Tibetan
བཟང་ལགས་ཟེར། བདག་གིས་ང་བདེ་མོ་ཡིན། ཁྱོད་རྣམ་གཉིས་དཀའ་ཨེ་བྱུང་དྲིས་ཚེ། དགེ་སྦྱོང་ཆེ་བ་ན་རེ། ངེད་གཉིས་དཀའ་ཚེགས་མ་བྱུང་ཡང་། ཕུལ་ཕྱོགས་ཐག་རིང་བས་གྲོ་ཁ་ལམ་རྒྱགས་ཆེར་མ་རྙེད།འོན་ཀྱང་ཁྱོད་ཀྱི་མདུན་ནས་ཆོས་ཤིག་ཐོབ་དགོས་པ་ཡིན་པས། ངེདགཉིས་ཀྱི་ལུས་འདི་ཁྱོད་ལ་འབུལ་ཁྱོད་ཀྱིས་ངེད་གཉིས་ལ་ད་དགོང་རྒྱགས་ཐབས་ཟས། ཕྱི་མ་གྲོ་ཐབས་ཆོས་གཉིས་ཀ་གནང་རོགས་དགོས་ཟེར། བདག་གིས་ཁྱོད་གཉིས་ཀྱི་ཆོས་ཡང་དག་ཞིག་བསྒྲུབས་ནས་དབེན་རི་ཁོ་ན་ལ་བསྡད་ན། ཟས་གོས་ཀྱི་མཐུན་རྐྱེན་ཅི་དྲག་བྱེད་དང་ཆོག་གི་མ་གཏོགས། ཁྱོད་གཉིས་ཀྱི་ལུས་ང་ལ་སྦྱིན་ཡང་གཡོག་མི་བཅོལ། དབེན་རི་ལ་སྒྲུབ་ཚུགས་ཟུང་དང་དེས་ཆོག་སྨྲས་ཚེ། ཡང་དགེ་སྦྱོང་ན་རེ། ཁྱོད་ལ་ལུས་འབུལ་དོན་གཡོག་མི་བཅོལ་ཐབས་དང་། རི་བྱི་ཇི་བཞིན་གད་ཕུག་དང་རི་ངོགས་ལ་འདུག་ཐབས་ཨེ་འོང་བསམ་པ་མིན། ཁྱོད་གཏེར་སྟོན་ཡིན་པས་གྲོགས་པོའི་ཆེད་དུ་ངེད་གཉིས་འདུག་སྙམ་པ་ཡིན་ཟེར་བས། བདག་སྔངས་སྐྲག་ཆེན་པོས། བླ་མ་རིན་པོ་ཆེ་མཁྱེན་བཀའ་དྲིན་ཅན་མཁྱེན་སྨྲས་པས། ཁོ་ན་རེ། ཁྱོད་ཀྱིས་ང་མ་འདོད་ཀྱང་། བན་ཆུང་འདི་ཅི་ནས་ཀྱང་རྗེས་སུ་བཟུང་དགོས་ཡང་ཡང་ཟེར་བས། བདག་གིས་འདི་སྐད་སྨྲས། ང་གཏེར་སྟོན་ཡང་མིན། གྲོགས་པོ་གི་དགོས་མེད། ཁྱོདགཉིས་ལྟ་བུའི་སློབ་མ་དམ་ཉམས་ད་སྔ་ཡང་ཡོད་མ་མྱོང་། ད་དུང་ཡང་མི་བསྐྱངས། ཁྱོདགཉིས་གར་འགྲོ་ན་སོང་། ཡུལ་འདིར་མ་འདུག་།ཁྱོད་གཉིས་ངས་བསད་དགོས་ཀྱང་མཛད་མི་ལྟ་སྨྲས་ཚེ། ཡང་ཁོ་ན་རེ། ཁྱོད་གཏེར་སྟོན་ཨེ་ཡིན་ང་རང་གིས་ཤེས། ཁྱོད་ཀྱིས་ཁ་བྱང་ནང་དུ་གཟིགས་དང་། ཐབས་གྲོགས་གཙོ་བོ་ལྔ་ཡོད་པའི་ནང་ནས་གཅིག་བན་ཆུང་འདི་རེད། འདི་གྲོགས་སུ་མ་བསྟེན་ན་ཁྱོད་རང་གི་གཏེར་ཁ་གང་ཟབ་ཀྱི་བརྡ་ཁྲོལ་མི་འོང་བར་འདུག་པས་ཁྱོད་ཀྱིས་དགོངས་འཚལ་ཟེར། བདག་ཡིད་ཅུང་ཟད་ཚོམ་ནས་ཁྱོད་གཉིས་ཡུལ་ཕྱོགས་གང་ནས་ཡིན་དྲིས་ཚེ། ཁོང་ན་རེ། ཡུལ་ཕྱོགས་ཉག་ཁོག་ནས་ཡིན། བན་ཆུང་གི་མིང་ཟེར་བ་དེ་ཡིན་པས། གུ་རུ་པདྨའི་ཞལ་ལུང་ལ་བསླུ་བ་མེད་པས་སྨོན་ལམ་དུས་སུ་འཛོམས་པ་རེད་ཟེར། ཡང་བདག་གིས། གུ་རུའི་ཞལ་ལུང་ལ་བསླུ་བ་མེད་པ་ཡིན་ཐང་ཀྱང་། ང་རང་མི་ བྃ༔ རུས་ངན་པའི་རྐྱེན་གྱིས་ལུང་བསྟན་ཇི་བཞིན་པར་བསྒྲུབ་ཐབས་འོང་བ་མིན། གཅིག་ཐད་ནས་ང་རང་སྐྱེ་ལུས་དམན་པས། ཆོས་བདག་དང་། ཐབས་གྲོགས་སུ་དང་འཕྲད་ཀྱང་ངོས་འཛིན་བྱེད་མ་ཕོད། གཉིས་ཐད་ནས་ལུས་རྟེན་སྔགས་ལ་ཞུགས། ཉམས་ལེན་བླ་མེད་ལ་བརྩོན། ས་ལམ་རིམ་བསྒྲོད་ལ་མི་ལྟོས་པར་འབོགས་འདོན་ཐབས་གྲོལ་ཟུང་འཇུག་གི་ལམ་ལ་བརྟེན་ནས་རིག་སྐུ་འགྲུབ་པའི་ཐབས་སེམས་དཔའ་ཆེན་པོ་གཅིག་གི་ཁྱད་ཆོས་ཡིན་པས་ན། དེའི་ཐུགས་དང་འགལ་བ་འགྲོ་སྙམ་ནས་དམ་ཚིག་དཔྲལ་བའི་མིག་ལྟར་བསྲུངས་ཏེ། གྲོགས་དེའི་བཀའི་གནང་བ་མ་ཐོབ་པར་གཏེར་ལུང་དང་མཐུན་པར་ཡོད་ཀྱང་རང་བློ་ཐད་ཆོད་བྱས་ནས་གྲོགས་གཅིག་དང་འགྲོགས་པ་མི་དྲན། ད་དུང་ཡང་གཏེར་སྟོན་མ་འོང་ཡང་དམ་ཚིག་ལ་མངོན་ལྐོག་མེད་པ་བྱེད་ངེས་པ་ཡིན་པས། ཁྱོད་གཉིས་གང་ཐད་ཀྱི་རང་གནས་ལ་སོང་ཞིག་སྨྲས་པས། ཡང་དགེ་སྦྱོང་ཆེ་བ་དེ་ཆུང་བ་ལ་ཐིམ་ནས་གཉིས་ཀའི་ལུས་མི་སྣང་བར་སྐད་ཀྱི་གདངས་ལས་འདི་སྐད་ཟེར། བཞིན་མཛེས་ལང་ཚོ་ལྡན་པའི་ཡིད་འཕྲོག་མ། །བལྟ་བས་མི་ངོམས་བདེ་ཆེན་མཆོག་གི་གཟུགས། །བདེན་པར་སྨྲ་ཞིང་གཡོ་སྒྱུ་ཡངས་པའི་ཐུགས། བརྩེ་ཆེན་དབང་ ཕྱུག་ཌཱ_UNK་ཁྱོད་ལ་བསྟོད། །ཚེ་གཅིག་སངས་རྒྱས་འགྲུབ་པའི་ལམ་བཟང་མཆོག །དུས་གཅིག་དོན་གཉིས་འགྲུབ་པའི་རྡོ་རྗེ་འཛིན། །ལྷན་ཅིག་བདེ་སྟོང་བསྐྱེད་པའི་གྲོགས་འགྱོད་ཅིང་། སྐད་ཅིག་མི་འབྲལ་ཚོགས་སུ་འཁོད་པར་ཤོག །ཟེར་ནས་ཉི་མ་ནུབ་ཕྱོགས་སུ་འོད་དམར་གྱི་རྣམ་པར་མི་སྣང་བར་གྱུར་ཏོ། །ཡང་རྒན་མོ་ཞིག་འོང་ནས་ཁྱོད་ཀྱིས་དགེ་སྦྱོང་གཉིས་ཨེ་ཤེས་ཟེར། བདག་གིས་མི་ཤེས་ཀྱང་གཏམ་མ་ངེས་པ་སྣ་ཚོགས་བཤད་འདུག་པས་ཅི་ཡིན་སྙམ་གི་སྨྲས་ཚེ། མོ་ན་རེ། བན་ཆུང་དེཀ་ཁྱོད་ཀྱི་ཐབས་གྲོགས་ཨཀྵ་རས་བཏང་བ་རེད། དགེ་སྦྱོང་ཆེ་བ་དེ་བསྭེ་རྒྱལ་ཡིན་རབས་ཡོད་པས། ཁྱོད་ཐབས་ཤེས་བར་ལ་བར་ཆད་ཅུང་ཟད་ཡོད་པར་འདུག་པས་གཟབ་དགོས་ཟེར་བ་དང་མཉམ་དུ་རང་གཉིད་ལས་སད་དོ། །དེ་ནས་ངེད་ཅག་རང་ཡུལ་ཕྱོགས་ལ་འགྲོ་ཆས་བྱས་ཚེ། བླ་སེར་རྣམས་ཀྱིས་གཙོས་སྡེ་འབངས་ཐམས་ཅད་ཀྱིས་སེམས་མྱ་ངན་བྱེད་ཅིང་ཅི་འབྱོར་གྱི་འབྲུ་བསོད་སོགས་བྱིན་ནས། ད་དུང་ཡང་ཡུལ་ཕྱོགས་འདི་ཀར་ལོ་ཤས་ཙམ་ལ་ཁྱོད་བཞུགས་ཐབས་དང་། སྨིན་གྲོལ་གྱི་བཀའ་དྲིན་མ་ཆུང་ཟེར་ནས་ཚིག་གནད་ཡང་ཡང་འཕང་། ཁྱདཔར་མི་དབང་གྲགས་རྒྱལ་ནས་ཀྱང་ང་རང་ན་སོ་ལོན་པའི་ཚེ་ཅི་ཡིན་མི་ཤེས་ད