Tibetan
དོན་དུ་སྨོན་པ་དང་འཇུག་པ་བྱང་ཆུབ་ཀྱི་སེམས་མཆོག་རྒྱ་ཆེན་པོ་བསྐྱེད་ནས་དམ་པ་གསུམ་དང་རྟག་ཏུ་མི་འབྲལ་བར་དགོས་སོ། །རྒྱུ་བསོད་ནམས་ཀྱི་ཚོགས་ལ་བརྟེན་ནས་འབྲས་བུ་ཡེ་ཤེས་ཀྱི་ཚོགས་རྫོགས་པའི་ཐབས་ལ་འབད་པར་གལ་ཆེའོ། །བདུན་པ་གཞི་དུས་ཀྱི་དབང་ལ་འཇུག་པ་ནི། རང་གི་མདུན་གྱི་ནམ་མཁར་པདྨ་དང་ཉི་བ་ཟླའི་གདན་ལ་རྒྱལ་ཀུན་ཡོངས་འདུས་ཀྱི་ངོ་བོ་ཆོས་སྐུ་རྡོ་རྗེ་འཆང་ཆེན་སྐུ་མདོག་མཐིང་ག་ཞལ་གཅིག་ཕྱག་གཉིས་པ་ཞབས་རྡོ་རྗེ་སྐྱིལ་ཀྲུང་གིས་བཞུགས་ཤིང་སྐུ་ལ་ལོངས་སྤྱོད་རྫོགས་པའི་རྒྱན་ཆས་གསོལ་བ་ཕྱག་གཉིས་བསྣོལ་སྟབས་ཀྱིས་རྡོར་དྲིལ་འཛིན་ཅིང་འཇའ་འོད་ཀྱི་ཀློང་དུ་བཞུགས་པར་བསྒོམ་མོ། །དེའི་སྐུ་སྟོད་ཀྱི་ཆ་ལ་རྒྱལ་བ་དགོངས་བརྒྱུད་ཀྱི་བླ་མ། སྐེད་པ་བར་གྱི་ཆ་ལ་རིག་ བྃ༔ འཛིན་བརྡ་བརྒྱུད་ཀྱི་བླ་མ། སྐུ་སྨད་ཀྱི་ཆ་ལ་གང་ཟག་སྙན་རྒྱུད་ཀྱི་བླ་མ་རྣམ་གསལ་བར་བསྐྱེད་དོ། །མཐའ་བསྐོར་དུ་ཡི་དམ་རྒྱུད་སྡེའི་ལྷ་ཚོགས་གནས་ཡུལ་གྱི་དཔའ་བོ་མཁའ་འགྲོ་དམ་ཅན་ཆོས་སྐྱོང་དང་བཅས་པ་གསལ་གདབ་ལ། དེ་དག་གི་སྤྱན་སྔར་རང་གི་ལུས་གུས་པས་ཕྱག་འཚལ་ཞིང་། ངག་གིས་གསོལ་བ་འདི་ལྟར་ཐོབ། རྒྱལ་བ་ཀུན་འདུས་བླ་མ་རྡོ་རྗེ་འཆང་། །གསོལ་བ་འདེབས་སོ་བདག་རྒྱུད་སྨིན་གྲོལ་མཛད། །ལུས་ལ་མི་འགྱུར་སྐུ་ཡི་བྱིན་གྱིས་རློབས། །སྒྱུ་ལུས་འོད་སྐུར་སྨིན་པར་མཛད་དུ་གསོལ། །ངག་ལ་ཚངས་དབྱངས་གསུང་གི་བྱིན་གྱིས་རློབས། །ངག་རླུང་གནས་དག་ལོངས་སྐུར་གྲོལ་བར་མཛད། །ཡིད་ལ་སྤྲོས་བྲལ་ཐུགས་ཀྱི་བྱིན་གྱིས་རློབས། །དྲན་རྟོགས་འོད་གསལ་ཆོས་སྐུར་གྲོལ་བར་ཤོག །སྦྱང་བྱ་སྒོ་གསུམ་བག་ཆགས་དྲི་མ་ཀུན། །སྦྱོང་བྱེད་ཏིང་འཛིན་གསུམ་གྱི་རྒྱས་ཐོབ་ནས། །སྦྱང་འབྲས་སྐུ་གསུམ་འབྲས་བུས་མངོན་གྱུར་ཅིང་། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །ཨོཾ་ཀཱ་ཡ་སིདྡྷི་ཨོཾ༔ ཨཱཿཝཱཀྐ་སིདྡྷི་ཨཱཿ ཧཱུྃཙིཏྟ་སིདྡྷི་ཧཱུྃ༔ ཞེས་བརྗོད་པ་དང་མཉམ་དུ་མདུན་གྱི་ནམ་མཁའི་ལྷ་ཚོགས་ཐམས་ཅད་འོད་དུ་ཞུ་ནས་འབྲུ་གསུམ་གྱི་རྣམ་པར་རང་གི་ གནས་གསུམ་ལ་ཐིམ་པས་སྒོ་གསུམ་གྱི་སྒྲིབ་གཉིས་བག་ཆགས་ཐམས་ཅད་ལྷག་མེད་དུ་དག་ནས་སྐུ་གསུམ་མཉམ་ཉིད་ཀྱི་དགོངས་པའི་ཀློང་དུ་གཏན་སྲིད་ཟིན་པར་བསམ་མོ། །འདི་ལྟ་བུའི་ལམ་གྱི་རིམ་པ་བདུན་པ་འདི་ནི་ཆོས་པ་ཀུན་གྱི་སྙིང་ནོར། ཐེག་པ་ཐམས་ཅད་ཀྱི་གཞུང་ཤིང་། རྣམ་མཁྱེན་ལམ་བགྲོད་ཀྱི་ཤིང་རྟ་ཆེན་པོ། ལམ་ཐམས་ཅད་ཀྱི་རྨིང་རྡོ་ལྟ་བུ་འདི་མེད་ཐབས་མེད་པ ཡིན་པས་ཁྱོད་ཀྱིས་འདི་ལྟར་མཛོད་དང་། ཚེ་འདིར་དབེན་པའི་གནས་སུ་སྒྲུབ་ཚུགས་ཐུབ་པར་ངེས་སོ། །ཞེས་གསུངས་མ་ཐག་གླིང་བུའི་སྒྲ་ལ་རྐྱེན་ནས་གཉིད་ལས་སད་དོ།དེ་ནས་རྒྱུན་དུ་མཁའ་འགྲོས་གསུངས་པ་བཞིན་ཉམས་ལེན་བྱས་ཏེ། འཁོར་བ་ལ་ངེས་པར་བློ་ལྡོག་ནས་ཕ་མ་ཉེ་འབྲེལ་འཁོར་གཡོག་མངའ་ཐང་ཐམས་ཅད་མཆིལ་མའི་ཐལ་བ་བཞིན་དུ་དོར་ནས། རང་ཉིད་གཅིག་པུར་ཆོས་རྣམ་དག་ཞིག་ཨེ་འགྲུབ་སྙམ་ཡོད་སྐབས། བོད་ཀྱི་ནང་བློན་རྒྱལ་བའི་བཀའ་ཚབ་སྐུ་གཡོག་ཤར་ཁྲ་སང་དང་། རྡོ་རིང་སང་། ཟུར་ཁང་སང་ལ་སོགས་པས་ང་རང་རློམ་ནས་ཕ་ཡབ་ལ་རྒྱུ་རྫས་དུ་མ་ཕུལ་ནས་བདག་སྦྱིན་དགོས་ཞུས་ཀྱང་། དེ་དག་བོད་སྡེ་ཡིན་པས་མ་གནང་ནས་རྒྱུ་རྫས་ཐམས་ཅད་ཕྱིར་སྤྲད། ནུབ་ཕྱོགས་སྐྱིད་ལུང་གྲོང་ཆེན་ཟེར་བ་རྒྱ་སྡེའི་དཔོན་ཀྲུའུ་ བྃ༔ ད་ལོ་ཡིའི་ཞེས་པ་ཆ་ལུགས་རྒྱ་ནག་དང་། ཆོས་ལུགས་སྙིང་ཐིག་པ་ང་རང་ཚོ་དང་འདྲ་བ། བསོད་ནམས་ལོངས་སྤྱོད་ལྡན་པ་ཞིག་ལ་བུ་གཅིག་པུ་ལས་མེད་པས། དེས་སྡེ་འབངས་མི་སྐྱོང་ཞིང་རབ་བྱུང་སྒྲུབ་དགོས་ཞེས་ཁོ་རང་གི་ཕ་མ་ལ་ཞུས་ཀྱང་བཀས་མ་གནང་སྟེ། ཁྱོད་ཀྱི་སེམས་ལ་འགྲོ་ངེས་ཀྱི་བུ་མོ་ཞིག་ཆུང་མར་བླང་ནས་ཁྱིམ་ཐབས་འཛིན་དགོས་སྨྲས་པས། བུ་ན་རེ། བདག་གི་ཁྱིམ་ཐབས་བྱེད་དགོས་ཕྱིན་ཆད་རྒྱ་ར་ཀ་ཤར་སང་གི་སྲས་མོ་གསུམ་གྱི་ནང་ནས་ཆུང་བ་ཀུན་དགའ་དབང་མོ་ཞེས་པ་དེ་ལོན་ན་ཁྱིམ་ཐབས་བྱེད། དེ་མིན་རྒྱལ་པོའི་སྨྲ་བ་ལན་གཅིག་ཡིན་པས་ཁྱིམ་འཛིན་བདག་གིས་མི་འོང་སྨྲས་པའི་ཚེ། ཁོང་རྣམས་ཀྱིས་དེ་ལྟར་བྱེད་ཟེར་ནས་བདག་གིས་ཕ་ཡབ་ལ་ཞུ་བ་ཕུལ་བས། བློན་འབངས་ཀུན་གྱིས་བཀའ་གྲོས་མཛད་ཅིང་། ཁོང་ཚོ་ཁྲི་སྡེའི་བདག་པོ་ཡིན་པས་ཐོབ་གཉིས་ནོན་བྱེད་ན་ཆོག །དཔོན་ཆུང་ལུགས་གཉིས་ལ་བློ་གྲོས་གསལ་བ་ཞིག་འདུག་ཟེར་བས། ནུབ་ཕྱོགས་པ་རྣམས་ཀྱིས་ཀྱང་དེ་ལྟར་བྱེད་ཟེར་ནས་ཐག་བཅད་ནས་དགའ་སྤྲོའི་ངང་ནས་ཕྱིར་སོང་། ང་རང་ནི་ཡིད་ཤིན་ཏུ་སྐྱོ་ཞིང་ལུས་སྲོག་བྲལ་ན་ཅི་མ་རུང་སྙམ་ནས་ཉིན་མཚན་མེད་པར་སྡུག་བསྔལ་ཁོ་ནས་དུས་འདའ་བའི་ཚེ། མི་ཀུན་གྱིས་གླུ་ངག་འདི་ལྟར་བརྩམས་འདུག །སྲས་མོ་ཀུན་དགའ་དབང་མོ། །ཤེལ་སྒོའི་ནང་གི་ལྟ་ལོག །ཁ་དོག་གཟི་བརྗིད་ལྡན་ཀྱང་། །ཀུན་གྱི་ལག་ཏུ་མི་ལོན། །ནམ་མཁའི་འཇའ་ཚོན་ཇི་བཞིན། །གར་འགྲོ་རང་དབང་ཐོབ་ཡོད། །ཅེས་ཐམས་ཅད་ཀྱིས་གླུ་རུ་བླང་འདུག་པས། ང་རང་ཤིན་ཏུ་དགའ་ནས་རྟེན་འབྲེལ་ལེགས། ནམ་མཁའི་འཇའ་ལྟར་རང་དབང་ཐོབ་ན་འཁོར་བར་མི་འཆིང་ངེས་པ་རེད་སྙམ། དེའི་ལོར་ལྷ་ལྡན་ལ་འབྲུམ་པ་བྱུང་ནས་མི་མང་པོ་འཆི་འདུག་པས། ང་རང་གི་བསམ་པ་ལ་འདི་དག་རྣམས་སྙིང་རེ་རྗེ་ཁ་ཡི་སོ་མ་བུད། མགོ་ཡི་སྐྲ་ལོ་མ་དཀར། འཆི་ཆོས་སྣ་གཅིག་མ་འགྲུབ་པར་འཆི་འགྲོ་བ་འདི་སྙིང་རེ་རྗེ། གཤིན་རྗེ་ཆོས་རྒྱལ་ཞེས་པ་ནི་འཇིགས་སྐྲག་ཆེ། ལས་མཁན་དང་བུ་ཆུང་དཀར་ནག་ནི་ཁྲིམས་ཁ་བཙན། ལས་ཀྱི་རླུང་དམར་ཞེས་པ་དེ་ཤུགས་ཆེ་བས་གར་འགྲོ་རང་དབང་མི་སྟེར་ཞིང་། རང་བྱས་ཀྱི་ལས་རྗེས་སུ་འབྲང་དགོས་པ་ཡིན་པས། བདག་གིས་དེ་རྣམས་སྡུག་བསྔལ་ལས་སྐྱོབས་ཏེ་བདེ་འགྲོ་ཐར་པའི་གླིང་དུ་འདྲེན་ནུས་ན་ཅི་མ་རུང་སྙམ་ཚེ། བཙུན་མ་ཞིག་གིས་འདི་སྐད་ཟེར། ཁྱོད་བྱིས་པ་ཆུང་ཆུང་སྙིང་རྗེ། གཤིན་རྗེ་ཆོས་རྒྱལ་ཞེས་པ་དང་ལས་མཁན་མགོ་བརྙན་ཅན་དང་། བྃ༔ ལས་ཀྱི་རླུང་དམར་བུ་ཆུང་དཀར་ནག་ཞེས་པ་སོགས་དངོས་ཅན་དུ་ཡོདཔར་མ་བསམ་ཞིག །དེ་ལྟར་བདེན་གྲུབ་ཏུ་ཡོད་ཚེ་དེ་དག་གི་བྱུང་ཁུངས་ཕ་མ་དང་ཐོག་མཐའ་ཐམས་ཅད་ངེས་པར་དངོས་ཅན་དུ་ཡོད་དགོས། དེ་ཡོད་ན་སེམས་ཅན་རྣམས་ཀྱི་རྒྱུ་དུག་ལྔ་ལས་མེད་པས། དེས་བསྐྱེད་པའི་འབྲས་བུ་རེ་རེ་ལས་འབྲས་བུ་སྣ་ཚོགས་འབྱུང་དོན་ཅིའི་ཕྱིར་ཡོད། དཔེར་ན་གཏི་མུག་གི་དབང་གིས་དུད་འགྲོར་སྐྱེ་ཞེས་པ་ལའང་། དུད་འགྲོའི་ལུས་གཅིག་ཏུ་མ་ངེས་ཤིང་། རྟ་དང་བ་གླང་ཕག་དང་ཉ་བོ་ཆེ་ལ་སོགས་གྲངས་ལས་འདས་པ་སྣ་ཚོགས་སུ་ཡོད་པ་དེ་དག་ཀྱང་རྒྱུ་གཅིག་ལ་འབྲས་བུ་ཐ་དད་མི་སྲིད། དེའི་ཕྱིར་ན་རྒྱུ་གཞན་ཐམས་ཅད་ལ་ཡང་འབྲས་བུ་གཅིག་ཏུ་མ་ངེས་ཤིང་དུ་མ་འབྱུང་བའི་ཕྱིར་ན་ཐམས་ཅད་དངོས་ཅན་བདེན་གྲུབ་ཏུ་ཡོད་པར་མ་བསམ་ཞིག །དཔེར་ན་མི་རྣམས་འཁྲུལ་པའི་དབང་གིས་འདིར་སྣང་དྲི་ཟའི་གྲོང་ཁྱེར་ལྟ་བུ་འདི་ལ་ཞེན་ཅིང་ཆགས་ནས་དགྲ་འདུལ་གཉེན་སྐྱོང་རྒྱུ་རྫས་ལོངས་སྤྱོད་ཐམས་ཅད་གཅེས་སྤྲས་ཀྱིས་བསོགས་ནས། རང་གིས་ཀྱང་ལོངས་མི་སྤྱོད་པར་སེར་སྣ་དམ་པོས་བཅིང་སྟེ་བསོགས་བསྐྲུན་བྱས། མཐར་རང་རྒྱུད་ལའང་ལོངས་སྤྱོད་དབང་མི་སྟེར་བར་གཞན་རྒྱུད་ཞིག་བླངས་ནས་དེ་ལ་རང་ རྒྱུད་ཀྱི་བསམ་པ་བཟུང་སྟེ། སྔར་བསགས་ཀྱི་རྒྱུ་རྫས་དངོས་པོ་ཅི་ཡོད་ཐམས་ཅད་སེར་སྣ་འཇུར་དགག་མེད་པར་དེ་ལ་སྦྱིན་ཚེ། དེས་དང་པོ་རྒྱུ་ངོ་ཆེ་བས་ཟླ་ཤས་རེ་ལ་གཅེས་སྤྲས་སུ་བསྐྱངས། བར་དུ་ང་ཆེ་ང་བཙན་ཟེར་ནས་ཟས་གོས་ཀྱི་སྐལ་བ་བཅད། ཐ་མ་ཁྱིམ་དང་བཟའ་ཚང་ལ་དོགས་འདུག་ཟེར་ནས་ཁྱི་བཞིན་ཕུད་པ་སོགས་ཀྱང་རང་བྱས་རང་ལ་སྨིན་པ་བཞིན་དུ། རིགས་དྲུག་དང་སྐྱེས་གནས་བཞི་ཡི་སྣང་བ་རྒྱ་ཆེ་ལ་གྲངས་མང་བ་ཇི་ལྟར་དུ་ཤར་ཡང་། རང་སྣང་ལས་གཞན་བདེན་གྲུབ་དངོས་ཅན་དུ་ཡོད་པ་མ་ཡིན་ནོ་ཟེར། ཡང་བདག་གིས་གཤིན་རྗེ་ཆོས་རྒྱལ་མིག་གིས་མཐོང་མ་མྱོང་བས་ཁོང་གི་ཕ་མ་དང་སྤུན་ཟླ་སོགས་མི་ཤེས། དངོས་ཅན་ཞིག་ཡིན་པར་འདུག །སྡིག་པ་བྱས་ན་གཤིན་རྗེ་ཆོས་རྒྱལ་གྱི་ཁྲིམས་ལས་ཐར་དུས་མེད་ཟེར། དངོས་མེད་ཡིན་ན་རླུང་ལྟ་བུ་ཡིན་པས། དེས་འུ་ཅག་ལ་ཅིགནོད་སྨྲས་ཚེ། ཡང་མོ་ན་རེ། ཧ་ཧ་ཁྱོད་བྱིས་པ་མཚར་ཆེ། ཆོས་རྒྱལ་མིག་གིས་མ་མཐོང་ན་ཁྲིམས་ཁ་བཙན་པ་ནི་སུས་ཤེས། ཆོས་རྒྱལ་སྡིག་ལ་འཛེམ་ན་འགྲོ་བ་མང་པོ་སྡུག་ལ་གཏད་པ་འདི་སྡིག་པ་མིན་ནམ། དེ་སྡིག་པ་ཡིན་ན་ཆོས་རྒྱལ་སུས་ཁྲིམས་ལ་སྦྱར། དེའི་ཁྲིམས་བདག་གང་གིས་བྱེད། དེ་མིན་ཚེ་རབས་ཐོག་མེད་ནས་ བྃ༔ རང་སྣང་ལོག་འཁྲུལ་དུ་སོང་ནས་དངོས་མེད་དངོས་པོར་བལྟས་ཤིང་ཁམས་གསུམ་རིགས་དྲུག་ཏུ་བར་མཚམས་མེད་པར་འཁོར་མོ་ཡུག་ཏུ་འཁྱམས་པ་ཡིན་ནོ་ཟེར། ཡང་བདག་གིས་དེས་ན་ཆོས་རྒྱལ་གྱི་རྒྱུ་རྐྱེན་ཅི་འདྲ་རེད་སྨྲས་པས། མོ་ན་རེ། སྐལ་ལྡན་མ་ཉོན་ཅིག །ཁྱོད་ཀྱི་སེམས་རང་བྱུང་དུ་གྲུབ་པ་དེ་ཆོས་རྒྱལ་དང་། ས་འདམ་འདི་ལ་ཆུ་ཐིག་གིས་ཁྱབ་པ་ལྟར་ལུས་ལ་རླུང་གིས་ཁྱབ་པ་དེ་ལས་ཀྱི་རླུང་དམར། དགེ་སྒྲུབ་སྡིག་སྤང་བྱེད་པའི་རྟོག་པ་དེ་བུ་ཆུང་དཀར་ནག །སྒོ་དྲུག་གི་འཆར་ཚུལ་རྣམས་ཉེ་བར་ལེན་པའི་སེམས་རྟོག་དེ་དག་ལས་མཁན་ཕོ་མོ་དང་། ཕྱི་ནང་གསང་བའི་རྣམ་རྟོག་བཟང་ངན་བར་གསུམ་ལས་བདེ་བ་དང་སྡུག་བསྔལ་སོགས་ཐ་དད་དུ་མ་འབྱུང་བ་ཡིན་ནོ། །དེའི་ཕྱིར་ན་ཆོས་རྒྱལ་ཞེས་པ་དངོས་ཅན་དུ་མེད་ཅིང་དགེ་སྡིག་གང་བྱེད་ཀྱི་འབྲས་བུ་རང་ལ་སྨིན་པ་ཡིན་པས། ཁྱོད་ཀྱིས་འདི་ཕྱི་རང་སྣང་དུ་ངོ་ཤེས་པར་གྱིས་ཤིག །ཞེས་ཟེར་ནས་གར་སོང་མ་མཐོང་། དེ་ལྟར་རང་གིས་ཉམས་སུ་བླངས་ན་དོན་རྒྱུད་ཐོག་ལ་ངེས་པར་བྱུང་ངོ་། །རང་ཡང་ནད་ལས་གྲོལ་ཏེ་གཞན་ལ་ཡང་གང་ཤར་སྔགས་སུ་བཟླས་ནས་ཕུས་བཏབ་པ་དང་སྔགས་ཆུ་སྦྱིན་པ་སོགས་ཕ་མས་མ་གོ་བར་བྱས་ཏེ། ལས་ཕྲན་རེ་ བརྩོན་པས་ཕན་ཐོགས་ཆེན་པོ་བྱུང་བས། ཉིན་གཅིག་ཨ་ཕས་གསུངས་པ་ཁྱོད་ཀྱིས་འབྲུམ་པ་ལ་སྔགས་ཆུ་སྦྱིན་འདུག་ཟེར་བས། ཁྱོད་ལ་སུས་བསླབ་པ་ཡིན་དྲང་པོར་ཤོད་དང་བདག་གིས་ཁྱོད་བཙུན་མ་བྱེད་བཅུག་གསུངས། ཨ་ཕ་ཡིན་པས་རྫུན་ནི་ཞུ་མི་ཉན་དྲང་པོར་ཞུས་ན་ཨེ་ཆོག་སྙམ་སྟེ་རང་བསྡད་པའི་ཚེ། ཡང་ཕ་ཡིས་སྔར་ལྟར་དྲིས་བྱུང་བས་མ་བཟོད་པར། བདག་གིས་འདི་སྐད་ཞུས། ཨ་ཕ་ལགས་བདག་གིས་རྒྱ་ཡིག་མ་གཏོགས་མི་ཤེས་ཤིང་སྔགས་བསླབ་སྦྱང་མ་མྱོང་བའི་གང་དྲན་ཁ་ནས་འདོན་ཅིང་ཆུ་ལ་ཕུས་བཏབ་ནས་ནད་པ་ལ་བྱིན་པས་ནད་ལས་གྲོལ་སོང་ཞུས་པས། ཨ་ཕའི་ཞལ་ནས་ཁྱོད་ཀྱིས་སྨོས་དང་། ང་རང་གིས་ཡི་གེར་བྲི་གསུངས། བདག་གིས་ཀྱང་ལགས་སོ་ཞུས་ནས་སྔགས་དངོས་དང་ཡོན་ཏན་ཐམས་ཅད་སྦས་གསང་མེད་པར་ཞུས་པས། ཡབ་ཀྱི་ཞལ་ནས་ངོ་མཚར་རེ་ཆེ་སྔོན་བྱོན་གཏེར་སྟོན་བརྒྱ་རྩའི་ནང་ནས་བྱིས་པའི་གཏེར་སྟོན་ཞེས་པ་ཞིག་གིས་སྔགས་འབུམ་ཁོ་ནས་འགྲོ་དོན་མཛད་ཅིང་གཏེར་བཞེས་མིང་དུ་ཐོགས་པ་ལྟར། ཁྱོད་ཀྱིས་ཀྱང་སྔགས་གཏེར་བྱེད་པ་གདའ་ཨ་གསུངས་ཏེ། སྔགས་ཡིག་ཉིད་ཀྱི་ཐུགས་དམ་ནང་དུ་བཞག་གོ། །དེ་ནས་བཟུང་དག་སྣང་གི་ཆོས་སྐོར་རེད་སྙམ་པ་བར་བར་སེམས་ལ་ཤར་ཀྱང་ཡི་ བྃ༔ གེ་མ་ཤེས་པས་བཏང་སྙོམས་སུ་ལུས་པའོ། །དེ་ནས་ལོ་ངོ་བཅུ་གཉིས་ཀྱི་དུས་གྲོགས་མོ་རྣམས་དང་བཅས་ཏེ་གནས་གསར་ཇོ་དགོན་མཇལ་དུ་སོང་བས། དེ་ནུབ་རྨི་ལམ་ལ་སྔར་བྲག་ཡེར་པ་ནས་རིག་རྒྱུའི་མི་མོ་འཇིགས་སུ་རུང་བ་དེ་ཐོན་བྱུང་ནས་འདི་སྐད་ཟེར། ཁྱོད་ཀྱིས་རང་སེམས་དག་པའི་ལྷ་ཁང་ལ་བསྐོར་བ་མི་བྱེད་པར། ཡུལ་གྲོང་རི་ངོགས་ཀུན་ཉུལ་ནས་ཅི་ལོན་རྒྱུ་ཡོད་ཟེར་ནས་རལ་གྲི་ཞིག་ལག་ཏུ་བཟུང་སྟེ་ང་རང་ལ་འཕེན་ཚད་བྱེད་འདུག །བདག་གི་བསམ་པ་ལ་སྔར་བཙུན་མ་དེ་ཀས་འདི་ཕྱི་རང་སྣང་དུ་ཐག་ཆོད་ཟེར་བས། དེ་ལ་བློ་ཐག་བཅད་དེ་གང་ཤར་རང་སེམས་ཀྱི་འཕྲུལ་ཡིན་སྙམ་ནས་བསྡད་ཚེ། མོ་ཡིས་ཁ་གནམ་ས་ཙམ་ཞིག་གདངས་ནས་ང་རང་ཇུར་མིད་དུ་ཟོས་མ་ཐག །མོ་ཡི་ལྟོ་བའི་ནང་ཐམས་ཅད་སྔར་གྱི་མཆོད་སྡོང་བྱ་རུང་ཁ་ཤོར་མཇལ་དུས་ཀྱི་སྐུ་གསུམ་མཁའ་འགྲོའི་དཀྱིལ་འཁོར་མཐོང་བ་དེ་ཇི་ལྟ་བ་བཞིན་མོ་རང་གི་ལྟོ་བའི་ནང་དུ་རྫོགས་འདུག་པས། བདག་གིས་དེ་དག་ལ་རིམ་བཞིན་མཇལ་ཏེ་འོག སྒོ་ནས་ཕྱིར་ཐོན་པ་དང་མཉམ་དུ་གཉིད་ལས་སད་བྱུང་། ནང་སྔ་མོ་གནས་གསར་རྗེ་བཙུན་མའི་སྐུ་མདུན་དུ་སོང་བའི་ཁོང་གི་དབུ་གཙུག་ཏུ་རྡོ་རྗེ་རྣལ་འབྱོར་མ་ཞིག་འོད་ཀྱི་རྣམ་པར་མཇལ་འདུག་ པས། བདག་གིས་འདི་ཅི་རེད་ལགས་ཞུས་ནས་ཕྱག་འཚལ་བས། རྗེ་བཙུན་མའི་ཞལ་ནས་འདི་བདག་གི་ཡི་དམ་རེད། ཁྱོད་ལས་རྣམ་དག་ཡིན་པས་མཇལ་བ་ཡིན། མ་འོངས་དུས་སུ་འུ་ཅག་གཉིས་མི་འབྲལ་ཚོམ་བུ་གཅིག་ཏུ་འཚོགས་ནས་ཆོས་འདིའི་བསྟན་པ་མཐའ་རྒྱས་སུ་འཛིན་པའི་རྟེན་འབྲེལ་ལེགས་སོ་གསུངས་ཏེ། ས་སྐྱའི་གསེར་ཆོས་བཅུ་གསུམ་གྱི་དཔེ་ཆ་རེད་ཟེར་བ་ཞིག་བདག་གི་མགོ་ལ་བཞག་ནས་སྨོན་ལམ་མཛད་དོ།།དེ་ནས་མི་ཆུང་རི་ཞེས་པ་སྔར་རྒྱ་ཚའི་མདའ་འབེན་དུ་བཞག་སྟེ་རིའི་ལྟེ་བ་ཕར་ཕུག་ཚུར་ཕུག་བྱས་ཡོད་པ་ཞིག་འདུག་པས་དེར་ཐོན་སོང་ཚེ། ང་རང་སྔར་ནེ་ཆུང་མ་ཡིན་དུས་གླིང་གི་བུ་མོ་རྣམས་དང་ཤྭ་འཕང་ནས་སོར་གདུབ་རྣམས་རྒྱལ་ལ་བཞག་ཚེ། ནེ་ཆུང་སོར་གདུབ་བོར་སོང་བ་དེ་འདི་ན་ཡོད་སྙམ་ནས་ཕ་ཝང་ཆེ་བ་གཅིག་གི་རྩར་ས་བརྐོས་ཏེ་བལྟས་པས་སོར་གདུབ་རྙེད་བྱུང་བས། གྲོགས་མོ་རྣམས་ཀྱིས་སོར་གདུབ་ཆེ་བ་འདི་ཅི་རེད་ཟེར། བདག་གིས་ཐོག་རྫས་རེད་སྨྲས་པས་བདེན་པར་འདུག་ཟེར། བདག་གིས་ཨ་མ་ལ་སོར་གདུབ་ཕུལ་ནས་ལོ་རྒྱུས་རྣམས་ཞིབ་པར་ཞུས་ཚེ། ཨ་མའི་ཞལ་ནས་སོར་གདུབ་ལོན་ཚུལ་ངོ་མཚར་ཙམ་འདྲ་ཡང་། སྐྱེ་སྔོན་ཁྱོད་ཀྱིས་བརྗོད་ལས་འདས་ཤིང་མཐའ་མ་ངེས་པ་དུ་མའི་ བྃ༔ ལུས་བླངས་ཡོད་པས་བཤད་མི་དགོས། བཤད་ཆེ་ན་ཁ་ཁྲིམས་གཅོད་འོང་གསུངས། དེ་ནས་རིམ་གྱིས་རང་གནས་ལ་ཐོན། ལོ་ཁྱིམས་དེའི་ཟླ་བ་ལྔ་པའི་ནང་དུ་སྐྱིད་གྲོང་དཔོན་སང་གིས། ང་རང་རིན་ཟོག་ཏུ་རྒྱུ་ནོར་གསེར་དངུལ་མང་པོ་ཁྱེར་ནས་ཡབ་སར་ཐོན་བྱུང་བས། ཡང་བདག་ནི་འཆི་ནད་ཀྱིས་ཐེབས་པ་ལྟ་བུར་སོང་། དེའི་སྐབས་སུ་ཨ་ཏའི་ཞལ་ནས་བདག་གི་བུ་མོ་འདི་སྐྱེས་བུ་ཁྱིམ་པ་ཞིག་ལ་མི་དབང་བ་འདྲ། འདིའི་བྱ་བྱེད་གནས་ཚུལ་གང་ལ་བརྟགས་ཀྱང་ཡིད་མི་ཆེས་པ་རེ་གདའ་གསུངས་པའི་ཚེ་ན། སྐྱིད་གྲོང་སང་གི་བློན་པོ་བསོད་ནམས་བསྟན་དར་ཞེས་པས་འདི་སྐད་ཞུས། ལགས་སྤྱིར་མི་ཆེན་ཚིག་ལ་འགྱུར་བ་མེད། སྒོས་རྒྱལ་པོའི་སྨྲ་བ་ལན་གཅིག་ཡིན་པ་དགོངས་འཚལ། ལགས་ཁྱོད་ཀྱི་སྲས་མོ་ངེད་ཅག་གི་དཔོན་བྱེད་ལོང་མ་སྟེར་ཀྱང་སྔར་ཚིག་བཞིན་གནང་དགོས། དེ་མ་གནང་ཚེ་ངེད་རང་གི་ཕྱི་སྡེ་ཁྲི། ནང་སྡེ་གསུམ་སྟོང་། ཧོར་ར་སྟོང་སྡེ་ངེས་མིང་མེད་བྱེད་དགོས་ཀྱང་། འཐབ་རྩོད་བྱེད་རྒྱུ་འོང་ངེས་ཡིནཔས་ཐུགས་རྒྱ་ཆེ་བ་ལ་སྐུ་མཁྱེན་ཟེར་བས། རང་བློན་རྣམས་ཀྱིས་ཐག་བཅད་ནས་དངོས་རྫས་ཐམས་ཅད་བླང་ཞིང་། སྟོན་མོ་བཞག་ནས་ཐམས་ཅད་ཀྱིས་དགའ་སྤྲོ་བྱེད་འདུག པས། བདག་གི་བསམ་པ་ལ་སྔོན་ཕ་ཡབ་ཀྱིས་ཨ་མ་ཡོད་ཚེ་ས་མཐར་འགྲོ་མི་ཉན་གསུང་ཀྱང་། ཁོང་གིས་ནི་ང་རང་མ་གཅེས་ནས་གཞན་ལ་སྦྱིན་འདུག་པས། བདག་ངེས་མེད་དུ་འགྲོ་དབང་མེད་ཀྱང་རང་སྲོག་གཅོད་དབང་ལོས་ཡོད། གནས་ལ་མ་སོང་ཚེ་འཐབ་རྩོད་འོང་ངེས་རེད་སྙམ་སྟེ། ཉལ་དུད་དང་རྒྱ་རག་གཉིས་བསྲེས་ནས་འཐུང་ན་མཆིན་པ་ཚིག་སྟེ་འཆི་འགྲོ་བ་མཐོང་ཆོས་སུ་ཡོད་པས། བདག་གིས་ཀྱང་དེ་ལྟར་བྱས་ཏེ་དཀར་ཡོལ་འབྲིང་ཙམ་གང་འཐུང་ནས་ང་རང་གི་ཁྱིམ་ནང་ལ་སོང་སྟེ། ཉལ་གུར་ཕུབ་ཡོད་པའི་དེ་ཀའི་ནང་དུ་ཉལ་བསྡད་ཚེ། སྣང་བ་ཐམས་ཅད་དཀར་ལམ་ལམ། དམར་གོར་གོར། ནག་ཐུམ་མེ་བ་ཅི་ཡང་མི་གོ་བ་ལྟ་བུར་སོང་ནས། ཟུག་གཟེར་ལ་ཚད་མེད་པ་བྱེད་འདུག །དེ་དུས་ང་རང་གི་གཡོག་མོ་ཐོན་བྱུང་བས། དེས་ཨ་ཏ་ལ་ཞུ་རུ་སོང་བས་ཡབ་ཡུམ་ཉེ་འབྲེལ་ཐམས་ཅད་གཅིག་ཐོན་གཉིས་ཐོན་བྱས་ནས་ཐམས་ཅད་འཚོགས་སོང་། ང་རང་ནི་ཁ་གྲགས་རྒྱུ་མེད་ཅིང་འཆི་འགྲོ་བ་ལྟ་བུར་བྱེད་འདུག་པས། ཨ་ཏས་ང་རང་གི་རྩ་ལ་གཟིགས་ནས་དུག་ཡིན་པ་མཁྱེན་ཏེ། སྨྱུག་ཕྲན་གྱིས་མར་ནག་བདག་གི་ཁ་ནང་དུ་དཀར་ཡོལ་གང་དེ་རེ་བླུགས་འདུག །དེས་ཅུང་ཞིག་ནས་མར་ནག་དང་ཉལ་དུད་ བྃ༔ གཉིས་ལྷན་དུ་སྐྱུགས་སྦྱོང་བྱས་ཏེ་ལྷག་མེད་དུ་ཐོན་སོང་། དེ་ནས་དབང་པོ་རིལ་བུ་དང་གཡུ་དྲུག་དཀར་དྲུག་དམར་གཉིས་ཀྱིས་རྗེས་གཅོད་མཛད་པ་སོགས་ཀྱིས་བདག་རིམ་པར་ནད་ལས་གྲོལ་ཀྱང་། གློ་བུར་དུ་རླུང་སྟོབས་ཀྱིས་དབང་པོ་ཤོར་སོང་བ་ལྟ་བུར་བྱས་ནས་ཉིན་ཞག་བདུན་གྱི་བར་དུ་གནས་ཚེ། བདག་གི་སྣང་བ་ལ་གྲོགས་བུ་མོ་གཉིས་བཅས་བར་དོ་ལ་སོང་སྣང་འཆར་ཏེ། སེམས་ཅན་མང་པོ་ངན་སོང་གི་སྡུག་བསྔལ་མྱོང་ཞིང་འདུག་པས། དེ་དག་ཅི་ཡིན་སྙམ་ནས་ཡུལ་ཁམས་བཅོ་བརྒྱད་ཡང་སོས་ལྷག་མ་བཅུ་དྲུག་ལ་སོགས་པའི་རྒྱུ་དང་འབྲས་བུ་ཐམས་ཅདགྲོགས་མོ་གཉིས་ལ་དྲིས་ནས་སེམས་ལ་བཟུང་སྟེ། འོད་དཀར་པོ་ཞིག་གི་ལམ་འདུག་པ་ལ་དེ་ལ་ངེད་རྣམས་ཀྱིས་གྲོས་བྱས་ནས་དེར་སོང་ན་ཆོག་པར་གདའ་སྙམ་ནས་སོང་ཚེ། རྒྱལ་བ་རིགས་ལྔའི་ཞིང་ཁམས་རེད་ཟེར་བ། ལ་ལའི་བཀོད་པ་ཐམས་ཅད་མཇལ་འདུག །ལ་ལའི་ཕྱོགས་རེ་ཙམ་དང་། ལ་ལའི་ལྕགས་རི་ལྗོན་ཤིང་རེ་དང་། ལ་ལ་འོད་ཀྱི་རྣམ་པ་ཙམ་དུ་མཇལ་འདུག་པས། བདག་གིས་གྲོགས་མོ་གཉིས་ལ་ཞིང་ཁམས་འདི་རྣམས་རེ་མཇལ་རེ་མི་མཇལ་བ་དེ་ཅིའི་ལན་སྨྲས་པས། ཁོང་གཉིས་ན་རེ། ཞིང་འདི་རྣམས་ད་དུང་དུས་ལ་མ་བབ་པ་ ཡིན་པས་ཆེར་མི་མངོན། རག་རིམ་ཙམ་མངོན་པ་དེ་དག་ཁྱོད་ཀྱིས་ཡིད་ལ་ཟུངས་ཤིག་ཟེར། དེ་ནས་ཡུལ་དེའི་ནུབ་ཕྱོགས་ཀྱི་མཚམས་སུ་ཟངས་མདོག་དཔལ་རིའི་ཕོ་བྲང་རེད་ཟེར་བ་ཞིག་འདུག །དེ་ལ་མཇལ་དུ་འགྲོ་སྙམ་ནས་ཕྱིན་པའི་ཚེ་ན་ལྕགས་རིའི་ཕྱི་ལ་སྐྱེས་མོའི་ཚལ་ཡིད་དུ་འོང་བ། མཐོང་བ་ཙམ་གྱིས་མི་རྟོག་པའི་ཡེ་ཤེས་རྒྱུད་ལ་སྐྱེད་པར་བྱེད་པ་ཞིག་འདུག་པས། དེའི་ནང་ན་འཇའ་འོད་ཀྱི་གུར་ཁང་དང་གདན་ཁྲི་མཛེས་པའི་དབུས་སུ་ཨ་མ་ཡེ་ཤེས་མཚོ་རྒྱལ་དང་། གཞན་ཡང་དཔའ་བོ་དང་དཔའ་མོ་མང་པོས་ཚོགས་འཁོར་མཛད་ཀྱིན་བཞུགས་འདུག་པས། བདག་ཤིན་ཏུ་དགའ་དདཀྱིས་མཚོ་རྒྱལ་བཞུགས་པའི་ཁྲི་རྩར་སོང་