Tibetan
གིས་རྗེ་ལ་འདི་སྐད་ཞུས། སྔར་ཨ་འཛོམས་སང་གིས་བུ་ཆུང་འགྱུར་མེད་རྡོ་རྗེའི་འདི་འབྲེལ་ཚད་དོན་ལྡན་ཞིག་འོང་བར་འདུག་པས། ལོ་ལྔ་ཕན་ཆད་ཁོ་རང་གདན་སར་འཁོད་ཐབས་འོང་ན་བཟང་གསུངས་པ་ཡིན། ད་ལོ་བུ་ཆུང་ལོ་ངོ་དྲུག་ལ་ཐོན་པ་དང་། ཁོ་རང་གི་ཚེ་ལ་ བར་ཆད་ཞིག་འདུག་པས། སྒོ་སྤྲུལ་གདན་ས་དངོས་ལ་ཐོན་ཐབས་དབེན་ཀྱང་། ཝ་ཤུལ་རོག་ཟ་སང་ཕན་ཚུན་གྱི་སྟབས་བདེ་བ་སོགས་ཡིན་པས། ཁོང་སང་ནས་ཀྱང་བུ་ཆུང་ལ་འདུན་པ་ཤིན་ཏུ་ཆེ་བས། ཁྱོད་ནས་དེ་ལུགས་ཀྱི་ཐུགས་བཞག་དགོས། ཁྱད་པར་མགར་ར་སང་དང་སྤྲོད་ལེན་མྱུར་དུ་འཕྲོད་ཐབས་མ་འོངས་ཚེ། བུ་ཆུང་ཟླ་བ་བཞི་པ་ཕན་ཆད་མི་འདུག་ངེས་པ་རེད་ཞུས་ཚེ། རྗེ་ནས་དེ་ལྟར་ཐུགས་ཁུར་བཞེས་ནས་རོག་ཟའི་བླ་བྲང་ལ་གསུང་ཆ་བསྐུར་བས། རོག་ཟ་དབོན་པོ་དཔོན་གཡོག་ཆ་ཤས་བྱོན་ནས། ཚིག་སྐྱོན་ཅུང་ཟད་ཉེས་འགལ་མེད་པ་ཞིག་ལ་རྐྱེན་ནས། ཁོང་སང་ནས་བུ་ཆུང་གི་དོན་བཏང་སྙོམས་ལ་བཞག །དེ་ནས་ཨ་སྐྱོང་དཔོན་ལ་ཞུ་ཡིག་སྔར་ལྟར་ཕུལ་ནས། བུ་ཆུང་གི་སྲོག་ལ་ཐུག་པའི་དོན་གོ་ནས། སྤྲོད་ལེན་གྱི་དུས་ཚོད་མྱུར་དུ་བསྒོས་པ་སོགས་བྱས་འདུག་པས། གྱོད་ཐོག་ལ་བསོད་སྤྲུལ་སང་གི་མདུན་འདུག་ར་ཡོབ་ཀུན་བཟང་བསྟན་འཛིན་དང་། ཁོང་ཤེས་ཅན་ཆ་ཤས་འགྲོ་ཐག་བཅད། སྒྲུབ་གྲྭ་གསར་རྙིང་བརྗེ་རན་ཡོད་པས། རྗེས་དེ་རྣམས་ལ་དབང་ཁྲིད་མཛད་ནས། གསར་བཞུགས་རྣམས་ལ་སྔར་ལྟར་ཞལ་བཀོད་མཛད། སྒྲུབ་གྲྭ་མཐར་ཕྱིན་པ་རྣམས་ལ་རང་རང་དང་འཚམས་པའི་ལུང་ བྃ༔ བསྟན་བསླབ་བྱ་སོགས་མཛད་སྐབས། བླ་བྲང་ནས་ཨ་སྐྱོང་བཟས་ཚིག་ངན་ཐོན་ནས། སྔར་ང་རང་དེ་ཀར་འདུག་སྐབས་བར་གྱི་མི་རྗེའི་དངོས་སློབ་བརྩོན་འགྲུས་རྒྱ་མཚོ་ལ་སོགས་པས་ལུགས་གཉིས་གང་ཐད་ནས་ཁོ་རང་གི་སེམས་མགུ་ཐབས་བྱས་ཀྱང་ཁ་ལ་མ་ཉན། རྗེ་དེ་ཉིད་ཀྱིས་ཀྱང་ལུགས་གཉིས་ཀྱི་བྱ་བ་ཐམས་ཅད་བྱུང་དང་འབྱུང་འགྱུར་དུ་མ་གསུངས་ཀྱང་བྱ་ཐབས་མ་རྙེད་ནས། དབུས་མོ་མ་བུ་གཉིས་ཀྱིས་གཏེར་སྟོན་བླ་བྲང་གི་ཐོབ་ཐང་བསྐྱང་བ་འདི་མི་འཐད། རྗེ་དང་ལྷན་དུ་འདུག་རྒྱུ་མ་དགོས་ཚིག་ཙམ་ཡང་བསླད་མི་ཆོག་ཟེར་བ་སོགས་རྐྱེན་ངན་གྱི་ཚིག་དུ་མ་ཡོད་ཀྱང་ཡི་གེར་འཇིགས་ནས་མ་བྲིས། རྗེའི་དངོས་