Tibetan
གསུངས། སྐ་བ་དཔལ་བརྩེགས་ལ་གདམས་པ་ཞུས་ཚེ། རིགས་ཀྱི་བུ་མོ་ངོ་བོ་སྟོང་པར་བཞུགས་པ་ནི་རང་གི་རིག་པ་དངོས་པོ་མཚན་མ་གང་ཡང་མགྲུབ་པ་སྟོང་གསལ་འདུས་མ་བྱས་པ་འདི་ཡིན་ནོ། །སྙིང་པོ་གསལ་བར་བཞུགས་པ་ནི་ཤེས་རབ་རང་བྱུང་གི་སྒྲོན་མ་ཡེ་ཤེས་གསལ་བའི་སྙིང་པོ་ཅན་དེ་སྙིང་ནང་དུ་གནས་ཀྱང་གདོས་བཅས་ལུས་ཀྱིས་མ་གོས་པར། ཡེ་ཤེས་ཀྱི་གསང་ལམ་ཆེན་མོ་ནས་འགགས་མེད་འོད་གསལ་བ་ཡིན་པ་ཤེས་པར་གྱིས་ཤིག །ཅེས་གསུངས། ཤུད་བུ་དཔལ་སེང་ལ་གདམས་པ་ཞུས་ཚེ། ཡེ་ཤེས་གཟིགས་པ་རྣམ་དགཔས། །སྣང་བ་སྐུ་དང་ཐིག་ལེར་རྫོགས། །ཡེ་ཤེས་རྒྱུན་ཆད་མེད་པ་ཡི། །ལྷུན་གྲུབ་དགོངས་པར་ལ་ཟློས་ཤིག །ཅེས་གསུངས། རྒྱལ་བ་བློ་གྲོས་ལ་གདམས་པ་ཞུས་ཚེ། དེ་བཞིན་ཉིད་དབྱིངས་བརྒྱད་བྲལ་གསུམ་ལྡན་ཅིང་། །སྟོང་གསལ་འདུས་མ་བྱས་དབྱིངས་ལྷུན་གྱིས་གྲུབ། །མཐའ་གྲོལ་སུས་ཀྱང་མ་བྱས་ངོ་བོའི་གཤིས། །མངོན་གྱུར་འཇོག་པ་གདམ་པའི་གནད་ཅིག་ཡིན། །ཞེས་གསུངས། རྨ་ཐོག་རིན་ཆེན་ལ་གདམས་པ་ཞུས་ཚེ། མངོན་སུམ་མཐོང་བས་ཡིད་དཔྱོད་འཛིན་པ་ཞིག །གོང་འཕེལ་ཡེ་ཤེས་སྣང་བ་མངོན་དུ་གྱུར། །ཚད་ བྃ༔ ཕེབས་ལོངས་སྤྱོད་རྫོགས་པའི་སྐུ་རུ་སྨིན། །ཆོས་ཟད་གདོད་མའི་གཞི་ལ་མངོན་སངས་རྒྱས། །འདི་ལྟར་རིམ་གཉིས་ལམ་མཐར་ཕྱིན་གྱུར་ན། །མྱང་འདས་ཞེས་བྱ་རྩོལ་སྒྲུབ་མི་དགོས་སོ། །ཡང་དག་རྫོགས་པའི་སངས་རྒྱས་ཨེ་མ་ཧོ། །ཞེས་གསུངས། དཔལ་གྱི་རྡོ་རྗེ་ལ་གདམས་པ་ཞུས་པས། ཕྱི་ཡི་རུ་ཏྲ་ཚོགས་དྲུག་ཞེན་པ་བྲལ། །ཡིད་ཤེས་འགྱུ་འཕྲོས་རྟོག་པ་དབྱིངས་སུ་གཅོད། །ནང་གི་རུ་ཏྲ་ཀུན་རྟོག་འཁྲུལ་པའི་བློ། །སྣང་རྟོག་ལྷ་ཡི་ཕྱག་རྒྱ་ཉིད་དུ་བསྒོམས། །གསང་བའི་རུ་ཏྲ་བདག་ལྟའི་གཉིས་འཛིན་འདི། །ངོ་བོ་ཀ་དག་ལུ་གུ་རྒྱུད་དུ་གྲོལ། །ཐམས་ཅད་དབྱིངས་ལས་གཡོ་བ་མེད་པའི་ཕྱིར། །བདག་མེད་མཉམ་ཉིད་དགོངས་པར་ལ་ཟློས་ཤིག །ཅེས་གསུངས། རྒྱལ་བ་བྱང་ཆུབ་ལ་གདམས་པ་ཞུས་པས། ཕྱི་ཡི་ཡེ་ཤེས་རང་བྱུང་རིག་པའི་རྩལ། །སྣང་རྟོག་ལྷ་སྐུའི་རོལ་པར་གཉིས་སུ་མེད། །ནང་གི་ཡེ་ཤེས་ཟུང་འཇུག་བདེ་བའི་སྐུ། །སྦྱོར་སྒྲོལ་རླུང་སེམས་ལྷ་སྐུ་གཉིས་སུ་མེད། །གསང་བའི་ཡེ་ཤེས་སྣང་གསུམ་བག་ཆགས་བཅོམ། །མི་སློབ་དོན་གྱི་རིག་སྐུ་ཉམས་སུ་ལོངས། །དེ་དོན་རྡོ་རྗེསྙིང་པོ་ཨ་ལ་ལ། །ཞེས་གསུངས་མ་ཐག །གུ་རུ་སྔར་གྱི་བཀོད་པ་ལྟར་བཞུགས་ཚེ། རྗེ་དེ་ཉིད་བི་མ་ལར་ཐིམ། བི་མ་གུ་རུའི་ཐུགས་ཀར་ཐིམ་ནས་མི་སྣང་བར་གྱུར་ཏོ། །དེ་ནས་སྔར་གྱི་མཁའ་འགྲོ་རྣམས་ཀྱིས་བདག་ཕོ་བྲང་གི་ཕྱི་རོལ་ལ་སྐྱེལ་མ་མཛད་ནས། ཡེ་ཤེས་མཚོ་རྒྱལ་གྱི་ཞལ་ནས། རིགས་ལྡན་མ་ཁྱོད་ནི་སྙིགས་དུས་ཀྱི་འགྲོ་བ་འདུལ་ཕྱིར་མཁའ་འགྲོ་བདུན་གྱི་ཕྲིན་ལས་གཅིག་ཏུ་སྤྲུལ་ཏེ། ཤེས་རབ་མི་མོའི་རྣམ་པར་མངགས་པ་ཡིན་པས། སྦས་ཚུལ་གྱིས་འགྲོ་བ་རྣམས་རྗེས་སུ་བཟུང་ན། བཅུ་ཕྲག་དྲུག་ནས་ཁྱོད་བདག་གིས་བསུ་བ་བྱེད་དོ། །དེ་ལྟར་གནད་དང་མ་ལྡན་ན་མཁའ་འགྲོའི་འཕྲུལ་བརྡ་ཇི་བཞིན་དུ་གཏེར་གཉིས་ཀྱི་བསྟན་པའི་འཛིན་སྐྱོང་ཚགས་སུ་ཚུད་པར་གྱིས་ལ། འདུ་ལོངས་ཀྱི་བྱ་བ་མངཔོའི་འཕྲོ་བོར་ལ་སྒྱུ་མའི་ཡུལ་ལ་ཞེན་ནས་ཡུན་རིང་ལ་སྡོད་གྲབ་མ་བྱེད། སྟག་སྤེལ་གླང་ལུག་སོགས་དང་འཕྲད་ན་སྐབས་ཀྱི་རྐྱེན་སེལ་རེ་འོང་། གདུལ་བྱ་ཚེ་ཆོས་ཐམས་ཅད་ཐབས་གྲོགས་དང་ཆོས་བདག་རྣམས་ལ་རག་ལས་པས། རྟེན་འབྲེལ་གྱི་གནད་ལ་གཟབ་པ་གལ་ཆེ་གསུངས་ཤིང་ཐུགས་བརྩེ་བར་མཛད་ནས་ཕྱིར་ཕོ་བྲང་ནང་དུ་བྱོན་སོང་། དེ་ནས་རྡོ་རྗེ་མཚོ་དང་ཀ་ལ་སིདྡྷི་རྣམས་ཀྱིས་དབྱངས་གཅིག་དང་མགྲིན་གཅིག་ཏུ་འདི་སྐད་གསུངས། སྔོན་ནམ་སྙིང་དང་བཛྲ་སྨོན་ལམ་མཐུས། །དུས་ད་ལྟ་རུ་ བྃ༔ སྨིན་པ་མཆེད་ཁྱེད་ལགས། །བོད་གདོང་དམར་མི་སྲིན་འདུལ་བའི་ཕྱིར། །དབྱིངས་ཌཱཀྐིའི་བརྡབྱང་ཇི་བཞིན་མཛོད། །བློ་ཚབ་ཚུབ་འདུ་ལོངས་མ་སྐྱོ་བར། །གཏེར་གཉིས་ཀྱི་སྐལ་ལྡན་སྨིན་གྲོལ་བཀོད། །སྐལ་མེད་ཀྱི་སྐྱེས་བུའི་བདེ་བ་སྤོངས། །ལས་ལྡན་པའི་སེམས་དཔའ་གྲོགས་སུ་བསྟེན། །ལུས་གདོས་པ་དབྱིངས་སུ་གདེངས་འདོད་ན། །རྩ་རླུང་ཐིག་སྨིན་པའི་ཐབས་མ་ཞན། །གདངས་འོད་ལྔ་སྟོབས་སུ་གྱུར་པའི་ཚེ། །དབྱིངས་ཌཱཀྐི་རླུང་དང་དབྱེར་མེདཔར། །དུས་དུས་སུ་བརྡ་ཡི་རི་མོ་ངོམ། །ཁྱོད་མི་གནས་མྱ་ངན་འདའ་དུས་དེར། །ངེད་ཌཱཀྐིའི་གསང་ལམ་མངོན་གྱུར་ནས། །མིག་འཕྲུལ་བཞིན་གནས་འདིར་འུ་ཅག་མཇལ། །དོན་ཡིད་ལ་ཟུངས་དང་གསལ་བར་ངེས། །ཞེས་གསུངས་མ་ཐག་ཏུ་གློ་བུར་དུ་གཉིད་ལས་སད་དོ། །དེ་ནས་ལོ་ཁྱིམ་དེ་ཀའི་ཟླ་བ་བཅུ་པའི་ནང་དུ་ང་རང་ནད་དྲག་པོ་ཞིག་གིས་མནར་ནས་འཆི་ལ་ཉེ་བ་བྱུང་ཚེ། ཟླ་བ་བཅུ་གཅིག་པའི་ཚེས་ཉེར་གཉིས་ནུབ་འཁྲུལ་སྣང་ལ། རྒན་མོ་གཟུགས་མི་བཟང་བ་ཉམ་ཐག་འདོད་སྲེད་ཆེ་བ་དབང་པོའི་སྒོ་རྣམས་གཞོན་ནུ་མ་ལྟ་བུར་སྐྱོན་དང་བྲལ་བ་ཞིག་འོང་ནས་འདི་སྐད་ཟེར། ཡ་ཡ་གྲོགས་མོ་ཁྱོད་ཅི་ན། ན་བའི་ན་ལུགས་ང་ལ་སྨྲོས། འདོད་སྲེད་སྲིད་པའི་རྒྱུས་ན་ན། སྨན་དཔྱད་བཟང་པོ་ང་ཡིས་ཤེས་ཟེར། དེ་ལ་བདག་གིས། རྒན་མིན་གཞོན་མིན་གྱི་ཨ་ཆེ་ལ། །ཇོ་མིན་ནག་མིན་ངའི་ན་ཚུལ་བཤད། །ང་ཆུང་ནས་བླ་མས་རྗེས་སུ་བཟུང་། །སྨིན་གྲོལ་གཉིས་ཀྱིས་རྒྱུད་བྱིན་རླབས། །འབོགས་འདོན་ཐབས་གྲོལ་གནད་ལ་མཁས། །འདོད་སྲེད་ཞགས་པས་འཆིང་མ་དགོས། །གྲོགས་ཡིད་བཞིན་ནོར་བུའི་སྐུ་དྲིན་གྱིས། །རྣམ་གསུམ་བག་ཆགས་གཞི་རུ་གྲོལ། །འཁོར་འདས་རིག་སྟོང་མཉམ་པ་ཉིད། །བདེ་སྟོང་འདུ་འབྲལ་མེད་པ་ཡི། །ཆགས་མེད་ཆགས་བྲལ་ཡེ་ཤེས་དབྱིངས། །དོན་དེ་བླ་མེད་བདག་གིས་མཐོང་། །སྲིད་པའི་རྒྱུ་ཡིས་ང་མི་ན། །འདོད་ཆགས་བདེ་བ་ཆེན་པོར་སངས། །ཉེར་ལེན་ལྷན་སྐྱེས་ཡེ་ཤེས་དངོས། །འཛིན་པ་རང་སྟོང་ཆོས་སྐུར་སྨིན། །འདོད་སྲེད་ནད་ལ་ཡ་མི་ང་། །ང་ན་བ་འདུ་བའི་ནད་ཀྱིས་མནར། །སྙིང་མི་བདེ་རྔ་ཆེན་བརྡུང་འདྲ་བྱེད། །གློ་མི་བདེ་སྦུད་པ་རྒྱབ་འདྲ་བྱེད། །མཁྲིས་མཚེར་གཉིས་རྟ་རྒོད་གཤིབ་འདྲ་བྱེད། ། མིག་འབྲས་གཉིས་དབང་རྩ་ཆདགྲབ་བྱེད། །མགོ་མི་ཐེག་ཕ་ལམ་རྡོ་ལས་ལྕི། །ཁྲག་མཁྲིས་གཉིས་ཆུ་ལྟར་རྩ་ཀུན་ཁྱབ། །རླུང་མ་མཐུན་དགྲ་གཤེད་འཐབ་པ་འདྲ། །དབུགས་རིང་ཐུང་ བྃ༔ ཁ་སྣ་གཉིས་ནས་རྒྱུད། །ལུས་འབྱུང་འདུས་སེམས་མེད་བེམ་པོ་ལྟར། །ནད་མ་ངེས་འཚོགས་པ་སྡུད་ནས་འདུག །སེམས་ཡེ་ཤེས་འོད་ཀྱི་གོང་བུ་འདི། །རྩ་དར་དཀར་ལམ་ནས་བསྒྲོད་ལ་ཁད། །བདག་ན་བའི་ཚུལ་འདི་དེ་ལྟར་ཡིན། །ཁྱོད་བརྟགས་དཔྱད་ཤེས་ན་དེ་ལ་དཔྱོད། །ཅེས་སྨྲས་ཚེ། མོ་ན་རེ། ཁྱོད་རྩ་རླུང་སྨན་པའི་རྣལ་འབྱོར་མ། ། ལུས་འོད་དུ་གྲོལ་བའི་བཞིན་ལེགས་མ། །ནད་མ་ངེས་འདི་དག་འབྱུང་བའི་རྒྱུ། །ཐབས་རྟེན་འབྲེལ་སབྟས་བསྒྲིབ་པ་དང་། །ལུས་འཚོ་བྱེད་གཞོན་ནུ་སྤངས་པ་དང་། །དམ་ཉམས་པའི་རྐྱེན་གྱིས་བསྐུལ་བ་སོགས། །དུས་འཛོམས་ཚེ་འབྱུང་འདུས་རྐྱེན་མང་ལྡང་། །ཁྱོད་སྲིད་པར་མི་གནས་དོན་མཐོང་ཡང་། །ཕྲ་བའི་བག་ཆགས་མ་དག་ནས། །རེ་དྭོགས་སེམས་ཀྱི་ཆོ་འཕྲུལ་གྱིས། །ལུང་བཞིན་སྤྱོད་པར་མ་བྱས་ཤིང་། །སེམས་དཔའ་ཆོས་འཛིན་བཏང་སུ་ལུས། །ཐེག་དམན་གྲུབ་མཐའི་ཚུལ་སྤྱོད་ལ། །སྒོ་གསུམ་འཇུག་སྲེད་ཅིའི་ཕྱིར་ཡིན། །མྱུར་ལམ་སྔགས་ཀྱི་ཁྱད་ཆོས་ཀྱིས། །འབྲས་བུ་ཐོབ་པ་མ་མཐོང་ངམ། །ཞེས་ཟེར། ཡང་བདག་གིས། ཉོན་དང་རིགས་མཐུན་ཨ་ཆེ་ལོ། །གསང་སྔགས་ཁྱད་ཆོས་ཉམས་བླངས་ན། རང་འབྲས་མྱུར་བ་ཆོས་ཉིད་ལ། །བདག་གིས་ཐེ་ཚོམ་བྱས་པ་མིན། །སྐྱེ་དང་ཚེ་རབས་ཐམས་ཅད་དུ། །མྱུར་ལམ་འདིར་འཕྲད་སྨོན་ལམ་འདེབས། །འོན་ཀྱང་དེང་དུས་སྙིགས་མ་ལ། མི་རྣམས་འདོད་སྲེད་མེ་ལྟར་འབར། །སྔགས་ལ་ཁ་གཡར་མི་དགེ་སྤྱོད། །རང་གཞན་གཉིས་ཕུང་གཏེར་རྫུན་འདོམས། །ཕོ་གཉིས་སྒོ་སྦྱོར་བྱང་ཆུབ་སེམས། །མཆིལ་མའི་ཐལ་བ་བཞིན་དུ་དོར། །སྔགས་བཞིན་སྤྱོད་པ་སྲིད་མཐའ་ཙམ། །དེའི་ཕྱིར་སྐྱེས་དམན་བདག་གི་ལུས། །རང་གཞན་ཕུང་བའི་རྒྱུར་འགྲོ་སྙམ། །ལུས་སྤྱོད་འདུལ་བའི་ལམ་ཞུགས་ནས། །བསམ་ངན་སྐྱེས་ངན་སྤངས་ནུས་བསམ། །ལོག་སྤྱོད་གྲོགས་ངན་རྒྱང་སྤངས་ནས། །བདེན་གཉིས་ལམ་ལ་འཇུག་སྤྲོ་བའི། །དོན་དེས་སུ་ལའང་ཅིའི་ཕྱིར་གནོད། །ཅེས་སྨྲས་ཚེ། གཏམ་གྱི་མཇུག་མ་རྫོགས་ཀྱང་ནད་གཟེར་དྲག་པོས་བསླངས་ནས་མྱུར་དུ་འཁྲུལ་སྣང་གནས་འགྱུར་བའོ། །དེ་ནས་ཡང་གཟུགས་མི་མངོན་པར་སྐད་ཀྱིས་གདངས་ལས་འདི་སྐད་ཐོས། ཡ་ཡ་གྲོགས་མོ་བཞིན་མཛེས་མ། །ཤར་གངས་དཀར་རྩེ་ནས་སེང་གཅིག་འབྱུང་། །གཡུ་རལ་ལྷོ་ཡི་ཕྱོགས་ནས་རྒྱས། །བྱང་གི་སྤྲེ་འུའི་སྒྱུ་རྩལ་གྱིས། །ནུབ་མི་རིང་གནས་ནས་ཆོམ་རྐུན་སྡང་། ། བྃ༔ མཛད་ཕྲིན་ལ་བར་ཆད་འབྱུང་ཉེ་བས། །ཁོང་དྲག་སྔགས་མིང་གིས་གཞོམ་པར་ནུས། །གནས་འདིར་ཡུན་རིང་མ་འགྱང་བར། །ལྷོ་ཙན་དན་ཁྲོད་དུ་བསྒྲོད་ན་ལེགས། །གཉིས་སྐྱེས་ཀྱིས་སྒྱུ་མའི་ནོར་ངོམས་ཚེ། །གནས་པདྨ་རྫོང་ནས་རང་ནོར་ལོན། །མདངས་གཅིག་གྲོགས་གཅིག་གིས་བྱེད་པ་ནི། །གསེར་སེར་པོ་གཡུ་ཡི་ཕྲ་བཀོད་བཞིན། བསྟན་འགྲོ་བའི་དོན་ཆེན་དེ་དུས་དར། །ཞེས་