Tibetan
འཆང་གི་སྐུ་མདུན་ལ་སོང་བས། ཁོང་གི་ཞལ་ནས་མདང་སུམ་ང་རང་གི་རྨི་ལམ་བཟང་པོ་ཞིག་རྨིས་པས། བུ་མོ་འདི་རིགས་བཟང་རྩ་དཀར་ཞིག་ཡིན་པར་འདུག །འདིའི་སྤྱི་གཙུག་ན་སྐྲ་དཀར་གྱི་ཚོམ་བུ་ཨེ་འདུག་གསུངས། ཕ་ཡབ་ཀྱི་ཞལ་ནས་ལགས་བུ་མོ་འདི་ཆུང་དུས་སྤྱི་གཙུག་ཏུ་སྐྲ་དཀར་རྒོད་ཀྱི་ལྡེམ་འཕྲུ་ལྟ་བུར་འདུག་ཀྱང་། མོ་ནས་སྐྲ་བླངས་ཕྱིན་ཆད་སྐྲ་དཀར་རྣམས་ཁེར་སྐྱེས་སུ་སྐྲ་ཉག་བཅུ་ཐམ་པ་འདུག་ལ་ཞུས། བླ་མས་བུ་མོ་འདི་ཟངས་ཡག་བྲག་དགོན་ལ་སོང་ནས་རྩ་རླུང་བསླབ་ན་གསང་སྔགས་འཛིན་ནུས་པ་ཞིག་འོང་གསུངས་ནས་བསྲུང་མདུད་བྱིན་རླབས་སོགས་མཛད་དོ། །དེ་ནས་རྒྱལ་རྩེའི་དཔལ་འཁོར་མཆོད་སྡོང་མཇལ་དུ་ཕ་མ་གཉིས་ཀ་བྱོན་སོང་། བདག་རྩེ་སྐོར་ལ་མི་ཐར་གསུངས་ཏེ་གྲོགས་མོ་རྣམས་དང་ལྷན་དུ་བཞག་ཡོད་སྐབས། བདག་གི་བསམ་པ་ལ་ད་ལན་ངས་མཆོད་སྡོང་མ་མཇལ་ན་ད་ཕན་ཆད་ང་འདིར་མི་ཐོན་སྙམ་ཚེ། ང་རང་གི་སྣང་བར་བྱ་རྒོད་ཞིག་འོང་ནས་ང་ཁུར་སོང་སྣང་འཆར། གྲོགས་གཞན་ བཱ༔ རྣམས་ཀྱིས་བདག་གར་སོང་མ་མཐོང་ཟེར། བདག་ནི་དཔལ་འཁོར་མཆོད་སྡོང་དང་། རྒྱ་གར་གྱི་སྨོན་གྲུབ་མཆོད་སྡོང་། བྱ་རུང་ཁ་ཤོར་རེད་ཟེར་བ་དབུས་སུ་མཆོད་སྡོང་རིན་པོ་ཆེའི་སྣ་ཚོགས་ལས་གྲུབ་པའི་མཐའ་བསྐོར་དུ། མཆོད་རྟེན་ཆུང་ངུ་བཞིས་བསྐོར་བ། དེ་དག་གི་བར་མཚམས་ཐམས་ཅད་དུ་དྲིལ་བུ་དང་སི་ལིའི་ལྕགས་ཐག་གིས་སྦྲེལ་བ། ཕྱི་ལ་འཇའ་འོད་ཀྱི་ཟེར་འཁྲིགས་ཤིང་། དེའི་སྟེང་གི་གནས་སུ་མཁའ་སྤྱོད་མ་དང་རྡོ་རྗེའཆང་སོགས་ཆོས་སྐུའི་ལྷ་ཚོགས། བར་ཁྱམས་ལ་རྣལ་འབྱོར་མ་དང་གྲུབ་ཐོབ་བརྒྱད་ཅུ་ལ་སོགས་རིག་འཛིན་གྱི་ལྷ་ཚོགས། ཕྱི་ཁྱམས་ལ་རྡོ་རྗེ་ཕག་མོ་དང་དཔའ་བོ་དཔའ་མོ་ལ་སོགས་ཕྱོགས་བཅུའི་རྣལ་འབྱོར་གྱི་ཚོགས་དང་། འོག་ཁྱམས་ལ་ཞི་ཁྲོ་བཀའ་བརྒྱད་ཀྱི་ལྷ་ཚོགས་རེད་ཟེར་བ་སྣང་བས་དཔག་དཀའ་བ་དུ་མ་ཡོད་པར་མཇལ་བས། བདག་དེ་དག་གི་དྲུང་ནས་ཕྱིར་འོང་མ་འདོད་པར་བྱ་རྒོད་ལ་ཁྱོད་རང་རང་གནས་སུ་སོང་ལ་ང་རང་ཞོག་དང་འདི་ཀར་འདུག་སྙམ་གྱི་སྨྲས་པས། ཁོས་ཨོ་རྒྱན་སྐད་དུ་བརྡའ་ལན་སྤྲད་ཀྱང་བདག་གིས་གོ་མ་ཐུབ་ཅིང་། ཕྱིར་རང་ཡུལ་ལ་བདག་བསྐྱལ་བྱུང་བས། གྲོགས་མོ་རྣམས་ཀྱིས་ཁྱེད་གར་སོང་ཟེར། བདག་གིས་ང་གཡུ་ལོ་བཀོད་ དུ་སོང་སྨྲས་ཚེ། གྲོགས་མོ་རྣམས་ཀྱིས་ན་རེ། གཡུ་ལོ་བཀོད་དུ་ཕུང་པོ་དང་ལྷན་དུ་འགྲོ་ཚུལ་མེད། ཁྱེད་རང་ཐང་ཕྲུག་ཡིན་པས་ཨ་ཕ་ལ་ཐུག་འཕྲད་བྱེད་དུ་སོང་བ་འདྲ་ཟེར། བདག་གིས བསམ་པ་ལ་སྔར་ཡེར་བའི་ནགས་ཁྲོད་ནས་ཕ་ཡིན་ཟེར་བའི་མི་དེའི་བཤད་ཚུལ་དང་། ད་ལན་བྱིས་པ་འདི་ཚོའི་ཟེར་ཚུལ་རྣམས་གང་ལ་བརྟགས་ནའང་ང་རང་གི་ཨ་ཕ་རྒྱ་དཔོན་འདི་སང་མིན་པར་འདྲ་སྙམ་ནས། དང་རང་ཕ་ཡི་ལས་ཐང་ཅི་ཡིན་ཨ་མ་ལ་དྲིས་ནས་དེ་བཞིན་ཨེ་ཡོང་བལྟ་དགོས་བསམ་སྟེ། ཕན་ཚུན་ཀུན་གྱི་གཏམ་རྣམས་བཏང་སྙོམས་སུ་བཞག །དེ་ནས་རིམ་བཞིན་གནས་ཐམས་ཅད་བསྐོར་ཏེ་སྟེང་འབོག་ལ་ཕེབས། དེའི་ནུབ་རྨི་ལམ་ལ་རྗེ་བཙུན་སྒྲོལ་དཀར་ཡིན་སྐད་པས་མཁའ་འགྲོ་མ་དཀར་མོ་ཡེ་ཤེས་ཀྱི་འཇའ་སྐུ་ཅན་ཞིག་མདུན་གྱི་ནམ་མཁར་བྱོན་ནས་ཕྱག་གཡས་བདག་གི་མགོར་བཞག་ནས་འདི་སྐད་གསུངས། ཇི་ལྟར་སྔོན་གྱི་བདེ་གཤེགས་སྲས་བཅས་ཀྱིས། །འགྲོ་ལ་བརྩེར་དགོངས་བྱང་ཆུབ་སེམས་བསྐྱེད་ལྟར། །ཁྱོད་ཀྱང་བདག་གི་རྗེས་སུ་འཇུག་ཕྱིར་དུ། །བྱང་ཆུབ་མཆོག་ཏུ་སེམས་ནི་རབ་བསྐྱེད་ཅིང་། །གནས་ངན་འཁོར་བའི་རྒྱ་མཚོ་མ་སྟོང་བར། །བྱང་ཆུབ་མཆོག་གི་སྤྱོད་པར་བསླབ་ཅིང་འཇུག །ཡང་དག་དོན་ ༔ རྣམས་དེ་ཡིས་ཐོབ་པར་འགྱུར། །གསུངས་ཏེ་ནམ་མཁའ་ལ་འཇའ་ལྟར་ཡལ་སོང་། ནང་སྔ་མོར་ཚིག་རྣམས་མ་བརྗེད་པར་གསལ་པོར་འདུག་པས་ཁ་ཐོན་དུ་བྱས་ཏེ་ཨ་ཕའི་དྲུང་དུ་སོང་ཚེ། ཕ་ཡི་ཞལ་ནས། ཁྱོད་ཀྱི་ཁ་ཐོན་དེ་སུ་ཞིག་གིས་བསླབ་པ་ཡིན་གསུངས། བདག་གིས་ཞུས་པ་ལགས་ང་རང་གི་རྨི་ལམ་ལ་རྐྱེན་ནས་ཤེས་པ་ཡིན་ཞུས་ཚེ། ཕ་ཡབ་ཀྱིས་གསུངས་པ་ཡ་ཨ་བ་རི། ཁྱོད་ཀྱི་ངའི་རྒྱལ་ས་ཨེ་སྐྱོང་མི་ཤེས། ནད་བདག་ལ་ས་བས་མེད་པ། རེ་བདག་ལ་གནམ་ལས་མེད་པ་ཞིག་བྱས་ཏེ་ཁྱོད་རང་གཅིག་པུར་མ་ངེས་པའི་གནས་སུ་འགྲོ་ངེས་རེད་ཏ། འོན་ཀྱང་ཁྱོད་རང་གི་ཨ་མ་ཤི་མ་སོང་བར་དུ་གང་ལའང་མ་འགྲོ་གསུངས། ཡང་བདག་གིས་ཨ་མ་ཁོང་མ་གཏོགས་ཁྱོད་བདག་གི་ཨ་ཕ་མིན་ནམ་ཞུས་ཚེ། ཕས་གསུངས་པ་བདག་ཁྱོད་ཀྱི་ཕ་ཡིན་ངེས་ཀྱང་། ངས་འཁོར་འདས་བདེན་མེད་དུ་ཤེས་ནས་གྲུབ་ཐོབ་རིན་པོ་ཆེའི་སྐུ་དྲིན་གྱིས་སྣང་སྲིད་སྒྱུ་མ་རྨི་ལམ་དུ་སྦྱོང་ནུས་པ་ཡིན་གསུངས། ཡང་བདག་གིས་སྣང་སྲིད་རྨི་ལམ་སྒྱུ་མར་སྦྱོང་བྱེད་ཅི་ལགས་ཞུས་ཚེ། ཁོང་གིས་རྫོགས་པ་ཆེན་པོ་ཞེས་པ་ཆོས་ཞིག་བསྒྲུབ་རྒྱུ་ཡོད་གསུངས་པས། བདག་ནི་ཆོས་དེའི་མིང་ཐོས་པ་ཙམ་གྱིས་དད་པ་སྐྱེས་ ནས་མིག་མཆི་མས་འཁྲུགས་ལུས་བ་སྤུ་གཡོས་ཤིང་ཤི་མཐར་ཐུག་གི་བར་དུ་དམ་ཆོས་རྫོགས་པ་ཆེན་པོ་ཞེས་པ་དེ་ཨེ་འགྲུབ་བལྟ་དགོས། གལ་ཏེ་ལས་དབང་ངན་པའི་སྟོབས་ཀྱིས་མ་འགྲུབ་ཀྱང་། སྨོན་ལམ་བཟང་པོ་ཞིག་འདེབས་པར་ཐོན་ན་ཅི་མ་རུང་སྙམ་ནས། རང་གི་ཡིད་དམ་བཅས། དེ་ནས་ངེད་ཅག་ཀུན་རང་གནས་ལ་ཐོན་ཏེ་ལོ་གསར་སོགས་བྱས་སོ། །དེ་ནས་ལོ་ངོ་བཅུ་ལོན་དུས་ནང་བློན་ཚེ་རིང་བཀྲ་ཤིས་དང་། བཀྲ་ཤིས་དོན་འགྲུབ་གཉིས་ཀྱིས་ཨ་ཕ་དཔོན་ལ་ཞུ་བཕུལ་ཏེ། ང་རང་ལ་དཔོན་ཐོབ་གཏད་དགོས་ཟེར། བདག་ནི་ཡིད་ཤིན་ཏུ་སྐྱོ་ཞིང་གནས་ཁང་ནང་དུ་འདུག་སྙིང་མ་སྤྲོ་ནས། གྲོགས་མོ་གསུམ་དང་བཅས་སྐྱེས་མོའི་ཚལ་ཀུན་དགའ་གླིང་དུ་ཕྱིན་ནས་དེ་ཀར་ཞག་ཆ་ཤས་བསྡད་སྐབས་དཔོན་འདུས་བྱས་ཏེ། གྲོས་ཤོམ་དགོས་ཟེར་ཅིང་ཐམས་ཅད་ཀྱིས་འུར་ཟིང་བྱེད་འདུག་པས། བདག་གིས་བླ་མ་དཀོན་མཆོག་ལ་གསོལ་བ་བཏབ་པ། ཀྱི་ཧུད་ཀྱི་ཧུད་ཀྱེ་མ་ཧུད། སྐྱབས་གནས་དཀོན་མཆོག་གསུམ་པོ་མཁྱེན། །ལས་ངན་བུ་མོར་ཐུགས་རྗེས་གཟིགས། །ལུས་ངན་དཔོན་མོའི་ཚུལ་དུ་སྐྱེས། །བྱ་ངན་རང་གཞན་སྡིག་ལས་བསགས། །མྱོང་བ་དམྱལ་བའི་སྡུག་བསྔལ་མྱོང་། །བདག་འདྲའི་ལས་ངན་ལུས་ ཆོ ༔ མ་བླང་། །དཀོན་མཆོག་གསུམ་གྱིས་བསྐྱབས་ཏུ་གསོལ། །ཅེས་གླུ་ངག་ལ་དྲངས་ནས་སྨྲས་ཚེ། གྲོགས་མོ་རྣམས་ཀྱིས་ཧ་ཧ། ངན་གསུམ་ངན་གྱི་སོང་བའི་གླུ་འདི་མི་ལེགས་ཟེར། བདག་གིས་ཁྱོད་ཚོས་གླུ་ཞིག་ལོང་དང་སྨྲས་པས། ཁོང་ཚོའི་ནང་ནས་དཔོན་ད་ལོ་ཕའི་བུ་མོ་སྙུའུ་རྩེ་ཞེས་པས་གླུའདི་སྨྲས། ཁྱོད་ཞལ་དཀར་བ་ཟླ་བའི་བཞིན་དང་མཚུངས། །དམར་དམར་བྱུ་རུའི་མདོག་ལྟར་མཁུར་ཚོས་མཛེས། །གང་དང་གང་འགྲོའི་ས་ལ་མཉེན་ལྕུག་ལྡན། །བུ་མོ་རྣམས་ལ་གཟིགས་པའི་སྤྱན་ཟུར་ཁྲ་ཧྲིག་གེ། །ཨ་ཆེ་རྒྱལ་པོའི་བཙུན་མོ་མཆོག་ཁྱོད་འདྲ་ཡིས། །བདག་ཅག་གྲོགས་མོ་རྣམས་ལ་དཔལ་ཡོན་གནོང་། །ཞེས་ཟེར་ནས་ཐམས་ཅད་ཀྱི་ཞལ་འཆམས་འདུག