བྃ༔ ཡང་། ཁོང་བླ་སེར་རྣམས་ཀྱི་དོན་དུ་ཁྱོད་འདི་ཕྱོགས་ལ་བཞུགས་ཐབས་མ་འཆུག །སྤྱིར་སྡེ་འབངས། སྒོས་བླ་སེར་ཐམས་ཅད་ཀྱིས་ཁྱོད་བཀའ་དྲིན་གསུམ་ལྡན་དུ་ཤེས་ནས། འདི་ཕྱིའི་བློ་གཏད་ཁྱོད་ལས་མེད་པ་ལྟ་བུ་ཡིན་པ་སོགས་ལུགས་གཉིས་གང་ཐད་ནས་དསྔ་རྟེན་འབྲེལ་བཟང་པོ་འོང་བ་ཡིན་པས། ད་དུང་ཡང་ཁྱོད་ཀྱི་ཐུགས་རྒྱ་ཆུང་མི་ཉན་ལགས། གྲྭ་ཚང་ལྔ་བརྒྱའི་བདག་པོ་ཁྱོད་ཀྱིས་མཛད་ན་བཤད་སྒྲུབ་ཀྱི་བསྟན་པ་ཡར་དར་ལོས་འོང་ཟེར་བ་སོགས་གསུང་སྒྲོས་མང་པོ་མཛད་འདུག་པས། རང་གནས་ཀྱང་མགར་རས་བཙན་མ་བཙུགས་ན ཐབས་གང་དྲག་གིས་རབ་སྒྲུབ་གྲྭ། མིན་ཀྱང་བར་སྐབས་རེ་ལ་དབང་ཁྲིད་རེསྟབས་ལྡན་ཨེ་འོང་བྱེད་སྨྲས། དེ་ནས་བྱ་པདྨ་རྡོ་རྗེ་དང་། ལྷ་བཟོ་མཁས་དབང་། གླིང་ཚོགས་རྒྱམ་སོགས་ཀྱིས་སྐྱེལ་མ་བྱས་ཏེ། རང་གནས་ཀྱི་ཕྱོགས་ལ་འོང་ནས། ཐོག་མར་བསོད་སྤྲུལ་རིན་པོ་ཆེ་དང་མཇལ་འཕྲད་མཛད་ཚེ། ཁོང་ཐུགས་ཤིན་ཏུ་དགྱེས་པར་མཛད་ཅིང་ལུགས་གཉིས་ཀྱི་གསུང་སྒྲོས་ཞིབ་རྒྱས་སུ་གནང་། དེའི་སྐབས་ལུང་ཟིན་སྐྱེས་བུ་དམ་པ་མཁན་པོ་ནོར་བུ་དབང་རྒྱལ་གྱིས་རིན་ཆེན་གཉིས་པ་དང་། བཀྲ་ཤིས་ལྷ་རྫས་བཅས་གནང་འབྱོར་ཕེབས་པ་བདག་གི་ལག་ཏུ་ འཕྲོད་པས། ཁོང་གི་ཚེ་ཆོས་ལ་བར་ཆད་མེད་པའི་ཕྱིར་དུ་བླ་མ་མཁའ་འགྲོའི་དཀྱིལ་འཁོར་དུ་ཕུལ་བས། དེའི་ནུབ་རྨི་ལམ་ལ་བྱ་ངང་པ་ལྟ་བུའི་གསེར་བྱ་ཞིག་བདག་གི་གམ་དུ་འོང་ནས་འདི་སྐད་ཟེར། ཝ་ཝཾ་གནས་མཆོག་དཔལ་རིའི་གླིང་ནས། །འོང་བའི་འཕྲུལ་ལྡན་གསེར་བྱ། །གྲོགས་གཅིག་ལས་འབྲེལ་རྩལ་གྱིས། །ཁྱོད་ལ་ངག་གསལ་སྒྲོན་ཡོད། །བདེ་བདེ་མཁའ་འགྲོའི་གྲོང་ཁྱེར། །རང་བྱུང་དབྱིངས་ཀྱི་རྒྱན་ལས། །ལོག་ན་མེད་པ་ཨེ་ནམ། །སྣང་ཆ་ཐབས་མཆོག་དཔའ་བོ། །སྟོང་དབྱིངས་ཤེས་རབ་བཙུན་མོ། །འདུ་འབྲལ་མེད་པ་ཨེ་ནམ། སྔོན་སྨོན་ལས་འཕྲོ་སད་པའི། །སབྟའི་དབང་དུ་མ་གཏོང་། །བདེ་ཆེན་འབྱུང་གནས་སེམས་དཔའ། །སྙིང་འཛིན་ལྕགས་ཀྱུའི་ལས་སྦྱོར། །མི་རིང་མྱུར་དུ་བརྩོན་ན། །ཕྱོགས་མེད་ཕྱོགས་ནས་འཕྲད་ངེས། །དེའི་མཐུས་གཏེར་གཉིས་བསྟན་པ། །ཤར་དང་ལྷོ་ནས་དར་ངེས། །བུ་ཆེན་རཏྣ་པ་ཤཾ། །མི་རིང་རང་གི་ཕྱོགས་ནས། །ཡོས་བུས་བརྫུ་བག་མེད་ཚེ། །དོན་གཉིས་ངང་གིས་འབྱུང་སྲིད། །པད་འབྱུང་མཚོ་རྒྱལ་གཉིས་ལ། །རྩེ་གཅིག་གསོལ་བ་བཏབ་ན། །རེ་འབྲས་མངོན་དུ་གྱུར་ནས། །ཕྱི་མ་དཔལ་རིར་འཁོད་ངེས། །བསླུ་བྲིད་འཇའ་ཚོན་ ༔ རི་མོ། །བློ་གཏད་དོན་གཉེར་བྱས་ཚེ། །ཆོས་བརྒྱད་དུག་གི་མེ་ཏོག །སྒྲ་བརྒྱའི་གདོང་གིས་བསུས་འོང་། །ལྷ་དང་སྲུང་མ་འཁུ་ནས། །མི་འདོད་དབང་སྒོར་གསལ་ལ། །ཅི་ཆ་ཅི་འགྱུར་མ་ངེས། །ནུབ་ནས་ཀུན་བཟང་མིང་གིས། །བརྡ་དོན་ལས་ལ་བསྐུལ་ཚེ། །ཤེས་རབ་མདའ་མོ་མ་ཞན། །རྟེན་འབྲེལ་གནད་གཟབ་གལ་ཆེ། །ཁྱོད་དང་རྡོ་རྗེའི་སྤུན་གྲོགས། ། བསོད་སྤྲུལ་སང་མཆན ད་ལན་མཁའ་འགྲོའི་གནས་ལ། །བཞུད་པའི་དུས་ཚིགས་མི་གསལ། །རྟེན་འབྲེལ་དུས་ལ་བབ་ཚེ། །ལམ་འདྲེན་བདག་གིས་བྱེད་འོང་། །ཉམས་པའི་རྐྱེན་གྱིས་བསྐུལ་ན། །ཡུན་རིང་འདུག་གྲབ་མ་བྱེད། །འགྲོ་དོན་ཞིང་དུ་ལྷག་པའི། །བརྡ་དོན་དུས་སུ་གསལ་ངེས། །ཤར་སྨད་བྲག་དཀར་གནས་ན། །མཁའ་འགྲོའི་ཟབ་སྒྲུབ་ཟབ་མོ། །ལྭ་ཡི་སྒྲོམ་བུ་གང་ཡོད། །ལྷོ་ནས་ནོར་བུ་ལོན་ན། །སྒྲ་བརྒྱ་དུས་ཚིགས་གནད་ཡིན། །ཆོས་འཛིན་འགྱུར་མེད་མིང་དང་། །འཕྲད་ན་དོན་གཉིས་འབྱུང་ངེས། །མཁའ་འགྲོས་མངག་པའི་ཕོ་ཉའི། །ལས་དང་འགྲོ་དོན་ཅི་འབྱུང་། །རྟེན་འབྲེལ་ཁོ་ནར་རག་ལས། །དེ་ཕྱིར་ཐབས་མཁས་ཐུགས་རྗེས། །རྟེན་དང་འབྲེལ་འབྱུང་མ་འཛོལ། ཌཱཀྐིའི་ཞལ་ལུང་ཇི་བཞིན། །སྟབས་ཀ་གཟབ་པ་གནད་ཡིན། །ཟེར་བ་དང་མཉམ་དུ་གཉིད་ལས་སད་དོ། །དེ་ནས་ཁ་བྱང་གསལ་བའི་མེ་ལོང་ན། གངས་རི་ཐོད་དཀར་གཏེར་ཁ་འདི། ། རྫུ་འཕྲུལ་ཇི་བཞིན་མཁའ་འགྲོས་སྤྲད། །འདི་འཕྲད་རིག་འཛིན་སྐྱེས་བུ་རྣམས། །པད་འབྱུང་ང་དང་དགོངས་པ་མཉམ། །ཁྱོད་ཀྱང་མི་གནས་འདས་པའི་ཚེ། །སྐུ་གདུང་མཁའ་འགྲོས་དྲང་ཡང་སྲིད། །ཡང་ན་གདུང་དང་རིང་བསྲེལ་དང་། །ཡིག་འབྲུ་ཕྱག་མཚན་ལ་སོགས་འབྱུང་། །ཞེས་གསུངས་པས། ལོ་ཁྱིམ་དེའི་ཟླ་བ་བཅུ་པའི་ཉེར་ལྔའི་དུས་ཆེན་ལ། སྐྱབས་རྗེ་ཐམས་ཅད་