Tibetan
འདེབས་སྨོན་ལམ་བཏབ་མཐར། སྐྱབས་རྗེ་རྣམས་ཀྱིས་ཐུགས་བརྩེ་བ་ཆེན་པོས་དགྱེས་བཞིན་བྱུང་དང་འབྱུང་འགྱུར་གྱི་བསླབ་བྱ་ལུང་བསྟན་ལྟར་གསུངས་པ་གཏེར་གཞུང་དུ་གསལ། དེའི་སྐབས་སུ་དམ་ཅན་ཡིན་སྐད་པའི་བན་རྒན་སྨ་ར་དམར་པོ་ཅན་ཞིག་འོང་ནས་འདི་སྐད་ཟེར། ཁྱོད་ཀྱི་བླ་མ་རྣམས་མཇལ་བ་ངོ་མཚར། རང་རིག་ལས་གཞན་ན་བླ་མ་ཡོད་རབས་མེད་ཟེར། བདག་གིས་ངའི་བླ་མ་དངོས་སུ་ཡོད་པས་རྨི་ལམ་ནའང་མཇལ་རྒྱུ་ཡོད། རང་རིག་བླ་མར་ཤེས་མཁན་དེ་བདག་ལྟ་བུའི་སྐྱོན་ཀུན་ལྡན་ཡོན་ཏན་ཀུན་ཟད་དེ་འདྲ་ཞིག་ཅིའི་ཕྱིར་ཡིན། ཁྱོད་ཀྱིས་ང་ལ་ངོ་མཚང་མ་བཤད་སྨྲས་ཚེ། གཏམ་གྱི་མཇུག་མ་རྫོགས་ཀྱང་ཐུན་རྔ་ལ་རྐྱེན་བྱས་ནས་གཉིད་ལས་སད་དོ། །དེ་ནས་སྒྲུབ་སྡེ་བ་རྣམས་ཀྱི་མཚམས་མཐར་ཕྱིན་ནས་བཏང་རག་ཚོགས་མཆོད་སོགས་ཞིབ་རྒྱས་སུ་བྱེད་སྐབས་ལུང་བསྟན་ཕྲན་བུ་རེ་སྣང་བ་གཏེར་གཞུང་དུ་གསལ། དེ་ནས་རང་ལོ་བཞི་བཅུའི་ལོར་རང་ཡུལ་ལ་འོང་གྲབ་བྱེད་སྐབས་ཉམས་སྣང་གིས་བསྐུལ་ནས། ཟམ་ཐང་དགོན་པར་གནས་འབྲེལ་ལ་སོང་བས། ཀུན་མཁྱེན་ཆོས་ བྃ༔ རྗེ་དོལ་བོ་བ་དང་། རྗེ་བཙུན་དམ་པ་ཏཱ་ར་ན་ཐའི་སྐུ་བརྙན་མཇལ་སྐབས་སྔོན་གནས་རྗེས་དྲན་གྱི་ཚུལ་དུ། རང་གི་ཕྱི་ནང་གསང་གསུམ་ལ་བོགས་འདོན་ཅུང་ཟད་རེ་རྙེད་ནས་གདམས་པའི་གསོས་སུ་སྨན། དེ་ནས་དེར་བཞུགས་ཀྱི་ཁྲི་པ་དང་། ཇོ་སེར་ཆ་ཤས་ལ་ཆོས་འབྲེལ་སོགས་མོས་འདུན་ལྟར་བྱས། རྩང་བའི་སེ་སྤྲུལ་སྐུ་རིན་པོ་ཆེ་ལ་རང་གཏེར་གྱི་ཆོས་འབྲེལ་ཕྲན་བུ་རེ་བྲི་སྤེལ་བྱས་ཏེ་ཕུལ་བ་སོགས་ཀྱིས་ཁོང་རྣམས་དད་གུས་ཀྱི་གནས་སུ་བྱེད་ཅིང་རང་ལ་མཐུན་རྐྱེན་ཡང་ཕུན་སུམ་ཚོགས་པར་མཛད་དོ། །དེ་ནས་ངེད་ཅག་རྣམས་ཕྱིར་ན་མདའ་རུ་འོང་ནས་ཟླ་བ་བཞི་པའི་དུས་མཆོད་སོགས་མཐའ་རྒྱས་སུ་བྱས། རང་སློབ་རིག་བཟང་དང་། ཉེ་གནས་ཐུབ་བཟང་གཉིས་རང་ཡུལ་ནས་བསུ་མར་ཐོན་བྱུང་། དེ་སྐབས་ཡུལ་དེ་གའི་བླ་སྤྲུལ་སེར་སྡེ་དཔོན་འཁོར་དང་བཅས་པས་ང་རང་གི་གནས་གཞི་འོང་ཐབས་དགོས་ཟེར་ནས་ནན་ཆེར་ཡང་ཡང་གྲོས་འདུན་བྱེད་སྐབས། རང་ནས་གནས་སྐབས་ཙམ་རེ་ལ་ཅི་དགོས་བྱེད་ཆགས་བྱས་ཏེ། ཞིབ་ཆ་རྗེས་ནས་བསོད་སྤྲུལ་རིན་པོ་ཆེའི་བཀའ་ཅི་གནང་ཡང་དེ་ལྟར་བྱེད་སྨྲས་ནས་དེ་གར་ཐག་བཅད་ཡོད་སྐབས། ཡང་འཁྲུལ་སྣང་ལ་དམ་ཅན་ཡིན་སྐད་པས་འདི་སྐད་ཟེར། ཡ་ཡ། ཁྱོད་ ད་ལོ་མ་འགོར་བར་མྱུར་དུ་རང་ཡུལ་ཕྱོགས་ལ་བྱོན་ཐབས་མཛོད་དང་། ང་སེར་དགོན་ནས་འོང་བ་ཡིན་པས་དེ་ཕྱོགས་ཐམས་ཅད་བདེ་མོ་རེད། ཁྱོད་ཀྱི་གནས་གཞི་འདི་ཕྱོགས་ལ་འོང་ཐག་ཆོད་དཀའ་མོ་རེད། སྔོན་ལས་ཀྱིས་ས་གར་གནས་མི་ཤེས་འང་ཟེར། བདག་གིས་ང་གར་གནས་གར་འགྲོ་ཁྱོད་ལ་ཁུར་ཐང་ཅི་ཡོད། ང་རང་ལ་བླ་མ་གཅིག་པུ་འདིའི་ཐུགས་ལ་མི་བབ་པ་བསྒྲུབ་མི་ཉན་མ་གཏོགས། གཞན་སུ་ལའང་བདག་གི་དབང་ཐོག་དོན་མེད་སྨྲས་པས། ཁོ་ན་རེ། ཡ་ཡ་ངས་ཁྱོད་ལ་དྲང་གཏམ་སྨྲས་ཀྱང་བདེན་པར་མ་བཟུང་ན། ཁྱོད་ཀྱི་འབྱུང་འགྱུར་གྱི་ལུང་བསྟན་རྣམས་སུ་ལྟོས་དང་གསལ་འོང་ཟེར་ནས་མི་སྣང་བར་གྱུར་ཏོ། །དེ་ནས་བླ་སེར་སྡེ་དཔོན་ཀུན་གྱིས་སྐྱེལ་མ་སོགས་ཀྱི་མཐུན་རྐྱེན་བྱས་ཏེ། ལོ་ཁྱིམ་དེའི་ཟླ་བ་ལྔ་པའི་ནང་ངེད་རྣམས་རང་ཡུལ་ཕྱོགས་ལ་འོང་སྐབས་ཆུ་ཐམས་ཅད་ཤིན་ཏུ་ཆེ་བས་བགྲོད་དཀའ་བ་བྱུང་ནས་གསང་ལམ་སར་བུད་ནས་འོང་བའི་ལམ་ཁར་སྔར་གྱི་ཡུལ་གཏེར་སྒར་དུ་ཐོན། དེ་ཕྱོགས་ཀྱི་བཀོད་པ་དང་ཡུལ་རྐྱེན་རྣམས་དབང་སྒོར་མངོན་ཚེ། སྙིང་ལ་ཚེར་མ་ཟུག་པ་ལྟ་བུའི་སྡུག་བསྔལ་གྱིས་ནོན་ནས་དྲན་བསམ་སྔ་ཕྱི་ཐམས་ཅད་རང་གཅིག་པུའི་སྡུག་བསྔལ་ཁོ་ནར་སོང་བ་ལ་ཡི་ཆད་ནས། བླ་མ་ བྃ༔ མཁའ་འགྲོའི་ཚོགས་ལ་འོ་དོད་འབོད་ཅིང་སྨྲེ་སྔགས་གདུང་བའི་མཆི་མ་ཆུ་རྒྱུན་ལྟར་བྱུང་ཡང་། རང་གཅིག་པུ་མ་གཏོགས་སུ་གང་གིས་ཀྱང་སྡུག་རོགས་མ་བྱུང་ནས་རང་སློབ་དད་དམ་འཆང་བ་དྲི་མེད་རྣམ་དག་གི་སར་སོང་ནས་རང་གི་དྲན་བསམ་སྔ་ཕྱི་ཐམས་ཅདསྡུག་བསྔལ་དུ་སོང་ཚུལ་རྣམས་བཤད་པས། ཁོང་ཡང་སེམས་རབ་ཏུ་ཕམ་ནས་མཆི་མ་བྱུང་བཞིན་བདག་ལ་ལུགས་གཉིས་ཀྱི་བསླབ་བྱ་དང་སེམས་གསོ་བྱེད་དོ། །རང་ནས་ཀྱང་གང་ཤེས་ཀྱི་ཉམས་ལེན་གྱི་གསོལ་འདེབས་སོགས་བྱས་ཏེ་ལམ་དུ་ཞུགས་སྐབས། རང་སློབ་དམ་པ་མཁན་པོ་ནོར་བུ་དབང་རྒྱལ་དཔོན་གཡོག་དང་འཕྲད་པས། ཁོང་རྣམས་ཤིན་ཏུ་ཡི་རངས་ཏེ་གདམས་པ་སོགས་ཀྱི་བསྒྲོ་གླེང་མཛད། རང་གནས་ཀྱང་བུ་སློབ་རྣམས་དང་ས་ཐག་རིང་འགྲོ་བས། མཁན་པོ་དང་ཨེ་མཇལ་མི་ཤེས་བསམ་ནས། ལུགས་གཉིས་ཀྱི་བསྒྲོ་གླེང་ཞིབ་རྒྱས་སུ་བྱས་ཏེ། ཆོས་དང་གདམས་པ་ཞུ་དགོས་པ་རྣམས་རྟེན་འབྲེལ་རྗེས་མཐུད་དུ་བཞག་གོ །དེ་ནས་དེ་ནུབ་ངེད་རྣམས་སྐྱ་རིང་ནང་ལ་ཞག་ས་བྱས་པས། རང་གི་སེམས་ཁམས་མི་བདེ་ཞིང་སྔར་གྱི་སྡུག་བསྔལ་དེ་ནད་ལྟ་བུ་ལ་སོང་ནས་དབུགས་རིང་འདོན་དགོས་པ་བྱུང་བས། རང་གི་ཉེ་གནས་ཐུབ་བཟང་ ཞེས་པ་དེས། ཨ་ལེ་ཁྱོད་སྙུང་ནི་ཨེ་རེད་ཟེར། བདག་གིས་ང་ན་བ་རེད། ཡུལ་རྐྱེན་གྱིས་སེམས་དཀྲུག །སེམས་ཀྱིས་ཉེར་ལེན་འབོད། ཉེར་ལེན་གྱིས་སྡུག་བསྔལ་བསྐུལ། སྡུག་བསྔལ་གྱིས་བློ་ཡིད་སུན། ཡིད་ཁམས་མུན་པ་ལྟ་བུར་སོང་ནས། སྙིང་རླུང་གིས་ན་འདུག་སྨྲས་པས། ཁོ་ན་རེ། ཨ་ཙི་ཅི་ཡིན་ཟེར་ནས་ཐལ། ནང་སྔ་མོ་སྐྱོ་ཚ་འཐུང་སྐབས་ནུབ་མོ་གཉིད་མ་འོང་བའི་རྐྱེན་གྱིས་དུབ་ཡོལ་ཅུང་ཟད་བྱེད་ཚེ། རྨི་ལམ་གྱི་སྣང་ངོར་བུད་མེད་ཡིད་དུ་འོང་བ་ཞིག་གློ་བུར་དུ་ཐོན་བྱུང་ནས་གླུ་ངག་ལ་དྲངས་ནས་འདི་སྐད་ཟེར། ཡ་ན་ཆུང་བུ་མོ་བཞིན་ལེགས་མ། །ཡུལ་གང་ཡིན་ཕ་མ་སུ་ཡི་བུ། །མིང་ཅི་ཟེར་འདི་རུ་ཅི་བྱེད་ཡོད། །གནས་གར་འགྲོ་གར་སོང་གང་ནས་འོང་། །སྐྱེ་སྔོན་མའི་སྤྲུལ་གཞི་སུ་ཞིག་ཡིན། །ཕ་མཚན་ལྡན་བླ་མ་ཅི་འདྲ་བསྟེན། །ཆོས་གདམས་པ་ཐོབ་ཚུལ་གང་ལྟར་བྱས། །ལམ་བསྐྱེད་རྫོགས་སྙིང་པོ་ཨེ་ལོན་ལོ། །ལྷ་བླ་མ་སུ་ཡི་ལྕམ་ཅིག་ཡིན། །དོན་གཉིས་མཛད་ཕྲིན་ཇི་ལྟར་བྱུང་། །ལས་བྱ་བ་ཅི་ལ་དགྱེས་པ་ཡིན། །བདེ་བསྐྱེད་ཀྱི་གྲོགས་མཆོག་ཅི་འདྲ་ཡོད། །ད་དེ་སོགས་གནས་ཚུལ་དྲང་པོར་སྨྲོས། །ཞེས་ཟེར་། ཡང་བདག་གིས། ཡ་ཡ་གྲོགས་མོ་སྙིང་རྗེ་ཅན། །ཁ་ བྃ༔ ཉམས་ཆུང་བའི་བུ་མོ་ལ། །སྐྱོ་རོགས་བྱེད་ཅིང་གནས་ཚུལ་འདྲི། །དྲིས་པའི་ཚིག་ལ་ལན་མེད་ན། །མ་ངན་བུ་མོའི་སྐྱེས་ཐང་རེད། །ཚུར་ཉོན་དང་ཡིད་མཐུན་བུ་མོ་ཁྱོད། །ངའི་གནས་ཚུལ་ཟུར་ཙམ་བཤད་ཀྱིས་ཉོན། །བཞིན་ལེགས་པ་ཕ་མའི་སྐུ་དྲིན་རེད། །ཡིད་གསལ་བ་སྔོན་གྱི་ལས་ཀྱི་འབྲས། །ཡུལ་ས་ཐག་རིང་བ་ལྷ་ལྡན་གནས། །འབྱོར་ལྡན་གྱི་ཕ་མའི་གཅེས་ཕྲུག་ཡིན། །ལས་དབང་གིས་མདོ་སྨད་ཁམས་སུ་འཁྱམས། །ངའི་མིང་ལ་ཇོ་མིན་ནག་མིན་ཟེར། །ཇོ་མིན་དང་ཚུལ་ལྡན་ཇོ་མོ་ཡིན། །ལམ་བསླབ་གསུམ་