Tibetan
གྱི་བྱ་བ་ལ་བསམ་མནོ་བྱས་ཚེ་རང་དགྲ་ཕྱོགས་ལ་བཅད་ཡོད་པས། ཡིག་དཔེ་ཞུ་དག་བྱེད་པར་ཐོན་མི་ཐོན་ཆ་མཆོད་ཡོད་ཚེ། སྔར་གྱི་བྱི་འུའི་ལུང་བསྟན་དྲན་ནས་དེ་གར་འགྲོ་ཆས་བསྒྲིགས་སྐབས། བསོད་སྤྲུལ་རིན་པོ་ཆེའི་ཐུགས་བབ་ཡོད་པ་མ་གཏོགས། གཞན་ཡུལ་མི་ལ་ལས་ཁྱོད་དེགར་འགྲོ་མདུན་ཡོད་པ་ མཚར་ཆེ། ན་ནིང་ཁོང་སང་གི་བྱ་བ་ལ་བསམ་བློ་ཐོང་དང་། ཀུན་གྱིས་ཁྱོད་ལ་ཁྲེལ་འོང་ཟེར་ནས་འཇིག་རྟེན་ཆོས་བརྒྱད་ལ་ཁ་དྲངས་ཏེ་འགལ་ཟླ་བརྩམ་ཡང་། རང་གི་བསམ་སྤྱོད་ཐམས་ཅད་སྔར་ནས་གཏེར་ཆེན་ཡབ་སྲས་རྣམས་ཀྱི་བསྟན་ཞབས་ལ་ལྷག་པ་ཡིན་པས། ཆོས་དང་མཐུན་པ་རེ་འོང་ན་འཇིག་རྟེན་གྱི་བྱ་བའི་སྐྱིད་སྡུག་ཅི་བྱུང་ཡང་བཟོད་མི་དགོས་ཅི་ཐབས་སྙམ་ནས། ཁོང་ཚོའི་བློར་མ་ཐད་ཀྱང་རང་བློའི་རྗེས་སུ་འབྲངས་ནས། ངེད་མ་བུ་གཉིས་དང་། ཐུབ་བཟང་ཚུལ་རྡོར་བཅས་ཟླ་བ་ལྔ་པའི་ནང་དུ་གཏེར་སྒར་ལ་སོང་སྟེ། དཀར་ལུང་ཞེས་པའི་རི་ཁྲོད་དུ་སྐྱབས་རྗེ་རྣམས་ཀྱི་དངོས་སློབ་དམ་པ་དྲི་མེད་རྣམ་དག་དང་། བླ་མ་པད་ནོར། ནམ་རྡོར་སོགས་བཞུགས་ཡོད་པས། ངེད་ཅག་རྣམས་ཐོག་མར་དྲི་རྣམ་གྱི་སར་སོང་ནས་གྲོགས་མཆེད་བུ་སློབ་ཐམས་ཅད་ཀྱིས་ཤི་གསོན་འཕྲད་པ་ལྟ་བུའི་དགའ་སྤྲོ་ཆེན་པོ་མཛད། རང་ནས་ཀྱང་ལུགས་གཉིས་ཀྱི་བྱ་བས་བླ་མ་ཡབ་སྲས་ཀྱི་བསྟན་པ་ལ་ཞབས་ཞུ་ཅི་འགྲུབ་བྱས་པ་མ་གཏོགས་ཞབས་འདྲེན་དུ་སོང་མེད་པའི་ལོ་རྒྱུས་ཞིབ་པར་བཤད་པས། ཁོང་རྣམས་ཀྱིས་ཀྱང་རྗེས་སུ་ཡི་རང་བྱས་སོ། །དེ་ནས་ཚུལ་རྡོར་གྱི་ནུ་བོ་རྡོ་རྗེ་སྲུང་གི་མངག་ཞུགས་ལྟར། སྤྲུལ་སྐུ་རྡོ་རྗེ་དགྲ་འདུལ་སང་གི་སྐུ་མདུན་ བྃ༔ ལ་རང་གི་ཉེ་གནས་ཚུལ་རྡོར་བཏང་ནས་ཡིག་དཔེ་གཡར་དགོས་པའི་རྒྱུ་མཚན་ཞུས་ཚེ། སྤྲུལ་པའི་སྐུ་དེ་ཉིད་ཀྱིས་ཀྱང་ཐུགས་དགྱེས་བཞིན་པའི་ཡིག་དཔེ་ཅི་དགོས་ཐམས་ཅད་གཡར་རོགས་མཛད་ནས། ངེད་ཅག་རྣམས་ཟླ་བ་གཅིག་ལྷག་ཙམ་དུ་གནས་དེ་གར་བསྡད་ནས་ཞུ་དག་དང་དཔེ་ཆོད་སོགས་ཞིབ་རྒྱས་སུ་གྲུབ་རྗེས། ཡུལ་རྐྱེན་དང་སྔར་གྱི་གནས་ཚུལ་ཐམས་ཅད་ཀྱིས་རང་གི་སེམས་གཏིང་སྡུག་གིས་ནོན་ནས་ཡིད་སྐྱོ་བའི་རྨོངས་གླུ་འདི་སྐད་བརྗོད། ཀྱེ་མ་འདུས་བྱས་འཁོར་བའི་ཆོས། །གནས་ཚུལ་འདི་ལ་ཡི་རེ་མུག །སྔ་སོར་རིགས་ལྡན་མི་མོ་ང་། །ད་ནི་ཀུན་གྱིས་སྤང་བྱར་མཐོང་། །སྔར་ཚིག་དར་གྱི་བདུད་པ་དེ། །ད་ལན་ནམ་མཁའི་མཛེས་མའི་གཟུགས། །སྔར་གྱི་འདོད་དོན་བཀོད་པ་རྣམས། །ད་ལྟ་སྡུག་གི་སྣོན་པ་རེད། །སྔར་འདྲིས་མཆེད་གྲོགས་དམ་ལྡན་རྣམས། །དབང་མེད་བྲལ་ཚེ་སྡུག་བསྔལ་རྒྱུ། །སྔར་གནས་ཡུལ་མི་སྡེ་འཁོར་རྣམས། །ད་ལྟ་རྔ་རུ་ངོ་གཉིས་འདྲ། །དེ་ལྟར་ལས་དང་བྱ་བ་ཀུན། །འགྱུར་བའི་ཆོས་ཉིད་འདི་མཐོང་ཚེ། །སྙིང་རྗེའི་ཡུལ་གྱུར་བུ་མོ་ངའི། །སྡུག་བསྔལ་འདི་འདྲ་སུ་ཡིས་བཟོད། །ཀྱེ་མ་ཀྱི་ཧུད་དཀོན་མཆོག་གསུམ། །འདི་ཕྱིའི་རེ་ལྟོས་བདག་ ལ་མེད། །གྲོགས་མེད་གཅིག་པུར་ཉམ་རེ་ཐག །ཡུལ་མེད་ས་མཐར་ཁྱི་བཞིན་ཕུད། །བདག་མེད་ཀུན་གྱིས་བརྙས་སྨོད་བྱེད། །བསམ་བཟང་ཆོས་དང་མཐུན་བྱས་ཀྱང་། །ཆོས་མིན་རྐྱེན་ངན་ཤུགས་ཀྱིས་ལྡང་། །མགོན་དྲིན་ཆེན་བླ་མ་ཞིང་དུ་གཤེགས། །བུ་གཅིག་པུ་ངམ་ནག་གཤིན་རྗེའི་ཁྲིད། །ངེད་མ་བུ་ཉམ་ཐག་ས་མཐར་སྤྱུགས། །ཁོང་བསོད་ནམས་ལྡན་རྣམས་ལྷན་དུ་ཚོགས། །དཔལ་བདེ་སྐྱིད་གོང་མ་ལྷ་དང་འདྲ། །ངའི་གནས་ཚུལ་སྡུག་བསྔལ་ཀུན་གྱི་གཞི། །སྔར་གྱིས་འཛོམས་པའི་བཀོད་པ་རྣམས། །དེ་རིང་མི་རྟག་མཁན་པོར་མངོན། རྒྱབ་རི་མི་རྟག་རྩི་ཤིང་སྐམ། །ལུང་པ་མི་རྟག་ཨ་བྲའི་གནས། །ཁང་ཁྱིམ་མི་རྟག་གྱང་རལ་སོང་། །བུ་སློབ་མི་རྟག་ཡུལ་གཞན་འགྲིམ། །བཟའ་ཚང་མི་རྟག་སོ་སོར་གྱེས། །འདི་འདྲའི་བཀོད་པ་སྣང་བའི་ཚེ། །སེམས་གཏིང་སྡུག་གིས་ནོན་པར་སོང་། ཀྱེ་མ་ཀྱི་ཧུད་འདུས་བྱས་ཆོས། །གང་ལ་བསམས་ཀྱང་སྙིང་པོ་མེད། །ཅི་ལ་བསམས་ཀྱང་སྒྱུ་མའི་འཕྲུལ། ། ཟིན་མེད་བྱ་བ་སྤོས་རྒྱའི་རིས། །ཆོས་བརྒྱད་འཁོར་བའི་ལྕགས་སྒྲོག་འདི། །སྤངས་ནས་དམ་པའི་ལྷ་ཆོས་ཞིག །བསྒྲུབ་ན་ཚེ་འདིར་དོན་ཆེན་རྙེད། །བླ་མའི་སྐུ་དྲིན་འདི་ཡིས་སོས། ། བྃ༔ འཁོར་སློབ་ཐུགས་འདུན་དེ་ཡིས་དགྱེས། །རང་གཞན་དོན་གཉིས་དེ་ཡིས་འགྲུབ། །དེ་ཕྱིར་སྒོ་གསུམ་ཆོས་ལ་འབད། །མིས་ཆོས་མེད་ཀྱང་ཞེ་བློ་བདེ། །གྲལ་ནས་བུད་ཀྱང་རང་དོན་འགྲུབ། །ཀུན་གྱིས་བརྙས་ཀྱང་ཀུན་ལས་རྒྱལ། །ས་མཐར་སྤྱུགས་ཀྱང་སེམས་མཐའ་ཆོད། །འགྱུར་མེད་གཉུག་མའི་རང་ཞལ་མཐོང