱི་གནད་གཅིག་འདི་རུ་འདུས །ཡལ་བར་མ་དོར་ཉམས་ལེན་མཛོད། །ཅེས་པ་འདི་ཡང རང་སློབ་དམ་པ་དད་དམ་འཆང་བ་ལྷ་མིང་འཛིན་པས་དབང་མདོག་ཕྲེང་བ་བཅས་དུས་རིང་མོ་ནས་འདི་ལྟར་དགོས་ཞེས་ཡང་ཡང་བསྐུལ་ངོར་མི་ལྡོག་ཙམ་དུ་སྙོམས་ལས་ཀུ་སུ་ལུ་པ་བདེ་སྐྱོང་དབང་མོའི་ཡིད་ཀྱི་མཚོ་ལས་ཤར་བ་རྫུན་རིས་སུ་བྲིས་པའོ །དགེའོ།། །། 77UE TI1397-177 TI1397-178 ༄༅། །བསྐལ་པ་ཤིང་བྱ་ལོ་པའི་ཟླ་བ་བཅུ་པའི་ཚེས་བཅུ་དགུའི་དགུང་ཐུན་སྐབས་སུ་ཐུན་ཆུང་ཞིག་གི་སྣང་བ་ལ་ཐིག་ལེ་སྔོན་པོ་ཤར་བའི་ཀློང་དུ༔ ཡུལ་ཡངས་པ་ཅན་ཡིད་དུ འོང་བ་མེ་ཏོག་སྣ་ཚོགས་དང་བྱ་རིགས་མི་འདྲ་བ་མང་པོས་གུ་རུ་ཧ་རི་ནི་སའི་སྒྲ་དི་རི་རི་སྒྲོགས་ནས་ཐམས་ཅད་དགའ་བའི་ཉམས་ཅན་ཤ་སྟག་གནས་པ་དང་༔ དེའི་དབུས་སུ་འཇའ་འོད་ཀྱི་གུར་ཁང་མཛེས་ཤིང་ཡིད་དུ་འོང་བའི་ནང་དུ་བདག་གི་བླ་མ་པདྨ་ལས་འབྲེལ་རྩལ་དང་༔ བདུད་འཇོམས་རྡོ་རྗེ༔ ངོ་མི་ཤེས་པའི་བླ་མ་གྲུབ་ཐོབ་མང་པོ་དང་༔ མཁའ་འགྲོ་བདེ་བའི་གོ་ཆ དབྱངས་ཅན་མ། དང་༔ རལ་གྲི་འབར་མ་༔ ཀ་ལ་སིདྡྷི། གསལ་བྱེད་དབང་མོ་ཤེལ་དཀར་མཚོ། རྣམས་ཀྱི་གཙོས་མཁའ་འགྲོ་མང་པོ་དང་༔ གཞན་ཡང་དཔའ་བོ་དཔའ་མོའི་ཚོགས་ཀྱིས བཀའ་འདུས་རྒྱ་མཚོའི་དཀྱིལ་འཁོར་ཞལ་ཕྱེས་ནས་བདུད་རྩི་སྨན་སྒྲུབ་མཛད་ཀྱིན་འདུག་པས༔ བདག་དེར་ལྷགས་ནས་ཡིད་བཞིན་ནོར་བུའི་ཕྱག་ལ་འཇུས་ནས་ཤིན་ཏུ་གདུང་སེམས་དྲག་པོས་སྨྲེ་སྔགས་འདོན་པས་དཔའ་བོ་ཆེན་པོས་ཞལ་འཛུམ་པ་མཛད་ནས་ཐུགས་བརྩེ་བ་ཆེན་པོས་འདི་སྐད་གསུངས༔ ཨེ་མ་རིགས་ལྡན་བརྩེ་བའི་གྲོགས༔ ཐུགས་ངལ་མ་མཛད་ཐུགས་རྒྱ་ཀློད་༔ ངེད་ཅག་དཔའ་བོ་མཁའ་འགྲོའི་གྲོང་༔ གཞན་ན་མེད་དོ་རང་སྣང་ཉིད༔ ཆོས་ཉིད་གཅིག་གི་ཆོ་འཕྲུལ་ལས༔ ཐ་དད་མེད་དོ་རིགས་ལྡན་མ༔ ཚོགས་ཀྱི་གྲལ་དུ་བཞུགས་དང་སྤྲོ༔ གསུངས་ནས་ཐུགས་བརྩེ་བརྩེ་མཛད་ནས་ཆང་ཀ་པཱ་ལ་གང་གནང་ནས་སྐུས་གར་བསྒྱུར་ཏེ༔ ཧེ་རུ་ཀ་རུས་པའི་རྒྱན་དྲུག་གིས་སྤྲས་པ༔ ཕྱག་གཉིས་རྡོར་དྲིལ་བསྣོལ་ཐབས་སུ་འཛིན་ཅིང་སྤྱན བར་སྣང་ལ་ཧ་རེ་གཟིགས་ནས་འདི་སྐད་གསུངས༔ ཧཱུྃ་ཧྲཱིཿ མི་འགྱུར་མི་ཤིགས་རྡོ་རྗེའི་སྐུ༔ དྭངས་གསལ་འོད་ཀྱི་ཕུང་པོར་ལྡན༔ སྐལ་ལྡན་ཁྱོད་ལ་དབང་བསྐུར་རོ༔ འགྱུར་མེད་སྐུ་ཡི་དབང་ཐོབ་ཤོག༔ དྷརྨ་ཀཱ་ཡ་ཨ་བྷི་ཥིཉྩ་ཨོཾ༔ ཧཱུྃ་ཧྲཱིཿ བརྗོད་བྲལ་སྔགས་ཀྱི་རང་གདངས་གསུང་༔ སྐལ་ལྡན་ཁྱོད་ལ་དབང་བསྐུར་རོ༔ བདག་གི་གསུང་དང་གཉིས་མེད་པའི༔ གསུང་གསང་མི་ཟད་དབང་ཐོབ་ཤོག༔ དྷརྨ་ཝཱཀྐ་ཨ་བྷི་ཥིཉྩ་ཨ༔ ཧཱུྃ་ཧྲཱིཿ ཀ་དག་རང་བྱུང་ཆོས་ཀྱི་སྐུ༔ གཉིས་