Tibetan
པ་འདྲ། རང་བྱུང་རིག་པའི་ཡེ་ཤེས་ཅི་ཡང་འཆར་བའི་གཞི་དེ་ལ་འོད། རིག་པ་འཁོར་འདས་གཉིས་ལ་ཡོངས་སུ་ཁྱབ་ཅིང་བློས་སྤྱོད་ཡུལ་ལས་འདས་ཤིང་གཏིང་དཔག་དཀའ་བ་མཐའ་ལ་ཐུག་པ་མེད་པ་ལ་དཔག་དང་། ཡོངས་ལ་ཁྱབ་ཅིང་བརྡལ་བའི་རང་བཞིན་ལས་མ་འདས་ཀྱང་དངོས་པོ་མཚན་མ་དང་བྲལ་ཞིང་སྨྲ་བསམ་བརྗོད་ལས་འདས་པས་ན་མེད་དང་། དག་པའི་ཞིང་དང་རིགས་དྲུག་སོ་སོའི་སྣང་བ་ཐམས་ཅད་རང་སྣང་ལས་མེད་པ་མཐོང་ཚེ། འོད་དཔག་མེད་ལ་གསོལ་བ་འདེབས་ཚུལ་འོ་རེད་སྨྲས་པས། མོ་ན་རེ། ངོ་སོ་བསྟོད་ཁྱོད་ཀྱིས་ཆོས་ཡག་པོ་ཤེས་འདུག །སྔར་འོ་སྐོལ་གྱི་བླ་མ་གཏེར་སྟོན་སང་གིས་ཀྱང་འཁོར་འདས་རང་སྣང་ཡིན་གསུངས་པ། བུ་སློབ་ཐམས་ཅད་དང་ངེད་ཀྱི་ཨ་ཁུ་རྣམས་ཀྱིས་བཤད་འདུག་ཀྱང་། བདག་གིས་ཅི་ཡང་ བྃ༔ མི་གོ་ཞིང་མི་ཤེས་པ་ཞིག་ཡིན་པས། བླ་མ་གསུང་མཆོག་རྡོ་རྗེའི་ལྷ་ཁང་ནང་གི་འོད་དཔག་མེད་དེ་སྤྱི་གཙུག་ཏུ་བསྒོམ་ན་ལོས་ཆོག་ཨེ་རེད་ཟེར། བདག་གིས་དེ་ཁྱོད་ཀྱི་མགོ་བོས་ཁྱག་ན་བསྒོམ་ལོས་ཆོག་དང་། ཁྱོད་ཀྱིས་མི་ཁྱག་སྨྲས་ཚེ། མོ་ན་རེ། ཁོ་རང་འདུག་ཁ་ཉན་ན་ཁྱག་ཡིན་ན་ལོས་འགྲོ་དང་། འདུག་ཁ་མི་ཉན་གི །ང་རང་ཁ་ཕར་འཁོར་ན་ཁོ་རང་ཚུར་འཁོར་འདུག །མིན་ཀྱང་གསལ་པོ་ཞིག་སེམས་ལ་མི་ཤར་བས་གསོལ་འདེབས་བྱེད་མི་བསམ་གི་ཟེར། ཡང་བདག་གིས་འོད་དཔག་མེད་མ་གསལ་ན་ཁྱོད་རངགི་བླ་མ་དེ་ཀ་འོད་དཔག་མེད་ཡིན་སྙམ་ནས་གསོལ་བ་ཐོབ་དང་འདྲ་སྨྲས་པས། མོ་རང་གིས་དེ་ལྟར་བྱེད་ཟེར། དེ་ནས་ཆོས་ཐུན་མཐར་ཕྱིན་ནས་ཐམས་ཅད་ཀྱིས་བླ་བྲང་གི་འདུ་ཁང་ནང་དུ་ཚོགས་འཁོར་བྱེད་འདུག་པས། དེ་དག་གི་གྲལ་མཐའ་ཞིག་ཏུང་རང་བསྡད་ནས་ཡི་གེ་མི་ཤེས་ཀྱང་སྨོན་ལམ་རེ་བཏབ་ཅིང་ཡོདཔས། དགེ་བསྐོས་ཀྱིས་ཁྱོད་སྤྲང་མོ་རེད་མར་སོང་འདུ་ཁང་ནང་དུ་མ་འདུག་ཟེར་ནས་ཕྱི་རོལ་ལ་ཕུད་བྱུང་། བདག་གིས་ཡིད་སྐྱོ་ཞིང་འདི་ལྟར་བསམ། ང་ལོ་བཅུ་གཉིས་ནས་ད་བར་གྱི་བྱ་བ་འདི་མཁའ་འགྲོས་ལུང་བསྟན་པ་བཞིན་བྱས་ཏེ་འོངས་ཀྱང་། སྡུག་བསྔལ་བག་ ཆགས་ཁོ་ནས་དུས་འདའ་བ་ལས་ཆོས་རྣམ་དག་ཞིག་མི་འགྲུབ་ཁོ་ཐག་རེད། བདག་གིས་ཕར་ངན་སེམས་མ་བྱས་ཀྱང་ཀུན་གྱིས་དགྲ་ལྟར་མཐོང་ནས་ཆོས་གྲལ་དང་ཚོགས་གྲལ་ཙམ་ལ་ཡང་མི་བཞག་ཅིང་དབྱུག་བརྡུངས་བྱེད་ནས་ཕུད་འདུག །ཐབས་གྲོགས་ཁོང་ནི་གཞན་དབང་དུ་སོང་ནས་བདག་གིས་འབྲེལ་བ་ཙམ་ཡང་མི་ཡོང་ངེས་པ་རེད། ཇི་ལྟར་བྱས་ཀྱང་ལུས་བརྟེན་འདིར་འགྲོ དོན་ཕར་ཞོག །རང་དོན་ཀྱང་མི་འགྲུབ་པར་འདུག་སྙམ་ནས་ངུ་ཞིང་བསྡད་ཡོད་པས། ནམ་མཁའ་ནས་གཟུགས་མེད་པའི་སྒྲ་འདི་ཐོས་སོ། ཧེ་ཧེ། སྔོན་བསོད་ནམས་དཔལ་གྱི་མཐུས་བསྐུལ་ནས། །མ་རྡོ་རྗེ་ཕག་མོས་རྗེས་སུ་བཟུང་། །ལས་རྟེན་འབྲེལ་སད་པའི་གཏེར་ལ་དབང་། །ཁྱོད་མཁའ་འགྲོའི་བཀའ་བཞིན་རང་སྐལ་གྱི། །ཐབས་གྲོགས་དང་རྟེན་འབྲེལ་མ་འཛོལ་དགོས། །བསྟན་དེ་སྲིད་བདུད་ཀྱིས་མ་བསྒྱུར་ན། །ཕན་ཚུན་གཉིས་གཅིག་གྲོགས་གཅིག་གིས་བྱེད། །རྒྱ་བོད་ཀྱི་བདེ་སྐྱིད་གསར་དུ་འབར། །ཆོས་བདག་རྣམས་སྨོན་ལམ་དབང་གིས་ནི། །དུས་དུས་སུ་ཉེ་རིང་ཀུན་ནས་འཛོམས། །གཏེར་གཉིས་ཀྱི་བསྟན་པ་ཉི་གཞོན་བཞིན། །ཤར་དང་ནི་ལྷོ་ནས་དར་བར་ངེས། །གནད་འདི་དང་ལྡན་པར་མགྱུར་ན། །ཨ་ཙར་དང་ནམ་ བྃ༔ སྙིང་ལང་འགྲོ་ཡི། །སྒྱུ་འཕྲུལ་ནི་དཔའ་བོ་ཀློང་གི་མིང་། །ཐབས་དེ་དང་རྟེན་འབྲེལ་དུས་ལ་བབ། །བརྡ་གོ་འམ་བདེ་བའི་འབྱུང་གནས་མ། །ཡུལ་སྒྱུ་མའི་འཕྲུལ་ལ་ཐུགས་མ་ངལ། །སྒོམ་བྱུང་གི་ཤེས་རབ་རྩལ་མ་ཞན། །བློ་རིག་པས་དཔྱོད་ཤེས་མ་བྱས་ན། །ལས་རྟེན་འབྲེལ་གྱི་སྣ་ཁ་སབྟས་བསྒྲིབ། །རྐྱེན་མི་འདོད་སྣ་ཚོགས་ཁྱོད་ལ་འོང་། །ད་འདི་དོན་ཙིཏྟའི་ཀློང་དུ་སྦོས།།ཞེས་ཐོས་པས་བདག་གི་བསམ་པ་ལངས་རྟེན་འབྲེལ་མི་འཛོལ་བའི་ཐབས་ཅི་ལ་ཐོན། ཁོང་ཡིད་བཞིན་ནོར་བུ་ལྟ་བུ་འདི་ནི་རིག་མའི་དབང་ལ་ཤོར་འདུག་སྙམ་ནས་འདི་སྐད་སྨྲས། དབྱིངས་མི་འགྱུར་ནམ་མཁའི་ཀློང་དཀྱིལ་ནས། །གཟུགས་མི་མངོན་སྒྲ་ལས་འབྱུང་འགྱུར་གྱི། །ལུང་བསྟན་པའི་དོན་དེངས་འགྲུབ་དཀའ། །ཁྱོད་དབྱིངས་ལ་འཁྲུལ་པ་མི་མངའ་ཡང་། །བདག་ཉམ་ཐག་བུ་མོའི་དོན་ཕྱིར་དུ། །སྐུ་སྒྱུ་མའི་རོལ་གར་མ་མཛད་ན། །ཁོང་གླང་རྒན་ལྟ་བུའི་བླུན་མོ་ངས། །ལས་ཅི་འགྱུར་ཐབས་མཁས་བྱེད་མི་ཤེས། །བདུད་སབྟའི་དབང་དུ་འགྲོ་སྙིང་འདུག །ཁྱོད་མཁའ་འགྲོའི་ཚོགས་ཀྱིས་གྲོགས་དམ་མཛོད། །ཅེས་སྨྲས་ནས། ཡང་མཁའ་འགྲོའི་ལུང་བསྟན་ལྟར་དོན་ཨེ་འགྲུབ་སྙམ་ནས། རྗེ་དེ་ཉིད་ཀྱི་སྐུ་ མདུན་ལ་སོང་བས་མ་ཐོན་ཏེ་དང་པོའི་དགོས་ཆེད་བཏང་སྙོམས་ལ་སོང་། དེ་ནས་ཡང་དགུན་གྲང་ལྷགས་ཀྱི་སྡུག་བསྔལ་བསམ་ནས་རྩག་པ་ཞིག་གི་དོན་དུ་གཡོག་ལ་འདུག་དགོས་སྙམ་ནས། ལོ་ངོ་བཅུ་བདུན་ལོར་ཡང་སྔར་གྱི་དུད་ཚང་དེ་སང་ལ་སོང་ནས་བསྡད་ཚེ། སྔར་དང་མི་འདྲ་ཞིང་འཁོར་བའི་བྱ་བ་ལས་ཀ་ལ་ང་རང་ཤིན་ཏུ་བཟང་བས་ཁོ་རང་ཚོའི་མནའ་མ་ལ་རློམ་ནས་གཅེས་སྤྲས་བྱེད་འདུག །མ་རྒན་མོས་ང་རང་སྔར་ནས་གཅེས་གཅེས་བྱས་ཏེ་མོ་རང་གི་ཟ་ལྷག་འཐུང་ལྷག་ལ་སོགས་པ་ང་ལ་སྦྱིན་ནས་དུས་ཀུན་སེམས་གསོས་བྱེད་པ་ཡིན་པས། ཉིན་གཅིག་མོ་རང་གིས་ང་ལ།ཁྱོད་ངེད་ཀྱི་མནའ་མ་ལོ་གི་ཟེར་འདུག །ཨ་བསྟན་ཁོ་རང་ནི་སེར་མོ་རེད་དེ་མིན་བུ་གཉིས་ཀ་མི་སྐྱ་རེད་དང་། བརྒྱུད་པ་དུང་ལས་དཀར་སྡིག་པ་ཆེ་ཟེར། བདག་གིས་མོ་རང་ལ་ཨ་མ་ཟེར་བ་ཡིནཔས། ཨ་མ་ང་རང་ཡུལ་ནས་རྒྱུ་མ་རྙེད་པར་མགོ་ལོག་ཕྱོགས་ལ་འོང་བ་མིན། ཁྱད་པར་སྡིག་རྒན་ཞིགགྲོགས་སུ་ཨེ་ལོན་བསམ་པ་མིན་པས། ཁ་ཞེ་མེད་པར་ཆོས་ཞིག་ཨེ་འགྲུབ་བསམ་པ་ཡིན་པས། ད་ལན་ཁྱོད་སང་གི་ཟུར་ལ་འདུག་རྒྱུ་འདི་ང་རང་དགུན་འཁྱག་ཆེ་བས། རྩག་པ་ཞིག་ཨེ་འགྲུབ་སྙམ་པ་ཡིན་མ་གཏོགས། དེ་ཕན་ཆད་གཡོག་ཙམ་ལའང་མི་འདུག་སྨྲས་ བྃ༔ པས། ཁོང་རྣམས་ཡི་ཐང་ཆད་ནས་བདག་གིས་མནའ་མ་མི་འོང་གི་སྙམ་ནས་རེ་བ་ཆད་ཅིང་། ཨ་མ་མིན་པས་མར་ཞབས་ལ་བཅད་ནས་ང་རང་གི་ཁ་ཕོར་ཡང་མ་སྒྱེད་ཡན་ལ་མ་བཞག་ཟེར། དེ་ནས་ནོར་གྱི་རྫིའུ་ལ་སོང་ནས་བྲག་མཐོ་བ་ཞིག་གི་རྩེ་ནས་མར་བྲག་གི་རྩ་བ་ལ་བལྟས་ཚེ། བྲག་ཙ་ན་ཁྱི་རྒན་ཞིག་ཉལ་འདུག་པས། བདག་གིས་ཅི་ཡིན་སྙམ་ནས་ཤིང་ཐུར་ཞིག་ཁོ་རང་གི་སྟེང་དུ་འཕང་བས། ཁྱི་དེ་ཡར་ལང་ནས་ཕར་འགྲོ་ཞོར་ལ་འདི་སྐད་ཟེར། ཀིང་ཀིང་འཁོར་བའི་ཆོས་ལ། །ཀིང་ཀིང་ཟིན་དུས་མེད་དོ། །ཆོས་བྱེད་སེམས་ཀྱིས་བསམ་ཀྱང་། །སང་བྱེད་གནང་བྱེད་ལུས་འདུག། རང་ཡུལ་དུག་སྦྲུལ་ཚང་འདི། །མི་རིང་མྱུར་དུ་སྤངས་ཤིང་། །མི་ཡུལ་སྲིན་བུའི་ཁ་ཆུས། །ལྐོག་ནས་འཆིང་བ་མ་མཐོང་། །དོན་མེད་ཁྱི་རྒན་ང་ཚོ། །དབྱུག་འདེད་བྱེད་དོན་ཅི་ཡོད། །ང་འགྲོ་རྒྱ་གར་ཡུལ་འགྲོ། །ཁྱོད་ནི་མི་གཡོག་བྱེད་སྡོད། །ངམ་ནག་གཤིན་རྗེའི་ཕོ་ཉས། །ནམ་བསུ་ཆ་ཆོད་ཨེ་ཡོད། །མཁའ་འགྲོས་གཏད་པའི་ཟབ་གཏེར། །ཁྱོད་ཀྱིས་འཛིན་སྐྱོང་ཨེ་བྱས། །སྔོན་སྨོན་ལས་ཀྱིས་བསྡུས་པས། །ཐབས་གྲོགས་ལག་ཏུ་ཨེ་རྙེད། །ཟབ་ལམ་གཏུམ་མོའི་ཁྱད་ཆོས། །ཁྱོད་ཀྱིས་ མཐར་ཕྱིན་ཨེ་བྱུང་། །དོན་ཆེན་རྒྱབ་ཏུ་དོར་ནས། །དོན་ཆུང་ལག་ཏུ་མ་ལོན། །རྩ་རླུང་ཚུལ་བཞིན་བསྒོམ་དང་། །འཁྱག་སྐོམ་ནད་ཀྱིས་མི་འཚེ། །ཡུལ་ངན་ཐབས་ཀྱིས་སྤོངས་ལ། །ངེས་མེད་རི་སུལ་འགྲིམ་ན། །དོན་གཉིས་ངང་གིས་འབྱུང་སྲིད། །ཁྱོད་དང་ང་གཉིས་སྔོན་ཆད། །སྐྱེས་འཕྲེང་དུ་མར་འགྲོགས་ཀྱང་། །དམ་གྲིབ་ཟས་གོས་གྲིབ་ཀྱིས། །ང་ངོ་ཁྱོད་ཀྱིས་མ་ཤེས། །ང་ནི་རྒྱ་གར་ཕྱོགས་ཀྱི། །རྣལ་འབྱོར་ཀུ་ཀུ་པ་ཡིན། །སྒྱུ་མའི་བུ་མོ་ཁྱོད་ལ། །སྒྱུ་འཕྲུལ་རོལ་གར་ངོམ་ནས། །བརྡ་དོན་ཚིག་ཏུ་སྨྲས་པས། །རང་བྱུང་ཙིཏྟར་ཨ་ཐམ། །སྒྱུ་འཕྲུལ་སྒྱུ་མར་བཤིགས་ནས། །ཆོས་དབྱིངས་ཀློང་དུ་དེང་འགྲོ། །ཞེས་ཟེར་ནས་འཇའ་ལྟར་ཡལ་སོང་། བདག་གི་བསམ་པ་ལ་ཁོང་གི་ཟེར་བ་ཐམས་ཅད་བདེན་འདུག །ད་ནི་འདི་སང་ལ་འདུག་མི་ཉན་པ་འདྲ་སྙམ་ནས། དེའི་ལོར་རྫ་མུ་ར་སྤྲུལ་སྐུ་མགོ་ལོག་ལ་བྱོན་ཏེ་མཁར་ནང་གོང་མའི་ནང་ལ་སྒར་གཞི་བཞུགས་ནས། མཆོག་དམན་ཀུན་ལ་ཆོས་གསུངས་འདུག་ཟེར་བ་ཐོས་པས། ཨ་བསྟན་ལ་ང་རང་མུ་ར་སྤྲུལ་སྐུའི་སྐུ་མདུན་ལ་ཆོས་འབྲེལ་ཞིག་ཞུ་རུ་འགྲོ་དགོས་སྨྲས་པས། ཁོ་ན་རེ། ཁྱོད་ཁར་སང་དགུན་ཆོས་ཐོབ་པ་ཡིན་པས། ད་ཉིན་གྲངས་ བྃ༔ ཆོས་ཞུ་ལ་འགྲོ་མི་ཁོམས་ཟེར། བདག་གིས་ཨོ་སྙིང་རྗེ་ཆོས་ལན་གཅིག་ཐོབ་པས་ཆེ་རྒྱུ་ཅི་ཡོད། རང་རྒྱུད་དུག་ལྔའི་གྲོང་ཁྱེར་འདི་འཇིག་མ་སོང་བར་དུ་དམ་པའི་ཆོས་བསྒྲུབ་དགོས་པ་ནི་ཁྱོད་ཀྱིས་མི་ཤེས་པ་ཨེ་རེད། ཁྱོད་འདྲའི་འཁོར་མེད་ཆོས་མེད་འདི་ལྟ་བུ་བདག་གིས་མི་བྱེད། ཡང་ན་ཁྱིམ་ཐབ་བཟུང་ནས་འཁོར་བ་ཡོད་པ་ཞིག་དང་། མིན་ན་ཡང་དག་པ་དམ་པའི་ཆོས་ཞིག་ཨེ་འགྲུབ་བལྟ་ངེས་བྱེད་རྒྱུ་ཡིན་སྨྲས་ནས། ང་རང་གིས་སྔར་གྱི་སྤྲང་དབྱུག་ལག་ཏུ་བཟུང་སྤྲང་ཁུག་རྒྱབ་ལ་ཁུར་ཏེ་འགྲོ་ཆས་བྱས་ཚེ། ཁོ་ན་རེ། ཁྱོད་ངེས་པར་ཁ་ལ་མ་ཉན་ནས་འགྲོ་སྙམ་ན། རྟ་གོང་ལ་སོང་མ་གཏོགས་རྡོ་ཆུས་ཁྱེར་འགྲོ། ཆོས་སྒར་གྱི་ཐོག་ལ་འོ་སྐོལ་གྱི་ཇོ་མོ་ཚུལ་སྒྲོན་ཡོད་པས། དེའི་སར་འདུག་ལ་རྟ་བོར་མི་འགྲོ་བ་གྱིས་ཟེར་བས། བདག་གིས་ཀྱང་ཁོ་རང་གིས་ངག་ལྟར་ཚུལ་སྒྲོན་གྱི་སར་སོང་བས། མོ་ན་རེ། ད་ལན་ཁྱོད་ཀྱིས་སྤྲུལ་སྐུ་མུ་ར་སང་གི་མདུན་ནས་སྐྲ་བཅད་སྡོམ་པ་ཞུ་དགོས། དེ་མིན་ངེད་སང་གི་ཟུར་ལ་ཁྱོད་མི་འདུག་ངེས་པ་རེད་ཟེར། བདག་གི་བསམ་པ་ལ་བསོད་བཀྲ་སང་ཟེར་བའི་དུད་ཚང་ཕྱུག་ཆེན་ཞིག་ཡོད་པས། དེ་སང་གི་ང་རང་མར་ཞབས་ལ་མི་བཅད་ཅིང་། དུས་ཀུན་བར་བར་ལ་འབྲས་ དང་གྲོ་མ་སོགས་ཤ་ཁྲག་མེད་པ་འི་ཟས་རེ་ཡོད་དུས་ང་རང་གི་སྐལ་བ་མ་ཆད་ཅིང་སྟེར་འདུག་པས། ཚུལ་སྒྲོན་གྱིས་བདག་བསོད་བཀྲ་སང་ལ་འདུག་གམ་སྙམ་ནས་ཕྲག་དོག་བྱེད་པ་འདྲ་བསམ་སྟེ། བདག་གིས་འདི་སྐད་སྨྲས། ངས་སྐྲ་བཅད་སྡོམ་ཞུ་མ་བྱས་རུང་ཁྱེད་ཚང་ལ་མི་གནོད། ཁྱོད་ཇོ་མོ་ཡང་དག་པ་རྣམས་ཀྱི་བྱ་སྤྱོད་ལ་བསམ་ནའང་། བདག་ལྟ་བུའི་ན་ཆུང་རྒྱུ་མེད་ཀྱིས་ཇོ་མགོ་མི་ཐོན་ངེས་པ་ཡིན་སྨྲས་ཚེ། མོ་རང་ཚིག་པ་ཟོས་ནས་ཡར་ལང་སྟེང་རང་གི་ཕྲག་ནས་བཟུང་ཞིང་མུ་ར་སང་གི་མདུན་ལ་ཁྲིད་ནས། ལགས་སྤྲུལ་སྐུ་སང་ཁྱོད་ཀྱིས་འདིའི་སྐྲ་ཕུད་བཞེས་རོགས་མཛོད། མོ་རང་དབུས་འཁྱར་ཞིག་རེད་དང་། སེམས་དཀར་བྱས་ཀྱང་སུའི་ཁ་ལ་མི་ཉན་ཅིང་འདིས་ཅི་བྱེད་མི་གོ་གི་ལགས་ཟེར། མདུན་གཡོག་གི་ཞལ་ནས་ཅུང་ཟད་ཞིག་སྡོད་དང་། གསོལ་བཅའ་འདི་མཛད་རྗེས་གསུང་རོགས་ཞུ་ཟེར། བླ་མའི་ཞལ་ནས། ཤ་ཚ་མི་ཁྱོད་གནམ་ལྟོ་ཡངས་པ། ས་ཁ་ཆེ་བའི་མི་ཡིན་ནི་འདྲ་འདྲ་གསུངས་ནས། གསོལ་བའི་ཤ་ཞིག་འདུག་པ་དེའི་ནང་ནས་ཤ་ལྟ་བུ་དུམ་ཞིག་བདག་ལ་གནང་བས། ཚུལ་སྒྲོན་གྱིས་དབུས་མོས་ཤ་མི་ཟ་གི་ལགས་ཞུས་ཚེ། ཡང་ཐུད་ཞིག་ནང་བས་ང་རང་གི་དངོས་གྲུབ་ཡིན་སྙམ་ནས། མོ་རང་ལ་ བྃ༔ ཅུང་ཟད་ཀྱང་མ་བྱིན་ཏེ། རང་གཅིག་པུས་ཟོས་ནས་རྗེས་ཤེས་བླ་མའི་ཐུགས་དང་རང་སེམས་གཉིས་མེད་དུ་བསྲེས་ནས་ཅུང་ཟད་བསྡད་ཚེ། མདུན་གཡོག་གི་ཞལ་ནས་མཚར་རོ་བུ་མོ་འདི་པའི་མིག་ནི་བསམ་གཏན་པ་ཞིག་དང་འདྲ་འདུག །ཁྱོད་ལ་ད་སྔ་བླ་མ་ཅི་འདྲ་ཞིག་ཡོད་ཟེར། བདག་གིས་རང་གི་རིག་པ་ནམ་མཁར་མཚན་གཞི་བཞག་ནས། ནམ་མཁའ་ལ་མཛུབ་མོ་གཏད་པས། ཁོ་ན་རེ། མུ་སྟེགས་པ་ཞིག་ཡིན་པར་འདུག །བླ་མ་ཉི་མ་ཡིན་ཟེར་སྨྲས། ཡང་ཁོང་གིས་ཁྱོད་ཀྱི་ཆོས་ཨེ་ཤེས་ཟེར། ཡང་བདག་གིས་སྣ་ཚོགས་ཆོས་ཁམས་རྒྱ་མཚོ་སྒོ་ལྔའི་འདོད་ཡོན་རང་བྱུང་དུ་ཤེས་པའི་བརྡ་རུ། མིག་སྣ་རྣ་བ་ལྕེ་ལུས་རྣམས་ལ་ལག་པ་གིས་རེག་པས། ཁོ་རང་གིས་དོན་མ་གོ་ནས་ཚུལ་སྒྲོན་ལ་ཅི་རེད་ཟེར། མོས་ཁང་སང་དགུན་ཆོས་ཞིག་ཞུས་པ་རེད། དེའི་དོན་ཟེར་བ་ཨེ་ཡིན་ན་དེ་མིན་མི་གོ་གི་ལགས་ཟེར་ཏེ་མོ་རང་མ་ཁོམས་ནས་བུད་སོང་། ང་རང་བསྡད་ནས་བླ་མས་ཇ་གསོལ་རྗེས་འདི་སྐད་ཞུས། ལགས་བདག་ནི་ཆུང་མོ་ལོ་བཅོ་ལྔ་ནས་ལྷག་བསམ་རྣམ་དག་གིས་ཆོས་ཞིག་ཨེ་འགྲུབ་བསམ་པ་ཡིན་པས། དེ་ལམ་དུ་འགྲོ་བ་ལ་ཐུགས་གཏད་རྒྱ་མ་ཆུང་། ང་དོན་ཆེན་རེ་ཡོད་པ་ཞིག་ཡིན་པས་སྐྲ་བཅད་མ་ བཅད་མེད་པ་འདྲ་ལགས། ཚུལ་སྒྲོན་མོ་རང་གི་བསམ་པ་རེད། བདག་གི་ལུས་འདིས་རང་ལ་གཞན་དབང་དྲག་པོས་མ་བསྒྱུར་ཚེ། རང་བསམ་གྱིས་དོན་མེད་ཀྱི་བླ་སེར། ཁྱིམ་བདག་མི་སྐྱ་ལ་སོགས་པར་མི་འགྲོགས་ཤིང་། དུས་ཀུན་རང་གཞན་གྱི་དོན་རེ་ཨེ་འགྲུབ་བལྟ་ཞིང་ཟས་གོས་ནོར་ལ་མི་ཆགས་པར་ལྷ་ཆོས་རྣམ་དག་ཞིག་ཨེ་འགྲུབ་བྱེད་ལགས། གལ་ཏེ་ལུས་དམན་རྐྱེན་གྱིས་བསམ་པ་ལམ་དུ་མ་སོང་ཡང་ཁྱོད་དང་ནི་འགལ་བ་མིན་པས་དེ་ལུགས་དགོངས་མཛོད་ཞུས་ཚེ། བླ་མས་ཐུགས་བརྩེ་བའི་ཚུལ་གྱིས་ཨོ་རེད་ཁྱོད་ཀྱིས་ཟས་གོས་ནོར་ལ་མ་ཆགས་པར་ཆོས་ཡང་དག་ཞིག་ཨེ་འགྲུབ་བསམ་པས་ཆོས་འགྲུབ་ནི་འདྲ་འདྲ། འཁོར་བ་ལ་ཞེན་ཆགས་ཆེ་ན་ཆོས་མི་འགྲུབ་ནི་འདྲ་འདྲ། དེང་སང་ཆོས་པ་རྣམས་ཀྱིས་འཁོར་བ་བློས་མ་ཐོང་བར་དབྱར་མར་བསོད། དགུན་ནས་སྤྲང་དང་། དུས་རྒྱུན་དུ་གཤིན་པོའི་རོ་དུམ་ཁུར་ནི་འདྲ་འདྲ་གསུངས་ཏེ། དེ་ལ་སོགས་པའི་ཆོས་བཤད་དུ་མ་མཛད་ཅིང་གསེར་སྐུ་ཞིག་བདག་གི་མགོ་ལ་བཞག་ནས་སྨོན་ལམ་བཏབ། དཔལ་སྤྲུལ་རིན་པོ་ཆེའི་དབུ་ཐོད་ཕྱེ་མའི་རིལ་བུ་བདུན་ཆ་གཅིག་དང་། གཞན་ཡང་ཆོས་སྨན་རིལ་བུ་ཤུགས་སྔགས་ཕྱག་མདུད་སོགས་གནང་ནས་ཞལ་ཏ་མཛད་ བྃ༔ དོ། །དེ་ནས་བདག་ཕྱིར་འོངས་ཏེ་ཚུལ་སྒྲོན་ལ་མི་སྐྱ་དང་དོན་མེད་ཀྱི་བླ་སེར་རྣམས་ལ་བདག་གིས་ལུས་འབྲེལ་མི་བྱེད་པར་ཁས་བླང་ཡོད། དེ་མིན་ང་རང་གིས་ཇོ་མོ་མ བྱེད་སྨྲས། མོ་ན་རེ། ཨ་ཙི་ཁྱོད་ཀྱི་ངོ་ལ་འབྲོང་ལྤགས་གྱོན་ཡོད་པ་འདྲ། བླ་ཆེན་ཁོང་ལྟ་བུ་ལ་འདི་འདྲའི་ཚིག་བཙོག་ཅི་ལ་ཞུ་ཕོད་ཟེར་ཞིང་འགྲམ་ཤ་འཐོན་འདུགདགགིས་རང་ཐུབ་ཀྱི་བྱ་བ་ཁོང་ལ་ཞུས་པས་མི་ཕོད་པ་མི་འདུག །དེ་བས་བསླབ་སྡོམ་ལྐོག་ལ་ཉམས་ན་དེ་མི་ཕོད་སྨྲས་ཚེ། མོ་རང་གིས་ཅི་ཡང་མི་ཟེར། དེ་སྐབས་སུ་མགར་ར་གཏེར་སྟོན་བདུད་འདུལ་དབང་ཕྱུག་གླིང་པ་ཞེས་པ་དེས་སྟོང་དཔོན་བླ་མ་སྨོན་ལམ་རྒྱ་མཚོ་ལ་གསུང་ཤོག་བསྐུར་ནས། བདག་ཁོང་གི་ཐབས་གྲོགས་སུ་མཁའ་འགྲོའི་ལུང་བསྟན་ཡོད་ཚུལ་ང་རང་གི་ཁ་བྱང་དང་མཚུངས་པར་འདུག་པས། དེ་ཀར་ཟླ་བ་བཅུ་གཅིག་པའི་ནང་དུ་འགྲོ་ཆས་བྱས་ཚེ། རྟེན་འབྲེལ་མི་ལེགས་པའི་རྟག་མཚན་བྱུང་ཡང་བཏང་སྙོམས་ལ་བཞག །དེ་ནས་ཕྱིར་འོངས་ཏེ་གཡོག་ཁ་གང་རྗེས་དེ་སང་གིས་རྩག་པ་བདེ་འབྲིང་ཞིག་ལས་མ་བྱིན། དེ་དུས་མགར་ར་གཏེར་སྟོན་གྱི་ཡུམ་ཡག་ཤུལ་བཟའ་ཡིན་འདུག་པས། དེས་ང་རང་ལ་ཚིག་བསྐུར་ནས་ཁྱོད་ངེད་ཀྱི་ཟུར་ལ་འོང་དགོས་མེད། འོང་ཚེ་དབུས་མོ་ལ་འདི་བྱས་འདུག་ཟེར་བའི་ཁ་རྟགས་ལག་རྟགས་ཞིག་བྱེད་ངེས་པ་ཡིན་ཟེར་བ་ཐོས་པས། ཨ་བསྟན་གྱིས་དེ་ཅི་ཟེར་བ་རེད་ཟེར། བདག་གིས་བླ་མའི་གསུང་ཤོག་ཐོན་པ་གསང་ཐབས་བྱས་ཏེ། ངསྨོན་ལམ་རྒྱ་མཚོ་ཁོང་དང་མཉམ་དུ་མགར་ར་གཏེར་སྟོན་གྱི་མདུན་ལ་ཆོས་ཞུར་འགྲོ་ཟེར་བ་དེ་མོ་རང་གིས་གོ་བ་ཨེ་རེད་སྨྲས་པས། ཨ་བསྟན་གྱིས་ཅི་ཡིན་མི་ཤེས་ཡ། མདོར་རྩ་ཁྱོད་རང་འགྲོ་ཉན་པ་མེད་པ་འདྲ་ཟེར། བདགགིས་ཁོང་གིས་ཟེར་རྒྱུ་འདི་བདེན་པར་འདུག་ཀྱང་སྨོན་ལམ་ཁོ་རང་ལ་ཐུག་ན་ད་དུང་གསལ་པོ་ཞིག་གོ་བར་འདུག་སྙམ་ནས། ཨ་བསྟན་སང་གི་གཡོག་ཁ་གང་སྟེ་རང་རེ་རྣམས་བཟང་དབྱེ་བྱས། ཁོང་སང་གིས་ཀྱང་ད་ཕན་ཆད་ཁྱོད་ཀྱི་ཡུལ་ས་ངེད་སང་གིས་བྱེད་དགོས་ཟེར་ནས་ཐམས་ཅད་བརྩེ་བརྩེ་བྱེད་ཅིང་ང་རང་ལམ་པ་བྱས་སོ། དེ་ནས་རང་ལོ་བཅོ་བརྒྱད་ལོར་སྐྱིད་ལུང་སྤྲུལ་སྐུ་ཞེས་པ་ང་རང་དང་ཕ་ཡུལ་གཅིག་པ་ཞིག་ཡོད་པས། དེའི་སྒར་ཐོག་ལ་སོང་ནས་ཁོང་ལ་བདག་གིས་ལོ་རྒྱུས་ཐམས་ཅད་ཞུས་ཚེ། ཁོང་གི་ཞལ་ནས་སྨོན་ལམ་རྒྱ་མཚོ་བུད་སོང་ཚར་བས། ང་རང་གིས་མགར་ར་གཏེར་སྟོན་ལ་སྐད་བསྐུར་བ་རགས་ཡོང་། དེའི་སྟ་གོན་ངས་བྱེད་ནས་ཁྱོད་ལ་ངེས་པར་ཐག་ཆོད་འོང་གསུངས་ཏེ། བྃ༔ ཁོང་གི་གྲྭ་པ་གཉིས་རོང་ཕྱོགས་ནས་སློང་དུ་འགྲོ་འདུག་པས། དེ་ལ་ཁོང་གིས་གསུང་ཆ་ཞིབ་མོར་བསྐུར་མཛད་པས། ཡག་བཟས་སྔར་ལས་ལྷག་པའི་ཚིག་ངན་དུ་མ ཐོན་བྱུང་བས། སྤྲུལ་སྐུའི་ཞལ་ནས། ད་ཡག་བཟའ་ལ་བླ་མ་མཁོ་ནི་མ་རེད། མོ་རང་གི་མིག་གིས་མཐོང་ས་འདི་ཀར་བླ་མ་འདས་སོང་ན་བསམ་རྒྱུ་མེད་ཟེར་འདུག་པས། ད་ཇི་ལྟར་བྱས་ཀྱང་བླ་མའི་སྐུ་ཚེལ་བར་ཆད་བྱེད་ངེས་པ་རེད་གསུངས་ནས་བདག་འགྲོ་མི་ཉན་པར་ཐུགས་ཐག་བཅད་འདུག་པས། བདག་གི་བསམ་པ་ལ་རྟེན་འབྲེལ་གྱི་སྣ་ཁ་ལོག་པས། སྔོན་ཐོག་མར་གྱི་རྟེན་འབྲེལ་གཞན་དབང་ལ་སོང་བའི་རྐྱེན་གྱིས་ད་ལན་ཡང་རྟེན་འབྲེལ་མི་ལྡན་ངེས་པ་རེད་སྙམ་ནས། དགོན་པའི་ཟུར་ལ་ཚ་ཁང་ཞིག་ཡོད་པས་དེའི་མདུན་དུ་སོང་ནས་གཏུམ་མོའི་འོད་གསལ་ཉམས་ལེན་བྱས་ཏེ་བསྡད་ཡོད་ཚེ། སྣང་བ་གནས་འགྱུར་ནས་ཐིག་ལེ་ཆེ་བ་ཞིག་གི་ནང་དུ་ཡུལ་རྒྱ་ཆེ་ལ་འཁོད་སྙོམས་པ། མེ་ཏོག་དང་ཆུ་མཚོ་ཡིད་དུ་འོང་བའི་མུ་ཁྱུད་དུ་འཁོར་བ། དེའི་དབུས་འཇའ་ཡི་གུར་ཁང་རྒྱ་ཆེ་ལ་ཁྱོན་ཡངས་པའི་ནང་ན་མཆོད་རྫས་དུ་མ་དང་། ཁྱད་པར་སྐུ་གསུམ་མཁའ་འགྲོའི་འདུ་ཚོགས་རེད་ཟེར་བའི་ཚོགས་འཁོར་ཞིག་བཤམས་ནས། དེ་ལ་དཔའ་བོ་དང་ དཔའ་མོ་མཁའ་འགྲོའི་འདུ་ཚོགས་ལྷ་མིའི་ཁྲོམ་འཚོགས་པ་ལྟར་འདུག་པས། བདག་གིས་ཅི་ཡིན་སྙམ་ནས་གུར་ཁང་གི་སྒོའི་བར་ལ་སོང་ནས་བལྟས་ཚེ། མཁའ་འགྲོ་ཡེ་ཤེས་མཚོ་རྒྱལ་གྱིས་ཚོགས་དཔོན་མཛད་ནས་བཀའ་འདུས་ཆོས་ཀྱི་རྒྱ་མཚོའི་དཀྱིལ་འཁོར་ཞལ་ཕྱེས་འདུག་པས། བདག་ནི་ཤིན་ཏུ་དགའ་ནས་ཕྱག་འཚལ་ཞིང་འདི་སྐད་གསོལ། ན་མོ། ཆོས་ཉིད་མཁའ་དབྱིངས་དག་པའི་ཀློང་དཀྱིལ་ནས། །ཐབས་མཁས་ཐུགས་རྗེས་འགྲོ་བའི་དོན་མཛད་པ། །རྒྱལ་ཀུན་བསྐྱེད་ཡུམ་མཁའ་འགྲོའི་ལྷ་ཚོགས་ལ། །བདག་གིས་སྒོ་གསུམ་གུས་པས་ཕྱག་འཚལ་ལོ། །ཚེ་སྔོན་སྨོན་ལམ་བཟང་པོའི་རྟེན་འབྲེལ་མཐུས། །དེ་རིང་མ་དང་མཁའ་འགྲོའི་ཚོགས་གྲལ་མཇལ། །ཇི་སྲིད་འཁོར་བའི་རྒྱ་མཚོ་མ་སྟོང་བར། །དེ་སྲིད་བདག་ཅག་འགྲོ་ཀུན་རྗེས་བཟུང་ནས། །