Tibetan
སོང་སྟེ་མཇལ་འཕྲད་སྐབས། བདག་གི་སྣང་བ་མི་སྤྲོ་ཞིང་ཁོང་གི་སྐུ་མདུན་ལ་འདུག་སྙིང་མི་འདོད་ཅིང་གཏམ་ཡང་བཤད་མི་མོས་པ་ལྟ་བུར་སོང་འདུག་པས། ཁོང་གི་ཞལ་ནས་ཁྱོད་ད་ལན་ཐུགས་ཡིད་མི་དྭངས་དོན་ཅི་ཡིན་གསུངས། བདག་གིས་ཁྱོད་ད་ལོ་ཞིང་ཁམས་ལ་ཕེབས་འགྲོ་བ་འདྲ། མདང་གསུམ་རྨི་ལམ་ལ་འཇིག་རྟེན་མཁའ་འགྲོ་མང་པོ་ཞིག་གིས་ཁྱོད་ཀྱི་ཐུགས་དམ་གྱི་དཔེ་ཆ་དེ་ཀ་དར་གྱི་འོད་ལི་ལ་དྲངས་ཏེ་དབྱིངས་སུ་ཡལ་སོང་བ་རྨིས་པ་དང་། ད་ལན་ཁྱོད་མཇལ་མ་ཐག་སེམས་ཁམས་སྡུག་གིས་གང་ནས་འདུག་སྙིང་མི་འདོད་གི་ཞུས་ཚེ། ཁོང་གི་ཞལ་ནས་ང་ད་ལོ་ཨེ་འཆི་མི་ཤེས་ནད་བབས་ཤིན་ཏུ་ལྕི་བས་ཅི་འགྱུར་དཀའ་མོ་རེད། འོན་ཀྱང་ང་རང་ཤི་སོང་ཡང་མྱུར་བར་ཁྱོད་ཀྱི་རིགས་སུ་སྐྱེ་སྲིད་བཟུང་བའི་འདུན་པ་གཏད་ན་ཆོག་པར་སྣང་། དེའི་ཕྱིར་ན་ང་རང་མི་རྒན་རྐང་པ་མེད་པ་ཞིག་ཡུན་རིང་ལ་བསྡད་མ་བསྡད་ཅི་ཡོད། ཁྱོད་རང་དང་ནི་འདུ་འབྲལ་ནམ་ཡང་ཡོད་ཆགས་མིན་གསུངས་ཚེ། བདག་གི་སེམས་ཁམས་སྡུག་གིས་གང་ནས་ཅི་ཡང་ཞུ་མ་ཐུབ་པར་ངུ་ཞིང་བསྡད་པས། ཁོང་གི་ཐུགས་ཀྱིས་མ་བཟོད་ནས་བརྩེ་བ་ཆེན་པོའི་ལུགས་གཉིས་ཀྱི་བསླབ་བྱ་དང་། ཁྱད་པར་ང་རང་གི་ཁ་བྱང་ཁོང་གི་དགོངས་བཞིན། ཐབས་གྲོགས་ཨཀྵ་ར་བཛྲ་དང་། པྲ་ཝ་མ་ཏི་གཉིས་ཀྱི་ཐད་ནས་རྟེན་འབྲེལ་གཞན་དབང་དུ་གཏོང་མི་ཉན་པའི་གསུང་གནད་འཕང་བ་སོང་མཛད་སྐབས། བདག་གིས་འདི་སྐད་ཞུས། ཁྱོད་སྐུ་མ་བཞུགས་རྗེས་སོར་ང་རང་ཡང་མི་འདུག་ངེས་པ་ཡིན་ལགས། ང་རང་འཇིག་རྟེན་འདིར་སྣང་དུ་འདུག་སྙམ་ཀྱང་། གཞན་རྐྱེན་རྟེན་འབྲེལ་ལོག་པ་ཁོ་ནས་འདུག་དབང་མེད། ལུས་འདི་བོར་ནས་ངེས་མེད་ཀྱི་གནས་གང་དུ་འགྲོ་དགོས་ཀྱང་རང་དབང་ཡོད་པ་ལྟ་བུ་ཡིན་པ་འདྲ་ན་ཤི་ཨེ་ཐུབ་མི་ཤེས་ཀྱང་འདུན་པ་གཏད་དང་ཆོག་གི་།དེའི་ཕྱིར་ན་ཐབས་གྲོགས་རྣམས་ཀྱི་ཐད་ནས་རྟེན་འབྲེལ་ལྡན་མ་ལྡན་མེད་ཞུས་ཚེ། ཡང་ཁོང་གི་ཞལ་ནས་དེ་ལྟར་མ་གསུངས་དང་འུ་ཅགགྲོས་བྱེད་དང་ཆོག་གི །ཁྱོད་ཀྱི་བསྙུངགཞི་ཅི་ཡིན་ཨེ་གོ་གསུངས། བདག་གིས་ང་རང་གི་ནད་མ་ངེས་པ་ཞིག་རེད། དེ་གོ་མ་གོ་མེད་གསལ་ལོས་ཡོང་། ཁྱོད་ལ་རིམ་གྲོ་ཅི་བསྒྲུབ་དགོས་གསུང་བར་ཞུ་ཞུས་ཚེ། ཡང་ཁོང་གིས་ང་རང་གི་སྐུ་རིམ་ལ་བླ་མ་གྲྭ་ཚང་སར་གཞི་ཁག་གསུམ་སོགས་ཀྱིས་ལོ་གཅིག་ལ་རིམ་གྲོས་རྒྱུན་མ་བཅད་པ་ཁྱོད་ཀྱིས་ བྃ༔ མཁྱེན་བཞིན། ད་ཚེ་ཟད་ནད་པ་སོས་ཐབས་དཀའ། །ཉི་མ་ལ་ཁར་འདུག་ཐག་ཐུང་། །ཟེར་བའི་དཔེ་བཞིན་རིམ་གྲོས་ཕན་ཐོགས་འོང་ཐབས་དེ་ཙམ་རེད། མིན་ཀྱང་ང་རང་ལ་དགོས་པ་ཆེན་པོ་ཞིག་ཡོད་པས་ཅི་འགྱུར་མི་ཤེས་གསུངས། ཡང་བདག་གིས་ཁྱོད་ལ་དགོས་པ་ཇི་ལྟར་ཡོད་སྦས་གསང་མེད་པར་གསུངས་དང་། དེའི་རྗེས་འུ་ཅག་དཔོན་གཡོག་གྲོས་བྱེད་དང་ཆོག །དེ་མིན་སྔར་ཞུས་ལྟར་ཁྱོད་མ་བཞུགས་ཚེ་ང་རང་ཡང་འཆི་མ་ཐུབ་ཀྱང་ས་མཐའ་ཞིག་ལ་འགྲོ་བ་ལས་འོས་མེད་པ། གཅིག་ཐད་ནས་ཚེ་རོགས་ངན་པས་གཟའ་སྡུག །གཉིས་ཐད་ནས་དུས་དང་རྣམ་པ་ཀུན་ཏུ་འཁོར་བའི་བྱ་བར་འབད་ནས་དཔོན་ཁྲིམས་ཁ་ཅན་གྱི་གོ་གཡོག་ལྟ་བུར་བྱས་ཏེ་མི་ཚེ་སྡུག་ལ་ཟད་དགོས་པ་འདྲ་ན། བླ་བྲང་ནང་དུ་མི་འདུག་ངེས་པ་ཡིན་ཞུས་ཚེ། ཁོང་གི་ཞལ་ནས་ཁྱོད་ལ་བྱ་བ་གང་ཐད་ནས་ཁག་མེད་ཡིན་པས་ཕྱི་ནང་ཀུན་གྱིས་གསལ། འོནཀྱང་སྐབས་རེ་ལ་དེཀར་སྡོད་དང་རིམ་གྱིས་རང་ལམ་གསལ་འོང་གི་།ང་རང་ལ་དགོས་པ་ཡོད་དོན་ནི་སྔ་སོར་ཁྱོད་གནས་ནང་དུ་ཐོག་མར་བྱོན་སྐབས། ཁྱོད་ཀྱིས་ང་ལ་གཞན་རྐྱེན་ཤུགས་དྲག་པ་ཞིག་གིས་འབོད་མི་ཐོན་འོང་བ་འདྲ། དེ་ཀར་ཁྱོད་འགྲོ་མི་ཉན་ནན་ཆེར་གསུངས་པ་ཡོད་ཀྱང་། ཨ་སྐྱོང་དཔོན་ཆུང་ཤི་སོང་བས། དེ་ཀར་རྡི་སྤྲུལ་སང་དང་། དཔོན་རྒན་རྣམས་ཀྱིས་ནན་ཏན་ཆེན་པོས་བདག་ཡོང་དགོས་གསུངས་ཏེ། བྱ་ཐབས་དང་བྲལ་ནས་དེ་ཀར་ང་རང་ཕྱི་ནང་ཀུན་གྱིས་མི་ཐོས་པར་བྱས་ཏེ་སོང་། དེ་ལ་རྐྱེན་ནས་རྐང་པ་འབམ་གཞི་ལྟ་བུར་གྱུར་ནས་བཅོས་ཐབས་དཀའ་བར་བྱུང་བ་ཡིན། དེ་དག་གི་རྐྱེན་ནི་དཔོན་ཆུང་གི་སྲོག་གཅོད་རྒྱ་བན་ཡས་དེ་ཀ་རེད། བདག་གིས་བན་རྒན་འཁྲུལ་འདུག་པ་དེ་ལ་ཕན་ཐོགས་ཤིག་མ་བྱུང་ཚེ། དགོན་སྡེ་ཡུལ་ཁོག་མངཔོའི་འགྲོ་བ་རྣམས་ལ་གནོད་ཚབ་ཆེ་བ་དང་། ཁྱད་པར་སྐྱེས་བུ་དམ་པའི་སྐུ་ཚེ་མཛད་ཕྲིན་སོགས་ལ་བར་ཆད་ཤིན་ཏུ་ཆེ་བར་འདུག་པས། དེ་ཐར་བ་ཐོབ་ཕྱིར་དང་། མིན་ཀྱང་རང་ཡང་ཚེ་ཡི་འཕེན་པ་རྫོགས་པ་སོགས་ཀྱིས་ཅི་འགྱུར་མི་ཤེས། འོན་ཀྱང་སྔར་ཞུས་པ་ལྟར་ཁྱོད་ལ་སྲས་ཞིག་ཡོད་པ་དེ་ང་རང་གི་རྣམ་ཤེས་ཡིན་ཐང་སྙམ། མིན་ཀྱང་རིགས་ཅན་ཁྱད་པར་འཕགས་པ་ཞིག་ཡིན་པས། ལོ་བཅུ་གསུམ་ལ་མ་ཐོན་བར་དུ་ཚེ་ལ་བར་ཆད་ཆེན་པོ་ཡོད་པས། གཏེར་སྲས་དྲི་མེད་སང་ལ་སྐྱབས་འཇུག་ཞུས་ན་དེས་ཕན་ཐོགས་ཡོད་ངེས་པ་ཡིན་མ་གཏོགས། དེ་མིན་གཅིག་གིས་ཀྱང་ཁོ་ལ་ཕན་མི་ཐོགས་གསུངས། ཡང་བདག་གིས་སྤྲུལ་སྐུ་དྲི་མེད་སང་མིན་པས་ བྃ༔ སྐྱབས་མི་ཐུབ་པའི་དོན་ཅི་ལགས། ཁོ་རང་སྐྱེ་བ་ངན་པ་རྒྱལ་པོའི་ཆོ་འཕྲུལ་ཡིན་ནམ། མིན་ན་ལྷ་འདྲེ་མཐུ་བོ་ཆེའི་བུ་ཡིན་ནམ། ཕ་མེད་བུ་འདི་རྒྱུ་རྐྱེན་ཅི་ཡིན་ཞུས་ཚེ། ཡང་ཁོང་གིས་ཕ་མེད་བུ་དེ་བདུད་སྤྲུལ་ཡིན་ན། སྔར་དགའ་རབ་རྡོ་རྗེ་ལ་སོགས། གྲུབ་པའི་དབང་ཕྱུག་དུ་མར་ཕ་མེད་པ་ཡིནཔས། དེ་དག་ཐམས་ཅད་བདུད་ཀྱི་ཆོ་འཕྲུལ་དུ་སྐྱོན་འབྱུང་ཉེ་བས་དེ་ལྟར་གཏན་ནས་མིན། ཁོ་རང་གི་སྔོན་གྱི་སྨོན་ལམ་དང་ལས་འཕྲོའི་དབང་གིས། གཏེར་སྟོན་ཡབ་སྲས་ཀྱི་བསྟན་པ་ལ་ཕན་ཐོགས་ཤིན་ཏུ་ཆེ་ཞིང་། ཁོ་རང་གི་གདུལ་བྱའི་ལྷག་མ་དེ་ཕྱོགས་ལ་ཡོད་པ་སོགས་ཀྱི་ཡིན་པས་ཁྱོད་ཀྱིས་དེ་ལུགས་དགོས་གསུངས། དེ་ནས་ཁོང་གིས་བླ་མ་བསྟན་འཛིན་ལ་འཕྲིན་བསྐུར་བ། ཁྱོད་ཀྱིས་མཁའ་འགྲོའི་ཞབས་བརྟན་དུ་ཚེ་སྒྲུབ་འཆི་བསླུ་ཚད་ལྡན་ཞིག་གསུངས་དང་། འབུལ་བ་སོགས་ང་རང་ནས་འཕྲོད་འོང་གསུངས་པ་དང་། ཁྱད་པར་ཡང་བདག་ལ་ད་ལོ་ཚེ་ལ་བར་ཆད་འདུག་པས། ཡིད་བཞིན་ནོར་བུའི་སྐུ་མདུན་ལ་འགྲོ་དགོས་པའི་ལོ་རྒྱུས་ཞིབ་རྒྱས་སུ་གསུངས་ཏེ། ང་རང་ཕྱིར་རང་ཁྱིམ་ལ་འགྲོ་གྲབ་བྱས་ཚེ། ཁོང་གིས་འདི་ཕྱི་བར་དོ་གསུམ་དང་སྐྱེ་བ་ཚེ་རབས་ཐམས་ཅད་དུ་འུ་ཅག་འབྲལ་བ་མེད་པའི་རྟེན་ འབྲེལ་ཡིན་གསུངས་ཏེ། རྡོ་རྗེ་དྲིལ་བུ་སྤུས་ལྡན་དང་། གཞན་ཡང་དངོས་རྫས་དུ་མ་དང་། ཤིང་ཐོག་མངར་གསུམ་གྱི་རིགས་སྣ་ཚོགས་བཅས་གནང་ནས་ཐུགས་བརྩེ་བརྩེ་མཛད་དོ། ། དེ་ནས་སྨན་དཔྱད་རིམ་འགྲོ་སོགས་ཀྱི་ཐུགས་ཁུར་སྒོ་སྤྲུལ་རིན་པོ་ཆེས་མཛད་ནས་ང་རང་གི་ལུས་ལ་ཟུག་རྔུ་མེད་པ་བྱུང་ངོ་། །དེའི་ལོར་ཡུལ་ཁམས་ཐམས་ཅད་དུ་ནད་ཡམས་དྲག་པོ་འཕྱུར་ཞིང་མི་མང་པོ་འཆི། ཁྱད་པར་དཔལ་ཡུལ་དགོན་པའི་གྲྭ་ཚང་གི་སེར་སྡེ་གང་དྲག་ཐམས་ཅད་ཤི་ནས་འཚེ་བ་ཆེན