Tibetan
ཞེས་སོགས་གསུངས་པ་ལ་བསམ་མནོ་བྱས་ཏེ། རང་སེམས་དྲན་པའི་རྟོད་ཕུར་དུ་བཅིང་ནས་བཟང་ངན་གཉིས་ཀྱི་བྱ་བ་ཐམས་ཅད་བཏང་སྙོམས་ལ་བཞག་གོ། །དེ་ནས་ཟླ་བ་དགུ་པའི་ཚེས་གཅིག་གི་ཉིན་རྫོང་མདའ་ཞེས་པའི་ཕུ་ན་གླིང་རི་སང་ཡོད་པས། མི་དཔོན་བསོ་རྒྱས་ཤི་མ་གསོན་ལྟ་བུར་འདུག་པས་དེ་གར་བདག་མ་འོངས་ཐབས་མེད་ཟེར་ནས། དཔོན་རྒན་གྱི་རེ་བ་ཆེན་པོ་བྱེད་འདུག་པས། སྔར་གྱི་འཁྲུལ་སྣང་དང་ད་ལན་གྱི་བྱ་བ་གཉིས་འདྲ་མཚུངས་པར་སྣང་ནས། བདག་དེ་གར་ཁྱུག་ཙམ་སོང་བས། མི་དཔོན་ཁོ་རང་དགའ་སྤྲོ་ཆེན་པོའི་སྒོ་ནས་ཁྱོད་དང་མཇལ་འཕྲད་འོང་བ་ཡིན་ བྃ༔ པས། ད་ང་རང་ཤི་ཡང་བློ་ལྷག་མེད་ཟེར་ནས་འཆི་བ་ལ་མི་འཇིགས་པ་ལྟ་བུར་བྱེད་འདུག་པས། བདག་གིས་ཀྱང་ཨ་མཆེད་ནུས་པ་ཁ་ཟེར་བའི་དཔེ་བཞིན། ཡི་དམ་ཐུགས་རྗེ་ཆེན་པོའི་དཀྱིལ་འཁོར་ལ་བརྟེན་ནས་དབང་བཞི་ཚད་ལྡན་དུ་བསྐུར་ནས་འཕོ་བ་སོགས་ཞིབ་རྒྱས་སུ་བྱས་ཚེ། ཁོ་རང་ཡང་ཡི་རང་ནས་དགའ་སྤྲོ་ཆེན་པོ་བྱེད་འདུག །དེ་སྐབས་ཉབ་དགེ་དགོན་པ་ཞེས་གསར་དགོན་ཞིག་འདུག་པ་དེ་གའི་དགོན་བདག་གི་སྤྲུལ་སྐུ་དཔོན་གཡོག་མང་པོ་ཞིག་གིས་མི་དཔོན་དེ་སང་ལ་སྐུ་རིམ་མཛད་ཀྱིན་འདུག་པས། སྤྲུལ་པའི་སྐུ་དེ་ཉིད་ཀྱི་དབུ་མཛད་པའི་ཐམས་ཅད་ཀྱིས་བདག་ལ་ཕྱག་དབང་ཞུས་ཚེ། ལེགས་ཉེས་ཀྱི་འཁྲུལ་སྣང་ཅུང་ཟད་ཤར་ཡང་། ཁོང་གནང་བཀག་གི་བཅའ་ཁྲིམས་དང་ལྡན་ཅིང་གསར་མ་བ་ཡིན་པ་དང་། བདག་མདོ་མེད་འཆོལ་མོ་ཡིན་པའི་རྐྱེན་ལ་བརྟེན་ནས། ཚེ་འགུགས་ཞིག་འདོན་བསམ་ཀྱང་གཞན་རྐྱེན་མཐོང་ཐོས་དོགས་གསུམ་གྱི་རྐྱེན་འབྱུང་འོང་སྙམ་ནས། ཁོང་གི་སྐུ་ཚེ་ལ་ཕན་ཐོགས་ཐབས་མ་བྱུང་བས། བུད་མེད་ཞིག་ན་རེ། ཁྱོད་ཀྱིས་འདི་སང་ལ་ཕན་ཐབས་ཞིག་བྱེད་སྙམ་ན། གུ་རུའི་སྐུ་བརྙན་མི་ཚད་ཙམ་དང་། བདུད་འདུལ་མཆོད་རྟེན་ཚད་ལྡན་བཅས་བཞེངས་གྲུབ་ ན་རིམ་བཞིན་དུ་བླ་སྤྲུལ་རྣམས་ཀྱི་སྐུ་ཚེ་ལའང་ཕན་ངེས་ཀྱང་དེ་ཁོང་སང་གིས་བསྒྲུབ་དཀའ། དམ་སྲི་མི་རུ་བརྫུ་བའི་སེར་གཟུགས་དང་། བདུད་འདྲེ་སྙིང་ལ་ཞུགས་པ་རྣམས་ཀྱིས་ཡུལ་དགོན་གྱི་ཆབ་སྲིད་ལ་གནོད་ཅིང་། བླ་སྤྲུལ་རྣམས་ཀྱི་སྐུ་ཚེ་ལ་བར་ཆད་བྱེད་པ་དང་། ཁྱད་པར་སྔ་འགྱུར་རྙིང་མའི་བསྟན་དགོན་ཕྲན་བུ་ཙམ་ལ་ཡང་ཤིན་ཏུ་གནོད་འཚེ་ཆེ་བ་ཡིན་པས། ཁྱོད་ཀྱང་བྱ་བ་གང་ཐད་ནས་སྟབས་གཟབ་བྱེད་པ་གལ་ཆེ། དང་པོ་ལེགས་ལེགས་འདྲ་ཡང་ཕུགས་མི་བརྟན་པས་མཐུན་རྐྱེན་དང་འགལ་རྐྱེན་མ་ནོར་ཨང་། ཁྱོད་ཀྱི་སློབ་འབངས་ཐམས་ཅད་ཀྱིས་འདི་རྣམས་ལ་བརྟག་དཔྱད་ཞིབ་པར་མ་བྱས་ན། ཡུལ་གནས་འདི་ཡང་དྲི་ཟའི་གྲོང་ཁྱེར་གྱི་དཔེར་འགྱུར་ནས། ཁོར་སློབ་དམ་ཚིག་གི་གསེར་ཐག་གཡའ་ཡིས་གོས་སྲིད་དོ། །ཟེར་ནས་བྱུང་དང་འབྱུང་འགྱུར་གྱི་གཏམ་དུ་མ་ཡོདཀྱང་ཡི་གེར་དོགས་ནས་མ་བྲིས་སོ། །དེ་ནས་ལོ་ཁྱིམ་དེའི་ཟླ་བ་དགུ་པའི་ཡར་ཚེས་ལྔའི་ཉིན་བེེ་ཕུག་མཁའ་འགྲོ་ཡང་རྫོང་དུ། བསྟན་འཕེལ་ཡར་དགོན་སྤྲུལ་སྐུ་ངག་འབྱུང་རིན་པོ་ཆེ་དང་། མར་དགོན་སྤྲུལ་སྐུ་འཆི་མེད་རྣམ་རྒྱལ། མཁར་དམར་ཡང་སྲིད། ཆུ་ངོས་པད་དཀར་སྤྲུལ་སྐུ་ལ་སོགས་ཕྱོགས་འདུས་ཀྱི་བླ་སྤྲུལ་རྣམས་དང་། རང་སློབ་ བྃ༔ དམ་པ་ཤེས་རབ་འོད་ཟེར་དང་། ཁྲོམ་དགེའི་མཁའ་འགྲོ་ཟླ་སྒྲོན། གཞན་ཡང་དེར་འདུས་ཀྱི་སློབ་འབངས་རྣམས་ལ། གྲུབ་དབང་སྐྱབས་རྗེ་གཏེར་ཆེན་ཡབ་སྲས་ཀྱི་གསུང་གི་རྩ་གསུམ་ཁྲོས་མའི་ཆོས་སྐོར་གྱི་དབང་ལུང་དང་། རང་གི་ཉམས་རིས་ཕག་མོའི་ཟབ་སྒྲུབ་ཀྱི་དབང་ལུང་སོགས་ཁོང་རྣམས་རང་རང་གི་ཐུགས་བཞེད་ལྟར་གྲུབ་རྗེས། ཡུམ་བཀའ་བདེ་ཆེན་རྒྱལ་མོའི་སྒོ་ནས་ལྷན་རྒྱས་ཀྱིས་ཚོགས་མཆོད་འབུལ་སྐབས། མཁའ་འགྲོ་ཡང་རྫོང་གི་མཆོད་གནས་གསང་ཕུག་གི་གནས་སྒོ་འབྱེད་པའི་དུས་ཚིགས་ཡིན་ཞེས་མཁའ་འགྲོའི་བརྡ་བྱང་གསལ་ཡང་། མི་ལྤགས་ཀྱི་གསེབ་ལ་ཐེའུ་རང་གིས་འཕྲུལ་འགྱེད་པར་སྣང་བ་ལ། རང་གིས་ཐེ་ཚོམ་བྱས་པའི་རྐྱེན་གྱིས་རྟེན་འབྲེལ་རྗེས་མཐུད་ལ་བཞག་གོ་།དེ་ནས་ངེད་རྣམས་རང་སློབ་དམ་པ་ཤེས་རབ་འོད་ཟེར་གྱིས་སྐྱེལ་མ་སོགས་ཀྱི་མཐུན་རྐྱེན་མཛད་ནས་རང་གནས་ལ་འཁོད་དེ། སྐྱབས་རྗེ་བསོད་སྤྲུལ་རིན་པོ་ཆེས་ཐུགས་དགྱེས་པར་མཛད་ཅིང་བླ་མའི་ཐུགས་ཀྱིས་ཟིན་པར་གྱུར་ཏོ། །དེ་ནས་རང་ལོ་ཞེ་གཉིས་ལོར་ཟླ་བ་གསུམ་པའི་ཡར་ཚེས་ལྔའི་ཉིན་སྐྱབས་རྗེ་བསོད་སྤྲུལ་རིན་པོ་ཆེའི་ཞབས་བརྟན་ལ་ཚེ་ལྷ་རྣམ་གསུམ་གྱི་སྐུ་སྤར་ནས་བསྡང་ཡོད་ཚེ། ཉི་མ་ཤིན་ཏུ་ཚ་ ཆེ་བའི་རྐྱེན་གྱིས་རང་གི་མིག་འཕྲུལ་བ་ལྟ་བུར་གྱུར་ནས། ནམ་ཁའི་ཀློང་ནས་བུ་མོ་མཛེས་མ་ཡིད་དུ་འོང་བ་ཞིག་བྱུང་ནས་འདི་སྐད་ཟེར། ཤར་ཙན་དན་བསིལ་གྲིབ་ལྷོ་རུ་འཕེན། །སྨད་དུག་སྦྲུལ་མཇུག་མ་སྟོད་ལ་འཁྱིལ། །མི་ཤེས་མེད་ཞིག་གིས་རྐྱེན་བསྐུལ་ནས། །ཡུལ་དྲུག་གི་བདེ་སྐྱིད་དུ་རུས་འཇོམས། །ལྷ་དམར་པོ་གསུམ་གྱིས་མ་འདུལ་ན། །ལས་གང་བྱས་སྡུག་བསྔལ་རིན་གྱིས་ཉོ། །གནས་ངན་སོང་ཟེར་ཡང་དེ་ལས་མེད། །རང་གཞན་ཀུན་འདི་ཕྱི་གཉིས་ཕུང་བསྒྲུབ། །ལྷ་མཆོག་གསུམ་གཏན་གྱིས་སྐྱབས་སྤངས་ནས། །ལས་མི་དགེ་རྩི་སྨན་བཞིན་དུ་སྤྱོད། །དུས་མི་འགྱུར་མི་རྣམས་འགྱུར་བའི་ཚེ། །ལྷོ་སྤོ་ཀོང་མཚམས་ནས་དམ་སྲི་ལང་། །ཁོང་ནུས་ལྡན་དཔའ་བོས་མ་འདུལ་ན། །སྟོད་ར་ས་འཇག་མའི་རྒྱང་གླུ་ལེན། ། ཤར་དུ་བ་སྔོན་པོ་ནུབ་ཏུ་འཕྱོ། །རང་གཞན་གྱི་རིན་ཆེན་གཞན་གྱིས་འཕྲོག །མདོག་དམར་པོ་གསེར་གྱི་ཁ་དོག་ངོམས། །དེའི་རྐྱེན་གྱིས་བོད་ཁམས་བསོད་ནམས་འགྲིབ། །བརྟེན་གསུམ་ལ་སྔར་མེད་བཀོད་པ་དར། །ཕུ་ཕུ་ལིང་པའི་སྲོག་ལ་བབ། །མགོན་པད་འབྱུང་སྤྲུལ་པའི་ཐབས་ཀྱིས་འདུལ། །ལྷ་དབང་ཕྱུག་དམར་ནག་དྲག་སྒྲུབ་གནད། །ནུབ་ཁུ་འཕང་འཐོར་ནས་དུ་བ་ བྃ༔ འཕྱོར། །དེ་སེལ་བྱེད་ཅང་ཤེས་ངུར་མོ་ཡི། །རྣོ་དབལ་གྱི་མེ་ལྕེ་ཕྱོགས་སུ་གྱེར། །དེས་རེ་ཞིག་བོད་འབངས་སྐྱོབ་པར་ངེས། །བྱང་མུན་པའི་ཁྲོད་ཀྱི་སྤྲེའུ་ཡིས་། ། མདངས་དམར་སེར་ཚོན་གྱིས་ཁ་དོག་བསྒྱུར། །ལྷོ་བ་དན་དམར་པོ་རླུང་གིས་བསྐྱོད། །བློ་རིག་པས་དཔྱོད་ཤེས་མ་གཟབ་ན། །སྲོག་མར་མེ་རླུང་དང་འཕྲད་ཉེན་ཡོད། །རང་བྱ་བ་མི་ལ་བློ་མ་གཏད། །མ་མཁའ་འགྲོའི་ཞལ་ལུང་བཞིན་དུ་རེམ། །ཕ་བླ་མའི་གདམས་པའི་སྙིང་བཅུད་སྐོར། །དུས་བཅུ་ཕྲག་གཉིས་ལ་བཀའ་རྒྱ་མཛོད། །སྐལ་ལྡན་གྱི་ཆོས་བདག་དུས་སུ་འཕྲད། །དུས་སྙིགས་མའི་མི་ལ་བློ་མ་འཁེལ། །ཡུལ་ཆོས་བརྒྱད་ཁྲོད་དུ་མགོ་མ་འཁོར། །ཟས་ལོག་འཚོ་དཀོར་ནག་ཁུར་མ་ལྕི། །གནས་འདུག་ས་གཅིག་ཏུ་གཞི་མ་བཅའ། །ཡུལ་ངེས་མེད་འགྲིམས་ན་བསྟན་འགྲོར་སྨན། །དུས་རི་མོ་ཅན་གྱི་འཛུམ་ཟེར་ལ། །དཔལ་ཡེ་ཤེས་སྤྲུལ་པ་མིང་། །དེ་འཕྲད་ན་རེ་ཞིག་ཚེ་འཕྲང་སེལ། །གནད་དེ་དང་ལྡན་པར་མ་གྱུར་ན། །མགོན་པད་འབྱུང་སྐུ་བརྙན་གྲངས་འབུམ་དང་། །དབྱིངས་ཌཱཀྐིའི་ད་ལ་ཚོགས་མཆོད་འབུམ། །དཔལ་མ་ཧཱ་ངྷ་ཛ་ས་མ་ཐ། །ཞེས་ཟེར་བའི་མཚམས་སུ་སྐུ་སྤར་རོགས་རྣམས་ཐོན་ བྱུང་བ་ལ་རྐྱེན་ནས་ཚིག་མཇུག་མ་རྫོགས་པར་མི་སྣང་བར་ཡལ་ལོ། །དེ་ནས་ལོ་ཁྱིམ་དེ་གའི་ཟླ་བ་ལྔ་པའི་ཡར་ཚེས་ལ་ཟླ་སྨད་རྩང་སྒར་རི་ཁྲོད་ཀྱི་འདུས་སྡེ་རྣམས་ལ། སྐྱབས་རྗེ་གཏེར་ཆེན་བདུད་འཇོམས་རིན་པོ་ཆེའི་གསུང་འབུམ་ཡོངས་རྫོགས་ཀྱི་དབང་ལུང་འདོན་གྲུབ་བྱེད་སྐབས། ཁམས་རི་བོ་ཆེའི་གྲྭ་ཚང་ནས་ཡིན་ཟེར་བའི་བཙུན་ཆུང་དབང་རྒྱལ་ཚེ་རིང་དང་། བཀྲ་ཤིས་རྣམ་རྒྱལ་ཟེར་བ་གཉིས་ཐོན་བྱུང་བས། བདག་གི་བསམ་པ་ལ་སྔར་རྨ་སྤོམ་རའི་ཆ་ངག་དང་འདྲ་མཚུངས་པར་སྣང་ཡང་ཆ་མ་ཆོད་པར་ཁོང་གཉིས་ལ་དྲིས་ཚེ།ཁོང་གཉིས་ན་རེ། ངེད་གཉིས་ཕ་ཡུལ་ས་ཐག་རིང་བས་གྲོ་ཁ་བཅའ་ལག་སོགས་མེད། འོན་ཀྱང་སློང་མོ་རེ་བྱས་ཏེ་སྔོ་ལ་སོགས་པའི་འཚོ་བར་བརྟེན་ནས། གཏེར་ཆེན་བདུད་འཇོམས་པའི་གསུང་ཆོས་རེ་ཅི་ནས་ཀྱང་ཨེ་ཐོབ་སྙམ་པ་ཡིན་ཟེར་ནས། ཁོང་གཉིས་བཟའ་བཅའ་མེད་ཀྱང་སྔོ་ངད་ལ་བརྟེན་ནས་དབང་ལུང་ཞུ་ཆགས་བྱེད་འདུག །ནང་མོ་དབང་གིས་སྟ་གོན་བསྐུར་བའི་སྐབས་ཁོང་གཉིས་ཀྱི་མེ་ཏོག་ཤར་དང་ལྷོ་རུ་བབ་པས་རྟེན་འབྲེལ་ཤིན་ཏུ་དགེ་བར་སྣང་། དེ་ནས་དབང་ལུང་རྣམས་མཐར་ཕྱིན་ནས་བཏང་རང་གི་ཚོགས་འཁོར་ཆེན་པོའི་སྐབས། རིག་འཛིན་རྣམས་ཀྱི་ཚོགས་གྲལ་དུ་དསྔ་མ་བྱོན་པའི་ བྃ༔ རྣལ་འབྱོར་པ་དབུ་སྐྲ་དང་སྨ་ར་དཀར་སང་ངེ་བ་ཞིག་མཇལ་བྱུང་བས། བདག་གིས་བླ་མ་དེ་སུ་ཞིག་ཡིན་སྙམ་ཚེ་རྣལ་འབྱོར་པ་དེས་བརྡ་ལན་མཛད་ནས་བལ་ཡུལ་ཕྱོགས་ཀྱི་རྟོགས་ལྡན་སུ་ཁ་རཱ་ཛ་ཛྙཱ་ན་ཡིན་གསུངས་པར་སྣང་། རྣལ་འབྱོར་པ་དེ་ད་ལན་གྱི་ཚོགས་གྲལ་ལ་བྱོན་དགོས་པའི་རྟེན་འབྲེལ་དང་། རང་གཞན་ལ་དགོས་ཆེད་དུ་མ་ཡོད་པར་གསུངས་ཀྱང་མི་ཆོས་བླ་མའི་རྫུན་གྱིས་རང་གཞན་བསླུ་བར་དོགས་ནས་མ་བྲིས་སོ། །དེ་ནས་ངེད་རྣམས་རང་གནས་ལ་འཁོད་ནས་ཞག་ཆ་ཤས་སོང་སྐབས། རང་སློབ་དམ་པ་ཤེས་རབ་འོད་ཟེར་དཔོན་གཡོག བྱོན་ནས་ལུགས་གཉིས་ཀྱི་གསུང་སྒྲོས་དང་། ཁྱད་པར་ཁོང་གིས་གྲུབ་དབང་སྐྱབས་རྗེ་གཏེར་ཆེན་ཡབ་སྲས་རྣམ་གཉིས་ཀྱི་གསུང་འབུམ་པུསྟ་ཀ་བཞི་བཅུ་དང་། བདག་གི་ཉམས་རིས་སྐོར་རྣམས་དང་། ཁྱོན་པུསྟ་ཀ་བཞི་བཅུ་ཞེ་བཞི་སོགས་བྲི་བཞེངས་ལེགས་པར་ཚར་བས། དེ་རྣམས་དབང་ལུང་ཁྲིད་རྒྱུན་དང་བཅས་པ་ཐམས་ཅད་ལྷག་ལུས་མེདཔར་འདོན་དགོས་གསུངས་ཚེ། བདག་གིས་སྐྱབས་རྗེ་བསོད་སྤྲུལ་རིན་པོ་ཆེ་ལ་དེ་ལྟར་གྱི་བཀའ་གནང་ཞུས་ཚེ། སྐྱབས་རྗེ་དེ་ཉིད་ཀྱིས་ཀྱང་ཐུགས་ཤིན་ཏུ་དགྱེས་བཞིན་པས་བཀའ་གནང་ཐོབ་པ་ལ་བརྟེན་ནས་རང་གིས་དེ་ལྟར་ བགྱི་བར་ཐག་བཅད་དོ། །དེ་ནས་རང་གི་ཉེ་གནས་ཚུལ་ཁྲིམས་རྡོ་རྗེ་དང་། ལྷ་རྟེན་གཉིས་ཀྱིས་ཡིག་དཔེ་རྣམས་ཞུ་དག་ལེགས་པར་གྲུབ་རྗེས། ཟླ་ཚེས་བཟང་པོར་ཡི་གེ་རྣམས་ལ་རབ གནས་བརྟན་བཞུགས་སྐབས། འདབ་བཞིའི་རྣམ་པའི་ཁ་བས་ཆར་འབེབས་ཤིང་། འབྲུག་སྒྲ་གྲགས་པ་ལ་སོགས་པ་ངོ་མཚར་བའི་བཀྲ་ལྟས་བཟང་པོ་བྱུང་ངོ་། །དེའི་སྐབས་རི་བོ་ཆེའི་སྐལ་ལྡན་གཉིས་ཀྱིས་རྩ་རྫོགས་ཐོད་རྒལ་རྣམས་ཀྱི་མཚམས་མཐར་ཕྱིན་པར་བྱས་ཚེ། མཁའ་འགྲོའི་ཞལ་ལུང་བཞིན་རིགས་དང་མཐུན་པའི་མིང་དབང་རྒྱལ་ལ་འགྱུར་མེད་ཚུལ་ཁྲིམས་དང་། བཀྲ་རྣམ་ལ་བསམ་གཏན་རྒྱ་མཚོ་ཞེས་པའི་མིང་གི་ཅོད་པན་བྱིན་ནོ། །ལོ་ཁྱིམ་དེའི་ཟླ་བ་བཅུ་གཉིས་པའི་མཁའ་འགྲོའི་ཉེར་ལྔའི་ཉིན། འགྱུར་མེད་ཚུལ་ཁྲིམས་ཀྱི་སྤུན་ཡ་བཀྲ་ཤིས་ཚེ་རིང་དང་། སྐྱུ་རུ་བླ་མ་ཚེ་དབང་རིག་འཛིན། སྤྲུལ་སྐུ་ཀུན་བཟང་རིག་པའི་རྡོ་རྗེ་སོགས་དཔོན་གཡོག་བཞི་བྱོན་ནས། ཁོང་རྣམས་ལ་གཏེར་ཆེན་བླ་མ་རིན་པོ་ཆེའི་གསུང་འབུམ་གྱི་དབང་ལུང་སོགས་ཐོབ་དགོས་པའི་གསུང་སྒྲོས་དང་། ཁྱད་པར་བཀྲ་ཤིས་ཚེ་རིང་ནས་སྤྲུལ་སྐུ་ཀུན་བཟང་དེ་ངེད་ཅག་གི་རྩ་བའི་བླ་མའི་སྐུ་སྲས་ཡིན་པས། ཁོང་ལ་ལུགས་གཉིས་གང་ཐད་ནས་གཏེར་ཆེན་བླ་མ་ཡབ་ བྃ༔ སྲས་ཀྱི་བསྟན་གཞི་འཛིན་ཐུབ་ངེས་ཀྱི་དབང་ལུང་གདམས་ཁྲིད་སོགས་ཞིབ་རྒྱས་སུ་བྱེད་དགོས་ཟེར་བ་དང་། སྔར་གྱི་སྤོམ་རིའི་ལུང་བསྟན་དང་མཐུན་པར་སྣང་ནས་རྟེན་འབྲེལ་རྗེས་མཐུད་དུ་བཞག་གོ། །དེ་ནས་རང་ལོ་ཞེ་གསུམ་དུས་འཛིན་ཤིང་ཁྱིའི་ལོ་ཟླ་བ་དང་པོ་ནས་བཟུང་སྟེ། རི་བོ་ཆེའི་གྲྭ་ཚང་གི་སྤྲུལ་སྐུ་དཔོན་གཡོག་རྣམས་ལ། གྲུབ་དབང་སྐྱབས་རྗེ་གཏེར་ཆེན་བླ་མ་རིན་པོ་ཆེའི་གསུང་གི་སྔོན་འགྲོ་དང་། རྫོགས་ཆེན་མ་བསྒོམས་སངས་རྒྱས། མྱུར་ལམ་ཐོད་རྒལ་གྱི་ཁྲིད། ཤེས་རིག་རྡོ་རྗེ་རྣོན་པོ་ལ་སོགས་པའི་ཁྲིད་དང་། གཞན་ཡང་རྩ་གསུམ་གྱི་དབང་ཁ་ཆ་ཤས་བཅས་གྲུབ་རྗེས། སྤྲུལ་སྐུའི་དབུ་མཛད་པའི་ཁོང་རྣམས་ཀྱིས་སྔོན་གནས་རྗེས་དྲན་གྱི་མོས་གུས་གློ་བུར་དུ་འཁྲུངས་ནས། གཏེར་ཆེན་བླ་མ་རིན་པོ་ཆེའི་གསུང་འབུམ་ཡོངས་རྫོགས་བྲི་བར་དམ་བཅའ་དང་། འཛིན་སྐྱོང་གི་ཐུགས་རྒྱ་བསྐྱེད་ཚེ། རང་ནས་ཀྱང་དེ་ལྟར་གྱི་ཡི་གེ་བྲིས་གཞི་ཤོག་གུ་དང་། སྣག་མཚལ་སོགས་དང་། ཁོང་རྣམས་ཀྱི་གསོལ་བཅའ་སོགས་ཀྱི་མཐུན་རྐྱེན་ཡོན་བདག་བྱས་ཏེ། ལོ་ཁྱིམ་དེ་ཀའི་ཟླ་བ་གསུམ་པའི་ཚེས་ལྔའི་ཉིན་གཟའ་ལེགས་པ་བརྒྱད་འཛོམས་ཀྱི་དུས་སུ། ཐུགས་སྒྲུབ་རྣམ་གསུམ་ལས་ཐོག་མར་ བླ་མའི་ཐུགས་སྒྲུབ་ཀྱི་ཆོས་སྐོར་འཇམ་དཔལ་གསང་བ་འདུས་པའི་བྲིས་ཀྱི་དབུ་བཙུག་གོ། །དེའི་ནུབ་རྨི་ལམ་ལ་མཁའ་འགྲོ་བདེ་བའི་གོ་ཆ་ཡིན་སྐད་པས་འདི་སྐད་ཟེར། དབྱིངས་མི་འགྱུར་ཆོས་སྐུའི་གཞི་ཀློང་ནས། །མདངས་སྣ་ཚོགས་སྒྱུ་འཕྲུལ་དྲྭ་བའི་སྤྲིན། །རྩལ་འགགས་མེད་གང་འདུལ་རྟེན་འབྲེལ་ངོམས། །བྱང་འདམ་ཁྲོད་ཀྱི་ནོར་བུ་ལྷོ་རུ་འཕེན། །གངས་དཀར་གྱི་རྩེ་ལ་ཉི་མ་ཤར། །སེང་མ་བུ་གཡུ་རལ་ལྷོ་ནས་རྒྱས། །གྲོང་མཐའ་ཡི་སེང་གེ་བག་ལ་ཞ། །ནུབ་ངང་ཁྱུ་ཁྱུ་ཚོགས་ལས་ཀྱིས་བསྐུལ། །ལས་ལྡན་པ་རང་སྐལ་ཆོས་དང་འཕྲད། །གསེར་ར་གན་མདོག་གི་མ་ནོར་དགོས། །བློ་རྩེ་གཅིག་རང་སྐལ་ཉམས་བླངས་ན། །དོན་གཉིས་ཀྱི་འབྲས་བུ་ཚེ་འདིར་རྙེད། །བློ་ཚབ་ཚུབ་ཡུལ་གྱི་རྗེས་འབྲངས་ནས། །སེང་དཀར་གྱི་གསོབ་ཀྱི་བརྫུ་བག་ལ། །རིན་ཆེན་དང་ནོར་ན་དོན་གཉིས་ཀྱི། །འབྲས་ཆོལ་བ་ཆུ་ཤིང་འབྲས་བུའི་དཔེ། །བློ་བརྟན་པོའི་བརྩོན་འགྲུས་ཅང་ཤེས་དེ། །ཤེས་རབ་ཀྱི་འོད་འབར་ཡངས་པ་རུ། ། བསྐུལ་ལྕགས་ཀྱི་སྲབ་ཁ་མ་ནོར་བར། །ནོར་སྐྱོང་གི་མཛུམ་མདངས་ངོམས་པའི་དུས། །ཆོས་བཅུད་ཀྱི་སྙིང་ནོར་ཕ་ཕོག་དེས། །ལྷོ་མུན་པར་སྒྲོན་མེའི་འོད་བརྒྱ་འབར། །དེའི་བདེ་སྐྱིད་ཉི་ བྃ༔ མ་སྤྲིན་བྲལ་དཔེ། །གནས་མི་རིང་ཉེ་ནས་རྐྱེན་ངན་བསྐུལ། །ལས་མི་འདོད་སྣ་ཚོགས་འཕྲུལ་ངོམས་ཚེ། །བློ་བརྟན་པོས་རང་ས་མ་བཟུང་ན། །སྲིན་བུ་ཡི་ཁ་ཆུས་འཆིང་ཉེ་བས། །སྟབས་གཟབ་པ་ཌཱཀྐིའི་གསང་ཚིག་ཡིན། །རྐྱེན་དེ་ཡི་དབང་དུ་མ་གྱུར་ན། །རིག་འཛིན་མིང་སྤོ་ཡི་ཕྱོགས་སུ་དགེ །གནས་དབེན་པར་སྒྲུབ་ཚུགས་ཟིན་གྱུར་ན། །ཚེ་འདི་རུ་དོན་གཉིས་འབྱུང་བར་ངེས། །ཡུལ་སྣང་གི་རྐྱེན་ལ་མ་ཞེན་དགོས། །རྡོ་རྗེའི་མིང་འབྲས་ལྗོངས་སྦས་གནས་སུ། །ལམ་ཟུང་འཇུག་སྙིང་པོའི་དོན་བསྒོམ་ན། །སྤྲིན་བྲལ་གྱི་ཉི་བཞིན་མུན་ཀུན་སེལ། །འཛུམ་ཟེར་གྱི་མདངས་ལ་གཟབ་གལ་ཆེ། །དེར་འཕྲད་ན་སྲོག་གི་མར་མེ་དེ། །དྲི་བཞོན་གྱི་རྐྱེན་དང་འཕྲད་ཉེ་བས། །མགོནཔད་འབྱུང་སྤྲུལ་པས་མ་སྐྱོབ་ན། །ཚེའི་འཕེན་པ་ནམ་མཁའི་དབང་གཞུའི་དཔེ། །འགྱུར་མེད་མིང་སྔོན་གྱི་སྨོན་ལམ་མཐུས། །ཟབ་གསང་གི་སྙིང་པོའི་ཆོས་དང་འཕྲད། །གཏེར་གཉིས་ཀྱི་བསྟན་པའི་གསོས་སུ་སྨན། །དགྲ་གཉེན་གྱི་ཡུལ་ལ་མགོ་འཁོར་ན། །རང་དོན་གྱི་ནོར་བུ་འདམ་དུ་འཕྲང་། །གནས་ངེས་མེད་འགྲིམ་པའི་སྟབས་ལྡན་ན། །རང་གཞན་གྱི་དོན་དེ་ངང་གིས་འགྲུབ། །བསམ་གཏན་གྱི་མིང་ འཛིན་རི་སུལ་འགྲིམ། རིན་ཆེན་སྤུངས་ཞེས་པའི་གནས། མཆན། །ལམ་ཟབ་ཀྱི་མྱུར་ལམ་མཐར་འཁྱོལ་ན། །གནས་རིན་ཆེན་གླིང་ནས་གྲུབ་འབྲས་མངོན། །ཡུལ་སྲིན་བུ་མེ་ཁྱེར་གཟུགས་ངོམས་ཚེ། །བློ་བརྟན་པོའི་རང་ས་བཟུང་བ་གནད། །བདུད་བར་ཆད་མི་རིང་ཉེ་ནས་སྡང་། །དཔྱོད་ཤེས་ཀྱི་སྟབས་ཁ་གཟབ་གལ་ཆེ། །ཀུན་བཟང་མིང་སྐྱེ་སྔོན་ཁྱོད་ཀྱི་ཐང་། །རྟེན་འདི་རུ་གཏེར་གསུམ་བསྟན་པའི་གཞིའི། །ལས་སྨོན་ལམ་སྐལ་བར་འཕྲོ་ལྡན་ཡང་། །སྲིནབྱ་ཡི་སྒྱུ་མའི་དཔེ་ངོམས་ཚེ། །སེང་དཀར་པོ་གྲོང་མཐའི་ཀུ་ཀུར་འགྲན། །ལྷ་དམར་ནག་ཕྲིན་བསྒྲུབ་ལས་བརྩོན་ནས། །སྔོན་ལྷག་ལྷ་ཕག་ཁྲོས་སེང་གསུམ་དང་། །མགོན་པད་འབྱུང་གྲོ་ལོད་ཕུར་པ་ཡི། །མཚམས་སྒྲུབ་དང་ཚོགས་མཆོད་གནད་གལ་ཆེ། །གནད་དེ་དང་ལྡན་པར་མ་གྱུར་ན། ། ཡུལ་དྲི་ཟའི་བུ་མོས་འཛུམ་གྱིས་འཁྱུད། །ལས་མཐའ་དམར་མི་འདོད་ངང་གིས་འཁོར། །བདུད་སབྟའི་དབང་དུ་འགྲོ་ཉེ་བས། །བློ་རིག་པས་དཔྱོད་ཤེས་གཟབ་གལ་ཆེ། །ཡ་ཡཿ ས་འཛིན་དམར་པོའི་ལེགས་ཉེས་སྣ་ཚོགས་ངོམས། །ལྷོ་ཡི་རྒྱལ་མཚན་རླུང་ལྷའི་ཉེ་ཆར་འཕེན། །དམར་པོ་ལྷ་གསུམ་ལས་སུ་ཕྲིན་བཅོལ་ན། །གཏེར་གཉིས་བསྟན་པ་རེ་ཞིག་དེའི་ཕྱོགས་ བྃ༔ གནས། །ཆོས་འཛིན་གྱི་སྐྱེས་བུ་མིང་དང་འཕྲད། །དེ་ཡིས་ཚེ་ཆོས་གདུལ་བྱ་རིམ་གྱིས་རྒྱས། །ནག་པོ་བདུད་ཀྱི་བར་ཆད་སྐབས་སྐབས་སྡང་། །རིག་པས་དཔྱོད་ལ་ཐམས་ཅད་རོ་སྙོམས་སྤྱོད། །གཏེར་སྟོན་བསྟན་པ་མི་འདོད་བཞིན་དུ་དར། །ནོར་བུ་རིན་ཆེན་འདམ་གྱིས་གོས་མི་སྲིད། །བདེ་བསྐྱེད་དཔའ་བོ་ཐབས་མཁས་གྲོགས་སུ་བསྟེན། །བུ་སློབ་ཆོས་བདག་སྨོན་ལམ་དབང་གིས་འཛོམས། །རང་སྐལ་ཆོས་ཀྱི་གདམས་པ་ཉམས་བླངས་ན། །སྟོན་འཁོར་དབྱེར་མེད་དཔལ་རིར་འཁོད་པར་ངེས། །གསང་ཚིག་གཞན་དུ་མ་སྨྲ་ཨ་ཐམ་རྒྱ། །ཞེས་ཟེར་ནས་མི་སྣང་བར་གྱུར་ཏོ། །དེ་ནས་ངེད་ཅག་གིས་ཟླ་བ་བཞི་པའི་ནང་གི་དུས་མཆོད་ཆེན་མོ་སོགས་འདོན་ནས། ཚེས་བཅུ་དགུའི་ཉིན་རང་སློབ དམ་པ་ཤེས་རབ་འོད་ཟེར་གྱི་གདནས་བེེ་ཕུག་མཁའ་འགྲོ་ཡང་རྫོང་དུ་སོང་ནས། ཕྱོགས་འདུས་ཀྱི་བླ་སྤྲུལ་རྣམས་ཀྱི་གཙོས་འདུས་སྡེ་བརྒྱ་ཕྲག་ཡ་བརྒལ་ཙམ་ལས་མི་མང་བར་བྱས་ཏེ། གྲུབ་དབང་སྐྱབས་རྗེ་རྣམ་གཉིས་གསུང་འབུམ་ཡོངས་རྫོགས་ཀྱི་དབང་ལུང་སོགས་འདོན་སྐབས། ཉིན་གཅིག་གནས་སྲུང་ཡིན་སྐད་པའི་བྱིའུ་སྐད་ཤིན་ཏུ་སྙན་པ་ཞིག་གིས་འདི་སྐད་ཟེར། ཏིང་ཏིང་ ཏིང་ཏིང་རྣལ་འབྱོར། །བདེ་བདེ་བདེ་བའི་རྡོ་རྗེ། །སྙན་སྙན་སྙན་པའི་གཏམ་ལ། །དཔྱོད་དཔྱོད་རིག་པས་དཔྱོད་དང་། །མཐོང་མཐོང་ངོ་མཚར་ལྟད་མོ། །ལྡན་ལྡན་ལས་ལྡན་སྐྱེས་བུར། །མངོན་མངོན་བཀོད་པ་སྣ་ཚོགས། །ཁྱོད་ལ་གསང་ཚིག་སྨྲའོ། །གསང་རྫོང་རྡོ་རྗེའི་ཕུག་གི །གནས་སྒོ་དུས་སུ་འབྱེད་ནས། །བསྒོམ་ཁྲེགས་ཆོད་ཐོད་རྒལ། སྒྲུབ་མཚམས་བསྙེན་སྒྲུབ༈ ཚོགས་བསགས་བརྩོན་པས།ཚོགས་དང་མར་མེ། མཆན། །རབ་ནི་ཟག་མེད་དབྱིངས་གྲོལ། །འབྲིང་གིས་ཆོས་ཉིད་དོན་རྟོགས། །ཐ་མས་སྐྱེ་བ་གསུམ་ནས། །འཕགས་མས་དངོས་སུ་བྱིན་རློབས། །དེ་སོགས་ཡོན་ཏན་དུ་མ། །འཕྲུལ་གྱི་བརྡ་ལས་གསལ་ངེས། །རང་སྐལ་སེམས་དཔའ་མིང་། །ཅང་ཤེས་སྔོན་མོ་འཛིན་དཔེ་།ནུབ་ནས་ཤར་དུ་ཕྱོགས་ཚེ། །ཁྱོད་དང་འཕྲད་པ་གལ་ཆེ། །ཆོས་ཀྱི་སྙིང་པོ་ཐུགས་ཏིག །ལག་ཏུ་ལོན་པ་ཨེ་ནམ། །དུས་བཞིའི་ཚེ་ཡི་གེགས་རྐྱེན། །དེ་ཡིས་སེལ་བ་ཐ་ཚིག །དེ་ལྟར་རྟེན་འབྲེལ་དབེན་ཚེ། །པདྨའི་མིང་འཛིན་གསུམ་གྱིས། །བརྡ་རྟགས་མཚོན་བྱེད་རྫས་ཀྱིས། །མེ་ལོང་གཟུགས་བརྙན་དཔེ་བཞིན། །མཚོན་བྱ་རྟེན་འབྲེལ་འཛོམ་ན། །ཚེ་རྐྱེན་སེལ་ཙམ་