སློབ་དྲི་མེད་རྣམ་དག་དང་། བླ་མ་ཚེ་མཆོག་སོགས་བུ་སློབ་ཆེ་བ་རྣམས་ཀྱིས་ཀྱང་། རྗེ་དེ་ཉིད་གཏེར་སྟོན་བླ་བྲང་གིས་དགོས་མེད་བྱས་ནས། མི་ལོ་བཅོ་ལྔ་སོང་ཚར་བས། ད་ལན་ཁྱོད་ཡབ་ཡུམ་ལ་བར་ཆད་བྱེད་པ་འདི་རྐྱེན་ཁ་ཆེན་པོ་ཞིག་ཡོད་པ་འདྲ་ན། ཁྱོད་ཡབ་ཡུམ་གཉིས་ཀའི་ཐུགས་གཟབ་དགོས་ཟེར་། རྗེའི་ཞལ་ནས། ངེད་ཡབ་ཡུམ་བྱེ་བྲལ་དགོས་ཚེ་གཟབ་རྒྱུ་ཅི་ཡང་མེད་པ་ལུང་བསྟན་རྣམས་སུ་གསལ། ད་ཇི་ལྟར་བྱས་ཀྱང་ཁོང་རྣམས་ཀྱི་བསམ་པ་རྫོགས་པར་མ་བྱས་ཚེ། གཏམ་ ཅི་བཤད་ཀྱང་བདེན་པར་མི་འཛིན་པ་རེད་གསུངས། དེ་སྐབས་གློ་བུར་དུ་ནད་ཡམས་ཆེན་པོ་ཞིག་གིས་རྐྱེན་བྱས་ཏེ། ཡབ་ཡུམ་སྲས་སློབ་ཐམས་ཅད་འཆི་ལ་ཉེ་བ་ལྟ་བུར་བྱུང་ནས། ལོ་ཁྱིམ་དེའི་ཟླ་བ་བཞི་པའི་ཚེ་བདུན་གྱི་ཉིན་གློ་བུར་གྱི་ནད་ཞིག་ལ་རྐྱེན་ནས། རང་གི་བུ་ཆུང་རིག་འཛིན་འགྱུར་མེད་རྡོ་རྗེ་ཚེ་དུས་ལས་འདས་ནས། ཡབ་ཡུམ་འབངས་འཁོར་ཐམས་ཅད་ཀྱི་སེམས་ཁམས་མྱ་ངན་གྱིས་ནོན་པར་གྱུར། དེ་ནས་རྗེའི་ཞལ་ནས་ད་ནི་གནས་དུས་བར་ཆད་ཀྱི་དབང་གིས། འུ་ཅག་གཉིས་གནས་སྐབས་ཙམ་དུ་འབྲལ་བ་ལྟར་བྱེད་དགོས་པ་འདྲ་ན། གཅེས་ཕྲུག སྙིང་གི་ནོར་བུ་ཁྱོད་ཀྱིས་ཐུགས་ངལ་མ་མཛད་དང་། འུ་ཅག་གཉིས་དམ་ཚིག་ལ་འགལ་བ་སྤུ་རྩེ་ཙམ་ཡང་མ་སོང་བ་དང་། ཐུགས་རྒྱུད་གཅིག་པ་སོགས་ཀྱི་མཁའ་འགྲོའི་ཚོགས་གྲལ་ནས་དུས་དང་རྣམ་པ་ཀུན་ཏུ་མཇལ་འོང་གསུངས་ནས། ཟླ་བ་དེ་ཀའི་ཚེས་བཅུའི་ཉི་ཤར་གྱི་དུས་སུ། ཕྱག་བདག་གི་མགོ་ལ་བཞག་ནས་སྤྱན་བར་སྣང་ཧྲིག་གེར་གཟིགས་ཤིང་། ཐབས་ཤེས་གཉིས་མེད་ཟུང་འཇུག་རྡོ་རྗེ་འཆང་གི་སྐུར་བཞེངས་པའི་སྨོན་ལམ་མཛད་ནས། གཟུགས་སྐུའི་བཀོད་པ་ཆོས་དབྱིངས་ལ་གཤེགས་སོ། །དེ་སྐབས་ཀྱི་ཡབ་ཡུམ་གཉིས་ཀྱི་ཞུས་ལན་ཐམས་ཅད་རྗེ་དེ་ཉིད་ བྃ༔ ཀྱི་རྣམ་ཐར་ཆེན་པོའི་ནང་དུ་ཞིབ་རྒྱས་སུ་གསལ། དེ་ནས་ང་རང་ནི་སྐྱབས་མེད་མགོན་མེད་ལོང་བཐང་དཀྱིལ་དུ་ལུས་པ་ལྟ་བུའི་སྡུག་བསྔལ་ཆེན་པོས་ནོན་ཏེ་བྱ་ཐབས་དང་བྲལ་ཡོད་སྐབས། རྗེས་དངོས་སུ་ཞལ་གཟིགས་ནས་ལུང་བསྟན་བསླབ་བྱ་སྩལ་བ་གཏེར་གཞུང་དུ་གསལ། དེ་ནས་རང་ཅག་ལ་དངོས་རྫས་སྤུས་ལྡན་གང་ཡོད་ཐམས་ཅད་དགོངས་རྫོགས་ཀྱི་ཕྱིར་དུ་བཏང་ནས། རང་ལ་