Tibetan
ཟླ་བ་ལྔ་པའི་ཡར་ཚེས་ལ་རྗེའི་སྔར་གྱི་གདན་ས་ནཻ་གྲོ་ བྃ༔ རྡོ་རྗེ་རྫོང་བྱ་བར་བཞུགས་གནས་སྤར་ནས། དེ་ཀརབྱོན་སྐབས་གནས་དེ་ཀ་ནས། བདག་གིས་སྒྲོལ་དཀར་ཚེ་འཕེལ་ལྷ་མོའི་སྒྲུབ་ཐབས་ཀྱི་ཟབ་ཤོག །དུང་སྒྲོམ་དཀར་པོ་པདྨ་ར་གའི་མཚམས་ཕྱེས་པ་ཞིག་གཏེར་ནས་དྲངས་ཏེ། རྗེ་དེའི་སྐུ་ཚེ་ཞབས་པད་བརྟན་ཕྱིར་ཕུལ་བས་རྟེན་འབྲེལ་དུ་མའི་གསོས་སུ་གྱུར་ཏོ། །དེ་ནས་རྗེ་ལ་མཁའ་འགྲོས་ལུང་བསྟན་ཏེ། གུ་རུ་རྟ་ཕག་ཞལ་སྦྱོར་གྱི་སྒོ་ནས་བདུད་རྩི་སྨན་སྒྲུབ་མཛད་དགོས་གསུངས་པ་ལྟར། སྨན་སྒྲུབ་ཀྱི་སྟགོན་རྣམས་ལེགས་པར་འཛོམ་པར་བྱས་ཏེ། ངེད་ཡབ་ཡུམ་གཉིས་དང་། བསོད་སྤྲུལ་སང་། གཞན་ཡང་རྡོ་རྗེའི་མཆོད་གཉིས་བཅས། ཉིན་ཞག་བདུན་གྱི་བར་དུ་བསྒྲུབ་པ་མཛད་ཚེ། བདུད་རྩི་ཁོལ་བ་དང་། སྨན་འཕེལ་བ་སོགས་རྟགས་མཚན་བསམ་གྱིས་མི་ཁྱབ་པ་བྱུང་བ་དང་། ཁྱད་པར་སྨན་ཕུད་དབྱིངས་སྤྱོད་མཁའ་འགྲོས་གདན་དྲངས་པའི་སྐབས་གསུངས་པ་ང་རང་གི་གཏེར་གཞུང་དུ་གསལ། དེ་ནས་རྗེ་དེ་ཉིད་ཀྱིས་མདུན་ནས། བདག་གིས་བླ་མ་རིན་པོ་ཆེའི་ཟབ་གཏེར་མ་བསྒོམས་སངས་རྒྱས་ཀྱི་ཁྲིད་ཞུ་སྐབས། བདག་གི་སྣང་ཉམས་ལ་རྗེ་དེ་ཉིད་ཀྱི་མགྲིན་པར་ལྷ་མོ་དབྱངས་ཅན་མ་ཆེ་ཆུང་ནས་འབྲུ་ཙམ་འོད་ཀྱི་རང་བཞིན་དུ་ཡོད་པར་སྣང་། ལན་རེ་རྗེ་དེ་ཉིད་འོད་དམར་གྱི་ཀློང་དུ་ཧཱུྃཿཡིག་དཀར་པོ་བཀྲག་འབར་བ་ཞིག་ཏུ་སྣང་བས། བདག་གིས་སྙིང་གི་ནོར་བུ་ཁོང་ལ་དེ་ལྟར་སྣང་འདུག་ཞུས་ཚེ། རྗེའི་ཞལ་ནས་འུ་ཅག་གཉིས་མྱུར་ལམ་འཕེལ་ཚད་རྫོགས་པར་འགྲོ་བ་ཡིན་པས། ཁྱེད་རང་ཡང་ལན་རེ་ཀུན་གཟིགས་དབང་མོ་དངོས་དང་། ལན་རེ་འོད་དཀར་གྱི་ཀློང་དུ་བྃཿཡིག་དམར་པོའི་རྣམ་པར་བདག་གིས་སྣང་འདུག་གསུང་། ཡང་བདག་གིས་ཐབས་ཤེས་གཉིས་ཀྱི་འོད་ཁྱིམ་དཀར་དམར་གོ་ལྡོག་ཏུ་སྣང་བའི་དོན་ཅི་ལགས་ཞུས་ཚེ། ཡང་རྗེའི་ཞལ་ནས་ཁྱོད་ཀྱི་སྣང་ཆ་ཐབས་ཀྱི་ཡེ་ཤེས་གྲོགས་ཀྱི་རྣམ་པར་བཞེངས་པ་དང་། བདག་གི་རིག་སྟོང་ཡེ་ཤེས་ཀྱི་ཆ་རྡོ་རྗེ་བཙུན་མོར་བཞེངས་པ་གཉིས་ཀ། །དཔེར་ན་གསེར་དང་མདངས། མེ་དང་ཚ་བ་བཞིན་དུ། རྒྱུ་རྐྱེན་གང་གིས་མ་བསྒྱུར་བར་ཐ་མི་དད་པའི་དོན་གྱི་ཨེ་ཡིན་གསུངས་པས། བདག་གིས་ཆོས་ཉིད་བསམ་བརྗོད་ལས་འདས་པ་དབྱིངས་དང་ཡེ་ཤེས་གཉིས་སུ་མེད་པའི་དོན་མཐོང་བར་འགྱུར་རོ། །དེ་ནས་རང་ལོ་སོ་གཉིས་ལོའི་ཟླ་བ་དང་པོའི་ཡར་ཚེས་ལ། རྗེའི་བཀའ་བཞིན་ང་རང་མཚམས་དམ་རྒྱ་ཞག་བརྒྱ་ལ་བསྡད་ཡོད་སྐབས། བུད་མེད་ཡིད་དུ་འོང་བ་གཉིས་འོང་ནས། ཁྱོད་ངེད་ཅག་གི་གནས་སུ་ལྟད་མོ་བལྟ་རུ་ བྃ༔ ཨེ་འགྲོ་ཟེར་བ་ལ། བདག་གིས་ད་དུང་མི་འགྲོ་བླ་མའི་བཀའ་དང་འགལ་བ་འོང་འགྲོ་བས། རྗེས་སོར་ང་རང་མཚམས་གྲོལ་རྗེས་འགྲོ་དང་ཆོག་གི་སྨྲས་ནས། མཚམས་གདན་སྲུང་དང་བཅས་པ་རྫོགས་རྗེས། ཡང་སྔར་གྱི་མི་མོ་གཉིས་ཐོན་བྱུང་ནས་དེ་དང་མཉམ་དུ་སོང་བས། ཡུལ་ཡངས་པ་ཆེན་པོ་ཡིད་དུ་འོང་བ་ཞིག་ཏུ་ཐོན་སོང་བས། བདག་གིས་ཁོང་གཉིས་ལ་ཡུལ་འདི་གང་རེད་དྲིས་ཚེ། ཁོང་གཉིས་ན་རེ། ཡུལ་འདི་ནི་སྦས་གནས་རྡོ་རྗེ་རྫོང་གི་མཁའ་འགྲོའི་ཚོགས་ཁང་གོང་མ་རེད་ཟེར། བདག་གིས་དེ་ན་སུ་བཞུགས་དྲིས་ཚེ། ཁོང་གཉིས་ན་རེ། དེ་ན་ཨ་མ་ཡེ་ཤེས་མཚོ་རྒྱལ་གྱིས་ཚོགས་དཔོན་མཛད་ཅིང་། གཞན་ཡང་མཁའ་འགྲོ་མང་པོ་བཞུགས་ཡོད་ཟེར། ང་རང་ཤིན་ཏུ་དགའ་ནས་མྱུར་བར་སོང་བའི་ཚེ། ཡུལ་དེ་ཀའི་དབུས་སུ་ཐོད་པ་སྐམ་རློན་རྙིང་གསུམ་གྱི་ལྕགས་རི་རིམ་པ་གསུམ་དུ་བསྐོར་བའི་ནང་དུ། རིན་པོ་ཆེའི་སྒྲོམ་ལེབ་གཅལ་དུ་བཀྲམ་པའི་དབུས་སུ། རིན་པོ་ཆེ་སྣ་ཚོགས་ཀྱི་གཞོང་པར་ཚོགས་ཀྱི་ཡོ་བྱད་བསམ་གྱིས་མི་ཁྱབ་པ་བཤམས་ཤིང་། མཚོ་རྒྱལ་གྱིས་ཚོགས་དཔོན་མཛད་ཅིང་། མཁའ་འགྲོ་དགོངས་པ་འདུས་པའི་དཀྱིལ་འཁོར་གྱི་ཞལ་ཕྱེས་ནས། ཚོགས་ཀྱི་ མཆོད་པ་རྒྱ་ཆེན་པོ་མཛད་འདུག་པས། བདག་གིས་ཡིད་དད་པ་ཆེན་པོས་ཕྱག་འཚལ་ནས་གསོལ་བ་འདི་ལྟར་བཏབ། ཨེ་མ་ཧོ། རང་སྣང་རྣམ་དག་མཁའ་འགྲོའི་འདུ་གླིང་ན། །རང་བྱུང་རིག་སྐུ་སངས་རྒྱས་པདྨའི་ལྕམ། །རང་གསལ་ཡེ་ཤེས་སྒྱུ་འཕྲུལ་མཁའ་འགྲོས་བསྐོར། །རང་སེམས་མ་བཅོས་གཉུག་མའི་གུས་ཕྱག་འཚལ། །རང་བྱུང་ལྷུན་འགྲུབ་དངོས་ཡིད་མཆོད་པ་འབུལ། །རང་གཞན་གཉིས་འཛིན་སྒྲིབ་པ་དབྱིངས་སུ་བཤགས། །བླ་མེད་ཡང་དག་དོན་ལ་རྗེས་ཡི་རང་། །ཐེག་གསུམ་ཆོས་ཀྱི་འཁོར་ལོ་བསྐོར་བར་བསྐུལ། །རྒྱལ་རྣམས་མྱ་ངན་མི་འདའ་བཞུགས་གསོལ་འདེབས། །འདིས་མཚོན་དགེ་བ་ཁམས་གསུམ་འགྲོ་ལ་བསྔོ། །ཀུན་ཀྱང་གནས་ངན་འཁོར་བ་ལས་སྒྲོལ་ཏེ། །ཞིང་མཆོག་དམ་པ་དེ་རུ་སྐྱེ་བར་ཤོག །བདག་ནི་ཚེ་རབས་ཚེ་བརྒྱུད་ཐམས་ཅད་དུ། །རྒྱལ་ཡུམ་མཚོ་རྒྱལ་ཁྱེད་ཀྱིས་རྗེས་བཟུང་སྟེ། །བདག་གི་སྒོ་གསུམ་བྱིན་གྱིས་རླབས་ཏུ་གསོལ། །དེའི་མཐུས་བདག་ཉིད་མཐོང་ཐོས་དྲན་རེག་དང་། །ཆགས་བྲལ་ཟག་ཟད་སྐྱེས་བུ་ལ་སོགས་པ། །བདེ་ཆེན་ཆགས་མེད་ཆགས་པས་ཡིད་དྲངས་ཤིང་། །ཆགས་ལམ་མཐར་ཕྱིན་མི་སློབ་ཆེན་པོའི་སར། །དབང་འབྱོར་སྟོབས་ཀྱིས་ བྃ༔ བདག་གི་འདྲེན་ནུས་ཤོག །ཁྱད་པར་ཡིད་འོང་གཟུགས་ཀྱི་ལང་ཚོ་ཡིས། །མི་དགེ་སྡིག་པའི་རྐྱེན་དུ་མི་འགྱུར་ཞིང་། །རིག་འཛིན་རྣམས་ཀྱི་བདེ་བསྐྱེད་གསང་བའི་གྲོགས། །ས་ལམ་བསྒྲོད་པའི་ཕོ་ཉ་འགྱུར་བར་ཤོག །ཁམས་དྲུག་ཚང་བ་རྡོ་རྗེའི་རྟེན་འདི་ལ། །ཕྱི་ནང་རྟེན་འབྲེལ་འཚོགས་པའི་ཉེར་རྒྱུ་ལས། །བདེ་སྟོང་ཟག་པ་མེད་པའི་ཡེ་ཤེས་བསྐྱེད། །ཐབས་ཤེས་དབྱེར་མེད་རིག་སྐུ་མངོན་གྱུར་ཤོག །བརྩེ་ཆེན་ཤུགས་ཀྱིས་ཡལ་བར་མ་དོར་བར། །ཤིན་ཏུ་སྟོབས་ཆུང་སྐྱེ་དམན་བདག་གིས་ཀྱང་། །རྒྱལ་བསྟན་ཉམས་པ་གསོ་ཞིང་དེར་འཛིན་གྱི། །སྐྱེས་བུའི་སྐུ་ཚེའི་བར་ཆད་སེལ་ནུས་ཤོག །འཇིག་རྟེན་འདི་ན་གནས་བཅས་འགྲོ་བ་རྣམས། །སྔོན་གྱི་རྟེན་འབྱུང་མཐུ་ཡིས་ཉེར་དྲངས་ནས། །ནད་ཀྱིས་མནར་དང་དགྲ་ཡིས་བཅོམ་པ་དང་། །སྡུག་བསྔལ་ཉམས་ཐག་བཟོད་དཀའི་གདུང་བ་སོགས། །ཐབས་རྣམས་དུ་མས་བདག་གིས་སྐྱོབ་ནུས་ཤོག །ཆོས་ཉིད་གདོད་ནས་རྣམ་དག་བདེན་པ་དང་། ། ཆོས་ཅན་རྒྱུ་འབྲས་བསླུ་མེད་བདེན་སྟོབས་དང་། །ཡེ་ཤེས་མཁའ་འགྲོ་རྣམས་ཀྱི་བྱིན་རླབས་ཀྱིས། །བདག་གིས་སྨོན་པ་ཡིད་བཞིན་འགྲུབ་གྱུར་ཅིག །ཅེས་གསོལ་བ་དང་མཉམ་དུ། འཁོར་གྱི་མཁའ་འགྲོ་མ་རྣམས་ཀྱི་དབྱངས་གཅིག་གིས་འདི་སྐད་གསུངས། ཨེ་མ་ཨེ་མ་ངོ་མཚར་ཆེ། །བདེ་བ་ཆེན་པོའི་ཡེ་ཤེས་སྐུས། །བདེ་བའི་འབྱུང་གནས་རིག་འཛིན་ཡུམ། །རྡོ་རྗེ་འཛིན་མ་ཁྱོད་མིན་ནམ། །ལས་ལྡན་རྗེས་སུ་འཛིན་པའི་ཕྱིར། །གང་འདུལ་ཐབས་ཀྱིས་སྐུར་བཞེངས་ནས། །འགྲོ་དོན་སྐྱོ་ངལ་མེད་པར་མཛོད། །སེམས་མ་ཆེན་མོ་ཁྱེད་མིན་ནམ། ཐབས་ལ་བརྟེན་ནས་ཤེས་རབ་ཀྱིས། །ཟབ་པ་ཀུན་གྱི་བཅུད་ལ་དབང་། །ཁམས་དབང་དང་མཐུན་འགྲོ་རྗེས་བཟུང་། །ཐར་པའི་དེད་དཔོན་ཁྱོད་མིན་ནམ། །རིགས་བཟང་སྐལ་ལྡན་ལས་འཕྲོ་ཅན། །ཀྱིལ་འཁོར་ནང་དུ་ད་བྱོན་འཚལ། །ཞེས་གསུང་སྟེ། བདག་བསུ་བའི་ཚུལ་མཛད་ནས། གཙོ་མོའི་མདུན་དུ་སོང་བས་ཤོག་དྲིལ་གཅིག་གནང་ནས། ཁྱོད་ང་ཡིས་ཕོ་ཉ་ཡིན་པས་ད་དུང་བསྟན་འགྲོའི་དོན་མཛོད་དང་། མ་འོངས་པ་ན་ཨོ་རྒྱན་མཁའ་འགྲོའི་གླིང་ནས་མཇལ་འོང་། དེ་དུས་བདག་གིས་བསུ་བ་བྱེད་དོགསུངས། དེ་ནས་ཐམས་ཅད་ཀྱིས་ཚོགས་ཀྱི་དགའ་སྟོན་ལ་རོལ་བས། བདག་གིས་གཙོ་མོ་ལ་འདི་སྐད་ཞུས། མཁའ་འགྲོའི་འདུས་སྟོན་གྱི་སྐལ་བ། བདག་གི་དཔའ་བོས་ཁྱེར་ཤོག་གསུངས་ཡོད་པས། དེ་མི་འགལ་ཙམ་དུ་དངོས་ བྃ༔ གྲུབ་ཀྱི་རྫས་ཞིག་གནང་དུ་སོལ་ཞུས་ཚེ། དམ་མེད་ལ་མིང་ཙམ་ཡང་མ་སྨྲ་ཞིག་གསུངས་ནས། དངོས་གྲུབ་ཀྱི་རྫས་ཅུང་ཟད་གནང་བས། བདག་གིས་འདི་མེད་དུ་འགྲོ་སྙམ་ནས། སྙིང་ཐད་དུ་བཟུང་ཞིང་ཡེ་ཤེས་སེམས་མ་དང་གཉིས་མེད་དུ་བཅིང་སྟེ། དེ་ལ་སེམས་འཛིན་བྱས་པའི་རྐྱེན་ལས་ཉམས་སྣང་ལས་སད་དོ། །དེ་ནས་སྔར་གྱི་རྫས་དེ་ཀ་ཨེ་ཡོད་བལྟས་པས། སྔར་ལྟར་དྲི་བཟང་གི་ནུས་པ་ཙམ་ཡང་མ་ཉམས་པར་འདུག་པས། གསང་གྲོགས་ཡིད་བཞིན་ནོར་བུ་ལ་འདི་མཁའ་འགྲོའི་ཚོགས་སྐལ་རེད་ཞུས་ནས་ཕུལ་བས། ཐུགས་ཤིན་ཏུ་དགྱེས་ཏེ་ངོ་མཚར་ཆེ་གསུངས་ནས། དབང་བཞིའི་དམིགས་པས་གཞིར་དྲངས་ཏེ་གསོལ་བས། དགའ་བཞིའི་ཡེ་ཤེས་གོང་འཕེལ་དུ་བྱུང་ངོ་གསུངས། དེ་སྐབས་ཨ་འཛོམས་སྒར་ནས་བང་མི་ཐོན་ནས། ང་རང་ཨ་འཛོམས་སྒར་ལ་འོང་དགོས་པའི་བཀའ་ཤོག་ཐོན་བྱུང་བས། བདག་གིས་རྗེ་ལ་འདི་སྐད་ཞུས། ང་རང་ཨ་འཛོམ་སྒར་ལ་མི་འགྲོ། གཅིག་ཐད་ནས་ང་རང་ལ་རྐང་པ་མེད་པ་དང་། བུ་ཆུང་ནར་ཆུང་བས་སྐྱུར་ཐབས་བྲལ་བ་དང་། མིན་ན་བྱ་བ་གང་ཐད་ནས་ད་སྔ་རང་བློ་རྒོད་ཆོད་བྱས་ཏེ་གཞན་དབང་དུ་བཏང་མ་མྱོང་། ཁྱོད་ཀྱི་སྐུ་མདུན་ལྟ་བུ་ཡིན་ཀྱང་ ཐུགས་ལ་མངའ་བཞིན། མགར་སྤྲུལ་ཁོ་རང་གིས་བདག་དགོས་མེད་བྱས་པ་མ་གཏོགས་རང་བློ་མིན། དེའི་ཕྱིར་ན་ད་ལན་ཀྱང་བདག་གི་བྱ་བ་གང་ལ་བསམ་བློ་བྱས་ཀྱང་། ད་ནི་རང་གཞན་འཁྲུལ་པའི་བྱ་བ་མི་བགྱི་སྙམ་པ་དང་། ཁྱད་པར་ཁྱོད་ཀྱི་སྐུ་རིང་ཕན་ཆད་རང་གཅིག་པུར་དབེན་རི་ལ་སྒྲུབ་ཚུགས་ཤིག་ཨེ་ཟིན་སྙམ་པ་ལས། གྲོགས་ཞིག་དང་མཉམ་དུ་འདུག་དགོས་སྙམ་པ་མེད་པས་ན། ད་ལན་ཡང་འགྲོ་འདུན་མེད་པ་དེའི་ལན་གྱིས་ཡིན་མ་གཏོགས། བདག་སྐྱེ་དམན་ཉམ་ཐག་སུ་དང་སུ་ཡིན་ཀྱང་ཁྱི་སྡོམ་ལྟར་ཁ་བསྐོར་སླ་བ་དང་། བླ་མ་ཨ་འཛོམ་སང་རྒྱ་བོད་ཡོངས་གྲགས་ཀྱི་སྐྱེས་ཆེན་དམ་པ་ཡིན་པས། དེས་དམན་པ་བདག་ལྟ་བུ་ལ་བང་མི་བཀའ་ཤོག་བསྐུར་ནས་འབོད་པ་བྱུང་དུས་ལོས་འགྲོ་དང་། ང་རང་བློ་རྒྱ་ཆུང་བས་འགྲོ་ལན་མ་བདེ་བར་སྣང་། ཁྱད་པར་སྔར་རང་ཅག་གཞན་དབང་ལ་སོང་ནས་དུས་ད་བར་དུ་ལྷན་དུ་མ་འཛོམ། ད་ལན་རྐྱེན་ངན་གྲོགས་སུ་འགྱུར་ནས། འུ་ཅག་གདན་ཐོག་གཅིག་ཏུ་འཛོམ་ཡོད་པའི་གནས་སྐབས་འདིར། བདག་ཁྱོད་དང་སྐད་ཅིག་ཙམ་ཡང་འབྲལ་མི་ཐུབ་ཅིང་། བྱིས་པ་མ་ལ་འཁོར་བ་ལྟ་བུར་ཁྱེད་ལ་སེམས་ཤིན་ཏུ་ཆགས་འདུག་པས་འགྲོ་མ་དགོས་ན་དགའ་ཞུས་ཚེ། རྗེའི་ཞལ་ནས། བྃ༔ ང་རང་ཡང་ཁྱེད་ལ་ཡིད་འཕྲེང་ནས་ཉིན་གཅིག་ལྟ་བུ་ལ་ཡང་འབྲལ་མ་དགོས་ནགནས་ཁང་ནོར་གྱིས་གང་བ་ལས་དེས་དགའ་སྤྲོ་ཤིན་ཏུ་ཆེ་ཡང་། བླམ་ཨ་འཛོམ་གྱི་སྐུ་ཚེ་ལོ་གཅིག་མ་དགོས་ཟླ་བ་གཅིག།ཟླ་བ་གཅིག་མ་དགོས་ཉིན་གཅིག་བཞུགས་པའི་རྟེན་འབྲེལ་གྱི་གྲོགས་ལྡན་བྱུང་ཚེ། སྤྱིར་སངས་རྒྱས་ཀྱི་བསྟན་པ་སེམས་ཅན་གྱི་བདེ་སྐྱིད། སྒོས་རང་གཞན་རྣམས་ཀྱི་བསོད་ནམས་ཀྱི་ཚོགས་རྒྱ་ཆེན་པོ་བསགས་པའི་མཐུན་རྐྱེན་དུ་འགྲོ་བ་དང་། ཁྱད་པར་ཁྱོད་རང་གི་སྔར་ནས་རྡོ་རྗེའི་ལུང་དུ་གསལ་བ། ཨཀྵར་བཛྲ་དང་རྟེན་འབྲེལ་གནད་ལྡན་རེ་བྱུང་ན། ཕན་ཚུན་ཀུན་གྱི་ཚེ་ཆོས་གདུལ་བྱ་ཐམས་ཅད་ལ་ཕན་ཐོགས་འབྱུང་ངེས་པ་ཡིན་སོགས་གསུངས་ནས་དེ་ཀར་འགྲོ་ཐག་བཅད། དེ་སྐབས་གཏེར་སྟོན་བླ་བྲང་ནས་རྡོར་དགྲ་ཡབ་ཡུམ་དང་༏ གཞན་སློབ་འབངས་གལ་ཆེན་ཐམས་ཅད་ཀྱིས་ང་རང་མར་འོང་དགོས་གསུངས་ནས། འདི་ཕྱིའི་ཆོས་དམ་གྱི་བཀའ་གནད་འཕང་བ་སོགས་མཛད། རྗེ་ཁོང་བྱོན་པར་དགོངས་ཀྱང་བསྒོམ་གྲྭ་ཆེན་པོའི་དབུ་བཙུགས་ནས་ཆོས་ཁྲིད་གསུང་དགོས་པ་སོགས་ཀྱིས་རང་དང་མཉམ་དུ་བྱོན་ཁར་མ་གྲུབ་ནས། ངེད་མ་བུ་གསུམ་གྲྭ་པ་གསུམ་བཅས་ལོ་ཁྱིམས་དེ་ཀའི་ཟླ་བ་གསུམ་པའི་ ཚེས་ཉེར་གཉིས་ཉིན་ལམ་དུ་ཞུགས། རྗེའི་སྐྱེལ་ཐུང་མཛད་སྐབས་འབྲལ་མ་ཐུབ་ནས། རང་ཤི་ཡུལ་དུ་འགྲོ་བ་ལྟ་བུར་སྡུག་བསྔལ་བྱུང་ཡང་བྱ་ཐབས་བྲལ་ནས་རྨོངས་གླུ་འདི་ལྟར་བླངས་པ། ལྷན་སྐྱེས་རིག་པ་བདེ་ཆེན་གར་དབང་པོ། །ཐབས་ཀྱི་ཆ་འཛིན་གཟུགས་ཀྱི་སྐུར་བཞེངས་པ། །སྙིང་གི་ནོར་བུ་པདྨ་ལས་འབྲེལ་རྩལ། །གང་དང་སྐད་ཅིག་མི་འབྲལ་ལྷན་འཚོགས་ནས། ། དགྱེས་པའི་འཛུམ་བསྟན་གསུང་གི་དབུགས་དབྱུང་འབྱིན། །ཐུགས་རྗེས་དགོངས་པས་གང་འདོད་ཆོས་ཆར་འབེབས། །ཐབས་ཤེས་བདེ་རོལ་གདན་ལ་རོ་མཉམ་ཚེ། །ལྷ་ཡི་ཡུལ་བཞིན་བདེ་སྐྱིད་བསམ་མི་ཁྱབ། །དཔའ་བོ་ཁྱོད་དང་འབྲལ་སྙམ་མེད་ན་ཡང་། །ད་རེས་སྔོན་འབྱུང་རྟེན་འབྲེལ་མཐུས་བསྐུལ་ནས། །རེ་ཞིག་མི་མངོན་གནས་གཞན་འགྲོ་དགོས་ཚེ། །འཆི་ཀྲེ༦ བདག་ཡུལ་བཞིན་དྲན་ཁམས་སྡུག་གིས་ཟིན། །འོན་ཀྱང་པད་འབྱུང་ཡབ་ཡུམ་ཐུགས་བསྐྱེད་དང་། །འུ་ཅག་ཐབས་ཤེས་དམ་གཙང་ཐུགས་བརྩེ་བས། །མྱུར་དུ་དངོས་ཞལ་མཇལ་བའི་སྨོན་ལམ་ཞུ། །ཞེས་ཞུས་པའི་ཚེ། རྗེ་ནས་ཀྱང་དེ་ལྟར་ཐུགས་བསྐྱེད་མཛད་ནས། བྱུང་དང་འབྱུང་འགྱུར་གྱི་བསླབ་བྱ་མཛད་ནས་རང་གནས་ལ་བཞུགས། གཞན་བུ་སློབ་རྣམས་ཀྱིས་བསྐྱེལ་ བྃ༔ མ་མཛད་ནས་ངེད་ཅག་ལམ་དུ་ཞུགས་ནས་སོང་སྐབས། རྗེ་ལ་སེམས་ཤིན་ཏུ་འཕྲེང་ནས་འགྲོ་སྙིང་མ་འདོད་ནས། རྗེའི་བཞུགས་གནས་ཀྱི་རྒྱབ་རི་མཐོང་ས་ཙམ་དུ་སོང་ནས་དེ་ཀར་བསྡད། ནང་སྔ་མོ་ཕྱིར་འགྲོ་དགོས་སྙམ་ཀྱང་། ཡང་གྲོགས་ཀྱི་བཀའ་བཅག་མ་ཕོད་ནས་རིམ་གྱིས་སོང་ཞིང་སེར་དགོན་དུ་ཐོན་ཚེ། བསོད་སྤྲུལ་སང་ནས་གྲྭ་ལག་དགོན་དུ་སྐྱེལ་མ་སོགས་ཀྱི་སྟ་གོན་མཛད། ཁོང་གི་ཆིབས་རྟ་བཟང་པོ་ཞིག་ཡོད་པ་དེ་ཀ་རང་ལ་བསྐུར། ཁྱད་པར་ཡིད་བཞིན་ནོར་བུའི་སྐུ་བདག་ཁོང་ཡིན་པས་ན། ཁྱོད་ཡབ་ཡུམ་གྱི་བདག་པོ་ང་རང་ལས་གཞན་སུ་མེད། དེའི་ཕྱིར་ན་ཁྱོད་རང་ཨ་འཛོམ་སྒར་ལ་གཏན་བཞུགས་བྱེད་པ་ལྟ་ཞོག །ཁྱོད་ཡབ་ཡུམ་གསུང་གྲོས་མཛད་པ་ཕན་ཆད་འགྱང་མི་ཉན་གསུངས། རང་ནས་ཀྱང་དེ་ལྟར་ཁས་ལེན་བྱས་ཏེ་ཐོན་འོང་ཞུས་ཚེ། བསོད་སྤྲུལ་སང་ནས་དེཀར་ཐུགས་ཐག་བཅད་ནས་སྐྱེལ་མ་མཛད་དོ། །དེནས་ངེད་རྣམས་རིམ་གྱིས་སོང་ནས་ཟླ་བ་བཞི་པའི་ཡར་ཚེས་བཅུ་གསུམ་ལ་ཨ་འཛོམ་སྒར་ཐོག་ཏུ་ཐོན། ཁོང་སང་ནས་བསུ་བ་སོགས་མཛད་ནས་ཕན་ཚུན་རྟེན་འབྲེལ་བཟང་པོའི་གསོས་སུ་གྱུར། དེ་ནས་འགྲོ་འདུལ་དཔའ་བོ་རྡོ་རྗེ་དང་། མཇལ་འཕྲད་མཛད་སྐབས། བླ་མའི་ ཞལ་ནས། ཁྱོད་ད་ལན་འདིར་བྱོན་སྟབས་འོང་བ་ཤིན་ཏུ་བཟང་། རང་གཞན་ཀུན་ལ་རྟེན་འབྲེལ་གྱི་འཆར་སྒོ་དུ་མ་ཡོད་པ་དང་། ཁྱད་པར་ཁྱོད་རང་མཁའ་འགྲོ་ཀུན་དགའ་འབུམ་མའི་སྐྱེ་སྲིད་ཡིན་པ་དུས་སྔ་མོ་ནས་རང་གི་སེམས་ལ་ཤར་ནས། ཨ་ངག་ལ་སོགས་པའི་ཉེ་འཁོར་རྣམས་ལ་གསལ། དེ་རྗེས་མགོ་ལོག་ཕྱོགས་ན་ནག་མོ་གཏེར་སྟོན་ཞིག་འདུག་ཟེར་བ་ཐོས་ཚེ། འབུམ་མའི་རྣམ་རོལ་ཡིན་པར་ཐག་བཅད་ཡོད་སྐབས། ཁྱོད་དང་ཆོས་འབྲེལ་ཡོད་པའི་བླ་སེར་རེའི་འདི་སོ་བྱོན་སྐབས་ལོ་རྒྱུས་གསལ་པོ་རེ་ཐོས་བྱུང་། ཁྱོད་ཀྱི་སྙན་རྒྱུད་ཀྱི་སྐོར་རྡོ་རྗེཕག་མོའི་སྒྲུབ་ཐབས་རེ་ཙམ་ལ། བདག་གིས་འབྲེལ་འཇོག་རེ་བྱས་ནས་དཔེ་རྒྱུན་ཙམ་ཡོད་ལ་སོགས་པའི་ལུགས་གཉིས་ཀྱི་གསུང་ཞིབ་དུ་མ་མཛད་ནས། ད་ཁྱོད་ཀྱིས་ད་ལན་གཟའ་སྐར་བཟང་བ་ཞིག་ཡིན་པས། ཁ་བྱང་རྣམས་ཀྱི་ལུང་འདོན་དགོས་གསུངས། བདག་གིས་ཀྱང་རྟེན་འབྲེལ་ཙམ་དུ་ཁ་བྱང་ཆུང་བ་ལོ་བཅུ་གསུམ་དུས་བྲིས་པ་དེ་ཀའི་ལུང་ཕུལ་བས། བླ་མའི་ཞལ་ནས། ཁྱོད་གཏེར་སྟོན་རེད་གསུངས་ནི་བླ་མ་སུ་བྱ་བ་ཡིན་གསུངས། བདག་གིས་ང་མོ་ལོ་གསུམ་བཅུ་ལ་མ་ཐོན་བར་དུ་བླ་མ་དང་འཕྲད་མ་མྱོང་བ་ཡིན་པས། ང་གཏེར་སྟོན་ཨེ་རེད་འདྲི་ལོང་མ་བྱུང་། བྃ༔ ཆུང་ལོ་བཅོ་ལྔ་ནས་བཟུང་སྟེ་གང་དྲན་ཡིག་རིས་དང་གླུ་རུ་བླངས་པ་ཡིན། དེ་མིན་གཏེར་སྟོན་ཡིན་མིན་རྟོག་དཔྱོད་མ་བྱས། ཆོས་ཉིད་ཀྱི་དོན་རྟོགས་ན་སྣང་སྲིད་བརྡ དཔེའི་ཚུལ་དུ་ཤར་དར་གི་ལགས། ང་རང་དབྱུག་པ་ཅན་ལ་ཅི་བྱུང་ཡང་ལྷུང་འབབ་མེད་པ་ཡིན་པས། གང་ཤར་ཡིག་རིས་སུ་བགྱིས་པ་དང་། གང་ཤེས་མན་ངག་ཏུ་བཤད་པ་ཡིན་ཞུས་ཚེ། བླ་མས་ཁྱེད་གཏེར་སྟོན་རང་མཐོང་ཅན་ཞིག་ཡིན་པ་འདྲ་མ་གཏོགས། ཁོང་གཏེར་སྟོན་གཞན་རྣམས་སུ་ཡིན་ཀྱང་། རང་གི་རྩ་བའི་བླ་མའམ། གཞན་ས་ཐོབ་སྐྱེས་བུ་རྣམས་ཀྱིས་གཏེར་སྟོན་དུ་མཚན་གསོལ་བ་མ་གཏོགས། རང་གིས་རང་གཏེར་སྟོན་ཡིན་ཟེར་བ་མ་ཚོར་གསུངས། ཡང་བདག་གིས་ཁོང་གཏེར་སྟོན་རྣམས་རྒྱ་གོང་མས་འབངས་ལ་ཐོབ་གཏད་པ་ལྟར། གཞན་ཞིག་གིས་ཁྱོད་ནི་གཏེར་སྟོན་ཐོབ་བོ་ཟེར་བ་ཡིན་ཐང་ལགས། དེ་ལྟར་བརྗོད་པ་ཙམ་གྱིས་གཏེར་སྟོན་ཡིན་མིན་ཆ་ཆོད་པར་ཤིན་ཏུ་དཀའ་སྙམ། དེང་དུས་ཡི་གེའི་འདོན་ཤེས་པ་ཙམ་དང་། སེམས་ཀྱི་བྱུང་ཚུལ་བསྐྱང་ནས་ཟླ་མཚམས་རེ་བསྡད་པ་ཙམ་མ་གཏོགས། དངོས་དང་དངོས་མེད་ཀྱི་མཚན་ལྡན་བླ་མའི་ཞབས་ལ་མ་གཏུགས། བསྐྱེད་རྫོགས་ཟབ་མོས་རང་རྒྱུད་མ་སྨིན། འཁོར་ བའི་བྱ་བ་ཆོས་བརྒྱད་ཀྱི་འདུན་པ་མ་བོར། སྡོམ་དང་དམ་ཚིག་ཚུལ་བཞིན་བསྲུང་མ་དགོས་པ་སོགས་ཀྱི་བྱ་བ་མཐོང་ཆོས་སུ་ཡོདཀྱང་། ད་དུང་གཏེར་སྟོན་བྱས་ཏེ་ཡི་གེ་མང་པོ་འབྲི་བ་ཤིན་ཏུ་མང་བས། གཏེར་སྟོན་རེད་བརྗོད་པ་ཙམ་གྱིས་ཅི་འགྱུར་མི་ཤེས་སྙམ། དེའི་ཕྱིར་ན་དམན་པ་ང་རང་ལྟ་བུ་ནི་གཞན་ཞིག་གིས་གཏེར་སྟོན་ཡིན་མིན་ཇི་ལྟར་བརྗོདཀྱང་། རང་སེམས་གཡོ་སྒྱུ་མེད་ཅིང་དམ་ཚིག་ལ་མངོན་ལྐོག་མེད་པ་དང་གཅིག །ནས་དང་ཡུག་པོའི་ས་བོན་ཆུང་ནས་ཁྱད་པར་ཡོད་པ་ལྟར། ང་རང་ཆུང་ལོ་ངོ་བརྒྱད་ནས་བླ་མ་མཁའ་འགྲོས་རྗེས་སུ་བཟུང་སྟེ་སྨིན་གྲོལ་ལ་བཀོད་པ་དང་གཉིས། བརྡ་ཤོག་ཡོད་པ་དང་མེད་པ་གང་ཡིན་ཀྱང་རང་བཟོས་བློ་ཡིས་བཅའ་བཅོས་ཐེ་ཚོམ་མེད་པར་གཏེར་དཔེ་ལྟར་བྲིས་པ་དང་གསུམ། ཐབས་གྲོགས་དང་ཆོས་བདག་འདུལ་ཞིང་ལ་སོགས་པ་ཐམས་ཅད་ལུང་བྱང་གསལ་པོ་དུ་མ་ཡོད་ཀྱང་། སྔོན་གྱི་སྨོན་ལམ་གྱི་དུས་ལ་མ་བབ་བར་དུ། རང་འདོད་ཀྱི་རྩོལ་བ་ཆེན་པོས་འབད་པ་མེད་པ་སོགས་ཀྱི་གཞི་བྱས་ནས། གཞན་ཞིག་ལ་ང་གཏེར་སྟོན་ཨེ་རེད་ཟེར་རྒྱུ་མ་བྱུང་བ་ཡིན་མ་གཏོགས། ང་རང་ཡོན་ཏན་ཀུན་ཟད། སྐྱོན་ཀུན་ལྡན་མི་ཡི་བྲན་མགར་ར་སང་ཟེར་བའི་གཡོག་མོ་ཞིག་ཡིན་པས། རང་མཐོང་ བྃ༔ རང་གི་གོ་རྒྱུའི་ཡོན་ཏན་སྤུ་རྩེ་ཙམ་ཡང་མེད་ལགས། དེང་སང་ཇོ་མིན་ནག་མིན་ཙམ་འོང་བ་འདི་བདག་གི་འདྲེན་སྟོན་དམ་པ་སྤྲུལ་སྐུ་ཡིད་བཞིན་ནོར་བུའི་བཀའ་འདྲིན་ལས་བྱུང་བ་ཡིན་ཞུས་ཚེ། བླ་མའི་ཐུགས་ཤིན་ཏུ་དགྱེས་པར་མཛད་ཅིང་། ཕ་བཟང་གི་བུ་མོ་ཁྱོད་འདི་ལྟར་ལོས་ཡིན། དམ་ཚིག་ལ་མངོན་ལྐོག་མེད་པར། ཕ་ནོར་བུས་ལོན་པ་ཕན་ཆད་ཅི་ཡོད་གསུངས། དེ་ནས་བླ་མ་རིན་པོ་ཆེས་བདག་ལ་ཀུན་མཁྱེན་བླ་མའི་གདམས་པ་