Tibetan
མཚན་ཉིད་ཡོངས་སུ་རྫོགས་པའི་སྟེང་ཁང་ན་རྒྱལ་བ་འོད་ཀྱི་ཕུང་པོ་ལ། ཕྱོགས་བཅུའི་སངས་རྒྱས་རྣམས་ཀྱིས་བསྐོར་བ། བར་ཁང་ལ་འགྲོ་འདུལ་འཕགས་པའི་ལྷ་མཆོག་ལ། བྱང་ཆུབ་སེམས་དཔའི་ཚོགས་ཀྱིས་བསྐོར་བ་དང་། འོག་ཁང་ན་རིན་པོ་ཆེ་སྣ་ཚོགས་ཀྱི་ཁྲིའི་ཁར་ཐབས་ཤེས་པདྨའི་སྟེང་ན། གུ་རུ་མཚོ་སྐྱེས་རྡོ་རྗེ་ལ་ཐུགས་སུ་བྱོན་པའི་མཁའ་འགྲོ་ལྔ་དང་། གཞན་ཡང་གྲུབ་ཆེན་རྗེ་འབངས་ཚོགས་ཀྱིས་བསྐོར་བ་དང་། གཞལ་ཡས་བར་ཁྱམ་དང་། སྨན་གྱི་སྤང་རི་ལ་སྔོན་བྱོན་བསྟན་པའི་བདག་པོ། གུ་རུའི་ཐུགས་རྗེ་འོད་ཟེར་ལས་འཁྲུངས་པའི་གཏེར་ཆེན་རྣམས་ཀྱིས་རང་རང་གི་འཁོར་ལ་ཆོས་སྟོན་པ་སོགས་མཛད་ནས། ཞིང་དང་གཞལ་ཡས་རྣམས་ཀྱང་རིགས་དང་མཐུན་པར་རང་བྱུང་ལྷུན་གྲུབ་ཏུ་སྣང་བའོ། །དེ་ནས་བདག་གིས་གུ་རུ་རྗེ་འབངས་སྟོན་འཁོར་མཇལ་བ་དང་། ལུས་བ་སྤུ་ གཡོ། མིག་མཆི་མ་འཁྲུགས། སེམས་དད་པ་ཆེན་པོས་གསོལ་བ་འདི་ལྟར་བཏབ། ཨེ་མ་ཧོ། རང་སྣང་དག་པ་པདྨ་འོད་ཀྱི་ཞིང་། །བཀོད་པ་རབ་རྫོགས་ལྷུན་གྲུབ་གཞལ་ཡས་དབུས། །མ་ཆགས་སྐྱོན་བྲལ་པད་ཟླ་རྒྱས་པའི་སྟེང་། །རྣམ་འདྲེན་སངས་རྒྱས་གུ་རུ་མཚོ་སྐྱེས་རྗེ། །སྤྲུལ་པའི་མཁའ་འགྲོ་རྗེ་འབངས་གྲུབ་བརྙེས་ཚོགས། །བདག་བློ་མོས་པའི་དཔལ་དུ་ཡོངས་ཤར་བ། །སྐུ་ཡིས་འོད་ཀྱིས་སངས་རྒྱས་ཞིང་ཀུན་ཁྱབ། །གསུང་གིས་གང་འདུལ་གསང་སྔགས་ཆོས་སྒྲ་སྒྲོགས། །ཐུགས་རྗེ་དགོངས་པས་ལས་ཅན་རྗེས་སུ་འཛིན། །བཀའ་དྲིན་འཁོར་མེད་རྣམས་ལ་གུས་ཕྱག་འཚལ། །དངོས་ཡིད་ལས་སྤྲུལ་ཕྱི་ནང་མཆོད་པ་འབུལ། །སྒོ་གསུམ་མི་དགེའི་ལས་ཀུན་མཐོལ་ལོ་བཤགས། །རང་གཞན་དགེ་ཚོགས་ཀུན་ལ་རྗེས་ཡི་རང་། །གང་ལ་གང་འདུལ་ཆོས་འཁོར་བསྐོར་བར་བསྐུལ། །དམ་པ་མྱ་ངན་མི་འདའ་བཞུགས་གསོལ་འདེབས། །ཀུན་ཀྱང་སངས་རྒྱས་ཐོབ་པའི་རྒྱུ་རུ་བསྔོ། །བདག་དང་བདག་ལ་འབྲེལ་ཐོག་སེམས་ཅན་ཀུན། །འདི་ནས་སྣང་བ་གནས་སུ་འགྱུར་མ་ཐག །སྐྱེ་བ་གཞན་གྱིས་བར་མ་ཆོད་པ་རུ། །ཟངས་མདོག་དཔལ་གྱི་ཕོ་བྲང་འདིར་སྐྱེས་ནས། །སྒྲིབ་གཉིས་བག་ བྃ༔ ཆགས་མ་ལུས་ཀུན་དག་སྟེ། །པད་འབྱུང་སྟོན་འཁོར་ཞལ་མཇལ་གསུང་ཐོས་ནས། །ཟབ་གསང་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་བསྒྲོད་རིམ་པར་མི་ལྟོས་པར། །སྟོན་འཁོར་དགོངས་པ་དབྱེར་མེད་སངས་རྒྱས་ཤོག །ཅེས་སྨོན་ལམ་བཏབ་མཐར། ཨ་མ་ཇོ་མོ་དང་། རྡོ་རྗེ་མཚོ་མོ་གཉིས་བྱོན་ནས་ཐུགས་བརྩེ་བའི་ཚུལ་གྱིས་འདི་སྐད་གསུངས་ཨེ་མ་རིགས་ལྡན་ལས་འཕྲོ་ཅན། །གནས་འདིར་བྱོན་པ་ངོ་མཚར་ཆེ། །གདོང་དམར་བོད་ཀྱི་ཡུལ་ཁམས་སུ། །འགྲོ་དོན་གདུལ་བྱ་ཇི་ལྟར་བྱུང་། །གྲོགས་དང་ཆོས་འཛིན་གང་དང་འཕྲད། །ཟབ་གཏེར་དར་རྒྱས་ཇི་ལྟར་བྱུང་། །རྟེན་འབྱུང་རྡོ་རྗེའི་ཕུང་པོ་དང་། །འབྲེལ་བའི་ལས་ལྡན་ཅི་ཙམ་སྨིན། །ཐབས་མཁས་ཐུགས་རྗེའི་འོད་ཟེར་གྱིས། །དོན་གཉིས་མཐར་ཕྱིན་ཅི་འདྲ་བྱུང་། །སྔོན་སྨོན་བསོད་ནམས་བཟང་པོའི་མཐུས། །ད་ལྟ་གུ་རུ་སྟོན་འཁོར་མཇལ། །རིགས་ལྡན་བདེ་ཆེན་བདེ་བའི་བདག །དཔའ་བོ་དཔའ་མོའི་ཚོགས་གྲལ་དུ། ། བྱོན་ལ་རང་སྐལ་དངོས་གྲུབ་ཞུས། །ཞེས་གསུངས་ཏེ། ངེད་ཅག་ཕོ་བྲང་ནང་དུ་བྱོན་པར་དགོངས་ཚེ། བདག་གིས་འདི་སྐད་ཞུས། ཨེ་མ་རྒྱལ་བའི་ཡུམ་གྱུར་རྡོ་རྗེ་རྣལ་འབྱོར་མ། །སྣ་ ཚོགས་ཐབས་ཀྱིས་འགྲོ་ཀུན་བུ་བཞིན་སྐྱོང་། །མི་མོའི་ཚུལ་གྱིས་གསང་སྔགས་བསྡུ་བ་མཛད། །སངས་རྒྱས་པདྨའི་ལྕམ་གཅིག་ཁྱོད་མིན་ནམ། །བདག་ཅག་རྗེས་འཇུག་བུ་ལ་ཐུགས་རྗེས་གཟིགས། །བྱམས་བརྩེའི་ཐུགས་རྗེས་ཡལ་བར་མ་དོར་བར། །ཁོ་མོ་བདག་ལ་དགོངས་ཤིག་གསན་དུ་གསོལ། །བདག་ནི་སྐྱེ་དམན་ན་ཆུང་ཉམས་ཕྲ་བས། །གདོང་དམར་བོད་དུ་འགྲོ་དོན་ག་ལ་སྲིད། །དུས་རྣམས་མི་འགྱུར་མི་རྣམས་འགྱུར་བའི་རྟགས། །བཙུན་པས་ཚུལ་ཁྲིམས་མི་བསྲུང་རླུང་ལ་བསྐུར། །སྔགས་པས་སེམས་བསྐྱེད་དམ་ཚིག་མེ་རུ་བསྲེགས། །སྒོམ་ཆེན་མི་ཚེ་ཆོས་སུ་རློམས་བྱས་ཀྱང་། །ཉམས་ལེན་ཏིང་འཛིན་ཕྲག་མདོག་བསྒོམ་པ་དང་། །འབད་རྩོལ་བྱ་བ་ནོར་ལ་བྱེད་པ་མཐོང་། །མཁས་པའི་ཡོན་ཏན་ཁ་ནས་གྱེར་གྱུར་ཀྱང་། །ཐོས་ཤེས་གནས་གོལ་ང་རྒྱལ་ལམ་ཁྱེར་བྱེད། །གྲུབ་ཐོབ་ཡུལ་གྲོང་ཉུལ་ཞིང་ནག་ཆང་སྤྱོད། །བཙུན་མའི་ལུས་མི་ཐུབ་ཅིང་བུ་རྒྱུད་གསོད། །སྐྱེ་པས་མནའ་ཟ་སྡེ་འཁྲུགས་ནང་དམེ་བྱེད། ཆོས་པ་རྣམས་ཀྱིས་ཆོས་བཞིན་མི་བྱེད་པར། །བཀའ་ལ་རས་ཆོད་བླ་མར་དམོད་ཅིང་གཤེ། །གསང་སྔགས་ལམ་ལ་སྐྱོན་དུ་བལྟ་ཞིང་འཛེམ། །ཐབས་གཉིས་སྒོ་སྦྱོར་ཕྲ་བའི་སྒོ་གསུམ་རྩ་508 