Tibetan
།ལུས་གདོས་བཅས་སྡུག་བསྔལ་གཞི་མ་འདི། །རླུང་རྒྱུ་བ་བརྟན་པ་མ་ཐོབ་ནས། །རྩལ་སེམས་བྱུང་རྟོག་པའི་འདྲ་འབག་གིས། །རང་བྱུང་གི་རིག་པའི་འོད་གསལ་སྒྲིབ།།རྐྱེན་དེ་སེལ་བོགས་འདོན་གདམས་པ་སྩོལ། །གེགས་གོལ་ཤོར་ནོར་ས་བཅད་དུ་གསོལ། །དོན་ཆོས་ཉིད་རང་ངོ་འཕྲོད་པ་དང་། །རྩལ་ཡེ་ཤེས་ཆེན་པོ་གྲོལ་བར་མཛད། །སེམས་སེམས་བྱུང་ཀུན་རྟོག་འཁོར་བའི་ཆོས། །དབྱིངས་སྐུ་གསུམ་ཀློང་དུ་མཉམ་གྲོལ་ནས། །གནས་སྲིད་གསུམ་དོང་ནས་སྤྲུགས་གྱུར་ཅིག །ཅེས་གསོལ་བ་བཏབ་པས་དེའི་ནུབ་རྨི་ལམ་ལ་གྲུབ་ཆེན་ཏ་ར་ན་ ཐ་རེད་ཟེར་བའི་པཎྜི་ཏའི་ཆས་གསོལ་ཞིང་། ཕྱག་གཉིས་ངལ་བསོས་ཕྱག་རྒྱ་མཛད་ཅིང་སྐུ་ཤིན་ཏུ་བགྲེས་པའི་ངང་ཚུལ་ཅན་ཞིག །རང་གི་མདུན་གྱི་ནམ་མཁར་པད་ཟླའི་གདན་ལ་ཞལ་འཛུམ་པ་དང་བཅས་བཞུགས་འདུག་པས། བདག་གི་ཡིད་དད་པ་ཆེན་པོའི་སྒོ་ནས་སྔར་གྱི་གདམས་པ་དྲན་ཅིང་། བླ་མའི་གདན་ཟླ་བའི་དཀྱིལ་འཁོར་ལས་བདུད་རྩི་འབེབས་བྱུང་གི་དམིགས་པ་སྤྲོ་བསྡུ་བྱས་ཚེ། དེ་མ་ཐག་ལུས་སེམས་བདེ་བས་ཁྱབ་སྟེ་འོད་གསལ་གྱི་སྣང་བ་གོང་འཕེལ་དུ་གྱུར། དེ་ནས་བདག་གིས་བླ་མ་ལ་འདི་སྐད་ཞུས། བླ་མ་ལགས་བདག་ནི་རིག་པའི་གནས་ལུགས་ཇི་བཞིན་པའི་ངང་མ་བོར་བར་རང་གནས་ཆེན་པོའི་བསམ་གཏན་ལ་མཉམ་པར་གཞག་ཅིང་། བར་སྐབས་རེ་ལ་རྩོལ་བཅས་རྫོགས་རིམ་ལ་ཅུང་ཟད་རེ་བསླབ་སྦྱང་བྱེད་པ་ཡིན་པས། དེའི་རྐྱེན་གྱིས་ཉམས་སྣང་མ་ངེས་པ་འདི་ལྟར་བྱུང་། སྣང་བ་ཐམས་ཅད་དམར་ལམ་ལམ། ནག་ཐོམ་མེ་བ། དཀར་ལམ་མེ་བ། ཁྲ་ཚོམ་མེ་བ། དམར་ཚུབ་ཚུབ། འོད་འཁྱིལ་ལེ་བ་ལ་སོགས་པ་དང་། ཁྱད་པར་རིགས་དྲུག་གི་གནས་ཀྱིས་སྟེང་མར་གྱུར་ཞིང་། ཞིང་ཁམས་ཐམས་ཅད་ཀྱིས་འོག་མ་བྱས་ཏེ། དེ་གཉིས་ཤན་འབྱེད་མི་ནུས་ཤིང་སེམས་ལ་སྡུག་བསྔལ་ལྟ་བུའི་ཉམས་མི་ བྃ༔ བཟོད་པ་ཞིག་བྱུང་ཞིང་། མཉམ་གཞག་གི་ངང་གཏན་པར་བྱས་ཀྱང་མེད་དུ་མི་འགྲོ། སྟོང་གཟུགས་ལྷ་སྐུའི་ལམ་ཁྱེར་ལ་བསྲེས་ཀྱང་ཉམས་དྭངས་རྒྱུ་མེད་པ་ལྟ་བུར་འདུག་པས། དེ་དག་གི་གེགས་སེལ་དང་གདམས་པའི་མན་ངག་གི་བོགས་འདོན་པ་སོགས་གནང་བ་བཀའ་དྲིན་མ་ཆུང་ཞུས་ཚེ། བླ་མའི་ཞལ་འཛུམ་པ་དང་བཅས་ཏེ་འདི་སྐད་གསུངས། ཀྱེེ་རིགས་ཀྱི་བུ་མོ་ཉོན་ཅིག །མྱུར་ལམ་གསང་བ་ཆེན་པོ་ཉམས་སུ་བླངས་པའི་རང་འབྲས་ཀྱི་ཡོན་ཏན་ཁྱོད་ལ་ཤར་བ་ཡིན་པས་ངོ་ཤེས་པར་མཛོད་ཅིག །ཁྱོད་ཀྱི་རྩ་ཐིག་རླུང་གསུམ་གྱི་སྒྲིབ་པ་ཅུང་ཟད་དག་པས་རླུང་སེམས་གཅིག་དྲིལ་གྱི་གནད་ཀྱིས་རླུང་ཞུགས་གནས་ཐིམ་པའི་རྟགས་རྣམས་མངོན་དུ་གྱུར་པ་ཡིན་ཀྱང་། ཞུགས་གནས་ཀྱི་རྟགས་ཁྱོད་ཀྱིས་འོད་གསལ་གྱིས་རྒྱས་བཏབ་པས་མཉམ་བཞག་གི་བོགས་འདོན་དུ་གྱུར་པའོ། །ད་ཐིམ་པའི་རྟགས་ནི་འདི་ལྟ་སྟེ། ཁྱོད་ཀྱི་སྣང་བ་ཆུ་རྒྱུག་པ་བཞིན་ཁྲ་ཚོམ་ཆེམ་པ་དེ་ནི་ས་ཆུ་ལ་ཐིམ་པའི་རྟགས་ཡིན་ནོ། །དེ་ནི་ལུས་ཀྱི་ས་ཁམས་འཛིན་པའི་རྣམ་པར་ཤེས་པ་ཆུ་ལ་ཐིམ་པའི་རྟགས་སུ་སྨིག་རྒྱུའི་སྣང་བ་ཤར་བའོ། །ཆུ་མེ་ལ་ཐིམ་པའི་རྟགས་སུ་ཁྱོད་ཀྱི་སྣང་བ་དུ་བ་ལྟ་བུ་སྔོ་ལྷེམ་མེ་བ་ཤར་བ་དེ་ནི་ཆུ་ཁམས་ཀྱི་རྣམ་ཤེས་མེ་ ལ་ཐིམ་པའི་རྟགས་སུ་དུ་བའི་སྣང་བ་ཤར་བ་ཡིན་ནོ། །མེ་རླུང་ལ་ཐིམ་པའི་རྟགས་སུ་ཁྱོད་ཀྱི་སྣང་བ་དམར་ཚུབ་ཚུབ་ཤར་བ་དེ་ནི་ལུས་ཀྱི་མེ་ཁམས་འཛིན་པའི་རྣམ་ཤེས་རླུང་ལ་ཐིམ་པའི་རྟགས་སུ་མེ་ཁྱེར་གྱི་སྣང་བ་ཤར་བ་ཡིན་ནོ། །རླུང་རྣམ་ཤེས་ལ་ཐིམ་པའི་རྟགས་སུ་ཁྱོད་ཀྱི་སྣང་བ་དམར་ཀྱི་ལེ་བ་དེ་ནི་རླུང་དབུ་མར་འདུས་པའི་རྟགས་སུ་མར་མེའི་སྣང་བ་ཤར་བ་ཡིན་ནོ། །ཀུན་རྟོག་གཡོ་བྱེད་ཀྱི་ལས་རླུང་སྣང་བ་ལ་ཐིམ་པའི་རྟགས་སུ་ཁྱོད་ཀྱི་སྣང་བ་ཟླ་འོད་ལྟར་དཀར་སང་ངེ་བ་བྱེདཔ་དེ་ནི་དཀར་ཆ་ལུགས་སུ་འབྱུང་བ་ཡིན་པས་ངོ་ཤེས་པར་གྱིས་ཤིག །སྣང་བ་མཆེད་པ་ལ་ཐིམ་པའི་རྟགས་སུ་ཁྱོད་ཀྱི་སྣང་བ་ཉི་འོད་ལྟར་དམར་ལམ་མེ་བར་ཤར་བ་དེ་ཡང་དམར་ཆ་ལུགས་སུ་ལྡོག་པ་ཡིན་པས་ངོ་ཤེས་པར་གྱིས་ཤིག །མཆེད་པ་ཉེར་ཐོབ་ལ་ཐིམ་པའི་རྟགས་སུ་ཁྱོད་ཀྱི་སྣང་བ་ནམ་མཁའ་སྨག་འཐུག་པོས་ཁྱབ་པ་ལྟ་བུར་ཤར་བ་དེ་ཡང་དཀར་དམར་དྷཱུ་ཏིར་འདུས་པའི་རྟགས་ཡིན་པས་ངོ་ཤེས་པར་གྱིས་ཤིག །ཉེར་ཐོབ་འོད་གསལ་ལ་ཐིམ་པའི་རྟགས་སུ་ཁྱོད་ཀྱི་སྣང་བ་སྟོང་སང་ངེ་བ་འགྱུ་འཕྲོའི་ཡན་ལག་དང་བྲལ་ཞིང་འཐུག་པོའི་འོད་གསལ་གྱི་སྣང་བ་ལྟ་བུར་ཤར་བ་དེ་ཡང་རྣལ་འབྱོར་ལམ་གྱི་འོད་གསལ་ལ་རྒྱུ་བྱས། ཕྲལ་གསལ་ཉམས་ཀྱི་འོད་གསལ་ལ་རྐྱེན་བྱས་ཏེ། བྃ༔ དེ་གཉིས་དུས་འཛོམས་པ་ལས་ངང་གནས་རང་བྱུང་གི་གཞིའི་འོད་གསལ་མཁའ་ལྟར་རྣམ་པར་དག་ཅིང་རྒྱ་ཆད་ཕྱོགས་ལྷུང་དང་བྲལ་བ་ཟབ་པ་ཞི་བ་སྤྲོས་པ་མེདཔའི་ཡེ་ཤེས་མངོན་དུ་གྱུར་པ་ཡིན་ནོ། །ཞེས་གསུངས་མ་ཐག་སྐུ་གནས་གྱུར་ནས་མགར་རགཏེར་ཆེན་བདུད་འདུལ་དབང་ཕྱུག་གླིང་པའི་སྐུའི་རྣམ་པར་བཞེངས་ནས་འདི་སྐད་གསུངས། སྐལ་ལྡན་མ་ཁྱོད་ལ་དམ་སྲི་མི་རུ་བརྫུ་བ་ཞིག་གིས་བར་ཆད་བརྩམ་པར་འདུག་པས། ངའི་ཟབ་གཏེར་གྱི་ནང་ནས་བྱིན་རླབས་མྱུར་བ་ཕུརཔ་གཞོམ་མེད་རྡོ་རྗེའི་བསྙེན་སྒྲུབ་ལ་མྱུར་དུ་བརྩོན་དང་། དེས་བར་ཆད་ཀྱི་གཡུལ་ལས་རྒྱལ་བར་ངེས་སོ་གསུངས་ཏེ། དབང་དང་ཕྱག་བཞེས་སོགས་ལེགས་པར་རྗེ་དེ་ཉིད་ཀྱི་ཞལ་ནས་ཐོབ། གཞན་ཡང་འབྱུང་འགྱུར་གྱི་ལུང་བསྟན་གསུངས་པ་གཏེར་གཞུང་དུ་གསལ། དེ་ནས་ནང་པར་དེ་ལ་རྐྱེན་བྱས་ཏེ་ཡི་གེ་བྲི་འདོན་དང་། གཏེར་གསར་གི་ཕྱག་བཞེས་རྔ་དྲིལ་བཀྲོལ་རྒྱུ་དང་བཅས་པ་བསླབ་མ་དགོས་པར་གློ་བུར་དུ་ཤེས་པ་བྱུང་ངོ་། །དེའི་ལོར་མགར་ར་རྒྱལ་སྲས་དཔོན་གཡོག་ཆ་ཤས་རྨ་ཆེན་ལ་བྱོན་གྲབ་བྱེད་འདུག་པས། བཙུན་མ་བསམ་དཀར་སྒྲོན་དང་ངེད་གཉིས་བསྡེབས་ནས་རྨ་རྒྱལ་ལ་སོང་། རྨ་རྒྱལ་གྱི་བློན་པོ་དགྲ་འདུལ་ དབང་ཕྱུག་བྱ་བས་བདག་རྟ་མཆོག་གོང་ལ་ཐོན་དུས་བསུ་མར་འོང་ནས་མངོན་སུམ་དུ་སྤྲིན་གྱི་རྟ་བྱས་ཏེ། ཁོང་རང་གི་ཕོ་བྲང་ནང་དུ་སོང་བས་བཟའ་བཅའ་སོགས་ཕུན་སུམ་ཚོགས་པ་བཤམས་ནས་སྔར་འདྲིས་ཀྱི་མིར་འཕྲད་པ་ལྟ་བུར་བཙུན་མོ་སྲས་འཁོར་བྲན་གཡོག་དང་བཅས་པས་དགའ་སྤྲོ་ཆེན་པོ་བྱེད་འདུག །དེའི་སྒོ་སྲུང་དགྲ་བླ་དུང་གི་ཐོར་ཅོག་ཅན་ཞེས་པས་འདི་སྐད་ཟེར། སེམས་མ་ཆེན་མོ་ཁྱོད་ངེད་ཅག་གི་གནས་སུ་ཕེབས་པ་བཀའ་དྲིན་ཆེ་ལགས། ད་ཞག་ཆ་ཤས་འདི་ཀར་བཞུགས་ནས་གནས་ལ་ཁྲུས་གསོལ། ས་བཅུད་གསོ་ཐབས་གཡང་བུམ། ངེད་ཅག་དཔོན་གཡོག་ལ་ཆོས་སོགས་ཞིབ་རྒྱས་སུ་གནང་དགོས་ཟེར་བས། བདག་གིས་ཀྱང་ཁོང་རྣམས་ཀྱི་འདོད་པ་ཐམས་ཅད་བསྒྲུབས་ནས་གནས་མགྲོན་དམ་ཚིགགཅིག་པར་སོང་། ཡང་བདག་གིས་ངའི་ཟབ་གཏེར་མཚོ་རྒྱལ་དང་། ཕག་མོའི་སྒྲུབ་ཐབས་རྣམས་ཀྱི་གཏེར་ཁ་དབང་ཕྱུག་མ་བདུན་ལ་བཅོལ་ཡོད་པས། དེ་ལོན་ཐབས་དགོས་སྨྲས་ཚེ། དགྲ་བླ་དུང་ཐོད་ཅན་སྐད་ཅིག་གིས་གློག་འཁྱུག་པ་ལྟར་སོང་ནས། རྨ་རྒྱལ་ནུབ་ཀྱི་སྒོ་སྲུང་དབང་ཕྱུག་མ་བདུན་གྱི་གནས་ནས། མཚོ་རྒྱལ་གྱི་ཟབ་ཤོག་སྐུ་དང་བཅས་པ་མཁའ་འགྲོའི་བླ་རྡོ་རྣམས་ལོན་ནས་བདག་ལ་གཏད་དོ། བྃ༔ ཕག་མོའི་ཟབ་ཤོག་ད་དུང་ཆོས་བདག་དང་ཐབས་གྲོགས་ཀྱི་རྟེན་འབྲེལ་མ་འཛོམས་པ་ཡིན་པས་དུས་ལ་མ་བབ་ཟེར་ཞིང་གཏེར་སྒྲོམ་མ་ལོན་པ་ཡིན་ཟེར། དེ་ནས་ཁོང་རྣམས་ལ་གང་དགོས་ཀྱི་བྱ་བ་བསྒྲུབ་སྟེ། ང་རང་ཕྱིར་འོང་གྲབ་བྱེད་དུས། བཙུན་མོ་གྲགས་རྒྱལ་མས་སྨྲས་པ། དའུ་ཅག་དམ་ཚིག་གཅིག་པ་ཡིན་པས་ཁྱོད་རྨ་རྒྱལ་འདི་ཀར་ལན་གྲངས་གསུམ་དུ་བྱོན་སྟབས་ལྡན་ན་སྐུ་ཚེ་དང་མཛད་ཕྲིན་ལ་དེ་བས་གྲགས་མེད། དེ་ལྟར་མ་ལྡན་ན་སྐབས་སུ་མི་འདོད་པ་འབྱུང་ཉེ་ཞིང་། ཁྱད་པར་སྐུ་ཚེ་ལ་བར་ཆད་ཤིན་ཏུ་ཆེ་འདུག་པས་སྟབས་གཟབ་པར་གལ་ཆེ་ཟེར། དེ་ནས་ཡང་སྔར་ལྟར་སྤྲིན་གྱི་རྟ་བྱས་ཏེ་བར་སྣང་ལ་འོང་བས་རང་གནས་ལ་ཐོན། ཁོང་རྣམས་ཀྱིས་ཚ་ཕོག་བསྐོལ་ཞིང་འདུག་པས། དེ་དག་གི་ནང་ནས་སྔགས་པ་ལྷག་པ་ཞེས་པ་མགར་ར་གཏེར་ཆེན་གྱི་དངོས་སློབ་དགེ་བཙུན་ཞིག་ཡོད་པས། དེ་ན་རེ། ཁྱོད་གར་སོང་བ་ཡིན། ད་ནང་ཉི་མ་ཤར་བ་དང་མཉམ་དུ་བོར་སོང་། དཉི་མ་ཕྱེད་ཡོལ་འགྲོ་གྱིན་འདུག་པས་དེའི་བར་ལ་རྗེས་སུ་ལྷག་དོན་ཅི་རེད་ཟེར་བདག་གིས་ང་ཕུག་པ་ཞིག་གི་ནང་དུ་སོང་ནས་བསྡད་ཡོད་ཚེ་གཉིད་དུ་སོང་བ་ཡིན་པས་དེས་ཁྱེད་ཅག་གི་རྗེས་མ་ཟིན་པ་ཡིན་སྨྲས་པས། ཁོང་རྣམས་ ཀྱིས་བདེན་པར་བཟུང་ངོ་། །དེ་ནས་ཉིན་གཅིག་གཡས་ལུང་གི་འབྲོག་སྡེ་ཞེས་པའི་ལུང་མདའ་རུ་ཚུག་མལ་བྱས་ཏེ་ཞག་ཆ་ཤས་བསྡད་སྐབས་། བདག་གིས་རྒྱལ་སྲས་ལ་ཞུས་པ། ཉིད་ཀྱིས་བདག་ལ་རྫོགས་པ་ཆེན་པོའི་ཆོས་ཞིག་གསུང་དུ་གསོལ་ཞུས་ཚེ། རྒྱལ་སྲས་ཀྱི་ཞལ་ནས་ཁྱོད་ལ་ད་སྔ་སེམས་ཁྲིད་ཐོབ་ཨེ་མྱོང་གསུངས། བདག་གིས་སེམས་ཁྲིད་ཞེས་ལྷག་པར་གྱི་ཁྱད་ཆོས་ཅན་ཞིག་མ་ཐོབ་ལགས། ཀུན་བཟང་བླ་མའི་ཞལ་ལུང་གི་ཁྲིད་ཡང་དག་པར་ཐོབ་ནས་འབུམ་ལྔ་སོགས་གང་དགོས་ལེགས་པར་བསྒྲུབས་པ་ལྟ་བུ་ཡིན་ཞུས། ཁོང་གི་ཞལ་ནས་ཀུན་བཟང་བླ་མའི་ཞལ་ལུང་སྔོན་འགྲོ་ཆོས་བཅུ་རེད། དེ་ལ་སེམས་ཁྲིད་མི་ཟེར་གསུངས། ཡང་བདག་གིས་རྒན་མོ་ཁྱི་སོའི་དཔེ་བཞིན་བདག་ལྟ་བུའི་བློ་རྨོངས་ཀུན་ལ་སེམས་ཁྲིད་དང་ཁྱད་པར་མི་འདུག །ཆོས་བཅུ་པོ་གང་ནས་གསུང་ཀྱང་། རང་དོན་ཡིད་བྱེད་ཀྱི་བློ་ངན་དྲུང་ནས་སྤང་སྟེ། གཞན་ཕན་བྱང་ཆུབ་ཀྱི་སེམས་རྣམ་པ་གཉིས་ཀྱིས་ཐེག་པ་ཆེན་པོའི་ལམ་དུ་ཁ་དྲངས་པ་དང་། བླ་མའི་རྣལ་འབྱོར་ལ་བརྟེན་ནས་ཚེ་འདིར་རྒྱལ་བ་རྡོ་རྗེ་འཆང་ཆེན་པོའི་གོ་འཕང་ཐོབ་པར་བྱ་བའི་གནད་དུ་མ་ཡོད་པར་འདྲ་ན། སེམས་ཁྲིད་ཅེས་ཀུན་གཞིའི་རྣམ་ཤེས་ཀྱི་གསལ་ཆ་ཙམ་ངོ་འཕྲོད་མ་ བྃ༔ འཕྲོད་མེད་ཞུས། ཡང་ཁོང་གི་ཞལ་ནས་སེམས་ཁྲིད་མ་ཡིན་པའི་རྫོགས་ཆེན་ཞེས་ངས་མི་ཤེས་གསུངས། ཡང་བདག་གིས་ལྷག་པར་ཁ་ཐོན་ནང་དུ་ཚིག་འདི་འདྲ་ཞིག་འདུག །ཡོད་པ་མ་ཡིན་རྒྱལ་བས་འདི་མ་གཟིགས། །མེད་པ་མ་ཡིན་འཁོར་འདས་ཀུན་གྱི་གཞི། །འགལ་འདུ་མ་ཡིན་བརྗོད་བྱའི་ཡུལ་ལས་འདས། །རྫོགས་ཆེན་གཞི་ཡི་གནས་ལུགས། རྟོགས་པར་ཤོག །ཅེས་གསུངས་པས། དེའི་དོན་ཁྲོལ་ནས་བདག་ལ་གསུང་དུ་གསོལ་ཞུས་ཚེ། ཁོང་གི་ཞལ་ནས་ཁྱོད་ཀྱི་གནས་འགྱུ་ཙམ་ཡང་ལྟ་མ་མྱོང་བ་ཞིག་གིས། རིག་འཛིན་འཇིགས་མེད་གླིང་པའི་དགོངས་པ་ཅི་ཡིན་མི་ཤེས་ཨ་གསུངས་ཏེ། གཞན་ཡང་དགོས་མེད་ཀྱི་གཏམ་རྣ་བ་ཚ་ཤས་རེ་གསུངས་པས། དེ་ནས་བཟུང་སྟེ་མི་ལོ་བརྒྱད་ཀྱི་བར་དུ་སྐུ་རྩར་ལ་བསྡད་པ་ཡིན་ཀྱང་། མན་ངག་ཚིག་གཅིག་ཀྱང་ཞུ་མ་ཕོད།དེ་ནས་གོ་མཚོན་རི་ཁྲོད་ལ་ཐོན་ཚེ། དེཀའི་རི་ཁྲོད་པ་ཐམས་ཅད་ཀྱིས་ཨ་ལགས་སུ་རེད་ཟེར་བ་ལ། ལོ་རྒྱུས་རྣམས་བཤདཔས། སྨེ་ཚངས་འབྲུག་འབུམ་ཞེས་པ་སྔར་མགར་ར་གཏེར་ཆེན་གྱི་ཆོས་བདག་ཏུ་ལུང་གིས་ཟིན་པ་ཞིག་འདུག་པས། དེ་ན་རེ། དབུས་མོ་ཁྱོད་མཁའ་འགྲོ་མ་ཞིག་ཡིན་ངེས་ཅན་རེད། བདག་ལ་སྒྲོལ་ དཀར་ཡིད་བཞིན་འཁོར་ལོའི་ཆོས་སྐོར་ཕབ་ཡོད་པས། དེའི་ཡིག་ཆུང་ནང་ན་འདི་ལྟར་གསུངས་འདུག་ཟེར་ནས། ཡི་གེ་ང་རང་གི་ལག་ཏུ་བཞག་བྱུང་བས་འདི་སྐད་ཡོད། གཟུངས་མཆོག་གྱུར་ཨཱཪྻའི་སྒྱུ་འཕྲུལ་གར། །གནས་ར་ས་འཕྲུལ་གྱི་ནུབ་ཕྱོགས་སུ། །ཕ་ནུས་ལྡན་མགོན་གྱི་མིང་མཐའ་ཅན། །མ་ཌཱཀྐིའི་རིགས་ཅན་འཛོམ་གྱི་མིང་། །དེའི་ཡན་ལག་ལས་སྐྱེས་ཆུ་འབྲུག་ལོ། །གནས་ལྔ་རུ་སྨེ་བའི་ཐིག་ལེ་