སྡོམ་དམ་ཉམས་པ་མེད། །ནག་མིན་དང་ནག་མོའི་མིང་དུ་བཏགས། །ནག་ཅན་བཞིན་ཡུལ་ཕུད་སྤང་བྱར་མཐོང་། །ནག་ཉེས་པ་སྤུ་ཙམ་ཡོད་མི་དྲན། །གནས་ཉེ་རིང་མེད་པ་ཀུན་ཏུ་འགྲོ། གཏེར་གཉིས་ཀྱི་བསྟན་པ་ཅི་དར་བྱས། །ཕ་བླ་མའི་ཐུགས་དགོངས་ཨེ་འགྲུབ་སྙམ། །བསྟན་འགྲོ་བའི་བདེ་སྐྱིད་ཨེ་འབྱུང་སྙམ། །ད་འགྲོ་བ་རང་ཁྱིམ་ཕྱོགས་སུ་འགྲོ། །ལས་བྱ་བ་ཅི་འགྱུར་སྔོན་ལས་རེད། །སྐྱེ་སྔོན་མའི་སྤྲུལ་གཞི་མི་ཤེས་དང་། །ང་ཁམས་དྲུག་ལྡན་པའི་ལུས་རྟེན་འདིས། །ཕ་བླ་མ་སངས་རྒྱས་དངོས་དང་མཇལ། །ཆོས་ཟབ་མོ་གཅིག་ཤེས་ཀུན་གྲོལ་ ཐོབ། །ང་ལེ་ལོ་ཆེ་དང་བློ་ཆུང་བས། །ཆོས་གདམས་པས་རང་རྒྱུད་མ་འདུལ་ནས། །ཤེས་ཅོལ་ཆུང་བར་མ་དོ་རུ་འཁྱམས། །ཡུལ་སྣང་བ་འབྲིད་མཁས་དབང་ཆེ་བས། སེམས་ཉོན་མོངས་མུན་པའི་སྨག་གིས་བསྒྲིབ། །དུས་རྒྱུན་དུ་བདེ་སྡུག་འཚེ་སྐྱོང་བྱེད། །ལམ་རིམ་གཉིས་དོན་འབྲས་གནད་ལྡན་ཀྱང་། །བོགས་འདོན་གྱི་ལམ་སྦྱང་རྩལ་རྫོགས་ཀྱི། །ཡིད་གཅུགས་ཀྱི་དུས་ཐབས་ཡུལ་གནས་དབེན། །ལུས་ལང་ཚོས་བརྒྱན་པའི་དུས་སྐབས་ལ། །ཁོང་གཏེར་སྟོན་རྣམས་ཀྱི་ཕོ་ཉ་ཡིན། །གནད་ཕྱག་རྒྱ་བཞི་དང་བྲལ་བ་མེད། །དེའི་སྟོབས་ཀྱིས་དོན་གཉིས་ངང་གིས་འགྲུབ། །ངས་ལས་དང་བྱ་བ་ཆོས་ལ་མོས། །ལོ་ཆུང་ནས་ད་ལ་ཐུག་གི་བར། །བློ་རྩེ་གཅིག་མཆོག་གསུམ་བླ་མར་གཏད། །སྒོ་གསུམ་གྱི་བྱ་བ་ཆོས་སུ་བཅོས། །མ་འགྲོ་དྲུག་བྱང་ཆུབ་ཐོབ་པའི་ཕྱིར། །ཚོགས་གཉིས་ཀྱི་བསོད་ནམས་རྒྱ་ཆེར་བསགས། །ཡིད་མཐུན་གྱིགྲོགས་མཆོག་སྡུག་བསྔལ་རྒྱུ། །དེ་བསམ་ཞིང་བསམ་ན་སྐྱོ་བ་འཕེལ། །ཉམས་ཆུང་ང་འཁོས་ཆུང་བྱ་བར་བརྩོན། །ལས་སྨོན་ལམ་མཐུ་ཡིས་མ་བསྒྱུར་ན། །ཚེ་མཇུག་འདིར་གཅིག་པུར་བསེ་རུ་བཞིན། །ངེས་མེད་ཀྱི་དབེན་ཁྲོད་ཨེ་ཟིན་སྙམ། །ད་དེ་སོགས་བདག་གི་ བྃ༔ གནས་ཚུལ་རེད། །ཞེས་སྨྲས་ཚེ། དེས་ཀྱང་འཇིག་རྟེན་པའི་གླུ་ལ་དྲངས་ནས་ལན་དུ་མ་སྨྲས་ཀྱང་ཡི་གེར་དོགས་ནས་མ་བྲིས་སོ། །དེ་ནས་རིམ་གྱིས་རང་གནས་ལ་ཐོན་པས། ཐོག་མར་སྐྱབས་རྗེ་བསོད་སྤྲུལ་རིན་པོ་ཆེ་དང་། བླ་མ་སང་གཉིས་ཀྱི་སྐུ་མདུན་ལ་སོང་བས། སྐྱབས་མཆོག་དེ་གཉིས་ཀྱི་ཐུགས་བརྩེ་བ་ཆེན་པོས་དགྱེས་བཞིན་གཏེར་གཉིས་ཀྱི་བསྟན་པ་ཕྱོགས་སུ་དར་བ་ངོ་མཚར་ཆེ་གསུངས་ནས་གསུང་སྒྲོས་དུ་མ་མཛད། དེ་ནས་ངེད་དཔོན་གཡོག་ཆ་ཤས་རྩང་སྒར་རི་ཁྲོད་ལ་སོང་ནས། མགར་ར་བླ་མ་རིན་པོ་ཆེའི་སྐུ་གདུང་མཆོད་རྟེན་གྱི་མདུན་དུ་ཚོགས་མཆོད་དང་། གྲོགས་མཆེད་རྣམས་ལ་ཐུག་འདུན་སོགས་ཀྱི་དེ་གར་སོང་ནས། ལུགས་གཉིས་ཀྱི་བྱ་བས་ཁོང་རྣམས་ཀྱིས་ཐུགས་ཡིད་ཚིམ་པར་བྱས་ཏེ། ངེད་རྣམས་རང་སློབ་དམ་པ་ཀར་དོན་གྱི་རི་ཁྲོད་དུ་འོང་ནས་དེ་གར་ཞག་ཆ་ཤས་བསྡད་ཚེ་གཏེར་སྲུང་གིས་བསྐུལ་ནས། ཀར་དོན་དང་། འགྱུར་མེད་ཕྲིན་ལས། ཚུལ་རྡོར། ངེད་མ་བུ་གཉིས་བཅས་འབྲི་ཕུག་མཁའ་འགྲོ་གསང་རྫོང་གི་མགུལ་བྲག་སེང་གེ་གནམ་མཆོང་འདྲ་བའི་ལོགས་ནས། ཕུར་སྒྲུབ་བདུད་ལས་རྣམ་རྒྱལ་གྱི་ཟབ་བཅུད་རྒྱས་པ་ཡོད་ཀྱང་གྲོགས་མ་ལྡན་ནས། ཕྲིན་སྒྲུབ་ཀྱི་ སྐོར་ཅུང་ཟད་རྙེད་པས་བྲི་སྤེལ་སོགས་ཞིབ་རྒྱས་སུ་བྱས་སོ། །དེ་ནས་རང་ལོ་ཞེ་གཅིག་ལོར་ཟླ་བ་དྲུག་པའི་ཚེས་བཅུའི་ཉིན་རང་སློབ་དམ་པ་བྱ་བྲལ་བ་ཤེས་རབ་འོད་ཟེར་རྫ་ཁོག་བཻ་རོའི་གསང་ཕུག་མཁའ་འགྲོ་ཡང་རྫོང་དུ་ཡོད་པས། ཁོང་ལ་འཕྲད་དོན་དང་། རང་ལ་དོགས་ཆོད་ཅུང་ཟད་ཡོད་པ་སོགས་ཀྱིས། ངེད་དཔོན་གཡོག་ཆ་ཤས་དེ་གར་སོང་བས། མཁའ་འགྲོའི་བརྡ་དོན་དུ་མ་གསལ་ཡང་རྟེན་འབྲེལ་ཆེ་ཤེས་བཏང་སྙོམས་ལ་བཞག །ཕྲན་བུ་རེ་འཛོམ་ཡང་དོན་འབྲས་ཆེར་མ་བྱུང་བས། གནས་དེ་གར་བདག་ཞག་བདུན་ཕྲག་ཆ་ཤས་ལ་མཚམས་དམ་རྒྱ་ལྟ་བུ་བྱས་ཏེ་བསྡད་ཡོད་སྐབས། གླིང་དཀར་རྒྱལ་པོ་སང་ནས་གསུང་ཤོག་དང་། བང་མི་ལན་དུ་མར་བཏང་ཡང་། ང་རང་མི་གཤིས་ངན་པའི་དབང་གིས་ཁྱི་དེད་ལམ་དུ་མི་འགྲོ་བ་ལྟ་བུར་བྱས་ཡོད་ཚེ། ཡང་པད་གུར་སྤྲུལ་སྐུ་སང་དང་། རྒྱལ་པོ་རྣམས་ཀྱིས་གཏེར་ཆེན་བདུད་འཇོམས་སང་དང་། འབྲུག་པ་རིན་པོ་ཆེ་རྣམ་གཉིས་ཀྱི་ཞལ་སྔ་ནས་ཁོང་རྣམས་གཉིས་ལ་ཆོས་ཐོབ་པ་ཡིན་པས། འོ་ཅག་དམ་ཚིག་གཅིག་པའི་མཆེད་གྲོགས་ལ་ཐུགས་འདང་མཛོད་ལ། ད་ལན་སྐབས་གཅིག་རྒྱལ་པོ་ཡབ་སྲས་ལ་སྐུ་གེགས་ཆེ་བས། ཚེ་དབང་ཞིག་བསྐུར་ཐབས་ཅི་ནས་ཀྱང་དགོས་གསུངས་ བྃ༔ ནས། བང་མི་ནན་ཆེར་བཏང་བས་ཁྱུག་ཙམ་དེ་གར་སོང་། དེའི་སྐབས་རང་སློབ་དམ་པ་ཤེར་རབ་འོད་ཟེར་གྱིས་གླིང་དཀར་རྒྱལ་པོ་ཡུམ་སྲས་འཁོར་དང་བཅས་པའི་སྐལ་ལྡན་རྣམས་ལ། འོད་གསལ་མ་བསྒོམས་སངས་རྒྱས་ཀྱི་ཁྲིད་གསུངས་ནས་ཡོད་པས། བདག་བསུ་མ་དང་བཅས་དེར་སོང་ནས། ཐོག་མར་བཙུན་མོ་རྣམ་གཉིས་ཀྱི་བསུ་བ་དང་མཇལ་འཕྲད་མཛད། རྒྱལ་པོས་སྐུ་ཚབ་བཏང་ནས་དངོས་མཇལ་རྟེན་འབྲེལ་གྱི་ཆེད་དུ་ནང་སྔ་མོ་མཛད་ན་ཆོག་པར་ཞུས། ལོ་ཁྱིམ་དེའི་ཟླ་བ་བརྒྱད་པའི་ཚེས་གཅིག་གི་ཉིན་ནང་སྔ་མོ་རང་གི་ཐུན་གྲོལ་མཐར། རྒྱལ་པོ་ཡབ་སྲས་དང་མཇལ་འཕྲད་མཛད་སྐབས། རྒྱལ་པོས་རྟེན་འབྲེལ་ཕུན་སུམ་ཚོགས་པའི་གསུང་སྒྲོས་དང་། ཁྱད་པར་གཏེར་འབྱུང་གི་ལོ་རྒྱུས་དང་། མཁའ་འགྲོ་དགོངས་པ་འདུས་པའི་ཆོས་ཟབ་ཁྱད་དུ་གྱུར་པ་འཇམ་མགོན་མཁྱེན་བརྩེའི་དབང་པོའི་ཞལ་སྔ་ནས་གསུངས་པའི་དོན་རྣམས་དང་། གྲུབ་དབང་འབྲུག་པ་རིན་པོ་ཆེ་ནས་ཀྱང་མཁའ་འགྲོ་དགོངས་འདུས་ལ་བསྔགས་པར་བརྗོད་པ་རྣམས་ཀྱི་གཞི་མཛད་ནས། ཁོ་རང་ནས་ཀྱང་བདག་ལ་མཁའ་འགྲོ་དགོངས་འདུས་ཀྱིས་ཆོས་སྐོར་ཕབ་དགོས་པའི་བསྐུལ་མ་མཛད་པས། དེ་སྐབས་རྟེན་འབྲེལ་གྱི་ཆེད་དུ་རང་ གཏེར་ཕག་མོའི་ཟབ་སྒྲུབ་ཀྱི་དབང་ལུང་དང་། ཚེ་དབང་སོགས་ཐུགས་འདུན་བཞིན་ཡབ་སྲས་བཙུན་མོ་རྣམས་དང་བཅས་པར་ཞིབ་རྒྱས་སུ་ཕུལ། གྲུབ་དབང་གཏེར་ཆེན་རིན་པོ་ཆེའི་།ཁྲོས་མའི་དབང་ལུང་དགོས་གསུངས་ཀྱང་ང་རང་ཁྲོམ་ཁོག་ལ་འགྲོ་དགོས་པས་བྲེལ་ཆེ་བས་རྟེན་འབྲེལ་རྗེས་མཐུད་དུ་བཞག །དེ་སྐབས་སུ་ལུང་བསྟན་ལྟ་བུ་རེ་ཡོད་ཀྱང་གཏེར་གཞུང་དུ་གསལ། དེ་ནས་རང་སློབ་དམ་པ་ཤེས་རབ་འོད་ཟེར་གྱིས་གྲྭ་པ་དང་རྟ་དྲེལ་གྲོ་ཁ་སོགས་ཀྱི་མཐུན་རྐྱེན་བྱས་ཏེ། ངེད་དཔོན་གཡོག་འབྲུག་སྒར་དུ་སོང་བའི་ལམ་ནས། མ་དགོན་སྤྲུལ་སྐུ་འཆི་མེད་རྣམ་རྒྱལ་ནས་འོང་དགོས་གསུངས་ཤིང་དེ་གར་སོང་ནས། ཁོང་ལ་དེའི་ལོར་སྐུ་གེགས་ཡོད་པས། ཚེ་དབང་སོགས་ཕུལ་བས་ཐུགས་དགྱེས་བཞིན་མཛད། དེ་སྐབས་གཏེར་ཁ་ཕྲན་བུ་རེ་ཡོད་ཀྱང་བཏང་སྙོམས་ལ་བཞག་པའི་རྐྱེན་གྱིས་ཆོས་སྐྱོང་འཁུ་ནས། རང་གི་སློབ་བུ་རིགས་བཟང་ལ་གློ་བུར་གྱི་ནད་ཞིག་བྱུང་ནས་ཞག་ཆ་ཤས་ལ་རེ་མདའ་ཞེས་པའི་ལུང་པར་བསྡད་ཡོད་སྐབས། འགྱུར་མེད་ཕྲིན་ལས་དང་། ཚུལ་རྡོར་དང་། ཆོས་དབྱིངས་རྣམས་འབུད་ཤིང་དང་ལྕམ་པ་ཐུ་བར་སོང་། བདག་གཅིག་པུར་རྡོ་འབུམ་ཆེ་བ་གཅིག་འདུག་པས་དེ་གར་བསྐོར་བ་བྱེད་དུ་སོང་བས། བྃ༔ ཧོར་པ་འདྲ་བའི་སྐྱེས་པ་སྐྱེ་མཆེད་དྭངས་བ་ལུས་རྒྱན་སྤུས་དག་དུ་མས་བརྒྱན་པ་ཞིག་འོང་ནས་འདི་སྐད་ཟེར། ཨ་ཨ་བུ་ཁྱོད་སུ་ཡིན་གང་དུ་བྱོན་ཟེར། །བདག་གིས་ཡིད་ཚོམ་ནས་ངག་བསྡམ་པའི་ཚུལ་གྱིས་ཅི་ཡང་མ་སྨྲས་པས། ཡང་དེ་ན་རེ། ཁྱོད་ང་ལ་དོགས་མི་དགོས་དང་། ང་ཡུལ་འདིའི་གཞི་བདག་ཞིག་ཡིན་པས། ངེད་ཀྱི་དཔོན་པོ་གླིང་རི་བས་རྒྱས་ཞེས་པ་དེ་ཁྱོད་ལ་ཤིན་ཏུ་དད་པ་ཆེ་འདུག་པས། ཁོ་རང་ལ་ཚེ་ཡི་མི་གདའ་ཁྱོད་མ་འཆུག་རེམ་རེམ། མྱི་ཁོ་སྡིག་པ་ཡང་ཆེ། བླ་སྤྲུལ་སོགས་ལ་དད་པ་མེད་ཅིང་བློ་ནག་པོར་ཕྱོགས་པ་ཡིན་ཟེར། བདག་གིས། ཁོ་རང་བླ་སྤྲུལ་རྣམས་ལ་དད་པ་མེད་པ་ཞིག་ང་རྒན་མོས་འདྲེན་ཐབས་མ་འོང་འང་། དཔེར་ན་ལོང་བས་ལོང་བ་ཁྲིད་པའི་དཔེ་བཞིན། བདག་ནི་ཡོན་ཏན་ཀུན་ཟད་སྐྱོན་ཀུན་ཚང་ཞིག་ཡིན་མ་གཏོགས། ཐོས་བསམ་སྒོམ་པའི་ཡོན་ཏན་སྤུ་རྩེ་ཙམ་ཡང་མེད་ངེས་པ་ཡིན་པས། གཤིན་འདྲེན་གསོན་སྐྱབས་བྱེད་པའི་ནུས་པ་ང་ལ་མེད་སྨྲས་ཚེ། ཡང་ཁོ་ན་རེ། ཁྱོད་ཅི་འདྲ་ཡིན་ངས་ཤེས། ཁྱོད་ཀྱིས་ང་མི་ཤེས་སམ་ཟེར། བདག་གིས་མི་ཤེས་པ་འདྲ་སྨྲས་པས། ཁོ་ན་རེ། ང་ཡུལ་ཕྱོགས་འདིར་འོང་ནས་ལོ་ཆ་ཤས་ཡིན། ད་རང་ཡུལ་ཕྱོགས་ལ་འགྲོ་རན་ ཡོད་པས་ཁྱོད་དང་མཇལ་བ་བཟང་། ཁྱོད་སྐུ་ཚེ་བརྟན་ཐབས་འོང་ན་ལོ་གཉིས་གསུམ་ཕན་ཆད་གཏེར་ཆོས་ཀྱི་བསྟན་པ་ངེད་ཀྱི་ཡུལ་ཕྱོགས་སུ་དར་ན་ཅི་ཤེས་ཟེར། བདག་གིས་ཁྱོད་ཀྱི་ཡུལ་ཕྱོགས་གང་ནས་ཡིན་སྨྲས་པས། དེ་ན་རེ། ལྷོ་སྤེལ་ཕྱོགས་ནས་ཡིན། ང་གཏེར་བདག་ནོར་བུ་ལྷ་རྩེ་ཟེར། ཁྱོད་པྲ་ཝ་པ་རི་ཡིན་དུས་འོ་ཅག་དམ་ཚིག་གི་དབང་དང་ལྡན་པའི་སྲུང་མ་ཡིན་ཟེར་བ་སོགས་བྱུང་དང་འབྱུང་འགྱུར་དུ་མའི་སྒྲོས་གླེང་འདུག་ཀྱང་ཡི་གེར་དོགས་ནས་མ་བྲིས། དེ་ནས་ངེད་རྣམས་ཐོག་མར་འབྲུག་སྒར་དུ་སོང་ནས། སྐུ་དངོས་རྣམས་དང་མཇལ་འཕྲད་མཛད་སྐབས་ཐམས་ཅད་ཀྱིས་ཐུགས་བརྩེ་བ་ཆེན་པོས་ཤི་གསོན་འཕྲད་པ་ལྟ་བུའི་དགའ་སྤྲོ་དཔག་ཏུ་མེད་པ་མཛད། དེ་ནས་ཕན་ཚུན་ཀུན་ཐུགས་མཐུན་གཞུང་བཟང་གི་གསུང་སྒྲོས་ཞིབ་རྒྱས་སུ་བྱས་ནས། ཨ་འགྱུར་རིན