Tibetan
ཀུན་རྟོག་དམག་བརྒྱས་དོ་ཟླ་མིན །ཐར་པའི་སྲོག་རྩ་གཅོད་པའི་ཤན་པ་ཡིན །མ་རིག་མུན་པའི་ཕག་ནས་རང་དང་འགྲོགས་། །ཤེས་རབ་དབང་མོ་ཁྱོད ཀྱིས་བཟློག་ཏུ་གསོལ། །སུ་ཁའི་མིང་གིས་སོ། དུས་གསུམ་རྒྱལ་བ་སྲས་བཅས་ཐམས་ཅད་ཀྱི། །ཕྲིན་ལས་མཛད་པ་རྨད་བྱུང་བསམ་མི་ཁྱབ། །གཅིག་བསྡུས་དཔལ་ལྡན་བླ་མ་རྡོ་རྗེ་འཆང་། །རྣམ་ཀུན་མཆོག་ལྡན་དཔའ་བོ་ཧེ་རུ་ཀ །པདྨའི་ཕ་ཕོག་ཐོབ་པས་སྙིང་ཐིག་དབང་། །མ་རིག་འགྲོ་ཁམས་ཆོས་ཀྱི་སྒྲོན་མེ་སྦར། །གང་འདུལ་ཕྲིན་ལས་མཛད་པ་མཐའ་རུ་ཕྱིན། །གསང་མཛོད་ཟབ་མོའི་ཆོས་ཀྱི་གཏེར་གྲོལ་ནས། །བླ་མེད་སྔགས་ཀྱི་དགོངས་བཅུད་ཟབ་མོ་ཡིས །ལས་ཅན་རྗེས་བཟུང་སྨིན་གྲོལ་ལམ་ལ་བཀོད། །གླིང་པ་རྣམ་ལྔ་གཏེར་ཆེན་བརྒྱ་རྩ་དང་། །རྒྱལ་དང་རྒྱལ་སྲས་འདུས་པའི་ངོ་བོ་མཆོག །བཀའ་དྲིན་མཚུངས་མེད་ཞབས་ལ་གུས་པས་འདུད །བདག་གི་ལུས་ངག་ཡིད་གསུམ་མཆོད་པ་འབུལ། །འདི་ཕྱི་ཀུན་ཏུ འབྲལ་མེད་བྱིན་གྱིས་རློབས། །མཚན་དཔེ་རབ་རྫོགས་སྐུ་ཡི་དཀྱིལ་འཁོར་མཛེས །ལྟ་བས་མི་ངོམས་མཆོག་ཏུ་དགའ་བའི་གཟུགས །ཞལ་གྱི་དཀྱིལ་འཁོར་ཞི་མ་ཁྲོ་འཛུམ་ལྡན། ། ༄༅། །གཉིས་འཛིན་འཁྲུལ་སྣང་ཡེ་ཤེས་ངང་དུ་གྲོལ། །སྤྱན་དཀྱིལ་འབྲུ་ཚུགས་བདུད་ཚོགས་ཟིལ་གྱིས་མནན། །མ་རིག་འཁྲུལ་འཛིན་རིག་སྟོང་ཆོས་སྐུར་བཅོམ ལྕང་ལོ་མ་བཅོས་ཟུར་ཕུད་ཐོད་དུ་བཅིངས། །སྐུ་གསུམ་ཡེ་ཤེས་མཁའ་འགྲོའི་སྲོག་བཅུད་འཛིན །སྐུ་ཡི་འོད་ཀྱིས་སངས་རྒྱས་ཞིང་ཀུན་ཁྱབ། །འགྲོ་བའི་མ་རིག་མུན་པའི་སྨག་རུམ སེལ། །ཡོན་ཏན་དུ་མས་བརྒྱན་པའི་སྐུ་མངའ་བརྙེས །གསུང་གི་ང་རོས་གསང་སྔགས་ཆོས་སྒྲ་སྒྲོགས །ཇི་སྙེད་དོན་ཀུན་ཇི་བཞིན་བློ་གྲོས་ཐོབ །འགྲོ་བའི་ཁམས་དབང་དང་མཐུན་ས་ལམ་གྱི། །བགྲོད་ཚུལ་ལུགས་གཉིས་ཐེག་པའི་ཆོས་མཐའ་དག །རྣམ་གྲངས་དབྱེ་བ་དང་བཅས་ཐོགས་མེད་མཁྱེན །ངག་གི་དབང་ཕྱུག་མཁྱེན་བརྩེ་རོལ་པའི་བདག །དུས་གསུམ ཀུན་མཁྱེན་ཁྱབ་བདག་རྡོ་རྗེ་འཆང་། །སྐུ་གསུམ་མངོན་གྱུར་སྤྲོས་བྲལ་གཡོ་བ་མེད། །མཁྱེན་གཉིས་ཡེ་ཤེས་ཆེན་པོའི་ཤེས་རབ་ཀྱིས །ཉོན་མོངས་མ་སྤངས་རང་གྲོལ་ཆོས་ཉིད་ངང་། །ཆོས་དབྱིངས་ངང་ལས་འགྱུར་མེད་གཉུག་མའི་ཀློང་།འཁྲུལ་གྲོལ་གཉིས་མེད་ཡེ་གྲོལ་ཆོས་སྐུའི་ཐུགས །མཚན་ཐོས་ཙམ་གྱིས་གཉིས་འཛིན་ཞེན་པ་ཆོད །འཁོར་བར་བློ་ ལྡོག་ཡང་དག་ཆོས་ལ་སྤྱོད། །མཐོང་བས་མ་རིག་སྒྲིབ་གཉིས་དབྱིངས་སུ་དག །བདེ་ཆེན་ཡེ་ཤེས་རང་ཞལ་མངོན་དུ་གྱུར། །སྦྱོར་བའི་རླུང་སེམས་དབང་བསྒྱུར་ཆོས་ཉིད་མཐོང། ། འཕོ་ཆེན་སྐུ་ཐོབ་གཞོན་ནུ་བུམ་སྐུར་འཁྱོལ །ཟབ་དོན་སྙིང་པོའི་སྒོ་འབྱེད་ལྡེ་མིག་མཆོག །ཚེ་བསོད་དཔལ་འབྱོར་གདུལ་བྱ་རྒྱས་མཛད་པའི །དངོས་གྲུབ་འབྱུང་གནས་དཔའ་བོ་ཁྱོད་ལྟ་།ཁོ་མོས་སྔར་ཡང་མ་རྙེད་ད་ཅི་མཐོང་། །བྲལ་དགོས་སྙིང་མིག་སྲོག་ལས་ཕོངས་ན་ཡང་། །རང་ཉིད་བསོད་ནམས་དམན་པས་གཞན་དབང་སོང་། །བྲལ་དགོས་བྱུང་ཚེ་རྗེས་བརྩེས་མི་འདོར་བར། །ཐུགས་རྗེས་རྒྱུན་ཆད་མེད་པར་གཟིགས་སུ་གསོལ། །འདིཕྱི་རེ་ལྟོས་སྐྱབ་མགོན་ཁྱེད་ལས་མེད། །ལས་ངན་བདག་ནི་ཡུལ་གཞན་བགྲོད་པའི་ཚེ། །སྙིང་མེད་མི་བཞིན་གཏད་མེད་ཧད་པོར་རྒྱུ། །སོང་ནས་དཀར་ནག་འཁྱུད་འཁོར་ཆོད་པ་དཀོན། །བཀའ་དྲིན་ཅན་གྱི་ཡོན་ཏན་ཐུགས་རྗེ་དྲན། །སྨྲེ་བསྔགས་འོ་དོད་གསོལ་བ་དྲག་ཏུ་བཏབ །སྐྱབས་མེད་བདག་ནི་སྐྱབས་གནས་གར་བཞུགས་ཀྱང་།བདག་གི་ལུས་བྲལ་སེམས་ཉིད་འདི་རུ་འཕོས །ཚེ་བསོད་དཔལ་འབྱོར་འདུས་པའི་སྲོག་རྟེན་ནྲྀཿ །སྐྱེ་མེད་རང་བྱུང་ཨ་ཡིག་རྣམ་པ་རུ། ༦2 ། ༄༅། །སེམས་ཁམས་དབྱིངས་ཕྱུག་མ་དང་དབྱེར་མེད་རོལ། །རང་བྱུང་སངས་རྒྱས་མཁའ་འགྲོར་ལྷུན་གྱིས་གྲུབ། །ཆོས་དབྱིངས་ཡེ་ཤེས་ཀློང་དུ་གཉིས་མེད་འཕོ ། ཤ་ཁམས་སངས་རྒྱས་སྤྱན་དང་དབྱེར་མེད་གྲོལ །རང་བྱུང་རྡོ་རྗེ་མཁའ་འགྲོར མེ་ལོང་ཡེ་ཤེས ཁྲག་ཁམས་མ་མ་ཀི་དང་རང་བྱུང་རིན་ཆེན་མཁའ་འགྲོར མཉམ་ཉིད་ཡེ་ཤེས༔ དྲོད་ཁམས་གོས་དཀར་མོ་དང་ཿ རང་བྱུང་པདྨ་མཁའ་འགྲོར སོར་རྟོགས་ཡེ་ཤེསཿ དབུགས་ཁམས་དམ་ཚིག་སྒྲོལ་དང་ཿ རང་བྱུང་ཀརྨ་མཁའ་འགྲོར བྱ་གྲུབ་ཡེ་ཤེས་དུག་ལྔ་རྣམ་དག་སྐུ་ལྔ་དབྱེར་མེད་གྲོལ །ལྷུན་གྲུབ་འགྱུར་བ་མེད་པའི་དགོངས་ཀློང་དུ། །གཉིས་མེད་རོ་གཅིག་ཐབས་དང་དབྱེར་མེད་འཕོ། །ཟུང་འཇུག་སྣང་སྟོང་ཆོས་སྐུའི་ངང་དུ་གྲོལ། །འཕོ་མེད་རྡོ་རྗེའི་སྐུ་དང་གཉིས་མེད་བསྲེ །ཤེས་རབ་སྣང་ཆ་ཐབས་ཀྱི་ཀློང་དུ་འཕོ། །སྒྱུ་ལུས་མི་སྣང་འོད་གསལ་ངང་དུ་ཡལ། །བཟང་ངན་འབྲེལ་བཅས་འཁོར་བར་མི་གནས་པར། །ལྷུན་གྲུབ་དག་པའི་ཞིང་དུ་གྲོལ་བར་ཤོག །ཀྱེ་ཧུད་ཀྱེ་ཧུད་གནས་གསུམ་མཁའ་འགྲོའི་ཚོགས །ཁྱེད་རྣམས་ཐུགས་རྗེ་བྱིན་རླབས་མཐུ་ཡོད་ན །བདག་གི་གྲོགས་དང་ འབྲལ་མེད་མཐུ་དཔུང་བསྐྱེད། །ཕྱི་ནང་གསང་བའི་བར་ཆད་མི་མཐུན་ཀུན། །ཕྲིན་ལས་དྲག་པོས་ཚར་གཅོད་བཟློག་ཏུ་གསོལ། །ཐབས་ཤེས་འབྲལ་མེད་མྱུར་དུ་འདུམ་པ་དང་། །མཛད་ཕྲིན་ནམ་མཁའ་བཞིན་དུ་རྒྱས་པ་དང་། །སྙན་གྲགས་སྲིད་ཞི་ས་གསུམ་ཁྱབ་པར་མཛོད །འགྲུབ་པར་ཤོག་ཅིག་གནས་གསུམ་མཁའ་འགྲོའི་མཐུས །བསམ་དོན་ལྷུན་གྲུབ་དངོས་གྲུབ སྩལ་དུ་གསོལ །ཅེས་པའང་དུས་འཛིན་གྱི་ལོ་ཟླ་བ་གསུམ་པའི་ཚེ་བཅུའི་ཉིན་རྐྱེན་སྣང་གིས་གནད་བསྐུལ་ཚེ་ཡིད་ཤིན་ཏུ་སྐྱོ་བའི་ངང་ནས་གང་དྲན་ཆལ་ཆོལ་དུ་ལུས་དམན་འདུ་ཤེས་གསུམ་པས་སྨྲས་པའོ། །དགེའོ།། །།རྒྱལ་ཀུན་འདུས་ཞལ་པདྨ་ཐོདཕྲེང་རྩལ། །དབྱིངས་ཡུམ་ཌཱ་ཀི་ཡེ་ཤེས་མཚོ་རྒྱལ་མ། །ཁྱེའུ་ཆུང་ལོ་ཙཱ་ནམ་མཁའི་སྙིང་པོ་སོགས། །རྩ་བརྒྱུད་བླ་མ་རྣམས་ལ་གསོལ་བ་འདེབས། །དུས་ངན་སྙིགས་མའི་རང་མཚངས་རང་གིས་སྟོན། །བསམ་ཞིང་བསམ་ན་སྐྱོ་བ་གཏིང་ནས་སྐྱེས །གཏེར་མིན་གཏེར་འདྲས་ས་སྟེང་ཡོངས་ལ་གང་། ཐེག་དགུའི་གནད་བསྡུས་གདམས་པ་སྣ་གཅིག་མེད །ཟབ་ཆོས་ཡ་མ་ཟུང་འབྲེལ་མང་དུ་སྤེལ། །ཟབ་ཟབ་ལུང་བསྟན་ཟེར་ཞིང་རང་མགོ་བསྐོར །འགྲོ་དོན་ཡིན་ཟེར་ནག་ཆང་དང་དུ་ ༄༅། །བླངས། །གཙང་བཙོག་མེད་པ་ཁྱི་ཕག་ལྟ་བུར་སྤྱོད །དད་པ་ཆུང་ཞིང་རང་རྒྱུད་རྭ་ལྟར་གྱོང་། །ཚུལ་ཁྲིམས་མི་ལྡན་དུག་ལྔ་འཆོལ་ཉོག་སྤྱོད། །དམ་པ་གོང་མ་རྣམས་ལ་སྐུར་པ་འདེབས། །གྲུབ་པ་ཐོབ་ཟེར་མི་དགེ་སྣ་ཚོགས་བསགས། །ཆ་ལུགས་མི་མཐུན་གང་དྲན་བབས་ཅོལ་བྱེད། །རང་དོན་སྣ་གཅིག་མེད་ཀྱང་གཞན་དོན་རློམས། །ཟླ་གཅིག་ཙམ་ཡང་སྒོམ་སྒྲུབ་མི་བརྩོན་ཞིང་། །ཡུལ་གྲོང་དགོན་གསེབ་ཀུན་ཏུ་དཀོར་ལ་རྒྱུག །དལ་ཁོམས་མེད་པར་ཉིན་མཚན་ཁོར་ཡུག་འགྲིམས། །གུ་རུ་པདྨའི་བླ་བཙོང་ཡིད་རེ་མུག ། དེ་འདྲའི་གཏེར་སྟོན་ལུས་སུ་བདག་མ་གྱུར། །བདག་ནི་སྐྱེ་བ་ཚེ་རབས་ཐམས་ཅད་དུ། །རིག་འཛིན་ཡབ་སྲས་རྣམས་ཀྱིས་རྗེས་བཟུང་ནས། །སྨིན་གྲོལ་གདམས་པའི་དཔལ་ལ་ལོངས་སྤྱོད་ཅིང་། །ཐེག་དགུའི་གནད་ལ་རིམ་བགྲོད་མི་ལྟོས་པར། །ཐེག་མཆོག་རྫོགས་པ་ཆེན་པོ་མངོན་གྱུར་ནས། །ཐེག་ཆེན་འབྲས་བུའི་འོད་གསལ་རབ་སྨིན་ཤོག །ཅེས་པའང་དུས་མཐའི་གཏེར་མིང་འཛིན་པ་རང་ཅག་རྣམས་ཀྱི་སྤྱོད་པ་ལ་ཞེ་ཁྲེལ་ནས་སུ་ཁའི་མིང་གིས་སྨོན་ཚིག་ཏུ་བྲིས་པའོ། །དགེའོ།། །། TI1395-508 ༣.༄༅། ཆོས་ཉིད་མཁའ་འགྲོའི་གསང་མཛོད་ལས་ཡེ་ཤེས་ཌཱ་ཀིའི་གསོལ་འདེབས་བྱིན་རླབས་སྤྲིན་ཕུང་བཞུགས༔ ཨེ་མ་ཧོཿ ཆོས་ཉིད་སྣང་བ་དག་པའི་ཞིང་ཁམས ནས༔ ཉམས་སྣང་གོང་འཕེལ་པདྨ་སཾ་བྷ་ཝ༔ རིག་པ་ཚད་ཕེབས་ཡེ་ཤེས་མཚོ་རྒྱལ་མ༔ བློ་འདས་གཉུག་མའི་ངང་དུ་གསོལ་བ་འདེབས༔ ཆོས་ཉིད་ཡེ་གྲོལ་དགོངས་པ་མངོན་གྱུར་ནས༔ འཇའ་ལུས་གཞོན་ནུ་བུམ་སྐུར་གྲོལ་བར་ཤོག༔ ཅེས་མཁའ་འགྲོའི་གསོལ་འདེབས་འདི་ཡང་པདྨ་རྡོ་རྗེའི་བཞེད་སྐོང་དུ་སུ་ཁའི་མིང་གིས་རྫུན་རིས་སུ་བྲིས་པའོ། དགེའོ།། །།ཉམས་བྱུང་སྐོར་ལས་བར་དོའི་མཐོང་སྣང་ངེས་བྱུང་གསལ་སྒྲོན་བཞུགས། ཐུགས་རྗེའི་བདག་ཉིད་སྤྱན་རས་གཟིགས །འཇིགས་པ་ཀུན་སྐྱོབས་འཕགས་མ་སྒྲོལ འགྲོ་བའི་མགོནཔོ་པདྨ་འབྱུང་། །ཡོངས་འདུས་དྲིན་ཆེན་བླ་མ་ལ །གསོལ་བ་འདེབས་སོ་ཐུགས་རྗེས་གཟིགས །བདག་དང་བར་དོའི་སེམས་ཅན་རྣམས། །ལས་སྣང་འཁྲུལ་པའི་འཇིགས་ལས་སྐྱོབས །ཨོ་མ་ཎི་པདྨེ་ཧཱུྃ་ཧྲཱིཿ ལར་འགྲོ་བ་རིགས་དྲུག་སྡུག་བསྔལ་ཆེ། །སྒོས་བར་དོའི་སྣང་བ་ཡ་རེ་ང་། །ལས་གང་བྱས་རང་གི་ལུས་ལ་སྨིན །ནོར་ལོངས་སྤྱོད་ཆེ་ ཡང་ཁྱེར་དབང་མེད། །ཕོ་དཔའ་རྩལ་ལྡན་ཀྱང་འཐབ་ས་མེད། །གཏམ་ཁ་ལྕེ་མཁས་ཀྱང་བཤད་ས་མེད། །མི་གཡོ་ཅན་སེམས་རྩ་འགུལ་ས་མེད། །གཉེན་ཉེ་འབྲེལ་དཔུང་རོགས་ཁྲིད ས་མེད། །རང་གཅིག་པུར་སྐྱབས་བྲལ་མགོན་མེད་དུ། །ལས་དགེ་སྡིག་གཉིས་ཀྱི་རྣམ་སྨིན་ཁུར། །ཡ་ང་བའི་གནས་སུ་འཁྱམས་ནས་འགྲོ། །ལས་བདེ་སྡུག་གཉིས་ལས་མྱོང་རྒྱུ་མེད། །སྐྱབས་དཀོན་མཆོག་གསུམ་ལས་རེ་ས་མེད། །ཨོཾ་མ་ཎི་པདྨེ་ཧཱུྃ་ཧྲཱིཿ ཨོཾ་མ་ཎིཔདྨེ་ཧཱུྃ་ཧྲཱིཿ ཨོཾ་མ་ཎིཔདྨེ་ཧཱུྃ་ཧྲཱིཿ ལས་སྣང་འཁྲུལ་པའི་སེམས་ཅན་རྣམས །བར་དོའི་སྣང་བ་ཤར་བའི་དུས། །ལས་རླུང་དྲག་པོས་རྒྱབ་ནས་དེད། །གཤིན་རྗེའི་ཕོ་ཉས་མདུན་ནས་བསུ །གཤིན་ལམ་འཕྲང་རིང་འགྲིམ་པའི་ཚེ། །རང་གིས་ལས་བསགས་དབང་གིས་ནི། བཟོད་མེད་སྡུག་བསྔལ་འདི་འདྲ་མྱོང་། །ལ་ལ་ལྕགས་སྲེག་སེར་བས་བཅོམ། །ལ་ལ་རླུང་དམར་དྲག་པོས་དེད། །ལ་ལ་གཤིན་རྗེའི་ཕོ་ཉས་དེད །སོད་རྒྱོབ་འུར་སྒྲ་ཆེམ་ཆེམ་བྱེད། མཚོན་ཆ་སྣ་ཚོགས་ལུས་ལ་གདབ །མི་བཟོད་སྡུག་བསྔལ་དུ་མ་མྱོང་། །ཨོཾ་མ་ཎི་པདྨེ་ཧཱུྃ་ཧྲཱིཿ སྐྱབས་དཀོན་མཆོག་གསུམ་དང་སྤྱན་རས་གཟིགས། །རྗེ་འགྲོ་བའི་མགོན་པོ་པདྨ་ ༄༅། །འབྱུང་། །དོན་དབྱེར་མེད་དྲིན་ཆེན་བླ་མ་མཁྱེན། །ཡིད་མོས་གུས་གདུང་བས་གསོལ་བ་འདེབས། །སྤྱིར་འགྲོ་བ་ཡོངས་ལ་ཐུགས་རྗེས་ཟུངས །སྒོས་བར་དོའི་སེམས་ཅན་བསྐྱབ་ཏུ་གསོལ། ལས་བསགས་པའི་རྣམ་སྨིན་ལུས་ལ་འཁོར། །མཚོན་ཆ་མང་པོས་བཅད་གཏུབ་བྱེད། །སྡུག་བསྔལ་དུ་མས་རྟག་ཏུ་མནར། །ཨོཾ་མ་ཎི་པདྨེ་ཧཱུྃ་ཧྲཱིཿ དེ་ནས་མི་ཆུང་དཀར་ནག་དང་། །འཕྲད་སྐབས་བདག་གིས་འདི་སྐད་སྨྲས །མི་མེད་ཡུལ་ནས་མི་གཉིས་བྱུང་།ཁྱོད་གཉིས་གང་དུ་འགྲོ་བ་ཡིན །ཉེས་མེད་སྐྱེ་འགྲོཿ ཡུན་ཅིག བསྡད་ཚེ་སྣང་བ་འགྱུར། །ཨོཾ་མ་ཎི་པདྨེ་ཧཱུྃ་ཧྲཱིཿ ཨོཾ་མ་ཎིཔདྨེ་ཧཱུྃ་ཧྲཱིཿ ཀྱེ་མ། ཉམས་ཐག་འགྲོ་བ༔ དོན་གཉིས་འགྲུབ་པའི་ལུས་མཆོག་ཐོབ་པར་ཤོག ཅེས་དང་། མ་ཎི་ལན་གསུམ་གྱི་རྗེས་སུ་ཀུན་གྱི་ཁས་ལེན་ཅི་འགྲུབ་རེ་བྱས་མཐར་བསྔོ་བ་ནི བདག་གཞན་རྣམས་ཀྱི་དགེ་བའི་རྩ་བ་འདིས་མཚོན་དུས་གསུམ་དུ་བསགས་པའི་དགེ་ཚོགས་ཅི་མཆིས་པ་ཐམས་ཅད་དྲིན་ཆེན་ཕ་མ་རྣམས་ཀྱིས་གཙོར་བྱས་པའི་རི་ལ་གནས་པའི་རི་དྭགས། །ཆུ་ལ་གནས་པའི་སྲོག་ཆགས ས་ལ་གནས་པའི་འབུ་སྲིན བྲག་ལ་གནས་པའི་བྱ་རིགས། མཛེ་མོ་མང་པོའི་རྡོ་ལེ ཆེ་བ་ལག་གིས་བསད་ཚོད། ཆུང་རྐང་འོག་ལ་བསད་པ། རིག་མ་རིག་ལ་བསད་པ། ཤསྣ་བརྒྱ་ཟོས་པ། ཁྲག་སྣ་སྟོང་འཐུང་བ། དཀརའོ་ཞོ་འཐུང་བ། དམར་ཤ་ཁྲག་ཟོས་པ འོག་རྟ་འགེལ་མཛོལ་སོགས་རྒྱུ་ཟས་ཁ་ལག་གི་འབྲེལ་ཐོགས་བསྔོ་གང་དགོས་རྣམས་ཀྱིས་གཙོར་བྱས་པའི་ཁམས་གསུམ་འགྲོ་བ་རིགས་དྲུག་ལ་གནས་པའི་སེམས་ཅན་ཐམས་ཅད་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པའི་ཕྱིར་དུ་བསྔོ། །ཨོཾ་མ་ཎི་པདྨེ་ཧཱུྃ་ཧྲཱིཿ ལན་གསུམ་མཐར། ཀུན་བཟང་རྡོ་རྗེ་འཆང་ཆེན་མན་ཆད་དང་། །སོགས་སྨོན་ལམ་གྱིས་མཐའ་བརྒྱན་པར་བྱའོ། །ཞེས་པ་འདིའང་རང་ལོ་ཉེར་གཅིག་ལོར་སྣང་ཉམས་ཤར་བའི་སྐོར་ལས་ཁོལ་དུ་ཕྱུངས་ཏེ། རིགས་ཀྱི་མྱུ་གུ་ཆོས་དབྱིངས་སྒྲོན་མ་དང་རང་སློབ་དད་དམ་ལྡན་པ་ཤེས་རབ་སྒྲོན་མ་གཉིས་ཀྱིས་འདོད་དོན་ནན་ཆེར་བསྐུལ་བ་ལ་བརྟེན་ནས་རང་གཞན་ལ་ཕན་པའི་བློས་ཀུན་བཟང་ཆོས་ཉིད་དབང་མོས་ཅུང་ཟད་ཁྲིགས་སུ་བསྡེབས་ནས་ས་མོ་ཡོས་ཀྱི་ལོར་བྲིས་པ་འདིས་ཀྱང་ཁམས་གསུམ་འཁོར་བའི་རྒྱ་མཚོ་དོང་ནས་སྤྲུགས་ནུས་པའི་རྒྱུར་གྱུར་ཅིག། དགེའོ།། ཀྱེ་ཧོ། སྤང་ལྗོངས་དབེན་པའི་གནས་ན །སྔོན་སྨོན་ལས་ཀྱིས་འབྲེལ་བའི །གསེར་ ༄༅། །ལྡན་ངང་ཁྱུཕོ་མོ། །ལྷ་ལྡན་ཁུ་བྱུག་ང་དང་། །འབྲེལ་ཟབ་ཅུང་ཟད་ཆེ་ཡང་། །གནས་ཚང་བྲག་ལ་བཅའ་བའི། །ཐང་དཀར་རྒོད་པོའི་གཤོག་འགྱུར། །སྤུ་གྲིའི་རྣོ་ལས་ངར་ཆེ། །ཁུ་བྱུག་ནུས་པ་ཆུང་བས། །བཟོད་ཐབས་མེད་པའི་དབང་གིས །སྐབས་རེར་གནས་ཡུལ་གཞན་དུ། །གྲངས་ལྷགས་སྡུག་བསྔལ་ཆེ་ཡང་། །མི་འགྲོ་འདུག་ཐབས་མ་བྱུང་། །དྲི་བྲལ་དར་དཀར་ལྟ་བུའི །བློ་སེམས་བསམ་པ་དཀར་པོ། །ཁྱེད་ཅག་རྣམས་ལ་འཆང་བས །དབེན་རི་སྒྲུབ་ཚུགས་ཟུངས་ལ། །གྲོགས་ངན་དབང་དུ་མ གཏོང་། །སྒོ་གསུམ་ཆོས་མིན་མ་བྱེད། །ཁུ་བྱུག་སྙིང་གི་ཐིག་པ །ཡང་ཟབ་མན་ངག་ཟབ་མོ། །ཉམས་ལེན་གནད་ལ་རེམ་མཛོད །ཤར་གྱི་རྟ་བདུན་དབང་པོས །སྤུ་གྲིའི་རྣོ་ངར་གཞོམ་ན། །ངང་ངུར་ཁྱུ་དང་འགྲོགས་ནས། །གཤོག་རྩལ་ངལ་དུབ་ཆེ་ཡང་།ཡིད་མཐུན་ཁྱེད་ཅག་བསམ་ནས །དུས་མེད་དུས་སུ་སླེབས་འོང་། །དེ་བར་རང་གཞན་དོན་དུ། སྤྱོད་ལམ་ཚུལ་བཞིན་ཞིབ་དགོས། །སྤང་ལྗོངས་ཡིད་དགའ་མེད་ན། །ཁུ་བྱུག་བརྟེན་པའི་གནས་བྲལ། །ཨ་ལ་ཀུ་རེ་ཡིན་ནོ། །མི་འགྱངས་མྱུར་དུ་མཇལ་འོང་། །ཞེས་རིགས་མཐུན་ གྱི་རིག་རྒོད་ཤེར་ལྷ་ཡིས་བསྐུལ་ནས རིགས་ངན་གྱི་རྒན་མོས་ཨ་མཚར་དུ་སྨྲས་སོ །དུས་འཛིན་ས་ཡོས་ལོར་རང་ཡུལ་འཁྱར་ལ་འགྲོ་སྐབས་རང་སློབ་ཤེས་རབ་ལྷ་མོ་ལ་བདེ་བའི་རྡོ་རྗེས་གདམས་པའོ།། སྔོན་འབྲེལ་ལས་ཀྱིས་བསྡུས་པའི །སྙིང་འདྲའི་བུ་སློབ་རྣམས་ཉོན། །ཤར་གྱི་ཁུ་བྱུག་སྔོན་མོ། །ལས་འཕྲོའི་སྟོབས་ཀྱིས་བསྐུལ་ནས །ལྷོ་ཕྱོགས་མུན་པའི།ཁྲོད་ལ། །སྔོན་སྨོན་སྟོབས་ཀྱིས་འཕངས་སོང་།སྟག་སེང་དཔའ་རྩལ་ལྡན་པས །ཡུལ་དེའི་མུན་པ་སེལ་བྱེད། །དགོས་འདོད་འབྱུང་བའི་ནོར་བུ། །འཛམ་གླིང་སྤྱི་ཡི་རྒྱན་གཅིག འོད་ཀྱིས་མུན་ཀུན་སེལ་ནས །ཁྱུང་འབྲུག་ཐང་དཀར་ངང་ཁྱུས། །རང་སྐལ་ནོར་ལ་སྤྱོད་ནས། །དོན་གཉིས་འོད་བརྒྱ་འགྱེད་བྱུང་། །སྤང་ལྗོངས་གཟི་མདངས་ངོམས་ནས། །གཡུ་འབྲུག་ངར་སྐད་སྒྲོགས་དུས། །ཁུ་བྱུག་རང་ཡུལ་སྙེགས་བསམ། །འོན་ཀྱང་ནུབ་ཀྱི་ཉི་ཟླ། །སྐབས་སྐབས་བཤོལ་མ་བྱེད་འདུག །དེ་ལྟར་སྐབས་ལྡན་མེད་ཚེ། །གསེར་གྱི་རྭ་རྩེ་ངོམས་དུས། ལྷོ་ནས་ཤར་དུ་རྒྱུ་ངེས །དེ་བར་ངེས་པ་མེདཔས། །གནས་ཚང་བྲག་ལ་བཅའ་བའི། ཐང་དཀར་ཐང་སྨུག་ཚོགས་ཀྱིས། །སྔར་གྱིས་དམ་བཅའ་བཞིན་དུ། །རང་ ༄༅། །སྐལ་གདམས་པར་ལོངས་སྤྱོད། །རྩལ་གསུམ་ལུས་ལ་རྫོགས་ཚེ། །གནམ་འཕང་གཅོད་ལ་ངལ་མེད། །དེ་ལྟར་ཚིག་མིན་དཔེ་ཡིན། །ངེས་མེད་ཡུལ་ཀུན ཉུལ་བའི །ཁུ་བྱུག་མ་བུའི་ཚོགས་ཀྱིས །ཡིད་མཐུན་བྱ་ཚོགས་རྣམས་ལ །ངེས་དོན་ངེས་པའི་གཏམ་འདི། །སྒྱུ་མའི་ཚིག་རིས་འདི་ཉིད། །དུས་གསུམ་བྱ་བའི་གནས་ཚུལ། ། སྦ་གསང་མེད་པར་གུས་ཕུལ། དཔྱོད་ལྡན་རྣམས་ཀྱིས་དཔྱོད་དང་། དཔྱིད་ཀྱི་རྒྱལ་མོའི་གླུ་དབྱངས། །དཔྱིདཀའི་ཉི་མ་འགྲོ་ཐབས། །དཔྱད་ཀྱང་ཨེ་ཤེས་མ་གོ། །དཔྱོད་ཤེས་རབ་ཏུ མཁས་ན། །དྲང་ངེས་གཉིས་ཀྱི་གཏམ་ཡོད །བྱུང་དང་འབྱུང་འགྱུར་ཐམས་ཅད། །གབ་གསང་མེད་པར་ཞུས་ཡོད། །ཧ་ཧ་རྒན་མོའི་སྨྱོ་གཏམ་མཚར་གླུ །ཧོ་ཧོ་གང་ཤར་ཡིག་རིས བྲིས་ནས། །ཧེ་ཧེ་བུ་སློབ་རྣམས་ལ་གུས་ཕུལ། དགེའོ།། །། TI1395-515 TI1395-516 ༄༅། །ཐོད་རྒལ་འཇའ་ལུས་མངོན་འགྲུབ་ཀྱི་སྐབས་དོན་ལ་ཐོག་མར་མཆོད་བརྗོད་ཀྱི་གནས་དང་ཉེ་གནས་ཁྱད་པར། ཕྱི་གནས་ཡུལ་དུར་ཁྲོད་ལ་གནས་དང་། ནང་རྡོ་རྗེའི་ལུས་ལ་ཚང་བ་ལ་ཉེ་གནས། ཞིང་དང་ཉེ་ཞིང་ཡང་དེ་བཞིན་དང་། སྤྱིར་མཆོད་བརྗོད་སྐབས་དབྱིངས་དང་དབྱིངས་བཞུགས་ཀྱི་ཁྱདཔར་དབྱིངས་ཆོས་སྐུ་དང་། དབྱིངས་བཞུགས་གཟུགས་སྐུ་བཞིན་ལག་གི་རྣམ་པ་ཅན་དུ་བཞེངས་པའོ། །ཕྱིའི་རུ་ཤན་སྐབས་སུ་གནས་ཀྱི་བྱེ་བྲག་ནི རབ་དུར་ཁྲོད། འབྲིང་ནགས་ཚལ། ཐ་མ་མཚོ་གླིང་སོགས་མིའི་རྒྱུ་འགྲུལ་མེད་པའི་སར་རྣལ་འབྱོར་པས་ལུས་གཅེར་བུར་ཕྱུངས་ནས་སྨད་དུ་གསང་གོས་མནབས། ཨང་རག་ཡིན་ཀྱང་ཆོག །རྣལ་འབྱོར་མ་རྣམས་ཀྱིས་གསང་གོས་དང་སྟོད་གཡོགས་མནབས ཇོ་སེར་གཉིས་གནས་སོ་སོར་འགྲོའོ། །ནང་གི་རུ་ཤན་སྐབས་སུ་ཐུན་སྐབས་རེ་ལ་དམྱལ་བའི་ས་བོན་ལ་དམིགས་ནས་འབྲུ་གསུམ་བཟླས་པ་ཅི་ནུས་བཟླ། མཐར་ཐུན་གྲོལ་རན་དུས་ཡི་དྭགས་ནས ལྷའི་བར་རེ་རེ་བཞིན་འབྲུ་གསུམ་བཟླས་པ་བརྒྱ་རྩ་རེ་བཟླ་ཞིང་ཐུན་གྲོལ་བར་བྱའོ། །ཐུན་གཞན་རྣམས་ལའང་དེས་འགྲེས་སོ། །དམྱལ་བ་སྦྱངས་ཚར་རྗེས་དམྱལ་བ་དོར་ཏེ་ཡི་དྭགས་ནས་ མགོ་བཟུང་ཞིང་གོང་ལྟར་བྱེད། དེའི་འགྲོས་ཀྱིས་རིགས་དྲུག་པོ་སོང་རྗེས་ཁ་སྐོང་འབུམ་ཐེར་གྱི་ཚེ་ན་རིགས་དྲུག་ལྷན་དུ་རིམ་བཞིན་སྤྱི་ལྟར་མས་རིམ་ནས་ཡར་སྦྱངས། ཡས་ནས་མར་སྦྱངས། མས་ནས་ཡར་སྦྱངས་ཏེ་ཐུན་གྲོལ ཐུན་གཞན་མ་རྣམས་ལའང་དེས་འགྲེས་སོ། །འདི་སྐབས་འབྲུ་གསུམ་བཟླས་པ་འབུམ་ཐེར་བདུན་པོ་འགྲོ་དགོས་སོ། །གསང་བའི་རུ་ཤན སྐབས་ཀྱི་ལག་གཉིས་ཀྱིས་རྡོ་རྗེ་རྩེ་གཅིག་གི་རྒྱ་བྱས་ཏེ། མགོ་ལ་མ་རེག་ཙམ་བྱ་བ་དང་། རང་ལུས་རྒྱས་གདབ་སྐབས་སུ་རང་ལུས་ཧཱུྃ་ཡིག་རྡུལ་ཕྲ་རབ་ཀྱི་ཆ་ཙམ་ཚོགས་པ་ལ་སེམས་བཟུང་། ཡང་ཧཱུྃ་ཡིག་གནས་འགྱུར་ནས་ཕྱག་ན་རྡོ་རྗེ་དེའི་གྲངས་དང་མཉམ་པར་བསྒོམ་ནས་ཧཱུྃ་ཡིག་གོང་ལྟར་གསལ། མཐར་ཐམས་ཅད་ཐུགས་ཀའི་ཧཱུྃ་ལ་བསྡུ ཧཱུྃ་ཡིག་ཀྱང་འཇའ་ཚོན་ནམ་མཁར་ཡལ་བ་ལྟར་ཆོས་ཉིད་ཀྱི་དབྱིངས་སུ་བསྡུའོ། །མཉན་བཙལ་སྐབས་སུ་ངལ་གསོ་བར་བྱ་ཞེས་པ་ནི། ཆོས་ཉིད་ཀྱི་དབྱིངས་སུ་མཉམ་པར་བཞག་པ་ལ་གསུངས། རྣལ་དབབ་སྐབས། སེང་གེ་ཉལ་སྟབས་སྤྱི་ལྟར་དང་། སོར་གཞུག་སྐབས་སུ་ལག་གཡས་སྡིགས་མཛུབ་ནམ་མཁར་འཕང་ནས། གཡོན་སྡིགས་མཛུབ་དཀུར་བརྟེན། རྐང་པ་གྱད་ཀྱི་འདོར་སྟབས་བྱ། མིག་ ༄༅། །གཉིས་ལག་གཡས་ཀྱི་སྡིགས་མཛུབ་ཀྱི་ཕྱོགས་སུ་འབྲུ་ཚུགས་བལྟ། ངག་གིས་ཧ་ཧ་བརྗོད། ཡང་གཡོན་ཕྱོགས་སུ་གོ་ལྡོག་ནས་དེ་ལྟར་བྱ་ཞིང་ཧེ་ཧེ་བརྗོད ཡང་སྡིགས་མཛུབ་གཉིས་ནང་བསྐོར་བྱེད་བཞིན་དུ་རུ་ལུ་རུ་ལུ་བརྗོད་ནས་མྱུར་བར་རྒྱུགས། དེ་ཐོག་ནས་ཡང་དལ་བུས་འགྲོ། དེ་ནས་གཡས་སྡིགས་མཛུབ་ནམ་མཁར་འཕང་བ་ནས་བཟུང་གོང་བཞིན་དལ་བུས་འགྲོ་བ་ཡན་ལན་གྲངས་ཅི་ནུས་ཀྱི་བར་བྱ། དཀའ་བའི་ཚེ་ན་བྱང་ཆུབ་སེམས་དཔའི་འདུག་སྟངས་བྱས་ནས་མཉམ་པར་