Tibetan
པར་སྙིང་ཐག་པ་ནས་དམ་པའི་ཆོས་ཞིག་ཨེ་འགྲུབ་སྙམ་ན་ལུས་བརྗེ་མི་དགོས་དང་། བདག་གིས་ཁྱོད་ལ་གྲོགས་ལྡན་བྱེད་གསུངས། བདག་གིས་ཀྱང་ལགས་སོ་བཀའ་དྲིན་ཆེ་ཞུས་ཏེ་རང་གནས་ལ་བཞུད་དོ། །དེ་ནས་ལོ་ཁྱིམས་དེའི་ཟླ་བ་གཉིས་པའི་ཚེས་གསུམ་གྱི་ཉིན་འཛམ་གླིང་སྤྱི་ཁྱབ་ཀྱིས་སྐྱེན་པོའི་མདའ་རྩལ་མགྱོགས་པའི་རྟ་རྒྱུག་བྱེད་པ་ཡིན་པས། དེ་ཀར་བདག་སོང་བས་སྤྱི་དཔོན་གྱི་གུར་མོ་ཆེའི་ནང་དུ་བདག་ལ་ཁྲི་ཡོལ་མདུན་ལྕོགས་ཟས་རིགས་སྣ་ཚོགས་བཤམས་ནས་ཀུན་གྱིས་བཀུར་སྟི་བྱེད་ཅིང་། བདག་ལ་དཔོན་མོ་སང་བཞུགས་ཁྲིའི་གདན་ལ་སྐུ་བཞུགས་ལགས་ཟེར། བདག་གི་བསམ་པ་ལ་ང་རྨི་ལམ་གྱི་དུས་སུ་ཀུན་དགའ་འབུམ་མས། འཁོར་དང་ལོངས་སྤྱོད་ཉེ་འབྲེལ་ལ། །མ་ཆགས་མ་ཞེན་རིགས་ཀྱི་བུ། །བར་ཆད་རྭ་ཅན་མི་འབྱུང་ཞིང་། །དེ་དག་འཁོར་བའི་ ལྕགས་སྒྲོག་ཡིན། །ཆོས་ཀྱི་བར་ཆད་དེ་ལས་མེད། །གསུངས་པ་དེ་ཀ་འདི་ཡིན་པར་གདའ་བས་ཐབས་ཀྱིས་སྤང་དགོས་སྙམ་ནས། ཁྲི་སྟེང་ལ་མ་སོང་བར་གཡོག་མོ་རྣམས་ལ་ང་རང་གི་རྟ་ཁྱེར་ཤོག །ངས་གཅིག་བརྗེད་སོང་འདུག་པས་ད་ནི་ཁྱིམ་ལ་འགྲོ་དགོས་སྨྲས་པས། ང་རང་གི་གཡོག་མོ་གཉིས་པོས་བདག་ལ་ཆ་ཞིབ་ཡོད་པས་ལགས་སོ་ཟེར་ནས་རྟ་ཁྲིད་དུ་སོང་། གཞན་རྣམས་ཀྱིས་ཁྱེད་ཅི་ལ་བྱོན། གཞན་ཞིག་མངགས་ན་ཨེ་ཆོག་ལགས་ཟེར། གཞན་ཞིག་སོང་བས་ནི་མི་ཆོག་ང་རང་ལ་ད་ནང་ཨ་ཏས་གསུང་མཛད་ཞིག་ཕེབས་ཡོད་པས་ད་ལྟ་མ་གཏོགས་མ་དྲན་པ་ཡིན་པས། ད་མགྱོགས་པར་འགྲོ་དགོས་སྨྲས་ནས་ཕྱིར་འོང་། དེའི་ཞོར་ལ་ནོར་བུ་གླིང་དུ་སོང་ནས་ཚ་འབོག་རྒྱབ་ནས་བསྡད་ཡོད་པས་དུས་ཡོལ་ཞིག་བྱེད་འདུག །བདག་གིས་གྲོགས་གཉིས་ལ་ང་ཅུང་ཟད་ཞིག་གཉིད་དགོས། ཁྱོད་གཉིས་ཇ་དལ་མོ་བྱས་ནས་འཐུང་སྨྲས་ཤིང་ཅུང་ཞིག་གཉིད་ཚེ། རྨི་ལམ་ལ་རྡོ་རྗེ་གཡུ་སྒྲོན་མ་ཡིན་སྐད་པའི་ན་ཆུང་བུ་མོ་རྒྱན་ལྡན་མཛེས་མ་ཞིག་གིས་འདི་སྐད་ཟེར། ཨ་ལྕམ་ཁྱོད་ཀྱི་གྲོགས་པོ་སུ་ཞིག་བྱ་བ་ཡིན། དེ་སྐྱེ་བ་སུ་རེད་ཨེ་ཤེས། ལས་མཐའ་ཅི་འདྲ་རེད་ཟེར། བདག་གིས་ང་ལ་གྲོགས་པོ་རང་འདོད་ཀྱི་སྐྱེས་པ་ནི་ བྃ༔ མེད། མ་འདོད་བཞིན་དུ་ཕ་མ་ཉེ་འབྲེལ་རྣམས་ཀྱིས་སྐྱིད་གྲོང་དཔོན་ཆུང་ལ་སྦྱིན་ཡོད་རབས་རེད་སྨྲས་ཚེ། ཁོང་ན་རེ། སྐྱིད་གྲོང་དཔོན་ཆུང་གཞོན་ནུ་ཡིད་དུ་འོང་བ་ཞིག་རེད། ཁྱོད་ཀྱི་ཁྱོ་ཕོ་ལ་ནོར་བར་འདུག་ཟེར། བདག་གིས་སེམས་མ་དགའ་ནས་གླུ་འདི་སྨྲས་སོ། །ཧེ་ཧེ་བུ་མོ་གཡོ་ཅན་མ། །ཁྱོད་རྡོ་རྗེ་གཡུ་སྒྲོན་མིན་ཐག་ཆོད། །སྐྱེས་པའི་གཟུགས་ལ་ཆགས་ཚུལ་འདི། །ཁྱེད་སྨད་འཚོང་མ་ཞིག་ཡིན་པར་གདའ།།སྐྱིད་གྲོང་དཔོན་ཆུང་གཟུགས་ལེགས་ཀྱང་། །མི་རྟག་དབྱར་གྱི་མེ་ཏོག་འདྲ། །སྟོན་བ་མོ་ཐོན་དུས་གཟི་མདངས་ཉམས། །དེས་འདི་བཞིན་འགྱུར་བའི་ཆོས་ཉིད་རེད། །ཁོའི་སྐྱེ་བ་བསོད་ནམས་ངས་མི་ཤེས། །ལས་རྣམ་པ་ཁྱིམ་པའི་ཆ་ལུགས་རེད། །ཁོང་གཞོན་ནུ་གཟི་བརྗིད་མདངས་ལྡན་ཀྱང་། མོ་ང་ལ་དགོས་མེད་ཁྱོད་ལ་སྦྱིན། །ཞེས་སྨྲས་པས། ཡང་མོ་ན་རེ། ཨ་ལྕམ་ཁྱོད་ཀྱི་ཁོང་ཁྲོ་མ་བྱེད་དང་ངས་གཏམ་དྲང་པོར་སྨ་ཟེར། བདག་གིས་ཁྱོད་སྐྱིད་གྲོང་དཔོན་ཆུང་ལ་དགའ་ཕྱོགས་མ་བཤད་ན་ང་ཡིས་ཉན་དང་ཆོག་སྨྲས་པས། མོ་ན་རེ། ང་ཡིས་ཁྱོད་ཀྱི་རྒྱུད་ཚོད་བརྟགས་པ་ཡིན་མ་གཏོགས་ཁྱོ་ཕོ་དགོས་པ་མིན། འོན་ཀྱང་བདག་གིས་ཁྱོད་ལ་གཏམ་དྲང་པོ་ཞིག་ བཤད་ཀྱིས་ཉོན་དང་བསམ་པ་འགྲུབ་འོང་ཟེར་ནས། བདག་གིས་རྣ་བ་ལ་མཆུ་གཏད་ནས་གཞན་གྱི་མི་གོ་བ་ལྟ་བུར་བྱས་ཏེ་འདི་སྐད་ཟེར། སང་ཕོད་ཁྱོད་ཀྱི་ཚེ་རབས་སྔོན་གྱི་གཏེརགྲོགས་ཚེ རབས་ལས་ཀྱི་བླ་མ་མཚན་དྲི་མ་མེད་པའི་འོད་ཟེར་མཐའ་ཡས་ཞེས་བྱ་བ། ནམ་སྙིང་དང་བེེ་རོ་གཡུ་སྒྲ་ཟུང་གི་སྤྲུལ་པ་གཏེར་སྟོན་འགྲན་ཟླ་དང་བྲལ་བ་ཞིག་མདོ་ཁམས་སྨད་ཕྱོགས་ནས་ཡར་བྱོན་འོང་ངེས་པས། དེ་དང་ལྷན་དུ་གངས་རི་ཐོད་དཀར་ཟླ་བའི་རྫོང་དུ་གནས་བཅས་ན། རྒྱ་བོད་ལ་བདེ་སྐྱིད་མི་ལོ་ལྔ་བཅུའི་བར་དུ་འབྱུང་བར་ངེས་ཀྱང་། དེ་ལྟར་མ་ལྡན་ན་ཁྱོད་ཀྱང་མདོ་ཁམས་ཤར་ཕྱོགས་སུ་འགྲོ་བའི་དུས་ལ་བབས་པ་ཡིན་ནོ་གསུངས། བདག་ཀྱང་བླ་མའི་མཚན་ཐོས་མ་ཐག་ཏུ་ལུས་བ་སྤུ་གཡོས། མིག་མཆི་མས་འཁྲུགས་ཅིང་སྐོམ་པ་ཆུ་ལ་གདུང་བ་བཞིན་དུ་བླ་མ་ལ་མཇལ་འདུན་ཤིན་ཏུ་ཆེ་བ་ཞིག་བྱུང་ཡང་། རང་གི་ཁ་བྱང་ནང་དུ་ཤེས་རབ་འོད་ཟེར་བྱ་བར་འདུག །དྲི་མ་མེད་པའི་འོད་ཟེར་མཐའ་ཡས་བྱ་བ་ཞིག་ཡོད་པ་ཧ་མ་གོ་སྙམ་ཚེ། ཡང་མོ་ན་རེ། ཁྱོདཀྱིས་དེ་ལྟར་བསམ་མནོ་མི་དགོས་དང་། པྲ་ཛྙཱ་རསྨི་ཞེས་པ་འཕྲང་འགོའི་གཏེར་ཆེན་རེད། བི་མ་རསྨི་ཞེས་པ་དང་སྤྲུལ་གཞི་གཅིག་ཡིན་པས་དོན་གཅིག་གོ །གུ་རུའི་དུས་ནས་སྨོན་ལམ་ བྃ༔ གྱི་འབྲེལ་ཟབ་ཆེ་བ་ཡིན་པས་ནོར་བ་དང་འཁྲུལ་བ་ཡོད་མི་སྲིད་དོ་གསུང་སྟེ་ང་རང་གི་ལྟེ་བ་ལ་འོད་དམར་གྱི་རྣམ་པར་མི་སྣང་བར་གྱུར་ཏོ། །དེ་ནས་གཉིད་སད་ཚེ་ང་རང་གི་རྟ གཙང་ཆུའི་ཕ་རི་ལ་བུད་སོང་བས། གྲོགས་མོ་གཉིས་ཀྱི་གྲུ་ཁ་ནི་ཐག་རིང་འདུག་པས་ད་ཆུའི་ཕ་རི་ལ་འགྲོ་ཐབས་ཅི་དགོས་ལགས་ཟེར། བདག་གིས་ང་འགྲོ་དང་འཁོར་བ་ལས་ཐར་དགོས་པས་ཆུ་ལས་ལོས་ཐར་སྨྲས་ཏེ། འགྲོ་ཆས་བྱས་ཚེ་ཁོང་གཉིས་ནས་མི་ཐར་སྙམ་ཀྱང་ཅི་ཡང་ཟེར་མ་ཕོད། བདག་གིས་དཀོན་མཆོག་ལ་གསོལ་བ་བཏབ། རྒྱུ་ལུས་སྟོང་རར་བསྒོམས་ནས་རླུང་བུམ་པ་ཅན་ཞིག་བཟུང་ཏེ། ཆུ་ལས་བརྒལ་སོང་བས་ལྟེ་བ་ཡན་ཆད་མ་ནུབ་པར་ཕ་རི་ལ་ཐར་སོང་། ཚུར་ལམ་དྲག་གི་བསམ་ནས་རླུང་མ་བཟུང་བ་རྟ་རྔ་ལ་འཇུས་ཏེ་འོང་བས། རྐང་པ་ས་ལ་མ་རེག་ཀྱང་མགོ་མན་ཆད་ཆུ་ལ་ནུབ་ནས་ཐར་དཀའ་བ་ལྟ་བུར་བྱུང་བས། གཡོག་མོ་གཉིས་ཀྱིས་ཁྱོད་ཕར་ལམ་ཆུའི་སྟེང་ནས་བྱོན་སོང་། ཚུར་ལམ་ཆུའི་འོག་ནས་བྱོན་འོང་དོན་ཅི་ལགས་ཟེར། བདག་གིས་རླུང་གི་ཁྱད་པར་གྱིས་ཡིན་ཀྱང་རྫུན་སྨྲས་ཏེ། ང་ཕ་ལམ་ཆུ་ལས་ཐར་སླ་བ་དེ་རང་ཁྱིམ་མྱུར་དུ་སྤང་བའི་དོན་རེད། ཚུར་ལམ་ཐར་དཀའ་བ་དེ་སྐྱིད་གྲོང་སང་གི་འཁོར་བར་ཡུན་དུ་ གནས་པའི་དོན་ཨེ་རེད་སྨྲས་ནས་ཧ་བགོད་བྱས་པས། ཁོང་གཉིས་ཀྱིས་ཅི་ཡང་མི་ཟེར་བར་བལྟ་འདུག །ཡང་བདག་གིས་ད་འུ་ཅག་རྣམས་འགྲོ། ད་ལྟ་ཁྱིམ་ལ་ཐོན་དུས་ཨ་ཏས་ཁྱེད་ཅག ཅིའི་ཕྱིར་འོང་བ་ཡིན་གསུང་ན། ང་རང་གི་ནད་རོ་འཁྲུགས་པ་རེད་ཟེར་དགོས་སྨྲས། ཁོང་གཉིས་ན་རེ། རྫུན་ཞུ་མི་ཕོད་རྗེས་སོར་ནས་དཔོན་གྱིས་སྙན་སོན་ན་ཆད་པ་ཡོང་ཡ་ཟེར། བདག་གིས་སྐྱོན་མེད་ད་ལན་སྐབས་ཐོབ་དེ་ཀར་མ་གཏོགས། རྗེས་སོར་རིམ་གྱིས་ང་རང་གིས་ཨ་ཏ་ལ་ལོ་རྒྱུས་ཞུ་དང་ཆོག་སྨྲས་ཏེ་དེ་ལྟར་བྱས་སོ། །དེ་ནས་ཟླ་བ་དྲུག་པའི་ནང་དུ་སྡེ་དཔོན་ཀུན་གྱིས་བགྲོས་བྱས་པ་ལྟར། ཨ་ཏ་དཔོན་གྱིས་བཙུན་མོ་ཞིག་ཁབ་ཏུ་བཞེས་སྐབས། བདག་གི་བསམ་པ་ད་ནི་དྲིན་ཆེན་ཨ་མ་ནི་མེད། ཇི་ལྟར་བཤད་ཀྱང་མ་ཡར་གྱི་གྲིབ་འདི་ཤིན་ཏུ་འཁྱག་པར་འདུག །ཨ་ཏ་ལ་བཀའ་གྲོས་ཞིག་འོང་ན་མིང་པོ་ཕུན་ཚོགས་ཆོས་འཕེལ་གྱིས་ཤིན་ཏུ་གཅེས་སྤྲས་ཆེ་བས་དེ་ཀར་འགྲོ་སྙམ། མིན་ཀྱང་ང་རང་ཡུལ་གཞན་དུ་འགྲོ་སྟབས་འོང་ན།འདི་ནི་ཁང་པ་རྩེགས་བཞིའི་ཡང་སྟེང་ཡིན་པས་བསྒྲོད་དཀའ། མིང་པོ་ཡང་ཁང་པ་རྩེགས་གསུམ་ལས་མེད་པས་དེ་དགའ་འདུག་བསམ་ནས། ཡང་ཉིན་གཅིག་ཨ་ཏའི་མདུན་ལ་སོང་བས། བཙུན་མོ་ བྃ༔ དང་གཉིས་ཀ་ལྷན་དུ་བཞུགས་འདུག་པས། བདག་གིས་ཨ་མ་དྲན་ནས་སེམས་སྡུག་གིས་གང་། ཨ་ཏའི་པང་ལ་མགོ་བཞག་ནས་ངུ་ཞིང་བསྡད་པས། ཨ་ཏས་ཁྱོད་ངུ་དོན་ཅི་རེད་སྨྲོས་དང་། ཁྱོད་རང་གི་བསམ་རྒྱུ་རེ་ཡོད་ན་སྒྲུབ་དང་ཆོག་གི་གསུངས། བདག་གིས་ཁྱེད་གཅིག་པུར་ཡིན་ན་ཞུ་བྱ་ཞིག་ཡོད། ང་ངུ་དོན་ནི་ཨ་མ་དྲན་པ་ཡིན་ལགས་ཞུས་ཚེ། ཨ་ཏའི་ཞལ་ནས་དཔོན་མོ་ལ་ཁྱོད་ཉི་མཐོང་ནང་དུ་ཅུང་འགྲོ་ཞིག་གྱིས་དང་། འདིས་ང་ལ་བཤད་རྒྱུ་ཞིག་ཡོད་ཟེར་འདུག །མོ་རང་བྱིས་པ་ཆུང་རུང་སེམས་ཤེས་ཆེ་བ་ཞིག་ཡིན་པས། དོན་ཆེན་རེ་མིན་ན་ཁྱིམ་གཅིག་ཡིན་ཀྱང་ངའི་སར་འོང་དཀའ་གསུངས་ཚེ། དཔོན་མོས་ལགས་སོ་ཞུས་ཏེ་སོང་། བདག་གིས་ང་ཨ་ཇོའི་སར་འགྲོ་སྙམ་གི་ཅི་དགོས་ཞུས་པས། ཨ་ཏས་ཅིའི་ཕྱིར་0 འགྲོ་སྙམ་པ་ཡིན་གསུངས། བདག་གིས་ང་སྐྱིད་གྲོང་སང་ལ་འགྲོ་རན་དུས་ཨ་ཇོས་བདག་ཤིན་ཏུ་གཅེས་སྤྲས་ཆེ་བས་དེའི་སར་ཡུན་རིང་ཞིག་འདུག་སྙམ་གི་ལགས། གནས་ལ་སོང་རྒྱབ་ནི་ཕན་ཚུན་ཀུན་གྱིས་ཐོབ་ཐང་ལ་བསམ་ནས་བདག་ཡུན་རིང་ཨ་ཇོའི་སར་འོང་རྒྱུའི་སྟབས་དེ་ཙམ་རེདསྙམ། དེང་སང་འགྲོ་ན་ཕྱི་ནང་ཀུན་གྱི་སེམས་ལ་མི་འབབ་རྒྱུ་མེད་པ་འདྲ་བསམ་གྱི་འདུག་ཞུས་ ཚེ། ཨ་ཏས་དེ་རེད་ཁྱོད་བདེན་པར་འདུག །དཔོན་གདན་དང་མ་བྲལ། རལ་གྲི་ཤུབས་དང་མ་ཕྱེད་ཟེར་བའི་དཔེ་བཞིན་དཔོན་ས་ལ་བསྡད་རྒྱབ་འགྲོ་འདུག་མང་དགོས་མེད། ཨ་ཇོའི་སར་འགྲོ་བསམ་ན་གཡོག་མོ་གཉིས་བཅས་སོང་ལ་ཡུན་རིང་བསྡད་ཀྱང་ཆོག་གསུངས། དཔོན་མོའི་སེམས་ལ་མ་བབས་ནས་འདི་སྐད་ཟེར། ང་རང་འདི་ཀར་མ་ཐོན་གོང་ལ་ནི་ཁྱོད་ཕྱི་ནང་ཀུན་གྱིས་མི་མཐོང་ཞིང་འཚམས་པ་ལྟ་བུ་ཞིག་རེད། ད་ལན་རང་ཁྱིམ་ལ་མི་བཞུགས་ཤིང་དཔོན་ཆུང་ཆོས་འཕེལ་སང་གི་སར་བྱོན་