Tibetan
ཁྲིད་ཀྱི་སྐོར་དང་། ཁྱད་པར་འོད་གསལ་ཐིག་ལེའི་ཁྲིད་གསུངས། རང་ནས་ཀྱང་མཁའ་འགྲོའི་གསང་མཛོད་ཀྱི་སྐོར་ཕག་མོའི་ཆོས་སྐོར་ཁ་ཚགས་ཀྱི་རྒྱུན་ཕུལ་བ་སོགས་བྱས། གྲོགས་ཨཀྵར་བཛྲས་མཐུན་རྐྱེན་བྱས་ནས། ཐུགས་ཏིག་གི་ཟབ་སྐོར་མཁའ་འགྲོ་དགོངས་པ་འདུས་པའི་ཟབ་གཏེར། དུང་ར་བྲག་དཀར་ནས་སྤྱན་དྲངས། རྟེན་འབྲེལ་དགོས་ཆེད་ཀྱི་ཕྱིར་དུ། རིག་འཛིན་འགྲོ་འདུལ་དཔའ་བོ་རྡོ་རྗེ་དང་། སྐུ་སྲས་འགྱུར་མེད་རྡོ་རྗེ་རྣམས་ཀྱིས་བཟང་གོས་པདྨ་ཅོད་པན་དང་། གཞན་ཡང་རིན་ཆེན་སྣ་ཚོགས། ལྷ་རེག་ཉིན་མོ་བདེ་ལེགས་བཅས་གནང་འབྱོར་ཕེབས་ནས་བསྐུལ་བ་པོ་མཛད་ཅིང་། དགོངས་འདུས་སྒྲུབ་ཐབས་ཡང་ཟབ་སྙིང་པོ་གཏན་ལ་ཕབ་ནས། གཞན་རྟེན་འབྲེལ་རྗེས་མཐུད་དུ་བཞག་གོ །དེ་ནས་ཕན་ཚུན་ཐམས་ཅད་ཀྱི་ལུགས་གཉིས་ཀྱི་གསུང་ཞིབ་དུ་མ་མཛད་ནས་བློ་ལྷག་མེད་པར་བྱས། ཁྱད་པར་བླ་མ་རིན་པོ་ཆེའི་ཐུགས་བརྩེ་བ་ཆེན་པོས་རྗེས་སུ་བཟུང་སྟེ། ལུགས་གཉིས་ཀྱི་བསླབ་བྱ་དང་། བྱིན་རླབས་མཛད་ནས་རྟེན་འབྲེལ་གྱི་ཉེས་པ་སེལ་བས། རང་གི་ནད་ཐམས་ཅད་ལས་གྲོལ་བར་མཛད་པ་དང་། ཁྱད་པར་དུ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ཚུལ་དུ་དངོས་རྫས་དུ་མ་གནང་ཞིང་། འདི་ཕྱི་བར་དོ་གསུམ་ལ་འབྲལ་བ་མེད་པའི་ཐུགས་བསྐྱེད་སྨོན་ལམ་མཛད་ཚེ། རང་ནས་ཀྱང་སྔར་མི་མིན་ལྷ་ཡིས་བྱིན་པའི་སྒྲོལ་དཀར་ཡིད་བཞིན་འཁོར་ལོའི་སྐུ་ལི་དཀར་དམར་གསེར་གསུམ་གྱིས་གྲུབ་པ་དང་། བཀྲ་ཤིས་ལྷ་རེག་བཅས་སྐུ་ཚེ་ཞབས་པད་བརྟན་ཕྱིར་དུ་བླ་མ་ལ་ཕུལ་བས་རྟེན་འབྲེལ་གྱིས་གསོས་སུ་གྱུར་ཏོ། །དེ་ནས་ཡུམ་སྲས་འཁོར་དང་བཅས་པས་ཐུགས་བརྩེ་བ་ཆེན་པོས་སྐྱེལ་ཐུང་མཛད། སྲས་མོ་ཀུན་བཟང་འཆི་མེད་དང་། ཨ་དཔལ་གཉིས་ཀྱིས་རྒྱང་རིང་པོའི་སར་སྐྱེལ་མ་མཛད་པ་དང་། ཁྱད་པར་ད་ཕན་ཆད་གནས་འདི་ཀར་ཁྱོད་འོང་ཐབས་མ་འཆུག་གསུངས་ནས། ཐུགས་མཐུན་གཞུང་བཟང་གི་བསླབ་བྱ་མཛད། རང་ནས་ཀྱང་ཁོང་གཉིས་ཀྱི་ཐུགས་འདུན་ བྃ༔ ལྟར། རང་དབང་རེ་མཆིས་ན་སྟབས་ཅི་ལྡན་བྱེད་པ་མ་གཏོགས་ཆ་ཆོད་ཅི་ཡང་མེད་ཞུས། ཁོང་གཉིས་ནས་དེ་ལྟར་མ་འཆུག་གསུངས་ཏེ་རང་གནས་ལ་བཞུད་དོ། །དེ་ནས་ངེད་རྣམས་རིམ་གྱིས་འོང་ནས་སེར་དགོན་ལ་ཐོན། བསོད་སྤྲུལ་སང་དང་མཇལ་འཕྲད་ཞུས་ཚེ། ཁོང་ཐུགས་ཤིན་ཏུ་དགྱེས་ཏེ་ཆུ་ཆེ་བས་ཞག་ཆ་ཤས་འདི་ཀར་འདུག་དགོས་གསུངས། བདག་གིས་ང་རང་སྔར་ཨ་འཛོམས་སྒར་ལ་འགྲོ་དུས། ཡིད་བཞིན་ནོར་བུས་ལམ་དང་བཅས་པ་ཟླ་བ་གཉིས་ལས་མ་འགྱངས་གསུངས་ཀྱང་། ཁྲོམ་ཆུ་ཤིན་ཏུ་ཆེ་བས་ཉི་མ་བདུན་ལ། བླ་མ་རིན་པོ་ཆེས་འགྲོ་མི་ཉན་གསུངས་ཏེ། བཀའ་གནང་ཟབ་མོ་ཕེབས་པས་ལྷག་སོང་། དེ་ལ་རང་དོན་ཡིད་བྱེད་ཀྱི་བློ་ངན་མེད་པ་ཡིན་པས་འགལ་བ་ཨེ་ཆུང་སྙམ།སང་ཉིན་ཕན་ཆད་འགོར་སོང་ན་ཟླ་བ་གཉིས་དང་ཉི་མ་བདུན་སོང་ཚར་བ་ཡིན་པས། ད་ལན་ང་རང་མི་འདུག་ཕྱིས་ནས་འུ་ཅག་མཇལ་འོང་ཞུས་ཚེ། ཁོང་ནས་དེ་ལྟར་ཐུགས་ལ་བབས་ནས་མགྲོན་ཁ་ཞབས་ཏོག་སོགས་ཀྱིས་སྐྱེལ་མ་མཛད། ཁྱད་པར་ཁོང་གི་མདུན་འདུག་དགེ་བཙུན་ཀུན་བཟང་བསྟན་འཛིན་གྱིས་ཆུའི་རབ་ཁ་བར་དུ་སྐྱེལ་མ་མཛད། དེ་སྐབས་བྱུང་དང་འབྱུང་འགྱུར་གྱི་གཏམ་མང་པོ་ཡོད་ཀྱང་ཡི་གེར་ འཇིགས་ནས་མ་བྲིས་སོ། །དེ་ནས་སང་ཉིན་དགུང་མོའི་དུས་སུ་ནེེ་གྲོ་རང་གནས་ལ་ཐོན། བླ་མ་ཚུལ་བཟང་སོགས་རྡོ་རྗེའི་མཆེད་པོ་རྣམས་ཀྱིས་བསུ་བ་མཛད་སྐབས། ང་རང་གི་རྐང་པ་སྔར་ལྟར་མ་ཡིན་པར་རང་མགོ་ཐོན་པ་བྱུང་བས། ཁོང་རྣམས་དགའ་སྤྲོ་ཆེན་པོའི་ངོ་མཚར་ཞིང་དད་པའི་གསོས་སུ་གྱུར། རྗེ་དེ་ཉིད་ང་རང་གི་དོན་དུ་སྐུ་མཚམས་ཞིག་ལ་བཞུགས་འདུག་པས། བདག་གིས་བླ་མ་ཚུལ་བཟང་ལ་ང་ད་དུང་སྐུ་མདུན་ལ་མི་འགྲོ། ཐུན་གྲོལ་རྗེས་སོང་ན་ཆོག་གི་སྨྲས་ནས་ལྷ་གུར་ནང་དུ་བསྡད་ཡོད་པས། རྗེའི་མདུན་གཡོག་དགེ་བཙུན་རྡོ་རྗེ་བསྲུང་ཡིན་འདུག་པས། དེ་ཀ་ཐོན་བྱུང་ནས་ཁྱོད་ད་ནས་སྐུ་མདུན་ལ་བྱོན་གསུངས་འདུག་ཟེར། བདག་གིས་ཀྱང་བཀྲ་ཤིས་པའི་དངོས་རྫས་སྣ་ཚོགས་མཇལ་རྟེན་བཟུང་ནས་སོང་བས། རྗེའི་ཞལ་ནས་གཅེས་ཕྲུག་སྙིང་གི་ནོར་བུ་ཁྱོད་ཀྱིས་ཕྱག་ཕུལ་མི་དགོས། མྱུར་དུ་བོར་ཡར་ཁྱིམ་དུ་བྱོན་གསུངས། བདག་གིས་མཇལ་རྟེནཕུལ་ནས་ཁམས་བཟང་ཞུས་ཚེ། རྗེས་ཀྱང་ཐུགས་བརྩེ་བ་ཆེན་པོས་ང་རང་ལ་མཁོ་བའི་ཡོ་བྱད་ཕྱག་རྙེད་རིན་ཐང་ཆེ་བ་སྣ་ཚོགས་གནང་། དེ་ནས་རང་གིས་བླ་མ་རིན་པོ་ཆེ་དང་མཇལ་ཚུལ་རྟེན་འབྲེལ་གནད་དང་ལྡན་ནས་ཟབ་གཏེར་སྤྱན་དྲངས་ཚུལ་ལ་སོགས་པ་ བྃ༔ ཐམས་ཅད་ཞིབ་རྒྱས་སུ་ཞུས་ཚེ། རྗེ་དེ་ཉིད་ནས་ཐུགས་ཤིན་ཏུ་དགྱེས་པར་མཛད་ནས། ད་དུང་རྟེན་འབྲེལ་འཕྲོ་ཅན་དུ་ཡོད་པ་རྣམས་གཏན་ལ་འབེབས་ཐབས་དགོས་གསུངས་ནས་བསྐུལ་བ་པོ་མཛད་དོ། །དེ་ནས་ལོ་ཁྱིམ་དེ་ཀའི་ཟླ་བ་བདུན་པའི་ནང་དུ། རྗེའི་ཐུགས་དགོངས་ལྟར་གཙུག་ལག་ཁང་གི་རྨང་བཏིང་། དེ་སྐབས་བསོད་སྤྲུལ་སང་དཔོན་གཡོག འབྲོང་སྐོར་ལ་བྱོན་པའི་ཞོར་ལ་དེ་ཀར་ཕེབས། དེའི་སྐབསང་རང་ལ་ལེགས་ཉེས་ཀྱི་འཁྲུལ་སྣང་ལུང་བསྟན་ཆ་ཤས་ཡོད་པ་རྗེའི་ཕྱག་ཏུ་ཕུལ་བས། ཐེ་ཚོམ་ཟ་ས་དུ་མ་ཡོད་ཀྱང་། གཅིག་ཐོག་ཏུ་ཐག་མ་ཆོད་ནས་བཏང་སྙོམས་ལ་ལུས། དེ་སྐབས་རྗེའི་དངོས་སློབ་བདེ་གསལ་རྒྱ་མཚོ་དང་། དྲི་མེད་རྣམ་དག་སོགས་ལ་ཆོས་དབྱིངས་རིན་པོ་ཆེའི་མཛོད་འགྲེལ་གསུངས་དུས། ང་རང་གིས་ཉམས་འུར་ནས་རྗེ་དེ་ཉིད་ཀློང་ཆེན་པའི་དུསང་རང་གསང་བའི་སྒྲུབ་སྡེ་མོ་ཡིན་པ་དང་། ལས་འབྲེལ་པའི་དུས་བྱ་རྒོད་ལ་སྤྲུལ་ནས། དངོས་སུ་གསང་བའི་བདེ་བསྐྱོད་བྱས་པ་སོགས་དང་། རྟོགས་པ་མངོན་གྱུར་གྱི་མགུར་ལ་སོགས་ཡིག་རིས་སུ་བྲིས་ནས་རྗེ་ལ་ཕུལ་ཏེ། བདག་ནི་སྨྱོན་པ་ལྟ་བུར་ཅི་ཡང་མི་ཤེས་པར་སོང་འདུག་པས་ཐབས་གང་དྲག་ཞུས་ཚེ། རྗེའི་ཞལ་ནས་ དགོངས་བརྒྱུད་བླ་མའི་བྱིན་རླབས་སེམས་ལ་ཐོབ་པ་ཡིན་པས། ཐབས་གཞན་གྱིས་བྱེད་རྒྱུ་མེད། རིག་སྟོང་བསམ་ངོ་དང་བྲལ་བའི་ངང་ལ་ཞོག་གསུངས། དེ་སྐབས་བླ་བྲང་ནས་ཚིག་ངན་མང་པོས་རང་གཞན་གྱི་སེམས་འཁྲུགས་གཞི་བཤད་པའི་རྐྱེན་གྱིས། བདུད་འཇོམས་པས་རྗེ་ལ་ལུང་བསྟན་ནས། ཡབ་ཡུམ་གཉིས་ཕྱོགས་གཞན་ཞིག་ཏུ་བྱོན་སྟབས་ལྡན་ན་བར་ཆད་ཀྱིས་མི་ཚུགས་གསུངས་ཀྱང་། རྗེ་སྐུ་མཆེད་གཉིས་ཐུགས་ནང་མཐུན་པས་བྱོན་ཀར་མ་ཐོན་ནས། ངེད་ཅག་འདུས་སྡེ་རྣམས་ལ་ཡབ་རྗེ་བླ་མའི་ཟབ་གཏེར་གྱི་རྩ་རླུང་གི་ཁྲིད་གསུངས། དེ་སྐབས་རང་ལ་རྩ་རླུང་གི་ནུས་པ་ཅུང་ཟད་ཐོན་པའི་ཚུལ་རྣམས་གཏེར་གཞུང་དུ་གསལ། དེ་ནས་རྗེས་བདག་ལ་ཟབ་གཏེར་གཉིས་ཀྱི་འཛིན་སྐྱོང་ཁྱོད་ཀྱིས་བྱེད་དགོས། ང་རང་ན་སོ་ལོན་པ་དང་། འཁོར་སློབ་འདུས་སྡེ་མང་བས། དེ་ཐམས་ཅད་ཀྱི་འདོད་དོན་བྱེད་དཀའ་འདུག་གསུངས། རང་ནས་ཀྱང་འཁོར་སློབ་སྐྱོང་ཐུབ་ཀྱི་ཡོན་ཏན་དང་ནུས་པ་མེད་ཀྱང་། ལྷག་བསམ་རྣམ་དག་གི་སྨོན་ལམ་དང་བཅས་བླ་མའི་བཀའ་དང་མ་འགལ་བ་ཙམ་དུ། ཟབ་གཏེར་གཉིས་ཀྱི་བསྟན་པ་ལ་འཛིན་སྐྱོང་ཅི་ནུས་བྱེད་པར་ཁས་བླང་བས། རྗེའི་ཐུགས་ཤིན་ཏུ་དགྱེས་པར་མཛད་དོ། །དེ་ནས་ལོ་ཁྱིམ་ བྃ༔ དེ་ཀའི་ཟླ་བ་བཅུ་གཅིག་པའི་ཡར་ཚེས་བརྒྱད་ཀྱི་ཉིན། ཡབ་རྗེ་བླ་མ་རིན་པོ་ཆེའི་མཆོད་ཆོག་ཚོགས་ཡོད་སྐབས། ཚོགས་གྲལ་དུ་འཇིག་རྟེན་མཁའ་འགྲོ་ཤིན་ཏུ་མང་བས། བདག་གིས་རྗེ་ལ་འདི་སྐད་ཞུས། ད་ལན་གྱི་ཚོགས་གྲལ་འདི་ལ་འཇིག་རྟེན་མཁའ་འགྲོ་མང་བར་འདུག་པས། དེ་ཀ་རྟེན་འབྲེལ་འབྲིང་ཙམ་རེད། ད་ལོ་འོ་སྐོལ་སང་ལ་ཆག་སྒོ་རེ་ཡོང་ཐང་གི་ཞུས་ཚེ། རྗེའི་ཞལ་ནས་ཆག་སྒོ་མེད་ཐབས་ལ་རིམ་གྲོ་ཅི་དགོས་གསུངས། ཡང་བདག་གིས་སྔར་གྱི་ལུང་བསྟན་རྣམ་གསུམ་དུ་གསལ་བ་ལྟར་བྱེད་དགོས་པར་འདུག་ཞུས་ཚེ། རྗེས་ཀྱང་དེ་ཀར་ཐུགས་ཐག་བཅད་ཡོད་སྐབས། གློ་བུར་དུ་ལེགས་ཉེས་ཕྲན་བུ་རེ་བྱུང་ཡང་ཡི་གེར་དོགས་ནས་མ་བྲིས་སོ། །དེ་ནས་རྗེའི་སྐུ་མདུན་ནས་བདག་གིས་ཟབ་གཏེར་གཉིས་ཀྱི་ཕྱག་བཞེས་དང་། རྟ་འདོན་ལ་སོགས་པ་ཐམས་ཅད་ཞིབ་རྒྱས་སུ་ནན་ཏན་ཆེན་པོས་སྦྱངས་བ་མཐར་སོན་པར་བྱས་སོ། །དེ་ནས་རང་ལོ་སོ་གསུམ་གྱི་དུས་གཡས་རུའི་ཆོས་སྒར་བ་རྣམས་གྲོས་བྱས་ང་རང་སར། རྡོར་བླ་བསྟན་འཛིན། ཨ་ལོ། འོད་ཆོས། འཇིགས་ཆོས་ལ་སོགས་པ་འོང་ནས། གཡས་རུའི་ཆོས་སྒར་ཐོག་ལ་ངེད་མ་བུའི་འདུག་གནས་བྱས་ཚེ། མགར་ར་སང་དང་ ནོག་མཁོན་མེད་ཐབས་ཡིན་ཟེར་བས། རྗེ་ནས་ཀྱང་ཕན་ཚུན་གྱི་དམ་ཚིག་ལ་དགོངས་ནས། རེ་ཞིག་དེ་ལྟར་བྱས་ན་ཆོག་གསུངས་སྐབས། མགར་ར་སང་གིས་ཁོང་ལ་དེ་ལྟར་བྱས་ན་མི་དགའ། བླ་མ་དཔལ་ཡུལ་སང་གི་ཆོས་སྒོ། ཨ་སྐྱོང་ཁང་རྒན་སང་གི་ཁྲིམས་སྒོ་གཉིས་ལ་བཞག་དགོས་ཟེར། དེ་ལྟར་བྱས་ནས་བཤད་གཏམ་གྱི་མཐར། ང་རང་ནས་ལུགས་གཉིས་གང་ཐད་ནས་ཉེས་པ་མ་ཡོད་ནས། རྡོ་ཚད་བཅུ་གཉིས་ཀྱི་སྐལ་བ་བྱིན་རྒྱུ་དང་། བུ་ཆུང་མགར་ར་སང་གི་མིན་ཀྱང་། གནས་སྐབས་ལ་ཡིན་པའི་དབང་དུ་བྱས་ཏེ། རྡོ་ཚད་བཅུའི་གཟུ་འཕང་། དེ་སྐབས་བདག་གིས་དེ་ལྟར་གྱིས་གཟུ་ལོག་མི་ཁུར་སྨྲས་ཀྱང་། རྗེ་ཁོང་རང་ནས་བདག་ལ་བཀའ་གནང་མ་ཐོབ་ནས་བྱ་ཐབས་བྲལ། བསོད་སྤྲུལ་སང་གི་གཙོས་བུ་སློབ་རྣམས་ཀྱིས་རང་རང་གི་འབྱོར་པར་བསྟུན་ནས། དེ་ལྟར་གྱི་དངོས་རྫས་རྟ་ནོར་སོགས་མཐུན་རྐྱེན་བྱེད་གསུངས་ནས་གྱོད་འགྲིགས་ཆག་བྱས། དེ་སྐབས་ལུང་བསྟན་ཐམས་ཅད་ཤིན་ཏུ་དཔྱོད་དཀའ་ཞིང་འཚུབས་ཆ་ཆེ་བ་དུ་མ་བྱུང་ཡང་། རང་ཕྱོགས་ལ་འཁོར་ཡོད་པས་བྱ་ཐབས་མ་རྙེད། དེ་དག་གི་སྐབས་ངེད་ཡབ་ཡུམ་ཚོགས་གྲལ་ལ་བྱོན་ཀྱང་། སྔར་ལྟར་མ་ཡིན་པར་རྗེ་ལ་ལོངས་སྐུའི་ཞིང་སྣང་མངོན་ཚེ། བྃ༔ ང་རང་ལ་སྤྲུལ་སྐུའི་ཞིང་སྣང་ཤར་བ་དང་། ཡང་རྗེས་ལ་སྤྲུལ་སྐུའི་ཞིང་སྣང་མངོན་ཚེ། རང་ལ་ལོངས་སྐུའི་ཞིང་སྣང་ཤར་བ་སོགས་ཐ་དད་མ་ངེས་པ་དུ་མ་བྱུང་ནས། གིང་ཕོ་གིང་མོས་གླུ་ལེན་རྣམས་གཏེར་གཞུང་དུ་གསལ། དེ་ནས་རྗེའི་ཐུགས་དགོངས་ལྟར་བླ་མ་རིན་པོ་ཆེའི་གསུང་ཆོས་རྣམས་སྤར་དུ་བཞེངས་དགོས་པས། དེའི་མཐུན་རྐྱེན་བསྒྲིགས་པ་སོགས་བྱེད་སྐབས། ཡང་གཏེར་སྟོན་བླ་བྲང་ནས་མི་འདོད་པའི་རྐྱེན་དུ་མའི་སྣ་འདྲེན་བྱེད་འདུག་པས། བདག་གིས་རྗེ་ལ་འདི་སྐད་ཞུས། ད་ནི་བྱ་བ་འདི་རྣམས་ལུང་བསྟན་དང་ཆ་མཚུངས་པས་ན། རེ་ཞིག་འུ་ཅག་གནས་གཞན་ཞིག་ཏུ་བྱོན་སྟབས་ལྡན་ན་བཟང་སྙམ་གི། །སྔར་ནི་ཁྱོད་སྐུ་མཆེད་ཐུགས་ནང་མཐུན་པའི་དབང་དུ་བྱས་ནས་ད་བར་དུ་ལུས། ད་ནི་མི་རུང་ལྕགས་ལ་འབུ་ཞུགས་ཁྱི་རོ་རུལ་པ་དོང་ཁར་ཕུད་ནས་མི་འདོད་པའི་སྣ་འདྲེན་དེ་ལྟར་བྱེད་པའི་དུས། ཁྱོད་ནས་ཐུགས་གཟབ་དགོས་ཞུས་ཚེ། རྗེ་དེ་ཉིད་ནས་བླ་བྲང་གི་སྔར་བཤད་ཐོག་ལ་མི་གནས་པའི་བྱ་སྤྱོད་མངོན་ཚེ། གནས་སྐབས་ཙམ་དུ་གདན་ས་ངེས་མེད་རེ་བྱེད་དགོས་གསུངས་ཏེ། རྗེའི་སྐུ་མཆེད་ཆེ་བ་རྡོ་གྲུབ་རིན་པོ་ཆེའི་སྐུ་མདུན་ལ་མཇལ་འཕྲད་བྱེད་དུ་གསང་ཐབས་སུ་བྱོན། དེའི་ སྐབས་བདག་གི་རྨི་ལམ་ལ་མཁའ་འགྲོ་བདེ་བའི་གོ་ཆ་ཡིན་སྐད་པས་འདི་སྐད་ཟེར། ཧེ་ཧེ། སྔོན་ནམ་སྙིང་དང་བཛྲ་སྨོན་ལམ་མཐུས། །ཁམས་བདུད་སྲིན་འདུལ་བའི་དཔལ་ཤར་བ། ། བདུད་བློ་འཕྲུལ་ཅན་གྱི་བརྫུ་བག་གིས། །རྒྱ་མཚོ་དང་ནོར་བུ་ཐ་དད་བྱེད། །རྐྱེན་ཐབས་ཤེས་སྲོག་གི་མར་མེ་འདི། །དྲི་གཞོན་གྱི་རྐྱེན་དང་མ་འཕྲད་དགོས། །ཁྱོའི་ཡན་ལག་རིགས་ཀྱི་སེམས་དཔའ་དེ། །སྦྲུལ་ལྕེ་གཉིས་ཁ་ནས་མ་ཐར་ན། །གནས་མི་མངོན་དབྱིངས་སུ་བྱི་གདོང་གི། །ཁོས་སྐྱེལ་མ་བྱེད་ལ་ཅི་ཆ་ཡོད། །ད་ལ་འུར་ལ་འུར་རང་གི་དོན། །ཆོས་བརྒྱད་ཀྱི་ཁྲོད་དུ་མ་གཡེང་དགོས། །སྨན་ཏཱ་རེའི་མིང་གི་ཆོ་འཕྲུལ་གྱིས། །ལྷོའི་ཆོས་བཅུད་གསེར་གྱི་རྒྱལ་མཚན་འདི། །ཁོང་ནམ་མཁའི་པདྨོའི་དཔེ་ལ་འགྲན། །གནས་འདི་ནི་དྲི་ཟའི་གྲོང་དང་མཚུངས། །རླུང་སེམས་ཀྱི་ཆོ་འཕྲུལ་མ་ཞན་པར། །ཡུལ་ལྔ་རུ་གདུལ་བྱེད་སྤྲུལ་པ་ནི། །ལྕམ་གཉིས་དང་སེམས་དཔའ་གསུམ་དུ་འབྱུང་། །དུས་དེ་རུ་ཁྱོད་ཀྱང་མ་འགྱང་བར། གནས་མཁའ་འགྲོའི་གླིང་གི་ཚོགས་དཔོན་རུ། །ངེད་ཌཱཀྐིས་དར་ལམ་འདྲེན་ནས་བསྒྲོད། །དུས་ལྔ་རུ་རྐང་གཉིས་གདུལ་བྱ་རྣམས། །ཕྲིན་ལས་ཀྱི་དཔལ་གྱིས་འདུལ་བ་འབྱུང་། བྃ༔ དབྱིངས་མིག་འཕྲུལ་འཛིན་པའི་བུ་མོ་འདི། །སྙིང་གཅེས་པའི་ནོར་དང་མ་ནོར་དགོས། །ཁོང་རྟ་བདུན་མི་བཞུགས་ནུབ་རིར་གཤེགས། །ཁྱོད་ཀུནྡའི་བརྗིད་མདངས་ཉམས་པའི་བསྒྲིབ། །བློ་རིག་པས་དཔྱོད་ཤེས་གཟབ་གལ་ཚེ། །བརྡ་གོའམ་བདེ་བའི་འབྱུང་གནས་མ། །ཞེས་ཟེར་ནས་མི་སྣང་བར་གྱུར་མ་ཐག །ཡང་བྱ་རྒོད་ཞིག་ཐོན་བྱུང་བས། བདག་གིས་ཁྱོད་འདི་ཀར་ཅི་བྱེད་དུ་འོང་བ་ཡིན་དྲིས་པས། ཁོ་ན་རེ། ཁྱེད་ཀྱི་གདུལ་ཞིང་ཡུལ་ལྔའི་ཕ་མ་བཙལ་དུ་འུ་ཅག་གཉིས་འགྲོ་ཟེར། བདག་གིས་ཡང་དེ་ལྟར་དུས་ལ་བབ་པ་འདྲ་སྙམ་ནས། བྱ་རྒོད་ལ་ཞོན་ནས་གདུལ་ཞིང་གི་ཡུལ་ལྔ་བལྟ་རུ་སོང་བས། ངན་འབྲེལ་ནུས་པའི་སྐྱེ་སྲིད་ཙམ་མ་གཏོགས། དོན་གཉིས་མཐར་ཕྱིན་ཞིག་གི་སྐྱེ་སྲིད་འཛིན་པའི་ཕ་མ་མ་རྙེད་ནས། ལ་ལ་ནི་ཕ་བྱང་སེམས་ལྡན་ཡང་མ་རིགས་ངན་ཁོང་ཁྲོ་ཆེ་བ་དང་། ལ་ལ་མ་མཁའ་འགྲོའི་རིགས་ཅན་ལྟ་བུ་ལ། ཕ་སྡིག་ལྡན་ནགས་ཕྱོགས་པ་དང་། ལ་ལ་གཉིས་ཀ་ཆོས་འགལ་གྱི་བྱ་བ་བྱེད་པ། ལ་ལ་བསོད་ནམས་ལོངས་སྤྱོད་ལྡན་ཡང་འཇིག་རྟེན་ཆོས་བརྒྱད་ཀྱི་འདམ་དུ་ཚུད་པ་ལ་སོགས་པ་དང་། ལ་ལ་ཕ་མ་གཉིས་ཀ་འབྱོར་ལྡན་རིགས་བཟང་ཡིན་ཀྱང་། ཆོས་མཐུན་གྱི་མཛད་ པ་མེད་ཅིང་འཁོར་བའི་ཁ་འཛིན་ལ་གཡེང་བ་སོགས་ཀྱིས་བསླུས་ནས་འདུག་པ་སོགས་མཐོང་ཚེ། བདག་གིས་གྲོགས་པོ་ལ་འདི་སྐད་སྨྲས། ད་ལན་གྱི་སྐབས་བདག་གི་སྐྱེ་སྲིད་བཟུང་བའི གནས་ཕ་མ་བསམ་བཞིན་མ་རྙེད་པ་ཅིས་ལན། ང་རང་ཆུང་ལོ་བརྒྱད་ནས་རྗེ་བཙུན་སྒྲོལ་མས་ཞལ་གཟིགས་ནས་རྗེས་སུ་བཟུང་དུས། བདག་གིས་བྱང་ཆུབ་མཆོག་ཏུ་སེམས་བསྐྱེད་ནས་གཞན་ཕན་ཁོ་ན་བསམ་པ་མ་གཏོགས། རང་འདོད་ཀྱི་བློ་ངན་ཐམས་ཅད་དྲན་འཛིན་གྱི་ཞགས་པས་བཅིངས་ཏེ། ཡུལ་མེད་མཉམ་ཉིད་ཀྱི་རྫོང་དུ་བསྐྲད། ཐ་ན་སེམས་ཅན་ལ་གནོད་པའི་ལས་གཞི་བསམ་སྦྱོར་བ་གསུམ་དང་ལྡན་པའི་སྒོ་ནས་རྨི་ལམ་ཙམ་ཡང་བྱེད་པར་མི་སྣང་ཡང་། རང་གི་ལུས་འདི་བག་ཆགས་ཆེ་བའི་རྐྱེན་གྱིས་ཕ་མ་བཟང་པོ་ཞིག་དང་མི་འཕྲད་པ་ཡིན་ནམ་དྲིས་པས། གྲོགས་ན་རེ། དེ་ལྟར་མ་ཡིན་ནོ། །དེང་དུས་སྙིགས་མའི་གནས་ཡུལ་འདིར་འགྲོ་རྣམས་ཉོན་མོངས་རགས་ཅིང་མི་དགེ་སྤྱོད་པ་ལ་དགའ་བ། ཆོས་བརྒྱད་དུག་ཆུས་མྱོས་ནས་གཏན་བདེའི་བྱ་བ་མི་སྒྲུབ། སྤྱོད་པ་མི་ཆོས་སུ་ཤོར་ནས་བསླབ་གསུམ་སྣ་གཅིག་མི་བསྲུང་། རང་འདོད་ཕུག་ཏུ་འཛིན་ཅིང་། གཞན་གནོད་ཞོར་ལ་བྱེད་པ་སོགས། དུས་སྙིགས་མའི་རང་རྟགས་རང་ བྃ༔ གིས་ངོམས་པ་ཡིན་པས། ཁྱེད་ཀྱི་སྐྱེ་སྲིད་འཛིན་པའི་ཕ་མ་ཡང་གནས་དུས་ཀྱིས་བསྒྱུར་བ་ཡིན་ཟེར་བ་དང་མཉམ་དུ་གློ་བུར་དུ་གཉིད་ལས་སད་དོ། །དེ་ནས་རྗེ་དཔོན་གཡོག་ཡར་གདན་སར་ཕེབས་ནས། ཐབས་ཤེས་ལྷན་དུ་འཚོགས་ཡོད་སྐབས། བདག་གིས་རྗེ་ལ་འདི་སྐད་ཞུས། ང་རང་ལ་མ་འདས་སྤྲུལ་སྐུ་ལྔ་ཡོད་པའི་ལུང་བསྟན་བྱུང་ཡང་། སྤྲུལ་སྐུ་གསུམ་ཙམ་མ་གཏོགས་སྐྱེ་སྲིད་འཛིན་པའི་ཕ་མ་ལེགས་པོ་མ་འབྱོར་བས། འུ་ཅག་ཡབ་ཡུམ་གཉིས་གང་ལྟར་བྱས་ཀྱང་། ད་ལོ་ཅི་འབྱུང་ཆ་ཆོད་དཀའ་བར་འདུག་ན། ང་རང་ཁྱོད་ཀྱི་སྔོན་ཆད་སོང་ཚེ་འགྱོད་པ་མེད། དེའི་ཕྱིར་ན་ཁྱོད་སྐུ་ཚེ་ཞབས་པད་བརྟན་འདུག་ན། ང་རང་ཁྱོད་ཀྱི་རིགས་སུ་སྐྱེ་སྲིད་བཟུང་ནས། ཁྱེད་ཡབ་སྲས་ཀྱི་བསྟན་ཞབས་འདི་ཀར་འདུན་པ་གཏད་ནས། བསྟན་པ་འཛིན་སྐྱོང་བྱེད་ནུས་རེ་ཨེ་འོང་སྙམ་གི་ཞུས་ཚེ། རྗེའི་ཞལ་ནས། གཅེས་ཕྲུག་ཁྱོད་ཀྱིས་ང་རང་ཐུགས་ནས་དོར་ཏེ། ཕྲིན་ལས་སྤྲུལ་པའི་སྐུ་ཐུགས་བསྐྱེད་མཛད་པའི་དོན་ཅི་ལགས། ངེད་ཡབ་སྲས་ཀྱི་བསྟན་པ་ལ་ཁྱོད་ཞིང་ལ་བྱོན་ཕྱིན་ཆད་གནོད་པ་ལས་ཕན་པ་ཅི་ལ་འབྱུང་། དེང་དུས་ཁྱོད་ཀྱི་སྐུ་དྲིན་གྱིས་གཏེར་གཉིས་ཀྱི་བསྟན་པའི་བཤད་སྒྲུབ་གཉིས་ཀྱི་གཞི་ཚུགས་ཅིང་། འཁོར་སློབ་གདུལ་བྱའི་བསྟན་པ་འདི་ལྟ་བུ་ཞིག་རྒྱས་ཡོད་པས། འདི་ཕན་ཆད་བསྟན་པ་ལ་བྱ་བ་བྱེད་ལུགས་མེད་པ་ཡིན། འུ་ཅག་གཉིས་ལ་རྒྱུ་རྫས་ལོངས་སྤྱོད་སོགས་ཇི་ལྟར་འབྱོར་ཡང་། ཆོས་མིན་ལོག་པའི་མཐུན་རྐྱེན་དུ་མ་གཏོང་བར། ཡབ་རྗེ་བླ་མའི་བསྟན་དོན་ཁོ་ན་ལ་དམིགས་པ་སོགས་བྱས་པ་ཐུགས་ལ་མངའ་བཞིན། ངེད་ཅག་གི་བསྟན་པའི་གསོས་སུ་ཁྱོད་གྱུར་ཡོད་པས། དེ་ཕན་ཆད་ཀྱི་ཐུགས་བསྐྱེད་ཅི་ཡང་མི་དགོས། སྔར་ཁྱེད་ཉི་མ་ལུང་ནས་ཞིང་ལ་བྱོན་གྲབ་བྱེད་པའི་སྡུག་བསྔལ་ལ་བསམ་མནོ་བྱས་ན། ད་ནི་ང་རང་ན་སོ་ལོན་པ་དང་། འུ་ཅག་ཐུགས་སྣང་མཐུན་པ་སོགས་ཀྱིས་ཁྱོད་མེད་ཚེ་ཇ་ཡུན་གཅིག་ལའང་བདག་འདུག་ཐབས་བྲལ་བ་ཡིན་པས། དཕན་ཆད་ཁྱོད་ཀྱི་ཐུགས་འདུན་དེ་ལྟར་གཏད་མི་ཉན་གསུངས་ནས་བཀའ་གནད་ཕེབས་ཚེ། བདག་རང་གིས་བསམ་བཞིན་དུ་ཁྱོད་ལ་ཡིད་མ་ཆགས་ནས་སྤྲུལ་པ་བཞག་པ་མིན། བྱ་རྒོད་ཞིག་ཐོན་བྱུང་ནས་ང་རང་མི་འགྲོ་རང་དབང་མ་སྟེར་བ་ཡིན་མ་གཏོགས། ཡིད་བཞིན་ནོར་བུ་ཁྱོད་བདག་གིས་བློས་དོར་བ་ལྟ་ཞོག །ཁྱོད་སྒྲུབ་གྲྭའི་ནང་དུ་བྱོན་ཚེ། ང་རང་ལ་བལྟ་ཚོད་མེད་པ་བྱུང་བ་ཁྱོད་ཀྱིས་མཁྱེན་བཞིན་དང་། ཁྱད་པར་ད་ལན་སྐབས་ཁྱོད་སྒྲུབ་སྒར་ལ་བྱོན་སོང་དུས། བྃ༔ ང་རང་གཅིག་པུ་ཤུལ་དུ་འདུག་ཐབས་མེད་པ་ལྟ་བུར་བྱུང་བས། ཁྱོད་མེད་ཕྱིན་ཆད་ང་རང་ལ་འདི་ཕྱི་གཉིས་ཀྱི་བློ་གཏད་ས་གཏན་ནས་མི་འདུག་པ་ལ་བསམ་ན། སྨྱོན་པ་འུར་ལང་བ་ལྟ་བུར་བྱ་སྤྱོད་ཐམས་ཅད་ཅི་བྱེད་ལྟོས་མེད་དུ་འདུག་ཞུས་ཚེ། རྗེའི་ཞལ་ནས། གཅེས་ཕྲུག་དེ་ལྟར་ཐུགས་བསམ་མི་དགོས་དང་། ང་རང་གཞན་རྐྱེན་དྲག་པོ་རེས་མ་བསྒྱུར་ཚེ། བརྒྱད་ཅུ་རྩ་གཉིས་བར་དུ་སྡོད་པའི་ཚེ་ཚད་བླ་མ་མཁའ་འགྲོའི་ལུང་བསྟན་དུ་མ་ཡོད་པས། ཁྱོད་དང་མ་བྲལ་ཚེ། ད་དུང་ལོ་སུམ་ཅུ་པོ་ཆ་ཤས་འདུག་རྒྱུའི་ལུང་བསྟན་ཡོད་གསུངས། དེ་སྐབས་སྒྲུབ་གྲྭ་བ་རྣམས་ཀྱིས་ངེད་ཡབ་ཡུམ་སྲས་དང་བཅས་པ་ཚོགས་འཁོར་ལ་བྱོན་དགོས་ཞུས་ནས། ཡིད་བཞིན་ནོར་བུ་དང་ངེད་མ་བུ་གཉིས་བཅས་ཚོགས་འཁོར་ལ་བྱོན། དེའི་སྐབས་4 མཁའ་འགྲོ་ཞིག་གིས་བདག་གི་བུ་ཆུང་ལ་དར་ཁ་དྲི་བྲལ་ཞིག་སྦྱིན་པར་སྣང་བས། ནུབ་ཇ་གསོལ་དུས་བདག་