་པོ་ཆེའི་ཞལ་སྔ་ནས་དབང་ལུང་ཕྲན་བུ་རེ་གནང་ནས་ལུགས་གཉིས་བསླབ་བྱ་སོགས་མཛད་དོ། །དེ་སྐབས་ཁྲོམ་དགེའི་མཁའ་འགྲོ་ཟླ་བ་སྒྲོན་མས་དུས་རིང་མོ་ནས་འོ་ཅག་མཇལ་འཕྲད་དགོས་པའི་གསུང་གནད་དུ་མ་འབྱོར་བས། རིགས་བཟང་དང་། འགྱུར་མེད་ཕྲིན་ལས་གཉིས་ཁོང་གི་མདུན་ལ་མི་མངགས་བྱས་ཚེ། མཁའ་འགྲོ་དེ་ཉིད་ཀྱང་སྨོན་ལམ་གྱི་ བྃ༔ མཐུ་སད་པ་ལྟ་བུར་མཛད་ནས། ཁོང་བདེ་བའི་རྡོ་རྗེ་དང་ལྷན་དུ་རྫ་ཁོག་ལ་འགྲོ་དོན་ཡོད་པས་དེ་གར་འགྲོ་དགོས་གསུངས་ནས། ཁོང་གི་མིང་པོ་དཔལ་ཆེན་ཞེས་པས་སྐྱེལ་མ་མཛད་ནས། འབྲུག་སྒར་དུ་ངེད་རྣམས་ཀྱི་སར་བྱོན་ཏེ། མཁའ་འགྲོ་དེ་ཉིད་ཀྱིས་མ་བུ་འཕྲད་པ་ལྟ་བུའི་དགའ་སྤྲོ་དང་ལུགས་གཉིས་ཀྱི་གསུང་སྒྲོས་མཛད།དཔལ་ཆེན་ནས་ཀྱང་ངེད་སང་གི་སྲིང་མོ་འདི་གྲུབ་ཐོབ་སྨྱོན་མ་ལྟ་བུ་ཞིག་ཡིན་ཀྱང་། ཁྱོད་ལ་དད་འདུན་ཤིན་ཏུ་ཆེ་འདུག་པས་དེ་ལུགས་ཀྱི་ཁྱོད་ཀྱིས་མགོ་འདྲེན་རེ་མ་འཆུག་ཟེར་ནས་བཅོལ་གཏམ་མཛད། དེ་ནས་ལོ་ཁྱིམ་དེའི་ཟླ་བ་བརྒྱད་པའི་ཉེར་ལྔའི་ཉིན་ངེད་དཔོན་གཡོག་ཕྱིར་རང་ཡུལ་ལ་ལམ་དུ་ཞུགས་སྐབས། དུང་རབྲག་དཀར་གྱི་གཏེར་སྲུང་སྐུ་བླ་མཆེད་གསུམ་གྱིས་གཏེར་གྱི་ཟུར་བབ་ལུང་བསྟན་ཕྲན་བུ་རེ་བྱུང་ཡང་བཏང་སྙོམས་ལ་བཞག་རྐྱེན་གྱིས། ངེད་རྣམས་ལ་སེར་བ་དྲག་ཏུ་ཕབ་ནས་ཐོག་འབྲུག་གློག་གསུམ་གྱི་འཇིགས་པ་བཟོད་དཀའ་བའང་བྱུང་བས། རང་གིས་བླ་མ་ལ་གསོལ་བ་བཏབ་ནས་མཉམ་པ་ཉིད་ཀྱི་དོན་དང་མ་བྲལ་བར་གནས་པས་ཉེར་འཚེ་ཆེར་མ་བྱུང་ཡང་། དགོང་མོ་བུད་མེད་ཞིག་གིས་ལུང་བསྟན་ལྟ་བུའི་ལོག་ལམ་གྱི་བསླབ་བྱ་དུ་མ་བྱེད་འདུག་པས། བདག་ གི་བསམ་པ་ལ་སྔར་མཚོ་རྒྱལ་ཞལ་ལུང་དུ། ཁོ་མོ་ང་ཡི་གཏེར་དང་འཕྲད་པའི་དུས། །གཟུགས་ཅན་གཟུགས་མེད་རྣམས་ཀྱིས་བར་ཆད་སྡང་། །ལུང་དུ་མི་སྟོན་གཅིག་ཀྱང་མི་འབྱུང་བས། །ཤེས་རབ་ཆེན་པོས་འདྲ་གཉིས་དབྱེ་མཁས་དགོས། །དོན་དང་མ་ལྡན་བརྡ་ཆོས་ངོམས་པའི་ཚེ། །ང་ཡི་དཀྱིལ་འཁོར་ཞལ་ཕྱེས་གསལ་བཏབ་ནས། །མ་ངའི་བསླུ་མེད་ཚིག་གི་བརྡ་དོན་དཀྲོལ། །ཤེས་པར་མཛོད་ཅིག་ཕྱི་རབས་གཏེར་བདག་རྣམས། །བཟང་པོའི་ལམ་ནས་བར་ཆད་འཇུག་ཉེ་བས། །དུས་དང་དུས་སུ་སྟབས་གཟབ་སྙིང་གཏམ་ཡིན། །