Tibetan
ལ་ཧྃཿཡིག་དང་ཨ་ཤད་གཉིས་ལས་ཡིག་འབྲུ་གཞན་རྣམས་མེད་ལགས། ད་ལན་གནས་བཞིར་ཡིག་ བྃ༔ འབྲུ་གསལ་དགོས་པའི་མན་ངག་གི་ཡོན་ཏན། ཡིག་འབྲུ་རྣམས་བསྒོམ་གནས་དང་། རྩ་འཁོར་ལ་སེམས་བཟུང་ཚུལ་རྣམས་བསྟན་དུ་གསོལ་ཞུས་ཚེ། བླ་མས་བཀའ་སྩལ་པ། རིགས་ཀྱི་བུ་མོ་ཉོན་ཅིག །འཁོར་ལོ་གཉིས་ལ་ཡི་གེ་བསྒོམ་པ་ནི་ཐུན་མོང་ལས་ཁྱད་པར་མེད་དོ། །འཁོར་ལོ་བཞི་དཀར་ཡི་གེ་བསྒོམ་པ་ནི་མན་ངག་གི་གནད་ཐུན་མོང་མ་ཡིན་པའི་ཁྱད་པར་ཤིན་ཏུ་ཆེའོ། །ས་བོན་དེ་དག་བསྒོམ་པའི་གནས་ནི་ནང་གི་རྒལ་པ་ལ་ཉེ་བའི་དྷཱུ་ཏིའི་ནང་ཁོངས་སུ་འཁོར་ལོ་སོ་སོའི་དབུས་ཀྱི་ཐད་དྲང་དུ་རོ་རྐྱང་གཉིས་ཀྱིས་དབུ་མར་མདུད་པ་དཀྲིས་པའི་མཚམས་སུ་དབུ་མའི་ནང་དུ་བསྒོམ་དགོས། བསྒོམ་པའི་ཚད་ནི་རྩ་གསུམ་འཁོར་འདབས་དང་བཅས་པ་ལ་སེམས་བཟུང་ནས་ས་བོན་རྣམས་ཀྱང་དག་ལ་གསལ་བར་མ་བྱུང་བར་དུ་བསྒོམ་དགོས། གལ་ཏེ་ལས་དང་པོ་པས་རྩ་འདབས་རྣམས་གསལ་ཆ་ཐོན་དཀའ་ནགཙོ་བོའི་རྩ་གསུམ་དང་དབུས་ཀྱི་ཡིག་འབྲུ་རྣམས་གསལ་ངར་ཐོན་པར་བྱས་ན་རླུང་འདུ་སླ་ཞིང་དགའ་བཞིའི་ཡེ་ཤེས་བསྐྱེད་པ་དང་། སེམས་ཐིག་ལེར་འདྲེས་ཏེ་ཐིག་ལེ་སྐུ་རུ་སྨིན་པའི་མན་ངག་ཁྱད་པར་ཅན་ཡིན་ནོ། །འདི་ལྟར་ཁྱོད་ཀྱི་ཉམས་སུ་ལོངས་ལ་གནད་ཚུལ་བཞིན་དུ་རྗེས་སུ་འཇུག་པ་རྣམས་ལ་ སྟོན་དང་། རླུང་སེམས་ལ་རང་དབང་འབྱོར་བའི་སྐྱེས་བུ་ཤ་སྟག་འབྱུང་ངོ་ཞེས་གསུངས་མ་ཐག་གཉིད་ལས་སད་དོ། །དེ་ནས་བླ་མས་གསུངས་པ་བཞིན་ཉམས་སུ་བླངས་བས་ནད་ལས་གྲོལ་ཏེ་རླུང་ལ་ཅུང་ཟད་བརྟན་པ་ཐོབ་པ་བྱུང་ངོ་། །དེ་ནས་ལོ་ངོ་བཅུ་གསུམ་གྱི་དུས་སུ་ཚེ་མཆོག་གླིང་དུ་གནས་འདུས་ཡོད་འདུག་པས། དགོན་དེའི་བདག་པོ་བདག་གི་མིང་པོ་ཆུང་བ་ཡང་སྤྲུལ་རིན་པོ་ཆེ་ནས་ངེད་ཅག་འབོད་མི་མངགས་བྱུང་བས། དེ་ཀར་ཨ་མ་དང་ང་རང་གཉིས་དཔོན་གཡོག་བཅོ་ལྔ་བཅས་སོང་སྐབས། གླིང་བར་ནས་བུ་མོ་བཞི་ཐོན་བྱུང་ནས་ཨ་མ་ལ་འདི་སྐད་ཟེར། ས་ག་ཟླ་བའི་མར་ངོའི་ཉེར་ལྔའི་ཉིན་ཁྱེད་བསུ་མ་བྱེད་རྒྱུ་ཡིན་ཟེར་ནས་གར་སོང་མེད་པར་ཡལ་སོང་། བདག་གི་ཨ་མ་ལགས། བུ་མོ་དེ་རྣམས་སུ་ཞིག་རེད། ཁྱོད་གང་དུ་བྱོན་དགོས་ཀྱི་རེད་ཞུས་པས། མོ་ན་རེ། ཁྱོད་ཀྱིས་དེ་ལྟར་ཡབ་ལ་ཞུ་མི་ཉན་དོན་གསལ་འོང་ངེས་ཡིན་གསུངས། དོ་ནུབ་རྨི་ལམ་ལ་གླིང་གི་མོ་སྨན་ཡིན་ཟེར་བའི་བུད་མེད་རྒས་པ་ཞིག་དང་འཕྲད་པས། བདག་གིས་འདི་སྐད་སྨྲས། ཨ་ཆེ་མོ་མ་ལགས་ང་རང་གི་ཨ་མ་འདིའི་སྐུ་ཁམས་བདེ་མི་བདེ་ལ་མོ་ཞིག་ཕབ་དགོས་ཞུས་ཚེ། མོ་ན་རེ། ཡ་ཡ་མོ་ཕབ།མོ་མ་ལ་མོ་སྒྲོན་དགོས་ཟེར། ༔ བདག་གིས་མོ་སྒྲོན་ཅི་དགོས་སྨྲས། མོ་ན་རེ། སེང་ཆེན་དང་དཔའ་ཐུལ་མཉེས་པའི་ཆང་ཕུད། དགྲ་བླ་ཝེར་མ་མཉེས་པའི་ཇ་ཕུད། བཙན་ཆེན་མེ་སྟག་དམར་པོར་ཤ་ཕུད། མོ་སྨན་ང་རང་དགའ་བའི་དཀར་གསུམ་རྣམས་དགོས་ཟེར། བདག་གིས་དེ་དག་དངོས་སུ་མེད་པས་ཡིད་སྤྲུལ་མཛོད། ཁྱོད་ལ་ང་རང་གི་མགུ་ཡ་བསྐལ་བཟང་མེ་ཏོག་གསེར་ལས་གྲུབ་པ་འདིཕུལ་སྨྲས་པས། མོ་རང་གིས་ཡ་དམོ་ཟེར། དེ་ནས་མོ་ཐིག་ལ་མདུད་པ་བྱས་ཏེ་འཕང་ནས་འདི་སྐད་ཟེར། ཉོན་དང་བུ་མོ་བཞིན་ལེགས་མ། །སྐྱེ་བུད་མེད་ཅིག་གི་མོ་དོན་ལ། །ཡ་མཚན་འདྲ་བ་འདི་ལྟར་བབ། །ལྷ་ངོ་དགོངས་ལས་མཐོ་ནས་གདའ། །དགོངས་ལ་ཉི་མ་ཤར་འདྲ་དགེ །ཕར་འགྲོ་ཞིག་གི་མོ་ལ་བཟང་། །དོན་ས་གཡུ་འབྲུག་གྱེན་འགྲོ་འདྲ།། ཁྱུང་ཆེན་ནམ་མཁར་འཕུར་འདྲ་དགེ །དོན་ས་མི་འགྱང་མྱུར་བའི་མོ། །ཕྱི་ས་ཐང་དཀར་རྒོད་ཁྱུ་འདྲ། །བྱ་རྒོད་པོ་ནམ་འཕང་བཅད་རན་གདའ། །འཇའ་ཚོན་ནམ་མཁར་ཡལ་བའི་མོ། མོ་བཟང་དང་ངན་པ་ཤེས་ལེ་མིན། །ད་སྔ་ཉི་མའི་ཕན་ཆད་ལ། །འདི་འདྲའི་མོ་ཞིག་བབ་མ་མྱོང་། །ཁྱོད་ཀྱིས་ཤེས་ན་དཔྱད་པ་རན། །ཟེར་བ་དང་གཉིད་ལས་སད་དོ། །ནང་པར་བདག་ྋ གི་བསམ་པ་ལ། ཨ་མ་ཁོ་རང་ཡེ་མི་བཞུགས་པ་འདྲ། བྱ་བ་གང་ལའང་དཔྱད་ན་མི་བཟང་བར་འདུག་སྙམ་ཀྱང་ཞུ་མ་ཕོད། དེ་ནས་ལོ་ཁྱིམས་དེའི་ཟླ་བ་བཞི་པའི་ནང་དུ་ཨ་མ་ལ་ནད་ཞིག བྱུང་ནས་རིམ་གྲོ་སོགས་ཇི་ལྟར་བྱས་ཀྱང་ཕན་པ་མ་བྱུང་ནས་ཚེ་དུས་ལས་འདས་སོང་། །དེ་ནས་ང་རང་ཨ་ཏས་གཅེས་སྤྲས་སུ་བསྐྱངས་ཀྱང་ཨ་མ་དྲན་པ་ལ་བཟོད་ལྷག་མེད་པ་ལྟ་བུར་གྱུར་པས། ཉིན་མཚན་མེད་པར་བདག་གི་ཨ་མ་འདི་དང་འཕྲད་ཐབས་ལ་ཅི་དགོས་སྙམ་ནས་ཁང་སྟེང་ལ་སོང་ནས་ཁ་གནམ་ལ་འཁོར་ཞིང་ངུ་གིན་བསྡད་ཡོད་པས། ལྷོ་ནུབ་ཀྱི་མཚམས་ནས་རྒོད་ཐང་ཀར་ཞིག་གིས་ཀྱི་ལི་ལི་འཁོར་ནས་