Tibetan
རྟེན་འབྲེལ་ཡན་ལག་གི་རླུང་ལྔ་སྟེ་རླུང་བཅུའོ། །དེ་ལ་ནང་རང་གནས་ཀྱི་རླུང་ལྔའི་ཁ་དོག་དང་རྒྱུ་བའི་ཚུལ་ནི་འདི་ལྟ་སྟེ། གྱེན་རྒྱུའི་ངོ་བོ་སྣང་མཐའ་རྣམ་པ་རླུང་དམར་མོ་མགྲིན་པར་གནས་ཏེ་ཟས་ཀྱི་རོ་ལེན་པ་དང་ངག་གི་བརྗོད་པ་བྱེད་དོ། །ཐུར་སེལ་གྱི་ངོ་བོ་དོནགྲུབ་རྣམ་པ་རླུང་ཁམས་ཀྱི་རླུང་གསང་གནས་སུ་གནས་ཏེ་དྲི་ལྕི་དོར་བའོ། །མེ་མཉམ་གྱི་ངོ་བོ་རིན་འབྱུང་རྣམ་པ་ས་ཁམས་ཀྱི་རླུང་ལྟེ་བར་གནས་ཏེ་ཟས་ཞུ་བ་སོགས་བྱེད་དོ། །སྲོག་འཛིན་གྱི་ངོ་བོ་མི་བསྐྱོད་པ་རྣམ་པ་ཆུ་ཁམས་ཀྱི་རླུང་སྙིང་གར་གནས་ཏེ་དྲན་པའི་ རྟེན་བྱེད་དོ། །ཁྱབ་བྱེད་ཀྱི་ངོ་བོ་རྣམ་སྣང་རྣམ་པ་ནམ་མཁའི་ཁམས་ཀྱི་རླུང་ནང་གི་ལྷུ་ཚིག་རྣམས་ལ་གནས་ཤིང་ཡན་ལག་འཕེན་སྡུད་བྱེད་དོ། །ཕྱི་རྟེན་འབྲེལ་ཡན་ལག་རླུང་ལྔ་ནི་རྒྱུ་ཞིང་རྩ་བ་སྙིང་གར་སྲོག་འཛིན་དང་ཆུན་གཅིག་གོ། །དེ་ལ་རྒྱུ་བ་མེ་ཁམས་མིག་དབང་ནས་འབྱིན་འཇུག་བྱེད། རྣམ་པར་རྒྱུ་བ་སྔོ་སྐྱ་རྣ་བ་ནས་འབྱིན་འཇུག་བྱེད་དོ། །ཡང་དག་རྒྱུ་བ་ས་ཁམས་སྣ་ནས་འབྱིན་འཇུག་བྱེད་དོ། །རབ་ཏུ་རྒྱུ་བ་ཆུ་ཁམས་ལྕེ་དབང་ནས་འབྱིན་འཇུག་བྱེད་དོ། །ངེས་པར་རྒྱུ་བ་རླུང་ཁམས་ལུས་དབང་ནས་འབྱིན་འཇུག་བྱེད་དོ། །སྲོག་འཛིན་དང་ཐུར་སེལ་རོ་རྐྱང་གཉིས་ནས་གཉིས་རྒྱུ༷་ཞིང་། མེ་མཉམ་དང་གྱེན་དུ་རྒྱུ་བ་རོ་རྐྱང་ནས་རེ་རེ་རྒྱུ། རླུང་ཕྲ་བ་རྣམས་ནི་སྙིང་གའི་རྩ་འཁོར་དུ་གནས་པའོ། །དེ་ལྟ་བུའི་རླུང་གཙོ་བོ་ལྔ་རྒྱུ་ཚུལ་ལྟར་ཡན་ལག་དང་འཁོར་གྱི་རླུང་རྣམས་ཀྱང་རྒྱུ་བ་ཡིན་ནོ། །དེ་ལྟར་རླུང་ཞུགས་གནས་ཐིམ་གསུམ་ལ་སྦྱངས་པ་ཐོན་པར་བྱ་བ་དང་། འབྲུ་གསུམ་འབྱིན་འཇུག་གནས་ལྡང་ལ་བརྩོན་ན་མཐར་ཚེ་དབང་རིག་འཛིན་གྱི་ས་བོན་རྒྱུད་ལ་ཐེབས་ནས་རླུང་སེམས་དབུ་མར་འདྲེས་ཏེ་ལས་རླུང་དབྱིངས་སུ་ཟདཔར་འགྱུར་རོ། །གསུམ་པ་ཐིག་ལེ་ཐོད་སྦྱོར་ལ་ཕྱག་རྒྱ་གསུམ་ལས། དང་པོ་ལས་ཀྱི་ཕྱག་རྒྱ་བསྒོམ་པ་ལ་རྩ་གསུམ། བྃ༔ འཁོར་ལོ་ལྔ་དང་བཅས་པ་གསལ་གདབ། དེའི་སྤྱི་བོར་བདེ་ཆེན་གྱི་འཁོར་ལོ་ཧྃ་དང་། ལྟེ་བར་སྤྲུལ་པའི་འཁོར་ལོར་ཨ་ཤད། གནས་གསུམ་ལ་རང་རང་གི་ཡི་གེ་རྣམས་གསལ་གདབ། ཨ་ཧྃ་རེག་པ་འཕྲོད་པས་སྤྱི་བོའི་བདུད་རྩི་བ་འོ་ལྟར་འཛག་པ། རླུང་གི་ཐིག་ལེ་སྣ་འདྲེན་ནས་རྩ་འཁོར་ཐམས་ཅད་ལ་ཁྱབ་པ་དང་། སྤེལ་བ་ཡར་འདྲེན་པ་ལ་སོགས་པ་དཔེར་ན་སྨྱུག་སྦུབ་ཏུ་ཆུ་འདྲེན་པ་ལྟར་རླུང་གིས་བྱང་སེམས་གང་དུ་འདྲེན་པའི་ནུས་པ་ཐོན་པ་གལ་ཆེ། དེས་རླུང་ཐིག་ལས་སུ་རུང་ཏེ་རྩ་འཁོར་རྣམས་ཀྱི་དབུས་ཀྱི་ཡི་གེར་སེམས་བཟུང་བས་རོ་རྐྱང་གི་རླུང་དབུ་མར་ཐིམ་པས་དགའ་བ་བཞིའི་ཡེ་ཤེས་མངོན་དུ་བྱེད་པར་འགྱུར་རོ། །གཉིས་པ་ལུས་ཀྱི་ཕྱག་རྒྱ་བསྒོམས་པ་ལ་སྔར་ལྟར་ཕྱི་ནང་གི་སྟོང་ར་རྣམས་གསལ་བཏབ་ལ། རང་ཉིད་སྐད་ཅིག་གིས་ཡི་དམ་གྱི་སྐུ་རུ་གསལ་ནས་རླུང་བུམ་ཅན་བཟུང་ལ་རྩ་གསུམ་འཁོར་ལོ་ལྔའི་རྩ་མདུད་གོང་འོག་གཉིས་ལ་ཐིག་ལེ་དཀར་དམར་ཞལ་སྦྱོར་དུ་བསྒོམ། འཁོར་ལོ་ལྔའི་ས་བོན་སྔར་ལྟར་གསལ་ནས་ཆུ་སྐྱེས་པདྨ་འདབ་མ་བཞི་པའི་དབུས་སུ་བཾཿའདབ་མ་བཞིར་ཧ་རི་ནི་ས་དང་། ཕྱི་དབྱིབས་ཆོས་འབྱུང་དམར་པོ་རུ་གསལ་གདབ་ལ། དེ་ནས་རིགས་ཅན་གྱི་དཔའ་བོ་ཡིད་རྒྱར་ བསྒོམ་ལ། རྩ་གསུམ་འཁོར་ལོ་ལྔ་དང་བཅས་པ་གསལ་ཏེ་རྟགས་ཀྱི་རྡོ་རྗེ་དཀར་པོ་རྩེ་ལྔ་པའི་དབུས་སུ་ཧཱུྃ་དཀར་པོ་ཆུ་ཤེལ་གྱི་མདོག་ལྟར་མགོ་ཐུར་དུ་བསྟན་པ། ར་བཞི་ལ་ར་ཙ་ཧྲཱི་ཡ་བཞི་དང་། གཞན་ཡང་ཐབས་ཤེས་གཉིས་ཀྱི་རྩ་ཁམས་གྲངས་ཅན་དང་། གྲངས་མེད་ཐམས་ཅད་ལ་ཡི་གེ་ཨ་ལི་དང་ཀ་ལིའི་ཐིག་ལེ་ལ་སོགས་པ་གསལ་བར་བསྐྱེད། དེ་ནས་ལྟེ་བའི་ཨ་ཐུང་ལས་ཡེ་ཤེས་ཀྱི་མེ་དབུ་མའི་ལམ་བརྒྱུད་དེ་སྤྱི་བོའི་ཧྃ་ལ་རེག་པ་ལ་རྒྱུ་བྱས། ཡབ་ཀྱི་རྟགས་ཀྱི་སེམས་དཔའ་ལ་རྐྱེན་བྱས་ཏེ་རྩ་གནས་སོ་སོ་ནས་བྱང་ཆུབ་སེམས་ཀྱི་རྒྱུན་བབས་པ་དབུ་མར་འདྲེས་པར་བསམ། ཧྃ་ལས་བདུད་རྩིའི་ཐིག་པ་བཅུ་དྲུག་སྤྱི་བོར་དུ་བབ་པས་དགའ་བའི་ཡེ་ཤེས་གོང་འཕེལ་དུ་འགྱུར་པར་བསམ། བརྒྱད་མགྲིན་པར་བབ་པས་མཆོག་དགའི་ཡེ་ཤེས་གོང་འཕེལ་དུ་གྱུར་པར་བསམ། བཞི་སྙིང་གར་བབས་པས་ཁྱད་དགའི་ཡེ་ཤེས་གོང་འཕེལ་དུ་གྱུར་པར་བསམ། གཉིས་ལྟེ་བར་བབ་པས་ལྷན་དགའི་ཡེ་ཤེས་གོང་འཕེལ་དུ་གྱུར་པར་བསམ། གཅིག་གསང་གནས་སུ་བབ་པས་དགའ་བྲལ་གྱི་ཡེ་ཤེས་གོང་དུ་འཕེལ་བར་བསམ་པ་ནི་མས་བརྟན་གྱི་དགའ་བ་བཞི་ཡིན་ནོ། །ཡང་རླུང་དང་རིག་པའི་སྟོབས་ཀྱིས་ཐིག་ལེ་རྣམས་མས་ནས་ཡར་སྤྱི་བོའི་ ༔ ཧྃ་ལ་བསྲེ་བའི་བར་ཡས་བརྟན་གྱི་དགའ་བ་བཞི་ཡིན་ནོ། །གཞན་རྩ་གནས་ཀུན་ལ་དཀར་ཆག་དག་པ་སྐུ། དམར་ཆ་དག་པ་གསུང་། རླུང་སེམས་དག་པ་ཐུགས་རྡོ་རྗེར་གྱུར་པར་བསམ། འཁོར་ལོ་རྣམས་སུ་ས་ཆུ་གནས་སུ་དག་ནས་སྐུ་རྡོ་རྗེ། མེ་རླུང་གཉིས་དག་ནས་གསུང་རྡོ་རྗེ། ནམ་མཁའ་དང་སེམས་གཉིས་དག་ནས་ཐུགས་རྡོ་རྗེའི་རང་བཞིན་མངོན་དུ་གྱུར་པར་བསྒོམ་མོ། །མདོར་ན་ཕྱི་སྒྱུ་ལུས་དག་པ་དཀྱིལ་འཁོར་གསུམ་དང་། ནང་རྩ་ཐིག་རླུང་གསུམ་རྡོ་རྗེ་གསུམ་དང་། གསང་བ་བདེ་གསལ་མི་རྟོག་སྐུ་གསུམ་གྱི་རང་བཞིན་ཡིན་པས། དེ་ཉིད་མངོན་དུ་བྱས་ཏེ་ཉམས་སུ་བླངས་ནས་ཕྱག་རྒྱའི་རིག་འཛིན་གྱི་གོ་འཕང་ཐོབ་པ་ཡིན་ནོ། །གསུམ་པ་ཐབས་ཀྱི་ཕྱག་རྒྱ་ནི་མཚན་ཉིད་དང་ལྡན་པ་རིགས་ལྔའི་སྒྱུ་འཕྲུལ་གྱི་དཔའ་བོ་བརྟགས་པ་དང་འགུགས་པ་དང་སྦྱངས་བ་སོགས་ལེགས་པར་བྱས་ཤིང་། ཐོག་མར་སྨིན་གྲོལ་གཉིས་ཀྱི་སྒོར་བཙུད་ནས་ཕྱི་ནང་གསང་གསུམ་གྱི་བསྐྱེད་རྫོགས་ལ་ནུས་པ་དང་རྟགས་ཐོན་པར་བྱེད་དུ་བཅུག་ལ། སྐུ་གསུང་ཐུགས་ཀྱི་དམ་ཚིག་གི་གནད་རྣམས་ལེགས་པར་བསྩལ་ནས་སྒོ་གསུམ་གྱི་བྱ་བ་ཆོས་མིན་སྐད་ཅིག་ཀྱང་མི་འགྲོ་བར་བྱས་ཏེ། དོན་དབང་གསུམ་པས་སྨིན་གྲོལ་ལ་ འགོད་དོ། །དེ་ནས་ཐབས་ཤེས་ལྷར་གསལ་བའི་སྐུ་དབུས་སུ་རྩ་གསུམ་འཁོར་ལོ་ལྔ་དང་བཅས་པ་གསལ་ལ། གནས་ལྔར་ཐབས་ལ་དཔའ་བོ་སྡེ་ལྔ་དང་། ཤེས་རབ་ལ་དཔའ་མོ་སྡེ་ལྔ། ཡན་ལག་བཞི་ལ་སྒོ་བ་ཡབ་ཡུམ། གཞན་ཡང་རྩ་གནས་ཐམས་ཅད་དཔའ་བོ་དང་མཁའ་འགྲོའི་རྣམ་པར་གནས་ལྔར་ཐབས་ཤེས་ཀྱི་ཚུལ་དུ་བསྒོམ་མོ། །གཙུག་ཏོར་ཡེ་ཤེས་ཀྱི་འཁོར་ལོའི་དབུས་སུ་ཟླ་གདན་ལ་ཧྃ་དང་། ལྟེ་བ་ནས་མར་སོར་བཞིའི་མཚམས་སུ་དབུ་མའི་མར་སྣེ་ལ་དགའ་བ་དང་བདེ་བའི་རྩ་མདུད་ཉི་ཟེར་ལྟར་ཡོད་པའི་དབུས་སུ་ཨ་ཤད་དམར་པོ་རྒྱ་ཁབ་ཀྱི་རྩེ་བཅད་པ་ལྟ་བུ་ལ་ཡེ་ཤེས་ཀྱི་མེ་ཉུག་ཉུག་ཏུ་འབར་བ་ཞིག་བསྒོམ། དེ་ནས་ཐབས་ཀྱི་རྒྱུ་བཞི་དང་། ཤེས་རབ་མའི་རྐྱེན་བཞི་སྟེ། ཡན་ལག་བརྒྱད་ལྡན་གྱིས་སྦྱོར་བ་རྩོམ་ནས་གཅིག་ཏུ་འཁོད་པ་ཚོགས་ལམ། ལུས་ཀྱི་དབང་ཤེས་ཀྱི་བདག་རྐྱེན་བྱས་ཏེ་སྤྱི་བོའི་བདུད་རྩིའི་སེམས་སྤྲིན་གཡོས་པ་དམིགས་པའི་རྐྱེན་དུ་འགྱུར་ཞིང་། དགའ་བ་བཞི་རིམ་གྱིས་མྱོང་བ་ནི་སྦྱོར་བའི་ལམ་ཡིན་ནོ། །དེ་ནས་ཐབས་ཀྱི་སེམས་སྤྲིན་ཤེས་རབ་མའི་མཁའ་གསང་དུ་བབས་ནས་དཀར་དམར་ཞལ་མཇལ་ཏེ། ཀུན་རྟོག་བརྒྱད་ཅུའི་རྟོག་པ་དབྱིངས་སུ་བཅོམ་ནས་བརྗོད་བྲལ་མཉམ་ཉིད་ཀྱི་ཡེ་ བྃ༔ ཤེས་མངོན་དུ་གྱུར་པ་དེ་ལ་འོག་སྒོ་ཁམས་གསུམ་རོལ་པ་ཞེས་བརྗོད་པ་ཡིན་ནོ། །ཐིག་ལེ་མཁའ་གསང་ནས་པདྨའི་ཟེའུ་འབྲུར་ཐོན་པས་དུས་སྦྱོར་གཅིག་གི་རླུང་ནུབ་ནས་ས་དང་པོའི་ཡོན་ཏན་ཐོབ། ཟེའུ་འབྲུ་ནས་གསང་གནས་སུ་འདྲེན་པས་དུས་སྦྱོར་གཉིས་ཀྱི་རླུང་ནུབ་ནས་ས་གཉིས་པ་ཐོབ། ལྟེ་གསང་གི་བར་དུ་འདྲེན་པས་དུས་སྦྱོར་གསུམ་པའི་རླུང་དག་ནས་ས་གསུམ་པ་ཐོབ། ལྟེ་བར་ཐོན་པས་དུས་སྦྱོར་བཞི་པའི་རླུང་དག་ནས་ས་བཞི་པ་ཐོབ། སྙིང་ལྟེའི་བར་དུ་འདྲེན་པས་དུས་སྦྱོར་ལྔ་པའི་རླུང་དག་ནས་ས་ལྔ་པ་ཐོབ། སྙིང་གར་ཐོན་པས་དུས་སྦྱོར་དྲུག་གི་རླུང་དག་ནས་ས་དྲུག་པ་ཐོབ། སྙིང་ག་དང་མགྲིན་པའི་བར་དུ་འདྲེན་པས་དུས་སྦྱོར་བདུན་པའི་རླུང་དག་ནས་ས་བདུན་པ་ཐོབ། མགྲིན་པར་ཐོན་པས་དུས་སྦྱོར་བརྒྱད་པའི་རླུང་དག་ནས་ས་བརྒྱདཔ་ཐོབ། མགྲིན་པ་ནས་སྨིན་མཚམས་བར་ལ་འདྲེན་པས་དུས་སྦྱོར་དགུ་པའི་རླུང་དག་ནས་ས་དགུ་པ་ཐོབ། སྨིན་མཚམས་ནས་སྤྱི་བོའི་བར་ལ་འདྲེན་པས་དུས་སྦྱོར་བཅུ་པའི་རླུང་དག་ནས་ས་བཅུ་པ་ཐོབ་ཅིང་ལྷུན་གྱིས་གྲུབ་པའི་རིག་འཛིན་མངོན་དུ་བརྙེས་པ་ཡིན་ནོ། །ཡང་ཐིག་ལེ་སྤྱི་བོར་ཐོན་པས་ས་བཅུ་གཅིག་པ་ཀུན་ཏུ་འོད་དང་། སྤྱི་བོར་དང་གཙུག་ཏོར་བར་ལ་ཐོན་ པས་ས་བཅུ་གཉིས་པ་མ་ཆགས་པདྨ་ཅན་དང་། གཙུག་ཏོར་ཧྃ་དང་རོ་གཅིག་ཏུ་འདྲེས་པས་ས་བཅུ་གསུམ་པ་རྡོ་རྗེ་འཛིན་པའི་ས་རུ་འགོད་པ་ཡིན་ནོ། །དེ་ལྟར་སྦྱོར་བའི་གནད་ལ་བརྟེན་ནས་སྒྲོལ་བ་རྒྱུ་དང་འབྲས་བུས་ས་ལམ་ཐམས་ཅད་རིམ་པར་མི་ལྟོས་པར་གཅིག་ཆར་དུ་བགྲོད་པའི་མྱུར་ལམ་དམ་པ་ནི་འདི་ཉིད་ཡིན་ནོ། །འདི་ལྟར་ཁྱོད་ཀྱིས་ཉམས་སུ་ལོངས་དང་ཐིག་ལེ་སྐུ་རུ་སྨིན་ཏེ་ཁ་སྦྱོར་ཡན་ལག་བདུན་གྱི་རིག་སྐུ་མངོན་དུ་གྱུར་ནས་ཟུང་འཇུག་རྡོ་རྗེ་འཆང་གི་གོ་འཕང་ཚེ་འདིར་ཐོབ་པར་འགྱུར་རོ། ཞེས་གསུངས་པ་དང་མཉམ་དུ་འོད་ཀྱི་ཐིག་ལེ་དཀར་པོ་ཞིག་ཏུ་གྱུར་ནས་རང་གི་སྤྱི་བོར་ཐིམ་སྣང་འཆར་ཚེ་གཉིད་ལས་སད་དོ། །ནང་སྔ་མོ་ནང་ཇ་འཐུང་ནས་ཨ་ཏ་ལ་ཁམས་བདེ་ཞུས་ཏེ། ཨ་ཇོ་ངེད་གཉིས་ཕྱིར་འོང་བའི་ལམ་ཁར་བུད་མེད་མཛེས་མ་ཞིག་ང་རང་དང་མཉམ་དུ་འོང་འདུག །ཨ་ཇོ་ཁོང་གིས་ནི་མི་གཟིགས་པ་འདྲ། བདག་གིས་ཅི་ཡིན་བསམས་ནས་བློ་མ་འཁེལ་ཀྱང་ཅི་ཡང་མ་སྨྲས། མོ་རང་ང་དང་མཉམ་དུ་གཟིམ་ཆུང་ཉི་འོད་འཁྱིལ་བའི་ནང་དུ་ཐོན་བྱུང་། བདག་གིས་ཁྱོད་སུ་ཡིན་དྲིས་པས། མོ་ན་རེ། ང་གཡུ་སྒྲོན་ལྷ་མོ་ཡིན། ད་ཁྱོད་ཀྱིས་མཁའ་འགྲོའི་བཀའ་བཞིན་ཟབ་གཏེར་གྱི་ཁ་བྱང་གཏན་ལ་ཕབ་ནས་འགྲོ་དོན་ལ་སྤྱོད་ཅིག་ བྃ༔ ཟེར བདག་གིས་ང་རང་གིས་ཡི་གེ་འབྲི་རྒྱུ་མི་དགོས་ཡིག་ངོ་ཡང་མི་ཤེས་པས་ཇི་ལྟར་འབྲིས་སྨྲས། མོ་ན་རེ། བདག་གིས་དྲུང་ཡིག་བྱས་ན་ཆོག་ཟེར་བས། བདག་གིས་ཨ་ཇོའི་སྣག་སྨྱུག་བླངས་ནས་ཤོག་གུ་བཅས་མོ་རང་གི་ལག་ཏུ་བཞག་པས། མོ་རང་གིས་ད་ཁྱོད་ཀྱིས་སྔར་མཁའ་འགྲོས་གསུངས་པའི་ཁ་བྱང་གི་བརྡ་དོན་རྣམས་སྨོས་ཤིག་ཟེར། བདག་གིས་ཀྱང་ཚིག་ལྷག་ལུས་མེད་པར་སྨྲས་པ་རྣམས་མོས་ཡི་གེར་བྲིས་ཏེ། ད་ཁྱོད་ཀྱིས་ཐུགས་དམ་བྱས་ལ་མགུལ་དུ་ཐོག་ཆིག་ཟེར་ནས་མོ་མི་སྣང་བར་གྱུར། དེ་ནས་བདག་གིས་དེ་ལྟར་བྱས་ཏེ་མགུལ་དུ་བཏགས། ཕྱི་ཡང་བྲི་བྱས་པ་གཏེར་གཞུང་དུ་གསལ་བའོ། །དེ་ནས་ཡང་ཟླ་བ་བཅུ་པའི་ནང་དུ་ཁམས་ཕྱོགས་ཀྱི་དབུས་མཇལ་བ་དུ་མ་འོང་འདུག་པས། དེ་དག་གི་ནང་ནས་རྫ་རྒྱལ་དགོན་པའི་རྫོགས་ཆེན་དཔལ་དགེ་སྤྲུལ་སྐུ་རེད་ཟེར་བའི་དབུས་སྒར་པ་ཞིག་ཐོན་ནས། ཨ་ཇོ་ཚང་ལ་གནས་ཚང་གཡར་དགོས་ཞུས་པས་གནས་ཚང་གཡར་བས་མགྲོན་པོ་རྣམས་ཐོན་འབྱུང་། བདག་གིས་ཀྱང་ཉི་མཐོང་གི་ཤེལ་སྒོའི་ནང་ནས་མགྲོན་པོ་རྣམས་ལ་བལྟས་པས་དེ་དག་གིས་ནང་ན་བླ་མ་དབུ་སྐྲ་ཅན་ཞིག་འདུག་པས། དེ་མཇལ་མ་ཐག་སྣང་བ་གནས་འགྱུར་ནས་ ཀུན་མཁྱེན་ཀློང་ཆེན་རབ་འབྱམས་ཟེར་བ་དེ་དངོས་རེད་བསམས་ནས་མིག་མཆི་མ་འཁྲུག །ལུས་བ་སྤུ་གཡོས་པའི་སྟོབས་ཀྱིས་ཐལ་མོ་སྦྱར་ནས་ཐུགས་རྗེ་མ་ཆུང་ཚེ་རབས་ཀུན་ཏུ་འབྲལ་བ་མེད་པར་ཤོག་ཅིག་ཅེས་སྨྲས་པས། ཨ་ཇོའི་ནག་མོ་སྒྲོན་དཀར་ཞེས་པས་འདི་སྐད་ཟེར། ཧེ་ཧེ་ཁྱོད་ལ་ཕོ་དགའ་མེད་བསམ་པས་མ་ཡིན་པ་འདྲ། ཕོ་དགའ་ཡོད་གི་འདུག །ཕ་གི་བླ་མ་མཐོང་བ་ལ་འདོད་ཆགས་སྐྱེས་ནས་མི་འབྲལ་བར་ཤོག་ཟེར་བས། སྐྱིད་གྲོང་དཔོན་ཆུང་བཅོ་ལྔའི་ཟླ་བ་ལྟ་བུ་ལ་ཡིད་མི་འཕྲེང་བར། ཁམས་པ་ནག་ར་ཁུས་འཕྱང་ཅན་ལ་ཡིད་ཤོར་དོན་ཅི་ཡོད་ཟེར། བདག་གིས་གླུ་ལ་དྲངས་ནས་འདི་སྐད་སྨྲས། གསོན་དང་ཨ་ཇོའི་ལྕམ་མོ་ལགས། །བུ་མོ་ང་ཕོ་དགའ་ཆེ་བ་མིན། །ཁོང་རྣལ་འབྱོར་སྐྱེས་ཆེན་དམ་པ་འདྲ། །བདག་རང་དབང་མེད་པར་དད་པ་སྐྱེས། །ཚེ་འདི་ཕྱི་འབྲལ་མེད་སྨོན་ལམ་བཏབ། །ཁྱོ་བྱེད་འདོད་ཆགས་པ་སྐྱེས་ནི་མིན། །ང་ཆགས་མེད་དོན་གྱིས་བཙུན་མ་ཡིན། །ཆགས་སྲེད་ཀྱི་བྱ་ངན་ངས་མི་བྱེད། ཁོང་དཔོན་ཆུང་ཟླ་བའི་གཟི་མདངས་ཅན། གྲོགས་ངན་པའི་དབང་དུ་མི་འགྲོ་ཞིང་། །ལས་ཐ་མ་ཆོས་ལ་སྤྱོད་པར་སྨོན། །ང་སྟོན་དགུན་མཚམས་ཀྱི་མེ་ཏོག་འདྲ། །དུས་དེ་རིང་ཡོད་ཀྱང་ བྃ༔ སང་ཉིན་མེད། །ལས་ཅི་འགྱུར་མི་ཤེས་ཨ་ལྕམ་ལགས། །ཞེས་སྨྲས་པས། མོ་ན་རེ། ཧེ་ཧེ་གསོན་དང་ཀུན་དགའ་ལགས། །རྫི་བུའི་ཁ་ལ་མ་ཉན་པའི། །ར་མའི་བློ་འདིའི་རང་སྲོག་བཅད། །ཕ་མའི་ཁ་ལ་མ་ཉན་པའི། །བུ་མོའི་བློ་འདི་འཁྲུག་པའི་གཞི། །ཁྱོད་བསམ་བློ་སེམས་ཀྱི་གཏིང་ནས་ཐོངས། །ཞེས་གླུ་མི་འདྲ་དུ་མ་འདུག །ཡིད་ཐེ་ཚོམ་ཤོར་བའི་ཚིག་དགའ་འདུག །དགོས་མེད་པ་འདི་འདྲ་མ་གསུངས་ལགས། །ཟེར་བས། བདག་གི་བསམ་པ་ལ། མོ་རང་བློ་རྩལ་རྣོ་བས་ངའི་ཚིག་གི་དོན་རྣམས་གོ་སོང་འདུག་སྙམ་ནས་འདི་སྐད་སྨྲས། ཨ་ལ་ཀུ་རེ་ཡིན། སྐྱིད་གྲོང་དཔོན་ལྟ་བུའི་ཁྱོ་ཕོ་ཞིག་ཡོད་དུས་དེས་ཚེ་རོགས་ལོས་འོང་། སྐྱིད་ཀྱིས་སྡུག །མར་གྱིས་ཚིལ་ཉོས་པའི་དཔེ་བཞིན། ང་རང་ཡུལ་ལ་རྒྱལ་པོ་རེད། མི་ཡུལ་ཉུལ་ན་སྤྲང་མོ་རེད། དེ་འདྲ་ཅི་ལ་བྱེད། ཁྱོད་རང་དོགས་མི་དགོས་སྨྲས་པས། མོ་ཡང་ཡིད་ཆེས་པརགྱུར། དེ་ནས་ཞག་ཁ་ཤས་སོང་སྐབས་གཡོག་མོ་གཉིས་ལ་དངུལ་བྱིན་ནས། ཁྱོད་གཉིས་ཀྱིས་ཨ་ཇོ་སོགས་ཀྱིས་མ་མཐོང་བ་དང་མ་གོ་བར་བྱས་ཏེ། ཕ་གིའི་བླ་མ་ཐོར་ཅོག་ཅན་དེའི་མཚན་ལ་ཅི་བཏགས། ཡུལ་ཕྱོགས་གང་ནས་ཡིན། ཆོས་ ལུགས་ཅི་རེད་སོགས་ལེགས་པར་ཞིབ་བྱས་སུ་དྲིས་ཤོག་དང་། བདག་གིས་ཁྱོད་གཉིས་ཚེ་གཅིག་ཏུ་ཁྲལ་ཁྲིམས་མེད་པར་ཕྱག་མཛོད་ཀྱི་ཕོགས་ཟན་ལོན་ངེས་བྱེད་སྨྲས། ཁོང་གཉིས་ཀྱིས་ཀྱང་དེ་ལྟར་ཞིབ་ཚགས་བྱས་ཏེ། སྤྲུལ་སྐུ་ཡིད་བཞིན་ནོར་བུའི་མཚན་དང་བཅས་པ་ཡིན་པར་ཐོས་པས་དགའ་སྤྲོ་ཚད་ལས་འདས་པ་བྱུང་ཡང་། སྐུ་མདུན་ལ་འགྲོ་རྒྱུ་ནི་ང་རང་མངའ་ཐང་མཐོ་བས་སྟབས་མ་ལྡན། ཉི་མཐོང་ཤེལ་སྒོའི་ནང་ནས་ཡིད་བཞིན་ནོར་བུ་དེ་ཉིད་ཅོག་བུའིཕྱི་ནང་ལ་ཕར་བྱོན་ཚུར་བྱོན་མཛད་པ་མཇལ་འདུག་པས་སྒོ་གསུམ་གཅིག་དྲིལ་གྱིས་གསོལ་བ་བཏབ་ཅིང་ལུས་ཀྱི་ཕྱག་རྒྱའི་གཙོ་བོ་བྱས་ཏེ་ཐུགས་ཡིད་བསྲེས། དེ་ནས་ཟླ་བ་བཅུ་གཅིག་པའི་ནང་དུ་བཀའ་དྲིན་ཅན་དེ་ཉིད་ལྷོ་གནས་རྣམས་སུ་བྱོན་སོང་བས། བདག་ནི་བུ་གཅིག་མ་དང་བྲལ་བ་ལྟར་སེམས་སྡུག་བསྔལ་གྱིས་ནོན་ཅིང་ཉིན་མཚན་མེད་པར་རྗེ་དེ་ཉིད་ལ་སེམས་འཕྲེང་འདུག་ཀྱང་། གཞན་ལ་ཟེར་མ་ཕོད་ནས་བར་བར་ངུ་གིན་བསྡད་པས། ཉིན་གཅིག་ང་ལ་ཨ་ཇོས་ཁྱོད་དེ་ཙམ་གྱིས་སྡུག བསྔལ་བྱེད་དོན་ཅི་ཡིན་ཟེར། བདག་གིས་ང་རང་གི་ཨ་མ་ཁོང་དྲན་པ་དང་། ད་ལོ་གསར་བ་ལ་ཟླ་བ་གཅིག་ལས་མེད་པས། ལོ་གསར་ནས་རང་ལོ་བཅུ་དྲུག་ལ་ཐོན་པ་ཡིན་པས། དེ་དུས་ བྃ༔ ཨ་ཏའི་བཀའ་བཞིན་གནས་ལ་འགྲོ་དགོས་པ་རྣམས་ཀྱིས་སྡུག་བསྔལ་བྱེད་པ་ཡིན་སྨྲས་པས། ཁོ་རང་གིས་ཀྱང་སེམས་ཆུང་བྱེད་ཅིང་ཚིག་ལན་མེད་པར་ཨ་ཏའི་མདུན་ལ་བུད་སོང་། བདག་ནི་གྲུབ་ཐོབ་རིན་པོ་ཆེའི་སྐུ་མདུན་ལ་སོང་ནས་བྱ་བ་གང་ཐད་ནས་ལོ་རྒྱུས་ཞིབ་པར་ཞུས་ཚེ། ཉིད་ཀྱི་ཞལ་ནས་འོ་ད་སྨོན་ལམ་དུས་ལ་བབ་པ་ཡིན་པས།ཁྱོད་རང་གི་བསམ་པ་ལྟར་གྱིས་དང་དོན་འགྲུབ་ངེས་ཡིན། ཁམས་ཕྱོགས་ཀྱི་བླ་མ་དེ་ཁྱོད་ཀྱི་ཚེ་རབས་ལས་ཀྱི་སློབ་དཔོན་ཡིན་པས་ཁོང་ལ་གསོལ་བ་ཐོབ་དང་། གཅིག་གྲོགས་གཅིག་གིས་བྱས་ནས་བསྟན་པ་དང་སེམས་ཅན་གྱི་དོན་རྒྱ་ཆེན་འབྱུང་བར་འགྱུར་རོ་གསུངས་ནས་བྱིན་རླབས་དང་སྨོན་ལམ་སོགས་མཛད་དོ། །བདག་གིས་ཀྱང་བླ་མ་ལ་སྐུ་དྲིན་གསོ་ཕྱིར་བྱུ་རུའི་ཕྲེང་བ་དང་གསེར་གྱི་གདུབ་བུ་རྣམས་ཕུལ་ནས་ཞབས་སྤྱི་བོར་བླངས་ཏེ་གསོལ་བ་བཏབ་པ་སོགས་བྱས་ནས་རང་ཁྱིམ་ལ་ཐོན་པས། ཨ་ཇོའི་ཞལ་ནས་ཁྱོད་ཨ་ཏའི་དྲུང་དུ་འགྲོ་དགོས་པར་འདུག །ཨ་ཏས་ཁོང་གི་རྨི་ལམ་ལོག་འདུག་པས་པདྨ་སྒྲོན་དཀར་ལ་འཁྲུགས་པ་འདྲ་གསུངས་ནས་ཐུགས་ཆུང་བར་མཛད་ཀྱིན་འདུག་ན་ཁྱོད་རང་ལན་གཅིག་ཡར་སོང་ལ་སླར་ཡང་ཕྱིར་ངའི་སར་ཤོག་དང་ཆོག་གསུངས། བདག་ གིས་ཨ་ཏས་ཐུགས་ཆུང་མཛད་ཚད་མེད། ང་གནས་ལ་སོང་ན་རྗེས་ཉིན་རེ་བཞིན་ང་རང་ཡོང་ཚོད་ནི་མེད། དེ་དུས་ཨ་ཏས་ཅི་མཛད། ཐུགས་ཆུང་མིན་ང་སྐྱིད་གྲོང་ཚང་གི་ཟུར་ལ་ཕུད་རན་པ་ལ་ཐུགས་དགའ་བ་ལོས་ཡིན་སྨྲས་པས། ཨ་ཇོས་དེ་ལྟར་ཅི་ལ་ཟེར་གཞན་གྱིས་ཚོར་ན་ཁ་ཁྲིམས་གཅོད་འོང་གསུངས། དེའི་བར་སྐབས་ཨ་ཇོའི་ངག་དང་། ང་རང་ཡང་ཁམས་ཕྱོགས་སུ་འགྲོ་རན་པར་ཨ་ཏ་ལ་ཐུགས་འདུན་ཡོད་པས། རང་ཁྱིམ་ལ་འོང་ནས་ཞག་ཁ་ཤས་སུ་བསྡད། སྔར་གྱི་གཡོག་མོ་གཉིས་ལ་ཁྲལ་ཁྲིམས་མེད་པའི་བཀའ་ཤོག་དང་། ཕྱག་མཛོད་ཀྱི་བླ་ཕོགས་གནང་བ་སོགས་ཀྱི་གསུང་མཛད་ཕེབས་པས། དཔོན་མོ་ན་རེ། སྐལ་བཟང་སྒྲོལ་མ་ཁྱོད་ཀྱིས་གཡོག་མོ་གཞན་རྣམས་ཁྲིམས་སྒོ་མི་ཕུད་པར་ཁོང་གཉིས་ཁྲིམས་སྒོ་ཕུད་དོན་ཅི་ཡིན། ཁྱོད་གནས་ལ་བྱོན་ཀྱང་ཁོ་རང་གཉིས་ཁྲིད་ན་མི་ཆོག་གམ་ཟེར། བདག་གིས་ང་རང་སོང་ཡང་ཁོང་གཉིས་མི་ཁྲིད་བསམ་པ་མིན་ལགས། ང་ཆུང་ལ་འོ་འཐུང་དུས་ནས་ཁོང་གཉིས་ཀྱིས་ངའི་གཡོག་བྱས་ཏེ་གཅེས་སྤྲས་སུ་བསྐྱངས་པ་ཡིན་པས་འདྲིས་ཐང་ཆེ། ང་རང་གི་ཁྱིམ་ལ་ཡོད་ཚེ་ཁོང་གཉིས་ལ་ལམ་ཁ་བདེ་མོ་ཞིག་བྱེད་སྙམ་པ་དང་། མིན་ཀྱང་རྒྱལ་པོའི་སྨྲ་བ་ལན་གཅིག་ཡིན་པ་ཆོད་ཆེ། བྃ༔ བར་འདུག་པས། ཨ་ཏ་དཔོན་གྱི་ཞལ་ནས་བཀའ་ཤོག་སོགས་ལོན་ན་དེའི་དགའ་བསམ་པ་ཡིན་སྨྲས། ཡང་ཨ་ཏའི་ཞལ་ནས་ཁྱོད་ཨ་ཇོའི་སར་ཉི་མ་མང་པོ་ཞིག་ཏུ་མ་འགོར་བར་ཚུར་ཤོག །བདག་གིས་རྨི་ལམ་འཁྲུལ་སྣང་མ་ངེས་ཤིང་། ཁྱད་པར་ང་རང་གི་མིག་གཉིས་གཞན་ཞིག་གིས་ལོངས་སྤྱོད་དགོས་ཟེར་བ་ལན་གྲངས་དུ་མར་རྨིས་པ་ཡིན་པས། ཁྱོད་ངའི་མིག་གིས་མི་མཐོང་བའི་ས་ཞིག་ཏུ་འགྲོ་ངེས་རེད་གསུངས། བདག་གིས་ཁྱེད་ཀྱི་སྤྱན་གྱིས་མི་གཟིགས་པའི་ས་ཞིག་ཏུ་སོང་ན་བདག་འཆི་འགྲོ་བ་ཨེ་ཡིན། དེ་མིན་མི་གཟིགས་དོན་མེད་པ་འདྲ་ཞུས་ཚེ། ཨ་ཏས་ཅི་ཡིན་ཐག་མི་ཆོད་གི །ཁྱོད་རང་དུས་རིང་མོ་ཞིག་ཏུ་མ་འདུག་གསུངས་ནས་གཅེས་གཅེས་མཛད་དེ་ཤེལ་ཀ་ར་གོར་མོ་གཉིས་དང་། གཞན་ཡང་ཁར་ཁ་སུར་རྒུན་འབྲུམ་མངའ་རིའི་ཁམ་བུ་སོགས་གནང་། བདག་ནི་དེ་རིང་མིན་པ་ལུས་ཐོག་འདིར་ཨ་