Tibetan
ཁོང་མིང་སྲིང་གཉིས་ལ་སྦྱིན་ན་ཀུན་གྱིས་བློ་ལྷག་ཅི་ཡོད། དེ་མིན་ཡིད་བཞིན་ནོར་བུའི་གསུང་ཆོས་ལྡེབས་གཅིག་ཀྱང་ཆོས་ཚན་ནང་ནས་ཁ་མི་གཏོར་ངེས་པ་ཡིན་སྨྲས་ནས། ཚུལ་རྡོར་ཁོ་རང་ལ་ཁྱོད་ཀྱིས་ཅི་བསམ་དྲིས་ཚེ། བདག་གིས་ཁྱོད་དང་མཉམ་དུ་འགྲོ་བསམ་ཡོད་པ་སྔར་ལྟར་ཡིན་པ་སོགས་ཟེར་བས། ཡང་བདག་གིས་འོད་འབར་ལ། ཚུལ་རྡོར་གྱིས་བླ་མ་དང་གཏེར་ཆོས་སྤངས་ནས་ཕུ་ནུའི་སར་སོང་ན་ཁོ་རང་གིས་ཤེས་སྨྲས་ཚེ། ཐམས་ཅད་གྲོས་མ་འཆམས་ནས། གནས་སྐབས་མགར་ར་སང་གི་ཁ་མ་བཅག་ཙམ་དུ་ཟླ་བ་གཉིས་ལ་ཕར་གདན་སར་འགྲོ་ཆས་བྱས་ཡོད་པས། ཚུལ་ཁྲིམས་རྡོ་རྗེ་དེ་ཀར་སོང་། ངེད་མ་བུ་གཉིས་དང་། ཐུབ་བཟང་བཅས་ཤུལ་དུ་བསྡད་ནས། མཆོད་སྡོང་བཞེངས་པ་སོགས་བྱས་ནས་མཐར་ཕྱིན་པར་བྱུང་ངོ་། །དེ་ནས་བསོད་སྤྲུལ་སང་གིས་ད་ནི་ཟླ་བ་གཅིག་གི་བར་དུ་སྐུ་གདུང་རྣམ་གཉིས་རྗེའི་ཕྱག་བཞེས་ བྃ༔ ལྟར་ཁྱོད་ཀྱིས་རབ་གནས་མཛད་དགོས་གསུངས་ནས། ལོ་ཁྱིམ་དེ་ཀའི་ཟླ་བ་བཅུ་གཉིས་པའི་ཡར་ཚེས་བཅུའི་ཉིན་རབ་གནས་བསྒྲུབ་པའི་དབུ་བཙུག་གོ། །དེནས་རང་ལོ་སོ་བཞི་ལོའི་ཟླ་བ་དང་པོའི་ཚེས་གཅིག་ཉིན་ཡུལ་མི་ཀུན་གྱིས་ལོ་གསར་བྱེད་ཅིང་གཟའ་མི་ངོ་འཛོམ་དུ་ཡོད་པ་མཐོང་ཚེ། བདག་གིས་སྔར་རྗེའི་ཞལ་བཞུགས་དུས་ཀྱི་བཀོད་པ་དྲན་ནས། སྨྲ་སྔགས་ཀྱིས་གསོལ་བ་བཏབ་མཐར། མཁའ་འགྲོ་གཉིས་ཀྱིས་བདག་གི་སེམས་གསོས་ནས། རྗེའི་རྣམ་ཐར་གྱི་བརྡ་དཔེ་བསྟན་པ་སོགས་གཏེར་གཞུང་དུ་གསལ། དེའི་ནུབ་རྨི་ལམ་ལ་ཉེ་བའི་གནས་རེད་ཟེར་བའི་ཞིང་ཁམས་ཀྱི་བཀོད་པ་ལྷུན་གྱིས་གྲུབ་པའི་དབུས་སུ། པདྨ་རཱ་ག་ལས་གྲུབ་པའི་ཕོ་བྲང་ཆེན་པོ་ཞིག་གི་མཐའ་སྐོར་དུ། ཤེལ་ལས་གྲུབ་པའི་ཕོ་བྲང་བརྒྱད་ཀྱིས་བསྐོར་བ། དེ་དག་གི་ཕྱི་ལ་རིན་པོ་ཆེ་སྣ་ལྔའི་ལྕགས་རི་མུ་ཁྱུད་ལྟར་ཡོད་པ་ཞིག་སྣང་བས། བདག་གི་བསམ་པ་ལ་ཕ་གི་ཕོ་བྲང་འདིའི་ནང་དུ་སུ་བཞུགས་ཡོད་མཇལ་དུ་འགྲོ་དགོས་སྙམ་ཚེ། ཕོ་བྲང་ནང་ནས་གིང་ཕོ་གིང་མོ་གཉིས་ཀྱིས་རུས་ཆེན་གྱི་རྔེའུ་ཆུང་བརྡུང་བཞིན་བདག་གི་སར་ཐོན་བྱུང་བས། བདག་གིས་ཕོ་བྲང་འདིའི་ནང་དུ་སུ་བཞུགས་ཡོད། ཁྱེད་ཅག་གཉིས་གང་དུ་འགྲོ་ཞེས་ སྨྲས་པས། ཁོང་གཉིས་ན་རེ། རྔེའུ་ཆུང་གི་སྒྲ་ལ་དྲངས་ནས་འདི་སྐད་ཟེར། ཡིད་འོང་གསང་ཆེན་ཕོ་བྲང་དུ། །བདེ་ཆེན་འབྱུང་གནས་དཔའ་བོ་ཡོད། །ཡོངས་གྲུབ་རང་བྱུང་དཀྱིལ་འཁོར་དུ། །དཔའ་བོ་དཔའ་མོ་དུས་སྟོན་བྱེད། །ངེད་ལྕམ་དྲལ་རྡོ་རྗེའི་གླུ་ལེན་ཡིན། །གནས་འགྲོ་དང་འོང་མེད་ཀུན་ཏུ་བརྡལ། །ཆོས་དབྱིངས་ཆོས་དབྱིངས་ཡངས་པ་ཆེ། །ཧེ་ས་ར་ན་ས་མ་ཐཿ ཞེས་ཟེར་ནས་བདག་གི་ལག་པ་གཡས་གཡོན་དུ་འཇུས་ནས་ཕོ་བྲང་ནང་དུ་སོང་ཚེ། ང་རང་ལ་ཁྲུས་བྱས། རུས་པའི་རྒྱན་དྲུག་དང་། རིན་ཆེན་དུ་མས་སྤྲས་ཤིང་ཚོགས་གྲལ་དུ་ཐོན་པའི་ཚེ། རྗེ་དེ་ཉིད་ཀྱིས་ཚོགས་དཔོན་མཛད་འདུག་པས། དེའི་མདུན་ཕྱོགས་སུང་རང་སྡོད་ཟེར། གཡས་གཡོན་ཐམས་ཅད་དཔའ་བོ་དང་དཔའ་མོ་ཧེ་རུ་ཀའི་ཆ་བྱད་ཅན་དུ་མ་བཞུགས་འདུག །དེ་དག་རྣམས་ཀྱི་དཀྱིལ་འཁོར་མདུན་ཐད་དུ་རང་རང་རིགས་ཀྱི་རྡོ་རྗེ་ལས་ཀྱི་གཟུངས་མ་རྣམས་ཀྱིས་སྨན་ཐོད་ཐོགས་ནས། ཧེ་རུཀ་ཡབ་ཡུམ་ལ་མཆོད་པ་ཕུལ་ནས་གླུ་གར་ལ་རོལ་འདུག །རྗེ་དེ་ཉིད་ཀྱི་རྡོ་རྗེ་མཆོག་གི་གཟུངས་མ་ང་རང་གིས་བྱས་ཏེ། རྡོ་རྗེ་ལས་ཀྱི་གཟུངས་མ་རྡོ་རྗེ་མཚོས་མཛད་ཅིང་། སྨན་ཐོད་ཐོགས་ནས་མཐེབ་སྲིན་གྱིས་བདུད་རྩི་མཆོད་བཞིན་གླུ་གར་ བྃ༔ འདི་ལྟར་བསྒྱུར་བ། ཨ་ཧོ་སུ་ཁ་སིདྡྷི་ཧྲཱིཿ རང་བྱུང་ཡེ་ཤེས་བྱང་ཆུབ་སེམས། །ཐབས་དང་ཤེས་རབ་གཉིས་སུ་མེད། །ཟུང་འཇུག་བདེ་ཆེན་ཟག་མེད་བཅུད། ། བདེསྟོང་ཡེ་ཤེས་བདུད་བརྩི་འདི། །ཧེ་རུ་ཀ་ཡི་དཀྱིལ་འཁོར་དུ། །གཉིས་མེད་རོལ་པར་འབུལ་གྱིས་བཞེས། །སྐུ་གསུང་ཐུགས་ཀྱི་དངོས་གྲུབ་སྩོལ། །ཞེས་མཆོད་པ་ཕུལ་བས། སྔར་གྱི་མ་དག་པའི་སྣང་བ་ཐམས་ཅད་འགགས་ནས། བདེ་སྟོང་ཟག་པ་མེད་པའི་ཡེ་ཤེས་ངམ་ངམ་ཤུགས་ཀྱིས་རྒྱུད་ལ་སྐྱེ་བར་བྱུང་ངོ་། །དེའི་སྐབས་བདག་གིས་རྗེ་ལ་འདི་སྐད་ཞུས། གནས་འདི་དཔལ་རི་མིན་ནམ། མངོན་དགའི་ཞིང་ཡིན་ནམ་ཞུས་པས། རྗེའི་ཞལ་ནས་གནས་འདི་ཉེ་བའི་གནས་ཡིན་པས། གང་ལྟར་བྱས་ཀྱང་ཆོག །གདན་གསུམ་ཚང་བའི་དཀྱིལ་འཁོར་རེད། ད་ལོ་ཁྱོད་ཀྱི་ཚེ་ལ་བར་ཆད་ཞིག་འདུག་པས། ངེད་རྣམས་ཀྱིས་ཁྱོད་རང་གི་རིམ་གྲོ་དུས་སྟོན་བྱེད་པ་ཡིན། གནས་སྐབས་རྐྱེན་སེལ་གྱི་ཐབས་འགུགས་པའི་སྙིང་འཛིན་ལྕགས་ཀྱུའི་མན་ངག་དང་། བརྡ་བྱང་རེད་གསུངས་ནས་ཤོག་དྲིལ་ཆུང་བ་གཅིག་གནང་བས། བདག་གིས་ང་རང་གནས་འདི་རུ་ཁྱོད་དང་གཉིས་མེད་དུ་ཡོད་པས། སྙིང་འཛིན་མན་ངག་གིས་བདག་ ལ་དགོས་པ་མི་སྣང་ཞུས། ཡང་རྗེའི་ཞལ་ནས་འདི་སྐད་གསུངས། ཁྱོད་ད་དུང་མཁའ་འགྲོའི་འཕྲུལ་བརྡ་བཞིའི་བར་དུ་གཏེར་གཉིས་ཀྱིས་གདུལ་བྱ་མཆོག་དམན་ཀུན་ལ་ཐབས་མཁས་ཀྱིས་རྗེས་སུ་བཟུང་ལ་སྨིན་གྲོལ་དུ་བཀོད། དེ་ནས་མི་སེམས་བདུད་ཀྱིས་བསླུས་ནས་རྐྱེན་ངན་བསྐུལ་ཚེ། ཁྱེད་མ་འགྱངས་པར་ཞིང་མཆོག་པདྨ་འོད་དུ་བདག་གིས་ལམ་འདྲེན་བྱེད་འོང་གསུངས་ཏེ། ཐུགས་བརྩེ་བརྩེའི་ཚུལ་མཛད་ནས་ཞིང་སྣང་ཐམས་ཅད་འོད་དཀར་དམར་གྱི་རྣམ་པར་གྱུར་པ་དང་། རྗེ་ཡང་དེ་ལྟར་གྱུར་ནས་རང་གི་དྲན་འདུས་ལ་ཐིམ་སྣང་འཆར་ཚེ་གཉིད་ལས་སད་དོ། །དེ་སྐབས་ཡུལ་མི་རྣམས་ཀྱིས་མིག་ལམ་དུ་གནོད་ནས། ལ་ལས་དབུས་མོ་བསོད་སྤྲུལ་སང་གི་གཟུངས་མ་རེད། ལ་ལས་སྤྲུལ་སྐུ་སང་ནར་ལོན་པའི་རྐྱེན་གྱིས་མོ་རང་འདི་ཀར་མི་འདུག་པ་འདྲ་མ ཟེར། ལ་ལས་གྱོད་མོ་ཡིན་པས་འུ་ཅག་ཀུན་ལ་གནོད་ཡོང་ཟེར་ནས། ནང་གྲྭ་ཁག་ཆེ་བ་རྣམས་ཀྱིས་བསོད་སྤྲུལ་སང་ལ་དངོས་སུ་དེ་ལྟར་ཞུས་པ་སོགས། ལོག་ལྟ་བརྙས་དམོད་སྣ་ཚོགས་བྱེདསྐབས། བསོད་སྤྲུལ་སང་གི་མདུན་གཡོག་ཀུན་བཟང་བསྟན་འཛིན་གཅིག་པུ་རང་ལ་སེམས་དཀར་བ་ཡིན་པས། ཁོང་ལ་བདག་གིས་འདི་སྐད་སྨྲས། བསོད་སྤྲུལ་སང་བཞེད་པ་ལྟར། བྃ༔ གནས་སྐབས་ང་རང་འདི་ཀར་འོང་ཀྱང་། ཀུན་གྱིས་ལོག་ལྟ་བསྐུར་འདེབས་སྣ་ཚོགས་བྱེད་པ་ཁྱོད་རྣམ་གཉིས་ནས་དགོངས་བཞིན། ཁྱོད་ཀྱི་གྲྭ་ཚང་རྣམས་ཀྱིས་བླ་སློབ བར་གྱི་དམ་ཚིག་བཀའ་གཉན་པ་དེ་མ་གོ་ནས། ཡུལ་གཉེན་པོར་བསྐུར་འདེབས་བྱེད་ཀྱིན་འདུག་པས། ད་ནི་ང་རང་གི་སྔར་ཞུས་པ་ལྟར། མདོ་སྨད་ཁམས་ཕྱོགས་སུ་དབུས་མོའི་གནས་ཚུལ་མི་མཐོང་བར་བྱེད་ནས་འགྲོ་ངེས་པ་ཡིན་པས། ཁྱོད་ཀྱིས་སྤྲུལ་སྐུ་སང་ལ་དོན་རྒྱུ་རྐྱེན་ཐམས་ཅད་ཞིབ་རྒྱས་སུ་ཞུས་སྨྲས་ཚེ། ཁོང་གིས་ཀྱང་སེམས་དཀར་བའི་གཏམ་སྣ་ཚོགས་ཀྱིས་བདག་གི་སེམས་གསོས་བྱས། དེའི་སྐབས་སྒོ་སྤའི་གཏེར་སྟོན་གྱི་སྐུ་སྲས་དྲག་སྔགས་མཐུ་སྟོབས་དབང་པོ་ཞེས་པ་དེས་གསུངས་ཤོག་དང་། བཀྲ་ཤིས་པའི་དངོས་རྫས་སོགས