Tibetan
THE COLLECTED REVELATIONS(GTER CHOS)OFSE-RA MKHA'-'GRO BDE-CHEN-RDO-RJE VOLUME VI Published byBartshamChador Lhakhang SangdagGyepailing TI1399-001 DBUS-MO BDE-BA'I-RDO-RJE RNAMPAR THAR PANGES JUNG DREN PA'ISIN RTA SKALDEN DAD PAICHOS SDONG TI1399-002 ༄༅། །ཡེ་ཤེས་ཀྱི་མཁའ་འགྲོ་མ་ཀུན་བཟང་བདེ་སྐྱོང་དབང་མོའི་ཟབ་གཏེར་ཆོས་སྡེ་ལས་གླེགས་བམ་དྲུག་པ་བཞུགས་སོ། TI1399-004 ༄༅། །ཨོཾ་སྭསྟི། ཡེ་ཤེས་ཀྱི་མཁའ་འགྲོ་མ་ཀུན་བཟང་བདེ་སྐྱོང་དབང་མོའི་ཟབ་གཏེར་ཆོས་ཉིད་ཀྱི་ཆོས་སྡེ་གླེག་བམ་ཆ༽ རྟགས་ཅན་འདིར། དབུ་ཤོག་ལྡེབ་གཅིག་གིས་ཐོག་དྲངས་ཏེ་དབུས་མོ་བདེ་བའི་རྡོ་རྗེའི་རྣམ་པར་ཐར་པ་ངེས་འབྱུང་འདྲེན་པའི་ཤིང་རྟ་སྐལ་ལྡན་དད་པའི་ཆོས་སྡོང་ལྡེབ་གྲངས་༣༡༣ དང་། རྣམ་ཐར་ཆེན་མོའི་མཇུག་གི་ཁ་སྐོང་ཉུང་ངུ་གཡུ་ཡི་ཕྲ་ཚོམ་ལྡེབ་གྲངས་༡༤ ༼བྱ་བཏང་བ་ཁྲོ་རྒྱལ་རྡོ་རྗེའི་གསུང་༽དང་། གླེགས་བམ་གྱི་དཀར་ཆག་རང་ཉིད་ལྡེབ་༡ བཅས་བསྡོམས་ལྡེབ་གྲངས་༣༢༨ བཞུགས། ༈ མཚུངས་མེད་ཌཱ་ཀི་བདེ་སྐྱོང་དབང་མོ་ཡི། །ཟབ་གཏེར་མཁའ་འགྲོའི་གསང་མཛོད་ཆོས་སྡེའི་གཞུང་། །བར་མཚམས་སྒོམ་སྡེས་པར་དུ་བཏབ་སྤེལ་མཐུས། ཟབ་ཆོས་ཕྲིན་ལས་མི་ནུས་མཐར་རྒྱས་ཤོག། ༈ གྲུབ་བརྙེས་རིག་འཛིན་ཌཱ་ཀིའི་འཁོར་ལོས་བསྒྱུར། །སྔོན་མེད་གདམས་ཟབ་མཁའ་འགྲོའི་གསང་མཛོད་བདག །མཁའ་སྤྱོད་དབང་མོ་བདེ་བའི་རྡོ་རྗེས་ཡི། །རིང་ལུགས་ཕྱོགས་མཐར་འཕེལ་རྒྱས་རྟག་ཁྱབ་ཤོག །ཛྙཱ་ནས་སོ།། །། TI1399-006 དབུས་མོ་བདེ་བའི་རྡོ་རྗེའི་རྣམ་པར་ཐར་པ་ངེས་འབྱུང་འདྲེན་པའི་ཤིང་རྟ་སྐལ་ལྡན་དད་པའི་མཆོད་སྡོང་བཞུགས་སོ། =ས་ཤུ་དུ་དུ་གྱི་བྃ༔ ན་མོ་གུ་རུ་དྷེ་ཝ་ཌཱཀྐི་ནི་སརྦ་སིདྡྷི་ཧཱུྃ༔ རང་རིག་ངོ་བོ་བདེ་ཆེན་འདུས་མ་བྱས། །རྣམ་ཀུན་མཆོག་ལྡན་དོན་གྱི་ཧེ་རུ་ཀ །བཀའ་དྲིན་འཁོར་མེད་པདྨ་ལས་འབྲེལ་རྩལ། །བྱང་ཆུབ་བར་དུ་རིགས་ཀྱི་བདག་པོར་བཞུགས། །ཀ་དག་ལྷུན་འབྱམས་ཆོས་སྐུའི་གཞི་ཀློང་ནས། །ངོ་བོ་མི་འགྱུར་ཆོས་སྐུ་ཀུན་བཟང་མོ། །རང་བཞིན་མ་འགགས་རྡོ་རྗེ་རྣལ་འབྱོར་མ། །ཐུགས་རྗེའི་རོལ་གར་རྡོ་རྗེ་ཕག་མོར་བཞེངས། །སྐུ་གསུམ་མཁའ་འགྲོའི་ཚོགས་ལ་གུས་པས་འདུད། །ལོངས་སྐུའི་ཞིང་དུ་གང་གའི་ལྷ་མོར་བཞེངས། །རྣམ་མཛེས་བཀོད་དུ་ལྷ་མོ་དབྱངས་ཅན་མ། །རྔ་ཡབ་གླིང་དུ་མཁའ་འགྲོ་མཐིང་འོད་ བྃ༔ འབར། །གནས་གསུམ་མཁའ་འགྲོའི་རྗེ་མོར་གུས་པས་འདུད། །གཡུ་ལོ་བཀོད་དུ་ཨཱཪྻ་ཏ་རེ་དཀར། །བོད་ཡུལ་དབུས་སུ་ཡེ་ཤེས་མཚོ་རྒྱལ་མ། །ལྷོ་བྲག་མཁར་ཆུར་ཤེལ་དཀར་རྡོ་རྗེ་མཚོ། །གང་འདུལ་སྤྲུལ་བསྒྱུར་མཛད་ལ་གུས་པས་འདུད། །གང་གི་གསང་གསུམ་ཐུགས་རྗེའི་སྒྱུ་འཕྲུལ་གྱིས༈ །ཁམས་གསུམ་འཁོར་བའི་རྒྱ་མཚོ་མ་སྟོང་བར། །ཐབས་མཁས་ཐུགས་རྗེ་རྣམ་འདྲེན་དུ་མའི་ཚུལ།།དངོས་དང་དངོས་མེདགདུལ་བྱའི་དཔལ་ཤར་བའི། །ཕྲིན་ལས་བཟང་པོར་ཚད་བཟུང་མ་མཆིས་ཀྱང་། །སྐལ་བཟང་ལས་ཅན་སྨོན་ལམ་འཕྲོ་ལྡན་པ། །མདོ་སྔགས་ལུང་རིག་ཤེས་རབ་སྤྱན་མངའ་བ། འཕགས་པའི་ནོར་འཆང་སྐྱེས་བུ་ཀུན་གྱི་མཆོག །མཁས་པའི་དབང་པོ་དོན་ལྡན་རྣལ་འབྱོར་པས། །རྒྱལ་བའི་རིང་ལུགས་འཕགས་ལམ་ཐོབ་པ་ཡི། །སྐྱེས་བུ་རྣམས་ཀྱི་མཛད་སྤྱོད་དམ་པའི་སྲོལ། །དད་པ་ངེས་འབྱུང་དག་སྣང་མོས་རྟེན་དུ། །བདག་གིས་ས་ལམ་སྦྱང་བགྲོད་རིམ་པ་རྣམས། །རྗེས་འཇུག་དཔལ་དུ་བཀའ་བསྐུལ་ཟབ་གནང་བས། །སོ་སྐྱེས་བདག་ལ་རྟོགས་བརྗོད་གནས་དབེན་ཀྱང་། །གྲངས་མེད་རྣམ་དཀར་དགེ་བའི་རྟེན་འབྲེལ་གྱིས། །སྐྱེ་འཕྲེང་དུ་མར་ཟབ་མོ་གཏེར་ལ་དབང་། །གནས་གསུམ་དཔའ་བོ་མཁའ་འགྲོས་བྱིན་བརླབས་ནས། ས་ལམ་སྦྱངས་བགྲོད་མ་དགོས་གཅིག་ཆར་དུ། །བདེན་པས་བསྡུས་པའི་ཆོས་ཀྱི་དེ་ཉིད་ཤེས། །ཡོན་ཏན་མི་སྨྲ་གྱི་ནའི་ངང་ཚུལ་གྱིས། །ངེས་མེད་གནས་ཡུལ་འགྲིམས་པར་དམ་བཅས་ཀྱང་། །སྔོན་གྱི་ལས་སྨོན་རྟེན་འབྲེལ་མཐུ་སད་ནས། །ཡེ་ཤེས་མཁའ་འགྲོའི་ཞལ་མཇལ་ལུང་བསྟན་ཐོབ། །གཏེར་གཉིས་འདོམས་ཞིང་གདུལ་བྱ་ཐབས་ཀྱིས་བསྐྱངས། །འོན་ཀྱང་མ་འོངས་རྗེས་འཇུག་སྐྱེས་བུ་རྣམས། །ཡིད་ཆེས་ཕྱིར་དུ་སྔོན་བྱོན་རྒྱལ་བ་ཡིས། །བཀའ་དང་ལུང་གིས་བསྔགས་པ་ཅུང་ཞིག་སྤྲོ། །དེ་ལ་དུས་གསུམ་སངས་རྒྱས་ཐམས་ཅད་ཀྱི་ངོ་བོ་རིག་འཛིན་ ༤་བྃ༔ ཆེན་པོ་པདྨ་ལས་འབྲེལ་རྩལ་ཞེས་པ་མངལ་གྱིས་མ་གོས་སྐྱོན་བྲལ་པདྨའི་སྦུབས་སུ་སྐུ་འཁྲུངས་ཤིང་། མཛད་པ་དང་ཕྲིན་ལས་རྐང་གཉིས་རྣམས་ཀྱི་གཙོ་བོ་རྒྱལ་བ་ཐུབ་པའི་དབང་པོ་ཉིད་ལས་ལྷག་པ་དུས་གསུམ་སངས་རྒྱས་ཐམས་ཅད་ཀྱི་ཕྲིན་ལས་གཅིག་ཏུ་འཛིན་པ་པོའི་ཐུགས་དགོངས་ལ། ད་ནི་ཐབས་ལ་བརྟེན་ནས་དར་དཀའ་བ་གསང་སྔགས་རྡོ་རྗེ་ཐེག་པའི་བསྟན་པ་བོད་འདིར་དར་དགོས་པས། དབྱིངས་ཡུམ་རྡོ་རྗེ་ཕག་མོའི་སྤྲུལ་པ་བསྟན་པའི་དུས་ལ་བབ་བོ་དགོངས་ཏེ། གུ་རུ་ཉིད་འོག་མིན་གྱི་གནས་སུ་གཤེགས་སོ། །དེ་ནས་སྤྲུལ་སྐུའི་ཞིང་ཁམས་ཕྲག་བརྒྱར་ཉུལ་ཞིང་ལོ་བདུན་བར་དུ་བཞུགས་ཏེ། རྡོ་རྗེ་རྣལ་འབྱོར་མ་སོགས་སྐུ་གསུམ་ཡེ་ཤེས་ཀྱི་མཁའ་འགྲོ། རྗེ་བཙུན་སྒྲོལ་མ་ལ་སོགས་གནས་གསུམ་མཁའ་སྤྱོད་ཀྱི་མཁའ་འགྲོ ལྷ་མོ་དབྱངས་ཅན་མ་སོགས་རིགས་བཞི་གནས་ཡུལ་གྱི་མཁའ་འགྲོ་མ་ཐམས་ཅད་བསྡུས་ནས་ཟག་མེད་བདེ་བའི་རོ་ཡིས་མཉེས་པར་མཛད་ཅིང་བདེ་སྟོང་ཡེ་ཤེས་ཆེན་པོའི་དགོངས་པར་བཞུགས། རྡོ་རྗེ་ཕག་མོའི་ཐུགས་བརྒྱུད་བསྐུལ་ཏེ་བོད་མི་གདོང་དམར་འདུལ་བའི་ཕྱིར་དུ། སྐུ་གསུང་ཐུགས་ཡོན་ཏན་ཕྲིན་ལས་དེ་ཁོ་ན་ཉིད་ཀྱི་སྤྲུལ་པ་དྲུག་ཏུ་འགྱེད་ཅིང་གུ་རུའི་དགྱེས་སྡེ་མོ་ མཛད། དེ་དག་གཅིག་ཏུ་བསྡུས་པའི་བདག་ཉིད་ལྷ་མོ་དབྱངས་ཅན་མ་དེ་ཉིད་དཀྱིལ་འཁོར་གྱི་དབུས་ནས་བཞེངས་ཏེ་མཁའ་འགྲོ་རྣམས་ལ་གསོལ་བ། བདག་ནི་འཇིག་རྟེན་གྱི་ཁམས་སུ་འདུལ་དཀའ་བ་མི་སྲིན་བོད་དང་། ལྷོ་ནུབ་སྲིན་པོའི་ཡུལ་གླིང་དང་མུ་སྟེགས་བོན་སྡེ་ལ་སོགས་སངས་རྒྱས་ཀྱི་བསྟན་པ་ལ་འཚེ་བྱེད་རྣམས་འདུལ་བ་དང་། དར་དཀའ་བ་གསང་སྔགས་རྡོ་རྗེ་ཐེག་པའི་བསྟན་པ་ཡུན་དུ་དར་ལ་སྐྱོང་བ་དང་། གུ་རུའི་སྐུའི་ཕྱག་རྒྱ་མ་དང་བཀའ་ཡི་བསྡུ་བ་མོ་མཛད་པའི་དུས་ལ་བབ་བོ་གསུངས་ཏེ། ཉིད་ལས་མི་གཞན་པའི་སྤྲུལ་པ་བལ་ཡུལ་དུཀ་ལ་སིདྡྷི་དང་། མོན་མོ་བཀྲ་ཤིས་ཁྱིའུ་འདྲེན། དབུས་གཙང་ཕྱོགས་སུ་ཤེལ་དཀར་རྡོ་རྗེ་མཚོ་སོགས་སུ་སྤྲུལ་ཏེ། རང་ཡང་བདེ་ཆེན་ཡེ་ཤེས་མཚོ་རྒྱལ་མའི་སྐུར་བཞེངས་ཏེ། གསང་སྔགས་བཀའ་ཡི་བསྡུ་བ་མོ་མཛད་ནས་ཕྲིན་ལས་གུ་རུ་ཉིད་དང་མཉམ་ཞིང་མཛད་པ་དང་ཕྲིན་ལས་ས་གསུམ་ན་འགྲན་ཟླ་དང་བྲལ་བར་མཛད་ཅིང་། མཐར་གདུལ་བྱ་རྟག་འཛིན་ཅན་རྣམས་ཀྱི་སྣང་ངོར་མི་རྟག་པའི་ཚུལ་བརྟན་ཅིང་སྐུའི་བཀོད་པ་དབྱིངས་སུ་བསྡུས་ནས་འོག་མིན་དུ་གཤེགས་པར་དགོངས་ཏེ། བལ་འབངས་ཀཱ་ལ་སིདྡྷི་དང་། མོན་མོ་བཀྲ་ཤིས་ཁྱིའུ་འདྲེན་ལ་སོགས་རྗེ་འབངས་ལོ་ 