ང་རང་གི་ཐད་དྲང་དེར་འཕུར་འདུག་པས། བདག་གི་བསམ་པ་ལ་རྒོད་མཁའ་འགྲོའི་བླ་བྱ་ཡིན་ཟེར་བ་འདི་ང་རང་གི་ཨ་མ་གར་ཡོད་ལོས་གོ་སྙམ་སྟེ་འདི་སྐད་སྨྲས། སྟེང་ནམ་མཁའ་ཡངས་པའི་དབྱིངས་རུམ་ནས། །ལས་རྣམ་དག་མཁའ་འགྲོའི་བླ་བྱ་ཁྱོད། །སེམས་བག་ཕེབས་ང་ཡི་ཚིག་ལ་ཉོན། །ཁྱོད་གར་འགྲོ་གང་ནས་འོང་བ་ཡིན། །ང་བྱིས་པ་མ་མེད་དྭ་ཕྲུག་ཡིན། །ངའི་ཨ་མ་བོར་ནས་ཟླ་གཅིག་སོང་། །གནས་གར་སོང་མགོ་སྡུག་བསྔལ་ཆེ། །ཁྱེད་རྩལ་ལྡན་ཐང་དཀར་རྒོད་པོ་ལོ། །ངའི་མ་མ་གར་སོང་ཨེ་མཐོང་གི །གནས་ བྃ༔ གང་དུ་བསྡད་ཡོད་ཨེ་གོ་ལོ། །དྲིན་ཨ་མ་མེད་པའི་བུ་མོ་ང་། །མི་ལོང་བ་ཐང་ལ་བོར་དང་འདྲ། །བྱ་གཤོག་མེད་གཡང་ལ་ལྷུང་དང་མཚུངས། །ད་དེ་ལྟར་བསམ་ནས་ཨ་མ་དྲན། །གཟུགས་སྐྱེ་མཆེད་མཛེས་པ་ཨ་མའི་དྲིན། །རྒྱན་ཡོ་བྱད་འཛོམས་པ་ཨ་མའི་དྲིན། །ཟས་ལོངས་སྤྱོད་འབྱོར་བ་ཨ་མའི་དྲིན། །གཏམ་ཁ་ལྕེ་བདེ་བ་ཨ་མའི་དྲིན། མི་ཀུན་དང་མཐུན་པ་ཨ་མའི་དྲིན། །ཆོས་ཡིག་དྲུག་ཤེས་པ་ཨ་མའི་དྲིན། །ལྷ་བླ་མ་མཇལ་བ་ཨ་མའི་དྲིན། །ད་འདི་འདྲའི་ཨ་མ་དྲིན་ཆེན་དང་། །ཚེ་འདི་རུ་འཕྲད་པའིགྲོགས་ལྡན་མཛོད།།ཁྱོད་ལྷ་བྱ་དཀར་པོའི་ཐུགས་ལ་ཟུངས། །ཞེས་སྨྲས་ཚེ། རྒོད་ཇེ་དམའ་བྱས་ནས་ཁང་སྟེང་ལ་བབ་བྱུང་བས། བདག་གི་ཨ་མ་ཨེ་ཡིན་སྙམ་ནས་རྒོད་ལ་བལྟས་ཡོད་ཚེ། ཨ་ཇོ་ཕུན་ཚོགས་ཆོས་འཕེལ་ཞེས་པ་དེ་འོང་ནས། ང་ལ་འདི་ལྟར་ཟེར་འདུག །ཁྱོད་ཀྱིས་ཁང་སྟེང་ལ་གླུ་བླང་འདུག་ཟེར་བས། འུ་ཅག་གི་ཨ་མ་མེད་སོང་བའི་སྡུག་བསྔལ་མི་བསམ་པར། ཁྱོད་ཀྱིས་གླུ་ཅིའི་ཕྱིར་བླང་བ་ཡིན་ཟེར། བདག་གིས་ངས་གླུ་བླང་རུང་མ་ཡོད་བུ་མོའི་སྐྱིད་གླུ་མིན། དྭ་ཕྲུག་ཤེས་མེད་ཨ་མ་དྲན་པའི་སྐྱོ་གཏམ་རང་སེམས་གསོ་བའི་རྨོངས་གླུ་མི་མིནབྱ་ལ་བླང་བ་ ཡིན་སྨྲས་ཚེ། ཁོང་ན་རེ། ཁྱོད་ཀྱིས་སེམས་ལ་གདོན་གྱིས་བརླམས་པ་འདྲ། བྱ་རྒོད་ཀྱིས་མི་སྐད་ཅི་ལ་ཤེས་འཁྲུལ་མ་འདུག་ཟེར། ཡང་བདག་གིས། ཨ་ཇོ་ཕུན་ཚོགས་ཆོས་འཕེལ་གསོན། །ངའི་སེམས་ཉིད་སྤྲོས་བྲལ་འཁྲུལ་པ་མེད། །གདངས་འགགས་མེད་མ་བུའི་ཚུལ་དུ་སྣང་། །རྩལ་མ་ངེས་བདེ་སྡུག་ཅིར་ཡང་འཆར། །དྲིན་ཨ་མ་ནམ་མཁའི་འཇའ་ཚོན་འདྲ། །འཇའ་ནམ་མཁའི་ཆོ་འཕྲུལ་དབྱིངས་སུ་ཡལ། །ང་བུ་མོ་མོན་བྱ་ཁུ་བྱུག་འདྲ། །སྟོན་སྐྱི་སེར་ཐོན་ཚེ་རང་ལམ་ཚོལ། །ཁྱོད་ཡབ་སྲས་མི་འགྱུར་གཡུ་དྲུང་འདྲ། །ཕྱོགས་གཅིག