འགྲོ་བ་དེ་ང་མི་ཁ་ལ་རྒྱབ་པ་རེད་ཟེར། བདག་གིས་དེ་ལྟར་མིན་པའི་ལོ་རྒྱུས་གོང་བཞིན་བཤད་ནས་ཨ་ཏས་སོང་དང་ཆོག་གསུངས་པ་ཡིན་སྨྲས་པས། དཔོན་ལ་ཞུ་མ་ཕོད་པར་ང་རང་ལ་གཏམ་མང་བཤད་འདུག་ཀྱང་བཏང་སྙོམས་ལ་སྐྱར་ནས། ཨ་ཇོ་སང་གི་ཟུར་ལ་སོང་ངོ་། །དེ་ནས་རང་ལོ་བཅོ་ལྔའི་དུས་ལོ་སར་རན་བྱུང་བས། དཔོན་མོ་དང་ཡུལ་མི་རྣམས་ཀྱིས་ང་རང་ཕར་འོང་དགོས་ཟེར། ཨ་ཇོ་སང་གིས་ད་ལོ་ཁྱོད་འདི་ཀར་འདུག་དགོས་གསུངས། ཨ་ཏས་ཅི་ཡང་མ་གསུངས་པས། ང་རང་ཨ་ཇོ་སང་གི་ཟུར་ལ་བསྡད། ལོ་གསར་གྱི་ཚེས་གསུམ་ཉིན་ཕ་མ་གཉིས་ལ་བུ་དང་བུ་མོ་རྣམས་ཀྱིས་དྲིན་ལན་འཇལ་ཕྱིར་ཟས་སྣ་ ཁྱེ་བཱ༔ ཚོགས་ཀྱི་སྡེར་ཁ་བཤམས་ཤིང་དར་བཅས་ཕྱག་བཙལ་ཏེ་སྐུ་དྲིན་གསོ་དགོས་པས། དེར་ཨ་ཇོ་དང་ང་གཉིས་ལྷན་དུ་སོང་ནས། ཟས་སྣ་རྣམས་ཨ་མ་ལ་སྐུ་སྐལ་བཞག་སྟེ་ཚོགས་རྫས་བྱས། ཨ་ཏ་ལ་དངོས་སུ་བཤམས་ཏེ་གོང་བཞིན་སྐུ་དྲིན་གསོ་བ་སོགས་བྱས་ཏེ། དོ་ནུབ་དེ་ཀར་བསྡད་པའི་རྨི་ལམ་ལ་རྒྱ་གར་ལྷོ་ཕྱོགས་སིདྡྷིའི་གླིང་རེད་ཞེས་པ་ཞིག་ཏུ་ཐོན་སོང་བས། དེ་ལ་མི་རིགས་མི་འདྲ་བ། ཁ་ཆེ། བལ་པོ། གོར་ཁ། བྲམ་ཟེ། ཨ་ཙ་ར་ལ་སོགས་པའི་མི་རིགས་དུ་མ་ཞིག་གིས་གྲུབ་ཐོབ་ཀུ་ཀུ་རཱི་པ་མཇལ་དུ་འགྲོ་བ་ཡིན་ཟེར་ནས་ཆུ་ཆེན་གཉིས་ཀྱི་འདུས་མདོ་རི་སྣ་ཐུར་དུ་ཟུག་པ་ཞིག་གིས་རྩ་བ་ལ་གྲོང་པ་མང་པོ་འདུག་པ་དེའི་ནང་ཞིག་ཏུ་འགྲོ་འདུགདག་གིས་འདི་རྨི་ལམ་ཡིན་པས་བདེན་གྲུབ་མེད། འོན་ཀྱང་སྔར་ང་རང་ཀུ་ཀུ་རཱི་པའི་བདེ་བསྐྱེད་ཀྱི་གསང་བའི་གྲོགས་སུ་གྱུར་པ་ཡིན་པས། ད་རེས་ཡང་མཇལ་བའི་སྐལ་བ་རེ་ཡོད་འགྲོ་སྙམ་ནས་ཁོང་རྣམས་ཀྱི་རྗེས་སོར་ནས་སོང་མཐར། བར་སྐབས་ཤིག་ལ་བདག་བརྒྱལ་སོང་བ་ལྟར་ཅི་ཡིན་མ་གོ་བར་སོང་འདུག །བརྒྱལ་སང་པ་དང་མཉམ་དུ་རི་དེའི་རྩེ་མོར་ཐོན་འདུག །ད་ནང་སྔ་བའི་མི་རྣམས་ནི་གར་སོང་མ་ཤེས། རི་རྩེ་ནས་མར་བལྟས་པས་ རིངོགས་དེར་ཤིང་སྣ་ཚོགས་སྐྱེས་ཤིང་བར་སྐབས་ཀྱི་མཚམས་རྣམས་སུ་ཁང་པ་མང་པོ་ཡོད་པ། དེ་དག་གི་ནང་དུ་རྒྱ་ཡིག །ཨ་ཀ་དང་པ་ཙ། ན་ད་དང་ཁ་པ། ག་ཙ་དང་ཏ་ཐ། ཨེ་ཨོ་དང་ཝ་མ། ར་ཉ་དང་ལ་བ། ཨི་ཨོཾ་དང་ཡ་ཧ། ཨུ་ཞ་དང་ཟ་ཤ །ཨེ་ཝཾ་དང་ཧཾ་ཧེ་ལ་སོགས་པ་ཆུང་བ་སྤུ་ཤད་ཀྱིས་བྲིས་པ་ཙམ་དང་། ཆེ་བ་གནམ་ས་ཁེབ་པ་ཙམ་རེད་འདུག བདག་གིས་དེ་དག་ཅི་ཡིན་སྙམ་ནས་མར་མར་སོང་བས། ས་ཁུག་བཞི་མན་ཆད་མི་ཐར་བར་འདུག་པས། སླར་ཡར་རི་རྩེ་ལ་འོང་བས་རྣལ་འབྱོར་པ་ཞིག་མགོ་བཏུམས་རྩ་རིལ་བྱས་ནས་ཉལ་འདུག་པས། བདག་གིས་ཁོང་ནད་པ་ཞིག་ཡིན་པར་འདྲ་བསམ་ནས་ཁྱོད་ནད་པ་ཨེ་ཡིན་སྨྲས་པས། ཁོ་རང་གི་མགོ་བཏུམས་ནས་ཡོད་པ་ཕུད་དེ་ང་རང་ལ་བལྟ་འདུགཔས། མི་ཡི་ལུས་ལ་སྤྲེའུའི་སྤུ་སྐྱེས་ཤིང་ཁ་མིག་གཉིས་མིན་པ་སྤུས་གང་བ་ཞིག་རེད། བདག་གིས་འདི་གྲུབ་ཆེན་ཀུ་ཀུ་རཱི་པ་ཡིན་ངེས་རེད། འདྲེ་ཞིག་ནི་མ་རེད་དད་པ་སྐྱེས་འདུག །མི་ནི་མ་རེད་བཟའ་བཅའ་མེད་པ་ལ་འདིར་གཅིག་པུར་འདུག་དོན་མེད་སྙམ་ནས། བདག་གིས་ཕྱག་འཚལ་ཏེ་བླ་མ་ལགས་ཁྱོད་ལ་བདག་གིས་དུས་རྟག་པར་གསོལ་བ་བཏབ་ཀྱང་། ད་ལན་མིན་པ་ཞལ་མི་མཇལ་བའི་ བྃ༔ དོན་ཅི་ཡིན་ལགས་ཞུས་པས། བླ་མའི་ཞལ་ནས། ང་ཁྱོད་ཀྱིས་མཐོང་མ་མྱོང་བས་གསོལ་འདེབས་ཅིའི་ཕྱིར་བྱེད་གསུངས། ཡང་བདག་གིས་ཁྱེད་དངོས་ཞལ་མཇལ་མ་མྱོང་ཡང་། སྔོན་དག་སྣང་ལ་གྲུབ་ཐོབ་ས་ར་ཧ་པས་སྟེང་སྒོ་བདེ་བ་ཆེན་པོའི་གདམས་པ་སྩལ་དུས། འོག་སྒོ་ཁམས་གསུམ་རོལ་པའི་མན་ངག་དུས་ལ་བབ་ཚེ། གྲུབ་པའི་དབང་ཕྱུག་སྔགས་ཀྱི་རྣལ་འབྱོར་པ་མི་ཕམ་ཀུ་ཀུ་རཱི་པས་སྩལ་འོང་གསུངས་ཏེ་ལུང་བསྟན་པ་ཡིན་པས། དེ་ནས་བཟུང་སྟེ་ཁྱོད་ལ་ཡིད་དུང་ངེ་བའི་དད་པས་གསོལ་བ་བཏབ་པ་ཡིན་ཞུས་ཚེ། ཁོང་ན་རེ། ཡུལ་འདི་ཁྱོད་ཀྱིས་ཨེ་ཤེས་གསུངས། བདག་གིས་མི་ཤེས་ལགས་རི་ངོགས་འདིར་ནགས་ཚལ་གྱི་བར་དུ་ཁང་ཁྱིམ་དུ་མ་འདུག་ཀྱང་། འོད་ཀྱི་རྣམ་པས་རྒྱ་ཡིག་གི་རྒྱལ་པོ་སུམ་བཅུ། བློན་པོ་ལྔ། སྡེ་ཚན་གསུམ་སོགས་ཆེ་ཆུང་དུ་མ་འདུག །མི་ནི་གཅིག་ཀྱང་མེད་པར་འདྲ་བས་མ་རིག་ལགས་ཞུས། ཡང་བླ་མས་འོ་འདི་ཁྱོད་ཀྱི་ཕུང་པོའི་གནས་ཚུལ་རེད། ཁྱོད་ཀྱི་འཁོར་ལོ་བཞི་པའི་མན་ངག་ལ་སྦྱངས་པས། རྩ་རླུང་ཐིག་ལེའི་སྒྲིབ་པ་ཅུང་ཟད་དག་པའི་སྟོབས་ཀྱིས་རླུང་སེམས་ཀྱི་དྭངས་མ་ཡི་གེའི་རྣམ་པར་མངོན་དུ་གྱུར་པ་ཡིན་ནོ་གསུངས། །བདག་གིས་ང་རང་གི་ ལུས་མངོན་སུམ་དུ་ཡོད་པས། ཡུལ་འདི་ངའི་ལུས་ཀྱི་གནས་ཚུལ་ཇི་ལྟར་ཡིན་ལགས་ཞུས། ཡང་བླ་མས་ཁྱོད་ལ་སྔར་ནས་ཕྱི་སྒྱུ་ལུས་སྟོང་ར། ནང་རྩ་རླུང་སྟོང་ར། གསང་བ་སེམས་ཉིད་འོད་གསལ་དུ་ངོ་སྤྲད་ནས་ཡོད་པ་ལ། ད་དུང་ལུས་བདེན་གྲུབ་ཏུ་འཁྲུལ་པ་དེའི་དབང་གིས་ལུས་གནས་རི་དང་ནགས་ཚལ་ཆུ་མཚོ་ཁང་ཁྱིམ་རྣམས་སུ་སྣང་བ་ཡིན་པས། དེ་མན་ངག་ལམ་སྒྲོལ་གྱི་ཐབས་ལ་བརྩོན་པ་གལ་ཆེ་གསུངས། ཡང་བདག་གིས་དེས་ན་ཡུལ་འདི་ལུས་ཀྱི་རྩ་གནས་དང་ཇི་ལྟར་དུ་མཚུངས་པ་ཡིན་བླ་མ་ཉིད་ཀྱིས་གསུང་དུ་གསོལ་ཞུས་ཚེ། བཀའ་སྩལ་པ། རིགས་ལྡན་མ་ཉོན་ཅིག །རི་འདིའི་རྩེ་མོར་ནགས་ཚལ་དང་། དེའི་བར་མཚམས་ཁང་མིག་སོ་གཉིས་སྒོ་ཆོས་འབྱུང་ཨེ་ཡིག་གིས་མཚན་པ་ཅན་དུ་ཡོད་པ་དེ་ནི་སྤྱི་བོ་བདེ་བ་ཆེན་པོའི་གནས་ཡིན་ནོ། །དེའི་འོག་ཏུ་ཁང་མིག་བཅུ་དྲུག་སྒོ་ཝཾ་ཡིག་གི་དབྱིབས་ཅན་དུ་ཡོད་པ་ནི་མགྲིན་པ་ལོངས་སྤྱོད་ཀྱི་གནས་ཡིན་ནོ། །དེའི་འོག་ཏུ་ཁང་མིག་བརྒྱད་པ་སྒོ་ཟླུམ་ལ་འཁྱིལ་བར་ཡོད་པ་ནི་ཆོས་ཀྱི་འཁོར་ལོའི་གནས་ཡིན་ནོ། །དེའི་འོག་ཏུ་ཁང་མིག་དྲུག་ཅུ་རྩ་བཞི་སྒོ་ཆོས་འབྱུང་གྲུ་གསུམ་གྱིས་མཚན་པར་ཡོད་པ་ནི་སྤྲུལ་པའི་འཁོར་ལོའི་གནས་ཡིན་ནོ། །དེ་དག་གི་ནང་དུ་ཡི་གེའི་རྣམ་ བྃ༔ པར་ཡོད་པ་ནི་རྩ་རླུང་གནད་དུ་བསྣུན་ན་ཐིག་ལེ་སྐུ་རུ་སྨིན་པའི་ས་བོན་ཡིན་ནོ། །དེའི་འོག་ཏུ་ཁྱོད་བསྒྲོད་མ་ནུས་པས་ཕྱག་རྒྱ་རྣམ་པ་གསུམ་ལ་བརྟེན་ནས་གསང་བའི་མྱུར་ལམ་ལ་བསླབ་པར་བྱ་དགོས་སོ། །དེ་ལ་དང་པོ་སྒྱུ་ལུས་ལས་རུང་དུ་བྱ་བ་ལ། རྩ་ཐོད་སྦྱོར། རླུང་ཐོད་སྦྱོར། ཐིག་ལེ་ཐོད་སྦྱོར་རྣམས་ལ་སྦྱངས་དགོས། དེ་ལ་དུ་མ་ཡོད་ཀྱང་། མདོར་བསྡུས་ན་ཁམས་གསུམ་རོལ་པའི་མན་ངག་ཁོ་ནར་འདུ་སྟེ། དེ་ལ་དང་པོ་རྩ་ཐོད་སྦྱོར་ཞེས་པ་ནི་དག་མ་དག་གི་རྩའི་རྣམ་དབྱེ་བྱེད་པ་དང་། མ་དག་པའི་རྩ་ལ་དག་པ་ཡེ་ཤེས་ཀྱི་རླུང་གིས་རྒྱས་བཏབ་ནས་ཡེ་ཤེས་ཀྱི་རྩ་རུ་དག་པར་བྱེད་པ་ཡིན་ནོ། །སྤྱིར་རྡོ་རྗེའི་ཕུང་པོར་ཁྲག་གི་རྒྱུན་གནས་པའི་རྩ་སྟོང་ཕྲག་བདུན་ཅུ་རྩ་གཉིས་དང་། ལས་རླུང་རྒྱུ་བའི་རྩ་ཉི་ཁྲི་ཆིག་སྟོང་དྲུག་བརྒྱ་ཐམ་པ། རླུང་ཁྲག་མི་རྒྱུ་བའི་རྩ་གཅིག །འཁོར་ལོ་ལྔས་བསྡུས་པའི་རྩ་ལྔ་བཅུ་རྩ་བདུན། ཡུལ་རྐྱེན་གྱིས་བསྡུས་པའི་རྩ་སོ་གཉིས། བྱང་ཆུབ་སེམས་སྤྲིན་གྱི་ལམ་རྩ་སོ་གཉིས་ཡོད་དོ། བསྡུ་ན་རྩ་གསུམ་དང་འཁོར་ལོ་བཞིའམ་ལྔར་འདུས་ལ། དེ་ལ་རྩ་གསུམ་སྔར་དང་མཚུངས་ཀྱང་། ད་ལན་དབུ་མའི་མཚན་ཉིད་འདི་ལྟར་སྒོམ་དགོས་སོ། །ཆུ་ཤིང་ལྟར་དྲང་བ། ཏིལ་མར་一 ལྟར་གསལ་བ། པདྨ་ལྟར་སྲབ་པ། རྒྱ་སྐྱེག་ལྟར་དམར་བ། དེའི་ཡར་མར་ལ་དཀར་དམར་གྱི་ས་བོན་གནས་པ། གཡས་སུ་རོ་མ་དམར་མོ་ཁ་གྱེན་དུ་ཕྱོགས་པ་ཤེས་རབ་ཟླ་མཚན་བབས་པའི་གནས་དང་། གཡོན་རྐྱང་མ་དཀར་པོ་ཁ་ཐུར་དུ་ཕྱོགས་པ་མི་བསྐྱོད་འབབས་པའི་གནས་སོ། །མོ་ལ་རོ་མ་དྲང་པོར་ཡོད་པའི་སྟོབས་ཀྱིས་ཁམས་རྫོགས་ཚེ་ཟླ་རེ་ལ་ཟླ་མཚན་ཡོད་དོ། །ཕོ་ལ་རྩ་སྣ་འགུགས་པར་ཡོད་པའི་ཁམས་ཉམས་པའི་ཁྲག་སྣ་སྒོ་ནས་ཐོན། གནོད་བྱེད་གདོན་དང་། རྩ་ཁ་ཕྱེ་བའི་སྨན་སྟོབས་ཀྱིས་ཆུ་ལམ་རྡོ་རྗེའི་སྦུབས་ནས་འབྱུང་སྲིད་དོ། །ཀུན་འདར་མའི་རྩ་སྣ་ནར་མར་ཡོད་པའི་རྒྱུའི་ཐིག་ལེ་འབབ་ལྡོག་སོགས་ཀྱི་ལས་བྱེད་དོ།།མདོར་ནརྩ་གསུམ་གྱི་རྩེ་མོ་རྣམས་ཡར་ཟུག་ཅིང་རྩ་བ་ཐུར་དུ་ཟུག་པ་ལས་དྲི་ཆུ་གཤང་ལྕི་ཐིག་ལེ་རྣམས་ཀྱི་འབྱུང་གནས་སོ། །དེ་ལྟ་བུའི་རྩ་གཙོ་བོ་གསུམ་ལས་འཁོར་ལོ་ལྔ་དང་། གཞན་ཡང་ལུས་ཀྱི་མགོ་མཇུག་ཐམས་ཅད་ཀྱི་རྩ་རྣམས་གྱེས་པ་ཡིན་ནོ། །འཁོར་ལོ་ལྔ་ནི། སྤྱི་བོ་རུ་ངོ་བོ་མེ་ལོང་ཡེ་ཤེས་ལ་རྣམ་པ་རྩ་འདབ་དཀར་ལ་དྭངས་པ་སོ་གཉིས། མགྲིན་པར་ངོ་བོ་སོར་རྟོག་ཡེ་ཤེས་ལ་རྣམ་པ་རྩ་འདབ་དམར་གསལ་བཅུ་དྲུག །སྙིང་གར་ངོ་བོ་ཆོས་དབྱིངས་ཡེ་ཤེས་ལ་རྣམ་པ་རྩ་ བྃ༔ འདབ་མཐིང་སྐྱ་བརྒྱད། ལྟེ་བར་ངོ་བོ་མཉམ་ཉིད་ཡེ་ཤེས་ལ་རྣམ་པ་རྩ་འདབས་སེར་སྐྱ་དྲུག་ཅུ་རྩ་བཞི། གསང་བར་ངོ་བོ་བྱ་གྲུབ་ཡེ་ཤེས་ལ་རྣམ་པ་རྩ་འདབས་ལྗང་སྐྱ་བདུན་ཅུ་རྩ་གཉིས། དེ་ལྟ་བུའི་རྩ་དེ་དག་གསལ་ངར་མ་ཐོན་བར་དུ་བསྒོམ་དགོས་སོ། དེའི་རྩ་ཁམས་གནས་སུ་དག་ནས་རྣམ་སྨིན་རིག་འཛིན་གྱི་ས་བོན་རྒྱུད་ལ་ཐོབ་པའོ། །གཉིས་པ་རླུང་ཐོད་སྦྱོར་ཞེས་པ་ནི་ལས་རླུང་དབྱིངས་སུ་དག་དགོས་པས། དེ་ལ་རླུང་བཅུ་ལས་རུང་དུ་བྱས་ཏེ། རླུང་སེམས་དབུ་མར་འདྲེས་ནསྣང་བ་དབང་ཐོབ་ཀྱི་ཡོན་ཏན་དུ་མ་འབྱུང་བ་ཡིན་ནོ། །དེ་ལ་མདོར་བསྡུ་ན་ནང་རང་གནས་ཀྱི་རྩ་བའི་རླུང་ལྔ། ཕྱི་