Tibetan
མཁའ་འགྲོ་མཚོ་རྒྱལ་མ་དང་དབྱེར་མེད་ཤོག །ཅེས་སྨོན་ལམ་བཏབ་མཐར། མཁའ་འགྲོ་ཀུན་གསལ་མ་དང་། བདེ་བའི་གོ་ཆ་ཡིན་སྐད་པའི་མཁའ་འགྲོ་གཉིས་བྱོན་ནས་འདི་སྐད་གསུངས། ཨེ་མ་སྐལ་བཟང་ལས་འཕྲོ་ཅན། །བདེ་བདེ་མཁའ་འགྲོའི་གྲོང་ཁྱེར་ན། །གྲོགས་ཁྱོད་འོང་བ་ངོ་མཚར་ཆེ། །རང་སྐལ་ཆོས་ཀྱི་གསང་མཛད་ཀྱིས། །སྨོན་ལམ་ ༔ དུས་ལ་བབ་པ་ཡིན། །ལས་འཕྲོ་ལྡན་ནོ་རིགས་ལྡན་མ། །ཞེས་ཟེར་ནས་ཁོང་རྣམ་གཉིས་ཀྱིས་བདག་ལ་ཁྲུས་བྱས་གོས་བརྗེ་བ་སོགས་མཛད་ནས་གུར་ཁང་ནང་དུ་སོང་བས། ཨ་མ་མཚོ་རྒྱལ་གྱིས་ཞལ་འཛུམ་པ་དང་བཅས་འདི་སྐད་གསུངས། རིགས་ལྡན་མ་ཁྱོད་ཀྱིས་འགྲོ་དོན་ཅི་འདྲ་བྱུང་། འཇིག་རྟེན་དུ་དཀའ་ཚེགས་ཆེན་པོ་ཨེ་བྱུང་གི །སྒྱུ་མའི་གནས་ཡུལ་ལ་བདག་གིས་མ་བྱས་སམ་གསུངས་ཚེ། ང་རང་ཡུལ་ཕྱོགས་ནས་འོང་དུས་སྡུག་བསྔལ་ཚོར་བ་དང་། མདོ་ཁམས་ལ་ཐོན་ཕྱིན་ཆད་སྡུག་བསྔལ་མྱོང་བ་ལ་བསམ་ནས་རྗེ་མོའི་ཞབས་ལ་བཏུད་དེ་འདི་སྐད་གསོལ། ཀྱེེ་མ་དགོངས་མཛོད་ཡེ་ཤེས་སྤྱན་ལྡན་མ། །ལུས་དམན་བདག་གིས་གནས་ཚུལ་ཟུར་ཙམ་ཞུ། །ལོ་ངོ་བརྒྱད་ནས་མཁའ་འགྲོས་རྗེས་སུ་བཟུང་། ། དངོས་ཉམས་རྨི་ལམ་ཀུན་ལ་དབུགས་དབྱུང་མཛད། །བཅུ་གཉིས་དུས་སུ་གྲུབ་པའི་རིག་འཛིན་རྗེ། །ས་ར་ཧ་ཡིས་རྗེས་བཟུང་སྨིན་གྲོལ་བསྩལ། །བཅུ་གསུམ་ལོན་དུས་ཌཱཀྐིའི་སྙན་རྒྱུད་ཀྱི། །ཟབ་གཏེར་ཁ་བྱང་འཁྲུལ་མེད་ལག་ཏུ་སོན། །བཅུ་བཞི་ནས་བཟུང་གཞན་དོན་ཁོ་ནར་འབད། །བཅོ་ལྔར་མཁའ་འགྲོའི་བཀའ་བཞིན་ཤར་གྱི་ཕྱོགས། །མདོ་ཁམས་སྲིན་པོའི་གླིང་ འདྲའི་ཡུལ་དུ་འོང་། །མ་ཤི་གསོན་ལ་དམྱལ་བའི་སྡུག་བསྔལ་མྱོང་། །སྔོན་སྨོན་ལས་འཕྲོ་དུས་སུ་འཛོམས་སྲིད་ཀྱང་། །གློ་བུར་སབྟའི་དབང་དུ་ཡང་ཡང་སོང་། །དགེ་མེད་བདུད་ཀྱི་ཡུལ་དུ་བདག་འདྲ་བས། །འགྲོ་དོན་ཕར་ཞོག་ཉམས་པའི་གྲིབ་རྐྱེན་གྱིས། །རང་དོན་ཁྲིམས་གཙང་འོང་བ་ཉིན་སྐར་དཔེ། །ཟབ་གཏེར་གྲོགས་དང་ཆོས་བདག་སྐྱེས་བུ་རྣམས། །གཞན་རྐྱེན་གནང་བཀག་ཚུལ་འཆོས་ལ་ཤོར་ནས། །སྐྱེ་དམན་བདག་ནི་སྤངས་བྱའི་གནས་སུ་མཐོང་། །དོན་གཉིས་མི་འབྱུང་ཌཱཀྐིའི་བཀའ་མི་འགྲུབ། །ལས་ངན་བདག་འདྲ་མཐོང་ཐོས་མི་འདུག་པས། །ད་ནི་འཇིག་རྟེན་ཁམས་སུ་བདག་མི་འགྲོ། །ཞེས་ངུ་ཞིང་ཞུས་པས། ཌཱཀྐིའི་ཞལ་ནས། ཉོན་དང་སྐལ་བཟང་ལས་འཕྲོ་ཅན། །སྒྱུ་མའི་ཡུལ་ལ་ཐུགས་མ་སྐྱོ། །འགྱུར་མེད་རིག་པའི་བཙན་ས་བཟུངས། །བདེ་སྡུག་རྨི་ལམ་གྲོང་ཁྱེར་འདྲ། །རིག་སྟོང་ལམ་ཁྱེར་རྩལ་མ་ཞན། །སྒྱུ་ལུས་སྟོང་རའི་ད་ལ་རུ། །བདེ་སྟོང་བོགས་འདོན་ཕྱག་རྒྱ་བསྟེན། །པདྨའི་སྨོན་ལམ་མཐུ་བཙན་པས། །གྲོགས་དང་ཆོས་འཛིན་རིམ་གྱིས་འཕྲད། །ལས་དང་སྨོན་ལམ་དུས་འཛོམས་པའི། །གདུལ་བྱའི་ཞིང་ལྔ་ཐབས་ཀྱིས་འདུལ། །རིགས་ལྡན་དཔའ་བོ་ཐབས་ཀྱི་ བྃ༔ གྲོགས། །མན་ངག་སྙིང་འཛིན་ལྕགས་ཀྱུས་བཀུག །ཆོས་བརྒྱད་ཆོས་ཀྱི་འགལ་ཟླ་དེ། །བདག་མེད་ཤེས་རབ་རལ་གྲིས་གཅོད། །གཉིས་འཛིན་བདུད་ཀྱི་སོ་པ་དེ། །གཉིས་མེད་ཆོས་སྐུའི་དགོངས་རྒྱས་ཐོབས། །དགའ་སྡུག་སེམས་ཀྱི་འགྱུ་འཕྲོ་ཀུན། །གསལ་སྟོང་རིག་པར་རྟོགས་པར་མཛད། །མཁའ་འགྲོའི་ཕོ་ཉ་ལས་འཕྲོ་ཅན། །མི་འདོད་བཞིན་དུ་འགྲོ་ལ་ཕན། །ནོར་བུ་རིན་ཆེན་ཇི་བཞིན་དུ། །ངན་སྨད་ལོག་ལྟས་གོས་མི་སྲིད། །སྲ་བརྟན་ས་ལས་ཆུ་བརྡོལ་བཞིན། །དོན་གཉིས་མཛད་པ་ངང་གིས་འགྲུབ། །ཁྱོད་ནི་ད་དུང་འཇིག་རྟེན་དུ། །གདུལ་བྱའི་ལྷག་མ་མ་རྫོགས་པས། །ཐུགས་བསྐྱེད་དམ་བཅའ་དཔུང་བསྐྱེད་ལ། །བདུད་སྲིན་མདོ་ཁམས་མ་ངེས་ཕྱོགས། །གང་འདུལ་ཐབས་ཀྱིས་བདེ་ལ་བཀོད། །ཉི་ཤུ་བར་ལ་སྦས་ཚུལ་ཟུང་། །ཐ་མལ་སྐྱེས་བུའི་བདེ་བ་སྤོང་། །གཟུགས་ཅན་མི་དང་གཟུགས་མེད་ལ། །རྟེན་འབྲེལ་རྫས་ཀྱི་འགྲོ་དོན་མཛད། །ཟབ་གཏེར་བཀའ་རྒྱ་མ་རལ་དགོས། །དེ་ཕན་རྟེན་འབྲེལ་གནད་ལྡན་ན། །དོན་གཉིས་ནོར་བུ་ལོན་པར་ངེས། །ཞེས་གསུངས་ནས་ཆང་ཀ་པཱ་ལ་གང་བདག་ལ་གནང་ནས། འདི་ལྷག་མེད་དུ་འཐུང་དང་མཁའ་འགྲོའི་ དངོས་གྲུབ་ཀྱི་རྫས་ཡིན་པས། ཁྱོད་ཀྱིས་ཤེས་བྱའི་ཆོས་ཐམས་ཅད་རྩོལ་མེད་དུ་ཤེས་པར་ངེས་སོ་གསུངས། བདག་གིས་ཀྱང་བདུད་རྩི་ལྷག་ལུས་མེད་པར་འཐུང་ནས། ཡང་རྗེ་མོ་ལ་བདག