Tibetan
དབུས་མོ་འདིས་ལེན་གྱིས་ཨ་སྐྱོང་བཟའ་མི་ འོང་ཟེར་བའི་རྐྱེན་གྱིས་སྐུ་མདུན་ལ་བཅར་མ་ཕོད། ཐག་རིང་པོ་ནས་ཕྱག་ཕུལ་ཞིང་བསྐོར་བ་རེ་བྱེད་དུས། རྗེ་དེ་ཉིད་ཀྱིས་བླ་མ་རིན་པོ་ཆེའི་རྣམ་ཐར་གྱི་ལོ་རྒྱུས་གཞན་བུ་སློབ་རྣམས་ལ་གསུངས་འདུག་པས། དེ་བདག་གིས་ཐོས་ནས་ཁོང་ཡབ་སྲས་ལ་དད་མོས་ལྷག་པར་སྐྱེས་སོ། །དེ་ལྟ་བུའི་སྡུག་བསྔལ་དུ་མ་མྱོང་བའི་ཚུལ་རྣམས་ཡི་གེར་དོགས་ནས་མ་བྲིས་སོ། །ཡང་དེ་ནས་ལོ་ཁྱིམས་དེའི་ཟླ་བ་བཞི་པ་ལྔ་པའི་ནང་ལ་དབུས་སྡེ་བྱང་ལམ་བརྒྱུད་ནས་འོང་བས། འབྲོག་པ་ལ་སྤྲང་ས་མ་རྙེད་ནས་ས་སྟོང་ལུས་པས་མུ་གེ་ཆེན་པོ་བྱུང་སྟེ། རྩྭ་མཛོ་མོ་ནུ་ཤིང་ཟེར་བ་དེ་དང་། ས་དཀར་སེར་གྱི་ཁུ་བ་གཉིས་ལ་ལྟོ་བརྟེན་བྱས་ཏེ་འོང་བས། ལུས་མ་འཚོ་ནས་རླུང་ཤུགས་ཆེན་འོང་ཚེ་ཤོག་སྐྱ་ལྟར་ཁྱེར་འགྲོ་བར་བྱེད་དེ་ལམ་མི་ཆོད། སྤང་འབུར་མཐོ་བར་ཡོད་ན་དེ་ལ་བསྐོར་བ་བྱས་ནས་མ་སོང་ན་རྐང་པས་ལུས་མི་ཁྱོག་ཅིང་དེ་ལྟ་བུའི་སྡུག་བསྔལ་བཟོད་དཀའ་བ་བྱུང་ནས་མུ་གེས་འཆི་ཆས་བྱེད་འདུག་པས། ཡང་བདག་གིས་བསམ་ཚོད་ཀྱི་ཚིག་འདི་སྨྲས། སྐྱབས་མཆོག་རྣམ་གསུམ་དད་པས་རྒྱུན་དུ་བསྟེན། །ལྷག་བསམ་དག་པས་བློ་ཕུག་ཆོས་ལ་གཏད། །ལས་འཕྲོ་དམན་པས་རང་དབང་དུས་མ་སྟེར། །དབྱར་དགུན་མེད་པར་འཆི་བའི་སྲོག་ལ་ བྃ༔ བབ། །བསྐྱེད་རྫོགས་ཡོད་ཀྱང་མུ་གེའི་ནད་མ་སེལ། །གཏེར་ལ་དབང་ཡང་སྒྱུ་མའི་ཟས་ནོར་དབུལ། །གང་ལྟར་བྱས་ཀྱང་འཆི་ལས་མི་ཐར་བས། །རང་སྣང་རྣམ་དག་དཔལ་རིའི་གླིང་དུ་འགྲོ། །ལུས་ནི་ཡེ་ནས་ཞི་ཁྲོའི་འདུ་ཁང་ལ་ཕུལ་ཡོད། །ཨེ་འདུ་མི་འདུ་ལྷ་ཚོགས་ཁོ་རང་ཚོས་ལོས་ཤེས། །ངག་རླུང་ཡེ་ནས་མ་དང་མཁའ་འགྲོ་ལ་ཕུལ་ཡོད། སྒྱུ་འཕྲུལ་འགྲོ་འོང་ཨེ་མཛད་ཁོང་རྣམས་ཀྱིས་ལོས་དགོངས། །ཡིད་ནི་ཡེ་ནས་བླ་མའི་ཐུགས་དགོངས་དང་བསྲེས་ཡོད། །ཐུགས་རྗེས་ཨེ་བཟུང་རྗེ་བཙུན་ཁོང་རང་གིས་ལོས་མཁྱེན། མི་རྟག་སྒྱུ་མའི་ཕུང་པོ་བདེ་སྡུག་གི་འཁྲུལ་གཞི། །ཅོར་ཆུང་བྱས་པའི་སེམས་འདི་ཉེར་ལེན་གྱི་སྡུན་ཐག །དབུས་རོགས་ལྷ་སྡེ་དཀར་པོའི་སྙིང་རྗེ་ནི་ཆུང་འདུག །ད་ནི་གཅེས་འཛིན་དོར་ནས་དཔལ་རི་ལ་བཞུད་འགྲོ། །ཞེས་སྨྲས་ནས་དབྱིངས་མི་འགྱུར་བའི་ཀློང་དུ་དལ་གཅིག་ངལ་བསོས་ཚེ། ཉམས་རྨི་ལམ་འདྲེས་མའི་སྣང་ཆར་ང་རང་གི་ཨ་མ་འོང་ནས་སྲུང་མདུད་ཞིག་བྱིན་ནས། ད་དུང་ཁྱོད་འཕོ་བའི་དུས་ལ་མ་བབ་པ་ཡིན་པས་དཔལ་རི་ལ་འགྲོ་མ་རན། ནམ་ཞིག་དུས་ལ་བབ་དུས་ང་རང་བསུ་མ་ལ་འོང་ཟེར་ནས་མི་སྣང་བར་གྱུར། བདག་ཉམས་ལས་སངས་ཏེ་ཅི་ཡིན་ ཨ་མ་དུས་ལས་འདས་ཕྱིན་ཆད། རྨི་ལམ་ཙམ་ཡང་ཤར་མ་མྱོང་བས། ད་ལན་གསལ་པོ་ཞིག་མཐོང་བའི་དོན་ཅི་ཡིན། ད་དུང་བདག་གིས་སྡུག་བསྔལ་འདི་ལྟ་བུ་མྱོང་དགོས་པ་འདྲ་སྙམ་ནས་ཡོད་ཚེ། བྱ་ཕོ་རོག་ཞིག་གི་སྐད་གོ་འདུག །བདག་གིས་དེ་སྔ་ས་སྟེང་འདིར་མི་མི་དགོས་བྱ་ཙམ་ཡང་མ་མཐོང་བས། ཕོ་རོག་ཞིག་གྲགས་འདུག་པ་ཅི་ཡིན་སྙམ་ནས་བལྟས་ཚེ། ཤིང་གི་ཞོ་ཟོ་ཞིག་གི་སྟེང་ན་ཕོ་རོག་ཞིག་བབ་འདུག་པས། བདག་གིས་ཅི་ཡིན་སྙམ་ནས་བལྟ་རུ་སོང་ཚེ་སྣོད་དེའི་ནང་དུ་ཞོ་གང་བླུགས་འདུག །དེའི་གཡས་སུ་སྒྲོག་གསར་པ་ཞིག་དང་། གཡོན་དུ་ནོར་བཏགས་ཐག་པ་ཞིག་བཞག་འདུག །ཐག་པ་གཉིས་ཀྱི་དོན་ཅི་ཡིན་མགོ་ཡང་། ཞོ་ཨ་མས་ང་ལ་འཆི་གསོས་ཀྱི་སྨན་དུ་གནང་བ་རེད་སྙམ་ནས། ཕུད་དེ་བླ་མ་དཀོན་མཆོག་གསུམ་ལ་མཆོད།མ་འཕྲོ་ང་རང་གིས་འཐུངས་ནས་སོང་བས། ལུས་སེམས་བདེ་བ་དང་། རླུང་སེམས་རང་སོར་ཆུད་ནས་སྟེང་འོག་གི་རླུང་འཛིན་ཐུབ་པར་བྱུང་ངོ་། །དེ་ནས་ཉིན་མཚན་བྱས་ཏེ་སོང་བས་དབུ་སྒར་གྱི་རྗེས་ཆོད་པས། ཐག་པ་བོར་སོང་། ཞོ་ཟིའི་བཟང་མོ་ལ་བྱིན་ནས་ལོ་རྒྱུས་རྣམས་སྦས་གསང་བྱས། དེ་ནས་རིམ་གྱིས་འོང་བས་རྩི་དམ་པའི་སྒྲུབ་ཕུག་ནས་རྗེ་དེ་ བྃ༔ ཉིད་ཀྱིས་ཟབ་གཏེར་ཞིག་བཞེས་དགོས་པར་འདུག་པས། དེར་ང་རང་སོང་ན་ཁོང་གིས་གཏེར་ཁ་མ་ལུས་པ་ལོན་ངེས་ཡིན་ཀྱང་། རྟ་པཎ་གྱིས་བདག་ལ་ཁྱོད་སྤེན་ཆུ་ལས་ཐར་དཀའ་བས་ཅིའི་ཕྱིར་འོང་ཟེར་ནས་འགྲོ་དབང་མ་སྟེར། འཇིགས་སྒྲོན་དང་ལྷན་དུ། རྗེའི་སྐུ་མདུན་ལ་སོང་བའི་རྟེན་འབྲེལ་འབྲིང་ཙམ་བྱུང་། དེ་ནས་རྫ་སྐྱོར་ཁུའི་གྲོང་དུ་ཐོན་ནས་རྒྱ་ནག་མ་ཎི་ལ་ཕྱག་བསྐོར་དང་། གཡུ་བྱུར་ཆ་ཤས་ལྷགས་འདུག་པ་རྣམས་ཀྱིས་རྡོ་ཡོན་བྱས། དེ་ཀར་ཞག་གཉིས་ཙམ་ལ་བསྡད་ནས་ཟས་སློང་དུ་སོང་བས། དགེ་རྒན་ཞིག་གིས་ཡ་ཨ་རྗེ་གང་ནས་ཡིན་ཟེར། བདག་ཡུལ་མེད་འཁྱམས་པོ་ཞིག་ཡིན་སྨྲས། ཁོང་ན་རེ། ཁྱོད་མཁའ་སྤྱོད་མའི་སྒྱུ་འཕྲུལ་ཞིག་ཡིན་པར་འདུག།ང་རང་གི་རྨི་ལམ་བཟང་པོ་རྨིས་པ་ཡིན་པས་ངོ་མཚར་ཆེ་ཟེར་ནས་ཕྱག་འཚལ་ཞིང་ཕྱག་དབང་བླངས་ནས་གྲོ་ཁ་ཅི་དགོས་སྦྱིན་ཟེར། བདག་གིས་ལམ་རྒྱགས་ཅུང་ཟད་ལས་མི་དགོས་ང་རང་གིས་ཁུར་མི་ཐུབ་གི་།ཁྱོད་ཀྱིས་ཡི་གེ་འབྲི་ཤེས་ན་ངས་གདམས་པ་ཞིག་བྲི་སྨྲས་ཚེ། ཁོང་ན་རེ། བདག་སྔར་ས་སྐྱའི་རྟ་མགྲིན་དབང་མོས་ལུང་བསྟན་གནང་ཡོད་པའི་དེའི་ཐོག་རེད་ཟེར་ནས་དགའ་སྤྲོ་ཆེན་པོའི་ངང་ནས་དྲུང་ཡིག་བྱས་ཏེ། མཁའ་འགྲོའི་ ཐུགས་ཏིག་གི་ཆོས་སྐོར་མཁའ་སྤྱོད་མའི་སྒྲུབ་ཐབས་ཚོགས་དང་བཅས་པ་ཕབས་ནས་ཁོ་རང་ལ་གཏད། དབང་དང་བསྐྱེད་རྫོགས་ཆ་ཚང་ཕབ་དགོས་ཟེར་བས། རྗེས་སོར་ང་ཡར་ལྷ་སར་འོང་དུས་བྲི་སྤེལ་བྱེད། ད་ལན་རྟེན་འབྲེལ་ཙམ་ཡིན་སྨྲས་པས། ཁོ་རང་ཤིན་ཏུ་དགའ་ནས་ལོངས་སྤྱོད་ལ་འཕངས་པ་མི་བལྟ་ཞིང་གང་དགོས་བདག་ལ་སྦྱིན་འདུག་ཀྱང་དགོས་མེད་སྨྲས་ཏེ། ཁོ་རང་ལ་གང་དགོས་ཀྱི་གདམས་པའི་བསླབ་བྱ་རེ་དང་སྲུང་མདུད་སོགས་བྱིན་ནས་ཉིན་གསུམ་གྱི་ལམ་ལ་བདག་ཁལ་རྟས་བསྐྱལ། དེ་ནས་རིམ་གྱིས་རྫ་རྒྱལ་དགོན་ལ་ཐོན་པས། དབུས་སྒར་པ་རྣམས་ཀྱིས་རྗེ་ཉིད་ཀྱི་སྐུའི་ནུ་བོ་སྤྲུལ་པའི་སྐུ་ནམ་མཁའ་འཇིགས་མེད་སང་རྫོགས་ཆེན་དཔལ་དགེའི་ཡང་སྤྲུལ་ཡིན་པ་ཁྲི་ཁར་མངའ་གསོལ་བྱས་ཏེ། བླ་བྲང་ནས་དབུས་སྒར་པ་ཡོངས་རྫོགས་ལ་མགྲོན་ཟས་སྦྱིན་ནས་ཞག་མང་པོའི་བར་དུ་ཁྲི་སྟོན་བྱེད་འདུག། དེ་དག་གི་ནང་ནས་སྤྲང་མོ་ཆོས་སྒྲོན་དངང་རང་གཉིས་ཀྱི་སྐལ་བ་ཆད་འདུག་པས། བདག་གིས་ཆོས་སྒྲོན་ལ་ཁྱོད་སྒར་ཕྱོགས་གཅིག་པ་ཡིན་པས་ཁོང་རྣམས་ཀྱི་གྲལ་དུ་སོང་ན་ལོས་ཆོག །ང་རང་ནི་སྔར་རྟ་པནདང་འཇིགས་བསམ་གཉིས་ཀྱིས་རྒྱ་ལམ་ལ་འགྲོ་མི་ཆོག་ཟེར་བས། ད་ལན་ཁྲི་སྟོན་ཁར་ཡོང་ཅི་ལ་བཅུག་ང་མི་ བྃ༔ འགྲོ་སྨྲས་ཚེ། མོ་ན་རེ། ཁྱོད་ཀྱིས་སྐྱིད་མ་ཁྱག་ནས་སྡུག་ཉོས་པ་རེད། ཕ་ཡུལ་བདེ་སྐྱིད་ཕུན་སུམ་ཚོགས་པ་དེ་དགོས་མེད་བྱས་ནས། དཔན་ཆེན་དང་འཇིགས་བསམ་གཉིས་ཀྱི་ངོ་དཀར་ནག་ལ་དོགས་བྱེད་དགོས་པ་དེ་ཁྱོད་རང་ལན་པ་རེད། སྤྲང་ཟས་ཨེ་རག་བསམ་འདུག་པ་ལས་རང་ཡུལ་ལ་རྒྱལ་པོ་བྱས་ཏེ་དཔོན་སྲིད་བཟུང་བསྡད་ན་འདི་འདྲའི་སྡུག་བསྔལ་མི་དགོས་ཟེར། བདག་གིས་ང་ད་དུང་རྒྱལ་སྲིད་ཀྱི་དག་པོ་ཡིན་སྨྲས་པས། མོ་ན་རེ། ཧེ་ཧེ་ཡིན་པ་ཡོད་གི། །འུ་ཅག་གཉིས་ཀྱིས་སྤྲང་ཟས་མ་རྙེད་ནས་བསྡད་ཡོད་པ་འདི་མི་ཤེས་སམ་ཟེར། བདག་གིས་འཇིག་རྟེན་གྱི་གླུ་ལ་དྲངས་ནས་འདི་ལྟར་སྨྲས། ཨ་རོག་ཉོན་དང་ཆོས་ཀྱི་སྒྲོན། །བུ་མོ་ང་ཡི་རྒྱལ་ཐོབ་ནི། །ཀུན་དང་མི་མཐུན་ཁྱད་པར་འཕགས། འགྱུར་བ་མེད་པའི་དཔོན་ཐོབ་ཡོད། །གདོད་ནས་རང་རིག་སྤྲོས་དང་བྲལ། །ལྷུན་རྫོགས་ཡེ་ཤེས་ཆེན་པོའི་རྩལ། །ཀུན་ཁྱབ་བརྡལ་བའི་ས་གཞི་ལ། །འཁོར་འདས་གཉིས་མེད་བྱང་སེམས་མཁར། །ཀློང་ཡངས་ཁྱབ་བརྡལ་རྩེ་མོ་མཐོ། །རྩོལ་སྒྲུབ་བྲལ་བའི་འཇུག་སྒོ་ཡང་། །རང་སྣང་ལྷུན་གྲུབ་རྒྱན་བཀོད་མཛེས། །རིག་དབྱིངས་འགྱུར་མེད་རྒྱལ་པོ་མཆོག །རྡོ་རྗེ་བདུན་ ལྡན་ཁྲི་ལ་བཞུགས། །ངང་གནས་ཡེ་ཤེས་བཙུན་མོ་དང་། །འདུ་འཕྲོའི་སྣང་བ་སྲས་དང་འཁོར། །དབྱིངས་དང་ཡེ་ཤེས་དབྱེར་མེད་ལས། །རོལ་རྩལ་ཅིར་ཡང་འཆར་བའི་ངོར། །ཡང་འཁོར་བྲན་དང་འབངས་ཀྱི་སྡེ། །རང་གསལ་བདེ་ཆེན་ཀློང་དུ་རྫོགས། །ཀ་དག་གདངས་ལས་ལྷུན་གྲུབ་འཕྲུལ། །ཡུལ་དྲུག་འདོད་ཡོན་བཀོད་པར་ཤར། །ཞེན་མེད་རང་གྲོལ་ངང་དུ་རོལ། །སྣང་སྲིད་ཀུན་ལ་མངའ་དབང་བསྒྱུར། །འདི་འདྲའི་རྒྱལ་སྲིད་བདག་གིས་ཐོབ། །སྒྱུ་མའི་ཡུལ་ལ་ང་མི་ཆགས། །ཕ་མཁར་བདུད་ཀྱི་བཙོན་ཁང་འདྲ། །ཉོན་མོངས་ཆོས་བརྒྱད་འཕེལ་བའི་རྒྱུ། །ཕ་ཐོབ་འཁོར་བའི་གཏིང་རྡོ་འདྲ། །དུག་ལྔ་རང་གར་སྤྱོད་པའི་གཞི། །ཕ་ཡུལ་ཐར་པའི་ལྕགས་སྒྲོགས་འདྲ། །རང་གཞན་དུས་ཀུན་ཆགས་སྡང་འཕེལ། །དེ་འདྲའི་གྲོང་ཡུལ་ངས་མི་འཛིན། །ཆོས་སྒྲོན་སེམས་ལ་དེ་ལྟར་ཞོག །སྨྲས་པས། མོ་ན་རེ། ཁ་མཁས་མ་ཁྱོད་ཀྱི་ཁ་ང་རང་གིས་མི་ཐུབ། རྟ་པན་དང་འཇིགས་བསམ་གཉིས་ཀྱིས་ཀྱང་མ་ཐུབ་པ་རེད། ང་འདུག་ཆུག །ཁྱོད་ཀྱི་སྐད་ངས་མི་གོ་ཟེར། དེའི་དགོང་མོ་ཡིད་བཞིན་ནོར་བུས་ཆོས་སྒྲོན་ངེད་གཉིས་གཟིམ་གུར་ནང་ལ་ཤོག་གསུངས་ནས་དེ་ཀར་སོང་བས་ཁོང་གིས་ངེད་གཉིས་ བྃ༔ ལ་ཐུད་གདལ་ཆེ་བ་གཅིག་མཉམ་དུ་གནང་། མོ་རང་གིས་མི་རིག་པར་ང་རང་ལ་དངུལ་སྒོར་མོ་གསུམ་དང་མར་གྲོག་ཞིག་གནང་ནས། ང་རང་ལ་སེམས་གསོས་ཀྱི་ཞལ་ཏ་མཛད་ཅིང་སྲུང་མདུད་དང་བྱིན་རྟེན་སོགས་གནང་ནས་རྗེ་དེ་ཉིད་ཀྱིས་བསམ་ཡས་ནས་བཞེས་པའི་གཏེར་བྱོན་གུ་རུའི་སྐུ་དང་མཚོ་རྒྱལ་འདྲ་སྐུ་སོགས་ཀྱིས་སྨོན་ལམ་མཛད་ཅིང་ཐུགས་བརྩེ་བ་ཆེན་པོས་བསྐྱངས། དེ་ནས་རིམ་གྱིས་འོང་སྟེ་ལོ་ཁྱིམས་དེ་ཀའི་ཟླ་བ་བརྒྱད་པའི་ནང་དུ་རྗེའི་གདན་སའི་ཉེ་ཆར་སྐྱ་རང་ནང་དུ་ཐོན་ནས། དབུས་སྒར་པ་རྣམས་ཀྱིས་དགའ་སྟོན་བཞག་ཅིང་། རང་རང་གི་ཡུལ་མི་རྣམས་བསུ་བ་ལ་འོངས་ནས་ཐམས་ཅད་རང་གནས་ལ་བུད་སོང་། རྗེ་དེ་ཉིད་ཀྱང་སྐུ་མཆེད་རྣམས་ཀྱིས་བསུ་བ་མཛད་ནས་གདན་ས་ཟླར་ཚང་དགོན་དུ་ཕེབས་ནས་གདན་ལ་འཁོད་དོ། །ཆོས་སྒྲོན་ཀྱང་གར་སོང་མ་གོ་བས། ང་རང་གཅིག་པུ་ལ་ཡུལ་བ་མེད་པར་ཤུལ་དུ་ལྷག་འདུག་ཚེ་ཡིད་ཅུང་ཟད་སྐྱོ་གནས་གླུ་འདི་བླངས་སོ། མགོན་པད་འབྱུང་ཉིད་དང་དབྱེར་མེད་པའི། །རྒྱལ་སྲས་དྲི་མེད་འོད་ཟེར་ལ། །བདག་གསོལ་བ་འདེབས་སོ་ཐུགས་རྗེས་བཟུངས། །མི་རྟག་སྒྱུ་མའི་གྲོང་ཁྱེར་འདིར། །བསམ་ཞིང་བསམས་ནས་སྐྱོ་བ་འཕེལ། །དབྱར་ གསུམ་སྐྱེས་པའི་མེ་ཏོག་རྣམས། །ད་ལྟ་མི་སྣང་རྩྭ་སྐྱར་སོང་། །ལས་ཀྱིས་བསྡུས་པའི་དབུས་རོགས་རྣམས། །མདང་སུམ་ཡོད་ཀྱང་ད་ལྟ་མེད། །ཚེ་སྟོད་ཕ་མའི་གཅེས་ཕྲུག་ང་། དཔོན་གྱི་སྲས་མོ་སྣང་མཐོ་མ། །ད་ལྟ་ཤུལ་དུ་ཁྱི་བཞིན་འཁྱམས། །ཉེ་རིང་ཀུན་གྱིས་བསྐྱུར་ལ་ལྟོས། །མི་རྟག་སྒྱུ་མའི་ཆོ་འཕྲུལ་ལ། སྙིང་པོ་མེད་པ་ཁོ་ཐག་ཆོད། །སྙིང་ནས་དམ་པའི་ལྷ་ཆོས་ཞིག །ཚེ་འདིར་འགྲུབ་པར་མ་བྱས་ན། །འདི་སྡུག་ཕྱི་སྡུག་བུ་མོ་ང་། །སྐྱབས་གནས་རེ་ས་གཅིག་ཀྱང་མེད། །དེ་ཕྱིར་དམ་པའི་ལྷ་ཆོས་ཞིག །འགྲུབ་ན་འདི་ཕྱི་གཉིས་སྐྱིད་ཡིན། །ཞེས་སྨྲས་ཏེ། རང་སེམས་རང་གིས་གསོས་ཏེ་རྗེའི་གདན་ས་དགོན་ནང་ལ་སོང་བས། དེ་ན་སྟོང་དཔོན་བཟང་མོ་དང་ལྡེ་བཙན་གཉིས་འདུག་པས། ཁོང་གཉིས་ལ་བདག་གིས་ཨ་ནེ་ང་ལ་གནས་ཚང་ཞིག་གཡར་རོགས་དགོས་སྨྲས་ཚེ། ཁོང་གཉིས་ན་རེ། སྔར་ཁྱོད་རྫ་ཆུ་ཁ་ལ་སོང་ནས་ཀུན་གྱིས་འདུག་སྨྲས་ཀྱང་ཁྱོད་མི་འདུག་པ་ཡིན། ད་གནས་འདིར་འདུག་རྒྱུ་ཨེ་ཡིན་ཟེར། བདག་གིས་སྤྲུལ་སྐུ་དྲི་མེད་སྐུ་མདུན་ནས་ཆོས་ཞིག་མ་ཐོབ་བར་དུ་འདི་ཀར་འདུག་རྒྱུ་ཡིན། དེ་ཕན་སྔོན་ལས་ཀྱིས་ཅི་འགྱུར་མི་ཤེས་སྨྲས་པས། ཁོང་གཉིས་ཀྱིས་ངོ་མཚར་ཁྱོད་一 