Tibetan
ལ་སྦྱིན་ཅིང་། འདི་ནི་རྨ་རྒྱལ་ལྷ་བུ་དུང་སྐྱོང་གི་སྐུའི་རིང་ལ་འཇིག་རྟེན་ཁམས་ཀྱི་ཕྱྭ་གཡང་གཏེར་བཅུད་ཐམས་ཅད་བསྡུས་ནས་རྨ་རྒྱལ་བང་མཛོད་གསེར་མཁར་སྨུག་པོར་གཏེར་དུ་སྦས་སྐབས། གཏེར་ཆེན་བརྒྱ་རྩའི་གཏེར་རྫས་ཤོག་སེར་རིགས་ལྔ། རིལ་བུ་རིགས་ལྔ། ཆོས་སྨན་རིགས་ལྔ། ཚེ་བཅུད་རིགས་ལྔ། གཡང་བཅུད་རིགས་ལྔ། གཞན་ཡང་གཏེར་རྫས་རིགས་མི་འདྲ་བ་སྣ་ཚོགས་གཅིག་ཏུ་བསྡུས་ནས་བཅུད་དུ་དྲིལ་བ་ཡིན་པས་འདི་ཁྱེད་ལ་འབུལ་བས། འབྱུང་བ་བཞིའི་དབྱིངས་སུ་སྦས་ན། དེའི་རིགས་ཀྱི་ནུས་པས་འགྲོ་བ་མང་པོ་གནས་ བྃ༔ ངན་འཁོར་བའི་རྒྱུན་གཅོད་པར་ངེས་སོ། །ཞེས་ཟེར་ནས་མི་སྣང་བར་ཡལ་ལོ། །དེ་ནས་སྦས་དཀར་སྟོང་ཤོང་ཟེར་བའི་ལ་ཐོག་ལ་ཚ་ཕོག་རྒྱབ་ཚེ། དེའི་ཉེ་ས་དེ་ཀར་མཚོ་ཆེན་པོ་འཇིགས་སུ་རུང་བ་ཞིག་འདུག་པས། དེའི་ནང་ན་རང་གཏེར་ནོར་འཛིན་དབང་མོའི་སྒྲུབ་ཐབས་ཁམས་གསུམ་བཅུད་བསྡུས་ཀྱི་སྒྲོམ་ཆུ་བདག་སྦལ་པའི་གཟུགས་འདྲ་བ་ཞིག་གདན་དྲངས་རྒྱུ་འདུག་སྟེ། ཐབས་གྲོགས་མེད་པས་ལོན་ཐབས་ཅི་དགོས་སྙམ་ཚེ། ཨ་ལྕེ་གཉིས་ཐོན་བྱུང་། ཁྱོད་གཉིས་སུ་ཡིན་དྲིས་པས། ཁོང་གཉིས་ན་རེ། ངེད་གཉིས་ཨ་ལགས་དགུ་རུང་སང་གི་མདུན་ནས་འོང་བ་ཡིན་པས། ཡི་གེ་འདི་ཁྱོད་ལ་སྤྲད་དགོས་ཟེར་ནས། བདག་གི་རོགས་པ་རྣམས་ཀྱིས་མི་མཐོང་བར་བྱས་ཏེ་ཡི་གེ་ང་ལ་སྤྲད་བྱུང་། བདག་གིས་ཁ་ཕྱེས་ནས་བལྟས་ཚེ། སྦས་པའི་རྣལ་འབྱོར་ཀ་ར་ཀིརྟའི་ཡི་གེ་རུ་ངོ་ཤེས་ཀྱང་ཅི་ཡང་མ་སྨྲས། དེ་ནས་ཐུབ་བཟང་དཔལ་རྒྱམ་གཉིས་འབྲོང་གི་ཨར་ལེའི་ཁྱུ་ཚོགས་འགྲོ་བ་ལ་བལྟ་རུ་སོང་། གཞན་རྣམས་ཀྱིས་ཇ་སྐོལ་ནས་བསྡད་འདུག །ངེད་མ་བུ་གཉིས་མཚོ་ཁ་ལ་བལྟ་རུ་སོང་ཚེ། མཚོ་དཀྱིལ་ནས་སྦལ་པ་ཁྱི་ཙམ་ཞིག་གི་ཁ་ནང་དུ་གཏེར་སྒྲོམ་བཟུང་སྟེ་ཚུར་ཚུར་མཚོ་མཐར་ཐོན་བྱུང་བས། ང་རང་ཁོ་ཡི་གཟུགས་ལ་འཇིགས་ནས་མཚོ་ནང་དུ་འགྲོ་མ་ཕོད། ཡང་ཁོ་ཡིས་མཚོ་ལ་གཡས་བསྐོར་བྱས་ཏེ། ངའི་སར་ཐོན་བྱུང་སྐབས་གཞན་རྐྱེན་ཞིག་ལ་ལྟོས་ནས། གཏེར་བདག་ཁོ་རང་མཚོ་ནང་མེད་ཐག་གིས་བུད་སོང་མ་ཐག་ནམ་མཁའ་ནས་གློ་བུར་དུ་སྤྲིན་ནག་འཁྲིགས་གེར་འོང་བ་དང་། མཚོ་འཕྱུར་ཞིང་མཚོ་མདོག་དམར་པོར་སོང་འདུག །དེ་ནས་ཁོང་རྣམས་ཀྱིས་ཀྱང་སེར་བ་བབས་འོང་བ་འདྲ་བས་འུ་ཅག་འདུག་འཇོག་དགོས་ཟེར་ཞིང་། གནས་དེ་ཀའི་ཉེ་ཆར་དུ་བསྡད་ཚེ་མི་འདོད་པ་འགའ་རེ་བྱུང་བ་དང་། ཁྱད་པར་ཉིན་ཞག་གཉིས་ཀྱི་བར་དུ་ཐོག་འབྲུག་གློག་གསུམ་གྱི་རྒྱུན་བཟུང་ནས་སྲོག་ལ་འཚེ་བ་འབྱུང་ཉེ་བའི་སྐབས། གཏེར་ཆེན་བདུད་འདུལ་དབང་ཕྱུག་གླིང་པས་ཞལ་གཟིགས་ནས་འདི་སྐད་གསུངས། ཧེ་ཧེ་རིགས་ལྡན་མཛའ་ན་མོ། །དྲན་འཛིན་དབང་སྒོ་གཏོད་ལ་ཉོན། །ཀླུ་བདུད་ཁྲོས་པའི་ཆོ་འཕྲུལ་གྱིས། །མི་འདོད་ལ་ཡོག་སྣ་ཚོགས་སྟོན། །བཟློག་བྱེད་མཁའ་འགྲོ་འཆོལ་བོ་ལོད། །ང་རྒྱལ་གནད་དང་མ་བྲལ་དགོས། །དོམ་ནག་ཐུར་དུ་རྒྱུག་འདྲ་ཡི། །སྣ་མདོར་གར་གྱི་རི་མོ་དགོས། །གཏེར་གྱི་སྲུང་མར་བརྔན་གཏོར་ཕྲིན་ལས་བཅོལ། །བར་ཆད་འཚུབས་མ་ངང་གིས་ཞི་འགྲོ། །འབྲས་བུ་ལྟ་ བྃ༔ བུའི་ཟབ་གཏེར་ཡང་བཅུད། །པདྨའི་སྙིང་ཐིག་གབ་པ་མངོན་ཕྱུང་། །ཌཱཀྐིའི་བརྡབྱང་ཇི་བཞིན་བྱེད་དགོས། །སྨོན་ལོག་ཤྲཱི་ཏ་རེའི་མིང་འཛིན། །ཐབས་ཀྱིས་སྤངས་ན་ལེགས་ཡོན་གསལ་ངེས། །དེ་ལྟར་སྟབས་ལྡན་ལེགས་པར་མེད་ཚེ། །རྟེན་དང་འབྲེལ་འབྱུང་བདུད་ཀྱིས་བསྒྱུར་ནས། །ཁྱོད་ཀྱང་སྔོན་གྱི་ལས་ཀྱིས་བསྐུལ་ཏེ། །ང་ཡི་བསྟན་པ་དེ་ཙམ་ཨེ་ཀོ །ལྷོ་ཕྱོགས་གངས་རིའི་ཁྲོད་ན་གནས་པའི། །ཤེས་ལྡན་ཏིཥྛ་བཛྲ་རྩལ་དང་། །ཐབས་ཤེས་འབྲེལ་ཟབ་ཅུང་ཞིག་ལྡན་ན། །བཞི་ཕྲག་དགུ་ཡི་དུས་སུ། །ཚེ་ཡི་ཉེར་འཚེ་དེས་སེལ །དེ་དང་དེ་སོགས་འབྱུང་འགྱུར། །དུས་དང་དུས་སུ་གསལ་ངེས། །ཞེས་གསུངས་ཏེ་མི་སྣང་བར་གྱུར་ཏོ། །དེ་ནས་བླ་མའི་བཀའ་བཞིན་རིམ་གྲོ་རྣམས་བསྒྲུབས་རྗེས་རྐྱེན་ལས་རིམ་གྱིས་གྲོལ་ནས། གློག་འབྲུག་གི་འཇིགས་པ་ཐམས་ཅད་ངང་གིས་ཞི་བར་བྱུང་ངོ་། །དེའི་སྐབས་སུ་གཏེར་ཁ་དུ་མའི་རྟེན་འབྲེལ་བཏང་སྙོམས་ལ་སོང་ཞིང་། ཁྱད་པར་བྲག་དཀར་སྤྲེལ་རྫོང་གི་ཟབ་གཏེར་མཁའ་འགྲོ་དགོངས་པ་འདུས་པའི་ཆོས་གཏེར་རྣམས་བཏང་སྙོམས་ལ་ལུས། དེའི་སྐབས་གཏེར་སྲུང་དངོས་སུ་འོང་བ་དང་། རྟེན་འབྲེལ་གཞན་རྐྱེན་ལ་ཤོར་བ་རྣམས་དེར་ འདུས་ཀུན་གྱིས་མཐོང་ཆོས་སུ་གྱུར་ཡང་། གནས་དུས་བསོད་ནམས་དམན་པའི་དབང་བཙན་པས་རྟེན་འབྲེལ་བཏང་སྙོམས་ལ་མི་འགྲོ་ཐབས་མེད་པ་ལྟ་བུར་བྱུང་ངོ་། །དེ་ནས་རིམ་གྱིས་མཚལ་སྣག་ཁ་མདོར་ཐོན་ནས་བསངས་གསོལ་དང་བཞུགས་ཁྲི་བཞེངས་པ་སོགས་བྱས། གོ་མཚོན་རི་ཁྲོད་དུ་སྒོ་སྤྲུལ་རིན་པོ་ཆེའི་གསུངས་མཛད་ཟབ་གནད་ཕེབས་པ་དེ་ཀར་ལ་སོང་། དེ་ནས་རྨ་རྒྱལ་དཔོན་གཡོག་གིས་མདའ་ལམ་གོང་མ་བར་དུ་བསྐྱལ་མ་མཛད་པ་དང་། ཁྱད་པར་རྡོ་རྗེ་གྲགས་རྒྱལ་མས་བསྟན་པ་སྤྱིའི་ལུང་བསྟན་དང་། ང་རང་ལ་བསྟོད་པ་བྱས་པ་སོགས་གཏེར་གཞུང་དུ་གསལ་བའོ། །དེ་ནས་རང་ལོ་ཉེར་བདུན་ལོར་གཡུ་རྩེའི་གནས་ནང་དུ་སྒོ་སྤྲུལ་རིན་པོ་ཆེ་སྐུ་མཚམས་ལ་བཞུགས་ཡོད་པ་ཐོས་ཚེ། དེ་ཀ་ངེད་མ་བུ་གཉིས་དང་། སློབ་བུ་ཐུབ་བསྟན་བཟང་པོ་བཅས་སོང་བས། བྱིས་མཚོ་ཞེས་པ་ཆེ་མཆོག་དཔལ་དགུའི་བརྟེན་གནས་ཡིན་པ་སྐྱེས་ཆེན་དུ་མས་རྡོ་རྗེའི་ལུང་དུ་གསལ་བའི་མཚོ་ཆེན་དེའི་ཁར་ཞག་འདུག་བྱས་ནུབ་རྨི་ལམ་ལ་ཀླུ་མོ་སྦྲུལ་གྱི་མཇུག་མ་བྱས་པ་རིན་པོ་ཆེ་སྣ་ཚོགས་ཀྱིས་བརྒྱན་པ་ཞིག་གིས་གནས་གསུམ་མཁའ་འགྲོའི་བླ་རྡོ་ཐིག་བརྒྱ་མ་དང་། ཟངས་སྒྲོམ་དམར་པོ་ཟུར་བརྒྱད་པ་ཞིག་སྦྱིན་པ་རྨིས་ཚེ། ནང་སྔ་ ༤ བཱོ༔ མོར་མགོ་སྔས་སྟེང་དུ་མངོན་སུམ་བཞག་འདུག་པས། ཟངས་སྒྲོམ་ཡང་གཏེར་དུ་སྦས་ནས་གཏེར་སྲུང་རང་ལ་གཉེར་དུ་གཏད་དོ། །དེ་ནས་རིམ་གྱིས་སོང་ནས་གཡུ་རྩེའི་མདུན་ལུང་བར་མ་ན་སྒོ་སྤྲུལ་རིན་པོ་ཆེ་བཞུགས་ཡོད་པ་དེ་ཀར་ཐོན་སོང་བའི་ཚེ། ཁོང་དང་མཇལ་འཕྲད་མཛད་ནས་ཐུགས་བརྩེ་བ་ཆེན་པོས་གསུངས་མཛད་དུ་མ་གནང་། ཁྱད་པར་སྔ་སོར་ཁོང་གི་གསུང་ལྟར། རང་གཏེར་དབྱངས་ཅན་ལྷ་མོའི་སྐུ་དང་། གུ་རུ་ཡབ་ཡུམ་གྱི་བྱང་སེམས་མཁའ་འགྲོའི་བླ་མཚོ་ནས་སྤྱན་དྲངས་པ་དང་། མཚོ་རྒྱལ་དབུ་ལྗོན་ཉག་མ་དང་བཅས་པ་སྐུ་ཚེ་དང་མཛད་ཕྲིན་རྒྱས་པའི་ཕྱིར་དུ་ཕུལ་བས་ཐུགས་ཤིན་ཏུ་མཉེས་ཤིང་འདི་སྐད་གསུངས། ཏ་རེ་དཀར་མོ་རྣམ་པར་རྒྱལ་མ་དང་། །ཡེ་ཤེས་མཚོ་རྒྱལ་ཀུན་དགའ་འབུམ་མ་སོགས། ཌཱཀྐི་བདུན་གྱི་ཕྲིན་ལས་གཅིག་བསྡུས་པ། །བདེ་ཆེན་བདེ་བའི་དབང་ཕྱུག་རྣལ་འབྱོར་མ། །ཁྱེད་འདྲ་བདག་གིས་མངོན་སུམ་མཇལ་བ་འདི། །སྡིག་ཟད་ལས་དག་སྨོན་ལམ་བཟང་པོས་འབྲེལ། །ད་དུང་སྐྱེ་དང་ཚེ་རབས་ཐམས་ཅད་དུ། །འབྲལ་མེད་ཚོམ་བུ་གཅིག་ཏུ་འགྲོགས་པར་ཤོག །ཅེས་གསུངས་ཏེ་ཚོགས་ཀྱི་འཁོར་ལོའི་སྟ་གོན་མཛད་དེ། དེར་འདུས་ཀྱི་བུ་སློབ་ རྣམས་དང་བཅས་པ་ལྷན་དུ་འཚོགས་ནས་ཚོགས་མཆོད་ཕུལ་བ་སོགས་བྱེད་སྐབས། ང་རང་གི་ཉམས་འུར་ནས་སྤྲུལ་པའི་སྐུ་དེ་ཉིད་ལ་སྤྲོས་མེད་དོན་གྱི་དབང་བཞི་དང་། ཁྱད་པར་མཚོ་རྒྱལ་གསང་དབང་ཤེས་རབ་རྩ་འབྱེད་ངོ་སྤྲོད་དང་བཅས་པ་བསྐུར་བས། གནས་ཁང་ཐམས་ཅད་ལ་དྲི་བཟང་གིས་ངད་འཐུལ་ཞིང་སྒྲ་སྒྲགས་པ་དང་། ནམ་མཁའ་ལ་འཇའ་ཚོན་ཤར་བ་སོགས་ངོ་མཚར་བའི་བཀྲ་ལྟས་དུ་མ་མཐོང་ཆོས་སུ་བྱུང་བས། དེར་འདུས་ཐམས་ཅད་ཀྱི་དདགུས་ཀྱི་གསོས་སུ་སྨན་ནོ། །དེ་ནས་མདུན་འཁོར་ཐམས་ཅད་རང་སར་གྱེས་སོང་རྗེས། སྒོ་སྤྲུལ་རིན་པོ་ཆེའི་ཞལ་ནས་འདི་སྐད་གསུངས། ཁྱོད་ད་ལོ་རྟ་ཤུལ་དགོན་དུ་སོང་ལ། གཏེར་སྟོན་གྱི་སྐུ་སྲས་དྲི་མེད་འོད་ཟེར་གྱི་སྐུ་མདུན་ལ་ཐབས་གང་དྲག་ཞིག་གིས་སོང་ལ། ཁྱེད་ཅག་གཉིས་ཀའི་ཐད་ནས་རྟེན་འབྲེལ་མ་འཛོལ་བ་དགོས་པ་འདྲ་མ་གཏོགས། ད་ཕན་ཆད་ལུས་སོང་ནགཉིས་ཀའི་སྐུ་ཚེ་དང་མཛད་ཕྲིན་སོགས་ལ་བར་ཆད་ཆེན་པོ་འདུག་པས་དེ་ལུགས་ཀྱི་སྟབས་གཟབ་དགོས་གསུངས། བདག་གིས་ལགས་ང་རང་གི་ལུང་བསྟན་སྔ་ཕྱི་ཐམས་ཅད་དུ་སྤྲུལ་སྐུ་དྲི་མེད་སང་ཐབས་གྲོགས་ཀྱི་མཆོག་ཡིནཔར་འདྲ་སྙམ་པའི་མཚན་རུས་རིགས་སྐྱེ་བ་ལ་སོགས་པར་ཐམས་ཅད་ བྃ༔ གསལ་པོར་འདུག་ཀྱང་། ཁོང་ཚུལ་བཙུན་པ་དང་། ཉེ་འཁོར་ཕྲག་པ་དོག་པའི་རྐྱེན་དང་། ང་རང་གཟུགས་བྱད་ངན་ཅིང་ཕ་མིང་ས་ཐག་རིང་བ་སོགས་ཀྱི་སྐྱོན་གྱིས་སྟབས་ལྡན་འོང་ཐབས་མ་བྱུང་བ་ཡིན། མིན་ཀྱང་ཁོང་ལྟ་བུའི་གཏེར་ཆེན་ཞིག་དམན་པ་བདག་གི་གྲོགས་སུ་སྨོན་ལམ་ཡོད་ཞུ་མ་ཕོད་ལགས་ཞུས་ཚེ། སྒོ་སྤྲུལ་རིན་པོ་ཆེས་ཁྱོད་རང་གིས་ཐབས་གྲོགས་རེད་ཟེར་མི་དགོས། སྔོན་གྱི་སྨོན་ལམ་ཟབ་འབྲེལ་ཤིན་ཏུ་ཆེ་བའི་དབང་གིས་ཐབས་གྲོགས་དང་། ཆོས་བདག་གཉིས་གང་ཡིན་ཀྱང་སྔོན་འབྲེལ་ཡོད་པས། གཏེར་སྟོན་དེའི་ཚུལ་འདུལ་འཛིན་ནམ། སྔགས་པའམ། ཁྱིམ་པ་ལ་སོགས་པ་གང་གི་སྐུར་བཞེངས་པ་དེའི་མཚན་ཐོས་པ་དང་། ཞལ་མཇལ་བ་དང་གསུང་ཐོས་པ་ཙམ་གྱིས་མོས་གུས་ཚད་མེད་པ་སྐྱེས་ཤིང་གཏེར་སྟོན་དང་གཏེར་ཆོས་གཉིས་ལ་དགའ་དད་ཀྱི་འདུན་པ་ལྡོག་མི་ཐུབ་པ་འབྱུང་བ་རྣམས་ནི། རང་རང་གི་རིགས་དང་ཁྱད་པར་བསོད་ནམས་ལ་བརྟགས་དཔྱདབྱས་ཏེ། གྲོགས་དང་ཆོས་བདག་ཏུ་ངོས་འཛིན་དགོས་གསུངས། དེ་ནས་ཕན་ཚུན་ལུགས་གཉིས་ཀྱི་གསུང་མཛད་དང་། དངོས་རྫས་རིན་ཐང་ཆེ་བ་དུ་མ་གནང་ནས་བདག་རང་གནས་ལ་ལོག་གོ་།དེ་སྐབས་བླ་བྲང་ ཁག་གཉིས་ཀས་ས་ནོག་བྱས་ཏེ། རྒྱལ་སྲས་སང་ངེད་ཅག་དཔོན་གཡོག་ས་ཕུད་ནས་འགྲོ་དགོས་གསུངས་པ་དང་། གཞན་ཡང་དམ་སེལ་ཤུགས་དྲག་པ་ཞིག་གི་རྐྱེན་ལ་ལྟོས་ནས། རྒྱ་རོང་གཏེར་སྨྱོན་གྱི་ཡང་སྲིད་ཞིག་བདག་གི་ལུས་ལ་སྐྱེ་སྲིད་བཟུང་ཡོད་པ་དེ་ལ་འཚེ་ནས་ལུས་བོར་བར་འདོད་སྐབས་འདི་སྐད་ཟེར། ཨ་མ་ད་འུ་ཅག་མ་བུའི་ཚུལ་དུ་གདན་ཐོག་གཅིག་ལ་འཁོད་པའི་སྐལ་བ་ཞན་པ་འདྲ་ན། བདག་དཔལ་རི་ལ་བཞུད་འགྲོ་རན་པས་མ་མ་ཁྱོད་ད་དུང་བསྟན་འགྲོའི་དོན་དུ་ཐུགས་རྒྱ་བསྐྱེད་དགོས་ཟེར། དེ་ཀའི་དུས་བདག་གི་ཤེས་པ་ཡང་སྔར་ལྟར་མ་ཡིན་པར། ཕྱི་འབྱུང་བ་ལྔའི་ཐིམ་རིམ། ནང་ཚོགས་དྲུག་གི་ཡུལ་འཛིན་ལྡོག་པ་སོགས་ཀྱི་རྟགས་མ་ངེས་པ་དུ་མ་ཤར་བས་ཡིད་མ་བདེ་ནས། རྒྱལ་སྲས་སང་ལ་དེ་ལྟར་གྱི་ལོ་རྒྱུས་ཞུས་ཀྱང་བཏང་སྙོམས་མཛད་འདུག །ང་རང་གི་བསམ་པ་ལ་སྔར་བུ་དེས་གཏམ་གཅིག་གཉིས་རེ་མ་གཏོགས་མི་བཤད། ད་ལན་ཁོ་རང་འཇིག་རྟེན་དུ་སྡོད་དབང་མེད་ཟེར་བ་སོགས་གཏམ་དུ་མ་བཤད་འདུག་པས་ན། ཅི་ནས་ཀྱང་མི་འཚོ་ངེས་པ་རེད་སྙམ་ནས་སེལ་མེད་ཀྱི་བདུད་རྩི་ཆོས་སྨན་དང་། སངས་རྒྱས་ཀྱི་རིང་བསྲེལ་ཨ་ཤྭའི་མཆོད་སྡོང་ནས་གདན་དྲངས་པའི་འཇའ་ཟུག་མ། ཤོག་སེར་ཆོས་ཀྱི་རིང་ བྃ༔ བསྲེལ་ལ་སོགས་པའི་དམ་རྫས་མྱོང་གྲོལ་ཁྱད་པར་བ་རྣམས་ཁོ་རང་ལ་དམིགས་ནས་རང་གིས་ཟོས་ཤིང་འདི་སྐད་སྨྲས། སྔོན་སྨོན་ལས་ཀྱིས་བསྡུས་པའི་བུ། །ཁྱོད་འདི་སྣང་མི་གནས་འདས་གྱུར་ན། །གནས་ངན་འཁོར་བར་མ་འཁྱམས་པར། །དཔལ་རི་པད་འབྱུང་ཐུགས་ཀ་རུ། །འདུན་པ་གཏོད་ཅིག་རིགས་ཀྱི་བུ། །ཞེས་སྨྲས་སོ། །དེ་ནས་ལོ་ཁྱིམས་དེ་ཀའི་ཟླ་བ་གསུམ་པའི་ཚེས་ཉེར་བཞིའི་ནུབ་ང་རང་ལ་ནད་རྒྱབ་ནས། ཉེར་ལྔའི་ཉིན་ནང་སྔ་མོ་རྒྱལ་སྲས་ལ་གསོལ་ཇ་དྲངས་རྗེས། སློབ་བུ་ཐུབ་བཟང་ལ་བུ་མོ་བཅོལ་ནས་ཁྱོད་ཀྱིས་ཁོང་ཕ་བུ་ལ་གསོལ་ཇ་རེ་བསྐོལ་རོགས་དང་། དེ་རིང་ཚོགས་འཁོར་ཞིག་བྱེད་དགོས་པས་དེའི་བཅའ་འདོན་སོགས་བྱེད་རོགས་དགོས། ང་རང་ལ་ནད་ཞིག་ཕོག་འདུག་པས་འགྲོ་འདུག་ལས་ཀ་སོགས་བྱེད་མི་ཐུབ་གི། །ད་ལྟ་ཚོགས་ཀྱི་དྲང་བའི་སྐབས་ང་རང་ལ་ཚོགས་སྐལ་འོང་མི་ཉན་སྨྲས་ནས།ཁོ་རང་ལ་ཚོགས་ཀྱི་ཡོ་བྱད་རྣམས་གཏད། དེ་ནས་ཉི་མ་ཤར་བ་དང་དུས་མཉམ་དུ་ང་རང་གི་ལྟེ་བའི་ནང་ནས་ཕྱི་རྒྱ་མ་རལ་པར་བུ་ཚེ་དུས་འདས་སོང་བས། བདག་གི་བསམ་པ་ལ་ད་ནི་རླུང་གི་ནུས་པ་ལ་རེ་མ་བཅས་ན་སྨན་དཔྱད་རིམ་གྲོ་ཁོང་གིས་མི་མཛད། གལ་ཏེ་དེ་ལྟར་མཛད་ཀྱང་ བུའི་རོ་ལྟོ་བ་ནས་ལོན་མི་འོང་སྙམ་ནས། རླུང་གི་རྣལ་འབྱོར་ཁོ་ན་ལ་འབད་པས་ལན་རེ་ནད་ཤུགས་དྲགས་པའི་སྟོབས་ཀྱིས་དྲན་པ་ཉམས་ལ་ཁད་པ་བྱེད། ལན་རེ་བུའི་རོ་རླུང་གིས་བསྐྱོད་ནས་ལྟོ་བའི་སྟོད་སྨད་གཡས་གཡོན་རྣམས་སུ་ཤོག་སྐྱ་རླུང་གིས་དེད་པ་བཞིན་འགུལ་སྤྱོད་བྱེད་ཅིང་འདུག་པ་ལ་བྱ་ཐབས་བྲལ་ནས། ལྟ་སྒོམ་གྱི་མེ་བཙའ་ནད་ལ་བཞག་ནས་རླུང་རིག་གཡོ་མེད་དུ་མཉམ་པར་བཞག་སྟེ། རང་ལ་གསལ་འདེབས་ཀྱི་གླུ་འདི་བླངས་པ་སྐྱབས་གནས་ཀུན་འདུས་ཨོ་རྒྱན་རྗེ། །འབྲལ་མེད་བདེ་ཆེན་འཁོར་ལོར་བཞུགས། །བདག་རྒྱུད་བྱིན་གྱིས་བརླབ་ཏུ་གསོལ། །རྐྱེན་སྣང་གྲོལ་བར་མཛད་དུ་གསོལ། །གཏད་མེད་རྒྱ་ཡན་ལྟ་བའི་ངང་། །འཛིན་མེད་རང་གསལ་སྒོམ་པའི་བབ། །རེ་དོགས་བྲལ་བ་སྤྱོད་པའི་གནད། །དེ་གསུམ་གནད་ཐོག་མེ་བཙའ་ཡིན། །གཟེར་ཆེན་ཆོས་སྐུའི་ཡེ་ཤེས་རྩལ། །མཉམ་པ་ཉིད་ཀྱི་གདམས་པར་མཐོང་། །གཟེར་འབྲིང་ལོངས་སྐུའི་ཡེ་ཤེས་རྩལ། །གསལ་སྟོང་འཛིན་མེད་འོད་གསལ་མཐོང་། །གཟེར་ཆུང་སྤྲུལ་པའི་ཡེ་ཤེས་ངང་། །ཤར་གྲོལ་དགོངས་པའི་མཚན་ཉིད་མཐོང་། །དེ་གསུམ་ནད་ཀྱི་སྨན་དཔྱད་ལགས། །སྒྱུ་ལུས་འབྱུང་འདུས་ལྟོ་བ་རུ། །སྒྱུ་མའི་བུ་ཡི་ བྃ༔ གདོས་པ་ལུས། །སྒྱུ་འཕྲུལ་རླུང་གིས་དྲྭ་བ་ཡིས། །མཁའ་གསང་སྲིད་པའི་ལམ་ནས་དྲོངས། །ཞེས་སྨྲས་ཏེ་དྲག་རླུང་འབྱུང་བ་རུ་ལོག་ཞིག་བཟུང་ནས་ལུས་གནད་གཅུན་ཏེ་བསྡོད་པས། དེ་མ་ཐག་པར་བུའི་རོ་མགོ་མཇུག་མ་ལོག་པར་གླང་ཆེན་ཉལ་སྟབས་ཀྱི་ཚུལ་དུ་མཁའ་གསང་ནས་ཐོན་ཐུབ་པར་བྱུང་ངོ་། །ལུས་ཀྱི་མདངས་མ་ཉམས་ཤིང་མངལ་གྲིབ་དང་བྲལ་བ་དཀར་ལ་དམར་བའི་མདངས་ཆགས་པ་ཟིལ་པ་ཁྲོམ་མེར་འདུག་པས། བདག་གིས་འདི་ཤི་བ་མིན་ནམ་དྲན་པ་ཉམས་པ་ཨེ་ཡིན་སྙམ་ནས་ལྟེ་ཐག་བཅད་པས་ནང་ཐམས་ཅད་ཁམས་དཀར་དམར་གྱིས་གང་ནས། དཔེར་ན་རྒྱུ་མ་བཙོས་པ་ལྟར་འགྲེངས་འདུག་པས་ཤི་བ་ཡིན་པ་ཐག་ཆོད་པར་བྱུང་ནས་རིམ་གྱིས་ཐུབ་བཟང་དང་། རྒྱལ་སྲས་སང་ལ་བུ་ཆུང་ཤི་བའི་ལོ་རྒྱུས་ཞུས་ཚེ། ཁོང་རྣམ་གཉིས་ནས་ཐུགས་ཆུང་མཛད་ཅིང་འགྱོད་པ་ཆེན་པོ་བྱེད་འདུག་པས། བདག་གིས་ཁྱེད་རྣམ་གཉིས་ཀྱིས་དེ་ལྟར་མ་མཛད། སྔར་བྱ་བ་འདི་འདྲ་མ་འོང་བའི་གོང་ལ་བསྲུང་བ་རིམ་གྲོ་སོགས་དགོས་ཞུས་ཀྱང་། མི་དང་རྒྱུ་གཉིས་གདམས་ཁ་ནོར་ནས་བསྲུང་རིམ་མ་ནུས་པ་ཡིན། ད་མི་རྟག་པ་ཐོག་ཏུ་ཐོན་ཚར་སྟེང་བྱེད་རྒྱུ་ཅི་ཡང་མེད་པ་ཡིན་པས་ན་ཐུགས་ངལ་མཛད་དགོས་ ཅི་ལ་ཡོད། བུ་ཆུང་ལ་ངེས་པར་བརྩེ་བ་ཡིན་ན་ཁོ་ལ་མཁོ་བ་ཆོས་ཡིན་པས་རྒྱུ་རྫས་བློས་ཅི་ཐོངས་གི་ཆོས་དགེ་རེ་མཛད་ན་ཐོབ་ལོས་ཡིན་ཞུས། དེ་ནས་སྲས་རྒྱལ་བ་དོན་འགྲུབ་ཀྱི་རྣམ་སྤྲུལ་དབོན་རིག་འཛིན་སང་གདན་དྲངས་ནས་རྟ་ཕོ་ཞིག་ཕུལ། བདུན་གཅིག་གི་བར་དུ་རྒྱལ་སྲས་སང་དང་། ཐུབ་བཟང་གཉིས་ཀྱིས་ཐུགས་ཆེན་ལྷ་ལྔའི་སྒོ་ནས་ཁྲུས་ཆོག་མཛད། ང་རང་ལ་ཡོན་བདག་དད་ལྡན་རྣམས་ཀྱིས་ཟས་གོས་ཀྱི་རྟེན་བྱིན་པའི་རྒྱུ་རྫས་དང་། ཁྱད་པར་སྒོ་སྤྲུལ་རིན་པོ་ཆེའི་གནང་སྦྱིན་མཛད་པའི་གོས་ཕྲུག་རས་དར་ལ་སོགས་པ་ཅི་ཡོད་ཐམས་ཅད་ཁོ་ཡི་དགེ་རྩར་བཏང་ནས་ཞག་ཞེ་དགུའི་བར་དུ་གང་ཤེས་ཀྱི་བསྔོ་སྨོན་ཁྲུས་ཆོག་སོགས་བྱས་ཚེ། ཡོན་བདག་ང་རང་ལ་སེམས་དཀར་བ་རྣམས་ཀྱིས་མར་མེའི་རྟེན་དང་སེམས་གསོས་བྱེད། རང་ལ་མི་དགའ་བ་རྣམས་དང་། མགར་ར་སང་གི་དུད་ཁྱིམ་གསུམ་མ་གཏོགས་ཐམས་ཅད་ཀྱིས་དགའ་བ་བསྒོམས་ནས་འདི་སྐད་ཟེར་འདུག །མ་ངན་མ་བུས་རྒྱན་ཟེར་བའི་དཔེ་ཡོད་ཀྱང་། དབུས་མོ་བསོད་ཟད་ཡིན་པས་བུ་འཆི་སོང་། ད་དུང་མོ་རང་ལ་མགོ་ལོག་གཟའ་དང་། རྒྱལ་སྲས་གཉིས་ཀྱིས་སྡུག་ཅི་འདྲ་མི་གཏད། མོ་རང་གིས་བུའི་རོ་མགོ་མཇུག་མ་ལོག་པར་ངོ་མཐོང་ཟེར་བ་དང་། བྃ༔ ལྟོ་བའི་ནང་ནས་བུ་ཤི་བ་ཡིན་ཟེར་རྒྱུ་ཐམས་ཅད་རྫུན་ངེས་པ་རེད། འབྲིའི་ལྟོ་བར་བེའུ་ཤི་སོང་བ་རྣམས་ཀྱང་མ་བུ་ལྷན་དུ་འཆི་འགྲོ་བ་མཐོང་ཆོས་སུ་འདུག་ན། མའི་ལྟོ་བར་བུའི་རོ་མེད་དུ་ནི་མ་སོང་། མོ་རང་ནི་མ་ཤི་བར་འདུག་པས། བུའི་རོ་ཕྱིར་ལོན་ཐབས་གཏན་ནས་མེད་ཟེར་ཞིང་ཀུན་གྱིས་རྩོད་གཞིའི་དཔེ་རུ་བྱེད་འདུག་ཀྱང་། རང་གི་ཚོགས་ངན་བྱས་ན་བུ་ཆུང་གི་ས་ལམ་ལ་གནོད་འགྲོ་སྙམ་ནས་བཏང་སྙོམས་ལ་བཞག་གོ། །དེ་ནས་ལོ་ཁྱིམས་དེ་ཀའི་ཟླ་བ་ལྔ་པའི་ཡར་ཚེས་ལ་གཡས་རུའི་ཆོས་སྒར་སྟེང་དུ་སྒར་གཞི་བཅག་ནས་འགྲོ་གྲབ་བྱེད་སྐབས། ང་རང་གིས་བསམ་བཟང་ཁོ་ནས་བླ་བྲང་ཁག་གཉིས་ཀའི་ས་གྱོད་འགྲིགས་ཐབས་ལ་ཤིན་ཏུ་འབད་ཀྱང་དོན་མ་འགྲུབ་ནས། ངེད་དཔོན་གཡོག་ཐམས་ཅད་གཡས་རུའི་ཆོས་སྒར་ལ་ཕེབས། དེ་ན་རྒྱལ་སྲས་ཀྱི་སྐུ་ནུས་འཇིགས་མེད་དཀོན་མཆོག་བཞུགས་ཡོད་པས། དེས་ངེད་ཅག་ལ་འདུག་སའི་ལྷས་མལ་སོགས་ཀྱི་མཐུན་རྐྱེན་བསྒྲུབས་པ་དང་། ཁྱདཔར་གནས་ནང་ནས་སྒོ་སྤྲུལ་རིན་པོ་ཆེས་གསུང་ཤོག་བསྐུར་ནས། སྦྲ་ཁྱིམ་དང་ཁལ་རྟ་བཅོས་པའི་མཐུན་རྐྱེན་མཛད་དོ། །དེའི་སྐབས་མཁར་ནང་འགབ་མའི་མགར་སྐོར་གྱི་ནང་ནས་ང་རང་གི་ཡུལ་པ་ལྟ་བུའི་ དུད་ཁྱིམ་ཞིག་ལ་བླ་མ་བློ་ཆོས་སང་ཞེས་པ་ཡོད་པས་དེ་ཀས་ང་རང་བསུ་བ་ལ་ཐོན་བྱུང་། ངེད་མ་བུ་གཉིས་དང་། ཐུབ་བཟང་བཅས་ཁོང་གི་སར་སོང་སྐབས་ཐག་རིང་མིན་ཉེ་མིན་གྱི་གནས་ནཻ་གྲོ་རྡོ་རྗེ་རྫོངབྱ་བར་སྤྲུལ་སྐུ་ཡིད་བཞིན་ནོར་བུ་སང་སྐུ་མཚམས་ལ་བཞུགས་ཡོད་པས། དེ་ཀར་མཁའ་འགྲོའི་ལུང་གིས་བསྐུལ་བ་དང་། སྔར་སྒོ་སྤྲུལ་སང་གི་བཀའ་གསུངས་རྣམས་ལ་གཞི་བཅས་ནས་རྟེན་འབྲེལ་དོན་ལྡན་རེ་ཨེ་འབྱུང་སྙམ་ནས། བློ་ཆོས་ཀྱིས་ལམ་ཁྲིད་བྱས་ཏེ་ངེད་མ་བུ་དེ་ཀར་སོང་བས། ཐོག་མར་མཁྱེན་སྤྲུལ་རིན་པོ་ཆེའི་སྐུ་སྲས་སྤྲུལ་པའི་སྐུ་རིག་འཛིན་ཀུན་བཟང་ཉི་མ་དང་མཇལ་བས། ཁོང་ལ་སྐུ་མདུན་དུ་ཨེ་ཚུད་ཞུས་པས། ཁོང་གི་ཞལ་ནས་གཞན་སུ་མི་ཆུད་པ་ཡིན་ཀྱང་། ཁྱོད་དཔོན་གཡོག་ལོས་ཆུད། ད་ལྟ་ཐུན་གྲོལ་རྗེས་བརྡ་བྱེད་དུ་འོང་གསུངས། ངེད་རྣམས་ཕར་ངོས་ཆུ་འགོ་ཞིག་འདུག་པ་དེ་ཀའི་ཐད་དུ་སྡོད་གྲབ་བྱས་ཏེ། བློ་ཆོས་དང་། ཐུབ་བཟང་གཉིས་ཀྱིས་གུར་ཕུབ་ཀྱིན་འདུག །ངེད་མ་བུ་གཉིས་ཕར་མེ་ཏོག་མང་པོ་སྐྱེས་ཡོད་སར་སོང་ནས་བསྡད་ཡོད་སྐབས།