Tibetan
ངེད་ཅག་དང་བཅས་པ་ལྷན་དུ་བྱོན་ནས། གནས་དེ་ཀར་བཞུགས་གདན་འཁོད་དེ། ཟབ་གཏེར་གཉིས་ཀྱི་དབང་ལུང་སོགས་ཕར་ཕུལ་བ་དང་། ཚུར་ཞུ་བ་སོགས་བྱས། ཁྱད་པར་རྗེ་དེ་ཉིད་ཀྱིས་གཏེར་བྱོན་སྒྲོལ་དམར་གྱི་སྒོ་ནས་བདག་གི་དོན་དུ་མཁའ་འགྲོའི་སུན་བཟློག་མཛད། ང་རང་གི་ནད་གཞི་འབམ་དང་དམ་གྲིབ་གཉིས་ལ་རྒྱུ་བྱས་པ་རེད་གསུང་སྟེ། སྨན་དང་ཅི་དགོས་རིམ་གྲོ་སོགས་མཛད་ཅིང་། ཁྱད་པར་ཡབ་ཡུམ་གཉིས་ནས་སྐུ་ཚེ་མཛད་འཕྲིན་རྒྱས་ཕྱིར་ལུགས་གཉིས་ཀྱི་ཞིབ་གསུངས་དང་། གདུལ་བྱ་སེམས་ཅན་གྱི་དོན་མ་རྫོགས་ཀྱི་བར་དུ་ཐབས་ཤེས་འདུ་འབྲལ་མེད་པའི་ཐུགས་བསྐྱེད་སྨོན་ལམ་མཛད་པ་གཏེར་གཞུང་དུ་གསལ། དེ་ནས་ངེད་ཅག་རང་ཡུལ་ཕྱོགས་ལ་འོང་ནས་རི་ཟབ་ཞེས་པའི་ནང་དུ་ཐོན་ནུབ་རྨི་ལམ་ལ། ཡང་ལྷན་སྐྱེས་ཀྱི་མི་མོ་འཇིགས་སུ་རུང་བ་དེ་ཐོན་བྱུང་ནས་འདི་སྐད་ཟེར། ཁྱོད་དམ་ཉམས་རྣམས་ཀྱི་ཁྲོད་དུ་ཅིའི་ཕྱིར་འགྲོ་བ་ཡིན། གསེར་དང་ར་གན། ཆང་དང་ཆུ་གཉིས་ནོར་བ་ལྟ་བུར། རང་སྐལ་གྱི་སེམས་དཔའ་དགོས་མེད་དུ་དོར། རང་ བྃ༔ གཏེར་ཟབ་མོའི་འཛིན་སྐྱོང་རྒྱབ་ཏུ་བོར་ནས། འཁོར་བའི་ཁ་འཛིན་ལ་གཡེངས། ཁྱོད་ཆུང་ནས་ད་བར་གྱི་དུས་ལ་ཐུག་ཚེ། ང་རང་གིས་དྲང་པོའི་བསླབ་བྱ་བྱས། ཟབ་མོའི་ཆོས་གཏེར་གྱི་ཕ་ཕོག་གཏད། རྐྱེན་ཕྱི་ནང་གི་བར་ཆད་བཟློག་པ་སོགས་མ་ཡིས་བུ་སྡུག་བརྩེ་བ་བཞིན་བྱས་ཏེ་བསྐྱེད་བསྲིང་བ་ཡིན་ཀྱང་། ད་དུང་རང་ཚུགས་མི་ཐུབ་ཅིང་གཞན་དབང་ཁོ་ན་ལ་གཏོང་དགོས་པའི་དོན་ཅི་ཡོད་ཟེར། ཡང་བདག་གིས་ང་རང་བློ་སྣ་མང་ནས་གྲོགས་དང་གྲོགས་མིན་ནོར་བ་མ་ཡིན། ལྷ་དང་བླ་མ་རྣམས་ཀྱིས་ཞལ་གསུང་བཅག་མ་ནུས་པས། རང་དོན་རྒྱབ་ཏུ་བོར་ནས། བདུད་འདུལ་དབང་ཕྱུག་གླིང་པའི་ཟབགཏེར་འཛིན་སྐྱོང་རེ་ཨེ་འོང་སྙམ་ནས། སེམས་འདུན་གྱི་འཕེན་པ་དེ་ཀར་གཏད་པ་སོགས་ཀྱིས་ད་བར་ལ་རང་དོན་མ་འགྲུབ་པ་དང་། ཁྱད་པར་ཐབསགྲོགས་དང་ཆོས་འཛིན་ཐམས་ཅད་གཞན་དབང་ཁོ་ན་ལ་སོང་བས། བདག་སྐྱེ་ལུས་དམན་པས་དེ་རྣམས་དང་འཕྲད་ཐབས་མ་བྱུང་བ་ཡིན། ད་ལན་གྱི་སྐབས་ཡང་ང་རང་མི་འགྲོ་རང་དབང་མེད་པ་དེ་ལན་སྨྲས་ཚེ། མོ་ན་རེ། ཁྱོད་རང་མི་རུས་ངན་པའི་རྐྱེན་གྱིས་བྱ་བ་གང་ཐད་ནས་ལ་ཡོག་མེད་པར་བྱེད་དགོས་སྙམ་ནས། ད་བར་ལ་མགར་ར་སང་གི་ཟུར་ལ་ ལྷག་སོང་བ་ཡིན། ད་ལོ་ཕན་ཆད་ཁྱོད་ངེད་ཅག་གི་དབང་ཡིན། མགར་ར་སང་གི་ཟུར་ལ་སྡོད་པའི་དུས་རྫོགས་པ་ཡིན་ཀྱང་། ད་དུང་སྨོན་ལམ་ལོག་པའི་སྐྱེས་བུས་རྒྱུད་བསྐུལ་ནས། ཁྱོད་ཀྱི་ཚེ་ཆོས་གདུལ་བྱ་རྣམས་ལ་ཅི་འགྱུར་མི་ཤེས། མར་མེ་དང་དྲི་བཞོན། ཆུ་དང་མེ། རྡོ་དང་ལྕགས་བཞིན་ཡིན་པས་སྟབས་གཟབ་དགོས་ཟེར་བ་དང་མཉམ་དུང་རང་གཉིད་ལས་སད་དོ། །དེ་ནས་ངེད་རྣམས་སོང་བའི་བླ་བྲང་གི་སྒར་གཞི་མགར་སྐོར་ནང་དུ་བྱོན་སོང་འདུག་པས། བདག་གིས་ཐུབ་བཟང་ལ་ད་ལོ་སྒར་གཞི་མགར་སྐོར་ནང་དུ་བུད་སོང་བ་དེ། ལུང་བསྟན་བཟང་པོ་ཞིག་མེད་པས་རྟེན་འབྲེལ་མ་ལེགས་སྨྲས། ཐུབ་བཟང་ན་རེ། རེད་སྔར་རྒྱལ་སྲས་སང་རྒྱུ་མེད་ཟས་མེད་ཡིན་དུས། ཕུ་ནུ་མགར་སྐོར་རེད་ཟེར་བ་མཐོང་མ་མྱོང་། དེང་སང་ཁྱོད་ཀྱི་སྐུ་དྲིན་གྱི་རྒྱུ་རྫས་ལོངས་སྤྱོད་དང་ལྡན་ཡོད་དུས། མགར་ར་སང་གི་རིགས་སད་ནས་རྒྱལ་སྲས་ལ་བདག་པོ་བྱེད་འདུག་ཟེར། བདག་གིས་ཁྱོད་མི་ཆུང་བྱིས་པའི་བློ་ཅན་ཡིན་པས་ཅི་ཡང་མི་ཤེས་དེ་ལྟར་ཟེར་མི་ཉན། ཁོང་རྣམས་ཀྱིས་གོ་སོང་ན་ཚིག་ངན་བྱེད་འོང་སྨྲས། དེ་ནས་ཁྱིམ་དུ་ཐོན་ཉེ་བའི་སར། ཁྲ་བླ་སྙན་གྲགས་དང་། འཇིགས་མེད་དཀོན་མཆོག་རྣམས་དགའ་སྤྲོ་ཆེན་པོས་ བྃ༔ བདག་བསུ་བ་ལ་ཐོན་བྱུང་། བདག་གིས་རུ་བ་འདི་རྣམས་སུ་རེད་དྲིས་པས། སྙན་གྲགས་ན་རེ། འདི་རྣམས་མགར་སྐོར་རེད་ཟེར། ཡང་བདག་གིས་འུ་ཅག་རུ་བསུ་བྱེད་མི་སུ་རེད་སྨྲས་ཚེ། ཁོང་གཉིས་ན་རེ། རུ་བསུ་བྱེད་མི་གཅིག་ཀྱང་མི་འདུག །སྤྲུལ་སྐུ་དང་། ལྷ་དཔལ་གཉིས་ཀྱི་གྲོས་བྱས་ནས། རུ་མགར་སྐོར་ནང་དུ་བབ་དགོས་ཟེར་ནས་ཁ་མ་ཉན་པ་ཡིན། ངེད་གཉིས་ཀྱིས་སྔར་གཡས་རུའི་སྒར་ནས་འོང་དུས་མགར་སྐོར་ནང་དུ་མོ་དང་ལུང་བསྟན་མ་ཆུད་པའི་རྣམ་གྲངས་ཁོ་རང་གཉིས་ལ་བཤད་ཀྱང་། ལྷ་དཔལ་གྱིས་ངེད་སང་ལ་སྔར་བླ་མ་རང་ནས་ཡུམ་དང་སྲས་གཉིས་ལ་ཀུན་གྱིས་ལུང་བསྟན་དང་ཕྱག་མོ་འཁྲུགས་པ་ཞིག་ཡིན་པས་སྐྱོན་མེད་ཟེར་བ་ལ། སྤྲུལ་སྐུས་བདེན་པར་བཟུང་ནས་རུ་མ་བཀལ་ཐབས་མེད་ཡིན་ཟེར་བའི་ལན་གྱིས་འདིར་ཐོན་པ་ཡིན་