Tibetan
ཆུང་ལ་བྱིན་དབབ་པའི་ལྟས་བྱུང་བའི་ཚེ། རྗེའི་ཞལ་ནས་བུ་ཆུང་འདིའི་ཕ་དང་སྐྱེ་སྲིད་སོགས་ཇི་ལྟར་ཡིན་གསུངས་པ་ལ། བདག་གིས་ཁོའི་ལོ་རྒྱུས་ཐམས་ཅད་སྦས་གསང་མེདཔར་ཞུས་ཚེ། རྗེའི་ཞལ་ནས་སྔར་བདག་གིས་ཁོང་ལ་རིག་འཛིན་ འགྱུར་མེད་རྡོ་རྗེ་མཚན་དུ་གསོལ་བ་ལྟར། རིག་པ་འཛིན་པ་ཞིག་འོང་ངེས་ཡིན་པས་ན་ཟས་གོས་སོགས་གྲིབ་ཅན་ལ་འཛེམ་དགོས་གསུངས། དེ་ནས་ཡབ་ཡུམ་གཉིས་ལ་བདུད་ཀྱི་བར་ཆད་མི་འབྱུང་བའི་ཕྱིར་དུ། རང་གཏེར་གྲོ་ལོད་ཀྱི་སྒྲུབ་པ་བདུད་ལས་གཡུལ་རྒྱལ་གྱི་ཟབ་ཤོག་སྡིག་སྒྲོམ་དམར་ནག་གི་གུད་དུ་སྦས་པ་སྡོང་ཁྲོམ་ཞེས་པའི་གནས་སུ་ཡོད་པ་དེའི་གཏེར་སྒོ་དང་དུས་ཚོད་རྣམས་གསལ་པོར་ཡོད་ཀྱང་། རྟེན་འབྲེལ་གྱི་དགོས་ཆེད་དུ་གཏེར་ནས་འདོན་པའི་སྐལ་བ་རྗེ་དེ་ཉིད་ལ་བབ་ཡོད་པ་ཡིན་པས། རྗེས་ཀྱང་ཐུགས་ཐག་དེ་ཀར་བཅད་ནས་ཐབས་ཤེས་རྟེན་འབྲེལ་གྱི་གསོས་སུ་གྱུར་ཏོ། །ཡུམ་གཏེར་ཡབ་ལ་དབང་བ་དང་། ཡབ་གཏེར་ཡུམ་གྱིས་འབེབས་ཐུབ་ཀྱི་ཐུགས་དགོངས་རོ་གཅིག་ཏུ་གྱུར་ཏེ། དེའི་སྐབས་སུ་རྗེ་དེ་ཉིད་ཀྱིས་བདག་ཐུགས་བརྩེ་བས་རྗེས་སུ་བཟུང་སྟེ། ཐབས་ཤེས་འདུ་འབྲལ་མེད་པའི་རྟེན་དུ་ཉིད་ཀྱི་གཏེར་བྱོན་རྡོ་རྗེ་རྩེ་ལྔ་པ་དང་། རྡོ་རྗེ་དྲིལ་བུ། གདུལ་བྱ་རྗེས་སུ་འཛིན་ཕྱིར་བུམ་བྷན་མེ་ཏོག་མིག་དར་བུམ་གོས་སྒྲོ་རྟིང་བུམ་སྒྲོ་དང་བཅས་པ། ཟབ་གཏེར་བྲི་སྤེལ་གྱི་མཐུན་རྐྱེན་ཤོག་གུ་དང་མཚལ་སྣག །གཞན་ཡང་རིན་ཐང་ཆེ་བའི་རྒྱུ་རྫས་དུ་མ་དང་ཕྱི་ནང་གསང་བའི་དབང་རྟེན་ཕྱིར་དུ་གནང་ནས། འདི་ བྃ༔ ནས་བྱང་ཆུབ་མཐོབ་བར་དུ་ཡབ་ཡུམ་སྐད་ཅིག་ཀྱང་འདུ་འབྲལ་མེད་པའི་ཐུགས་བསྐྱེད་དང་སྨོན་ལམ་མཛད་དེ། ངེད་ཅག་རྣམས་རང་གནས་ལ་ལོག་གོ །དེའི་སྐབས་སུ་བདུད་འཇོམས་པའི་ཞལ་གཟིགས་ནས་ལུང་བསྟན་གསུངས་པ་གཏེར་གཞུང་དུ་གསལ། དེ་ནས་རང་ཁྱིམ་ལ་ཐོན་པའི་རྒྱལ་སྲས་སང་དཀར་བསོད་ལ་བྱོན་སོང་ནས་གསལ་སྒྲོན་མོ་རང་གཅིག་པུར་བསྡད་འདུག་པས། བདག་གིས་གསལ་སྒྲོལ་ལ་ངེད་མ་བུ་ཐུབ་བཟང་གི་ཡུལ་པས་འབོད་ཡོད་པས། དེ་ཀར་སོང་ན་སྤྲུལ་སྐུའི་བཀའ་བཀྱོན་ཨེ་གནང་དྲིས་ཚེ། ཁོང་རང་གིས་སྐྱོན་མེད་འགྲོ་བསམ་ན་ད་ལན་སྟབས