བྃ༔ ཐིག་རླུང་གསུམ་མཆན་ཉམས། །ཆོས་དང་ཆོས་མིན་དབྱེ་བ་ནོར་གྱིས་བྱེད། །དེ་ལ་སོགས་པའི་སྙིགས་དུས་རང་མཚང་ངོམས། །དམན་པ་བདག་འདྲས་སྐྱོབ་པར་མི་ནུས་ཤིང་། །རྒྱལ་བསྟན་ཉམས་གསོས་དོན་གཉིས་ཅིའི་ཕྱིར་འབྱུང་། །གྲོགས་དང་ཆོས་འཛིན་གཞན་རྐྱེན་སབྟས་བསྒྲིབ། །སྐལ་ལྡན་མཆིས་ཀྱང་ཀུན་གྱིས་ལོག་ལྟ་བྱེད། །ཟབ་པའི་མན་ངག་རིན་ཆེན་གཏེར་གྱི་མཛོད། །བརྐུས་ནོར་བཞིན་དུ་སྦས་གསང་མ་བྱས་ན། །སྐལ་ལྡན་རེ་ཙམ་མ་གཏོགས་སྟོན་ཡུལ་དབེན། །དེ་ཕྱིར་ཁོ་མོ་བདག་གིས་འགྲོ་བའི་དོན། དངོས་ཅན་མི་ལས་དངོས་མེད་ལྷ་འདྲེ་དང་། །ཉམ་ཐག་གནས་ངན་འཁྱམས་པའི་འགྲོ་བའི་མངའ། །བཟང་འབྲེལ་དཀོན་ཅིང་ངན་འབྲེལ་ཤུགས་ཀྱིས་འདུས། །ད་ནི་འཇིག་རྟེན་ཡུལ་དུ་བདག་མི་འགྲོ། །ཕར་ལ་དྲང་པོར་བཤད་ཀྱང་ཚུར་ལ་སྡང་། །ཆོས་མཐུན་བྱ་བ་སྣ་གཅིག་མི་བརྩོན་ཞིང་། །རང་གཞན་ཕུང་བྱེད་ལས་ལ་རྟག་ཏུ་འབད། །སྨིན་གྲོལ་ཐོབ་ཀྱང་གདམས་པ་ཁུར་མི་ལོན། །ལས་འབྲས་ཐོས་ཀྱང་བླང་དོར་གནས་མི་ཤེས། །ཕ་བུ་ཡིན་ཀྱང་སྙིང་པོ་བློ་གཏད་མེད། །འགྲོ་དོན་ཕར་ཞོག་རང་འབྲས་བརླག་ངེས་པའི། །གནས་ངན་དེ་དག་བདག་གིས་ སྤང་བར་འདོད། །ཅེས་ཞུས་ཚེས། རྗེ་མོའི་ཞལ་ནས། རིགས་ལྡན་མ་ད་དུང་ཁྱོད་ཀྱི་ཕྲིན་ལས་མ་རྫོགས་པ་ཡིན་པས། སེམས་བསྐྱེད་ཀྱི་གོ་ཆ་མ་ཞན་པར། མཁའ་འགྲོའི་ཞལ་ལུང་བཞིན་དུ་སྒྲུབས་དང་། ངེད་ཅག་ནས་གྲོགས་ལྡན་བྱེད། ཁྱད་པར་གཏེར་སྟོན་གྱི་ཕྲིན་ལས་ཐབས་གྲོགས་ཆོས་བདག་རྣམས་ལ་རག་ལས་ཡོད་པས། རྟེན་འབྲེལ་བཏང་སྙོམས་ལ་མ་བཞག་པར་ཚུལ་བཞིན་དུ་སྤྱོད་པ་གལ་ཆེ་གསུངས། ཡང་བདག་གིས་ལུས་དམན་བདག་གི་སྒོ་གསུམ་གྱི་བྱ་བས། གུ་རུ་ཡབ་ཡུམ་གྱི་ཐུགས་བཞེད་བསྒྲུབ་ནུས་པ་ཞིག་དང་། སེམས་ཅན་ལ་ཕན་ཐོགས་ཅུང་ཟད་སྲིད་ནས་དོན་གཉིས་ཕྲན་བུ་རེ་འགྲུབ་ན། གནས་སྐབས་ཕྱིར་འགྲོ་དགོས་ཀྱང་སྡུག་བསྔལ་མི་བཟོད་པར་ཅི་ཐབས། མཐུན་རྐྱེན་ཇི་ལྟར་མཛད་ཁྱོད་རྣམས་དགོངས། ང་རང་མནར་མེད་ཀྱི་གནས་སུ་འགྲོ་དགོས་པ་དང་། འཇིག་རྟེན་མི་ཡུལ་དུ་འགྲོ་དགོས་པ་གཉིས་ཀྱི་སྡུག་བསྔལ་ལ་ཁྱད་པར་མེད་ཀྱང་། རང་གི་བྱང་ཆུབ་སེམས་དཔའི་བསླབ་པ་ལས་འགལ་བ་འགྲོ་སྙམ་ནས། རང་སེམས་ཁོང་དུ་ཆུད་པར་བྱས་ཏེ། སེམས་ཅན་གཅིག་གི་དོན་ལ་ཡང་ལན་གྲངས་མང་པོར་ཕྱིར་འགྲོ་དགོས་ཀྱང་བཟོདཔར་ཨེ་ཐུབ་ལྟ་བ་ལས་འོས་མེད་པ་འདྲ་ཞུས་ཚེ། རྡོ་རྗེ་ བྃ༔ མཚོས་རིགས་ལྡན་མ་དེ་ལྟར་སེམས་ཅན་གཅིག་གི་དོན་བྱེད་ནུས་ཚེ། གུ་རུ་ཡབ་ཡུམ་གྱི་ཐུགས་བཞེད་འགྲུབ་པ་ཡིན་ནོ། །དམ་པའི་ཆོས་ཟབ་མོ་ལེའུ་གཅིག་གཏན་ཕབ་བྱས་ཚེ། འགྲོ་དོན་སྣ་གཅིག་མ་བྱུང་ཀྱང་། གུ་རུ་ཡབ་ཡུམ་གྱི་ཐུགས་བཞེད་འགྲུབ་པ་ཡིན་ནོ། །སྡོམ་དམ་ལ་མངོན་ལྐོག་མེད་པར་འགྲོ་བའི་དོན་ཁོ་ནར་བརྩོན་ཚེ། ལོག་ལམ་སྐྱེ་འགྲོས་གཤེ་བསྐུར་བྱེད་ཀྱང་། གུ་རུ་ཡབ་ཡུམ་གྱི་ཐུགས་བཞེད་འགྲུབ་པ་ཡིན་ནོ། །ཅིའི་ཕྱིར་ཞེ་ན་འགྲོ་བའི་ལས་མ་ཟད་བར་དུ། གུ་རུའི་ཐུགས་རྗེའི་ཕྲིན་ལས་མི་ཟད། དེ་མ་ཟད་བར་དུ་རྟག་ཁྱབ་ལྷུན་འགྲུབ་ཆེན་པོར་འགྲོ་བ་གང་ལ་གང་འདུལ་དུ་སྟོན་ཅིང་། འཁོར་བ་དོང་ནས་སྤྲུགས་པར་མཛདཔ་ཡིན་པས་ན། ཁྱོད་ཀྱང་དེ་ལྟར་བསྟན་དང་འགྲོ་བའི་དོན་དུ་ཐུགས་བསྐྱེད་རྣམ་པར་དག་པའི་གོ་བགོས་ཤིག་དང་། མ་འོངས་དུས་ལ་བབ་ཚེ། འབྲེལ་ཐོག་སེམས་ཅན་དང་བཅས་པ་ཞིང་འདིར་སྐྱེ་ཞིང་། ཁྱོད་ཀྱང་ང་དང་གཉིས་སུ་མེད་པར་འགྱུར་བར་ངེས་སོ་གསུངས། དེ་ནས་འདུ་བ་ཐམས་ཅད་ཀྱིས་ཚོགས་ཀྱི་འཁོར་ལོ་རྒྱ་ཆེན་པོ་མཛད་ཅིང་། ཁྱད་པར་བཀའ་འདུས་ཆོས་ཀྱི་རྒྱ་མཚོའི་དཀྱིལ་འཁོར་གྱི་ཞལ་ཕྱེས་ནས། རྗེ་འབངས་རང་རང་རྣམས་ལ་སྨིན་གྲོལ་ བསྩལ་ནས་བཀའ་ཡི་བསྡུ་བ་མཛད་ཅིང་། དཔེ་མཛོད་ཐམས་ཅད་འཕྲུལ་གྱི་ཟ་མ་ཏོག་ལ་རྒྱས་གདབ་ནས། རྗེས་སུ་འཇུག་པ་རྣམས་ལ་ཕ་ཕོག་ཏུ་གནང་ཞིང་ཐུགས་བསྐྱེད་མཛད་པ་སོགས་དང་། ཁྱད་པར་ཡིད་བཞིན་ནོར་བུསང་རང་གི་སྒྲུབསྡེའི་དཔའ་བོ་མཛད་ཅིང་སྨིན་གྲོལ་ལ་བཀོད་ནས། ཡེ་ཤེས་མཚོ་རྒྱལ་གྱིས་ཐུགས་བརྩེ་བ་ཆེན་པོས་རྗེས་སུ་བཟུང་སྟེ། ཡང་གསང་མཁའ་འགྲོའི་ཐུག་ཏིག་གི་ཆོས་སྐོར་བམ་པོ་ལྔ་བཅུ་རྩ་བརྒྱད་ཀྱི་ཤོག་སེར་རྣམས་སྙན་བརྒྱུད་ཀྱི་ཚུལ་དུ་བདག་ལ་གཏད་ནས་བརྡ་དབང་བསྐུར། གསང་མཚན་དུ་མཁའ་འགྲོ་དགྱེས་པའི་རྡོ་རྗེ་བཏགས་ནས་གཏད་རྒྱ་སྨོན་ལམ་མཛད། དེ་ནས་སྟོན་འཁོར་ཚིམས་པ་དྲུག་ལྡན་ལ་རོལ་སྐབས་སུ། གུ་རུ་སྐུའི་གཟུངས་མ་བརྒྱད་ལས་རང་འདྲ་བ་བརྒྱད་དུ་སྤྲུལ་ནས། སྟོན་འཁོར་རྣམས་ལ་བདེ་བ་ཆེན་པོའི་གླུ་དབྱངས་འདི་གསུངས་པ། ཨ་ཧོཿ སྣང་སྲིད་དག་པ་རབ་འབྱམས་ཡོངས་གྲུབ་ཀྱི་དཀྱིལ་འཁོར། །ཆོས་སྐུ་དག་པ་གཉིས་ལྡན་རིགས་འདུས་ཀྱི་བླ་མ། །གཟུགས་སྣང་དག་པ་རབ་འབྱམས་རྗེ་འབངས་ཀྱི་ཚོམ་བུ། །འདོད་ཡོན་དག་པ་རབ་འབྱམས་འདུ་བ་ལ་ཕེབས་ནས། །བདེ་སྟོང་དག་པ་རབ་འབྱམས་གླུ་གར་ལ་རོལ་མཛོད། །ཆོས་ཉིད་དག་པ་རབ་འབྱམས་ བྃ༔ དངོས་གྲུབ་ཡང་ཞུའོ། །ཞེས་རྡོ་རྗེའི་གླུ་དང་གར་གྱི་མཆོད་པ་བསམ་གྱིས་མི་ཁྱབ་པ་མཛད་དོ། །ཡང་ཞུས་ལན་དུ། གིང་ཆེན་བརྒྱད་ཀྱིས་རྔ་ཆུང་གི་སྒྲ་ལ་དྲངས་ནས་གླུ་གར་འདི་ལྟར་བྱེད། ཨ་ལ་ལ་ཧོ། ཨེ་མ་ཧོ། གཅིག་ནི་མཉམ་ཉིད་ཆོས་སྐུའི་བྲོ། །ལྷུན་གྲུབ་སྐུ་དང་ཡེ་ཤེས་རྫོགས། །ཡེ་སྟོང་མཐའ་བྲལ་ཆེན་པོའི་གར། །གསལ་སྟོང་ཟུང་འཇུག་ཀློང་དུ་འཆམ། །གཉིས་ནི་བདེ་ཆེན་ཡེ་ཤེས་བྲོ། །རླུང་སེམས་ཡེ་ཤེས་ཕྱག་རྒྱ་ཡི། །དགའ་ཆེན་ལྷན་སྐྱེས་ཆེན་པོའི་གར། །བདེ་སྟོང་ཟུང་འཇུག་ངང་དུ་འཆམ། །གསུམ་ནི་དག་པར་རབ་འབྱམས་བྲོ། །གདན་གསུམ་དཀྱིལ་འཁོར་གཅིག་ཏུ་རྫོགས། །སྣང་སྲིད་གཞིར་བཞེངས་ཆེན་པོའི་གར། །རིག་སྟོང་ཟུང་འཇུག་ཀློང་དུ་འཆམ། །དག་མཉམ་ཆོས་སྐུའི་ཕོ་བྲང་།རང་བྱུང་ལྷུན་འགྲུབ་སྟོན་འཁོར་རྫོགས། །གསང་སྔགས་དུས་སྟོན་ཨ་ལ་ལ། །དཔའ་བོ་དཔའ་མོས་དགྱེས་པར་རོལ། །སྣང་བཞི་མཐར་ཕྱིན་བུམ་སྐུའི་དབྱིངས། །འཇའ་ལུས་ཆོས་སྐུའི་དངོས་གྲུབ་ཞུ། །ཞེས་རྡོ་རྗེའི་གར་དང་གླུ་ཡི་མཆོད་པ་བསམ་གྱིས་མི་ཁྱབ་པ་མཛད་དོ། །དེ་ནས་མཁའ་འགྲོ་ཡེ་ཤེས་མཚོ་རྒྱལ་དང་། ཀ་ལ་སིདྡྷི། བཀྲ་ཤིས་སྤྱི་འདྲེན། i ཤཱཀྱ་དྷེ་ཝ། རྡོ་རྗེ་མཚོ་ལ་སོགས་པས་སྨོན་ལམ་དང་བསླབ་བྱ་མཛད་ནས། ད་ནི་རིགས་ལྡན་ཁྱོད་རང་གུ་རུ་རྗེ་འབངས་རྣམས་ལ་བྱིན་རླབས་ཞུས་དང་། འུ་ཅག་འགྲོ་དོན་ལ་འགྲོ་བའི་དུས་ལ་བབས་པ་ཡིན་གསུངས། བདག་གིས་ང་གདོང་དམར་བོད་ཀྱི་ཡུལ་དུ་འགྲོ་བ་ལ། བྱིན་རླབས་ཙམ་གྱིས་བདག་གིས་གཞན་སྨིན་མི་ནུས་པས། གདམས་ངག་ཚིག་ཉུང་ལ་དོན་འདུས་པ། ཐོས་པ་ཙམ་གྱི་མྱོང་བ་ཐོན་པ། བསྒོམ་པ་ཙམ་གྱིས་