་གོ། །དེ་ནས་ཞག་ཆ་ཤས་ནས་རྒྱ་ཤོག་དཔོན་ཁག་བཅོ་བརྒྱད་ཀྱི་ཕྱི་བློན་ནང་བློན་སུམ་ཅུ་དང་རྒྱ་སྡེ་བོད་སྡེའི་རྫོང་དཔོན་རྣམས་འདུས་ཏེ་བཀའ་གྲོས་མཛད་ཅིང་བདག་ལ་ཕ་ཡི་གདན་ས་འཛིན་དགོས་ཟེར། བདག་གིས་སྨྲས་པ་ཁྱོད་རྣམས་ཀྱིས་ང་ལ་ཁ་ཚོད་བྱེད་མི་དགོས། ཅི་བྱེད་ཅི་མཐའ་སྔོན་ལས་ཀྱིས་ཤེས། ཨ་ཇོ་དང་ཨ་ཆེ་གཉིས་ལ་ཕ་ཡི་ཐོབ་ཐངས་གཏོད་དང་དེ་ཡིས་དགའ་སྨྲས། བློན་པོ་རྣམས་ན་རེ། ཁྱོད་ཀྱི་ཇོ་ཇོ་གཉིས་དང་ ཨ་ཆེ་རྣམས་ལ་གཞི་སྐལ་དང་དཔོན་ཐོབ་གཏད་ཚར་ཏེ། ཁོང་རང་རྣམས་ཀྱིས་བྱ་བཅི་དགོས་བསྐྱངས་ནས་བཞུགས་ཡོད་པ་འདི་ཀ་རེད། ཁྱོད་ནི་མིང་སྲིང་ཀུན་གྱི་ཆུང་བ། དཔོན་དང་དཔོན་མོའི་གཅེས་ཕྲུག །བུ་ཆུང་ཐོབ་ཀྱི་བདག་པོ་ཡིན་པས་དེ་ལུགས་དགོས་ཟེར་ནས་ཤོམ་ར་བྱེད་འདུག །བདག་གིས་ཨོ་རྒྱན་ཆེན་པོ་དང་། ཡེ་ཤེས་མཚོ་རྒྱལ་གཉིས་ལ་གསོལ་བ་འདེབས་ཤིང་ཁོང་རྣམས་ལ་ཚིག་ལན་ཅི་ཡང་མ་སྨྲས་པར་བསྡད་ཚེ། ཐམས་ཅད་ཀྱིས་སྲས་མོས་ཚིག་ལན་མི་སྟེར་བ་འདི་ཅི་ཡིན་ཟེར། ལ་ལས་སྲས་མོ་ན་ཆུང་བའི་རྐྱེན་གྱི་རེད་ཟེར། ལ་ལས་མིན་ན་སོ་ཆུང་ཡང་སེམས་ཤེས་ཆེ་བ་ཞིག་ཡིན་འདུག་པས་དེས་ལན་ཟེར་ནས་ཐམས་ཅདཕྱིར་དཔོན་པོ་རྣམས་ཀྱི་སྐུ་མདུན་དུ་སོང་། བདག་ཨ་མ་ཡོད་སར་སོང་ནས་ལོ་རྒྱུས་ཐམས་ཅད་བཤད་པས། མས་ཀྱང་བློན་པོ་རྣམས་ཀྱིས་ཅི་བསྒོས་ལྟར་གྱིས་དང་དེ་དགའ་གསུངས། ཡང་བདག་གི་བསམ་པ་ལ་དཔོན་ས་མི་འཛིན་ཞུ་མི་ཕོད་ཆད་པ་འོང་། ང་རང་གི་ཕ་སུ་ཡིན་དྲིས་ནས་དེའི་བྱ་བ་ཨེ་ཐོན་བལྟ་དགོས་སྙམ་ནས་ཨ་མ་ལ་ཞུས་པ། བདག་གི་ཨ་ཕ་སུ་ཡིན། དེའི་བྱ་བ་ང་རང་གིས་བསྐྱང་ཨེ་ཐུབ་བལྟ་ལགས། བདག་རྩེད་མོ་ལ་ཕྱིན་ཚེ་ཨ་ཆེ་དང་གྲོགས་མོ་རྣམས་ཀྱིས་ང་ལ་ བྃ༔ ཁྱོད་དཔོན་སྤྱི་ཁྱབ་སང་གི་བུ་མོ་མིན། ཐང་སྙེད་རེད་ཟེར། མིན་ཀྱང་གཉན་ཆེན་ཐང་ལྷ་ཡིན་ཟེར་བ་ཞིག་གིས་ཁོའི་བུ་མོ་ཡིན་ཟེར་བ་ལན་གྲངས་མང་པོའི་བར་དུ་རྨི་ལམ་ལ་གསལ་ཀྱང་། གཞན་གཅིག་ལའང་ཟེར་མ་ཕོད་པས་ཅི་ཡིན་ཨ་མ་ཁྱོད་ཀྱིས་དགོངས་ཞུས་ཚེ། ཨ་མའི་ཞལ་ནས་ཁྱོད་ཀྱི་ཨ་ཕ་གཉན་ཆེན་ཐང་ལྷ་ཡིན་ཟེར་བ་བདེན། ང་རང་འདམས་ཤོད་ཀྱི་དཔོན་ཁག་རྣམས་ཀྱིས་མགྲོན་འབོད་བྱས་སར་སོང་སྐབས་ཉིན་ཞག་ལྔར་བདག་བོར་ནས་གཞི་བདག་གིས་ཁྲིད་སོང་། དེ་སྐབས་ཐང་ལྷ་ཞེས་པའི་མི་ཕོ་གཟི་བརྗིད་ལྡན་པ་ཞིག་དང་ལྷན་དུ་བསྡད་པར་སྣང་བས་ཞག་ལྔ་ནས་འདམས་ཤོད་གཉན་དྲུང་ཞེས་པའི་རི་སུལ་དུ་ཕྱིར་ཐོན་ཀྱང་ནད་མ་ངེས་པ་ཞིག་གིས་ན་འདུག་པས། ཀུན་གྱིས་རིམ་གྲོ་ཆེན་པོ་བསྒྲུབས་ཀྱང་མ་ཕན། ཕྱིར་ལྷ་སར་རང་ཁྱིམ་ལ་འོངས་ནས་ཡབ་ལ་ཞུས་པས་སྐྱོན་མེད་ཁྱོད་ལ་གཞི་བདག་གི་བརྒྱུད་ཞིག་འདུག་གསུངས། ང་རང་ཁྲིམས་ལ་ཤིན་ཏུ་དོགས་ཀྱང་ཐབས་མེད་པ་ཡིན་པ་ཀུན་གྱིས་མི་གསལ་བའི་ཁ་ཁྲིམས་བཞག་ནས་མ་མངོན་པ་ཡིན། ཁྱོད་ལུས་ལ་ཡོད་ཕྱིན་ཆད་ལན་གྲངས་མང་པོར་ང་རང་ལ་དག་པའི་སྣང་བ་མ་ངེས་པ་ཤར་བ་དང་། དུས་རྒྱུན་དུ་རྡོ་རྗེ་གཡུ་སྒྲོན་མ་ཡིན་ཟེར་བའི་མཁའ་འགྲོའི་ཆ་ བྱད་ཅན་གྱི་མི་མོ་ཞིག་གིས་ལན་རེ་ཁྲུས་གསོལ་བྱེད། ལན་རེ་བརྡ་ཐབས་ཀྱིས་ཁྱོད་དང་མོ་རངགཉིས་སྤྲུལ་པ་གཅིག་ཡིན་ཟེརསྣང་འཆར་གསུངས་ཏེ། གོང་དུ་སྨོས་བཞིན་ཆུང་ནས་བཟུང་ལོ་གཅིག་གཉིས་སོགས་ཀྱི་ལོ་རྒྱུས་ཐམས་ཅད་ཞིབ་རྒྱས་སུ་གསུངས། དེ་ནས་ང་རང་གཟིམ་ཆུང་ཉི་འོད་གླིང་དུ་སོང་ནས་བསྡད་ཡོད་ཚེ། མཁའ་འགྲོ་ཡེ་ཤེས་མཚོ་རྒྱལ་ཡིན་གསུངས་པའི་བུད་མེད་ཡིད་དུ་འོང་བ་རིན་པོ་ཆེའི་རྒྱན་དུ་མས་སྤྲས་ཤིང་དྲི་བཟང་གིས་གནས་ཁང་ཐོ་ཕྱི་ཀུན་ཁྱབ་པ་ཞིག་བྱོན་ནས་འདི་སྐད་གསུངས། སྐལ་ལྡན་མ་ཁྱོད་ཀྱིས་ང་འབོད་དོན་ཅི་ཡིན་གསུངས། བདག་གིས་ང་ཡི་འོ་དོད་འབོད་པའི་དོན་ནི། ཁྱོད་ཡེ་ཤེས་དབྱིངས་བཞུགས་རྣམས་ལ་ཐུགས་རྗེ་དང་ནུས་སྟོབས་ཆེ་བས། བདག་ཁྱིམ་ནས་ཁྱིམ་མེད་པར་དབེན་པའི་རི་སུལ་དུ་ཡང་དག་པའི་ཆོས་ཤིག་བསྒྲུབ་སྙམ་པ་དེ་བསམ་པ་ཇི་བཞིན་འགྲུབ་པ་དང་། ཕ་མ་ཉེ་འབྲེལ་ཀུན་གྱིས་འཁོར་བའི་བྱ་བ་བསྐྱང་དགོས་གསུངས་ཏེ་བཀའ་བཙན་དུ་མཕེབས་ཡོད་པས་དེ་སེལ་ཐབས་ལ་ཅི་དགོས་ལགས་ཞུས་ཚེ། ཌཱཀྐིའི་ཞལ་ནས། ཁྱོད་ཀྱིས་ཉིན་མཚན་དུས་དྲུག་ཏུ་གསོལ་བ་འདི་ལྟར་ཐོབ་དང་བར་ཆད་ཐམས་ཅད་ཞི་བར་ངེས་སོ་གསུངས་ཏེ་སྐུ་མི་སྣང་ཞིང་གསུང་གི་གདངས་ལས་འདི་ བྃ༔ སྐད་ཐོས། ཨེ་མ་ཧོཿ སྐྱབས་གནས་ཀུན་འདུས་མཁའ་འགྲོ་མཚོ་རྒྱལ་མར། །བཟོད་མེད་གདུང་ཤུགས་དྲག་པོས་གསོལ་བ་འདེབས། །ཕྱི་ནང་གསང་བའི་བར་ཆད་ཀུན་ཞི་ཞིང་། །བསམ་པ་ལྷུན་གྱིས་འགྲུབ་པར་བྱིན་གྱིས་རློབས། །ཞེས་གསུངས་པས། བདགགིས་ཀྱང་དུས་རྒྱུན་དུ་འདི་ལ་བརྩོན་པས་སྡེ་དཔོན་ཀུན་གྱི་བློ་ལོག་ནས་ང་རང་གིས་དཔོན་ཐོབ་འཛིན་མི་འཛིན་གང་བདེ་བྱེད། དཔོན་ཤུལ་སྟོང་ཐབས་མེད་ཟེར་ནས་གྲོས་ལོང་སྟེ་ཐམས་ཅད་རང་གནས་སུ་སོང་ངོ་། །དེ་ནས་ལོ་བཅུ་གཅིག་དུས་ལྷ་སའི་བླ་བྲང་སྟེང་ལ་སྟག་ལུང་ཁྲི་ཆེན་མ་ཧཱ་རིན་པོ་ཆེས་ཞི་ཁྲོ་ཁྲོམ་དཀྲུགས་ཀྱི་དབང་མོ་ཆེ་གསུངས་ཚེ། དེ་ལྟར་ངེད་ཅག་རྣམས་ཀྱང་དབང་ཞུ་ལ་སོང་བས། དེའི་དུས་དབང་གི་བྱིན་རླབས་སྐབས་སུ་བདག་གི་ལུས་འཕར་བ་དང་གར་དང་ཕྱག་རྒྱ་བཅའ་བ་སོགས་དབང་མེད་དུ་བྱུང་བས། དེར་འདུས་ཐམས་ཅད་ཀྱིས་ངོ་མཚར་རོ་ཞེས་གྲགས། མ་ཧཱ་རིན་པོ་ཆེ་ནས་ཀྱང་གསང་ཡུམ་དུ་མིང་གསོལ་ནས་ཁོང་གི་སྐུ་གེགས་སེལ་བའི་རྟེན་འབྲེལ་གྱི་སྣ་ཁ་མ་ལོག་པ་སོགས་བྱུང་། ལོ་ཁྱིམས་དེའི་ཟླ་བ་དྲུག་པའི་ཚེས་བཅུའི་ཉིན་བསྟན་རྒྱས་གླིང་གི་འཆམ་མཇལ་དུ་སོང་ནས་ཡོད་སྐབས། ཨ་མའི་པང་ལ་མགོ་བཞག་ནས་ ཅུང་ཞིག་གཉིད་ཚེ་རྨི་ལམ་ལ་ཨོ་རྒྱན་རིན་པོ་ཆེ་མཇལ་དུ་འགྲོ་ཟེར་ནས་མི་མང་པོ་ཐོནབྱུང་། ང་རང་ཡང་གུ་རུ་མཇལ་འདོད་ཆེ་བས་ཁོང་རྣམས་ཀྱི་རྗེས་སྙེག་ནས་སོང་བའི་བར་སྐབས་ཞིག་ཏུ་སྐྱེས་མོའི་ཚལ་རྒྱ་ཆེ་ལ་ཁྱོན་ཡངས་པ་མེ་ཏོག་དང་ལྗོན་ཤིང་རབ་ཏུ་རྒྱས་པའི་དབུས་སུ་འཇའ་འོད་ལྟ་བུའི་ཁ་དོག་ལྔ་ལྡན་གྱི་གུར་ཁང་ནང་དུ་ཟ་འོག་གི་འབོལ་སུམ་བརྩེགས་ཀྱི་སྟེང་དུ། གུ་རུ་ཉིད་ལན་རེ་གསེར་སྐུ་ལྟ་བུར་སྣང་། ལན་རེ་ཡེ་ཤེས་སྒྱུ་མའི་སྐུ་རུ་སྣང་འདུག་པས། བདག་གིས་གྲོགས་རྣམས་ལ་གུ་རུའི་སྐུ་གཉིས་སུ་སྣང་བ་དེ་ཅི་རེད་དྲིས་ཚེ། ཁོང་རྣམས་ན་རེ་གུ་རུ་རིན་པོ་ཆེ་ཡེ་ཤེས་འཇའ་སྐུ་ཡིན་པས་གཉིས་སུ་སྣང་དོན་མེད། ཁྱོད་ཀྱིས་འཁོར་བར་བློ་མ་ལྡོག་པས། གཉིས་སྣང་འཁྲུལ་དབང་གིས་སྒྲིབས་པ་རེད་ཟེར། ཡང་བདག་གིས་ང་རང་ཆུང་ལོ་བརྒྱད་ནས་བཟུང་རྗེ་བཙུན་སྒྲོལ་མའི་དྲུང་ནས་བྱང་ཆུབ་སེམས་སྡོམ་ཐོབ་ཕྱིན་ཆད། ཆེ་བ་མི་ཆུང་བ་བྱ་དང་རི་དྭགས་ཐ་ན་ཤིག་སྲོ་ཙམ་ལ་ཡང་གནོད་འཚེ་སྤངས་ཤིང་ཕན་ཐོགས་ཅི་ཡོད་བྱེད་པ་དང་། དུས་རྒྱུན་དུ་དཀོན་མཆོག་ལ་བློ་ཕུག་གཏད་ནས་ཆོས་བསྒྲུབ་ཀྱི་བསམ་པ་ཡོད་སྨྲས་ཚེ། གུ་རུ་རིན་པོ་ཆེ་གང་བྱོན་མ་གོ །རྣལ་འབྱོར་མ་མཁའ་སྤྱོད་མ་གློ་བུར་དུ་བྱོན་ནས་འདི་སྐད་གསུངས། བྃ༔ རིགས་ལྡན་མ་ཁྱོད་ཀྱིས་བྱང་ཆུབ་ཀྱི་སེམས་བསྒོམས་པས་བསྐལ་པ་དུ་མའི་ཚོགས་རྒྱ་ཆེན་པོ་རྫོགས་པར་འགྱུར་རོ། །ཆོས་སྒྲུབ་བློ་ཙམ་གྱིས་ཡང་དག་པའི་ལྷ་ཆོས་མི་འགྲུབ་པ་ཡིན་པའི་ཕྱིར་ན། དང་པོ་ཁྱོད་ཀྱིས་སྙིང་ཐག་པ་ནས་ཆོས་བརྒྱད་ཀྱི་སྣ་འདྲེན་ཕ་མ་ཉེ་འབྲེལ་འཁོར་གཡོག་མངའཐང་ཐམས་ཅད་ལམ་ཁའི་རྡོ་བོར་བ་བཞིན་དུ་བློས་ཐོངས་ལ་དགོས་མེད་རྒྱུད་ལ་མ་སྐྱེས་ཀྱི་བར་དུ་བློ་སྦྱོངས་ཤིག །གཉིས་པ། རང་གི་ལུས་རྟེན་འདི་ལྟ་བུ་ནི་ཡང་ཡང་རྙེད་པར་དཀའ་བའི་དཔེ་ནི་ཨུ་དུམ་ཝ་རའི་མེ་ཏོག་ལས་ཀྱང་དཀོན་པ་ཡིན་པས། འདི་ཆུད་ཟོས་སུ་མ་བཏང་བར་ཡང་དག་པའི་ལྷ་ཆོས་ཞིག་བསྒྲུབ་ན་ཐར་པའི་ལམ་བཟང་ཐོབ་པའི་ལུས་རྟེན། དཔེར་ན་ཡིད་བཞིན་གྱི་ནོར་བུ་ལས་དགོས་འདོད་རང་འབྱུང་བ་ལྟར། སྐུ་དང་ཞིང་ཁམས་ཡེ་ཤེས་ཡོན་ཏན་ཐམས་ཅད་རང་བཞིན་གྱིས་ཐོབ་པར་བྱེད་དོ། །འཁོར་བའི་བྱ་བ་ལ་འབད་རྩོལ་བྱས་ན་ངན་སོང་གི་གནས་རིས་རྣམས་སུ་འཕེན་བྱེད་ཀྱི་རྡོ་ལྟ་བུའིཕུང་པོ་ཡིན་ནོ། །དཔེར་ན་རེག་ཕུང་གི་དུག་ལས་སྨན་མི་འབྱུང་བ་ལྟར་འཁོར་བའི་གནས་ན་བདེ་བ་ནམ་ཡང་ཡོད་པ་མ་ཡིན་ནོ། །དེས་ན་དལ་འབྱོར་གྱི་མི་ལུས་ཐོབ་དཀའ་བ་ལ་བསམ་ནས་སྐྱེ་ཤི་གཉིས་ལ་རང་དབང་མ་ཐོབ་ཀྱི་བར་ དུ་དལ་འབྱོར་ཆུད་མ་སོན་པར་མི་ལུས་དོན་ལྡན་བྱེད་པ་གལ་ཆེ། གསུམ་པ་མི་ལུས་རིན་པོ་ཆེ་ཐོབ་ཀྱང་སྐྱེ་འཆི་རང་ངོས་ནས་གྲུབ་པ་ལྟ་བུ་ཤ་སྟག་ཡིན་ཏེ། ཇི་ལྟར་ཡིན་སྙམ་ན་ཕྱི་སྣོད་འཇིག་རྟེན་སྲ་ཞིང་འཐས་པ་འདི་ཡང་མཐར་མེ་བདུན་ཆུ་གཅིག་རླུང་གིས་འཇིག་ནས་མི་རྟག་པ་དང་། སྐྱེ་འགྲོ་སེམས་ཅན་རྣམས་ཀྱང་ཚོང་དུས་ཀྱི་མགྲོན་པོ་ལྟར་ཚེ་ཚད་ལ་ངེས་པ་མེད་ཅིང་གཅིག་སྔོན་གཅིག་གིས་གཅོད་ནས་ཚེའི་དུས་ལས་འདས་པ་ལ་བསམ་ནས་མི་རྟག་པ་བསྒོམ་པ་དང་། ནམ་ཟླའི་དུས་ཚོད་ཀྱང་མི་རྟག་ཅིང་དུས་བཞིར་འཕོ་བ་དང་འགྱུར་བ་ཡིན་ནོ། །དེའི་ཕྱིར་ན་སྒྱུ་མའི་ཕུང་པོ་འདི་ནི་དབུགས་རྟ་རྔ་ཙམ་དང་དྲོད་མེ་སྟག་ཙམ་གྱི་རྟེན་ཡིན་པས་འདི་དང་མ་བྲལ་བར་དུ་དམ་པའི་ཆོས་ཀྱི་བསྐུལ་མ་འཆི་བ་མི་རྟག་པ་བསྒོམ་ལ་འཆི་སྲིད་ཆོས་ཀྱི་སྐུ་ཐོབ་པ་ཞིག་བྱེད་དགོས་སོ། ། བཞི་པ་འཁོར་བ་གང་དུ་སྐྱེས་ཀྱང་སྡུག་བསྔལ་གྱི་རང་བཞིན། སྡུག་བསྔལ་གྱི་ཡོ་ལང་། སྡུག་བསྔལ་གྱི་འཁྲུལ་འཁོར་ལས་མ་འདས་ཤིང་། བདེ་བའིགནས་སྐབས་སྐད་ཅིག་ཙམ་ཡང་ཡོད་པ་མ་ཡིན་ནོ། །དེ་ལྟ་བུའི་མཐའ་མེད་འཁོར་བའི་གནས་ངན་འདི་རུ་སྡུག་བསྔལ་ཁོ་ནར་སྤྱོད་པའི་སྐྱེ་འགྲོ་དེ་དག་རང་གི་ཕ་མར་མ་གྱུར་པ་གཅིག་ཀྱང་མེད་དོ། །ཕ་མར་གྱུར་པའི་དུས་སུ་ད་ལྟའི་ བྃ༔ ལུས་ཀྱི་ཕ་མ་བཞིན། དང་པོ་མདངས་དང་ཤ་ཁྲག་གིས་གསོས། བར་དུ་ཁ་ཟས་འཐུང་སྐལ་གྱིས་གསོས། ཐ་མ་རྒྱུ་ནོར་ལོངས་སྤྱོད་ཀྱིས་གསོས་ནས་གཅེས་སྤྲས་སུ་སྐྱོང་མཁན་ཤ་སྟག་ཡིན་པས། དེ་དག་རྣམས་འཁོར་བ་སྡུག་བསྔལ་གྱི་རྒྱ་མཚོ་ལས་སྒྲོལ་ཞིང་གཏན་དུ་བདེ་བ་སངས་རྒྱས་ཀྱི་ས་ཐོབ་པར་བྱ་སྙམ་ནས། སྡུག་བསྔལ་གྱི་གཞི་མ་འཁོར་བའི་འདྲེན་ཆོས་བརྒྱད་ཀྱི་བྱ་བ་བློས་དོར་ལ་དམ་པའི་ཆོས་ཁོ་ན་ལ་བརྩོན་པ་གལ་ཆེའོ། །ལྔ་པ་ལས་འབྲས་བསླུ་མེད་བསམ་པ་ནི་རང་གིས་ལས་གང་བསགས་རང་ལ་སྨིན་ངེས་པ་ཡིན་ནོ། །སྔོན་ལུས་ངག་ཡིད་གསུམ་གྱི་སྒོ་ནས་དཀར་པོ་དགེ་བའི་བསོད་ནམས་རྒྱ་ཆེན་པོ་བསགས་པའི་མཐུ་ལས། ད་ལྟ་མི་ལུས་རིན་པོ་ཆེ་ཐོབ་སྟེ་དལ་བའི་རྟེན་འབྱོར་པའི་ལོངས་སྤྱོད་དང་ལྡན་པ་རྣམས་ཀྱང་ལས་འབྲས་བསླུ་བ་མེད་པའི་སྟོབས་ཀྱིས་སྔོན་བསགས་དགེ་འབྲས་སྨིན་པ་དང་། སྔོན་སྡིག་ལ་སྤྱོད་པའི་དབང་གིས་ད་རེས་ལུས་རྟེན་འདི་ཡང་མི་ལུས་ཐོབ་ཙམ་མ་གཏོགས། དལ་བའི་གནས་དང་འབྱོར་པའི་ཡུལ་མེད་ཅིང་ལས་གང་བྱེད་སྡིག་པ་མི་དགེ་བ་ཁོ་ནར་འགྱུར་ཞིང་ཚེ་འདིར་བདེ་སྐྱིད་སྤུ་རྩེ་ཙམ་ཡང་མི་འབྱུང་བ་རྣམས་ནི་སྔོན་གྱི་སྡིག་པའི་ལས་འབྲས་སྨིན་པ་ཡིན་པས། འདི་ནས་འོག་ནས་འོག་ཏུ་འགྲོ་ཞིང་ཐར་པའི་དུས་རིང་བ་ཡིན་ནོ། །དེའི་ཕྱིར་ན་དགེ་སྡིག་གཉིས་གང་བྱས་ཀྱང་ལས་འབྲས་ལ་བསླུ་བ་མེད་པ་ཡིན་པས། བླང་དོར་གྱི་གནས་ལ་མཁས་ཤིང་ཚུལ་ཇི་ལྟ་བ་བཞིན་དུ་ཤེས་པར་གྱིས་ཤིག །དྲུག་པ་ཡང་དག་ལམ་ལ་འཇུག་པ་ལ། ལས་ཅི་འགྱུར་ཡང་བླ་མ་དཀོན་མཆོག་གསུམ་ལ་གསོལ་བ་ཐོབ་ལ་ཡིད་ཁྱོད་ཤེས་ཀྱི་དད་པ་བརྟན་པོས་སྐྱབས་ཀྱི་དམ་པར་འཛིན་དགོས། སེམས་ཅན་གྱི་