གིས་ཁྱེད་ཉིན་མཚན་དུས་དྲུག་ལ་མཇལ་བའི་ཐབས་ལ་ཅི་དགོས་ཞུ་སྙམ་ཚེ་གཞན་རྐྱེན་གྱིས་ཉམས་ལས་སད་དོ། །དེ་ནས་རང་ལོ་བཅུ་དགུའི་དུས་སུ་མགར་ར་གཏེར་ཆེན་སང་གི་གསུང་ཤོག་ལ་འུ་ཅག་གཉིས་ཀྱི་རྟེན་འབྲེལ་ལ་གཞན་དབང་དུ་སོང་བས་བྱ་ཐབས་བྲལ་བ་ཡིནཔས། འོན་ཀྱང་བླ་མ་གཏེར་སྟོན་གྱི་ཐུགས་སྲས་དྲི་མེད་འོད་ཟེར་ཁྱོད་གཉིས་ལ་སྨོན་ལམ་ཟབ་འབྲེལ་འདུག་པས། དྲི་མེད་ཁོང་ཡང་ངའི་སར་བྱོན་འོང་བར་ཡོད་པས། ཁྱོད་ཀྱང་མ་འགྱངས་བར་མྱུར་དུ་བདག་གི་སར་ཐོན་ཐབས་གྱིས་དང་། འུ་ཅག་ཀུན་ལ་དོན་ཆེན་ཡོད་ངེས་ཡིན། བདག་གི་ཟབ་གཏེར་གྱི་གཏེར་མཇུག་ཁྱོད་གཉིས་ལ་དབང་བ་ཡིན་པས། འཛིན་སྐྱོང་གི་བསྟན་པ་ཁྱོད་གཉིས་ལ་གཏད་དགོས་པ་ཡིན་སོགས་གསུངས་འདུག་པས། སྐྱིད་སྤྲུལ་གྱི་ཞལ་ནས་ཨ་ཁ་ཁ་བླ་མས་ཁོང་མི་བཞུགས་དགོངས་པ་རེད། ང་རང་གིས་བླ་མ་མཇལ་འདོད་ཀྱང་ན་སོ་ལོན་པའི་སྟོབས་ཀྱིས་ཐོན་དཀའ་འདུག །ཁྱོད་རང་ནི་མྱུར་དུ་སོང་ལ་བླ་མས་ཅི་གསུངས་བསྒྲུབ་ལ་གང་བདེར་སྡོད་ བྃ༔ གསུངས། དེ་ནས་བདག་གིས་སྤྲུལ་སྐུའི་གསུང་ལྟར་དགོན་མཐའི་རྒན་མོ་ཆོས་སྐྱིད་ཞེས་པ་དང་མཉམ་དུ་སོང་བས། སྨར་གྱི་ལུང་ལག་གླང་འབུད་ཟེར་ས་དེ་ཀར་ཐོན་དུས། དེའི་ནུབ་རྨི་ལམ་ལ་མགར་ར་གཏེར་སྟོན་རེད་ཟེར་བ་ཞིག་མཁའ་འགྲོས་བསུས་ཏེ་ལྷོ་ནུབ་ཀྱི་མཚམས་སུ་བྱོན་འགྲོ་བ་མཐོང་བས། བདག་མྱུར་དུ་དེ་ཀར་སོང་ནས་བླ་མ་ཁོང་ཨེ་མཇལ་སྙམས་པས། བླ་མ་དངང་གཉིས་བར་ཡོལ་བ་ལྟ་བུའི་ནག་པོ་ཞིག་གིས་བསྒྲིབས་ནས་བླ་མ་དང་མཇལ་འཕྲད་མ་བྱུང་ནས་གཉིད་ལས་སད་དོ། །ནངས་པར་རྒན་མོ་ལ་འུ་ཅག་སོང་ཡང་དོན་ཅི་ཡོད་མི་ཤེས་པ་འདྲ། བླ་མ་ཁོང་སྐུ་ཁམས་བདེ་མོ་ཨེ་ཡིན་མི་ཡིནགོ་དཀའ་མོ་རེད་སྨྲས་ཚེ། མོ་ན་རེ། བླ་མ་སྐུ་ཁམས་མ་བདེ་ཡང་ཡག་བཟའ་ལ་མ་གནོད་ན། འུ་ཅག་གཉིས་ལ་ཅི་གནོད་ཟེར། ང་རང་ནི་སེམས་མ་བདེ་ནས་ཅི་དགོས་སྙམས་ནས་ངེད་གཉིས་ལམ་དུ་ཞུགས་ནས་སོང་བས་གཉིས་མདོ་ཟེར་ས་དེ་ཀར་ཐོན་དུས། མགྲོན་པོ་ཞིག་མར་འགྲོ་བ་དང་འཕྲད་པས། དེ་ལ་བདག་གིས་ཁྱོད་སུ་ཡིན་དྲིས་པས། ཁོ་ན་རེ། ང་མགར་ར་སྟག་ལི་ཟེར་བ་དེ་ཡིན་ཟེར། ཡང་བདག་གིས་དེས་ན་མགར་ར་གཏེར་སྟོན་བཞུགས་གནས་གང་ན་ཡོད། སྐུ་ཁམས་བདེ་ མོ་ཨེ་རེད་སྨྲས་པས། ཁོན་རེ། ཨོ་བླ་མ་དང་ཡག་བཟའ་གཉིས་གཟའ་འཁོན་བྱས་ཏེ་ཁ་གཏམ་མ་ཡོད་ནས་ཟླ་བ་གཉིས་ཙམ་ཡིན། བླ་མས་ཁོང་གི་རྟེན་འབྲེལ་ཡག་བཟས་འཆུག་བཅུག་པ་ཡིནཔས། ཁོང་ཞིང་ཁམས་ལ་འགྲོ་བ་ཡིན་གསུངས་ཏེ། སྐུ་ཁམས་ཀྱང་ཤིན་ཏུ་འཁྲུག་ཅིང་ཞབས་བརྟན་དུ་མ་འདོན་ཀྱང་ཕན་པར་དཀའ་འདུག་པས་ཞི་བར་གཤེགས་ངེས་པ་རེད་ཟེར་ནས་ཁོ་རང་གྲོང་པའི་ནང་དུ་བུད་སོང་། ངེད་གཉིས་ལ་བླ་མའི་གདན་སར་འགྲོ་ལམ་བསྟན་ཏེ་དེར་སོང་ཟེར། དེ་ནས་ངེད་གཉིས་དགོན་ལམ་ལ་ཞོན་ནས་ཡར་སོང་བས། བླ་མའི་གཟིམ་ཁང་གི་ཉེ་སར་ཐོན་འདུག་པས། བླ་བྲང་གི་གཡོག་མོ་གཉིས་ཀྱིས་ཟོམ་སྟོང་ཁུར། ཡག་བཟའི་ཨ་ནེ་བརྩོན་འགྲུས་མཚོ་ཞེས་པས་ཐལ་བ་གཏོར་བ་སོགས་བྱས་ཤིང་། ང་རང་ཡིན་པར་གོ་ནས་རྟེན་འབྲེལ་ལ་གང་གནོད་བྱེད་འདུག་པས། བདག་གིས་མར་བོས་ནས་འདི་སྐད་སྨྲས། ཧེ་ཧེ་ཉོན་དང་ཆོས་སྐྱིད་ལོ། ཐལ་བ་ཟོམ་སྟོང་སྨོན་ལོག་གསུམ། །དུས་གཅིག་འཛོམས་པའི་རྒྱུ་རྐྱེན་འདི། །བསོད་ནམས་ཟད་པའི་ལྟས་ངན་རེད། །ཨ་ཙེ་འདི་ཚོའི་བསམ་ལུགས་ལ། །མངོན་ཤེས་ཡོད་པ་ཤ་སྟག་རེད། །ང་ཡིན་སུ་ཡིས་མ་གོ་གོང་། །ང་རེད་སུ་ཡིས་མ་བརྗོད་ བྃ༔ ཀྱང་། །རྟེན་འབྲེལ་ལོག་པའི་སྣ་གཏད་བྱས། །དུས་ངན་མི་ཡི་བྱ་སྤྱོད་ལ། །བསམ་ན་སྡུག་བསྔལ་རིན་གྱིས་ཉོ། །དེ་སོ་ཁྱོད་ཀྱིས་ཨེ་ཤེས་ལོ། །ཞེས་སྨྲས་པས། རོག་རྒན་མོ་ན་རེ། ཁྱོད་ཀྱིས་འདི་ལྟར་མ་ཟེར། འུ་ཅག་སྤྲང་པོ་ཡིན་པས་བརྡུང་བཙོག་བྱེད་འོང་ཟེར། དེ་ནས་ཡར་ལང་ནས་དགོན་ནང་ལ་སོང་སྟེ་གནས་ཚང་ཞིག་ཨེ་རྙེད་བསམ་ཡོད་ཚེ། སྔར་གྱི་སྟོང་དཔོན་སྨོན་ལམ་དང་། བླ་མ་ན་རོ་པ་ཞེས་པ་གཉིས་བྱོན་ནས། ཁྱོད་གཉིས་དཀའ་ཨེ་ཐས་ཟེར། བདག་གིས་ང་རང་མ་སྐྱོན། རྒན་མོ་ན་སོ་ལོན་པའི་རྐྱེན་གྱིས་དཀའ་ཚེགས་ཆེ་ཐས་ཞུས། དེ་ནས་ཁོང་གཉིས་ཀྱིས་གནས་ཚང་འབུད་ཤིང་སོགས་ཀྱི་མཐུན་རྐྱེན་བྱས་ཚེ། ཡང་བདག་གིས་སྨོན་ལམ་རྒྱ་མཚོ་ལ་བླ་མ་སྐུ་ཁམས་ཅི་འདྲ་གི། སྤྲུལ་སྐུ་དྲི་མེད་སང་མ་བྱོན་པ་ཨེ་ཡིན་སྨྲས་པས། ཁོང་ན་རེ། བླ་མ་སྐུ་ཁམས་ཤིན་ཏུ་འཁྲུགས་ཆེ་བས་བྱ་ཐབས་བྲལ་བ་ལྟ་བུ་རེད། སྤྲུལ་སྐུ་སང་བྱོན་སྟབས་མ་ལྡན་པ་རེད། ད་ངེད་ཅག་གི་ཡག་བཟའ་ལ་ཁྱོད་ཐོན་ཡོད་ཟེར་མ་ཕོད། བླ་མས་ནི་དེ་རིང་ཁོང་ལ་མགྲོན་པོ་ཞིག་ཐོན་རན་ཡོད་གསུངས་ནས་ཐུགས་དགའ་བ་ལྟ་བུར་མཛད་འདུག་པས་ཁྱོད་བྱོན་པ་དགོངས་པ་འདྲ་ཟེར། དེ་ནས་བདག་ཞག་ཁ་ཤས་བསྡད་ ཀྱང་ཁོང་རྣམས་ཀྱིས་ང་རང་བླ་མའི་མདུན་ལ་ཐོན་ཐབས་མ་འོང་། ལོ་ཁྱིམས་དེའི་ཟླ་བ་གཉིས་པའི་ཉེར་བརྒྱད་ཀྱི་ཉི་ཤར་མཚམས་ལ་བླ་མ་སྐུ་ཞི་བར་གཤེགས་འགྲོ་གི་གྲགས་འདུག །ང་རང་ནི་སེམས་སྐྱོ་ནས་དགོན་པའི་ཡ་ཟུར་ལ་ལྕང་ར་ཞིག་འདུག་པས་དེ་ཀར་སོང་ཡོད་ཚེ། མི་མང་པོས་ང་རང་གི་མིང་ནས་འབོད་འདུག །བདག་གིས་ཅི་ཡིན་སྙམས་ནས་བལྟས་ཚེ། ཁོང་རྣམས་ཀྱི་ནང་ནས་བླ་མའི་དངོས་སློབ་རྡོ་དགེ་བླ་མ་བསྟན་འཛིན་དང་། བླ་མ་ན་རོ་པ། སྨོན་ལམ་རྒྱ་མཚོ་སོགས་བུ་སློབ་དུ་མས་རྟ་ཁྲིད་ནས་ང་རང་ལ་ཁྱོད་བྱོན་དགོས། བླ་མ་ནི་འདས་འགྲོ་ཁ་ཡོད་པས། ཡག་བཟས་ཁྱོད་བྱོན་ཆོག་ཟེར་ཞིང་ཐམས་ཅད་ཀྱིས་ཁྱོད་མ་འོང་བར་ཐབས་མེད་ཟེར། བདག་གིས་ཡག་བཟའི་སྐུ་ཚེ་རིང་ཏེ། ད་མ་སྔུན་དུ་བུ་བསད་དགོས་དོན་ཅི་ཡོད། སྔར་ངས་ཁོ་རང་ལ་ཚིག་དོན་ཆེན་བཤད་ནས་ལོ་གཉིས་ཡིན། དེ་དུས་ནི་ང་འོང་མི་ཉན་ཟེར། ད་ཆུ་ཟམ་འོག་ལ་འདུས་པ་ལྟར་བྱེད་རྗེས་ང་རང་ཐོན་མ་ཐོན་གཉིས་ལ་ཁྱད་པར་མེད། དེའི་ཁར་ཁྱོད་ཅག་རྣམས་ཀྱིས་ཀྱང་ང་ཡོང་ཡོད་པ་ཤེས་བཞིན་དུ་མཐུན་རྐྱེན་མ་བྱས། ད་བླ་མ་འདས་རན་དུས་ང་རང་གིས་ཅི་ཡང་བྱ་ཐབས་མིཐོན་ངེས་པ་ཡིན་པས་མི་འགྲོ་སྨྲས་ཚེ། ཡང་ཁོང་རྣམས་ཀྱིས་སྔར་ བྃ༔ ཁྱོདའོང་བགོ་ཡང་ཡག་བཟའ་ལ་ཟེར་ཐབས་མ་འོང་བ་ཡིན་མ་གཏོགས། མཐུན་རྐྱེན་མ་བྱས་པ་མིན་ཟེར། ཁྱོད་ཅག་གིས་བླ་མ་གཏེར་སྟོན་ལ་མོ་ཁྲིམས་འཇོག་ཕོད་སར་ང་འོང་ཡོད་གི་ཟེར་ལོས་ཕོད། ད་ཇི་ལྟར་ཡིན་ཀྱང་ང་མི་འགྲོ་སྨྲས་པས། བླ་མ་བསྟན་འཛིན་དང་། བོང་ཡུལ་ཚེ་རིང་དབང་འདུས་གཉིས་ཀྱིས་ཆོས་དམ་ཚིག་འཕང་ནས་མི་འགྲོ་རང་དབང་མ་སྟེར་ཞིང་། བདག་ཁོང་རྣམས་དང་ལྷན་དུ་སོང་བས། ཀུན་གྱིས་ཁམས་བཟང་ཟེར་འདུག་ཀྱང་ལན་ཅི་ཡང་མ་སྨྲས་ནས་ཁང་སྟེང་ལ་སོང་བས། བླ་སེར་བུ་སློབ་རྣམས་ཀྱིས་ཚོགས་འཁོར་བྱེད་འདུག །བདག་གིས་བསམ་པ་ལ་མགྲོན་པོ་འགྲོ་ཁའི་ལམ་རྒྱགས་སྟེར་བ་བཞིན། འདི་རྣམས་ཀྱིས་བླ་མ་བྱོན་ཐབས་ལ་ཚོགས་འཁོར་འབུལ་འདུག་སྙམ་ཡང་ཅི་ཡང་མ་སྨྲས།དེ་ནས་བླ་མ་ཁོང་གི་དངོས་སློབ་བྱ་བྲལ་བ་ངག་དབང་བདེ་མཆོག་ཅེས་པ་དེའི་བླ་མའི་གཟིམ་ཁང་གི་སྒོ་ལ་འོངས་ནས་ང་རང་ལ་ཁྱོད་བླ་མའི་སྐུ་མདུན་ལ་ཤོག་ཟེར་བས་དེ་ཀར་སོང་ནས་བདག་གིས་ཕྱག་ཕུལ་བས་མར་སྤྱན་གྱིས་གཟིགས་ཤིང་ཞལ་འཛུམ་པའི་ངང་ནས་དར་ཁ་བཟང་པོ་ཞིག་བདག་ལ་གནང་ནས། ཕྱག་གཡས་པས་ང་རང་གི་ལག་གཡོན་པ་བཟུང་སྟེ་སྨོན་ལམ་མཛད་པ་ལྟ་བུར་བྱས་ཏེ། སྟེང་ གི་ནམ་མཁའ་ལ་ཧྲིག་གེར་གཟིགས་ནས་བཞུགས་འདུག །བདག་ནི་ཡིད་ཤིན་ཏུ་སྐྱོ་ཞིང་བྱ་ཐབས་བྲལ་བ་ལྟ་བུར་བྱུང་ཡང་སྡུག་བསྲན་བྱས་ཏེ། བླ་མའི་སྐུ་ལ་མགོ་གཏུགས་ཏེ་གསོལ་བ་འདི་ལྟར་བཏབ། ཀྱེ་མ་ཀྱི་ཧུད་བདག་ཅག་འགྲོ་བའི་མགོན། །རིག་འཛིན་བདུད་འདུལ་དབང་ཕྱུག་གླིང་པ་དགོངས། །སྙིགས་མའི་འགྲོ་བློས་བསམ་སྤྱོད་ལོག་གཏམ་ལ། །ཐུགས་སུན་མཛད་ནས་གཟུགས་སྐུ་དབྱིངས་སུ་བསྡུས། །དཔལ་རིའི་ཞིང་དུ་ཡིབ་པ་ཅིའི་ཕྱིར་ལགས། །བདག་ཅག་འགྲོ་བའི་སྐྱབས་གནས་སུ་ལ་ཞུ། །ཁོ་མོ་བདག་གི་སྡུག་བསྔལ་སུ་ཡིས་སྐྱོབས། །ཟབ་གཏེར་ཆོས་སྲིད་འཛིན་སྐྱོང་གང་གིས་བྱེད། །ལས་ངན་སེམས་ཅན་རེ་ལྟོས་སུ་ལ་བཅའ། །ཀྱེ་མ་ཀྱི་ཧུད་འགྲོ་འདུལ་ཐུགས་རྗེ་ཅན། །བདག་ཅག་ཡལ་བར་མ་དོར་རྗེས་སུ་ཟུངས། གཟུགས་སྐུ་ཉིན་བྱེད་དཀྱིལ་འཁོར་མི་བསྡུ་བར། །བསྟན་དང་འགྲོ་བའི་དཔལ་དུ་བཞུགས་གསོལ་འདེབས། །གལ་ཏེ་མི་མངོན་དཔལ་རིར་ཡིབ་འགྲོན། །སྐྱེ་དམན་བདག་ནི་ཐུགས་ནས་མི་འདོར་བར། །དུས་ཀུན་རྗེས་བཟུང་སྨིན་གྲོལ་དབུགས་དབྱུངས་མཛད། །ཕྱི་མ་དཔལ་རི་པདྨ་འོད་གླིང་ནས། །སྟོན་འཁོར་དབྱེར་མེད་དགོངས་པ་མངོན་གྱུར་མཛོད། །ཅེས་གསོལ་ བྃ༔ བའི་སྐབས་བུ་སློབ་རྣམས་ཀྱིས་ཚོགས་ཀྱི་དྲང་བ་ཐོན་ནས། བླ་མ་ལ་ཚོགས་དྲོངས་ཟེར་བ་དང་མཉམ་དུ་བདག་གི་ལག་པ་ཕྱག་གིས་བཏང་སྟེ། ཞལ་འཛུམ་པ་ཞིག་མཛད་ནས། ངག་དབང་བདེ་མཆོག་གིས་ཚོགས་ཆང་བླ་མའི་ལྗགས་ཐོག་ལ་དྲང་མ་ཐག་ཏུ། བླ་མས་ཕྱག་གཡས་ཀྱི་སྡིགས་མཛུབ་དང་གཡོན་མཉམ་བཞག་མཛད་ནས་སྤྱན་དབྱིངས་སུ་འབྲུ་ཚུགས་སུ་གཟིགས་ཤིང་གཟུགས་སྐུའི་བཀོད་པ་ཆོས་དབྱིངས་སུ་བསྡུས་སོ། །དེ་ནས་ཞག་བདུན་འགྲོ་སྐབས་ང་རང་རྨི་ལམ་འོད་གསལ་ལ་གནས་ཡོད་ཚེ། མདུན་གྱི་ནམ་མཁར་ཡེ་ཤེས་འཇའ་འོད་འཁྱིལ་བའི་ཀློང་དུ་དཔའ་བོ་དང་དཔའ་མོ་མང་པོའི་དབུས་སུ། བདུད་འདུལ་དབང་ཕྱུག་གླིང་པ་དེ་ཉིད