ཟེར། དེ་ནས་མགར་སྐོར་དང་རུ་ལྷན་དུ་བསྡད་ནས། སྟོན་སར་རྫོགས་སྐབས་ཉིན་གཅིག་བདག་གིས་རྒྱལ་སྲས་ལ་འདི་སྐད་ཞུས། འུ་ཅག་ད་ལན་ཡུལ་ཕྱོགས་འདིཀར་འདུག་མི་ཉན་པ་འདྲ། བུ་ཆུང་འགྱུར་མེད་རྡོ་རྗེ་ལ་ཤིན་ཏུ་མོ་འཁྲུགས་པ་དང་། ང་རང་གི་རྐང་པ་ཡང་ཇེ་འཁྲུགས་ལ་སོང་ནས་ཆུ་ཟམ་གང་ཁུར་མི་ཐུབ་པ་ལྟ་བུར་སོང་འདུག ཁྱད་པར་འུ་ཅག་གཉིས་ད་ལོ་ཤི་དབྱེ་གསོན་བྲལ་ཞིག་གི་ངོ་ཡོད་འདུག་པས། རྫོང་གི་གནས་ནང་དུ་རབ་ལོ་གཅིག །འབྲིང་སྟོན་དགུན་ཙམ། ཐ་ནའང་ཟླ་བ་གཅིག་ཙམ་ཞིག་ལ་བཞུགས་ཀར་ཐོན་ན་ཤིན་ཏུ་བཟང་བར་སྣང་གི །དེ་མིན་འུ་ཅག་གི་ལས་མཐའ་ཅི་འགྱུར་མི་ཤེས་པ་འདྲ་ཞུས་པས། ཁོང་གི་ཞལ་ནས། ང་སྤྲང་སྡོམ་ལ་མི་འགྲོ། གསལ་སྒྲོན་མོ་དང་ང་གཉིས་ས་ཐག་གིས་ཕྱེས་པ་ཡིན་མ་གཏོགས། སེམས་ཐ་དད་དུ་སོང་བ་མ་ཡིན་པས། ཁྱོད་མ་བུ་ངའི་སར་བསྡད་ཚེ། གསལ་སྒྲོན་འདིཀར་མི་འོང་ཟེར་བས། ཁྱོད་རང་ཁ་གསོ་ཐབས་ནུས་ན་བུད་སོང་དང་ཆོག་གི །ང་རྫོང་གནས་ལ་མི་འགྲོ་ངེས་པ་ཡིན་གསུངས། ཡང་བདག་གིས་གསལ་སྒྲོན་འོང་མི་ཉན་པའི་ཐབས་འུ་ཅག་བྱོན་དགོས་ཞུས་པ་མིན། དེའི་ཐད་ནས་སྔར་ཞུས་པ་ལྟར་བར་ཆད་དངོས་གྲུབ་ལ་དགོངས་ཚེ། ཁྱོད་ཀྱི་ཐུགས་བབཅི་བདེ་ལོས་མཛད། ད་ལན་རྫོང་ནང་ལ་བྱོན་རྒྱུ་གྲུབ་ན་ཤིན་ཏུ་དགེ་བར་སྣང་བས་དེ་ལུགས་ཐུགས་ལ་ཞོག་ཞུས། དེ་ནས་ཉིན་གཅིག་ང་རང་ནོར་གྱི་རྫི་བུ་ལ་སོང་བས། ཡུལ་དེར་ཤིང་དང་ནགས་ཚལ་ཤིན་ཏུ་འཐུག་པའི་ཟིལ་པ་ཆེ་བ་དང་། རང་ལ་ཆར་གོས་མེད་པས་སྟེང་ནས་ཁ་ཆར་གྱིས་གདུང་ནས་གོས་ཕྱི་ནང་མེད་པ་ཆུ་ལ་བྱིང་བ་ བྃ༔ ལྟར་རློན་སོང་བ་ལ་རྐྱེན་བྱས་ཏེ། ནང་སྔ་མོ་རྐང་པ་གཉིས་ཀྱི་རྒྱུས་པ་འཐོན་ནས་འགྲོ་མི་ཤེས་པར་བྱེད་འདུག་པས། སྙན་གྲགས་མ་བུ་དང་། རྒྱལ་སྲས་གཉིས་ཀྱི་ཨ་ནེ་བསམ་སྐྱིད་སོགས་ཀྱིས་སྨན་པ་འབོད་དགོས་ཟེར་ཀྱང་། ཁོང་གི་ཐུགས་བབ་མེད་ཚེ་བཏང་སྙོམས་ལ་བཞག །རང་ནས་ཀྱང་སྙིང་རུས་བྱས་ཏེ་ནོར་བཞོ་བཤིག་དང་ཁྱིམ་གྱི་ལས་ཀ་ཐམས་ཅད་སྔར་ལྟར་ཅི་ལྕོགས་བྱས། དེ་སྐབས་ཡང་རྒྱལ་སྲས་སང་གི་སྐུ་ནུས་འཇིགས་མེད་དཀོན་མཆོག་ལ། ངེད་དཔོན་གཡོག་རྫོང་གནས་ལ་བྱོན་དགོས་པའི་ལོ་རྒྱུས་རྣམས་ཞིབ་པར་བཤད་ནས། དེ་ལྟར་ཁྱོད་ཀྱིས་རྒྱལ་སྲས་ལ་ཡང་ཡང་ཞུ་དགོས་སྨྲས་པས། ཁོང་ནས་ཀྱང་ལན་མང་པོར་དེ་ལྟར་ཞུས་ཀྱང་བྱེད་རྒྱུ་མ་རྙེད་ནས། གཉིད་མདའ་ཉི་མ་ལུང་བྱ་བར་སྟོན་རུ་རྫོགས། དེའི་ཉིན་གཉིས་གོང་ལ་སོང་བ་དེ་ལ་ཁག་བཞག་ནས། ང་རང་གི་རྐང་པ་གཉིས་ཞ་སོང་ནས་མལ་སར་ལྷུང་ཡང་ད་དུང་སྙིང་རུས་བྱས་ཏེ། རྒྱལ་སྲས་སྐུ་མཆེད་ལ་ན་བཟའ་ཆ་ཚང་སྤུས་ལྡན་ཞིག་བཟོ་དྲུབ་རེ་བྱས་ཚེ། ནད་གཞི་ཇེ་འཁྲུགས་ལ་སོང་ནས་འཆི་ལ་ཉེ་བར་བྱུང་ཡང་སྨན་དཔྱད་རིམ་གྲོ་བྱེད་པ་ལྟ་ཞོག །ཐུབ་བཟང་དང་། འཇིགས་མེད་དཀོན་མཆོག་གཉིས་ཀྱིས་ནད་གཡོག་བྱས་པ་ ཐུགས་ལ་མ་བབ་པའི་རྣམ་འགྱུར་མངོན་ཚེ། བདག་གིས་ཁོང་གཉིས་ལ་འདི་སྐད་སྨྲས། ང་རང་ནད་ཞབས་འདི་ལས་ཐར་སྲིད་པ་བྱུང་ན། མགར་ར་བླ་བྲང་གི་ཁྱིམ་དེར་མི་འདུག་ངེས་པ་ཡིན། ང་མོ་ལོ་ཉི་ཤུའི་དུས་ནས་ད་རྩ་དགུ་ལ་མ་ཐོན་བར་དུ་ལག་ངར་གྱིས་མེ་ཐུར་སོག་པས་ཐལ་ཕྱག་བྱས་ཏེ། མི་ཚེ་གཡོག་ལ་ཟད་པ་ཡིན། ད་འཆི་ཁར་ཐུགས་ཀྱང་སྨན་དཔྱད་རིམ་གྲོ་བྱེད་པ་ལྟ་ཞོག །ནད་གཡོ་རེད་མགར་སྐོར་ཕྱི་ནང་ཀུན་དང་། ཁྱད་པར་རྒྱལ་སྲས་ཁོ་རང་དང་བཅས་པའི་དགོངས་པ་དེ་ཁྱོད་གཉིས་ཀྱིས་གསལ་བ་ལྟར། ང་རང་གིས་ཟེར་མི་དགོས། བདག་གི་ནད་གཡོག་ཡིན་མིན། མགར་ར་ལྷ་མཆོག་སྨན་པ་ཡིན་པས། ཁོ་རང་འབོད་དུ་སོང་ལ་སྨན་དཔྱད་བྱེད་དུ་བཅུག་དགོས་སྨྲས། དེ་སྐབས་གཏེར་སྟོན་བླ་བྲང་གི་གཉེར་པ་འོད་འབར་དང་། འཇིགས་མེད་བཟང་པོ་གཉིས་ཀ་ཚོང་ནས་ལེན་དུ་ཐོན་བྱུང་བས། དེའི་གདོང་ལ་ཡིད་བཞིན་ནོར་བུ་གུ་རུ་རྟ་ཕག་གི་བསྐྱེད་རྫོགས་ཆ་ཚང་སྔར་ཞུས་ལྟར་ཕྱག་བྲིས་མཛད་ཅིང་གླེགས་ཤིང་ཡིག་ཐག་དང་བཅས་པ་སྤུས་ལྡན་གནང་འབྱོར་སྤྱི་བོར་ཕེབས་པ་དང་། དེ་དང་མཉམ་དུ་རྗེ་དེ་ཉིད་དགུང་ལོ་ཞེ་གཉིས་ཕན་ཆད་མི་བཞུགས་པའི་ལུང་བསྟན་སྣ་ཚོགས་བླ་མ་རིན་པོ་ཆེ་བདུད་འཇོམས་རྡོ་རྗེ་དང་། བྃ༔ གཞན་ཡང་གནས་གསུམ་མཁའ་འགྲོའི་ལུང་བསྟན་སོགས་དང་། ཁོང་དཔལ་རིར་ཕེབས་དགོས་བྱུང་ཚེ་ཁྱོད་ཀྱིས་ཐུགས་ངལ་མཛད་མི་དགོས། འུ་ཅག་ཡབ་ཡུམ་སྐད་ཅིག་ཙམ་ཡང་འབྲལ་བ་མེད་སོགས་གསུང་ཡིག་ཕེབས་པས་ཅི་བྱེད་ལྟོས་མེད་དུ་སོང་། ཕྱི་ནད་ཀྱིས་མནར། སེམས་སྡུག་བསྔལ་གྱིས་གདུང་ནས། རྗེ་དེ་ཉིད་ལ་སྨྲེ་སྔགས་ཀྱིས་སྐྱོ་གཏམ་དང་། ཁོ་མོའི་མགོན་དུ་བཞུགས་པར་གསོལ་བ་བཏབ་ནས་ཞུ་ཡིག་ཕུལ། དེ་ནས་ཡང་ཉིན་གཅིག་ཐུབ་བཟང་གི་ཡུལ་པ་རྣམས་ཐོན་བྱུང་བས། ང་རང་མཐོང་ཚེ་ཐམས་ཅད་ཀྱིས་མཆི་མ་བྱུང་ནས། ཨ་ཁ་ཁ་ད་ལན་ཁྱོད་འདས་འགྲོ་ངེས་པ་རེད། སྨན་པ་དང་མོ་པ་རྣམས་ཀྱིས་ཅི་ཟེར་འདུག་ཟེར་བས། བདག་གིས་ང་རང་ནད་འདིས་མནར་ནས་ལོ་གསུམ་ཙམ་ཡིན། ཇེ་འཁྲུགས་ལ་སོང་ནས་རང་མགོ་མ་ཐོན་པར་ཟླ་བ་གཅིག་ལྷག་ཙམ་སོང་། དེའི་ཚེ་སྨན་ཐུན་གཅིག །རིམ་གྲོ་ཁྲུས་ཙམ་ཡང་བྱེད་མ་མྱོང་བ། འཇིགས་མེད་དཀོན་མཆོག་དང་། ཐུབ་བཟང་སོགས་ཀྱིས་གསལ་སྨྲས་ཚེ། ཁོང་ཚོས་གྲོས་བྱས་ཏེ་མགར་ར་ལྷ་མཆོག་འབོད་དུ་སོང་ནས་ཐོན་བྱུང་། ཁོང་གིས་ང་རང་གི་རྩ་དང་ཆུ་ལ་བལྟས་ཚེ། ཆུ་འབམ་རེད། ནད་ཡུན་རིང་བའི་རྐྱེན་གྱིས་སྟོད་ དུ་འགྲོ་ཉེན་གདའ་ཟེར། དེ་སྐབས་ཐམས་ཅད་ཀྱིས་བདེནཔར་བཟུང་ཡང་། སྨན་གྱིས་ཕན་ཐབས་མ་བྱུང་ནས་འཆི་བ་ལ་ཉེ་འོང་བའི་ཚེ། ལྷ་དཔལ་དང་། རྒྱལ་སྲས་སྐུ་མཆེད་རྣམས་ཀྱིས་བཀའ་བགྲོས་མཛད་ནས། ངེད་མ་བུ་གཏེར་སྒར་ལ་བསྐྱལ་དགོས་ཟེར། དེའི་སྐབས་བདག་གིས་ང་མི་རོ་འཕང་པ་དུར་ཁྲོད་བྱེད་མི་དགོས། ངེད་མ་བུ་གཏེར་སྟོན་བླ་བླང་ཟུར་ལ་ཅིའི་ཕྱིར་འགྲོ། ང་རང་གིས་ཚེ་སྟོད་རྐང་པ་ཡོད་ཚེ་ཁྱོད་མགར་ར་སང་གི་གཡོག་བྱས། ད་ཤི་རན་དུས་གཞན་ཞིག་ཡོད་སར་འགྲོ་དགོས་པའི་དོན་ཅི་ཡང་མེད། གལ་ཏེ་ངེད་མ་བུས་ཁྱོད་ཅག་ལ་གནོད་ན། རྫོང་གནས་སམ། འབྲོང་མདུན་གཉིས་གང་རུང་དུ་འགྲོ་དང་ཆོག་མ་གཏོགས། གཏེར་སྟོན་སྤྲུལ་སྐུའི་སྐུ་མདུན་ལ་ངེད་མ་བུ་སོང་ཚེ། ཁྱོད་མགར་ར་སང་གིས་དེ་སྔ་ཅི་བཤད། ཅི་གྲོས་ཡོད། རང་རང་སོ་སོའི་སེམས་ལ་ཡོད་པ་དེ་རེད། ང་རང་གི་སྟེང་ན་ཆུ་ཞིག་མ་བླུགས། འོག་ནས་མེ་ཞིག་མ་འབུད། དེ་མིན་བྱ་བ་གང་ཐད་ནས་ཁྱེད་སང་གིས་ཅི་བྱས་སེམས་ལ་ལོས་ཡོད་སྨྲས་ཚེ། ལྷ་དཔལ་དང་། རྒྱལ་སྲས་སང་གཉིས་ཀས་འབྲོང་མདུན་དང་། རྫོང་གནས་གཉིས་ལ་མགར་སྐོར་ཚོ་བ་ལམ་མེད་པ་ཡིན་པས། གཏེར་སྒར་དུ་འགྲོ་དགོས་ཟེར། བྃ༔ འཇིགས་མེད་དཀོན་མཆོག་དཔོན་གཡོག་གཉིས་སྐྱེལ་མ་མངགས་ནས། བསྐལ་པ་ལྕགས་བྱའི་ཟླ་བ་བརྒྱད་པའི་ཚེས་གསུམ་གྱི་ཉིན་ངེད་མ་བུ་གསུམ་དང་། ཐུབ་བཟང་བཅས་ལམ་དུ་བཞུགས། དེ་སྐབས་རྒྱལ་སྲས་སང་ནས་ཐུགས་ཆུང་མཛད་ཅིང་ལུང་པའི་མདའ་བར་དུ་སྐྱེལ་མ་མཛད། ང་རང་གི་འདུག་གནས་སྦྲའི་སྟེང་དུ་བྱ་རྒོད་བབས་པ་དང་། རླུང་ཆེན་པོས་སྦྲའི་མ་ལོག་གི་ཆོན་ཐག་བཅད་པ་སོགས་མ་ངེས་པའི་ལྟས་མང་དུ་བྱུང་བས། སྐྱེལ་མ་ཐམས་ཅད་ཀྱིས་ང་རང་ཤི་འགྲོ་བ་ལྟ་བུའི་མྱ་ངན་བྱེད་དོ། །དེ་ནས་མགར་ར་ལྷ་དཔལ་གྱིས་ཀྱང་ཇ་བར་ཞིག་གི་ལམ་དུ་སྐྱེལ་མ་བྱས། རྒྱལ་སྲས་སང་དང་ཉེ་འཁོར་གཞན་རྣམས་ཕྱིར་ལོག་གོ། །དེ་སྐབས་བདག་གི་སྣང་བ་ལ་ད་རྒྱལ་སྲས་སང་དང་། ངེད་གཉིས་སྐྱེ་བ་འདི་རུ་མི་འཕྲད་ངེས་པ་རེད་སྙམ་ནས། ལྷ་དཔལ་དང་། འཇིགས་མེད་དཀོན་མཆོག་གཉིས་ལ་འདི་སྐད་སྨྲས། ང་རང་ནད་བབ་ལྕི་བའི་རྐྱེན་གྱིས་ཤི་འགྲོ་བ་ལ་ལ་ཐང་མེད་པ་འདྲ། རྒྱལ་སྲས་ལ་ཁྱོད་གཉིས་མ་འཆུག །གསལ་སྒྲོན་ཁ་དྲི་རྩུབ་པ་དང་། རྒྱལ་སྲས་སང་མི་གཤིས་ངན་པའི་རྐྱེན་གྱིས་ལས་མཐའཅི་འགྱུར་མི་ཤེས་པ་འདྲ་ན། ཁྱོད་གཉིས་ཀྱི་དེ་ལུགས་དགོས་སྨྲས་ཚེ། ཁོང་གཉིས་ ནས་ཀྱང་དེ་ལྟར་བྱེད་པར་ཁས་བླང་ནས། བདེ་སྡུག་ལེགས་ཉེས་ཀྱི་གཏམ་སོགས་ཞིབ་རྒྱས་སུ་བྱས་ཏེ་ལྷ་དཔལ་ཕྱིར་ལོག་གོ་།དེ་ནས་ངེད་ཅག་ལམ་དུ་བཞུད་ནས་རང་ལ་ངལ་དུབ་ཆེན་པོ་བྱུང་ཡང་སྙིང་རུས་བྱས་ཏེ་སོང་བས། རྗེ་དེ་ཉིད་ཀྱི་བཞུགས་གནས་མཁར་འགབ་སང་གི་ས་གས་ཀྱི་ཉི་མ་ལུང་བྱ་བར་བཞུགས་ཡོདཔས། དེ་ཀར་ཐོན་ནས་ཐོག་མར་རྗེའི་དངོས་སློབ་བསོད་སྤྲུལ་སྣ་ཚོགས་རང་གྲོལ་དང་མཇལ་འཕྲད་མཛད། དེ་ནས་རིམ་གྱིས་སྐུ་མདུན་དང་མཇལ་འཕྲད་མཛད་སྐབས། ང་རང་གིས་སྙིང་རུས་བྱས་ཀྱང་ལུས་ཟུང་ཟད་པའི་རྐྱེན་གྱིས་གཏམ་ཚིག་གཅིག་གཉིས་ལས་བཤད་མ་ཐུབ་པ་སོགས་བྱུང་བས། རྗེའི་ཐུགས་ཀྱིས་མ་བཟོད་ནས་འཇིགས་མེད་དཀོན་མཆོག་ལ། ཁྱོད་ཀྱིས་མཁའ་འགྲོ་འདི་ལ་ནད་དྲག་པོ་འདི་ཙམ་གྱིས་མནར་ཀྱང་ལྟ་རྟོགས་མི་བྱེད་པ་ཅི་ཡིན་གསུངས་པས། ཁོང་གིས་ལོ་རྒྱུས་ཐམས་ཅད་ཞུ་ཆས་བྱེད་འདུག་པས། བདག་གིས་ཁོང་ལ་བརྡ་ཞིག་བྱས་པས་ཅི་ཡང་ཟེར་མ་ཕོད་ནས། ཕན་གནོད་མེད་པའི་གཏམ་ཆ་ཤས་ཞུས། དེ་ནས་རྗེ་དེ་ཉིད་ཀྱིས་སྨན་དཔྱད་རིམ་གྲོ་སོགས་ཀྱི་མཐུན་རྐྱེན་མཛདཔས། ང་རང་ནད་ལས་ཇེ་དྭངས་ལ་སོང་། དེ་སྐབས་སྔར་སྒོ་སྤྲུལ་རིན་པོ་ཆེའི་ཞལ་གསུངས་ལ། ཁྱོད་ལོ་གསུམ་ཅུ་ལ་ བྃ༔ ཐོན་དུས་ཤ་ཟ་དགོས་པ་བྱུང་ཡོང་། དེ་སྐབས་ཐེ་ཚོམ་མི་དགོས་དང་། ཁ་རེག་ཚད་ཀྱི་སེམས་ཅན་རྣམས་ལ་ཕན་ཐོགས་ཆེན་པོ་འབྱུང་ངེས་གསུངས་པ་ལྟར་རྗེ་དེ་ཉིད་ནས་ཤ་ཟ་དགོས་གསུང་སྟེ། ཤ་ལ་བྱིན་རླབས་མཛད་ནས་གནང་བས་བཀའ་བཅག་མ་ནུས་པ་དང་། ནད་ཀྱི་ཕྱིར་དུ་དགོས་པ་ཡིན་པ་སོགས་ཀྱི་ཟས་དེ་ལ་ཅུང་ཟད་རེ་ལོངས་སྤྱོད། སྔར་རླུང་ལ་འཕེལ་འགྲིབ་ཤིན་ཏུ་སོང་བ་རྣམས་སོར་ཆུད་པ་བྱུང་ནས། རྩ་རླུང་ལ་བོགས་ཐོན་ནས་ལས་སུ་རུང་བའི་རྒྱུ་བྱེད་དོ། །ཡང་ང་རང་རྗེའི་བཀའ་གནང་ལྟར་མཚམས་དམ་རྒྱ་ཞིག་ལ་བསྡད་ཡོད་སྐབས། ཡུལ་དེ་ཀའི་བདག་པོ་གཉུག་མར་གནས་པའི་མི་མིན་རྣམས་ཀྱིས་གཟུགས་སྣ་ཚོགས་ལ་སྤྲུལ་ནས་ཐོ་འཚམ་བྱེད་དུ་འོང་བས། བདག་གིས་ཁོང་རྣམས་ལ་ལ་ཏིང་འཛིན་གྱིས་བཅིང། ལ་ལ་སྙིང་རྗེས་བསྒྲལ། ལ་ལ་དམ་ལ་བཞག་ནས། ཕྱིན་ཆདགང་དག་འགྲོ་བ་རྣམས་ལ་གནོད་བྱེད་མི་ནུས་པར་བྱས་ཚེ། དེ་དག་གི་ནང་ནས་རྒན་བུ་འཇིགས་སུ་རུང་བ་ནག་ཕྱོགས་པ་ཞིག་འདུག་པ་དེས་ན་རེ། ཁྱོད་མགོ་ནག་མི་བས་ཁ་བཙན་ཚེ། །སྲེ་མོང་བཞིན་དུ་ཡུལ་ཀུན་ཉུལ། །ངོ་དམར་དྲོད་ལས་འཇིགས་ཆ་ཚེ། །མིག་གིས་མཐོང་ཚད་བྲན་དུ་བྱེད། །ཁྱོད་འདི་རུ་ འདུག་དོན་ཅི་ཡང་མེད། །གཅོད་པ་ཡིན་ན་གཉན་སར་སོང་། །བསྒོམ་ཆེན་ཡིན་ན་བྲག་སྟོང་འགྲིམས། །སྤྲང་པོ་ཡིན་ན་ཡུལ་གཞན་སོང་། །ས་འདིའི་བདག་པོ་ང་རང་ཡིན། །ཁྱོད་ཡུལ་འདིར་མི་བཞག་ཐག་གི་ཆོད། །ཅེས་ཟེར་ནས་ཁོ་ཡི་རལ་གྲི་ཀླད་ལ་བསྐོར་བས། བདག་གིས་ཁོ་ལ་སྙིང་རྗེ་ཚད་མེད་པ་ཞིག་སྐྱེས་ནས། ཁྱོད་ཀྱིས་ཁོང་ཁྲོ་མ་བྱེད། རང་གཞན་ཐམས་ཅད་ངན་སོང་ལ་འགྲོ་བའི་རྒྱུ་བྱེད་འོང་མ་གཏོགས། ང་འཇིགས་མེད་དོན་གྱི་རྣལ་འབྱོར་མ་ཡིན་པས། ཁྱོད་ལྟ་བུས་གླགས་མི་ནུས། འོན་ཀྱང་བླ་མ་དཀོན་མཆོག་གསུམ་ལ་བློ་གཏོད་ལ་གསོལ་བ་ཐོབ་དང་། ལས་ངན་གྱི་རྒྱུན་ཆད་ནས་ཐར་པའི་ལམ་སྣ་རེ་ཟིན་འོང་སྨྲས་པས། ཁོ་ཡང་ཁོང་ཁྲོ་ཞི་ནས་འདི་སྐད་ཟེར། བླ་མ་དཀོན་མཆོག་ལ་གསོལ་བ་བཏབ་ན་ཕན་ཡོན་ཅི་འདྲ་ཡིན