Tibetan
ཏ་དང་མཇལ་དཀའ་སྙམ་ནས་འབྲལ་མི་ཐུབ་པ་ལྟ་བུ་བྱུང་ཡང་མི་མངོན་པའི་ཚུལ་གྱིས་ཨ་ཏ་ལ་དགའ་དགའ་བྱས་ནས་ཕྱིར་འོང་བས། ཡིད་བཞིན་ནོར་བུ་དཔོན་གཡོག་ལྷོ་གནས་ནས་ཕྱིར་ཕེབས་འཐོན་འདུག་པས། རྗེ་དེ་ཉིད་གཏེར་སྟོན་ངེས་པ་རེད་ཟེར་ཞིང་ཀུན་གྱིས་ཁྱིམ་ལ་གདན་འདྲེན་བྱས། བདག་གིས་ཀྱང་ཚེ་དབང་ཞིག་ཞུ་དགོས་སྨྲས་པས། ཨ་ཇོས་དེ་ལྟར་བགྱི་སྟ་གོན་བསྒྲིགས་ནས་ཚེ་དབང་ཐོབ། དེ་སྐབས་རྗེ་དེ་ཉིད་ཀྱི་མདུན་གཡོག་འོད་འབར་ཞེས་པ་ཞིག་འདུག་པས་དེ་ལ་བདག་གིས་ཁམས་ཕྱོགས་ཀྱི་ས་ཆའི་ལོ་རྒྱུས་དྲིས་པས་དབུས་སྐད་མ་གོ་ནས་བཏང་སྙོམས་སུ་བཞག །དེ་དག་གི་ནང་ནས་བཙུན་མ་འཇིགས་སྒྲོན་ཞེས་པས་དབུས་སྐད་གོ་འདུག་པར་དེ་ལ་དྲིས་པས་རྒྱུ་ཡོད་ན་སྐྱིད། རྒྱུ་མེད་ཚོ་སྡུག །ཆོས་ཅི་དགོས་ཀྱང་ངེད་ཚོའི་ས་ཆ་ན་ཡོད་པ་རེད་ཟེར། བདག་གིས་དེ་ན་རྫོགས་པ་ཆེན་པོའི་ཆོས་ཨེ་དར་སྨྲས་པས། མོ་ན་རེ། ཆོས་རྫོགས་པ་ཆེན་པོ་ངེད་ཀྱི་སྤྲུལ་སྐུ་རྣམས་ཀྱིས་གསུང་ཐུབ་ངེས་ཡིན་ཟེར། ཡང་བདག་གིས་ཁྱེད་ཅག་ཕ་ཡུལ་ལ་ནམ་འགྲོ་སྨྲས་པས། མོ་ན་རེ། འདི་ཟླའི་ཉི་ཤུ་གསུམ་ལ་འགྲོ་ངེས་ཡིན་ཟེར། དེ་ནས་ཟླ་བ་བཅུ་གཉིས་པའི་ཚེས་བཅུ་དགུའི་ནང་མོ་བཀའ་དྲིན་ཅན་གྱི་དཔོན་གཡོག་སྔོན་ལ་བྱོན་སོང་བས། བདག་འདུག་ཐབས་དང་བྲལ་ཀྱང་བྱེད་རྒྱུ་མ་རྙེད། ཉི་ཤུ་གསུམ་གྱི་ཉིན་དབུས་སྒར་པ་ཐམས་ཅད་བཀྱག་སོང་བས། གཡོག་མོ་གཉིས་དང་ང་རང་གསུམ་སྣང་གཡེང་ལ་འགྲོ་བའི་ཚུལ་གྱིས་རྗེ་ཉིད་ཀྱི་བཞུགས་གནས་ཁང་སྟེང་ལ་ཅོག་བུ་ཕུབ་ནས་བཞུགས་པ་དེའི་ཤུལ་ལ་སོང་སྟེ་ བཱ༔ བསྐོར་བ་ཞིག་བྱས་པས་ཕྲེང་བ་རྡོག་པོ་གཅིག་རྙེདབྱུང་། བདག་གི་བསམ་པ་ལ་རྟེན་འབྲེལ་ལེགས། ཡི་དམ་ལྷའི་སྙིང་པོ་འདྲེན་བྱེད་ཡིན་པས་ནམ་ཞིག་ན་བདག་བླ་མ་འདིའི་ཐུགས་རྒྱུད་ཀྱི་ཡོན་ཏན་ཐོབ་པ་ཞིག་འོང་བར་གདའསྙམ་སྟེཕྲེང་བ་མགུལ་དུ་བཏགས་ནས་ཁྱིམ་དུ་འོངས། གཡོག་མོ་གཉིས་ལ་སྔར་གྱི་བཀའ་ཤོག་བྱིན་ཏེ་ལུགས་གཉིས་ཀྱི་ཁ་ཏ་བྱས་ཚེ། ཁོང་གཉིས་ན་རེ། ཁྱོད་ཀྱིས་འདི་ལྟར་ཅིའི་ཕྱིར་མཛད། ཁྱེད་གར་བྱོན་སར་ངེད་གཉིས་ཁྲིད་པར་ཞུ་ཟེར་ནས་ངུ་འདུག །བདག་གིས་རྟེན་འབྲེལ་ལེགས་ང་ཞག་ཤས་ནས་གནས་ལ་འགྲོ་རྒྱུ་ཡིན་པ་ལ་ཁྱོད་གཉིས་ཅི་ལ་ངུ་། དེ་དུས་སྟོན་མོ་བཞག་ནས་ཟླ་བ་ལྷག་ཙམ་ལ་འུ་ཅག་མགྲོན་འབོད་ལ་སོང་ན་དེའི་བར་ལ་བཀའ་ཤོག་བོར་འགྲོ་སྙམ་ནས་ཁྱོད་གཉིས་ལ་སྤྲད་པ་ཡིན་མ་གཏོགས། ང་གཞན་ཞིག་ཏུ་འགྲོ་བསམ་པ་ཨེ་ཡིན་སྔོན་ལས་འདི་དཀའ་མོ་རེད་ཟེར་ཐག་མི་ཆོད་སྨྲས། དེ་ནས་ཟླ་ཁྱིམ་དེའི་ཉི་ཤུ་བདུན་གྱི་ནུབ་མོ་འགྲོ་བའི་དུས་ཡིན་སྙམ་ནས། ལྐོག་ཏུ་མ་ཆང་ཉོས་ནས་གཡོག་མོ་གཉིས་ལ་བླུད་པས་ཁོང་གཉིས་ཆང་གིས་མྱོས་ནས་སྒོ་ལམ་ལ་ཉལ་ས་ཡོད་པས་དེ་ཀར་ཉལ་སྡོད་སྨྲས་པས་དེ་ལྟར་བྱེད་འདུག །བདག་ནི་ཡར་ལངས་ནས་མགོ་ཆ་རྒྱན་གོས་ཐམས་ཅད་ ཕུད། གཡོག་མོའི་ཕྲུག་ལྭ་གསར་པ་ཞིག་ཡོད་པ་དེ་སྟེང་ལ་གྱོན། རང་གི་གོས་ཆེན་གྱི་ལྭ་དེ་ནང་དུ་གྱོན། དེ་མིན་དངོས་རྫས་ཅུང་ཟད་མེད་པར་བྱས་ཏེ། སྔར་ཨ་ཏས་གནང་བའི་ཀ་ར་དང་ཤིང་ཐོག་རྣམས་ཆོས་སྒྲུབ་པའི་ལམ་རྒྱགས་བྱེད་སྙམ་སྟེ་ལག་འཐེན་ནང་དུ་སྦས་ཡོད་པ་དེ་གཅིག་པུ་ཁྱེར་ནས། ཉི་མཐོང་གི་སྒོ་བཅག་ཅིང་དེའི་ནང་ནས་ཕྱིར་བུད་དེ་ཁང་པ་རྩེགས་གསུམ་ཡིན་པའི་སྐས་གཉིས་ལས་ག་ལེར་བབ། རྒྱལ་སྒོ་ལ་སྒོ་སྲུང་ཡོད་པས་མི་ཐར་བ་འདུག་པས་བརྩེགསགཅིག་མཐོན་པོ་ཞིག་ཡིན་ཀྱང་དེའི་སྟེང་ནས་ཕྱི་རོལ་ལ་མཆོང་སོང་བས་རྐང་པའི་བོལ་ཚིག་གཉིས་པོ་སྟེམ་སྟེམ་བྱེད་འདུག་ཀྱང་། ཁྱིམ་པས་གོ་འགྲོ་སྙམ་ནས་རྗེ་བཙུན་སྒྲོལ་མ་མཁྱེན་ནོ་བརྗོད་ནས་རླུང་ཅུང་ཟད་ཞིག་བཟུང་སྟེ་འོང་བས། ལམ་དུ་འདྲེ་རྐང་རྒྱུག་སྒྲོགས་དང་། བོང་བུ་སུག་པོ་རྩེ་ཞེས་པ་མགོ་བོང་བུ་གཟུགས་བྱད་བནྡེ་གཟན་དང་ཤམ་ཐབ་སོགས་གྱོན་པ་ཅན། དེ་ལ་སོགས་པའི་ཀུན་གྱིས་མཐོང་ཆོས་སུ་གྱུར་པའི་འདྲེ་རིགས་དུ་མ་དང་འཕྲདཀྱང་ཡ་ང་བག་ཚ་མེད་པར་ཕྱིན་པ་ཡིནཀྱང་། བག་མ་རི་ཞེས་པ་གེ་སར་ལྷ་ཁང་ཡོད་པའི་བྲག་སྣེ་ལམ་ཁར་ཟུག་པ། མདུན་དུ་ཆུ་ཆེན་པོ་ཡོད་པ། གཡས་གཡོན་ཀུན་བྱེ་མའི་རི་ཐང་ཡིན་པ་ཞིག་ཡོད། དེ་ཀར་ཐོན་སོང་བས་ བྃ༔ དམན་མོ་ཐམས་ཅད་འཚོགས་འདུག་པ་དེ་རྣམས་ཀྱི་གཙོ་མོ་འཇིགས་སུ་རུང་བ་མཆེ་བ་དཀར་སང་སང་བྱེད་ཅིང་ཨམ་གཙིགས་བསྡམས་པ། ནུ་མ་གཉིས་ཕྲག་པ་གཡས་གཡོན་དུ་འཕངས་ནས་ལག་གཉིས་མཉམ་པས་མི་མགོ་ཞིག་ཁྲག་གི་དམར་ཙ་རེ་བྱེད་པ་ཅན་ཞིག་ཟ་གྱིན་འདུག