་སྐུ་དགེ་སྦྱོང་གི་ཆ་ལུགས་མཛད་ཅིང་ཞལ་འཛུམ་པའི་ཚུལ་གྱིས་བཞུགས་པ་མཐོང་ཚེ། བདག་གིས་མོས་གུས་དྲག་པོས་ཕྱག་འཚལ་ཞིང་གསོལ་བ་འདི་ལྟར་བཏབ། དུས་གསུམ་རྒྱལ་བའི་ཐུགས་རྗེའི་གར། །གཏེར་ཆེན་ཆོས་ཀྱི་རྒྱལ་པོ་ལ། །བདག་ནི་གུས་པས་གསོལ་བ་འདེབས། །བྱང་ཆུབ་བར་དུ་འབྲལ་མེད་མཛོད། །ཅེས་གསོལ་བས། འཁོར་གྱི་དཔའ་བོ་དང་དཔའ་མོ་རྣམས་ཀྱིས་དབྱངས་གཅིག་དང་མགྲིན་གཅིག་ཏུ་འདི་སྐད་གསུངས། གནས་དག་པ་རབ་འབྱམས་ཆོས་དབྱིངས་ཀྱི་ཞིང་ན། །རྗེ་དག་པ་རབ་འབྱམས་སྐུ་བཞི་ཡི་བདག་ཉིད། །འཁོར་དག་པ་རབ་འབྱམས་དཔའ་བོ་དང་དཔའ་མོ། །ཆོས་དག་པ་རབ་འབྱམས་བརྗོད་བྲལ་གྱི་ཡེ་ཤེས། །དུས་དགཔ་རབ་འབྱམས་རྟག་ཁྱབ་ཀྱི་འཁོར་ལོ། །ཁྱོད་སྐལ་བཟང་སྨོན་ལམ་ལས་འཕྲོ་དེ་ལྡན་པས། །གནས་ཕུན་ཚོགས་ལྔ་ལྡན་བཀོད་པ་འདི་ངོ་མཚར། །ཞེས་གསུངས་ཏེ་ཚོགས་ཀྱི་མཆོད་པ་དུ་མ་བཤམས་འདུག་པས། བླ་མའི་ཞལ་ནས། སྐལ་ལྡན་མ་འུ་ཅག་འཇིག་རྟེན་དུ་དངོས་མཇལ་མ་བྱུང་ཡང་ད་ལན་འདིར་འཕྲད་པ་ངོ་མཚར་ཆེ མགོན་པདྨའི་སྨོན་ལམ་ལ་འགྱུར་བ་མེད་པ་ཡིན་པས། འུག་ཅག་དུས་ནམ་ཞིག་ནའང་མི་འཕྲད་པའི་ཐབས་མེད་པ་ཡིན། ད་ནི་ངས་ཁྱོད་ལ་སྨིན་གྲོལ་སྩོལ་བའི་དུས་ལ་བབ་པ་ཡིན་གསུངས་ཏེ། ཉིད་ཀྱི་ཟབ་གཏེར་ཁྲོས་མའི་དབང་དང་། གཞན་ཡང་དབང་ཁ་ཆ་ཤས་གནང་ནས་སྨིན་གྲོལ་ལ་བཀོད་ཅིང་བསླབ་བྱ་དང་ལུང་བསྟན་བསྩལ་བ་གཏེར་གཞུང་དུ་གསལ། ཡང་བདག་གིས་བླ་མ་ལགས། ང་རང་ལུས་དམན་པའི་དབང་གིས་འཇིག་རྟེན་དུ་འགྲོ་དོན་འོང་བར་དཀའ་འདུག་པས། ངས་ལུས་འདི་དོར་ནས་ལུས་ལྡན་སྐྱེས་བུ་ཞིག་གི་ལུས་ཐོབ་ཐབས་བྱས་ན་ བྃ༔ འགྲོ་དོན་རེ་ཨེ་འོང་སྙམ་གྱི་ཞུས་ཚེ། བླ་མས་ཁྱོད་ཀྱིས་དེ་ལྟར་མ་བསམ་ཞིག །ལུས་ལྡན་གྱི་ལུས་འདི་སེམས་མ་ཆེན་མོ་རྒྱལ་ཀུན་བསྐྱེད་པའི་ཡུམ། ས་ལམ་བགྲོད་པའི་ཤིང་རྟ། མདོ་སྔགས་འཛིན་པའི་སྐྱེས་བུ་སྤེལ་བའི་གཞི་མ། ཆུ་འགོ་གངས་ལ་ཐུག་པ་བཞིན། སྟོང་དབྱིངས་གསང་ཆེན་ཡུམ་གྱི་མཁའ་ཀློང་ནས་ཆོས་ཉིད་ཀྱི་མཁའ་ལ། ཐུགས་རྗེའི་ཤུགས་ཀྱིས་འགྲོ་ཞིང་འཁོར་འདས་གཉིས་ཀྱི་འབྱུང་གནས་དམ་པ་ཡིན་པས། ཁྱོད་ཀྱི་ལུས་རྟེན་འདིའི་འགྲོ་དོན་གྱི་ལྷག་གོ། །ཇི་ལྟར་ལྷག་སྙམ་ན་སྔོན་སངས་རྒྱས་འོད་སྲུང་གི་དུས་ཁྱོད་བྲམ་ཟེའི་བུ་མོ་ནམ་མཁའ་སྒྲོན་མ་བྱ་བ་ཡིན་དུས་བྱང་ཆུབ་མཆོག་ཏུ་སེམས་བསྐྱེད་པའི་ཐུགས་བསྐྱེད་རྣམ་པར་དག་པའི་གཞི་དང་། རྗེ་མོ་མཚོ་རྒྱལ་གྱི་སྨོན་ལམ་གྱི་སྟོབས་ཀྱིས་ཁྱོད་ཀྱིས་བསྟན་འཛིན་གྱི་སྐྱེས་བུ་རྣམས་ཀྱི་སྐུ་ཚེའི་བར་ཆད་ངན་པ་ཐམས་ཅད་དངོས་དངདངོས་མེད་ཀྱི་ཚུལ་དུ་སེལ་ཞིང་བསྟན་པའི་རྒྱལ་མཚན་བསྒྲེང་བ་དང་། སེམས་ཅན་ལ་ཐབས་དང་རྟེན་འབྲེལ་གྱི་སྒོ་ནས་བདེ་སྐྱིད་སྤེལ་ཞིང་བདེ་ལ་འགོད་པ་དང་། ཁྱད་པར་ཉམ་ཐག་གི་སེམས་ཅན་རྣམས་ཀྱི་མ་ལྟ་བུར་གྱུར་ནས་འགྲོ་དོན་བསམ་གྱིས་མི་ཁྱབ་པ་རིམ་གྱིས་འབྱུང་བར་ངེས་སོ་གསུངས་སྐབས། ང་རང་ཉིན་ཞག་ གཉིས་ལ་རྨི་ལམ་འོད་གསལ་ལ་གནས་པས། ཁོང་བླ་མའི་སློབ་མ་རྣམས་ཀྱིས་འདི་སྡུག་བསྔལ་གྱི་དྲན་པ་ཉམས་པ་རེད་ཟེར་ནས། བདག་གི་རོ་སྟོད་ལ་མེ་བཙའ་དུ་མ་བཞག་པའི་རྐྱེན་གྱིས་གཏམ་མཇུག་མ་རྫོགས་ཀྱང་ཉམས་ལས་སད་དོ། །དེ་ནས་ཡང་ཁོང་རྣམས་ཀྱིས་ཁྱོད་ཀྱི་སྙིང་ག་ལ་སོགས་ལ་མེ་བཙའ་འཇོག་དགོས་ཟེར་བས། བདག་གིས་བོང་ཡུལ་གླིང་བསམ་འཕེལ་ཞེས་པ་ཁོང་ལྷ་རྗེ་ཡིན་འདུག་པས་འདི་སྐད་སྨྲས། བསམ་དཀར་བ་ལྷ་རྗེ་སྐུ་ཚེ་རིང་། །སྤྲང་བདག་མེད་དགོངས་ཏེ་སྨན་དཔྱད་མཛད། །ཁྱོད་མཁས་པ་ངོ་མཚར་ཅན་ཞིག་གདའ། །ང་གཉིད་ལོག་མེ་བཙའ་ཅི་ལ་བཞག །ནད་མེད་པའི་ཕུང་པོ་བསྲེག་དོན་མེད། །ངའི་རོ་སྟོད་བླ་མའི་དཀྱིལ་འཁོར་ཡིན། །རོ་སྨད་མཁའ་འགྲོའི་ད་ལ་རེད། །རོ་སྐེད་ཡི་དམ་བཞུགས་གནས་ཡིནན། །ལུས་ཕྱི་ནང་མེད་དེ་ལྷ་སྐུ་རྫོགས། །ངག་འཁྲུལ་གཏམ་མེད་དེ་བསྒོམ་བྱུང་ཚིག །སེམས་སྨྱོ་འབོག་མ་ཡིན་འོད་གསལ་ངང་། །རྒྱུ་དེ་དག་མེ་བཙའི་ནད་མ་རེད། །ང་སྤྲང་མོ་བདག་མེད་ཉལ་དུ་ཆུག །ཅེས་སྨྲས་ཚེ། ཁོང་རྣམས་ཡིད་ཐེ་ཚོམ་ནས་ལ་ལས་འདས་ལོག་རེད་ཟེར། ལ་ལས་རླུང་སྟོབས་ཀྱིས་མཁའ་འཁྱམས་པ་རེད་ཟེར། རྡོ་དགེ་བླ་མ་བསྟན་འཛིན་ བྃ༔ གྱིས་འདི་ཇི་ལྟར་བཤད་ཀྱང་མཁའ་འགྲོ་མ་ཞིག་དངོས་ཡིན་པས་གཞན་དང་མི་འདྲ། བླ་མ་རྡོ་རྗེ་འཆང་དེའི་ཁ་བྱང་དང་ལུང་བྱང་ལ་སོགས་པའི་ནང་དུ་ལན་གྲངས་དུ་མར་ལུང་གིས་ཟིན་ཡོད་པ་ང་རང་གི་མིག་འདིས་མཐོང་བ་ཡིན་