་བདེ་བས་སོང་ན་ལོས་ཆོག་ཟེར། བདག་གི་བསམ་པ་ལ་མོ་རང་གི་སེམས་ལ་བབ་འདུག་པས་མི་སྐྱོན་ངེས་པ་རེད་སྙམ་ནས། ཡང་ངེད་ཅག་བྱ་སྐོར་ནང་དུ་སོང་ནས། དེའི་ཞོར་ལ་ཁྲ་རྡོ་བླ་མའི་སྐུ་མདུན་ལ་སོང་བས། ཁོང་ཐུགས་ཤིན་ཏུ་དགྱེས་ཤིང་དགའ་སྤྲོ་ཆེན་པོ་མཛད། ཁྱདཔར་ང་རང་གི་གཏེར་གྱི་ཁ་བྱང་ལྟར་ལས་དང་བྱ་བ་ཐམས་ཅད་དེ་ཀར་ཐག་བཅད་དགོས། མགར་ར་སང་གིས་ཁྱོད་དགོས་མེད་བྱས་ཏེ་ལྷམ་ཚང་བརྗེ་བ་ལྟ་བུར་བྱེད་དོན་མེད་པ་ཡིན་ཀྱང་། ད་ཁོ་རང་ཚོའི་བསམ་པ་ལྟར་མགོ་ལོག་གཟའ་དང་ལྷན་དུ་འདུག་ཆུག ཁྱོད་རང་ གིས་རང་ལམ་བླང་ནས་བསྟན་པ་དང་འགྲོ་བའི་དོན་རེ་ཨེ་འགྲུབ་གྱིས་ལ་མ་འཆུག་གསུངས། ཡང་བདག་གིས་ང་རང་གི་ཁ་བྱང་ལྟར་ད་སྔ་ཡན་ཐག་བཅད་མ་མྱོང་བས། ད་དུང་ཡང་རྒྱལ་སྲས་ཁོ་རང་གིས་ཅི་གསུངས་བྱེད་པ་མ་གཏོགས་ལུགས་གཉིས་གང་ཐད་ནས་རང་བློ་རྒོད་ཆོད་མི་བྱེད། བསྟན་པ་དང་སེམས་ཅན་གྱི་དོན་དམན་པ་བདག་ལྟ་བུའི་འོང་བར་དཀའ་ཡང་ལྷག་བསམ་རྣམ་དག་རེ་སྒོའི་ཨེ་འགྲུབ་ལོས་བལྟ་ཞུས་ཚེ། ཡང་ཁོང་གིས་མགར་ར་སང་གི་བསམ་པ་ལྟར་ན། ཁྱེད་རང་གིས་ཁོང་རྣམས་ཀྱི་གཡོག་མོ་བྱེད་ན་དེ་འཐད་ངོ་མ་ཡིན་ཡང་། ཁྱོད་ཕལ་པའི་བུད་མེད་དང་མི་འདྲ་བ་ཡིན་པས་ན། དམ་སེལ་གྱིས་ཁྱོད་ཀྱི་ཚེ་ཆོས་གདུལ་བྱ་ཐམས་ཅད་ལ་གནོད་ངེས་པ་ཡིན་པས། དེ་ལུགས་ཀྱི་སྟབས་གཟབ་དགོས་གསུངས། གཞན་ཡང་ལུགས་གཉིས་ཀྱི་ཞལ་ཏ་དུ་མ་མཛད་ནས་ངེད་ཅག་ཕྱིར་ལོག་སྐབས། གཉེན་མོ་འབྲུག་རྒྱལ་དཔོན་གཡོག་གསུམ་གྱིས་རྫུ་འཕྲུལ་གྱི་རྟ་ཕོ་ལ་བཅིབས་ནས་རང་ཐད་དེར་འོང་། བདག་གིས་ཅི་ཡིན་སྙམ་པས། ཁོང་རྣམས་ན་རེ་ངེད་ཚོ་ཁྱོད་རང་གི་ནོར་སྐལ་སྤྲད་དུ་འོང་བ་ཡིན་ཟེར་ནས། ཤེལ་དང་། ལ་ཅ་དང་། ཨ་ཀྲོང་གསུམ་གྱི་སྒྲོམ་བུ་ཞིག་བདག་ལ་གཏད་ནས། འདི་རྣམས་མཆོད་སྡོང་བྱ་རུང་ བྃ༔ ཁ་ཤོར་གྱི་ཟབ་གཏེར་རེད། མཁའ་འགྲོ་མ་ལས་ཀྱི་དབང་མོ་ཆེས་ངེད་ཅག་ལ་བསྐུར་བ་ཡིན་པས། རྟེན་འབྲེལ་གཞན་དབང་དུ་མ་ཤོར་བར་དགོས་ཟེར་ནས་ཐལ། བདག་གིས་ཐུབ་བཟང་གི་མཐོང་ཡོད་སྙམ་ནས་འདི་སྐད་སྨྲས། ད་ལྟའི་ནག་མོ་དེ་རྣམས་སུ་རེད་དྲིས་པས། ཐུབ་བཟང་གིས་འབྲུག་རྒྱལ་མ་དཔོན་གཡོག་མ་མཐོང་ནས།ཁྲ་རྡོ་བླ་མའི་ལྕམ་སྲིང་དང་ཚ་མོ་སོགས་ཀྱི་ལོ་རྒྱུས་བཤད་འདུག་པས། ང་རང་གི་ཡང་དེ་ལྟར་ཡིན་མདོག་བྱས་ཏེ། གཏེར་རྫས་རྣམས་གསང་རྒྱ་བྱས་པའོ། །དེ་ནས་རང་ལོ་སུམ་ཅུའི་ལོའི་ཟླ་བ་གཉིས་པའི་ཚེས་བདུན་གྱི་ཉིན། སྒོ་སྤྲུལ་རིན་པོ་ཆེ་སྔར་ཞི་བར་གཤེགས་པའི་རྣམ་ཐར་གྱི་བཀོད་པ་རྣམས་དྲན་ཏེ། ཡིད་སྐྱོ་བ་ལ་ཚད་མེད་པ་ལྟ་བུར་ཡོད་སྐབས། རང་གི་སྣང་བ་གནས་འགྱུར་ནས་འོད་ཐིག་དམར་གསལ་གྱི་ཀློང་དུ་ཡུལ་ཡངས་པ་ཆེན་པོ་སྤང་ལྗོངས་དང་མེ་ཏོག་སྣ་ཚོགས་ཀྱིས་སྣང་བའི་མཐའ་ཁྱབ་པར་གང་བ། དེའི་དབུས་སུ་འཇའ་འོད་ལྔ་ལྡན་གྱི་གུར་ཁང་རྒྱ་ཆེ་བ་གཅིག་སྣང་། བདག་གིས་ཕ་གི་གུར་ཁང་ནང་དུ་སུ་བཞུགས་ཡོད་བལྟ་རུ་འགྲོ་དགོས་སྙམ་ནས་སོང་ཚེ། གུར་ནང་དུ་དཔའ་བོ་དང་དཔའ་མོ་མང་པོས་ཚོགས་ཀྱི་མཆོད་པ་རྒྱ་ཆེན་པོ་མཛད་ཅིང་། དེའི་ཚོགས་ རྗེ་ཚོགས་བདག་སྒོ་སྤྲུལ་རིན་པོ་ཆེ་འདུལ་བ་འཛིན་པའི་ཆས་ཚུལ་དུ་བཞུགས་འདུག །བདག་གིས་ཡིད་དགའ་སྐྱོ་དད་གུས་འདྲེས་མའི་ཕྱག་ཕུལ་ནས་འདི་སྐད་གསོལ། ཁྱེད་ངེད་ཅག་གི་དཔལ་མགོན་དུ་མི་བཞུགས་ཤིང་། གནས་འདི་ཀར་བྱོན་པ་ཅི་ལགས་ཞུས་ཚེ། ཁོང་གི་ཞལ་ནས་བདག་དུས་དང་རྣམ་པ་ཀུན་ཏུ་འགྲོ་བའི་དོན་ཁོ་ན་ལས་སྐད་ཅིག་ཀྱང་འདའ་བ་མེད་པར་གནས་ཡོད་ཀྱང་། མི་རྣམས་འཁྲུལ་པའི་དབང་གིས་ཡོད་འཛིན་གྱི་བློས་བཅད་ནས། སྣང་དང་མི་སྣང་གཉིས་སུ་གྲུབ་པ་ཡིན་མ་གཏོགས། ང་ཁྱེད་ཅག་གི་གནས་ལས་ཡུལ་གཞན་རང་རྒྱུད་ཅན་དུ་འགྲོ་མ་མྱོང་། འོན་ཀྱང་ད་ལན་ཡང་འདི་ཀར་བྱོན་དགོས་པ་འདྲ་སྙམ་ནས། ངེད་ཅག་གི་ཚོགས་འཁོར་བྱེད་ཀྱིན་ཡོད་གསུངས། བདག་གིས་ཀྱང་ཁོང་གིས་གསུངས་ལྟར་བདེན་སྙམ་ནས། སྔར་སྡུག་བསྔལ་གྱིས་ནོན་པའི་སེམས་དེ་ཀ་ལུང་མ་བསྟན་དུ་སོང་ནས་ཚོགས་ཀྱི་མཆོད་པའི་གྲལ་དུ་བསྡད་ཚེ། དཔའ་མོ་ཞིག་གིས་ན་རེ། ཁྱོད་ཀྱི་ཀ་པཱ་ལ་གས་ཆག་སོང་འདུགཔས། དེ་ཚོགས་སྣོད་དུ་མི་འོས། གྲོགས་བི་མ་ལས་ཁྱོད་ལ་ཀ་པཱ་ལ་ཞིག་གནང་བ་དེ་རྟེན་དང་འབྲེལ་འབྱུང་ལེགས་པས་ཚོགས་སྣོད་དུ་ཤིན་ཏུ་བཟང་ཟེར། བདག་གི་བསམ་པ་ལ་ཚོགས་སྣོད་ཀ་པཱ་ལ་ བྃ༔ ཟེར་བ་དེ་ང་རང་གི་ཁ་ཕོར་ཡིན་པར་འདུག །ཁ་ཕོར་སྐྱོན་ཅན་བཟུང་མི་ཉན་པ་འདྲ། བི་མ་ལའི་ཀ་པཱ་ལ་ཟེར་བ་དེ་ཀ་སྔར་གསངགྲོགས་ཡིད་བཞིན་ནོར་བུའི་གསོལ་དཀར་འབྲུག་གཉིས་མ་ཞིག་གནང་ཡོད་པ་དེ་ཀ་རེད་སྙམ། ཡང་སྤྲུལ་སྐུ་རིནཔོ་ཆེའི་ཞལ་ནས། ཁྱོད་ཤམ་བྷ་ལར་བལྟ་རུ་ཨེ་འགྲོ་གསུངས་པས། བདག་གིས་ང་ཕྱིར་འཇིག་རྟེན་དུ་འོང་མ་དགོས་ན་འགྲོ་དང་ཆོག །དེ་མིན་ཡུལ་སྣང་ཞིག་མིག་གིས་མཐོང་མ་མཐོང་མེད་ཞུས་ཚེ། ཁོང་གི་ཞལ་ནས་ད་ཁྱོད་གནས་འདི་ཀར་འོང་བའི་དོན་རེད། ཤམ་བྷ་ལའི་ཡུལ་གྲུགཅིག་གི་བཀོད་པ་བལྟས་ན་ཆོག་གསུངས། ཡང་བདག་གིས་གདོས་བཅས་ཤ་ཁྲག་གི་ལུས་ཡིན་ན་ལམ་འཕྲང་ཆོད་ཐབས་ཡོང་དཀའ་ཞུས་ཚེ། ཡང་ཁོང་གིས་ཁྱོད་ལ་གདོས་པ་མེད་འོད་གསལ་གྱི་ལུས་ཡིན། གདོས་པ་དང་བཅས་པས་འགྲོ་ས་མེད། རང་སྣང་དག་པའི་ཞིང་ཁམས་ལ་བསྐྱེད་རྫོགས་ཟབ་མོའི་དོན་འབྲས་སོ་སོར་མངོན་དུ་གྱུར་པ་ཡིན་གསུངས། དེ་ནས་བདག་ཁོང་དང་མཉམ་དུ་དར་གྱི་འོད་ལི་ལ་མཁའ་འགྲོ་རྣམས་ཀྱིས་དྲངས་ནས་སོང་ཚེ། མཆོད་སྡོང་དཀར་པོ་ཆེ་བརྗིད་ཚད་ལས་འདས་པ་ཞིག་སྣང་། དེའི་མཐའ་སྐོར་དུ་སྐྱིད་མོའི་ཚལ་ཀུན་དགའ་ར་བ་དང་བཅས་པས་བསྐོར་ བ། དེའི་ཕྱི་ལ་གངས་རི་དང་ཡུལ་གྲོང་རྣམས་རིམ་པ་མང་པོས་བསྐོར་བ། དེ་དག་གི་ཕྱི་རོལ་དུ་ཆུ་ཁ་དོག་མ་ངེས་པ་དུ་མའི་འོབས་མུ་ཁྱུད་ལྟར་འཁོར་བ། དུག་ཤིང་དང་། གཙུབ་ཤིང་དང་། ཚེར་མ་ཅན་དང་། ཙན་དན་དཀར་དམར་དང་། ཨ་ཀ་རུ་དང་། སྒྲོན་ཤིང་ལ་སོགས་པའི་ནགས་འདབས་ལ། སྟག་དང་གཟིག་དང་། དོམ་ནག་དང་། མི་རྒོད་དང་། དུག་སྦྲུལ་ལ་སོགས་པས་ཡོངས་སུ་གང་བར་གནས་འདུག །བདག་གིས་གནས་འཇིགས་སུ་རུང་བ་འདི་གང་ལགས་ཞུས་ཚེ། ཌཱཀྐི་ན་རེ། དེ་དག་ནི་ཤམ་བྷ་ལའི་སྦས་རྫོང་ཆེན་པོ་བཞིའི་གཙོས་གྲོང་ཁྱེར་སུམ་ཅུ་རྩ་བདུན་ཡོད་པས། ད་ལན་དེ་དག་གི་ཕྱི་ཁྱོན་ཙམ་མ་གཏོགས་མི་མངོན་པ་ཡིན། ད་ཚེ་འཕོས་མ་ཐག་སྔོན་འབྲེལ་གྱི་མཐུས་འདི་རུ་འཁོད་ནས་འགྲོ་བའི་དོན་དཔག་ཏུ་མེད་པ་འབྱུང་བར་ངེས་སོ་ཟེར། དེ་ནས་མཆོད་སྡོང་ནང་དུ་མཇལ་དུ་སོང་བའི་སྟེང་འོག་བར་གསུམ་བདེ་གསང་འཇིགས་གསུམ་གྱི་བློས་བསླང་རེད་ཟེར་བ། རིན་པོ་ཆེ་སྣ་ཚོགས་ལ་གཞི་བྱས་པ་ལྟ་བུ་འོད་དང་འོད་ཟེར་ཕྱོགས་བཅུར་འཕྲོ་བ། རང་བྱུང་ལྷུན་འགྲུབ་ཆེན་པོའི་བཀོད་པ་ཡོངས་སུ་རྫོགས་པ་ཞིག་མཇལ་བས། བདག་གིས་དངོས་འབྱོར་ཡིད་སྤྲུལ་གྱི་མཆོད་དམིགས་དང་། བྃ༔ གསོལ་འདེབས་སྨོན་ལམ་ཚིགས་སུ་བཅད་པ་འདི་སྐད་བརྗོད། རང་བྱུང་ལྷུན་འགྲུབ་ཕོ་བྲང་ཆེན་པོའི་དབུས། །རྒྱལ་བའི་གསང་གསུམ་ཕྲིན་ལས་གཅིག་བསྡུས་པ། ། ངོ་མཚར་རྨད་བྱུང་དཀྱིལ་འཁོར་ཆེན་པོ་འདི། །མཐོང་བ་ཙམ་གྱིས་རིག་སྟོང་ཡེ་ཤེས་སྐྱེས། །བདག་ནི་ཚེ་རབས་ཚེ་བརྒྱུད་ཐམས་ཅད་དུ། །གསང་སྔགས་ཟབ་མོའི་ཆོས་དང་མི་འབྲལ་ཞིང་། །རིམ་གཉིས་ལམ་བསྒོམ་མྱུར་ལམ་མཐར་ཕྱིན་ནས། །ས་དང་ལམ་བསྒྲོད་རིམ་པར་མི་ལྟོས་པར། །གསང་གསུམ་དཀྱིལ་འཁོར་འདི་ཡི་དོན་མཐོང་སྟེ། །མི་གནས་གཏན་སྲིད་ཟིན་པར་བྱིན་གྱིས་རློབས། །གལ་ཏེ་ལས་དབང་ངན་པའི་མཐུས་བསྐུལ་ཏེ། །ལམ་གྱི་ལམ་མཆོག་མངོན་དུ་མ་གྱུར་ན། །དཔའ་བོ་དཔའ་མོས་བདག་གི་མདུན་བསུས་ཏེ། །ཞིང་མཆོག་དམ་པ་འདི་རུ་སྐྱེ་བར་ཤོག །སྐྱེས་མ་ཐག་ཏུ་སྟོན་འཁོར་ཞལ་མཐོང་ནས། །སྤྲུལ་པས་འགྲོ་ཁམས་དོངས་ནས་སྤྲུགས་པར་ཤོག །བདག་དང་བདག་ལ་འབྲེལ་ཐོགས་སྐྱེ་འགྲོ་ཀུན། །སྐྱེ་བ་གཞན་གྱིས་བར་མ་ཆོད་པ་རུ། །སྤྲུལ་པས་གནས་དེར་སྐྱེས་ནས་གྲོལ་བར་ཤོག །ཇི་སྲིད་འཁོར་བའི་རྒྱ་མཚོ་མ་སྟོང་བར། །དེ་སྲིད་གང་ལ་གང་འདུལ་ཐབས་དུ་མས། །འགྲོ་བའི་དེད་ དཔོན་ཆེན་པོར་བདག་འགྱུར་ཤོག །ཅེས་སྨོན་ལམ་བཏབ་མཐར། སྣང་ཡུལ་ཐམས་ཅད་རྨི་ལམ་དབྱིངས་སུ་སད་པ་ལྟར་སོང་ནས། གཞན་རྐྱེན་ཞིག་གིས་བྱ་བའི་མཇུག་རྫོགས་ལོང་མ་བྱུང་ནས་ཉམས་ལས་སད་དོ། །དེའི་ལོར་བྱང་རྒྱ་ཁ་དར་ནས་འུར་འུར་ཟིང་ཟིང་བྱེདཔས། ཀུན་གྱིས་རུ་ཕྱོགས་གཞན་ཞིག་ཏུ་འགྲོ་དགོས་བསྒྲགས་ཚེ། བན་ནག་ནས་དབོན་རིག་འཛིན་དང་། མགར་ར་གཏེར་ཆེན་གྱི་དངོས་སློབ་བྱ་བྲལ་བ་བན་ཤུལ་བླ་མ་ངག་དབང་བདེ་མཆོག་རྣམས་ཀྱིས་བཀའ་གྲོས་མཛད་ནས། བླ་བྲང་ཁག་གཉིས་ཀྱི་ས་གྱོད་འགྲིགས་ཐབས་མཛད་ནས། རྒྱལ་སྲས་སང་གདན་སར་འཁོད་དགོས་གསུངས་ནས་ཐག་བཅད་ཚེ། ཕན་ཚུན་ཀུན་གྱིས་དེ་ལྟར་སེམས་བབ་འོང་བའི་གྲོས་འཆམས། དེ་སྐབས་ངེད་མ་བུ་ལ་ཕྱག་མོ་ལུང་བསྟན་མ་ཆུད་ཀྱང་། གདན་སར་མ་ཕེབས་ནས་ལྕིའི་དབང་ཆེན་ཐང་བྱ་བར་སྒར་གཞི་བཟུང་། དེ་སྐབས་ང་རང་ལ་ནད་མ་ངེས་པ་ཞིག་བྱུང་འདུག་པས། ཁྲ་བླ་སྙན་གྲགས་དང་། འཇིགས་མེད་དཀོན་མཆོག་སོགས་ཀྱིས་གྲོས་བྱས་ཏེ། དཔལ་ལྡན་རྒྱ་མཚོ་འབྲོང་བསྐོར་ལ་འགྲོ་དགོས་སྨྲས་ནས། ཕྱི་ནང་ཀུན་ལ་གསང་ཐབས་ཀྱིས་ཡིད་བཞིན་ནོར་བུའི་སྐུ་མདུན་ལ་ལུང་བསྟན་ཞུ་རུ་མངགས་པའི་ཚེ། བྃ༔ རྗེ་དེ་ཉིད་ནས་ལུང་བསྟན་ཤིན་ཏུ་འཁྲུགས་ཆེ་བས། ཉེར་ལྔ་ཚུན་ཆད་འབྲོང་བསྐོར་དང་། ཡུམ་ཀའི་མེ་མཆོད་ཅི་འགྲུབ། ཚོགས་དང་ཁྲུས་བསྐང་སོགས་གང་འཛོམས་གལ་ཆེ་བར་གསུངས་པས། སྙན་གྲགས་དང་། དཔལ་རྒྱམ་སོགས་ཀྱིས་རིམ་གྲོ་ཐམས་ཅད་ལྷག་ལུས་མེད་པར་བསྒྲུབ། འབྲོང་སྐོར་ལ་འགྲོ་རྒྱུ་སྟབས་མ་འགྲིགས་ནས་བཏང་སྙོམས་ལ་བཞག་སྐབས། ཟླ་བ་དྲུག་པའི་ཚེས་བཅོ་བརྒྱད་ནུབ་ང་རང་གི་ནད་གཞི་ཇེ་འཁྲུགས་ལ་སོང་ནས། འཆི་ལ་ཉེ་བ་བྱུང་བའི་ཚེ། ཐུབ་བཟང་དང་། འཇིགས་མེད་དཀོན་མཆོག་རྣམས་ཀྱིས་གྲོས་ཐག་བཅད་དེ། འབྲོང་སྐོར་དང་། ཡིད་བཞིན་ནོར་བུའི་སྐུ་མདུན་ལ་འགྲོ་དགོས་པའི་ལོ་རྒྱུས་རྒྱལ་སྲས་ལ་ཞུས་ནས་ཁོང་གིས་ཀྱང་འགྲོ་ཆོག་པའི་བཀའ་གནང་ཐོབ། དེ་དག་གི་དུས་རང་ལ་ལུང་བསྟན་འོང་སྟེ། དམ་སེལ་གྱི་དབང་གིས་ང་རང་ལ་བར་ཆད་ཀྱི་འཚེ་བ་སྣ་ཚོགས་དང་། ཁྱད་པར་ཚེ་ལ་བར་ཆད་ཡོད་པ་སོགས་དང་། དེ་དག་སེལ་བའི་ཐབས་དང་རྟེན་འབྲེལ་བཅས་གསལ་པོར་བྲི་ཡོད་པ་ཉེ་འཁོར་རྣམས་ཀྱིས་མཐོང་སར་ཉིན་གཅིག་མེ་ལ་བསྲེགས་པ་ཁོང་རྣམས་ཀྱིས་དྲན་ཏེ། ང་རང་ལ་འགྱོད་པ་ཆེན་པོ་བྱེད་འདུག །བདག་གིས་ལུང་བསྟན་མེ་ལ་ བསྲེག་ནི་གི་འགྱོད་མི་དགོས་དང་། ཁྱེད་ཅག་གིས་ཁལ་རྟ་སོགས་ཀྱི་སྟབས་ལེགས་འགྲིགས་ཐབས་འོང་ན། ད་ལན་གྱི་བར་ཆད་སེལ་ཐབས་ལྡན་འོང་སྨྲས། ཁོང་རྣམས་ནས་ཡོན་བདག་ང་རང་ལ་སེམས་དཀར་བ་རྣམས་ལ་ཁལ་རྟ་རེའི་ཕྲིན་བཅོལ་བས། སོག་ཀའི་དཀོན་མཆོག་ཚེ་རིང་དང་། གཞན་ཡོན་བདག་འགའི་རྟ་ཁལ་སོགས་ཀྱི་མཐུན་རྐྱེན་བྱས་ཏེ། སྙན་གྲགས་ཀྱིས་ཉིན་གཅིག་གི་ལམ་དུ་བསྐྱལ་ནས། ངེད་མ་བུ་གསུམ་དང་། ཐུབ་བཟང་བུ་སྤུན་གཉིས། གཞན་ཡང་འབྲོང་སྐོར་བ་ཆ་ཤས་བཅས་ཚེས་ཉི་ཤུའི་ཉིན་ལམ་དུ་ཞུགས་ཏེ་སོང་བས། ཉེར་ལྔའི་ཉིན་འབྲོང་རིའི་ཉེ་ཆར་ལ་ཐོན་ཡོད་སྐབས། རང་གི་སྣང་བ་སྔར་ལྟར་མ་ཡིན་པར་དཔལ་རིའི་བཀོད་པ་ལན་རེ་འཆར།ལན་རེ་ནུབ་པ་ལྟར་མི་གསལ་བར་བྱེད་སྐབས། ནམ་མཁའི་དཀྱིལ་དུ་འཇའ་ཁྱིམ་ལྔ་ཚོམ་གྱི་ཁ་དོག་འབར་བ་དང་། གཞན་ཡང་འཇའ་སྤྲིན་དང་། འཇའ་འོད་ཐིག་ལེ་ལྟ་བུ་དུ་མས་ནམ་མཁའི་ཐམས་ཅད་ཁྱབ་ལྟར་ཤར་ཡང་། ངེད་ཅག་གི་ཕྱོགས་སུ་ཐམས་ཅད་རླུང་གིས་བསྡུས་འོང་བ་ལྟར་བྱེད་འདུག་པས། ཐུབ་བཟང་ལ་སོགས་པའི་མི་ཀུན་གྱིས་དང་པོ་ངོ་མཚར་ནས་གནས་ཀྱི་བསུ་བ་མཛད་པ་འདྲ་ཟེར། དེ་ནས་ངེད་རྣམས་གར་འགྲོའི་ཕྱོགས་སུ་འོང་བ་ བྃ༔ ལ་ཡིད་ཚོམ་ནས། ང་རང་ལ་དེ་དག་གི་རྒྱུ་རྐྱེན་ཅི་ཡིན་པ་འདྲ་ཟེར་ལ། བདག་གིས་དབྱར་གནམ་ལ་འཇའ་ཚོན་ཤར་གྲངས་དོན་ཅི་ཡོད་ང་རང་གིས་མི་ཤེས་སྨྲས་ཚེ། དེ་ནས་ཁོང་རྣམས་འབྲོང་རི་ལ་སྐོར་བ་བྱེད་དུ་བུད་སོང་། ང་རང་མ་བུ་གཉིས་གུར་ནང་ལ་བསྡད་ཡོད་སྐབས། གནོད་སྦྱིན་ཡིན་ཟེར་བའི་བནྡྷེའི་གཟུགས་ཅན་ཞིག་ཐོན་བྱུང་བས། བདག་གིས་ཁྱོད་སུ་ཡིན་ང་ཡོད་སར་འོང་མི་ཉན། ད་ལྟ་གྲྭ་པ་རྣམས་ཀྱིས་ཁྱོད་ལ་ཚིག་ངན་བྱེད་འོང་། ང་རང་ནད་པ་ཞིག་ཡིན་པས་འགྲོས་མཛད་ཡོད་སྨྲས་པས། ཁོང་ན་རེ། ང་མགྲོན་པོ་གཞན་དང་མི་འདྲ་བས་ཁྱོད་ཀྱིས་མི་ཤེས་སམ་ཟེར། བདག་གིས་ང་འཆི་ལ་ཁད་ཀྱི་ནད་པ་ཞིག་ཡིན་པས། ཁྱོད་སུ་ཡིན་བརྟག་དཔྱད་བྱེད་ལོས་མེད་སྨྲས་ཏེ། མགོ་བསྟུམ་ནང་དུ་འཐོན་ནས་ཉལ་བསྡད་ཚེ། ཁོང་ན་རེ། ང་ཁྱོད་ཀྱི་ཐབས་གྲོགས་ལས་འབྲེལ་རྩལ་གྱིས་མངགས་པ་ཡིན་པས། ཁྱོད་འཆི་དབང་མེད་ཟེར་ནས་ཀྵཿཡིག་གི་རྣམ་པར་ང་རང་གྱི་གསང་གནས་ལ་ཐིམ་སྣང་འཆར་ཚེ། སྔར་གྱི་མཐོང་སྣང་རབ་རིབ་ཐམས་ཅད་འོད་དམར་གྱི་རྣམ་པར་གྱུར་ཏེ། རང་གི་ལྟེ་བའི་དྲོད་འཛིན་ལ་ཐིམ་པ་དང་མཉམ་དུ་འདི་སྣང་ཐམས་ཅད་སྐབས་འབྱེད་ནུས་ཤིང་། ནད་གཞི་ཡང་ཇེ་དེངས་ལ་སོང་ ངོ་། །དེ་ནས་མདུན་ལུང་གོང་མའི་གཡོན་ཕྱོགས་སུ་བྲག་རི་སེངྒེ་གནམ་དུ་མཆོང་འདྲའི་ངོས་ནས། ཚེ་སྒྲུབ་ཉི་ཟླ་ཁ་སྦྱོར་གྱི་ཟབ་ཤོག་གཟི་སྒྲོམ་ཟུར་བརྒྱད་པ་དང་། རྟ་མགྲིན་ལས་ཚོགས་བདུད་དཔུང་ཚར་ཆོད་ཀྱི་ཟབ་ཤོག་གནམ་ལྕགས་གའུ་ཁ་སྤྲོད། གཞན་ཡང་སྔོན་གནས་རྗེས་དྲན་གྱི་གཏེར་ཁ་ཆ་ཤས་གསང་གཏེར་གྱི་ཚུལ་དུ་བླང་བ་དང་། གཏེར་སྲུང་སོ་སོས་སྤྲད་པ་བྱུང་བས། དེ་དག་ལ་ལ་ཡང་གཏེར་དང་། ལ་ལ་གསལ་ཁྱབ་ཏུ་བྲི་སྤེལ་བྱེད་པའི་འདུན་པ་བཅས་ཆོས་བདག་ལ་འཕྲོད་པར་བྱས། དེ་ནས་འབྲོང་སྐོར་བ་རྣམས་རང་ཕྱོགས་ལ་ཕྱིར་ལོག །ངེད་མ་བུ་དང་། ཐུབ་བཟང་བུ་སྤུན་གཉིས་བཅས་བྱ་སྟོད་ལ་རྗེའི་སྐུ་དྲུང་དུ་སོང་ནས། ཐོག་མར་བླ་མ་ཚུལ་བཟང་གིས་ངེད་ཅག་མཐོང་ནས་དགའ་སྤྲོ་ཆེན་པོས་བསུ་བ་ལ་བྱོན། དེ་ནས་རྗེ་དེ་ཉིད་དང་མཇལ་འཕྲད་མཛད་པའི་སྐབས་ཐུགས་བརྩེ་བས་བསྐྱངས་ཏེ་དགའ་སྤྲོ་ཆེན་པོ་མཛད། དེ་སྐབས་རང་ནས་ཀྱང་ཤི་གསོན་འཕྲད་པ་ལྟ་བུའི་དགའ་སྤྲོས་རྗེ་ལ་དདཔ་འབྲལ་མི་ཕོད་པ་ལྟར་བྱུང་། རང་གི་གཏེར་རྫས་ཁྱད་པར་བ་དང་། གཞན་ཡང་དངོས་རྫས་ཅི་འབྱོར་མཇལ་རྟེན་དུ་ཕུལ་བས། རྗེའི་ཐུགས་དགྱེས་པ་ཆེན་པོ་བཞེས་ཏེ། རྟེན་འབྲེལ་གྱི་གསོས་སུ་གྱུར། དེ་ནས་ལུགས་གཉིས་ཀྱི་ཞིབ་ བྃ༔ གསུངས་མཛད་སྐབས། རང་གི་ཡིད་སྐྱོ་ནས་ད་ཇི་ལྟར་བྱས་ཀྱང་ད་ལན་མ་གཏོགས། རྗེ་དེ་ཉིད་ལ་དངོས་སུ་མཇལ་བའི་སྐལ་བ་ཨེ་ཡོད་སྙམ་ནས་ཡིད་ཆུང་བྱས་ཏེ་མཆི་མ་བྱུང་བས། རྗེས་ཐུགས་བརྩེ་བས་སེམས་གསོས་ཀྱིས་བསླབ་བྱ་མཛད་ཚེ། བདག་གིས་འདི་སྐད་ཞུས། ཁྱེད་ཀྱིས་བདག་ཐུགས་བརྩེ་བ་ཆེན་པོས་རྗེས་སུ་བཟུང་སྟེ། མི་གྲལ་ནས་བུད་པ། ལྷ་གྲལ་དུ་བཀོད་ནས། ཚེ་སྲོག་འཛིན་པའི་ཀ་བ། མྱུར་ལམ་བསྒྲོད་པའི་གསང་གྲོགས། ཟབ་གཏེར་གདུལ་བྱ་རྒྱས་པའི་དཔའ་བོ། ལུགས་གཉིས་བྱ་བ་ཀུན་གྱི་འབྱུང་གནས་དམ་པ། ཁྱེད་ལྟ་བུ་ཁོ་མོ་བདག་གིས་སྔར་ཡང་མ་རྙེད། ཕྱི་ནས་རྙེད་པ་ལྟ་ཞོག །དེའི་ཕྱིར་ན་ཁྱོད་བདག་གི་བསོད་ནམས་ཀྱི་དཔལ་དུ་མི་བཞུགས་སྙམ། ཁྱདཔར་བདག་གིས་ན་ནིང་ཁྱོད་སྣ་རིང་མ་ལ་བཞུགས་ཡོད་སྐབས། རང་གི་ཁ་ཞེ་གཏིང་མེད་པའི་ཡང་ཞུ་བཅས་ཀྱང་དོན་འབྲས་ཅི་ཡོད་ཆ་མ་ཆོད་པས། ང་རང་ལས་ངན་པ་ཡིན་པས། རྗེ་ཁྱོད་ཀྱི་སྔོན་དུ་བདག་ཚེ་འཕོས་སོང་ན་ཅི་མ་རུང་སྙམ་པ་ཡིན་ཞུས་ཚེ། ཡང་སྔར་ལྟར་སྐུ་ཚེ་རྐྱེན་དབང་དུ་མི་གཏོང་གསུངས་ཏེ། གཅིག་གྲོགས་གཅིག་གིས་མཛད་ནས་རྟེན་འབྲེལ་ཕུན་སུམ་ཚོགས་པའི་གསོས་སུ་གྱུར་ཏོ། །དེ་ ནས་བྱང་རྒྱའི་འུར་ཟིང་གི་རྐྱེན་གྱིས་ཉེ་འཁོར་རྣམས་ཀྱིས་གྲོས་ཐག་བཅད་ནས། རྗེའི་བཞུགས་གནས་གཡུ་བསྭེ་བྱ་བའི་གནས་དེ་ཀར་སྤར་ཏེ།