བྃ༔ ཀྱི་སྔར་ནས་ཆོས་བསམ་པ་ཡིན་ཟེར་བ་དེ་བདེན་འདུག །སྡུག་བསྔལ་བག་ཆགས་བཟོད་དཀའ་བ་བླང་ཡང་ད་དུང་ཆོས་རྣམ་དག་ཨེ་འགྲུབ་སྙམ་འདུག་པས། ཁྱོད་ཀྱིས་ཆོས་པ་རབ་ཞིག་འོང་ངེས་རེད་ཟེར་ནས་སེམས་གསོས་བྱེད་ཅིང་ཇ་བླུད། དེའི་སྐབས་ཨ་ཁུ་དར་ལོ་བྱོན་འོང་ནས་ཁྱོད་འདུག་རྒྱུ་ཨེ་ཡིན་གསུངས། བདག་འདུག་རྒྱུའི་རྣམ་གྲངས་ཐམས་ཅད་བཟང་མོས་ཞུས་ཚེ། ཁོང་གི་ཞལ་ནས་འདུག་ན་གནས་ཚང་བླ་བྲང་གི་ཁང་ཤོད་ལ་འདུག་སྤྲུལ་གཅེས་ཀྱིས་གསུང་གི་ཟེར། བདག་གིས་སྤྲུལ་སྐུ་སུས་གསུང་བ་རེད་དྲིས་པས། བཟང་མོས་ཁྱོད་རང་གི་སྤྲུལ་སྐུས་གསུང་ནི་རེད་ཟེར་ནས་རྩེ་མཚར་མང་པོ་བཤད་འདུག་པས། བདག་གིས་བརྟེན་འབྲེལ་ལེགས་ཁྱོད་ཀྱིས་ཟེར་བ་ལྟར་ང་རང་གི་ཚེ་མཇུག་ལ་ཁོང་གི་གྲོགས་རེ་ལ་མི་འགྱུར་ཟེར་ཐག་ཅི་ཆོད་སྨྲས། དེ་ནས་བཟང་མོས་བསྐྱལ་ནས་བླ་བྲང་གི་ཁང་ཤོད་ལ་སོང་ནས་དེ་ཀར་གནས་བཅས་ནས་ཞག་ཁ་ཤས་བསྡད་ཚེ། རྗེ་ཉིད་ཀྱིས་བར་སྐབས་རེ་ལ་གཞན་གྱིས་མི་རིག་པར་མཛད་ནས། ང་རང་ལ་ནས་དང་མར་ཕྱུར་སོགས་གནང་། དེ་སྐབས་བླ་བྲང་གི་ཐུགས་ཁུར་པ་ཨ་སྐྱབས་སྤྲུལ་སྐུ་ཞེས་པ་ཞིག་འདུག་པས། ཁོང་གི་ཞལ་ནས་དབུས་མོ་དེ་ཀར་འདུག་ མི་ཆོག །འདིར་བསྡད་ཚེ་ཨ་སྐྱོང་བཟའ་ཚུར་མི་འོང་ངེས་པ་ཡིན་གསུངས་ནས་ཐུགས་ཁྲོ་བྱེད་འདུག་པས། བདག་གིས་ད་དུང་ང་རང་མི་དཀར་ཡིན་པས་ཨ་སྐྱོང་བཟའ་མི་ཡོང་དོན་མེད། ང་འདུག་ནི་གི་ཅི་གནོད་སྨྲས་ནས་མ་སོང་བས། ཡང་ཉིན་གཅིག་འོད་འབར་གྱིས་བློ་བྱས་ཏེ། ང་རང་ལ་ཁྱོད་དགུན་འདིར་ཆོས་ཞུ་བསམ་ན། བདག་གིས་ཁྱིམ་ཚང་ཞིག་ལ་ཁྱོད་བཞག་ཆས་བྱས་ཡོད། དེ་ཀར་སོང་གཡོག་གྱིས་དང་ཁོང་སང་གིས་ཆོས་ཞུ་དུས་གྲོ་ཁ་སྦྱིན་ཟེར་བས་དེའི་དགའ་འདུག །ཆོས་ཐུན་རན་དུས་ང་རང་གིས་ཁྱོད་བསུ་ཐབས་འོང་ཟེར། བདག་གི་བསམ་པ་ལ་ང་འདི་ཀར་བསྡད་ཀྱང་ཨ་སྐྱོང་བཟས་ནོག་འཁོན་བྱེད་ངེས་རེད། དེ་བས་ཞག་ཁ་ཤས་ལ་འོད་འབར་གྱི་ཁ་ལ་འཇོག་དང་དགའ་སྙམ་ནས། ཁོ་རང་གིས་ཟེར་བ་ལྟར་གདོང་སྐོར་ཨ་བསྟན་སང་ལ་གཡོག་མོར་འདུག་ཆས་བྱས་ཏེ། ཨ་བསྟན་གྱིས་ང་རང་བསུ་བ་ལ་ཐོན་བྱུང་། དེ་དག་གི་དུས་རྗེ་དེ་ཉིད་བཞུགས་མེད་པས། དེའི་ཤུལ་དུང་རང་ལ་ཨ་སྐྱབས་སྤྲུལ་སྐུས་འདུག་ཏུ་མ་སྟེར་ནས་གདོང་སྐར་ཨ་བསྟན་དང་མཉམ་དུ་ཁ་ཕོར་རུམ་དང་ལྷམ་གཉིས་མཆན་དུ་བཅུག་ནས་རྡོའི་ལམ་ཆུང་ཁར་བུད་སོང་བས། རྗེ་དེ་ཉིད་འཇིགས་བསམ་སང་ལ་གཡང་སྒྲུབ་གསུང་ནས་ཇ་ བྃ༔ སྐབས་ལ་བབ་སྟེ། སྒོར་བཞེངས་མཛད་འདུག་པ་མཐོང་བས། བདག་གིས་སེམས་སྡུག་བསྔལ་གྱིས་ནོན་ཅིང་མིག་མཆི་མས་གང་ནས་ལམ་མ་རིག་ནས་ལྷམ་གོན་པའི་ཚུལ་བྱས་ཤིང་ས་ལ་ཅུང་ཟད་བསྡད་པས། ཨ་བསྟན་ན་རེ། ཁྱོད་ལམ་འདི་གྱིས་ལ་བུད་སོང་དང་། ང་སྤྲུལ་སྐུ་སང་ལ་ཕྱག་མོ་ཞིག་འདེབས་དགོས་ཟེར་ནས་རྟ་ལ་ལྕག་གིས་རྒྱབ་ནས་བུད་སོང་། ང་རང་ནི་འགྲོ་སྙིང་འདོད་ཀྱང་འགྲོ་མ་ཕོད། དེ་ནས་ཨ་བསྟན་ཐོན་བྱུང་བས། བདག་གིས་སྤྲུལ་སྐུ་སང་གིས་ཅི་གསུངས་གི་དྲིས་ཚེ། ཁོ་ན་རེ། སྤྲུལ་སྐུས་ཁྱོད་ཀྱི་ཚེགས་མ་ཐུབ་གསུང་ནས་འོད་འབར་ལ་བཀའ་བཀྱོན་བྱེད་འདུག་ཟེར། དེ་ནས་ཨ་བསྟན་སང་ལ་ཐོན་སོང་བས། དེ་སང་མགོ་ལོག་གི་དུད་ཚང་ཞིག་ཡིན་འདུག་པས། ཐོག་མར་སྐད་མི་གོ་ཞིང་བྱ་བ་ཐམས་ཅད་ལ་ཆ་ཞིབ་མེད་པའི་རྐྱེན་གྱིས་དཀའ་ཚེགས་ཆེན་པོ་མྱོང་། དེ་ནས་རིམ་གྱིས་ལས་ཀ་རྣམས་ཀྱང་ཤེས། སྐད་ཀྱང་གོ་བར་གྱུར་ནས་ཟླ་བ་ལྷག་ཙམ་བསྡད་རྗེས་ཆོས་ཐུན་ལ་ཐོན་བྱུང་བས། ཁོང་སང་གི་ཇོ་མོ་ཚུལ་སྒྲོན་དང་ལྷན་དུ་དགོན་ནང་ལ་འོང་བས། དེའི་དུས་སུ་ཨ་སྐྱོང་བཟའ་བླ་བྲང་ནང་དུ་བྱོན་འདུག་པས། ང་རང་རྗེ་དེ་ཉིད་ཀྱི་སྐུ་མདུན་ལ་འགྲོ་མ་སྤོབས་པར། འོད་འབར་ ལ་ངག་གསལ་བསྐུར་ནས་བདག་གིས་ཆོས་ཐུན་ཅི་ཞུ་དགོས་ཞུས་པས། ཁོང་གིས་ཐོག་མར་ཆོས་ཐམས་ཅད་ཀྱི་འབྱུང་ས་སྔོན་འགྲོ་ཡིན་པས་དེ་ཞུས་ལ་འབུམ་ལྔ་སོགས་ལེགས་པར་མཐར་ཕྱིན་པར་གྱིས་དང་། དེ་ནས་རིམ་གྱིས་སྣང་སྦྱང་དང་ཐོད་རྒལ་སོགས་ཐོབ་འོང་གི་གསུངས་འདུག་པས། བདག་གིས་ཀྱང་དེ་ལྟར་བྱས། དེའི་ལོར་ཨ་སྐྱབས་སྤྲུལ་སྐུས་རྩ་རླུང་གསུངས། རྗེ་དེ་ཉིད་ཀྱིས་སྣང་སྦྱང་དང་ཐོད་རྒལ་གཅོད་ཁྲིད་རྣམས་གསུངས། རྗེའི་སྐུ་ནུ་ལྷ་ཆེན་སྟོབས་རྒྱལ་གྱིས་སྔོན་འགྲོ་གསུངས་ཤིང་། སྤྲུལ་སྐུ་རྡོ་རྗེ་དགྲ་འདུལ་གྱིས་ཁྲིད་དཔོན་མཛད་དོ། །དེའི་སྐབས་སུ་སྤྲུལ་སྐུ་ལྷ་སྟོབས་ཀྱིས་ཁྲིད་ཇི་ལྟར་གསུངས་པ་བཞིན་ལྷག་ལུས་མེད་པར་བདག་གིས་སེམས་ལ་ཟིན། ཚུལ་སྒྲོན་ལ་སྤྲུལ་སྐུས་འདི་ལྟར་གསུང་གི་སྨྲས་ནས་རྒྱུག་འཕྲོད་པས། མོ་ན་12 རེ། ཁྱོད་རྒྱ་ཁ་རོང་བཞིའི་མི་བརྒྱུད་ཡིན་པས་བློ་རྩལ་བཟང་འདུག་ཟེར། དེ་ནས་བདག་གིས་སྔ་དྲོ་ཁྲིད་ཞུས། དེ་མིན་གཉིད་ཐུན་ཆུང་ངུ་ཞིག་གི་བར་མ་གཏོགས། དུས་ཀུན་ཕྱག་འཚལ་ནས་ཁ་བ་བབས་པ་དང་ལྷགས་པས་འཁྱག་པ་སོགས་ལ་དཀའ་ཐུབ་བྱས་ཏེ། ཉིན་ཞག་བཅུ་བདུན་གྱིས་ཕྱག་འབུམ་འགྲོ་ངེས་བྱས། དེ་སྐབས་སུ་རྟ་ཤུལ་བན་ཆུང་རྣམས་ཀྱིས་སྔོན་འགྲོ་ཞུ་ བྃ༔ འདུག་པས། དེ་དག་གིས་ང་རང་ལ་ཕྱག་འཚལ་དུས་དབུས་མོ་འདི་འཁྱག་ནི་དང་དྲོ་ནི་སོགས་མི་ཤེས་པ་ནོར་ལྟ་བུ་རེད་ཟེར་ནས། ཁོ་རང་ཚོའི་ལྷམ་ཚང་གི་རྩྭ་དང་། གཞན་དགོན་གསེབ་ཀྱི་རྩྭ་ཉུབ་བསྡུས་ནས་རྒྱབ་ཏུ་ཨེ་འདུག་བལྟ་ཞིང་། ལ་ལས་བདག་གི་མགོ་ཐོག་ནས་རྡོག་པས་མནན། ལ་ལས་སྔུན་ལ་རྩྭ་བླུགས་ནས་ཁྱོད་ཀྱི་ཁ་ལ་འདི་རྒྱོབ་ཟེར། ཡང་ལ་ལས་འདི་ལ་གཙང་བཙོག་མི་འདུག་ཁྱི་དང་འདྲ་ཟེར་ནས་མི་དང་ཁྱི་ལ་སོགས་པའི་མི་གཙང་བ་རྣམས་ཐུར་མས་བཟུང་ནས་བདག་གི་སྔུན་དང་མགོ་ལ་སོགས་པར་བཞག་འདུག །བདག་གིས་ཕྱག་དང་ཁོང་ཁྲོ་གཉིས་འཛོམས་མི་ཉན་བསམ་པ་དང་། མིན་ཀྱང་ངེད་ཅག་ཆོས་གྲོགས་ཡིན་པས་ཁོང་རྣམས་ཅི་བྱས་ཀྱང་ལན་མི་བྱེདསྙམ་ནས་དམ་བཅའ་བཟུང་། ཆོས་ཞུ་ཆེ་བ་རྣམས་ཀྱིས་ནི་དེ་ལྟར་མ་བྱེད་མི་ཟེར་བར་ཐམས་ཅད་མཚར་ནས་ཧ་བགད་བྱེད་འདུག་པས། ཉིན་གཅིག་བཙུན་མ་ཡེ་ཤེས་སྒྲོན་མ་ཞེས་པས་མཐོང་སྟེ། བན་ཆུང་རྣམས་ལ་ཚིག་ངན་བྱེད་ཅིང་ད་ཕན་ཆད་དེ་ལྟར་བྱེད་དུས་སྤྲུལ་སྐུ་རྣམ་པ་ལ་ཞུ་ངེས་ཡིན་ཟེར་བས། ཁོང་རྣམས་ཀྱིས་དེ་ལྟར་མི་བྱེད་པར་ཁས་བླངས། བདག་ལ་མོ་རང་གིས་བར་བར་དུ་ཇ་བླུད་ཅིང་སེམས་གསོས་ཀྱི་གཏམ་བཤད་ དོ། །དེ་ནས་ཀུན་གྱིས་འཕོ་བ་སྦྱངས་འདུག་པས། རྒན་མོ་ཞིག་གིས་ཁྱོད་ཀྱིས་འོད་དཔག་མེད་ཨེ་ཤེས་ཟེར། བདག་གིས་ང་རང་གིས་ཤེས་རྒྱུའི་འོད་དཔག་མེད་དེ་ཁྱོད་ཀྱིས་མི་མཐོང་སྨྲས་པས། མོ་ན་རེ། ཁྱོད་ཀྱིས་ཤེས་ན་ཅི་འདྲ་རེད་སྨོས་དང་ང་རང་གིས་ལོས་ཤེས་ཟེར། ཡང་བདག་གིས་འོད་དཔག་མེད་ཞེས་པ་དེ་ཀ་ཐག་རིང་ཞིག་ལ་དྲི་ཟའི་གྲོང་ཁྱེར་ཆགས་པ་ལྟ་བུ་ཞིག་མིན་