གྲོལ་བ་ཐོབ་པ། ནང་བསྒོམ་ན་ནང་སངས་རྒྱས། ནུབ་བསྒོམ་ན་ནུབ་སངས་རྒྱས་པའི་མན་ངག་ཁྱད་པར་ཅན་ཞིག་གནང་དུ་སོལ་ཞུས་ཚེ། གུ་རུ་རིན་པོ་ཆེའི་སྐུ་ཡི་བཀོད་པ་སྐྱབས་རྗེ་ཐམས་ཅད་མཁྱེན་པ་ཆེན་པོ་ཡིད་བཞིན་ནོར་བུའི་སྐུ་དང་ཐ་མི་དད་པར་བཞེངས་ནས་འདི་སྐད་གསུངས། དབྱིངས་དང་ཡེ་ཤེས་དབྱེར་མེད་རྫོགས་པ་ཆེ། །གཏད་འཛིན་མཐའ་བྲལ་ཞིག་པ་གདོད་མའི་གཤིས། །མ་བཅོས་ཟང་ཐལ་རྗེན་པའི་ངང་མཐོང་ན། །ཡེ་གྲོལ་འདུས་མ་བྱས་པར་ཆོས་ཀུན་གྲོལ། །དོན་དམ་འགྱུར་མེད་རང་རིག་མངོན་གྱུར་ནས། །ཆོས་སྐུའི་གཏན་སྲིད་ཟིན་པར་རྡོ་རྗེའི་ཚིག །ཅེས་གསུངས་མ་ཐག་ཏུ་བདག་གི་སྣང་བ་ཐམས་ཅད་འར་མ་འུར། གང་སྣང་སྣང་ཙམ། ཤེས་པ་བན་མ་བུན་དུ་སོང་ནས། བྃ༔ གང་ཡིན་ཡིན་ཙམ། སྨྱོན་པ་འུར་ལང་པ་ལྟ་བུར། ཤེས་པ་གཏད་སོ་དང་བྲལ་བར་ཡུན་གཅིག་ལ་གནས་ཚེ། དགོངས་པ་མི་འགྱུར་བའི་གདེངས་མངོན་དུ་བརྙེས་པ་བྱུང་ངོ་། །དེ་ནས་གཡས་གྲལ་གྱི་དང་པོ་ལ། བི་མ་ལ་བཞུགས་པས། དེ་ལ་ཕྱག་ཕུལ་ནས་གདམས་པ་ཞུས་ཚེ། སྟོང་གསལ་ནམ་མཁའ་འདི་ནི་ཡེ་ཤེས་དངོས། །དེ་ལས་གཞན་དུ་རྩོལ་སྒྲུབ་མ་བྱེད་ཅིག །ནམ་མཁའི་ངོ་བོ་རང་རིག་འགྱུར་བ་མེད། །གཏད་མེད་རང་སར་བཞག་པས་ཆོས་སྐུར་གྲོལ། །ཞེས་གསུངས། གཡོན་གྲལ་གྱི་དང་པོ་ལ། བེེ་རོ་ཙཱ་ན་བཞུགས་པས་གདམས་པ་ཞུས་ཚེ། གདོད་ནས་རང་རིག་མི་འགྱུར་ཆོས་ཀྱི་སྐུ། །མཚན་མའི་སྐྱོན་བྲལ་ཟང་ཐལ་སྐྱེ་བ་མེད། །བརྗོད་པའི་ཡུལ་འདས་དཔེ་མེད་གཉུག་མའི་གཤིས། །ཡིད་དཔྱོད་བློ་བྲལ་ཆོས་སྐུའི་ངང་དུ་ཞོག །ཅེས་གསུངས། མདུན་གྲལ་གྱི་དང་པོ་ལ། ཆོས་རྒྱལ་བཞུགས་པས། བདག་གིས་གདམས་པ་ཞུས་ཚེ། སེམས་ཉིད་སྐྱེ་འཆི་བྲལ་བ་ཡི། དུས་གསུམ་ཐོག་མཐའ་མེད་པར་གནས། །དངོས་མེད་ཁྱབ་བརྡལ་ནམ་མཁའི་ངང་། །རྒྱུ་རྐྱེན་མེད་པའི་ངོ་བོར་ལྟོས་ཞེས་གསུངས། །དེ་ནས་ནམ་མཁའི་སྙིང་པོ་ལ་གདམས་པ་ཞུས་ཚེ། ཆོས་རྣམས་ཀུན་གྱིས་རྩ་བ་སེམས་ལ་གནས། །སེམས་ནི་མི་འགྱུར་ནམ་མཁའི་ངང་དུ་གནས། །ནམམཁའ་ནམ་མཁའི་མཚན་ཉིད་ཀུན་དང་བྲལ། །དཔེ་མེད་ནམ་མཁའ་གསུམ་སྤྲུགས་ཤེས་པར་མཛོད། ཅེས་གསུངས། སངས་རྒྱས་ཡེ་ཤེས་ལ་གདམས་པ་ཞུས་པས། ཀུན་འབྱུང་ནམ་མཁའ་སེམས་དང་ཆོས་ཉིད་གསུམ། །ཐ་དད་ཅུང་ཟད་ཡོད་པ་མ་ཡིན་ནོ། །ཆོས་ཀྱི་ཟ་མ་ཏོག་ཞེས་ཡོངས་སུ་གྲུབ། །བརྗོད་མེད་ཆོས་སྐུའི་དོན་དེ་བླ་ན་མེད། །འཁོར་འདས་ཆོས་ཀུན་ཡེ་ནས་གཞི་རུ་དག །གང་ཡང་ཡིད་ལ་མ་བྱེད་རང་གསལ་ཞོག །ཅེས་གསུངས། འོ་བྲན་དབང་ཕྱུག་ལ་གདམས་པ་ཞུས་ཚེ། རོ་མྱོང་མཐོང་ཐོས་ཚོར་བ་ཅི་ཤར་ཡང་། །རང་ཞལ་རང་གིས་མཐོང་ན་རང་སར་གྲོལ། །འདུ་བྱེད་ལས་ཀུན་ཡེ་ནས་ཆོས་ཀྱི་དབྱིངས། །མ་གྲོལ་སྲིད་པའི་སེམས་ཅན་གཅིག་ཀྱང་མེད། །བརྗོད་དུ་མེད་པའི་དོན་དེ་མཐོང་གྱུར་ན། །ཆོས་ཀུན་ནམ་མཁའི་མཚན་ཉིད་ཇི་བཞིན་རྟོགས། །ཞེས་གསུངས། རྒྱལ་བ་མཆོག་དབྱངས་ལ་གདམས་པ་ཞུས་ཚེ། གཞི་དབྱིངས་མི་འགྱུར་ངོ་བོ་ཡེ་ནས་སྟོང་། །རང་བཞིན་མ་འགགས་གསལ་སྟོང་ལོངས་སྤྱོད་རྫོགས། །ཐུགས་རྗེས་ཀུན་ལ་ཁྱབ་པ་སྤྲུལ་པའི་སྐུ། །སྐུ་གསུམ་ བྃ༔ དབྱེར་མེད་རང་བྱུང་གཞི་ལ་རྫོགས། །དག་མཉམ་འོད་གསལ་བརྗོད་པ་བྲལ་བའི་དབྱིངས། །སྤྲོས་བྲལ་རྣམ་ཐར་གསུམ་ལྡན་ངང་དུ་ཞོག །ཅེས་གསུངས། རྡོ་རྗེ་བདུད་འཇོམས་ལ་གདམས་པ་ཞུས་པས། རང་བྱུང་རིག་པ་གཅིག་ཆོད་དུ་ངོ་ཤེས་པར་གྱིས་དང་། སྣང་བ་ཇི་ལྟར་ཤར་ཡང་རང་གྲོལ་ཆོས་ཉིད་དུ་གྲོལ་བ་ལས་གཞན་མེད་དོ། །གསུངས་དཔལ་གྱི་ཡེ་ཤེས་ལ་གདམས་པ་ཞུས་ཚེ། སྒོ་ལྔའི་དབང་ཡུལ་གསལ་བ་ལ། །ཡིད་ཤེས་འཇུར་དྲན་མི་གཡོ་བར། །རང་གསལ་རྟོག་མེད་ངང་མཐོང་ན། །བཞག་ཐབས་མང་པོ་ཤེས་མི་དགོས། །གནད་ཀྱི་མན་ངག་འདི་ལ་འདུས། །ཞེས་གསུངས། ལང་གྲོ་ལོ་ཙཱ་ལ་གདམས་པ་ཞུས་ཚེ། འཁོར་འདས་གཉིས་མེད་རོལ་པར་ཐག་ཆོད་ཚེ། །ནམ་མཁའ་དྭངས་གསལ་ཆ་དང་འགྲོགས་པ་བཞིན། །རིག་གདངས་དབྱེར་མེད་མངོན་གྱུར་ཆེན་པོ་ཡི། །ཤར་གྲོལ་རྦ་རླབས་ལྟ་བུར་ཆོས་སྐུར་གྲོལ། །ཞེས་གསུངས། ཁྱེའུ་ཆུང་ལོ་ཙཱ་ལ་གདམས་པ་ཞུས་ཚེ། རང་རིག་རྟོག་པ་ཀུན་དང་བྲལ། །ཡེ་གྲོལ་ཡིན་པས་བསྐྱར་གཞི་མེད། །ངང་གིས་གྲོལ་བས་བཅོས་སུ་མེད། །ཅེར་གྲོལ་འབད་རྩོལ་བྲལ་བ་ཡི། །ཇི་ལྟར་ཤར་ཡང་དེ་ལྟར་དུ། །གཞི་ལ་ཕན་ གནོད་མེད་པར་གྲོལ། །ཞེས་གསུངས། དཔལ་གྱི་སེང་གེ་ལ་གདམས་པ་ཞུས་ཚེ། ཐ་མལ་ཤེས་པ་བཟོ་མེད་ལྷུག་པ་འདི། །རྒྱལ་བའི་དགོངས་པ་མཐའ་གྲོལ་ཀློང་ཡངས་ཡིན། །སྒོམ་དང་བསྒོམ་པར་བྱ་བ་གང་ཡང་མེད། །གྲོལ་དང་མ་གྲོལ་གཉིས་མེད་དེ་བཞིན་ཉིད། །ཅེས་གསུངས། གཡུ་སྒྲ་སྙིང་པོ་ལ་གདམས་པ་ཞུས་ཚེ། ཁྱབ་བརྡལ་རིག་པ་བྱང་ཆུབ་སེམས། སྐུ་དང་ཡེ་ཤེས་བདག་གི་དཔལ། །སྲིད་ཞི་མཉམ་པ་ཉིད་ཀྱི་དབྱིངས། །སྐུ་གསུམ་ཡེ་ཤེས་ཕྲིན་ལས་རྫོགས། །རང་བྱུང་ཆེན་པོར་ལ་བཟླའོ། །ཐོབ་བྲལ་འབྲས་བུ་ཨེ་མ་ཧོ། ཞེས་གསུངས། ཛྙཱ་ན་ཀུ་མ་ར་ལ་གདམས་པ་ཞུས་ཚེ། ཆོས་ཀུན་མ་སྐྱེས་སྟོང་པའི་རང་བཞིན་ལས། སྣ་ཚོགས་རྟེན་འབྲེལ་གཟུགས་བརྙན་ཅིར་ཡང་འཆར། །དེ་ཉིད་ངོ་བོ་མེད་ཅིང་གཞི་ལ་སངས། །ཇི་བཞིན་པ་དེ་དེ་བཞིན་ཉིད་ཡིན་ནོ། །ཞེས་གསུངས། ཡེ་ཤེས་དབྱངས་ལ་གདམས་པ་ཞུས་ཚེ། དབྱིངས་དང་ཡེ་ཤེས་གཉིས་མེད་རིག་པའི་ངང་། །འཁོར་འདས་ཆོས་ཀུན་བསམ་བརྗོད་སྤྲོས་དང་བྲལ། །སྐུ་གསུམ་ཡེ་ཤེས་ཆེན་པོར་ལྷུན་གྱིས་གྲུབ། །འདི་དོན་རྟོགས་དང་མ་རྟོགས་ཁྱད་པར་ལས། །ཆེད་དུ་འབད་རྩོལ་བྲལ་བ་གདོད་མའི་གཞི། །མངོན་གྱུར་ བྃ༔ ངང་གནས་ཆེན་པོར་ལ་བཟླའོ། །ཞེས་གསུངས། སོག་པོ་ལྷ་དཔལ་ལ་གདམས་པ་ཞུས་ཚེ། རིག་སྟོང་རིག་པའི་དབྱིངས་སུ་ཆོས་ཐམས་ཅད། །མཉམ་པ་ཉིདགྱུར་ཀུན་ཟླུམ་ཐིག་ལེའི་མཁའ། །འཁོར་འདས་ཞེན་འཛིན་བྲལ་བའི་ངང་ཚུལ་དུ། །མི་གནས་གདོད་མའི་མགོན་པོའི་གཏན་སྲིད་ཟུངས། །ཞེས་གསུངས། སྣ་ནམ་ཡེ་ཤེས་ལ་གདམས་པ་ཞུས་ཚེ། རིགས་ཀྱི་བུ་མོ་ངོ་བོ་སྟོང་པའི་ཡེ་ཤེས་ཆོས་ཀྱི་སྐུ་དང་། རང་བཞིན་གསལ་སྟོང་ཡེ་ཤེས་ལོངས་སྤྱོད་རྫོགས་སྐུ་དང་། ཐུགས་རྗེ་རང་སྣང་གི་ཡེ་ཤེས་སྤྲུལ་པའི་སྐུ་སྟེ། སྐུ་གསུམ་མཉམ་པ་ཉིད་ཀྱི་དབྱིངས་རྣམ་པར་མི་རྟོག་པའི་ཡེ་ཤེས་ནི་འབྲས་བུའི་ཆོས་མཆོག་ཉེར་ལྔའི་དབང་ཕྱུག་ཏུ་ཤེས་པར་གྱིས་ཤིག །རང་རིག་ལས་མ་འདས་པ་ཡིན་ནོ། །ཞེས་གསུངས། དཔལ་གྱི་དབང་ཕྱུག་ལ་གདམས་པ་ཞུས་ཚེ། སྙིང་དང་འབྲེལ་བའི་རྩ་མཆོག་ནས། །ཡེ་ཤེས་མཐོང་བ་མངོན་དུ་བྱེད། །རང་སྣང་ཉིད་དུ་གདེང་འཆོས་ན། །ཡེ་ཤེས་ཆེན་པོའི་ཀློང་དུ་གྲོལ། ། ཞེས་གསུངས། ལྡན་མ་རྩེ་མང་ལ་གདམས་པ་ཞུས་ཚེ། ཆོས་ཉིད་རྣམ་པར་དག་པའི་གདངས། །མངོན་གྱུར་དག་པའི་སྒོ་ནས་འཆར། །རིག་པ་རླུང་ལྔའི་རང་བཞིན་དུ། །ལུས་ཅན་ཀུན་ གྱི་སྙིང་ལ་གནས། །ཞེས་