སེམས་དཀར་བའི་སློབ་འབངས་ཐམས་ཅད་དང་། ཁྱད་པར་རྗེའི་མདུན་གཡོག་འོད་འབར་བྱ་བས་དོ་ཁུར་བླངས་ནས། བདེ་བར་གཤེགས་པ་རྣམ་གཉིས་ཀྱི་ཐུགས་དགོངས་རབ་ཏུ་རྫོགས་པར་བྱས། དེ་སྐབས་བསོད་སྤྲུལ་སང་དང་། རྗེའི་སྐུ་མཆེདཔདྨ་རྡོ་རྗེ་རྣམས་བྱོན་ནས་མགོ་འདྲེན་མཛད། དེ་སྐབས་ཡང་བླ་བྲང་ནས་ང་རང་གནས་དེ་ཀར་སྡད་མི་ཆོག་སོགས་བཤད་པ་མང་པོ་བྱས་ནས་འདུག་ཏུ་མ་སྟེར། རང་ནས་སྔར་རྗེ་དགོངས་པ་གཤེགས་སྐབས་བླ་བྲང་ནས་བཟང་ངན་གྱི་བྱ་བ་ཅི་བགྱིས་ཀྱང་། ལོ་གཅིག་ལ་བཟོད་པ་བྱེད་པའི་དམ་བཅའ་བྱས་ཡོད་པས། བདག་གིས་འདི་སྐད་སྨྲས། རྗེའི་ཐུགས་བཞེད་ལྟར་གཙུག་ལག་ཁང་གི་བཞེངས་འཕྲོ་བདག་གིས་ཅི་འགྲུབ་ལེགས་པར་བསྒྲུབ་ནས་སོང་ན་ཨེ་ཆོག་སྨྲས་ཚེ། གཙུག་ ལག་ཁང་གི་འཕྲོ་བསྐྱང་རྒྱུ་ཕར་ཞོག །དགོངས་རྫོགས་མྱུར་བར་ཟིན་ཐབས་དགོས་སོགས་ཟེར་བས། བསོད་སྤྲུལ་སང་གི་ཐུགས་རྒྱལ་བཞེངས་ནས་མཁའ་འགྲོ་དཔོན་གཡོག་གདན་སར་བཞུགས་མ་ཆོག་ཀྱང་། རྩ་བའི་བླ་མའི་དགོངས་རྫོགས་ཞིབ་རྒྱས་སུ་བྱེད་དུ་མི་འཇུག་པ་སུ་ཡོད་ཀྱང་། ང་རང་གིས་ལས་བྱ་བ་གང་དགོས་སྲོག་དང་བསྡོ་བར་བྱེད་པ་སོགས་བདག་གིས་བླ་མ་ཡབ་ཡུམ་གྱི་སྐུ་དོན་འགྲུབ་ངེས་མི་བྱེད་ན་གསུངས་ནས་བཀའ་གནང་དྲག་པོ་ཕེབས་པས། བླ་བྲང་ནས་རེ་ཞིག་གཏམ་རྩུབ་ཀྱི་གནས་དབེན་པར་བྱུང་། དེ་སྐབས་ང་རང་ཡང་སེར་དགོན་ལ་འགྲོ་དགོས་པའི་གསུང་གནད་འཕང་བས་བཟློག་ཏུ་མ་ནུས། དེ་ནས་སྐུ་གདུང་རིན་པོ་ཆེ་འོད་དུ་ཞུ་རན་སྐབས། རྗེའི་ཟབ་གཏེར་གུ་རུའི་ཐུགས་ཀྱི་སྒྲུབ་པའི་དབང་ལུང་གི་རྒྱུན། སྔར་ང་རང་ལ་འཛིན་སྐྱོང་ཆོག་པའི་བཀའ་ཕེབས་དང་། ཆ་ལག་གི་གཏེར་ཤོག་རྣམས་གཏད་པ་ཙམ་ལས། བརྒྱུད་པ་གསལ་ཁྱབ་ཏུ་མི་བཞུགས་པ་ཡིན། རྗེའི་དངོས་སློབ་མཁྱེན་ཡངས་ལྡན་པ་རྣམས་ཀྱིས་བཀའ་གྲོས་མཛད་ནས། སྐུ་གདུང་རིན་པོ་ཆེ་བཞུགས་ཡོད་སྐབས་འདིར། གུ་རུའི་ཐུགས་སྒྲུབ་ཀྱི་བདག་དབང་བླང་ན། རང་གི་ལས་རུང་ཙམ་གྱི་ལུང་ཐོབ་པ་ཡིན་གསུངས་འདུག་པས། བྃ༔ བདག་གི་སྣང་བ་ལ་ང་རང་བསྡད་ཡོད་པས། བླ་མའི་ཟབ་གཏེར་གྱི་བསྟན་པ་ལས་སུ་རུང་བ་ཙམ་བྱེད་མི་དགོས་པ་དང་། གུ་རུའི་ཐུགས་སྒྲུབ་ཀྱི་བརྡ་ཤོག་རྣམས་རང་ལ་དབང་བ་ཡིན་ཡང་། ཟབ་གཏེར་འདི་ཤིན་ཏུ་ཟབ་ཆེ་བའི་དབང་གིས་རྟེན་འབྲེལ་བཏང་སྙོམས་ལ་འགྲོ་བ་དང་། མ་ཚད་རྗེའི་ཟབ་གཏེར་ཡོངས་རྫོགས་ཀྱི་གཏེར་མཇུག་རྣམས་ཀྱང་དེ་ཙམ་རེད་སྙམ་ཡོད་ཚེ། རྗེའི་ཟབ་གཏེར་གྱི་ཡིག་བྲིས་པ་ཚུལ་ཁྲིམས་རྡོ་རྗེ་བདག་གི་སར་བྱོན་ནས་འདི་སྐད་ཟེར། ཁོང་བུ་སློབ་ཆེ་བ་རྣམས་ཀྱིས་སྐུ་གདུང་མདུན་ནས་བདག་དབང་བླང་དགོས་གསུང་འདུག་པས། བདག་གིས་ཅི་བྱེད་ན་དགའ་ལགས་ཟེར། བདག་གི་སྣང་བ་ལ་ད་དུང་རྗེའི་ཟབ་གཏེར་བྲི་སྤེལ་གྱི་གནས་དབེན་ཀྱང་། འཛིན་སྐྱོང་ང་རང་གིས་བྱེད་པའི་སྐལ་བ་ཡོད་པ་འདྲ་སྙམ་ནས་འདི་སྐད་སྨྲས། དེ་ལྟར་ཐབས་སྡུག་བྱེད་མི་དགོས་པ་འདྲའང་། ད་ལན་ཁོང་རྣམས་ཀྱི་བསམ་པ་ལྟར་བྱས་ན། ཕྱིས་ནས་འགྱོད་པ་མི་དགོས། དེ་མིན་སྔར་བླ་མ་གཏེར་ཆེན་རིན་པོ་ཆེའི་སྐུ་རིང་ནས་འདི་སང་ལ་གཏེར་བརྒྱུད་མ་ཆད་པ་དང་། མིན་ཀྱང་ང་རང་ལོ་ཤས་ཙམ་ལ་འདུག་ན། དེ་ཙམ་བྱེད་མི་དགོས་སྙམ་ཀྱང་། ད་ལན་ཟེར་ཐབས་དཀའ་བས་དེ་ལྟར་བྱེད་ན་ཆོག་སྨྲས། དེ་ལ་སོགས་པ་མི་འདོད་པ་དུ་མ་བྱུང་ཡང་ཡི་གེར་འཇིགས་ནས་མ་བྲིས་སོ། །དེ་ནས་སྐུ་གདུང་རིན་པོ་ཆེ་འོད་ཞུ་བྱེད་སྐབས། འཁོར་འབངས་ཐམས་ཅད་མྱ་ངན་གྱིས་གདུང་ནས་འབར་ཤིང་གི་སྟ་གོན་ལེགས་པར་མ་འཛོམས་པས། སྐུ་གདུང་རིན་པོ་ཆེ་རང་བྱུང་གཏུམ་མོའི་མེས་འོད་དུ་ཞུ་ནས། གདུང་རུས་དང་གདུང་ཐལ་སོགས་ཀྱི་དངོས་གྲུབ་ཀྱི་སྐལ་བ་ཤིན་ཏུ་ཕྲ་བ་བྱུང་ཞིང་། ཁྱད་པར་གདུང་དུད་འཇའ་སྤྲིན་ལྟ་བུར་འཁྲིགས་པའི་ཀློང་ནས། མཁའ་འགྲོ་མ་རུས་པའི་རྒྱན་དྲུག་སོགས་ཀྱིས་སྤྲས་པ་བཞི་དར་གྱི་འོད་ལི་ལ། ཐུགས་རྟེན་ཤེལ་གྱི་མཆོད་སྡོང་མདའ་གང་ཚད་ཙམ་ཡོད་པ། དེའི་ཕྱོགས་བཞིར་འཇའ་ཚོན་ཁ་དོག་ལྔ་ལྡན་ཟུག་ཅིང་། སྟེང་གི་འཇའ་སྣེ་རྣམས་སུ་འོད་ཐིག་ཟླུམ་འཁྱིལ། རྔེའུ་ཆུང་ཙམ་རེའི་ནང་དུ། བདེ་གཤེགས་རིགས་ལྔ་ཡབ་ཡུམ་གྱི་སྐུ་གསལ་སྟོང་འཛིན་མེད་ཆེན་པོར་ཡོད་པ་ཞིག །ལྷོ་ནུབ་ཀྱི་ཕྱོགས་ཀྱི་ནམ་མཁའ་ལ་སྤྱན་དྲངས་འདུག་པས། བདག་གི་ཡིད་སྐྱོ་བའི་ཤུགས་ཀྱིས་ཌཱཀྐི་རྣམས་ལ་འདི་སྐད་ཞུས། ཀྱེ་མ་ཀྱི་ཧུད་ཡེ་ཤེས་མཁའ་འགྲོ་རྣམས། །བདག་གི་འདྲེན་སྟོན་བླ་མ་གང་དུ་གཤེགས། །རྗེས་འཇུག་བུ་སློབ་མཆེད་ལྕམ་སུ་ལ་རེ། །མགོན་མེད་ཉམ་ཐག་གྱུར་པ་བདག་ཅག་གི། །མི་རེའི་ཁོང་ ༔ ནས་སྙིང་རེ་བོར་བ་ལྟར། །འདྲེན་སྟོན་བླ་མ་མེད་པའི་མྱ་ངན་གྱིས། །གཅེས་པའི་སྲོག་ཀྱང་འཕངས་མེད་དོར་ལ་ཉེ། །ཁྱད་པར་སྙིང་རྗེའི་ཡུལ་གྱུར་སྐྱེ་དམན་བདག །འདི་ཕྱིའི་སྐྱབས་གནས་རེ་ས་གང་གིས་བྱེད། །ཉམས་ལེན་རྟོགས་པའི་དྲོད་ཚད་སུ་ཡིས་འཛིན། །ཁོ་མོའི་སྙིང་འཛིན་ནོར་བུ་སུ་ཡིས་བྱེད། །ཀྱེ་མ་ཀྱི་ཧུད་ཡེ་ཤེས་ཌཱཀྐི་མ། ། བདག་གི་འདྲེན་སྟོན་པདྨ་ལས་འབྲེལ་རྩལ། །དངོས་སུ་བཞུགས་པའི་སྐལ་བ་མ་བྱུང་ཡང་། །མཁའ་འགྲོའི་ཕྱག་གི་ཐུགས་རྟེན་བཟང་པོ་འདི། །ཁོ་མོ་བདག་གི་དཔལ་དུ་གནང་དུ་སོལ། །བདག་གི་བླ་མ་ཆོས་སྐུའི་ཞིང་དུ་ཡིབ། །གཟུགས་སྐུ་བཞིན་ལེགས་རྣམ་པ་མི་མངའ་བའི། །མཁའ་འགྲོའི་ཕྱག་གི་ཐུགས་རྟེན་དམ་པ་འདི། །ཁོ་མོ་བདག་གི་དཔལ་དུ་གནང་བར་ཞུ། །བདག་གི་བླ་མ་ལོངས་སྐུའི་ཞིང་དུ་ཡིབ། །མཚན་འཛིན་ཡུལ་བྲལ་ཡེ་གདངས་ཆེན་པོར་བཞུགས། །མཁའ་འགྲོའི་ཕྱག་གི་ཐུགས་རྟེན་དམ་པ་འདི། །ཁོ་མོ་བདག་གི་དཔལ་དུ་གནང་བར་ཞུ། །བདག་གི་བླ་མ་པདྨ་འོད་དུ་ཡིབ། །ཟག་བཅས་སྒྱུ་མའི་འཁྲུལ་པ་མི་མངའ་ཡང་། །རིགས་ལྡན་དཔའ་བོ་མཁའ་འགྲོའི་ཚོགས་དཔོན་དུ། །ཆོས་གཟུགས་ཡེ་ཤེས་རོལ་ པའི་གར་དུ་བཞེངས། །མཁའ་འགྲོའི་ཕྱག་གི་ཐུགས་རྟེན་བཟང་པོ་འདི། །ཁོ་མོ་བདག་གི་དཔལ་དུ་གནང་དུ་གསོལ། །ཞེས་སྨྲེ་སྔགས་ཀྱི་མཆི་མ་འཁྲུགས་བཞིན་ཞུས་པས། ཌཱཀྐིའི་ཞལ་ནས། གསོན་དང་རིགས་ལྡན་རྒྱལ་བའི་ལྕམ། །མཁའ་འགྲོའི་ཕྱག་གི་ཐུགས་རྟེན་འདི། །རང་བྱུང་ཡོངས་གྲུབ་རྒྱལ་བའི་ཚབ། །བཞེངས་པ་ལྷུན་འགྲུབ་ཆེན་པོར་བཞེངས། ། དཀོན་གཉེར་དཔའ་བོ་དཔའ་མོས་བྱེད། །འདོད་ཡོན་རང་བྱུང་རྒྱན་གྱིས་མཆོད། །དེ་ངེད་ཅག་རྣམས་ཀྱི་གདུང་སྐལ་ཡིན། །ཁྱེད་མཆེད་ལྕམ་གདུང་སྐལ་དཔལ་སྤྱོད་ན། །ལུས་གདན་གསུམ་ཚང་བའི་གནས་མཆོག་ཏུ། །རྩ་འཁོར་ལོ་ལྔ་ཡི་གཞུར་དྲངས་ནས། །དྭངས་མ་གཉིས་ཡུལ་བཅུའི་བུ་མོར་འགྲོགས། །གནས་དག་པ་གསུམ་གྱི་རྡོ་རྗེའི་རྫོང་། །དེར་སྤྱོད་ན་བླ་མའི་སྐུའི་འཁོར་ལོ། །དོན་འགྱུར་བ་མེད་པའི་གདུང་སྐལ་ཡིན། །ཁྱེད་མཆེད་ལྕམ་གདུང་སྐལ་དཔལ་སྤྱོད་ན། །དོན་ཟབ་གཏེར་ཆོས་མཛོད་སྣ་ཚོགས་པ། །བརྡ་འཆུག་མེད་ཡི་གེའི་རིས་སུ་བཀོད། །རང་ཁམས་དབང་མོས་པ་དང་བསྟུན་ནས། །སྙིང་པོ་ཡི་སྒྲུབ་པ་གནད་ལྡན་ཅིང་། །ཆོས་ཡལ་བར་མ་དོར་དོན་གཉིས་མཛོད། །དེ་བླ་མའི་གསུང་གསང་འཁོར་ལོ་སྟེ། བྃ༔ དོན་འགྱུར་བ་མེད་པའི་གདུང་སྐལ་མཛོད། །ཁྱེད་མཆེད་ལྕམ་གདུང་སྐལ་དཔལ་སྤྱོད་ན། །རང་བྱུང་རིག་པ་སྐུ་གསུམ་མཉམ་པ་ཉིད། །འོད་གསལ་གཉུག་མའི་ངང་གདངས་མ་བྲལ་ན། །འདྲེན་སྟོན་བླ་མའི་ཐུགས་ཀྱི་འཁོར་ལོ་སྟེ། །ཀ་དག་ལྷུན་འགྲུབ་སྙིང་པོ་ཉམས་བླང་ན། །དོན་འགྱུར་བ་མེད་པའི་གདུང་སྐལ་ཡིན། །དོན་གོའམ་རིགས་ལྡན་མཛའ་ན་མོ། །ཞེས་ཟེར་ནས་མི་སྣང་བར་ཇེ་མཐོར་བྱས་ནས་ཡལ་ལོ། །དེ་ནས་དགོངས་རྫོགས་ཀྱི་བྱ་བ་སོགས་ཞིབ་རྒྱས་སུ་གྲུབ་ནས་ལོ་ཁྱིམ་དེ་ཀའི་ཟླ་བ་དྲུག་པའི་ཡར་ཚེས་བཅུའི་ཉིན་མཁར་འགབ་དཔོན་འགྲོ་མགོན་གྱིས་མཐུན་རྐྱེན་བྱས་ཏེ། སྡེ་དཔོན་ཐམས་ཅད་ཀྱིས་ཁལ་རྟ་རང་གྲོ་བྱས་ནས་སེར་དགོན་དུ་བརྡ་འཕང་བྱས། ཁྱད་པར་རི་ཁྲོད་གོང་འགབ་གཉིས་ལ་བཞུགས་ཡོད་པའི་རྡོ་རྗེའི་མཆེད་པོ་རྣམས་ཀྱིས་སྐྱེལ་མ་མཛད། གཡུ་བསྭེའི་སྣ་རིང་མར་དུས་མཆོད་ཀྱི་ཚོགས་འཁོར་བྱས། དེའི་སྐབས་ང་རང་གི་ཡིད་ཤིན་ཏུ་སྐྱོ་ཞིང་། རྗེ་ལ་གདུང་དབྱངས་ཀྱི་གསོལ་འདེབས་འདི་ལྟར་བྱས། སྐྱབས་འཁོར་ལོའི་མགོན་པོ་ཆོས་ཀྱི་རྗེ། །ཐུགས་ཞི་བའི་དབྱིངས་སུ་མི་གཟིམ་པར། །ཉམ་ཐག་པའི་བུ་མོར་ཐུགས་རྗེས་གཟིགས། །གྲོགས་ཡིད་བཞིན་ནོར་བུ་དཔལ་རིར་ ཞིབ། །བུ་གཅིག་པུ་ཕྱི་མའི་ཡུལ་དུ་སོང་། །ང་བདེ་བའི་རྡོ་རྗེ་ས་མཐར་ཕུད། །ཁོང་མཆེད་གྲོགས་རང་རང་གནས་སུ་ཕེབས། །གནས་ནེ་གྲོ་བྱང་ཐང་མི་མེད་འདྲ། །རྩ་འཇག་སྐྱ་རླུང་གིས་བསྐྱོད་ནས་འདུག །གཙུག་ལག་ཁང་སེང་གེའི་ཡ་ཁ་འདྲ། །འདུས་སྡེ་རྣམས་བྱི་ཕྲུག་ཁ་འཐོར་ལྟར། །སྐྱབས་གནས་བྲལ་བྱ་ལོང་མཁར་གཤེགས་འདྲ། །ཡུལ་སྡེ་པ་རྔ་རུ་ངོ་གཉིས་བཞིན། །ཉམ་ཐག་པའི་བུ་མོར་ཀུན་གྱིས་སྡང་། །ལས་དེ་སོགས་འདུས་བྱས་མཚན་ཉིད་ལ། །ད་བསམ་ཞིང་བསམ་ན་སྐྱོ་བ་སྐྱེས། །གནས་གང་དུ་སོང་ཀྱང་བླ་མ་དྲན། །གྲོགས་སུ་དང་འགྲོགས་ཀྱང་བླ་མ་དྲན། །ལས་འདི་འདྲ་ཐུག་དུས་བླ་མ་དྲན། །དུས་ཉིན་མཚན་མེད་པར་བླ་མ་དྲན། །རྗེ་དུས་གསུམ་སངས་རྒྱས་ཁོང་རང་དྲན། །མགོན་ཁྱོད་ཀྱི་ཐུགས་ནས་དོར་གྱུར་ན། །སྐྱེ་དམན་བདག་བློ་གཏད་སུ་ལ་བཅའ། །དོན་ལྡན་གྱི་ཉི་མ་ནུབ་རིར་ཕྱོགས། །མུན་འཐུམ་གྱི་འགྲོ་བ་སུ་ཡིས་སྐྱོབ། །དབྱིངས་དག་པ་གཉིས་ལྡན་མཁའ་འགྲོས་འདྲེན། གདོས་བཅས་ཀྱི་སེམས་ཅན་སུ་ཡིས་འདྲེན། །སྐུ་ཉི་མའི་དཀྱིལ་འཁོར་མི་བཞུགས་པར། །ཡིད་མོས་གུས་ཀྱི་འོ་དོད་འབོད་དགོས་བྱུང་། །གསུང་བྱམས་པའི་གདམས་པ་མི་གསུང་ བྃ༔ བར། །ཞལ་རྒྱུན་གྱི་དཔེ་ཆར་རེ་དགོས་བྱུང་། །ཐུགས་བརྩེ་བས་རྗེས་སུ་མི་བཟུང་བར། །མུན་བསྒོམ་གྱི་ཐུགས་ཡིད་བསྲེ་དགོས་བྱུང་། །ལས་སྐྱིད་སྡུག་ཅི་དང་ཅི་བྱུང་ཡང་། །ང་སྡུག་མོས་རང་སེམས་རང་གིས་གསོས། །ཡུལ་རྒྱུས་མེད་གནས་སུ་གཅིག་པུར་འགྲིམ། །ལས་འདི་འདྲའི་བྱ་བ་མཐོང་ཙ་ན། །ཁོང་སྒྱུ་མའི་ནང་གི་སྒྱུ་རྒོད་འདྲ། ། མགོན་བླ་མའི་ཐུགས་རྗེས་མ་སྐྱོབས་ན། །སྤྲང་ལུས་སྲོག་དོར་ལ་ཡ་མི་ང་། །ཞེས་གསོལ་བ་བཏབཔས། བྱིའུ་ཡིད་དུ་འོང་བ་ཞིག་གིས་འདི་སྐད་ཟེར། ཧྲིང་ཧྲིང་རྣལ་འབྱོར་བདེ་སྐྱོང་དབང་མོ། །སྒྱུ་མའི་འཕྲུལ་ལ་ཐུགས་ངལ་མི་དགོས། །ལས་འབྲེལ་རྩལ་དང་འདུ་འབྲལ་མེད་པས། །དཔལ་རིའི་གླིང་ནས་སྐབས་སྐབས་མཇལ་འོང་། །གསེར་རི་ལྷུན་པོའི་གནས་ཀྱི་ཉེ་ཆར། །མི་རིང་མདའ་མོ་དགུ་ཡི་བསྒྲོད་ལམ། །ཨཱརྻའི་གནས་ཀྱི་གཡས་ལོགས་དེ་རུ། །འཕྲུལ་གྱི་བརྡ་དཔེ་གཡུ་སྒྲོམ་གུད་དུ། །དྲག་ཁྲོས་རྔམས་པའི་ཁྲོད་ནས་ལོངས་དང་། ། གདུལ་བྱ་ཐབས་ཀྱིས་གསང་སྒོ་འབྱེད་འོང་། །མི་མིན་ཡུལ་གྱི་རྐང་དྲུག་རྩེ་འཇོ། །ནམ་མཁའི་དབང་གཞུའི་མདངས་ཀྱིས་བསུས་ནས། །མི་རིང་སྒྱུ་འཕྲུལ་དབང་སྒོར་གསལ་ངེས། །ཀ་ ལི་སྒྲ་ཡིས་འབོད་པ་ཐོན་ཚེ། །མི་མངོན་འཕྲུལ་གྱི་བརྡ་རིས་སྤེལ་མཛོད། །སྔོན་འབྲེལ་དཔའ་བོ་བཛྲ་མིང་ལ། །རིང་མིན་ཉེ་ནས་རྨ་བྱའི་མདངས་ཀྱིས། །བློ་སེམས་བསྐུལ་ལ་ཅི་ཆ་ཅི་ཡོད། །ཁྱོད་དང་རྟེན་འབྲེལ་གནད་ཟབ་ལྡན་ན། །དཔའ་བོ་མིང་གི་ཟླ་གཞོན་གསལ་ངེས། །དེ་དང་དེ་སོགས་འབྱུང་འགྱུར་ཟུར་ཙམ། །ས་མ་ཡ་ཐི་སྙིང་ལ་ཆོངས་ཤིག །ཅེས་ཟེར་ནས་མི་སྣང་བར་གྱུར་ཏོ། །དེ་ནས་ངེད་རྣམས་རིམ་གྱིས་སེར་དགོན་ལ་ཐོན། བསོད་སྤྲུལ་སང་ནས་བསུ་བ་དང་མགྲོན་ཁ་སོགས་མཛད། དེ་སྐབས་རང་གི་ལྷས་མལ་འདུགས། བསོད་སྤྲུལ་སང་དང་ཐག་ཅུང་ཟད་ཉེ་ས་ན་འདུག་དགོས་སྨྲས་ཀྱང་། ཕྱི་ནང་ཀུན་གྱིས་ལོག་ལམ་བསམ་ནས་དེ་ཙམ་སྟབས་མ་ལྡན་པས། གནས་འདི་ཀར་ཡུན་རིང་པོར་འདུག་བསྐལ་མེད་པ་འདྲ་སྙམ། དེ་ནས་གྲོགས་མཆེད་རྣམས་དང་། འགྲོ་མགོན་སོགས་སྐྱེལ་མ་ཐམས་ཅད་ཕར་སོང་། དེ་དག་གི་ནང་ནས་རྗེ་དེ་ཉིད་ཀྱི་སྐུ་ཚ་མཁྱེན་སྤྲུལ་སང་གི་རིགས་སྲས་ཀུན་བཟང་ཉི་མ་དང་། དྲི་མེད་རྣམ་དག་གཉིས་ཀ་ཞག་ཆ་ཤས་སུ་ངེད་ཅག་ལ་སྐྱོ་རོགས་བྱས། དེ་སྐབས་ཀུན་བཟང་ཉི་མ་དཔོན་གཡོག་གསུམ། ང་རང་གི་དོན་ལ་མར་བསོད་ལ་བྱོན། དྲི་མེད་རྣམ་དག །ཚུལ་ཁྲིམས་ བྃ༔ རྡོ་རྗེ། ཐུབ་བཟང་། ཚུལ་ཁྲིམས་ནོར་བུ། ངེད་མ་བུ་གཉིས་བཅས། ཐོད་སྒང་ཞེས་པའི་གནས་སུ། ཨ་བུའི་བླ་མ་བསྟན་འཛིན་དར་རྒྱས་ཀྱི་སྐུ་དམར་གདུང་ངོ་མཚར་ཅན་ཞིག་ཡོད་པ་ཐོས་ནས། དེཀར་མཇལ་དུ་སོང་བས། སྔར་སྣ་རིང་མ་ནས་མཁའ་འགྲོས་བརྡ་བྱང་འོང་བ་ལྟར། གནས་དེ་ཀའི་ཉེ་ལོགས་ནས། གསང་བ་འཕྲུལ་ཡིག་གི་ཟབ་གཏེར་གསང་ཐབས་སུ་སྤྱན་དྲངས། དེ་སྐབས་དྲི་མེད་རྣམ་དག་ཤེས་རབ་མྱུར་བས་ཟུར་ཙམ་གོ་སོང་ཡང་། བདག་གི་བློ་འཕྲུལ་མྱུར་བས་གསང་ཐུབ་པ་བྱུང་ངོ་། །དེ་ནས་བསོད་སྤྲུལ་སང་གི་ཕྱག་རྫས་ཅི་ཡོད་ཐམས་ཅད་བསོགས་ནས་ཡིད་བཞིན་ནོར་བུའི་སྐུ་གདུང་བཞེངས་གྲབ་མཛད་ཚེ། རང་ནས་ཀྱང་དངོས་རྫས་ཅི་འབྱོར་གྱི་སྟ་གོན་བྱས་ཏེ། བླ་མའི་སྐུ་དྲིན་གསོ་བའི་ཕྱིར་དུ་རིན་ཆེན་དང་པོའི་མཆོད་སྡོང་མདའ་ཚད་ཙམ་ཞིག་བཞེངས། དེ་སྐབས་སུ་ཚུལ་ཁྲིམས་རྡོ་རྗེ་ནི། སྔར་ང་རང་སེར་དགོན་དུ་འོང་ཁར་མགར་ན་བློ་ཆོས་ཀྱིས་ངོ་ལོག་ནས་ཕུ་ནུས་གྲྭ་གཤིབ་སྟེ། ཚུལ་ཁྲིམས་རྡོ་རྗེ་ཁོང་མགར་ར་སང་ཡིན་པས། དབུས་མོ་དང་ལྷན་དུ་འགྲོ་མི་ཆོག་སོགས་ཀྱི་གཏམ་ངན་དུ་མ་བཤད། བདག་གིས་ཚུལ་ཁྲིམས་རྡོ་རྗེ་ཁོང་རང་ལ་དྲིས་ན་ལོས་ཤེས། ངེད་ ཅག་སྔར་རྗེ་ཞལ་བཞུགས་དུས་ནས་ཁྱིམ་གཅིག་ཏུ་བསྡད་ནས། ཁོ་རང་གིས་ཕ་མའི་འདུ་ཤེས་ལྟ་བུའི་བློ་གཏད་ངེད་ཡབ་ཡུམ་ལ་བཅའ་བ་ཡིན། ད་ལན་ཁོ་རང་ཕུ་ནུ་ཉེ་འབྲེལ་རྣམས་ཡོད་པས་དགའ་སྙམ་ན། ང་རང་གིས་རྒྱུ་རྫས་ཅི་ཡོད་ཐམས་ཅད་ཆ་གསུམ་དུ་བཏང་ནས། ཐུབ་བཟང་དང་།