ཟེར་ནས་མི་སྣང་བར་གྱུར་ཏོ། དེ་ནས་རང་ལོ་སོ་དྲུག་ལོའི་ཟླ་བ་གསུམ་པའི་ཡར་ཚེས་གཅིག་ནས་བཞི་པར་ཐུག་གི་བར་ལ། སྐྱབས་རྗེ་ཐམས་ཅད་མཁྱེན་པ་ཡིད་བཞིན་ནོར་བུའི་ཟབ་གཏེར་ཡོངས་རྫོགས་པུསྟ་ཀ་བཅོ་བརྒྱད་ཀྱི་སྨིན་བྱེད་དབང་དང་། གྲོལ་བྱེད་ཁྲིད། རྒྱབ་བརྟེན་ལུང་དང་བཅས་པ། ཨ་བསྭེ་མཁན་པོ་མཁྱེན་གཉིས་བློ་གྲོས་ཀྱི་སྤྱན་མངའ་བ་ནོར་བུ་དབང་རྒྱལ་གྱིས་དུས་རིང་མོ་ནས་སྨིན་གྲོལ་བསྐུལ་བཔོ་མཛད་པ་དེ་དང་། རྗེའི་དངོས་སློབ་ཆོས་ཀྱི་བདག་པོ་ཨ་སྐྱབས་བླ་མ་བྱ་བྲལ་བ་ཀརྨ་དོན་གྲུབ་དང་། ཧ་ཤུལ་བླ་མ་ཆོས་གྲགས། བྱ་བྲལ་བ་ཤེས་རབ་འོད་ཟེར་ལ་སོགས་ཕྱི་ནང་གི་འདུས་སྡེ་དང་། སེར་དགོན་གྱི་ཁྲི་པ་འཇིགས་དགའི་ཡང་སྤྲུལ་བསྟན་པའི་བདག་པོ་སྤྲུལ་པའི་སྐུ་རིག་འཛིན་ཆོས་ ཉིད་དོན་རྟོགས་དང་། སྐུ་ཕྱོགས་མཁྱེན་བརྩེའི་ཡང་སྲིད་སྤྲུལ་པའི་སྐུ་རིག་འཛིན་ཀུན་བཟང་བསྟན་པའི་ཉི་མ་དང་། གཞན་ཡང་དགོན་པའི་དབོན་སྤྲུལ་ཆེ་གྲྭ་རྣམས་དང་། རང་གི་ཉེ་གནས་སོགས་འདུས་སྡེའི་ཚོགས་ལ་སྨིན་གྲོལ་ཞིབ་རྒྱས་སུ་ཕུལ་ནས་མཐར་ཕྱིན་ཏེ། བཀྲ་ཤིས་གཏང་རག་དགའ་སྟོན་ཚོགས་འཁོར་རྒྱ་ཆེན་བྱེད་སྐབས། ཀུན་གཟིགས་དབང་མོ་ཡིན་སྐད་པའི་བུད་མེད་སྔོ་བསངས་རུས་པའི་རྒྱན་དྲུག་སྤྲས་པ་དར་དང་རིན་ཆེན་སྣ་ཚོགས་ཀྱིས་བརྒྱན་ཅིང་། ཐོད་རྔ་དང་དྲིལ་བུའི་སྒྲ་ལ་དྲངས་ནས་འདི་སྐད་གསུངས། ཧེ་ཧེ། དབྱིངས་ཡེ་ཤེས་སྤྲུལ་པ་ཤར་ནས་འབྱུང་། །ལྷོ་རྒྱུད་མང་གི་དཔལ་དུ་རོལ་ཤེས་ན། །དཔལ་ལས་འབྲེལ་གྱི་ཐུགས་རྗེ་ཟླ་གཞོན་དེ། །སྒྲ་བརྒྱ་ཡི་ལྟོ་བར་རང་སྐད་འབྱིན། །མཐུ་ནུས་པ་རྡོ་རྗེ་ཅན་ལ་འགྲན། གཏེར་གཉིས་ཀྱི་བསྟན་པ་མཐའ་ལ་བརྟེན། །དེའི་གནད་དང་ལྡན་པར་མ་གྱུར་ན། །ཤེལ་དཀར་གྱི་མེ་ལོང་འོདཔོ་ཆེ། །ཁོང་ཡོས་བུས་འབྲུག་གི་མདངས་བསུས་ཚེ། །འོད་མི་སྣང་ཡིབ་ལ་ཅི་ཆ་ཡོད། །ས་ཆུ་གཉིས་རངས་བཟུང་བ་གནད། །བྱང་མུན་པའི་ཁྲོད་ཀྱི་ག་ལ་བར། །གནས་སྐབས་ལས་ཡུན་རིང་གནས་མ་བཅའ། །བྲག་སྤྲེ་འུས་དབྱར་ལྔའི་སྒྲ་བསྐུལ་ཚེ། །ལས་དགེ་ བྃ༔ དང་མི་དགེ་སྣ་ཚོགས་འོང་། །གནས་ངེས་མེད་ཀུན་ཏུ་སྒྲུབ་ཚུགས་ཟུངས། །ཡུལ་དགྲ་གཉེན་མེད་པར་གནས་མལ་མཛད། །ཆོས་ཟབ་མོ་གཏེར་གཉིས་གདམས་པ་འདི། །ལས་ལྡན་པ་འགའ་རེ་མ་གཏོགས་པའི། །མི་མང་པོའི་ཁྲོད་དུ་གསང་བར་སྦོས། །མཁྱེན་གཉིས་ཀྱི་ཤེས་རབ་མིག་མེད་ན། །དམ་གྲིབ་ཀྱིས་རང་གཞན་ཕུང་ལ་སྦྱོར། །ལར་པད་འབྱུང་དང་མཚོ་རྒྱལ་ཐུགས་བསྐྱེད་ཀྱིས། །གཏེར་སྟོན་དང་གཏེར་བདག་ཟབ་པའི་ཆོས། །དུས་ནམ་ཞིག་འཕྲད་པ་རྡོ་རྗེའི་ཚིག །ནོར་རིན་ཆེན་འདོད་དགུ་སྟེར་བ་བཞིན། །མ་འགྲོ་བའི་དོན་ཆེན་རིམ་གྱིས་འབྱུང་། །ལས་གང་འབྲེལ་སྐྱེས་འགྲོ་མ་ལུས་པ། །གནས་འདི་ནས་ལུས་བརྗེས་གྱུར་མཐག །དཔལ་པདྨ་འོད་ཀྱི་ཞིང་ཁམས་སུ། །འདྲེན་སྟོན་གྱི་མཆོག་ཏུ་ཨེ་མ་ཧོ། །ཞེས་གསུངས་ཏེ་མི་སྣང་བར་གྱུར་ཏོ། །དེ་ནས་ལོ་ཁྱིམ་དེ་ཀའི་ཟླ་བ་ལྔ་པའི་ཡར་ཚེས་བཞིའི་ཉིན་འཛི་རོང་གསང་ལུང་དགོན་པས་ང་རང་བསུ་མ་ལ། དགེ་བཙུན་དམ་ཆོས་དང་། ཚོགས་རྒྱམ་གཉིས་ཐོན་བྱུང་བའི་དེ་ཀར་འགྲོ་གྲབ་བྱེད་སྐབས། ཉག་རོང་ཨ་བསྲེ་བའི་མི་སྐྱ་ཕོ་མོ་རྣམས་ཀྱིས་ཁོང་ཚོ་ལ་ཆོས་འབྲེལ་རེ་འཇོག་རོགས་དང་། དཀར་བསོད་རེའི་མཐུན་རྐྱེན་བྱེད་ ཟེར་ནས། དེ་དག་གི་ནང་ནས་རང་གི་སློབ་འབངས་སུ་གྱུར་པ་བུ་གཟའ་ཞེས་པས་འདུག་ཏུ་མ་སྟེར་ནས། དེ་ཀར་སོང་ཡོད་སྐབས་ནུབ་མོ་ཐོ་རངས་ཁར་རྨི་ལམ་ལ། ང་རང་ཡུལ་འཇིགས་རྔམས་ཡིད་དུ་མི་འོང་བ་མཐོང་བ་ཙམ་གྱིས་ལུས་སེམས་སྡུག་བསྔལ་གྱིས་གདུང་ཞིང་འགྲོ་བ་རྣམས་ཀྱང་སྡུག་བསྔལ་ཁོ་ནས་མནར་བ་ཤ་སྟག་ཏུ་འདུག་པས། བདག་གིས་འདི་རྨི་ལམ་ནང་ནས་ཡ་ང་བ་འཇིགས་སུ་རུང་བ་དེ་ཀ་ཅི་ཡིན་སྙམ་ཚེ། དེ་མ་ཐག་པར་མི་ནག་ཁྲོས་པའི་ཉམས་ལྡན་སྨ་ར་དང་སྨིན་མ་སྐྲ་ལ་སོགས་པའི་བ་སྤུ་ཐམས་ཅད་གནམ་དུ་གཟིངས་པ། རོ་སྟོད་ལ་མི་མགོའི་ཕྲེང་བ་དང་། རོ་སྨད་ལ་མི་ལྤགས་ཀྱི་ཤམ་ཐབས་དཀྲིས་པ། ལག་གཡས་མེ་ལོང་དང་། གཡོན་ཁྲམ་ཤིང་ཐོགས་པ་ཞིག་བྱུང་ནས་འདི་སྐད་ཟེར། ཁྱོད་ཡུལ་འདིར་འོང་དོན་ཅི་ཡིན། དགེ་སྡིག་ཅི་འདྲ་བསགས་ཡོད་སྨོས་ཤིག་ཟེར་ནས། ཨམ་གཙིགས་བསྡམ་ཞིང་རྐང་རྡེབ་བྱེད་ཅིང་ཧ་ཧེའི་སྐད་སྒྲ་འབྲུག་སྒྲ་ལྟར་མི་བཟོད་པ་ལྟ་བུར་བྱེད་འདུག་པས། ཐོག་མར་ང་རང་ཡང་ཅུང་ཟད་ཞིག་སྐྲགབྱུང་བས་འདི་སྐད་སྨྲས་སོ། །ཕ་བླ་མ་ཀུན་མཁྱེན་ཆོས་ཀྱི་རྗེ། །འདྲེན་མཆོག་པདྨ་ལས་འབྲེལ་ལ། །གསོལ་བ་འདེབས་སོ་བྱིན་གྱིས་རློབས། །འཁྲུལ་སྣང་ཆོས་སྐུར་གྲོལ་ བྃ༔ བར་མཛོད། །ཉོན་དང་མི་ནག་འཇིགས་རྔམས་ཅན། །ངས་དགེ་སྒྲུབ་སྡིག་སྤོང་ཅི་བྱས་ཡང་། །ཁྱོད་ཀྱི་རྗེས་གཅོད་བྱེད་དོན་མེད། །ཡུལ་འདི་དང་སྐྱེ་འགྲོ་དེ་དག་གི །རྒྱུ་རྐྱེན་ཁྱོད་ཀྱིས་བདག་ལ་སྨོས། །ཁྱོད་ང་རྒྱལ་བ་སྤུ་མ་གཟེང་ཞིག །ཕྲག་དོག་སྐད་སྒྲ་མ་ཆེ་ཞིག །འདོད་ཆགས་འཁྲུགས་ལོང་མ་རྒོད་ཅིག །ཞེ་སྡང་གདུག་རྩུབ་མ་སྟོན་ཅིག །གཏི་མུག་རང་གཟུགས་མ་ངོམས་ཤིག །ང་ལྷ་ལུས་ཐོབ་པའི་མི་མོ་ཡིན། །ཉོན་གཟུགས་ཁྱོད་ལ་ཡ་མི་ང་། །སེམས་ཆོས་སྐུར་གྲོལ་བའི་རྣལ་འབྱོར་ཡིན། །རྨི་ལམ་སྒྱུ་མར་ང་མི་ཞེན། །གང་སྣང་ཡེ་ཤེས་ཆེན་པོའི་ངང་། །སྐྱེ་འགགས་གཉིས་མེད་ཕྱོགས་ལྷུང་བྲལ། །དག་མཉམ་རོལ་པའི་གདེང་ཞིག་ཐོབ། འཆི་བའི་དགྲ་ལ་ཡ་མི་ང་། །འཆི་མེད་གཉུག་མའི་བཙན་ས་ཟིན། །གང་ཤར་གང་སྣང་རིག་པའི་རྒྱན། །སྤང་བླང་མཚན་འཛིན་ཡུལ་ལས་འདས། །ཆོས་ཀུན་མཉམ་པ་ཉིད་དུ་གྲོལ། །ངའི་དགེ་བའི་མཐའ་དེ་ནམ་མཁར་མཉམ། །ཁྱེད་ཅེར་ཆུང་སེམས་ཀྱིས་ཐུག་ས་མེད། །ངས་སྡིག་ཀུན་རྩ་བ་མ་རིག་བཅོམ། །བདག་ཉིད་གཅིག་པུའི་བདུད་མོ་དེ། །ཤེས་རབ་གཉིས་ཀྱི་མདའ་མོས་བསད། །ལྷན་ཅིག་སྐྱེས་པའི་བདུད་ཕོ་ དེ། །སྐུ་གསུམ་གྱི་རི་རབ་འོག་ཏུ་མནན། །ཀུན་བཏགས་བདུད་ཀྱི་བུ་ཆུང་དེ། །ཡེ་ཤེས་ལྔའི་སྒྲོམ་དུ་འཆོར་མེད་བྱས། །རྣམ་གཡེང་ལྷ་ཡི་བདུད་པོ་དེ། །ཚོགས་དྲུག་རང་གྲོལ་གྱི་མདུང་མོས་བསད། །དགའ་སྤྲོ་ཞེན་པའི་བདུད་པོ་འདི། །མཉམ་པ་ཉིད་ཀྱི་ཧོམ་དུ་མནན། །འཁྲུལ་སྣང་ཕུང་པོའི་བདུད་པོ་འདི། །རྣམ་ཐར་གསུམ་གྱི་རལ་གྲིས་བསད། །སྙེམས་བྱེད་བདུད་ཀུན་ཨ་མྱེ་འདི། །ཆོས་དབྱིངས་མཁའ་ལ་ཡུལ་ཕུད་བྱས། །ཐོགས་བཅས་ཡུལ་གྱི་དྭཕྲུག་དང་། །ཐོགས་མེད་ཡིད་ཀྱི་དྭ་ཕྲུག་གཉིས། །བླང་དོར་རེས་མོས་ཀྱི་ས་ལ་བསྐྱལ། གཅེས་འཛིན་རང་གྲོལ་གྱི་ཞགས་པས་བཅིངས། །སྣང་སྟོང་གཉིས་མེད་ཀྱི་ཕུར་པས་བསད། །སྐུ་གསུམ་མཉམ་ཉིད་ཀྱི་ས་ཐོབ་བྱས། །ངས་སྡིག་པའི་ལས་བྱས་འདི་ལྟར་ཡིན། །ཁྱོད་ཨ་བུ་ཡིན་ན་རྗེས་གཅོད་མཛད། །ཅེས་སྨྲས་ཚེ། ཁོང་ན་རེ། ཡ་ཡ། གྲང་ང་ཁམས་ནས་འོང་བའི་བྱང་སེམས་མ། །ཁྱོད་ཀྱི་དགེ་སྒྲུབ་སྡིག་སྤང་ངོ་མཚར་རྨད། །དེ་དོན་བརྗོད་ན་གྲངས་ཀྱི་མི་ལོངས་བས། །ཁྱོད་ཀྱི་སློབ་འབངས་རྣམས་ལ་འདི་ལྟར་གྱིས། །གདམས་པ་སྟོན་དང་ཁམས་གསུམ་ཡོངས་གྲོལ་གྱི། །རྣལ་འབྱོར་ཤ་སྟག་འབྱུང་བ་ངེས་པའི་ཚིག །འོན་ཀྱང་ཁྱོད་ཀྱི་ བྃ༔ གདུལ་བྱའི་ཆ་ཙམ་ལ། །ཉེ་བའི་སྡིག་ཅན་གྲང་ང་ཁམས་ཀྱི་མི། །ཉག་དཔོན་ཚུལ་བཟུང་ཡ་མ་ཚེ་རིང་དང་། །རྡོ་རྗེ་བཀྲ་ཤིས་ཨ་དང་མགོན་པོ་རྒྱལ། །དེ་ལ་སོགས་པའི་དམེ་བུ་དེ་དག་རྣམས། །ཤི་མ་ཐག་པར་ཡུལ་འདིར་སྐྱེ་བ་བརྒྱུད། །བཟོད་དཀའ་སྡུག་བསྔལ་ཡུན་རིང་མྱོང་ཞིང་མནར། །དེ་ནས་མར་མར་འོག་ནས་འོག་ཏུ་འགྲོ། །རང་བྱས་ལས་ཀྱི་རྣམ་སྨིན་མ་ཟད་བར། །འབྲས་བུ་སྡུག་བསྔལ་སྐེམ་པར་མི་འགྱུར་རོ། །ཞེས་ཟེར་བས། བདག་ཁོ་རང་དང་མཉམ་དུ་ཡུལ་དེར་བལྟ་རུ་སོང་བའི་ཚེ། ཟངས་དཀར་ཡུལ་ཆུང་ཙམ་གྱི་ནང་དུ་ཁྲོ་ཆུ་ཁོལ་མས་བཀང་ནས་ཕྱོགས་བཞིར་མི་ནག་བཞིས་སྦུད་པ་རྒྱབ་ཅིང་འདུག་པས། བདག་གིས་འདི་ཅི་རེད་སྨྲས་ཚེ། ཁོ་ན་རེ། འདི་ཉག་ཨ་བསྭེའི་དཔོན་འཁོར་བཙོས་རེད། དེ་བས་ཚ་བ་ད་དུང་ཡོད། དེ་ལ་ཡ་མ་མགོན་བཙོ་དགོས་ཟེར། ཡང་ཟངས་ཀྱི་རི་དྭགས་ཤ་བ་གླ་བ་སོགས་མང་པོ་མེ་རང་འབར་དུ་ཡོད་པ། ལ་ལས་ཁ་ནས་མདའ། ལ་ལས་མེ་དཔུང་། ལ་ལས་སྤུ་གྲི་སོགས་མཚོན་ཆ་སྣ་ཚོགས་ཆར་བབས་པ་ལྟ་བུར་འདུག་པས། འདི་དག་ཅི་རེད་དྲིས་ཚེ། ཁོ་ན་རེ། འདི་དག་ནི་ཉག་ཨ་བསྭེའི་དཔོན་འཁོར་གྱིས་མ་ཉེས་རི་དྭགས་བསད་པའི་ རྣམ་སྨིན་འཇལ་ས་རེད། ད་དུང་ཡང་དེའི་ཕན་ན་སྡུག་བསྔལ་མི་འདྲ་བའི་གནས་དུ་མ་ཡོད་དོ་ཟེར། བདགགིས་ཡུལ་འདི་དང་སྡུག་བསྔལ་མི་འདྲ་བའི་གནས་ཡོད་དོན་ཅི་རེད་དྲིས་པའི་ཚེ། ཁོ་ན་རེ། ཡུལ་འདི་ནི་དམྱལ་བ་ཡང་སོས་ཀྱི་སྟེང་རེད། སྙིགས་དུས་ཀྱི་འགྲོ་བ་རྣམས་ལས་འབྲས་ཁྱད་དུ་བསད་ནས་མི་དགེ་བ་སྣ་ཚོགས་བསགས་པའི་འབྲས་བུ་སྡུག་བསྔལ་མ་ངེས་པ་སྣ་ཚོགས་ཀྱི་དམྱལ་བ་ཡོད་པས་བརྗོད་ཀྱིས་མི་ལོང་ངོ་། །ཁྱོད་ཀྱིས་ཉེ་འཁོར་རྣམས་ལ། དོན་མེད་ཀྱི་སྡིག་པ་བྱེད་དུ་མ་བཅུག་ཞིག །ལས་འབྲས་བསླུ་བ་མེད་པར་རང་ཐོག་ལ་སྨིན་ངེས་པ་ཡིན་ནོ། །ཟེར་མ་ཐག་གཏམ་མཇུག་མ་རྫོགས་ཀྱང། རྟ་འཛིང་བྱས་པའི་རྐྱེན་གྱིས་གཉིད་ལས་སད་དོ། །དེ་ནས་ཟླ་ཁྱིམ་དེ་ཀའི་ཡར་ཚེས་བཅུ་བཞིའི་ཉིན་ཉེ་