ཏུ་འཁོད་ཅིང་ཕུན་ཚོགས་ལྡན། །བྱ་རྒོད་པོ་བྱང་ཆུབ་སེམས་མ་འདྲ། །ང་སྡུག་མོའི་བསམ་པ་ཐབས་ཀྱིས་འབྲིད། །གནས་འདི་ནི་དུག་སྦྲུལ་ཚང་ལྟ་བུ། །དུས་སྐད་ཅིག་བདེ་བ་ཡོད་མ་མྱོང་། །གནས་བདེ་བདེ་དབེན་པའི་རི་ངོགས་བདེ། །ལམ་བདེ་བདེ་དམ་པའི་ལྷ་ཆོས་བདེ། །དུས་མི་འགྱངས་བདེ་ཆེན་ལམ་དུ་འགྲོ། །ཞེས་གླུ་རུ་བླངས་པས། ཨ་ཇོས་ཁྱོད་ངེས་པར་མ་ངེས་པ་ཞིག་འདུག་པས། ཨ་ཏའི་དྲུང་དུ་མྱུར་དུ་འགྲོ་ཟེར་ནས་ཁོ་རང་གི་ང་རྒྱབ་ཏུ་ཁུར་ཏེ་སྐས་ལས་ཕབ་ནས་ཨ་ཏའི་སར་ཕྱིན་ཏེ་འདི་སྐད་ཟེར། ཨ་ཏ་ཁྱོད་ཀྱིས་འདི་ལ་བཀའ་བསྒོ་བསྲུང་ བྃ༔ སྐྱོབ་རེ་མཛད་དགོས་པར་འདུག །འདིའི་སེམས་ཁམས་མི་བདེ་བ་ལྟ་བུའི་གཏམ་མ་ངེས་པ་སྣ་ཚོགས་བཤད་འདུག་ཟེར། ཨ་ཏས་སྐྱོན་མེད་འདི་ཁོ་རང་གི་ཅི་བྱེད་རུང་གདོན་གྱིས་འཚེ་བ་མིན། མོ་རང་གི་རྒྱུ་དག་རྡོ་བཅག་ཐད་སོར་མི་ཆག །ཁྱི་དེད་ལམ་དུ་མི་འགྲོའི་དཔེ་བཞིན། མི་དང་མི་མཐུན་ཞིང་སྨྱོན་པ་ལྟ་བུ་རེད་གསུང་། ཡང་ཇོ་ཇོས་འདི་སྐྱིད་གྲོང་དཔོན་ལ་སོང་ཡང་། ཕ་མྱེས་བཟང་པོའི་བླ་བཙོང་། རྒྱ་ཤོག་དཔོན་སྡེའི་ཞབས་འདྲེན། བཀའཁྲིམས་འབྱུང་བའི་གཞི་མ་འོང་ངེས་རེད་ཟེར། ཡང་བདག་གིས་ཨ་ཇོ་ཁྱོད་ཀྱིས་དེ་ལྟར་ཐུགས་བསམ་མི་དགོས་དང་། ང་རང་གིས་ཕ་མྱེས་བཟང་པོའི་སྙན་གྲགས། རྒྱ་ཤོག་དཔོན་སྡེའི་མཚན་བཟང་སོགས་ལ་མི་གནོད་ངེས་པ་ཨ་ཏའི་དྲུང་དུ་བཤད། མིན་ཀྱང་རང་བསམ་རེ་ལོས་ཡོད་སྨྲས། ཁོ་རང་གིས་ང་སྐྱིད་གྲོང་སང་ལ་འགྲོ་ངེས་རེད་བསམ་ནས་གཏམ་ཐམས་ཅད་བདེན་པར་བཟུང་། བདག་གིས་ནི་ཕའི་མདུན་ནས་དམ་བཅའ་བྱས་ཏེ། སྐྱིདགྲོང་དཔོན་ལ་མི་འགྲོ་བ་དང་། རང་བསམ་གྱི་གནས་ཡུལ་ཀུན་ལ་ངེས་མེད་དུ་འགྲོ་སྙམ་ནས་གཏམ་བཤད་དོ། །དེ་ནས་ཕ་ཡབ་དང་ཨ་མ་ཨ་ཇོ་སོགས་ལ་ང་རང་འགྲོ་རྒྱུའི་ཚིག་ཐང་ཡོད་པས་བཀའ་ནི་འགལ་ བ་མེད། མིན་ཀྱང་སྔོན་ཨ་ཏས་ང་རང་ལ་ཁྱོད་རང་གི་ཨ་མ་ཡོད་ཚེ་ཐག་རིང་ལ་མ་འགྲོ་དེ་མིན་ཅི་དགའ་གྱིས་གསུངས་པས། ད་ནི་དྲིན་ཆེན་གྱི་ཨ་མ་ནི་མེད། ཨ་ཏས་ནིང་མ་མཁོ་བར་སྐྱིད་གྲོང་དཔོན་ཆུང་ལ་སྦྱིན་འདུག་པས། ང་ཆགས་དོན་མེད་པས་ད་ནི་གནས་ངེས་མེད་ཞིག་ཏུ་འགྲོ་སྙམ་ནས་བློ་ཐག་རྦད་ཀྱིས་བཅད་ཀྱང་། ད་དུང་གཞན་ཉེ་འབྲེལ་སྡེ་དཔོན་རྣམས་ཀྱི་སྣང་ངོར་ང་རང་སྐྱིད་གྲོང་དཔོན་མོ་བྱེད་ཆགས་བྱས་ནས། རྒྱན་གོས་དང་ཆས་ཀ་ཐམས་ཅད་སྤུས་ལྡན་མི་འདྲ་བ་དགོས། ང་དཔོན་ཁག་གཉིས་ཀྱི་ཐོབ་ནོན་རེད་སྨྲས་པས། ཁོང་ཚོས་བདེན་པར་འཛིན་ཅིང་། ཚོང་དཔོན་དང་གཉེར་པ་སོགས་ཀྱིས་དེ་ཚོ་བསྡམས་ཏེ། བལ་པོའི་གསེར་མགར་དང་། བོད་མི་གོས་བཟོ་རྣམས་འབོད་ནས་རྒྱན་ཆས་ཅི་དགོས་ཐམས་ཅད་སྤུས་ལྡན་དུ་འཚགས་འདུག །ང་རང་གིས་བླ་མ་མཁའ་འགྲོའི་ལྷ་ཚོགས་ལ་གསོལ་བ་བཏབ་ནས་ཡོན་ཆབ་དང་དང་དམར་མེ་སྤོས་སོགས་དུ་མ་ཕུལ་ཞིང་དུས་རྒྱུན་དུ་འདུན་པ་ཆོས་ལ་གཏདཔས། ཉིན་གཅིག་རྨི་ལམ་ལ་ཡུལ་ཡིད་དུ་འོང་བ་སྤང་ལྗོངས་དང་ནགས་ཚལ་མེ་ཏོག་རྒྱས་པ། བྱ་དང་རི་དྭགས་མང་པོས་རྩེ་འཇོ་བྱེད་ཅིང་སེམས་བག་ཕེབས་པར་གནས་པ། དེའི་དབུས་སུ་བུད་མེད་མི་འདྲ་བ་མང་ བྃ༔ པོ་འཚོགས་འདུག །བདག་གི་བསམ་པ་ལ་ཕ་གི་བུད་མེད་རྣམས་ཀྱི་གྲལ་དུ་ཨ་མ་ཨེ་ཡོད་སྙམ་ནས་བུད་མེད་རྣམས་ཡོད་སར་སོང་བས། ཨ་མ་ནི་མི་འདུག །ཁོང་རྣམས་ཀྱང་ངོ་མི་ཤེས་པ་ཤ་སྟག་རེད་སྙམ་ཚེ། ཁོང་རྣམས་ཀྱི་ནང་ནས་སྔར་རྨི་ལམ་གྱི་སྐབས་འཆི་བའི་གདམས་པ་བསླབ་པའི་བཙུན་མ་དང་། ས་ར་ཧ་པའི་དྲུང་དུ་འགྲོ་རོགས་ཀྱི་བུ་མོ་གཉིས་ཀ་དང་བཅས་པ་ངའི་སར་འོང་ནས། ཁྱོདའོ་བརྒྱལ་ལམ། ད་ལན་འདིར་ཐོན་པ་ངོ་མཚར་ཆེ་ཟེར། བདག་གིས་ཁྱེད་རྣམས་སྐུ་ཁམས་བདེ། འུ་ཅག་མཇལ་རྒྱུ་ཡོད་པ་ངོ་མཚར་ཆེ་ལགས་ཞུས་ནས་ཕྱག་ཕུལ་བས། ཁོང་རྣམས་ན་རེ། འུ་ཅག་སྐྱེ་བ་གཅིག་པས་ཕྱག་མི་འོས། དཀྱིལ་འཁོར་གྱི་གཙོ་མོ་ལ་ཕྱག་ཕུལ་དང་། རང་ནོར་དངོས་གྲུབ་ལོན་པའི་དུས་ལ་བབས་པ་ཡིན་ནོ་ཟེར། ཡང་བདག་གིས་འུ་ཅག་སྐྱེ་རྒྱུད་ཅིའི་ཕྱིར་གཅིག་པ་ཡིན་ལགས་སྨྲས་པས། ཁོང་རྣམས་ན་རེ་བཙུན་མ་འདི་ཀུན་དགའ་འབུམ་མ་ཡིན་ནོ། །སུ་ཁ་སིདྡྷི་དང་། ངྷི་བཾ་ཏ་རེ་ངེད་གཉིས་ཡིན་རབས་ཡོད་གསུངས་ནས་གར་སོང་མེད་པར་གྱུར་ཏོ། །ཡང་བདག་གིས་ཁོང་རྣམས་ཀྱིས་གསུངས་པ་ལྟར་གཙོ་མོ་ལ་ཕྱག་ཕུལ་བས། གཙོ་མོ་གདན་ལས་བཞེངས་ཏེ་ཁོང་གི་ལྟེ་བ་གྲི་གུག་ གིས་དམར་ལམ་མེར་ཁ་ཕྱེས་འདུག་པས། ང་རང་ཤིན་ཏུ་སྐྲག་སྟེ་མིག་གིས་བལྟ་མ་བཟོད་ནས་ཨ་མ་ཞེས་འབོད་ཅིང་ཕྱིར་འོང་གྲབ་བྱས་ཚེ། ཡང་བུད་མེད་རྣམས་ན་རེ། ཁྱོད་ཀྱིས་འདི་ལྟར་མ་ཟེར་ཞིག །མིག་ཕྱེས་ནས་ལྟོས་དང་སྐྱོན་མེད། རངབྱུང་ཡོངས་གྲུབ་ཀྱི་དཀྱིལ་འཁོར་ཆེན་པོ་མཇལ་བའི་དུས་ལ་བབས་སོ་གསུངས་པས། བདག་གིས་མིག་ཕྱེས་ནས་དལ་གྱིས་བལྟས་ཚེ། བུད་མེད་ཐམས་ཅད་གནས་འགྱུར་ནས་མཁའ་འགྲོའི་ཆ་ལུགས་ཅན་ཤ་སྟག་ཏུ་སོང་འདུག །གཙོ་མོ་ཡང་རྡོ་རྗེ་ཕག་མོའི་སྐུའི་རྣམ་པར་གྱུར་ནས་ལུས་དཀྱིལ་སྐྱེ་མཆེད་ཀྱི་ལྷ་ཚོགས་རྣམས་ཀྱི་དབང་བསྐུར་ཅིང་ངོ་སྤྲད། ཆོས་ཉིད་མཁའ་འགྲོའི་གསང་མཛོད་དང་། མཁའ་འགྲོའི་ཐུགས་ཐིག་གཉིས་ཀྱི་བརྡ་དབང་བསྐུར་ཅིང་། ཆོས་འདི་གཉིས་སྟོན་པའི་དུས་དང་། དར་བའི་གནས། ཆོས་འཛིན་གྱི་སྐྱེས་བུ། གདུལ་བྱའི་ཡུལ། རྟེན་འབྲེལ་གྱི་འཆར་སྒོ། ཐབས་ཀྱིགྲོགས་དང་བཅས་པའི་ཁ་བྱང་དང་ལུང་བྱང་རྣམས་སྩལ་ཏེ། ཁྱོད་ཀྱིས་ཆོས་འདི་རྣམས་ཀྱི་འགྲོ་དོན་དུས་ལ་བབ་པ་ཡིན་པས། ཁ་བྱང་གི་དོན་རྣམས་མ་བརྗེད་པར་ཡིད་ལ་ཟུངས་ཤིག་དང་། ཁྱོད་ང་ཡི་ཕོ་ཉ་བ་ཡིན་པས་བསྟན་འགྲོའི་དོན་ངང་གིས་འབྱུང་བར་ངེས་སོ་གསུངས་ཏེ། བྃ༔ གཙོ་འཁོར་ཐམས་ཅད་འོད་ཀྱི་རྣམ་པར་ཁྲུ་གང་ཙམ་ལས་འཕགས་ཏེ་ནམ་མཁའི་ཁམས་ལ་བཞུགས་འདུག །ཡང་བདག་གིས་མཁའ་འགྲོ་སུ་ཁ་སིདྡྷི་ལ་འདི་སྐད་གསོལ། བདག་ལ་དབང་དང་གདམས་པ་སྩལ་བ་རྣམས་ནི་ཤིན་ཏུ་བཀའ་དྲིན་ཆེ་སྟེ། ང་རང་སྐྱེ་ལུས་དམན་པའི་དབང་གིས་བསྟན་འགྲོའི་དོན་འགྲུབ་དཀའ་བས་ཇི་ལྟར་བྱས་ན་དགའ་ལགས། ཟབ་གཏེར་འདི་གཉིས་ཀྱི་ལས་འཕྲོ་བདག་ལ་ཅིའི་ཕྱིར་དབང་བ་ཡིན་ལགས་ཞུས་ཚེ། ཌཱཀྐིས་ན་རེ། རིགས་ལྡན་མ་ཁྱོད་ཀྱི་ལུས་དམན་པ་མ་ཡིན་ནོ། །སྔོན་མཚོ་རྒྱལ་གྱིས་ཞུས་ལན་དུ། གུ་རུས་བཀའ་སྩལ་པ། ལུས་མེད་ལུས་མཆོག་སེམས་མ་ཉིད་ཀྱི་ལུས། །ཚོགས་ཆེན་ཡེ་རྫོགས་བདེ་གཤེགས་དགྱེས་བསྐྱེད་ཡུམ། །སྟོང་དབྱིངས་ཤེས་རབ་རྡོ་རྗེ་བཙུན་མོ་ཆེ། །ལུས་མཆོག་འདི་འདྲ་ཐོབ་པའི་ཐུགས་བསྐྱེད་མཛད། །དུས་གསུམ་རྒྱལ་བའི་ཕྲིན་ལས་ཆུ་ཟླའི་གར། །གདུལ་བྱའི་མོས་ངོར་གཟུགས་ཀྱི་སྐུར་བཞེངས་པ། །འབྱུང་གནས་རྡོ་རྗེ་བཙུན་མོའི་ཆུ་སྐྱེས་ཞལ། །སངས་རྒྱས་བསྟན་གཞི་སྨིན་པའི་མྱུ་གུ་བཞིན། །བུད་མེད་ལུས་འདི་མི་དམན་ལུས་འདི་བཟང་། །མཚོ་རྒྱལ་ཁྱོད་ཀྱི་ནམ་ཡང་ལུས་འདི་དང་། །མི་འབྲལ་ཐུགས་བསྐྱེད་སྨོན་ལམ་ རྣམ་དག་དགོས། །གསུངས་པ་བཞིན་ཡིན་པས་ལུས་དམན་མ་ཡིན་ནོ། །ཆོས་འདི་ཁྱོད་སྔོན་ཀུན་དགའ་འབུམ་མའི་དུས་མ་རྒྱུད་གསང་བ་ཡེ་ཤེས་ཡང་གསང་བླ་མེད་སྙན་རྒྱུད་ཀྱི་ཆོས་སྐོར་ཤོག་དྲིལ་ལྔ་པའི་སྡེ་ཚན་པདྨ་མཁའ་འགྲོའི་ཆོས་སྐོར་ཡང་གཏེར་དུ་སྦས་པ་རྣམས་རེད། ད་ཁྱོད་ཀྱི་མཁའ་འགྲོའི་གསུང་བཞིན་འདི་ནས་ཉི་མ་ཤར་ཕྱོགས་སུ་འགྲོ་དོན་དུས་ལ་བབས་པ་ཡིན་པས། མ་འགྱང་བར་སོང་ལ་འགྲོ་དོན་མཛོད་ཅིག་དང་། མ་འོངས་པ་ན་བཟང་ངན་འབྲེལ་ཐོག་དང་བཅས་པ་ཨོ་རྒྱན་མཁའ་འགྲོའི་གླིང་དུ་བསྒྲོད་པར་ངེས་སོ་གསུངས་མ་ཐག་ཏུ་འཁོར་ཐམས་ཅད་གཙོ་མོ་ལ་ཐིམ་མོ། །ཡང་གཙོ་མོའི་ཞལ་ནས། ང་འགྲོ་ཨོ་རྒྱན་མཁའ་འགྲོའི་གླིང་དུ་འགྲོ། །ཡེ་ཤེས་མཚོ་རྒྱལ་ང་དང་གཉིས་སུ་མེད། །དུས་ཀུན་འབྲལ་མེད་ཁྱོད་ཀྱིས་གསོལ་བ་ཐོབ། ཐུགས་རྗེ་ནམ་ཡང་བསླུ་བ་ཡོད་མ་ཡིན། །རིགས་ལྡན་ཁྱོད་ཀྱིས་འདི་བཞིན་ཡིད་ལ་ཟུངས། །དབྱིངས་ཀྱི་སྤྲུལ་པ་ཆོས་དབྱིངས་ཞིང་དུ་འགྲོ། །འགྲོ་དང་འོང་མེད་ཀུན་ཏུ་ཁྱབ་པར་བརྡལ། །མ་བཅོས་འགྱུར་མེད་ཆོས་ཉིད་དེ་བཞིན་ཉིད། །ཀ་དག་ཀུན་ཏུ་བཟང་མོར་ཨེ་མ་ཧོ། །ཞེས་གསུངས་ཤིང་འཇའ་ལྟར་ཡལ་སོང་མཐར་གཉིད་ལས་སད་དོ། །ནངས་པར་སྔར་ལྟར་ བཱ༔ མ་ཡིན་པར་ཤེས་པ་གསལ་ཞིང་རིག་པ་གདེངས་ཐོབ་པ་ལྟར་ཉིན་ཞག་གསུམ་གྱི་བར་དུ་ཏིང་འཛིན་ལས་གཡོ་བ་མེད་པར་གནས་པ་སོགས་བྱུང་ངོ། །དེ་ནས་ལོ་ངོ་བཅུ་བཞིའི་དུས་ཉིན་གཅིག་ཨ་ཏ་ལ། ང་རང་གྲུབ་ཐོབ་རིན་པོ་ཆེའི་མདུན་ལ་འགྲོ་བསམ་གྱི་ཞུས་ཚེ། ཨ་ཏས་ཀྱང་ཆོག་གསུངས་ཏེ། མཇལ་རྟེན་དུ་གོས་ཆེན་དམར་མོ་ཡུག་གཅིག་ཕྲུག་བུབ་གཅིག་དང་སྲམ་ལྤགས་དར་ཕུན་ཚོགས་བཀྲ་ཤིས་བཅས་གནང་ནས་དཔོན་གཡོག་བདུན་བཅས་སོང་གསུང་། བདག་གིས་ཀྱང་དེ་ལྟར་བྱས་ཏེ་བླ་མའི་དྲུང་དུ་སོང་ནས། སྔར་ཨ་མའི་ཉམས་མྱོང་གི་ལོ་རྒྱུས་བླ་མ་ལ་ཞུས་ན་ཆོག་གསུངས་ཡོད་པས་དེའི་དོན་གྱི་འོང་བ་ཡིན་ཞུས། བླ་མའི་ཞལ་ནས་འོ་ལེགས་མདངས་ང་རང་གི་རྨི་ལམ་ལ་བྱ་རྒྱལ་ཁྱུང་གི་ཕྲུག་གུ་ཞིག་གཤོག་རྩལ་རྒྱས་ཏེ་ནམ་མཁའ་ལ་འཕུར་གྲབ་བྱེད་འདུག་པས། དེ་བདག་གིས་ལམ་བསྟན་བྱེདཔ་རྨིས་པ་ཡིན་པས་བཟང་། ནམ་མཁའ་སྤྲིན་མེད་ལ་གློ་བུར་དུ་སྤྲིན་གཡོ་འདུག་པས། ཁྱོད་ལ་ལུགས་གཉིས་ཀྱི་མཛད་པ་གང་ཐད་ནས་བར་ཆད་རེ་འོང་ངེས་པ་རེད་གསུངས། ཡང་བདག་གི་ཉམས་མྱོང་གི་ལོ་རྒྱུས་ཐམས་ཅད་ཞུས་ནས་དེ་དག་ལམ་དུ་འགྲོ་བ་ལ་ཅི་དགོས་ཉིད་ཀྱིས་གསུངས་དགོས་ཞུས་ཚེ། བླ་མའི་ཞལ་ནས་ཁྱོད་ལ་ང་རང་གིས་བསླབ་བྱའི་ཚིག་རེ་བཤད་ན་གཞན་ལ་ཟུར་ཙམ་ཡང་ཟེར་མི་ཉན་མ་གཏོགས། དཔོན་སང་གི་ཁྲིམས་ལ་སྦྱར་འོང་གསུང་ཚེ། བདག་གིས་ཁྱོད་ཀྱིས་གསུང་མཛད་ཅིགནང་ཡང་ང་རང་གི་སྲོག་ལ་བབ་ཀྱང་ཨ་ཏ་ཙམ་ལ་ཡང་ཅིའི་ཕྱིར་ཞུ་ལགས་ཞུས་ཚེ། བླ་མའི་ཞལ་ནས་འོན་བདག་གིས་ཁྱོད་ལ་རྒྱུ་མཚན་བཤད་དོ། །མཁའ་འགྲོའི་ཞལ་ལུང་ལས་ཁྱོད་ཉི་མ་ཤར་ཕྱོགས་སུ་འགྲོ་དགོས་གསུངས་དོན་ནི། ཁྱོད་ཀྱི་སྔོན་སྨོན་ལས་འཕྲོའི་དབང་གིས་མདོ་ཁམས་སྨད་ཀྱི་ཕྱོགས་སུ་གདུལ་བྱ་ཡོད་པས། དེའི་དུས་ལ་བབ་པར་གདའ་བས་ཉེ་འབྲེལ་ཡུལ་མི་སོགས་ཀྱི་ངག་ལ་མ་ཉན་པར་ཁྱེད་རང་གི་བསམ་མནོ་ཐོངས་ལ། མཁའ་འགྲོའི་བཀའ་བཞིན་སྒྲུབ་ན་འདི་ཕྱི་གཉིས་ལ་ལེགས་ཡོན་ཐོབ་འོང་གི་གསུངས། ཡང་བདག་གིས་བླ་མ་ལགས་ང་རང་གི་བསམ་པ་ལ་གཞན་དོན་ཕར་ཞོག །རང་དོན་དུ་དམ་པའི་ཆོས་རྣམ་དག་ཞིག་མི་འགྲུབ་སྙམ་འདུག་ལགས། སྤྱི་སྡེ་དཔོན། སྒོས་ཨ་ཏ་དང་ཉེ་འབྲེལ་རྣམས་ཀྱིས་སྐྱིད་གྲོང་དཔོན་ཆུང་ལ་སྦྱིན་ནས་མི་འགྲོ་རང་དབང་མེད་པར་བྱེད་ཅིང་། གལ་ཏེ་མ་སོང་ཡང་ནང་འཁྲུག་ཆེན་པོའི་གཞི་བྱེད་པར་འདུག་པས་དེ་ལ་ཅི་དགོས་ང་རང་མདོ་ཁམས་ཕྱོགས་སུ་འགྲོ་དོན་འོང་མི་ཞིག་ བྃ༔ ཡིན་ན། ལྷ་དང་བླ་མ་རྣམས་ཀྱིས་སྐྱིད་གྲོང་དཔོན་ཆུང་ལ་ལས་འབྲེལ་ལེགས་པས། ཁྱོད་ཀྱི་ཆུང་མར་དགེ་བར་གདའ་ཅི་ལ་གསུངས། དེའི་ཕྱིར་ན་བདག་གི་ལུས་འདི་བོར་མ་སོང་བར་ཆོས་བཞིན་སྤྱོད་པའི་སྐལ་བ་མེད་པ་འདྲ་འདུག་པས། དེ་ལ་ཐབས་ཅི་དྲག་ཉིད་ཀྱིས་གསུང་དགོས་ཞུས་ཚེ། ཡང་བླ་མའི་ཞལ་ནས་ཁྱོད་ཀྱིས་ངེས་