མཁྱེན་པ་འགྲོ་འདུལ་གསང་སྔགས་གླིང་པའི་ཡེ་ཤེས་སྒྱུ་མའི་སྐུའི་ཐུགས་རྗེ་ལ་བརྟེན་ནས། གངས་རི་ཐོད་དཀར་གྱི་གསང་གཏེར་མཁའ་འགྲོའི་ཐུགས་བཅུད་གསང་བ་གབ་ཐིག་གི་ཟབ་ཤོག་ཞིང་ལྤགས་ངོས་ལ་བཻ་རོའི་ཕྱག་བྲིས་གསེར་རིས་བརྡ་གྲོང་ཆེ་བཅུ་གསུམ། བསྭེ་སྒྲོམ་གྲི་གུག་གི་རྒྱ་ཅན། མཚོ་རྒྱལ་གྱི་རཀྟ་འོད་ཟེར་ལྔ་པ། དབང་ཕྱུག་གི་ནོར་བུ་རིན་ཆེན་གསུམ་ལས་བྱས་པའི་སྒྲོམ་བུ་བཅས་ལག་ཏུ་འབྱོར་ནས་རྟེན་འབྲེལ་ཕུན་སུམ་ཚོགས་པ་བྱུང་ངོ་། །ཡང་རང་ལོ་སོ་བདུན་ལོར་གྲུབ་དབང་སྐྱབས་རྗེ་ལས་འབྲེལ་རྩལ་གྱི་ཡང་སྲིད་དགུང་གྲངས་གསུམ་ལོན་ བྃ༔ དུས། བསོད་སྤྲུལ་རིན་པོ་ཆེས་སྐུ་བདག་མཛད་ནས་སེར་དགོན་དུ་གདན་སར་འཁོད་ནས་ཁྲི་སྟོན་སོགས་རྒྱ་ཆེན་པོ་མཛད་སྐབས། སྤྲུལ་པའི་སྐུ་དེ་ཉིད་སྐུ་ན་ཆུང་ཡང་ངོས་འཛིན་མཛད་པ་སོགས་གཞན་ལས་ཁྱད་པར་ཆེས་ཆེར་འཕགས་པས། དེར་འདུས་ཀྱིས་བླ་སྤྲུལ་རྣམས་དང་དགེ་འདུན་འདུས་སྡེའི་ཚོགས་ཀྱི་དབུས་མཆོག་དམན་ཀུན་གྱིས་ངོ་མཚར་ཞིང་ཐམས་ཅད་ཀྱིས་མངོན་པར་བསྟོད་པའི་གནས་སུ་གྱུར་ཏོ། །དེའི་སྐབས་ལོ་ཁྱིམ་དེ་ཀའི་ཟླ་བ་བརྒྱད་པའི་ནང་དེར། མཁར་ནང་དཔོན་འགྲོ་མགོན་དང་རང་སློབ་རྣམས་ཀྱི་འདུན་པ་བཞིན། རང་གི་གནས་གཞི་ཁོང་ཚོའི་སར་འགྲོ་ཆགས་བྱས་ཡོད་ཚེ། ཕྱོགས་འདུས་ཀྱི་བླ་སྤྲུལ་རྣམས་དང་། ཁྱད་པར་རང་སློབ་དམ་པ་མཁས་པའི་དབང་པོ་མཁན་པོ་ནོར་བུ་དབང་རྒྱལ་དང་། ཁྲ་སྐྱ་བླ་མ་ཤེས་རབ་འོད་ཟེར་སོགས་བུ་སློབ་རྣམས་ལ། གྲུབ་དབང་གཏེར་ཆེན་ཡབ་སྲས་ཀྱི་གསུང་འབུམ་སྐོར་གྱི་དབང་ལུང་རེ་དང་། རང་གི་ཉམས་རིས་ཀྱི་ཆོས་བཀའ་ཕྲན་བུ་རེ་བྲི་སྤེལ་བྱས་པ་སོགས་བུ་སློབ་རྣམས་ཀྱི་ཐུགས་འདུན་ལྟར་བསྒྲུབས་རྗེས་ཁོང་རྣམས་རང་གནས་ལ་བྱོན། རང་ཡང་མཁར་ནང་སང་གི་ནང་དུ་འགྲོ་ཆགས་བྱས་ཏེ། རང་ལ་མ་ཐོབ་པའི་དབང་ལུང་ཁྲིད་ལ་སོགས་པ་557 ཐམས་ཅད་བསོད་སྤྲུལ་རིན་པོ་ཆེའི་ཞལ་སྔ་ནས་ཚང་བར་ཞུས་ཏེ། ལུགས་གཉིས་གསུང་བསྒྲོས་དང་བསླབ་བྱ་མཛད་སྐབས། བླ་མའི་བཀའ་དང་དང་མཁའ་འགྲོའི་ལུང་བསྟན་གང་དུ་མ་གཏོགས་པའི་འཇིག་རྟེན་མི་ལུགས་ལ་བརྟེན་ནས་རང་དབང་མེད་བཞིན་འགྲོ་དགོས་པ་ལ་ཡིད་ཆད་ནས་སེམས་ཤིན་ཏུ་སྐྱོ་བཞིན་མིག་ནས་མཆི་མ་ཆུ་ཀླུང་བརྡོལ་བ་ལྟར་བྱེད་འདུག་པས། གློ་བུར་དུ་བལ་ཞྭ་སྐྱ་ལེབ་དཀར་པོ་མགོ་ལ་གྱོན་པ་ཞིག་མི་རྟགཉིས་པོ་འགྲེང་ངེར་བདག་གི་ཁྱིམ་དུ་ཐོན་བྱུང་བས། བདག་གི་བསམ་པ་ལ་སྦྲ་ཁང་ཡར་མ་ཆེ་རྟ་མིག་གཉིས་པོ་མར་ཆུང་དུ་མ་སོང་བར་ཁྱིམ་ནང་དུ་ལྷགས་པ་དེ་ཅི་ཡིན་སྙམ་ཚེ། ཁ་ན་རེ། ཡ་ཁྱོད་ཚོས་ཅི་བསམ་གྱིན་ཡོད་ཟེར་བ་ལ། བདག་གིས་ང་རང་སྡུག་སྒུར་བྱས་ནས་བསྡད་ཡོད། ཁྱོད་སུ་ཡིན་དྲིས་པས། ཡང་དེན་རེ། ང་ལྷ་ལུང་ནོར་བུ་སྒང་ཟེར་བ་དེའི་ཉེ་ཆར་ནས་ཡིན་ཟེར། ཡང་བདག་གིས་ཁྱོད་འདིར་འོང་དོནཅི་ཡིན་སྨྲས་ཚེ། ཁོ་ན་རེ། ང་ཁྱོད་ལ་མཚར་གཏམ་ཞིག་བཤད་དུ་འོང་བ་ཡིན་ཟེར། བདག་གིས་མཚར་རྒྱུ་ཅི་ཡོད། ཁྱོད་ལྟ་བུའི་གཞི་བདག་འདྲ་བ་རིག་མྱོང་། བདག་ལྟ་བུའི་ཐ་མལ་ཉམ་ཆུང་གི་སྤྲང་མོ་ཁྱོད་ཀྱིས་རིག་ལོས་ཡོད་སྨྲས་པས། དེ་ན་རེ། ཡ་ཧོ་མཚར་སོ་མཚར་ བྃ༔ གཏམ་ང་ཡིས་ཤེས། །ཁྱོད་ཉོན་དང་དཔེ་བཞག་འདི་ལྟར་རེད། །ཡུལ་བསོད་ནམས་ཆུང་དང་དུས་དབང་གིས། །ཁོང་དཀར་ཕྱོགས་ལྷ་མགོན་དབུ་འཕང་དམའ། །བདུད་སྡིག་ཏོའི་ཟ་ཁ་ཡར་དར་རེད། །དེ་སྙིགས་མ་སྙིགས་མའི་དུས་རྟགས་དང་། །ལས་མི་དགེར་སྤྱོད་པའི་འབྲས་བུ་དེ། །རང་ཐོག་ལ་སྨིན་ན་དུས་ངན་ཟེར། །རྟེན་འབྲེལ་གྱི་སྣ་ཁ་འཆོལ་བ་མཚར། །ཆོས་ཀུན་རྫོབ་ལ་རྩིས་གཞི་ཆེར་བརྩོན་ནས། །ཟབ་གཏེར་གྱི་བྲི་སྤེལ་གཡེལ་བ་མཚར། །ཚེ་འདི་སྣང་རེ་དོགས་མ་ཞིག་པས། །རྟེན་འབྲེལ་འབྱུང་སབྟས་བསྒྱུར་བ་མཚར། །ཆོས་ཟབ་པའི་གཏེར་ལ་དབང་ལྡན་ཡང་། །གབ་སྦས་ཀྱི་སྒྲོག་ཏུ་བཅིངས་པ་མཚར། །བསྟན་འགྲོ་བའི་དོན་གྱི་སྒོ་ཕྱེས་ཚེ། །ངེས་འབྱུང་གིས་བློ་རྒྱ་ཆུང་བ་མཚར། ད་མཚར་ཏེ་མཚར་རོ་ཁྱོད་ལ་མཚར། །སྙིགས་དུས་འགྲོ་བའི་མོས་པ་དང་། །བཟའ་ཚང་མང་པོའི་འགོ་རྫི་དང་། །གཏེར་སྟོན་ངན་པའི་ཐེ་ཚོམ་གསུམ། །ང་རྒད་པོས་བལྟས་ན་ཡི་རེ་ཆད། །སྙིགས་དུས་འགྲོ་བའི་ཆོས་པ་རྣམས། །འགྲུབ་དུས་མེད་པ་སྤོས་རྒྱའི་རིས། །བཟའ་མི་མང་པོའི་ལོངས་སྤྱོད་ལ། །ཐོབ་ཐང་ཆུང་བ་འཇའ་ཚོན་རིས། །གཏེར་སྟོན་ངན་པའི་ཐེ་ ཚོམ་བློ། །རང་མགོ་བརྡུང་བའི་ཐོ་བ་རེད། །ད་དེ་འདྲའི་ལད་མོ་མི་བྱེད་པར། །མཁའ་འགྲོའི་ཞལ་ལུང་བཞིན་བསྒྲུབ་ན། །འཁོར་སློབ་གདུལ་བྱ་བསྟན་པ་དར། །ཟབ་གཏེར་གཉིས་ཀྱི་བསྟན་གཞི་དེ། །ཐིག་ལེ་འཛིན་པའི་འཛུམ་གྱིས་བསུ། །དོན་གཉིས་ནོར་བུ་ལག་ཏུ་ལོན། །ལྷོ་ཡི་ལྷོ་ཤོད་རོང་ཆེན་གནས། །སྦས་རྫོང་རྡོ་རྗེའི་ཉེ་ཆར་ནས། །སེང་དཀར་མ་བུ་ཆ་འདྲ་བའི། །རིགས་ལྡན་སྐྱེས་བུ་ཆོས་ཀྱི་བདག །ཁྱུང་ཆེན་སྔོན་མོའི་དུས་སུ་སླེབ། །སྟག་འབྲུག་ཁྱུང་ཆེན་རྩལ་ལྡན་པ། །ཝ་ཡི་མཇུག་མར་བསྡེབས་ནས་འོང་། །རང་སྐལ་ཆོས་དང་སྤྱོད་ཤེས་ན། །དོན་གཉིས་ངང་གིས་འབྱུང་ཡང་སྲིད། །བྱ་མོ་ནག་མོས་བསླུ་བྲིད་དང་། །དབང་གཞུའི་མདངས་ཀྱིས་མ་འགྱུར་ན། །གཏེར་གཉིས་བསྟན་གཞི་དེར་གནས་འགྱུར། །དེ་སོགས་ཁྱོད་ཀྱིས་རིག་པས་དཔྱོད། །ལྷ་གཉེན་ཆེན་ཐང་ལྷའི་ཆ་ངག་ཡིན། །ངས་ཁྱོད་ལ་འཕྲོད་པ་སེམས་ལ་འཆོང་། །ཅེས་ཟེར་སྣང་འཆར་ཚེ་མི་སྣང་བར་གྱུར། དེ་ནས་གཞན་རྐྱེན་ཞིག་གིས་མཁར་ནང་དུ་འགྲོ་ཐབས་མ་ལྡན་ནས། གནས་ངེས་མེད་ཞིག་ཏུ་འགྲོ་བསམ་ཡོད་ཀྱང་། སྐྱབས་རྗེ་བསོད་སྤྲུལ་རིན་པོ་ཆེའི་སྐུ་རིང་ལ་གནས་གཞི་གཞན་དུ་འགྲོ་མི་ཉན་གསུངས་ཏེ་ཆོས་ བྃ༔ དམ་ཚིག་གི་བཀས་མནན་ནས། རེ་ཞིག་བླ་མའི་བཀའ་བཞིན་སེར་དགོན་དུ་གནས་བཅས་ཏེ། ཕྱོགས་འདུས་ཀྱི་བུ་སློབ་རྣམས་ལ་ཆོས་ཁྲིད་དབང་ལུང་སོགས་ཀྱིས་སྔར་ལྟར་བར་མཚམས་མེད་པར་བསྟན་པ་བསྐྱངས། དེ་སྐབས་སུ་འགྲུབ་རྒྱུ་མེད་པའི་ལུང་བསྟན་ལྟ་བུར་བྱུང་བ་གཏེར་གཞུང་དུ་གསལ། དེ་ནས་རང་ལོ་སོ་བརྒྱད་ཀྱི་དུས་གཞན་རྐྱེན་ཤུགས་དྲག་པ་ཞིག་ལ་རྐྱེན་ནས་ཡིད་སྐྱོ་བའི་ངང་ནས་བདག་ལྟ་བུའི་ལུས་ངན་པ་དམན་པ་མགོན་མེད་སྐྱབས་དང་བྲལ་བ་ཕར་ལ་གཅེས་པར་བསྐྱངས་ཀྱང་ཚུར་རང་བཞིནགྱིས་སྡང་བ་ལ་བློ་སུན་ཡོད་སྐབས། སྦྲ་ཆེན་གྱི་སྣེ་ལ་བྱིའུ་ཡིད་དུ་འོང་བ་ཞིག་གིས་འདི་སྐད་ཟེར་སྣང་འཆར། ཏིང་ཏིང་རྣལ་འབྱོར་བདེ་བའི་རྡོ་རྗེ། །སྒྱུ་མའི་སྣང་བར་བདེན་ཞེན་མ་བྱེད། །ཕ་གཅིག་རྟོགས་ལྡན་བླ་མའི་གདམས་པས། ཚོགས་དྲུག་རང་གྲོལ་དགོངས་སྤྱོད་ཟབ་མོ། །ཅི་སྣང་ཡེ་ཤེས་རྒྱན་རོལ་ཨེ་གོ །སྣང་བ་རྒྱས་འདེབས་རྩིས་གདབ་མི་དགོས། །གང་ཤར་རང་གྲོལ་ངང་དུ་སྐྱོང་མཛད། །བདེ་སྡུག་འཁྲུལ་སྣང་རིག་པའི་རྩལ་སྦྱངས། །འཛིན་མེད་རྒྱ་ཡན་ཆེན་པོར་ལ་ཟློས། །ཞེས་ཟེར། ཡང་བདག་གིས། ཡིད་འོང་མཛེས་ལྡན་སྨྲ་མཁས་བྱིའུ་ཆུང་། །གྲོགས་མེད་གཅིག་པུར་གནས་པའི་ སྤྲང་མོར། །གོ་དོན་བསླབ་བྱ་མཛད་པ་དྲིན་ཆེ། །འོན་ཀྱང་ཁྱོད་ཡུལ་གང་ཡིན་སྨོས་དང་། །འོང་བའི་གཤོག་རྩལ་ངལ་དུབ་ཨེ་བྱུང་། །ང་ཡི་བསམ་སྤྱོད་སྡུག་བསྔལ་སྣོན་པ། །སྐྱོ་གྲོགས་མེད་པ་ཁྱོད་ཀྱིས་ཤེས་སམ། །གནས་ཚུལ་ཟུར་ཙམ་བཤད་ཀྱིས་ཉོན་དང་། །ཆུང་ནས་ད་ལ་ཐུག་གི་བར་དུ། །མཁའ་འགྲོ་རྣམས་ཀྱིས་ལུང་བསྟན་བྱིན་ཡང་། །བདག་གི་བྱ་བ་གང་དང་གང་ལ། །རང་བཞིན་ཐ་མལ་པ་ལས་སྡུག་བྱུང་། །ད་ནི་ལུང་བསྟན་བསླབ་བྱའི་དགོས་མེད། །དབེན་པའི་རི་ངོགས་ཡང་ཡང་དྲན་ནས། །བློ་ཐག་བསམ་བློ་དེ་གར་བྱེད་ཡོད། །ཕ་གཅིག་རྟོགས་ལྡན་བླ་མའི་དྲིན་གྱིས། །རང་རིག་ཆོས་སྐུའི་གནས་ལུགས་མཐོང་བས། །གནས་དགའ་འགྱུ་སྡུག་རྩིས་གདབ་མི་དགོས། །གང་ཤར་ཡེ་ཤེས་རོལ་པར་མཉམ་བརྡལ། འཛིན་རྩོལ་བཅོས་མའི་སྒོམ་ལ་མི་རེ། །གོ་མྱོང་རྟོག་པའི་ལམ་རྟགས་མངོན་གྱུར། །ཡིདགཉིས་ཐེ་ཚོམ་རེ་དོགས་མི་དགོས། །སྐུ་གསུམ་དབྱེར་མེད་གཞི་ལ་རྫོགས་པའི། །བསྒོམ་དང་སྒོམ་བྱེད་དམིགས་གཏད་བོར་ཐལ། །སྣང་བ་མ་འགགས་དཔེ་རུ་ཤར་བས། །ཡིག་སྣ་མང་པོའི་ཚིག་རོ་མི་བསྡུ། །ཆགས་བྲལ་ཡེ་ཤེས་དོན་དེ་མཐོང་བས། །ཆགས་སྤྱོད་ཁྱིམ་པའི་ བྃ༔ གཟུགས་ལ་མི་ཆགས། །མི་ཚེའི་ལྷག་མ་ཆོས་ལ་དྲིལ་ན། །ལུས་རྟེན་ཐོབ་པའི་དོན་མཆོག་རེདསྙམ། །ཨེ་གོ་ཨེ་ཚོར་འཕྲུལ་ལྡན་བྱིའུ་ཆུང་། །ཞེས་སྨྲས་ཚེ། ཆ་མི་ཆོད་པའི་ལུང་བསྟན་ལྟ་བུའི་ཚིག་འགའ་བཤད་ནས་འཕུར་སོང་། །དེ་ནས་རང་གི་བསམ་པ་ལ་ང་ངེས་མེད་དུ་འགྲོ་སྟབས་བྱུང་ན། སྐྱབས་རྗེ་བསོད་སྤྲུལ་རིན་པོ་ཆེའི་མདུན་ནས་གཏེར་ཆེན་བདུད་འཇོམས་རྡོ་རྗེའི་ཟབ་ཆོས་ཆ་ཚང་འབྲི་རྒྱུ་དམ་བཅའཕུལ་ཡོད་པས་དེ་སྔོན་ལ་འཛོམས་དགོས་སྙམ་ནས། རང་ལ་དབང་བའི་རྒྱུ་རྫས་སེར་སྣ་དང་སྡིག་དང་མ་འདྲེས་པའི་ཡོན་བདག་རྣམས་དང་། སློབ་བུ་ཤེས་རབ་འོད་ཟེར་སོགས་བུ་སློབ་རྣམས་ཀྱིས་བྱིན་པའི་ཊཾ་སུམ་བརྒྱ་ལྷག་ཙམ་འདུག་པ་དེ་གའི་བྲིས་ཡོན་གྱི་གཞི་བྱས་ནས་བྲི་བར་བརྩམ་ཚེ། ཡི་གེ་བྲིས་དཔེ་དག་མོ་གཏེར་སྟོན་བླ་བྲང་སང་མ་གཏོགས་ཁུངས་ལྡན་མེད་པས་ན། སྔར་