Tibetan
བུ་མོ་འདི་ཀ་སྡེ་དཔོན་གཉིས་ཀྱི་དཀྲུགས་ཤིང་ཡིན་པར་འདུག་པས་གཞན་ཞིག་ཏུ་སྦྱིན་ དགོས་ཟེར་བས། བློན་པོ་ཚེ་རིང་བཀྲ་ཤིས་ཀྱིས་དར་ཉིན་མོ་བདེ་ལེགས་ཞིག་དཔོན་མོ་ལ་ཕུལ་ཏེ་ཞུས་པ། ལགས་ད་སྔ་འོ་སྐོལ་ཚང་ལ་སྤྲུལ་པའི་སྐུ་རེ་འབྱོན་མ་མྱོང་ཡང་། སྲས་མོ་འདི་འདྲ་བསྐྱོན་གང་གིས་མ་གོས་པ་བསོད་ནམས་ཡོན་ཏན་ལྡན་པ་ཡོད་མ་མྱོང་བ་ཡིན་པས། ངེད་སྡེ་འབངས་ཀུན་གྱི་ཆོས་ཁྲིམས་དར་དཀར་གྱི་མདུད་པ་འཛིན་པར་བྱེད་པ་ཞིག་ལོས་ཡོང་སྙམ་པ་མ་གཏོགས། སྡེ་གཉིས་ཀྱི་དཀྲུགས་ཤིང་ཅིའི་ཕྱིར་འགྲོ། ཉིད་ཀྱིས་ཡབ་ཡུལ་དུ་མི་གནང་རོག་ཞུ་ཟེར་བ་ནས་སྡེ་འབངས་ཐམས་ཅད་ཀྱི་སེམས་འཁོན་རང་ཞི་ལ་སོང་ནས་ཡུལ་བདེ་ཞིང་བཀྲ་ཤིས་ཕུན་སུམ་ཚོགས་པ་འབྱུང་སྟེ། ཀུན་གྱི་གཅེས་མིང་དུ་ཀུན་དགའ་དབང་མོར་བཏགས་སོ། །དེ་ནས་ཕ་མས་གཅེས་སྤྲས་སུ་བསྐྱངས་ཏེ་ནར་སོན་ཚེ། ལོ་ངོ་གཅིག་ཐོག་ཙམ་འགྲོ་སྐབས་ཉི་ཐིག་ལ་འཇུས་ནས་མ་ལ་སྨྲས་པ། ང་འགྲོ་པདྨ་འོད་དུ་འགྲོ། །ཨ་མ་མཚོ་རྒྱལ་དྲུང་དུ་འགྲོ། །ཟག་མེད་ནུ་ཞོ་དེ་རུ་ཡོད། །ཟག་བཅས་ཟས་ཀྱི་དགོས་པ་མེད། །ཅེས་ཟེར་ནས་ཉིན་ཞག་བདུན་ལ་དྲན་པ་ཉམས་ཤིང་ཤི་སོང་བ་ལྟ་བུར་གྱུར། ཡུལ་མི་ཉེ་འབྲེལ་ཀུན་གྱིས་སྡུག་བསྔལ་བྱེད་ཅིང་ཐམས་ཅད་ཀྱིས་ཤིས་སོ་གྲགས། མ་ཡུམ་གྱིས་གཞན་ལ་ནི་ལོ་རྒྱུས་མ་ཞུས། དཔོན་ ༔ ལ་དེ་ལྟར་གོང་བཞིན་ལོ་རྒྱུས་རྣམས་ཞུས་ཚེ། ཡབ་ཀྱི་ཞལ་ནས་བུ་མོ་འདིའི་མཚན་ཉིད་གང་ལ་དཔྱད་ཀྱང་རིགས་ཅན་རྩ་དཀར་ཞིག་ཡིན་པར་འདུག་པས། གཞན་རིམ་གྲོ་ཅི་ལྟ་བུ་ཞིག་ལས། བླ་མ་རིག་འཛིན་གྱི་དཀྱིལ་འཁོར་ཞལ་ཕྱེས་ནས་མཆོད་པ་འབུལ་དགོས་གསུངས་ཏེ། དཀོན་མཆོག་སྤྱི་འདུས་ཀྱི་དཀྱིལ་འཁོར་ལ་ཚོགས་ཀྱི་མཆོད་པ་འབུམ་ཕྲག་ཕུལ་བ་སོགས་གྲུབ་རྗེས་གཉིད་སད་པ་ལྟར་ནད་ལས་གྲོལ་ཟེར། ལོ་ངོ་གཉིས་གསུམ་ལ་སྔར་གྱི་སྐྱེ་སྲིད་བཟུང་བའི་ཡུལ་དྲན་ནས་མ་ཡུམ་ལ། བདག་གི་གནས་ཁང་དང་ཕ་མ་གཉིས་འདི་སྐད་བྱ་བ་ཡོད་ཅེས་རྒྱ་གར་དང་བལ་པོའི་སྐད་ཀྱིས་བརྡ་སྤྲད་པས། མ་ཡིས་མ་གོ་བར་བལ་པོའི་མི་ཞིག་གིས་ལོ་ཙཱ་བ་བྱས་ཏེ། བརྡའ་སྤྲད་ནས་བོད་སྐད་དུ་སྨྲས་པ། ཡུལ་ལི་ཡུལ་ལྕང་རསྨུག་པོ། ཕ་ཨ་རྒྱ་ཡ་དང་། མས་ལེ་བྱ་བ་གཉིས་ཀྱི་བུ་མོ་བྱང་ཆུབ་ཆོས་སྒྲོན་བྱ་བ་ཡིན་ཟེར། ཆོས་གསང་སྔགས་རྡོ་རྗེ་ཐེག་པ། བླ་མ་ནི་བེེ་རོ་ཙ་ན་བྱ་བ་ཡིན། དེར་བདག་འགྲོ་དགོས་ཟེར་འདུག་སྨྲས། མ་ཡི་བསམ་པ་ལ་འདི་བྲམ་ཟེའུ་རིགས་རེད་ཟེར་བ་བདེན་འདུག །ཌཱཀྐིའིརིགས་ཅི་ཡིན་མི་ཤེས་སྙམ། དེ་ནས་བཟུང་སྟེ་ཆུང་ནས་ཆོས་ལ་མོས་པ་བློ་དཀར་ཕྱོགས་པ་འཇིག་རྟེན་གྱི་ གཏམ་ཅི་ཡང་མི་སྨྲ་ཞིང་ཡིག་དྲུག་དང་སྒྲོལ་མའི་སྙིང་པོ་རྒྱུན་དུ་ཁ་ཐོན་བྱས་འདུག །གཞན་བྱིས་པ་རྣམས་ཀྱི་རྩེ་གྲལ་དུ་སོང་ཡང་རྩེད་མོ་མི་བྱེད་པར་ཡིག་དྲུག་འདྲེན་འདུག་པས། བྱིས་པའི་ཚོགས་ཐམས་ཅད་མི་དགའ་ཞིང་དེ་རྣམས་ཁྱོད་ཨ་ཡི་ཨ་མྱེ་ལྟ་བུ་ཞིག་འོ་རེད། མ་ཎི་འདྲེན་འདུག་ཟེར་ནས་ཁ་སྨད་སྣ་ཚོགས་བྱེད་ཀྱིན་འདུག་པ་ལ་བདག་གིས་འཇིག་རྟེན་པའི་གླུ་ལ་དྲངས་ནས་འདི་སྐད་སྨྲས། ཧེ་ཧེ། ཉོན་དང་འདིར་འཚོགས་ཤག་མོ་རྣམས། །ཕྱི་སྣང་བའི་ཡུལ་ལ་ཕར་ལྟོས་དང་། །ཉི་ཟླ་མི་རྟག་སྟོན་པ་འདྲ། །ནང་འུ་ཅག་ཚོ་ལ་ཚུར་ལྟོས་དང་། །ན་ནིང་ཡོད་པ་ད་ལོ་མེད། །ཁར་སང་སྐྱེས་པའི་མེ་ཏོག་རིགས། །ད་ལྟ་འུ་ཅག་ལག་ཏུ་སྐམ། །དེ་སོགས་མི་རྟག་སྟོན་པ་འདྲ། །ང་རྩེ་ཁམས་མེད་པ་དེ་ཡིས་ལན། །གཤིན་རྗེའི་འཕྲང་རིང་འགྲིམ་པའི་དུས། །སྐྱབས་ཞུས་མ་ཎི་ཡིག་དྲུག་ཡིན། །ད་ཀུན་གྱི་མ་ཎི་གསུང་བར་ཞུ། །ཞེས་སྨྲས་པས། ཁོང་རྣམས་ན་རེ་ངེད་ཅག་རྒས་པ་འཆི་ཁ་ཡོད་པ་ལྟ་བུ་ནི་མིན། ཡིག་དྲུག་འདྲེན་ཚེ་ཡུལ་མི་གཞན་གྱིས་འཕྱ་ཁ་ཕོག་ཡོང་ཟེར། བདག་ནི་དེ་ནས་བཟུང་སྟེ་ཡུལ་ཁྱིམ་ཉེ་འབྲེལ་རྣམས་ལ་ཞེན་པ་ལྡོག་ནས་དབེན་རི་ཁོ་ནར་འགྲོ་མདུན་ཆེ་ཡང་ནར་ཆུང་བའི་སྟོབས་ཀྱིས་ཁང་པའི་སྟེང་འོག་ བྃ༔ ཙམ་མ་གཏོགས་འགྲོ་མ་ཕོད་ཀྱང་། མ་ལ་ལོ་རྒྱུས་རྣམས་དུས་ཀུན་ཏུ་བཤད་ཚེ། ཨ་མའི་ཞལ་ནས། ཁྱོད་ཀྱིས་དབེན་རིར་གཅིག་པུར་འདུག་བསམ་ཤིན་ཏུ་ཆེ་ན་ང་རང་གིས་དཔོན་ལ་གཅིག་ཞུ་དང་། བཙུན་མ་བྱེད་ཆོག་པའི་བཀའ་གནང་ཨེ་ཐོབ་བལྟ་ཟེར་ནས། ཕ་ཡབ་ལ་དེ་ལྟར་ལོ་རྒྱུས་ཞུས་ཚེ། ཕ་ཡི་ཞལ་ནས་སྔར་ཚེ་རབས་ལས་རྩིས་ལ་བཙུན་མ་མགོ་བྲེག་བྱེད་མི་ཉན་པ་ལྟ་བུ་ཡོད་པས་བདག་གིས་ཆ་མི་ཆོད། ལྕང་གྲོང་གྲུབ་ཐོབ་རིན་པོ་ཆེ་ལ་བརྟག་བབ་དང་ཅི་དགོས་ཀྱི་བཀའ་གྲོས་ཞིབ་རྒྱས་གྱིས་དང་གོ་རྒྱུ་ཡོད་ཟེར། དེ་ནས་ལོ་ངོ་བརྒྱད་ཀྱི་ལོར་ལྕང་གྲོང་གྲུབ་ཐོབ་རིན་པོ་ཆེ་ཞེས་པ་རྒྱ་ཤོག་དཔོན་ཁག་བཅོ་བརྒྱད་ཀྱི་དབུ་བླ་གྲུབ་ཆེན་ཐང་སྟོང་རྒྱལ་པོའི་སྤྲུལ་པར་ཡོངས་གྲགས་སུ་གསལ་བའི་སྐྱེས་བུ་དམ་པ་དེའི་སྐུ་དྲུང་དུ་ཡབ་ཡུམ་གཉིས་དང་བདག་བཅས་དཔོན་གཡོག་ཆ་ཤས་སོང་། དེ་ནས་བླ་མའི་ཞལ་ནས་ཁྱེད་ཅག་རྣམས་བྱོན་པ་བཟང་། རྟེན་འབྲེལ་ལེགས་སོ་ཡོད་པས་ཞག་ཆ་ཤས་ལ་འདི་ཀར་བཞུགས་དགོས་གསུངས་ཏེ། མགྲོན་ཁང་སོགས་ཕུན་སུམ་ཚོགས་པའི་ཞབས་ཞུ་མཛད། དེ་ནས་རིམ་བཞིན་ཕ་མ་གཉིས་ཀྱིས་བདག་གི་ལོ་རྒྱུས་ཐམས་ཅད་ཞིབ་པར་ཞུས་ཚེ། བླ་མས་གསུངས་པ་བུ་མོ་འདི་ ནི་ས་སྐྱའི་རྟ་མགྲིན་དབང་མོའི་སྤྲུལ་པ་འཁྲུལ་མེད་ཡིན་པས་ཁྱིམ་ཐབས་དང་བཙུན་གཟུགས་གཉིས་ཀ་མི་འོས། དུས་ལ་བབ་ཚེ་རིགས་སད་འོང་བས་དེ་བར་ལ་གང་བདེར་ཞོག་གསུངས། ཡང་ཨ་མས་གསོལ་པ་བུ་མོ་འདི་སྡེ་འབངས་ལ་བྱམས་བརྩེ་ཆེ་བའི་དཔོན་ཐོབ་ནོན་པར་དཀའ་འདུག །བཙུན་མ་ཞིག་ཆོག་ན་མོ་རང་ཡང་དབེན་ཁྲོད་ལ་འདུན་པ་ཆེ་འདུག་ཞུས་ཚེ། བླ་མའི་ཞལ་ནས་བུ་མོ་འདི་ལས་ཅན་ཡིན་པས་ཁྱོད་ཀྱི་སྡེ་འབངས་བསྐྱངས་ནས་ཨེ་འདུག་མི་ཤེས་ཀྱང་། ད་ལན་ལོ་བར་རེ་ལ་གང་བདེར་མཛད་དང་གསལ་འོང་གསུངས། བདག་ནི་ན་ཆུང་བས་ཅི་ཡང་ཞུ་མ་སྤོབས་ཀྱང་སེམས་ལ་རྒྱལ་ས་བཟུང་དགོས་པ་འདྲ་སྙམ་ནས་སྡུག་བསྔལ་བྱས་ཏེ་ངུ་ཞིང་བསྡད་པས། བླ་མས་ཤེལ་དཀར་ཞིག་གནང་ནས་ཁྱོད་མ་ངུ་དང་། བསམ་པ་ཆོས་བཞིན་དུ་འགྲུབ་ངེས་གསུངས་ཏེ་བརྡ་དང་བརྡ་ལན་ཞིག་མཛད་པ་བདག་གིས་གོ་སོང་བས། ཤེས་རབ་ཅན་ཞིག་རེད་གསུངས། བྱིན་རླབས་དང་སྐྱབས་མཇུག་སོགས་མཛད་ཅིང་ངེད་ཅག་རང་གནས་ལ་ཚུར་ཐོན། དེ་ནས་ལོ་ཁྱིམས་དེ་ཀའི་ཟླ་བ་དྲུག་པའི་ནང་དུ་དཔལ་ལྡན་ལྷ་མོའི་གསོལ་མཆོད་ལ་འགྲོ་ཞོར་དང་། གཙུག་ལག་ཁང་དུ་ལྷ་མཇལ་ལ་སོང་བས། སྒྲོལ་མ་དར་ལེན་ལས་ཞལ་ བྃ༔ འཛུམ་པའི་ཚུལ་མཛད་ཅིང་སྐུ་ལུས་འཕར་འདར་བྱས་པ་ཀུན་གྱིས་མཐོང་ཆོས་སུ་གྱུར། རང་ཡང་སྣང་བ་གནས་འགྱུར་ནས་དངོས་སུ་སྒྲོལ་མས་རྗེས་སུ་བཟུང་སྟེ་བྱིན་རླབས་ཐོབཔར་བསམ། དེ་ནས་བཟུང་སྟེ་དུས་ཀུན་སྒྲོལ་མ་ལ་རྩེ་གཅིག་ཏུ་གསོལ་བ་བཏབ་ནས་ཕྱག་འཚལ་ཉེར་གཅིག་གི་གསོལ་འདེབས་ཀྱང་རང་བཞིན་གྱིས་ཤེས་པ་བྱུང་ངོ་། །དེ་ནས་མ་ཡུམ་གྱིས་བུ་མོ་འདི་ལ་བོད་ཡིག་བསླབ་དགོས་བསམཀྱང་། ཕ་ཡིས་བཀའ་མ་གནང་བར་ཐོག་མར་རྒྱ་ཡིག་བསླབ་དགོས་གསུངས་ཏེ། རྒྱ་ཡིག་དང་རྒྱ་སྐད་ལ་ཤིན་ཏུ་མཁས་པའི་དྲུང་ཡིག་པ་ཞིག་གི་མདུན་ལ་རྒྱ་ཡིག་བསླབ་པར་བཏང་། བདག་ནི་ཡིད་ཕམ་ཞིང་ཡབ་ལ་ནི་ཞུ་མ་ཕོད། ཨ་མ་ལ་ཕྱག་ཕུལ་ནས་འདི་སྐད་ཞུས། ལགས་ང་རྒྱ་ཡིག་བསླབ་སྦྱངས་ལ་འགྲོ་འདུན་གཏན་ནས་མེད་ཀྱང་། ཕ་ཡབ་དཔོན་གྱིས་དཀའི་མ་གནང་། ཨ་མ་ཁྱོད་ལ་བདག་གི་ཡིད་ཆགས་ཀྱི་མ་གཏོགས་ཁྱོད་མེད་ཕྱིན་ཆད་བདག་གིས་རྒྱ་བོད་ཀྱི་ཡིག་སྣ་བསླབ་ནས་དཔོན་སར་མི་འདུག་ངེས་པར་ཐག་ཆོད་ཡིན་ཞུས་ཚེ། ཨ་མས་ཀྱང་སེམས་ཆུང་མཛད་ཅིང་བླ་མ་དཀོན་མཆོག་གསུམ་ལ་གསོལ་བ་ཐོབ་དང་། ཁྱོད་འཁོར་ངན་སྤྱོད་མི་དགོས། ད་ལན་ཕ་ཡི་བཀའ་བཞིན་ལོས་ དགོས་གསུངས་ནས་རྒྱ་ཡིག་བསླབ་པ་ལ་བཏང་བས། བདག་གིས་ཀྱང་ཕ་མའི་བཀའ་བཞིན་གྲོགས་མོ་ཆ་ཤས་དང་བཅས་ཡི་གེ་བསླབ་སྦྱང་ལ་སོང་བས། གྲོགས་གཞན་རྣམས་ལས་འཕགས་པའི་ཡི་གེ་ཤེས་པར་བྱུང་བས། ཡུལ་སྡེ་རྣམས་ཀྱིས་སྲས་མོ་འདིས་དཔོན་ས་ནོན་ངེས་ཀྱི་ཤེས་རབ་ཅན་རེད་ཅེས་གླེང་། དེ་ནས་ཉིན་གཅིག་བདག་གི་བསམ་པ་ལ་ངས་ཇི་ལྟར་བྱས་ཀྱང་འཇིག་རྟེན་ཆོས་བརྒྱད་ཀྱི་བྱ་བ་དགྲ་འདུལ་གཉེན་སྐྱོང་ལ་སོགས་བྱེད་དགོས་པར་འདུག་པས། བདག་ལྟ་བུའི་ལུས་ངན་འདི་མེད་ན་ཅི་མ་རུང་སྙམ་ནས་ཡི་གེ་དེ་ཆུ་ལ་བསྐུར། རང་ཡང་ཆུ་ནང་དུ་མཆོང་དགོས་བསམ་ནས། གུ་རུ་པད་འབྱུང་ཡབ་ཡུམ་དང་རྗེ་བཙུན་སྒྲོལ་མ་ལ་འོ་དོད་ཀྱིས་གསོལ་བ་འདི་ལྟར་བཏབ། ཀྱེེ་མ། སྐྱབས་གནས་ཀུན་འདུས་ཨོ་རྒྱན་པདྨ་འབྱུང་། །ཨ་མ་མཚོ་རྒྱལ་རྗེ་བཙུན་འཕགས་མ་སྒྲོལ། །གསོལ་བ་འདེབས་སོ་བདག་ལ་ཐུགས་རྗེས་གཟིགས། །སྐྱེ་དམན་བདག་གི་ལུས་འདི་འཁོར་བའི་གཞི། །ཟག་བཅས་མི་གཙང་ལུས་ངན་འདི་བོར་ནས་།དལ་འབྱོར་ལུས་བརྟེན་ཐོབ་པར་བྱིན་གྱིས་རློབས། །སྐྱེས་མ་ཐག་ཏུ་ཆོས་དང་འཕྲད་ནས་ཀྱང་། །ཚུལ་བཞིན་སྤྱོད་པའི་རང་དབང་ལྡན་པར་ཤོག །ཅེས་སྨྲས་ཏེ། ཆུ་ལ་མཆོང་ བྃ༔ གྲབ་ཡོད་ཚེ་བུད་མེད་མི་སྡུག་པའི་གཟུགས་ཅན་འཇིགས་སུ་རུང་བ་ཞིག་འོང་ནས། ཁྱོད་ཆུ་ལ་མཆོང་ཁར་ངས་བསད་དགོས་ཟེར་ནས་རལ་གྲི་ལག་ཏུ་བཟུང་སྟེ་ཐོན་བྱུང་བས། བདག་ནར་ཆུང་བའི་རྐྱེན་གྱིས་ཨ་མ་ལ་དྲག་ཏུ་ལན་གསུམ་བོས་པས། བདག་གི་གཡོག་མོ་རྣམས་ཀྱིས་ཚོར་ནས་མྱུར་བར་ཆུ་ཁ་ལ་གློ་བུར་དུ་ཐོན་ཏེ། དཔོན་མོ་ཁྱོད་ཅིའི་ཕྱིར་ཨ་མ་གསུངས་པ་ཡིན་ལགས་ཟེར། བདག་གིས་རྫུན་སྨྲས་ནས་ང་རང་ཡི་གེ་ཆུས་ཁྱེར་སོང་བས་དེ་ཡི་ཕྱིར་མ་ལ་འབོད་པ་ཡིན་ཟེར། ད་ནི་ཡབ་ལ་ཞུ་མི་ཕོད་པས་བདག་ཡུལ་གཞན་ཞིག་ཏུ་བྲོས་འགྲོ་དགོས་སྨྲས་པས། གཡོག་མོ་རྣམས་ཀྱིས་དེ་ལྟར་ཅི་ལ་དགོས། ཡི་གེ་ཉོ་རྒྱུ་ཡོད་པས་ཉོས་ན་ཆོག །ཁྱོད་རྒྱལ་པོའི་སྲས་མོ་ཞིག་དོན་མེད་ལ་ཡུལ་བུད་དུ་གང་ལ་བྱོན་ཟེར་ནས། ངེད་ཅག་རྣམས་ཁྱིམ་དུ་སོང་སྟེ་གཡོག་མོ་རྣམས་ཀྱིས་ཡི་གེ་ཆུ་ལ་ཤོར་བ་ཨ་མ་ལ་ཞུས་ཚེ། མ་ཡིས་ཅི་ཡང་མི་གསུངས་པར་ངོ་ནག་སློང་ངེར་བཞུགས་འདུག་པས། བདག་ཤིན་ཏུ་སྐྲག་ནས་ཅི་དགོས་སྙམ་པ་བྱུང་ཚེ། ཨ་མའི་ཞལ་ནས་ཁྱོད་ཀྱི་བསམ་པ་ལོག་པ་མ་འཛིན་ཅིག །སྐྱེ་བ་དུ་མར་རང་སྲོག་གཅོད་ངེས་རེ་ཡོད་འགྲོ་གསུངས། བདག་གིས་ཅི་ཡང་མ་ཞུས་པར་སྔར་ལྟར་ཡི་གེ་བསླབ་པ་ལ་སོང་། དེ་ ནས་བཟུང་སྟེ་དུས་ཀུན་ཏུ་སྔར་གྱི་བུད་མེད་འཇིགས་སུ་རུང་བ་དེས་བདག་པོ་བྱས་ཏེ་བྱ་བ་གང་ལ་ཡང་རང་དབང་མེད་པ་ལྟ་བུར་སོང་འདུག །དེ་ནས་ཟླ་བ་བཅུ་གཉིས་པའི་ཚེས་བཅུ་ལ་ཡེར་པ་ཟླ་བ་ཕུག་ཏུ་གུ་རུ་ང་འདྲ་མའི་མདུན་དུ་དཔོན་ཁག་བདུན་པོ་དེ་ལྷན་དུ་ཚོགས་མཆོད་ཕུལ་དུ་སོང་སྐབས། ནང་སྔ་མོ་ལྷ་རི་མགོ་ཞེས་པའི་རི་བོ་མཎྜལ་བཤམས་པ་ལྟ་བུ་ཞིག་ཡོད་པས། དེར་བྱིས་པ་མང་པོ་ལྷན་དུ་རྩེ་མོར་སོང་བས། དེའི་ལམ་ཁ་རུ་ཕ་ཝོང་ཆེ་བ་གཅིག་གི་སྟེང་ན་རིན་པོ་ཆེ་ལས་གྲུབ་པའི་ཕུར་བུ་ཞལ་གསུམ་ཕྱག་དྲུག་པ་མཐོ་གང་བ་ཞིག་འདུག་པས།བདག་གིས་ལག་གཉིས་ཀྱིས་ཤུགས་ཕུད་ནས་ཡར་འཐོན་ཚེ་སོར་བཞི་ལྔ་ཙམ་མ་གཏོགས་ལོན་འོང་སྐབས། བྱིས་པ་གཞན་ཐམས་ཅད་དེར་ལྷགས་ཏེ། པདྨ་སྒྲོན་དཀར་གྱིས་བྲག་ལ་ཕུར་པ་གདབ་འདུག་ཟེར་ཞིང་ཐམས་ཅད་ཀྱིས་བཞད་གད་ཐག་གིས་སོང་། བདག་ཀྱང་ཐེ་ཚོམ་ཟོས་ཤིང་ཕྱིར་ལོག་ནས་ཕ་ཡབ་ལ་དེ་ལྟར་འདུག་ཞུས་ཚེ། ཡབ་ཀྱིས་ཞལ་ནས་ཁྱོད་ཕྱིར་སོང་ལ་ཁོང་གི་སར་ཁྱེར་ཤོག་གསུངས། བདག་གིས་ཕ་ཡི་བཀའ་བཞིན་ཕུར་བུ་བཙལ་དུ་སོང་བས། སྔར་གྱི་བུད་མེད་དེ་ཕ་ཝོང་གི་སྟེང་ནས་གར་སྟབས་ཀྱིས་ལང་འདུག་ཡོད་པས། དེར་བདག་འགྲོ་མ་སྤོབས་པར་ཡབ་ཀྱི་དྲུང་དུ་ཕྱིར་ ༔ སོང་ནས་ལོ་རྒྱུས་ཞུས་པས། ཕ་ཡི་ཞལ་ནས་བུད་མེད་དེ་ཁྱོད་ཀྱི་ཚེ་རབས་ལས་ཀྱི་ལྷ་ཡིན་པས་དེ་ལ་ཅིའིཕྱིར་འཇིགས། ད་ལན་ཁྱོད་ཀྱིས་དོན་ཆེན་པོ་མ་ཆོད། ད་སང་ཉིན་ཁྱོད་གཅིག་པུ་སོང་ལ་བྲག་ཕུག་ཀུན་ཉུལ་ཞིང་ཅི་ལོན་ཀྱང་ང་ལ་ཁྱེར་ཤོག་གསུངས། ལགས་སོ་ཞུས་ཏེ་ཨ་མ་ལ་བདག་གཅིག་པུར་བྲག་ཕུག་ཏུ་འགྲོ་ཕོད་བྲལ་ཡང་། ཕ་ཡབ་ཀྱིས་བཀའ་གནང་ཕེབས་པས་ཅི་དགོས་ཞུས་ཚེ། ཨ་མའི་ཞལ་ནས་དཔོན་ལ་བདག་གིས་ཀྱང་ཞུ་མི་འོས་སོང་དང་ཕ་ཡི་བཀའ་སྒྲུབ་ན་མི་སྐྱོན་ཟེར། བདག་གིས་བུད་མེད་འཇིགས་སུ་རུང་བ་དེ་ཨེ་ཡོད་སྙམ་གྱི་ཞུས་པས། མས་ན་རེ་བུད་མེད་དནང་ལྷ་སར་སོང་ཡོད་པས་ཁྱོད་ཀྱི་སར་མི་འོང་གསུངས། བདག་བྱིས་པ་ཡིན་པའི་དབང་གིས་བདེན་པར་བཟུང་སྟེ། ནང་སྔ་མོ་བྱིས་པ་གཞན་རྣམས་ཀྱིས་མི་རིག་པར་བྱས་ནས་བྲག་ཕུག་ཉུལ་དུ་སོང་བས། ངོ་མི་ཤེས་པའི་བུད་མེད་མཛེས་མ་རྒྱན་གོས་ལེགས་པ་ཞིག་འོངས་ནས། གྲོགས་མོ་ཁྱོད་གང་དུ་བྱོན། གང་ནས་ཡིན་ཟེར། བདག་གིས་ང་ཕ་ཡབ་ཀྱི་བཀའ་བཞིན་བྲག་ཕུག་ཉུལ་དུ་འགྲོ་བ་ཡིན་སྨྲས་པས། མོ་ན་རེ། ང་ཡིས་ཁྱོད་ལ་འགྲོ་རོགས་བྱེད་ཟེར་ནས། ང་དང་མཉམ་དུ་ས་ཁུག་གཅིག་ལ་འོང་བས། གཡེར་ཁ་རྫོང་ཞེས་ཕུག་མོ་ཆེ་ཞིག་ཡོད་པ་དེར་ཐོན་སོང་བས། ཕུག་པའི་ཡ་ཐེམ་ལ་བྲག་ཆེན་པོ་ཞིག་འདུག །དེའི་ནང་དུ་འོད་ལྟ་བུ་ཞིག་ཤར་འདུག་པས། མོན་རེ། གྲོགས་མོ་ཁྱོད་ཀྱིས་འདིའི་ནང་དུ་ལྟོས་དང་ཨེ་འདྲ་གདའ་ཟེར། བདག་གིས་བལྟས་ཚེ་རིན་པོ་ཆེ་ལྗོན་ལས་གྲུབ་པའི་ཐུགས་ཆེན་ཡབ་ཡུམ་གྱི་སྐུ་འདྲབྱིས་པ་ལོ་བརྒྱད་ཀྱི་ཚད་ཙམ་ཞིག་འདུག་པས། བདག་གིས་འདི་ཅི་རེད་སྨྲས་ཚེ། མོ་ན་རེ། གྲོགས་མོ་ཁྱོད་ཀྱིས་འདི་མི་ཤེས་སམ་ཟེར། བདག་གིས་ལྷ་ཡབ་ཡུམ་ལོས་ཤེས་ཀྱང་། འདིར་ཡོད་དོན་ཅི་ཡིན་མི་ཤེས་སྨྲས། ཡང་མོ་ན་རེ། ཁར་སང་ཁྱོད་ཀྱིས་ཕུར་བུ་དེ་ལོན་ན་འདི་ཡང་ལོན་ནི་ལ་ཐང་ཅི་ཡོད། ད་འདི་ཡང་ལོན་ཐབས་མེད་པས་ཕར་ངོས་ཀྱི་བྲག་བར་གྱི་རིལ་བུ་འདི་རྣམས་ཁྱེར་ལ་ཨ་ཕ་ལཕུལ་དང་ཆོག །ཁྱོད་ཀྱིས་སྔ་མའི་རྟེན་འབྲེལ་འགྲིགས་ན་བསམ་ཡས་ནས་གནས་གསུམ་གྱི་རང་ནོར་ལོན་ཅིང་། དབུས་གཙང་གཉིས་པོ་ཁྱོད་ཀྱི་གདུལ་ཞིང་ཡིན་ཀྱང་། ད་ལན་དེ་ཙམ་རེད། ད་ཁྱོད་ལོ་བཅུ་བཞི་བཅོ་ལྔ་ཕན་ཆད་ལས་མི་འགྱངས་པར་མདོ་ཁམས་ཤར་ཕྱོགས་སུ་འགྲོ་དོན་ལ་བབ་བོ་ཞེས་ཟེར་བ་དང་མཉམ་དུ་མོ་གར་སོང་མེད་པར་ཡལ། བདག་གིས་དེ་དག་གི་དོན་ཅི་ཡིན་མ་ཤེས་ཀྱང་། རིལ་བུ་དེ་ བྃ༔ རྣམས་ཁྱེར་ནས་ཕ་ཡིས་དྲུང་དུ་ཕུལ་བས་ཐུགས་དགྱེས་པར་མཛདཅིང་། རིལ་བུ་རྣམས་ཙན་དན་དམར་པོའི་སྒམ་ཆུང་ཞིག་འདུག་པ་དེ་ཀའི་ནང་དུ་བཅུག་སྟེ། སྒམ་དེ་དརསྣ་ལྔས་དྲིལ་ཅིང་དཀྱིལ་འཁོར་གྱི་དབུས་སུ་བཞག་ནས་ཚོགས་འཁོར་རྒྱ་ཆེན་པོ་ཕུལ་འདུག །ཡང་བདག་གིས་ཨ་མ་ལ་རིལ་བུ་འདི་རྣམས་ཅི་རེད་ཞུས་པས། མ་ཡི་ཞལ་ནས་རིལ་བུ་འདི་རྣམས་བྲམ་ཟེའི་སྐུ་ཤ་ཨེ་ཡིན་སྙམ། དཔོན་གྱིས་བདུད་རྩི་ཆོས་སྨན་ཞིག་སྒྲུབ་དགོས་ཀྱང་བྲམ་ཟེ་སྐྱེ་བདུན་གྱི་ཤ་མ་རྙེད་པས། བྲག་ཡེར་པ་ན་ཡོད་གསུངས་པ་དེ་ཡིན་ནམ་སྙམ་གྱི་ཏ། ད་ཁྱོད་ཀྱིས་གཞན་ལ་གསང་དགོས་གསུངས། བདག་གིས་ནང་པར་སྔར་གྱི་སྐུའི་ལོ་རྒྱུས་ཐམས་ཅད་སྦས་གསང་མེདཔར་མ་ལ་ཞུས་ཚེ། མས་ཁྱོད་ཀྱིས་འདི་ལྟར་གཞན་སུ་གཅིག་ལའང་མ་ཟེར་ཅིག །ཁྲིམས་ཕོག་ཡོང་བས་བཟང་ངན་ཐམས་ཅད་ང་ལ་ཡང་ཟེར་མི་དགོས། གལ་ཏེ་བཤད་དགོས་ན་གྲུབ་ཐོབ་རིན་པོ་ཆེ་ལ་གསང་ཐབས་ཀྱིས་ཞུས་དང་སྐྱོན་མེད་ཟེར། དེ་ནས་དེར་འདུས་ཀྱི་དཔོན་དཔོན་མོ་སྲས་སྲས་མོ་ཐམས་ཅད་ལྷན་རྒྱས་སུ་བྱོན་ནས་རི་བསྐོར་དང་བར་བསྐོར་དུ་སོང་། དེ་ནས་འོ་ཐང་ཞེས་པ་བེེ་རོ་ཙ་ནའི་ཕྱགཕྲེང་འཐོར་བ་རྡོ་ཡི་མཆོད་སྡོང་བརྒྱ་རྩ་ཡོད་སར་གསོལ་ ཕོག་བསྐོལ་ནས་བཞུགས་ཡོད་སྐབས། བྱིས་པ་རྣམས་ཀྱིས་སེ་བའི་ཤིང་ཐོག་ཐུ་བར་སོང་བས། དེར་བདག་ཀྱང་སོང་སྟེ་ཤིང་སྡོང་པོ་ཆེ་བ་གཅིག་གི་རྩར་བསྡད་ཡོད་པས། རྟ་བྲ་ར་རྟིང་དཀར་ཅན་གྱི་སྟེང་ན་མི་ཕོ་དཀར་ལ་དམར་མདངས་ཅན་ཞིག་གིས་མགོ་ལ་རྨོག་དཀར་མེ་ལོང་གིས་བརྒྱན་པ་ལག་ན་ནོར་གཞོང་དང་རྦ་ལྕགས་འཛིན་ཅིང་གཟི་བརྗིད་དང་ལྡན་པ་ཞིག་འོང་ནས། ཨུ་ཕའི་བུ་མོ་ད་དུང་དེར་བསྡད་ཨེ་ཡོད། ང་ཁྱེད་ལ་འཕྲད་འདུན་ཆེ་བས་འོང་བ་ཡིན་ཟེར་ནས་རྟ་གོང་ནས་མར་ས་ལ་བབ་སྟེ། ང་རང་པང་དུ་བླང་ཞིང་གཅེས་གཅེས་བྱེད་འདུག་པས། བདག་གིས་ང་ཡི་ཕ་ཁྱོད་མིན་རྒྱ་དཔོན་ཚང་ཡིན། ཁྱོད་ང་རངགིས་རིག་མ་མྱོང་བས་ཕ་ཅི་ཕྱིར་ཡིན་སྨྲས། ཡང་ཁོ་ན་རེ། ང་ཁྱོད་ཀྱིཕ་ཡིན་མིན་ཨ་མ་ལ་ལ་དྲིས་དང་གསལ་ཟེར། བདག་གིས་ཁྱོད་ཀྱི་མིང་ཅི་སྐད་བྱ་བ་ཡིན། གདུང་རྒྱུད་རུས་ལ་ཅི་ཟེར་སྨྲས་པས། ཁོ་ན་རེ། ང་ཡི་མིང་སྣ་ཚོགས་ཡོད་ཀྱང་སྤྱི་ཁྱབ་ཏུ་གཉན་ཆེན་ཐང་ལྷ་ཟེར། རུས་ནི་ས་བརྒྱད་ཐོབ་པའི་དགེ་བསྙེན་དཀར་པོ་ལྷ་ཡི་རིགས་ཡིན། བརྒྱུད་པ་ནི་གུ་རུ་པདྨའི་ཟབ་གཏེར་གྱི་གཉེར་འཛིན་ཅིང་བོད་ཁམས་བདེ་ལ་འགོད་ཅིང་སངས་རྒྱས་ཀྱི་བསྟན་པ་དར་རྒྱས་ཡུན་དུ་གནས་པའི་བྱ་བ་བྱེད་དོ་ཟེར་མ་ བྃ༔ ཐག །གཞན་བྱིས་པ་མང་པོ་ཐོན་བྱུང་བས་གཏམ་གྱི་མཇུག་མ་རྫོགས་ཀྱང་རླུང་འཚུབ་ཞིག་གི་རྣམ་པར་ཡལ་སོང་། བདག་གིས་ཅི་ཡིན་སྙམ་ཡང་མ་ལ་ཞུ་མ་སྤོབས་པར་བཏང་སྙོམས་སུ་བཞག་གོ །དེ་ནས་ལོ་ངོ་དགུའི་དུས་སུ་ཕ་མ་གཉིས་བཅས་དབུས་རི་བར་སྐོར་ལ་སོང་སྐབས། འོན་ཕུ་སྟག་ཚང་གི་དབེན་གནས་སུ་ཐོན་ཚེ། སྔོན་གྱི་ལས་འཕྲོ་དྲན་ནས་ཨ་མ་ལ་འདི་སྐད་ཞུས། བདག་ཡེ་ཐོག་ཞིག་ཏུ་ཡུལ་འདིར་བསྡད་མྱོང་བ་འདྲ་ལགས། སྔར་གྱི་བྱ་བྱེད་དང་རང་སྐལ་གྱི་ཡི་གེ་རེ་ཡང་འདིར་ཡོད་པར་དྲན་འདུག་སྨྲས། ཨ་མའི་ཞལ་ནས་ཁྱོད་ཀྱིས་དེ་ལྟར་མ་ཟེར། སྔར་ཡབ་མེས་གོང་མ་ནས་བཟུང་ཆོས་ཀྱི་རྒྱལ་པོ་ངག་གི་དབང་པོའི་སྐུ་རིང་ནས་ད་བར་ལ་གྲུབ་པ་ཐོབ་པ་དུ་མ་ཡོད། བུད་མེད་ཡིག་གཏེར་ལོན་པ་མི་སྲིད་པས་རྒྱལ་པོའི་ཆད་པ་ཉོ་འོང་བས་ཁ་རོག་སྡོད་གསུངས། དེའི་ནུབ་རྨི་ལམ་ལ་མཁའ་འགྲོ་རུས་རྒྱནགསོལ་བ་དར་དང་རིན་ཆེན་སྣ་ཚོགས་སྤྲས་པ་ཞིག་བྱོན་ནས། ཆང་ཐོད་ཕོར་གང་གནང་ཞིང་རིགས་ལྡན་མ་ཁྱོད་ཀྱིས་འདི་གསོལ་དང་མཁའ་འགྲོའི་ཚོགས་སྐལ་རེད་གསུངས། བདག་གིས་ཞུས་པ་མཁའ་འགྲོའི་ཚོགས་གྲལ་དུ་མ་ཐོན་ན་ཚོགས་སྐལ་ཙམ་གྱིས་ཅི་ཕན་ཞུས་ཚེ། མཁའ་འགྲོའི་ཞལ་ནས་ ཁྱོད་ཀྱི་རྡོ་རྗེ་ཕུང་པོའི་འཁོར་ལོ་སློབ་དང་། མཁའ་འགྲོ་རླུང་སེམས་ཀྱི་ཆོ་འཕྲུལ་ཡིན་པས་མི་འགྱང་བར་མཇལ་འོང་གསུངས་ཏེ་ཐལ། དེ་ནས་རིམ་གྱིས་སོང་སྟེ་བཀྲ་ཤིས་ལྷུན་པོར་ཐོན། ས་སྐྱའི་སྔགས་