ཁོ་རྣམས་ཀྱིས་མེ་ཞིག་སྔོ་ལེམ་ལེམ་འབུད་ཅིང་། གཟུགས་མི་མངོན་པར་ངག་ནས་ཧབ་ཤ་ཧབ་ཤ་ཟེར་ཞིང་འདུག་པས། བདག་སྔངས་སྐྲག་ཆེན་པོས་འགྲོ་མ་ཕོད་པ་ལྟར་བྱུང་ནས་ཅི་དགོས་ཕྱིར་སོང་ན་ད་ཕན་ཆད་ཁྱིམ་ལས་མི་ཐར། ལམ་དུ་སོང་ན་འདི་དག་གིས་ང་ཟ་ཨེ་འཇོག་སྙམ་ཡོད་ཚེ། སྔར་གྱི་བག་ཆགས་སྒྱུ་ལུས་སྟོང་ར་བསྒོམས་པ་དེ་དྲན་ནས་བདག་གཞན་སྟོང་ཉིད་གསུམ་ལྡན་གྱི་ངང་ནས་ལམ་ལ་ཐེ་ཚོམ་མེད་པར་བུད་སོང་བས། ཁོང་གཙོ་འཁོར་ཐམས་ཅད་བཤུག་པའི་སྒྲ་དང་བཅས་ཏེ་ཡལ་སོང་། ང་རང་ནི་མགྱོགས་པ་རྟ་རྒོད་ལྟ་བུས་ས་ཆོད་ཅིང་། ནང་པར་ཉི་དྲོས་དུས་སྟོད་ལུང་མཚུར་ཕུག་གི་སྟོད་ནས་དབུས་སྒར་པ་རྣམས་རྗེས་ཟིན་པར་བྱུང་བས། ཀུན་གྱིས་གཏམ་ལབ་ཀྱང་ང་རང་གིས་ཚུར་མི་གོ། ཕར་བཤད་ཀྱང་ཁོང་རྣམས་ཀྱིས་མི་གོ་བར་འདུག །ང་རང་གི་བསམ་པ་ལ་འདི་རྣམས་གཟུགས་ནི་མི་རེད་དེ། གོས་ནི་ ཀོ་བ་གྱོན་འདུག །གཏམ་བཤད་དུས་ནི་མཐའ་འཁོབ་པ་ཀླ་ཀློ་ཞིག་དང་འདྲ་བས་དེ་དག་གི་ཡུལ་ལ་ཆོས་རྫོགས་པ་ཆེན་པོ་ཞེས་པ་དེ་དར་བར་དཀའ་འདུག །འོན་ཀྱང་བླ་མ་དྲི་མེད་འོད་ཟེར་ཁོང་ལ་གསོལ་བ་བཏབ་ནས་སོང་ན་ཤི་ཆོས་རྣམ་དག་ལོས་འགྲུབ། མིན་ཀྱང་རིན་པོ་ཆེ་ཁོང་ལྟ་བུའི་གཟིགས་ལམ་དུ་བདག་ཚེ་འཕོས་སོང་ན་མི་གནས་ཀྱི་གཏན་སྲིད་ཟིན་ངེས་ཡིན་སྙམ་སྟེ། རང་སེམས་རང་གིས་གསོས་ནས་འོང་བས་བར་སྐབས་ཞིག་ཏུ་བཙུན་མ་འཇིགས་སྒྲོན་དང་འཕྲད་པས། མོ་ན་རེ། ཁྱོད་སྨྱོན་མ་ངེད་རྣམས་ཀྱི་རྗེས་ལ་ཅིའི་ཕྱིར་འོང་། ཁྱོད་ལ་ཟས་གོས་མེད་པས་མུ་གེ་དང་ལྷགས་པ་གཉིས་ཀྱིས་འཆི་མི་འགྲོ་ན་གནམ་ཟེར་ནས་བཤོལ་མ་བྱེད་འདུག །བདག་གིས་ང་འཆི་དགོས་ཚེ་ཁྱིམ་ལ་བསྡད་པ་དང་རྒྱལ་ཁམས་ཉུལ་བ་གཉིས་ལ་ཁྱད་པར་ཅི་ཡོད་ལས་ཆེ་སྨྲས། མོ་ན་རེ། ཁྱོད་ཡོང་དོནཅི་རེད། སྤྲུལ་སྐུ་རྣམ་པས་ཤོག་གསུངས་པ་ཨེ་ཡིན། དེ་མིན་ན་ཁྱོད་རང་ཁྱིམ་ལ་ལོངས་སྤྱོད་མངའ་ཐང་ཆེ་ཞིང་སྐྱིད་པོ་ཡིན་འདུག་པས་འདི་ན་ཅི་ལ་ཡོང་ཟེར ཡང་བདག་གིས་ང་ཇི་ལྟར་བྱས་ཀྱང་རང་ཁྱིམ་ལ་འདུག་དབང་མེད། ལོ་གསར་ཚེས་བཅུ་གསུམ་ཉིན་གནས་ལ་འགྲོ་རྒྱུ་ཁྲིག་ཁྲིག་བྱས་ཡོད་པས། དེའི་སྔོན་ལ་རང་བློ་ཐག་ཆོད་བྱས་ བྃ༔ ནས་ས་མཐར་འཁྱར་འགྲོ་སྙམ་པ་ཡིན་མ་གཏོགས། སྤྲུལ་སྐུ་རྣམས་ཀྱིས་ང་རང་ཤོག་གསུངས་པ་མིན། དོན་ཆེན་པོ་མེད་ཚེ་ཤོག་གསུངས་ཀྱང་མི་ཡོང་། ཅི་ལ་ཡོང་སྨྲས། དེ་ནས་ཡར་ལུང་པའི་ཕུ་སྟོད་ལ་སོང་བས་རི་རྩེ་ལ་ཕུག་པ་ཞིག་འདུག །དེའི་ནང་དུ་སོང་ནས་ང་རང་གི་སྐྲ་སྐེད་པར་སླེབ་ཐོན་འདུག་པ་དེའི་ཕྱེད་བྲེགས་ཏེ་ཕུག་པར་གཏེར་དུ་སྦས་ནས་ཡུལ་གཞི་ས་ཕྱོགས་ཐམས་ཅད་ལོངས་སྤྱོད་རྒྱས་པར་ཤོག་ཅིག་སྨོན། དེ་དུས་རང་གི་སྐེ་རྒྱན་ཆུང་བ་དེ་མགུལ་དུ་འདུག་པས་ཅི་དགོས་སྙམ་ནས་ལྷམ་ཡུའི་ནང་དུ་སྦས། ཉིན་ཞག་མང་པོར་ཟས་སྐོམ་མ་རྙེད་པས་སྐོམ་བྱུང་བས། ཆུ་ཁ་ཞིག་ཏུ་སོང་ནས་ཆུ་ཞིག་འཐུང་སྟེ། སྔར་ཨ་ཏས་གནང་བའི་ཀ་ར་དང་ཤིང་ཐོག་གི་ཕུད་རྣམས་ཡར་མཆོད། ལྷག་མ་ང་རང་གིས་རྒྱགས་ཕྱེ་བྱས་ནས་འོང་བས་ཐང་ཆེན་པོ་ཞིག་ཏུ་འབྲོག་པའི་སྦྲ་ཕུབ་ཡོད་འདུག་པས་བདག་གིས་མ་ཤེས་ཤིང་བྱང་ཐང་ལ་འབྲོང་ཡོད་ཟེར་བའི་ཕ་གི་ཡིན་པར་གདའ་སྙམ་ནས་འགྲོ་མ་ཕོད། དགོང་མོ་ཕྱོགས་ཕྱོགས་ནས་རྟ་ནོར་ལུག་གསུམ་དེད་ནས་སྦྲའི་ཟུར་ལ་བཞག་འདུག་པས། དེ་དུས་འབྲོག་པ་ཡིན་པར་གོ་ནས་སྤྲང་ཟས་སློང་དུ་སོང་། སྤྲང་ཁུག་མེད་པས་ལྷམ་ནང་དུ་བླུགས་པས། ཀུན་གྱིས་ཧ་ བགད་བྱེད་ཅིང་འདི་སྨྱོན་མ་ཞིག་རེད་ཟེར། རྒན་མོ་ཞིག་གིས་སྨྱོན་མ་མ་རེད་སྤྲང་གསར་ཞིག་ཡིན་པ་འདྲ་ཟེར་ནས། མོ་རང་གིས་ང་ལ་ཁུག་མ་ཞིག་སྦྱིན་དུ་འོང་ནས་ཨ་ཅེ་བུ་མོ་མཛེས་མ་ཁྱོད་གཟུགས་བྱད་ལེགས་པས། ཁྱིའི་ཁ་ནས་ཐར་རུང་སྐྱེས་པ་རྣམས་ཀྱི་འོག་ནས་ཐར་དཀའ་བ་གདའ་ཟེར། བདག་གིས་སྤྲང་ཟས་རྣམས་ཁུར་ནས་འོང་སྟེ། བསྐོལ་སྣོད་མེད་པས་ཆུ་ཁར་སོང་ནས་རྩམ་པ་ཞིག་ཟོས་པས་མགྲིན་པར་མི་ཐར་ཞིང་སྐྱུག་ལོག་བྱེད་འདུག །དེ་དུས་སྔར་ཕ་མའི་སྐུ་དྲིན་གྱིས་ཟས་གང་དགའ་ཟོས་ནས་རྩམ་པ་སྡུག་པོ་ཁྱི་ཟས་ལྟ་བུ་ཟ་མ་མྱོང་བ་དེས་ལན་སྙམ་ནས། ཟས་རླུང་ལ་བརྟེན་བཏུང་བ་ཆུ་ལ་བྱས་ནས་སོང་བས་ལོ་ངོ་བཅུ་དྲུག་སྐབས་འཕན་པོའི་ཁོག་ལ་ཐོན་སོང་བས། དེ་ཀར་དབུས་སྒར་པ་དང་སྤྲུལ་སྐུ་བཀའ་དྲིན་ཅན་སོགས་ཐམས་ཅད་བཞུགས་འདུག །དེ་དག་གི་ནང་ནས་རྟ་ཤུལ་འཇིགས་བསམ་དངཔཎ་ཆེན་ཞེས་པ་གཉིས་ཀྱིས་ང་རང་ཡོང་མི་ཆོག་ཟེར་ནས་གཏམ་མ་བཤད་ཅིང་། ཁྱད་པར་དུ་རྟ་པཎ་གྱིས་ང་རང་བུའི་འབེན་དུ་མི་འཇོག་ན་ཟེར་ཞིང་ཤིན་ཏུ་བརྣག་བྱུང་བས། བདག་གིས་ང་ཡོང་བས་ཁྱོད་ཅག་ལ་བྱ་བ་གང་ཐད་ནས་མི་གནོད་སྨྲས་ཀྱང་། ཁར་མི་ཉན་ཞིང་ད་དུང་ཚིག་ངན་ཅི་རིགས་ཟེར་འདུག །ངེད་ཅག་གི་ལོ་ཙཱ་ བྃ༔ བ་འབྲོང་བ་སང་ཡིན་པས་དེས་ཀྱང་ང་ལ་བཤོལ་མ་བྱེད་འདུག་པས། བདག་གིས་ཁོང་ཁྲོ་བྱས་ཏེ། རྟ་ཤུལ་པཎ་ཆེན་དང་འཇིགས་བསམ་གཉིས་ཀྱིས་ང་བུའི་འབེན་ལ་བཞག་ནས་རོ་རུ་མ་བཏང་བར། ཕྱིར་རང་ཡུལ་ལ་མི་འགྲོ་ཐག་གི་ཆོད་པ་ཡིན་སྨྲས་ནས་ངེད་ཅག་གི་ཚིག་མཚམས་ཆད་སོང་། དེ་སྐབས་སུ་རྗེ་དེ་ཉིད་ཀྱིས་ད་ལན་ཁྱོད་ཕ་ཡུལ་ལ་སོང་དང་། མིང་པོ་སོགས་ཀྱིས་བཀའ་བཀྱོན་མི་གནང་བའི་ཐད་ནས་འོད་འབར་ལ་བདག་གིས་ཡི་གེ་བསྐུར་ན་དམ་ཚིག་གི་འབྲེལ་བ་ཡོད་པས་དེས་ཆོག་གསུངས་ནས་དར་རྟེན་མདུད་བཅས་ཕེབས་པས། བདག་གིས་ལགས་སོ་ཉིད་རིན་པོ་ཆེའི་བཀའ་ཅིའི་ཕྱིར་བཅག་ཕོད། ང་རང་གི་བསམ་རྒྱུ་དམ་པའི་ཆོས་རྣམ་དག་ཞིག་ཨེ་འོང་སྙམ་ནས་རང་ཡུལ་རྒྱབ་ཏུ་བོར། མི་ཡུལ་ལ་འདུན་པ་གཏད། ཕ་མིང་ལོངས་སྤྱོད་ཀུན་ལ་མ་བསམ་པར་ཁྱོད་བླ་མ་དཀོན་མཆོག་གསུམ་ལ་བློ་ཕུག་བཅོལ་ནས་ངེས་མེད་དུ་འགྲོ་བ་ཡིན་པས། དེ་ལྟར་མ་དགོས་པར་ཁྱིམ་ཐབས་འཛིན་ན་ཕྱིར་མི་ལྡོག་པའི་ས་ཐོབ་སྲིད་ན་བདག་སྐྱེལ་མ་མི་དགོས། ང་རང་གཅིག་པུར་སོང་ན་ཆོག་ཞུས་ཏེ་དར་ཁ་ཡར་སྐུ་མདུན་ལ་བསྐུར། ཕྱག་མདུད་ང་རང་གི་མགུལ་དུ་འཆང་ནས་རང་ས་དེར་ཉལ་བསྡད་པས། ཡང་རྗེ་ དེ་ཉིད་ཀྱིས་བདག་གིས་ཁྱོད་ཡར་སོང་ཟེར་དོན་དབུས་རོགས་རྣམས་ཀྱིས་དབུས་མོ་ཁྲིད་འོང་བ་འདྲ། མུག་ལྷགས་ཀྱིས་འཆི་སོང་ན་ཅི་བྱེད་ཟེར་ནས་འདུག་ཏུ་མ་སྟེར་བས། དེས་ན་ཁྱོད་སོང་སྨྲས་པ་ཡིནཀྱང་། ཁྱིམ་ཐབ་དང་ཆོས་རྣམ་དག་གཉིས་ལྷན་དུ་ཅི་ལ་འགྲུབ། དེས་ན་ཁྱོད་རང་གི་བསམ་པ་ལྟར་གྱིས་གསུངས་ནས་བཀའ་གནང་ཐོབ་བོ། དེ་དུས་སྟོང་དཔོན་བཟང་མོ་ཞེས་པ་དང་། ཨ་སྐྱབས་ལྡེའུ་བཙན་ཞེས་པ་གཉིས་ཀྱིས་གཅེས་སྤྲས་བྱས་ཤིང་ཇ་ཚར་རེ་བླུད་པ་དངགོན་བྱད་རེ་གཡར་བསོགས་སྐབས་སྐབས་སུ་བྱས་བྱུང་། དེ་མིན་མི་ཁག་གསུམ་བཅུ་ཡ་བརྒལ་ཞིག་འདུག་པས། གཅིག་གིས་ཀྱང་གཅར་མི་ཉན་ཟེར་ནས་ང་རང་ལ་མཛེ་བོ་ལྟར་དོགས་འདུག །རྟ་ཤུལ་པཎ་ཆེན་ལ་གློ་བུར་དུ་ནད་ཞིག་རྒྱབ་ནས་ཉིན་མང་པོར་འདུག་ས་གཅིག་ཏུ་བསྡད་སོང་། ང་རང་ལ་ཇ་བསྐོལ་སྣོད་མེད་པས་འཕན་པོའི་གྲོང་པ་ལ་སྤྲང་ནས་སོང་བས། ཨ་ཅེ་རྒན་མོ་ཞིག་གིས་རྫ་མ་ལུང་གཉིས་ཅན་ཞིག་བྱིན་བྱུང་བས། དེ་ལ་བདག་གིས་ཇ་ཅི་འདྲ་བྱེད་ནས་བསྐོལ་རྒྱུ་ཡིན་དྲིས་ཚེ། མོ་ན་རེ། རྡོ་གསུམ་གྱི་སྟེང་དུ་རྫ་མ་འཛུགས་ནས་ཆུ་བླུགས་ཅིང་ཇ་ཐོབ་ལ་མེ་བཞག་ན་ཇ་ཁོལ་འོང་ཟེར། བདག་གིས་ཀྱང་རྒན་མོའི་བསླབ་བྱ་ལྟར་བྱས་པས། རང་ཡུལ་ལ་ བྃ༔ ཡོད་དུས་ཙན་དན་དཀར་དམར་གྱི་ཤུག་བདུག་རེ་མ་གཏོགས་དུ་བ་གཞན་མིག་ལ་ཕོག་མ་མྱོང་བའི་རྐྱེན་གྱིས་དུ་བས་མིག་ལ་འཚེ་ནས་མིག་ལོངའགྲོ་བ་ལྟར་བྱེད་འདུག་པས། རྫ་མ་འདི་ལེན་སྙམ་ནས་ས་རྫ་རྡོ་ལ་བརྒྱབ་པས་ཤོག་གཉིས་ལ་ཆགས་སོང་། ཡང་རྫ་ཤོག་ཆེ་བའི་ནང་དུ་ཇ་བསྐོལ་ནས་བསྡད་ཚེ། ཉིན་གཅིག་འཇིགས་སྒྲོན་གྱི་རིག་ནས་མོ་རང་གི་སེམས་ཀྱིས་མ་བཟོད་དེ། །མོ་རང་ལ་ཟངས་བས་ཆུང་བ་ཞིག་ཡོད་པ་དེ་དང་། མེ་ལྕགས། ཁུའི་ལྭ་གསར་པ་ཞིག་ཡོད་པ་དེ་རྣམས་ཁྱེར་ནས་ངའི་སར་ཐོན་བྱུང་། བདག་གིས་དེ་རྣམས་ཅི་རེད་དྲིས་པས། མོ་ན་རེ། འདི་རྣམས་ཁྱོད་རང་ལ་གཡར་བ་ཡིན་པས་གཞན་ལ་མ་བཤད། ང་རང་ལ་ཕྱིར་མ་འཕྲོད་ཀྱང་སྐྱོན་མེད། ཁྱོད་རང་གིས་ལོངས་སྤྱོད་དང་ཆོག་ཟེར། དེ་དུས་རྩ་རླུང་བསྒོམས་ཀྱང་ཁ་ཟས་མ་རྙེད་པས་རླུང་འཛིན་ཤིན་ཏུ་དཀའ་འདུག་ཀྱང་། དགེ་བསྙེན་ཐང་ལྷ་ཡིན་ཟེར་བ་ཞིགགིས་ནུབ་གྲང་ལ་ཁོ་རང་གོས་བེར་གྱི་ཐུ་བས་འགེབ་འདུག་པས་གྲང་ལྷག་གིས་ཆེར་མ་འཁྱག །རྟ་པན་ནད་ལས་གྲོལ་ཏེ་དབུས་སྒར་བ་རྣམས་འགྲོ་ཆས་བྱེད་འདུག་པས། བདག་གིས་གྲང་ལྷག་ཉེར་འཚེ་ལ་བསམས་ནས་ཁྱི་ཤུལ་རབ་གསལ་ཞེས་པ་ལ་བྱུ་རུ་བཞི་བྱིན་ནས་ཁོ་རང་ལ་ རྩག་ཡར་ཞིག་འདུག་པ་དེ་ཉོས། ནུབ་མོ་གོན་ཨེ་ཉན་བསམ་ཀྱང་གྲང་ལྷགས་ཀྱི་ངད་པས་གདུངས་ནས་རྐང་པའི་སྟེང་དུ་གོན་ནས་ཉལ་བསྡད་པས། གཉིད་མི་ཡོང་ཞིང་ལུས་པོ་མགོ་མཇུག་མེད་པར་ཟ་ཕྲུག་བྱེད་ཅིང་མི་བདེ་བ་དུ་མ་འོང་འདུག་པས་རྩག་རྙིང་ཐུར་དུ་འཕང་སྟེ་ཉལ་བས་ཅུང་ཟད་གཉིད་སོང་བའི་རྨི་ལམ་ལ། དགེ་བསྙེན་ཐང་ལྷས་མདུང་རྟིང་གིས་བདག་ལ་རྒྱབ་ནས། ཁྱོད་ཀྱིས་དམེ་བའི་གོས་གྱོན་པའི་གྲིབ་ཀྱིས་ང་རང་ལ་ཡང་གནོད་པས་ད་ནི་ང་འགྲོ་བ་ཡིན་ཟེར་ནས་མི་སྣང་བར་གྱུར། ནངས་པར་གཉིད་སད་དུས་མགོ་ལུས་ཐམས་ཅད་ནད་ཀྱིས་ཟིན་ནས་འགྲོ་རྒྱུ་མེད་པ་ལྟར་ཡིན་ཡང་། རང་གཅིག་པུར་ལྷགས་འགྲོ་བའི་སྙིང་རུས་བྱས་ཏེ་སོང་། དེ་ནས་བཟུང་སྟེ་ལུས་ཀྱི་མདངས་ཉམས། ཤེས་པ་མི་གསལ། རླུང་ཞུགས་གནས་ཐིམ་གསུམ་ལོག་པའི་ཉམས་རྟོགས་འགགས་པ་སོགས་འགལ་རྐྱེན་དུ་མར་སོང་ཞིང་ཟླ་བ་གཅིག་ལྷག་ཙམ་ལ་ན། ཉིན་གཅིག་འཇིགས་སྒྲོན་གྱིས་ང་རང་ཁྲིད་ནས་སྤྲུལ་སྐུ་ཡི་བཞིན་ནོར་བུའི་མདུན་ནས་ཁྲུས་དངགཅོད་ཚེ་འགུགས་སོགས་ཞུས། ཁོང་གི་ཞལ་ནས་ཁྱོད་ཀྱི་ཟས་གོས་ལ་ཤིན་ཏུ་འཛེམ་དགོས་པ་འདྲ། མཁའ་འགྲོ་འཁྲུགས་འདུག་པས་འཁྲུགས་བསྐང་གལ་ཆེ་གསུངས། འཇིགས་སྒྲོན་ བྃ༔ གྱིས་འཁྲུགས་བསྐང་ཁྱོད་ཀྱིས་གསུང་རོགས་དགོས་ཞུས་ཚེ། ཡ་ཆོག་གི་གསུངས་ཏེ། རྗེ་དེ་ཉིད་ཀྱིས་འཁྲུགས་བསྐང་མཛད་པས་ནད་ལས་གྲོལ་ཏོ། །དེ་ནས་འདམ་སང་གཞུང་ལ་ཐོན་དུས་ནང་བྲང་ཁོག་ལ་ཟས་མེད་པས་རླུང་མི་ཟིན། ཕྱི་ལུས་པོ་ལ་གོས་མེད་པས་ལྷགས་པས་འཁྱག་ནས་འཆི་འགྲོ་བར་བྱས་ཏེ། སྣང་བ་གནས་འགྱུར་ནས་དཔལ་རིའི་ཞིང་ཁམས་མཐོང་ཡོང་བ་ལྟར་བྱེད་དུས་དྲན་པ་ཉམས་ནས་ཅི་ཡིན་མ་གོ།དྲན་པ་རྙེད་ཚེ་མིག་ཕྱེས་ནས་བལྟས་པས། རྒྱ་ཚོགས་མགོན་ལྷུན་དང་། རིས་མུག་ཟེར་བ་གཉིས་ཀྱི་ཅོག་གུར་ནང་ལ་ཐོན་འདུག །བདག་གིས་ཅི་ཡིན་འདྲི་སྙམ་ཡང་ལྷགས་པས་ཁ་འཁྱག་སོང་བས་གཏམ་སྨྲ་མ་ནུས། དེ་དུས་ཁོང་གཉིས་ཀྱིས་རྗེ་དེ་ཉིད་ལ་མོ་རང་འཆི་འགྲོ་བ་མ་རེད། དྲན་པ་ཉམས་པ་ཡིན་འདུག་པས་སོས་བྱུང་ཞུ་རུ་སོང་ཚེ། རྗེ་ཉིད་དང་གཙང་སྐོར་བླ་མ་བློ་བཟང་དར་རྒྱས་གཉིས་བྱོན་ནས་ཁོང་རྣམ་གཉིས་ཀྱིཕྱག་གིས་ང་རང་གི་ལྟོ་བ་འཕུར་པས་དྲོད་རྒྱས་ཤིང་གཏམ་བརྗོད་ནུས་པ་བྱུང་ནས། ཁོང་མགོན་ལྷུན་གཉིས་ལ་ང་ལ་ཅི་རེད་སོང་དྲིས་པས། ཁོང་གཉིས་ཀྱིས་ཁྱོད་ལྷགས་པ་གིས་འཁེང་སོང་ནས་འཆི་ཆས་བྱེད་འདུག་པས། ངེད་གཉིས་ཀྱིས་རྟ་རྒན་ལ་བཅིང་འོང་བ་ཡིན་ ཟེར། དེ་ནས་བླ་མ་དར་ལོས་རྩག་འགགས་ཞིག་གནང་། རྗེ་ཉིད་ཀྱིས་ལྤགས་ཕུར་ཆུང་བ་གཉིས་གནང་། མགོན་ལྷུན་གྱིས་ལྷམ། འཇིགས་སྒྲོན་གྱིས་ཞྭ་དང་ལྭ་བ་རྣམས་བྱིན་པས། ཉིན་མོ་གྲང་ལྷགས་ཆེར་མ་བྱུང་། ནུབ་མོ་ཤིན་ཏུ་འཁྱག་ཅིང་གཉིད་མི་འོང་ཅིང་ལུས་པོ་ཐམས་ཅད་ཤིང་ལོ་བསིག་བསིག་བྱེད་འདུག །སྔོན་ལུས་འཁེང་སོང་བའི་སྟོབས་ཀྱིས་མགོ་ལུས་རྐང་གསུམ་ཐམས་ཅད་རྨ་ལོག་གི་སོང་ནས་ནང་ནུབ་གཉིས་ལ་ལྷགས་པ་ཆེ་བས་རྨ་ཁ་ཐམས་ཅད་ནས་ཁྲག་འོང་ནས་རི་དྭགས་རྨས་མ་བཞིན་ཁྲག་ལམ་བཏོད། ཉི་མ་ཅུང་ཟད་འོང་དུས་རྨ་ཐམས་ཅད་ཟ་ཕྲུག་ཁོལ་ཞིང་ཚ་ན་ཟུག་གཟེར་གྱིས་མནར་ནས་ཅི་བྱེད་ལྟོས་མེད་དུ་བྱུང་བས། བླ་མ་ལྷ་ལ་གསོལ་བ་འདི་ལྟར་བཏབ། སྐྱབས་གནས་ཀུན་འདུས་པད་འབྱུང་མཚོ་རྒྱལ་དང་།།སྤྱན་རས་གཟིགས་དང་རྗེ་བཙུན་འཕགས་མ་སྒྲོལ། །སངས་རྒྱས་བྱང་སེམས་ཐམས་ཅད་བདག་ལ་དགོངས། །ཉམ་ཐག་ཁོ་མོ་བདག་ལ་ཐུགས་རྗེས་གཟིགས། །བདག་གིས་ལྷག་བསམ་རྣམ་པར་དག་པ་ཡིས། །མ་གྱུར་སེམས་ཅན་ཀུན་གྱི་དོན་ཕྱིར་དུ། །ཡང་དག་དམ་པའི་ལྷ་ཆོས་ཞིག་བསྒྲུབས་ནས། །དོན་གཉིས་མཛད་པ་མཐར་ཕྱིན་ཞིག་བསམ་ཀྱང་། །ལས་ངན་བདག་གི་ལུས་སྒྲིབ་མ་ བྃ༔ ཟད་ནས། །མ་ཤི་གསོན་པོར་གྲང་དམྱལ་སྡུག་བསྔལ་མྱོང་། །བདག་དང་བདག་འདྲའི་ནང་སོང་འགྲོ་ཀུན་གྱི། །སྡུག་བསྔལ་བག་ཆགས་མ་ལུས་ཀུན་བསྡུས། ནས། །བདག་གིས་མྱོང་གྱུར་འདི་དང་དབྱེར་མེད་མཛོད། །བདག་གཞན་བསགས་དང་བསག་འགྱུར་དགེ་བའི་ཚོགས། །མ་ལུས་འགྲོ་བའི་སེམས་ཅན་ཡོངས་ལ་བསྔོ། །ཀུན་ཀྱང་རྔ་ཡབ་ཟངས་མདོག་དཔལ་གྱི་རིར། །ཡབ་རྗེ་ཨོ་རྒྱན་ཆེན་པོའི་ཞབས་དྲུང་དུ། །སྐྱེས་ཏེ་དོན་གཉིས་ལྷུན་གྲུབ་དཔལ་ཐོབ་ཤོག །ཅེས་སྨྲས་པས། སྟོང་དཔོན་བཟང་མོ་ན་རེ། ཨོ་སྙིང་རྗེ་ཁྱོད་ཀྱིས་ཡི་གེ་མི་ཤེས་ན་མགུར་མ་སྙན་པོ་དེ་འདྲ་ཅི་ལ་ཤེས་ཟེར། བདག་གིས་ཡི་གེ་འབྲུ་མ་ཤེས་ཏེ་དོན་ཤེས་སྨྲས། མོ་ན་རེ། འོ་དེ་ན་འདིའི་དོན་སྨོས་ཤོག་ཟེར། འཇམ་དཔལ་མཚན་བརྗོད་ཞིག་འདོན་འདུག །བདག་གིས་འདིའི་དོན་བསམ་གྱིས་མི་ཁྱབ་ཅིང་ཐེག་པ་ཀུན་གྱི་དོན་འདུས་ཡོད་པར་སྣང་གི་སྨྲས་ཏེ། མདོར་བསྡུས་ཏེ་བཤད་པས་མོ་ངོ་མཚར་ནས་དད་པ་བྱེད་འདུག །རྗེ་དེ་ཉིད་ཀྱིས་ཀྱང་ཉེ་འཁོར་གྱིས་མ་རིག་པར་མཛད་ནས་ང་རང་ལ་རྨ་སྨན་དང་། བཟའ་བཅའ་རེ་གནང་སྦྱིན་མཛད་ཀྱང་། ཀུན་གྱིས་