་ཟེར། བདག་གིས་ཁོང་རྣམས་ཀྱི་མོས་པ་དང་མཐུན་པའི་མགུར་སྨྲས་པ་གཏེར་གཞུང་དུ་གསལ། དེ་ནས་ཡང་རྗེ་དེ་ཉིད་ལ་སྔར་གྱི་གདམས་པའི་མཇུག་རྡོ་རྗེ་ཆུ་འཐུང་གི་མན་ངག་རྣམས་གདན་ཐོག་གཅིག་ཏུ་ཡབ་ཡུམ་གཉིས་ཀྱིས་ཟླ་བ་གསུམ་གྱི་བར་དུ་ཉམས་ལེན་མཛད། དེ་སྐབས་སུ་ཕྱི་ཡུལ་གྱི་རྟགས་སུ་ཉིན་མཚན་མེད་པར་རི་ངུར་བ་དང་། ས་གཡོ་བ་དང་། སྒྲའུར་བ། བྃ༔ གླིང་བུ་དང་། རོལ་མོའི་སྒྲ་སྒྲོགས་པ། དྲི་བཟང་གི་ངད་ལྡང་བ་སོགས་བྱུང་བ། ལས་ལྡན་སློབ་འབངས་ཀུན་གྱིས་མཐོང་ཆོས་སུ་གྱུར་པ་དང་། ནང་རྩ་རླུང་ཐིག་ལེ་གནས་སུ་དག་པའི་རྟགས་སུ་དབུ་མགྲིན་གྱི་མདུད་རྒྱ་གྲོལ་ནས། ལམ་སྦྱངས་བསྒྲོད་ལ་མ་ལྟོས་པར། ཐེག་པའི་ཆོས་ཚུལ་ཐམས་ཅད་ཆགས་ཐོགས་མེད་པར་མཁྱེན་ཅིང་། ཟབ་གཏེར་དགོངས་པའི་གབ་སྒྲོམ་ལས། འགྲོ་བའི་ཁམས་དང་མོས་པ་དང་མཐུན་པའི། གདམས་པའི་གནད་དོན་ཐམས་ཅད་ཀྱི་བརྡ་རང་གྲོལ་དུ་བྱུང་བ་དང་། རླུང་བཅུ་ལས་སུ་རུང་ཞིང་། ལུས་གཞོན་ཤ་དང་ལྡན་ཅིང་ཤིང་བལ་ལྟར་ཡང་བ། ངག་རྡོ་རྗེའི་ཚིག་རང་རྡོལ་དུ་མགུར་མ་བྱས་ཚེ། དེའི་སྒྲ་ཐོས་ཚད་ཀྱི་རྒྱུད་ལ་བསམ་གཏན་དང་པོའི་ས་བོན་འཇོག་པ་སོགས་ལས་ཕྲན་དུ་མས་འགྲོ་བའི་དོན་འབྱུང་ཞིང་། ཁྱད་པར་བདེ་ཆེན་སྟོང་པའི་ཡེ་ཤེས་སྤྲོས་བྲལ་རིག་སྟོང་རྣམ་ཐར་གསུམ་ལྡན་རིག་སྟོང་བསམ་བརྗོད་ལས་འདས་པའི་དགོངས་པ་མངོན་དུ་གྱུར་ཅིང་། ཐབས་ཤེས་གཉིས་ཀྱི་ཐུགས་ཡིད་མངོན་སུམ་དུ་རོ་གཅིག་ཏུ་འདྲེས་ནས། སྐུ་གསུམ་མཁའ་འགྲོའི་ཚོགས་གྲལ་དུ་བྱོན་ནས་དག་པའི་གཟིགས་སྣང་སྐབས་སྤྲུལ་པའི་ཁྱད་པར་གྱིས་ཞི་བ་རྡོ་རྗེ་མཚོ་དེ་ཉིད། རྗེས་རྡོ་རྗེ་མཚོ་དངོས་སུ་གཟིགས། ང་རང་གིས་ཀུན་གཟིགས་དབང་མོའི་རྣམ་པར་མཐོང་བ་དང་། གསང་ཆེན་མྱུར་ལམ་མཐར་ཕྱིན་པའི་དགའ་སྟོན་དུ་ཚོགས་ཀྱི་མཆོད་པ་བསམ་གྱིས་མི་ཁྱབ་པ་དང་། ཁྱད་པར་གནས་གསུམ་དུ་རང་རང་དང་འཚམས་པའི་ལོངས་སྤྱོད། གཉིས་མེད། སྤྲོས་མེད། སྤྲོས་བཅས་སོགས་ཡིད་དུ་འོང་བའི་ནང་ནས། རིག་འཛིན་དགྱེས་ཚོགས། མཁའ་འགྲོའི་ནུ་ཚོགས་གཉིས་སུ་འདུག་པས། རྗེས་མཁའ་འགྲོའི་ནུ་ཚོགས་ཟེར་གསུངས། བདག་གིས་མཁའ་འགྲོའི་འདུ་ཚོགས་ཡིན་སྙམ་པ་རེ་མ་