་བསྐུར་ནས། ཁྱོད་ལ་བྱིན་རླབས་ངོ་མཚར་ཆེ་བའི་ཟབ་ཆོས་པུསྟ་ཀ་གཅིག་ཕབ་རྒྱུ་ཡོད་པ་བདག་གི་རྨི་ལམ་དུ་གསལ་བས། དེ་ཀ་ལྷག་ལུས་མེད་པར་འབེབས་ཐབས་དང་། ད་དུང་བསྟན་པ་དང་འགྲོ་བའི་དོན་དུ་གཟུགས་སྐུ་རྟ་བདུན་དབང་པོ་མི་འགྱུར་སྐུ་ཚེ་ཞབས་པད་བརྟན་པར་གསོལ་བ་འདེབས་ལགས་པས་ཐུགས་ཀློང་རིན་པོ་ཆེར་མངའ་ཐུབ་ཞུ་ཟེར་བ་སོགས་ཀྱིས་རྟེན་འབྲེལ་གྱི་གསོས་སུ་སྨན་ནས། རྗེའི་རྣམ་ཐར་ཆེན་མོ་འདེབས་ཐུབ་ཀྱི་མཐུན་རྐྱེན་དུ་གྱུར། དེ་དག་གི་སྐབས་ཞལ་གཟིགས་ལུང་བསྟན་གནས་ཚུལ་སོགས་དུ་མ་ཡོད་ཀྱང་གཏེར་གཞུང་དུ་གསལ། དེ་ནས་ཟླ་བ་བཞི་པའི་ཡར་ཚེས་བདུན་ནས་བཅུའི་བར། བླ་མ་མཆོད་ཆོག་དང་། ཐོས་གྲོལ་གཉིས་བླ་སྤྲུལ་དགེ་འདུན་ཉི་ཤུ་རྩ་གསུམ་གྱིས་གསུངས། དེ་མཐར་ཕྱིན་པ་དང་མཉམ་དུ་ང་རང་གིས་སྒར་གཞིའི་མ་འཕྲོ་གཏོར་ནས། ཡུལ་ངེས་མེད་དུ་འགྲོ་སྙམ་ཚེ། བསོད་སྤྲུལ་རིན་པོ་ཆེས་གྲོགས་དང་བླ་སློབ་ཀྱི་དམ་ཚིག་གིས་བཀའ་གནདཕེབས་ནས། ཁྱོད་ཡུལ་འདི་ཀར་བཞུགས་ཉམས་མི་སྤྲོ་ཡང་། ང་རང་གི་སེམས་བབ་ཡོད་པའི་གནས་ཞིག་ཏུ་བཞུགས་དགོས་མ་གཏོགས། སྤྲུལ་སྐུ་བཀའ་དྲིན་ཅན་གྱི་བསྟན་པ་འཛིན་སྐྱོང་ཁྱོད་རང་ལ་ཐུག་པ་དང་། མིན་ཀྱང་བདག་གི་བླ་མའི་ཡུམ་དང་། གཏེར་ཆོས་ཐམས་ཅད་ས་མཐའ་ཞིག་ལ་མི་གཏོང་ངེས་པ་ཡིན་པས། ཁྱོད་ནི་བྱོན་མི་ཉན་གསུངས་ནས་ཐུགས་ཆུང་བར་མཛད་འདུགཔས། བདག་གིས་དམ་ཚིག་ལ་བསམ་ནས་ཁོང་གི་བཀའ་བཅག་མ་ནུས་པར། ཁོང་གི་སྐུ་རིང་འདིར་ང་གནས་གང་བདེ་ཞིག་ཏུ་འདུག་ཐག་བཅད། དེ་སྐབས་མཁར་ནང་འགྲོ་མགོན་ནས་བསོད་སྤྲུལ་སང་ལ་ཞིབ་གྲོས་བྱས་ཏེ། ང་རང་འདུག་གནས་ བྃ༔ སྐབས་རེ་ལ་མཁར་ནང་སང་གི་ནང་དུ་འགྲོ་ཆགས་བྱས་ཀྱང་། བྱ་བ་མང་པོའི་མགོ་འཛོམས་དགོས་པས། རེ་ཞིག་གནས་དེ་ཀར་འགྲོ་སྟབས་དབེན་ནས་ཡོད་སྐབས། ནུབ་གཅིག་རྨི་ལམ་ལ་རྗེ་དེ་ཉིད་སྔར་སྐུ་བཞུགས་ཡོད་པའི་གནས་སྐབས་ལྟར་བྱོན་ནས། གཅེས་ཕྲུག་འུ་ཅག་གཉིས་གཡང་ཤར་བྲག་དཀར་གྱི་གཏེར་བཏོན་པའི་དུས་ལ་བབས་པ་ཡིན་པས་མྱུར་བར་འགྲོ་གསུངས། བདག་གི་བསམ་པ་ལ་གཡང་ཤར་བྲག་དཀར་ཞེས་པ་ཉག་ཁོག་ཡིན་པས། ངེད་ཡབ་ཡུམ་མྱུར་བར་ཐོན་ཐབས་ཨེ་ལྡན་སྙམ་ཚེ། རྗེས་མཁྱེན་བཞིན་འདི་སྐད་གསུངས། གཅེས་ཕྲུག་དེ་ལྟར་ཐུགས་བསམ་མི་དགོས་གསུངས་ནས། ཕྱག་གཡས་པས་བདག་གི་ལག་པ་གཡོན་པའི་མཁྲིག་མར་བཟུང་ནས་བྱོན་ཚེ། མིག་འཕྲུལ་ལྟ་བུར་གཡང་ཤར་བྲག་དཀར་རེད་ཟེར་བ་ཞིག་ལ་ཐོན་སོང་བས། ཡུལ་དེ་ཀའི་བདག་པོ་གཞི་བདག་དྲག་རྩལ་ཅན་ཞིག་འདུག་པས། དེ་རྗེས་དམ་འོག་ཏུ་བཅིང་ནས་རྫུ་འཕྲུལ་ཙམ་ཡང་སྟོན་མི་ནུས་པར་མཛད་ཅིང་། ཡབ་ཡུམ་གཏེར་སྒོར་བྱོན་ནས་མཁའ་འགྲོའི་གསང་མཛོད་ཆེན་མོའི་ཟབ་ཤོག་མཆོང་སྒྲོམ་དུ་སྦས་པ་སྤྱན་དྲངས་ནས། བསླབ་བྱ་ལུང་བསྟན་གསུངས་པ་གཏེར་གཞུང་དུ་གསལ། དེའི་ནངས་པར་ བསོད་སྤྲུལ་རིན་པོ་ཆེའི་ཆོས་ཀྱི་བཀའ་བབ་ཡིན་པས། གཏེར་སྒྲོམ་ཁོང་གི་སྤྱན་ལམ་དུ་ཕུལ་ནས། དེ་ཀ་ང་རང་ལ་ཡིད་བཞིན་ནོར་བུས་མཐུན་རྐྱེན་མཛད་ནས་གནང་བ་ཡིན་པས། ཁོང་ཐུགས་ཤིན་ཏུ་དགྱེས་ཤིང་གཏེར་སྒྲོམ་ལ་དབང་ལེན་མཛད། རིན་ཆེན་གཉིས་པ་དང་། ལྷ་རེག་བཟང་པོའི་སྐྱེས་བཅས་གནང་ནས། འདི་གཏེར་སྒྲུབ་མཛད་ནས་གཏན་ལ་འབེབས་ཐབས་མ་འཆུག་གསུངས། དེ་སྐབས་ཨ་སར་ཞེས་པའི་གནས་སུ་བསྡད་ཡོད་ཟེར་བའི་མི་གཉིས་བདག་གི་སར་ཐོན་བྱུང་ནས། ཁྱོད་གཉིས་གང་དུ་འགྲོ་བ་ཡིན་དོན་ཅི་ཡོད་དྲིས་པས། ཁོང་གཉིས་ན་རེ། ངེད་གཉིས་ཚོང་ལ་འོང་ཞོར་ཡོད་པས། ཁྱོད་ཀྱི་མདུན་དུ་ཨ་བསྭེ་མཁན་པོ་ནོར་བུ་དབང་རྒྱལ་ཞེས་པས་ཞུ་བྱ་ཞིག་ཡོད་ཟེར་ནས། དེ་ལྟར་སྤྲད་བྱུང་བས། བདག་གི་བསམ་པ་ལ་སྔར་ང་རང་ལོ་ཉེར་ལྔ་ཉེར་དྲུག་ནས་ལུང་བསྟན་རྣམས་སུ། ནམ་སྙིང་སྤྲུལ་པ་རཏྣའི་མིང་འཛིན་པ། །ལྷོ་ནས་ལྷོ་རུ་བརྒྱུད་ཅིང་དུས་སུ་འཕྲད། །ཡོངས་རྫོགས་གཏེར་གྱི་བཀའ་བབས་ཨེ་མ་ཧོ། །ལྕེ་གཉིས་ལྡན་པའི་སྦྲུལ་དང་མ་འཕྲད་དགོས། །ཟེར་བ་དེ་ཨེ་ཡིན་སྙམ་ནས། ཁོང་གི་འདོད་དོན་རྟེན་འབྲེལ་རྗེས་མཐུད་དུ་བཞག་པས། དེ་ནས་བཟུང་སྟེ་འཁོར་སློབ་གདུལ་བྱའི་ བྃ༔ ཞིང་སའི་ལས་འཕྲོ་སད་ནས། འཛི་སྐའི་ན་མདའ་སང་ཞེས་པ། གཙང་ཆེན་དགོན་པའི་དགོན་ལག་གསང་ལུང་དགེ་འདུན་པ་རྣམས་ཀྱིས་སྙིང་ཐིག་ཡ་བཞིའི་དབང་ལུང་དགོས་གསུངས་འདུག་པས། ཁོང་རྣམས་ཀྱི་འདོད་དོན་ལྟར། སེམས་ཁྲིད་ངོ་འཕྲོད་པའི་བླ་སེར་བརྒྱ་དང་ཉེར་ལྔ་ལས་མི་མང་བར་བྱས་ནས། ཡ་བཞིའི་ཟབ་དབང་རྣམས་བསྐུར་བའི་དུས། སྐྱབས་རྗེ་ཡིད་བཞིན་ནོར་བུ་ཀུན་མཁྱེན་ཆོས་རྗེའི་རྣམ་པར་བྱོན་ནས། བདག་གི་སྒོ་གསུམ་སྨིན་གྲོལ་དུ་བཀོད་ནས་བྱིན་གྱིས་བརླབས་པར་མཛདཔས། དབང་གི་སྐབས་དོན་རྣམས་འབད་རྩོལ་མི་དགོས་པར་རང་གཏེར་ལྟར་བློ་རུ་ཆུད་པ་བྱུང་ཞིང་། ཁྱད་པར་གང་ཟག་དགོས་ལུང་གསུངས་པ་གཏེར་གཞུང་དུ་གསལ། དེ་ནས་འདུས་སྡེ་རྣམས་ལ་སྨིན་བྱེད་དབང་དང་། གྲོལ་བྱེད་ཁྲིད། སྐྱབས་རྗེ་ཡབ་སྲས་ཀྱི་གཏེར་བྱོན་མ་བསྒོམས་སངས་རྒྱས་ཀྱི་ཕྱི་སྦྱངས་དང་། རྫོགས་ཆེན་ཡང་ཏིག་གི་ཁྲིད་ལ་སོགས་པ་བཤད། མི་སྐྱ་ཕོ་མོ་སྟོང་ཕྲག་ཙམ་ལ། འགྲོ་འདུལ་ཐུགས་ཆེན་གྱི་སྒོ་ནས་དབང་ཁྲིད་ཀྱིས་འབྲེལ་བ་བཞག་པས། མ་ཎི་དུང་བདུན་ལྷག་ཙམ་གྱིས་གཙོས་དགེ་སྦྱོར་བསམ་གྱིས་མི་ཁྱབ་པ་བྱུང་། དེ་དག་གི་སྐབས་སུ་མཁའ་འགྲོའི་ལུང་བྱང་ལྟར། རྫོང་གནས་ དང་། ལྗང་ར་བྲག་དཀར་སོགས་ནས་ཟབ་གཏེར་ཆ་ཤས་གདན་དྲངས། རྫོང་གནས་ཀྱི་གཏེར་ཁ་ལེན་རྒྱུ་ཡུལ་མི་ཀུན་གྱིས་ཡིད་ཚོད་བྱས་ཏེ་ཐོས་སོང་བ་དང་། རང་གི་ཉེ་གནས་ཡི་གེའི་རིག་བྱེད་ཚུལ་ཁྲིམས་རྡོ་རྗེ་དང་། གླིང་ཚོགས་རྒྱམ་སོགས་གྲྭ་པ་ཆ་ཤས་ཡོད་པས། གསང་གཏེར་དངོས་ཀྱི་ཚུལ་མ་འོང་ཀྱང་། ཁོང་སྐལ་ལྡན་རྣམས་མ་གཏོགས་ཀུན་ལ་གསང་རྒྱ་བྱས། དེ་སྐབས་སྔར་གཏེར་སྟོན་གསང་སྔགས་གླིང་པའི་གདན་སའི་ཉེ་ཕྱོགས་ནགཏེར་ཁ་རེ་སྤྱན་དྲངས་རྒྱུ་ཡོད་པས། དེ་ཀར་ངེད་དཔོན་གཡོག་སོང་བས། རྒན་མོ་ཞིག་གིས་དབུས་མོ་ཁྱོད་ན་ནིང་འདས་སོང་ཟེར་བཐོས་པས། ཁྱོད་ཤི་མ་སོང་བ་ཨེ་ཡིན་ཟེར། གྲྭཔ་ཐམས་ཅད་ཀྱིས་ངོ་ནག་ངམ་ངམ་བྱེད། བདག་གིས་མོ་རང་ལ་ང་མ་ཤི་ནས་འདི་ཀར་ཐོན་ཡོད་སྨྲས་ཀྱང་། མོ་རང་ཡིད་མ་ཆེས་ནས་ཡང་ཡང་དེ་ལྟར་ཟེར་འདུག་པས། བདག་གི་བསམ་པ་ལ་ད་ལན་རང་གཏེར་བཏང་སྙོམས་ལ་འགྲོ་ངེས་ཡིནཀྱང་། ཨ་སྐྱེས་གསང་སྔགས་གླིང་པའི་གཏེར་མཇུག་བདག་གིས་བྱ་བ་བྱེད་པའི་ལུང་བསྟན་ཡོད་པས། དེ་ཀ་སྟབས་ལྡན་ཨེ་འོང་སྙམ་ནས། སྟ་གོན་བྱས་ཚེ་རྟེན་འབྲེལ་བཏང་སྙོམས་ལ་སོང་བས། གཏེར་སྲུང་རྣམས་ཀྱིས་འཁུ་ལྡོག་བྱས་ནས། ངེད་ཅག་ བྃ༔ ལ་མི་འདོད་པ་རེ་གློ་བུར་དུ་བྱུང་བས། བདག་གིས་ཡུལ་ལྷ་སྐྱོངས་རེག་གཉན་རྩེ་ལ་ཕྲིན་བཅོལ་བས། བྲག་བཙན་ཁོ་རང་དམ་ལ་གནས་པ་བྱུང་ངོ་། །དེ་ནས་འདུས་སྡེ་མཆོག་དམན་ཀུན་ལ་གང་འདོད་ཀྱི་བསླབ་བྱ་དང་། གདམས་ཁྲིད་ཀྱི་མན་ངག་རྣམས་ཞིབ་རྒྱས་སུ་བཤད་ནས་དད་མོས་ཀྱི་གསོས་སུ་གྱུར། ཁོང་རྣམས་ནས་རང་རང་གི་ཅི་འབྱོར་གྱི་དངོས་རྫས་བདག་ལ་བྱིན་ནས་སྐྱེལ་མ་སོགས་ཀྱི་མཐུན་རྐྱེན་བསྒྲུབ་ཅིང་། བུ་མ་དང་བྲལ་བ་ལྟ་བུའི་སྨྲེ་ངག་འདོན་ཞིང་ལུགས་གཉིས་ཀྱི་བྱ་བ་ཅི་དགོས་ཀྱང་། བླ་སེར་དཔོན་སྡེ་ཀུན་གྱིས་ཁ་འཆམས་ནས། ང་རང་གནས་སྐབས་ལོ་ཤས་ཙམ་ལ་གནས་འདི་ཀར་འོང་དགོས་ཡང་ཡང་ཟེར་བས། བདག་གིས་ཁོང་རྣམས་ཡིད་མི་བཅད་ཙམ་དུ་བསོད་སྤྲུལ་རིན་པོ་ཆེ་ནས་བཀའ་གནང་ཐོབ་ཚེ། ཡུན་རིང་ཐུང་ཆ་མི་ཆོད་ཀྱང་ལན་གཅིག་ཕྱིར་འོང་སྨྲས་པས། ཁོང་རྣམས་དགའ་མགུ་ཡི་རང་ནས་དམ་ཚིག་གི་གསོས་སུ་འགྱུར་རོ། །དེ་ནས་ཚུལ་ཁྲིམས་རྡོ་རྗེ་ངེད་གཉིས་དང་། གཞན་ཡང་ཚོགས་རྒྱམ་ལ་སོགས་པའི་སྐྱེལ་མ་རྣམས་ཀྱིས་སེར་དགོན་བར་དུ་གྲོགས་ལྡན་བྱས་ནས། ལོ་ཁྱིམ་དེ་ཀའི་ཟླ་བ་བཅུ་གཅིག་པའི་ཡར་ཚེས་བདུན་གྱི་ཉིན་སེར་དགོན་རང་གནས་སུ་ཐོན། དེའི་ སྐབས་སྔར་ང་རང་འཛི་རོང་འགྲོ་དུས། བསོད་སྤྲུལ་སང་ལ་བདག་ཟླ་བ་བཅུ་གཅིག་པའི་ཚེས་བདུན་ཕན་ཆད་མི་འགྱང་བར་ཐོན་འོང་ཞུས་ཡོད་པས། བླ་མའི་བཀའ་དང་འགལ་བ་འགྲོ་སྙམ་ནས། ཚེས་བདུན་གྱི་ནུབ་ཚུལ་ལོ་ངེད་གཉིས་སྔོན་དུ་འོང་ནས་སེར་དགོན་གྱི་ཉེ་ཆར་ཐོན་སྐབས། བདག་གི་སྣང་བ་ལ་ཡིད་བཞིན་ནོར་བུ་དེ་བཞུགས་ཡོད་ནཅི་མ་རུང་སྙམ་ནས་ཡིད་རྟིང་སྡུག་གིས་གང་ནས་རྨོངས་གླུ་འདི་ལྟར་བླང་ངོ་། །ཀྱེ་མ་ཀྱི་ཧུད་འདུས་བྱས་ཆོས། །མི་རྟག་སྒྱུ་མའི་གྲོང་ཁྱེར་འདི། །ཞིག་ཤུལ་འདི་ལ་ཡི་རེ་མུག །སྔར་ཞིག་འཛོམས་པའི་བུ་སློབ་འབངས། །ད་ལྟ་མི་སྣང་སོ་སོར་བྲལ། །སྔར་དུས་རིགས་བཟང་སྐལ་ལྡན་ང་། །ད་ལྟ་ཀུན་གྱིས་སྤང་བྱར་མཐོང་། །སྔར་གྱི་བཀོད་པ་འདོད་ཡོན་རྣམས། །ད་ལྟ་དྲན་དུས་སྡུག་བསྔལ་བསྐུལ། །སྔོན་ཆད་འགྲོགས་པའི་གྲོགས་བཟང་དེ། །ད་ལྟ་དཔལ་རིའི་ཞིང་དུ་ཕེབས། །ཞལ་གྱི་དཀྱིལ་འཁོར་དྲན་ཙམ་གྱིས། །མིག་ནས་མཆི་མའི་ཆར་རྒྱུན་འབེབས། །ཐུགས་ཀྱི་དགོངས་པ་གཏད་དྲན་དུས། །སེམས་ལ་སྡུག་བསྔལ་མུན་ནག་འཐིབ། །གསུང་གི་བྱམས་བརྩེ་བསྐྱངས་དྲན་དུས། །ཡིད་ལ་གདུང་བའི་མེ་དཔུང་འབར། །ཡིད་གཅུགས་འདུ་འབྲལ་ བྃ༔ མེད་པ་ཡིས། །བསྐྱངས་པའི་སྐུ་དྲིན་དྲན་ཙམ་ན། །གཅེས་པའི་ལུས་ལ་ང་མི་ཆགས། །འཕང་བའི་སྲོག་དང་འབྲལ་ན་དགའ། །རིག་པ་འོད་ཀྱི་གོང་བུ་འདི། །རྩ་མཆོག་དྷཱུ་ཏིའི་ལམ་བརྒྱུད་ནས། །དཔལ་རིར་ལས་འབྲེལ་རྩལ་གྱི་དྲུང་། །མི་འགྱང་མྱུར་བགྲོད་བྱེད་པར་སྨོན། །ཞེས་སྨྲས་ཚེ། གློ་བུར་དུ་མི་བདེ་བ་ལྟ་བུར་བྱུང་ཡང་བཏང་སྙོམས་སུ་བཞག །དེ་ནས་བསོད་སྤྲུལ་སང་གི་མདུན་འདུག་ཀུན་བཟང་བསྟན་འཛིན་གྱིས་ངེད་ཅག་ལ་མགྲོན་ཐབས་བྱས་པ་སོགས་ཀྱི་མཐུན་རྐྱེན་བསྒྲུབས་ནས། རང་གི་གནས་མལ་ལ་བདེ་བར་འཁོད་དོ། །དེ་ནས་སྐྱེལ་མ་རྣམས་ཕྱིར་སོང་ནས། རང་གཅིག་པུར་ཐུན་མཚམས་ཞིག་ལ་བསྡད་ཡོད་པས། སྔར་གྱི་མི་བདེ་བ་ལྟ་བུའི་ནད་གཞི་དེ་ཀ་འཁྲུགས་ནས་འཆི་ལ་ཉེ་བ་འབྱུང་སྐབས། ཐུགས་སྲས་དང་། ཤཱི་ལ་བཛྲ་སོགས་ཀྱིས་རང་དབང་མ་གཏད་ནས་རོ་ཤོར་བྱས། དེའི་སྐབས་འབྱུང་འགྱུར་གྱི་ལུང་བསྟན་དུ་མ་ཡོད་ཀྱང་། ཤཱི་ལ་བཛྲ་ནན་ཆགས་ཆེ་བའི་རྟེན་འབྲེལ་གྱིས་གཏེར་གཞུང་དུ་གསལ། དེ་ནས་རང་ལོ་སོ་ལྔའི་ལོའི་ཟླ་བ་གསུམ་པའི་ཡར་ཚེས་ལ། བསོད་སྤྲུལ་རིན་པོ་ཆེའི་བཀའ་བསྐུལ་ཕེབས་པ་དང་། སེ་རའི་སྒྲུབ་གྲྭ་བ་རྣམས་དང་། ཁྱད་པར་ཝ་ ཤུལ་ཕན་བདེ་ལ་སོགས་པས་ཡང་ཡང་བཀའ་གནད་ཟབ་བསྐུལ་བྱས་ཚེ། སྒྲུབ་གྲྭ་བ་དང་དགོན་སེར་ཆེ་གྲྭ་རྣམས་ལ་མ་བསྒོམས་སངས་རྒྱས་ཀྱི་ཁྲིད་བཤད་ཞིབ་པར་བྱས་ཏེ་མཐར་ཕྱིན་ནས། རྗེའི་དགོངས་རྫོགས་བླ་མ་མཆོད་པ་སོགས་སྔར་ལྟར་བྱེད་སྐབས། ཚོགས་ལེན་ཌཱཀྐི་ཞིག་གིས་འདི་སྐད་ཟེར། དབྱིངས་མི་འགྱུར་འོད་ལྔའི་མཁའ་ཀློང་ནས། །གདངས་མ་འགགས་ཌཱཀྐིའི་གར་དུ་བསྒྱུར། །རྩལ་ཡེ་ཤེས་རོལ་པའི་བརྡ་གླུ་ལེན། །ཤར་གངས་སེང་གཡུ་རལ་འོད་པོ་ཆེ། །ལྷོ་རྨ་བྱའི་ཆོས་བཅུད་གསོས་སུ་སྨན། །ནུབ་རུས་སྦལ་ཕོ་བྲང་རི་མོ་དེ། །བྱང་མུན་པས་བསུ་ལ་ཅི་ཆ་ཡོད། །ཁ་རླངས་ཀྱིས་ཡུལ་གསུམ་འཚེ་ཡང་སྲིད། །མགོན་བི་མའི་སྤྲུལ་པས་མ་སྐྱོབ་ན། །མདོག་སྔོན་གྱི་སྤྲུལ་གྲུས་འཛིན་པར་བྱེད། །སྨད་ཚ་བའི་ཕྱོགས་ནས་ལྟ་ལོག་སྡེ། །དབྱིངས་གསེར་གྱི་ཉི་མར་འགྲན་པ་འབྱུང་། །བདུད་ཀླུ་གོང་སྤྲུལ་པ་ཤེས་