་། །རང་རིག་བླ་མ་དབྱེར་མེད་སྟེང་། །ཐུགས་རྗེ་ཉེ་རིང་ཡོད་མི་སྲིད། །བྱིན་རླབས་སྒོ་གསུམ་བུམ་པར་བསྐྱིལ། །ཀུན་བཟང་ཆོས་སྐུའི་རྒྱལ་ས་རུ། །མི་རིང་བསྒྲོད་པ་ཅི་ཆ་ཡོད། །ཅེས་སྨྲས་ནས་རང་སེམས་རང་གིས་གསོས་ནས་བསྡད་ཡོད་སྐབས། སྔར་གྱི་རི་ཁྲོད་དུ་རྡོ་རྗེ་སྤུན་ཡོད་པ་དེ་གའི་སར་ངེད་མ་བུ་གཉིས་ཤོག་ཟེར་བས་དེར་སོང་ཚེ། བདག་གི་བསམ་པ་ལ་བྱུང་དང་འབྱུང་འགྱུར་དུ་མའི་བཀོད་པ་ཤར་བས་ཐམས་ཅད་བཏང་སྙོམས་ལ་བཞག་གོ །དེ་ནས་རང་གི་བུ་མོ་ཆོས་དབྱིངས་སྒྲོལ་མ་དང་མཉམ་དུ་རི་ངོགས་དེར་སྔར་སྨན་གྱི་རིགས་དུ་མ་ཡོད་པས། དེ་སྐབས་ཡོད་སྙམ་ནས་སྨན་ཐུ་རུ་སོང་ཚེ་སྨན་སྣ་གཅིག་མ་རྙེད་ནས། ཡང་སྔར་གྱི་གནས་ཀྱི་བཀོད་པ་དང་ཡོན་ཏན་རྣམས་དྲན་པ་དང་། སྐྱབས་རྗེ་ཡིད་བཞིན་ནོར་བུའི་སྐུ་གདུང་བཞུ་མེས་ཕུལ་སར་མཁན་ཨ་ཀྲོང་གི་སྡོང་པོ་ ཆེ་བ་གཅིག་སྨིན་འདུག་པ་དང་། གཞན་ཡང་གཟིམ་སྦྲའི་ཤུལ་དང་། གཏེར་ཆེན་བདུད་འཇོམས་པའི་འདྲ་སྐུ་ང་འདྲ་མ་ཞེས་ཕྱག་ནས་འཐོར་བའི་བྱིན་ཅན་ཞིག་ཡོད་པ་དེ་བཞུགས་པའི་ཤུལ་རྣམས་སུ་མཁན་ཨ་ཀྲོང་གི་སྡོང་པོ་རེ་སྨིན་པ་མ་གཏོགས་རྩ་སྨན་ཤིང་གསུམ་ཐམས་ཅད་ཉམས་ནས་ས་དམར་ཤིག་གེར་འདུག་པ་ལ་ཡིད་སྐྱོ་ནས། རྗེ་ལ་འོ་འདོད་འབོད་པས་མ་འོངས་ལུང་བསྟན་བསླབ་བྱ་གནང་བ་གཏེར་གཞུང་དུ་གསལ། དེ་ནས་ངེད་ཅག་ཡི་གེ་ཞུ་དག་ཚར་རྗེས་དེར་འདུས་ཀྱི་བུ་སློབ་མཆེད་གྲོགས་རྣམས་ལ། སྐྱབས་རྗེ་ཡིད་བཞིན་ནོར་བུའི་རྣམ་ཐར་དང་། གཞན་ཡང་ཁོང་རྣམས་ལ་གང་མཁོའི་གདམས་ཁྲིད་སོགས་ཞིབ་རྒྱས་སུ་ཕུལ་ནས་ཐམས་ཅད་ཀྱི་ཐུགས་འདུན་རྫོགས་པར་བྱས། ཁོང་རྣམས་ཀྱིས་ཀྱང་ལུགས་གཉིས་ཀྱི་ཞལ་ཏ་དང་། ཁྱད་པར་བླ་མ་ཡབ་སྲས་ཀྱི་བསྟན་པ་ཁྱོད་ལ་རག་ལས་པས་འཛིན་སྐྱོང་སྤེལ་གསུམ་ད་སྔ་ལྟར་ཁྱེད་མ་འཆུག །ད་ངེད་རྣམས་ནི་ན་སོ་ལོན་པས་ཁྱོད་ཀྱིས་བཞུགས་གནས་སུ་ཐོན་སྟབས་དབེན་ཀྱང་། ལྷག་བསམ་རྣམ་དག་གིས་ཞབས་པད་བརྟན་རིམ་གྲོ་རྒྱུན་ལྡན་དུ་བྱེད་ཟེར་ནས། ཁོང་རྣམས་ཀྱིས་ཐུགས་ཆུང་མཛད་ཅིང་སྤྱན་ཆབ་བསིལ་བ་ལ། བདག་ཡིད་སྐྱོ་ཡང་མི་མངོན་པར་བྱས་ཏེ། འུ་ བྃ༔ ཅག་དམ་ཚིག་ལ་འགལ་བ་སྤུ་ཙམ་ཡང་འགྲོ་མ་མྱོང་བ་དང་། ཁྱོད་རྣམས་མི་ཚེ་གཅིག་ལ་དམ་པའི་ཆོས་ཁོ་ན་བསྒྲུབ་ནས་ཚེ་དང་སྒྲུབ་པ་མཐར་ཕྱིན་པ་ཤ་སྟག་ཡིན་པས། འོ་ཅག་འདི་ཕྱི་བར་དོ་ཐམས་ཅད་དུ་འབྲལ་བ་མེད་ངེས་པ་ཡིན། ཇི་ལྟར་ཡིན་ཞེས་ན་དུས་རྟག་པར་བླ་མ་ཡིད་ཀྱིས་མི་བརྗེད་པར་སྐུའི་བཀོད་པ། གསུང་གི་གདམས་པ། ཐུགས་བརྩེ་བས་བསྐྱང་བ་རྣམས་ལྷག་གེར་དྲན་པ་ནི་དབང་བཞི་གཅིག་ཆར་དུ་ཐོབ་ཡིན། མོས་གུས་ཀྱིས་བླ་མའི་སྐུ་ལྷག་གེར་སེམས་ལ་འཆར་བ་བུམ་དབང་། གསུང་གི་དབུགས་དབྱུང་བ་དྲན་པ་གསང་དབང་༏ ཐུགས་བཅུད་གདམས་ཟབ་ཐོབ་པ་ཤེར་དབང་། ཐུགས་ཡིད་རོ་གཅིག་ཏུ་རྟོགས་པ་ཚིག་དབང་། དེའི་རྣམ་པར་མི་རྟོག་པའི་ཡེ་ཤེས་ལྷག་པར་མཐོང་བ་ནི་དབང་བཞི་རྗེས་འབྲེལ་གཅིག་ཆར་དུ་རྫོགས་པའི་དགོངས་དོན་རྣམས་ཐུགས་ལ་མངའ་བཞིན་མཛད་དང་། ཕྱི་མ་དཔལ་རིཔད་མ་འོད་དུ་མཇལ་འོང་སོགས་ཞུས་ནས། ཁོང་རྣམས་ཐུགས་ཡིད་ཚིམ་པར་མཛད། དེ་ནས་རིམ་བཞིན་བདག་ཅག་རང་ཡུལ་ལ་སླེབས་ནས། ཐོག་མརསྐྱབས་རྗེ་བསོད་སྤྲུལ་རིན་པོ་ཆེའི་སྐུ་མདུན་དུ་སོང་ནས། ད་སྐབས་ཀྱི་བྱ་བ་ཐམས་ཅད་ལམ་དུ་སོང་བའི་ལོ་རྒྱུས་རྣམས་ཞིབ་ པར་བསྙད་པས། སྐྱབས་རྗེ་དེ་ཉིད་ཀྱི་ཐུགས་ཤིན་ཏུ་དགྱེས་ནས་གཏེར་ཆོས་རྣམ་གཉིས་འཛིན་སྐྱོང་དགོས་པའི་བཀའ་གསུང་ནན་ཆེར་ཕེབས་ནས། དེ་ནས་ཟླ་བ་བརྒྱད་པའི་ནང་ངེད་རང་སློབ་དམ་པ་བྱ་བྲལ་ཤེས་རབ་འོད་ཟེར་དང་། འཇིགས་དགའི་ཡང་སྤྲུལ་ཆོས་ཉིད་དོན་རྟོགས་དང་། སྐྱབས་རྗེ་བདུད་འཇོམས་རྡོ་རྗེའི་སྐུ་སྲས་མཁྱེན་སྤྲུལ་རིན་པོ་ཆེའི་ཡང་སྲིད་སྤྲུལ་པའི་སྐུ་ཀུན་བཟང་བསྟན་པའི་ཉི་མ་སོགས་སེར་དགོན་གྱི་བླ་སེར་ཆེ་གྲྭ་ཐམས་ཅད་དང་། གཞན་ཡང་ཕྱོགས་འདུས་ཀྱི་བླ་སྤྲུལ་རྣམས་ལ། གཏེར་ཆེན་བདུད་འཇོམས་རྡོ་རྗེའི་ཟབ་ཆོས་ཀྱི་དབང་ལུང་ཁྲིད་ལ་སོགས་པ་ཞིབ་རྒྱས་སུ་ཕུལ། དེ་སྐབས་རང་སློབ་དམ་པ་ཤེས་རབ་འོད་ཟེརགྱིས་གཏེར་ཆོས་ཆ་ཚང་འབྲི་སྤེལ་བྱེད་པ་ཁས་བླངས་ཚེ། རྟེན་འབྲེལ་རབ་འབྲིང་གཉིས་ཀྱི་བརྡ་དོན་གསལ་བའི་ལུང་བསྟན་གཏེར་གཞུང་དུ་གསལ། རང་སློབ་དམ་པ་མཁན་པོ་ནོར་བུ་དབང་རྒྱལ་ལ་གཞན་རྐྱེན་གྱི་ཐེ་ཚོམ་ཞིག་གིས་དངོས་གྲུབ་ལ་བར་ཆད་དུ་འགྱུར་ནས་དབང་ལུང་སྐབས་སུ་དེར་བྱོན་སྟབས་མ་འོང་བས་ཁོང་ཚེ་འདིར་འགྲོ་དོན་ཕྲན་བུ་ཙམ་ལས་ཆེས་ཆེར་ལྷག་པ་མ་བྱུང་ཡང་། ལས་ངན་གྱི་གདུང་བའི་ཉེ་དུ་དམྱལ་བའི་སེམས་ཅན་དུ་གྱུར་པ་ཐམས་ཅད་འདྲེན་པར་མཁའ་འགྲོས་ལུང་བསྟན་ བྃ༔ པ་སོགས་གཏེར་གཞུང་དུ་གསལ། དེའི་སྐབས་ང་རང་གི་ཆུ་སྐྱེས་ལ་ནད་མ་ངེས་པ་ཟུག་རྔུ་ཤིན་ཏུ་ཆེ་བ་ཞིག་བྱུང་ཡོད་པས། ཟླ་བ་བཅུ་གཉིས་པའི་ཚེས་བཅུའི་ཉིན་ཐུན་གསང་ཞིག་གི་སྣང་ཆར། བུད་མེད་རྒན་སོང་མ་ཞིག་འོང་ནས་འདི་སྐད་ཟེར། ཁྱོད་ཀྱི་ནད་ཅི་འདྲ་ཞིག་རེད་ཟེར་བས། བདག་གིས་ང་རང་གི་ནད་བཤད་ཐབས་མེད་པ་ངོ་ཚ་བའི་ཡུལ་ཞིག་རེད་སྨྲས་པས། མོ་ན་རེ། ཁྱོད་ཀྱི་ནད་ལ་ཕན་པའི་སྨན་ཞིག་ང་རང་གིས་ཤེས་ཟེར། བདག་གིས་སྨན་ཅི་འདྲ་ཞིག་རེད། ཁྱོད་ལ་སྦྱིན་རྒྱུ་ཨེ་ཡོད་སྨྲས་པས། མོ་ན་རེ། ང་རང་ལ་མེད་གཞན་ཞིག་ལ་ཡོད་དེ་ཁྱོད་ཀྱིས་མི་འཐུང་འང་ཟེར། བདག་གིས་འཐུང་རྒྱུ་མ་རྙེད་མ་གཏོགས་རྙེད་ཚེ་ཕན་པ་འབྱུང་སྲིད་ན་སྨན་འཐུང་ན་ཆོག་གི་སྨྲས་ཚེ། མོན་རེ། ཧ་ཧ་མི་འཐུང་ཁྱོད་ཀྱི་སྨན་མི་འཐུང་། །འཐུང་ན་སྨན་མཆོག་ང་ཡིས་བསྟན། །ཉོན་མོངས་འཇོམས་པའི་ཨ་མྲྀ་ཏ། །ཁམས་དྲུག་ལྡན་པ་རྡོ་རྗེའི་ལུས། །ལྔ་ལྡན་སུམ་ཅུ་རྩ་གཉིས་ཀྱི། །རྩེ་འཛིན་ཟླ་བའི་འོད་ལ་གནས། །བཞུགས་པ་སྟོང་ཆེན་ལམ་ནས་ཐོན། །འབབ་པ་བཞི་ཡི་གནས་བརྒྱུད་ནས། །དྲུག་ཅུ་རྩ་བཞིའི་གྲོང་ནས་འབྱུང་། །ལེན་པ་ཆུ་སྐྱེས་གསོས་བྲན་ན། །རྟེན་འབྲེལ་འབྱུང་འདུས་ ནད་ཀུན་སེལ། །འདི་ལྡན་སྨན་པའི་རྒྱལ་པོ་ནི། །བཛྲ་མིང་སོགས་ལྷོ་ན་ཡོད། །ཆུ་གསུམ་འདུས་པའི་གནས་སུ་འཕྲད། །དེ་ཡིས་རེ་ཞིག་ཚེ་འཕྲང་སེལ། །ཞེས་ཟེར། ཡང་བདག་གིས། ཉོན་དང་རྒན་མོ་སྤེལ་གཏམ་ཅན། །ཁོ་མོ་བདེ་བའི་རྡོ་རྗེ་ང་། །ཁྱོ་ཕོ་མ་རྙེད་ན་བ་མིན། །སྒྱུ་ལུས་འབྱུང་གཞི་འཁྲུགས་པ་དང་། །རང་གི་གཅེས་འཛིན་མ་ཞིག་པས། །དུས་ཀུན་ནད་ཀྱིས་མནར་བ་ཡིན། །དེ་ལ་ཕན་ཐབས་ཅང་སྲིད་ན། །སྨན་པ་མཆོག་ལ་སྐྱབས་རྟེན་སྙམ། །འོན་ཀྱང་ཁྱོད་ཀྱི་སྨན་ལོག་འདི། །མི་བརྟེན་ངེས་པ་ཐག་གིས་ཆོད། །བདེན་མེད་གཏམ་འདི་མི་སྨྲ་བར། །ཁྱོད་རང་གང་དགའི་གནས་སུ་སོང་། །ཞེས་སྨྲས་པས། མོ་ན་རེ། གྲོགས་མོ་ཁྱོད་ཁོང་ཁྲོ་མ་ལང་དང་། བདག་གིས་བཤད་པ་དེ་དག་ངེས་པ་ཡིན་མ་གཏོགས་སྤྲེལ་གཏམ་མིན། ཁྱོད་ཀྱིས་ཐབས་གྲོགས་མ་བརྟེན་ན་མི་ཚེ་གཅིག་ལ་སྨན་གཞན་འཐུང་ཡང་ཕན་པ་མི་འབྱུང་བའི་ཁར་མ་ངེས་པའི་ནད་བཅོས་ཐབས་མེད་པ་འདྲ་བ་འོང་ཐང་གི་ཟེར་བས། བདག་གིས་ནད་བྱུང་ན་སྡུག་བསྔལ་ང་རང་གིས་མྱོང་དགོས། ཁྱོད་ཀྱིས་ནི་མྱོང་མི་དགོས། ད་ང་སྡོད་ཆུག་དང་དགའ། ཚེ་མཇུག་ལ་ཁའི་ཉི་མ་ལྟ་བུ་འདིར་ཆོས་རྣམ་དག་ཞིག་ཨེ་འགྲུབ་སྙམ་ བྃ༔ གི་མ་གཏོགས། གྲོགས་པོ་ཞིག་ལོན་དགོས་མི་བསམ་སྨྲས་པས། གཏམ་མཇུག་མ་རྫོགས་ཀྱང་གཞན་རྐྱེན་ཞིག་གིས་ཉམས་ལས་སད་དོ། །དེ་ནས་རང་ལོ་སོ་དགུའི་ལོར་རང་སློབ་དམ་པ་མཁན་པོ་ནོར་བུ་དབང་རྒྱལ་དང་། སྔགས་བཙུན་ཉི་མ་སྒྲོན་མ་སོགས་ཀྱིས་ད་ལོ་ངེད་ཅག་གིས་ཡུལ་སྡེའི་ནང་ལ་དཀར་སྡོམ་དུ་འོང་དགོས་ཟེར་བས། དེར་ཟླ་བ་དྲུག་པའི་ཚེས་ཉེར་གསུམ་ཉིན་སོང་ནས། ཉེར་ལྔ་མཁའ་འགྲོའི་དུས་ཆེན་ཉིན་ཚོགས་མཆོད་འབུལ་སྐབས། ཨ་བསྲེ་བ་རྣམས་ཀྱིས་ཅི་འབྱོར་གྱི་མཆོད་པ་སོགས་འོང་ནས་ཚོགས་འཁོར་རྒྱ་ཆེན་པོ་བྱེད་སྐབས། དགེ་རྩེ་གྲྭ་ལག་དགོན་པའི་བླ་ཁག་གི་ནང་ནས་ཐོག་རྒོད་སྤྲུལ་སྐུ་མེ་ལོང་སང་དཀར་བསོད་ལ་བྱོན་ཡོད་པས། ཁོང་གིས་ཚོགས་མཆོད་ཀྱི་ཞལ་འདེབས་སུ་མར་ཐུད་སོགས་བསྐུར་བྱུང་བས། དེ་དང་མཉམ་དུ་མི་ལྭ་བ་དཀར་པོ་གཡང་ལུགས་སུ་གྱོན་པ་ལག་གཡས་ནོར་གཞོང་དང་གཡོན་སྦ་ལྕགས་འཛིན་པ། རྟ་ནག་རྟིང་ནག་ལ་ཞོན་ཅིང་། དབུ་ལ་ལ་ཐོད་དང་དངུལ་གྱི་མེ་ལོང་དག་གིས་བརྒྱན་པ་ཞིག་འཐོན་བྱུང་ནས་འདི་སྐད་ཟེར། ཨ་རེ་ཡ། ཁྱེད་སྐུ་ཁམས་བཟང་ལགས་ཟེར། བདག་གི་བསམ་པ་ལ་འདི་མི་མ་ཡིན་ཞིག་འདྲ་སྙམ། ང་རང་བདེ་མི་བདེ་ཁྱོད་ ཀྱིས་ཤེས་སམ་སྨྲས་པས། དེ་ན་རེ། ཤེས་ཀྱང་ཆོག་སྟེ་ཁྱོད་བདག་གི་ཁ་ལ་མི་ཉན་འང་ཟེར། ཡང་བདག་གིས། ཤེས་ན་དེ་རེད། ཁ་ཉན་མི་ཉན་བལྟ་དོན་མི་གདའ། ཁྱོད་རང་བདག་གི་བླ་མ་ནི་མིན་སྨྲས་ཚེ། དེ་ན་རེ། བླ་མ་མིན་ཀྱང་བླ་འདྲ་ཞིག་དང་མཉམ་ཟེར། བདག་གིས་ཁོང་དགེ་བསྙེན་ཐང་ལྷ་ཡིན་པར་འདྲ་སྙམ་ནས་ཅི་ཡང་མ་སྨྲས་པས། ཁོ་ན་རེ། ཁྱོད་ཀྱི་བསམ་པ་ལྟར་འོང་དཀའ་སྟེ། གུ་རུ་པདྨའི་སྨོན་ལམ་ལ་བཟློག་ཐབས་ག་ལ་ཡོད། དེ་བས་མ་དང་མཁའ་འགྲོའི་ལུང་བསྟན་པ་བཞིན་རྟེན་འབྲེལ་གྱི་ཐབས་ལ་མཁས་པ་གལ་ཆེ། དེ་ལྟར་མ་བྱས་ཚེ་ཁྱེད་རང་ཚེ་ལ་མཐར་ཕྱིན་པ་ལྟ་ཞོག །འབྱུང་ལུས་ལ་འོ་བརྒྱལ་ཆེན་པོ་འོང་ཐང་གི། །བདག་གིས་ཁྱོད་ལ་བསམ་པ་དཀར་བ་ཡིན་པས་དེ་ལུགས་རྟོགས་དཔྱོད་མཛོད་དང་། རྟེན་འབྲེལ་གཞན་དབང་དུ་གཏོང་དགོས་པ་ཁྱོད་རང་གནང་བཀག་ཅན་གྱི་བཙུན་མ་ནི་མ་ཡིན། འདོད་ལོག་སྤྱོད་པའི་མོ་ཁྲམ་ཀྱང་མ་རེད། རྟེན་ཅིང་འབྲེལ་བའི་མཐུན་རྐྱེན་འཛོམས་ཚེ་རང་གཞན་གྱི་དོན་ཆེན་པོ་འོང་བ་ཡིན་པས། དེ་ལྟར་དགོངས་མཛོད་ཟེར་ནས་གཏེར་སྒྲོམ་ཞིག་གཏད་བྱུང་བས། བདག་གིས་འདི་ཅི་རེད་སྨྲས་ཚེ། ཁ་བྱང་སྦས་པ་མངོན་འབྱེད་མཚོ་རྒྱལ་ཞལ་ ༔ ཆེམས་རེད་ཟེར་བ་དང་མཉམ་དུ་ནམ་མཁར་འཇའ་ལྟར་ཡལ་སོང་། །དེ་ནས་རིམ་བཞིན་སོང་ནས་རྩང་སྒར་དུ་ཐོན་ཚེ། ཡུལ་དེར་འཇིག་རྟེན་མཁའ་འགྲོ་དུ་མས་མགྲོན་འགྱེད་བྱེད་འདུག་པས། བདག་གིས་ཁྱོད་རྣམས་ཀྱིས་ཅི་བྱེད་ཅིང་ཡོད་སྨྲས་ཚེ། དེ་དགགིས་ངེད་ཅག་མགར་ར་བླ་མ་པདྨ་བཀོད་དུ་བྱོན་འགྲོ་རན་པས་དེ་ལ་མཐུན་རྐྱེནབྱེད་པ་ཡིན་ཟེར། དེ་སྐབས་བླ་མ་རིན་པོ་ཆེ་དེ་འབམ་གཞི་ལྟ་བུའི་ནད་དྲག་པོ་ཞིག་གིས་བསྙུང་འདུག་པས། བདག་གི་བསམ་པ་ལ་བླ་མ་སྐུ་ཡེ་མི་བཞུགས་པ་འདྲ་སྙམ་ཀྱང་བླ་མར་ཞུ་ཕོད་མ་བྱུང་ཡང་། ཉེ་གནས་སློབ་འབངས་རྣམས་ལ་ཟུར་ཙམ་སྨྲས་ཀྱང་ཆ་ཆོད་པ་ཞུ་རྔོག་མ་ཐོག །བླ་མ་རིན་པོ་ཆེ་ལ་བདག་གིས་ང་རང་ད་ལོ་འཛི་ཀའི་གསང་ལུང་དགོན་དུ་འགྲོ་དགོས་པས། སང་ཕོད་ད་ཙམ་འོང་ན་ཁྱོད་དང་མཇལ་འཕྲད་འོང་ངམ་ཞུས་ཚེ། བླ་མས་ནད་བབ་ལྕི་བས་ཅི་འགྱུར་མི་ཤེས་ཀྱང་མཇལ་འཕྲད་འོང་ངེས་ཡིན་གསུངས་ནས་རྟེན་འབྲེལ་རྗེས་མཐུད་དུ་བཞག །དེ་ནས་དགེ་རྩེ་གྲྭ་ལག་དགོན་གྱི་ཚེས་བཅུ་མཇལ་དུ་སོང་བས། ཕྱག་སྤྲུལ་རིན་པོ་ཆེ་དབུས་ནས་གདན་སར་ཕེབས་པ་དང་དུས་འཛོམས་ནས་མཇལ་འཕྲད་མཛད་ཚེ། ཁོང་ནས་གསང་སྔགས་ཀྱི་རྫས་རྡོར་དྲིལ་སྤུས་ལྡན་ སོགས་གནང་སྦྱིན་དང་། ལུགས་གཉིས་ཀྱི་གསུང་སྒྲོས་ཞིབ་རྒྱས་སུ་མཛད། དེ་ནས་རིམ་བཞིན་རང་སློབ་དམ་པ་བྱ་བྲལ་དོན་གྱི་རྣལ་འབྱོར་ཀར་དོན་གྱི་རི་ཁྲོད་དུ་སོང་སྟེ། ཁོང་སྐལ་ལྡན་རྣམས་ལ་གཏེར་ཆེན་ཡབ་སྲས་ཀྱི་ཟབ་གཏེར་དང་། རང་གི་ཉམས་རིས་ཀྱི་སྐོར་ཆ་ཤས་ཀྱི་དབང་ལུང་སོགས་ཕུལ། དེ་སྐབས་གནས་དེའི་སྲུང་མས་གཏེར་གྱི་ཁ་བྱང་གི་བརྡ་དོན་གསལ་པོར་བསྟན་ཀྱང་། རྟེན་འབྲེལ་དུས་དང་མ་སྤྲད་པར་བཏང་སྙོམས་སུ་བཞག་པས། ལོ་ཁྱིམ་དེའི་ནང་དུ་དགྲ་འདྲེ་སོགས་ཀྱིས་རྒོལ་བ་གནོད་འཚེ་མི་འདོད་པ་ཕྲན་བུ་རེ་བྱུང་ཡང་། རྟེན་འབྲེལ་མ་ལྡན་པས་འཁུ་ལྡོག་ཡིན་པར་བསམ་ནས། རང་ལ་ནུས་པ་ཅི་ཡོད་ཀྱིས་གཏེར་སྲུང་ཨར་ལ་གཏད་པས་དུས་མི་འགྱང་བར་བཅོལ་བའི་ལས་བསྒྲུབ་པར་ཁས་བླངས་ནས་འཁུ་ལྡོགཞི་བར་བྱུང་། དེ་ནས་ལོ་ཁྱིམ་དེའི་ཟླ་བ་བཅུ་པའི་ཉེར་ལྔའི་དུས་ཆེན་ཉིན་འཛི་ཀའི་གསང་ལུང་རི་ཁྲོད་དུ་འདུས་སྡེ་སྐལ་ལྡན་བརྒྱ་ཕྲག་ཙམ་ལ། གཏེར་ཆེན་རིན་པོ་ཆེའི་ཟབ་གཏེར་གྱི་ཁྲེགས་ཆོད་མ་བསྒོམས་སངས་རྒྱས་དང་། མྱུར་ལམ་ཐོད་རྒལ་གཉིས་ཀྱི་ཁྲིད་ཀྱི་དབུ་བཟུང་ནས། ཟླ་བ་གསུམ་དང་ཞག་བཅུ་ཕྲག་གཉིས་ལ་མཚམས་དམ་རྒྱ་བྱེད་དགོས་པའི་བཅའ་ཁྲིམས་སོགས་ལེགས་པར་གྲུབ་ བྃ༔ རྗེས། དེ་ནུབ་རྨི་ལམ་ལ་སྐྱབས་རྗེ་གཏེར་ཆེན་ཡབ་སྲས་ཐམས་ཅད་ཀྱིས་གསུང་སྒྲོས་མཛད་པའི་ཚུལ་དུ་བཞུགས་པ་མཐོང་བའི་ཚེ། བདག་ཡིད་ཤིན་ཏུ་དགའ་སྤྲོ་དད་གུས་ཆེན་པོས་རྒྱུད་རབ་ཏུ་བསྐུལ་ནས་སྒོ་གསུམ་མི་ཕྱེད་པས་ཕྱག་འཚལ་ཞིང་གསོལ་བ་འདི་ལྟར་གདབ། ཨེ་མ། དུས་གསུམ་རྒྱལ་དང་རྒྱལ་སྲས་ཐམས་ཅད་ཀུན། །ངོ་བོ་གཅིག་ལ་རྣམ་པ་ཐ་དདཔར། །བདག་ཅག་རྗེས་འཇུག་གདུལ་བྱའི་མོས་ངོར་བཞེངས། །ཐབས་ལ་མཁས་པས་བསྟན་འགྲོ་བདེ་ལ་བཀོད། །མཁྱེན་བརྩེ་ནུས་པའི་མངའ་བདག་ཆོས་ཀྱི་རྗེ། །སྐྱབས་མཆོག་བླ་མ་རྣམས་ལ་གསོལ་བ་འདེབས། །ཁོ་མོ་བདག་ནི་ལུས་ངན་དམན་པར་སྐྱེས། །ཆོས་བཞིན་སྤྱོད་ཀྱང་ཆོས་མིན་ཤུགས་ཀྱིས་སྡང་། །འོན་ཀྱང་སྔོན་སྨོན་བསོད་ནམས་ཕྲན་བུའི་འབྲས། །ད་ལྟ་འདྲེན་སྟོན་ཁྱེད་རྣམས་དངོས་ཞལ་མཇལ། །འདི་ནས་ཚེ་རབས་ཚེ་བརྒྱུད་ཐམས་ཅད་དུ། །ལས་རྐྱེན་ངན་པའི་དབང་དུ་མི་གཏོང་བར། །ཁྱོད་ཐུགས་ཡེ་ཤེས་ཆེན་པོའི་འོད་བརྒྱ་ཡིས། །གཟུང་འཛིན་འཁྲུལ་པའི་མུན་པ་ཀུན་བསལ་ནས། །རང་རིག་ཆོས་སྐུ་ཆེན་པོར་སངས་རྒྱས་ཤོག །བདག་དང་བདག་ལ་བཟང་ངན་འབྲེལ་ཐོགས་ཀུན། །ཚེ་འདིའི་སྣང་བ་ ནུབ་པར་གྱུར་མ་ཐག །གཏེར་ཆེན་བླ་མ་མཆོག་གི་ཞབས་དྲུང་དུ། །འདུས་པ་དང་པོའི་འཁོར་དུ་སྐྱེ་བར་ཤོག །ཅེས་གསོལ་