་པོ་བྱུང་བ་དང་། ཁྱད་པར་ངེད་ཅག་གི་ཆོས་སྒར་སྟེང་དུ་ནད་འཕྱུར་ནས་མི་གཅིག་ཀྱང་འགྲོ་འདུག་མ་ཐུབ་ནས་རང་རང་སོ་སོའི་ཁྱིམ་ལ་ལོག་འདུག་སྐབས། སྤྲུལ་སྐུ་སང་གི་བསྙུན་གཞི་ཇེ་འཁྲུགས་ལ་སོང་འདུག་ཟེར་བས། བདག་གི་བསམ་པ་ལ་ཁོང་མི་བཞུགས་པ་ཡིན་པས་ད་ལན་ཞིང་ཁམས་ལ་བྱོན་འགྲོ་ངེས་པ་ཡིན་སྙམ་ཀྱང་ཅི་ཡང་ཟེར་མ་ཕོད། དེ་ནས་ཁོང་གི་དངོས་སློབ་རྡོ་དགེ་ཨ་ལོ་དང་། འོད་ཆོས། འཇིགས་ཆོས་རྣམས་ནད་ལས་ཅུང་ཟད་དྲག་ཡོད་པ་སྐུ་མདུན་ལ་སོང་ཚེ། སྒོ་སྤྲུལ་རིན་པོ་ཆེའི་ཞལ་ནས་ད་ང་རང་ན་སོ་ལོན་པ་དང་། ནད་བབས་ལྕི་བས་ཅི་འགྱུར་ཆ་ཆོད་མེད་པ་འདྲ་ན། ཁྱེད་ཅག་གིས་ཉམས་ལེན་དང་ཆོས་དང་མཐུན་པའི་བྱ་བ་ བྃ༔ གང་ཐད་ནས་མཁའ་འགྲོ་སྐལ་བཟང་སྒྲོལ་མ་ལ་བློ་གཏོད་དང་། ཁོང་རང་སྦས་པའི་རྣལ་འབྱོར་མ་འགྲན་བྲལ་ཞིག་ཡིན་པས། ཁྱེད་ཅག་ལོག་ལམ་དུ་མི་ཁྲིད་ངེས་པ་ཡིན། ང་རང་ནད་གཞི་ཇེ་འཁྲུགས་ལ་སོང་བ་ཁོང་ལ་ཟེར་མི་དགོས་གསུངས། འཇིགས་ཆོས་ན་རེ་ཁྱོད་ཀྱི་སྐུ་ཁམས་ཇེ་འཁྲུགས་ལ་སོང་བ་མཁའ་འགྲོས་སྙན་འདུག་ཞུས་ཚེ། ཁོང་རྣམས་ལ་བདག་གི་སར་ཡི་གེ་ཞིག་ཐམ་རྒྱ་མཛད་ནས་བསྐུར་བྱུང་བས། བདག་གིས་ཡི་གེ་འདི་ཅི་རེད་ཁྱོད་ཅག་ལ་ཅི་གསུང་གི་དྲིས་ཚེ། གོང་གི་ལོ་རྒྱུས་རྣམས་བཤད་ཅིང་། ད་ངེད་ཅག་ལ་ཅི་མཐའ་མི་ཤེས་ཟེར། བདག་གིས་ཡི་གེ་དེ་ཀ་ཁཕྱེས་ནས་བལྟས་ཚེ་འདི་ལྟར་སྣང་། བདེ་ཆེན་མཁའ་འགྲོའི་འདུ་གླིང་དུ། །བདེ་བའི་འབྱུང་གནས་རྣལ་འབྱོར་ང་། །སྒྱུ་མའི་འཁྲུལ་འཁོར་དོར་ནས་འགྲོ། །ཆོས་དབྱིངས་ཀློང་དུ་ཨེ་མ་ཧོ། །བདེ་ཆེན་བདེ་བའི་རྡོ་རྗེ་ཁྱོད། །འགྲོ་ཀུན་བདེ་བ་ལ་འགོད་ཕྱིར། །སྐུ་ཚེ་བསྐལ་བརྒྱར་ཞབས་བརྟན་གསོལ། །མ་འོངས་དཔལ་རིའི་ཕོ་བྲང་དུ། །འབྲལ་མེད་བདེ་ཆེན་དཔལ་སྤྱོད་ནས། །ཚོམ་བུ་གཅིག་ཏུ་འཁོད་པར་ཤོག །ཅེས་གསུངས་པ་ལ། བདག་ཡིད་ཤིན་ཏུ་སྐྱོ་ཡང་བྱ་ཐབས་དང་བྲལ། དེ་ནས་ལོ་ཁྱིམས་དེ་ཀའི་ཟླ་བ་ གཉིས་པའི་ཚེས་བདུན་གྱི་ཉིན་སྤྲུལ་པའི་སྐུ་དེ་ཉིད་ཀྱིས་གཟུགས་སྐུ་ཆོས་དབྱིངས་ལ་ཐིམ་ནས་ཕྱི་རྟགས་སུ་ནམ་མཁའ་ལ་འཇའ་ཚོན་ཤར་བ་དང་། སྒྲ་འུར་བ་དང་། ཅང་ཏེའུ་དང་གླིང་བུའི་སྒྲ་སོགས་ཀུན་གྱིས་གསལ་པོར་ཐོས་པས། ཆོས་སྒར་བ་ཐམས་ཅད་ཡིད་མ་བདེ་ཡང་ནད་ཀྱིས་མནར་བ་ཤ་སྟག་ཡིན་པས་འགྲོ་འདུག་མ་ཐུབ་ནས་བཏང་སྙོམས་ལ་སྡུག་སྒུར་བྱས་བསྡད། ད་ལྟ་དགོང་མོ་མདུན་འདུག་གི་ཕྱག་མཛོད་རྡོ་དགེ་འོད་གསལ་ཞེས་པ་ངེད་ཅག་ཆོས་སྒར་བ་རྣམས་ཀྱི་སར་འོང་ནས། སྐུ་ཞི་བར་གཤེགས་སོང་བའི་ལོ་རྒྱུས་བཤད་ཚེ། དེར་འདུས་ཐམས་ཅད་དྲན་པ་མེད་པ་ལྟ་བུར་གྱུར་ཏེ་མྱ་ངན་ཆེན་པོས་ནོན་ཅིང་ལོང་བ་ཐང་དཀྱིལ་ལ་བོར་བ་ལྟ་བུར་གྱུར་ཏེ། དེ་སྐབས་འོད་གསལ་ང་རང་གི་སར་འོང་ནས་ཡིད་སྐྱོ་བའི་སྡུག་གཏམ་དུ་མ་བཤད་ཅིང་། ཁྱད་པར་སྐུ་ཞི་བར་གཤེགས་དུས་ཅི་གསུང་གི་དྲིས་ཚེ། འོད་གསལ་ན་རེ། དང་པོ་བསྙུན་གཞི་ཇེ་འཁྲུགས་ལ་འགྲོ་སྐབས། སྒོ་ཆེན་དབོན་རྒན་དང་། རྡོ་དགེ་རིག་འཛིན་སོགས་ཀྱིས་བྱེད་རྒྱུ་མ་རྙེད་ནས། ཁྱོད་འབོད་དུ་འགྲོ་དགོས་དེས་ཕན་ཐོགས་རེ་ཨེ་ཡོད་ཞུས་ཚེ། མཁའ་འགྲོ་ཁོང་རང་རིམ་གྱིས་ན་གྱིན་ཡོད་པས་འདི་ཀར་འོང་མི་ཐུབ། གལ་ཏེ་འོང་ཐུབ་ཀྱང་སྔར་ཁྱེད་ཅག་ལོག་ལྟ་བྱེད་ བྃ༔ པ་དེ་རེད། མི་སྡུག་ཐུག་ན་ཁྱི་ལ་ཕྱག་འཚལ་ལོ་ཟེར་བའི་དཔེ་བཞིན་ཡིན་པས་ཁོ་རང་བྱོན་ཟེར་མ་དགོས་མ་གཏོགས་དམ་སེལ་གྱིས་ཁོང་ལ་གནོད་འོང་གསུངས་ནས། སྤྲུལ་སྐུ་སང་ཁོང་རྣམས་ཀྱི་ཁ་མ་ཉན། དེ་ནས་དབོན་རྒན་གྱིས་ཕྱག་མོ་གཟིགས་ནས་ཚེ་སྒྲུབ་འཆི་བསླུ་འདོན་དགོས་གསུངས་ཏེ། དཔོན་གཡོག་བཅུས་ཚེ་སྒྲུབ་གསུངས་ནས་ད་ནང་འཆི་བསླུའི་མགོར་ཐོན་སྐབས། བླ་སེར་རྣམས་ཀྱིས་གསོལ་ཇ་བཞེས་གྲུབ་བྱས་ཏེ་ལ་ལ་དྭངས་སང་ལ་བསྡད་ཡོད་སྐབས། དབོན་པོ་དང་རིག་འཛིན་གཉིས་སྐུ་མདུན་ཐོན་བྱུང་བས། སྤྲུལ་སྐུ་སང་གིས་ཁྱེད་གཉིས་ད་དུང་མ་བྱོན་གསུང་པས་ཁོང་གཉིས་ཕྱིར་བུད་སོང་། དེ་ནས་སྐུ་མདུན་ལ་ང་རང་གཅིག་པུ་ཡིན་པས། ཁོང་གི་ཞལ་ནས་ཆོས་ཅན་གྱི་སྣང་བ་ཆོས་ཉིད་ལ་ཐིམ་ཞེས་པ་འདི་རེད་གསུངས་བདག་གིས་དོན་མ་གོ་ཡང་སེམས་སྡུག་ཆེ་བས་ཅི་ཡང་ཞུ་རྒྱུ་མ་རྙེད། དེ་ནས་ཁོང་གི་ཞལ་བྱང་ཕྱོགས་ལ་གཟིགས་ནས་ལྟ་སྟངས་མཛད་ཅིང་ཕུར་བསྙེན་ཚར་གསུམ་གསུངས་ནས། དེ་བྱང་རྒྱ་དང་སློབ་མ་རྣམས་ཀྱི་བར་ཆད་ཀྱི་ཁ་གནོན་ཡིན་གསུངས། ཞལ་ཤར་དུ་གྱུ་ནས་ཁོང་གི་རྟེན་སྒམ་དེ་ཀ་ཁྱོད་ཀྱི་ལག་པ་དར་གྱིས་ལྕིབ་ལ་ཁྱེར་ཤོག་གསུངས། བདག་གིས་དེ་ལྟར་བྱས་ ནས་རྟེན་སྒམ་ཕྱག་ཏུ་ཕུལ་བས་དབུ་ཐོག་ཏུ་བཞག་ནས་ཡུན་གཅིག་ལ་སྨོན་ལམ་བཏབ། ཁ་ཕྱེས་ཏེ་སྒྲུབ་རྟེན་གྱི་ཕུར་བུ་གསུམ་འདུག་པས། གཙོ་ཕུར་རེདགསུངས་ནས་དབང་བཞི་བླང་། ལས་ཕུར་དང་། བསྒྲལ་ཕུར་རེད་གསུངས་ཤིང་འདྲིལ་སྟངས་དང་གདབ་པའི་ཚུལ་མཛད། གསུམ་པོ་ལྷན་དུ་ཕྱག་གིས་བཟུང་ཞིང་གནས་ལྔར་གཏུགས་ཏེ་གཤེགས་བསྡུ་མཛད་ནས་ཕུར་བུ་རྣམས་བདག་ལ་གནང་སྟེ། ད་འདི་རྣམས་ཁྱེད་ཅག་གི་རྟེན་བྱེད་དམ་གཞན་ལ་སྦྱིན་པ་སོགས་ཅི་དགོས་གྱིས་གསུངས། ཤོག་ཆགས་རྣམས་ཁ་ཕྱེས་ནས་མགར་ར་གཏེར་ཆེན་དང་། གཏེར་སྲས་དྲི་མེད། མཁའ་འགྲོ་མ་སོགས་ཀྱི་དབུ་སྐྲ་ན་བཟའ་རེད་གསུངས་ནས་མེ་ལ་བསྲེགས་ཤིང་ཚིག་རོ་རྣམས་གསོལ། དེ་རྣམས་ཀྱི་གཏེར་རྫས་རེད་གསུངས་ནས་ཤོག་སེར་ཆོས་སྨན་ཐམས་ཅད་ཞལ་དུ་གསོལ་ཞིང་། དབྱངས་ཅན་མའི་སྐུ་དང་། གཞན་ཡང་སྒྲོམ་བུ་ཆ་ཤས་དར་སྣ་ལྔའི་ནང་དུ་ལྷན་གཅིག་ལ་བཞག་སྟེ། འདི་རྣམས་ལ་ལ་ཐག་རིང་། ལ་ལ་ཐག་ཉེར་ཡོད་པའི་གཏེར་སྟོན་ཞིག་གི་ཡིན་པས། ཁྱེད་ཅག་ལ་དགོས་མེད་ན་ཁོང་རང་གིས་བདག་པོ་བྱེད་འོང་། དེ་སྐབས་དེ་ལ་གཏོད་གསུངས་མ་ཐག་རྟེན་སྒམ་དབུ་སྔས་ལ་བཞག་ནས། ཨཱཿཨཱཿཨཱཿ བྃ༔ གསུངས་ཏེ་སྐུ་མྱ་ངན་ལས་འདའ་བའི་ཚུལ་གྱིས་གཤེགས་སོང་ཟེར། དེ་སྐབས་གོང་གི་གཏེར་རྫས་རྣམས་རང་གི་ཡིན་པར་ཤེས་ཀྱང་བཏང་སྙོམས་ལ་བཞག་གོ། །དེ་ནས་སྐུ་གདུང་རིན་པོ་ཆེ་མེ་དཀྱིལ་དུ་འོད་ཞུ་བྱེད་སྐབས། གདུང་རྟེན་ཞི་བ་རྡོ་རྗེ་སེམས་དཔའ་ཚོན་གང་བ་དང་། ཁྲོ་བོ་རྟ་མགྲིན་ཕུར་མཇུག་ཅན་ལེབ་སོར་བཅུ་གསུམ་གྱི་ཚད་ཙམ་ཡོདཔ་དང་། གཞན་ཡང་རིང་བསྲེལ་སོགས་རྟགས་མཚན་ཁྱད་པར་བ་དུ་མས་རྗེས་འཇུག་སྐལ་ལྡན་རྣམས་ཀྱི་དད་མོས་ཀྱི་རྟེན། མཆོད་འབུལ་བསོད་ནམས་བསགས་པའི་གནས་སུ་མཐོང་ཆོས་སུ་ད་ལྟའི་བར་དུ་བཞུགས་པའོ། །དེ་སྐབས་རྒྱལ་སྲས་སྐུ་མདུན་དུ་སྐེ་བསམ་ཞེས་པས་ཡི་གེ་ཞིགཕུལ་བྱུང་བས། བདག་གིས་ཅི་ཡིན་མ་གོ་ནས་རྒྱལ་སྲས་སྐུ་ནུས་འཇིགས་མེད་དཀོན་མཆོག་ལ་ཡི་གེ་འདི་སུས་བསྐུར་བ་རེད་དྲིས་པས། ཁོང་ན་རེ། སྤྲུལ་སྐུ་དྲི་མེད་སང་གིས་བསྐུར་བ་རེད། དེ་དང་མཉམ་དུ་ཁྱོད་རང་ལ་ཡི་གེ་ཞིག་བསྐུར་འདུག་ཟེར། ཡང་བདག་གིས་རྒྱལ་སྲས་ལ་ང་རང་ལ་བསྐུར་བའི་ཡི་གེ་དེ་ཀ་བདག་ལ་ཨེ་གནང་ཞུས་ཚེ། ཁོང་གི་ཞལ་ནས་ཡི་གེ་ཁྱོད་ལ་སྦྱིན་ཀྱང་ཆོག་མ་སྦྱིན་ཀྱང་ཆོག་གི །མདོར་རྩ་སྤྲུལ་སྐུ་ཁོ་རང་ད་ལོ་མཁྱེན་སྤྲུལ་གྱི་ཀེག་ཐོག་ལ་ཐོན་ཡོད་ པས། དེའི་རྐྱེན་སེལ་དུ་ཁྱོད་དང་ལྷན་དུ་ཡུམ་ཀའི་ཚེ་སྒྲུབ་ལ་ཟླ་བ་གཅིག་ལ་བསྡད་ན་བར་ཆད་སེལ་ངེས་པ་ཡིན། བླ་མ་ཉག་བླ་སང་། ཨ་འཛོམས་སང་། སྒོ་སྤྲུལ་སང་སོགས་ཀྱི་སྔར་ནས་གསུངས་པ་དང་། ད་ལན་ཡང་ཉག་བླ་སང་དང་། བླ་མ་མང་པོས་ཡང་ཡང་ལུང་དུ་བསྟན་ནས། བསོད་སྤྲུལ་སང་དང་། རྡོར་དགྲ་ཡབ་ཡུམ་སོགས་ཀྱིས་བཀའ་གྲོས་མཛད་ནས། ངའི་སར་ཡི་གེ་ཐོན་བྱུང་བས་འགྲོ་དགོས། མིན་ཀྱང་ཁྱོད་ཁོང་ལ་སྦྱིན་ཡོད་པ་ཡིན་པས། བདག་པོ་འོང་དུས་ཐབ་ཟངས་སྦྱིན་ཟེར་བ་ལྟར། ང་རང་གི་སེམས་ལ་མི་འབབ་རྒྱུ་ཅི་ཡང་མེད་གསུངས་ཤིང་དེ་ཀར་འགྲོ་ཐག་བཅད་ནས་ཡིག་ལན་བསྐུར་བ་སོགས་མཛད། དེ་སྐབས་བདག་གིས་ཐུབ་བཟང་དང་། འཇིགས་མེད་དཀོན་མཆོག་གཉིས་ལ་རྒྱལ་སྲས་ཀྱིས་དེ་ལྟར་གསུངས་ཀྱང་། གསང་ཐབས་ཙམ་ལ་འགྲོ་བ་མ་གཏོགས་ཀུན་གྱིས་མངོན་གྱུར་དུ་འགྲོ་གྲབ་མ་བྱས་ན་སྙམ་གི་། །དཕན་ཆད་ང་རང་ལ་ཡང་བསམ་དགོས་རེ་ཡོད་པས། བྱ་བ་གང་ཐད་ནས་གཏེར་སྟོན་བླ་བྲང་ལ་ང་རང་སྦྱིན་ཡོད་ཟེར་བ་དེ་མ་བསྒྲགས་ན་སྙམ་གི་སྨྲས་ཚེ། ཁོང་གཉིས་ཀྱིས་ཀྱང་དེ་ལྟར་བསམས་ཀྱང་འོ་སྐོལ་རྒྱལ་སྲས་སང་གིས་མི་སྐད་མི་ཤེས་པ་འདྲ་ཟེར། དེ་ནས་ བྃ༔ ངེད་དཔོན་གཡོག་འབྲོང་སྐོར་ལ་འགྲོ་དགོས་སྨྲས་ཏེ། རྒྱལ་སྲས་སྐུ་མཆེད་དང་། ངེད་མ་བུ་གཉིས། ཐུབ་བཟང་བཅས་ཐོག་མར་འབྲོང་སྐོར་ལ་ཕེབས་ནས། མཁར་འགབ་མགར་སྐོར་ནང་དུ་ཐོན་སྐབས། བློ་ཆོས་སང་གི་ཟུར་ལ་ཞག་ཆ་ཤས་སུ་བཞུགས། དེ་དུས་བློ་ཆོས་དང་། རྒྱལ་སྲས་སྐུ་མཆེད། ཐུབ་བཟང་སོགས་གཟའ་མི་ལྷན་དུ་འཛོམས་སར། ང་རང་སྔར་བསྐལ་པ་ཡོས་བུའི་ལོར་གཏེར་སྟོན་སང་ལ་སྦྱིན་རབས། རྒྱབ་ཕ་མིང་མེད་པའི་རྐྱེན་གྱིས་གསལ་སྒྲོན་ཁབ་ཏུ་བཞེས་ནས་གཟའ་སྡུག་གཏད་རབས། རྒྱུ་རྫས་ལ་ཁྱད་ཕྱེས་ནས་རྒྱལ་སྲས་ཀྱི་ཕྱག་རྫས་ངེད་མ་བུ་ལ་ལོངས་སྤྱོད་མི་ཆོག་རབས་ཐམས་ཅད་བཤད་ནས། ད་ལན་གྱི་སྐབས་སུའང་དགོས་མེད་བྱས་ཤིང་གསང་ཐབས་ཙམ་ཡང་མི་ཆོག་པར་མངོན་གྱུར་དུ་འགྲོ་དགོས་པ་ཡིན་པས། ད་སྔ་ནི་རང་ཐད་ནས་དམན་ས་བཟུང་སྟེ། ཁྱེད་མགར་ར་སང་གིས་ཅི་བསྒོས་ཀྱི་བཀའ་བསྒྲུབ། ཅི་བགྱིས་ཀྱི་ལས་ཀ་བྱས་ནས་གོ་གཡོག་ངན་པ་ལྟ་བུའི་དཀའ་ལས་དཀའ་ཚེགས་བྱས་པ་ཡིན་མ་གཏོགས། ང་རང་མོ་ལོ་བཅུ་གསུམ་གྱི་དུས་ནས་མ་དང་མཁའ་འགྲོས་ལུང་བསྟན་ཏེ། ཐབས་གྲོགས་ཆོས་བདག་གཏེར་གནས་སོགས་གར་ཡོད་ང་ རང་གིས་ཤེས། ཁྱོད་རྣམས་ཀྱིས་བསྟན་མི་དགོས་ཀྱང་། ང་རང་ཁྱེད་ཅག་ལ་ཤིན་ཏུ་གནོད་འདུག་པས། མཐོ་དམན་ཀུན་ལ་སྦྱིན་པར་མ་ཐོན་པ་ལྟ་བུར་བྱེད་འདུག་པས། ད་ཕན་ཆད་དབུས་མོས་བྱ་བ་མ་ཐོན་ནས། གཏེར་སྟོན་སྤྲུལ་སྐུའི་སྐུ་མདུན་དུ་འགྲོ་འདུག་བྱེད་ཀྱིན་ཡོད་ཟེར་བ་ཁྱེད་ཅག་སུས་ཐད་ནས་སྨྲས་ཚེ། ང་རང་གི་སེམས་ལ་བསམ་ཡོད་པའི་བྱ་བ་དེ་མ་འགྲུབ་བར་དུ་དམ་བཅའ་ལྷོད་མེད་ངེས་པ་ཡིན། དེ་བས་ད་ལན་འུ་ཅག་སྤྲུལ་སྐུ་སང་གི་སྐུ་མདུན་ལ་འགྲོ་མི་འགྲོ་ཁྱོད་རྣམས་གྲོས་གྱིས། མི་འགྲོ་སྙམ་ན་ང་རང་གི་ཐད་ནས། འགྲོ་དགོས་ཟེར་རྒྱུ་ཚིག་གཅིག་ཀྱང་མེད་སྨྲས་ཚེ། རྒྱལ་སྲས་དཔོན་གཡོག་གིས་ཅི་ཡང་མི་གསུང་བར་བཞུགས་འདུག །བློ་ཆོས་ཀྱིས་ཁོང་མགར་ར་སང་གི་བྱ་བ་མ་ཐོན་རབས་དང་། ཁྱད་པར་ད་ལན་གཏེར་སྒར་ལ་མི་འགྲོ་ཐབས་མེད་ཡིན་འདུག་པས་ཁྱོད་མ་འཆུག་ཟེར། ཡང་བདག་གིས་ང་མི་འཆུག་ཅི་ལས་རྒྱུ་ཡོད། ང་རང་གི་ཐད་ནས་ད་ལྟ་མ་འོངས་གཉིས་ཀྱི་ལོ་རྒྱུས་ཞུས་ཚར་བ་དེ་ཀ་ཡིན་སྨྲས་ཚེ། བློ་ཆོས་ན་རེ་དེ་དག་ལོས་ཡིན། ངེད་ཀྱིས་རང་བྱས་མཐོན་པའི་རྐྱེན་གྱིས་ད་ལན་ལྟ་བུ་ཞིག་ལ་ཡང་ཅི་དགོས་མི་ཤེས་པར་འདུག་ཀྱང་བྱ་ཐབས་མེད། ཁྱོད་མ་འཆུག་ཟེར་རྒྱུ་དེ་སྤྲུལ་སྐུ་དྲི་མེད་ བྃ༔ སང་གིས་ཁོང་ལ་རྒྱལ་སྲས་ཀྱིས་སྦྱིན་ཡོད། ད་ཁྱོད་སྐུ་མདུན་ལ་འདུག་དགོས་འདྲ་གསུངས་ན། དེའི་དབང་དུ་མི་གཏོང་ཐབས་ཁྱོད་མ་འཆུག་རེམ་རེམ་ཟེར། ཡང་བདག་གིས་ལུགས་གཉིས་གང་ཐད་ནས་ང་རང་གི་བྱ་བ་འདི་ཕྱི་ཐུབ་པ་བྱེད། ད་སྔའི་ཐད་རྒྱལ་སྲས་ཀྱིས་ཅི་གསུངས་མི་ཤེས་མ་གཏོགས། སྤྲུལ་སྐུ་སང་གིས་ང་རང་ལ་གསུང་ཡིག་བསྐུར་བའི་ནང་དུ་རྒྱལ་སྲས་ཀྱི་ཐུགས་བབ་མེད་ཚེ་འོང་མི་ཉན་གསུངས་ཡོད་པ་ཁྱོད་