Tibetan
ཅེས་པ་འདིའང་དད་ལྡན་འཇིགས་མེད་མཆོག་གི་བཞེད་སྐོང་དུ་འཁོར་འཁྱམས་པ་སྤྲང་མོ་ཏཱ་རེའི་མིང་གིས་བྲིས་པའོ །དགེའོ།། །། རྒྱལ་ཀུན་འདུས་པ་ཨོ་རྒྱན་པདྨ་ཡི །ཐུགས་ཀྱི་སྤྲུལ་པ་ཀུན་སྐྱོང་གླིང་པར་འདུད །དལ་འབྱོར་མི་ལུས་རིན་ཆེན་ཐོབ་ པའི་དུས། །སྟོང་ལོག་མི་དགོས་ཙམ་དུ་བླ་མ་བརྟེན། །ལུས་ངག་ཡིད་གསུམ་དམ་པའི་ཆོས་ལ་ཞུགས །མིང་དང་དོན་མཚུངས་ཐུབ་པའི་བསྟན་ལ་འཇུག །བསྐལ་པ་བཟང་པོའི་སངས རྒྱས་ཉིད་དང་མཇལ། །ལུས་རྟེན་ཆུད་ཟོས་མི་དགོས་སྡུག་སྒྲར་ཡིན །བཟའ་ཚང་མི་རྟག་ཚོང་འདུས་མགྲོན་པོ་འདྲ། །ལོང་གཏམ་འཐབ་རྩོད་མི་དགོས་མུག་སྒུར་ཡིན། །ནོར་རྫས་ལ སོགས་འཁོར་བའི་རྟོད་ཕུར་ལ །སེར་སྣའི་མདུདཔོས་མ་བཅིངས་སྡུག་སྒྲར་ཡིན །གཉིས་འཛིན་སྒྱུ་མ་ལྟ་བུའི་འཁྲི་བ་འདི། །མཚན་ལྡན་དགེ་བའི་བཤེས་གཉེན་བསྟེན་ནས་ཀྱང་། དབེན་པའི་རི་ལ་གཅིག་པུར་བསྒོམ་པའི་མཐུས །བདག་འཛིན་རྩ་བ་ཆོད་ནས་མུག་སྒུར་ཡིན །འགྲོ་དྲུག་ཕ་མའི་རང་བཞིན་ཡིན་པ་ལ །མ་གཅིག་ཡིན་པ་ངེས་པ་མེད་ན་ཡང་། །དྲིན་ལན་སོད་ཕྱིར་དབེན་རི་སྡུག་སྒུར་ཡིན །ཕུང་པོ་མི་རྟག་ཆུ་ཡི་ལྦུ་བ་འདྲ །དགེ་སྡིག་ལས་གང་འབྲས་བུ་རང་ལ་སྨིན །བླང་དོར་མི་ཤེས་དབེན་རིར་མུག་སྒུར་ཡིན། །བླ་མར་སྐྱབས་ན་གང་འདོད་ཐར་ལམ་འགོད། །མོས་གུས་གདུང་བའི་དད་པ་དྲག་པོ་ཡིས། །དབེན་པ་བསྟེན་ནས་བླ་མའི་བཀའ་བཞིན་བྱེད། །རྭ་འདྲའི་རང་སེམས་བཏུལ་ནས་སྡུག་སྒུར་ཡིན །དབེན་ ༄༅། །པའི་རི་ལ་ཡོན་ཏན་བརྗོད་ལས་འདས། །ཅུང་ཞིག་བཤད་ན་འདི་ལྟར་ཡིན་པར་སྣང་།དབེན་པ་བསྟེན་ན་འཁོར་བར་ཞེན་པ་ལྡོག །དབེན་པ་བསྟེན་ན་ཐར་པའི་ས་བོན་ཐོབ། །དབེན་པ་བསྟེན་ན་སངས་རྒྱས་ཡོན་ཏན་ཐོབ། །དབེན་པ་བསྟེན་ན་ཆོས་ལ་མོས་གུས་སྐྱེ། །དབེན་པ་བསྟེན་ན་བྱམས་དང་སྙིང་རྗེ་འབྱུང་། །དབེན་པ་བསྟེན་ན་ཞེ་སྡང་སྡིག སེམས་ཆུང་།དབེན་པ་བསྟེན་ན་དགྲ་གཉེན་ཆགས་སྡང་མེད། །དབེན་པ་བསྟེན་ན་སྐྱབས་འགྲོ་བཟླས་བརྗོད་འཕེལ། །དབེན་པ་བསྟེན་ན་བླ་མས་རྗེས་སུ་བཟུང་། །དབེན་པ་བསྟེན་ན གདམས་ངག་བདུད་རྩི་ལོན། །དབེན་པ་བསྟེན་ན་གཉུག་མའི་གནས་ལུགས་མཐོང་། །དབེན་པ་བསྟེན་ན་རང་བྱུང་ཡེ་ཤེས་མཇལ །དབེན་པ་བསྟེན་ན་རིག་པའི་རངས་ཟིན། །དབེན་པ བསྟེན་ན་སྟོང་ཉིད་ལྟ་བ་རྟོགས། །དབེན་པ་བསྟེན་ན་ཤུགས་འབྱུང་འགགས་མེད་ཤར །དབེན་པ་བསྟེན་ན་སྤང་བླང་རེ་དོགས་མེད། །དབེན་པ་བསྟེན་ན་འབྲས་བུ་སྐུ་བཞི་ཐོབ །དབེན་པ་བསྟེན་ན་གཅིག་པུར་བག་ཡངས་སྤྲོ། །དབེན་པ་བསྟེན་ན་དོན་གཉིས་ལྷུན་འགྲུབ་ཡོང་།འདི་ནི་དབེན་པའི་ཡོན་ཏན་བསྡུས་ཙམ་འདྲ། །སྡུག་སྒུར་མུག་སྒུར་མི་ཚེ་ཆོས་ལ་དྲིལ། ། མཚན་ལྡན་དགེ་བའི་བཤེས་གཉེན་མང་ན་ཡང་།བཀའ་དྲིན་གསུམ་ལྡན་དོན་གྱི་བླ་མ་མཆོག །རྒྱལ་བའི་རྒྱལ་ཚབ་ཉིད་དང་འབྲལ་མེད་དུ། །ཅི་གསུང་བསྒྲུབས་ནས་རང་གཞན་གཉིས་ཀ འདུག །ཅེས་པ་འདིའང་རང་གི་སློབ་བུ་ཐུབ་བཟང་ལ་ཆོས་དབང་གིས་སྡུག་སྒུར་མུག་སྒུར་མ་བྱེད་སྐྱིད་པོ་གྱིས་ཟེར་བའི་ལན་དུ་དལ་ཁོམས་མེད་པར་འཁོར་བར་ཉམས་ལེན་བྱེད་པའི་སྤྲང་མོ་སྐྱོན་ཀུན་ལྡན་པ་དུད་འགྲོ་ལྟ་བུ་དེ་ཝའི་མིང་གིས་ཨ་མཚར་ཙམ་དུ་བྲིས་པའོ། །དགེའོ།། །། ཨོ་རྒྱན་མཚོ་སྐྱེས་རྡོ་རྗེའི་ཐུགས་ཀྱི་གར། །གདུག་པ་ཚར་གཅོད་དཔའ་བོ་ཧེ་རུ་ཀ །རིག འཛིན་བི་མ་རསྨིའི་ཞབས་ལ་འདུད། །བདག་རྒྱུད་ཆོས་དང་འདྲེས་པར་བྱིན་གྱིས་རློབས །ཨེ་མ་གསོན་དང་སྐལ་ལྡན་རིགས་ཀྱི་བུ །ཀ་དག་རིག་པ་ཟང་ཐལ་ཆོས་ཀྱི་སྐུ །ཁ་དོག་མཚན་མ་ལས་འདས་ལྷུན་གྱིས་གྲུབ །ག་ལེར་མ་བཅོས་འོད་གསལ་ངང་དུ་སྐྱོང་། །ང་བདག་བདག་འཛིན་འགོང་པོ་ཤུགས་ཀྱིས་ཐུལ །དགའ་སྡུག་མ་བྱེད་གཉིས་མེད་ཀློང་དུ་ཞོག ། གཅེས་འཛིན་སྒྱུ་མའི་ཕུང་པོ་འཁྲུལ་པའི་ལུས །ཀུན་བརྟགས་མི་བཟོད་ཟུག་རྔུ་འབྱུང་བའི་ཚེ། །ཕན་གནོད་གཉིས་འཛིན་རེ་དོགས་མི་བྱེད་པར། །ཞི་བྱེད་མྱུར་ལམ་ཟབ་མོའི་གདངས་ཀྱིས་ ༄༅། །གཅོད། །ཅིར་སྣང་རང་གྲོལ་གདམས་པའི་ཕ་ཕོག་ལོངས། །གཉིས་འཛིན་འཁྲུལ་པའི་སྣང་བ་འདྲེ་རུ་ལོང་། །ཕྱི་ལྷོང་སྣང་བ་ཚབ་ཚུབ་རླུང་ལྟར་ལྡང་། །མི་བདེའི་སྣང་གྲགས་རུ་ལོག་ཁོང་ཁྲོའི་རྒྱུ །བདག་མེད་ཤེས་རབ་ཆེན་པོའི་ཕཊ་ཀྱིས་གཅོད། །ཡུལ་མེད་ཟང་ཐལ་དགོངས་པའི་ཕ་ཕོག་ལོངས། །གང་སྣང་གང་ཤར་མ་བཅོས་རང་བབ་ཞོག །སྣང་སྲིད་དག་མཉམ་སྐུ་བཞིའི་རང་ཞལ་མཇལ །ནང་གསལ་གཞོན་ནུ་བུམ་སྐུར་གཏན་སྲིད་ཟིན །དེ་སྐད་རྫུན་རྒྱལ་མདོ་མེད་འཆོལ་མོ་ཡིས །རིག་པའི་རལ་ལས་འབྲེལ་རྩལ། གྲིའི་དྲུང་དུ་ཨ་མཚར་ཕུལ།། །།ཨེ་མ་གསོན་དང་བཙུན་པ་ལགས །རང་བྱུང་རིག་པ་ཀ་དག་ཆེ། །བློ་ལས་འདས་པ་བསམ་བརྗོད་བྲལ། །དོན་དམ་བདེ་གཤེགས་སྙིང་པོ་མཆོག །འཁོར་འདས་ཆོས་ཀུན་རིག་པའི་གཤིས །གཤིས་ལུགས་མ་བཅོས་སོ་མའི་ངང་། །ལྟ་བ་འཁོར་འདས་དབྱེ་བསལ་མེད། །གཏད་མེད་རྒྱ་ཡན་ངང་དུ་ཞོག །སྒོམ་པ་ཞེན འཛིན་དམིགས་གཏད་བྲལ། །གཉུག་མ་འོད་གསལ་ངང་དུ་ཞོག །སྤྱོད་པ་ཆུ་དང་རྦ་རླབས་བཞིན། །རང་ཤར་རང་གྲོལ་སྤང་བླང་བྲལ། །འབྲས་བུ་རང་རིག་འགྱུར་བ་མེད། །ཟང་ཐལ་ རྒྱ་ཡན་ངང་དུ་ཞོག །སུ་ཁའི་མིང་གིས་སོ། །། ཨ་ཧོ། རང་བྱུང་རིག་པ་རྩོལ་བྲལ་ཆོས་ཉིད་ཀྱི་གནས་ལུགས། །བཅོས་བསྒྱུར་བློ་ཡིས་འཛིན་པའི་ལྕགས་སྒྲོག་གིས་མ བཅིངས། །རང་བབས་ཁྱབ་བརྡལ་ནམ་མཁའི་འཁོར་ཡུག་ཏུ་སྐྱོངས་དང་། །སངས་རྒྱས་ཀུན་ཏུ་བཟང་པོ་ཐག་རིང་ན་མི་བཞུགས །དེ་སྐད་བཙུན་ཆུང་མཐའ་ཡས་རྒྱ་མཚོ་ཡིས་བསྐུལ ངོར། །མདོ་མེད་འཆོལ་མོ་རྫུན་རྐྱལ་རྟོག་བྲལ་གྱི་རྣལ་འབྱོར །བདེ་ཆེན་བདེ་བའི་རྡོ་རྗེས་སྨྱོ་གཏམ་འདི་བྲིས་སོ །དགེའོ།། །། ཀ་དག་རིག་པ་རྩ་བྲལ་ཆོས་ཀྱི་སྐུ། །ཁ་དོག་མཚན་མ་ལས་འདས་འོད་གསལ་ངང་། །ག་ལེར་མ་བཅོས་རང་བབས་ངང་སྐྱོངས་དང་། །ང་བདག་རྩ་བ་ཆོས་ཉིད་ཆེན་པོར་གཅོད། །དེ་སྐད་བཙུན་མ་བདེ་ཆེན་སྒྲོལ་མ་ལ །སུ་ཁའི་མིང་གིས་གསལ་འདེབས་ཙམ་དུ་བྲིས །དགེའོ།། །། སྐྱབས་འཁོར་ལོ་མགོན་པོ་ལས་འབྲེལ་རྩལ །དུས་འབྲལ་མེད་སྤྱི་བོའི་རྒྱན་དུ་བཞུགས །བདག་སྒོ་གསུམ་བྱིན གྱིས་བརླབ་ཏུ་གསོལ། །ཨེ་མ་གསོན་དང་དགེ་མ། །འཇིག་རྟེན་འཁོར་བའི་ཆོས་ལ། །སྙིང་པོ་མེད་པ་ཨེ་གོ། །སྔོན་སྨོན་བསོད་ནམས་སྟོབས་ཀྱིས། །ད་རེས་དལ་འབྱོར་ཐོབ ༄༅། །དུས། །དོན་མེད་ཆུད་ཟོས་མ་བྱེད། །དབེན་རིར་གཅིག་པུར་སྡོད་ལ། །དད་མོས་ཐང་ལྷོད་མེད་པར། །སྒོ་གསུམ་དགེ་ལ་འབུང་མཛོད། །འོད་གསལ་རྫོགས་པ་ཆེན་པོ། །ཐག་རིང་གཞན་ན་མེད་དོ། །རང་བྱུང་ཡེ་ཤེས་དེ་ཀ །ཀུན་ཏུ་བཟང་པོ་དངོས་ཡིན །ཕྱི་ཡུལ་སྣང་བར་མི་སྤྲོ །ནང་དུ་སེམས་སུ་མི་བསྡུ། །བར་དུ་རྐྱེན་དབང་མི་གཏོང་།མ་བཅོས་མ་བསྒྱུར་མ་ཡེངས །འཛིན་མེད་ངང་དུ་ཞོག་དང་། །རང་རིག་རང་ཞལ་མཇལ་འོང་། །ཁྱོད་ཀྱང་སྒྱུ་ལུས་རྒུདཔས། །ས་ཐག་རིང་པོར་བགྲོད་དཀའ། བདག་ཀྱང་གྲོགས་ངན་རྐྱེནགྱིས །ས་མཐར་འགྲོ་དགོས་བྱུང་ཚེ། །སྐབས་རེར་དངོས་མཇལ་དཀའ་ཡང་།ཕྱི་མ་དག་པའི་ཞིང་དུ། །མཇལ་བའི་སྨོན་ལམ་འདེབས་སོ། །འཁོར་འདས་ཆོས་ཀུན་བདེན་མེད། །སྒྱུ་མའི་ངང་ཚུལ་ལྟོས་དང་། །རྟག་བརྟན་ཡོད་པ་མ་ཡིན། །སྡུག་བསྔལ་སྐྱོ་སེམས་མ་བྱེད། །ང་དང་འབྲལ་བ་མེད་དོ། །དད་མོས་གདུང་ཤུགས་དྲག་པོས། །གསོལ་བ་ཡང་ཡང་ཐོབ་དང་། །སྒྱུ་མའི་བུ་མོའི་སྒྱུ་འཕྲུལ །ཐབས་མཁས་ཐུགས་རྗེས་སྐྱབས་ཡོང་། །དེ་སྐད་དད་ལྡན་དགེ་མ །ཆོས་ཕྲེང་ཞེས་པས་ཡང་ཡང་། །ནན་ ཆེར་བསྐུལ་བ་ཟབ་ཕྱིར །མདོ་མེད་གཏེར་མིང་འཛིན་པ །བདེ་སྐྱོང་ཆོས་ཉིད་དབང་མོས། །གང་ཤར་ཡིག་རིས་བྲིས་སོ། །དགེའོ།། །། བཀའ་དྲིན་འཁོར་མེད་བླ་མའི་ཞལ སྔ་ནས། །ཐོས་པའི་ཟབ་བཅུད་སྙིང་པོའི་གདམས་པའི་མཆོག །དུས་རྣམ་ཀུན་ཏུ་ཉམས་ལེན་གནད་ལ་རེམ །ཆོས་སྐུའི་གཏན་སྲིད་ད་རེས་ཟིན་པར་མཛོད། །ཀ་དག་རིག་པ་ཤེལ་གོང་དྲི་མ་མེད། །ཁ་དོག་སྣ་ཚོགས་རང་མདངས་ལྷུན་གྱིས་གྲུབ །ག་ལེར་མ་བཅོས་རང་བབས་ངང་བསྐྱང་ན །ངར་འཛིན་འགོང་པོ་ཡེ་ཤེས་ཆེན་པོར་གྲོལ །འཛིན་ཞེན་ཡུལ་མེད་ཀུན་བཟང་རང་ཞལ་མཇལ། །དེ་སྐད་ཨ་མཚར་ཙམ་དུ་སྤྲང་འཁྱམས་པ། །སུ་ཁའི་མིང་གིས་གར་ཆོས་ཉིད་ལ་ཕུལ །ཀ་དག་རིག་པ་བརྗོད་མེད། །ཁ་དོག་མཚན་མ་ལས་འདས། །ག་ལེར་རིག་པས་དཔྱོད་དང་། །ང་བདག་རྩ་བ་ཆོད་འགྲོ། །ཧེ་ཧེ་ཧེ། སུ་ཁའི་མིང་གིས་སོ། །། ཨ་ཧོ། འཁོར་བ་འདི་ལ་ཡིད་མ་ཆེས །འཁོར་བ་འདི་ལ་ཡིད་ཆེས་ན། །མྱང་འདས་ཞེས་བྱ་ཅི་ལ་སྲིད། །སེམས་ཉིད་འདི་ལ་ཡིད་མ་ཆེས། །སེམས་ཉིད་འདི་ལ་ཡིད་ཆེས་ན། །རིག་པ་ཞེས་པ་ཅི་ལ་སྲིད། ལྟ་བ་འདི་ལ་ཡིད་མ་ཆེས། །ལྟ་བའདི་ལ་ཡིད་ཆེས་ ༄༅། །ན། །ཡེ་སྟོང་སྤྲོས་བྲལ་ཅི་ལ་སྲིད། །སྒོམ་པ་འདི་ལ་ཡིད་མ་ཆེས། སྒོམ་པ་འདི་ལ་ཡིད་ཆེས་ན། །གཉུག་མ་ཤུགས་འབྱུང་ཅི་ལ་སྲིད། །སྤྱོད་པ་འདི་ལ་ཡིད་མ་ཆེས། སྤྱོད་པ་འདི་ལ་ཡིད་ཆེས་ན། །འབད་རྩོལ་བྲལ་བ་ཅི་ལ་སྲིད། །གཞི་སྣང་འདི་ལ་ཡིད་མ་ཆེས། གཞི་སྣང་འདི་ལ་ཡིད་ཆེས་ན། །ཡེ་གཞི་ཀ་དག་ཅི་ལ་སྲིད། །ལམ་སྣང་འདི་ལ་ཡིད་མ་ཆེས །ལམ་སྣང་འདི་ལ་ཡིད་ཆེས་ན །གསལ་སྟོང་ཟུང་འཇུག་ཅི་ལ་སྲིད། །འབྲས་བུ་འདི་ལ་ཡིད་མ་ཆེས །འབྲས་བུ་འདི་ལ་ཡིད་ཆེས་ན། །ཟང་ཐལ་བརྗོད་བྲལ་ཅི་ལ་སྲིད། །ཀུན་རྫོབ་འདི་ལ་ཡིད་མ་ཆེས། །ཀུན་རྫོབ་འདི་ལ་ཡིད་ཆེས་ན། །སྣང་སྟོང་ཟུང་འཇུག་ཅི་ལ་སྲིད། །ཡིན་པ་མ་ཡིན་ཐམས་ཅད་སྟོང་། །མེད་པ་མ་ཡིན་ཀུན་ཏུ་གསལ། །སྟོང་གསལ་ངང་ལ་བཞག་ཙམ་ན། །འཁོར་འདས་ཆོས་ཀུན་རྫུན་ཕུག་རྡིབས། །ཐམས་ཅད་ཆོས་ཉིད་རྒྱན་དུ་ཤར། །རིག་སྟོང་སྤྲོས་བྲལ་འོད་ཀྱི་མདངས། །གསལ་སྒྲིབ མེད་པར་འཁོར་འདས་ཁྱབ། །ཡེ་རྫོགས་འབྲས་བུ་གཞན་མི་རེ། །བདེ་ཆེན་རང་རིག་ཀློང་དང་འདྲེས། །དབྱིངས་གསུམ་དབྱེར་མེད་ངང་དུ་བཞག །འདི་ནི་སྤྲང་མོའི་རྫུན་རིས་ཡིན། ། ཆོས་དང་མི་མཐུན་ནེ་ཙོའི་གཏམ། །གཞན་གྱིས་གཟིགས་ལ་ཐུགས་ཁྲེལ་རྒྱུ །སྤྲང་མོ་རང་གི་ཆོས་ལུགས་ལགས། །འཁོར་འདས་ཆོས་ཀུན་དེ་ལྟར་སྣང་། །འཁོར་བ་ཉམས་ལེན་བྱེད མཁན་ལ། །མྱང་འདས་བྱ་བ་ཅི་ཕྱིར་ཤེས །རྫུན་ཚིག་ཡིན་ནོ་ལྷ་གྲོགས་རྣམས །བདེ་བའི་རྡོ་རྗེས་སོ། །། ཨ་ཧོ། སྙིང་གི་བུ་ཁྱོད་ཀྱི་སྒྲ་འཛིན་དབང་པོ་ང་ལ་ཉོན། །ང་ཡེ་ཤེས་དབྱིངས་ཀྱི་མཁའ་འགྲོ་མ། །བླ་མའི་བྱིན་རླབས་སེམས་ལ་ཐོབ། །ཡི་དམ་ལྷ་ཡི་དངོས་གྲུབ་བརྙེས །མ་རྒྱུད་མཁའ་འགྲོ་རང་དང་འགྲོགས། །སེམས་གཞི་མེད་རྩ་བྲལ་མཁའ་དང་འདྲ། །དེ་རྐྱེན་གྱིས་སྣང་སྲིད་བརྡ་ཆོས་ཤར། །མི་བྲི་ཁ་ནས་བཀག་མེད་འཆོར། །སུ་མི་འཐད་ཀྱང་བྱེད་རྒྱུ་མེད། །ལྟ་བ་གཏད་མེད་མཐའ་དབུས་བྲལ། །བློ་ཡི་གཏད་སོ་ཡེ་ནས འདས། །སྒོམ་པ་རང་བྱུང་བློ་འདས་གཤིས། །ཨ་འཐས་བཅོས་མས་མ་བསླད་པར། །གསལ་སྟོང་འཛིན་པ་བྲལ་བའི་ངང་། །སྤྱོད་པ་སྦྲུལ་མདུད་ནམ་མཁའ་བཞིན། །རང་ཤར་རང་གྲོལ་སྤང་བླང་མེད། །གཞི་རིག་པ་གསལ་སྟོང་ནམ་མཁའ་འདྲ །ཕྱོགས་ལྷུང་བྲལ་བ་ཀ་དག་ལ །ལམ་སྣང་རང་ཆས་ལྷུན་གྲུབ་རྫོགས །སྣང་སྲིད་ཆོས་ཀུན་རྒྱན་དུ་ཤར། །འབྲས་ ༄༅། །བུ་རེ་དོགས་བྲལ་བ་ཡི། །ཐམས་ཅད་ཀུན་ཏུ་བཟང་པོའི་ཀློང་། །ནམ་མཁའ་ནམ་མཁར་ཐིམ་བཞིན་གྲོལ། །ཅེས་པའང་སྤྲང་མོ་སྐྱོན་ཀུན་ལྡན་པས་རང་ལོ་ཉེར་གཅིག་དུས་རྫུན་རིས་སུ་བྲིས་པ། སུ་མི་འཐད་ཀྱང་ངལ་བའི་རྒྱུ །ང་ཡིས་སྨྱོ་ཁ་ལབ་པ་ཡིན། །ཆོས་དང་མི་མཐུན་བསླུ་ཚིག་འདྲ། །ཧ་ཧ་ཧ། ཨེ་མ་ཧོ། རྒྱལ་བ་ཀུན་འདུས་ཨོ་རྒྱན་པདྨ་ཡི། །ཐུགས་ཀྱི་རྣམ་འཕྲུལ་བདུད་འདུལ་དབང་ཕྱུག་གླིང་། །དབྱེར་མེད་རིག་འཛིན་ཀུན་སྐྱོང་གླིང་པ་ལ །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །བློ་སྣ་དམ་པའི་ཆོས་ལ་བསྒྱུར་དུ་གསོལ །ཨེ་མ་གསོན་དང་སྙིང་གི་བུ་མཆོག་ཁྱོད། །དལ་འབྱོར་ཐོབ་པ་ཚེ་སྔོན་འབྲས་བུ་ཡིན །དོན་མེད་ཆུད་ཟོས་མ་བྱེད་དགེ་ལ་འབད། །འཆི་བདག་ནམ་ཡོང་བློ་གཏད་མེད་པས་ན། །འཆི་ཆོས་ད་ནས་སྒྲུབས་ཤིག་སྙིང་གི་བུ། །དཀར་ནག་བསགས་པའི་འབྲས་བུ་རང་ལ་སྨིན །དགེ་སྡིག་སྤང་བླང་མ་ནོར་ཞིབ་པར་གྱིས། །འཁོར་བ་མེ་འོབ་ལྟ་བུར་སྡུག་བསྔལ་ཆེ། །དེ་ལས་ཐར་འདོད་བློ་སྣ་མི་རིང་བར། །སྐོམ་པ་ཆུ་ལ་གདུང་བཞིན་ཆོས་ལ་བརྩོན །འདི་ཕྱི་གཉིས་ཀྱི་སྐྱབས་གནས་མཆོག་གསུམ་བཟུང་། །འདི་ཡིས་བསླུ་བ་མེད་དོ་ སྙིང་གི་བུ། །རང་གཞན་གཉིས་ཚང་སྨོན་འཇུག་དོན་ལ་བསྒོམ། །དེ་ལ་མ་བརྟེན་སངས་རྒྱས་ཐོབ་པ་མེད། །ཚོགས་ཆེན་མ་བསགས་འབྲས་བུ་ག་ལ་སྲིད། །ཚོགས་གཉིས་རྫོགས་ཕྱིར་མཎྜལ་ཉིད་ལ་བརྩོན། །ཚེ་རབས་བསགས་པའི་སྡིག་སྒྲིབ་ཁུར་པོ་ལྕི །གཉེན་པོ་སྟོབས་བཞིའི་བཤགས་སྦྱངས་ནར་མར་ཟློས། །ཐར་པའི་ལམ་བཟངསྟོན་མཁས་བླ་མ་ཡིན། །མཚན ལྡན་དགེ་བའི་བཤེས་གཉེན་བསྟེན་པ་གནད། །བླ་མ་བསྟེན་ནས་དམ་ཚིག་མ་བསྲུངས་ན །བླ་སློབ་གཉིས་ཀ་ངན་འགྲོར་ལྟུང་བའི་རྒྱུ། །དེས་ན་དམ་ཚིག་མ་ཉམས་བསྲུང་བ་གནད། བླ་མས་ཅི་གསུང་ཚད་མར་བཟུང་བ་དང་། །ཅི་མཛད་ཆོས་སུ་མཐོང་བ་མོས་གུས་གནད། །དད་པ་དག་སྣང་ཕྱོགས་རིས་མི་བྱེད་པར། །ཐང་ལྷོད་མེད་པར་ཆུ་བོའི་རྒྱུན་བཞིན་གྱིས། །སྲོག ལ་བབས་ཀྱང་བླ་མའི་བཀའ་མ་བཅག །སངས་རྒྱས་ཀུན་འདུས་ངོ་བོ་བླ་མ་ཡིན །སྐད་ཅིག་ཙམ་ཡང་ལོག་ལྟ་མ་སྐྱེས་པར། །ཅི་མཛད་བརྡ་དང་ཆོས་སུ་མཐོང་ནས་ཀྱང་།བྱིན་རླབས་འཇུག་ཕྱིར་སྤྱི་བོའི་གཙུག་ཏུ་བསྒོམ། །དབང་བཞི་བླངས་ནས་མོས་གུས་དྲག་པོ་ཡིས། །བླ་མའི་ཐུགས་དང་རང་སེམས་དབྱེར་མེད་བསྲེས །ཀ་དག་སྤྲོས་བྲལ་ངང་ལ་མཉམ་པར་ ༄༅། །ཞོག །དེ་ཡིས་བླ་མའི་བྱིན་རླབས་འཇུག་ཀྱང་སྲིད། །བླ་མ་མ་བསྟེན་སངས་རྒྱས་ཐོབ་དུས་མེད། །དམ་ཚིག་མ་བསྲུང་དབང་བཞི་བླང་ཚུལ་མེད། །བྱང་སེམས་མེད་ན་སྟོང་ཉིད་བསྒོམ་ལུགས་མེད། །ཉོན་མོངས་མ་ཐུལ་རྫོགས་ཆེན་རྟོགས་པ་མེད། །བདག་འཛིན་མ་ཆོད་བདག་མེད་ཡོང་བ་མེད། །སྙིང་རྗེ་མེད་པས་དོན་གཉིས་འགྲུབ་པ་མེད། །དད་པ་མེད་ན་བྱིན་རླབས་འཇུག་པར་དཀའ །རང་འདོད་ཆེ་ལ་གཞན་ལ་ཕན་པ་དཀའ། །ད་ནི་སྙིང་ནས་ཆོས་ཤིག་བསྒྲུབ་བསམ་ན། །ཕ་ཡུལ་སྲིན་ཡུལ་འདྲ་སྟེ་སྤངས་ནས སུ། །དབེན་པ་བསྟེན་ལ་རང་ཉིད་གཅིག་པུ་རུ། །བླ་མའི་བཀའ་བཞིན་སྒྲུབ་ལ་ཉམས་ལེན་གནད། །ལུས་ནི་དལ་བར་མ་འདུག་སྒྲིབ་སྦྱངས་དང་། །ངག་ནི་འཁྱལ་བར་མ་ལབ་བཟླས་བརྗོད་རེམ། །ཡིད་ཀྱིས་རྩེ་གཅིག་དཀོན་མཆོག་གསུམ་ལ་གཏོད། །དེ་ནས་བྱུང་གནས་འགྲོ་གསུམ་གཏན་ལ་ཕབས །བར་དུ་གནས་འགྱུ་རིག་གསུམ་ལ་སོགས་བལྟ། །དེ་དག་རིམ་བཞིན་མ་ནོར་གནད་དུ་བསྣུན །རང་རྒྱུད་ཉོན་མོངས་གཉེན་པོར་སོང་ནས་ཀྱང་། །རྭ་འདྲའི་རང་སེམས་དེ་ཀ་འདུལ་བ་གནད། །ལྟ་བ་རང་སེམས་གཏན་ལ་ཕབས་པ་དང་། །སྒོམ་པ་རང་ སྐྱོན་ཁོ་ན་བཟུང་བ་ཡི། །སྤྱོད་པ་ཞི་ཞིང་བག་ཡོད་ལྡན་པ་དགོས། །གཞི་ནི་བྱང་ཆུབ་སེམས་དང་ལྡན་ནས་ཀྱང་། །ལམ་ལ་བརྩོན་འགྲུས་ལྷོད་མེད་ཆོས་ལ་བརྩོན །འབྲས་བུ་རང་གཞན་གཉིས་ཀ་ཐར་པ་ཐོབ། །དེ་ལས་ལྷག་པའི་ཆོས་ནི་ངས་མི་ཤེས། །ཞེས་པ་འདི་ཡང་སྤྲང་མོའི་སེམས་ལ་གང་དྲན་ནེ་ཙོའི་གཏམ་བཞིན་རང་རྒྱུད་མ་ཐུལ་བར་གཞན་ལ་སྨྲས་པ་འདི་ལོང་བས་ལོང་བ་ཁྲིད་པ་དང་འདྲ་ནའང་ཁྱོད་ཀྱི་ཞལ་ངོ་མི་ལྡོག་ཙམ་དུ་ཡང་ཨ་མས་ཕུལ་བ་སེམས་ལ་ཟུངས། དེ་མིན་ཞལ་གདམས་མི་ཤེས་ཁ་རོག་སྡོད །འཁོར་བ་ཉམས་ལེན་བྱེད་པའི་རྒན་མོ་ལ། ། ཞལ་གདམས་ཡོད་པ་ཀུན་གྱིས་ཁྱེར་བགད་ཤོར། །ཨ་མ་ཀུན་ཏུ་བཟང་མོའི་མཁའ། །རིག་པའི་བུ་ཆུང་དབྱེར་མེད་འགྲོགས །འཇིག་རྟེན་བུ་ཡི་དགོས་པ་ཆུང་། །དབྱིངས་རིག་ཨ་མའི་མཁའ་ཀློང་དུ། །འགྱུར་མེད་རིག་པའི་ཁྱེའུ་ཆུང་ཡོད། །ཟག་མེད་ཏིང་འཛིན་ནུ་ཞོ་འཐུང་། །ཀློང་ཡངས་ངང་ལ་རྩེད་མོ་བྱེད། །རང་བྱུང་མཁའ་འགྲོ་ལྔ་དང་འགྲོགས། །སྣང་སྲིད་ཡུལ་ལ་ལྟད་མོ་བལྟ། །ཕར་ལ་བལྟས་པས་ཚུར་ལ་གསལ། །གསལ་སྟོང་ངང་ལ་དྲན་པས་བལྟ། །ཆོས་བརྒྱད་བུ་ཡི་དགོས་པ་ཆུང་། །སྐྱེ་འགགས་གནས་གསུམ་བྲལ་བ་ཡི །རིག་པའི ༄༅། །བུ་ཆུང་ང་དང་འགྲོགས། །ཁྱོད་ཀྱིས་མཐོང་བ་ངོ་མཚར་ཆེ། །ངག་སྒོ་སྡོམས་ལ་སྒོམ་སྒྲུབ་གྱིས། །དེ་མིན་ང་ལ་བཤད་རྒྱུ་མེད། །སྤྲང་མོ་ལེ་ལོ་ཅན་གྱིས་སོ། ཀྱེ་མ། ཨ་མ་ཀུན་ཏུ་བཟང་མོའི་ཀློང་དུ། །སྣང་སྲིད་འཁོར་འདས་ཆོས་ཀུན་སྟོང་སོང་། །འོད་གསལ་ཨ་མ་ཟང་ཐལ་བརྗོད་མེད། །གཟུང་འཛིན་ཡུལ་ལས་ཡེ་ནས་གྲོལ་སོང་། །ཨ་མ་ཁྱབ་བརྡལ་གཏད་མེད་ཀློང་དུ། །འཛིན་མེད་རིག་པའི་བུ་ཕྲུག་འཕྲད་ཚེ། །ཡེ་གཞི་གདོད་མའི་ངང་དུ་འཇུག་སོང་། །ཕྱོགས་མཐའ་བྲལ་བའི་ཨ་མ་དེ་ཉིད། །བདེ་སྟོང་བརྗོད་པ་བྲལ་བའི་གཤིས་ལ། །ལྷུན་འགྲུབ་ངང་དུ་བུ་ཕྲུག་བསྐྱངས་ནས། །འཛིན་མེད་སྟོང་ཆེན་མཁའ་ལ་ཐིམ་སོང་། །ཆོས་སྐུའི་ཀློང་དུ་རོ་གཅིག་འདྲེས་ཏེ། །སྐུ་གཉིས་ཟུང་འཇུག་འཁོར་བ་སྟོང་ནས། །ཀུན་ཏུ་བཟང་པོའི་གོ་འཕང་ཐོབ་སོང་། །ཞེས་པ་འདིའང་ཡུལ་སྣང་གི་རྐྱེན་བྱས་ཏེ་སྤྲང་མོ་རང་གི་ཨ་མ་དྲན་ནས་ཡི་མུག་མཆི་མ་འཁྲུགས་པའི་དུས་སུ་རང་གིས་རང་ཉིད་ལ་སེམས་གསོ་བའི་ཚུལ་དུ་སྐྱོན་ཀུན་ལྡན་པ་བདག་གི་རྫུན་རིས་སོ། དགེའོ།། །། ཨེ་མ་སྙིང་གི་བུ་མཆོག་ཁྱོད། །གནས་ལུགས་ལྟ་བ་སྐྱོང་བས་ན། །ཨ་མ་དབྱེར་མེད་ངང་ལ མཇལ། །མ་བཅོས་བསྒོམ་མེད་ཡེངས་མེད་དུ། །ཨ་མ་ལྷུན་གྲུབ་ངང་དུ་མཇལ། །སྤྱོད་པ་ཆུ་དང་རྦ་རླབས་བཞིན། །ཨ་མ་ཤར་གྲོལ་དབྱེར་མེད་མཇལ། །དེ་མིན་མཇལ་ཐབས དཀའ་མོ་གདའ། །ཨ་མ་སྙིང་གི་བུ་ཁྱོད་ཀྱི །ཕ་ཡིས་གསུང་བཞིན་ཉམས་ལེན་རེམ། །སྙིང་གཏམ་ཡིན་པས་སེམས་ལ་ཟུངས། །ཨེ་གོ་ཨ་མའི་སྙིང་གི་བུ། །ང་དང་འབྲལ་བ་ནམ་ཡང་མེད། །སྐྱེ་མེད་ཀྱི་མཁའ་ལ་འགགས་མེད་དུ་ཤར་ཚེ། །སྣང་སྲིད་ཀུན་བརྡ་ཡི་རི་མོར་འདུག་གོ །དེ་མིན་སྨྱོ་ཁ་མ་ལབས་ཉོལ་ལ་སྡོད།། དགེའོ།། །། སྐྱབས་གནས་ཀུན་འདུས་བླ་མ་རིན་པོ་ཆེ །གསོལ་བ་འདེབས་སོ་ཐུགས་རྗེས་བདག་ལ་གཟིགས། །ཀུན་གཞི་ཀ་དག་དྲི་མེད་ལ། །སྐྱེ་རྒ་ན་འཆི་ལས་འདས་ཀྱང་། །སེམས་ཉིད་ཅོལ་ཆུང་ཕྲུག་གུ འདི། །འབྱུང་བ་ལྔ་ཡི་དབང་དུ་སོང་། །སྟོད་ནས་བདག་འཛིན་