ཡོད། །མིང་ཀ་ལྤ་ལ་བྷ་དྲ་ཏ་རེ་འམ། །སུ་ཁ་ཡི་མིང་དང་འཕྲད་གྱུར་ན། །ཆོས་འདི་ཡི་བསྟན་པ་མཐའ་ནས་རྒྱས། །གཏེར་སྟོན་གྱི་སྐུ་ཚེ་བརྒྱད་ཅུར་འཚོ། །བདུད་སབྟའི་ལས་ཀྱི་དབང་སོང་ན། །རང་ནོར་གྱི་མཆོག་དེ་གཞན་ལ་ཤོར། །ཞེས་གསུངས་འདུག་པས། ཁྱོད་ཇི་ལྟར་ཡིན་ཡང་མགར་ར་སང་ལ་མི་དབང་བ་འདྲ། གནས་འདི་ཀར་བཞུགས་ན་གསོལ་བཅའ་དང་ན་བཟའ་ལ་སོགས་པའི་མཐུན་རྐྱེན་ངེད་ཅག་གིས་ཞབས་ཞུ་བྱེད་ཟེར། དེ་ནས་གནས་དེ་ཀར་ཚེ་དང་སྒྲུབ་པ་མཐར་ཕྱིན་པར་མཛད་པ། སྔོན་བྱོན་དུ་མས་མ་ཅིག་གི་སྤྲུལ་པར་རྡོ་རྗེའི་ལུང་དུ་གསལ་བ་ཨ་ནེ་བཟང་མོ་ཞེས་པ་ཞིག་ཡོད་པ་དེ་སྐུ་ཞི་བར་གཤེགས་སོང་འདུག་པས། དེའི་མདུན་གཡོག་དགེ་བཙུན་རབ་གསལ་ཞེས་པ་དང་། བཙུན་ བྃ༔ མ་ཆོས་མཚོ་ཞེས་པ་གཉིས་ཀ་བདག་གི་སར་ཐོན་བྱུང་བས། བདག་གིས་ཁྱོད་གཉིས་གང་དུ་འགྲོ་བ་ཡིན་སྨྲས་པས། ཁོང་གཉིས་ན་རེ། ངེད་གཉིས་ཁྱོད་ཀྱི་སྐུ་མདུན་ལ་འོང་བ་ཡིན། སྔར་ཁྱོད་མ་བྱོན་གོང་ནས་ངེད་ཅག་གི་བླ་མ་ཨ་ནེ་བཟང་མོ་སང་གིས་དབུས་ནས་མཁའ་འགྲོ་མ་ཞིག་བྱོན་ཡོང་ངེས་ཡིན་པས། དེ་ལ་བདག་གི་ཐོད་པ་དེ་དང་། ཤོག་རྒྱ་འདི་འཕྲོད་དགོས་གསུངས་པ་ཡིན་ཀྱང་། ཤོག་རྒྱ་འདི་རེད། ཨ་ནེའི་དབུ་ཐོད་ལོན་ཐབས་མ་བྱུང་བས། སྐུ་གདུང་བཞུས་རྗེས་དབུ་ཐོད་དུམ་པོ་འདི་བླང་ཡོད་ཟེར་ནས། ཤོག་རྒྱ་དང་དབུ་ཐོད་ཀྱེ་དུམ་བུ་དེ་གཉིས་བདག་ལ་གཏད་བྱུང་བས། ང་རང་གིས་ཅི་ཡིན་སྙམ་ནས་ཤོག་རྒྱ་ཁ་ཕྱེས་ཏེ་བལྟས་ཚེ། དེའི་ནང་ན་རྫས་མ་ངེས་པ་སྣ་ལྔ་དང་། ངེས་པའི་རྫས་གསུམ་བཅས་འདུག་ཀྱང་ཅི་ཡིན་ཆ་མ་ཆོད། དེའི་ནུབ་བླ་མ་ལྷ་ལ་གསོལ་བ་བཏབ་ནས་གཉིད་དུ་སོང་བའི་རྨི་ལམ་ལ་མ་ཅིག་ལབ་སྒྲོན་ཡིན་སྐད་པའི་མཁའ་འགྲོ་མ་མཛེས་ཤིང་ཡིད་དུ་འོང་བ་སྐུ་ལ་མཐིང་ཤམ་དང་དྲི་མེད་རས་གཟན་དཀར་པོ་མནབ་པ། དབུ་སྐྲ་སིལ་བུར་སྐུ་རྒྱབ་ཏུ་འཕྱང་བ། ཕྱག་གཡས་ཌཱ་མ་རུ་དང་གཡོན་པས་དངུལ་དཀར་གྱི་དྲིལ་བུ་དཀྲོལ་ཞིང་། སྙན་པའི་དབྱངས་ཀྱི་གདངས་ལས་ཚིག་ འདི་ལྟར་བྱུང་ངོ་། །ཆོས་སྐུ་རྒྱལ་བ་ཡུམ་ཆེན་མོ། །སྐྱེ་མེད་མ་ལ་གསོལ་བ་འདེབས། །ལོངས་སྐུ་རྡོ་རྗེ་རྣལ་འབྱོར་མ། །འགགས་མེད་མ་ལ་གསོལ་བ་འདེབས། །སྤྲུལ་སྐུ་མཚོ་རྒྱལ་ལབ་སྒྲོན་མ། །ཀུན་ཁྱབ་མ་ལ་གསོལ་བ་འདེབས། །བདག་འཛིན་འཁྲུལ་པ་རྩད་ནས་ཆོད་པ་དང་། །བདག་མེད་ཤེས་རབ་རྟོགས་པར་བྱིན་གྱིས་རློབས། །ཡུལ་མེད་ཟང་ཐལ་མཐོང་བར་བྱིན་གྱིས་རློབས། །རྐྱེན་ངན་གྲོགས་སུ་འཆར་བར་བྱིན་གྱིས་རློབས། །ཕུང་པོ་གཟན་བསྒྱུར་ནུས་པར་བྱིན་གྱིས་རློབས། །ཡུམ་ཆེན་དགོངས་པ་རྟོགས་པར་བྱིན་གྱིས་རློབས། །འབྲེལ་ཚད་དོན་དང་ལྡན་པར་བྱིན་གྱིས་རློབས། །ཆོས་སྐུའི་གཏན་སྲིད་ཟིན་པར་བྱིན་རློབས། །ཕཊཿཕཊཿཕཊཿ ཞེས་གསུངས་མ་ཐག་ཏུ་བདག་གི་སྣང་བ་གནས་འགྱུར་ཏེ། གྲོགས་མཁའ་འགྲོ་གཉིས་དང་བཅས་གནས་དང་ཡུལ་གྱི་ཞིང་ཁམས་མང་པོ་ཉུལ་སྣང་འཆར་ཡང་། ཞིང་གི་བཀོད་པ་བསམ་གྱིས་མི་ཁྱབ་ཅིང་མཐའ་ཡས་པ་འདུག་པས། མཐར་ཆགས་སུ་བྲི་བ་སེམས་ལ་མ་ངེས། དེ་དག་གི་ནང་ནས་འོག་མིན་ཟངས་མདོག་དཔལ་རི་རེད་ཟེར་བའི་ཡུལ་ཡངས་པ་ཆེན་པོ་ས་གཞི་ཐམས་ཅད་རིན་པོ་ཆེ་སྣ་ཚོགས་ལས་གྲུབ་པའི་དབུས་སུ་རི་འདོད་འབྱུང་ནོར་བུ་གྱེན་བསྟན་ ༅ བཱ༔ གྱི་དབྱིབས་ཅན་དམར་ལ་འོད་ཟེར་འཕྲོ་བ། དེའི་སྟེང་དུ་ཕོ་བྲང་ཆེན་པོ་ཤར་ཕྱོགས་ཤེལ་ལས་གྲུབ་པ། ལྷོ་བེེ་ཌཱུཪྻ། ནུབ་པདྨ་ར་ག །བྱང་ཨིནྡྲ་ནི་ལ་ལས་གྲུབ་པ། སྒོ་བཞི་རྟ་བབ་བརྒྱད་ལ་སོགས་པ་གཞལ་ཡས་ཁང་གི་བཀོད་པ་ཐམས་ཅད་ཡོངས་སུ་རྫོགས་པ། དེའི་ཕྱི་ལ་རྡོ་རྗེ་རིགས་ཀྱི་ཞིང་ཁམས་ས་གཞི་ཐམས་ཅད་ཤེལ་ལས་གྲུབ་པ། མཚོ་དང་རྫིང་བུ་རྣམས་ཟླུམ་ལ་འཁྱིལ་བ། རི་དང་ནགས་ཚལ་ཐམས་ཅད་དཀར་ལ་གསལ་ཞིང་དྲི་བཟང་གི་ངད་འཐུལ་བ། དཔའ་བོ་དང་དཔའ་མོ་ཐམས་ཅད་ཀྱང་དཀར་གསལ་ཞི་བའི་ངང་ཚུལ་ཅན་ཤ་སྟག་ཏུ་འདུག་པས། བདག་གིས་གྲོགས་མཁའ་འགྲོ་གཉིས་ལ་འདིའི་ཞིང་ཁམས་གི་མིང་ལ་ཅི་ཟེར། དཔའ་བོ་དཔའ་མོའི་འདུ་ཚོགས་འདི་རྣམས་ཅི་ལགས་ཞུས་ཚེ། ཌཱཀྐི་ན་རེ། འདིའི་ཡུལ་ཞིང་ཁམས་འདུ་བ་དང་བཅས་པ་ཉེ་བའི་གནས་བདེ་ཆེན་འཁོར་ལོའི་བཀོད་པ་རེད། དེའི་གཡས་སུ་ཡུལ་ཞིང་ཁམས་ཐམས་ཅད་སེར་གསལ་འོད་དུ་འབར་བ། འདུ་ཚོགས་ཐམས་ཅད་རྒྱས་པའི་ཉམས་ཅན་དུ་ཡོདཔ་དེ་དག་རིན་ཆེན་རིགས་ཀྱི་ཞིང་ཁམས་ཀུན་སྣང་སྤྲུལ་པའི་ཉེ་བའི་གནས་རེད། གཡོན་ཕྱོགས་ན་ཡུལ་ཞིང་ཁམས་ཐམས་ཅད་ལྗང་གསལ་གྲུ་གསུམ་གྱི་དབྱིབས་ལ། འདུ་ བའི་ཚོགས་རྣམས་ཀྱང་ཁྲོ་ཞིང་གཏུམ་པ་དེ་དག་ཀརྨ་རིགས་ཀྱི་ཞིང་ནང་སྦས་པ་གཏུམ་དྲག་རོལ་པའི་གནས་རེད། དེའི་རྒྱབ་ལོག་ན་ཡུལ་ཞིང་ཁམས་ཐམས་ཅད་དམར་ལ་ཟླ་བ་ཕྱེདཔའི་དབྱིབས་ལ། འདུ་བའི་ཚོགས་རྣམས་ཀྱང་དམར་གསལ་ལང་ཚོ་ལྡན་པ་དེ་དག་པདྨ་རིགས་ཀྱི་ཞིང་ཁམས་ཀུན་གསལ་འདུས་པ་འཁོར་ལོའི་ཉེ་བའི་གནས་རེད། དེ་དག་ལས་སྟེང་དུ་འཕགས་པའི་ཡུལ་ཞིང་ཁམས་མཐིངག་སྒྲིབ་གཡོགས་དང་བྲལ་ཞིང་འཇའ་དང་འོད་ཀྱི་མིག་མང་རིས་སུ་འབྲེལ་བ། ནམ་མཁའ་བར་སྣང་ཐམས་ཅད་དྲི་བཟང་གི་ངད་འཐུལ་ཞིང་། ཡེ་ཤེས་སྒྱུ་མའི་འཇའ་སྐུ་ལྷའི་བུ་དང་བུ་མོ་མང་པོས་མཆོད་རྫས་དུ་མ་ཐོགས་ནས་དཔའ་བོ་དང་དཔའ་མོ་རྣམས་ལ་ཐུགས་གཉེས་པའི་མཆོད་པཕུལ་བ་དང་། བྱ་རིགས་སྣ་ཚོགས་ཀྱིས་འབྲུ་གསུམ་དབྱངས་སུ་གྱེར་ཞིང་། འབྱུང་བའི་སྒྲ་རྣམས་གསང་སྔགས་ཀྱི་ཆོས་ཚིག་རངབྱུང་དུ་ཡོད་པ་དེ་དག་ཀྱང་ཉེ་བའི་གནས་འཁོར་ལོ་གསུམ་པའི་ཞིང་སྣང་མངོན་སུམ་དུ་སྣང་བ་ཡིན་པས། ཞིང་ཁམས་དེ་དག་ཐམས་ཅད་གཞན་ཞིག་ཏུ་ཡོད་པར་མ་བསམ་ཞིག །ཁྱོད་ཀྱི་རྡོ་རྗེ་ཕུང་པོའི་གྲོང་ཁྱེར་དང་འབྲེལ་བར་གནས་སོ་ཟེར། ཡང་བདག་གིས་ཉེ་བའི་གནས་ཞེས་པ་འཁོར་ལོ་བཞི་པ་མན་ཆད་མེད་དམ་ཞུས་པས། བྃ༔ ཌཱཀྐི་ན་རེ། རིགས་ལྡན་མ་ཉོན་ཅིག །ཡེ་ཤེས་དྭངས་མའི་འོད་རྩ་ཞེས་པ་རྩ་གཙོ་བོ་གསུམ་ལས་གྱེས་པའི་གྲོང་ཁྱེར་བཅུ་དྲུག་ཡོད་དོ། །དེ་དག་འཁོར་ལོ་བཞིའི་གནས་སུ་བཞི་བཞིར་ཡོད་པ་ལ་དཀར་དམར་ཞལ་སྦྱོར་དུ་རྒྱུ་བ་ཡིན་ནོ། །དེ་ནི་ཉེ་བའི་གནས་དང་འབྲེལ་བའི་ཡེ་ཤེས་ཀྱི་རྩ་བཞི་ཡང་བརྗོད་དོ། །དེ་དག་གཉིས་སུ་དགྱེས་པའི་འཁོར་ལོ་བཞིའི་ཀློང་དུ་རྩ་ཡི་གྲོང་ཁྱེར་བརྒྱད་བརྒྱད་ཡོད་དོ། །དེ་ལ་ཡང་དཀར་དམར་རྒྱུ་བས་རྩ་རླུང་གནད་དུ་སྣུན་ན་བདེ་ཆེན་ཡེ་ཤེས་རྒྱས་པར་བྱེད་ཅིང་ཡུལ་ཆེན་སོ་གཉིས་དང་འབྲེལ་བར་ཡོད་དོ། །མདོར་ན་གནས་དང་ཡུལ་ཞིང་ཐམས་ཅད་རང་སྣང་དག་པའི་འོད་གསལ་གྱི་ཆོ་འཕྲུལ་ཡིན་པས་གུད་དུ་མ་བཅད་ཅིག །དབྱིངས་འདི་ལས་གཡོ་བ་མེད་པ་ཡིན་ནོ། །ཞེས་གསུངས་མ་ཐག་དབུས་ཀྱི་ཞིང་ཁམས་དང་བཅས་པ་གནས་འགྱུར་ཏེ། ཟངས་མདོག་དཔལ་རིའི་ཕོ་བྲང་མངོན་གསུམ་དུ་གསལ་པོར་མཐོང་བྱུང་བས་