2 བཱོ༔ པཎ་རྣམས་ལ་རང་རང་དང་འཚམས་པའི་གདམས་པ་དང་བསླབ་བྱ་མཛད་ཅིང་། ཁྱད་པར་དུ་སིདྡྷི་དང་ཁྱིའུ་འདྲེན་གཉིས་ལ་འདི་སྐད་གསུངས། བོད་མོ་མཚོ་རྒྱལ་ཡེ་ཤེས་སྒྱུ་མའི་འཕྲུལ། །དབྱིངས་ཀྱི་སྤྲུལ་པ་དབྱིངས་ཀྱི་རྒྱན་དུ་ཤར། །ལྷུན་གྲུབ་རྩལ་ལས་མཆོད་གཉིས་གར་དུ་བསྒྱུར། །མཉམ་ཉིད་རིག་སྟོང་ཆོས་དབྱིངས་ཀློང་དུ་རོལ། །ཞེས་གསུངས་མ་ཐག་ཏུ་བཀྲ་ཤིས་ཁྱིའུ་འདྲེན་ཨུཏྤལ་སྔོན་པོ་འདབས་མ་བརྒྱད་པའི་དབུས་སུ་ཧཱུྃ་དང་། འདབས་འཁོར་རྣམས་སུ་ཕཊ་བརྒྱད་ཡོད་པ་ཞིག་ཏུ་གྱུར་ནས་མཚོ་རྒྱལ་གྱི་ཐུགས་ཀ་གཡས་སུ་༥༡ཐིམ། ཀ་ལ་སིདྡྷི་པདྨ་དམར་པོ་འདབས་མ་བཅུ་དྲུག་པའི་དབུས་སུ་ཧྲཱིཿདང་འདབས་མ་རྣམས་སུ་ཨ་ལི་བཅུ་དྲུག་གི་མཚན་པ་ཅན་དུ་གྱུར་ནས་མཚོ་རྒྱལ་གྱི་ཐུགས་ཀ་གཡོན་ཕྱོགས་ལ་ཐིམ་刘།དེ་ནས་ཤེལ་དཀར་བཟའ་ཞི་བ་རྡོ་རྗེ་མཚོ་ཡིས་གསེར་གྱི་མཎྜལ་ལ་གཡུ་ཡི་ཚོམ་བུ་བཀོད་དེ་ལུས་ལོངས་སྤྱོད་དང་བཅས་པཕུལ་ཏེ་ཇོ་མོ་ལ་གསོལ་པ། ཀྱེེ་མ་བོད་ཀྱི་མཁའ་འགྲོ་མ། བདག་ཅག་རྣམས་ཀྱི་ལྟོས་བཅས་རྗེ། །ཁྱོད་མི་མངོན་དབྱིངས་སུ་གཤེགས་གྱུར་ན། །བདག་ཐུགས་རྗེ་མ་འདོར་རྗེས་བཟུང་ནས། །དཔལ་པདྨ་འོད་དུ་འཁྲིད་པར་ཞུ། །ཞེས་ཞུས་ཤིང་མཆི་ མས་བརྣང་ཏེ་བརྒྱལ་བར་གྱུར་པ། སླར་ཇོ་མོས་བྱིན་རླབས་མཛད་ཅིང་གསོས་པ་དང་། མཚོ་རྒྱལ་གྱི་ཞལ་ནས། ཨེ་མ་ཉོན་དང་ཤེལ་དཀར་བཟའ། །ཡེ་ཤེས་མཁའ་འགྲོ་རྡོ་རྗེ་མཚོ། ད་དུང་གདུལ་བྱ་མ་རྫོགས་པའི། །པདྨ་འོད་དུ་འཁྲིད་ཐབས་དབེན། །ཤེལ་བྲག་མཁའ་འགྲོའི་གསང་ཕུག་ཏུ། །དགེ་སློང་ནམ་མཁའི་སྙིང་པོ་དང་། །དབྱེར་མེད་ཐབས་དང་ཤེས་རབ་འབྲེལ། །འབྱུང་འདུས་ཤ་ཁྲག་རང་གཟུགས་འདི། །མཁའ་ལ་སྤྱོད་ཐབས་རྩ་རླུང་བསྒོམས། །རླུང་སེམས་གཅིག་ཏུ་འདྲེས་ནུས་ན། །དངོས་གྲུབ་བྱ་བ་ལོག་ན་མེད། །དུས་དང་རྣམ་པ་ཐམས་ཅད་དུ། །མཉམ་འགྲོགས་སྐད་ཅིག་མ་ཤོར་བར། །ཁོ་མོ་བདག་ལ་གསོལ་བ་ཐོབ། །འབྲལ་མེད་སྙིང་གི་དཀྱིལ་དུ་བསྒོམ། །དུས་དྲུག་ང་ཡི་ཞལ་མཐོང་ནས། །མཐའ་ཡི་གླིང་བར་སྲིན་ཡུལ་གྱི། །སྐྱེ་འགྲོ་ཁ་འཐོར་བྱེ་བ་ཕྲག །དུང་ཕྱུར་ཅུ་ཕྲག་འདུལ་བ་སོགས། །འགྲོ་དོན་བརྗོད་ཀྱིས་མི་ལོང་ངེས། །དེ་ནས་སྐྱེ་བ་གསུམ་བརྒྱུད་མཐར། །དཔལ་རི་པདྨ་འོད་གླིང་དུ། །རྡོ་རྗེ་བདེ་ཆེན་པདྨ་མཚོ། །བྱ་བར་འགྱུར་ནས་གུ་རུ་དང་། །འབྲལ་མེད་བདེ་ཆེན་དཔལ་ལ་སྤྱོད། །དེ་དུས་སྤྲུལ་པ་བཅུ་གསུམ་འགྱེད། །ཟབ་མོ་གཏེར་གྱིས་འགྲོ་དོན་ བྃ༔ མཛད། །མི་ལོ་ཁྲི་ཕྲག་བཅུ་གསུམ་ནས། །འོག་མིན་གསང་ཆེན་དུར་ཁྲོད་དུ། །རྡོ་རྗེ་ཕག་མོའི་ཐུགས་ཀློང་དུ། །གཉིས་མེད་མངོན་འཚང་རྒྱ་བར་འགྱུར། །ཞེས་གསུངས་ནས་རྡོ་རྗེ་ཕག་མོའི་དཀྱིལ་འཁོར་གྱི་ཞལ་ཕྱེས་ཏེ། ཕྱི་ནང་གསང་བའི་དབང་རྣམས་རྒྱལ་ཐབས་སྤྱི་བླུག་ཏུ་སྩལ་ཞིང་གཏེར་གྱི་གཉེར་བྱང་གཏད་ནས་ཐུགས་བསྐྱེད་སྨོན་ལམ་མཛད་དོ། །དེ་ལྟ་བུའི་ཡེ་ཤེས་ཀྱི་མཁའ་འགྲོ་མ་ཞི་བ་རྡོ་རྗེ་མཚོ་དེ་ཉིད་སྐུ་འཕྲེང་རིམ་པར་བྱོན་ཚུལ་ཅུང་ཟད་བརྗོད་ན། སྔོན་འཕགས་ཡུལ་དུ་འཕགས་མ་ཀོ་ཊི་པ། ཟངས་གླིང་དུ་གྲུབ་ཆེན་རོ་ལང་དམར་མོ། བོད་ཡུལ་པདྨའི་དྲུང་དུ་རྡོ་རྗེ་མཚོ། བལ་ཡུལ་ལི་ཡི་རྫོང་དུ་བྱང་ཆུབ་ཆོས་སྒྲོན། རྒྱ་ནག་ཏུ་ལྷ་གཅིག་ཁྲི་བཙན། གསང་ཕུག་རྫོང་དུ་བདེ་ཆེན་དཀར་མོ། ལྷོ་རོང་ནོ་ཐང་ཤེད་དུ་ཀུན་དགའ་འབུམ་མ། བསམ་ཡས་གནས་སུ་རྡོ་རྗེ་གཡུ་སྒྲོན་མ། ལྷོ་ཤད་རོང་དུ་པདྨ་མཚོ་སྐྱིད། ཡར་ལྷ་ཤམ་པོར་པུ་རྩེ་དེ་ཝ། ཨོ་རྒྱན་ལྗོང་དུ་བདེ་ཆེན་མཁའ་སྤྱོད་མ། བུམ་ཐང་གླིང་ན་གསལ་བྱེད་སྒྲོན་མ། འབྲི་གོང་དུ་བདེ་ཆེན་ཆོས་ཉིད་དབང་མོ། ས་སྐྱར་རྟ་མགྲིན་གྲུབ་པའི་དབང་མོ་སོགས་དོན་གཉིས་མཐར་ཕྱིན་གྱི་རྣལ་འབྱོར་མ་སོམ་ཉི་དང་བྲལ་བ་དུ་མ་བྱོན་པར་ ངེས་སོ། །ད་ལྟ་སྙིགས་དུས་འདིར་བདེ་ཆེན་བདེ་བའི་རྡོ་རྗེ་བདག་མཁའ་འགྲོ་ཤེལ་དཀར་གཟའ་དང་མཁའ་འགྲོ་བདུན་གྱི་ཕྲིན་ལས་སུ་ངེས་པ་རང་ལ་བཀའ་དྲིན་གསུམ་ལྡན་ཐོབ་པའི་མཚུངས་མེད་བླ་མ་དམ་པས་གསུངས་པ་དང་། ཁྱད་པར་མཚོ་རྒྱལ་དང་རྡོ་རྗེ་ཕག་མོའི་རྣམ་རོལ་དུ་རྡོ་རྗེའི་ལུང་གིས་གསལ་བ་ནི། གཏེར་སྟོན་པདྨ་གླིང་པའི་ཟབ་ཆོས་སྙིང་བྱང་དམར་པོ་ལས། མ་འོངས་དུས་བབ་ལྷ་ལྡན་ཆོས་གླིང་དུ༔ རྡོ་རྗེ་ཕག་མོའི་རྣམ་འཕྲུལ་བདེ་བའི་མཚན༔ ཆུ་འབྲུག་ལོ་པ་སྤྱི་མགྲིན་སྙིང་ག་རུ༔ བྃ་དང་ཧ་རི་ནི་སའི་རི་མོ་ཤར༔ ཟབ་གཏེར་གཉིས་འདོམས་གདུལ་བྱ་ཐབས་ཀྱིས་སྐྱོང་༔ ཞེས་དང་། བདུད་འདུལ་གཉིས་པའི་གཏེར་ལུང་ལས། སྙིགས་དུས་མཚོ་རྒྱལ་སྤྲུལ་པ་དབུས་ནས་འབྱུང་༔ དམན་པའི་ཚུལ་བཟུང་བདེ་བའི་རྡོ་རྗེ། ཐུགས་རྗེའི་མིང་མཐའ་ཅན༔ གཏེར་སྟོན་རྣམས་ཀྱི་སྐུ་ཚེའི་བར་ཆད་སེལ༔ རྩ་རླུང་རྣལ་འབྱོར་མང་པོར་ལམ་གྲོལ་སྟོན༔ གདུལ་བྱ་ལྷག་མ་མདོ་ཁམས་ཕྱོགས་ནས་འགྱེད༔ ཅེས་དང་། པདྨ་མཚོ་སྐྱིད་དམ་ཇོ་མོ་སྨན་མོའི་དག་སྣང་ཞལ་ཆེམས་ལས། མ་འོངས་ང་སྤྲུལ་ཡོས་སམ་འབྲུག་ལོ་པ༔ ཁྱིམ་པའི་ཚུལ་འཛིན་སུ་ཁ་བཛྲ་ཞེས༔ སྨོན་ལམ་དབང་གིས་མདོ་སྨད་གནས་ བྃ༔ ཡུལ་འགྲིམས༔ ཡང་གསང་མཁའ་འགྲོའི་ཐུགས་སྒྲུབ་ཆོས་གཏེར་འབྱིན༔ ཆོས་དབང་སྤྲུལ་པ་རིགས་ཀྱི་མྱུ་གུར་སྲིད༔ བསྟན་པ་རེ་དར་རེ་མི་དར་བ་འབྱུང་༔ ཞེས་དང་། རྡོ་གྲུབ་རིན་པོ་ཆེ་ལིཀྵཾ་ཀ་རའི་མ་འོངས་ལུང་བསྟན་ལས༔ དཔལ་ཨོ་རྒྱན་གྱི་བྱིན་ཐོབ་རྣལ་འབྱོར་མ༔ མིང་སུ་ཁ་བཛྲ་འབོད་པ་སྟེ༔ སྟོད་ཕྱོགས་ནས་སྨད་དུ་འབྱོན་གྱུར་ན༔ ཡུལ་ཐ་གྲུ་ཀུན་དགེ་བའི་ལྟས་བཟང་ཤར༔ ཞེས་དང་། དཔའ་བོ་ལས་རབ་རྡོ་རྗེའི་གཏེར་ལུང་ལས། མཚོ་རྒྱལ་སྤྲུལ་པ་ཏ་རེའི་མིང་༔ འབྲུག་ལོ་སྙིང་དབུས་བྃ་ཡིག་མཚན༔ ལྷ་ལྡན་ནུབ་ཀྱི་ཕྱོགས་ནས་འོང་༔ དེར་འཕྲད་ཚེ་ཆོས་བསྟན་པ་རྒྱས༔ ཞེས་དང་། སྐྱབས་རྗེ་ཐམས་ཅད་མཁྱེན་པ་པདྨ་ལས་འབྲེལ་རྩལ་གྱི་གཏེར་ལུང་ལས། ཟབགཏེར་ལྡེ་མིག་མཚོ་རྒྱལ་གསུང་གི་སྤྲུལ༔ བྲམ་ཟེའི་རིགས་འཆང་པདྨའི་ཟབ་གཏེར་དབང་༔ སུ་ཁའི་མཚན་ཅན་ཡེ་ཤེས་མཁའ་འགྲོ་དངོས༔ དེ་དང་སྨོན་ལམ་དབང་གིས་འཕྲད་ནས་ཀྱང་༔ གསང་གཏེར་སྒོ་འབྱེད་འོད་གསལ་མ་བུའི་སྐོར༔ ཡང་གབ་སྦས་པ་ཟབ་གནད་ལྡེ་མིག་བཅས༔ རྟེན་འབྲེལ་ལེགས་འགྲིགས་དུས་སུ་ཐོན་གྱུར་ནས༔ རྣམ་མང་འགྲོ་ལ་ཕན་ཐོགས་རྒྱ་ཆེར་ཤོག༔ ཅེས་ དང་། རང་གཏེར་མཁའ་འགྲོ་དགོངས་འདུས་ཁ་བྱང་ལས། མ་འོངས་སྙིགས་མ་ལྔ་བདོའི་དུས་ཀྱི་ཚེ༔ ཕག་མོའི་བྱིན་ཐོབ་མཚོ་རྒྱལ་སྐུ་ཡི་སྤྲུལ༔ ཞི་བ་རྡོ་རྗེ་མཚོ་ཡི་ཐུགས་རྗེ་གར༔ སྦས་པའི་རྣལ་འབྱོར་ཟབ་གཏེར་ཕྲན་བུ་དབང་༔ ཆུ་འབྲུག་ལོ་འཛིན་དེ་བྃ་ཏ་རེའམ༔ སུ་ཁ་བཛྲ་མིང་གིས་ཆོས་འདི་སྟོན༔ ཐབས་གྲོགས་ཆོས་བདག་སྨོན་ལམ་དབང་གིས་འཛོམས༔ བཟང་འབྲེལ་ཚེ་འདིར་མཁའ་འགྲོའི་གླིང་དུ་འདྲེན༔ ངན་འབྲེལ་འཁོར་བ་མཐའ་ཅན་མ་འོངས་དུས༔ གདུལ་བྱར་གྱུར་ནས་དཔལ་རིར་འཁོད་པར་ངེས༔ ཞེས་སོགས་སྔ་ཕྱི་དུ་མར་རྡོ་རྗེའི་ལུང་དུ་གསལ་བ་ཉེ་རིང་ཀུན་ནས་མཐོང་ཆོས་སུ་ངེས་ཀྱང་། རང་ཉིད་སྐྱེ་ལུས་དམན་པའི་དབང་གིས་དོན་གཉིས་ཀྱི་ཕྲིན་ལས་འབྱུང་ཚུལ་དང་། ས་ལམ་བགྲོད་པའི་རྟོགས་བརྗོད་ཀྱི་གནས་ལས་དབེན་མོད། གོང་དུ་སྨྲོས་པ་བཞིན་སྐལ་ལྡན་ཆོས་ཀྱི་བདག་པོ་དང་། རྗེས་འཇུག་གདུལ་བྱར་གྱུར་པ་རྣམས་ཀྱི་དང་བ་འདྲེན་ཕྱིར་དུ། ལོ་རྒྱུས་ཅུང་ཟད་བརྗོད་པ་ལ་ནི་ཐོག་མར་སྐྱེ་སྲིད་བཟུང་བའི་ཚུལ་ནི། རྒྱ་གར་རྡོ་རྗེ་གདན་གྱི་བྱང་ཕྱོགས། འཕགས་མཆོག་སྤྱན་རས་གཟིགས་ཀྱི་སྤྲུལ་པ་ཆོས་རྒྱལ་སྲོང་བཙན་སྒམ་པོའི་གདན་ས། བོད་ཡུལ་ཁ་བ་ཅན་གྱི་ཤར་ཕྱོགས། ར་ས་ བྃ༔ འཕྲུལ་གྱི་ལྷ་ཁང་གི་ནུབ་ཕྱོགས་ཀླུ་མོ་མཐིལ་ཞེས་པ། ས་འཛིན་རྡོ་རྗེ་གཡུ་སྒྲོན་མས་མཛད་པ། ཡུལ་རྟེན་གྱི་གཙོ་བོ་ཇོ་བོ་ཤཱཀྱ་མུ་ནེ་སོགས་ངོ་མཚར་གྱི་སྐུ་རྟེན་སྣ་ཚོགས་བཞུགས་པའི་ཉེ་ཆར་དུ། ཡུལ་གྲོང་ཐམས་ཅད་ལས་འཕགས་པ། རྒྱ་ར་ག་ཤར་ཞེས་པའི་ཕོ་བྲང་དུ་དཀར་པོ་ལྷ་ཡི་རིགས་ཞེས་སོག་པོ་དབང་གི་གདུང་བརྒྱུད་དུ་གཏོགས་པ་བཙན་ཕྱུག་འཕན་དར་དང་ལྡན་པའི་མི་དབང་ལྷ་སྲས་བྱམས་པ་མགོན་པོ་ཞེས་རོང་ཚའི་སྤྲུལ་པར་གྲགས་པ་དགོངས་གཏེར་ལ་དབང་ཞིང་གྲུབ་རྟགས་སོགས་ཐོགས་མེད་དུ་སྟོན་ཅིང་ཁྱིམ་པའི་ཚུལ་དུ་ཡོད་པ་དེ་ལ་གནས་ཆུང་ཆོས་སྐྱོང་གིས་ལུང་བསྟན་ཏེ། ཁྱོད་ཀྱིས་སྔགས་ཆས་མཛད་ནས་གནུབས་བཟའ་ཚེ་རིང་ཆོས་འཛོམས་ཞེས་པ་ཌཱཀྐིའི་རིགས་ཅན་ཞིག་ཡོད་པས། དེ་ཁབ་ཏུ་བཞེས་ན་ད་དུང་ཡང་ཁྱོད་ཚང་ལ་དངོས་གྲུབ་དང་རྣལ་འབྱོར་མའི་རྒྱུན་མི་ཆད་པར་གསུངས་པ་བཞིན་དུ། ཡུལ་མི་ཉེ་འབྲེལ་ཀུན་གྱིས་དེ་བཞིན་བྱེད་ཟེར་ནས་ཚེ་རིང་ཆོས་འཛོམས་ཁབ་ཏུ་བཞེས་ནས་ཡབ་མེས་གོང་མའི་བཀའ་སྲོལ་འཛིན་ཅིང་། མཆོག་དམན་ཀུན་གྱིས་བཀུར་བསྟི་དང་ཕུ་དུད་བྱེད་པའི་གནས་མི་དབང་ལྷ་ཡི་རིགས་སུ་སྐྱེ་སྲིད་བཟུང་ཞིང་། ཆུ་འབྲུག་ལོ་ཡི་ཟླ་བ་དང་པོའི་ཡར་ཚེས་གཅིག་གི་ ཉིན་མ་ཡུམ་ལ་གནོད་པ་མེད་པར་ངོ་མཐོང་བའི་ཚེ། བྱིས་པ་གཞན་དང་མི་འདྲ་བ་སྒོང་སྐྱེས་ཀྱི་ཚུལ་དུ་ཡོད་པ་ལ། མས་རེག་མ་སྤོབས་པར་ཕ་ཡབ་ལ་ལོ་རྒྱུས་ཞུས་ཚེ། ཕ་ཡིས་རྟེན་འབྲེལ་ལེགས་གསུངས་ཏེ། མདའ་མོ་སྒྲོ་ལྡན་དར་སྣ་ལྔས་བརྒྱན་པ་ཞིག་གིས་སྒོ་ང་དེ་ཁཕྱེས་པ་དང་མཉམ་དུ་འཇའ་འོད་འཁྲིགས་ཤིང་ཁང་སྟེང་ལ་བྱ་རྒོད་ཀྱིས་གར་འཆམས་པ་དང་། དྲི་བཟང་གིས་ཡུལ་དེར་ཁྱབ་པ་སོགས་འབྱུང་བ་དང་། གནས་ཁང་ནང་དུ་དུང་དཀར་གྱི་སྒྲས་གང་བ་སོགས་ངོ་མཚར་གྱི་ལྟས་མང་དུ་བྱུང་བས། ཡབ་ཡུམ་གཉིས་ཀས་འདི་སྤྲུལ་པའི་སྐུ་ཁྱིའུ་ཞིག་ཡིན་སྙམ་ཡང་མ་རེད། བུ་མོ་མཚན་ལྡན་གཅིག་འདུག་པས་ཅི་ཡིན་གསུངས། ཡུལ་མི་ཀུན་གྱིས་དཔོན་ཚང་ལ་སྤྲུལ་པའི་སྐུ་ཡ་མཚན་ཅན་ཞིགའཁྲུངས་སོ་གྲགས་སོ། །དེ་ནས་བྲམ་ཟེ་བོས་ཏེ་བྱིས་པའི་ལུས་དྲི་བཟང་གི་ཆུས་བཀྲུས་ནས་མཚན་རྟགས་བལྟས་པ་ལ་འདི་སྐད་ཟེར། འདི་ནི་གྲུབ་ཐོབ་གསང་སྔགས་འཆང་བའི་རིག་མར་འོས་ཤིང་། ཁྱིམ་ཐབས་འཛིན་པའི་གནས་ལམ་ཤིན་ཏུ་ངན་པར་འདུག །བཙུན་མ་མགོ་བྲེག་བྱེད་པ་ཡང་མ་ཡིན། འདིའི་སྐྲ་ལ་བྱིན་རླབས་ཐོབ་པའི་རྟགས་ཡོད་ཟེར་ཞིང་། ཕ་མ་དང་ཉེ་འབྲེལ་རྣམས་ལ་བདག་གི་ལུས་ལ་ཡི་གེ་ཡོད་པ་དང་། བྃ༔ སྐྲ་ལ་མཁའ་འགྲོའི་བྱིན་རླབས་ཐོབ་པའི་རྟགས་དང་། ཁྱད་པར་གནས་ལྔར་བཾ་ཧ་རི་ནི་ས་ཡོད་པ་རྣམས་བསྟན་པས་ཐམས་ཅད་དགའ་ཞིང་བཙས་སྟོན་རྒྱ་ཆེན་པོ་བྱས་སོ། །དེ་ནས་མིང་འདོགས་པར་བྱེད་དགོས་ཟེར་ཞིང་། རྒྱ་སྡེ་རྣམས་ཀྱིས་ངེད་ཀྱི་ལོ་ཐོབ་པ་ཡིན། གནམ་གང་གཉིས་ཡོད་པས་དེའི་ལན་གྱིས་ཡོས་བུ་ལོ་པ་ཡིན་ཟེར། བོད་ཤོག་པ་རྣམས་ཀྱིས་རྒྱལ་ཁམས་བོད་ཀྱི་ཚེས་གཅིག་གི་ཉིན་སྐུ་འཁྲུངས་པ་ཡིན་པས་འབྲུག་ལོ་ཐོབ་པ་ཡིན་ཟེར་ནས། རྒྱ་སྡེ་བོད་སྡེ་གཉིས་ཀྱི་མིང་བཏགས་པ་ལ་ཁ་མ་འཆམ་ནས། སྟག་ལུང་མ་ཧཱ་རིན་པོ་ཆེ་ལ་མིང་གི་ཅོད་པན་གྱི་བཀའ་བཏགས་ཞུས་ཚེ། སྐལ་བཟང་སྒྲོན་མ་ཞེས་མིང་དུ་བཏགས། བྲམ་ཟེའི་རྒྱ་སྡེ་བོད་སྡེ་གཉིས་ལ་ཁྱེད་ཅག་ནོག་འཁོན་མ་བྱེད་དང་། བུ་མོ་འདིའི་མཚན་རྟགས་ངེས་པ་མེད་པ་ཡ་མཚན་ཅན་ཞིག་འདུག་པས། འུ་ཅག་གི་དཔོན་མོ་མི་བྱེད་པ་འདྲ་ན། མ་ཧཱ་རིན་པོ་ཆེས་མིང་གསོལ་བ་དེ་ཀ་བཏགས་དགོས་ཟེར་ཀྱང་ཐམས་ཅད་ཡིད་མ་རང་བས། མ་ཡུམ་གྱི་ཞལ་ནས་དེ་སྔ་འོ་སྐོལ་ཚང་ལ་བུ་དང་བུ་མོ་མང་པོ་ཡོད་ཀྱང་སྡེ་གཉིས་པོ་ནོག་འཁོན་བྱེད་སྲོལ་མེད། ད་ལན་གྱི་